ଭରପୁର ସମ୍ଭାବନା ଥାଇ ମଧ୍ଯ ପ୍ରଶାସନ ର ଉଦ୍ୟମ ନାହିଁ ; ପର୍ଯ୍ୟଟନ ବିଭାଗ ର ଆଢୁଆଳରେ ରହିଛି “ଲୁଙ୍ଗୁରତଲ”…!

ଏଥର ସମ୍ଭାଳ ବ୍ୟୁରୋ (ଗୁଣୁପୁର) – ଭରପୁର ସମ୍ଭାବନା ଥାଇ ମଧ୍ଯ ପ୍ରଶାସନ ର ଉଦ୍ୟମ ନାହିଁ ; ପର୍ଯ୍ୟଟନ ବିଭାଗ ର ଆଢୁଆଳରେ ରହିଛି “ଲୁଙ୍ଗୁରତଲ” । ପ୍ରକୃତିରାଣୀ ର ମନୋରମ ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ରହିଛି ସ୍ଥାନ ହେଲେ ହେଉନି ବିକାଶ । ରାୟଗଡା ଜିଲ୍ଲା ଗୁଣୁପୁର ବ୍ଲକ୍ ଅନ୍ତର୍ଗତ ଲିମାମେଡା ଗ୍ରାମକୁ ଲାଗି ରହିଥିବା ଲୁଙ୍ଗୁରତଲ ପିକନିକ ସ୍ପଟ ଅବହେଳିତ ଅବସ୍ଥାରେ । କୁଳୁକୁଳୁ ନାଦ କରି ବହିଯାଉଛି ପୁଣ୍ୟତୋୟା ପବିତ୍ର ପୁରାଣ ବର୍ଣ୍ଣିତ ମହେନ୍ଦ୍ର ତନୟା ନଦୀ । ପାହାଡ଼ି ନଈ ହୋଇଥିବାରୁ ନଦୀର ଜଳ ସ୍ୱଚ୍ଛ ଓ କ୍ଷିପ୍ର । ନଦୀ ଶଯ୍ୟାରେ ବିସ୍ତୀର୍ଣ୍ଣ ପଥର ଶଯ୍ୟା । ଏହି ପଥର ଗୁଡିକ ଦେଖିବାକୁ ବିଭିନ୍ନ ପଶୁ ଙ୍କ ଆକୃତି । ବିସ୍ତୀର୍ଣ୍ଣ ପଥର ଖୋଲ ମଧ୍ୟରେ ପ୍ରବାହିତ ହେଉଛି ନଦୀର ଧାର । ଯେକେହି ଏହାକୁ ଜଳ ପ୍ରପାତ ବୋଲି ଭାବିବା ସ୍ୱାଭାବିକ । ନଦୀର ଦୁଇ ପାର୍ଶ୍ଵରେ କାଜୁ ତୋଟା ଓ ପଥର ଶଯ୍ୟା । ସୁନ୍ଦର ପିକନିକ ସ୍ପଟ ଭାବେ ଏହି ସ୍ଥାନ ବେଶ ପରିଚିତ । ଶୀତଋତୁ ସାରା ଏଠାକୁ ବିଭିନ୍ନ ଅଞ୍ଚଳରୁ ଅନେକ ଲୋକ ପିକନିକ ପାଇଁ ଆସନ୍ତି । ପିକନିକ ସହ ପ୍ରାକୃତିକ ସୌନ୍ଦର୍ଯ୍ୟ ର ଭରପୁର ମଜାନିଅନ୍ତି । ଏଠାରେ ସୂର୍ଯ୍ୟୋଦୟ ଓ ସୂର୍ଯ୍ୟାସ୍ତ ଦୃଶ୍ୟ ଅତୀବ ମନୋରମ । ଦୁର୍ଭାଗ୍ୟ ବଶତଃ ଏହି ସ୍ଥାନକୁ ପହଞ୍ଚିବାକୁ ଭଲ ରାସ୍ତାଟିଏ ନାହିଁ । ସେଠାରେ ବସାଉଠା କରିବା ପାଇଁ କୌଣସି ବ୍ୟବସ୍ଥା ନାହିଁ । ଆଲୋକୀକରଣ ବ୍ୟବସ୍ଥା ମଧ୍ୟ ନାହିଁ । ତେଣୁ ଭ୍ରମଣ ଉଦ୍ଧେଶ୍ୟରେ ଯାଉଥିବା ଅନେକ ଯାତ୍ରୀ ନାନା ସମସ୍ୟାର ସମ୍ମୁଖୀନ ହେଉଛନ୍ତି । ପ୍ରଥମତଃ ଏଠାରେ ଏକ ସୂଚନା ଫଳକ ନିର୍ମାଣ, ଲିମାମେଡା ସାନ ନଦୀ ପୋଲ ଠାରୁ ଏହି ସ୍ଥାନ ପର୍ଯ୍ୟନ୍ତ ପକ୍କା ରାସ୍ତା ନିର୍ମାଣ, ଲୋକଙ୍କ ବସା ଉଠା ପାଇଁ ଆସନ ନିର୍ମାଣ, ଆଲୋକୀକରଣ ସହ ସୌନ୍ଦର୍ଯ୍ୟ ବର୍ଦ୍ଧିତ ବୃକ୍ଷ ରୋପଣ କରାଗଲେ ଏହି ସ୍ଥାନର ଶ୍ରୀ ବୃଦ୍ଧି ପାଇପାରନ୍ତା ।

ଆକ୍ସନ ମୁଡ୍ ରେ ରାଜସ୍ୱ ବିଭାଗ, ୨ବାଲି ବୋଝେଇ ଟ୍ରାକ୍ଟର ଜବତ; ୪୦ ହଜାର ଟଙ୍କା ଜରିମାନା ଆଦାୟ…!

ଏଥର ସମ୍ଭାଳ ବ୍ୟୁରୋ (ଗୁଣପୁର) – ଗୁଣପୁର ରାଜସ୍ୱ ବିଭାଗ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଇ ବେଆଇନ ଭାବେ ପରିବହନ କରାଯାଉଥିବା ୨ଟି ବାଲି ବୋଝେଇ ଟ୍ରାକ୍ଟର ଜବତ କରାଯାଇ ଥିଲା । କୌଣସି ସୂତ୍ରରୁ ସୂଚନା ପାଇ ଗୁଣପୁର ଉପକଣ୍ଠ ତୁରୁକାନି ଗୁଡା ଗ୍ରାମ ନିକଟସ୍ଥ ବଂଶଧାରା ନଦୀ ବାଲି ଉତ୍ସରୁ ବେଆଇନ ଭାବେ ବାଲି ପରିବହନ କରାଯାଉଥିବା ବେଳେ ତହସିଲଦାର ଶରତ ଚନ୍ଦ୍ର ନାୟକ ଅଚାନକ ଚଢ଼ାଉ କରିଥିଲେ। ସେଠାରୁ ୨ଟି ବାଲି ବୋଝେଇ ଟ୍ରାକ୍ଟର ଜବତ କରି ଗାଡି ମାଲିକ ଜଗା ଗୌଡ଼ ଏବଂ ମାଝୀ ଶବରଙ୍କ ଠାରୁ ଟ୍ରାକ୍ଟର ପ୍ରତି ୨୦ ହଜାର ଟଙ୍କା ଲେଖାଏଁ ମୋଟ ୪୦ ହଜାର ଟଙ୍କା ଜରିମାନା ଆଦାୟ କରିଛନ୍ତି । ଉକ୍ତ ବ୍ୟକ୍ତି ଦୁହେଁ ଦୀର୍ଘ ମାସ ଧରି ପୋଲିସ ଏବଂ ରାଜସ୍ୱ ବିଭାଗ କୁ ଚକମା ଦେଇ ବିଳମ୍ବିତ ରାତ୍ରରୁ ବାଲି ପରିବହନ କରି ଆସୁଥିଲେ। ଖାଲି ସେମାନେ ନୁହଁ ସେହି ଭଳି ଅନେକ୍ ବାଲି ମାଫିଆ ସ୍ଥାନୀୟ ସାନନଦୀ ନିକଟରେ ଥିବା ବେଆଇନ ବାଲି ଉତ୍ସ , ମାଛଖୁଣ୍ଟି ଓ ଲିମାମଡା ବାଲି ଉତ୍ସରୁ ମଧ୍ୟ ବ୍ୟାପକ ବାଲି ଉଠାଇ ମାଫିଆ ମାନେ ଦୌରାତ୍ମ୍ୟ ବଢାଇ ଥିବାରୁ ସେମାନଙ୍କୁ ମଧ୍ୟ ଖୁବ ଶୀଘ୍ର ଚଢ଼ାଉ କରାଯାଇ ରାଜସ୍ୱ ଆଇନ ଅନୁଯାୟୀ ଦଣ୍ଡିତ କରାଗଲା ବିଭାଗ ର ରାଜସ୍ୱ ହାନି ହୋଇ ନଥାନ୍ତା ବୋଲି ବୁଦ୍ଧିଜୀବି ମହଲରେ ଆଲୋଚନା ଜୋର ଧରିଛି ବିଭାଗୀୟ । ଆକ୍ସନ ମୁଡ୍ ରେ ବିଭାଗର ଆତର୍କିତ ଚଢ଼ାଉ ପରେ ବାଲି ମାଫିଆ ଙ୍କ ମଧ୍ୟରେ ଛନକା ପଶିଛି। ଆଗାମୀ ଦିନରେ ମଧ୍ୟ ଚଢ଼ାଉ ଜୋରଦାର କରାଯିବା ସହ ବାଲି ମାଫିଆଙ୍କୁ ସାବାଡ଼ କରାଯିବ ବୋଲି ତହସିଲଦାର ଶରତ ଚନ୍ଦ୍ର ନାୟକ ସୂଚନା ଦେଇଛନ୍ତି। ଦେଖିବାକୁ ରହିଲା ଏତିକି ଜରିମାନା ଆଦାୟ କରି ପ୍ରଶାସନ ଅଧିକାରୀ ଚୁପ୍ ରହୁଛନ୍ତି ନାଁ ଚଡାଉ ପୁଣି ଜୋର୍ ଜାର ଚାଲୁଛି ।

ଶୀତଳଷଷ୍ଠୀ ଯାତ୍ରାରୁ ଫେରିବା ବେଳେ ୨ସାଙ୍ଗଙ୍କୁ ଛୁରାମାଡ଼; ଜଣେ ମୃତ । ସାମ୍ନାକୁ ଆସିଲା ଆକ୍ରମଣ ସମୟର ସିସିଟିଭି ଚିତ୍ର ।

!!! ବଲାଙ୍ଗୀର ରୁ ଜିତେଶ ଶତପଥୀ ଙ୍କ ରିପୋର୍ଟ !!!

ଏଥର ସମ୍ଭାଳ (ବଲାଙ୍ଗୀର) – ଶୀତଳଷଷ୍ଠୀ ଯାତ୍ରାରୁ ଫେରିବା ବେଳେ ଦୁଇ ସାଙ୍ଗଙ୍କୁ ଛୁରାମାଡ଼ । ଛୁରାମାଡ଼ରେ ଜଣଙ୍କର ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି। ଏଭଳି ଅଭାବନୀୟ ଘଟଣା ବଲାଙ୍ଗିର ନୃସିଂହ ମନ୍ଦିର ନିକଟରେ ଘଟିଛି । ମୃତକ ହେଲେ ଗେଟ୍ ସରୋବରପଡ଼ାର ସରୋଜ ପାଣିଗ୍ରାହୀ ଓ ଗୁରୁତର ଜଣଙ୍କ କନ୍ଧପାଳିପଡ଼ାର ପ୍ରେମ ସାହୁ l ଗୁରୁତର ଯୁବକଙ୍କୁ ଭୀମଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ କିଏ ଆଉ କାହିଁକି ଛୁରାମାଡ଼ କରିଛି ତାହା ଏଯାଏଁ ଜଣାପଡିନାହିଁ ସେପଟେ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି l ସୂଚନାମୁତାବକ ବିଳମ୍ବିତ ରାତିରେ ସରୋଜ ଓ ପ୍ରେମ ଉଭୟ ଶୀତଳଷଷ୍ଠୀ ଯାତ୍ରା ଦେଖି ଘରକୁ ଫେରୁଥିଲେ। ନରସିଂହ ମନ୍ଦିର ଛକ ନିକଟରେ ହଠାତ୍ ୨ ଦୁର୍ବୃତ୍ତ ଆସି ସରୋଜଙ୍କୁ ଗାଳିଗୁଲଜ କରିଥିଲେ। ପ୍ରେମ ଏହାକୁ ବିରୋଧ କରିବାରୁ ଦୁ଼ର୍ବୃତ୍ତମାନେ ତାଙ୍କୁ ଛୁରାମାଡ଼ କରିଥିଲେ।

ପରେ ସରୋଜଙ୍କୁ ଛୁରୀରେ ଆକ୍ରମଣ କରି ଘଟଣାସ୍ଥଳରୁ ଚମ୍ପଟ ମାରିଥିଲା ଦୁର୍ବୃତ୍ତ । ସେପଟେ ପୋଲିସ ତଦନ୍ତ ଚଳାଇଥିବା ବେଳେ ସାମ୍ନାକୁ ଆସିଲା ଆକ୍ରମଣ ସମୟର ସିସିଟିଭି ଚିତ୍ର । ତେବେ ପ୍ରେମଙ୍କ କହିବାନୁସାରେ ଯେଉଁ ଦୁଇଜଣ ଯୁବକ ଛୁରାମାଡ କଲେ ସେମାନଙ୍କ ମଧ୍ୟରୁ ସେ ଜଣଙ୍କୁ ଚିହ୍ନିଛନ୍ତି। ତେବେ ତାଙ୍କ ବୟାନ ଅନୁସାରେ ପୁଲିସ ସମ୍ପୃକ୍ତ ବ୍ୟକ୍ତିଙ୍କୁ ଖୋଜୁଛି। କିନ୍ତୁ ଉକ୍ତ ଘଟଣାରେ ବର୍ତ୍ତମାନ ସୁଦ୍ଧା କାହାକୁ ଗିରଫ କରାଯାଇନାହିଁ।

ରିଙ୍କୁ ମେହେର ହତ୍ୟାକାଣ୍ଡ ଘଟଣା ; ମୁଖ୍ୟ ଅଭିଯୁକ୍ତ ସାନ ଭାଇକୁ ଗିରଫ କଲା ପୁଲିସ…!

!!! ବଲାଙ୍ଗୀର ରୁ ଜିତେଶ ଶତପଥି ଙ୍କ ରିପୋର୍ଟ୍ !!!

ଏଥର ସମ୍ଭାଳ (ବଲାଙ୍ଗୀର) -ବଲାଙ୍ଗୀର ରିଙ୍କୁ ମେହେର ହତ୍ୟାକାଣ୍ଡ ଘଟଣା । ମୁଖ୍ୟ ଅଭିଯୁକ୍ତ ସାନ ଭାଇକୁ ଗିରଫ କଲା ପୁଲିସ l ମୁଖ୍ୟ ଅଭିଯୁକ୍ତ ସାନ ଭାଇ ପାରିବାରିକ କଳହରୁ ବଡ଼ ଭାଇକୁ ହାଣି ୮ ଖଣ୍ଡ କରିଥିଲା। ଦୁଇଦିନ ତଳେ ପଲିଥିନରେ ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର କରିଥିଲା ପୁଲିସ। ଅଭିଯୁକ୍ତକୁ ଘଟଣାସ୍ଥଳକୁ ନେଇ ଆଜି ସିନ୍ ରିକ୍ରିଏସନ୍ କରିଛି ପୁଲିସ। ସୂଚନା ଅନୁସାରେ, ମୃତ ଯୁବକ ରିଙ୍କୁ ମେହେର ନିଜ ବାପା ମା’ ଓ ଦୁଇ ଭାଇଙ୍କ ସହ ଭଡାଘରେ ରହୁଥିଲେ । ପ୍ରାୟ ସମୟ ପାରିବାରିକ କନ୍ଦଳ ଲାଗିରହୁଥିଲା । ଏପରିକି କିଛି ଦିନ ତଳେ ରିଙ୍କୁ ନିଜ ବାପାଙ୍କୁ ମାଡ ମାରିଥିବା ବେଳେ ସେ ଗୁରୁତର ଅବସ୍ଥାରେ ବୁର୍ଲା ମେଡିକାଲରେ ଚିକିତ୍ସିତ ହୋଇଥିଲେ । ରିଙ୍କୁ ଏକାକୀ ଭଡାଘରେ ରହୁଥିବା ବେଳେ କିଛି ଦିନ ହେଲା ତାଙ୍କର ଖୋଜ ଖବର ମିିଳିନଥିଲା । ହେଲେ ଦୁଇ ଦିନ ତଳେ ବନ୍ଦ ଘରୁ ତାଙ୍କ ମୃତ ଦେହ ଖଣ୍ଡ ବିଖଣ୍ଡିତ ଅବସ୍ଥାରେ ଉଦ୍ଧାର ହୋଇଥିଲା । ଅଭିଯୁକ୍ତ ରିଙ୍କୁକୁ ହତ୍ୟା କରିବା ସହ ୮ଖଣ୍ଡ କାଟି ପଲିଥିନରେ ପୁରାଇ ରଖିଥିଲା ଦୁର୍ବୁତ୍ତ । ଘଟଣା ସ୍ଥଳରେ ପୁଲିସ ପହଞ୍ଚି ଗଳିତ ମୃତଦହକୁ ବନ୍ଦ କୋଠରୀରୁ ଉଦ୍ଧାର କରିଥିଲା । ପ୍ରାଥମିକ ତଦନ୍ତରୁ ମିଳିଥିବା ସୂଚନା ଅନୁସାରେ, ଘଟଣାଟି ଘଟିଥିଲା ବଲାଙ୍ଗୀର ସହରର ୧୮ ନଂ ୱାର୍ଡ ସାଲେପାଲିପଡାରେ । ପ୍ରାୟ ୨୦ ବର୍ଷ ହେବ ଭଡ଼ାଘରେ ରହୁଥିଲେ ମାର୍କଣ୍ଡ ମେହେର। ମାର୍କଣ୍ଡଙ୍କ ଚାରିପୁଅ। ବଡ଼ପୁଅ ବଲାଙ୍ଗୀର ସହରରେ ରହୁଥିବା ବେଳେ ଆଉ ଜଣେ ପୁଅ ସମ୍ବଲପୁରରେ ରହୁଛନ୍ତି । ତୃତୀୟ ଓ ଚତୁର୍ଥ ପୁଅ, ବାପା ମାର୍କଣ୍ଡ ଏବଂ ମା’ଙ୍କ ସହିତ ସାଲେପାଲିର ଭଡ଼ାଘରେ ରହୁଥିଲେ। ମାର୍କଣ୍ଡଙ୍କ ବଡ଼ପୁଅ କହିବା ଅନୁସାରେ, ତୃତୀୟ ପୁଅ ରିଙ୍କୁ ମାନସିକ ରୋଗୀ ଥିଲେ । ବେଳେ ବେଳେ ରେ ସେ ପରିବାର ଲୋକଙ୍କୁ ମାରପିଟ କରୁଥିଲେ । ୨୦ ଦିନ ତଳେ ରିଙ୍କୁ ନିଜ ବାପା ମାର୍କଣ୍ଡଙ୍କୁ ପ୍ରବଳ ମାଡ଼ ମାରିଥିଲେ । ଗୁରୁତର ଅବସ୍ଥାରେ ମାର୍କଣ୍ଡଙ୍କୁ ବୁର୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିଲା। ୬ ଦିନ ତଳେ ମାର୍କଣ୍ଡ ଡାକ୍ତରଖାନାରୁ ଫେରିଥିଲେ । ତେବେ ପୁଣି ୪ ଦିନ ତଳେ ମାର୍କଣ୍ଡଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ଡାକ୍ତରଖାନାକୁ ନିଆଯାଇଥିଲା । ସାନପୁଅ ଓ ତାଙ୍କ ସ୍ତ୍ରୀ ଶଶୁରମାର୍କଣ୍ଡଙ୍କୁ ବୁର୍ଲା ନେଇଥିବା ବେଳେ ସାଲେପାଲି ଭଡ଼ାଘରେ ୪ ଦିନ ହେଲା ରିଙ୍କୁ ଏକୁଟିଆ ରହୁଥିଲେ । ତେବେ ଗତ ବୁଧବାର ସକାଳୁ ରିଙ୍କୁ ରହୁଥିବା ବନ୍ଦ କୋଠରିରୁ ଦୁର୍ଗନ୍ଧ ଆସୁଥିଲା । ସ୍ଥାନୀୟ ଲୋକଙ୍କଠାରୁ ଖବର ପାଇ ୱାର୍ଡ କାଉନସିଲର ପୁଲିସକୁ ଜଣାଇଥିଲେ । ବଲାଙ୍ଗୀର ଏସ୍‌ଡିପିଓ, ମାଜିଷ୍ଟ୍ରେଟ୍‌ଙ୍କ ସହିତ ଘଟଣାସ୍ଥଳକୁ ଆସି ତାଲା ଖୋଲି ବନ୍ଦ କୋଠରି ଭିତରରେ ପଶି ଭୟଙ୍କର ଦୃଶ୍ୟ ଦେଖିବାକୁ ପାଇଥିଲେ । ଘର ଭିତରେ ମୁଣ୍ଡବିହୀନ ଖଣ୍ଡ ବିଖଣ୍ଡିତ ଶବ ପଡ଼ି ରହିଥିଲା । ସଙ୍ଗେସଙ୍ଗେ ସାଇଣ୍ଟିଫିକ୍‌ ଟିମ୍‌କୁ ଡକାଯାଇଥିଲା । ସାଇଣ୍ଟିଫିକ୍‌ ଟିମ୍‌ ଆସିବାପରେ ବନ୍ଦ ଘରୁ ଶବକୁ ଉଦ୍ଧାର କରାଯାଇଥିଲା । ଶବର ମୁଣ୍ଡ, ହାତ, ଗୋଡ଼କୁ ଗଣ୍ଡିରୁ ଅଲଗା କରି ଦିଆଯାଇଥିଲା । ତା’ସହିତ କଳା ରଙ୍ଗର ୭ଟି ପଲିଥିନ ଭିତରେ କଟାଯାଇଥିବା ଅଙ୍ଗପ୍ରତ୍ୟଙ୍ଗକୁ ଭର୍ତ୍ତି କରାଯାଇଥିଲା ଓ ନିକଟରେ ଫିନାଇଲ ବୋତଲ ମଧ୍ୟ ପଡ଼ିଥିଲା ।

