ଏଥର ଧରାଯିବ ଫେକ୍ ଜବ କାର୍ଡ ସୂଚନା ଦେଲେ ମନ୍ତ୍ରୀ…!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ବର) – ଫେକ ଜବ କାର୍ଡ ଧରିବାକୁ ଆରମ୍ଭ ହେବ ଇକେୱାଇସି | ଜବ କାର୍ଡ ଧାରୀ କରିବେ ଇକେୱାଇସି | ତିନି ମାସ ଭିତରେ ଜବ କାର୍ଡ ଇକେୱାଇସି ନ କଲେ କଟିବ ଜବ କାର୍ଡ। ଏନେଇ ସୂଚନା ଦେଇଛନ୍ତି ପଞ୍ଚାୟତି ରାଜ ଓ ପାନୀୟ ଜଳ ଯୋଗାଣ ବିଭାଗ ମନ୍ତ୍ରୀ ରବି ନାରାୟଣ ନାୟକ।  ମନ୍ତ୍ରୀ ରବି ନାରାୟଣ ନାୟକ ଆହୁରି କହିଛନ୍ତି, ସରକାର ବାହାର କରିଛନ୍ତି ଫେକ ଜବ କାର୍ଡ | ଏହାର ଅଧିକାରୀ କିଏ ଥିଲେ, ଅର୍ଥ କିଏ ଆତ୍ମସାତ କରୁଥିଲା ବିଗତ ଦିନରେ ଯିଏ ଶାସନ କରୁଥିଲେ ସିଏ ତାର ଉତ୍ତର ଦେବେ | ସରକାର ବର୍ଷେ ଭିତରେ ୨ ଲକ୍ଷ ନୂଆ ଜବ କାର୍ଡ ଦେଇଛନ୍ତି |

ରକ୍ତ ଦାନ ମହତ ଦାନ – ଶିବ ପ୍ରସାଦ ଦୋରା

ଏଥର ସମ୍ଭାଳ ବ୍ୟୁରୋ (ରାୟଗଡ଼) – ରକ୍ତଦାନ ମହତ ଦାନ ଏହି ମୂଳ ମନ୍ତ୍ରକୁ ଆପଣେଇଛନ୍ତି ରାୟଗଡ଼ ଜିଲ୍ଲା “ସମ୍ବାଦ” ଖବର କାଗଜ ଜିଲ୍ଲା ପ୍ରତିନିଧି ଶିବ ପ୍ରସାଦ ଦୋରା। ପିଲାବେଳୁ ଅନ୍ୟର ଦୁଃଖ କଷ୍ଟକୁ ଦେଖି ସମ୍ଭାଳି ପାରନ୍ତି ନାହିଁ ଶ୍ରୀ ଦୋରା। ସମ୍ବାଦ ଦୈନିକ ଖବର କାଗଜରେ ରାୟଗଡ଼ ଜିଲ୍ଲାର ଜିଲ୍ଲା ପ୍ରତିନିଧି ଭାବରେ କାର୍ଯ୍ୟରତ ଅଛନ୍ତି ଶିବ ପ୍ରସାଦ ଦୋରା। ଶ୍ରୀ ଦୋରାଙ୍କ ସଙ୍ଘର୍ଷମୟ ଜୀବନର ସେବା ଉଦ୍ଧେଶ୍ୟରେ ରକ୍ତ ଦାନ ମହତ ଦାନ ମନେ କରି, ଯେଉଁଠି ମଧ୍ୟ ରକ୍ତଦାନ ଶିବିର ଆୟୋଜନ ହେଇଥାଏ, ନିଜ ସ୍ଵଇଚ୍ଛାରେ ରକ୍ତଦାନ ଶିବିରରେ ପହଞ୍ଚି ଯାଆନ୍ତି ରକ୍ତ ଦାନ କରିବା ପାଇଁ। ତାଙ୍କର ଏହିଭଳି ମହତ୍ ପଣିଆ ପଛରେ ତାଙ୍କ ନିର୍ମଳ ଭାବମୂର୍ତ୍ତି ଦେଖିବାକୁ ମିଳେ ବୋଲି କହିଛନ୍ତି ଆତ୍ମୀୟ ସ୍ୱଜ୍ଜନ ଏବଂ ସାମ୍ବାଦିକ ବନ୍ଧୁ ମାନେ। ଆଜକୁ ପାଖାପାଖି ୧୦୦ଥରରୁ ଉର୍ଦ୍ଧ ଥର ରକ୍ତ ଦାନ ଶିବିର ଏବଂ ଆବଶ୍ୟକ ସ୍ଥଳେ ରୋଗୀଙ୍କୁ ରକ୍ତ ଦାନ କରନ୍ତି। ଖାଲି ଏତିକି ନୁହେଁ, ସାମ୍ବାଦିକତା କ୍ଷେତ୍ରରେ ମଧ୍ୟ ନିଜ ଅଞ୍ଚଳର ସମସ୍ୟା ଓ ତାହାର ସମାଧାନ ଏବଂ ଅଞ୍ଚଳର ବିକାସ ଦିଗରେ ଜିଲ୍ଲା ପ୍ରଶାସନର ଦୃଷ୍ଟି ଆକର୍ଷଣ କରି ଥାଆନ୍ତି ଶ୍ରୀ ଦୋରା। ଅସହାୟଙ୍କୁ ସହାୟ ହୋଇ ଜିଲ୍ଲା ପ୍ରଶାସନ ଓ ସମାଜକୁ ମାଧ୍ୟମ ହୋଇ ଅଭିଯୋଗ ଶୁଣାଣି ଗୁଡ଼ିକରେ ଦୁଃଖିହାରିଙ୍କୁ ସହଯୋଗ କରନ୍ତି। ନିରାଡମ୍ୱର ଜୀବନ ଓ ନିଃସ୍ଵାର୍ଥପର ସେବାରେ ନିଜକୁ ସାମିଲ କରି ବେଶ୍ ଆନନ୍ଦ ଲାଗେ ବୋଲି କହିଛନ୍ତି ଶ୍ରୀ ଦୋରା।

ଏହିଭଳି ବ୍ୟକ୍ତି ବିଶେଷଙ୍କୁ ନିଜ ଗହଣରେ ପାଇ ଜିଲ୍ଳାର ସମସ୍ତ ସାମ୍ବାଦିକ ବନ୍ଧୁ ମାନେ ବହୁତ୍ ପ୍ରଶଂସା କରିବା ଦେଖିବାକୁ ମିଳୁଛି। ରାଜ୍ୟର ପ୍ରମୁଖ ଖବର କାଗଜ “ସମ୍ବାଦ” ଜିଲ୍ଲା ପ୍ରତିନିଧି ଭାବରେ ବେଶ୍ ଜଣାଶୁଣା ଶ୍ରୀ ଦୋରାଙ୍କ ଅନ୍ୟନାମ ‘ବୁବୁ’ ଦୋରା ନାମରେ ସମସ୍ତେ ଜାଣନ୍ତି। ସରକାରି କାର୍ଯକ୍ରମର ପ୍ରଚାର୍ ପ୍ରସାର ଏବଂ ରାୟଗଡ଼ ଜିଲ୍ଲାର ସମସ୍ତ ଖବର ଆମ ନଜରକୁ ଆଣି ଉତ୍ତମ କାର୍ଯ୍ଯ ଦକ୍ଷତା ସମ୍ପାଦନ କରନ୍ତି ବୋଲି କହିଛନ୍ତି ଜିଲ୍ଲା ସୁଚନା ଓ ଲୋକ ସମ୍ପର୍କ ଅଧିକାରୀ ଶ୍ରୀ ବସନ୍ତ କୁମାର ପ୍ରଧାନ ଭୂରି ଭୂରି ପ୍ରଶଂସା କରିବା ସହ ଧନ୍ୟବାଦ୍ ଜଣାଇଛନ୍ତି। ସେହିଭଳି ଗ୍ରନ୍ଥାକର ଡମ୍ବରୁଧର ପଣ୍ଡା କହିଛନ୍ତି ଯେ, ସାମ୍ବାଦିକତା ଏକ ପ୍ରକାର ସେବା ଭାବରେ ଆପଣେଇଵା ହିଁ ପ୍ରକୃତ ସେବା। ଆଗକୁ ଏହିଭଳି ସେବା ମନବୃତ୍ତି ଜାରି ରହୁ ଏହି ସେବା ଅନ୍ୟ ମାନଙ୍କ ପାଇଁ ପ୍ରେରଣାର ଶ୍ରୋତ ହେଉ ବୋଲି କହିଛନ୍ତି ଶ୍ରୀ ପଣ୍ଡା।

ଏକ ବଡ ଅଜଗର ଉଦ୍ଧାର…!

ଏଥର ସମ୍ଭାଳ ବ୍ୟୁରୋ(ରାୟଗଡା)- ରାୟଗଡା ଜିଲ୍ଲା ଉପଜିଲ୍ଲାପାଳ ଙ୍କ କାର୍ଯ୍ୟ।ଳୟ ଠାରେ ଏକ ଅଜଗର ଆଜି ଉଦ୍ଧାର କରାଯାଇଛି ।

ପାଣ୍ଡିଆନଙ୍କ ଜିଦ୍ ଆଗରେ ବିଜେଡି ନେତା ଙ୍କ କର୍ତ୍ତବ୍ୟ ଫସର ଫାଟିଲା ; ନେତା ହେଁ ହେଲେ ଅଣନିଃଶ୍ୱାସୀ

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ସାଧାରଣ ନିର୍ବାଚନରେ ଦଳର ଶୋଚନୀୟ ପରାଜୟ ଓ ୨୪ବର୍ଷର ଶାସନର ଅନ୍ତ ସତ୍ତ୍ୱେ ଦଳ ପୁଣିଥରେ କ୍ରିୟାଶୀଳ ହୋଇ ଲକ୍ଷଲକ୍ଷ କର୍ମୀଙ୍କ ପାଖକୁ ଯିବା ଓ ସାଧାରଣ ଲୋକମାନଙ୍କ ମଧ୍ୟରେ ନିଜର ଉପସ୍ଥିତି ଜାହିର କରିବାକୁ ଆଗ୍ରହ ଦେଖାଉନାହିଁ। ଏପରିକି ବିଗତ ଏକ ବର୍ଷରୁ ଅଧିକ ସମୟ ଧରି ରାଜ୍ୟରେ ପ୍ରମୁଖ ବିରୋଧୀ ଦଳ ହୋଇ ମଧ୍ୟ କୈଣସି ଗୋଟିଏ ବି ପ୍ରସଙ୍ଗରେ ଦଳ ପଞ୍ଚାୟତସ୍ତର ପର୍ଯ୍ୟନ୍ତ ନିଜର କର୍ମୀମାନଙ୍କ ପାଖରେ ପହଞ୍ଚି ସେମାନଙ୍କ ଉତ୍ସାହ ବୃଦ୍ଧି ଭଳି ପଦକ୍ଷେପ ନେଇପାରିନି। ବିଜେଡିର ସାଙ୍ଗଠନିକ ବ୍ୟାପାରରେ ଭିକେ ପାଣ୍ଡିଆନ୍ ନାହାଁନ୍ତି ବୋଲି ଦଳର ସୁପ୍ରିମୋ ନବୀନ ପଟ୍ଟନାୟକ ବାରମ୍ବାର ସଫେଇ ଦେଉଛନ୍ତି। ପାଣ୍ଡିଆନ୍ ମଧ୍ୟ ଦଳର କୈଣସି ନେତାଙ୍କୁ ସିଧାସଳଖ ଭେଟ ବି କରୁନାହାନ୍ତି। କିନ୍ତୁ ତାଙ୍କ ବିନା ନିର୍ଦ୍ଦେଶରେ ଦଳରେ ପତ୍ରଟିଏ ବି ହଲିପାରୁନି। ଆଉ ଦଳ ଓ ସଂଗଠନରେ ଏପରି ସ୍ଥିତିକୁ ଦେଖି ଅଧିକାଂଶ ଆଗଧାଡି଼ର ନେତାମାନେ ନିଜକୁ ଅଣନିଃଶ୍ବାସୀ ଅନୁଭବ କରୁଥିଲେ ଅନ୍ୟ ବିକଳ୍ପ ନପାଇ ପାଣ୍ଡିଆନଙ୍କ ଛାୟା ଇକୋସିଷ୍ଟମରେ ମୋଡ଼ିମକଚି ହୋଇ ରହିବାକୁ ବାଧ୍ୟ ହୋଇଥିବା ଚର୍ଚ୍ଚା ହେଉଛି। ଏପରିକି ପାଣ୍ଡିଆନଙ୍କ ଜିଦ୍ ଆଗରେ ବିଜେଡି କିଂକର୍ତ୍ତବ୍ୟବିମୂଢ଼ ହୋଇପଡ଼ିଛି। ବୟସାଧିକ ଯୋଗୁଁ ସଂଗଠନ ପରିଚାଳନାରେ ନବୀନଙ୍କ ଅନାଗ୍ରହ ଓ ଅପାରଗତା, ପାଣ୍ଡିଆନଙ୍କ ଉପରେ ମାତ୍ରାଧିକ ନିର୍ଭରଶୀଳତା ହିଁ ପରୋକ୍ଷରେ ବିଜେଡି ନେତାମାନଙ୍କୁ ପାଣ୍ଡିଆନଙ୍କ ହାକିମାତି ସ୍ବୀକାର ପାଇଁ ଏକରକମ ବିବଶ କରିଦେଇଥିବା ଦଳୀୟ ମହଲରେ ଚର୍ଚ୍ଚା। ବିଜେଡି ସୂତ୍ର ଅନୁସାରେ, ଦଳର ଆଗଧାଡି଼ର ନେତ୍ରୀମାନଙ୍କ ତୀବ୍ର ବିରୋଧ ସତ୍ତ୍ଵେ ପାଣ୍ଡିଆନଙ୍କ ଜିଦ୍ ଆଗରେ ମୁଣ୍ଡ ନୁଆଁଇ ବିଜେଡି ଗୁରୁବାର ଭୁବନେଶ୍ବରରେ ଓ ଶୁକ୍ରବାର ନୀଳଗିରି ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ଓ ପ୍ରତିବାଦ ସଭା କରିଛି। ଗୁରୁବାର ଶଙ୍ଖ ଭବନରେ ବିଜେଡିର ଅସ୍ଥାୟୀ ମୁଖିଆ ଦେବୀପ୍ରସାଦ ମିଶ୍ରଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ଦଳର ଆଗଧାଡି଼ର ନେତ୍ରୀମାନେ ସିଧାସଳଖ ଏହି ପ୍ରାୟୋଜିତ କାର୍ଯ୍ୟକ୍ରମକୁ ବିରୋଧ କରିଥିଲେ। ବିଜେପିରୁ ଆମଦାନୀ ନେତ୍ରୀ ଲେଖାଶ୍ରୀ ସାମନ୍ତସିଂହାରଙ୍କୁ କାହିଁକି ଏତେ ଗୁରୁତ୍ୱ ଦିଆଯାଉଛି ଓ ଅନ୍ୟ ପ୍ରମୁଖ ନେତ୍ରୀମାନଙ୍କ କ୍ଷେତ୍ରରେ ଦଳ ଚୁପ୍ ଥିବାବେଳେ ଲେଖାଶ୍ରୀଙ୍କ ପାଇଁ ମାତ୍ରାଧିକ କାର୍ଯ୍ୟକ୍ରମ ଉଚିତ୍ ନୁହେଁ ବୋଲି ଉକ୍ତ ବୈଠକରେ ଦଳୀୟ ନେତ୍ରୀମାନେ ନିଜର ଅସନ୍ତୋଷ ବ୍ୟକ୍ତ କରିଥିଲେ। ଲେଖାଶ୍ରୀଙ୍କ ପ୍ରତି ନୀଳଗିରି ବିଧାୟକ ସନ୍ତୋଷ ଖଟୁଆଙ୍କ ଆପତ୍ତିଜନକ ମନ୍ତବ୍ୟ ପାଇଁ ଥାନାରେ ଦଳ ପକ୍ଷରୁ ଦୁଇ ଦୁଇଟି ଏତଲା ଓ ରାଜ୍ୟ ମହିଳା କମିଶନରେ ମାମଲା ହୋଇସାରିଛି। ଦଳ ମଧ୍ୟ କ୍ରମାଗତ ଭାବରେ ଏହି ମନ୍ତବ୍ୟକୁ ନିନ୍ଦା କରି ବିଧାୟକଙ୍କ ଗିରଫଦାରୀ ଓ କ୍ଷମା ପ୍ରାର୍ଥନା ଦାବି କରିସାରିଛି। ଆଇନଗତ ଲଢେଇ ଏବେ ଜାରି ରହିଛି। ତେଣୁ ଯଦି ଦଳ ଚାହୁଁଛି, ତାହେଲେ ବିଗତ କିଛି ମାସ ମଧ୍ୟରେ ରାଜ୍ୟରେ ବଢୁଥିବା ମହିଳା ହିଂସା ବିରୁଦ୍ଧରେ ଆନ୍ଦୋଳନ କରାଯାଉ ବୋଲି ଅଧିକାଂଶ ନେତ୍ରୀ ପ୍ରସ୍ତାବ ଦେଇଥିଲେ। ଦେବୀ ମଧ୍ୟ ନେତ୍ରୀମାନଙ୍କ ବିରୋଧ ଦେଖି ବ୍ୟାକଫୁଟକୁ ଯାଇଥିଲେ। ମାତ୍ର ପାଣ୍ଡିଆନଙ୍କ ଜିଦ୍ ଓ କଡ଼ା ଆଭିମୁଖ୍ୟ ଦେଖି କେବଳ ଲେଖାଶ୍ରୀଙ୍କ ପ୍ରସଙ୍ଗରେ ଦଳର ଆଗଧାଡି଼ର ନେତ୍ରୀମାନଙ୍କୁ ଭୁବନେଶ୍ୱରରେ ବିକ୍ଷୋଭ ପ୍ରଦର୍ଶନ କରିବାକୁ ନିର୍ଦ୍ଦେଶ ଦିଆଗଲା। ଅନିଚ୍ଛା ସତ୍ତ୍ବେ ଦଳର ହାତଗଣତି ନେତ୍ରୀ ଭୁବନେଶ୍ୱରରେ ବିକ୍ଷୋଭରେ ସାମିଲ ହେଲେ ଓ ଅଧିକାଂଶ ଅନୁପସ୍ଥିତ ରହିଲେ। ଅନୁରୂପ ଭାବେ ପାଣ୍ଡିଆନଙ୍କ ଚାପ ଓ ଜିଦ୍ ଯୋଗୁଁ ଗତ ୭ ତାରିଖରେ ମଧ୍ୟ ବାଲେଶ୍ବରରେ ବିଜେଡି ଏକ ସାମ୍ବାଦିକ ସମ୍ମିଳନୀ କରି ଲେଖାଶ୍ରୀଙ୍କ ପ୍ରତି ଆପତ୍ତିଜନକ ମନ୍ତବ୍ୟ ପାଇଁ ବିଧାୟକ ସନ୍ତୋଷ ଖଟୁଆଙ୍କ ଗିରଫ ଦାବି କରିଥିଲା। ବିଜେଡି ନେତା ପ୍ରତାପ ଜେନା ନିଜର ତୋଷାମଦିଆ ନୀତି ଓ ପାଣ୍ଡିଆନଙ୍କୁ ଖୁସି କରିବା ପାଇଁ ଏହି ସାମ୍ବାଦିକ ସମ୍ମିଳନୀରେ ବାଲେଶ୍ଵର ଜିଲ୍ଲାର ଦଳୀୟ ବିଧାୟକ ଓ ପରାଜିତ ବିଧାୟକ ପ୍ରାର୍ଥୀ ଏବଂ ଜିଲ୍ଲା ସଭାପତି ଉପସ୍ଥିତ ଥିଲେ। ତେବେ ପ୍ରତାପଙ୍କ ବୈଠକରେ ବସ୍ତା ବିଧାୟିକା ସୁବାସିନୀ ଜେନା ଓ ତାଙ୍କ ସ୍ବାମୀ ରବୀନ୍ଦ୍ର ଜେନା ଉପସ୍ଥିତ ଥିଲେ ମଧ୍ୟ ସାମ୍ବାଦିକ ସମ୍ମିଳନୀରୁ ଦୂରେଇ ରହିଥିଲେ। ବିଜେଡି ସୂତ୍ର ଅନୁସାରେ, ସାଧାରଣ ନିର୍ବାଚନରେ ଦଳର ଶୋଚନୀୟ ପରାଜୟ ଓ ୨୪ବର୍ଷର ଶାସନର ଅନ୍ତ ସତ୍ତ୍ୱେ ଦଳ ପୁଣିଥରେ କ୍ରିୟାଶୀଳ ହୋଇ ଲକ୍ଷଲକ୍ଷ କର୍ମୀଙ୍କ ପାଖକୁ ଯିବା ଓ ସାଧାରଣ ଲୋକମାନଙ୍କ ମଧ୍ୟରେ ନିଜର ଉପସ୍ଥିତି ଜାହିର କରିବାକୁ ଆଗ୍ରହ ଦେଖାଉନାହିଁ। ଏପରିକି ବିଗତ ଏକ ବର୍ଷରୁ ଅଧିକ ସମୟ ଧରି ରାଜ୍ୟରେ ପ୍ରମୁଖ ବିରୋଧୀ ଦଳ ହୋଇ ମଧ୍ୟ କୈଣସି ଗୋଟିଏ ବି ପ୍ରସଙ୍ଗରେ ଦଳ ପଞ୍ଚାୟତସ୍ତର ପର୍ଯ୍ୟନ୍ତ ନିଜର କର୍ମୀମାନଙ୍କ ପାଖରେ ପହଞ୍ଚି ସେମାନଙ୍କ ଉତ୍ସାହ ବୃଦ୍ଧି ଭଳି ପଦକ୍ଷେପ ନେଇପାରିନି। ବିଜେଡି ସୁପ୍ରିମୋ ନବୀନ ପଟ୍ଟନାୟକ ମଧ୍ୟ ସବୁ ଜିଲ୍ଲାକୁ ଗସ୍ତ ହେଉ କି ଜିଲ୍ଲାର ଆଗଧାଡି଼ର ନେତାମାନଙ୍କୁ ମଧ୍ୟ ଭେଟିନାହାନ୍ତି। ବିଜେଡି ପରାଜୟର ମୁଖ୍ୟ ସୂତ୍ରଧର ଦଳର ଅଘୋଷିତ ସର୍ବେସର୍ବା ପାଣ୍ଡିଆନ ବି କାହାରିକୁ ଭେଟୁ ନଥିବାବେଳେ ତାଙ୍କ ଖାସ୍ ଅନୁଗତ ପ୍ରଣବ ପ୍ରକାଶ ଦାସ(ବବି) ଏବେ ପୁଣିଥରେ ନିଜର ପୁରୁଣା ଫର୍ମକୁ ( ଦଳ କ୍ଷମତାରେ ଥିବାବେଳେ ଅହଙ୍କାର ଓ ଔଦ୍ଧତ୍ୟ) ଫେରିଛନ୍ତି । ଦଳରେ ପାଣ୍ଡିଆନଙ୍କ ହାକିମାତି ଆରମ୍ଭ ହେବା ସହ ବବିଙ୍କ ମାମଲାତି ବି ପୁଣିଥରେ ଫେରିଛି। ଯଦିଓ ଦଳର ଅସ୍ଥାୟୀ ମୁଖିଆ ଭାବେ ବରିଷ୍ଠ ନେତା ଦେବୀ ପ୍ରସାଦ ମିଶ୍ରଙ୍କୁ ପୁଣିଥରେ ଦାୟିତ୍ବ ମିଳିଛି, କିନ୍ତୁ ସେ ଦଳୀୟ ସାଂଗଠନିକ ପ୍ରସଙ୍ଗରେ ପାଣ୍ଡିଆନ-ବବିଙ୍କ ବିନା ନିର୍ଦ୍ଦେଶରେ କିଛି କରିବାର ସାହାସ ଜୁଟାଇ ପାରିନାହାନ୍ତି। ନବୀନଙ୍କ ଅସୁସ୍ଥତା ଓ ନିର୍ଭରଶୀଳତା, ବରିଷ୍ଠ ନେତାମାନଙ୍କ ନୀରବତା,  ଦେବୀଙ୍କ ଚାଟୁକାରିତା, ଅଢ଼େଇ ଦଶନ୍ଧି ପରେ ପୁନଃଗଠିତ ଦଳର ରାଜନୀତିକ ବ୍ୟାପାର କମିଟି (ପିଏସି)ର ଅକର୍ମଣ୍ୟତାର  ଫାଇଦା ଉଠାଇ  ପାଣ୍ଡିଆନ ପ୍ରଚ୍ଛଦପଟରେ ରହି ନିଜ ଢଙ୍ଗରେ ବିଜେଡିକୁ ପରିଚାଳନା କରିବାରେ ଲାଗିଛନ୍ତି। ବିଜେଡି ରାଜ୍ୟରେ ପ୍ରମୁଖ ବିରୋଧୀ ଦଳ ହୋଇ ମଧ୍ୟ ପାଣ୍ଡିଆନଙ୍କ ନିଜସ୍ଵ ଆତ୍ମରକ୍ଷା ରଣନୀତି ପାଇଁ ଦଳ ଧୀରେ ଧୀରେ ରାଜ୍ୟ ଓ ରାଜ୍ୟବାସୀଙ୍କ ସ୍ବାର୍ଥ-ସମସ୍ୟାରୁ ଦୂରେଇ ଯିବାରେ ଲାଗିଛି। ବିଜେଡିର ବିଗତ ବର୍ଷେ ଧରି ଏଭଳି ନୀତି-ନୈତିକତାବିହୀନ ଆଭିମୁଖ୍ୟ ମଧ୍ୟ ରାଜ୍ୟରେ କଂଗ୍ରେସକୁ ବଳ ଗୋଟାଇବାରେ ସହାୟକ ହୋଇଛି ଓ ତଥା ଦଳ ଲୋକଙ୍କ ସମସ୍ୟା ସହ ଜଡ଼ିତ ରହି ସେମାନଙ୍କ ଆସ୍ଥାଭାଜନ ହେବାରେ ଲାଗିଛି।

