ପୁଣି ଏକାଠି ହେବେ କି ନୀତୀଶ କୁମାର ଓ ପିକେ ? ବୈଠକକୁ ନେଇ ଚର୍ଚ୍ଚା ….!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ପୁଣିଥରେ ଏକାଠି ହେବେ କି ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଓ ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର ଓରଫ ପିକେ? କିଛି ଦିନର ବାକ ଯୁଦ୍ଧ ପରେ ଏହି ଦୁଇ ନେତା ଗୋଟିଏ ବନ୍ଦ କୋଠରୀରେ ବୈଠକ କରିବା ପରେ ନାନା ପ୍ରକାରର ଚର୍ଚ୍ଚା ଆରମ୍ଭ ହୋଇଯାଇଛି। ୨୦୨୪ ସାଧାରଣ ନିର୍ବାଚନ ପାଇଁ ନୀତୀଶ କୁମାର ସବୁ ବିରୋଧୀଙ୍କୁ ବିଜେପି ବିରୋଧରେ ଏକାଠି କରିବାକୁ ଚେଷ୍ଟା କରୁଛନ୍ତି। ଏବେ ସେ ପିକେଙ୍କୁ ଭେଟିଥିବାରୁ ୨୦୨୪ରେ ଏମାନଙ୍କ ମଧ୍ୟରେ କୌଣସି ବୁଝାମଣା ହୋଇପାରେ ବୋଲି କୁହାଯାଉଛି। ବୁଧବାର ସନ୍ଧ୍ୟାରେ ନୀତୀଶ କୁମାର ଓ ପିକେ ଦୀର୍ଘ ୪୫ ମିନିଟ ଧରି ରୁଦ୍ଧଦ୍ୱାର ବୈଠକ କରିଥିଲେ। ୨୦୨୪ ସାଧାରଣ ନିର୍ବାଚନ ସମ୍ପର୍କରେ ଏମାନେ ଆଲୋଚନା କରିଥିବା କୁହାଯାଉଛି। ଏକଦା ପିକେ ଜେଡିୟୁରେ ନୀତୀଶ କୁମାରଙ୍କ ଡେପୁଟି ଥିଲେ। ହେଲେ ଦୁଇ ବର୍ଷ ହେଲା ଉଭୟଙ୍କ ମଧ୍ୟରେ ବିବଦା ଚାଲିଥିଲା। ଏପରି କି ଉଭୟ ପରସ୍ପରକୁ ସମାଲୋଚନା କରିବାକୁ ମଧ୍ୟ ପଛାଉ ନଥିଲେ। କିନ୍ତୁ ସମୟ ବଦଳିବା ସହ ଉଭୟଙ୍କ ଆଭିମୁଖ୍ୟ ମଧ୍ୟ ବଦଳିଛି। ଦୁଇ ନେତା ପରସ୍ପର ସହ ବୈଠକ କରିଛନ୍ତି। ନୀତୀଶ କୁମାର ଓ ପିକେଙ୍କୁ ଏକାଠି କରିବାର ବ୍ୟବସ୍ଥା ପବନ ବର୍ମା କରିଛନ୍ତି। ପବନ ବର୍ମା ହେଉଛନ୍ତି ନୀତୀଶଙ୍କ ଜେଡିୟୁର ପୂର୍ବତନ ନେତା। ଦୁଇ ବର୍ଷ ତଳେ ପବନ ଓ ପିକେଙ୍କୁ ଦଳ ବିରୋଧୀ କାମ ପାଇଁ ଜେଡିୟୁରୁ ବିଦା କରାଯାଇଥିଲା। ଏବେ ସେ ହିଁ ପିକେ ଓ ନୀତୀଶ କୁମାରଙ୍କୁ ଏକାଠି କରିବାକୁ ଉଦ୍ୟମ ଆରମ୍ଭ କରିଛନ୍ତି। ବୁଧବାର ବୈଠକରେ ପବନ ବର୍ମା ମଧ୍ୟ ଉପସ୍ଥିତ ଥିଲେ। ନୀତୀଶ କୁମାର ବୈଠକ ସମ୍ପର୍କରେ ବିସ୍ତୃତ ସୂଚନା ଦେଇ ନାହାନ୍ତି। ପିକେଙ୍କ ସହ ତାଙ୍କର କିଛି ସାଧାରଣ କଥାବାର୍ତ୍ତା ହୋଇଥିବା ସେ କହିଛନ୍ତି। ନୀତୀଶ କୁମାର ବୈଠକ ପରେ କହିଛନ୍ତି, “ଆମେ ଦେଖାହେଲୁ। ତାଙ୍କୁ ଏ ବିଷୟରେ ପଚରା ଯାଉ। ଆମେ କୌଣସି ସ୍ୱତନ୍ତ୍ର ବିଷୟରେ କଥା ହୋଇନୁ। ଏହା ଏକ ସାଧାରଣ ଭେଟଘାଟ। ଆପଣମାନେ କୌଣସି ପ୍ରକାରର ଆକଳନ କରନ୍ତୁ ନାହିଁ। ମିଟିଂରେ ଖରାପ କ’ଣ? ଆମେ ପରସ୍ପରକୁ ବହୁତ ଦିନରୁ ଜାଣିଛୁ।” ବିହାର ମୁଖ୍ୟମନ୍ତ୍ରୀ ସାମ୍ବାଦିକମାନଙ୍କୁ ପିକେଙ୍କୁ ସବୁ କିଛି ପଚାରିବାକୁ ମଧ୍ୟ କହିଛନ୍ତି। ଗୋଟିଏ ନିର୍ଦ୍ଦିଷ୍ଟ ପ୍ରଶ୍ନରେ ନୀତୀଶ କୁମାର କହିଛନ୍ତି, “ମୁଁ ପିକେଙ୍କ ଉପରେ ଆଦୌ କ୍ଷୁବ୍ଧ ନୁହେଁ। ତାଙ୍କ ଉପରେ ମୋର କୌଣସି ପୂର୍ବାଗ୍ରହ ନାହିଁ।”ଗତ ସପ୍ତାହରେ ଉଭୟ ପରସ୍ପରକୁ ସମାଲୋଚନା କରିଥିଲେ। ନୀତୀଶ କୁମାର ବିଜେପିକୁ ଛାଡ଼ପତ୍ର ଦେଇ ଆରଜେଡି, କଂଗ୍ରେସ ଓ ଅନ୍ୟ ରାଜନୀତିକ ଦଳଗୁଡ଼ିକ ସହ ମିଶି ସରକାର ଗଠନ କରିବାରୁ ପିକେ ଏହାକୁ ତାଚ୍ଛଲ୍ୟ କରିଥିଲେ। ପିକେ କହିଥିଲେ “ନୀତୀଶ କୁମାର ମାସକ ତଳେ ପକ୍ଷ(ଶାସକ ଦଳ) ସହ ରହିଥିବା ବେଳେ ଏବେ ସେ ବିପକ୍ଷ(ବିରୋଧୀ ଦଳ)ରେ ରହିଛନ୍ତି। ଏହା କେତେ ଭରାସାଯୋଗ୍ୟ ସେକଥା ଲୋକମାନେ ନିଷ୍ପତ୍ତି ନେବେ। କିନ୍ତୁ ବିହାରରେ ଏପରି ନୂଆ ମହାମେଣ୍ଟ ଜାତୀୟ ସ୍ତରରେ ବଡ଼ ପ୍ରଭାବ ପକାଇବ ବୋଲି ମୋର ଆଶା ନାହିଁ।” ସେ ପରୋକ୍ଷରେ ନୀତୀଶ କୁମାର ୨୦୨୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚ୍ୟାଲେଞ୍ଜ ଦେଇ ପାରିବେ ନାହିଁ ବୋଲି କହିଥିଲେ। ଏହାର ଜବାବରେ ନୀତୀଶ କୁମାର କହିଥିଲେ, “ସେହି ବ୍ୟକ୍ତି(ପିକେ) ମୋ ସହ ଆସିଥିଲେ ଓ ଏହାପରେ ମୁଁ ତାଙ୍କୁ ନିଜର କାମ ଛାଡ଼ି ମୋ ସହ ରହିବାକୁ କହିଥିଲି। କିନ୍ତୁ ସେ ମୋ କଥା ଶୁଣି ନଥିଲେ। ସେ ଦେଶର ବିଭିନ୍ନ ରାଜନୀତିକ ଦଳ ସହ କାମ କରିଛନ୍ତି। ଏହା ତାଙ୍କର ଗୋଟିଏ ଧନ୍ଧା ବା ବ୍ୟବସାୟ। ଯେତେବେଳେ ଜଣେ ଏମିତି କଥା କହୁଛନ୍ତି ସେତେବେଳେ ତାଙ୍କ ମୁଣ୍ଡରେ ଅଲଗା କିଛି ଚାଲିଛି ବୋଲି ଭାବିବାକୁ ପଡ଼ିବ। ସେ ବିଜେପି ସହ ରହିବାକୁ ଚାହୁଁଛନ୍ତି କିମ୍ବା ବିଜେପି ପାଇଁ ଗୁପ୍ତରେ କାମ କରିବାକୁ ଚାହୁଁଛନ୍ତି।” ଏହାପରେ ପିକେ ୪ଟି ଫଟୋ ବିନା କମେଣ୍ଟରେ ପୋଷ୍ଟ କରିଥିଲେ। ଏଥିରେ ନୀତୀଶ କୁମାର ପ୍ରଧାନମନ୍ତ୍ରୀ ମୋଦିଙ୍କ ବିଭିନ୍ନ କାର୍ଯ୍ୟକ୍ରମରେ କେମିତି ନତମସ୍ତକ ହୋଇଥିଲେ, ତା’ର ଦୃଶ୍ୟ ରହିଥିଲା।

ଚିତାଚୈତନ ଲଗାଇ ୩୦ ଲକ୍ଷରୁ ଅଧିକ ଟଙ୍କା ଚିତା କାଟିଛି ବାସୁଦେବ….!

ଏଥର ସମ୍ଭାଳ ବ୍ୟୁରୋ(କେନ୍ଦ୍ରାପଡ଼ା)- ଚିତା ଚୈତନ ଲଗାଇ ପୂଜକ ବେଶରେ ବାସୁଦେବ ପଣ୍ଡା! ତାଙ୍କୁ କେତେବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହିତ ଆଉ କେତେବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ସହିତ ଫେକ୍‌ ଫଟୋରେ ଦେଖିବାକୁ ମିଳୁଛି। ଆଉ କେତେବେଳେ ତାଙ୍କୁ ସେନା ଅଧିକାରୀଙ୍କ ସହିତ ଫଟୋରେ ଦେଖିବାକୁ ମିଳୁଛି। ଅତି ଚତୁରତାର ସହିତ ଫଟୋ ଏଡିଟ୍‌ କରି ନିଜକୁ ଫ୍ରେମ୍‌ରେ ରଖିଛନ୍ତି ବାସୁଦେବ। ପରବର୍ତ୍ତୀ ସମୟରେ ସେହି ଫଟୋ ଦେଖାଇ ସ୍ପଷ୍ଟ ଦିବାଲୋକରେ ଠକୁଥିଲେ। କାହାକୁ ଭଲ ଡାକ୍ତରକୁ ଦେଖାଇବାକୁ କହି ତ ଆଉ କାହାକୁ ସେନାରେ ଚାକିରି କରାଇଦେବାକୁ କହି, ଏମିତି