ପାରଳାଖେମୁଣ୍ଡି ଠାରେ ନିମୋକୋକାଲ କଞ୍ଜୁଗେଟ (ପିସିଭି) ଟୀକାକରଣର ଶୁଭାରମ୍ଭ।

!!! ଗଜପତି ରୁ ଜିଲ୍ଲା ପ୍ରତିନିଧି ଅନିତା କୁମାରୀ ଅଧିକାରୀ ଙ୍କ ରିପୋର୍ଟ !!! 

ଏଥର ସମ୍ଭାଳ (ପାରଳାଖେମୁଣ୍ଡି) – ଗଜପତି ଜିଲ୍ଲାରେ ୫ ବର୍ଷ ବୟସରୁ କମ୍ ବୟସର ପିଲାଙ୍କ ନିମନ୍ତେ ଉଦ୍ଧିଷ୍ଟ ଭାରତ ସରକାରଙ୍କ ନିୟମିତ ଟୀକାକରଣ କାର୍ଯ୍ୟକ୍ରମ ଅଧୀନରେ ଆଉ ଏକ ଟୀକା ଥିବା ନିମୋକୋକାଲ କଞ୍ଜୁଗେଟ ଟୀକା(ପିସିଭି)ର ଶୁଭାରମ୍ଭ ହୋଇଯାଇଛି । ଏହି ଅବସରରେ ପାରଳାଖେମୁଣ୍ଡି ସ୍ଥିତ ଜିଲ୍ଲାମୁଖ୍ୟ ଚିକିତ୍ସାଳୟ ପରିସରରେ ଥିବା ପ୍ରସୂତି ଏବଂ ଶିଶୁସ୍ବାସ୍ଥ୍ୟ କେନ୍ଦ୍ର ଠାରେ ଏହି ଟିକାକରଣ କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା। ଏହି ଶୁଭାରମ୍ଭ କାର୍ଯ୍ୟକ୍ରମରେ ରାଜ୍ୟ ସ୍ୱାସ୍ଥ୍ୟସେବା ବିଭାଗ ନିର୍ଦ୍ଦେଶକ ଡାଃ ବିଜୟ କୁମାର ମହାପାତ୍ର ମୁଖ୍ୟଅତିଥି ଭାବେ ଯୋଗଦେଇ ନିମୋକୋକସ କଞ୍ଜୁଗେଟ ଟୀକାକରଣର ଶୁଭାରମ୍ଭ କରିଥିଲେ ।

ରାଜ୍ୟ ନିର୍ଦ୍ଦେଶକ ଡାଃ ମହାପାତ୍ରଙ୍କ ସମେତ ଜିଲ୍ଲା ମୁଖ୍ୟ ଚିକିତ୍ସାଅଧିକାରୀ ଡାଃ ପ୍ରଦୀପ କୁମାର ପାତ୍ର ,ଏଡିପିଏଚଓ:(ପରିବାର କଲ୍ୟାଣ) ଡାଃ ଏମ୍ ଏସ୍ ମୁନୀର , ଡିଏମଓ: ଡାଃ ପ୍ରମୋଦ କୁମାର ପଣ୍ଡା , ଡିପିଏଚଓ: ଡାଃ ଏମ: ମୁବାରକ ଅଲି , ଡିପିଏମ: ସୌମ୍ୟରାଣୀ ଗୌଡ଼ ପ୍ରମୁଖଙ୍କ ଉପସ୍ଥିତିରେ ଏଏନଏମ: ଶାନ୍ତିଲତା ବିଶ୍ବାଳ ଏବଂ ସନ୍ତୋଷି କୁମାରୀ ଜେନା ଆସିଥିବା ସମସ୍ତ ଲାଭାର୍ଥୀ ଛୁଆ ମାନଙ୍କୁ ଟୀକା ଦେଇଥିଲେ । ଏହି ଟୀକାକରଣ ସମ୍ପର୍କରେ ଅଧିକ ସୂଚନା ଦେଇ ରାଜ୍ୟ ସ୍ୱାସ୍ଥ୍ୟସେବା ନିର୍ଦ୍ଦେଶକ ଡାଃ ମହାପାତ୍ର କହିଥିଲେ ଯେ , ନିମୋନିଆ ମୁଖ୍ୟତଃ ୫ ବର୍ଷରୁ କମ ବୟସର ପିଲାଙ୍କର ମୃତ୍ୟୁ ହେବାରେ ଏକ ପ୍ରମୁଖ କାରଣ ହୋଇଥାଏ । ଏହି ନିମୋନିଆ ହେବାର ମୁଖ୍ୟ କାରଣ ନିମୋକୋକାସ ଜୀବାଣୁ ସଂକ୍ରମଣ ଅଟେ । ନିମୋକୋକାଲ ରୋଗ ହେଲେ ପିଲାକୁ ଡାକ୍ତରଖାନା ନେବାକୁ ପଡିପାରେ ଏମିତିକି ପିଲାର ମୃତ୍ୟୁ ବି ହୋଇପାରେ । ପିସିଭି ଟୀକା ୫ ବର୍ଷରୁ କମ ବୟସର ପିଲାଙ୍କ ନିମୋକୋକାସ ଜୀବାଣୁ ଜନିତ ନିମୋନିଆରୁ ସୁରକ୍ଷା ପ୍ରଦାନ କରିବାର ଏକ ସଫଳ ମାଧ୍ୟମ ଅଟେ ।

