ମାର୍ଚ୍ଚ ୯ରେ ଧାରଣା ଦେବେ ୫ ହଜାର ବିଦ୍ୟୁତ କର୍ମଚାରୀ, କାମ ଅନୁଯାୟୀ ଦରମା ପାଉନଥିବା ଅଭିଯୋଗ…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଟାଟା ଅଧୀନରେ ଥିବା ବିଦ୍ୟୁତ ବିଭାଗ ସେସୁରେ ୧୨ ହଜାରରୁ ଅଧିକ ଆଉଟସୋସିଂ କର୍ମଚାରୀ କାମ କରୁଛନ୍ତି । କାମ ଅନୁଯାୟୀ ଦରମା ପାଉନଥିବା ଅଭିଯୋଗ ଆଣିଛି ନିଶୂଳ ଓଡ଼ିଶା ବିଦ୍ୟୁତ ମଜ୍ଦୁର ମହାସଂଘ । ଏନେଇ ଆସନ୍ତା ୯ରେ ଟାଟା ପାୱାର ମୁଖ୍ୟ କାର୍ଯ୍ୟାଳୟ ସମ୍ମୁଖରେ ଆଉସିଂ କର୍ମଚାରୀମାନେ ଧାରଣାଦେବେ ବୋଲି ସଂଘର ସାଧାରଣ ସମ୍ପାଦକ ସତ୍ୟବ୍ରତ ପଣ୍ଡା ସୂଚନା ଦେଇଛନ୍ତି । ତାଙ୍କ କହିବା ଆଉସିଂ ଅନୁଯାୟୀ ବିଦ୍ୟୁତ୍ ବିଭାଗର କର୍ମଚାରୀମାନେ ନିଜ କର୍ମକ୍ଷେତ୍ରରେ ବିଭିନ୍ନ ବିପଦଜନକ ପରିସ୍ଥିତିର ସମ୍ମୁଖୀନ ହୁଅନ୍ତି । ହେଲେ ସେମାନଙ୍କ କାମ ଅନୁଯାୟୀ ସେମାନଙ୍କୁ ପର୍ଯ୍ୟାପ୍ତ ପରିମାଣର ଦରମା ଦିଆଯାଉ ନାହିଁ । ଫଳରେ ସେମାନେ ବିଭିନ୍ନ ଆର୍ଥିକ ସମସ୍ୟାର ସମ୍ମୁଖୀନ ହେଉଛନ୍ତି । ଏନେଇ ସଂଘ ପକ୍ଷରୁ ଟାଟା ପାୱାରର ପରିଚାଳନା ସଦସ୍ୟଙ୍କୁ ଏକ ଦାବିପତ୍ର ଦିଆଯାଇଥିଲା । ଆଲୋଚନା ପାଇଁ ଟାଟା ପାୱାର ରାଜି ନହେବାରୁ ୯ ତାରିଖରେ ଧାରଣା ଦେବା ପାଇଁ ସଂଘ ନୋଟିସ୍ ମଧ୍ୟ ଦେଇଥିଲା । ହେଲେ ଟାଟା ପାୱାର ବିଭାଗ ପକ୍ଷରୁ କୌଣସି ପ୍ରତିକ୍ରିୟା ଆସିଲା ନାହିଁ । ତେଣୁ ଆସନ୍ତା ୯ରେ ୫ ହଜାରରୁ ଅଧିକ କର୍ମଚାରୀ ରାଜଧାନୀସ୍ଥିତ ପାୱାର ହାଉସ କଲୋନୀଠାରେ ଥିବା ଟାଟା ପାୱାର ମୁଖ୍ୟ କାର୍ଯ୍ୟାଳୟ ସମ୍ମାନା ରେ
ଧାରଣା ଦେବେ ।

ସ୍ୱତନ୍ତ୍ର ସ୍କ୍ୱାଡ୍ ଓ ସିସିଟିଭି ଜଗିବ ମାଟ୍ରିକ୍ ପରୀକ୍ଷା କପି …!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ମାଟ୍ରିକ ପରୀକ୍ଷାରେ କପି ରୋକିବାକୁ ସ୍ୱତନ୍ତ୍ର ସ୍କ୍ୱାର୍ଡ ଗଠନ କରିଛି ବିଦ୍ୟାଳୟ ଓ ଗଣଶିକ୍ଷା ବିଭାଗ। ପରୀକ୍ଷା ସେଣ୍ଟର ଗୁଡ଼ିକୁ ସ୍କ୍ୱାଡ୍ ଅଚାନକ ଗସ୍ତ କରିବେ। ଯାହାର ଗାତିବିଧି ସମ୍ପର୍କରେ କେହି ପୂର୍ବ ସୂଚନା ପାଇବେନି। ସେହିପରି ପରୀକ୍ଷାରେ ସ୍ୱଚ୍ଛତା ରକ୍ଷା ନିମନ୍ତେ ଅଧିକାଂଶ ପରୀକ୍ଷା କେନ୍ଦ୍ରଗୁଡ଼ିକରେ ସିସିଟିଭି ଲଗାଯିବ। ଏନେଇ ଆଜି ସୂଚନା ଦେଇଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ। ସେ କହିଛନ୍ତି, ଆସନ୍ତା ମାର୍ଚ୍ଚ ୧୦ରୁ ମାଟ୍ରିକ ସମେଟିଭ-୨ ପରୀକ୍ଷା। ତେଣୁ ଏବେଠାରୁ ପ୍ରଶ୍ନପତ୍ର ପ୍ରତିଜିଲ୍ଲାର ହବରେ ପହଞ୍ଚି ସାରିଛି। ଜିଲ୍ଲା ପ୍ରଶାସନ ସହ ବି ସହଯୋଗ ପାଇଁ ଆଲୋଚନା ହୋଇଛି। ପ୍ରଶ୍ନପତ୍ର ହବରୁ ପରୀକ୍ଷା କେନ୍ଦ୍ର ଯାଏଁ ପ୍ରଶ୍ନପତ୍ର ନେବାକୁ ସ୍ୱତନ୍ତ୍ର ଲୋକଙ୍କୁ ଦାୟିତ୍ୱ ଦିଆଯାଇଛି।ଗ୍ରୀଷ୍ମର ପ୍ରକୋପକୁ ଦୃଷ୍ଟିରେ ରଖି ଆବଶ୍ୟକ ସୁରକ୍ଷା ବ୍ୟବସ୍ଥା କରାଯାଇଛି। ଶୃଙ୍ଖଳା ସହ ପରୀକ୍ଷା ହେବ। ଏହା ଶେଷ ପରୀକ୍ଷା ନୁହେଁ, ବରଂ ପିଲାମାନଙ୍କ ପ୍ରଥମ ପରୀକ୍ଷା। ତେଣୁ ଛାତ୍ରଛାତ୍ରୀମାନେ ଚାପମୁକ୍ତ ହୋଇ ପରୀକ୍ଷା ଦିଅନ୍ତୁ ବୋଲି ଶ୍ରୀ ଦାଶ କହିଛନ୍ତି। ଅନ୍ୟପଟେ ମାଟ୍ରିକ ପରୀକ୍ଷା ପାଇଁ ବୋର୍ଡ଼ ପକ୍ଷରୁ ଶେଷ ପର୍ଯ୍ୟାୟରେ ପହଞ୍ଚିଛି ପ୍ରସ୍ତୁତି। ମାଟ୍ରିକ ପରୀକ୍ଷାକୁ ନିର୍ଭୁଲ ଓ ସୁରୁଖୁରୁରେ କରିବା ପାଇଁ ସମସ୍ତ ପ୍ରସ୍ତୁତି କରିଛି ବୋର୍ଡ। ଚଳିତ ଥର ୫ ଲକ୍ଷ ୩୨ ହଜାର ୬୦୩ ଜଣ ପରୀକ୍ଷାର୍ଥୀ ଫର୍ମଫିଲପ କରିଥିବା ବେଳେ ୩୦୩୧ ଗୋଟି ପରୀକ୍ଷା କେନ୍ଦ୍ର କରାଯାଇଛି। ସେହିପରି ୩୧୬ ଗୋଟି ନୋଡାଲ ସେଣ୍ଟର କରାଯାଇଥିବାବେଳେ ସେଥି ମଧ୍ୟରୁ ୨୨ ଗୋଟି ପୁଲିସ ଷ୍ଟେସନରେ ଏହି ନୋଡ଼ାଲ ସେଣ୍ଟର ହୋଇଛି।  କନ୍ଧମାଳର ୭, କୋରାପୁଟର ୫, ମାଲକାନାଗିରିର ୧୦ ଥାନାକୁ ନୋଡ଼ାଲ ସେଣ୍ଟର କରାଯାଇଛି। ଛାତ୍ରଛାତ୍ରୀମାନେ ବୋର୍ଡ଼ ୱେବସାଇଟ ଏବଂ ସ୍କୁଲରୁ ଆଡମିର୍ଟ କାଡ ନେଇପାରିବେ। ସେହିପରି କପି ରୋକିବା ପାଇଁ ବିଭିନ୍ନ ସ୍ତରରେ ସ୍କ୍ୱାଡ୍ କରାଯାଇଛି। ପରୀକ୍ଷା କେନ୍ଦ୍ରକୁ ମୋବାଇଲ ସମ୍ପୂର୍ଣ୍ଣ ରୂପେ ବାରଣ କରାଯାଇଛି। ସେଣ୍ଟର ସୁପରିଟେଣ୍ଡେଣ୍ଟମାନଙ୍କ ପାଖରେ ପରୀକ୍ଷକମାନେ ମୋବାଇଲ ରଖିବେ ବୋଲି ବୋର୍ଡ଼ ପକ୍ଷରୁ କଡା ନିର୍ଦ୍ଦେଶ ଦିଆଯାଇଛି। ଖରାକୁ ଦୃଷ୍ଟିରେ ରଖି ପରୀକ୍ଷା ସକାଳ ୮ଟା ରୁ ଆରମ୍ଭ ହୋଇ ପୂର୍ବାହ୍ନ ୧୦ଟାରେ ଶେଷ ହେବ। କେବଳ ଗଣିତ ପରୀକ୍ଷା ଦିନ ୧୫ ମିନିଟ ସମୟ ଅଧିକ ଦିଆଯିବ। ପରୀକ୍ଷା ସମୟରେ ବିଦ୍ୟୁତ କାଟ୍ ହେବ ନାହିଁ ବୋଲି ସରକାରଙ୍କ ତରଫରୁ ନିର୍ଦ୍ଦେଶ ଦିଆଯାଇଥିବା ବୋର୍ଡ ପକ୍ଷରୁ କୁହାଯାଇଛି।ପରୀକ୍ଷା ଶେଷ ପରେ ୫୬ ମୂଲ୍ୟାଙ୍କନ କେନ୍ଦ୍ରରେ ମୂଲ୍ୟାଙ୍କନ କରାଯିବାକୁ ଥିବାବେଳେ ନୂଆ ଢାଞ୍ଚାରେ ଫଳ ପ୍ରକାଶ ପାଇବ। ଏସଏ-୧ରୁ ୪୦ ପ୍ରତିଶତ, ଏସଏ-୨ରୁ ୪୦ ପ୍ରତିଶତ, ଇଣ୍ଟରନାଲ ଆସେସମେଣ୍ଟରୁ ୨୦ ମାର୍କ ମିଶି ଫଳ ପ୍ରକାଶ କରାଯିବ। ସେହିପରି ମଧ୍ୟମା ଏବଂ ଷ୍ଟେଟ ଓପନ ସ୍କୁଲ ପରୀକ୍ଷା ମଧ୍ୟ କରାଯିବ ବୋଲି ବୋର୍ଡ ପକ୍ଷରୁ ସୂଚନା ଦିଆଯାଇଛି।