କେତେ କ’ଣ ପ୍ରତିଶ୍ରୁତି ଦେଇ ବାସୁଦେବ ୩୦ ଲକ୍ଷରୁ ଅଧିକ ଟଙ୍କା ଠକେଇ କରିଥିବା ଅଭିଯୋଗ ହୋଇଛି। ଏପରି ୪୨୦ ଠକଙ୍କୁ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲ୍ଲାରେ। ନିକିରାଇ ଥାନା ଢୋଲ ଗାଁର ଯୁବକ ହେଉଛନ୍ତି ବାସୁଦେବ ପଣ୍ଡା। ପେଶାରେ ସେ ଜଣେ ପୂଜକ। ହେଲେ ନିଶା ଠକିବା। ତାଙ୍କ ଠକାମୀ ଶିକାର ହୋଇଛନ୍ତି ଜମରା ଗାଁର କରୁଣାକର ରଣା। କରୁଣାକରଙ୍କ ସାନ ଭାଇ ଅସୁସ୍ଥ ହୋଇପଡ଼ିଥିଲେ। ତାଙ୍କୁ ସାମାନ୍ୟ ରୋଗ ହୋଇଥିଲା। ହେଲେ ତାଙ୍କୁ କ୍ୟାନସର ହୋଇଥିବା କହି ଭୟଭୀତ କରାଇ ଥିଲେ ବାସୁଦେବ। ଭଲ ଡାକ୍ତର ଦେଖାଇବାକୁ ହେଲେ ୬ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି କହିଥିଲେ। କିଛି ଉପାୟ ନପାଇ କରୁଣାକର, ସାନ ଭାଇର ଚିକିତ୍ସା ପାଇଁ ଜମି ବିକ୍ରି କରି ବାସୁଦେବଙ୍କୁ ଟଙ୍କା ଦେଇଥିଲେ। ହେଲେ ପରବର୍ତ୍ତୀ ସମୟରେ କରୁଣାକର ଜାଣିଥିଲେ ଯେ ତାଙ୍କ ଭାଇକୁ ସାମାନ୍ୟ ରୋଗ ହୋଇଛି। ଡାକ୍ତରଙ୍କୁ ଦେଖାଇବା ପରେ ସବୁ କିଛି ସ୍ପଷ୍ଟ ହୋଇଥିଲା। ଏହା ପରେ କରୁଣାକର ଦେଇଥିବା ଟଙ୍କା ବାସୁଦେବଙ୍କୁ ମାଗିଥିଲେ। ମାତ୍ର ସେ ଧରାଛୁଆଁ ଦେଇଥିଲେ। ଶେଷରେ କିଛି ଉପାୟ ନପାଇ କରୁଣାକର ନିକିରାଇ ଥାନାରେ ଅଭିଯୋଗ କରିଥିଲେ । ସେହିପରି ଆଉ ଜଣେ ଚାଷୀ ହେଉଛନ୍ତି ରବୀନ୍ଦ୍ର ସାହୁ। ତାଙ୍କୁ ଚୁନ ଲଗାଇଛନ୍ତି ବାସୁଦେବ ପଣ୍ଡା। ପୁଅକୁ ସେନା ବାହିନୀରେ ଚାକିରି କରାଇଦେବାକୁ କହି ରବୀନ୍ଦ୍ରଙ୍କଠାରୁ ୨୦ ଲକ୍ଷ ଟଙ୍କା ନେଇଥିବା ଅଭିଯୋଗ ହୋଇଛି। ପରବର୍ତ୍ତୀ ସମୟରେ ରବୀନ୍ଦ୍ର ଜାଣିଥିଲେ ବାସୁଦେବ ଜଣେ ଠକ ବୋଲି। ଏହା ପରେ ସେ ଦେଇଥିବା ଟଙ୍କା ଫେରି ପାଇବାକୁ ଚାହିଁଥିଲେ। ମାତ୍ର