ବନ୍ଧୁତ୍ୱ ଦିବସକୁ ନିଆରା ଭାବେ ପାଳିଲା ‘ଯାଯାବର’ ସଂଗଠନ…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଆଜି ବନ୍ଧୁତ୍ୱ ଦିବସ। ଏହି ଦିବସକୁ ନିଆରା ଢଙ୍ଗରେ ପାଳିଛି ଭୁବନେଶ୍ୱରର ଯାଯାବର ସଂଗଠନ। ବନ୍ଧୁତ୍ୱ ଦିବସରେ ଦେଇଛି ସ୍ୱଚ୍ଛତାର ବାର୍ତ୍ତା। ଖଣ୍ଡଗିରି ସ୍ଥିତ ବସଷ୍ଟାଣ୍ଡ ପରିସରକୁ ସଫା କରିଛନ୍ତି ସଂଗଠନର ସଦସ୍ୟମାନେ। ଏହା ସହିତ ରାସ୍ତାକଡ଼ରେ ବୃକ୍ଷରୋପଣ କରିଛନ୍ତି। ପରିବେଶକୁ ସଫାସୁତର ରଖିବା ସହିତ ବୃକ୍ଷରୋପଣ କରିବାକୁ ଯାଯାବର ସଂଗଠନର ସଦସ୍ୟମାନେ ଯୁବକଯୁବତୀମାନଙ୍କୁ ନିବେଦନ କରିଛନ୍ତି। ଆଗାମୀ ଦିନରେ ପରିବେଶ ସୁରକ୍ଷା ଦିଗରେ ଏଭଳି କାର୍ଯ୍ୟକ୍ରମ ଜାରି ରହିବ ବୋଲି ସଂଗଠନ ପକ୍ଷରୁ କୁହାଯାଇଛି। ଏହା ସହିତ ଆଗାମୀ ଦିନରେ ସଂଗଠନ ତରଫରୁ ସଚେତନତାମୂଳକ କାର୍ଯ୍ୟକ୍ରମ ଜାରି ରହିବ ବୋଲି କୁହାଯାଇଛି। ମୁକେଶ ପରିଡ଼ାଙ୍କ ନେତୃତ୍ୱରେ ସଂଗଠନର ସଦସ୍ୟ ମନୋରଞ୍ଜନ ମହାନ୍ତି, ସ୍ମୃତି ରଞ୍ଜନ ବିଶ୍ୱାଳ, ସତ୍ୟଜିତ୍ ରାଉତ, ଦିଲ୍ଲୀପ ରାଉତ, ସସ୍ମିତା ମଲ୍ଲ, ପ୍ରିୟଦର୍ଶିନୀ ସାହୁ, ସତ୍ୟାନନ୍ଦ ନାୟକ, ନଳିନୀ ରାଉତ, ସମ୍ବିତ ବେହେରା, ଅନିଲକାନ୍ତ ଦାସ, ଶ୍ରୀରାମ ମହାନ୍ତି ଓ ଅରୂପାନନ୍ଦ ବାରିକ ପ୍ରମୁଖ ଆଜିର ସଫେଇ ଓ ବୃକ୍ଷରୋପଣ କାର୍ଯ୍ୟକ୍ରମ ସାମିଲ ହୋଇଥିଲେ।

ପ୍ରଶାସନ ର କଠୋର ନିସ୍ପତି ; ଆସନ୍ତା ବର୍ଷ କେବଳ ନୀତି ସମ୍ପୃକ୍ତ ସେବାୟତ ରଥ ଚଢ଼ିବେ….!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଆସନ୍ତା ବର୍ଷ ରଥରେ ସମସ୍ତ ସେବାୟତ ଚଢ଼ିବେନି। କେବଳ ନୀତି ସହ ଜଡ଼ିତ ସେବାୟତ ହିଁ ରଥ ଉପରକୁ ଚଢ଼ିବେ। ଫଳରେ ଠାକୁରଙ୍କୁ ଭଲ ଭାବେ ଦର୍ଶନ କରିପାରିବେ ଭକ୍ତ। ଆଜି ଗଜପତି ଦିବ୍ୟସିଂହଦେବଙ୍କ ଅଧ୍ୟକ୍ଷତାରେ ବସିଥିବା ଶ୍ରୀମନ୍ଦିର ପରିଚାଳଚନା କମିଟି ବୈଠକରେ ଏହି ନିଷ୍ପତ୍ତି ହୋଇଛି। ବୈଠକରେ ବିଶେଷ ଭାବେ ଚଳିତ ବର୍ଷ ଅନୁଷ୍ଠିତ ହୋଇଯାଇଥିବା ସ୍ନାନଯାତ୍ରା ଓ ରଥଯାତ୍ରା ସମ୍ପର୍କରେ ସମୀକ୍ଷା କରାଯାଇଥିଲା। ଏହାଛଡ଼ା ଗରିବ ସେବାୟକଙ୍କ ନିମନ୍ତେ ଆବାସ ପ୍ରକଳ୍ପ ଓ ସେବାୟତ ପିଲାଙ୍କ ପାଠପଢ଼ା ପାଇଁ ଗୁରୁକୁଳ ପ୍ରତିଷ୍ଠା ନେଇ ଆଲୋଚନା ହୋଇଥିଲା। ଅଲୋଚନା ନିମନ୍ତେ ଏଜେଣ୍ଡାରେ ଅନେକ ବିଷୟ ରହିଥିଲେ ହେଁ ନିର୍ଦ୍ଧାରିତ ସମୟ ଭିତରେ ଯାହି ଯେତିକି ଆଲୋଚନା କରି ବୈଠକକୁ ସମାପ୍ତ କରାଯାଇଥିଲା। ତେଣୁ ଶ୍ରୀମନ୍ଦିର ଜମିଜମା ସୁରକ୍ଷା ଓ ବିକ୍ରିବଟା, ରତ୍ନଭଣ୍ଡାର ସୁରକ୍ଷା, ଶ୍ରୀମନ୍ଦିର କରିଡ଼ର ପ୍ରଭୃତି ବିଷୟରେ ବିଶେଷ କୌଣସି ଆଲୋଚନା ହୋଇପାରିନି। ତେବେ ଚଳିତ ବର୍ଷ ସ୍ନାନଯାତ୍ରା ଓ ରଥଯାତ୍ରାରେ ଠାକୁରମାନଙ୍କ ଆଗପଛରେ ନିର୍ଦ୍ଧାରିତ ସଂଖ୍ୟା ଠାରୁ ବହୁ ଅଧିକ ସେବାୟତମାନେ ଘେରି ରହିବାରୁ ଭକ୍ତଙ୍କୁ ଭଲ ଦର୍ଶନ ନ ମିଳିବା ଏବଂ ସ୍ଥିରିକୃତ ଆଚରଣ ସଂହିତାକୁ ଉଲ୍ଲଂଘନ କରାଯିବା ନେଇ କ୍ଷୁବ୍ଧ ଥିବା ପ୍ରଶାସନ କଠୋର ମନୋଭାବ ପୋଷଣ କରିଛି। ବୈଠକ ପରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀରବିକ୍ରମ ଯାଦବ ସୂଚନା ଦେଇ କହିଛନ୍ତି, ବୈଠକରେ ସ୍ନାନଯାତ୍ରା ଓ ରଥଯାତ୍ରା ସମୀକ୍ଷା ହୋଇଥିଲା। ଆସନ୍ତା ବର୍ଷ ଏହି ଉତ୍ସବ ପାଳନ ବେଳେ ସେବାୟତମାନେ ଠାକୁରଙ୍କ ପାଖରେ ଏମିତି ଠିଆ ହେବେ, ଯେପରି ଭକ୍ତ ଭଲଭାବେ ଠାକୁର ଦର୍ଶନ କରିବେ। ଠାକୁରଙ୍କ ନୀତି ପରିଚାଳନା ପାଇଁ ଯେତିକି ସେବାୟତ ଆବଶ୍ୟକ ସେତିକି ରହିବେ। ୩୬ ନିଯୋଗ ସହିତ ଏନେଇ ବୈଠକ କରି ଅଲୋଚନା ହେବ। ଏହାଛଡ଼ା ବୈଠକରେ ଆଦର୍ଶ ଗୁରୁକୂଳ ପ୍ରତିଷ୍ଠା ନେଇ ଆଲୋଚନା ହୋଇଥିଲା। ଏହି ପ୍ରକଳ୍ପକୁ ଶୀଘ୍ର ଶେଷ କରିବାକୁ ଆଲୋଚନା ହୋଇଛି। ସେହିପରି ସେବକ ବାସଗୃହ ନିମନ୍ତେ ପ୍ଲାନ୍ ଆପ୍ରୁଭାଲ ହୋଇଛି। ୪ ମାସ ଭିତରେ କାମ ଆରମ୍ଭ ହେବ। ଗତ ବୈଠକରେ ଲ୍ୟାଣ୍ଡ ସବ୍ କମିଟି ନେଇଥିବା ନିଷ୍ପତ୍ତିକୁ ଆପ୍ରୁଭାଲ ଦିଆଯାଇଛି। ଶ୍ରୀମନ୍ଦିର ପ୍ରଶାସନ ଦ୍ୱାରା ପରିଚାଳିତ ଗେଷ୍ଟ ହାଉସ୍ ରୁମ୍‌ଗୁଡ଼ିକ ସୁବିଧାରେ ଅନ୍‌ଲାଇନ୍‌ରେ ବୁକିଂ ପାଇଁ ଏଚ୍‌ଡିଏଫ୍‌ସି ସହିତ ଏକ ଏମ୍‌ଓଏୟୁ କରାଯିବ। ଏହାକୁ ପରିଚାଳନା କମିଟିରେ ମଞ୍ଜୁରୀ ମିଳିଛି। ଶ୍ରୀଗୁଣ୍ଡିଚା ମନ୍ଦିର ମଧ୍ୟ ସବୁଦିନିଆ ଖୋଲିବାକୁ ନିଷ୍ପତ୍ତି ହୋଇଛି। ଶ୍ରୀଗୁଣ୍ଡିଚା ମନ୍ଦିର ରତ୍ନ ବେଦୀ ଓ ରୋଷଘର ବ୍ୟାରିକେଟ କରାଯିବ। ଭକ୍ତ ଏଠାରେ ବୁଲିପାରିବେ ନାହିଁ। ଅନ୍ୟ ସମସ୍ତ ସ୍ଥାନ ଦେଖିପାରିବେ ବୋଲି ସେ କହିଛନ୍ତି। ପରିଚାଳନା କମିଟି ସଦସ୍ୟ ଦୁର୍ଗା ଦାସ ମହାପାତ୍ର କହିଛନ୍ତି, ବୈଠକରେ ସେବାୟତଙ୍କ ସୁବିଧା ପାଇଁ ମାଟିତୋଟା ପରିବର୍ତ୍ତେ ହରଚଣ୍ଡିସାହିର ୩.୧୮୩ ଏକର ଓ ମାଟିମଣ୍ଡପସାହିର ୨.୮୧୧ ଏକର ଜମିରେ ସେବକ ଆବାସ କରାଯିବାକୁ ନିଷ୍ପତ୍ତି ହୋଇଛି। ହରଚଣ୍ଡି ସାହିରେ ୨୨୪ ବାସଗୃହ ପ୍ରଥମେ କରାଯିବ। ପ୍ରତ୍ୟେକ ସେବାୟତଙ୍କ ନିମନ୍ତେ ଏଠାରେ ୨ଟା ରୁମ୍ ସହ ଅନ୍ୟାନ୍ୟ ବ୍ୟବସ୍ଥା କରାଯିବ। ସେହିପରି ଆସନ୍ତା ୫ ବର୍ଷ ପାଇଁ ଶ୍ରୀମନ୍ଦିରରେ କେଉଁ ସବୁ ଉନ୍ନତିକରଣ କାମ ଆବଶ୍ୟକ ସେନେଇ ଏଏସ୍‌ଆଇକୁ ଏକ ରିପୋର୍ଟ ଦେବାକୁ କୁହାଯାଇଛି। ଏଏସ୍‌ଆଇ ସୁପରିଣ୍ଟେଣ୍ଡେଣ୍ଟ ଆରକ୍ୟୁଲୋଜିଷ୍ଟ ଅରୁଣ ମଲ୍ଲିକ ରତ୍ନସିଂହାସନ ପଛରୁ ଖସି ପଡ଼ିଥିବା ପ୍ଲାଷ୍ଟର ସମ୍ପର୍କରେ କହିଛନ୍ତି, ଏହା ମନକୁ ଖସିନି କିମ୍ବା ଆଦ୍ରତା ଯୋଗୁ ଖସିନି। ଏହାକୁ ଖସାଇ ଦିଆଯାଇଛି। ପ୍ଲାଷ୍ଟର ଉପରେ କୌଣସି ଜିନିଷ ମାଡ଼ ହେବାରୁ ଏହା ଖସି ପଡ଼ିଛି। ପୂଜକମାନେ ଏହା ଜାଣିଥିବେ। ଏହି ପ୍ଲାଷ୍ଟର ବହୁତ ବର୍ଷ ତଳେ କରାଯାଇଥିଲା। ଏଭଳି ଘଟଣା ପୁଣି ଘଟିବନି ବୋଲି କହି ହେବନି। ଏନେଇ ଶ୍ରୀମନ୍ଦିର ପ୍ରଶାସନ ଯନ୍ତ୍ରୀମାନଙ୍କ ସହ ଆଲୋଚନା ହୋଇସାରିଛି। ଆସନ୍ତାବର୍ଷ ରଥଯାତ୍ରା ସମୟରେ ପୁଣି ଆବଶ୍ୟକ ମରାମତି କାମ ହେବ। ସେହିପରି ସେ ରତ୍ନ ଭଣ୍ଡାର ସମ୍ପର୍କରେ କହିଛନ୍ତି, ଏହାର ମରାମତି ନେଇ ଶ୍ରୀମନ୍ଦିର ପ୍ରଶାସନ କହିଲେ କରାଯିବ। ୨୦୧୮ରେ ରତ୍ନ ଭଣ୍ଡାର ଯାଞ୍ଚ ସମ୍ପୂର୍ଣ୍ଣ ହୋଇ ନ ଥିଲା।

କାଗଜକଲମରେ ଚାଲିଛି ମେଗା ଜଳଯୋଗାଣ ପ୍ରକଳ୍ପ ….!

!!! ରାୟଗଡ଼ ରୁ ଜିଲ୍ଲା ପ୍ରତିନିଧି ବଳରାମ ମଲ୍ଲିକ ଙ୍କ ରିପୋର୍ଟ !!!