ଜିଲ୍ଲାସ୍ତରୀୟ ପ୍ରାକୃତିକ ବିପର୍ଯ୍ୟୟ କମିଟି ବୈଠକ ଅନୁଷ୍ଠିତ।

ଏଥର ସମ୍ଭାଳ ବ୍ୟୁରୋ (ପାରଳାଖେମୁଣ୍ଡି)- ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ଠାରେ ଥିବା ଜିଲ୍ଲାପରିଷଦ ସମ୍ମିଳନୀ କକ୍ଷଠାରେ ପ୍ରାକୃତିକ ବିପର୍ଯ୍ୟୟ ଜନିତ ଜିଲ୍ଲା ସସ୍ତରୀୟ ବୈଠକ ଲାଇନ୍ ବିଭାଗୀୟ ଅଧିକାରୀମାନଙ୍କ ମଧ୍ୟରେ ଅନୁଷ୍ଠିତ ହୋଇଯାଇଛି । ଏହି ବୈଠକରେ ଗଜପତି ଅତିରିକ୍ତ ଜିଲ୍ଲାପାଳ ଶ୍ରୀଯୁକ୍ତ ରାଜେନ୍ଦ୍ର ମିଞ୍ଜଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବେଳେ ଆନ୍ୟ ଅତିଥି ମାନଙ୍କ ମଧ୍ୟରେ ଜିଲ୍ଲା ପରିଷଦ ଅଧ୍ୟକ୍ଷ ଶ୍ରୀଯୁକ୍ତ ଜି.ତିରୁପତି ରାଓ, ପାରଳା ପୌର ପରିଷଦ ଅଧ୍ୟକ୍ଷା ଶ୍ରୀମତୀ ନିର୍ମଳା ସେଠୀ,କାଶୀନଗର ବିଜ୍ଞାପିତ ଅଞ୍ଚଳ ପରିଷଦ ଅଧ୍ୟକ୍ଷା ଶ୍ରୀମତୀ ଏମ.ସୁଧାରାଣୀ,ଅତିରିକ୍ତ ଆରକ୍ଷୀ ଅଧିକ୍ଷକ ଶ୍ରୀଯୁକ୍ତ ବାମଦେବ ସିଂ, ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟନିର୍ବାହୀ ଅଧିକାରୀ ଜିଲ୍ଲାପରିଷଦ ଶ୍ରୀଯୁକ୍ତ ରୋମାଞ୍ଚଳ ଖମାରୀ ଓ ଉପଜିଲ୍ଲାପାଳ ଶ୍ରୀଯୁକ୍ତ ଆଲୋକ କୁମାର ପ୍ରଧାନ ପ୍ରମୁଖ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମକୁ ଜିଲ୍ଲା ଜରୁୀକାଳୀନ ଅଧିକାରୀ ଶ୍ରୀ ପ୍ରଭାସ ବେହୁରା ପରିଚାଳନା କରି ପ୍ରାକୃତିକ ବିପର୍ଯୟଚ ପ୍ରସ୍ତୁତି ସମ୍ପର୍କରେ ବିଭିନ୍ନ ବିଭାଗର ପ୍ରସ୍ତାବ ଉପସ୍ଥାପନା କରିଥିଲେ ।

ଅତିରିକ୍ତ ଜିଲ୍ଲାପାଳ ଶ୍ରୀଯୁକ୍ତ ମିଞ୍ଜ କହିଥିଲେ ଯେ ଗଜପତି ଜିଲ୍ଲାର ପ୍ରାକୃତିକ ବିପର୍ଯ୍ୟୟ କିପରି ମୁକାିଲାକରିବାକୁ ହେବ ଏବଂ ଯାହାର ମୁକାବିଲାପାଇଁ ଜିଲ୍ଲା ପ୍ରଶାସନ ପକ୍ଷରୁ ସର୍ବଦା ସତର୍କ ରହିବା ଆବଶ୍ୟକ ବୋଲି କହିବା ସହ ପ୍ରଶାସନ ସର୍ବଦା ସରକାରଙ୍କ ନିର୍ଦ୍ଦେଶନାମାକୁ ପାଳନ କରି ପୂର୍ବପ୍ରସ୍ତୁତି ଓ ସଫଳତାର ସହ ମୁକାବିଲା କରିବାରେ ବହୁ ଦୃଷ୍ଟାନ୍ତ ରହିଛି ବୋଳି କହିବା ସହ ପ୍ରାକୃତିକ ବିପର୍ଯ୍ୟୟ ପାଇଁ ବିଭିନ୍ନ ବିଭାଗୀୟ ଅଧିକାରୀମାନେ କିପରି ପ୍ରସ୍ତୁତି କରିଛନ୍ତି ସେ ବିଷୟରେ ସବିଶେଷ ବିବରଣୀ ଉପରେ ଆଲୋଚନା କରିଥିଲେ । ସେହିପରି ଅପହଞ୍ଚ ଅଞ୍ଚଳରେ କିରୋସିନ, ମହମବତୀ, ଦିଆସିଲ ଏବଂ ଶୁଖିଲାଖାଦ୍ୟ ଆଦି ମହଜୁଦ ରଖିବାକୁ ଯୋଗାଣ ବିଭାଗକୁ ନିର୍ଦ୍ଦେଶ ଦିଆଯାଇଛି। ସମସ୍ତ ବ୍ଲକ, ତହସିଲ ଓ ସହର ଅଞ୍ଚଳ ସ୍ତରରେ ପ୍ରଚୁର ପରିମାଣରେ ରିଲିଫ ସାମଗ୍ରୀ, ବନ୍ୟା ସମୟରେ ପ୍ରସୂତି ମହିଳାଙ୍କ ପାଇଁ ସ୍ଥାନାନ୍ତରିଣ ଓ ଚିକିତ୍ସା ଯୋାଇଦେବା ଉପରେ ଗୁରୁତ୍ବ ଦିଆଯାଇଛି। ସେହିପରି କ୍ଷୁଦ୍ର ଜଳସେଚନ ବିଭାଗ, ଜିଲ୍ଲା ଯୋଗାଣ ବିଭାଗ, ପୂର୍ତ୍ତ ବିଭାଗ, ଜନସ୍ୱାସ୍ଥ୍ୟ ବିଭାଗ, ଗ୍ରାମ୍ୟ ପରିମଳ ଓ ଜଳଯୋଗାଣ ବିଭାଗ, ସ୍ୱାସ୍ଥ୍ୟ ବିଭାଗ, ବନ ବିବାଗ, ପ୍ରାଣୀ ସମ୍ପଦ ବିଭାଗ ଏବଂ ବିଦ୍ୟୁତ, ଟେଲିକମ୍ ବିଭାଗ ପ୍ରଭୃତି ବିଭାଗ ଗୁଡିକ ପ୍ରାକୃତିକ ବିପର୍ଯ୍ୟୟ ସମୟରେ କିପରି ନିଜ ନିଜର ଦାୟିତ୍ୱ ସମ୍ପର୍ଣ୍ଣ କରିବେ ସେ ବିଷୟରେ ପୁଙ୍ଖାନୁପୁଙ୍ଖ ଆଲୋଚନା ହୋଇଥିଲା । ମୁଖ୍ୟତଃ ଏନ୍‌ଡିଆର୍‌ଏଫ, ଓଡ୍ରାଫ ଓ ଅଗ୍ନିଶମ ବିଭାଗର ପ୍ରାକୃତିକ ବିପର୍ଯ୍ୟୟ ସମୟରେ ଗୁରୁଦାୟିତ୍ୱ ରହିଥିବାବେଳେ ସେମାନେ ଧନଜୀବନକୁ ରକ୍ଷା କରିବାପାଇଁ ସର୍ବଦା ପ୍ରସ୍ତୁତ ହୋଇ ରହିବା ଆବଶ୍ୟକ ବୋଲି କୁହାଯାଇଥିଲା । ସେହିପରି ଆଞ୍ଚଳିକ ପରିବହନ ବିଭାଗ କିପରି ବିପର୍ଯ୍ୟୟ ସମୟରେ ବିଭିନ୍ନ ଯାତ୍ରୀବାହୀ ଓ ମାଲବଝୋଇ ଗାଡି ପ୍ରସ୍ତୁତି କରି ରଖିବେ ସେଥିପ୍ରତି ଦୃଷ୍ଟି ଆକର୍ଷଣ କରାଯାଇଥିଲା।

ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସମସ୍ତ ବିଡ଼ିଓ, ତହସିଲଦାର ,ପାରଳାଖେମୁଣ୍ଡି ଓ କାଶୀନଗର କାର୍ଯ୍ୟନିର୍ବାହୀ ଅଧିକାରୀ ସମେତ ଜିଲ୍ଳାର ସମସ୍ତ ଲାଇନ୍ ବିଭାଗୀୟ ଅଧିକାରୀ ଗଣ ପ୍ରମୁଖ ଉପସ୍ଥିତଥିଲେ । ଏହି କାର୍ଯ୍ୟକ୍ରମକୁ ଜିଲ୍ଲା ଜରୁରୀ କାଳୀନ ଅଧିକାରୀ ଶ୍ରୀ ପ୍ରଭାସ ବେହୁରା ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ଶେଷରେ ଜିଲ୍ଲା ବିପର୍ଯ୍ୟୟ ପରିଚାଳନା ଅଧିକାରୀ ଶ୍ରୀ ପ୍ରଦୋଷ କୁମାର ଶତପଥୀ ଧନ୍ୟବାଦ ଅର୍ପଣ କରିଥିଲେ ।

ଅସହାୟ ୫ଟି ଶିଶୁଙ୍କୁ ଉଦ୍ଧାର କରି ଥଇଥାନ କଲା ଗଜପତି ଜିଲ୍ଲା ପ୍ରଶାସନ…!

ଏଥର ସମ୍ଭାଳ ବ୍ୟୁରୋ (ପାରଳାଖେମୁଣ୍ଡି)- ମୋହନା ବ୍ଲକ୍ ର ଅନ୍ତରବା ଏବଂ ଆଲିଗଣ୍ଡା ଗ୍ରାମରେ ପିତାଙ୍କୁ ହରାଇ ଅତି ଦୟନୀୟ ଅବସ୍ଥାରେ ବାସ କରୁଥିବା 5 ଜଣ ଶିଶୁଙ୍କୁ ଉଦ୍ଦାର କଲା ଗଜପତି ଜିଲ୍ଲା ପ୍ରଶାସନ। ସୂଚନା ପ୍ରକାରେ ଆଲିଗଣ୍ଡା ଗ୍ରାମର ଜୀବନ ମଲ୍ଲିକଙ୍କ ଆକସ୍ମିକ ମୃତ୍ୟୁ ପରେ ତାଙ୍କ ସ୍ତ୍ରୀ ଶାନ୍ତି ମଲ୍ଲିକ ନିଜର ମାନସିକ ଭାରସାମ୍ୟ ହରାଇ ବସିଥିଲେ। ଯାହା ଦ୍ବାରା କି ପାଞ୍ଚଟି ଛୁଆଙ୍କ ଲାଲନପାଳନ ତାଙ୍କ ପକ୍ଷେ ଅସମ୍ଭବ ହୋଇପଡ଼ିଲା। ବିଭିନ୍ନ ସୂତ୍ରରୁ ଖବର ପାଇବା ପରେ ଜିଲ୍ଲାପାଳ ଙ୍କ ର ନିର୍ଦ୍ଦେଶ କ୍ରମେ ଚାଇଲଡଲାଇନ୍ ଏବଂ ଶିଶୁ ଯତ୍ନ ଅନୁଷ୍ଠାନ, ଜରାଉର କର୍ମକର୍ତ୍ତା 3ଟି ପୁତ୍ର ସନ୍ତାନଙ୍କୁ ଉଦ୍ଧାର କରି ଶିଶୁ ମଙ୍ଗଳ ସମିତିର ନିର୍ଦ୍ଦେଶ କ୍ରମେ ଡ଼େ ଷ୍ଟାର ହୋମ୍ ଶିଶୁ ଯତ୍ନ ଅନୁଷ୍ଠାନ, ଜରାଉ, ମୋହନା ରେ ଥଇଥାନ କରିଛନ୍ତି ଏବଂ ସେମାନଙ୍କର ଅଧାରହିଯାଇଥିବା ଶିକ୍ଷା କିପରି ପୁର୍ଣ୍ଣ ହେବ ସେଥିପ୍ରତି ମଧ୍ୟ ଦୃଷ୍ଟି ଦିଆଯାଇଛି। ଏବଂ ଏହି ମହିଳାଙ୍କର ଅନ୍ୟ 2ଟି ଝିଅଙ୍କ ଯତ୍ନ ନେବା ଲାଗି ସିଡିପିଓ, ମୋହନା ଙ୍କୁ ଅନୁରୋଧ କରାଯାଇଛି।ମାନସିକ ଭାରସାମ୍ୟ ହରାଇଥିବା ମାର ମଧ୍ୟ ଚିକିତ୍ସାକୁ ସୁନିଶ୍ଚିତ କରିବା ପାଇଁ ଜିଲ୍ଲା ମୁଖ୍ଯ ଚିକିତ୍ସାଧକାରୀ, ଗଜପତି ଙ୍କୁ ଅନୁରୋଧ କରାଯାଇଛ।

ସେହିପରି ଅନ୍ତରବା ଗ୍ରାମର ଲୋକା ବିରଙ୍କର ମୃତ୍ୟୁ ପରେ ପରିବାର ପ୍ରତିପୋଷଣ କରିବାରେ ଅସମର୍ଥ ତଥା ପିଲାମାନଙ୍କ ଭବିଷ୍ୟତକୁ ନେଇ ଚିନ୍ତାରେ ଥିବା ରୂପା ବୀର ଙ୍କର 2ଟି ସନ୍ତାନଙ୍କୁ ମଧ୍ୟ ଥଇଥାନ ଏବଂ ଉଚିତ୍ ଶିକ୍ଷା ନିମନ୍ତେ ଡ଼େ ଷ୍ଟାର ହୋମ୍ ଶିଶୁ ଯତ୍ନ ଅନୁଷ୍ଠାନ, ଜରାଉ, ମୋହନା ରେ ଥଇଥାନ କରାଯାଇଛି ।

ଉପରୋକ୍ତ 5 ଟି ଶିଶୁଙ୍କ ଶିକ୍ଷା ଏବଂ ଭବିଷ୍ୟତକୁ ନେଇ ଜିଲ୍ଲା ପ୍ରଶାସନ ସଜାଗ ରହିଥିବା ପ୍ରକାଶ କରିଛନ୍ତି ଜିଲ୍ଲା ଶିଶୁ ସୁରକ୍ଷା ଅଧିକାରୀ ଶ୍ରୀଯୁକ୍ତ ଅରୁଣ କୁମାର ତ୍ରିପାଠୀ।