ବବିଙ୍କ ଟ୍ୱିଟ୍ : ଅଶୋକ ଦାସଙ୍କ କଥା ମନେ ପକାଇ ବର୍ଷିଲେ ସୂର୍ଯ୍ୟବଂଶୀ ଓ ମହାଲିଙ୍ଗ ….!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ରାଜ୍ୟରେ ଶିଶୁ ଓ ମାତୃ ମୃତ୍ୟୁହାରକୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଚିନ୍ତାବ୍ୟକ୍ତ କରିଥିବାବେଳେ ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ(ବବି) ଟ୍ୱିଟ୍ କରି ଓଡ଼ିଶା ଆସି ଧର୍ମେନ୍ଦ୍ର ହିଂସା ପାଇଁ ତାଙ୍କ ଦଳର ନେତାମାନଙ୍କୁ ଉତ୍ସାହିତ କରିବା ଭଳି କଥା କହୁଥିବା ଉଲ୍ଲେଖ କରିଛନ୍ତି । ଯାହାକୁ ନେଇ ବିଜେପି ବିଧାୟକ ମୁକେଶ ମହାଲିଙ୍ଗ ଓ ସୂରଜ ସୂର୍ଯ୍ୟବଂଶୀ କଡ଼ା ଭାଷାରେ ଟ୍ୱିଟ୍ କରି ବବିଙ୍କୁ ଜବାବ ଦେଇଛନ୍ତି । ବିଜେଡି ନେତା ପ୍ରଣବ ପ୍ରକାଶ ଦାସ ମୂଳ ବିଷୟରେ ଉତ୍ତର ନରଖି ରାଜ୍ୟର ଯୁବ ସମାଜକୁ ଭ୍ରମିତ କରୁଛନ୍ତି । ରାଜ୍ୟରେ ଶିଶୁ ଓ ମାତୃ ମୃତ୍ୟୁହାର ଚିନ୍ତାଜନକ ଥିବା ବେଳେ ଯାଜପୁରର ନଗଡା ଏହାର ଏକ ଜ୍ୱଳନ୍ତ ଉଦାହରଣ ବୋଲି ଟ୍ୱିଟ୍ କରି ଲୋଇସିଂହା ବିଧାୟକ ମୁକେଶ ମହାଲିଙ୍ଗ କହିଛନ୍ତି । ସେହିପରି ଶାସକ ଦଳର ୪୦ ଜଣ ବିଧାୟକ ଓ ମନ୍ତ୍ରୀମାନଙ୍କ ନାଁରେ ଅପରାଧିକ ମାମଲା ନେଇ ଶ୍ରୀ ଦାସ ଚୁପ୍ କାହିଁକି ବୋଲି ବିଧାୟକ ସୂର୍ଯ୍ୟବଂଶୀ ସୂରଜ ପ୍ରଶ୍ନ କରିଛନ୍ତି । ଶ୍ରୀ ମହାଲିଙ୍ଗ ଟ୍ୱିଟରେ ଉଲ୍ଲେଖ କରିଛନ୍ତି ଯେ “ବାବୁ, ଆମ ବକ୍ତବ୍ୟକୁ ଆପଣ ଠିକ ଭାବେ ଶୁଣିନଥିଲା ଭଳି ମନେହେଉଛି । ଯେଉଁ ସମ୍ବେଦନଶୀଳ କଥା ଉଠିଛି, ତାର ଉତ୍ତର ନରଖି ଆପଣ କଥାକୁ ବୁଲେଇ ରାଜ୍ୟର ଯୁବ ସମାଜକୁ ଭ୍ରମିତ କରୁଛନ୍ତି । ରାଜ୍ୟରେ ମହିଳା, ଗର୍ଭବତୀ ମହିଳା, ବାଳିକା, ନବଜାତ ଶିଶୁ ତଥା ଅନାହାର ଏବଂ ଅପପୃଷ୍ଟି ବିଷୟରେ ବର୍ଣ୍ଣନା କରାଯାଇଥିଲା । ତାକୁ ନିଜ ସୁବିଧା ଅନୁସାରେ ଏଡାଇ ଦେବା ପାଇଁ ଆପଣ ଚତୁରତାର ସହ ପ୍ରୟାସ କରିଛନ୍ତି । ଆପଣଙ୍କ ଜିଲ୍ଲା ଯାଜପୁରର ନଗଡ଼ା ହେଉଛି ଏହାର ଜ୍ୱଳନ୍ତ ଉଦାହରଣ । ବବି ବାବୁ ଦିନରେ ଲଣ୍ଠନ ଦେଖାଇବାର ଚେଷ୍ଟା କରୁଛନ୍ତି । ରାଜନୀତିରେ ହାରିବା ଜିତିବା ଲାଗି ରହେ । ଗତ ୨୦୧୯ ନିର୍ବାଚନରେ ଦିଲ୍ଲୀର ଚାବିକାଠି ରଖିବା ଦମ୍ଭ ଦେଖାଇ ୨୧ ରୁ ୨୧ ଲୋକସଭା ଆସନ ହାତେଇବା ପାଇଁ ପ୍ରଚାର କରିଥିଲେ । କିନ୍ତୁ ଭୋଟରମାନେ ବିଜେପିକୁ ୮ଟି ଲୋକସଭା ଆସନରେ ଜିତାଇଥିଲେ । ବିଜେପି ୨୦୧୯ ନିର୍ବାଚନରେ ୯୧ ଲକ୍ଷ ୨୯ ହଜାର ୭୭୩ ଖଣ୍ଡ ଭୋଟ ପାଇଥିଲା ବୋଲି ସେ ବବିଙ୍କୁ ମନେ ପକାଇ ଦେଇଛନ୍ତି । ବବିଙ୍କ ବାପା ମଧ୍ୟ ଶେଷ ନିର୍ବାଚନ କିପରି ଭାବରେ ହାରିଥିଲେ ତାହା ତାଙ୍କର ମନେ ଥିବ ବୋଲି ମହାଲିଙ୍ଗ କହିଛନ୍ତି । ଗତକାଲି ଓଡିଶାର ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କର ଜୟନ୍ତୀକୁ ବିଜୁ ଜନତା ଦଳ ଧୂମଧାମରେ ପାଳନ କଲା । ସେ ମଧ୍ୟ ୧୯୭୧ ମସିହାରେ ଗୋଟିଏ ଥର ୫ଟି ଯାଗାରେ ନିର୍ବାଚନ ଲଢି ହାରିଥିଲେ । ତାଙ୍କ ପ୍ରତି କ’ଣ ଜନସମର୍ଥନ ନଥିଲା ନା ସେ ଲୋକପ୍ରିୟ ନଥିଲେ ବୋଲି ସେ ପ୍ରଶ୍ନ କରିଛନ୍ତି । ସେହିପରି ବିଧାୟକ ସୂର୍ଯ୍ୟବଂଶୀ ସୂରଜ ଟ୍ୱିଟ୍ କରି କହିଛନ୍ତି ଯେ ବବି ଭାଇ, ଆପଣଙ୍କ ପିତା ଅଶୋକ ଦାସ ଛାତ୍ରାବସ୍ଥାରେ ରାଜନୀତିକୁ ଆସିଥିଲାବେଳେ ତାଙ୍କ ବିରୁଦ୍ଧରେ ମଧ୍ୟ ସେତେବେଳର ସରକାର ଅନେକ ସଙ୍ଗୀନ ଅପରାଧିକ ମାମଲା ରୁଜୁ କରିଥିଲା । ତା’ମାନେ ସେ କ’ଣ ଅପରାଧି ହୋଇଯାଇଥିଲେ ? ଏ ବିଷୟରେ ଆପଣ ଘରର ଗୁରୁଜନମାନଙ୍କୁ ପଚାରି ବୁଝିଲେ ଉଚିତ୍ ହେବ । ଆପଣ ଏବଂ ଆପଣଙ୍କ ମୁଖ୍ୟମନ୍ତ୍ରୀ ରାଜନୈତିକ ସଂଘର୍ଷ ବିନା କ୍ଷମତାକୁ ଉପଭୋଗ କରୁଛନ୍ତି । ଆପଣ ମୂଳ କଥାର ଉତ୍ତର ନଦେଇ ଯେଉଁ କଥା ଗୁଡ଼ିକ କହିଛନ୍ତି ଓଡ଼ିଶାବାସୀ ତା’ର ସତ୍ୟତା ଭଲ ଭାବେ ଜାଣିଛନ୍ତି । ଆମର ବିରୋଧୀ ଦଳର ନେତା, ରାଜ୍ୟ ଯୁବମୋର୍ଚ୍ଚା ସଭାପତିଙ୍କୁ ଆପଣଙ୍କ ସରକାର ମିଛ କେସରେ ଫସାଇ ଅପରାଧୀ କହୁଛନ୍ତି । ଆଉ ଆପଣଙ୍କ ଦଳର ୪୦ ଜଣ ବିଧାୟକ ଓ ମନ୍ତ୍ରୀମାନଙ୍କ ନାଁରେ ହତ୍ୟା, ଧର୍ଷଣ, ଡକାୟତି, ଅପହରଣ ଭଳି ସଙ୍ଗୀନ ଅପରାଧୀକ ମାମଲା ରହିଛି । ଏହା ଉପରେ ଆପଣ କିଛି କହୁନାହାନ୍ତି କାହିଁକି ବୋଲି ସେ ଟ୍ୱିଟ୍ କରି ବବିଙ୍କୁ ପ୍ରଶ୍ନ କରିଛନ୍ତି ।

