“କେସ ରେକର୍ଡ ” ଅଭିଯୋଗ କେତେ ମିଛ କେତେ ସତ ?

ଏଥର ସମ୍ଭାଳ ବ୍ୟୁରୋ (ରାୟଗଡା) – ରାୟଗଡା ଜିଲ୍ଲା ଗୁଣପୁର ପଞ୍ଚାୟତ ସମିତି ରେ ବିଡ଼ିଓ ଏବଂ ସମିତି ଅଧ୍ୟକ୍ଷା ଙ୍କ ମଧ୍ୟରେ ଲାଗିରହିଥିବା ରାଜନୈତିକ ମତଭେଦ ଏବେ ଶୀତଳ ଯୁଦ୍ଧରେ ପରିଣତ ହେବାରେ ଲାଗିଛି । କିଛି ଦିନ ତଳେ ସମିତି ଅଧ୍ୟକ୍ଷା ଙ୍କ ସମର୍ଥିତ ବ୍ୟକ୍ତି ମାନେ ବିଡ଼ିଓ ଙ୍କୁ ଅସଦ ବ୍ୟବହାର କରିଥିବା ନେଇ ବିଡ଼ିଓ ଶାନ୍ତିପ୍ରଭା ପ୍ରଧାନ ଗୁଣପୁର ଥାନାରେ ଏତଲା ଦେବା ପରେ ସମିତି ଅଧ୍ୟକ୍ଷା ଝିଲ୍ଲି ଶବର ଙ୍କ ଭାଇ ଙ୍କୁ ପୋଲିସ ଗିରଫ କରି କୋର୍ଟଚାଲାଣ କରି ଅନ୍ୟ ଅଭିଯୁକ୍ତ ଙ୍କୁ ଖୋଜୁଛି । ପୋଲିସର ଏହି ଖୋଜା ଖୋଜିରେ ଶାସକ ଦଳ ନେତାଙ୍କ ପ୍ରଚ୍ଛଦ ହାତ ରହିଥିବା ସାଧାରଣରେ ଚର୍ଚ୍ଚାର ବିଷୟ ପାଲଟିଛି । ଏହା ମଧ୍ୟରେ ପୁଣି ବିଡ଼ିଓ ମହୋଦୟା ସମିତି ଅଧ୍ୟକ୍ଷା ଙ୍କ ବିରୁଦ୍ଧରେ ସଙ୍ଗୀନ ଅଭିଯୋଗ ଆଣିଛନ୍ତି । ଅଫିସର କିଛି ଆବଶ୍ୟକ କେସ ରେକର୍ଡକୁ ଅଧ୍ୟକ୍ଷା ନିଜ ଅଫିସରେ ରଖି ଫେରାଉ ନଥିବାରୁ ତହବିଲ କାର୍ଯ୍ୟରେ ବାଧା ସୃଷ୍ଟି ହେଉଥିବା ଅଭିଯୋଗ ଆଣିଛନ୍ତି । ଫାଇଲ ଗୁଡ଼ିକ ଦେବା ନିମନ୍ତେ ସେ ବାରମ୍ବାର କହୁଥିବା ବେଳେ ଏହାକୁ ଫେରାଇ ନଥିବା କିମ୍ବା ଅଫିସକୁ ଆସୁନଥିବା ଅଭିଯୋଗ ନେଇ ବିଡ଼ିଓ ମହୋଦୟା ଉପ ଜିଲ୍ଲାପାଳ ଙ୍କୁ ଫେରାଦ କରିବାରୁ ଉପ ଜିଲ୍ଲାପାଳ ଙ୍କ ନିର୍ଦ୍ଦେଶ କ୍ରମେ ଏଜୁକ୍ୟୁଟିଭ ମାଜିଷ୍ଟ୍ରେଟ ତଥା ଗୁଣପୁର ତହସିଲଦାର ଶ୍ରୀ ଶରତ ଚନ୍ଦ୍ର ନାୟକ  ଙ୍କ ଉପସ୍ଥିତିରେ ଅଧ୍ୟକ୍ଷା ଙ୍କ ଅଫିସର ଗୃହ ଖୋଲା ଯାଇଥିଲା । ଉପ ଜିଲ୍ଲାପାଳ ଙ୍କ ଦ୍ଵାରା କ୍ଷମତା ପ୍ରାପ୍ତ ତହସିଲଦାର ଉପାଧ୍ୟକ୍ଷ ଙ୍କୁ ଡକାଇ ତାଙ୍କରି ହାତରେ ପୋଲିସ ଏବଂ ବିଡ଼ିଓଙ୍କ ଉପସ୍ଥିତିରେ ତାଲା ଖୋଲି ଅଫିସ୍ ଗୃହ ମଧ୍ୟକୁ ପସି ବିଡ଼ିଓ ଅଭିଯୋଗ କରିଥିବା ଫାଇଲ ଗୁଡ଼ିକୁ ଖୋଜା ଖୋଜି କରିଥିଲେ  ।ପରନ୍ତୁ ଅଫିସ୍ ଗୃହରୁ ସେଭଳି କିଛି ଫାଇଲ ମେଳି ନଥିଲା । ବର୍ତ୍ତମାନ ସାଧାରଣରେ ପ୍ରଶ୍ନ ଉଠୁଛି , ବିଡ଼ିଓ କରିଥିବା ଅଭିଯୋଗ ମିଥ୍ୟା ନା ଏହି ଫାଇଲ ଗୁଡ଼ିକ ଧରି ଅଧ୍ୟକ୍ଷା ମହୋଦୟା ଚମ୍ପଟ୍ ମାରିଛନ୍ତି ।ବିଡ଼ିଓ ଦର୍ଶାଇ ଥିବା କେସ ରେକର୍ଡ ଗୁଡ଼ିକ ଯେଉଁ କିରାଣୀ ମହୋଦୟ ଙ୍କ ନିକଟରେ ଗଚ୍ଛିତ ରହିବା କଥା ଏହାଙ୍କୁ ତଦନ୍ତ ପରିସର କୁ ଆଣି ଜେରା କରାଗଲେ ପ୍ରକୃତ ତଥ୍ୟ ପଦାକୁ ଆସିବ । ଏନେଇ ପୋଲିସ ଏବଂ ଉପ ଜିଲ୍ଲାପାଳ କଣ ପଦକ୍ଷେପ ନେଉଛନ୍ତି ଦେଖିବାକୁ ରହିଲା । ସେ ଯାହା ହେଉନା କାହିଁକି ଉଭୟଙ୍କ ମଧ୍ୟରେ ଆରମ୍ଭ ହୋଇ ଥିବା ଶୀତଳ ଯୁଦ୍ଧ ମଧ୍ୟରେ ସାଧାରଣ ଜନତା ବଳି ପଡ଼ିବା ପୂର୍ବରୁ କୌଣସି ଏକ ସ୍ଥାୟୀ ଦୃଢ଼ କାର୍ଯ୍ୟାନୁଷ୍ଠାନ ନେବା ନିମନ୍ତେ ରାଜ୍ୟ ପ୍ରଶାସନକୁ ଜିଲ୍ଲାପାଳ ସୁପାରିସ କରିବା ଅପରିହାର୍ଯ୍ୟ ହୋଇ ପଡ଼ିଛି ।

