୩ବର୍ଷ ହେଲା ସରୁନି ଅମ୍ଲାଭଟ୍ଟା ଚାଟିକଣା ରାଜରାସ୍ତା କାମ…!
!!! ରାୟଗଡା ରୁ ଜିଲ୍ଲା ପ୍ରତିନିଧି ପି॰ଦିଲ୍ଲୀପ କୁମାର ଙ୍କ ରିପୋର୍ଟ !!!
ଏଥର ସମ୍ଭାଳ(ରାୟଗଡା)- ୩ ମାସରେ କାମ ସାରିବାକୁ ଚୁକ୍ତି ହୋଇଥିଲା କିନ୍ତୁ ଇତି ମଧ୍ୟରେ ବିତିଗଲାଣି ୩ ବର୍ଷ।ଅଥଚ କାମ ସରିପାରୁନାହିଁ।ଅଧପନ୍ତରିଆ କାମ ପାଇଁ ସିଂହଭାଗ ରାସ୍ତାରେ ପିଚୁ କମ୍ ମାଟି ବେଶି ଥିବାରୁ ପ୍ରତିଦିନ ଘଟୁଛି ଦୁର୍ଘଟଣା। ଯେଉଁଥି ପାଇଁ ସାଧାରଣ ଲୋକଙ୍କ ଧନ ଜୀବନ ନଷ୍ଟ ହେବା ସହ ଏହି ରାସ୍ତା ଉପରେ ନିର୍ଭର କରୁଥିବା ୪ ବ୍ଲକବାସୀ ଯାତାୟତରେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି।୫ନଂ ରାଜ୍ୟ ରାଜପଥର ଅମ୍ଲାଭଟ୍ଟା ଛକରୁ ଚାଟିକଣା ପର୍ଯ୍ୟନ୍ତ ୨୮.୬୮୦ କିମି ରାସ୍ତା ନିର୍ମାଣ ପାଇଁ ୨୦୧୯ ମସିହାରେ ପୂର୍ତ୍ତ ବିଭାଗ-୧ ଟେଣ୍ଡର ଡାକିଥିଲା।୧୨. ୬୦ ପ୍ରତିଶତ ଲେସରେ ଭବାନୀପାଟଣାର ବିନୋଦିନୀ ଇନଫ୍ରା ପ୍ରାଇଭେଟ୍ ଲିମିଟେଡ୍ ରାସ୍ତା ନିର୍ମାଣ ପାଇଁ ଟେଣ୍ଡର ହାତେଇଥିଲା।୧୧ କୋଟି ୩୪ ଲକ୍ଷ ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ରାସ୍ତା କାମ ୩ ମାସର ଅବଧି ମଧ୍ୟରେ ଶେଷ କରିବାକୁ ଠିକା ସଂସ୍ଥା ୨୦୧୯ ଜୁଲାଇ ମାସରେ ଚୁକ୍ତି କରିଥିଲା।୨୦୧୯ ନଭେମ୍ବର ସୁଦ୍ଧା କାମ ସାରି ଡିସେମ୍ବରରେ ରାସ୍ତା ପୂର୍ତ୍ତ ବିଭାଗକୁ ହସ୍ତାନ୍ତର କରିବାକୁ ଚୁକ୍ତିରେ ଉଲ୍ଲେଖ ରହିଛି।ହେଲେ ୩ ମାସ ବଦଳରେ ୩ ବର୍ଷ ବିତି ଯାଇଥିଲେ ସୁଦ୍ଧା ରାସ୍ତା ନିର୍ମାଣ ଶେଷ ହୋଇପାରୁନି।ବିଭିନ୍ନ କାରଣ ଦର୍ଶାଇ ଠିକା ସଂସ୍ଥା ପୂର୍ତ୍ତ ବିଭାଗକୁ ଠକି ଚାଲିଥିଲେ ମଧ୍ୟ ଠିକା ସଂସ୍ଥା ବିରୁଦ୍ଧରେ ଆଜି ସୁଦ୍ଧା କୌଣସି କାର୍ଯ୍ୟାନୁଷ୍ଠାନ ଗ୍ରହଣ ହୋଇନି।ପୂର୍ତ୍ତ ବିଭାଗ ଯନ୍ତ୍ରୀ ଠିକାଦାରଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁ ବିଭାଗ ପକ୍ଷରୁ ନିର୍ମାଣ କାମ ଶେଷ କରିବାକୁ ତାରିଖ ପରେ ତାରିଖ ଅଫର୍ କରାଯାଉଛି ଠିକା ସଂସ୍ଥାକୁ।ଏହା ସତ୍ତ୍ବେ ରାସ୍ତା ନିର୍ମାଣ ଆରମ୍ଭ ହୋଇପାରୁନାହିଁ।୨୮ କିମି ରାସ୍ତା ମଧ୍ୟରୁ ୧୬ କିମି ରାସ୍ତା ୱାନ୍ ଲେୟାର ହୋଇଥିବା ବେଳେ ମାତ୍ର ୫ରୁ ୬ କିମି ରାସ୍ତା ଡବଲ୍ ଲେୟାର ହୋଇଛି।