ଏଥର ସମ୍ଭାଳ(ରାୟଗଡା)- କାଶୀପୁର ବ୍ଲକର ହଇଜା ରାଜ୍ୟ ସରକାରଙ୍କ ଚିନ୍ତା ବଢାଇଛି । ଏହି ବ୍ଲକରେ ବର୍ତ୍ତମାନ ଯେଉଁ ହଇଜା ବ୍ୟାପିଛି ତାହାର ମୂଳ କାରଣ ହେଲା ଦୁଷିତ ଜଳ । ଦଶ ଦଶନ୍ଧି ଧରି ଏହି ବ୍ଲକର ଲୋକଙ୍କୁ ବିଶୁଦ୍ଧ ପାଣି ମିଳୁନଥିବା କାରଣରୁ ବାଧ୍ୟ ହୋଇ ନଦୀ, ନାଳ , ଝରଣା ଓ ଅନ୍ୟନ୍ୟ ଜଳଉତ୍ସର ପାଣିକୁ ଜୀବନ ଧାରଣ ପାଇଁ ସିଧାସଳଖ ବ୍ୟବହାର କରୁଛନ୍ତି । କାଶୀପୁର ବକ୍ଲ ବାସୀ କଳାହାଣ୍ଡି ଜିଲ୍ଲା ଅଧିନରେ ଥିବା ସମୟରୁ ଆରମ୍ଭ କରି ଆଜି ପର୍ଯ୍ୟନ୍ତ ବିଶୁଦ୍ଧ ପାଣିଟିକିଏ ପାଇଁ ଡହଳ ବିକଳ ହେଉଛନ୍ତି । ପାଣି ସମସ୍ୟାର ସମାଧାନ ପାଇଁ ଯେଉଁ ଯୋଜନା ହୋଇଛି ତାହା କେବଳ ନାଲିଫିତା ତଳେ ସୀମିତ ରହିଛି । କାରଣ ଗତ ଏକ ବର୍ଷ ତଳେ କାଶୀପୁର ବ୍ଲକର ୨୪ ପଞ୍ଚାୟତ ଅନ୍ତର୍ଗତ ୪୨୫ ଗ୍ରାମକୁ ପାଇପ ଜଳ ଯୋଗାଣ ପାଇଁ ଏକ ବୃହତ ପ୍ରକଳ୍ପ ରାଜ୍ୟ ସରକାର ଠିକାଦାରଙ୍କ ସହିତ ଚୁକ୍ତି ନାମା ସ୍ଵାକ୍ଷର କରିଥିଲେ । ଏଥିସହ କାଶୀପୁର ବ୍ଲକକୁ ସଂଲଗ୍ନ ଥିବା ରାୟଗଡା ବ୍ଲକର ୪ ଟି ପଞ୍ଚାୟତ ଅନ୍ତର୍ଗତ ୪୯ ଟି ଗ୍ରାମକୁ ମଧ୍ୟ ଉକ୍ତ ପ୍ରକଳ୍ପରୁ ଜଳଯୋଗାଣ ହେବ ବୋଲି ଘୋଷଣା ହୋଇଥିଲା । ଏପରିକି ୨୦୧୮-୧୯ ମସିହାରେ ୨୯୮ କୋଟି ୬୯ ଲକ୍ଷ ୭୦ ହଜାର ଟଙ୍କା ବ୍ୟୟରେ ଏହି ମେଗା ଜଳ ଯୋଗାଣ ପ୍ରକଳ୍ପକୁ ରାଜ୍ୟ କେବିନେଟରେ ମଧ୍ୟ ମଞ୍ଜୁରି ମିଳିଥିଲା । ଏତଦ ବ୍ୟତିତ ଅନ୍ୟାନ୍ୟ ଆନୁଷଙ୍ଗିକ କାର୍ଯ୍ୟ ପାଇଁ ଅଧିକ ୪୦ କୋଟି ଟଙ୍କା ଖର୍ଚ ଅଟକଳ ମଧ୍ୟ ମଞ୍ଜୁର ହୋଇଥିଲା । ମୋଟ ୩୩୮ କୋଟି ୮୨ ଲକ୍ଷ ଟଙ୍କା ବ୍ୟୟରେ ଜଳ ଜୀବିକା ମିଶନ ଜରିଆରେ ଏହି ପ୍ରକଳ୍ପ ୩ ନଭେମ୍ବର ୨୦୨୩ ରେ ସାରିବାର ଲକ୍ଷ ଧାର୍ଯ୍ୟ ହୋଇଥିଲା । ଇତିମଧ୍ୟରେ ବର୍ଷେ ବିତିବାକୁ ବସିଥିବା ବେଳେ ମାଟି ତଳେ ପାଇପ ଖଣ୍ଡିଏ ମଧ୍ୟ ପୋତାଜାଇ ନାହିଁ । ଏଭଳିକି ଏକ ବର୍ଷ ପରେ ଏହି ପ୍ରକଳ୍ପର ସ୍ଥିତି ଯଥା ପୂର୍ବମ ତଥା ପରମ ରେ ରହିଯାଇଛି । ଏହି ପ୍ରସ୍ତାବିତ ମେଗା ପ୍ରକଳ୍ପ ପାଇଁ ନବରଙ୍ଗପୁର ଜିଲ୍ଲା ଇନ୍ଦ୍ରାବତୀ ନଦୀରୁ ଜଳ ଉଠାଯାଇ ପାଇପ ମାଧ୍ୟମରେ କାଶୀପୁର ବ୍ଲକର ୯୦ ପ୍ରତିଶତ ଗ୍ରାମକୁ ଜଳ ଯୋଗାଣ କରିବାର ଲକ୍ଷ ସରକାର ହାତକୁ ନେଇଛନ୍ତି ।