୧୭ରେ ବନ୍ଦ ରହିବା ସାରା ଓଡ଼ିଶା ….!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ବାଲେଶ୍ଵର ଏଫଏମ କଲେଜ ଛାତ୍ରୀ ସୈାମ୍ୟାଶ୍ରୀଙ୍କ ମୃତ୍ୟୁ ଘଟଣା ପ୍ରତିବାଦରେ ଆସନ୍ତା ୧୭ ତାରିଖରେ ଓଡ଼ିଶା ବନ୍ଦ ଡାକରା ଦେଇଛି ରାଜ୍ୟ କଂଗ୍ରେସ। ଏହାକୁ ବାମ ଦଳ ସମେତ ଅନ୍ୟ ବିରୋଧୀ ଦଳ ସମର୍ଥନ କରିଛନ୍ତି। ବିଦ୍ୟାଳୟ, କଲେଜ ଓ ଦୋକାନ ବଜାର ବନ୍ଦ ରଖିବାକୁ ନିଷ୍ପତ୍ତି ହୋଇଛି।ପିସିସି ସଭାପତି ଭକ୍ତ ଦାସ କହିଛନ୍ତି ଯେ ଏ ସରକାର ଶାସନକଳକୁ ଚଳାଇବାରେ ଅସମର୍ଥ। ତେଣୁ ସେମାନେ ଓହରି ଯାଆନ୍ତୁ। କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ କହିଛନ୍ତି ଯେ ଏହି ଘଟଣା ପାଇଁ ରାଜ୍ୟ ସରକାର ଦାୟୀ। ନୈତିକତା ଦୃଷ୍ଟିରୁ ମୁଖ୍ୟମନ୍ତ୍ରୀ ଓ ଉଚ୍ଚ ଶିକ୍ଷା ମନ୍ତ୍ରୀ ଇସ୍ତଫା ଦିଅନ୍ତୁ। କଂଗ୍ରେସ ଏହି ପ୍ରସଙ୍ଗକୁ ବିଧାନସଭାରେ ଉଠାଇବ।କଂଗ୍ରେସ ସାଂସଦ ରାହୁଲ ଗାନ୍ଧୀ କହିଛନ୍ତି ଯେ ଏହା ଆତ୍ମହତ୍ୟା ନୁହେଁ। ଏହା ବ୍ୟବସ୍ଥା ଦ୍ବାରା ଏକ ସଂଗଠିତ ହତ୍ୟାକାଣ୍ଡ। ଯୈାନ ଶୋଷଣ ବିରୁଦ୍ଧରେ ସାହାସୀ ଝିଅଟି ସ୍ଵର ଉଠାଇଥିଲା। କିନ୍ତୁ ତାକୁ ଚପାଇ ଦେବାକୁ ଚେଷ୍ଟା କରାଯାଇଥିଲା। ତାଙ୍କୁ ଅପମାନିତ କରାଯାଇଥିଲା। ଅଧ୍ୟାପକଙ୍କ ବିରୋଧରେ ମାନସିକ ନିର୍ଯାତନା ଆଣି ଗତ ଶନିବାର ଆତ୍ମାହୁତି ଉଦ୍ୟମ କରି ଭୁବନେଶ୍ୱର ଏମ୍‌ସରେ ଚିକିତ୍ସିତ ହେଉଥିବା ଛାତ୍ରୀ ସୈାମ୍ୟାଶ୍ରୀ (୨୦) ସୋମବାର ରାତିରେ ଶେଷ ନିଃଶ୍ୱାସ ତ୍ୟାଗ କରିଥିଲେ। ଆଜି ଭୋଗରାଇର ପଳାସିଆରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି।

ଗାୟତ୍ରୀ ଫାର୍ମାସି ମହାବିଦ୍ୟାଳୟରେ ବନ ମହୋତ୍ସବ କାର୍ଯ୍ୟକ୍ରମ ପାଳିତ

!!! ରାୟଗଡ଼ ଜିଲ୍ଲା ଗୁଣପୁର ରୁ ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଜୋଶୀ  !!!

ଏଥର ସମ୍ଭାଳ(ଗୁଣପୁର)- ଗୁଣପୁର ସ୍ଥିତ ଗାୟତ୍ରୀ ଫାର୍ମାସି ମହାବିଦ୍ୟାଳୟ ପରିସରରେ ବନ ମହୋତ୍ସବ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଅଛି । ପ୍ରିନ୍ସିପାଲ ଡଃ. କାହ୍ନୁଚରଣ ଚରଣ ପାଣିଗ୍ରାହୀଙ୍କ ଅଧ୍ୟକ୍ଷତାରେ ଏହା ଅନୁଷ୍ଠିତ ହୋଇଯାଇଛି । ଗୁଣପୁର ବନ ବିଭାଗ ଆନୁକୂଲ୍ଯରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଅନୁଷ୍ଠାନର ଚେୟାରମ୍ୟାନ ଶ୍ରୀଯୁକ୍ତ ଅକ୍ଷୟ ଦାସ ଓ ଗୁଣପୁର ବନ ବିଭାଗର ରେଞ୍ଜର ଯୋଗ ଦେଇ ଛାତ୍ରଛାତ୍ରୀ ବୃକ୍ଷ ରୋପଣ କରିବାପାଇଁ ଉଚ୍ଚାଇତ କରିଥିଲେ । ଅନୁଷ୍ଠାନର ବିଭିନ୍ନ ବିଭାଗର ଛାତ୍ରଛାତ୍ରୀ ଯଥା ବି.ଫାର୍ମାସି, ଡି.ଫାର୍ମାସି,ନର୍ସିଂ ଓ ଡି.ଏମ.ଏଲ.ଟି ଆଦି ବିଭାଗର ଛାତ୍ରଛାତ୍ରୀମାନଙ୍କ ଦ୍ବାର ବିଭିନ୍ନ ପ୍ରକାରର ଔଷଧୀୟ ବୃକ୍ଷ ରୋପଣ କରାଯାଇଥିଲା । ଏଥିରେ ଅନୁଷ୍ଠାନର ପ୍ରଶାସନିକ ଅଧିକାରୀ ପି.ଭି.କୋଟେଶ୍ୱର ରାଓଙ୍କ ସମେତ ସମସ୍ତ ଅଧ୍ୟାପକ, ଅଧ୍ୟାପିକା ଓ କର୍ମଚାରୀ ଯୋଗ ଦେଇଥିଲେ । ଏହି କାର୍ଯ୍ୟକ୍ରମକୁ ରାଜୀବ ପଣ୍ଡା ପରିଚାଳନା କରିଥିଲେ । ଏହିପରି ବୃକ୍ଷ ରୋପଣ କାର୍ଯ୍ୟକ୍ରମ ମହାବିଦ୍ୟାଳୟ ପରିସରରେ ଅନୁଷ୍ଠିତ ହୋଇଥିବାରୁ ଅନୁଷ୍ଠାନର ନିର୍ଦ୍ଦେଶକ ଶ୍ରୀଯୁକ୍ତ ସଞ୍ଜୟ ସାହୁ ଅଭିନନ୍ଦନ ଜଣାଇଥିଲେ ଓ ସମସ୍ତଙ୍କୁ ବୃକ୍ଷ ରୋପଣ କରିବା ଆବଶ୍ୟକ ବୋଲି ନିଜ ବାର୍ତ୍ତା ମାଧ୍ୟମରେ କହିଥିଲେ ।