ବାସୁଦେବ ଧରାଛୁଆଁ ଦେଇନଥିଲେ। ସେ ମୋବାଇଲ ବନ୍ଦ କରିଦେଇଥିବା ଅଭିଯୋଗ ହୋଇଛି। ଏହି ଖବର ପ୍ରଚାରିତ ହେବା ପରେ ଠକାମୀରେ ଶିକାର ହୋଇଥିବା ଲୋକ ବାସୁଦେବଙ୍କ ଘରେ ପହଞ୍ଚିଥିଲେ। ହେଲେ ସେ ଫେରାର ହୋଇଯାଇଛନ୍ତି। ବାସୁଦେବାଙ୍କ ଜାଲରେ କେବଳ କରୁଣାକର ଓ ରବୀନ୍ଦ୍ର ପଡ଼ି ନାହାଁନ୍ତି। ଏକାଧିକ ଲୋକଙ୍କୁ ବାସୁଦେବ ନିଜ ଫାସରେ ଫସାଇଥିବା ଅଭିଯୋଗ ହୋଇଛି। ଦେଶର ପ୍ରଭାବଶାଳୀ ବ୍ୟକ୍ତିଙ୍କ ସହିତ ନିଜ ଫଟୋକୁ ଏଡିଟ୍‌ କରି ଯୋଡ଼ି ଲୋକଙ୍କ ମନରେ ବିଶ୍ୱାସ ଜନ୍ମାଇଥିଲା। ପରେ ସମୟ ସୁବିଧା ଦେଖି ବିଭିନ୍ନ ଲାଳସା ଦେଖାଇ ଟଙ୍କା ଆଦାୟ କରିଥିଲା। ବାସୁଦେବଙ୍କ ନାଁରେ ଅଭିଯୋଗ ହେଉଥିଲେ ମଧ୍ୟ ପୁଲିସ୍‌ ନୀରବଦ୍ରଷ୍ଟା ସାଜିଥିଲା। ପରେ ଘଟଣା କେନ୍ଦ୍ରାପଡ଼ା ଏସ୍‌ପିଙ୍କ ପାଖକୁ ଯାଇଥିଲା। ଏସ୍‌ପି ପୂରା ଘଟଣା ଶୁଣିବା ପରେ ମାମଲା ରୁଜୁ କରିବା ସହିତ ଘଟଣାର ତଦନ୍ତ କରିବାକୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି।

ନକଲି ଔଷଧ ଧରପଗଡ଼ ପାଇଁ ସବୁ ଜିଲ୍ଲାରେ ହେବ ଚଢ଼ଉ…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ନକଲି ଔଷଧ ବିକ୍ରି ଅଭିଯୋଗରେ କଟକରେ ୨ଜଣ ଗିରଫ ହୋଇଥିବାବେଳେ ଆଗାମୀ ଦିନରେ ରାଜ୍ୟର ସମସ୍ତ ଜିଲ୍ଲାରେ ଏହି ନକଲି ଔଷଧ ଧରପଗଡ଼ ନିମନ୍ତେ ଚଢ଼ଉ ଜୋରଦାର କରାଯିବ ବୋଲି ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସ ସୂଚନା ଦେଇଛନ୍ତି । ଗଣମାଧ୍ୟମକୁ ପ୍ରତିକ୍ରିୟା ଦେଇ ଶ୍ରୀ ଦାସ କହିଛନ୍ତି ଯେ, ରାଜ୍ୟରେ ନକଲି ଔଷଧ ବିକ୍ରି ଓ ଯୋଗାଣକୁ କୌଣସି ପରିସ୍ଥିତିରେ ବି ସରକାର ବରଦାସ୍ତ କରିବେ ନାହିଁ । ଆଇନ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ, କାହାରିକୁ ଛଡ଼ାଯିବ ନାହିଁ । କଟକ ଓ ଭୁବନେଶ୍ୱର ଓ ବ୍ରହ୍ମପୁରର ବିଭିନ୍ନ ମେଡିସିନ୍ ଷ୍ଟୋର ଓ ଡିଷ୍ଟ୍ରିବ୍ୟୁଟର ଉପରେ ଚଢ଼ଉ ପରେ ବ୍ଲଡପ୍ରେସରର ନକଲି ଔଷଧ ‘ଟେଲମା-୪୦’ ମିଳିଥିଲା । ଯାହାକୁ ନେଇ ରାଜ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିବାବେଳେ ଏହି ନକଲି ଟେଲମା-ଏମ୍ ଓ ଟେଲମା-୪୦ କୁ ଜବତ କରିଛନ୍ତି । ମଙ୍ଗଳବାର କମିଶନରେଟ ପୁଲିସ ଏହି ନକଲି ଔଷଧ ଯୋଗାଣ ମାମଲାରେ ୨ଜଣଙ୍କୁ ଗିରଫ କରିଛି । ଗ୍ଲେନମାର୍କ କମ୍ପାନୀ ପକ୍ଷରୁ ଏହି ଦୁଇଟି ମେଡିସିନକୁ କମ୍ପାନୀ ଦ୍ୱାରା ପ୍ରସ୍ତୁତ କିମ୍ବା ଯୋଗାଣ କରାଯାଇନଥିବା ନେଇ ସ୍ପଷ୍ଟ କରାଯିବା ପରେ ଏଫଆଇଆର ରୁଜୁ ହୋଇଥିଲା ।

ଗୁଣପୁର ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ର ମେଧାବୀ ବିଦ୍ୟାର୍ଥୀ ଅଭିନନ୍ଦନ ପାଳିତ …!

!!! ରାୟଗଡ଼ ଜିଲ୍ଲା ଗୁଣପୁର ରୁ ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଜୋଶୀ ଙ୍କ ରିପୋର୍ଟ !!!

ଏଥର ସମ୍ଭାଳ(ଗୁଣପୁର)- ଚଳିତ ଶିକ୍ଷା ବର୍ଷ ରେ ବିଭିନ୍ନ ବିଦ୍ୟାଳୟ ଓ ମହାବିଦ୍ୟାଳୟ ରେ ଉଚ୍ଚ ନମ୍ବର ରଖି ପରୀକ୍ଷା ରେ ଉତ୍ତୀର୍ଣ୍ଣ ହୋଇଥିବା ୭୫ ଜଣ ଵିଦ୍ୟାର୍ଥୀନୀ ବିଦ୍ୟାର୍ଥୀ ମାନଙ୍କୁ ଏ॰ବି॰ଭି॰ପି ଗୁଣପୁର ଦ୍ୱାରା ପୁରସ୍କାର ବିତରଣ କରଯାଇଥିଲା । ମହର୍ଷି ଗୁରୁକୂଳ ପ୍ରଯୋଜନା ଆୟୋଜିତ ଏହି କାର୍ଯ୍ୟକ୍ରମ ରେ ମୁଖ୍ୟ ଅତିଥି ଭାବେ ଅତିରିକ୍ତ ଉପଜିଲ୍ଲାପାଳ ରାଜେନ୍ଦ୍ର ପ୍ରସାଦ ଚୌଧୁରୀ, ସମ୍ମାନିତ ଅତିଥି ଭାବେ ଅତିରିକ୍ତ କପିଳେଶ୍ୱର ତାଣ୍ଡି ଓ ମୁଖ୍ୟ ବକ୍ତା ଭାବେ ଅବସରପ୍ରାପ୍ତ ଶିଖିକା ସଙ୍ଘମିତ୍ର। ମିଶ୍ର ଉପସ୍ଥିତ ରହି । ବିଦ୍ୟାର୍ଥୀ ମାନଙ୍କୁ ନିଜର ଉଦ୍ୟମ, କର୍ମତତ୍ପର ରହିବା ସହ ସଂଯମୀ ଓ ରାଷ୍ଟ୍ର ପ୍ରତି ଉତ୍ସର୍ଗୀକୃତ ରହିବା ଦରକାର ବୋଲି ମାର୍ଗଦର୍ଶନ ଦେଇଥିଲେ । କାର୍ଯ୍ୟକ୍ରମ କୁ ବିଦ୍ୟାର୍ଥୀ ପରିଷଦ ର ବରିଷ୍ଠ କାର୍ଯ୍ୟକାର୍ତ୍ତା ଡ଼ ପ୍ରଶାନ୍ତ ହୋତା ସ୍ୱାଗତ କରିଥିଲେ ,ସଭାପତି ପ୍ରଫୁଲ୍ଲ ଲିମା ସଂଯୋଜନା କରିଥିଲେ ,ସଂପାଦକ ଦେବାଶିଶ ସେନାପତି ବିବରଣୀ ପାଠ କରିଥିଲେ। ।

ସଭାରେ ପୂଣ୍ୟ ଶ୍ଳୋକ ସାହୁ ଧନ୍ୟବାଦ ଆର୍ପଣ କରିଥିବାବେଳେ ଇନ୍ଦ୍ର।କ୍ଷୀ ଦାଶ୍ ପୁରସ୍କାର ଓ ସମ୍ବର୍ଦ୍ଧନା କୁ ସଂଯୋଜନା କରିଥିଲେ । ଶତ ପ୍ରତିଶତ ଉଚ୍ଚ ନମ୍ବର ର ପରୀକ୍ଷା ଫଳ ନିମନ୍ତେ ସରସ୍ବତୀ ଶିଶୁ ବିଦ୍ୟା ମନ୍ଦିର ସଭାପତି ଗଜପତି ରାଓ, ପ୍ରଧାନ ଆଚାର୍ଯ୍ୟ ପ୍ରଫୁଲ୍ଲ ଶତପଥୀ ସମ୍ବର୍ଦ୍ଧିତ ହୋଇଥିଲେ ସେଭଳି ଜିଲ୍ଲା ସ୍ତର ବିଜ୍ଞାନ ରେ ଉଚ୍ଚ ନମ୍ବର ରଖିଥିବା ଜି ସାଇ ଶ୍ରୀ ସୁବୁଦ୍ଧି ,ବଂଶଧାରା ମହାବିଦ୍ୟାଳୟ ର ଓ ମ୍ୟାଟ୍ରିକ ରେ ଉଚ୍ଚ ନମ୍ବର ରଖିଥିବା ସରସ୍ଵତୀ  ଶିଶୁ ବିଦ୍ୟା ମନ୍ଦିର ର ଡି॰ ଆୟୁସମାନ  ଙ୍କୁ ସ୍ୱତନ୍ତ୍ର ସମ୍ବର୍ଦ୍ଧିତ କରାଯାଇଥିଲା । ସେଭଳି ପ୍ରଯୋଜକ ଓ ଶତ ପ୍ରତିଶତ ପରୀକ୍ଷା ଫଳ ରଖୀଥିବା ମହର୍ଷି ଗୁରୁକୁଳ ର ରାଜେଶ କୁମାର ପଣ୍ଡା ଓ ପ୍ରିୟବ୍ରତ ବିଶୋଇ ଙ୍କୁ ସମ୍ବର୍ଦ୍ଧିତ କରାଯାଇଥିଲା । କାର୍ଯ୍ୟକ୍ରମ ପ୍ରାରମ୍ଭିକ ସଙ୍ଗୀତ ଓ ବନ୍ଦେ ମାତାରମ ଶିଶୁ ବିଦ୍ୟ ମନ୍ଦିର ଛାତ୍ରୀ ମାନଙ୍କ ଦ୍ୱାରା କରାଯାଇଥିଲା । ଏହି କାର୍ଯ୍ୟକ୍ରମ କୁ ଜିଲ୍ଲା ପ୍ରମୁଖ ଶେଷ ସାଇ ସେନାପତି, ବିଭାଗ ପ୍ରମୁଖ ଉମା ଦାଶ୍ ,ବି କିରଣ କୁମାର, ସାଇ ପାଣିଗ୍ରାହୀ, ବି ସତୀଶ କୁମାର ,ମାନସ ବୈଦ୍ୟ ଭୂଷଣ ପ୍ରମୂଖ ପରିଚ।ଳନ। କରିଥିଲେ ।