ଶାନ୍ତ ପରିବେଶକୁ ଅଶାନ୍ତ କରୁଛି ରାଜ୍ୟ ପ୍ରଶାସନ : ଜନମତ

ଏଥର ସମ୍ଭାଳ ବ୍ୟୁରୋ (ରାୟଗଡ) – ଶ୍ରୀମତୀ ଶାନ୍ତି ପ୍ରଭା ପ୍ରଧାନ ଗୁଣପୁର ଠାରେ ବିଡ଼ିଓ ଭାବେ କାର୍ଯ୍ୟ ଭାର ଗ୍ରହଣ କରିବାର କିଛି ଦିନ ପରେ ଏହାଙ୍କ କାର୍ଯ୍ୟ ଶୈଳୀକୁ ନେଇ ଗୁଣପୁର ସମିତିର ସଦସ୍ୟ ଏବଂ ସରପଞ୍ଚ ବିରୋଧ କରି ଆସି ଏହାଙ୍କ ବଦଳୀ ଦାବିକରି ଆସୁଥିଲେ । କିନ୍ତୁ ରାଜ୍ୟ ସରକାର ଏଥିପ୍ରତି ଦୃଷ୍ଟି ନଦେଇ ବିଡ଼ିଓ ଙ୍କୁ ଘଣ୍ଟ ଘୋଡାଇ ଆସୁଥିବା ହେତୁ ପରବର୍ତ୍ତୀ ସମୟରେ ବିଜେଡିର ସମ୍ପୂର୍ଣ୍ଣ ଭୋଟ ବ୍ୟାଙ୍କ୍ ଥିବା ଗୁଣପୁର ପଞ୍ଚାୟତ ସମିତି ଆସନ ବିଜେଡି ହାତରୁ ଖସି ସ୍ଵାଧୀନ ପ୍ରାର୍ଥୀ ବୋଲାଉଥିବା ପୂର୍ବତନ ସାଂସଦ ଭାସ୍କର ରାଓ ସମର୍ଥିତ ଅକ୍ତିଆରକୁ ଆସିଲା । ଏହି ଗୋଷ୍ଠୀ ସମିତି ଶାସନ ଦାୟିତ୍ୱ ଗ୍ରହଣ ପରେ ବିଡ଼ିଓଙ୍କ ବିରୁଦ୍ଧରେ ରାଜ୍ୟ ଦରବାରରେ ଅଭିଯୋଗ କରିବା ପରେ ମଧ୍ୟ ରାଜ୍ୟ ସରକାର ଏଥିପ୍ରତି ଦୃଷ୍ଟି ନଦେବା ଯୋଗୁଁ ସମିତିରେ ଅଶାନ୍ତ ବଢ଼ିବାରେ ଲାଗିଛି । ଏହି କ୍ରମରେ ଗତ ୨୪/୧୧/୨୦୨୨ ତାରିଖ ରେ ପୁଣି ସମିତି ସଦସ୍ୟଙ୍କ ସମେତ କିଛି ଗ୍ରାମବାସୀ ବିଡ଼ିଓ ଅଫିସ୍ ସମ୍ମୁଖରେ ଧାରଣା ଦେଇ ଅଫିସ୍ ଘେରାଉ କରିବା ନଜରକୁ ଆସିଛି । ବିଡ଼ିଓ ଙ୍କ ମନମୁଖୀ ଶାସନ ବିରୁଦ୍ଧରେ ଏହି ଆନ୍ଦୋଳନ ଆରମ୍ଭ ହୋଇଥିବା ଆନ୍ଦୋଳନକାରୀ କହୁଥିବାବେଳେ ଏହା ରାଜନୈତିକ ଅଭିସନ୍ଧି ମୂଳକ ବୋଲି ଶାସକ ଦଳ ଗୋଷ୍ଠୀ ଚିତ୍ରଣ କରୁଥିବା କୁହାଯାଉଛି । ଏହି ଘେରାଉ କୁ ନେଇ ସ୍ଥାନୀୟ ବିଡ଼ିଓ ଗୁଣପୁର ଆଦର୍ଶ ଥାନାରେ ଏକ ଏତଲା ଦେଇଛନ୍ତି । ଏହାକୁ ଆଧାରକରି ପୋଲିସ ସମିତି ଅଧ୍ୟକ୍ଷା ଙ୍କ ଭାଇଙ୍କୁ ଗିରଫ କରିବା ସହ ଅନ୍ୟ ଦୁଇଜଣ ଙ୍କୁ ହିରାସତ୍ କୁ ନେବାର ମସୁଧା ଚଳାଇଛି । ତେବେ ଏଠାରେ କଥା ଉଠୁଛି ଏହି ଘେରାଉ ଓ ଆନ୍ଦୋଳନରେ କେବଳ ଏହି ତିନି ଜଣ ଥିଲେକି ? ସମିତି ସହ ସଂସ୍ଲିଷ୍ଠ ଥିବା ଆନ୍ଦୋଳନ କାରୀ ଙ୍କୁ ପୋଲିସ ତଦନ୍ତ ପରିସର ମଧ୍ୟକୁ ନେଇ ଗିରଫ କରୁନି କାହିଁକି ? ଯଦି ଜଣେ ସରକାରୀ କର୍ମଚାରୀ ଙ୍କୁ ଅସତ୍ ବ୍ୟବହାର କରିଥିବା କାରଣରୁ ପୋଲିସ ଏହି ପଦକ୍ଷେପ ନେଇଛି ଏବଂ ଅନ୍ୟ ଦୁଇଜଣ ଙ୍କୁ ଗିରଫ କରିବାକୁ ଏତେ ତତ୍ପରତା ପ୍ରକାଶ କରିଛି ତେବେ କିଛିଦିନ ତଳେ ଗୁଣପୁର ଠାରେ ଜିଲ୍ଲାର ସର୍ବୋଚ୍ଚ କର୍ମକର୍ତ୍ତା ମାନ୍ୟବରା ଜିଲ୍ଲାପାଳ ଙ୍କୁ ଜିଲ୍ଲାର ସର୍ବୋଚ୍ଚ ପୋଲିସ ଅଧିକାରୀ ମାନନୀୟ ଏସ ପି ମହୋଦୟ ଙ୍କ ଉପସ୍ଥିତିରେ ଯେଉଁ ଭଳି ଅସଦାଚରଣ କରାଗଲା ସେହି କ୍ଷେତ୍ରରେ କେତେ ଜଣଙ୍କୁ ଗିରଫ କରାଯାଇ କୋର୍ଟ ଫରୱାର୍ଡ କରାଯାଇଛି ବୋଲି ସାଧାରଣରେ ପ୍ରଶ୍ନ ଉଠିବା ସହ ଚର୍ଚ୍ଚା ଜୋର୍ ଧରିଛି । ଯଦି ପୋଲିସ ପକ୍ଷରୁ ଜିଲ୍ଲାପାଳଙ୍କ ଘଟଣା ନେଇ ସେତେବେଳେ ଏଭଳି ତତ୍ପରତା ପ୍ରକାଶ କରାଯାଇ ଆନ୍ଦୋଳନକାରୀ ଏବଂ ଆନ୍ଦୋଳନ ନିମନ୍ତେ ଉସୁକାଇଥିବା ବ୍ୟକ୍ତି ଙ୍କ ବିରୁଦ୍ଧରେ କାର୍ଯ୍ୟନୁଷ୍ଠାନ ଗ୍ରହଣ କରାଯାଆନ୍ତା ତେବେ ଆଜି ବିଡ଼ିଓ ଙ୍କ ପ୍ରତି ଏଭଳି ଆଚରଣ କରା ଯିବାରେ ସାହସ ଉଠନ୍ତା ନାହିଁ ଓ କର୍ମଚାରୀ ମାନେ ସୁରକ୍ଷିତ ମଣି ନିଜର କାର୍ଯ୍ୟ ତୁଲାଇ ପାରନ୍ତେ ବୋଲି ସାଧାରଣରେ ମତ ପ୍ରକାଶ ପାଇଛି । କିଛି ବୁଦ୍ଧିଜୀବି ଙ୍କ ମତରେ , ଜନ ଅସନ୍ତୋଷ ପ୍ରକାଶ ପାଇ ସରକାରୀ କର୍ମଚାରୀ ଙ୍କ ବିରୁଦ୍ଧରେ ଆସୁଥିବା ଅଭିଯୋଗକୁ ଯଥା ଶୀଘ୍ର ତଦନ୍ତ କରି କାର୍ଯ୍ୟନୁଷ୍ଠାନ ଗ୍ରହଣ କରାନଯିବା ଏବଂ ତୁରନ୍ତ ସେଠାରୁ ବଦଳି କରା ନଯାଇ ରାଜନୈତିକ ଦୃଷ୍ଟି କୋଣରୁ ସେଠାରେ ରଖି ନିଆଁ ରେ ଘିଅ ଢାଳିବା ଭଳି କାର୍ଯ୍ୟ ତୁଲାଉ ଥିବାରୁ ଏଭଳି ଅସନ୍ତୋଷ ର ବହ୍ନି ବଢୁଛି । ଦେଖିବାକୁ ରହିଲା ପ୍ରଶାସନ ପକ୍ଷରୁ ଆଗାମୀ ଦିନ ରେ କଣ କାର୍ଯ୍ୟନୁଷ୍ଠାନ ଗ୍ରହଣ କରାଯାଉଛି ।

ରାୟଗଡ଼ା ଜିଲ୍ଲା ସଦର ମହକୁମାରେ ଅବସ୍ଥିତ ଗୋବିନ୍ଦ ଚନ୍ଦ୍ର ଦେବ ହାଇସ୍କୁଲ ଠାରେ , ୭୫ ତମ ଏନ୍ ସି ସି ଦିବସ ପାଳିତ ।