ଏହାଦ୍ଵାରା କାଶୀପୁର ବ୍ଲକ ଅଞ୍ଚଳରୁ ସବୁଦିନ ପାଇଁ ପାନୀୟ ଜଳ ସମସ୍ୟା ଦୁର ହେବା ସହ କଲେରା , ହଇଜା ଭଳି ମହାମାରୀରୁ କାଶୀପୁର ବାସୀଙ୍କୁ ନିସ୍ତାର ମିଳିବ । ହେଲେ ପ୍ରକଳ୍ପ କାର୍ଯ୍ୟର କଚ୍ଛପ ଗତି ଦେଖିଲେ ବିଶ୍ବାସ ହେଉନି ସମୟ ସୀମା ଭିତରେ ଲୋକଙ୍କୁ ବିଶୁଦ୍ଧ ପାଇପ ଜଳ ମିଳିପାରିବ । ଇନ୍ଦ୍ରାବତିରୁ ଜଳଉଠାଣ କରାଯାଇ ଲଦିଗୁଡା, କେ.ପଞ୍ଜରା ଗ୍ରାମର ବାଟଦେଇ ଆସିବ ଡଙ୍ଗାସିଲକୁ । ଡଙ୍ଗାସିଲ ଠାରେ ପ୍ରାୟ ୫ ଟି ବୃହତ ଟାଙ୍କିରେ ଜଳ ସଂରକ୍ଷଣ ହେବ । ସଂରକ୍ଷଣ ପରେ ତାହା ବିଶୋଧନ କରାଯାଇ ସେଠାରୁ ପାଇପ ମାଧ୍ୟମରେ ସମସ୍ତ ଗାଁ ମାନଙ୍କୁ ଶୁଦ୍ଧ ପାନୀୟ ଜଳ ପଠାଯିବ । ଏଥି ପାଇଁ ୧୦୦୦ କିଲୋମିଟର ବାଟ ପାଇପ ବିଛାଯାଇ ଜଳ ଯୋଗାଣ କରିବାର ଯୋଜନା ରହିଛି । ତେବେ ଠିକାଦାର ପାଇପ ନ ପକାଇ କେବଳ ରାସ୍ତାକଡରେ ପାଇପ ଗୁଡିକ ଗଛିତ ରଖି ପ୍ରଦର୍ଶନୀ କରୁଥିବା ଅଭିଯୋଗ ହୋଇଛି । ଏଭଳିକି ଡଙ୍ଗାସିଲ ଠାରେ ଟ୍ୟାଙ୍କ ନିର୍ମାଣକାର୍ଯ୍ୟ ମଧ୍ୟ ଆରମ୍ଭ ହୋଇନାହିଁ । ଏହିଭଳି ସ୍ଥିତି ଯଦି ଲାଗିରହେ ତେବେ ଆଉ ବର୍ଷକ ମଧ୍ୟରେ ଏହି ପ୍ରକଳ୍ପ ନିର୍ମାଣ ଶେଷ ହେବା ନେଇ ସନ୍ଦେହ ସୃଷ୍ଟିହୋଇଛି । ବର୍ତ୍ତମାନ ପରିସ୍ଥିତିରେ କଲେରା ମୃତ୍ୟୁର ତାଣ୍ଡବ ଲୀଳାକୁ ଦେଖି ନିଜ ମୁଣ୍ଡରୁ ଦାୟିତ୍ୱ ଖସାଇବା ନ୍ୟାୟରେ ଗ୍ରାମ୍ୟ ଜଳ ଯୋଗାଣ ବିଭାଗ କେବଳ ମିଥ୍ୟା ତଥ୍ୟ ପ୍ରଦାନ କରିବାରେ ଲାଗିଛି । ଗୋଟିଏ ପଟେ ସ୍ୱଛ ପାନୀୟ ଜଳ ପାଇନପାରି ଲୋକେ ରୋଗାକ୍ରାନ୍ତ ହେଉଛନ୍ତି । ଅନ୍ୟପଟେ ସ୍ୱଛ ଜଳପ୍ରଦାନ ପାଇଁ ସରକାର ଅନୁଦାନ ପ୍ରଦାନ କରିବାପରେ ମଧ୍ୟ ଗ୍ରାମ୍ୟ ଜଳ ଯୋଗାଣ ବିଭାଗର ଉଦାସୀନତା କାରଣରୁ ନିର୍ମାଣ ବିଳମ୍ବ ହେଉଛି । ତେବେ କିଛି ସ୍ଥାନରେ ଫରେଷ୍ଟ କ୍ଲିୟରାନ୍ସ ମିଳିନଥିବା କାରଣରୁ ନିର୍ମାଣ ଆଗେଇପାରୁ ନଥିବା ସୂଚନା ମଧ୍ୟ ହସ୍ତଗତ ହୋଇଛି । ଏ ସମ୍ପର୍କରେ ବିଭାଗୀୟ ନିର୍ବାହୀ ଯନ୍ତ୍ରୀ ଚିତରଞ୍ଜନ ଜେନା କହିଛନ୍ତି ଯେ, ନିର୍ମାଣ କାର୍ଯ୍ୟ ଜାରି ରହିଛି । ବହୁତ ଦୁରରୁ ଜଳ ଅଣାଯିବ, ତେଣୁ ଅଧିକ ଜ୍ଞାନକୌଶଳ ଅବଲମ୍ବନ କରାଯାଉଛି । ତେବେ ଦେଖିବାକୁ ବାକି ରହିଲା କେବେ ଏହି ଜଳଯୋଗାଣ ପ୍ରକଳ୍ପ କାର୍ଯ୍ୟକ୍ଷମ ହେବ ।

ଗୁଣୁପୁର ଅଦାଲତ ଭିତ୍ତିଭୂମି ବିକାଶ କରିବାକୁ ଦାବୀ…!

ଏଥର ସମ୍ଭାଳ ବ୍ୟୁରୋ(ଗୁଣୁପୁର)- ସ୍ଥାନୀୟ ଓକିଲ ସଂଘର ଏକ ପ୍ରତିନିଧି ଦଳ ଆଜି ଆଇନ ମନ୍ତ୍ରୀ ଜଗନ୍ନାଥ ସାରକା ଙ୍କୁ ସୌଜନ୍ୟମୂଳକ ସାକ୍ଷାତ କରି ଗୁଣୁପୁର ଅଦାଲତ ପରିସରରେ ଥିବା ଭିତ୍ତିଭୂମି ର ବିକାଶ, ନୂଆ କୋଠା ନିର୍ମାଣ ସହ ରାୟଗଡା ଠାରେ ଏକ ଆଇନ ମହାବିଦ୍ୟାଳୟ ଖୋଲିବା କୁ ପଦକ୍ଷେପ ନେବାକୁ ମନ୍ତ୍ରୀ ଙ୍କ ସହ ଆଲୋଚନା କରିଥିଲେ ।

ବରିଷ୍ଠ ଆଇନଜୀବୀ ବ୍ରହ୍ମାନନ୍ଦ ପଟ୍ଟନାୟକ, ଦେବୀ ପ୍ରସାଦ ଆଚାର୍ଯ୍ୟ, ଗୌରୀ ଦାଶ, ପ୍ରବୀଣ ପଟ୍ଟନାୟକ, ଗଣେଶ ପଣ୍ଡା , କୃଷ୍ଣ ସେନାପତି , ମୋନଜ ରତ୍ନ।ଲୁ ଓ ଜଗଦୀଶ ଶବର ଉପସ୍ଥିତ ଥିଲେ ।

ଜି ଆଇ ଇ ଟି ଵିଶ୍ଵବିଦ୍ୟାଳୟରେ ଖୋଲିଲା ବି.ଏସସି ନର୍ସିଂ ପାଠ୍ୟକ୍ରମ …!

!!! ରାୟଗଡା ଜିଲ୍ଲା ଗୁଣପୁର ରୁ ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଜୋଶୀ ଙ୍କ ରିପୋର୍ଟ !!!

