ଛତୁଆ ବଣ୍ଟନ କୁ ଅଙ୍ଗନବାଡି କର୍ମୀ ଙ୍କ ବିରୋଧ ।
ଏଥର ସମ୍ଭାଳ ବ୍ୟୁରୋ (ରାୟଗଡ଼ା) -ରାୟଗଡା ଜିଲ୍ଲା ରାମନାଗୁଡା ବ୍ଲକ ଅନ୍ତର୍ଗତ ନାଲାପାଣ୍ଡା ଗ୍ରାମ ରେ ଶିଶୁ , ଗର୍ଭବତୀ ଏବଂ ପ୍ରସୂତି ମହିଳାଙ୍କ ନିମନ୍ତେ ଉଦ୍ଧିଷ୍ଟ ଛତୁଆ କୁପ୍ରଶାସନ ପକ୍ଷରୁ ବଣ୍ଟନ କରାଯିବାକୁ ଆସିଥିବା ଗାଡ଼ି କୁ ଅଙ୍ଗନବାଡି କର୍ମୀ ମାନେ ଅଟକାଇଥିଲେ । ୮ ଦଫା ଦାବି ନେଇ ସାରା ରାଜ୍ୟରେ ଅଙ୍ଗନବାଡି କର୍ମୀ ମାନେ କାର୍ଯ୍ୟ ବନ୍ଦ ଆନ୍ଦୋଳନ ଜାରି ରଖିଥିବା ଅବସରରେ ବ୍ଲକ ଠାରୁ ଆରମ୍ଭ କରି ରାଜ୍ୟ ସ୍ତରୀୟ ସମସ୍ତ ଶିଶୁ ବିକାଶ ଯୋଜନା କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିବା ବେଳେ ପ୍ରଶାସନ ପକ୍ଷରୁ ଏଭଳି ତରବରିଆ ଭାବେ ଛତୁଆ ବଣ୍ଟନ କାର୍ଯ୍ୟକ୍ରମ କୁ ତୀବ୍ର ବିରୋଧ କରିଛନ୍ତି ଅଙ୍ଗନବାଡି କର୍ମୀ । ଧାରଣା ଚାଲିଥିବା ହେତୁ ଦୀର୍ଘଦିନ ଧରି ଶିଶୁ , ଗର୍ଭବତୀ ଏବଂ ପ୍ରସୂତି ମହିଳାମାନେ ପୁଷ୍ଟିକର ଖାଦ୍ୟ ରୁ ବଞ୍ଚିତ ହେଉଥିବାରୁ ଜିଲ୍ଲା ପ୍ରଶାସନ ତରଫରୁପ୍ରତି ଅଙ୍ଗନବାଡି କେନ୍ଦ୍ର ରେ କୌଣସି ପରିସ୍ଥିତିରେ ମଧ୍ୟ ସୁରୁଖୁରୁରେ ଛତୁଆ ବଣ୍ଟନ ପାଇଁ ସେକ୍ଟର ସୁପରଭାଇଜର ମାନଙ୍କ ସହଯୋଗ ରେ ସ୍ଥାନୀୟ ସ୍ୱୟଂ ସହାୟକ ଗୋଷ୍ଠୀ ମାନଙ୍କ ଦ୍ୱାରା ବଣ୍ଟନ କରିବା ପାଇଁ ଯୋଜନା କରାଯାଇଛି ।ଜିଲ୍ଲା ପ୍ରଶାସନ ର ନିର୍ଦ୍ଦେଶ କ୍ରମେ ଚଳିତ ମାସ ୨ ତାରିଖ ଦିନ ରାମନାଗୁଡା ବ୍ଲକ ଶିଶୁ ବିକାଶ ଯୋଜନା ଅଧିକାରୀ ଙ୍କ ତରଫରୁ ସନ୍ଧ୍ୟା ସମୟରେ ପ୍ରତି କେନ୍ଦ୍ର ରେ ଛତୁଆ ବଣ୍ଟନ କରିବାକୁ ଯାଉଥିବା ଖବର ପାଇ ରାମନାଗୁଡା ଅଙ୍ଗନବାଡି କର୍ମୀ ସଂଘ ସମ୍ପାଦିକା ଯମୁନା ଶବର ଙ୍କ ନେତୃତ୍ୱରେ ପ୍ରତିମା ଶବର, ଚନ୍ଦ୍ରକଳା ଗମାଙ୍ଗ, ଜୟନ୍ତୀ ଗମାଙ୍ଗ, ଉଷାବତୀ ଶବର ଙ୍କ ସମେତ କୁଜେନ୍ଦ୍ରୀ ସେକ୍ଟର ର ସମସ୍ତ ଅଙ୍ଗନବାଡି କର୍ମୀ ଛତୁଆ ବଣ୍ଟନ ଗାଡ଼ି କୁ ପିଛା କରି ନାଲାପାଣ୍ଡା ଗ୍ରାମ ରେ ପହଞ୍ଚି ଅଟକାଇ ଥିଲେ ,ପୁଣି ସେମାନଙ୍କ ଦାବି ପୂରଣ ନହେବା ଯାଏଁ ଛତୁଆ ବଣ୍ଟନ କରିବାକୁ ହେବ ନାହିଁ ବୋଲି ତାଗିଦ୍ କରିବା ସହ ଉକ୍ତ ଗାଡ଼ି ରେ ଛତୁଆ ବୋଝେଇ କରି ଫେରେଇ ନେଇଯିବା କୁ କହିଥିଲେ ।