ମହିଳା ଦିବସ ସପ୍ତାହ ସମାରୋହ ; ଅଫିସରଙ୍କୁ କୋଳେଇଲେ, ନେତ୍ରୀମାନଙ୍କୁ ଦୂରେଇଲେ…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଆସନ୍ତା ମାର୍ଚ୍ଚ ୮ରେ ଆନ୍ତର୍ଜାତିକ ମହିଳା ଦିବସ ଉପଲକ୍ଷେ ରାଜ୍ୟ ସରକାରଙ୍କ ପକ୍ଷରୁ ସପ୍ତାହବ୍ୟାପୀ ରାଜ୍ୟସ୍ତରୀୟ କାର୍ଯ୍ୟକ୍ରମକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦଘାଟନ କରିଛନ୍ତି । ରାଜ୍ୟରେ ମହିଳା ସଶକ୍ତିକରଣ ଅଭିଯାନରେ ୭୦ଲକ୍ଷରୁ ଅଧିକ ମହିଳା ସାମିଲ ହୋଇଥିବାର ବାହାବା ନେଉଥିବା ଶାସକ ବିଜେଡି ନିଜର ନିର୍ବାଚନୀ ଏଜେଣ୍ଡାରେ ମହିଳାଙ୍କୁ ବିଧାନସଭା ଓ ସଂସଦରେ ୩୩ ପ୍ରତିଶତ ସଂରକ୍ଷଣ ଦେବା ପ୍ରସଙ୍ଗରେ ଲଢ଼େଇ ଜାରି ରଖିଥିବା କହୁଛି । ମହିଳାମାନେ ରାଜନୀତିକୁ ଆସି ନେତୃତ୍ୱ ନିଅନ୍ତୁ ବୋଲି ଦମ୍ଭୋକ୍ତି ଦେଖାଉଛି । କିନ୍ତୁ ଆନ୍ତର୍ଜାତିକ ମହିଳା ଦିବସ ଉପଲକ୍ଷେ ରାଜ୍ୟସ୍ତରୀୟ ସରକାରୀ କାର୍ଯ୍ୟକ୍ରମରେ ମହିଳାଙ୍କ ସହ ଜଡ଼ିତ ବିଭିନ୍ନ ପଦପଦବୀର ନେତୃତ୍ୱ ନେଉଥିବା ନେତ୍ରୀମାନଙ୍କୁ ଅଣଦେଖା କରିବାକୁ ବିଜେଡି ସରକାର ପଛାଇ ନାହିଁ । ଆନ୍ତର୍ଜାତିକ ମହିଳା ଦିବସରେ ନିଜର ଦଳୀୟ ନେତ୍ରୀମାନଙ୍କୁ ଅଣଦେଖା ଓ ଅପମାନିତ କରି ସରକାରୀ ଅଫିସରମାନଙ୍କୁ ଧରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନେଇ ରାଜ୍ୟସ୍ତରୀୟ ସମାରୋହ ପାଳନ କରିଛି । ଯାହାକି ବିଜେଡିର ଦୋମୁହାଁ ନୀତିକୁ ପଦାରେ ପକାଇଛି । ନିଜ ସରକାରରେ ବିଭିନ୍ନ ସରକାରୀ ପଦପଦବୀରେ ଥିବା ନିଜ ଦଳର ନେତ୍ରୀମାନଙ୍କୁ ଅଣଦେଖା କରୁଥିବା ବିଜେଡି ଏବେ ସରକାରୀ ଅଫିସରଙ୍କୁ କୋଳେଇ ବସିଛି । ଆଉ ଗଣମାଧ୍ୟମ ଓ ସଭାସମିତିରେ ମହିଳା ସଶକ୍ତିକରଣର ଲମ୍ବାଚଉଡ଼ା ଭାଷଣ ଦେବାକୁ ବିଜେଡି ନେତା-ମନ୍ତ୍ରୀ ପଛାଉ ନଥିବା ଜଣାପଡ଼ିଛି । ସୂଚନା ଅନୁସାରେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକସେବା ଭବନସ୍ଥିତ କନଭେନସନ ସେଂଟରଠାରେ ଆନ୍ତର୍ଜାତିକ ମହିଳା ଦିବସ ଉପଲକ୍ଷେ ଶୁକ୍ରବାର ରାଜ୍ୟ ମହିଳା ଓ ଶିଶୁବିକାଶ ବିଭାଗ ପକ୍ଷରୁ ସପ୍ତାହବ୍ୟାପୀ ରାଜ୍ୟସ୍ତରୀୟ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ । ଏଥିପାଇଁ ଆୟୋଜିତ ସଭାକୁ ସମ୍ବୋଧିତ କରି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଥିଲେ ଯେ, ମହିଳା ସଶକ୍ତିକରଣ ଆଜି କେବଳ ଗୋଟିଏ ସ୍ଲୋଗାନ ନୁହେଁ । ଏହା ଆଜି ଏକ ବାସ୍ତବତା । ଓଡ଼ିଶାର ମା’ମାନେ ଆଜି ରୂପାନ୍ତରର ସାରଥୀ ହୋଇଛନ୍ତି । ୭୦ଲକ୍ଷ ମା’ମାନଙ୍କର ବିଶାଳ ସଂଗଠନ ଆଜି ଏସଏଚଜିରୁ ଏସଏମଇ ହେବାକୁ ଯାଉଛି । ମା’ମାନେ ଉଦ୍ୟୋଗୀ ହେବାକୁ ଯାତ୍ରା ଆରମ୍ଭ କରିଛନ୍ତି । ମହିଳାମାନଙ୍କୁ ସବୁ କ୍ଷେତ୍ରରେ ସମାନ ଅଧିକାର ପ୍ରଦାନ କରିବା ସହିତ ଏକ ନ୍ୟାୟପୂର୍ଣ୍ଣ ସମାଜ ଗଠନ ଦିଗରେ କାମ କରିବା ପାଇଁ ମୁଖ୍ୟମନ୍ତ୍ରୀ ଆହ୍ୱାନ ଦେଇଥିଲେ । ସେହିପରି ଆଜି ମିଶନ ଶକ୍ତି ବିଭାଗର ସଚିବ ସୁଜାତା କାର୍ତ୍ତିକେୟନ ଗଣମାଧ୍ୟମକୁ ସୂଚନା  ଦେଇ କହିଥିଲେ ଯେ, ସଶକ୍ତିକରଣ ହେଉଛି ସମ୍ପୂର୍ଣ୍ଣ ପ୍ରକ୍ରିୟା । ମହିଳାମାନଙ୍କୁ ନେତୃତ୍ୱ ନେବାର ପ୍ଲାଟଫର୍ମ ଦେଉଛି ମିଶନ ଶକ୍ତି । ଗତ ପଂଚାୟତ ନିର୍ବାଚନରେ ପ୍ରାୟ ୬୦ ପ୍ରତିଶତ ମହିଳା ନିଜ ବଳରେ ଛିଡ଼ା ହୋଇ ଆସିଛନ୍ତି । ୨୧ଟି ଜିଲ୍ଲା ପରିଷଦ ସଭାପତି ହେଉଛନ୍ତି ମହିଳା । ତେଣୁ ମହିଳାମାନେ ଆସି ଯଦି ରାଜନୀତିରେ ଭାଗ ନେଉଛନ୍ତି ସେଥିପାଇଁ ସେମାନଙ୍କୁ ସମାଲୋଚନା କରିବା କଥା ନୁହେଁ । ଏହା ସେମାନଙ୍କର ପସନ୍ଦ ଓ ଅଧିକାର ମଧ୍ୟ ବୋଲି ସେ କହିଥିଲେ। ଏବେ ପ୍ରଶ୍ନ ଉଠୁଛି, ଯଦି ମହିଳାମାନେ ଆଗକୁ ଆସି ନେତୃତ୍ୱ ନିଅନ୍ତୁ ବୋଲି ରାଜ୍ୟ ସରକାର ଚାହୁଁଛନ୍ତି ତା’ହେଲେ ସାର୍ବଜନୀନ କାର୍ଯ୍ୟକ୍ରମରେ ସେହି ମହିଳାମାନଙ୍କୁ ସମ୍ମାନ ଦେବାରେ ସମସ୍ୟା ରହୁଛି କେଉଁଠି? ଆନ୍ତର୍ଜାତିକ ମହିଳା ଦିବସର ରାଜ୍ୟସ୍ତରୀୟ କାର୍ଯ୍ୟକ୍ରମରେ ପୂର୍ବରୁ ମୁଖ୍ୟମନ୍ତ୍ରୀଙ୍କ ସହ ସଭାମଂଚରେ ମହିଳା କମିଶନ ଅଧ୍ୟକ୍ଷା, ମହିଳା ସମବାୟ ବିକାଶ ନିଗମ ଅଧ୍ୟକ୍ଷା, ସମାଜ ମଙ୍ଗଳ ବୋର୍ଡ ଅଧ୍ୟକ୍ଷା ଭଳି ସରକାରୀ ପଦପଦବୀରେ ଥିବା ଦଳୀୟ ନେତ୍ରୀମାନଙ୍କୁ ଦେଖିବାକୁ ମିଳୁଥିଲା । କିନ୍ତୁ ଚଳିତଥର ମୁଖ୍ୟମନ୍ତ୍ରୀଙ୍କ ସହ କେବଳ ବିଭାଗୀୟ ମନ୍ତ୍ରୀଙ୍କୁ ବାଦ୍ ଦେଲେ ସଭା ମଂଚରେ ସମସ୍ତେ ସରକାରୀ ପଦାଧିକାରୀମାନେ ହିଁ ରହିଥିଲେ । କେହି ଜଣେ ବି ରାଜନୀତି ସହ ଜଡ଼ିତ ଥିବା ନେତ୍ରୀ(ସରକାରୀ ପଦବୀରେ ଥିବା) ମଂଚରେ ମୁଖ୍ୟମନ୍ତ୍ରୀଙ୍କ ସହ ନଥିଲେ। ମହିଳା ଓ ଶିଶୁବିକାଶ ବିଭାଗ ଏବଂ ମିଶନ ଶକ୍ତି ବିଭାଗର ଉପଦେଷ୍ଟାମାନଙ୍କୁ ବି ସଭାମଂଚରେ ଦେଖିବାକୁ ମିଳିନଥିଲା । ମହିଳା ଓ ଶିଶୁବିକାଶ ବିଭାଗର କାର୍ଯ୍ୟକ୍ରମରେ ବିଭାଗୀୟ ଉପଦେଷ୍ଟା ସୁମିତ୍ରା ଜେନା, ସଂଯୁକ୍ତା ମହାନ୍ତି ଓ ସବିତା ମହାନ୍ତିଙ୍କ ସମେତ ମିଶନଶକ୍ତି ଉପଦେଷ୍ଟା ଲୋପାମୁଦ୍ରା ବକ୍ସିପାତ୍ର ଓ ଗୀତା ବସ୍ତିଆଙ୍କୁ ମଂଚରେ ନଥିଲେ । ସେହିପରି ମହିଳା କମିଶନ ଅଧ୍ୟକ୍ଷା ମିନତୀ ବେହେରା, ସମବାୟ ବିକାଶ ନିଗମ ଅଧ୍ୟକ୍ଷା ସ୍ୱାଧୀନବାଳା ଦାସ ଓ ସମାଜ ମଙ୍ଗଳ ବୋର୍ଡ ଅଧ୍ୟକ୍ଷା କଲ୍ୟାଣୀ ନାୟକ ପ୍ରମୁଖ ବିଜେଡି ଦଳ ସହ ଜଡ଼ିତ। ଏସବୁ ନେତ୍ରୀମାନେ ସରକାରୀ ପଦପଦବୀରେ ଅଛନ୍ତି । ଯଦି ବିଜେଡି ସରକାର ଏହି ନେତ୍ରୀମାନଙ୍କୁ ଉପଯୁକ୍ତ ସମ୍ମାନ ସରକାରୀ ପ୍ଲାଟଫର୍ମରେ ଦେଇପାରୁନାହାନ୍ତି ତା’ହେଲେ ଅନ୍ୟ ସାଧାରଣ ମହିଳାଙ୍କୁ କିଭଳି ସମ୍ମାନ ଦେଉଥିବେ ତାହା ସହଜେ ଅନୁମେୟ । କେବଳ ନିର୍ବାଚନ ଆସିଲେ ମହିଳା ସଶକ୍ତିକରଣ ଓ ଲୋଭନୀୟ ପ୍ୟାକେଜ ଘୋଷଣା କରି ସେମାନଙ୍କ ଭୋଟ ହାତେଉଥିବା ବିଜେଡି ପରବର୍ତ୍ତୀ ସମୟରେ ସେହି ମହିଳାଙ୍କୁ ଅସମ୍ମାନିତ କରିବାକୁ ପଛାଉ ନଥିବା ବିଭାଗୀୟ ରାଜ୍ୟସ୍ତରୀୟ ସମାରୋହରୁ ଜଣାପଡ଼ିଛି ।

ପ୍ରତିଶୋଧପରାଣୟ ହୋଇଛନ୍ତି ରାଜ୍ୟ ସରକାର ଓ ପୁଲିସ: ରାଜ୍ୟପାଳଙ୍କ ହସ୍ତକ୍ଷେପ ଲୋଡ଼ିଲା ବିଜେପି…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ରାଜ୍ୟ ସରକାର ଅଗଣତାନ୍ତ୍ରିକ ଓ ସ୍ୱେଚ୍ଛାଚାରୀ ଶାସନର ପରମ୍ପରା ସୃଷ୍ଟି କରିଛନ୍ତି । ସ୍ୱାସ୍ଥ୍ୟମନ୍ତ୍ରୀ ନବ ଦାସ ହତ୍ୟାକାଣ୍ଡ ମାମଲାକୁ ଚାପି ଦେବାକୁ ରାଜ୍ୟ ସରକାର ଉଦ୍ୟମ କରୁଛନ୍ତି । ରାଜ୍ୟର ପୁଲିସ ଓ ସରକାର ଉଭୟ ଏବେ ପ୍ରତିଶୋଧପରାୟଣ ହୋଇପଡ଼ିଛନ୍ତି । ତେଣୁ ଶାସନ ବ୍ୟବସ୍ଥାରେ ରାଜ୍ୟପାଳଙ୍କ ହସ୍ତକ୍ଷେପ ଜରୁରୀ ହୋଇ ପଡ଼ିଛି ବୋଲି ବିଜେପି ଦାବି କରିଛି । ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ନେତୃତ୍ୱରେ ଆଜି ବିଜେପିର ଏକ ଉଚ୍ଚସ୍ତରୀୟ ପ୍ରତିନିଧି ଦଳ ରାଜଭବନ ଯାଇ ରାଜ୍ୟପାଳ ପ୍ରଫେସର ଗଣେଶୀଲାଲଙ୍କୁ ଭେଟି ରାଜ୍ୟରେ ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି ସମ୍ପର୍କରେ ଅବଗତ କରିବା ସହ ତାଙ୍କର ହସ୍ତକ୍ଷେପ ଦାବି କରିଛନ୍ତି । ଶ୍ରୀ ମିଶ୍ର କହିଛନ୍ତି ଯେ, ରାଜ୍ୟରେ ବିପର୍ଯ୍ୟସ୍ତ ଆଇନଶୃଙ୍ଖଳା, ବହୁଚର୍ଚ୍ଚିତ ନବ ଦାସ ହତ୍ୟାକାଣ୍ଡ ତଦନ୍ତରେ ଶିଥିଳତା ଓ ଆନ୍ଦୋଳନକାରୀ ଯୁବମୋର୍ଚ୍ଚା କର୍ମୀଙ୍କ ଉପରେ ପୁଲିସର ଜୁଲମ୍ ଓଡ଼ିଶାର ଜନମାନସକୁ ବିଚଳିତ କରିଛି । ରାଜ୍ୟରେ ଶାସନ କେମିତି ଚାଲୁଛି ଓ କିଏ ଚଲାଉଛି ତାହା ଜଣାପଡୁନାହିଁ । ଆନ୍ଦୋଳନକାରୀ ଯୁବମୋର୍ଚ୍ଚା କାର୍ଯ୍ୟକର୍ତାଙ୍କୁ ପୁଲିସ ଅମାନୁଷିକ ଅତ୍ୟାଚାର କରିବା ସହ ମିଛ ଦଫା ଲଗାଇ ଜେଲରେ ଭର୍ତ୍ତି କରିଛିି । ଏଭଳି ପରିସ୍ଥିତିରେ ରାଜ୍ୟପାଳଙ୍କ ହସ୍ତକ୍ଷେପ ଜରୁରୀ ହୋଇପଡିଛି ଏବଂ ତାଙ୍କୁ ହସ୍ତକ୍ଷେପ କରିବା ପାଇଁ ଆଜି ଅନୁରୋଧ କରିଛୁ ବୋଲି ଶ୍ରୀ ମିଶ୍ର କହିଛନ୍ତି ।ସେ କହିଛନ୍ତି ଯେ, ଗତ କିଛି ଦିନ ତଳେ ରାଜ୍ୟର ଜଣେ କ୍ୟାବିନେଟ୍ ମନ୍ତ୍ରୀଙ୍କୁ ବିଚ୍ ରାସ୍ତାରେ ପୁଲିସ ଏଏସ୍‌ଆଇ ହତ୍ୟା କରିବା ଭଳି ସଙ୍ଗୀନ ଘଟଣା ଓଡ଼ିଶାର ଜନମାନସକୁ ସ୍ତମ୍ଭୀଭୂତ କରିଥିଲା । ଏହି ଘଟଣା ରାଜ୍ୟବାସୀଙ୍କ ମନରେ ପୁଲିସ ପ୍ରଶାସନ ଏବଂ ଆତ୍ମ ସୁରକ୍ଷା ପ୍ରତି ଏକ ଭୟର ବାତାବରଣ ସୃଷ୍ଟି କରିବା ସହ ମନ୍ତ୍ରୀଙ୍କ ହତ୍ୟା ମାମଲାରେ ତଦନ୍ତ ଯେଭଳି ଦିଗହରା ହୋଇଛି, ତାହା ଅନେକଙ୍କୁ ଦ୍ୱନ୍ଦ୍ୱରେ ପକାଇଛି । ଘଟଣାର ସତ୍ୟାସତ୍ୟ ସାମ୍ନାକୁ ଆସିବା ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି । ସରକାର ଏହି ହତ୍ୟା ଘଟଣାକୁ ଚାପି ଦେବା ପାଇଁ ଉଦ୍ୟମ କରୁଛନ୍ତି । ନବ ଦାସ ହତ୍ୟା ଘଟଣାର ସିବିଆଇ ତଦନ୍ତ କରିବା ପାଇଁ ବିଜେପି ପକ୍ଷରୁ ବାରମ୍ବାର ଦାବି କରିବା ସତ୍ୱେ ସରକାର ଏଥିପ୍ରତି ଭୃକ୍ଷେପ ନକରି ଏ ପରିପ୍ରେକ୍ଷୀରେ ଚାଲିଥିବା ଆନ୍ଦୋଳନକୁ ଦମନ କରିବା ପାଇଁ ପୁଲିସ ସହାୟତାରେ ନିରୀହ ଆନ୍ଦୋଳନକାରୀ, ରାଜନୈତିକ କାର୍ଯ୍ୟକର୍ତାଙ୍କ ଉପରେ ଅତ୍ୟାଚାର କରିବା ଅତ୍ୟନ୍ତ ନିନ୍ଦନୀୟ । ପୁଲିସ ପ୍ରତିଶୋଧ ପରାୟଣ ହୋଇ ମହିଳା କାର୍ଯ୍ୟକର୍ତାଙ୍କୁ ଅସଦାଚରଣ କରିବା ସହ ଆନ୍ଦୋଳନକାରୀଙ୍କ ବିରୋଧରେ ମିଛ ଦଫା ଲଗାଇ ବେଆଇନ ଭାବେ ସେମାନଙ୍କୁ ଗିରଫ କରି ଜେଲରେ ଭର୍ତ୍ତି କରୁଛନ୍ତି । ସରକାର ଏବଂ ପୁଲିସ ପ୍ରତିଶୋଧ ପରାୟଣ ହେବାରୁ ନିବୃତ ରୁହନ୍ତୁ।