ବନ୍ଦକୁ ଓଡ଼ିଶାବାସୀ ଖାରଜ କରିଛନ୍ତି : ବିଜେପି
ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର): କଂଗ୍ରେସ ଏବଂ ବାମପନ୍ଥୀଙ୍କ ‘ଭାରତ ବନ୍ଦ’ ଆଜି ସମ୍ପୂର୍ଣ୍ଣ ଭାବେ ବିଫଳ ହୋଇଛି ଓ ଓଡ଼ିଶାବାସୀ ଏହାକୁ ସମ୍ପୂର୍ଣ୍ଣ ଖାରଜ କରିଛନ୍ତି ବୋଲି ବିଜେପି କହିଛି।
ରାଜ୍ୟ ବିଜେପି ଉପସଭାପତି ସମୀର ମହାନ୍ତି ଆଜି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଆଜି ରାଜ୍ୟରେ ଜୀବନଯାତ୍ରା ପୁରା ସ୍ୱାଭାବିକ ରହିଥିଲା। କଂଗ୍ରେସ ବନ୍ଦ ସମୟରେ ହିଂସା ସୃଷ୍ଟି କରେ। ଏହାକୁ ଦୃଷ୍ଟିରେ ରଖି କିଛି ସ୍ଥାନରେ ଦୋକାନ ବଜାର ବନ୍ଦ ଥିଲା। ରାଜଧାନୀ ଭୁବନେଶ୍ୱର, କଟକ ସମେତ ସବୁ ବଡ଼ ସହରରେ ଲୋକମାନେ ଏହି ବନ୍ଦକୁ ପ୍ରତ୍ୟାଖାନ କରିଛନ୍ତି।
ଶ୍ରୀ ମହାନ୍ତି କହିଛନ୍ତି ଯେ, ଦେଶର ଜନତା ଉଭୟ ବାମପନ୍ଥୀ ଓ କଂଗ୍ରେସକୁ ନିର୍ବାଚନୀ ମଇଦାନରେ ପ୍ରତ୍ୟାଖାନ କରିଛନ୍ତିା ସାରା ଦେଶ ଆଜି ମୋଦିଙ୍କ ବିକାଶରେ ସାମିଲ ହୋଇଛିା କଂଗ୍ରେସ ଓ ବାମପନ୍ଥୀ ମାନଙ୍କର ଏହି ବନ୍ଦ ପାଳନ ସେମାନଙ୍କର ହତାଶାଭାବକୁ ଦେଖାଉଛି। ମାତ୍ର ୬ ମାସରେ କେନ୍ଦ୍ରରେ ନରେନ୍ଦ୍ର ମୋଦିଙ୍କର ସରକାର ରାଷ୍ଟ୍ରହିତରେ ଅନେକ ପଦକ୍ଷେପ ନେଇଛନ୍ତିା ଧାରା ୩୭୦ର ଉଚ୍ଛେଦ, ନାଗରିକ ଆଇନରେ ସଂଶୋଧନ ଭଳି ଐତିହାସିକ ପଦକ୍ଷେପ ବାମପନ୍ଥୀ ଓ କଂଗ୍ରେସର ନିଦ ହଜାଇ ଦେଇଛି। ଦେଶରେ ବାମପନ୍ଥୀ ଓ କଂଗ୍ରେସର ବିଚାରାଧାରକୁ ଲୋକମାନେ ପ୍ରତ୍ୟାଖାନ କରିଛନ୍ତି। କେବଳ ନିଜର ପରିଚୟ ବଞ୍ଚାଇବା ପାଇଁ ସେମାନଙ୍କର ଏହି ବନ୍ଦ ପାଳନ ଥିଲା ଯାହାକୁ ଲୋକମାନେ ବୁଝିପାରିଛନ୍ତିା ଯେଉଁମାନେ ଭାରତ ବନ୍ଦ କରୁଛନ୍ତି ସେମାନେ କାହିଁକି ବନ୍ଦ କରୁଛନ୍ତି ତାହା ସେମାନେ ସ୍ପଷ୍ଟ କରିପାରୁନାହାନ୍ତି।
ଏହାଦ୍ୱାରା ଶ୍ରମିକ ମାନଙ୍କର କ’ଣ କ୍ଷତି ହେବ ତାହା ସେମାନେ ବୁଝାଇବାରେ ଅକ୍ଷମ । ଅଣସଂଗଠିତ ଶ୍ରମିକମାନଙ୍କର ପେନସନ୍ ପାଇଁ ଆଗରୁ କୌଣସି ସରକାର ଚିନ୍ତା କରିନଥିଲୋ ନରେନ୍ଦ୍ର ମୋଦିଙ୍କର ସରକାର ପ୍ରଧାନମନ୍ତ୍ରୀ ଶ୍ରମ ଯୋଗୀ ମାନ ଧନ ଯୋଜନା ଅଧିନରେ ଶ୍ରମିକ ମାନଙ୍କ ପାଇଁ ପେନସନର ବ୍ୟବସ୍ଥା କଲେ। ମାସକୁ ଅତିକମରେ ୩୦୦୦ ଟଙ୍କାର ପେନସନର ବ୍ୟବସ୍ଥା କରିଛନ୍ତି। କେବଳ ସେତିକି ନୁହେଁ ମୋଦି ସରକାର ପ୍ରୋଭିଡେଟ୍ ଫଣ୍ଡରେ ସୁଧାର ଆଣି ଏହାକୁ ଶ୍ରମିକ କଲ୍ୟାଣ ଅଭିମୁଖୀ କରିଛନ୍ତି ବୋଲି ଶ୍ରୀ ମହାନ୍ତି କହିଛନ୍ତି।
ଏହି ଅବସରରେ ବିଜେପି ରାଜ୍ୟ ମୁଖପାତ୍ର ଗୋଲକ ମହାପାତ୍ର ଏବଂ ରାଜ୍ୟ ଯୁବମୋର୍ଚ୍ଚା ସଭାପତି ଟଙ୍କଧର ତ୍ରିପାଠୀ ପ୍ରମ୍ରୁଖ ଉପସ୍ଥିତ ଥିଲେ ।