ପିତୃମାତୃ ହୀନ ଶିଶୁଙ୍କ ଦଶମ ପରୀକ୍ଷାରେ ଶତ ପ୍ରତିଶତ ସଫଳତା ।

ଏଥର ସମ୍ଭାଳ ବ୍ୟୁରୋ (ପାରଳାଖେମୁଣ୍ଡି)-ପ୍ରାକୃତିକ ଦୁର୍ବିପାକ ଏବଂ କୋଭିଡ଼ ମହାମାରୀ ସିନା ପିଲାମାନଙ୍କ ଠାରୁ ବାପା ଓ ମାଙ୍କୁ ନେଇଗଲା କିନ୍ତୁ ଜିଲ୍ଲାପାଳ ଶ୍ରୀଯୁକ୍ତ ଲିଙ୍ଗରାଜ ପଣ୍ଡା ଙ୍କ ନେତୃତ୍ବରେ ଜିଲ୍ଲା ପ୍ରଶାସନ କିନ୍ତୁ ପିଲାମାନଙ୍କୁ ବାପା ମାଁ ର ସ୍ନେହ, ମମତା, ଯତ୍ନ ଏବଂ ସୁରକ୍ଷାରେ ଏପରି ବାନ୍ଧି ରଖିଛି ଯେ ପିଲାମାନେ ଆଜି ପ୍ରକାଶ ପାଇଥିବା ଓଡ଼ିଶା ସରକାର ଦଶମ ଶ୍ରେଣୀ ପରୀକ୍ଷାରେ ଶତକଡ଼ା ୭୦ ରୁ ୯୦ ପ୍ରତିଶତ ମାର୍କ ରଖି କୃତକାର୍ଯ୍ୟ ହୋଇଛନ୍ତି।
ତେଣୁ ଅତିରିକ୍ତ ଜିଲ୍ଲାପାଳ ଶ୍ରୀଯକ୍ତ ବିରେନ୍ଦ୍ର କୁମାର ଦାସ ଆଜି ପ୍ରାଉଡ଼୍ ବାଳିକା ଶିଶୁ ଯତ୍ନ ଅନୁଷ୍ଠାନକୁ ଯାଇ ଏହି ଖୁସି ମୁହୁର୍ତ୍ତରେ ପିଲାମାନଙ୍କ ସହ କିଛି ସମୟ କଟାଇବା ସହ ମିଠା ଖୁଆଇ ପିଲାମାନଙ୍କୁ ଅଭିନନ୍ଦନ ଜଣାଇଥିଲେ। ଏହି ଅବସରରେ ଶ୍ରୀ ଦାସ ପିଲାମାନଙ୍କୁ ସମ୍ବର୍ଦ୍ଧିତ କରି କହିଥିଲେ ଯେ ପିଲାମାନେ ଆଗକୁ କିପରି ଆହୁରି ଭଲ କରିବେ ସେଥିପ୍ରତି ଧ୍ୟାନ ଦେବେ ଏବଂ ଜିଲ୍ଲା ପ୍ରଶାସନ ସେମାନଙ୍କ ପାଖରେ ପ୍ରତି ମୂହୁର୍ତ୍ତରେ ଛିଡ଼ା ହୋଇଥିବା କଥା କହି ଉତ୍ସାହିତ କରିଥିଲେ।
ଯେଉଁ ଶିଶୁମାନେ ଆଜିର ଦିନରେ ଦଶମ ପରୀକ୍ଷାରେ ଭଲ କରିଛନ୍ତି ସେମାନେ ହେଉଛନ୍ତି ତିତିଲି ମହାବାତ୍ୟା ଏବଂ କୋଭିଡ଼ ମହାମାରୀ ରେ ନିଜର ପିତାମାତାଙ୍କୁ ହରାଇ ସରକାର ଏବଂ ଜିଲ୍ଲା ପ୍ରଶାସନର ସହଯୋଗରେ ରହିଆସୁଥିବା ଶିଶୁମାନେ ।
ଗଜପତି ଜିଲ୍ଲାର ପିତୃମାତୃ ହରାଇ ବିଭିନ୍ନ ଶିଶୁଯତ୍ନ ଅନୁଷ୍ଠାନ ମାନଙ୍କରେ ରହିଆସୁଥିବା ଶିଶୁ ମାନଙ୍କ ଭିତରୁ ୨୦ ଜଣ ଶିଶୁ ଦଶମ ଶ୍ରେଣୀ ବୋର୍ଡ଼ ପରୀକ୍ଷା ଦେଇଥିଲେ। ସେଥିମଧ୍ୟରୁ ସମସ୍ତ ଶିଶୁ କୃତକାର୍ଯ୍ୟ ହୋଇଥିଲାବେଳେ ଜଣେ ଶିଶୁ ଶତକଡ଼ା ୮୦ ରୁ ଉର୍ଦ୍ଧ୍ବ ମାର୍କ ରଖି A2 ରେ ସ୍ଥାନ ପାଇଥିବା ବେଳେ ସେମାନଙ୍କ ଭିତରୁ ୧୦ ଜଣ ଶିଶୁ ଶତକଡ଼ା ୭୫ ରୁ ଉର୍ଦ୍ଧ୍ବ ମାର୍କ ରଖି B1 ରେ ସ୍ଥାନ ପାଇଛନ୍ତି।
A2 ଏବଂ B1 ସ୍ଥାନ ପାଇଥିବା ଶିଶୁ ମାନଙ୍କ ମଧ୍ୟରୁ ଜଣେ ତିତିଲି ମହାବାତ୍ୟାରେ ଅନାଥ ହୋଇଥିଲା ବେଳେ ଅନ୍ୟ ଦୁଇଜଣ କୋଭିଡ଼ ମହାମାରୀରେ ନିଜର ପିତା ମାତାଙ୍କୁ ହରାଇ ଜିଲ୍ଲା ପ୍ରଶାସନ ଏବଂ କିଛି ସ୍ବେଚ୍ଛାସେବୀ ଅନୁଷ୍ଠାନ ମାନଙ୍କ ସହାୟତାରେ ବଢ଼ିଚାଲିଛନ୍ତି।
ପ୍ରକାଶ ଥାଉକି ଯେ କୋଭିଡ଼ ମହାମାରୀରେ କୋଭିଡ଼ ଯୋଗୁଁ ନିଜ ମାତା ପିତାଙ୍କୁ ହରାଇ PM Care for Children Scheme ରେ ସ୍ଥାନ ପାଇଥିବା 8 ଜଣ ଶିଶୁଙ୍କ ମଧ୍ୟରୁ ଜଣେ ଶିଶୁ ଶତକଡ଼ା ୯୩ ମାର୍କ ରଖି A1 ରେ ସ୍ଥାନ ପାଇଛନ୍ତି।
ଆଜି ଦିନରେ କୃତକାର୍ଯ୍ୟ ହୋଇଥିବା ୨୦ ଜଣଙ୍କ ମଧ୍ୟରୁ ଚାରିଜଣ ଶିଶୁ ବିବେକାନନ୍ଦ ରେସିଡ଼ନ୍ସିଆଲ୍ ସ୍କୁଲ, ଏସ୍.ଉରୁଡ଼ା, ଚାରି ଜଣ ଶିଶୁ ଶ୍ରୀଜଗନ୍ନାଥ ନିକେତନ,ଆର୍.ସୀତାପୁର, ଚାରି ଜଣ ଶିଶୁ ପ୍ରାଉଡ଼, ବି.ସୀତାପୁର, ତିନି ଜଣ ଶିଶିୁ ନିସାନ ସାଲୋମ ଚିଲ୍ଡ୍ରେନ୍ ହୋମ୍, ଗୁମ୍ମା ଏବଂ ଅନ୍ୟ ପାଞ୍ଚଜଣ ଶିଶୁ ଡ଼େ ଷ୍ଟାର ହୋମ୍, ଜରାଉ, ମୋହନା ଶିଶୁଯତ୍ନ ଓ ସୁରକ୍ଷା ଅନୁଷ୍ଠାନରେ ରହି ଆସୁଛନ୍ତି।
ଆଗାମୀ ଦିନରେ ଶିଶୁମାନଙ୍କ ଉଚ୍ଚଶିକ୍ଷା ପାଇଁ ଶିଶୁମାନଙ୍କ ଇଚ୍ଛା ମୁତାବକ ଅନୁଷ୍ଠାନରେ ନାମ ଲେଖାଇ ସମସ୍ତ ସହଯୋଗ ଯୋଗାଇବା ପାଇଁ ଜିଲ୍ଲା ପ୍ରଶାସନ ପ୍ରତିଶ୍ରୁତି ଦେଇଛି।

ଜୟପୁର ଠାରେ ଦ୍ବିତୀୟ ରାଷ୍ଟ୍ରୀୟ ଲୋକ ଅଦାଲତ ଅନୁଷ୍ଠିତ।

!!! ଜୟପୁର ରୁ ପ୍ରବୀର ପାତ୍ର ଙ୍କ ରିପୋର୍ଟ !!!

ଏଥର ସମ୍ଭାଳ (ଜୟପୁର)- କୋରାପୁଟ ଜିଲ୍ଲା ଜୟପୁର ଜିଲ୍ଲା କୋର୍ଟ ପରିସରରେ ଜିଲ୍ଲା ଆଇନ ସେବା ପ୍ରାଧିକରଣ ଆନୁକୂଲ୍ୟରେ ଆଜି ୨୯୫୭ ମାମଲାର ଫୈସଲା କରାଯାଇଛି।ଆଜି କୋରାପୁଟ, କୋଟପାଡ଼, ବୋରିଗୁମ୍ମା, ଲକ୍ଷ୍ମୀପୁର, ଦଶମନ୍ତପୁର, ସେମିଲିଗୁଡା, ଲମତାପୁଟର ବିଭିନ୍ନ ଅଦାଲତରେ ପଡିରହିଥିବା ଭିନ୍ନ ଭିନ୍ନ ଜିଲ୍ଲାର ଅନ୍ୟାନ୍ୟ ବିଚାରାଳୟ ପରିସରରେ ୨୦୨୩ ଦ୍ଵିତୀୟ ରାଷ୍ଟ୍ରୀୟ ଲୋକଅଦାଲତ ଅନୁଷ୍ଠିତ ହୋଇଯାଇଛି। ଏହି ରାଷ୍ଟ୍ରୀୟ ଲୋକ ଅଦାଲତରେ ପ୍ରାୟ ସମସ୍ତ ପ୍ରକାରର ବିଚାରାଧିନ ମକଦ୍ଦମା ଯଥା ଦେୱାନୀ, ଫୌଜଦାରୀ (ସାଲିସ୍ ଯୋଗ୍ୟ), ମୋଟର ଦୁର୍ଘଟଣା ଜନିତ କ୍ଷତିପୂରଣ, ବ୍ୟାଙ୍କ ଋଣ, ବିଦ୍ୟୁତ୍ ଓ ଜଳଯୋଗାଣ, ପାରିବାରିକ, ଜମି ଅଧିଗ୍ରହଣ, ଶ୍ରମ ବିବାଦ, ଚେକ୍ ବାଉନ୍ସ ମାମଲା ଇତ୍ୟାଦିର ଆପୋଷ ସହମତିରେ ସମାଧାନ କରାଯାଇଥିଲା ଏଥିସହ ପ୍ରାକ୍ ମକଦ୍ଦମା ସ୍ତରୀୟ (କଚେରୀରେ ଦାୟର ହୋଇନଥିବା) ବ୍ୟାଙ୍କ ଋଣ ବିବାଦ, ଶ୍ରମବାଦ, ପାରିବାରିକ ବିବାଦ ଇତ୍ୟାଦିର ମଧ୍ୟ ସମାଧାନ ଏହି ରାଷ୍ଟ୍ରୀୟ ଲୋକ ଅଦାଲତରେ ହୋଇଥିଲା । ଜୟପୁରର ଏହି ରାଷ୍ଟ୍ରୀୟ ଲୋକ ଅଦାଲତରେ ଜିଲ୍ଲା ଦୌରାଜଜ୍ ଶ୍ରୀ ସତ୍ୟନାରାୟଣ ମିଶ୍ର, ସ୍ବତନ୍ତ୍ର ଭିଜିଲାନସ୍ ଜଜ୍ ଶ୍ରୀ ରାଜେଶ୍ ଏକ୍କା, ଅତିରିକ୍ତ ଜିଲ୍ଲା ଦୌରା ଜଜ୍ ଶ୍ରୀ ଇ.ବିଶ୍ଳେଶ୍ବର ରାଓ, ପରିବାର ଅଦାଲତର ବିଚାରପତି ଡଃ ପବିତ୍ର ମୋହନ ସାମଲ, ଅତିରିକ୍ତ ଜିଲ୍ଲା ଓ ଦୌରା ଜଜ୍ ତଥା ସ୍ବତନ୍ତ୍ର ପୋକ୍ସ ଅଦାଲତ ଶ୍ରୀ ସି.ଏଚ୍. ବାସୁଦେବ ପାତ୍ର, ବରିଷ୍ଠ ଦେୱାନୀ ବିଚାରପତି, ସି.ଜେ.ଏମ୍. ଶ୍ରୀ ଦିଲ୍ଲୀପ କୁମାର ସାହୁ ରେଜିଷ୍ଟ୍ରାର ସିଭିଲକୋର୍ଟ ଶ୍ରୀ ବି.ପ୍ରସାଦ ଦେବତା, ଶ୍ରୀମତୀ ରେଖାରାଣୀ ପଣ୍ଡା, ବରିଷ୍ଠ ଦେୱନୀ ବିଚାରପତି ତଥା ସହାୟକ ଦୌରା ଜଜ୍ ଶ୍ରୀମତୀ ଅଞ୍ଜଳୀ ମାଛଖଣ୍ଡ, ଜିଲ୍ଲା ଆଇନ ସେବା ପ୍ରାଧିକରଣ, ସଚିବ ଶ୍ରୀ ସୁମନ ଜେନା ଏସ୍.ଡି.ଜେ.ଏମ୍. ଶ୍ରୀ ସଞ୍ଜୟ କୁମାର ବାରିକ, ପ୍ରଥମ ଶ୍ରେଣୀ ବିଚାର ବିଭାଗୀୟ, ଦଣ୍ଡାଧିକାରୀ କୁମାର ବେହେରା ଉପସ୍ଥିତ ରହି ମକଦ୍ଦମା ସମାଧାନ କରିଥିଲେ । ଏହା ବ୍ୟତୀତ ଜୟପୁର ଓକିଲ ସଂଘର ବରିଷ୍ଠ ଆଇନ ଜୀବୀ ଶ୍ରୀ ଶଶାନନ୍ଦ ମିଶ୍ର, ଶ୍ରୀ ପି.ଇଶ୍ବର ରାଓ, ଶ୍ରୀ ଆନନ୍ଦ ରଥ, ଶ୍ରୀ ସୁଧିର କୁମାର ପାଢୀ, ଶ୍ରୀ ଗୋପବନ୍ଧୁ ସାନ୍ତା, ଶ୍ରୀ ସୁନିଲ କୁମାର ମହାନ୍ତି, ଶ୍ରୀ ଜ୍ୟୋତିରଞ୍ଜନ ପୁଜାରୀ, ଶ୍ରୀ ଗିରିଧର ଖୋରା, ଏସ.ଏମ. ଦିନବନ୍ଧୁ ଶ୍ରୀ ନିର୍ଭିକ ସାମନ୍ତରାଏ, ପ୍ରମୁଖ ଉପସ୍ଥିତ ରହି ରାଷ୍ଟ୍ରୀୟ ଲୋକ ଅଦାଲତରେ ବିଭିନ୍ନ କେଶ ଗୁଡିକର ସମାଧାନ କରିବାରେ ସହଯୋଗ କରିଥିଲେ । ଏହି ରାଷ୍ଟ୍ରୀୟ ଲୋକ ଅଦାଲତରେ ସମୁଦାୟ ମୋଟ ୭୯ କ୍ରିମିନାଲ କମ୍ପାଉଣ୍ଡବେଲ୍ ମଧ୍ୟରୁ ୦୫ ଟି ଫେସଲା ହୋଇଥିଲା, ଏନ.ଆଇ.ଆ ୭୩ ଟି ମଧ୍ୟରୁ ୨୫ ଟି ଫେସଲା ହୋଇ ୧୦୪୬୮୪୮୩ ଟଙ୍କା ଧାର୍ଯ୍ୟ ହୋଇଥିଲା, ବ୍ୟାଙ୍କ ମାମଲା ୯୮ ଟି ମଧ୍ୟରୁ ୦୯ ଫେସଲା ହୋଇ ୬୬୨୭୫୯ ଟଙ୍କା ଧାର୍ଯ୍ୟ ହୋଇଥିଲା, ମୋଟର ଦୁର୍ଘଟଣା ଜନିତ କ୍ଷତିପୁରଣ ୧୮୪ ଟି ମଧ୍ୟରୁ ୨୩ ଟି ଫେସଲା ହୋଇ ୧୨୧୩୦୦୦୦ ଟଙ୍କା ଧାର୍ଯ୍ୟ ହୋଇଥିଲା, ଶ୍ରମବିବାଦ, ପାରିବାରିକ ବୈବାହିକ ମାମଲା ୧୯ ମଧ୍ୟରୁ ୧୩ ଟି ଫେସିଲା ହୋଇ ୧୫୩୪୦୦ ଟଙ୍କା ଧାର୍ଯ୍ୟ ହୋଇଥିଲା, ସେହିପରି ଅନ୍ୟାନ୍ୟ ସିଭିଲ୍ କେଶ୍ ୩୮ଟି ମଧ୍ୟରୁ୧୮ଟି ଫେସଲା କରାଯାଇ ୫୦୦୦୦୦ ଟଙ୍କା ଧାର୍ଯ୍ୟକରାଯାଇଥିଲା। ଗ୍ରାହକ ବିବାଦ ୧୦ ମଧ୍ୟରୁ ୦୧ ଫେସଲା କରାଯାଇଥିଲା, ଅନ୍ୟାନ୍ୟ କ୍ରିମିନାଲ ବିବାଦ ମଧ୍ୟରେ ୧୮୧ ମଧ୍ୟରୁ ୬୧ଟି ଫେସଲା କରାଯାଇଥିଲା । ସେହିପରି ଜିଲ୍ଲାର ବିଭିନ୍ନ ତହସିଲ ଓ ରାଜସ୍ବ ବିଭାଗ ଦ୍ବାରା ୨୬୪୧ ମାମଲା ମଧ୍ୟରୁ ୨୫୬୮ ଫୈସଲା କରାଯାଇ ୨୯୭୪୪୮ ଟଙ୍କା ଆଦାୟ ହୋଇଥିଲା, 1. ଏବଂ ପ୍ରାକ୍-ମକଦ୍ଦମା ସ୍ତରୀୟ (କଚେରୀ ଦାୟର ହୋଇନଥିବା) କେଶ୍ ମଧ୍ୟରେ ବ୍ୟାଙ୍କ ବିବାଦ ଓ ଅନ୍ୟ ମକଦ୍ଦମା ବିବାଦ ୧୭୭୫ ମାମଲା ମଧ୍ୟରୁ ୨୩୪ ଟି ସମାଧାନ କରାଯାଇ ୭୭୨୨୫୮୧ – ଟଙ୍କା ଧାର୍ଯ୍ୟ କରାଯାଇଥିବା ସୂଚନା ମିଳିଛି।

ବସଷ୍ଟାଣ୍ଡ କାର୍ଯ୍ୟ ତୁରନ୍ତ ସାରିବାକୁ ରାଜ୍ୟପାଳ ଉଦ୍ଧେଶ୍ୟରେ ଦାବିପତ୍ର…!

!!! ଜୟପୁର ରୁ ପ୍ରବୀର ପାତ୍ର ଙ୍କ ରିପୋର୍ଟ !!! 

