ବଲାଙ୍ଗିରରେ ଆରମ୍ଭ ହେଲା ‘ସୁକୁନ’ କାର୍ଯ୍ୟକ୍ରମ…!

ଏଥର ସମ୍ଭାଳ ବ୍ୟୁରୋ(ବଲାଙ୍ଗିର)- ଗରିବ ମୁହଁରେ ଫୁଟିବ ହସ। ଏଣିକି ସେମାନଙ୍କୁ ମିଳିବ ମାଗଣା ପୋଷାକ। ବଲାଙ୍ଗିର ସେଞ୍ଚୁରିଆନ୍ ୟୁନିଭର୍ସିଟି ଓ ଜେଆଇଟିଏମ୍ କଲେଜର ମିଳିତ ଉଦ୍ୟମରେ ‘ସୁକୁନ’ ନାମକ ଏକ କାର୍ଯ୍ୟକ୍ରମର ଶୁଭାରମ୍ଭ କରିଯାଇଛି। ଏଥିରେ ସ୍କୁଲ୍ ତଥା କଲେଜର ଛାତ୍ରଛାତ୍ରୀମାନେ ନୂଆ-ପୁରୁଣା ପୋଷାକ ଦାନ କରିବେ। ସେହି ପୋଷାକକୁ ଗରିବ ଲୋକଙ୍କୁ ଦାନ କରାଯିବ। ବଲାଙ୍ଗିର ବସ୍ ଟର୍ମିନାଲରେ ଏହି ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ମୁଖ୍ୟଅତିଥି ଭାବେ ଜିଲ୍ଲାପାଳ ଚଞ୍ଚଳା ରାଣା ଯୋଗଦେଇଥିଲେ। ଏହାସହ କାର୍ଯ୍ୟକ୍ରମରେ ଅନ୍ୟ ଆକ୍ଟିଭିଟି ତଥା ସହରକୁ ଡ୍ରଗ୍ସ ଫ୍ରି କରିବା ପାଇଁ ଏକ ହ୍ୟୁମାନ ଚେନ୍ କରାଯାଇଥିଲା। କେବଳ ଏତିକି ନୁହେଁ, ଆଜାଦିକା ଅମୃତ ମହୋତ୍ସବ ପାଳନ ଅବସରରେ ଛାତ୍ରଛାତ୍ରୀମାନେ ଜାତୀୟ ପତାକା ଉଡ଼ାଇଥିଲେ। ଏହି କାର୍ଯ୍ୟକ୍ରମ ଫଳରେ ଛାତ୍ରଛାତ୍ରୀଙ୍କ ମଧ୍ୟରେ ଦାନଭାବ ବୃଦ୍ଧି ହେବ। ଏହାଦ୍ୱରା ସେମାନେ ଦୁଃଖୀ-ଗରିବଙ୍କ ସାହାଯ୍ୟ ମଧ୍ୟ କରିପାରିବେ। କଲେଜର ଏହି ନିଆରା ପ୍ରୟାସକୁ ଜିଲ୍ଲାପାଳଙ୍କ ସମେତ ଅଞ୍ଚଳବାସୀ ଭୁରି ଭୁରି ପ୍ରଶଂସା କରିଛନ୍ତି। ତେବେ ଛାତ୍ରଛାତ୍ରୀଙ୍କ ଏହି ଛୋଟ ପ୍ରୟାସ ଦ୍ୱାରା ଅନେକ ଗରିବ ଉପକୃତ ହେବେ ବୋଲି ଆଶା କରାଯାଉଛି। ଅନ୍ୟପକ୍ଷେ ନୂଆ ପୋଷାକ ପାଇ ଗରିବମାନେ ବେଶ୍ ଖୁସି ଥିବା କହିଛନ୍ତି।

୯ ଦୁର୍ନୀତିଖୋର ଅଧିକାରୀଙ୍କ ବିରୋଧରେ ବଡ଼ କାର୍ଯ୍ୟାନୁଷ୍ଠାନ…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ପୁଣିଥରେ ଦୁର୍ନୀତିଖୋର ଓ ଅପାରଗ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ରାଜ୍ୟ ସରକାର। ଏଥର ୯ ଜଣ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ୫ଜଣ ଅଧିକାରୀଙ୍କୁ ବାଧ୍ୟତାମୂଳକ ଅବସର ଦିଆଯାଇଥିବା ବେଳେ ୨ ଜଣଙ୍କୁ ଚାକିରୀରୁ ବହିଷ୍କାର କରାଯାଇଛି। ସେହିପରି ଅନ୍ୟ ୨ଜଣ ଅଧିକାରୀଙ୍କ ପେନସନକୁ ସ୍ଥାୟୀ ଭାବେ ବନ୍ଦ କରାଯାଇଛି। କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଅଧିକାରୀଙ୍କ ମଧ୍ୟରେ ଜଣେ ସୁପରିନ୍ଟେଣ୍ଡିଂ ଇଞ୍ଜିନିୟର, ୨ ଜଣ ଏକଜିକ୍ୟୁଟିଭ ଇଞ୍ଜିନିୟର, ୨ ଜଣ ଆସିଷ୍ଟାଣ୍ଟ ଇଞ୍ଜିନିୟର, ଜଣେ ଜୁନିୟର ଇଞ୍ଜିନିୟର, ଜଣେ ଓଏଏସ୍ ଅଧିକାରୀ, ଜଣେ ଜିଲ୍ଲା ମୁଖ୍ୟ ପ୍ରାଣୀଧନ ଅଧିକାରୀ ଓ ଏବଂ ଜଣେ ସାମାଜିକ ଶିକ୍ଷା ସଂଗଠକ ରହିଛନ୍ତି। ପୂର୍ବରୁ ମଧ୍ୟ ୧୬୪ ଜଣ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇଥିବା ବେଳେ ଏବେ ଆଉ ୯ ଜଣଙ୍କ ବିରୋଧରେ ସମାନ ପଦକ୍ଷେପ ଗ୍ରହଣ କରାଯାଇଛି। ଏହାକୁ ମିଶାଇ ଏଯାଏ ୧୭୩ ଜଣ ଅଧିକାରୀଙ୍କ ବିରୋଧରେ ରାଜ୍ୟ ସରକାର କାର୍ଯ୍ୟାନୁଷ୍ଠାନ ଗ୍ରହଣ କରି ସାରିଲେଣି। ବାଧ୍ୟତାମୂଳକ ଅବସର ଦିଆଯାଇଥିବା ୫ ଜଣ ଅଧିକାରୀଙ୍କ ମଧ୍ୟରେ ଅଛନ୍ତି ମାଲକାନଗିରିର ଗ୍ରାମ୍ୟ ଉନ୍ନୟନ ଡିଭିଜନ-୧ର ପୂର୍ବତନ ସୁପରିଟେଣ୍ଡିଂ ଇଞ୍ଜିନିୟର ଆଶିଷ କୁମାର ଦାଶ। କଣ୍ଟ୍ରାକ୍ଟରମାନଙ୍କ ଠାରୁ ବେଆଇନ ଭାବେ ସେ ୧୦.୨୩ ଲକ୍ଷ ଟଙ୍କା ନେଇ ଯାଉଥିବା ବେଳେ ଭିଜିଲାନ୍ସ ହାତରେ ଧରା ପଡ଼ିଥିଲେ। ବିଭିନ୍ନ ସ୍ଥାନରେ ଥିବା ତାଙ୍କ ଘର ଉପରେ ଚଢଉ କଲା ପରେ ୮.୬୩ କୋଟି ଟଙ୍କାର ସଂପତ୍ତି ଓ ୧.୪ କୋଟି ଟଙ୍କାର ନଗଦ ଟଙ୍କା ଭିଜିଲାନ୍ସ ଠାବ କରିଥିଲା। ବେଆଇନ ଓ ଦୁର୍ନୀତି କାମ କରିଥିବାରୁ ତାଙ୍କୁ ବାଧ୍ୟତାମୂଳକ ଅବସର ଦିଆଯାଇଛି। ସେହିପରି ଭଦ୍ରକ ଗ୍ରାମ୍ୟ ଉନ୍ନୟନ ଡିଭିଡନ-୧ର ପୂର୍ବତନ ଏକଜିକ୍ୟୁଟିଭ ଇଞ୍ଜିନିୟର ମାନସ ରଂଜନ ମହାନ୍ତିଙ୍କୁ ମଧ୍ୟ ବାଧ୍ୟତାମୂଳକ ଅବସର ଦିଆଯାଇଛି। ଜଣେ କଣ୍ଟ୍ରାକ୍ଟରଙ୍କ ଠାରୁ ୩୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ସେ ଭିଜିଲାନ୍ସ ହାତରେ ଧରା ପଡ଼ିଥିଲେ। ଏହାସହ ତାଙ୍କ ପାଖରୁ ୩,୯୦ କୋଟି ଟଙ୍କାର ଆୟ ବହିର୍ଭୁତ ସମ୍ପତ୍ତି ଜବତ କରାଯାଇଥିଲା। ତାଙ୍କ ବିରୁଦ୍ଧରେ ଦୁଇଟି ବିଭାଗୀୟ ତଦନ୍ତ ମଧ୍ୟ ଚାଲିଥିଲା। କଟକ ଗଣ୍ଡରପୁର ଡ୍ରେନେଜ୍ ଡିଭିଜନର ଏକଜିକ୍ୟୁଟିଭ ଇଞ୍ଜିନିୟର ହେଉଛନ୍ତି ମନୋଜ କୁମାର ବେହେରା। ସେ ଓ ତାଙ୍କ ପତ୍ନୀଙ୍କ ନାମରେ ୪.୨୬ କୋଟିରୁ ଅଧିକ ଟଙ୍କାର ଆୟବହିର୍ଭୁତ ସଂପତ୍ତି ରହିଥିବା ନେଇ ଅଭିଯୋଗ ପରେ ଭିଜିଲାନ୍ସରେ ମାମଲା ହୋଇଥିଲା। ଏଥିପାଇଁ ମନୋଜ ବେହେରାଙ୍କୁ ବାଧ୍ୟମୂଳକ ଅବସର ଦିଆଯାଇଛି। କେନ୍ଦୁଝର ଜିଲ୍ଲା ସାଳପଡ଼ା ସ୍ଥିତ ବୈତରଣୀ ଜଳସେଚନ ଡିଭିଜନର ଆସିସଷ୍ଟାଣ୍ଟ ଇଞ୍ଜିନିୟର ଉମେଶ କୁମାର ଶାଶିନୀଙ୍କ ବିରୁଦ୍ଧରେ ୧.୪୨ କୋଟିରୁ ଅଧିକ ଟଙ୍କାର ଆୟବହିର୍ଭୁତ ସଂପତ୍ତି ଥିବା ଜଣାପଡ଼ିଛି। ଏଥିପାଇଁ ତାଙ୍କୁ ମଧ୍ୟ ବାଧ୍ୟତାମୂଳକ ଅବସର ଦିଆଯାଇଛି। ଉମରକୋଟ ସଡ଼କ ଓ କୋଠାବାଡ଼ି (R&B Section)ର ଆସିସଷ୍ଟାଣ୍ଟ ଇଞ୍ଜିନିୟର ବିଶୁଦ୍ଧାନନ୍ଦ ବେହେରାଙ୍କ ନାମରେ ନିମ୍ନମାନର କାମ କରିବାର ଅଭିଯୋଗ ଥିଲା। ଏହାସହିତ ତାଙ୍କ ଠାରୁ ୭୦.୯୩ ଲକ୍ଷ ଟଙ୍କାର ଆୟ ବହିର୍ଭୁତ ସଂପତ୍ତି ଠାବ ହୋଇଥିଲା। ଏଥିପାଇଁ ତାଙ୍କୁ ବାଧ୍ୟତାମୂଳକ ଅବସର ଦିଆଯାଇଛି। ପାରଳାଖେମୁଣ୍ଡିର ଅବସରପ୍ରାପ୍ତ ପୂର୍ବତନ ଜିଲ୍ଲା ମୁଖ୍ୟ ପ୍ରାଣୀଧନ ଅଧିକାରୀ (CDVO) ଜଳଧର ମଲ୍ଲିକଙ୍କ ନାମରେ ଗୋଟିଏ ବଦଳି କେସରେ ୧୦ ହଜାର ଟଙ୍କାର ଲାଞ୍ଚ ନେବା ମାମଲା ରହିଥିଲା। ଏଥିପାଇଁ ତାଙ୍କ ପେନସନକୁ ସ୍ଥାୟୀ ଭାବେ ବନ୍ଦ କରାଯାଇଛି। ବର୍ତ୍ତମାନ ବାଲେଶ୍ୱର ଜିଲ୍ଲାରେ ଡେପୁଟି କଲେକ୍ଟର ଥିବା ଓ ମୟୂରଭଂଜର ସାମାଖୁଣ୍ଟା ବ୍ଲକର ପୂର୍ବତନ ତହସିଲଦାର ଓଏଏସ ଅଧିକାରୀ ସବିତା ସାହୁ ୧୦ ହଜାର ଟଙ୍କାର ଲାଞ୍ଚ ନେଇ ଧରା ପଡ଼ିଥିଲେ। ତାଙ୍କୁ ଚାକିରୀରୁ ବହିଷ୍କାର କରାଯାଇଛି। ବଲାଙ୍ଗୀର ଜିଲ୍ଲାର ପୂର୍ବତନ ସାମାଜିକ ଶିକ୍ଷା ସଂଗଠକ (Ex-SEO) ପ୍ରଭାସିନୀ ବାବୁ ସ୍ୱାମୀଙ୍କୁ ହରାଇଥିବା