ଖୋଲିଲା ହୀରାକୁଦ ଡ୍ୟାମର ୨୦ଟି ଗେଟ୍‌ ;ବର୍ଷର ପ୍ରଥମ ବନ୍ୟାଜଳ ନିଷ୍କାସିତ

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ହୀରାକୁଦ ଡ୍ୟାମ୍‌ରୁ ଆଜି ଚଳିତ ବର୍ଷର ପ୍ରଥମ ବନ୍ୟା ଜଳ ନିଷ୍କାସନ କରାଯାଇଛି। ପର୍ଯ୍ୟାୟକ୍ରମେ ଡ୍ୟାମରୁ ୨୦ଟି ଗେଟ୍‌ ଖୋଲିଛି। ବାମ ପଟର ୧୩ଟି ଓ ଡାହାଣ ପଟର ୭ଟି ଗେଟ୍ ଖୋଲା ଯାଇଛି। ପରମ୍ପରାକୁ ବଜାୟ ରଖି ପୂଜାର୍ଚ୍ଚନା ପରେ ଗେଟ୍ ଖୋଲାଯାଇଥିଲା। ସକାଳ ୧୦ଟା ୧୮ ମିନିଟ୍‌ରେ ପ୍ରଥମେ ବାମପାର୍ଶ୍ଵ ସ୍ପିଲୱେ ପଟୁ ୭ ନମ୍ବର ସ୍ଲୁଇସ୍‌ ଗେଟ୍ ଖୋଲାଯାଇଥିଲା। ତା’ପରେ ଆଉ ୧୧ଟି ଗେଟ୍ ଖୋଲାଯାଇଥିଲା। ତେବେ ହୀରାକୁଦ ଡ୍ୟାମର ଉପରମୁଣ୍ଡରେ ଅଧିକ ବର୍ଷା ଯୋଗୁ ଜଳଭଣ୍ଡାର ମଧ୍ୟକୁ ବନ୍ୟାଜଳର ପ୍ରବେଶ ବଢ଼ିଥିଲା। ଏହାକୁ ଦୃଷ୍ଟିରେ ରଖି ପୁଣି ୮ଟି ଗେଟ୍ ଖୋଲା ଯାଇଥିଲା। ତେବେ ହୀରାକୁଦର ବନ୍ୟା ଜଳ ତଳମୁଣ୍ଡରେ ବନ୍ୟା ବିଭୀଷିକା ସୃଷ୍ଟି କରିବ ନାହିଁ ବୋଲି କହିଛନ୍ତି ମୁଖ୍ୟଯନ୍ତ୍ରୀ ସୁଶୀଲ କୁମାର ବେହେରା। ସକାଳ ୮ଟାରେ ହୀରାକୁଦ ଡ୍ୟାମ ଜଳଭଣ୍ଡାର ମଧ୍ୟକୁ ସେକେଣ୍ଡକୁ ୧ ଲକ୍ଷ ୩୦ ହଜାର ଘନଫୁଟ ଜଳ ପ୍ରବେଶ କରୁଥିବା ବେଳେ ଅପରାହ୍ନ ୩ଟା ବେଳକୁ ଏହାର ପରିମାଣ ସେକେଣ୍ଡକୁ ୨ ଲକ୍ଷ ୭୪ ହଜାର ଘନଫୁଟକୁ ବୃଦ୍ଧି ପାଇଥିଲା। ଆଗକୁ ପୁଣି ଲଗାଣ ବର୍ଷାର ସମ୍ଭାବନା ଥିବାରୁ ଜଳଭଣ୍ଡାର ମଧ୍ୟକୁ ବନ୍ୟାଜଳ ପ୍ରବେଶ ପରିମାଣ ବଢ଼ିବାର ସମ୍ଭାବନା ରହିଛି। ଏଠାରୁ ନିଷ୍କାସିତ ବନ୍ୟାଜଳ କଟକର ମୁଣ୍ଡଳି ଠାରେ ପହଞ୍ଚିବାକୁ ପ୍ରାୟ ୩୬ ଘଣ୍ଟା ସମୟ ଲାଗିବ। ଗେଟ୍‌ ଖୋଲିବା ପୂର୍ବରୁ ଆଜି ସକାଳୁ ସତର୍କ ସାଇରନ ବାଜିବା ଆରମ୍ଭ କରିଥିଲା। ସେହିପରି ଗତ ୨ ଦିନ ଧରି ତଳମୁଣ୍ଡରେ ଡାକବାଜି ଯନ୍ତ୍ରରେ ପ୍ରଚାର କରାଯାଇ ଲୋକଙ୍କୁ ସତର୍କ କରାଯାଇଥିଲା। ବୁର୍ଲା, ହୀରାକୁଦ ଓ ସମ୍ବଲପୁର ସମେତ ମହାନଦୀର ତଳ ମୁଣ୍ଡରେ ପ୍ରଚାର କରାଯାଇ ଲୋକମାନଙ୍କୁ ସଚେତନ କରାଯାଇଥିଲା। ହୀରାକୁଦ ଡ୍ୟାମରୁ ଚଳିତ ବର୍ଷର ପ୍ରଥମ ବନ୍ୟାଜଳ ନିଷ୍କାସନ ଦୃଶ୍ୟ ଦେଖିବା ପାଇଁ ସମ୍ବଲପୁର ସମେତ ଅନ୍ୟ ଜିଲ୍ଲାମାନଙ୍କରୁ ଲୋକମାନେ ହୀରାକୁଦକୁ ଆସିଥିଲେ। ଏଠାରେ ଲୋକଙ୍କର ବେଶ୍ ଗହଳି ଲାଗିଥିଲା। ଜଳ ନିଷ୍କାସନ ସମୟରେ ଧୂଆଁଳିଆ ପରିବେଶ ସୃଷ୍ଟି ହୋଇଥିଲା। ଡ୍ୟାମରୁ ଜଳ ନିଷ୍କାସିତ ହେବାର ଦୃଶ୍ୟକୁ ଲୋକେ ଉପଭୋଗ କରିଥିଲେ ଓ ସେମାନଙ୍କ ମୋବାଇଲ ଫୋନ୍‌ର କ୍ୟାମେରାରେ ତାହାକୁ ତୋଳି ଧରିଥିଲେ।ହୀରାକୁଦ ଡ୍ୟାମର ଜଳସ୍ତର ୬୧୦ ଫୁଟ ଡେଇଁ ସାରିଥିବା ବେଳେ ଆଗକୁ ବର୍ଷା ଜାରି ରହିଲେ ଆହୁରି ଅଧିକ ଗେଟ୍ ଖୋଲାଯାଇପାରେ ବୋଲି ଜଣାପଡ଼ିଛି।

ସର୍ବାଧିକ ଅବଧିର ରେକର୍ଡ ଭାଙ୍ଗି ମନମୋହନ ପୁଣି ବିଜେପି ରାଜ୍ୟ ସଭାପତି

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ମନମୋହନ ସାମଲଙ୍କ ଉପରେ ବିଜେପି ପୁଣିଥରେ ଆସ୍ଥାପ୍ରକଟ କରିଛି । ସେ ୪ର୍ଥ ଥର ପାଇଁ ରାଜ୍ୟ ବିଜେପି ସଭାପତି ଭାବେ ନିର୍ନ୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି । ଦଳର ରାଜ୍ୟ ସଭାପତି ପଦ ନିର୍ବାଚନ ନିମନ୍ତେ ଶ୍ରୀ ସାମଲ ଏକମାତ୍ର ପ୍ରାର୍ଥୀ ଭାବେ ନାମାଙ୍କନ ପତ୍ର ଦାଖଲ କରିଥିବାରୁ ସେ ସଭାପତି ହେବା ସ୍ପଷ୍ଟ ହୋଇଛି, ମାତ୍ର ଆସନ୍ତାକାଲି (ମଙ୍ଗଳବାର) ଏନେଇ ବିଧିବଦ୍ଧ ଘୋଷଣା ହେବ । ୬୬ବର୍ଷୀୟ ଶ୍ରୀ ସାମଲ ପୁଣିଥରେ ୩ବର୍ଷ ପାଇଁ ସଭାପତି ନିର୍ବାଚିତ ହେବା ସହ ରାଜ୍ୟରେ ସର୍ବାଧିକ ଅବଧିର ବିଜେପି ସଭାପତି ହେବାର ରେକର୍ଡର ଅଧିକାରୀ ମଧ୍ୟ ହୋଇଛନ୍ତି । ରାଜ୍ୟ ବିଜେପିର ସର୍ବାଧିକ ଅବଧିର ସଭାପତି ଭାବେ ବିଶ୍ୱଭୂଷଣ ହରିଚନ୍ଦନ ମୋଟ (୧୯୮୦ରୁ ୧୯୮୮ ମସିହା ପର୍ଯ୍ୟନ୍ତ) ୮ବର୍ଷ କାର୍ଯ୍ୟ କରିଥିବାବେଳେ ଶ୍ରୀ ସାମଲ ପ୍ରଥମ ଦଫାରେ କ୍ରମାଗତ ଦୁଇଥରରେ ୫ବର୍ଷ (୧୯୯୯ରୁ ୨୦୦୦ ଓ ୨୦୦୧ରୁ ୨୦୦୪ ମସିହା) , ଦ୍ୱିତୀୟ ଦଫାରେ ୨ବର୍ଷ ୩ମାସ ଓ ତୃତୀୟ ଦଫାରେ ୩ବର୍ଷ ପାଇଁ ନିର୍ବାଚିତ ହୋଇଛନ୍ତି । ମନମୋହନ ଆଜି ଏକମାତ୍ର ପ୍ରାର୍ଥୀ ଭାବେ ନାମାଙ୍କନ ପତ୍ର ଦାଖଲ କରିଥିବାରୁ ସେ ରାଜ୍ୟ ବିଜେପିର ପରବର୍ତ୍ତୀ ସଭାପତି ହେବା ସ୍ପଷ୍ଟ ହୋଇଛି । ଯଦିଓ ଆସନ୍ତାକାଲି ବିଧିବଦ୍ଧ ଘୋଷଣା ହେବ । ମନମୋହନ ୧୯୯୯ ମସିହାରେ ରାଜ୍ୟ ବିଜେପିର ସଭାପତି ଥିବାବେଳେ ବିଜେଡି ସହ ମେଂଟ କରି ଦଳ ଓଡ଼ିଶାରେ ପ୍ରଥମଥର ପାଇଁ କ୍ଷମତାର ସ୍ୱାଦ ଚାଖିଥିଲା । ଏବେ ଦ୍ୱିତୀୟଥର ୨୦୨୩ ମାର୍ଚ୍ଚ ମାସରେ ଦଳର ରାଜ୍ୟ ସଭାପତି ଦାୟିତ୍ୱ ନେବାପରେ ବିଜେପି ନିଜସ୍ୱ ଦମରେ ୨୦୨୪ ଜୁନ ମାସରେ ସରକାର ଗଢ଼ିବାରେ ସକ୍ଷମ ହୋଇଛି । ଦଳକୁ ସଫଳତା(କ୍ଷମତାସୀନ କରାଇବା) ଦେବାରେ ‘ମନମୋହନ’ ଭାଗ୍ୟଶାଳୀ ସାବ୍ୟସ୍ତ ହୋଇଛନ୍ତି । ତେବେ ମନମୋହନଙ୍କ ପ୍ରଥମଦଫା(୧୯୯୯-୨୦୦୪) ସଭାପତିତ୍ୱ କାଳରେ ତାଙ୍କ ଦଳ ରାଜ୍ୟ ସରକାରରେ ଭାଗିଦାରୀ ହେବାରେ ସକ୍ଷମ ହୋଇଥିବାବେଳେ ସେ ନିଜେ ପରାଜିତ ହୋଇଥିଲେ । ଏବେ ମଧ୍ୟ ସମାନ ଢଙ୍ଗରେ ୨୦୨୪ ନିର୍ବାଚନରେ ତାଙ୍କ ଦଳ ନିଜସ୍ୱ ଦମରେ ସରକାର ଗଢ଼ିଛି ସତ କିନ୍ତୁ ମନମୋହନଙ୍କୁ ପରାଜିତ ହେବାକୁ ପଡ଼ିଛି । ୨୦୦୦ ମସିହାରେ ଧାମନଗର ଓ ଏବେ ଚାନ୍ଦବାଲି ଆସନରୁ ସେ ପରାଜିତ ହୋଇଛନ୍ତି । ଅବଶ୍ୟ ଦଳ ତାଙ୍କୁ ୨୦୦୦ ମସିହାରେ ରାଜ୍ୟସଭା ପଠାଇ ପୁରସ୍କୃତ କରିଥିଲା । ଏବେ ଆସନ୍ତା ମାର୍ଚ୍ଚ ମାସରେ ଅନୁରୂପ ପୁରସ୍କାର ମଧ୍ୟ ଦଳ ତାଙ୍କୁ ଦେଇପାରେ ବୋଲି ଚର୍ଚ୍ଚା ହେଉଛି ।