ଏଥର ସମ୍ଭାଳ ବ୍ୟୁରୋ (ରାୟଗଡ଼ା) – ରାୟଗଡ଼ା ଜିଲ୍ଲା ସଦର ମହକୁମା ରେ ଅବସ୍ଥିତ ଗୋବିନ୍ଦ ଚନ୍ଦ୍ର ଦେବ ହାଇସ୍କୁଲ ଠାରେ , ୭୫ ତମ ଏନ୍ ସି ସି ଦିବସ ମହା ଆଡ଼ମ୍ବରରେ ପାଳିତ ହୋଇ ଯାଇଛି । ଏହି ଅବସରରେ ବିଦ୍ୟାର୍ଥୀ ଙ୍କୁ ନେଇ ଚିତ୍ରାଙ୍କନ ଫର୍ଦ୍ଦ ପ୍ରତିଯୋଗିତା ସହ ଝୋଟି ପ୍ରତିଯୋଗିତା ଅନୁଷ୍ଠିତ ହୋଇ ଯାଇଛି ।ଚିତ୍ରାଙ୍କନ ପ୍ରତିଯୋଗିତାରେ ଶ୍ରୀନୁ ମାଣ୍ଡାଙ୍ଗି ପ୍ରଥମ ସ୍ଥାନ ଅଧିକାର କରିଥିବା ବେଳେ ସିଦ୍ଧାର୍ଥ ହୁଇକା ଦ୍ଵିତୀୟ ସ୍ଥାନ ଓ କାହ୍ନ। ବାଙ୍ଗାରି ତୃତୀୟ ସ୍ଥାନ ଅଧିକାର କରିଛନ୍ତି। ସେହିଭଳି ଝୋଟି ପ୍ରତିଯୋଗିତାରେ ଅଂଶଗ୍ରହଣ କରିଥିବା ଛାତ୍ରୀ ମାନଙ୍କ ମଧ୍ୟରୁ ସୋନାଲି ପ୍ରଥମ ସ୍ଥାନ ଅଧିକାର କରିଥିବା ବେଳେ ରିୟଙ୍କା ବିଡିକା ଦ୍ଵିତୀୟ ସ୍ଥାନ ଓ ମାଲେଶ୍ୱରି ସୁନା ଙ୍କ ସହ ଅନିମା ପିଡ଼ିକାକା ତୃତୀୟ ସ୍ଥାନ ଅଧିକାର କରିଛନ୍ତି ।

ଏନ୍ ସି ସି ଅଧିକାରୀ ପଦବୀରୁ ଅବସର ନେଇଥିବା ହିନ୍ଦୀ ଶିକ୍ଷକ ଶ୍ରୀ ଅଶୋକ କୁମାର ଦାଶ ଙ୍କୁ ବିଦାୟ କାଳୀନ ସମ୍ବର୍ଦ୍ଧନା ଦେବା ନିମନ୍ତେ ଆୟୋଜିତ ସଭାରେ ମୁଖ୍ୟ ଅତିଥିଭାବେ କର୍ଣ୍ଣଲ ବି,ଏସ୍,ଶ୍ରୀନିବାସ ଯୋଗଦେଇଥିବା ବେଳେ ସମ୍ମାନୀତ ଅତିଥି ଭାବେ ସୁବେଦାର ମେଜର ଏସ,କେ,ଜେନା ଏବଂ ବିଦ୍ୟାଳୟର ଭାରପ୍ରପ୍ଟ ପ୍ରଧାନ ଶିକ୍ଷକ ଏମ,ମୁରଲୀ ଙ୍କ ସହ ପ୍ରଥମ ଏନ୍ ସି ସି ଅଧିକାରୀ ଶ୍ରୀମତୀ ପ୍ରମିଳା ମହାପାତ୍ର ଯୋଗଦେଇ ଶ୍ରୀ ଦାଶ ଙ୍କୁ ବିଦାୟ କାଳୀନ ସମ୍ବର୍ଦ୍ଧନା ଜଣାଇଥିଲେ । ଏହି ଅବସରରେ ଦିଦ୍ୟାର୍ଥି ଙ୍କୁ ନେଇ ଏକ ସାଇକେଲ ଶୋଭାଯାତ୍ରା ସହର ପରିକ୍ରମା କରିବା ସହ ବୃକ୍ଷ ରୋପଣ କରାଯାଇଛି । ଏନ୍ ସି ସି ବିଦ୍ୟାର୍ଥୀ ଙ୍କ ମଧ୍ୟରୁ ଉତ୍ତମ କେଡ୍ ର ବିଦ୍ୟାର୍ଥୀ ଭାବେ ଉଡାଣ ବିଭାଗରୁ ଏମ ଡି ମୁନା ଖାଁ, ଆର୍ମି ବାହିନୀ ( ବାଳିକା ବିଭାଗ ) ପକ୍ଷରୁ ପାୟଲ ମହାଙ୍କୁଡ ଓ ଆର୍ମୀ ବାହିନୀ ( ବାଳକ ବିଭାଗ) ପକ୍ଷରୁ ରୋମିୟୋ କୌଶଲ୍ୟା ଙ୍କୁ ଉତ୍ତମ ସମର ଶିକ୍ଷାର୍ଥୀ ଭାବେ ମନୋନୀତ କରାଯାଇ ଟ୍ରଫି ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା । ଆୟୋଜିତ କାର୍ଯ୍ୟକ୍ରମରେ ବିଦ୍ୟାଳୟର ସମସ୍ତ ଶିକ୍ଷକ, କର୍ମକର୍ତ୍ତା ଙ୍କ ସହିତ ବିଦ୍ୟାର୍ଥୀ ମାନେ ସମ୍ମିଳିତ ହୋଇ ଥିଲେ।

ବ୍ଲକ ଗ୍ରାଣ୍ଟ ଭଳି କୁତ୍ସିତ ପ୍ରଥା ଉଚ୍ଛେଦ ପରେ ମଧ୍ୟ ଦୂର ହୋଇନାହି ଶିକ୍ଷକ ଙ୍କୁ ସରକାରୀ ଉପେକ୍ଷା…!

!!! ରାୟଗଡ଼ା ରୁ ଜିଲ୍ଲା ପ୍ରତିନିଧି ବଳରାମ ମଲ୍ଲିକ ଙ୍କ ରିପୋର୍ଟ୍ !!!

ଏଥର ସମ୍ଭାଳ (ରାୟଗଡା) – ରାୟଗଡ଼ା ଜିଲ୍ଲା ର ଜେ କେ ପୁର ଚାନ୍ଦିଲି ର ଦ୍ଵିଭାଷିକ ଉଚ ବିଦ୍ୟାଳୟ ରେ ଜିଲ୍ଲାର ନୂତନ ଅନୁଦାନ ପ୍ରାପ୍ତ ବିଦ୍ୟାଳୟ କର୍ମଚାରୀ ସଂଘ ଗଠିତ ହୋଇଛି । ଏହି ସଂଘ ଗଠନ ବୈଠକରେ ଜିଲ୍ଲାର ସମସ୍ତ ନୂତନ ଅନୁଦାନ ପ୍ରାପ୍ତ ଉଚ୍ଚ ବିଦ୍ୟାଳୟ କର୍ମଚାରୀ ମାନେ ଉପସ୍ଥିତ ରହି ବ୍ଲକ ଅନୁଦାନ ଉଛେଡ ପରେ ମଧ୍ୟ ବିଭିନ୍ନ ଆଳରେ କରାଯାଉଥିବା ସରକାରୀ ଉପେକ୍ଷା ସଂର୍କୀତ ଆଲୋଚନା କରାଯାଇଥିଲା ଦୀର୍ଘ ଦିନ ହେବ ରାଜ୍ୟ ରେ ଓସ୍ତା ସଙ୍ଘ ସହ ମିଳିବ ଭାବେ ରାଜ୍ୟ ସରକାରଙ୍କ ଏହି ଉପେକ୍ଷା ବିରୋଧରେ ଆଲୋଚନା ଓ ଆନ୍ଦୋଳନ ପରେ ମଧ୍ୟ ସରକାର କରୁଥିବା ଉପେକ୍ଷା କୁ ଆଲୋଚନା କରି କ୍ଷୋଭ ଓ ନିନ୍ଦା କାରାଯାଇଥିଲା ଉଚ୍ଚ ତମ ନ୍ୟାୟାଳୟ ର ଦିଶା ନିର୍ଦେଶ ପରେ ମଧ୍ୟ କର୍ମଚାରୀ ମାନଙ୍କୁ ଅବସର କାଳିନ ଲାଭ ଦେବା ନିଷ୍ପତ୍ତି ରେ ବିଳମ୍ବ, ସପ୍ତମ ବେତନ ସୁପାରିଶ ରେ କର୍ମଚାରୀ ଭତା ଦେବା, ଚାକିରୀ ସର୍ତ୍ତାବଳୀ ଲାଗୁ କରିବା, ଟ୍ରାନ୍ସଫର, ଛୁଟି ଭଳି ସରକାରୀ ସୁବିଧା ପ୍ରଦାନ ଦାବୀ ଗୁଡ଼ିକ ସମ୍ପର୍କରେ ବିଷଦ ଆଲୋଚନା କରି ସରକାର ଙ୍କୁ ପ୍ରତ୍ୟେକ ପଂଚାୟତ ରେ ଥିବା ଏକମାତ୍ର ଉଚ୍ଚ ବିଦ୍ୟାଳୟ ଗୁଡ଼ିକୁ ଶିକ୍ଷାର୍ଥୀ ଓ ଶିକ୍ଷକ ମାନଙ୍କ ଭବିଷ୍ୟତ କୁ ଦୃଷ୍ଟିରେ ରଖି ତୁରନ୍ତ ସରକାର ନିଜେ ତାହାର ଦାୟିତ୍ୱ ନେବାକୁ ଅନୁରୋଧ ଓ ଦାବୀ କରାଗଲା । ଉପରୋକ୍ତ ସମସ୍ତ ଦାବୀ ଗୁଡିକୁ ସରକାରକଂ ପୂର୍ବରୁ ତୁହା କୁ ତୁହା ଆଲୋଚନା ପରେ ମଧ୍ୟ କୌଣସି ଫଳ ମିଳୁନଥିବା କାରଣରୁ ଏବଂ ଏହି ଶିକ୍ଷକ ମାନଙ୍କ ଦାୟିତ୍ୱ ନେଇଥିବା ଓସ୍ତା ସଙ୍ଘ ଦରକାର ଙ୍କ ଆନୁଗତ୍ୟ ପାଲଟିଥିବା କାରଣରୁ ଏହି ନୂତନ ଅନୁଦାନ ପ୍ରାପ୍ତ ଶିକ୍ଷକ କର୍ମଚାରୀ ସଂଘ ତରଫରୁ ନିନ୍ଦା କରାଯାଇ ତୁରନ୍ତ ନ୍ୟାର୍ଯ୍ୟ ଦାବିଗୁଡିକୁ ନ ମାନିଲେ ପ୍ରତ୍ୟେକ ଜିଲ୍ଲାରେ ଏଭଳି ସଂଗଠନ କରି ତୃଣମୁଳ ସ୍ତରରୁ ରାଜଧାନୀ ପର୍ଯ୍ୟନ୍ତ ଆନ୍ଦୋଳନ କୁ ବିସ୍ତ୍ରୁତ କରାଯିବ ବୋଲି ଚେତାବନୀ ଦିଆଯାଇଛି ।

ରେଲୱେର ଇଞ୍ଚିଏ ବି ଜାଗା ଛଡାଯିବ ନାହିଁ – ଡି॰ଆର॰ଏମ

!!! ରାୟଗଡ଼ ଜିଲ୍ଲା ଗୁଣପୁର ରୁ ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଜୋଶୀ ଙ୍କ ରିପୋର୍ଟ !!! 