ଜଣେ ମହିଳାଙ୍କୁ ୨୦ ହଜାର ଟଙ୍କାର ସାମାଜିକ ସହାୟତା ପ୍ରଦାନ ପାଇଁ ୩୦୦୦ ଟଙ୍କା ଲାଞ୍ଚ ଗ୍ରହଣ କରିଥିଲେ। ଏହି କାମ ପାଇଁ ତାଙ୍କୁ ମଧ୍ୟ ଚାକିରୀରୁ ବହିଷ୍କାର କରାଯାଇଛି। ଗଞ୍ଜାମ ଜିଲ୍ଲା ରୁରାଲ ୱାର୍କ୍ସ ଡିଭିଜନ-୨ର ଦିଗପହଣ୍ଡି ସ୍ଥିତ ଅବସରପ୍ରାପ୍ତ ପୂର୍ବତନ ଜୁନିୟର ଇଞ୍ଜିନିୟର ତ୍ରିନାଥ ସେଠୀ ୯ ହଜାର ଟଙ୍କା ଲାଞ୍ଚ ମାମଲାରେ ଦେଷୀ ସାବ୍ୟସ୍ତ ହୋଇଛନ୍ତି। ଏଥିପାଇଁ ତାଙ୍କ ପେନସନକୁ ସ୍ଥାୟୀ ଭାବେ ବନ୍ଦ ରଖାଯାଇଛି। ଏହାକୁ ମିଶାଇ ବର୍ତ୍ତମାନ ସୁଦ୍ଧା ୧୭୩ ଜଣ ଅଧିକାରୀଙ୍କୁ ଚାକିରୀରୁ ବହିଷ୍କାର ବା ବାଧ୍ୟତାମୂଳକ ଅବସର ଦିଆଯାଇଛି କିମ୍ବା ପେନସନକୁ ସ୍ଥାୟୀ ଭାବେ ସ୍ଥଗିତ ରଖାଯାଇଛି।

ପଞ୍ଚାୟତିରାଜ ସଚିବ ଅଶୋକ ମୀନାଙ୍କୁ ମିଳିଲା କେନ୍ଦ୍ରରେ ନିଯୁକ୍ତି, ଉଷାଙ୍କୁ ପଦୋନ୍ନତି…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ଗତ ସପ୍ତାହରେ କେନ୍ଦ୍ରରୁ ଡେପୁଟେସନ ସମାପ୍ତ କରି ୨ଜଣ ଆଇଏଏସ୍ ଓଡ଼ିଶା ଫେରିବା ପରେ ଆଜି ରାଜ୍ୟ ପଂଚାୟତିରାଜ ବିଭାଗର ପ୍ରମୁଖ ସଚିବ ଅଶୋକ କୁମାର ମୀନାଙ୍କୁ କେନ୍ଦ୍ର ସରକାରରେ ନିଯୁକ୍ତି ମିଳିଛି। ଏହାସହିତ ଆଇଏଏସ୍ ଉଷା ପାଢ଼ୀଙ୍କୁ ମଧ୍ୟ ଅତିରିକ୍ତ ସଚିବ ପାହ୍ୟାକୁ ପଦୋନ୍ନତି ଦିଆଯାଇଛି। କେନ୍ଦ୍ର କ୍ୟାବିନେଟର ନିଯୁକ୍ତି ସଂକ୍ରାନ୍ତ କମିଟି ଆଜି ୧୯୯୩ ବ୍ୟାଚ୍ ଆଇଏଏସ୍ ତଥା ପଂଚାୟତିରାଜ ସଚିବ ଶ୍ରୀ ମୀନାଙ୍କୁ କେନ୍ଦ୍ର ସରକାରରେ ଅତିରିକ୍ତ ସଚିବ ପାହ୍ୟାରେ ଭାରତୀୟ ଖାଦ୍ୟ ନିଗମ (ଏଫସିଆଇ)ର ପରିଚାଳନା ନିର୍ଦ୍ଦେଶକ ତଥା ଅଧ୍ୟକ୍ଷ ଭାବେ ନିଯୁକ୍ତି ଦେଇଛନ୍ତି। ଶ୍ରୀ ମୀନା ଅଗଷ୍ଟ ତୃତୀୟ ସପ୍ତାହରେ ଓଡ଼ିଶା ଛାଡ଼ି ନିଜର ଏହି ନୂଆ ଦାୟିତ୍ୱ ସମ୍ଭାଳିବେ। ସେହିପରି କେନ୍ଦ୍ରୀୟ ଡେପୁଟେସନରେ ଥିବା ୧୯୯୬ ବ୍ୟାଚ୍ ଆଇଏଏସ୍ ଉଷା ପାଢ଼ୀଙ୍କୁ ଯୁଗ୍ମ ସଚିବରୁ ଅତିରିକ୍ତ ସଚିବ ପାହ୍ୟାକୁ ପଦୋନ୍ନତି ଦିଆଯାଇଛି। ଶ୍ରୀମତୀ ପାଢ଼ୀ ଏବେ କେନ୍ଦ୍ର ସରକାରରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟରେ କାର୍ଯ୍ୟରତ ଅଛନ୍ତି। ତାଙ୍କ ଆଇଏଏସ୍ ସ୍ୱାମୀ ଅରବିନ୍ଦ ପାଢ଼ୀ ଓଡ଼ିଶା ଫେରି ରାଜ୍ୟ କୃଷି ସଚିବ ଦାୟିତ୍ୱ ତୁଲାଉ ଥିବାରୁ ଶ୍ରୀମତୀ ପାଢ଼ୀ ମଧ୍ୟ ଓଡ଼ିଶା ଫେରିବେ ବୋଲି ଚର୍ଚ୍ଚା ହେଉଛି। ମାତ୍ର ଆଜିର ପଦୋନ୍ନତି ପରେ ତାଙ୍କ ଓଡ଼ିଶା ଫେରିବା ଚିତ୍ର ଅସ୍ପଷ୍ଟ ରହିଛି। ସେହିପରି, ରାଜ୍ୟ ମତ୍ସ୍ୟ ଓ ପଶୁସମ୍ପଦ ସଚିବ ୧୯୯୭ ବ୍ୟାଚ୍ ଆଇଏଫଏସ୍ ଆର ରଘୁପ୍ରସାଦଙ୍କୁ କେନ୍ଦ୍ର ସରକାରରେ ନିଯୁକ୍ତି ମିଳିଥିବାରୁ ସେ ଗତ ସପ୍ତାହରେ କେନ୍ଦ୍ରୀୟ ଡେପୁଟେସନରେ ଯାଇଛନ୍ତି। ଅନ୍ୟପକ୍ଷରେ ରାଜ୍ୟ ଗୃହ ବିଭାଗର ଅତିରିକ୍ତ ମୁଖ୍ୟ ସଚିବ ସଞ୍ଜିବ ଚୋପ୍ରା ଓ ତାଙ୍କ ପତ୍ନୀ ଆଇଏଏସ୍ ରଞ୍ଜନା ଚୋପ୍ରା ଓ ଅର୍ଥ ସଚିବ ବିଶାଳ ଦେବ ମଧ୍ୟ କେନ୍ଦ୍ରୀୟ ଡେପୁଟେସନରେ ଯିବାର ସମ୍ଭାବନା ରହିଛି । ତେବେ ସ୍ୱାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ସଚିବ ଆର କେ ଶର୍ମା ଅସୁସ୍ଥ ଥିବାରୁ ଏବେ ସରକାରୀ କାର୍ଯ୍ୟରେ ଯୋଗ ଦେବା ସମ୍ଭାବନା କ୍ଷୀଣ ଥିବାବେଳେ ତାଙ୍କ ପତ୍ନୀ ଆଇଏଏସ୍ ମୋନା ଶର୍ମା ସ୍ୱେଚ୍ଛାକୃତ ଅବସର ନେବେ ବୋଲି ଚର୍ଚ୍ଚା ହେଉଛି। ଶ୍ରୀମତୀ ଶର୍ମା ଏବେ ରାଜ୍ୟ ଜଙ୍ଗଲ ଓ ପରିବେଶ ବିଭାଗର ଅତିରିକ୍ତ ମୁଖ୍ୟ ସଚିବ ଅଛନ୍ତି ଓ ସେ ୨୦୨୩ ମାର୍ଚ୍ଚରେ ସରକାରୀ ଚାକିରୀରୁ ଅବସର ନେବେ। ତେଣୁ ଅଧିକ ସଂଖ୍ୟକ ଆଇଏଏସଙ୍କୁ କେନ୍ଦ୍ରକୁ ଡେପୁଟେସନରେ ଯିବାପାଇଁ ରାଜ୍ୟ ସରକାର ଅନୁମତି ଦେଇ ନପାରନ୍ତି ବୋଲି ଚର୍ଚ୍ଚା। ସୂଚନାଯୋଗ୍ୟ,ଓଡ଼ିଶା କ୍ୟାଡ଼ରର ୨ଜଣ ବରିଷ୍ଠ ଆଇଏଏସ୍ ଅରବିନ୍ଦ ପାଢ଼ୀ ଓ ଏସ୍ ଅଶ୍ୱଥି ଓଡ଼ିଶା ଫେରିବା ପରେ ରାଜ୍ୟ ସରକାର ତାଙ୍କୁ ଯଥାକ୍ରମେ କୃଷି ସଚିବ ଓ ସ୍କୁଲ ଓ ଗଣଶିକ୍ଷା ସଚିବ ଭାବେ ଅବସ୍ଥାପିତ କରିଛନ୍ତି।

ସରପଞ୍ଚ ସାଜିଲେ ଗଣିତ ଶିକ୍ଷକ, ବୁଝାଇଲେ ଜ୍ୟାମିତିର ଜଟିଳ ସୂତ୍ର…!