ଏଥର ସମ୍ଭାଳ(ଜୟପୁର)- ଜୟପୁରରେ ଅର୍ଦ୍ଧ ନିର୍ମିତ ଅବସ୍ଥାରେ ପଡ଼ି ରହିଥିବା ଓଏସଆରଟି ବସଷ୍ଟାଣ୍ଡ ତୁରନ୍ତ ନିର୍ମାଣ ନେଇ ଆଜି କୋରାପୁଟ ଜିଲ୍ଲାପାଳଙ୍କ ଜରିଆରେ ମହାମହିମ ରାଜ୍ୟପାଳଙ୍କୁ ଜୟପୁର ଜନ କଲ୍ୟାଣ ମଞ୍ଚ ପକ୍ଷରୁ ଏକ ଦାବିପତ୍ର ପ୍ରଦାନ କରାଯାଇଛି । ଏହି ପତ୍ରରେ ଦର୍ଶାଯାଇଛି ଯେ, ଜୟପୁର ସହର ହେଉଛି ଅବିଭକ୍ତ କୋରାପୁଟ ଜିଲ୍ଲାର ପ୍ରାଣକେନ୍ଦ୍ର । ସେହିପରି ଏହି ସହରରେ ରହିଥିବା ବସଷ୍ଟାଣ୍ଡକୁ ମଧ୍ୟ ଓଡ଼ିଶା ସହ ଆନ୍ଦ୍ରପ୍ରଦେଶ, ତେଲେଙ୍ଗାନା, ଛତିଶଗଡ଼ର ବହୁ ଅଂଚଳ ବାସିନ୍ଦା ନିର୍ଭର କରନ୍ତି । ଏଠାରୁ ବିଭିନ୍ନ ରାଜ୍ୟର ରାଜଧାନୀ ବିଶେଷ କରି ରାୟପୁର, ହାଇଦ୍ରାବାଦ, ଭୁବନେଶ୍ୱର ସହ ବିଜୟୱାଡା, ବିଶାଖାପାଟଣା ଭଳି ସହରକୁ ଯାତ୍ରୀବାହି ବସ ଚଳାଚଳ କରେ । ପ୍ରତ୍ୟେହ ଶହ ଶହ ବସର ହଜାର ହଜାର ଯାତ୍ରୀଙ୍କ ସୁବିଧା ପାଇଁ ରାଜ୍ୟ ସରକାର ଏଠାରେ ଏକ ବିଶ୍ୱସ୍ତରୀୟ ବସ ଟର୍ମିନାଲ ପ୍ରତିଷ୍ଠା ନିଷ୍ପତ୍ତି ନେଇଥିଲେ । ଏପରିକି ୧୨ କୋଟିରୁ ଅଧିକ ଟଙ୍କା ବ୍ୟୟ ଅଟକଳ କରି ରାଜ୍ୟ ପରିବହନ ନିଗମ ଅଧୀନରେ ରହିଥିବା ଜମି ମଧ୍ୟ ଯୋଗାଇ ଦେଇଥିଲେ । ନିଜେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତ ୨୩-୧୨-୨୦୧୬ ମସିହାରେ ଜୟପୁର ଆସି ଏହାର ଶୁଭ ଦେଇଥିଲେ । କିନ୍ତୁ ଦୁର୍ଭାଗ୍ୟ ୭ ବର୍ଷ ବିତିଯାଇଥିଲେ ମଧ୍ୟ ଲୋକଙ୍କୁ ଏହି ବସଷ୍ଟାଣ୍ଡର ସୁବିଧା ମିଳୁ ନାହିଁ । ଫଳରେ ପ୍ରତିଦିନ ବସଯାତ୍ରୀ ମାନେ ନାନା ଦୁର୍ଦ୍ଦଶାର ସମ୍ମୁଖିନ ହୋଇଚାଲିଛନ୍ତି । ଯାହାକି ଭାରତ ଭଳି ଏକ ଜନମଙ୍ଗଳ ରାଷ୍ଟ୍ର ପାଇଁ ଶୋଭନୀୟ ନୁହେଁ । କେବଳ ସେତିକି ନୁହେଁ ମୁଖ୍ୟମନ୍ତ୍ରୀ ନିଜେ ଶୁଭ ଦେଇଥିବା ଏହି କାର୍ଯ୍ୟକୁ ବିଳମ୍ବ କରୁଥିବାରୁ ଏହା ମୁଖ୍ୟମନ୍ତ୍ରୀଙ୍କ ଆଦେଶ ପ୍ରତି ଅପମାନ, ତେଣୁ କାର୍ଯ୍ୟ ନିର୍ବାହୀ ସଂସ୍ଥା ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନର ଦାବି କରିଛି ଆଜି ମଞ୍ଚ । ଏହି ପତ୍ର ପ୍ରଦାନ ବେଳେ ରାଜେନ୍ଦ୍ର କୁମାର ଗୌଡ଼, ବାଲା ରାୟ, ଚନ୍ଦ୍ରକାନ୍ତ ସୁତାର, ଟି ଗୌରି ଶଙ୍କର, ପ୍ରଦୀପ କୁମାର ନାୟକ ପ୍ରମୁଖ ଉପସ୍ଥିତ ଥିଲେ ।

ପୌର ପରିଷଦ ର ନିଷ୍ପତ୍ତି ; ପୁନଃରୁଦ୍ଧାର ହେବ ପୋଖରୀ, ଉପଭୋକ୍ତା ସୁବିଧାରେ ପାଇବେ ଖାଉଟି ସମାଗ୍ରୀ, ସହରକୁ ସି. ସି କ୍ୟାମେରା…!

• ଏଥର ସମ୍ଭାଳ ବ୍ୟୁରୋ(ଗୁଣପୁର) – ଗୁଣପୁର ପୌର ପାଳିକାର ତୃତୀୟ ସାଧାରଣ ବୈଠକ ଅଧ୍ୟକ୍ଷା ମମତା ଗୌଡ଼ ଙ୍କ ସଭାପତିତ୍ବରେ ପୌର ପାଳିକା ସଭାଗୃହରେ ଅନୁଷ୍ଠିତ ହୋଇଯାଇଛି । ୧୫.୫.୨୦୨୩ ରେ ଅୟୋଜିତ ହେବାକୁ ଥିବା ବୈଠକ ରେ ସ୍ଥାନୀୟ ବିଧାୟକ ଶ୍ରୀ ରଘୁନାଥ ଗମାଙ୍ଗ ଯୋଗ ଦେଇନଥିବାରୁ ଏହାକୁ ବିରୋଧ କରି ବିଜେଡି ସମର୍ଥିତ ଗୋଷ୍ଠୀ ବିଧାୟକଙ୍କ ଯୋଗଦାନ କୁ ବାଧ୍ୟତା କରିଥିବାରୁ ଏହାକୁ ସ୍ଥଗିତ କରାଯାଇ ପରବର୍ତ୍ତୀ ଦୁଇଦିନ ପରେ ବୈଠକ ଆହ୍ଵାନ କରିବାକୁ ଅଧ୍ୟକ୍ଷା ପରାମର୍ଶ ଦେଇଥିଲେ । ପରବର୍ତ୍ତୀ ଦିନ ଅର୍ଥାତ୍ ତା – ୧୭.୦୫.୨୦୨୩ ରିଖ ଦିନ ବିଧାୟକଙ୍କ ଉପସ୍ଥିତିରେ ବୈଠକ ବସିଥିଲା । ସହରରୁ ଅପରାଧ ନିୟନ୍ତ୍ରଣ କରିବା ନିମନ୍ତେ ସହରରେ କିଛି ସ୍ଥାନରେ ସି ସି କ୍ୟାମେରା ଯୋଖାଜିବା ନିମନ୍ତେ ପୂର୍ବ ବୈଠକରେ ନିଆଯାଇଥିବା ପ୍ରସ୍ତାବ ଉପରେ ଆଲୋଚନା କରାଯାଇଥିଲା । କ୍ୟାମେରା ଯୋଖାଯିବା ନିମନ୍ତେ ଭୁବନେଶ୍ୱର ର ଏକ ଅନୁଷ୍ଠାନକୁ ୧ ଫେବ୍ରୁୟାରୀ ୨୦୨୩ ରିଖ ଦିନ କାର୍ଯ୍ୟାଦେଶ ଦିଆଯାଇଥିବା ଅଧ୍ୟକ୍ଷା କହିଥିଲେ । କିଛି ଦିନ ମଧ୍ୟରେ ଏହି କାର୍ଯ୍ୟ ତ୍ବରାନ୍ବିତ ହେବ ବୋଲି ଆଲୋଚନାରୁ ଜଣାଯାଇଛି । ସି ସି କ୍ୟାମେରା ଯୋଖାଯିବା କାର୍ଯ୍ୟ ପନ୍ଥାକୁ ସାଧାରଣରେ ସ୍ଵାଗତ କରାଯାଇଛି । ଗ୍ରହଣ କରାଯିବାକୁ ଥିବା ଉନ୍ନତୀ ମୂଳକ କାର୍ଯ୍ୟ ର ପ୍ରଥବକୁ ଅନୁମୋଦନ କରାଯାଇ ୨୨-୨୩ ର ସମସ୍ତ ଉନ୍ନୟନ ମୂଳକ ପ୍ରସ୍ତାବକୁ ପାରିତ କରାଯାଇଥିଲା ।ଏହି ବୈଠକରେ ଗ୍ରହଣ କରାଯାଇଥିବା ପ୍ରସ୍ତାବ ମାନଙ୍କ ମଧ୍ୟରେ ପରିଷଦ କାର୍ଯ୍ୟାଳୟ ନିମନ୍ତେ ଆବଶ୍ୟକୀୟ ନଥିପତ୍ର ଓ ଆସବାବ କ୍ରୟ କରିବା ନିମନ୍ତେ ଗୃହ ଓ ନଗର ଉନ୍ନୟନ ବିଭାଗ ପତ୍ର ସଂଖ୍ୟା ୮୪୮ ତା – ୧୨.୦୧.୨୦୨୨ ରିଖ କ୍ରମେ ନିର୍ବାହୀ ଅଧିକାରୀ ଙ୍କ ବ୍ୟବହାର ପାଇଁ ଭଡ଼ା ସୂତ୍ରରେ ଯୋଗାଇ ଦିଆ ଯାଇଥିବା ଗାଡିକୁ ମଞ୍ଜୁର କରିବା, ପରିଷଦରେ ନିଯୋଜିତ ଚୁକ୍ତି ଭିତ୍ତିକ କର୍ମଚାରୀ ମାନଙ୍କ କାର୍ଯ୍ୟର ନବୀକରଣ କରିବା, କାର୍ଯ୍ୟରତ ଗୋଷ୍ଠୀ ସଙ୍ଗଠିତା ଙ୍କ କନଭେନସ ଏଲାଉନ୍ସ ବାବଦରେ ପ୍ରତି ମାସରେ ୫୦୦ ଟଙ୍କା ପ୍ରଦାନ କରିବା, କାର୍ଯ୍ୟାଳୟ ରେ ଥିବା ସମସ୍ତ ପ୍ରକାର ଗାଡ଼ିର ମରାମତି କରିବା, ନିର୍ମାଣଧୀନ ପାର୍କ, ଶୌଚାଳୟ ଏବଂ ମିସନ୍ ଶକ୍ତି କେଫ୍ କୁ ଏମ୍.ଏସ୍.ଜି ଗ୍ରୁପ ମାଧ୍ୟମରେ ରକ୍ଷଣାବେକ୍ଷଣ ଓ ପରିଚାଳନା କରିବା ନିମନ୍ତେ ଆଗତ ପ୍ରସ୍ତାବ ଗୁଡିକ ଉପରେ ବିଶଦ ଭାବେ ଆଲୋଚନା କରାଯାଇ ଏହାର୍ ପାରିତ କରାଯାଇଛି l