ଗତ କିଛିବର୍ଷ ଧରି ଲଗାତାର ଭାବରେ ରାଜ୍ୟରେ ହତ୍ୟା, ଲୁଟ, ଦୁଷ୍କର୍ମ ଓ ନାରୀ ନିର୍ଯାତନା ବଢ଼ୁଥିବା କାରଣରୁ ସମାଜର ପ୍ରତ୍ୟେକ ବର୍ଗ ନିଜକୁ ଅସୁରକ୍ଷିତ ମଣୁଛନ୍ତି ।  ଏହି ସମ୍ବେଦନଶୀଳ ପ୍ରସଙ୍ଗରେ ହସ୍ତକ୍ଷେପ କରିବା ସହ ରାଜ୍ୟର ଆଇନଶୃଙ୍ଖଳା ପରିସ୍ଥିତିର ଚରମ ବିଫଳତାକୁ ରୋକିବା ପାଇଁ ଦୃଢ ପଦକ୍ଷେପ ଗ୍ରହଣ କରିବାକୁ ବିଜେପି ବିଧାୟକ ଦଳ ତରଫରୁ ଅନୁରୋଧ କରାଯାଇଛି ବୋଲି ଶ୍ରୀ ମିଶ୍ର କହିଛନ୍ତି । ଏହି ପ୍ରତିନିଧି ଦଳରେ ବିଧାୟକ ଲଲିତେନ୍ଦୁ ବିଦ୍ୟାଧର ମହାପାତ୍ର, ମୁକେଶ ମହାଲିଙ୍ଗ, ଜୟନ୍ତ ଷଡଙ୍ଗୀ, ସୂର୍ଯ୍ୟବଂଶୀ ସୁରଜ ସ୍ଥିତପ୍ରଜ୍ଞଙ୍କ ସମେତ ବିଜେପିର ରାଜ୍ୟ କର୍ମକର୍ତ୍ତାମାନେ ମଧ୍ୟ ସାମିଲ ଥିଲେ ।

ଶ୍ରୀଜଗନ୍ନାଥଙ୍କ ୩୫ ହଜାର ଏକର ଜମିର ହେବ ଡିଜିଟାଇଜେସନ, ଖର୍ଚ୍ଚ ହେବ ୧୧ କୋଟି …!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ମହାପ୍ରଭୁ ଶ୍ରୀଜଗନ୍ନାଥଙ୍କ ନାମରେ ଓଡ଼ିଶାରେ ରହିଥିବା ୩୫ ହଜାର ଏକର ଜମିର ହେବ ଡିଜିଟାଇଜେସନ। ଏଥିପାଇଁ ପ୍ରାୟ ୧୧ କୋଟି ୪୦ ଲକ୍ଷ ଟଙ୍କା ଖର୍ଚ୍ଚ ହେବ। ଏହି ବେୟକୁ ଆଇନ ବିଭାଗ ମଞ୍ଜୁରୀ ଦେଇଛି। ଏନେଇ ଆଜି ସୂଚନା ଦେଇଛନ୍ତି ଶ୍ରୀଜଗନ୍ନାଥ ମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା। ସେ କହିଛନ୍ତି, ମହାପ୍ରଭୁଙ୍କ ନାମରେ ଥିବା ଜମିର ଡିଜିଟାଇଜେସନ ହୋଇପାରିଲେ ଭୂଲେଖ ଭଳି ମହାପ୍ରଭୁଙ୍କ ଜମି ଚିହ୍ନଟ ସହଜ ହୋଇପାରିବ। ଲୋକେ ଅନ୍‌ଲାଇନ୍ ଜରିଆରେ ମହାପ୍ରଭୁଙ୍କ ଜମି ଭୋଗଦଖଲ ବାବଦ ରାଜସ୍ୱ ପୈଠ କରିପାରିବେ। ଏବେ କର୍ମଚାରୀ ଅଭାବରରୁ ମହାପ୍ରଭୁଙ୍କ ଜମିର ରାଜଭାଗ ବା ରାଜସ୍ୱ ଠିକ୍ ଭାବେ ଆଦାୟ ହୋଇପାରୁନି। ଖୁବ୍‌ ଶୀଘ୍ର ଲୋକଙ୍କ ଇ-ପାଉତି କାଟିବାର ସୁବିଧା ମିଳିବ। ଆସନ୍ତା ମାର୍ଚ୍ଚ ୧୭ତାରିଖରେ ପ୍ରି-ବଜେଟ ବୈଠକରେ ଏବାବଦରେ ବିସ୍ତୃତ ଭାବରେ ନିଷ୍ପତ୍ତି ହୋଇ ଚଳିତ ବର୍ଷ ବଜେଟରେ ଉପସ୍ଥାପିତ ହେବ। ଆସନ୍ତା ୧୭ ଫାଇନାନ୍‌ସ କମିଟି ବୈଠରେ ଡିଜିଟାଇଜେସନ ଅଫ ଲ୍ୟାଣ୍ଡ ରେକର୍ଡ, ଶ୍ରୀ ଜଗନ୍ନାଥ ମହାପ୍ରଭୁ ବିଜେ ପୁରୀ, ମାର୍ଫତ ଶ୍ରୀମନ୍ଦିର ପରିଚାଳନା କମିଟି ନାମରେ ଥିବା ଜମି ରାଜ୍ୟ ସରକାରଙ୍କ ଭୂଲେଖ ଭଳି ଏକତ୍ରିତ ହେବ। ଡିଜିଟାଇଜେସନ ପାଇଁ ୧୧କୋଟି ୪୦ଲକ୍ଷ ଧାର୍ଯ୍ୟ କରାଯାଇଛି। ଓରସାକ୍ ଏହି ଡିଜିଟାଜେସନ କାମ କରିବ। ଆସନ୍ତା ବର୍ଷ ବଜେଟରେ ଏହି ଟଙ୍କା ଶ୍ରୀମନ୍ଦିର ପ୍ରଶାସନକୁ ମିଳିବ। ମହାପ୍ରଭୁଙ୍କ ନାମରେ ରାଜ୍ୟରେ ମୋଟ ୩୫ହଜାର ଏକର ଜମି ରହିଥିବାବେଳେ ଏଥିମଧ୍ୟରୁ ଖୋର୍ଦ୍ଧା ଓ ପୁରୀରେ ୨୦ହଜାର ଏକର ଜମି ରହିଛି। ଚଳିତ ଆର୍ଥିକ ବର୍ଷ ମହାପ୍ରଭୁଙ୍କ ନାମରେ ପୁରୀ, ଖୋର୍ଦ୍ଧା ଜିଲ୍ଲା ସମେତ ବିଭିନ୍ନ ଜିଲ୍ଲାରେ ଥିବା ୨୦୭୫ ଏକର ଜମିର ପଟ୍ଟା ଶ୍ରୀମନ୍ଦିର ପ୍ରଶାସନ ଖାତାକୁ ଆସିସାରିଛି। ନୂଆ ଶ୍ରୀଜଗନ୍ନାଥ ଜମି ପରିଚାଳନା ନିୟମ ଲ୍ୟାଣ୍ଡ କମିଟିରେ ମଞ୍ଜୁରୀ ପାଇସାରିଛି। ଏହା ଆସନ୍ତା ପରିଚାଳନା କମିଟିରେ ଅନୁମୋଦନ ନିମନ୍ତେ ଉପସ୍ଥାପିତ କରାଯିବ। ଏହା ମଞ୍ଜୁରୀ ପାଇଗଲା ପରେ ଶ୍ରୀଜଗନ୍ନାଥ ଜମି ବିକ୍ରି ସହଜ ହୋଇଯିବ। ଜିଲ୍ଲାପାଳମାନେ ଏବାବଦରେ ନିଷ୍ପତ୍ତି ନେଇପାରିବେ। ଫଳରେ ଜମି ବିକ୍ରି ଟଙ୍କା ବଢ଼ିବ ଓ କର୍ପସ ପାଣ୍ଠି ବୃଦ୍ଧି ପାଇବ। ଏବେ ଶ୍ରୀମନ୍ଦିର ପ୍ରଶାସନ କର୍ପସ ଫଣ୍ଡରେ ୩୫୭ କୋଟି ଟଙ୍କା ରହିଛି ବୋଲି ଶ୍ରୀ ଜେନା କହିଛନ୍ତି। ସେହିପରି ଦିବ୍ୟାଙ୍ଗ ମାନଙ୍କୁ ଉତ୍ତର ଦ୍ୱାର ବାଟେ ନେଇ ଶ୍ରୀମନ୍ଦିର ଦର୍ଶନ ବ୍ୟବସ୍ଥା ବିଷୟରେ ସେ ସୂଚନା ଦେଇଛନ୍ତି। ଯୋଜନା ଅନୁମୋଦନ ପାଇଲେ ଉତ୍ତର ଦ୍ୱାର ଠାରେ ଦିବ୍ୟାଙ୍ଗମାନେ ପହଞ୍ଚିବା ପରେ ଶ୍ରୀମନ୍ଦିରରେ କାମ କରୁଥିବା ବୋଝିଆମାନେ କାନ୍ଧରେ ବାହୁଙ୍ଗି କରି ସେମାନଙ୍କୁ ଭିତରକୁ ନେଇ ଜଗନ୍ନାଥ ଦର୍ଶନ କରାଇବେ। ଏଥିନିମନ୍ତେ ଏକ ନିର୍ଦ୍ଦିଷ୍ଟ ସମୟ ସ୍ଥିର କରାଯିବ। ଏନେଇ ପୁରୀ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଓ ସ୍ୱେଚ୍ଛାସେବୀ ଅନୁଷ୍ଠାନ ସହ ବୈଠକ ସରିଛି ବୋଲି ସେ କହିଛନ୍ତି।

ସମୀକ୍ଷା ବୈଠକରେ ଜାତୀୟ ଏସଟି କମିଶନ ଖପ୍ପା ; ଡିଏମଏଫ ପାଣ୍ଠିର ହିସାବ ଦିଅ, ଆଦିବାସୀଙ୍କ ପାଇଁ ସ୍ୱତନ୍ତ୍ର ବିଭାଗ କର..!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ରାଜ୍ୟରେ ଅନୁସୂଚିତ ଜନଜାତିଙ୍କ ଅଧିକାର, ସୁରକ୍ଷା ଓ କଲ୍ୟାଣ ଦିଗରେ ରାଜ୍ୟ ସରକାର ଆବଶ୍ୟକ ପଦକ୍ଷେପ ନେବାରେ ବିଫଳ ହୋଇଥିବାରୁ ଜାତୀୟ ଅନୁସୂଚିିତ ଜନଜାତି(ଏସଟି) କମିଶନ ତୀବ୍ର ଅସନ୍ତୋଷ ବ୍ୟକ୍ତ କରିଛନ୍ତି । ଏହାସହିତ ଡିଏମଏଫ ପାଣ୍ଠି ଖର୍ଚ୍ଚ, ପେଷା ନିୟମ ପ୍ରଣୟନ, ଆଦିବାସୀଙ୍କୁ ମୌଳିକ ସୁବିଧାସୁଯୋଗରୁ ବଂଚିତ କରାଯିବା, ରାଜ୍ୟର ୨୩% ଆଦିବାସୀଙ୍କ ପାଇଁ ନୂଆ ବିଭାଗ ଆଦି ସମ୍ପର୍କରେ ମାସକ ମଧ୍ୟରେ ବିସ୍ତୃତ ରିପୋର୍ଟ ଦେବାକୁ କମିଶନ ଆଜି ରାଜ୍ୟ ମୁଖ୍ୟ ସଚିବ ପ୍ରଦୀପ କୁମାର ଜେନାଙ୍କୁ ନିର୍ଦ୍ଦେଶ ଦେଇଛନ୍ତି । ଜାତୀୟ ଏସଟି କମିଶନ ଅଧ୍ୟକ୍ଷ ହର୍ଷ ଚୌହ୍ୱାନଙ୍କ ନେତୃତ୍ୱରେ କମିଶନଙ୍କ ପ୍ରତିନିଧି ଦଳ ଆଜି ଭୁବନେଶ୍ୱରରେ ରାଜ୍ୟ ସରକାରଙ୍କ ସହ ଜନଜାତିଙ୍କ ପାଇଁ କାର୍ଯ୍ୟକାରୀ ହେଉଥିବା ଯୋଜନାଗୁଡ଼ିକ ସମେତ ସ୍ୱାସ୍ଥ୍ୟ, ଶିକ୍ଷା, ନିଯୁକ୍ତି, ପୁନଃ ଥଇଥାନ ଓ ମୌଳିକ ସୁବିଧା ଆଦି ପ୍ରସଙ୍ଗରେ ଏକ ସମୀକ୍ଷା ବୈଠକ କରିଥିଲେ । କମିଶନ ସଦସ୍ୟ ଅନନ୍ତ ନାୟକ, ସଚିବ ଅଳକା ତିୱାରୀ ଓ ଅନ୍ୟମାନଙ୍କ ଉପସ୍ଥିତିରେ ଅନୁଷ୍ଠିତ ଏହି ସମୀକ୍ଷା ବୈଠକରେ ମୁଖ୍ୟ ସଚିବ ପ୍ରଦୀପ କୁମାର ଜେନା, ଅନୁସୂଚିତ ଜାତି ଓ ଜନଜାତି ବିଭାଗର ସଚିବ ରୂପାରୋଶନ ସାହୁ ଓ ଅନ୍ୟ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ । ରାଜ୍ୟରେ ଆଦିବାସୀଙ୍କ ସାମାଜିକ ଓ ଅର୍ଥନୀତିକ ବିକାଶ, ସେମାନଙ୍କର ସାମ୍ବିଧାନିକ ଅଧିକାର ଓ ସୁରକ୍ଷା ଆଦିର ସମୀକ୍ଷା କରିଥିଲେ ।ସମୀକ୍ଷା ବୈଠକ ପରେ କମିଶନ ତୁରନ୍ତ ଆଦିବାସୀଙ୍କ ପାଇଁ ଉଦ୍ଦିଷ୍ଟ ପାଣ୍ଠିକୁ ଅନ୍ୟତ୍ର ଖର୍ଚ୍ଚ କରାଯିବାକୁ ପରାମର୍ଶ ଦେବା ସହ ଆଦିବାସୀଙ୍କ ପାଇଁ ବିଭିନ୍ନ ସ୍କିମରେ ଆସୁଥିବା ଅର୍ଥର ସୁବିନିଯୋଗ କରିବା ଉପରେ ଗୁରୁତ୍ୱ ଦେଇଛନ୍ତି । ଯେଉଁ ସବୁ ପ୍ରକଳ୍ପ ଯୋଗୁ ଆଦିବାସୀମାନେ ବିସ୍ଥାପିତ ହୋଇଛନ୍ତି ସେମାନଙ୍କୁ ଦୀର୍ଘଦିନ ଧରି ଥଇଥାନ  କରାନଯିବା, ବିଶେଷକରି କେନ୍ଦୁଝର ଜିଲ୍ଲାରେ ଶିଳ୍ପ, ଜଳସେଚନ ଓ ଅନ୍ୟ ବିକାଶମୂଳକ ପ୍ରକଳ୍ପ ପାଇଁ ଆଦିବାସୀମାନେ ବିସ୍ଥାପିତ ହୋଇଥିବା, ଆଦିବାସୀବହୁଳ ଅଂଚଳରେ ଡାକ୍ତର ଓ ପାରାମେଡିକାଲ କର୍ମଚାରୀ ଅଭାବ, ସ୍ୱାସ୍ଥ୍ୟ ଭିତ୍ତିଭୂମି ନଥିବା ଏବଂ ବିଶେଷକରି ଆବାସିକ ସ୍କୁଲଗୁଡ଼ିକରେ ପୁଅ ଓ ଝିଅମାନେ ଅମାନବୀୟ ଓ ଦୟନୀୟ ପରିସ୍ଥିତିରେ ରହୁଥିବା ସମ୍ପର୍କରେ କମିଶନ ଆଜିର ବୈଠକରେ ରାଜ୍ୟ ସରକାରଙ୍କୁ ସୂଚାଇ ଦେଇଛନ୍ତି । ରାଜ୍ୟରେ ପ୍ରାୟ ୨୩ ପ୍ରତିଶତ ଆଦିବାସୀ ଲୋକ ରହୁଥିଲେ ମଧ୍ୟ ସରକାର ସେମାନଙ୍କ ପାଇଁ ସ୍ୱତନ୍ତ୍ର ବିଭାଗଟିଏ କରିନାହାନ୍ତି । ଯେଉଁଥିପାଇଁ କମିଶନ ଯେତେବେଳେ କିଛି ତଥ୍ୟ ମାଗୁଛନ୍ତି ତାହା ସଠିକ୍ ସମୟରେ ଠିକ୍ ଢ଼ଙ୍ଗରେ ମିଳିପାରୁନି । ରାଜ୍ୟରେ ପେଷା ଆଇନକୁ କାର୍ଯ୍ୟକାରୀ କରାଯାଇପାରୁନି । ପେଷା ନିୟମାବଳୀ ତୁରନ୍ତ କାର୍ଯ୍ୟକାରୀ କରିବାକୁ କମିଶନ ପରାମର୍ଶ ଦେଇଛନ୍ତି । ଏହାସହିତ ବହୁସଂଖ୍ୟାରେ ଜଙ୍ଗଲ ଜମି ଅଧିକାର ଆବେଦନକୁ ସରକାର ଖାରଜ କରିଥିବା କମିଶନ ଜାଣିବାକୁ ପାଇଛନ୍ତି । ଯେଉଁ ଅଧିକାରୀ ଓ ବ୍ୟକ୍ତିମାନେ ଜାଲ୍ ଆଦିବାସୀ ଜାତି ସାର୍ଟିଫିକେଟ୍ ପ୍ରଦାନ କରିଛନ୍ତି  ଅବା ନେଇଛନ୍ତି ସେମାନଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ହୋଇନଥିବା ସମୀକ୍ଷା ବୈଠକରୁ ଜଣାପଡ଼ିଛି ।ରାଜ୍ୟରେ ଡିଏମଏଫ ପାଣ୍ଠି ଖର୍ଚ୍ଚକୁ ନେଇ ସ୍ଥାନୀୟ ଅଧିକାରୀ ଓ ଲୋକମାନେ ଆବଶ୍ୟକ ପରିମାଣର ସଚେତନ ନଥିବାରୁ ସରକାର ଏହାକୁ ମନମୁଖୀ ଖର୍ଚ୍ଚ କରୁଛନ୍ତି । ଡିଏମଏଫ(ଜିଲ୍ଲା ଖଣିଜ ପାଣ୍ଠି)କୁ ଅନ୍ୟତ୍ର ଖର୍ଚ୍ଚ କରାଯିବାକୁ ନେଇ କମିଶନ ଅସନ୍ତୋଷ ବ୍ୟକ୍ତ କରିଛନ୍ତି । ଆଦିବାସୀ ଅଚଂଳରେ ଜଳ,ରାସ୍ତା, ବିଦ୍ୟୁତ ଭଳି ମୌଳିକ ସୁବିଧା ନଥିବା, ସରକାରୀ ଉଦ୍ୟୋଗରେ ଆଦିବାସୀଙ୍କୁ ନିଯୁକ୍ତି ମିଳୁନଥିବା ଓ ଆବଶ୍ୟକ ପରିମାଣର ଟେଲିଫୋନ୍ ଯୋଗାଯୋଗ ବ୍ୟବସ୍ଥା ନଥିବା ନେଇ କମିଶନ କ୍ଷୁବ୍ଧ ହୋଇଛନ୍ତି । କମିଶନ ଅଧ୍ୟକ୍ଷ ଶ୍ରୀ ଚୌହ୍ୱାନ ଆସନ୍ତା ମାସକ ମଧ୍ୟରେ ବିସ୍ତୃତ ରିପୋର୍ଟ ଦେବାକୁ ମୁଖ୍ୟ ସଚିବ ଶ୍ରୀ ଜେନାଙ୍କୁ ନିର୍ଦ୍ଦେଶ ଦେଇଛନ୍ତି । ରାଜ୍ୟ ସରକାରଙ୍କ ରିପୋର୍ଟ ମିଳିବା ପରେ ହିଁ କମିଶନ ତାଙ୍କର ଚୂଡ଼ାନ୍ତ ରିପୋର୍ଟ ପ୍ରସ୍ତୁତ କରି ଉଭୟ ରାଷ୍ଟ୍ରପତି ଓ ସଂସଦକୁ ପଠାଇବେ ବୋଲି ସୂଚନା ଦେଇଛନ୍ତି ।

ପିଏ॰ଆଇ॰ଟି॰ଡି॰ଏ ଙ୍କ ରାମନାଗୁଡା ବ୍ଲକ କ୍ଷେତ୍ର ପରିଦର୍ଶନ…!