ଏଥର ସମ୍ଭାଳ(ଗୁଣପୁର)- ଜି ଆଇ ଇ ଟି ଵିଶ୍ଵବିଦ୍ୟାଳୟ ଗୁଣୁପୁରରେ ଚଳିତ ବର୍ଷ ଠାରୁ ନୂତନ କରି ବି.ଏସସି ନର୍ସିଂ ପାଠ୍ୟକ୍ରମ ଆରମ୍ଭ ହୋଇଛି । ଓଡିଶା ନରସେସ ଏଣ୍ଡ ମିଡିୱ।ଇଭସ ରେଜିଷ୍ଟ୍ରସନ କାଉନସିଲ (odisha nurses & midwives registration council ) ପକ୍ଷରୁ ଚଳିତ ଶିକ୍ଷା ବର୍ଷ ୨୦୨୨-୨୩ ରେ ବି.ଏସସି ନର୍ସିଂ ପାଠ୍ୟକ୍ରମ ନିମନ୍ତେ ଜି ଆଇ ଇ ଟି ଵିଶ୍ଵବିଦ୍ୟାଳୟ କୁ ଅନୁମତି ପ୍ରଦାନ କରିଛନ୍ତି। ଉଚ୍ଚ କୋଟିର ଭିତ୍ତିଭୂମି, ଉଚ୍ଚମାନର ଶିକ୍ଷାଦାନ ଯୋଗୁଁ ଇଂଜିନିୟରିଂ, ,କୃଷିବିଜ୍ଞାନ, ମ୍ୟାନେଜମେଣ୍ଟ ପାଠ୍ୟକ୍ରମରେ ଗତ ପଚିଶି ବର୍ଷ ଧରି ଯେଉଁ ଉତ୍କୃଷ୍ଟତା ଏହି ଅନୁଷ୍ଠାନ ପ୍ରଦର୍ଶନ କରିଛି, ତାହାରି ଫଳରେ ରାଜ୍ୟ ସରକାର ଏବଂ ନର୍ସିଂ କାଉନସିଲ ଜି ଆଇ ଇ ଟି ବିଶ୍ଵବିଦ୍ୟାଳୟ କୁ ଏହି ପାଠ୍ୟକ୍ରମ ନିମନ୍ତେ ଓ.ଏନ.ଏମ.ଆର .ସି . ପତ୍ର ନଂ- ୨୩୯୯ ତା -୦୩-୦୮-୨୦୨୨ ଦ୍ୱାରା ବି.ଏସସି ନର୍ସିଂ ପାଠ୍ୟକ୍ରମ ପାଇଁ ୬୦ ସିଟ ପାଇଁ ଅନୁମତି ପ୍ରଦାନ କରିଛନ୍ତି /ଏହା ଜାଣି ଅବିଭାବକ ମହଲରେ ଆନନ୍ଦର ବାତାବରଣ ସୃଷ୍ଟି ହୋଇଛି / ପୂର୍ବରୁ ଏହି ଅଞ୍ଚଳର ଛାତ୍ରଛାତ୍ରୀ ମାନେ ବହୁ ଦୂରଦୁରାନ୍ତ ଯାଇ ଏହି ପାଠ ପଡୁଥିଲେ,ବର୍ତ୍ତମାନ ନିଜ ଜାଗାରେ ଏହି ସୁବିଧା ପାଇବେ l ଜି ଆଇ ଇ ଟି ବିଶ୍ୱବିଦ୍ୟାଳୟରେ ଯେଉଁ ଉଚ୍ଚ କୋଟିର ଶିକ୍ଷାଦାନ ସହ ନିଯୁକ୍ତି ସୁଯୋଗ କରାଯାଉଛି ସେହିପରି ଏହି ବି.ଏସସି ନର୍ସିଂ ର ଛାତ୍ରଛାତ୍ରୀ ମାନଙ୍କୁ ସେହିପରି ଉଚ୍ଚମାନର ଶିକ୍ଷାଦାନ କରାଯିବା ସହ ଦେଶବିଦେଶରେ ନିଯୁକ୍ତି କରାଯିବ ବୋଲି ଛାତ୍ରଛାତ୍ରୀ ଓ ଅଭିଭାବକ ଆଶା ରଖିଛନ୍ତି lଏହି ଅବସରରେ ରାଜ୍ୟ ସରକାର ଓ ନର୍ସିଂ କାଉନସିଲ କୁ ବିଶ୍ୱବିଦ୍ୟାଳୟର ସଭାପତି ଡ଼ଃ ସତ୍ୟ ପ୍ରକାଶ ପଣ୍ଡା, ଉପ ସଭାପତି ଡ଼ଃ ଚନ୍ଦ୍ର ଧ୍ୱଜ ପଣ୍ଡା, ମହା ନିର୍ଦେଶକ ଡ଼ ଜଗଦୀଶ ପଣ୍ଡା , ରେଜିଷ୍ଟ୍ରାର ଡ଼ ଏନ.ଭି .ଜେ.ରାଓ ପ୍ରମୁଖ କୃତଜ୍ଞତା ଜଣାଇଛନ୍ତି l ଚଳିତ ବର୍ଷ ବି.ଏସସି ନର୍ସିଂରେ ଆଡମିଶନ ନିମନ୍ତେ ଦରଖାସ୍ତ ଆହ୍ୱାନ କରାଯାଉଥିବା ସହ ଆସନ୍ତା ସେପ୍ଟେମ୍ବର ମାସରେ ପାଠପଢା ଆରମ୍ଭ କରାଯିବା ନେଇ ଅନୁଷ୍ଠାନ କତ୍ତୃପକ୍ଷ ସୂଚନା ଦେଇଛନ୍ତି ।

ମୋଦିଙ୍କ କଥା ରଖିଲେ ରାହୁଲ ଗାନ୍ଧି ….!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)-  ତ୍ରିରଙ୍ଗା ପତାକାକୁ ‘ଡିସ୍‌ପ୍ଲେ ପିକ୍‌ଚର୍‌’ ବା ଡିପି ରଖିବାକୁ ‘ମନ୍‌ କି ବାତ୍‌’ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମୋଦି ଦେଶବାସୀଙ୍କୁ  ଅନୁରୋଧ କରିଥିଲେ। ପ୍ରଧାନମନ୍ତ୍ରୀଙ୍କ କଥା ମାନି ଅନେକ ଦେଶବାସୀ ନିଜର ଡିପି ବଦଳାଇଥିବା ଦେଖିବାକୁ ମିଳୁଛି। ଏମିତି କି ପ୍ରତି କଥାରେ ମୋଦିଙ୍କ ବିରୋଧ କରୁଥିବା କଂଗ୍ରେସ ନେତା ରାହୁଲ ଗାନ୍ଧି ମଧ୍ୟ ପ୍ରଧାନମନ୍ତ୍ରୀଙ୍କ କଥା ରଖିଛନ୍ତି। ରାହୁଲ ଗାନ୍ଧି ନିଜ ଟ୍ୱିଟର ଓ ଫେସବୁକ ଆକାଉଣ୍ଟର ଡିପି ବଦଳାଇଛନ୍ତି। ପ୍ରୋଫାଇଲ ଫଟୋରେ ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହରୁ ଜାତୀୟ ପତାକା ଧରିଥିବା ଫଟୋ ରହିଛି। ଏହି ଫଟୋକୁ ଟ୍ୱିଟ୍‌ କରି ରାହୁଲ ଗାନ୍ଧି ଲେଖିଛନ୍ତି ଯେ, ତ୍ରିରଙ୍ଗା ହେଉଛି ଦେଶର ଗର୍ବ। ଏହା ପ୍ରତ୍ୟେକ ନାଗରିକଙ୍କ ହୃଦୟରେ ଅଛି। ରାହୁଲ ଗାନ୍ଧିଙ୍କ ଭଉଣୀ ପ୍ରିୟଙ୍କା ଗାନ୍ଧୀ ଭଦ୍ରା ମଧ୍ୟ ନିଜର ଡିପି ବଦଳାଇ ଜବାହରଲାଲ ନେହେରୁ ଜାତୀୟ ପତାକା ଧରିଥିବା ଫଟୋ ରଖିଥିବା ଦେଖିବାକୁ ମିଳିଛି। ଅଗଷ୍ଟ ୨ରୁ ଅଗଷ୍ଟ ୧୫ ପର୍ଯ୍ୟନ୍ତ ତ୍ରିରଙ୍ଗା ପତାକାକୁ ସାମାଜିକ ଗଣମାଧ୍ୟମ ‘ଡିସ୍‌ପ୍ଲେ ପିକ୍‌ଚର୍‌’ କରିବାକୁ ପ୍ରଧାନମନ୍ତ୍ରୀ କହିଥିଲେ। ‘ସ୍ୱାଧୀନତାର ଅମୃତ ମହୋତ୍ସବ ଅବସରରେ ଅଗଷ୍ଟ ୧୩ରୁ ଅଗଷ୍ଟ ୧୫, ତିନି ଦିନ ଯାଏଁ ‘ହର୍‌ ଘର୍‌ ତ୍ରିରଙ୍ଗା’ କାର୍ଯ୍ୟକ୍ରମ ମଧ୍ୟ ଆୟୋଜନ କରାଯିବ।