ଓଡ଼ିଶା ପୁଲିସରେ ଟେଣ୍ଡର ଫିକ୍ସିଂ ; ଚିନ୍ତା ରେ ଗୃହ ବିଭାଗ

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଦୁର୍ନୀତି ବିରୁଦ୍ଧରେ ରାଜ୍ୟ ସରକାରଙ୍କ ‘ଜିରୋ ଟଲେରାନ୍ସ ନୀତି’କୁ ଭୃକ୍ଷେପ ନକରି ଓଡ଼ିଶା ପୁଲିସ କ୍ରମାଗତ ଭାବେ ଟେଣ୍ଡର ଅନିୟମିତତାରେ ଲିପ୍ତ ଥିବାର ପୁଳାପୁଳା ପ୍ରମାଣ ଦାଣ୍ଡରେ ପଡ଼ି ଏବେ ହାଟରେ ଗଡ଼ିଲାଣି । କେଉଁଠି ନିର୍ଦ୍ଦିଷ୍ଟ ଘରୋଇ କମ୍ପାନୀକୁ ଅହେତୁକ ଅନୁକମ୍ପା ଦେଖାଇ ବିନା ଟେଣ୍ଡର ଓ ରାଜ୍ୟସ୍ତରୀୟ କ୍ରୟ କମିଟିର ବିନା ଅନୁମୋଦନରେ ୭.୮୪ କୋଟି ଟଙ୍କାର କାର୍ଯ୍ୟାଦେଶ ଦିଆଗଲାଣି ତ କେଉଁଠି ପୁଲିସ ଡିଜିଙ୍କ ଭାବମୂର୍ତ୍ତି ସୁଧାରିବା ପାଇଁ ବର୍ଷକୁ କୋଟିଏ ଟଙ୍କାରୁ ଅଧିକ ଟଙ୍କାର କାର୍ଯ୍ୟ ଟେକି ଦେବାକୁ ସବୁ କସରତ ସରିଲାଣି। ସେହିପରି ‘ଉପକୂଳ ସୁରକ୍ଷା ପାଇଁ ଡ୍ରୋନକିଣା’ ହେଉ କି ‘ସିଷ୍ଟମ ଇଣ୍ଟିଗ୍ରେଟର ଚୟନ’ରେ ଟେଣ୍ଡର ପ୍ରକ୍ରିୟା, ସବୁଥିରେ ଅନିୟମିତତା ଜଳଜଳ ଦିଶୁଥିଲେ ମଧ୍ୟ ସମସ୍ତେ ନିରବଦ୍ରଷ୍ଟା ସାଜିଛନ୍ତି । କେବଳ ସେତିକି ନୁହେଁ ବିଗତ ୧୦ମାସ ମଧ୍ୟରେ ‘ଓଡ଼ିଶା ପୁଲିସ’ ନିଜର ବିଭିନ୍ନ କାର୍ଯ୍ୟ ଓ ସେବା ପାଇଁ ଯେଉଁସବୁ ଟେଣ୍ଡର ଡାକିଛି ସେଥିରୁ ଅଧିକାଂଶ ଟେଣ୍ଡରର ଚୂଡ଼ାନ୍ତରେ ଅନିୟମିତତାର ଅଭିଯୋଗ ଜଳଜଳ ଦିଶିବାରେ ଲାଗିଛି । ଆଉ ଏପଟେ ଏହି ସମସ୍ତ ଅନିୟମିତତା ଘଟଣାରେ ଗୃହ ବିଭାଗ ଓ ପୁଲିସ ଡିଜିପିଙ୍କ କାର୍ଯ୍ୟାଳୟର ଭୂମିକା ତଥା ନିରବତାକୁୁ ନେଇ ମଧ୍ୟ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ୨୦୨୫ ଜୁନ୍ ୩୦ତାରିଖରେ ରାଜ୍ୟ କ୍ରାଇମ ରେକର୍ଡ ବ୍ୟୁରୋ(ଏସସିଆରବି) ନିର୍ଦ୍ଦେଶିକା  ସନ୍ତୋଷ ବାଲା ଗୋଟିଏ ଚିଠି ସମସ୍ତ ପୁଲିସ ପ୍ରତିଷ୍ଠାନ(ଥାନାରୁ ଆରମ୍ଭ କରି ଆଇଜି ରେଞ୍ଜ ଅଫିସ ସମେତ)କୁ ଲେଖିଛନ୍ତି । ଏହି ଚିଠିରେ ଶ୍ରୀମତୀ ବାଲା ସବୁ ପୁଲିସ୍ ଅଫିସରମାନଙ୍କୁ ସେମାନଙ୍କ କାର୍ଯ୍ୟାଳୟରେ ଥିବା ଇଂଟରନେଟ୍ ସଂଯୋଗର ବ୍ୟାଣ୍ଡୱିଥ୍ ଅପଗ୍ରେଡେସନ୍ କାର୍ଯ୍ୟ ନିମନ୍ତେ ଏୟାରଟେଲ୍ କମ୍ପାନୀର ଟେକନିସିଆନମାନଙ୍କୁ ଆବଶ୍ୟକ କାର୍ଯ୍ୟ କରିବା ପାଇଁ ଅନୁମତି ଓ ସହଯୋଗ କରିବାକୁ ପରାମର୍ଶ ଦେଇଛନ୍ତି । ସେମାନେ ଏହି ଇନଷ୍ଟଲେସନ୍ ସମୟରେ ପୁରୁଣା ମୋଡେମ୍‌, ରାଉଟର ଓ ଆଉଟଡୋର ୟୁନିଟକୁ ମଧ୍ୟ ପରିବର୍ତ୍ତନ କରିପାରନ୍ତି ବୋଲି ସୂଚିତ କରିଛନ୍ତି । ସିସିଟିଏନ୍ ପ୍ରୋଜେକ୍ଟ ଅନ୍ତର୍ଗତ ଏବେ ସବୁ ପୁଲିସ ପ୍ରତିଷ୍ଠାନକୁ ସଂଯୋଗ କରୁଥିବା ଏୟାରଟେଲ୍ କମ୍ପାନୀର ଡେଡିକେଟେଡ୍ ଲିଜଡ୍ ଲାଇନ(ମଲଟି ପ୍ରୋଟୋକଲ ଲେବଲ ସ୍ୱିଚିଂ-ଏମପିଏଲଏସ କନକ୍ଟେଭିଟି)ର ଅପଗ୍ରେଡେସନ୍ ଜୁଲାଇ ପହିଲାରୁ (୪ରୁ ୧୬ ଏମବିପିଏସ୍ ପରିବର୍ତ୍ତେ ୧୦୦ରୁ ୧୫୦ ଏମବିପିଏସ୍ ସ୍ପିଡକୁ ବୃଦ୍ଧି) କରାଯିବ ବୋଲି ଚିଠି ଲେଖିବା ପରେ ଏହି କେଳେଙ୍କାରୀ ପଦାକୁ ଆସିଛି । ରାଜ୍ୟ ସରକାର ଓ ରାଜ୍ୟସ୍ତରୀୟ କ୍ରୟ କମିଟିର ବିନା ଅନୁମୋଦନରେ କିଏ ଓ କିଭଳି ଏହି ଅପଗ୍ରେଡେସନ୍ ପାଇଁ(୭କୋଟି ୮୪ଲକ୍ଷ ୧୮ହଜାର ୪୯୮ଟଙ୍କାର କାର୍ଯ୍ୟ ନିମନ୍ତେ) ଅନୁମତି ଦେଲା ତାକୁ ନେଇ ପ୍ରଶ୍ନ ଉଠିଛି । ପୁଲିସ ଡିଜିଙ୍କ ଅନୁମତି ବିନା ସମସ୍ତ ପୁଲିସ ପ୍ରତିଷ୍ଠାନକୁ ଶ୍ରୀମତୀ ବାଲା ଚିଠି ଲେଖି ଏହି ଅପଗ୍ରେଡେସନ୍ ନିମନ୍ତେ ସୂଚିତ କରିବା ସମ୍ଭବପର ନଥିବାବେଳେ ଓଡ଼ିଶା ସରକାରଙ୍କ ଆର୍ଥିକ ପରିଚାଳନା ନିୟମ (ଓଜିଏଫଆର) -୨୦୨୩କୁ ଖୋଲା ଉଲ୍ଲଘଂନ କରି ପ୍ରତିଯୋଗିତାମୂଳକ ବିଡିଂ ଓ ବଜାରର ମୂଲ୍ୟକୁ ବିଚାରକୁ ନନେଇ କାହିଁକି ଏୟାରଟେଲ୍ କମ୍ପାନୀକୁ ଏତେ ଟଙ୍କାର କାର୍ଯ୍ୟାଦେଶ ଟେକି ଦିଆଗଲା ତାହା ଏବେ ପୁଲିସ ଡିଜି ଓ ଗୃହ ବିଭାଗକୁ ସନ୍ଦେହଘେରକୁ ଆଣିଛି । ‘କ୍ରାଇମ ଆଣ୍ଡ କ୍ରିମିନାଲ ଟ୍ରାକିଂ ନେଟୱାର୍କ ଆଣ୍ଡ ସିଷ୍ଟମସ(ସିସିଟିଏନଏସ)’ ପ୍ରୋଜେକ୍ଟ ରାଜ୍ୟର ସମସ୍ତ ଅପରାଧ ଓ ଅପରାଧୀଙ୍କ ଡାଟାବେସ୍ ସହ ନାଗରିକଙ୍କୁ ଅନଲାଇନରେ ପୁଲିସ ସେବା ପ୍ରଦାନକୁ ତ୍ୱରାନ୍ୱିତ କରାଯାଉଛି । ଏହି ସିସିଟିଏନଏସ୍  ପ୍ରୋଜେକ୍ଟ ଅନ୍ତର୍ଗତ ସବୁ ପୁଲିସ ପ୍ରତିଷ୍ଠାନକୁ ଏକ ‘ଡେଡିକେଟେଡ୍ ଲିଜଡ୍ ଲାଇନ’ ମାଧ୍ୟମରେ ସଂଯୋଗ କରାଯାଇଛି । ୨୦୨୩ ଜାନୁୟାରୀ ମାସରେ ବିଧିବଦ୍ଧ ଟେଣ୍ଡର ପ୍ରକ୍ରିୟାରେ ଏୟାରଟେଲ କମ୍ପାନୀ ଚୟନିତ ହେବାପରେ ତ୍ରୈମାସିକ ୪୬ଲକ୍ଷ ଟଙ୍କାରେ ଏହି ସେବା(ବ୍ୟାଣ୍ଡୱିଥ ୪ଏମବିପିଏସରୁ ୧୨ଏମବିପିଏସ) ୨୦୨୬ ମାର୍ଚ୍ଚ ୩୧ତାରିଖ ପର୍ଯ୍ୟନ୍ତ ଯୋଗାଇ ଦେବାକୁ ଚୁକ୍ତିବଦ୍ଧ ହୋଇଛି । କିନ୍ତୁ କେନ୍ଦ୍ର ଗୃହ ମନ୍ତ୍ରଣାଳୟର ନିର୍ଦ୍ଦେଶ ଓ କ୍ରିମିନାଲ ଜଷ୍ଟିସ ସିଷ୍ଟମର ଗାଇଡଲାଇନ(୨୦୨୪ ଫେବୃୟାରୀ ୧୫ରେ ଜାରି)ର ଆଳ ଦେଖାଇ ରାଜ୍ୟ କ୍ରାଇମ ରେକର୍ଡ ବ୍ୟୁରୋ ନିର୍ଦ୍ଦେଶିକା ଶ୍ରୀମତୀ ବାଲା ବିନା ଟେଣ୍ଡର ଓ ବଜାର ଦରକୁ ଅନୁଧ୍ୟାନ ନକରି ଏହି ବ୍ୟାଣ୍ଡୱିଥକୁ ୧୦୦ରୁ ୧୫୦ ଏମବିପିଏସକୁ ବୃଦ୍ଧି(୭.୮୪କୋଟି ଟଙ୍କାର କାର୍ଯ୍ୟାଦେଶ) ନିମନ୍ତେ ଏୟାରଟେଲ୍ କମ୍ପାନୀକୁ ଅନୁମତି ପତ୍ର ଜାରି କରିଥିବା ଜଣାପଡ଼ିଛି । ଏପରିକି ଏହି ସିସିଟିଏନଏସ୍ ନିମନ୍ତେ ୨୦୨୫-୨୬ ଆର୍ଥିକ ବର୍ଷ ପାଇଁ ମୋଟ ୨.୭୫ କୋଟି ଟଙ୍କା ଥିବାବେଳେ ବାକି ୯ମାସ (ଚଳିତ ଜୁଲାଇରୁ ୨୦୨୬ ମାର୍ଚ୍ଚ) ପାଇଁ ୫କୋଟି ୫୫ଲକ୍ଷ ୧୮ହଜାର ୪୯୮ଟଙ୍କା ଦେବା ନିମନ୍ତେ ପୁଲିସ ଡିଜିଙ୍କ ଅନୁମତି ଲୋଡ଼ିଥିଲେ । ଯଦିଓ ଏତେପରିମାଣର ଆର୍ଥିକ ଦେଣନେଣ ପାଇଁ ଅନୁମତି ଦେବା କ୍ଷମତା ପୁଲିସ ଡିଜିଙ୍କର ନାହିଁ ଓ ଏଥିପାଇଁ ରାଜ୍ୟ ସରକାରଙ୍କ ଅନୁମତି ଜରୁରୀ । ତଥାପି ଏହି ଅନୁମତି ମିଳିବା ପୂର୍ବରୁ ଏୟାରଟେଲ୍ କମ୍ପାନୀକୁ ଆବଶ୍ୟକ ଅପଗ୍ରେଡେସନ୍ କାର୍ଯ୍ୟ ଆରମ୍ଭ ନିମନ୍ତେ ଶ୍ରୀମତୀ ବାଲା କାହା ନିର୍ଦ୍ଦେଶରେ ଅନୁମତି ଦେଇଛନ୍ତି ତାହା ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି । ଅବଶ୍ୟ ଏହି ଅପଗ୍ରେଡେସନ୍ ନିମନ୍ତେ ନୂଆ ଟେଣ୍ଡର କରାଗଲେ ସେହି ଟେଣ୍ଡର ପ୍ରକ୍ରିୟା ଓ ଇନଷ୍ଟେଲେସନ୍ ଆଦି କାର୍ଯ୍ୟ ସରିବାକୁ ଅତିକମରେ ୬ମାସ ସମୟ ଲାଗିବ, ଯାହା ସରୁସରୁ ୨୦୨୫ ନଭେମ୍ବର ମାସ ହୋଇଯିବ ଏବଂ ଏହା ସମ୍ଭବ ନୁହେଁ ବୋଲି ଶ୍ରୀମତୀ ବାଲା ତାଙ୍କ ନୋଟସିଟରେ ଉଲ୍ଲେଖ କରିଛନ୍ତି ।