ଏହା ବ୍ୟତୀତ ପ୍ରଧାନମନ୍ତ୍ରୀ ଆବାସ ଯୋଜନା ର ଷଷ୍ଠ ଫେଜ୍ ରେ ପ୍ରସ୍ତୁତି ତାଲିକା କୁ ମଞ୍ଜୁରୀ, ମୋ ଖତ, ମୋ ଶୌଚାଳୟ, ଟାଉନ୍ ହଲ୍ ଉନ୍ନତୀକରଣ, ମୋ ପୋଖରୀ ପୁନରୁଦ୍ଧାର ନିମନ୍ତେ ପ୍ରସ୍ତାବ ଆଗତ କରାଯାଇଥିଲା l ପୌର ପରିଷଦ ମଧ୍ୟରେ ଥିବା ୯ ପୋଖରୀ ର ପୁନଃରୁଦ୍ଧାର ପାଇଁ ଆବଶ୍ୟକୀୟ ନିର୍ଦ୍ଦେଶ ନାମା ସକାଶେ ପରିଷଦ ପକ୍ଷରୁ ରାଜ୍ଯ ସରକାର ଙ୍କୁ ପ୍ରସ୍ତାବ ଦିଆଯାଇଥିଲା l ଏଥି ମଧ୍ୟରୁ ୩ ଗୋଟି ପୋଖରୀ ର ପୁନଃରୁଦ୍ଧାର ପାଇଁ ଆସିଥିବା ନିର୍ଦ୍ଦେଶନାମା କ୍ରମେ କପିଳପୁର୍ ଠାରେ ଥିବା ପୋଖରୀ, ନିୟନ୍ତ୍ରିତ ବଜାର କମିଟି କାର୍ଯ୍ୟାଳୟ ନିକଟରେ ଥିବା ପୋଖରୀ ଏବଂ ସେଫାଳୀ ପାହାଡ଼ ନିକଟସ୍ଥ ପୋଖରୀ ର ପୁନଃରୁଦ୍ଧାର ନିମନ୍ତେ ପୌର ପରିଷଦ ର ନିଜସ୍ୱ ଖର୍ଚ୍ଚ ରେ ଏହାର୍ ପୁନଃରୁଦ୍ଧାର ନିମନ୍ତେ ଡିପିଆର୍ ପ୍ରସ୍ତୁତ କରି ସରକାର ଙ୍କ ନିକଟରେ ଉପସ୍ଥାପନା କରିବା ପାଇଁ ନିଷ୍ପତ୍ତି କରାଯାଇଛି l ପବ୍ଲିକ୍ ୱେଷ୍ଟ ମ୍ୟାନେଜ୍ ମେଣ୍ଟ ବାଇଲା ର ଅନୁମୋଦନ ଉପରେ ତୃତୀୟ ବୈଠକ ରେ ଆଗତ ପ୍ରସ୍ତାବ କୁ ପାରିତ କରାଯାଇଛି l ଚଳିତ ବୈଠକ ରେ ପରିଷଦ ର ୨୨ – ୨୩ ଆର୍ଥିକ ବର୍ଷର ଆୟ ଓ ବ୍ୟୟର ସମୀକ୍ଷା କରାଯାଇ ଏହାକୁ ମଞ୍ଜୁରୀ କରାଯାଇଥିଲା l ଏହା ବ୍ୟତୀୟ ଉପଜିଲ୍ଲାପାଳ ଗୁଣପୁର ପତ୍ର ସଂଖ୍ୟା ୧୮୫୯ ତା ୦୨.୦୫.୨୦୨୩ ରିଖ ରେ ପ୍ରଦତ୍ତ ଜଙ୍ଗଲ ଜମି ଅଧିଗ୍ରହଣ ନିମନ୍ତେ ପରିଷଦ ର ୱାର୍ଡ ମଧ୍ୟରେ ଥିବା ଜଙ୍ଗଲ ଜମି ଅଧି ଗ୍ରହଣ ସକାଶେ ସମ୍ପୃକ୍ତ ୱାର୍ଡ ସଦସ୍ଯ ସଦସ୍ୟା ଙ୍କୁ ନେଇ ଏକ କମିଟି ଗଠନ କରିବା ପାଇଁ ପ୍ରସ୍ତାବ ଆଗତ କରାଗଲା l ଉପଜିଲ୍ଲାପାଳ ଙ୍କ ପକ୍ଷରୁ ମହିଳା ସଂଘ ମାଧ୍ୟମରେ ଖାଉଟି ସାମଗ୍ରୀ ବିତରଣ ନିମନ୍ତେ ନିର୍ଦ୍ଦେଶ ଦିଆଯାଇଅଛି l ପରନ୍ତୁ ଏଥି ନିମନ୍ତେ ମନୋନୀତ ମହିଳା ସଂଘ ର କେନ୍ଦ୍ର ଗୁଡିକ୍ ସମାନଙ୍କୁ ଦିଆଯାଇଥିବା ୱାର୍ଡ ଠାରୁ ବହୁ ଦୁରରେ ଅବସ୍ଥିତ ଥିବାରୁ ଖାଉଟି ମାନେ ସୁବିଧାରେ ସାମଗ୍ରୀ ପାଇବା ନିମନ୍ତେ ବିଭିନ୍ନ ୱାର୍ଡ ର ଭିନ୍ନ ଭିନ୍ନ ସ୍ଥାନ ରେ ସାମଗ୍ରୀ ବଣ୍ଟନ କରିବା ପ୍ରସ୍ତାବ କୁ ସର୍ବ ସମ୍ମତି କ୍ରମେ ଗୃହିତ କରାଗଲା l ଏହି ପରିପ୍ରେକ୍ଷୀରେ ଆମ ବଜାର୍ ପ୍ରାଙ୍ଗଣରେ ୱାର୍ଡ – ୧,୧୮,୧୯ ୱାର୍ଡ଼ ର ଲୋକଙ୍କୁ, ୱାର୍ଡ଼ – ୨,୩,୪ ଲୋକଙ୍କୁ ୱାର୍ଡ ନମ୍ବର ୪ ୱାର୍ଡ ର କମ୍ୟୁନିଟି ହାଲ୍ ରେ, ୱାର୍ଡ – ୫,୬,୭,୮ ର ଲୋକଙ୍କୁ ମୈତ୍ରୀ କେନ୍ଦ୍ର ରେ, ୱାର୍ଡ – ୧୦,୧୧, ଏସ୍.ପି ଗୁଡା ଲୋକଙ୍କୁ ନିୟନ୍ତ୍ରିତ ବଜାର କମିଟି ଗୁଣପୁର ପରିସରେ, ୱାର୍ଡ – ୧୨,୧୩,୧୪,୧୫ ଲୋକ ଙ୍କୁ କୋଣ୍ଡା ବାଉରୀ ସାହି ର କେନ୍ଦ୍ର ରେ ଦେବା ନିମନ୍ତେ ନିଷ୍ପତ୍ତି ଗ୍ରହଣ କରାଗଲା l

ସେହି ଭଳି ସରକାର ଙ୍କ ନିର୍ଦ୍ଦେଶନାମା ଅନୁଯାୟୀ ବେଞ୍ଚ ମାର୍କ ଭେଲ୍ୟୁେସନ୍ ହିସାବରେ ଗୃହ ଟିକସ ଆଦାୟ କରିବା ଦ୍ୱାରା ଜନ ସାଧାରଣ ଙ୍କୁ ଟିକସ ପାଞ୍ଚ ଗୁଣା ଅଧିକ ପଡ଼ିବ, ତେଣୁ ୨୦୧୮ ମସିହା ରେ ନିଷ୍ପତ୍ତି ହୋଇଥିବା ବେଞ୍ଚ ମାର୍କ ଭେଲ୍ୟୁେସନ୍ ହିସାବରେ ହିଁ ଟିକସ ଆଦାୟ କରିବା ନିମନ୍ତେ ପୌର ଉପାଧ୍ୟକ୍ଷ ପ୍ରସ୍ତାବ ଦେଇଥିଲେ l ଏହି ପ୍ରସ୍ତାବ କୁ ସର୍ବ ସମ୍ମତି କ୍ରମେ ମଞ୍ଜୁର ଦିଆଯାଇ ଗୃହ ଟିକସର ଆଦାୟ ନିମନ୍ତେ ନିଷ୍ପତ୍ତି ଗ୍ରହଣ କରାଗଲା ଏବଂ ପୌର ପରିଷଦ ର ୱାର୍ଡ ନମ୍ବର ୧ ଠାରୁ ୧୯ ମଧ୍ୟରେ ଥିବା ସମସ୍ତ୍ ସାହିର ଆବଶ୍ୟକତା ଅନୁଯାୟୀ ରାସ୍ତା ଓ ନାଳ ନିର୍ମାଣ ନିମନ୍ତେ ଏକ ସବିଶେଷ ଖସଡା ପ୍ରସ୍ତୁତ କରାଯାଇ ଏହାକୁ ସର୍ବ ସମ୍ମତି କ୍ରମେ ଗ୍ରହଣ କରାଗଲା l ଏହି ବୈଠକ ଗୁଣପୁର ପୌର ପରିଷଦ ର ଉପାଧ୍ୟକ୍ଷ ଶ୍ରୀ ଶିବ ପ୍ରସାଦ ଗୌଡ, ପୌର ନିର୍ବାହୀ ଅଧିକାରୀ ଶ୍ରୀମତୀ ଡାଃ. ସତ୍ୟ ସମ୍ପୁର୍ଣ୍ଣା ରାଉତ , ସହକାରୀ ଯନ୍ତ୍ରୀ ବିଶ୍ଵନାଥ ସରକା, କନିଷ୍ଠ ଯନ୍ତ୍ରୀ ଆଦିତ୍ୟ ମିଶ୍ର ଏବଂ ଏକାଉଣ୍ଟଟେଣ୍ଟ ନିରଞ୍ଜନ ସାହୁଙ୍କ ସମେତ ପୌର ପରିଷଦ ର ସମସ୍ତ ୱାର୍ଡ ର କାଉନ୍ସିଲ ଉପସ୍ଥିତ ଥିଲେ l