ଏଥର ସମ୍ଭାଳ ବ୍ୟୁରୋ(ବାସୁଦେବପୁର)- ସରପଞ୍ଚ ସାଜିଲେ ଗଣିତ ଶିକ୍ଷକ । ପିଲାଙ୍କ ଭଲମନ୍ଦ ବୁଝିବାକୁ ବିଦ୍ୟାଳୟ ପରିଦର୍ଶନରେ ଯାଇଥିବା ସରପଞ୍ଚ ଗଣିତ ଶିକ୍ଷକ ନ ଥିବା ଜାଣି ନିଜେ ଧରିଲେ ଚକ । କଳାପଟାରେ କଷିଲେ ଅଙ୍କ ଆଉ ପିଲାଙ୍କୁ ବୁଝାଇଲେ ଜ୍ୟାମିତିର ଜଟିଳ ସୂତ୍ର ।  ଆଜିକାଲି ସରପଞ୍ଚ ବିଭିନ୍ନ ଦୁର୍ନୀତିରେ ଲିପ୍ତ ଥିବା ଶୁଣିବାକୁ ମିଳୁଥିବା ବେଳେ ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ବରଣ୍ଡୁଆ ପଞ୍ଚାୟତରେ କିନ୍ତୁ ଦେଖିବାକୁ ମିଳିଛି ଭିନ୍ନ ଚିତ୍ର। ଏହି ପଞ୍ଚାୟତର ସରପଞ୍ଚ ଗୋବିନ୍ଦ ଚନ୍ଦ୍ର ମଲିକ ଶିକ୍ଷକ  ସାଜି ଜଟିଳ ଜ୍ୟାମିତିର ସୂତ୍ରକୁ ବେଶ୍‌ ସରଳ ଭାବରେ ବୁଝାଇପାରୁଛନ୍ତି। ଫଳରେ ଚାରିଆଡ଼ୁ ତାଙ୍କ ନିକଟକୁ ଛୁଟୁଛି ପ୍ରଶଂସାର ସୁଅ । ସରପଞ୍ଚ ଗୋବିନ୍ଦ ଚନ୍ଦ୍ର ମଲିକ ପଞ୍ଚାୟତରେ ବୁଲୁଥିବା ବେଳେ ଜଗବନ୍ଧୁ ସରକାରୀ ବିଦ୍ୟାପୀଠକୁ ପରିଦର୍ଶନ କରିବାକୁ ଯାଇଥିଲେ । ବିଦ୍ୟାଳୟରେ ପିଲାଙ୍କ ସହ କଥା ହେବା ସହ  ସେମାନଙ୍କ ସମସ୍ୟା ବିଷୟରେ ଆଲୋଚନା କରିଥିଲେ । ପରେ ବିଦ୍ୟାଳୟରେ ଗଣିତ ଶିକ୍ଷକଙ୍କ ଅଭାବ ରହିଛି ବୋଲି ଜାଣିବାକୁ ପାଇଥିଲେ । ନବମ, ଦଶମ ପିଲ  ଭଲ ଭାବେ ଗଣିତ ଜ୍ଞାନ ହାସଲ ନ କଲେ ସେମାନଙ୍କ ଭବିଷ୍ୟତ ଅନ୍ଧକାର ହେବ ଭାବି ଖୋଦ ସରପଞ୍ଚ ଶିକ୍ଷକ ପାଲଟିଗଲେ।  ଆଉ ତା’ ପରେ ପିଲାଙ୍କୁ ଜ୍ୟାମିତିର ଜଟିଳ ସୂତ୍ର ସରଳ ଭାଷାରେ ବୁଝାଇଲେ । କେବଳ ଏହି ବିଦ୍ୟାଳୟ ନୁହଁ, ପଞ୍ଚାୟତର ବିଭିନ୍ନ ବିଦ୍ୟାଳୟକୁ ନିୟମିତ ପରିଦର୍ଶନରେ ଯାଇଥାନ୍ତି ସରପଞ୍ଚ ଗୋବିନ୍ଦ । ସେଠାରେ ପିଲାଙ୍କ ତଥା ଶିକ୍ଷକ, ଶିକ୍ଷୟିତ୍ରୀଙ୍କ ସୁବିଧାଅସୁବିଧା ବି ବୁଝିଥାନ୍ତି।  ବିଜ୍ଞାନରେ ସ୍ନାତକ କରିଥିବା ଗୋବିନ୍ଦ ବରଣ୍ଡୁଆ ପଞ୍ଚାୟତରୁ ପ୍ରଥମ ଥର ପାଇଁ ନିର୍ବାଚିତ ହୋଇଛନ୍ତି l ଏନେଇ ସରପଞ୍ଚ ଗୋବିନ୍ଦ କହିଛନ୍ତି, ମୁଁ ସ୍କୁଲର ଭଲମନ୍ଦ ବୁଝିବାକୁ ଆସି ଗଣିତ ଶିକ୍ଷକ ଅଭାବ ଥିବା ଜାଣିବାକୁ ପାଇଲି। ତେଣୁ ପିଲାଙ୍କୁ ଜ୍ୟାମିତ ଓ ବୀଜଗଣିତ ପଢ଼ାଇଲି। ମୁଁ ଏହି ସ୍କୁଲରେ ପଢ଼ିକି ଯାଇଥିବା ବେଳେ ଏବେ ଏହି ପିଲାଙ୍କୁ ପଢ଼ାଇ ବେଶ୍‌ ଖୁସି ଲାଗୁଛି।  