ପାଣିଟାଙ୍କି ଦ୍ଵାରା ଜଳ ଯୋଗାଣ…!
!!! ରାୟଗଡା ଜିଲ୍ଲା ରୁ ପ୍ରତିନିଧି ପି॰ଦିଲ୍ଲୀପ କୁମାର ଙ୍କ ରିପୋର୍ଟ !!!
ଏଥର ସମ୍ଭାଳ(କଲ୍ୟାଣସିଂହପୁର)- ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ର ବିଭିନ୍ନ ସାହିରେ ପାନୀୟ ଜଳ ପାଇଁ ନଳକୂପ ଖନନ କରାଯାଇନି।ତେଣୁ ସାହିବାସିନ୍ଦା ଦୀର୍ଘ ବର୍ଷ ହେଲା ନଦୀର ଦୂଷିତ ପାଣି ପିଇ ଆସୁଛନ୍ତି।ଏହାକୁ ଦୃଷ୍ଟିରେ ରଖି ଜଣେ ବ୍ୟକ୍ତି ଟାଙ୍କି ଯୋଗେ ସାହିବାସିନ୍ଦାଙ୍କୁ ସପ୍ତାହକୁ ଦୁଇଥର ପାଣି ଯୋଗାଉଛନ୍ତି।ବାକିଟି ସାହିରେ ୧୫ପରିବାର ଦୀର୍ଘ ବର୍ଷ ହେଲା ରହି ଆସୁଛନ୍ତି।କିନ୍ତୁ ସାହିରେ ପ୍ରଶାସନ ପକ୍ଷରୁ ନଳକୂପଟିଏ ମଧ୍ୟ ଖନନ କରାଯାଇନି। ତେଣୁ ବାଧ୍ୟ ହୋଇ ସାହିବାସିନ୍ଦା ନିକଟସ୍ଥ କଲ୍ୟାଣ ନଦୀର ଦୂଷିତପାଣି ପିଉଥିଲେ।ଏହାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ବଡ଼ଦ୍ୱାର ସାହିରୁ ପାଇପ୍ ଯୋଗେ ସାହିବାସିନ୍ଦାଙ୍କୁ ପାନୀୟ ଜଳ ଯୋଗାଇ ଦିଆଯାଉଥିଲା।ତେବେ ଏହା ମଧ୍ୟ ଦୁଇ ବର୍ଷ ହେଲା ବନ୍ଦ ହୋଇ ଯାଇଥିବାରୁ ସାହିବାସିନ୍ଦା ପାଣି ପାଇଁ ହନ୍ତସନ୍ତ ହେଉଛନ୍ତି।ପଞ୍ଚାୟତ ଠାରୁ ବ୍ଲକ କାର୍ଯ୍ୟାଳୟ ପର୍ଯ୍ୟନ୍ତ ଗୁହାରି କଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି।
ଏଭଳି ପରିସ୍ଥିତିରେ ବଡ଼ଦ୍ଵାର ସାହିର ବଦାନ୍ୟ ବ୍ୟକ୍ତି କାଳିଆମଣି ଭତ୍ରା ନିଜସ୍ୱ ଉଦ୍ୟମରେ ଏକ ଟ୍ରାକ୍ଟରରେ ଟାଙ୍କି ଲଗାଇ ଦୁଇ ଦିନକୁ ଥରେ ପାଣି ଯୋଗାଉଥିବା ସାହିବାସିନ୍ଦା ପ୍ରକାଶ କରିଛନ୍ତି। କାଳିଆମଣିଙ୍କ ଏଭଳି ଉଦ୍ୟମକୁ ଅଞ୍ଚଳରେ ବେଶ୍ ପ୍ରସଂସା କରାଯାଇଛି। ପାନୀୟ ଜଳ ସମସ୍ୟା ନେଇ ସାହିବାସିନ୍ଦା ବିଡିଓଙ୍କୁ ଲିଖି ଭାବେ ଜଣାଇବା ପରେ ଆର.ଡବ୍ଲ.ଏସ.ଏସ ଯନ୍ତ୍ରୀ ବାକିଟି ସାହିରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ। କିନ୍ତୁ ଏହାପରେ ବି ସାହିରେ ପାନୀୟ ଜଳ ବ୍ୟବସ୍ଥା କରାଯାଉ ନଥିବାରୁ ସାହିବାସିନ୍ଦା ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ଏଥିସହ ଜନପ୍ରତିନିଧି ମଧ୍ୟ ପାନୀୟ ଜଳ ସମସ୍ୟା ପ୍ରତି ଗୁରୁତ୍ଵ ଦେଉ ନଥିବା ସାହିବାସିନ୍ଦା ଅଭିଯୋଗ କରିଛନ୍ତି।ତୁରନ୍ତ ସାହିରେ ନଳକୂପ ଖନନ କରିବା ସହ ବଡ଼ଦ୍ୱାର ସାହିରୁ ପୁଣି ଥରେ ପାଇପ୍ ସଂଯୋଗ ଦେଇ ଜଳଯୋଗାଣ କରିବା ଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେବାକୁ ସାହିବାସିନ୍ଦା ଦାବି କରିଛନ୍ତି।