ଅଗଷ୍ଟ ୮ ଯାଏ ଇଡି ହେପାଜତରେ ରହିବେ ସଞ୍ଜୟ ରାଉତ …!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ପାତ୍ରା ଚୌଲ ଜମି ଦୁର୍ନୀତି ଘଟଣାରେ ଗିରଫ ହୋଇଥିବା ଶିବସେନା ସାଂସଦ ସଞ୍ଜୟ ରାଉତଙ୍କୁ କୌଣସି ପ୍ରକାରର ଆଶ୍ୱସ୍ତି ମିଳିନି। ତାଙ୍କ ରିମାଣ୍ଡ ଅବଧିକୁ ଆଜି ମୁମ୍ବାଇର ଗୋଟିଏ କୋର୍ଟ ଆସନ୍ତା ୮ ତାରିଖ ଯାଏ ବୃଦ୍ଧି କରିଛନ୍ତି। ଏହାର ଅର୍ଥ ଅଗଷ୍ଟ ୮ ଯାଏ ସଞ୍ଜୟ ରାଉତ ଇଡି ହେପାଜତରେ ରହି ଜେରାର ସମ୍ମୁଖୀନ ହେବେ। ଗୋରେଗାଓଁ ଉପକଣ୍ଠରେ ଥିବା ପାତ୍ରା ଚୌଲର ନିବୀକରଣ ନାଁରେ ଦୁର୍ନୀତି ହୋଇଥିବା ଇଡି ଅଭିଯୋଗ କରିଛି। ଏଥିପାଇଁ ରବିବାର ମଧ୍ୟରାତ୍ରରେ ଇଡି ସଞ୍ଜୟ ରାଉତଙ୍କୁ ଗିରଫ କରିଥିଲା। ସେବେଠାରୁ ସେ ଇଡି ହେପାଜତରେ ରହିଛନ୍ତି। ରବିବାର ଗିରଫ ପରେ ସୋମବାର ସକାଳୁ ଇଡିର ଅଧିକାରୀମାନେ ସଞ୍ଜୟ ରାଉତଙ୍କୁ ପିଏମଏଲଏ କୋର୍ଟର ବିଚାରପତି ଏମସି ଦେଶପାଣ୍ଡେଙ୍କ ଆଗରେ ହାଜର କରି ୮ ଦିନର ରିମାଣ୍ଡ ପାଇଁ ଆବେଦନ କରିଥିଲେ। ହେଲେ କୋର୍ଟ ତାଙ୍କୁ ଅଗଷ୍ଟ ୪ ଯାଏ ରିମାଣ୍ଡରେ ପଠାଇଥିଲେ। ଆଜି ଏହି ଅବଧି ଶେଷ ହେଉଥିବାରୁ ଶ୍ରୀ ରାଉତଙ୍କୁ ପୁଣି କୋର୍ଟରେ ହାଜର କରାଯାଇଥିଲା। ଏଥିସହ ଆଉ ୪ ଦିନର ରିମାଣ୍ଡ ଆବେଦନ କରାଯାଇଥିଲା। କୋର୍ଟ ଏହାକୁ ଅନୁମତି ଦେଇଛନ୍ତି। ପାତ୍ରା ଚୌଲ ଜମି ଦୁର୍ନୀତି ଘଟଣାରେ ରାଉତ ଓ ତାଙ୍କ ପରିବାର ସଦସ୍ୟ ୧ କୋଟି ଟଙ୍କାର ଫାଇଦା ହାସଲ କରିଥିବା ଇଡି କହିଛି। ଏହି ଟଙ୍କାରେ ସଞ୍ଜୟ ରାଉତ ଆଉ କିଛି ସ୍ଥାନରେ ବିଲଡିଂ କିଣିଥିବାରୁ ଇଡି ଏହାକୁ ସିଜ ମଧ୍ୟ କରିଛି।

ସଂସଦ ଚାଲିଥିବା ବେଳେ ମତେ ଇଡି କେମିତି ସମନ କଲା – ମଲ୍ଲିକାର୍ଜୁନ ଖାଡ଼ଗେ

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ସଂସଦରେ ନ୍ୟାସନାଲ ହେରାଲଡ୍‌ ମାମଲାର ତାତି। ଏହି  ମାମଲାରେ ଇଡିର ଗୋଟିଏ ପରେ ଗୋଟିଏ ପଦକ୍ଷେପକୁ ନେଇ କଂଗ୍ରେସ ଛାନିଆ ହୋଇପଡ଼ିଥିବା ବେଳେ ପ୍ରସଙ୍ଗ ଏବେ ସଂସଦରେ ଉଠିଛି। ପ୍ରଥମେ ରାହୁଲ ଗାନ୍ଧି, ପରେ ସୋନିଆ ଗାନ୍ଧି ଏବଂ ଏବେ ମଲ୍ଲିକାର୍ଜୁନ ଖାଡ଼ଗେଙ୍କୁ ଇଡି ସମନ କରିବା ପରେ ରାଜନୀତି ଜୋର ଧରିଛି। ଆଜି ସଂସରେ ଏହି ପ୍ରସଙ୍ଗକୁ କଂଗ୍ରେସ ସଦସ୍ୟ ମାନେ ଉଠାଇ ପ୍ରବଳ ହୋହଲ୍ଲା କରିଥିଲେ । ଆଜି ରାଜ୍ୟସଭାରେ କଂଗ୍ରେସ ସାଂସଦ ମଲ୍ଲିକାର୍ଜୁନ ଖାଡ଼ଗେ କହିଛନ୍ତି ଯେ, ଯେତେବେଳେ ସଂସଦରେ ଅଧିବେଶନ ଚାଲିଛି ସେମାନେ କେମିତି ସମନ କରୁଛନ୍ତି । ଗତକାଲି ଇଡି ପକ୍ଷରୁ ନ୍ୟାସନାଲ ହେରାଲ୍ଡ ପରିସରେରେ ଥିବା ୟଙ୍ଗ ଇଣ୍ଡିଆନ୍‌ କାର୍ଯ୍ୟାଳୟକୁ ସିଲ କରାଯାଇଛି।  ଉକ୍ତ କମ୍ପାନୀର ମଲ୍ଲିକାର୍ଜୁନ ଖାଡ଼ଗେ ହେଉଛନ୍ତି ସ୍ୱୀକୃତିପ୍ରାପ୍ତ ପ୍ରତିନିଧି। ଗତକାଲି ସେ ଅଫିସରେ ନଥିବା ବେଳେ ଉକ୍ତ ଅଫିସକୁ ସିଲ କରାଯାଇଥିଲା। ସେ ଅଫିସରେ ଉପସ୍ଥିତ ରହି ସର୍ଚ୍ଚ ଅପରେସନକୁ ସହଯୋଗ କଲେ ଏହି କଟକଣା ପ୍ରତ୍ୟାହାର କରାଯିବ ବୋଲି ଇଡି ପକ୍ଷରୁ କୁହାଯାଇଛି।  କିନ୍ତୁ  ଇଡିର ଟାଇମିଂକୁ ନେଇ ଖାଡ଼ଗେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେ, ଆଜି ମୋତେ(ଗୁରୁବାର) ଦିନ ୧୨ଟା ୩୦ରେ ଇଡିରେ ହାଜର ହେବା ପାଇଁ ନୋଟିସ ହୋଇଛି। ମୁଁ ଆଇନକୁ ସମ୍ମାନ ଦେବାକୁ ଚାହେଁ।  କିନ୍ତୁ ବର୍ତ୍ତମାନ ସମନ କରିବା ଉପଯୁକ୍ତ ସମୟ କି ବୋଲି  ସେ ପ୍ରଶ୍ନ କରିଛନ୍ତି। ସଂସଦ ଅଧିବେଶନ ସମୟରେ ଜଣେ ସାଂସଦକୁ କେମିତି ସମନ କରାଯାଉଛି ବୋଲି ସେ ପ୍ରଶ୍ନ ଉଠାଇଛନ୍ତି।  ଅନ୍ୟପଟେ କଂଗ୍ରେସ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସ୍ୱେଚ୍ଛାଚାରୀ ସରକାରକୁ ଡରେନାହିଁ ବୋଲି  ରାହୁଲ ଗାନ୍ଧି କହିଛନ୍ତି। ରାହୁଲ୍‌ ଗାନ୍ଧି କହିଛନ୍ତି, ଆମେ ଡରିବୁ ନାହିଁ। ତାଙ୍କର ଯାହା କରିବା କଥା କରନ୍ତୁ, କିଛି ଯାଏଆସେ ନାହିଁ। ଟିକେ ଚାପ ପ୍ରୟୋଗ କଲେ ଆମେ ଚୁପ୍‌ ହୋଇଯିବୁ ବୋଲି ସେମାନେ ଭାବୁଛନ୍ତି। ଆମେ ଚୁପ୍‌ ହେବୁନାହିଁ। ବିଜେପି ଯାହା କରୁଛି, ଆମେ ତା’ର ବିରୋଧ କରିବୁ। ଆମେ ଭୟଭୀତ ହେବୁନାହିଁ ବୋଲି ସେ କହିଛନ୍ତି।