ଶିକ୍ଷାର ଯେ ମହତ୍ତ୍ୱ ଜାଣିଛି, ସେ ପିଲାଙ୍କୁ ପଢ଼ାଇପାରିବ । ଏହାଦ୍ୱାରା କେବେ କାହାର ଅମଙ୍ଗଳ ହେବ ନାହିଁ । ପିଲାଙ୍କୁ ପଢ଼ାଇ ବେଶ୍‌ ଖୁସି ଓ ଶାନ୍ତି ଲାଗୁଛି। ଆମ ଗଣିତ ଶିକ୍ଷକଙ୍କ ବଦଳି ହୋଇଯିବାରୁ ପାଠପଢ଼ା ବାଧାପ୍ରାପ୍ତ ହୋଇଛି। ସରପଞ୍ଚ ସାର୍‌ ଆମ କଥା ବୁଝିବାକୁ ଆସିଥିବା ବେଳେ ସେ ଆମ ସମସ୍ୟା ଜାଣିଲେ। ଜଟିଳ ଗଣିତକୁ ସେ ବେଶ୍‌ ସରଳ ଭାବେ ବୁଝାଇପାରୁ  ଥିବାରୁ ଆମେ ବେଶ୍‌ ଖୁସି ଅଛୁ ବୋଲି କହିଛନ୍ତି ଛାତ୍ରଛାତ୍ରୀ।

ସାମନାକୁ ଆସିଲା ପ୍ରଧାନ ଶିକ୍ଷୟତ୍ରୀଙ୍କ ଦୁର୍ନୀତି ; ଛାତ୍ରଛାତ୍ରୀଙ୍କ ଏମ୍.ଡି.ଏମ୍ ଟଙ୍କା ହଡ଼ପ ଅଭିଯୋଗ …!

!!! ରାୟଗଡା ରୁ ଜିଲ୍ଲା ସ୍ଵତନ୍ତ ପ୍ରତିନିଧି ପି॰ଦିଲ୍ଲୀପ କୁମାର ଙ୍କ ରିପୋର୍ଟ !!!

ଏଥର ସମ୍ଭାଳ(ବିଷମକଟକ)- ରାୟଗଡା ଜିଲ୍ଲା ବିଷମକଟକ ବ୍ଲକ ଅନ୍ତର୍ଗତ କୁଟ୍ରାଗଡ଼ ପଞ୍ଚାୟତର ହୁକୁମତୋଳା ପ୍ରାଥମିକ ସେବାଶ୍ରମର ପ୍ରଧାନ ଶିକ୍ଷୟତ୍ରୀ ଜଣେ ଅଭିଭାବକଙ୍କ ଠାରୁ ପିଲାର ନାମ ଲେଖାଇବା ପାଇଁ ଟଙ୍କା ଲାଞ୍ଚ ନେଉଥିବା ଭିଡିଓ ଭାଇରଲ ହେବା ପରେ ପ୍ରଧାନ ଶିକ୍ଷୟତ୍ରୀଙ୍କ ଆଉ ଏକ ବଡ଼ ଦୁର୍ନୀତି ସାମନାକୁ ଆସିଛି।କୋଭିଡ ସମୟରେ ଛାତ୍ରଛାତ୍ରୀ ମାନଙ୍କ ପାଇଁ ଆସିଥିବା ଚାଉଳ ଓ ଟଙ୍କା ହଡ଼ପ କରିଥିବା ନେଇ କିଛି ଅଭିଭାବକ ଏବେ ଅଭିଯୋଗ କରିଛନ୍ତି।ଅନ୍ୟପଟେ ଏହି ଭିଡିଓରେ ଟଙ୍କା ଦେଉଥିବା ବ୍ୟକ୍ତି ଜଣକଙ୍କ ପରିଚୟ ମିଳିବା ପରେ ଆମ ପ୍ରତିନିଧି ଉକ୍ତ ବ୍ୟକ୍ତିଙ୍କ ପାଖକୁ ଯାଇ ଘଟଣା ସମ୍ପସର୍କରେ ପଚାରି ବୁଝିଥିଲେ ବ୍ୟକ୍ତି ଜଣକ ଚାରି ଜଣ ପିଲାଙ୍କୁ ନାମ ଲେଖା ବେଳେ ଟଙ୍କା ଦେଇଥିବା ସ୍ୱୀକାର କରିଛନ୍ତି ।