ଏହି ଟୀକା ପିଲାମାନଙ୍କୁ ନିମୋକୋକାସ ଜୀବାଣୁ ଜନିତ ନିମୋନିଆ ଓ ମସ୍ତିଷ୍କ ସଂକ୍ରମଣରୁ ସୁରକ୍ଷା ପ୍ରଦାନ କରିବାରେ ବେଶ ସହାୟକ ହୋଇଥାଏ ।ପିସିଭି ଟୀକା ନିୟମିତ ଟୀକାକରଣ କାର୍ଯ୍ୟକ୍ରମ ଅଧୀନରେ ବିନା ମୂଲ୍ୟରେ ପ୍ରଦାନ କରାଯିବ । ଯାହାକି ଭାରତ ସରକାରଙ୍କ ନିୟମିତ ଟୀକାକରଣ କାର୍ଯ୍ୟକ୍ରମରେ ଏହାକୁ ସାମିଲ କରାଯାଇଛି ବୋଲି କହିଥିଲେ ।ପିସିଭିର ଏହି ୩ ଟୀକା ପିଲାଙ୍କୁ ମୁଖ୍ୟତଃ ପ୍ରଥମ ଟୀକା ଦେଢ ମାସରେ , ଦ୍ଵିତୀୟ ଟୀକା ସାଢ଼େ ୩ ମାସରେ ଏବଂ ତୃତୀୟ ତଥା ବୁଷ୍ଟର ଟୀକା ୯ ମାସରେ ଦେବାକୁ ହେବ । ଏହି ରୋଗରୁ ସର୍ବାଧିକ ସୁରକ୍ଷା ପାଇବା ପାଇଁ ପିସିଭି ଟୀକାର କୌଣସି ବି ମାତ୍ର ତଥା ଟୀକା ଯେପରି ବନ୍ଦ ନ ହୁଏ , ତାହା ସୁନିଶ୍ଚିତ କରିବାକୁ ହେବ ବୋଲି କୁହା ଯାଇଥିଲା ।ନେତ୍ରାନନ୍ଦ ଶତପଥୀ ଏବଂ ଡିଏମ୍ଆରସିଏଚ ଶୁଶାନ୍ତ ପ୍ରସାଦ ନାୟକ ଓ ଶୁରେଶ କୁମାର ପ୍ରମୁଖ ସମସ୍ତ କାର୍ଯ୍ୟକ୍ରମକୁ ପରିଚାଳନାରେ ସହଯୋଗ କରିଥିଲେ ।