ୟଙ୍ଗ ଇଣ୍ଡିଆନ୍‌ ଅଫିସ୍‌କୁ ଇଡିର ସିଲ ପରେ କଂଗ୍ରେସର ଜରୁରୀ ବୈଠକ…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- କଂଗ୍ରେସ ଦ୍ୱାରା ପରିଚାଳିତ ନ୍ୟାସନାଲ ହେରାଲଡ୍‌ ଭବନରେ ଥିବା ୟଙ୍ଗ ଇଣ୍ଡିଆନ୍‌ ଅଫିସ୍‌କୁ ଇଡି ସିଲ କରିବା ପରେ ଦଳକୁ ଶକ୍ତ ଝଟ୍‌କା ଲାଗିଛି।  ଇଡିର କାର୍ଯ୍ୟାନୁଷ୍ଠାନକୁ ନେଇ ଦଳୀୟ ମହଲରେ ଅସନ୍ତୋଷ ତେଜି‌ଥିବା ବେଳେ ଆଜି ପରବର୍ତ୍ତୀ ରଣନୀତି ନେଇ ବୈଠକ ବସିବ। ନ୍ୟାସନାଲ ହେରାଲଡ୍‌ ଘଟଣାରେ ମନିଲଣ୍ଡରିଂ ମାମଲାରେ ତଦନ୍ତ କରୁଥିବା ଇଡି ପୂର୍ବରୁ କଂଗ୍ରେସ ନେତା ରାହୁଲ ଗାନ୍ଧି ଓ ମା ସୋନିଆ ଗାନ୍ଧିଙ୍କୁ ଜେରା କରିସାରିଛି।  ଏବେ ଏହି ଘୋଟାଲାରେ ଇଡିର ଗୋଟିଏ ପରେ ଗୋଟିଏ ପଦକ୍ଷେ୪ ଦଳକୁ ଅଡ଼ୁଆ ପକାଇଛି। ତେଣୁ ଇଡି ଏବଂ କେନ୍ଦ୍ର ସରକାରଙ୍କୁ ମୁକାବିଲା ପାଇଁ ଆଜି କଂଗ୍ରେସ ପକ୍ଷରୁ ଉଭୟ ଦଳୀୟ ଲୋକସଭା ସଦସ୍ୟ ଏବଂ ରାଜ୍ୟ ସଭା ସଦସ୍ୟଙ୍କୁ ବୈଠକ ପାଇଁ ଡକାଯାଇଛି। ତେବେ କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହେବା ଆଶଙ୍କାରେ ଦିଲ୍ଲୀର ୨୪-ଆକବର ରୋଡ଼ରେ ଥିବା  ମୁଖ୍ୟ କଂଗ୍ରେସ କାର୍ଯ୍ୟାଳୟ ସମ୍ମୁଖରେ ଅତିରିକ୍ତ ପୁଲିସ ଫୋର୍ସ ମୁତୟନ କରାଯାଇଛି। ସେହିପରି ୧୦ ଜନପଥରେ ଥିବା କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧିଙ୍କ ବାସଭବନ ଆଗରେ ମଧ୍ୟ ସୁରକ୍ଷା ବ୍ୟବସ୍ଥାକୁ ବଢ଼ାଇ ଦିଆଯାଇଛି। ଏଆଇସିସସି ହେଡ୍‌କ୍ୱାର୍ଟର ଅଭିମୁଖେ ରାସ୍ତାକୁ ଦିଲ୍ଲୀ ପୁଲିସ ସିଲ କରିଦେଇଛି। ସେହିପରି ଆଜି ସଂସଦରେ କଂଗ୍ରେସ ଏମପିମାନେ ଆଡଜର୍ଣ୍ଣମେଣ୍ଟ ନୋଟିସ ଦେବାର କାର୍ଯ୍ୟକ୍ରମ ରହିଛି। ଏକ ସାମ୍ବାଦିକ ସମ୍ମିଳିନୀ କରି କଂଗ୍ରେସ ନେତା ଅଜୟ ମାକେନ କହିଛନ୍ତି ଯେ, ସେମାନେ ଡିସିପିଙ୍କଠାରୁ ଏକ ଚିଠି ପାଇଛନ୍ତି। ସେଥିରେ ଲେଖା ଅଛି ଯେ, ଅଗଷ୍ଟ ୫ ତାରିଖରେ ଦଳ ବିକ୍ଷୋଭ କରିପାରିବ ନାହିଁ। ଏହା ଗଣତନ୍ତ୍ରର ହତ୍ୟା ବୋଲି ସେ କହିଛନ୍ତି। ସୂଚନା ଅନୁଯାୟୀ ବୁଧବାର ନ୍ୟାସନାଲ ହେରାଲଡ୍ ଅର୍ଥ ହେରଫେର ମାମଲାରେ ଇଡି ହେରାଲଡ ଅଫିସ ସମେତ ୧୨ଟି ସ୍ଥାନରେ ଚଢ଼ଉ କରିଥିଲା।  ବୁଧବାର ହେରାଲ୍‌ଡ ଭବନକୁ ସିଲ୍ କରିଦେଇଛି। ସେହିପରି ପୁଲିସ ଉପସ୍ଥିତିରେ ‌ହେରାଲ୍‌ଡ ଭବନରେ ଥିବ‌ା ୟଙ୍ଗ ଇଣ୍ଡିଆନ୍ ଅଫିସକୁ ସିଲ୍ କରି ଦେଇଛି। କଂଗ୍ରେସ ନେତାମାନେ ସରକାରଙ୍କର ଏଭଳି ପଦକ୍ଷେପର ସମାଲୋଚନା କରିଛନ୍ତି।