!!! ରାମନାଗୁଡା ରୁ ଶୁଭଜିତ୍ ପଟ୍ଟନାୟକ ଙ୍କ ରିପୋର୍ଟ !!!

ଏଥର ସମ୍ଭାଳ (ରାମନାଗୁଡା)- ରାୟଗଡା ଜିଲ୍ଲା ରାମନାଗୁଡା ପଂଚାୟତ ସମିତି କାର୍ଯ୍ୟାଳୟ ସଦ୍ଦ୍ଭାବନା ଗୃହରେ ଗୋଷ୍ଠି ଉନ୍ନୟନ ଅଧିକାରୀ ସୁଶ୍ରୀ ପ୍ରଭାତୀ ଝୋଡିଆ ଙ୍କ ଅଧ୍ୟକ୍ଷତାରେ ଗୁଣୁପୁର ସମନ୍ୱିତ ଆଦିବାସୀ ଉନ୍ନୟନ ସଂସ୍ଥା ପ୍ରକଳ୍ପ ପ୍ରଶାସିକା ଶ୍ରୀମତୀ ଶାନ୍ତିଲତା ପ୍ରଧାନଙ୍କ ଦ୍ବାରା ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ଏଥିରେ ଗୋଷ୍ଠି ଉନ୍ନୟନ ଅଧିକାରୀ ପ୍ରଭାତୀ ଝୋଡିଆ ,ତହସିଲଦାର ନିର୍ମଳ ଚନ୍ଦ୍ର ସାହୁ, ରାମନାଗୁଡା ବ୍ଲକ ସହକାରୀ ନିର୍ବାହୀ ଯନ୍ତ୍ରୀ ରାକେଶ କୁମାର ସାହୁ, ଗୁଣୁପୁର ଆଇଟିଡିଏ ସହକାରୀ ନିର୍ବାହୀ ଯନ୍ତ୍ରୀ ,ଆଇଟିଡିଏ ପ୍ରୋଗ୍ରାମ ଅଫିସର,ରାୟଗଡା ଆଦିବାସୀ ଉନ୍ନୟନ ପରିଷଦ ସଦସ୍ୟ ରାମାରାଓ ପାଲାକା ପ୍ରମୁଖ ମଞ୍ଚାସୀନ ଥିବା ବେଳେ ରାମନାଗୁଡା ବ୍ଲକ୍ ର ସମସ୍ତ କର୍ମଚାରୀ ଓ କ୍ଷେତ୍ର କର୍ମଚାରୀ ଯୋଗ ଦେଇଥିଲେ । ସହକାରୀ ଯନ୍ତ୍ରୀ ପ୍ରତାପ କୁମାର ମିଶ୍ର ସମସ୍ତଙ୍କ ପରିଚୟ ପ୍ରଦାନ କରିବା ପରେ ଆଇଟିଡିଏ ଏବଂ ଆଦିବାସୀ ଉନ୍ନୟନ ପରିଷଦ ର ଉଦ୍ଦେଶ୍ୟ ସମ୍ଵନ୍ଧରେ ଆଲୋକପାତ କରିଥିଲେ । ଏହାପରେ ଆଇଟିଡିଏ ପିଏ ଶ୍ରୀମତୀ ପ୍ରଧାନ ସମସ୍ତ ବିଭାଗ ସମନ୍ବୟତା ରକ୍ଷା ପୂର୍ବକ ସମସ୍ତ ଉନ୍ନୟନ ମୂଳକ କାର୍ଯ୍ୟରେ ସକ୍ରିୟ ଭୂମିକା ନିର୍ବାହ କରିବାକୁ ଅନୁରୋଧ କରିଥିଲେ । ସେହିପରି ରାମନାଗୁଡା ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ଜୟଶ୍ରୀ ବିଷୋୟୀ ରାମନାଗୁଡା ବ୍ଲକ୍ ସ୍ତରରେ ଅନୁସୂଚିତ ଜାତି ତଥା ଜନଜାତି ଙ୍କ ପାଇଁ କାର୍ଯ୍ଯକାରୀ ହେଉଥିବା ବିଭିନ୍ନ ଯୋଜନା ସମ୍ବନ୍ଧରେ ଅବଗତ କରାଇଥିଲେ ।

ମିଶନ ଶକ୍ତି ବିପିଏମ ଯସ୍ମୀନ ମୁଟିକା ଏ ଦିଗରେ ସ୍ୱୟଂ ସହାୟକ ଗୋଷ୍ଠୀ ର ମହିଳା ମାନଙ୍କ ଭୂମିକା ସମ୍ବନ୍ଧ ରେ ଆଲୋଚନା କରିଥିଲେ। ଉନ୍ନୟନ ମୂଳକ କାର୍ଯ୍ଯ ସମ୍ପାଦନ ର ପ୍ରକ୍ରିୟା ରେ ଆସୁଥିବା ସମସ୍ଯା ଓ ସମାଧାନ ଉପରେ ବିଚାର କରାଗଲା । ରାମନାଗୁଡା ବ୍ଲକ୍ ର ସର୍ବାଙ୍ଗୀନ ଉନ୍ନତି ତଥା ସାମାଜିକ, ସାଂସ୍କୃତିକ ତଥା ଆର୍ଥିକ ବିକାଶ ପାଇଁ ସର୍ବଦା ପୂର୍ଣ୍ଣ ପ୍ରାଣରେ ସହଯୋଗ କରିବାକୁ ମଞ୍ଚାସୀନ ଥିବା ସମସ୍ତ ଅଧିକାରୀ ପ୍ରତିଶ୍ରୁତି ଦେଇଥିଲେ । ସଭା ଶେଷରେ ସହକାରୀ ଯନ୍ତ୍ରୀ ଶ୍ରୀ ପ୍ରତାପ ମିଶ୍ର ଧନ୍ୟବାଦ ଅର୍ପଣ କରିଥିଲେ। ଏହାପରେ ଆଇଟିଡିଏ ପିଏ ଶ୍ରୀମତୀ ଶାନ୍ତିପ୍ରଭା ପ୍ରଧାନ , ରାମନାଗୁଡା‌ ବ୍ଲକର ମଙ୍ଗଳ ବିଭାଗ ଦ୍ଵାରା ପରିଚାଳିତ ହେଉଥିବା ବିଭିନ୍ନ ବିଦ୍ୟାଳୟ କୁ ପରିଦର୍ଶନ ରେ ଗସ୍ତ କରି ବିଦ୍ୟାଳୟ ର ଆନୁଷଙ୍ଗିକ ବ୍ୟବସ୍ଥା ,ଛାତ୍ର ଛାତ୍ରୀ ମାନଙ୍କର ଶିକ୍ଷା ର ଗୁଣାତ୍ମକ ବିଷୟରେ ପିଲାଙ୍କୁ ପଚାରି ବୁଝିବା ସହିତ ଉନ୍ନୟନ ମୂଳକ ପ୍ରକଳ୍ପ ଗୁଡ଼ିକ ର କାର୍ଯ୍ୟ ତଦାରଖ କରି ବିଭିନ୍ନ ଅଞ୍ଚଳ ର କ୍ଷେତ୍ର ପରିଦର୍ଶନ କରିଥିଲେ । ପିଏଆଇଟିଡିଏ ଙ୍କ ଏହି ପରିଦର୍ଶନ ସମୟରେ ବ୍ଲକ୍ ର ସମସ୍ତ କର୍ମକର୍ତ୍ତା ଙ୍କ ସମେତ ଅନ୍ୟାନ୍ୟ ବିଭାଗ ର ସରକାରୀ କର୍ମଚାରୀ ଉପସ୍ଥିତ ଥିଲେ।

ସାମ୍ଵାଦିକ ଆକ୍ରମଣକାରୀ ଅଭିଯୁକ୍ତ ଙ୍କୁ ଗିରଫ ଦାଵୀ…!