ସ୍ଥାନୀୟ ଲୋକ ଓ ଜନ ପ୍ରତିନିଧୀଙ୍କ ଅସନ୍ତୋଷ ପରେ କିଛି ମାସ ତଳେ ଠିକାସଂସ୍ଥାକୁ ଉପରିସ୍ଥ ଅଧିକାରୀ ତାଗିଦ୍ କରିଥିଲେ।ଏପରିକି ଠିକା ସଂସ୍ଥା ମନମୁଖୀ କାର୍ଯ୍ୟ କରୁଥିବାରୁ କଳା ତାଲିକାଭୁକ୍ତ କରିବା ସହ କାମ ପାଇଁ ପୁଣି ଟେଣ୍ଡର ଆହ୍ବାନ କରିବାକୁ ବିଭାଗୀୟ ସର୍ବୋଚ୍ଚ ଯନ୍ତ୍ରୀଙ୍କୁ ଚିଠି ଲେଖାଯାଇଛି।କିନ୍ତୁ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଠିକାଦାର ପୋଷିବା ନ୍ୟାୟରେ ପୁଣି ବିନୋଦିନୀ ଇନଫ୍ରାକୁ ୨୦୨୧ ଡିସେମ୍ବର ସୁଦ୍ଧା କାମ କରିବାକୁ ନୂଆ ଡେଡଲାଇନ୍ ଦେଇଛନ୍ତି।ଗତ ଦେଢ଼ ମାସ ହେଲା ଠିକା ସଂସ୍ଥା ସଂପୂର୍ଣ୍ଣ ବନ୍ଦ ରଖିଥିବାରୁ ଏବେ ରାଜପଥରେ ଯାତାୟାତ ସମ୍ଭବପର ହେଉନି। ଭାରିଯାନ ଏବଂ ଓଭରଲୋଡ୍ ଟ୍ରକ୍ ଚଳାଚଳ ଯୋଗୁ ରାଜପଥରେ ଅଣ୍ଟାଏ ଲେଖାଁଏ ଖାଲ ସୃଷ୍ଟି ହୋଇ ପ୍ରତିଦିନ ଗାଡ଼ି ଗୁଡ଼ିକ ଦୁର୍ଘଟଣାର ଶିକାର ହେଉଛନ୍ତି। କାଦୁଅରେ ଫଶିବା ପରେ ଗାଡ଼ି ଗୁଡ଼ିକ ବାହାରି ପାରୁନଥିବାରୁ ଘଣ୍ଟା ଘଣ୍ଟା ଧରି ଟ୍ରାଫିକ୍ ଜାମ୍ ମଧ୍ୟ ହେଉଛି।ସ୍ଥାନୀୟ ଲୋକ ମାଟି ପକାଇ ଖାଲଖମାକୁ ପୋତୁଥିବା ବେଳେ ଦିନ ରାତି ଭାରିଯାନ ଚଳାଚଳ ଯୋଗୁ ରାସ୍ତାର ଅବସ୍ଥା ଯଥା ପୂର୍ବଂ ତଥା ପରଂ ସ୍ଥିତିକୁ ଫେରି ଆସୁଛି। ଏ ସଂପର୍କରେ ପୂର୍ତ୍ତ ବିଭାଗ କର୍ତ୍ତୃପକ୍ଷଙ୍କୁ ପଚାରିବାରୁ ଡିସେମ୍ବର ସୁଦ୍ଧା କାମ ଶେଷ କରିବାକୁ ଠିକାଦାରକୁ କୁହାଯାଇଛି ବୋଲି କହିଛନ୍ତି।ସୂଚନାଯୋଗ୍ୟ, ୫ ନଂ ରାଜ୍ୟ ରାଜପଥର ମାନ୍ୟତା ପାଇଥିବା ଏହି ରାସ୍ତା ରାୟଗଡ଼ାରୁ ମୁନିଗୁଡ଼ା କଳାହାଣ୍ଡି ଦେଇ ଛତିଶଗଡ଼ର ରାୟପୁରକୁ ସଂଯୋଗ ହୋଇଛି।ଅନ୍ୟପକ୍ଷରେ ରାୟଗଡ଼ା ଜିଲ୍ଲା ଭାଗରେ ଥିବା ରାଜପଥ ମଧ୍ୟରେ ଇମ୍ଫା, ବେଦାନ୍ତ ଭଳି ଅନ୍ତର୍ଜାତୀୟ କମ୍ପାନି ଥିବାରୁ ପ୍ରତିଦିନ ଶହଶହ ସଂଖ୍ୟାରେ ଭାରିଯାନ ଚଳାଚଳ କରୁଛନ୍ତି।ରାସ୍ତା ଅବସ୍ଥା କଦର୍ଯ୍ୟ ଯୋଗୁ ଭାରିଯାନ ଚଳାଚଳ ସମୟରେ ଗାଡ଼ି ଭାରସାମ୍ୟ ହରାଉଥିବାରୁ ଦୁର୍ଘଟଣା ଘଟୁଛି। ଏଥିସହିତ ଜିଲ୍ଲାର ଚନ୍ଦ୍ରପୁର,ମୁନିଗୁଡ଼ା, ବିଷମକଟକ ବ୍ଲକବାସୀ ଏହି ରାଜପଥ ଦେଇ ଜିଲ୍ଲା ସଦର ମହକୁମାକୁ ବିଭିନ୍ନ କାମରେ ଆସୁଛନ୍ତି।