ଯେଉଁମାନେ ୫୨ ବର୍ଷ ଧରି ତ୍ରିରଙ୍ଗା ଉଡ଼ାଇ ନଥିଲେ ସେମାନେ ଆଜି ହର ଘର ତ୍ରିରଙ୍ଗା ଅଭିଯାନ କରୁଛନ୍ତି – ରାହୁଲ ଗାନ୍ଧି

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ତ୍ରିରଙ୍ଗା ଅଭିଯାନକୁ ନେଇ ଟାର୍ଗେଟ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧି। ବିଜେପି ପକ୍ଷରୁ  ‘ହର ଘର ତ୍ରିରଙ୍ଗା କାର୍ଯ୍ୟକ୍ରମ’କୁ ନେଇ ତେରଛା ବାଣ ମାରିଛନ୍ତି ରାହୁଲ। ଜାତୀୟ ପତାକା ପ୍ରତି ଦଳର ପକୃତ ଆନ୍ତରିକତାରକୁ ନେଇ ସେ ପ୍ରଶ୍ନ ଉଠାଇଛନ୍ତି।  ସେ ସିଧାସଳଖ ବିଜେପି ସହ ଜଡ଼ିତ ଆରଏସଏସକୁ ଆକ୍ଷେପ କରିଛନ୍ତି। ସେ କହିଛନ୍ତି ଯେ, ଆଜି ଯେଉଁମାନେ ‘ହର ଘର ତ୍ରିରଙ୍ଗା’ ଅଭିଯାନ ଆରମ୍ଭ କରିଛନ୍ତି ଇତିହାସ ସାକ୍ଷୀ ଅଛି ସେମାନେ ଆରଏସଏସ ସଙ୍ଗଠନରୁ ଆସିଛନ୍ତି।  ଯେଉଁମାନେ ୫୨ ବର୍ଷ ହେବ ତ୍ରିରଙ୍ଗା ଉଡ଼ାଇ ନାହାନ୍ତି। କର୍ଣ୍ଣାଟକର ହୁବୁଲି ଜିଲ୍ଲାର ଏକ କାର୍ଯ୍ୟକ୍ରମରେ ଯୋଗ ଦେଇ ଏହା କହିଛନ୍ତି ରାହୁଲ ଗାନ୍ଧି। କର୍ଣ୍ଣାଟକର ଖଦିଗ୍ରାମରେ ରାହୁଲ ଗାନ୍ଧି ପରିଦର୍ଶନ କରିବା ସହ ସେଠାରେ ତିଆରି ହେଉଥିବା ଜାତୀୟ ପତାକାକୁ ସେ ଇସ୍ତ୍ରୀ କରୁଥିବା ଫଟୋ ସେ ତାଙ୍କ ସୋଶାଲ ମିଡିଆରେ ପୋଷ୍ଟ କରିଛନ୍ତି। ଖଦିଗ୍ରାମ ବୁଲି ସବୁ କର୍ମଚାରୀଙ୍କୁ ଭେଟି ସେ ଖୁବ ଆନନ୍ଦିତ ବୋଲି ରାହୁଲ ଗାନ୍ଧି କହିଛନ୍ତି । ସେ ଅହୁରି କହିଛନ୍ତି ଯେ, ଏଇ ତ୍ରିରଙ୍ଗା ଉଡ଼ାଇବା ପାଇଁ ଲକ୍ଷ ଲକ୍ଷ ଭାରତୀୟ  ତ୍ୟାଗ ଓ ବଳିଦାନ ଦେଇଛନ୍ତି। କିନ୍ତୁ କେବଳ ଗୋଟିଏ ସଙ୍ଗଠନ ଏହି ତ୍ରିରଙ୍ଗାକୁ ମାନିବାକୁ ଅଗ୍ରାହ୍ୟ କରି ଆସୁଥିଲା। ୫୨ ବର୍ଷ ଧରି ନାଗପୁର ମୁଖ୍ୟ କାର୍ଯ୍ୟାଳୟରେ ତ୍ରିରଙ୍ଗା ଉଡ଼ିନଥିବା ସେ କହିଛନ୍ତି। ସେମାନେ ଲଗାତାର ଧରି ଏହି  ଜାତୀୟ ପତାକାକୁ ଅପମାନ କରିଛନ୍ତି।  ଆଜି ସେଇ ସଙ୍ଗଠନରୁ ଆସିଥିବା ଲୋକମାନେ ତ୍ରିରଙ୍ଗାର ଇତିହାସ ବିଷୟରେ କହୁଛନ୍ତି। ସେମାନେ ହର ଘର ତ୍ରିରଙ୍ଗା ଅଭିଯାନ ଚଳାଇଛନ୍ତି। କାହିଁକି ଆରଏସଏସ ୫୨ ବର୍ଷ ଧରି ନାଗପୁର କାର୍ଯ୍ୟାଳୟରେ ତ୍ରିରଙ୍ଗା ଉଡ଼ାରଇ ନଥିଲେ ବୋଲି ସେ ପ୍ରଶ୍ନ କରିଛନ୍ତି। ନିଜ ପେଟପାଟଣା ଲାଗି ଖଦି ବୋର୍ଡ଼ ପକ୍ଷରୁ ଯେଉଁ ଜାତୀୟ ପତାକା ତିଆରି କରାଯାଉଛି ତାକୁ କାହିଁକି ନଷ୍ଠ କରାଯାଉଥିଲା ବୋଲି ସେ ପ୍ରଶ୍ନ କରିଛନ୍ତି। ସେମାନେ ଦେଶର ମୁକ୍ତି ଆନ୍ଦୋଳନରେ କଂଗ୍ରେସକୁ ଅଟାକି ପାରି ନଥିଲେ। ନ୍ୟାସନାଲ ହେରାଲ୍ଡ ମାମଲାରେ ଇଡିର କାର୍ଯ୍ୟାନୁଷ୍ଠାନ ପରେ ରାହୁଲ ଗାନ୍ଧିଙ୍କ ଏହି ବୟାନ ଆସିଛି। ସୂଚନା ଅନୁଯାୟୀ, ଅଗଷ୍ଟ ୨ରୁ ଅଗଷ୍ଟ ୧୫ ପର୍ଯ୍ୟନ୍ତ ତ୍ରିରଙ୍ଗା ପତାକାକୁ ସାମାଜିକ ଗଣମାଧ୍ୟମ ‘ଡିସ୍‌ପ୍ଲେ ପିକ୍‌ଚର୍‌’ କରିବାକୁ ପ୍ରଧାନମନ୍ତ୍ରୀ କହିଥିଲେ। ‘ସ୍ୱାଧୀନତାର ଅମୃତ ମହୋତ୍ସବ ଅବସରରେ ଅଗଷ୍ଟ ୧୩ରୁ ଅଗଷ୍ଟ ୧୫, ତିନି ଦିନ ଯାଏଁ ‘ହର୍‌ ଘର୍‌ ତ୍ରିରଙ୍ଗା’ କାର୍ଯ୍ୟକ୍ରମ ମଧ୍ୟ ଆୟୋଜନ କରାଯିବ।