ଏଥର ସମ୍ଭାଳ (ଗୁଣପୁର)- ଗୁଣପୁର ରେଳ ଷ୍ଟେସନର ଉନ୍ନତି ଓ ସୌନ୍ଦର୍ଯ୍ୟକରଣ କାମ ଉପରେ ଅଧିକ ଗୁରୁତ୍ବ ଦିଆଯାଉଛି । ଏଥିପାଇଁ ସମସ୍ତ ପଦକ୍ଷେପ ନିଆ ସରିଛି। ତେଣୁ କାମ ମଧ୍ଯ ଆରମ୍ଭ ହୋଇଯାଇଛି। ପାର୍କିଂ ପାଇଁ ମଧ୍ୟ ଶିଘ୍ର ଟେଣ୍ଡର ହବ। ବୁଧବାର ଗୁଣପୁର ଗସ୍ତରେ ଆସିଥିବା ଅବସରରେ ଏଭଳି କିଛି ପ୍ରତିକ୍ରିୟା ରଖିଛନ୍ତି ରେଳବାଇର ଓ୍ବାଲଟର ଡିଭିଜନର ଡିଆରଏମ ଅନୁପ ଶତପଥୀ । ସେ ତାଙ୍କ ଗସ୍ତ ସମୟରେ ସ୍ଥାନୀୟ ବିଭିନ୍ନ ବର୍ଗର ଲୋକଙ୍କୁ ଭେଟି ଆଲୋଚନା କରିଥିଲେ। ଏହି ଅବସରେ ସ୍ଥାନୀୟ ବୁଦ୍ଧିଜୀବି ଏବଂ ସାଧାରଣ ଲୋକେ ଡିଆରଏମଙ୍କୁ ଭେଟି ଷ୍ଟେସନର ଉନ୍ନତିକରଣ ସହ ହାଇଦ୍ରାବାଦ୍-ବିଶାଖପାଟଣା ଗୋଦାବରୀ ଏକ୍ସପ୍ରେସକୁ ଗୁଣପୁର ଯାଏଁ ସଂପ୍ରସାରଣ ପାଇଁ ଦାବି କରିଥିଲେ। ଏଥିରେ ଡିଆରଏମ ପ୍ରତିକ୍ରିୟା ପ୍ରକାଶ କରି କହିଛନ୍ତି ଯେ ଗୋଦାବରୀ ଟ୍ରେନ ଓ୍ବାଲଟର ଡିଭିଜନ୍ ର ଟ୍ରେନ୍ ନୁହେଁ, ଏଥିପାଇଁ ବିଭିନ୍ନ ଅଧିକାରୀଙ୍କ ସହ ଆଲୋଚନା କରାଯିବା ପରେ ନିଷ୍ପତ୍ତି ନିଆଯାଇପାରିବ। ତେଣୁ ଏହା କିଭଳି ହେବ ସେନେଇ ଉଚ୍ଚ ସ୍ତରରେ ନିଷ୍ପତ୍ତି ନିଆଯାଇ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି। ଅନ୍ଯପକ୍ଷ କଟକ ରୁ ଆସୁଥିବା ମେମୁ ଟ୍ରେନଟିକୁ ଦୈନନ୍ଦିନ ସଫେଇ କରାଯାଉ ନଥିବା ନେଇ ବାରମ୍ବାର ଯାତ୍ରୀ ମାନେ ଅଭିଯୋଗ କରିବା ସମ୍ପର୍କରେ ଧ୍ଯାନ ଦିଆଯାଇ ପଦକ୍ଷେପ ନିଆଯାଇଛି। ସେହି ସମସ୍ଯା ଆଗକୁ ଆଉ ରହିବନି ବୋଲି ସେ କହିଥିଲେ। ଗୁଣପୁର ଥେରୁବାଲି ନୂତନ ରେଳ ଲାଇନ ସଂଯୋଗ ନେଇ ବିଭାଗ ପକ୍ଷରୁ ଦିଆଯାଇଥିବା ପ୍ରସ୍ତାବ ନିତି ଆୟୋଗଙ୍କ ଠାରେ ରହିଛି । ଅତିଶିଘ୍ର କାର୍ଯ୍ୟ ହେବାର ସମ୍ଭାବନା ଅଧିକ ବୋଲି ସେ କହିଥିଲେ।

ବିପଦ ସଙ୍କୁଳ ଅବସ୍ଥାରେ ପୁଟା ଲୁହପୋଲ ; ଗୁଜରାଟ ଘଟଣାର ପୁନରାବୃତ୍ତି ହେବନି ତ …?

!!! ରାୟଗଡ଼ ଜିଲ୍ଲା ଗୁଣପୁର ରୁ ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଜୋଶୀ ଙ୍କ ରିପୋର୍ଟ !!! 

ଏଥର ସମ୍ଭାଳ (ଗୁଣପୁର)- ଗୁଣୁପୁର ଦୁର୍ଗମ ରେ ଦୁର୍ଦ୍ଦଶା । ପୂର୍ବଘାଟ ପର୍ବତମାଳା ପାଦଦେଶରେ ଅବସ୍ଥାନ କରୁଥିବା ତଥା ଆଦିମ ଜନଜାତି ଲାଞ୍ଜିଆ ସୌରା ବସବାସ କରୁଥିବା ଗୁଣୁପୁର ବ୍ଳକ ଶଗଡା ପଞ୍ଚାୟତ ଅନ୍ତର୍ଗତ ପୁଟା ନାଳ ଉପରେ ନିର୍ମାଣ କରାଯାଇଥିବା ଲୁହା ପୋଲ ଏବେ ବିପଦ ସଙ୍କୁଳ ଅବସ୍ଥାରେ । ଏଥିରେ ଖଞ୍ଜା ଯାଇଥିବା ନଟ ବୋଲଟ ଗଳି ପଡିବା ଯୋଗୁଁ ଲୁହା ପ୍ଲେଟ ଗୁଡ଼ିକ ବାହାରି ଯାଉଛି । ଯାନବାହନ ଚଳାଚଳ କଲାବେଳେ ଅତି ଭୟଙ୍କର ଶବ୍ଦ ହେବା ସହ ଯାତାୟତ କରୁଥିବା ଯାତ୍ରୀ ଭୟଭୀତ ହୋଇ ପଡୁଛନ୍ତି । ଏଠାରେ ପୂର୍ବରୁ ସିମେଣ୍ଟ ନିର୍ମିତ ଛୋଟିଆ ପୋଲ ଥିବା ବେଳେ ପାହାଡ଼ି ନାଳ ରେ ବନ୍ୟାପାଣି ପ୍ରବାହିତ ହେଲେ ପୋଲ ଧୋଇଯିବା ସହ ଯୋଗାଯୋଗ ବିଛିନ୍ନ ହେଇଯାଉଥିଲା । ଗତ ୨୦୧୫ ରେ ଏଠାରେ ସ୍ଥାୟୀ ପ୍ରତିକାର ସ୍ୱରୂପ ଏକ ଲୁହା ପୋଲ ପ୍ରାୟ ୭୦ ଲକ୍ଷ ଟଙ୍କା ରୁ ଉର୍ଦ୍ଧ୍ବ ଟଙ୍କା ବ୍ୟୟ ଅଟକଳ ରେ ନିର୍ମାଣ କରାଯାଇଥିଲା ।

