ପଞ୍ଚାୟତ ସମିତି ବୈଠକରେ ଦୁଇ ନେତା ହାତାହାତି ; ବିଧାୟକ ନୀରବ ଦ୍ରଷ୍ଟା…!
ଏଥର ସମ୍ଭାଳ (ଗୁଣପୁର) – ନିଜ ନିଜ ର କର୍ତ୍ତବ୍ୟ ଭୁଲି ଗଲେ ନିର୍ବାଚିତ ପ୍ରତିନିଧି । ପିଲାଙ୍କ ଭଳି ହେଲେ ମାରପିଟ । ପଞ୍ଚାୟତ ସମିତି ବୈଠକରେ ହାତାହାତି ହୋଇଛନ୍ତି ଦୁଇ ନେତା । ଏଭଳି ଦେଖିବାକୁ ମିଳିଛି ଗୁଣପୁର ପଞ୍ଚାୟତ ସମିତି ବୈଠକରେ ।
ବୈଠକ ଚାଲିଥିବାବେଳେ ବୈଠକରେ କୋରମ ଅଭାବର ପ୍ରସଙ୍ଗକୁ ନେଇ ସମିତି ସଭ୍ୟ ଓ ଜିଲ୍ଲା ପରିଷଦ ସଦସ୍ୟ ହାତାହାତି ହୋଇଛନ୍ତି । ବୈଠକରେ ପଞ୍ଚାୟତ ସମିତିର ୨୦ ଟି ଗ୍ରାମପଞ୍ଚାୟତରୁ ୫ ଟି ସମିତି ସଭ୍ୟ ଓ ୩ ଟି ସରପଞ୍ଚ ଉପସ୍ଥିତ ଥିଲେ । ଏହାକୁ ନେଇ ଘନାନ୍ତ୍ରୀ ସମିତି ସଭ୍ୟ ଶ୍ରୀଧର ଶବର ଆବଶ୍ୟକ କୋରମ ନ ଥାଇ ବୈଠକ କେମିତି ଚାଲିଛି ବୋଲି ପ୍ରଶ୍ନ କରୁଥିଲେ । ତେବେ ଗୁଣପୁର ଜିଲ୍ଲା ପରିଷଦ ସଦସ୍ୟ ତଥା ବିଜେଡି ନେତା ଅଶ୍ବିନୀ ଗମାଙ୍ଗ ଶ୍ରୀଧରଙ୍କୁ ପାଟି ବନ୍ଦ କରିବାକୁ ତାଗିଦ କରିବାରୁ ଉଭୟଙ୍କ ମଧ୍ୟରେ କଥା କଟାକଟି ହୋଇଥିଲା । ପରେ ଅଶ୍ବିନୀ ନିଜ ସ୍ଥାନରୁ ଉଠି ଶ୍ରୀଧରଙ୍କ ପାଖକୁ ଆସିବାରୁ ଦୁହେଁ ହାତାହାତି ହୋଇଥିବା ଜଣାପଡ଼ିଛି । ଏହାକୁ ଦେଖି ବିଡିଓ କୋରମ ଅଭାବରୁ ବୈଠକକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ କରିଛନ୍ତି ।
ବୈଠକରେ ଗୁଣପୁର ବିଧାୟକ ରଘୁନାଥ ଗମାଙ୍ଗ , ଅଧ୍ୟକ୍ଷା ଦେବକୀ ଗମାଙ୍ଗ , ବିଡିଓ ଅଗସ୍ଥି ପ୍ରଧାନ, ସହକାରୀ ଯନ୍ତ୍ରୀ ଦୂର୍ଯ୍ୟଧନ ଯାନୀ ପ୍ରମୁଖ ଉପସ୍ଥିତ ଥିଲେ ।
ବିଧାୟକଙ୍କ ଉପସ୍ଥିତ ରେ ଏଭଳି ତୁମୁଳ କାଣ୍ଡ ଘଟିଥିଲେ ମଧ୍ୟ ଏଥି ପ୍ରତି ବିଧାୟକଙ୍କ ନୀରବ ଦ୍ରଷ୍ଟା ସାଧାରଣ ରେ ଅନେକ ପ୍ରଶ୍ନବାଚୀ ସୃଷ୍ଟି କରିଛି। ବର୍ତ୍ତମାନ୍ ସୁଦ୍ଧା ଏନେଇ ପୋଲିସ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ସୂଚନା ମିଳିଛି।