ଏଥର ସମ୍ଭାଳ ବ୍ୟୁରୋ (ରାଜନଗର)- କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକ ତାଳଚୁଆ ମେରାଇନ ଥାନା ଅଧିନ ଦେଉଳସାହିରେ ତା ୨୭.୨.୦୨୩ ରିଖ ଦିନ ଲୋକଙ୍କ ଠାରୁ ଅଭିଯୋଗ ପାଇ ଖବର ସଂଗ୍ରହ କରିଥିବା ଉତ୍କଳମେଲର ସାମ୍ବାଦିକ ଶ୍ରୀ ସର୍ବେଶ୍ବର ପ୍ରଧାନ ଓ ତାଙ୍କ ସ୍ତ୍ରୀକୁ ମରଣାତ୍ମକ ଆକ୍ରମଣ ହୋଇଥିଲା। ଘଟଣାର ପାଞ୍ଚଦିନ ଵିତି ଯାଇଥିଲେ ମଧ୍ୟ ଦୁର୍ଵୁତ ଖୁଲମ ଖୋଲା ଵୁଲୁଥିଲେ ଵି ପୋଲିସ୍ ସେମାନଙ୍କୁ ଗିରଫ କରିଵାକୁ ଆନ୍ତରିକତା ନଥିବା ଦେଖା ଦେଇଛି।ସେମାନଙ୍କୁ ଗିରଫ ଦାଵୀରେ ରାଜନଗର ବ୍ଲକ ସାମ୍ବାଦିକ ସଂଘ ପକ୍ଷରୁ ତାଳଚୁଆ ମେରାଇନ୍ ଥାନା ଅଧିକାରୀ ଶ୍ରୀ ଅନାମ ଚରଣ ନାୟକଙ୍କୁ ଗତକାଲି ସାକ୍ଷାତ କରି ଦାଵୀପତ୍ର ଦେଇଛନ୍ତି। ସୂଚନା ଯୋଗ୍ୟ ଗ୍ରାମ୍ୟ ଉନ୍ନୟନ ଵିଭାଗ ପକ୍ଷରୁ ଅନନ୍ତକେଶରୀ ମୌଜାଠାରୁ ଦେଉଳସାହି ପର୍ଯ୍ୟନ୍ତ ଗାର୍ଡ ୱାଲ ନିର୍ମାଣ କରାଯାଉଛି।ସେଠାରେ ଫଳକ ନଥିବାକୁ ଠିକାଦାର କିମ୍ବା ଵିଭାଗୀୟ ଯନ୍ତ୍ରୀ କାର୍ଯ୍ୟ ତଦାରଖ କରନ୍ତି ନାହିଁ । ଏହି କାର୍ଯ୍ୟ ଟି ମିସ୍ତ୍ରୀ ଓ ଲେଵରଙ୍କ ଦ୍ବାରା ହେଉଥିଲା।ସେହି କାର୍ଯ୍ୟ ଏତେ ନିମ୍ନମାନର ହୋଇଥିଲା ଯାହାକି ୫ଦିନରେ ଫାଟି ଆଁ ହୋଇଥିଲା।ଏହାକୁ ନେଇ ସ୍ଥାନୀୟ ସାମ୍ବାଦିକ ଶ୍ରୀପ୍ରଧାନ ଖବର କରିବାକୁ ଫଟୋ ଉଠାଇଥିଲେ । ସେତେବେଳେ ଠିକାଦାରଙ୍କ ଗୁଣ୍ଡା ତଥା ଦଲାଲମାନେ ଖର ନକରିବାକୁ ଧମକ ଦେଇଥିଲେ।ସନ୍ଧ୍ୟାରେ ସାମ୍ବାଦିକ ଦେଉଳ ସାହିଵଜାରକୁ ଯାଉଥିବା ଵାଟରୁ ସ୍ଥାନୀୟ ଜିଆର ଏସ୍ ଙ୍କ ସ୍ବାମୀ ଓ ସ୍କୁଲକୁ ଯାଉନଥିବା ଜଣେ ଶିକ୍ଷକଙ୍କ ସମେତ ଦଶଜଣ ଵ୍ୟକ୍ତି ଟେକି ନେଇ ମରଣାତ୍ମକ ଆକ୍ରମଣ କରିଥିଲେ। ସେତେଵେଳେ ତାଙ୍କ ସ୍ତ୍ରୀ ସ୍ବାମିକୁ ରକ୍ଷା କରିବାକୁ ଯାଇ ସେ ମଧ୍ୟ ଆକ୍ରମଣର ଶିକାର ହୋଇଥିଲେ । ସେନେଇ ସାମ୍ଵାଦିକଙ୍କ ସ୍ତ୍ରୀ ଦଶଜଣ ଅଭିଯୁକ୍ତଙ୍କ ନାମରେ ଥାନାରେ ଅଭିଯୋଗ କରିଥିଲେ ମଧ୍ୟ ଅଭିଯୁକ୍ତକୁ ଗିରଫ କରାନଯାଇ ଓଲଟି ସାମ୍ବାଦିକଙ୍କ ନାମରେ କେଶ୍ କରାଯାଇଛି ।ଏହାର ପ୍ରତିବାଦ କରି ସ୍ଥାନୀୟ ସାମ୍ବାଦିକ ସଂଘ ପକ୍ଷରୁ ଥାନାରେ ଅଭିଯୋଗ କରିଛନ୍ତି । ଅଭିଯୁକ୍ତଙ୍କୁ ଯଥା ଶୀଘ୍ର ଗିରଫ କରାଯିବା ନିମନ୍ତେ ଜିଲ୍ଲା ଆରକ୍ଷୀ ଅଧିକ୍ଷକ ଦୃଷ୍ଟି ଦେବା ନିମନ୍ତେ ଦାବୀ ହେଉଛି ।

ଡିଆରଏମ ଙ୍କ ଗୁଣପୁର ଗସ୍ତ ; କଥା ପାଣି ର ଗାର …!

ଏଥର ସମ୍ଭାଳ ବ୍ୟୁରୋ (ଗୁଣପୁର)- ନୌପଡା-ଗୁଣପୁର ରେଳ ଲାଇନ୍ ରେ ଘଣ୍ଟାକୁ ଏବେ ୪୫ ରୁ ୫୦ ବେଗରେ ଟ୍ରେନ୍ ଯାତାୟତ କରୁଥିବା ବେଳେ ଏହାକୁ ୧୦୦ କୁ ବଢାଇବା ଯୋଜନା ରହିଛି। ରେଳ ଲାଇନ୍ ର ବେଗ ବଢିଲେ ହିଁ ଅଧିକ ଟ୍ରେନ୍ ଯାତାୟତ କରି ପାରିବ। ଏହି ୯୦ କିମି ରାସ୍ତାରେ ୬୦ ଟି ଲେବଲ୍ କ୍ରସିଂ ଥିବାବେଳେ ଏହା ମଧ୍ୟ କମାଯିବ। ଏମିତି ସବୁ କହିଛନ୍ତି ଆଜି ଗୁଣପୁର ଗସ୍ତରେ ଆସିଥିବା ବିଶାଖାପାଟଣା ଡିଭିଜନ ଡିଆରଏମ ଅନୁପ ଶତପଥି । ଏହି ଲାଇନ୍ କୁ ଅମୃତ ଭାରତ ଯୋଜନା ରେ ଅନ୍ତର୍ଭୁକ୍ତ କରାଯାଇଛି। ଏହା ଦ୍ଵାରା ଏହି ଲାଇନ୍ ର ଓ ଷ୍ଟେସନ ର ବିକାଶ ହବ ବୋଲି ସେ କହିଛନ୍ତି। ଏବେ ପାରଳାଖେମୁଣ୍ଡି, କାଶୀନଗର ଓ ଗୁଣପୁର ଷ୍ଟେସନର ଅନେକ ଉନ୍ନତି ଘଟିଛି। ଏବେ ଷ୍ଟେସନ ଉଚ୍ଚତା କାର୍ଯ୍ୟ ସରିଛି। ଏହାର ପୁର୍ଣ୍ଣାଙ୍ଗ କାର୍ଯ୍ୟ ସରିବା ପରେ ଦ୍ବିତୀୟ ପ୍ଲାଟଫର୍ମ କଥା ଚିନ୍ତା କରାଯିବ ବୋଲି ସେ କହିଛନ୍ତି। ଏସବୁ ସମେତ ମେମୁ ଟ୍ରେନ୍ ର ସଫେଇ, ମୁଖ୍ଯଦ୍ବାର, ପାନୀୟ ଜଳର ସୁବିଧା ଇତ୍ଯାଦି କାର୍ଯ୍ଯ ଉପରେ ମଧ୍ୟ ଅଧିକ ଧ୍ଯାନ ଦିଆଯାଉଛି ବୋଲି ସେ କହିଥିଲେ। ସୀମାନ୍ତ ରେଳ ଉପଭୋକ୍ତା ସୁରକ୍ଷା ମଞ୍ଚ ପକ୍ଷରୁ ଦିଆ ଯାଇଥିବା ଉପଭୋକ୍ତାଙ୍କ ସମସ୍ୟା ପ୍ରତି ଶତପଥୀ ମହାଶୟ ଧ୍ୟାନ ଦେଇନାହାଁନ୍ତି । କେବଳ ରେଳ ଲାଇନ୍ ପ୍ରସସ୍ତି କରଣ ଏବଂ ପ୍ଲାଟଫର୍ମ ଉନ୍ନତୀ କରଣ ଦିଗରେ ଏହାଙ୍କ ଧ୍ୟାନ ସୀମିତ ରହିଛି ବୋଲି ଅଭିଯୋଗ ଉଠିଛି। ନିଜର ଗସ୍ତକୁ ଲୋକ ଦେଖାଣିଆ କରି ଖବର କାଗଜରେ ପ୍ରସାର ନିମନ୍ତେ ନିଜ ଜୟଗାନ କରୁଥିବା କିଛି ମୁଷ୍ଟିମେୟ ଚାଟୁ କାର ଙ୍କୁ ନିଜ ଗସ୍ତ ଖବର ଦେଇ ଫୋଟ ପୋଜ ଦେଇ ନିଜର ଟି ଆର୍ ପି ବଢ଼ାଇବା ବ୍ୟତୀତ ବର୍ତ୍ତମାନ୍ ସୁଦ୍ଧା ରେଳ ଯାତ୍ରୀ ଏବଂ ରେଳ ଉପଭୋକ୍ତା ଙ୍କ ସମସ୍ୟାର ସମାଧାନ ପାଇଁ କଣ ପଦକ୍ଷେପ ନେଇଛନ୍ତି ବୋଲି ଚର୍ଚ୍ଚା ଜୋର୍ ଧରିଛି । ଏହାକୁ ନେଇ ବୁଦ୍ଧିଜୀବୀ କହିଲେଣି, “କିହେବ ଶୁଆ ପୋଷିଲେ – ରାମ ନାମ ନବୋଲିଲେ”। ଦେହିବାକୁ ରହିଲା ରେଳ ଡବା ରେ ରିତିମତ ପାଣି ରହିବ କେବେ,ରୀତିମତ ସଫା ହେବ କେବେ,ମୁଖ୍ୟ ଫାଟକ ନିକଟରୁ ତିନି ଚକିଆ ଯାନ ହଟି ଏକ ସୁରକ୍ଷିତ ପ୍ରଶସ୍ତ ସ୍ଥାନରେ ପାର୍କିଂ ର ବ୍ୟବସ୍ଥା କରାଯାଇ ଯାତ୍ରୀ ମାନେ ଯିବା ଆସିବାର ସୁବିଧା କରାଯିବ କେବେ ।