ଦୀର୍ଘ ସାତ ବର୍ଷ ଅତିକ୍ରାନ୍ତ ହୋଇଥିବା ରୁ ଏହାର ତଦାରଖ ଓ ରକ୍ଷଣାବେକ୍ଷଣ ଆବଶ୍ୟକ ହେଉଛି । ଏଇ ନିକଟରେ ଗୁଜୁରାଟ ରେ ଏକ ଝୁଲା ପୋଲ ଗଳି ପଡିବାରୁ ଦେଢ ଶହ ଲୋକଙ୍କ ମୃତ୍ୟୁ ଘଟିଥିବା ବେଳେ ଓଡ଼ିଶାର ଧବଳେଶ୍ବର ପୀଠର ଝୁଲା ପୋଲ ମଧ୍ୟ ବନ୍ଦ ରହିଛି । ମୃତ୍ୟୁ ଯନ୍ତା ସାଜିଥିବା ରାୟଗଡା ଉପକଣ୍ଠ ରେ ଥିବା ଝୁଲା ପୋଲ ମଧ୍ୟ ଯାତ୍ରୀ ଙ୍କ ପାଇଁ ବନ୍ଦ ରଖାଯାଇଛି । ଦୁର୍ଗମ ଅଞ୍ଚଳ କୁ ସଂଯୋଗ କରୁଥିବା ଏହି ମୁଖ୍ୟ ରାସ୍ତା ଉପରେ ଥିବା ପୁଟା ନାଳ ଲୁହପୋଲ ର ରକ୍ଷଣାବେକ୍ଷଣ ବ୍ୟବସ୍ଥା ଗ୍ରହଣ ନକଲେ ଆଗକୁ କି ଅଘଟଣ ଯେ ଘଟିପାରେ ଏଥିରେ ସନ୍ଦେହ ନାହିଁ ।

୪ବର୍ଷ ହେଲା ଶର୍ଯ୍ୟାରେ ବିତୁଛି ଜୀବନ;ଦାରିଦ୍ରତା ଯୋଗୁଁ ଚିକିତ୍ସା ସାଜିଛି ବାଧିକ…!

!!! ରାୟଗଡ଼ ଜିଲ୍ଲା ଗୁଣପୁର ରୁ ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଜୋଶୀ ଙ୍କ ରିପୋର୍ଟ !!! 