କ୍ୟୁଣ୍ଟାଲରେ ୧୦ ରୁ ୧୨ କେଜି ଧାନ କଟନୀ ଛଟ୍‌ନୀ ମିଲରଙ୍କ ମନମାନି, ମଣ୍ଡିରୁ ଉଠୁନି ଧାନ ଏସମସ୍ୟା ସମାଧାନ ପାଇଁ ସମାଜବାଦୀ ପାର୍ଟିର ଦାବି …!

!!! କଳାହାଣ୍ଡି ଜିଲ୍ଲା ପ୍ରତିନିଧି ମନୋଜ ସିଂ ଙ୍କ ରିପୋର୍ଟ !!!

ଏଥର ସମ୍ଭାଳ(ଭବାନୀପାଟଣା) –  କ୍ୟୁଣ୍ଟାଲରେ ୧୦ ରୁ ୧୨ କେଜି ଧାନ କଟନୀ ଛଟ୍‌ନି ମିଲରଙ୍କ ମନମାନି, ମଣ୍ଡିରୁ ଉଠୁନି ଧାନ ଏମିତି ଅନେକ ସମସ୍ୟା ନେଇ ଚାଷୀମାନେ ଏବେ ନାହିଁ ନଥିବା ଅସୁବିଧାରେ ଅଛନ୍ତି । ବିଶେଷ କରି ଓଡିଶାର ଭାତ ହାଣ୍ଡି କୁହାଯାଉଥିବା ପଶ୍ଚିମାଞ୍ଚଳର ଚାଷୀଙ୍କୁ ହତାଶ କରିଛି ସରକାରଙ୍କ ଆଭିମୁଖ୍ୟ । ଏନେଇ କ୍ଷୋଭ ପ୍ରକାଶ କରିଛନ୍ତି ସମାଜବାଦୀ ପାର୍ଟି ଓଡିଶା ରାଜ୍ୟ ସଭାପତି ଶିବ ହାତୀ ଯାଦବ I ଧାନର ଅଭାବୀ ବିକ୍ରୀକୁ ନେଇ ସେ ସରକାରଙ୍କୁ କଡା ସମାଲୋଚନା କରି କହିଛନ୍ତି ଯେ ଖରିଫ ଧାନ ବିକ୍ରିରେ ଚାଷୀ ବହୁତ ଅସୁବିଧାର ସମ୍ମୁଖୀନ ହୋଇଥିଲେ; ମିଲରମାନେ କ୍ରିଣ୍ଟାଲ ପିଛା ୮ କେଜି ପର୍ଯ୍ୟନ୍ତ ଧାନ କାଟି କ୍ରୟ କରିଥିବା ନେଇ ଚାଷୀ ଅଭିଯୋଗ କରିଥିଲେ । ଏହାକୁ ନେଇ ରାଜ୍ୟ ତମାମ୍ ଅସନ୍ତୋଷ ବଢ଼ିଥିଲା, ବିଧାନସଭା ସଭା କମ୍ପିଥିଲା, ଚାଷୀମାନେ ରାସ୍ତାରେ ଧାରଣା ଦେଇଥିଲେ । ଆଶା କରାଯାଉଥିଲା ଯେ, ରବି ଧାନ କ୍ରୟ ବେଳକୁ ହୁଏତ ଏହି ସମସ୍ୟା ଦେଖା ଦେବ ନାହିଁ । ମାତ୍ର ବର୍ତ୍ତମାନ ରବି ଧାନ ବିକ୍ରି ସମୟରେ ଚାଷୀଙ୍କ କଷ୍ଟ ଖରିଫକୁ ବଳି ଯାଇଛି। ସେତେବେଳେ ମିଲର ୮ କିଲୋ କଟନି ଛଟନି କରୁଥିଲେ, ଏବେ ତାହା ୧୨ କିଲୋରେ ପହଞ୍ଚିଛି । ୧୨ କିଲୋ ନ କାଟିଲେ ମିଲର ଧାନ କିଣୁ ନାହାନ୍ତି ଫଳରେ ପଶ୍ଚିମ ଓଡ଼ିଶାର ବିଭିନ୍ନ ମଣ୍ଡିରେ ହଜାର ହଜାର ବସ୍ତା ରବି ଧାନ ପଡ଼ି ରହିଛି । ରାଜ୍ୟରେ ମୌସୁମୀ ବର୍ଷା ଆରମ୍ଭ ହୋଇ ଯାଇଥିବା ଯୋଗୁଁ ଅନେକ ମଣ୍ଡିରେ ପଡି ରହିଥିବା ଧାନରୁ ଗଜା ହେବା ବି ଦେଖାଗଲାଣି । ଏହାକୁ ନେଇ ଚାଷୀ ମହଲରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି । ରବି ଧାନ ବିକ୍ରି ଅବଧି ଆଉ ମାତ୍ର ୧୦ ଦିନ ରହିଛି ହେଲେ ଅଧାରୁ ଅଧିକ ଜିଲ୍ଲାରୁ ଏପର୍ଯ୍ୟନ୍ତ ଉଠିନି ଧାନ । ବର୍ଷା ଯୋଗୁଁ ଓଦା ଧାନକୁ ଚାଷୀ ଶୁଖାଇ ବାଧ୍ଯ ହୋଇ ଶାଗ ମାଛ ଦରରେ ଏବେ ଦଲାଲ୍‌କୁ ବିକ୍ରି କରିବାକୁ ବାଧ୍ୟ ହେଉଛି। ବିଶେଷକରି ପଶ୍ଚିମ ଓଡ଼ିଶାରେ କଳାହାଣ୍ଡି,ନୂଆପଡା, ସମ୍ବଲପୁର, ବରଗଡ଼ ଆଦି ଜିଲ୍ଲାରେ ଏଭଳି ସ୍ଥିତି ଦେଖାଦେଇଛି। ଏହା ଉପରେ ସରକାର ଦୃଢ଼ ପଦକ୍ଷେପ ନେବା ପରିବର୍ତ୍ତେ ନିଜର ଆତ୍ମ ପ୍ରଚାର ପାଇଁ ବର୍ଷ ପୂର୍ତି ଉତ୍ସବ କାର୍ଯ୍ୟକ୍ରମରେ ମାତିଛନ୍ତି। ରବି ଧାନ କ୍ରୟ ପାଇଁ ରାଜ୍ୟରେ ମଣ୍ଡି ବ୍ୟବସ୍ଥା ଚାଲୁ ହୋଇଥିବାବେଳେ ଧାନ କିଣାବିକା ଆରମ୍ଭରୁ ବ୍ୟାପକ ଅବ୍ୟବସ୍ଥା ଦେଖାଦେଇଛି । ଏହି କାରଣରୁ ଅନ୍ୟ କୌଣସି ଉପାୟ ନପାଇ ଚାଷୀ ଖୋଲା ବଜାରରେ କ୍ୟୁଣ୍ଟାଲ ପିଛା ମାତ୍ର ୧୫୦୦ରୁ ୨୦୦୦ ଟଙ୍କାରେ ଧାନ ବିକ୍ରି କରିବାକୁ ବାଧ୍ୟ ହେଉଛି । ରାଜ୍ୟ ସରକାର ଯେତେ ଚାଷୀଙ୍କୁ ଧାନ ବିକ୍ରି ପାଇଁ ଟୋକନ ଯୋଗାଇ ଦେଇଥିଲେ, ସେଥିରୁ ପାଖାପାଖି ୧୦ ରୁ ୨୦ ପ୍ରତିଶତ ଚାଷୀଙ୍କ ଟୋକନ୍ ବାତିଲ ହୋଇ ସାରିଲାଣି। ମଣ୍ଡି ଏବଂ ମିଲର ମାନଙ୍କ ଉପରେ ରାଜ୍ୟ ସରକାରଙ୍କ ନିୟନ୍ତ୍ରଣ ନଥିବାରୁ ମିଲର୍ସମାନେ ନିଜ ଇଚ୍ଛା ମୁତାବକ ମଣ୍ଡିରୁ ଧାନ ଉଠାଉଛନ୍ତି । ପ୍ରତି କ୍ୟୁଣ୍ଟାଲରେ ୧୦ ରୁ ୧୨ କେଜି ଧାନ କଟନି ଛଟ୍‌ନି କରୁଛନ୍ତି । ଧାନ ସରକାର କିଣୁଛନ୍ତି ନା ମିଲର୍ସ କିଣୁଛନ୍ତି ବୋଲି ଚାଷୀଙ୍କ ମନରେ ଦ୍ଵନ୍ଦ ସୃଷ୍ଟି ହୋଇଛି। ପଶ୍ଚିମ ଓଡ଼ିଶାରେ ବିଭିନ୍ନ ଅଞ୍ଚଳରେ ଚାଷୀମାନେ ଅଧିକ ଧାନ ଚାଷ କରିଥିଲେ । ସମବାୟରେ ମଣ୍ଡି ପଞ୍ଜିକରଣ ବେଳେ ଏହି ତଥ୍ୟ ମଧ୍ୟ ଦେଇଥିଲେ । ମାତ୍ର ସରକାରଙ୍କୁ କିନ୍ତୁ ଟୋକନ୍ ଯୋଗାଇବାବେଳେ କମ୍ ପରିମାଣରେ ଧାନ କିଣିବା ପାଇଁ ସେଥିରେ ଉଲ୍ଲେଖ ରହିଛି । ଏହି ଚାଷୀମାନେ ବିଶେଷକରି ଛତିଶଗଡ଼ ଓ ବାହାର ରାଜ୍ୟରୁ ଆସୁଥିବା ବେପାରୀମାନଙ୍କୁ ଧାନ ବିକିବାକୁ ବାଧ୍ୟ ହେଉଛନ୍ତି । ତେଣୁ ଏଥିରେ ମୂଳ ଟଙ୍କା ବି ଉଠୁନି ବୋଲି ଶିବ ହାତୀ ଅଭିଯୋଗ କରିଛନ୍ତି। କଳାହାଣ୍ଡି, ବରଗଡ, ବଲାଙ୍ଗୀର, ସୋନପୁର ଆଦି ବହୁ ଜିଲ୍ଲାରେ ଏହାକୁ ନେଇ ଚାଷୀ ମହଲରେ ତୀବ୍ର ଅସନ୍ତୋଷ ବୃଦ୍ଧି ପାଇବାରେ ଲାଗିଛି । ଖରିଫ୍ ଠାରୁ ରବି ପର୍ଯ୍ୟନ୍ତ ଚାଷୀମାନଙ୍କ ଧାନ ବିକ୍ରି ମୁଖ୍ୟ ସମସ୍ୟା ଭାବେ ଠିଆ ହୋଇଛି । ଆରମ୍ଭରୁ ଚାଷୀ ନାହିଁ ନଥିବା ଅସୁବିଧା ଭୋଗୁଥିବା ବେଳେ ରାଜ୍ୟରେ କୃଷି ସମାବେଶ କାହା ପାଇଁ ବୋଲି ସରକାରଙ୍କୁ ଶିବ ହାତୀ ପ୍ରଶ୍ନ କରିଛନ୍ତି । ସରକାର ଚାଷୀଙ୍କ ସମସ୍ୟାକୁ ଗମ୍ଭୀରତାର ସହିତ ବିଚାର କରି ତୁରନ୍ତ ସମାଧାନ କରିବାକୁ ସେ ଦାବି କରିଛନ୍ତି ।