ବିଦ୍ୟାଳୟ ସଫେଇ ସହ ଟିମ କ୍ଲିନ ସିଟିର ସାପ୍ତାହିକ ସେବା କାର୍ଯ୍ୟ ଜାରି॥!

!!! ଗଞ୍ଜାମ ରୁ ଜିଲ୍ଲା ପ୍ରତିନିଧି ପବିତ୍ର ରାଉତ ଙ୍କ ରିପୋର୍ଟ !!! 

ଏଥର ସମ୍ଭାଳ (ବ୍ରହ୍ମପୁର)- ଦକ୍ଷିଣ ଓଡ଼ିଶାର ଅଗ୍ରଣୀ ସ୍ବେଚ୍ଛାସେବୀ ସଂଗଠନ ବ୍ରହ୍ମପୁରର ଟିମ କ୍ଲିନ ସିଟି (TCC) ସଦସ୍ୟଙ୍କ ଦ୍ୱାରା ଜାରି ରହିଛି ସାମାଜିକ ସେବା ଅଭିଯାନ। ଦୀର୍ଘ ଦୁଇ ବର୍ଷ ଧରି ଟିମ ପକ୍ଷରୁ ସହରରେ ତଥା ସହର ବାହାରେ ଅନେକ ପ୍ରକଳ୍ପ ହାତକୁ ନିଆଯାଇଛି। କୋଭିଡ କଟକଣା ଯୋଗୁଁ ନିୟମିତ କାର୍ଯ୍ୟ ଯଦିଓ ବାଧାପ୍ରାପ୍ତ ହୋଇଛି ତଥାପି ଟିମ ସଦସ୍ୟଙ୍କ ମନରେ ଉତ୍ସାହ କମିନାହିଁ। ସଂକ୍ରମଣ ନିୟନ୍ତ୍ରଣକୁ ଆସିବା ସହ ଗଂଜାମ ଜିଲ୍ଲା ଏବେ ଗ୍ରୀନ ଯୋନରେ। ରାସ୍ତାର ଉଭୟ ପର୍ଶ୍ବରୁ ବେନିୟମ ପୋଷ୍ଟର ହଟାଇବା, ଅସହାୟ ନିରାଶ୍ରୟଙ୍କୁ ସେବା ଓ ସହାୟତା ଯୋଗାଇବା, ମହାପୁରୁଷଙ୍କ ପ୍ରତିମୂର୍ତ୍ତି ସଫେଇ, ଦୁର୍ଘଟଣାଗ୍ରସ୍ତ ଆହତଙ୍କୁ ହସ୍ପିଟାଲରେ ପହଞ୍ଚାଇବା, ପୋଲିସ ଓ ସଫେଇ କର୍ମଚାରୀଙ୍କ ଭଳି ସମ୍ମୁଖ ଯୋଦ୍ଧା, ବୁଲା ବିକାଳି ଓ ଦିନ ମଜୁରିଆଙ୍କୁ ପାଣି ବୋତଲ, ସାନିଟାଇଜର,ମାସ୍କ ଓ ବିସ୍କୁଟ ଆଦି ବଣ୍ଟନ କରାଯାଇଛି। ଆଗକୁ ସ୍କୁଲ ଖୋଲିବା ସମ୍ଭାବନାକୁଦୃଷ୍ଟିରେ ରଖି ଟିମ ପକ୍ଷରୁ ନୂତନ ପ୍ରକଳ୍ପ ହାତକୁ ନିଆଯାଇଛି। ସହରରେ ଥିବା ବିଭିନ୍ନ ସରକାରୀ ବିଦ୍ୟାଳୟ ପରିସରକୁ ସଫେଇ କାର୍ଯ୍ୟ ଆଜିଠାରୁ ଆରମ୍ଭ ହୋଇଛି। ପ୍ରଥମ ବିଦ୍ୟାଳୟ ଭାବେ ସିଦ୍ଧାର୍ଥ ନଗରରେ ଥିବା ଜ୍ୟୋତି ନଗର ପ୍ରାଥମିକ ବିଦ୍ୟାଳୟ ଓ ଅଙ୍ଗନବାଡି କେନ୍ଦ୍ର ପରିସରକୁ ଟିମ ସଦସ୍ୟଙ୍କ ଦ୍ୱାରା ସଫା କରାଯାଇଛି। ଏଥିରେ ସ୍କୁଲର ପ୍ରଧାନ ଶିକ୍ଷୟିତ୍ରୀ ସହଯୋଗ କରିବା ସହ ଟିମର ସଦସ୍ୟଙ୍କ ଏଭଳି କାର୍ଯ୍ୟକୁ ଭୁୟସୀ ପ୍ରଶଂସା କରିଥିଲେ। ଟିମ ପକ୍ଷରୁ ଯଦିଓ ଏହି କାର୍ଯ୍ୟ ହାତକୁ ନିଆଯାଇଛି ଏବଂ ଆଗକୁ ଏହି କାର୍ଯ୍ୟ ଜାରି ରହିବ, ତେବେ ଏହାଦ୍ୱାରା ନିଜ ନିଜ ଅଞ୍ଚଳର ବିଦ୍ୟାଳୟର ପରିସର ଓ ପରିବେଶ ସୁରକ୍ଷା ଦାୟିତ୍ୱ ସମ୍ପୃକ୍ତ ଅଞ୍ଚଳବାସୀ, ଯୁବଗୋଷ୍ଠୀ ହାତକୁ ନେଲେ ସହରର ସବୁ ବିଦ୍ୟାଳୟର ସ୍ଥିତିରେ ସୁଧାର ଆସିପାରିବ ବୋଲି ଟିମ ପକ୍ଷରୁ ଆହ୍ୱାନ କରାଯାଇଛି। ଆଜିର ଏହି ସ୍କୁଲ ସଫେଇ ଅଭିଯାନରେ ଟିମର ବହୁ ସଦସ୍ୟ ଯୋଗଦେଇ ସକ୍ରିୟ ସାମିଲ ହୋଇଥିଲେ।