ଏଥର ସମ୍ଭାଳ (ଗୁଣପୁର)- ଦାରିଦ୍ରତା ଯୋଗୁଁ ପରିବାର ଆଧୁନିକ ସଭ୍ୟତା ଓ ସରକାର ସୁଯୋଗରୁ ଠାରୁ ବହୁ ଦୂରତରେ ଥିବାବେଳେ ଏବେ ଏକମାତ୍ର ପୁତ୍ର ଅଜଣାରୋଗରେ ପୀଡିତ ହୋଇ ଦୁଇଗୋଡ ଅକାମୀ ହୋଇଯାଇଛି । ଏଭଳି ଦଇବର ଦାଉ ଆଗରେ ଅସହାୟ ହୋଇପଡିଛନ୍ତି ଗୁଣପୁର ବ୍ଲକର ଡମ୍ବସରା ପଞ୍ଚାୟତ ଝିଙ୍କିରିସାହିର ଜଣେ ବାଳକ । ବୟସ ମାତ୍ର ୧୬, ପଞ୍ଚମ ଶ୍ରେଣୀ ଅଧ୍ୟୟନ ବେଳେ ଅଜଣା ରୋଗରେ ପୀଡିତ ହୋଇଥିଲା । ସେ ଦିନ ଠାରୁ ପରିବାର ଲୋକ ବିଭିନ୍ନ ମେଡିକାଲରେ ଚିକିତ୍ସା କରାଇଥିଲେ ସୁଦ୍ଧା ଆଜି ପର୍ଯ୍ୟୟ ଭିନ୍ନକ୍ଷମ ହୋଇ ରହିଛନ୍ତି । ଉକ୍ତ ବାଳକକୁ ପାଠପଢିବାକୁ ପ୍ରବଳ ଇଚ୍ଛା ଥିଲେ ମଧ୍ୟ ଗୋଡ ଦୁଇଟି ଅକାମୀ ହୋଇ ପଡିଥିବାରୁ ତାପାଇଁ ଶିକ୍ଷା ସପ୍ନ ପାଲଟି ଯାଇଛି । ଗୋଟିଏ ପଟେ ଦାରିଦ୍ରତା ଓ ଅନ୍ୟପଟେ ଶିକ୍ଷାରୁ ବଞ୍ଚିତ ସାଙ୍ଗକୁ ସ୍ୱାସ୍ଥ୍ୟ ସମସ୍ୟାରେ ଜୁଝି ବାଳକଜଣର ଗୁମୁରୀ ଗମୁରୀ କାନ୍ଦୁଛି । ଆହା ବୋଲି କହିବାକୁ ତାହାର କିଏ ନାହିଁ ।ସ୍ଥାନୀୟ ଡମ୍ବସରା ଗ୍ରାମର ଆଦିବାସୀ ବାଳକ ବିଭୂତି ଶବର(୧୫) ବାପା ମୀନକେତନ ଶବରଙ୍କ ଏକମାତ୍ର ପୁତ୍ର ଅଟନ୍ତି । ବିଭୂତିଙ୍କ ଆଉଜଣ ଭଉଣୀ ମଧ୍ୟ ଅଜଣା ରୋଗରେ ପଡି ମୃତ୍ୟୁବରଣ କରିଥିବାବେଳେ ବିଭୂତି ହିଁ ଏକମାତ୍ର ବାପା,ମାଆଙ୍କ ସାହାଭରସା ଥିଲା । ବିଭୂତିଙ୍କ ବାପା,ମାଆ ଦିନ ମଜୁରିଆ କାମ କରି ପରିବାର ଚଳନ୍ତି । ଆର୍ଥିକ ଅବସ୍ଥା ସ୍ୱଚ୍ଛଳ ନଥିବାରୁ ପ୍ରଥମ ଶ୍ରେଣୀରୁ ପଞ୍ଚମ ଶ୍ରେଣୀ ମାମୁଁ ଘର ପଦ୍ମପୁର ବ୍ଲକ ଗୁଡିଆବନ୍ଧ ପ୍ରାଥମିକ ବିଦ୍ୟାଳୟରେ ଅଧ୍ୟୟନ କରୁଥିଲେ ବିଭୂତି । ସେ ବିଦ୍ୟାଳୟରେ ଜଣେ ମେଧାବୀ ଛାତ୍ର ଥିଲେ । ପଞ୍ଚମ ଶ୍ରେଣୀ ଅଧ୍ୟୟନ ସମୟରେ ହଠାତ୍‍ ଗୋଡ,ହାତ ବିନ୍ଧା ହୋଇଥିଲା । ପରିବାର ଲୋକ ପ୍ରଥମେ ଗୁଣପୁର ତାପରେ ବ୍ରହ୍ମପୁର ମେଡିକାଲରେ ଭର୍ତ୍ତି କରିଥିଲେ । ଚିକତ୍ସା ନିମନ୍ତେ ଅର୍ଥର ଅଭାବ ଯୋଗୁଁ ବିଭୂତିଙ୍କ ଅଣ୍ଟାରୁ ଗୋଡ ଯାଏଁ ସରୁ ହୋଇ ଆସୁଛି । ଏନେଇ ବାରମ୍ବାର ସ୍ଥାନୀୟ ପ୍ରଶାସନ ଓ ଲୋକପ୍ରତିନିଧିଙ୍କୁ ଅବଗତ କରିଥିଲେ ସୁଦ୍ଧା ଚିକିତ୍ସା ନିମନ୍ତେ କୌଣସି ସହାୟତା ପ୍ରଦାନ କରାଯାଇନାହିଁ । ଯାହାଫଳରେ ବିଭୂତିଙ୍କୁ ପରିବାର ଲୋକ ଚିକିତ୍ସା କରିବାରେ ସକ୍ଷମ ହୋଇନପାରି ଘରେ ପକାଇ ରଖିଛନ୍ତି । ପ୍ରଶାସନ ପକ୍ଷରୁ ଭିନ୍ନକ୍ଷମ ଭତ୍ତା ମଧ୍ୟ ପ୍ରଦାନ କରାଯାଉନାହିଁ । କେବଳ ଗୋଟିଏ ହୁଇଲ ଚେୟାର ପ୍ରଦାନ କରାଯାଇଥିବା ବେଳେ ଏହା ଚଳାଇବା ବିଭୂତିଙ୍କ ପାଇଁ ସମ୍ଭବପର ହେଉନାହିଁ । ଗତ ୪ବର୍ଷରୁ ଉଦ୍ଦ୍ୱର୍ ହେଲା ଶର୍ଯ୍ୟରେ ବିତୁଛି ଜୀବନ । ବିଭୁତି ଚାହୁଛି ସେ ପାଠପଢି ନିଜେ ମଣିଷ ହେବାସହ ପରିବାରର ଦୁଃଖକୁ ଲାଘବ କରିବ । ବିଡମ୍ବନା ସହାୟତାର ଅଭାବ । ଉକ୍ତ ବାଳକକୁ ଯଦି ପ୍ରଶାସନ ପକ୍ଷରୁ ଚିକିତ୍ସା ନିମନ୍ତେ ସହାୟତା କରାଗଲେ ସମାଜରେ ମୁଖ୍ୟତ୍ସୋତରେ ସାମିଲ ହୋଇପାରିବ । ଅନ୍ୟପକ୍ଷରେ ବାପା,ମାଆ ପିଲାଦିନରୁ ଜଣେ ମାତ୍ର ପୁଅକୁ ଦେଖି ହାଡଭଙ୍ଗା ପରିଶ୍ରମ କରି ବହୁ କଷ୍ଟରେ ଚଳି ଆସୁଥିଲେ । ପୁଅର ଏଭଳି ଅବସ୍ଥା ଯୋଗୁଁ ଦୁଃଖରେ ଭାଙ୍ଗି ପଡିଛନ୍ତି । ପ୍ରଶସାନ ତୁରନ୍ତ ବିଭୂତିକୁ ଚିକିତ୍ସା ସହାୟତାର ହାତ ବଢାଇବାକୁ ବିଭିନ୍ନ ମହଲରେ ଦାବୀ କରାଯାଉଛି ।