ଅସରାଏ ବର୍ଷା ରେ ସାହି ମଧ୍ୟରେ କୃତ୍ରିମ ପୋଖରୀ !
ଏଥର ସମ୍ଭାଳ ବ୍ୟୁରୋ (ଗୁଣପୁର) : ବର୍ଷା ସମୟରେ ଗୁଣପୁର ପୌର ପରିଷଦ ର ୫ ନମ୍ବର୍ ୱାର୍ଡରେ ରହିଥିବା ଡେରା ସାହି ର ଅବସ୍ଥା ନ କହିଲେ ଭଲ । ସାହି ରାସ୍ତାର ଆରମ୍ଭ ମୁଣ୍ଡରେ ନାଳ ଉପରେ ନିର୍ମାଣ କରାଯାଇଥିବା ଡ୍ରେନ ର ଘୋଡଣି ରାସ୍ତା ର ଉଚ୍ଚତା ଠାରୁ ଅଧିକ ରହିଥିବା ହେତୁ , ବର୍ଷା ସମୟରେ ରାସ୍ତାର ଉପର ମୁଣ୍ଡରୁ ଆସୁଥିବା ପାଣି ଏଠାରେ ଜମି ଏକ କୃତ୍ରିମ ପୋଖୋରୀ ସୃଷ୍ଟି କରୁଛି । ଏହି ରାସ୍ତାଟି ରେ ଏହି ସାହିର ବାସିନ୍ଦା ଙ୍କ ସମେତ ନିକଟସ୍ଥ ବ୍ଲକ କଲୋନୀ ର ତିନିଗୋଟି ପଡ଼ାର ଲୋକ ଯିବା ଆସିବା କରନ୍ତି । ରାସ୍ତା ଉପରେ ଏଭଳି ପାଣି ଜମି ରହିଥିବାରୁ ଯାନ ବାହାନ ଯିବା ଆସିବାରେ ବହୁ ଅସୁବିଧା ହେଉଥିବା ସହ ସାଇକେଲ ଆରୋହୀ ମାନେ ଖସି ପଡ଼ୁଥିବା ନଜରକୁ ଆସୁଛି । ଏଣୁ ବର୍ଷା ଋତୁ ଆରମ୍ଭ ପୂର୍ବରୁ ଏହାକୁ ମରାମତି କରିବା ନିମନ୍ତେ ଅଞ୍ଚଳବାସୀ ଦାବୀ କରୁଛନ୍ତି । କେବଳ ଅସରାଏ ବର୍ଷା ରେ ଏଠାର ଅବସ୍ଥା ଏଭଳି ଥିବା ବେଳେ ବର୍ଷା ଋତୁ ରେ ଏହାର ଅବସ୍ଥା ଆକଳନ ନକରିବା ଭଲ । ସଂପୃକ୍ତ ୱାର୍ଡ଼ ସଦସ୍ୟ ଏବଂ ପୌର ପରିଷଦ ଅଧ୍ୟକ୍ଷା ଏଥିପ୍ରତି ଦୃଷ୍ଟି ଦେଲେ ଯଥାଶୀଘ୍ର ଏହି ସମସ୍ୟା ଦୂର ହୋଇ ପାରିବ ବୋଲି ସାହି ବାସିନ୍ଦା ତଥା ଯୁବ ସାମ୍ବାଦିକ ସିଦ୍ଧାର୍ଥ ଦାଶ ଆଶା ପୋଷଣ କରିଛନ୍ତି ।