ଭାଇରଲ ଭିଡିଓ ଟିକୁ ଦେଖିବା ପରେ ଏହି ଭିଡିଓରେ ସେ ନିଜେ ଟଙ୍କା ଦେଉଥିବା ସ୍ୱୀକାର କରିଥିବା ବେଳେ ଏହା କେମିତି ଭାଇରଲ ହେଲା ସେ ଜାଣିନଥିବା କହିଛନ୍ତି । ଏଥିରୁ ପ୍ରଧାନ ଶିକ୍ଷୟତ୍ରୀ ଜଣକ ନାମ ଲେଖାଇବାକୁ ଟଙ୍କା ଗ୍ରହଣ କରିଥିବା ସ୍ପଷ୍ଟ ହୋଇ ଯାଇଥିବା ବେଳେ ତଦନ୍ତ କେଉଁ ବାଟରେ ଯାଉଛି ଦେଝିବାକୁ ରହିଲା ।ଅନ୍ୟପଟେ ଆଗୁଳ ପଞ୍ଚାୟତ ବଡ଼ମୁଦ୍ରା ଗାଁର ଜଣେ ଅବିଭାବକ କୃଷ୍ଣ ଯାକେସିକା ତାଙ୍କ ପିଲାର ଏମ॰ଡି॰ଏମ ଟଙ୍କା ଓ ଚାଉଳ ନେବାକୁ ତିନି ତିନି ଥର ଆସି ଫେରିବା ପରେ ପୁଣି ଆସିଥିବା ବେଳେ ଆମ ପ୍ରତିନିଧିଙ୍କ ସହିତ ଦେଖା ହୋଇଥିଲା। ପ୍ରଧାନ ଶିକ୍ଷୟତ୍ରୀ ଜଣକ ବାରମ୍ବାର ଆକାଉଣ୍ଟ ଭୁଲ ଦର୍ଶାଇ ଫେରାଇ ଦେଉଥିବା ବେଳେ ଆକାଇଣ୍ଟ କିନ୍ତୁ ଠିକ ଥିବା ଏବଂ ସେ ତିନି ଥର ଆକାଉଣ୍ଟ ଜେରକ୍ସ କରି ଦେଇଥିବା ପରେ ମଧ୍ୟ ଟଙ୍କା,ଚାଉଳ ଓ ତାଙ୍କ ଝିଅର ପୋଷାକ ଦେଇ ନଥିବା ସେ ଅଭିଯୋଗ କରିଛନ୍ତି ।।ଏହିପରି ପିସ୍କାପଙ୍ଗା ପଞ୍ଚାୟତର ଅଣଚୁଆଁ,ଗେଣ୍ଡାବାଜୁ ଗାଁର ଅନେକ ପିଲାଙ୍କ ଏମ॰ଡି॰ଏମ ଟଙ୍କା,ଚାଉଳ ଓ ପୋଷାକ ପ୍ରଧାନ ଶିକ୍ଷୟତ୍ରୀ ଦେଇ ନ ଥିବା ଅଭିଯୋଗ ଉଠିଛି ।ବିଦ୍ୟାଳୟ ଡେଭେଲପ ମେଣ୍ଟ ଟଙ୍କା ଉଠାଣ,ଖର୍ଚ୍ଚ ନେଇ ବିଧ୍ୟଳୟ କମିଟି ସଭାପତି ପଚାରି ବୁଝିବାରେ ଏଥିରେ ତାଙ୍କରକିଛି ମୁଣ୍ଡ ଖେଳାଇବାର ନାହିଁ ବୋଲି କହୁଥିବା କମିଟି ସଭାପତି ଅଭିଯୋଗ କରିଛନ୍ତି । ବିଦ୍ୟାଳୟ ପାଣ୍ଠିକୁ ଖର୍ଚ୍ଚ କରିବା ପୂର୍ବରୁ ଏହା କମିଟି ବୈଠକରେ ସୁପାରିସ ହେବାର ଜରୁରୀ ଥିବା ବେଳେ ଖର୍ଚ୍ଚ ବିଷୟରେ କେମିତି ସଭାପତି ଜାଣିପାରିନାହାନ୍ତି ବୋଲି ପ୍ରଶ୍ନ ଉଠିଛି ।ଏବେ ତାଙ୍କୁ ବିଦ୍ୟାଳୟ ଭିତରକୁ ଯିବାକୁ ଦିଆଯାଉ ନାହିଁ ବୋଲି ସଭାପତି କହିଥିଲେ। ଶୀଘ୍ର ଏହାର ତଦନ୍ତ ଜିଲ୍ଲାପାଳଙ୍କ ଦ୍ୱାରା କରାଯାଇ କରଷାନୁଷ୍ଠାନ ଗ୍ରହଣ କରିବା ନିମନ୍ତେ ଦାବୀ ହେଉଛି ।

ଅବହେଳିତ ଅବସ୍ଥାରେ ଅଛି ମୁନିଗୁଡାର ରାସ୍ତାଘାଟ,ନାଳ ନାର୍ଦମା ଓ ଗୋପବନ୍ଧୁ ଦୈନିକ ବଜାର…!

!!! ରାୟଗଡା ରୁ ଜିଲ୍ଲା ସ୍ଵତନ୍ତ ପ୍ରତିନିଧି ପି॰ଦିଲ୍ଲୀପ କୁମାର ଙ୍କ ରିପୋର୍ଟ !!!

ଏଥର ସମ୍ଭାଳ(ମୁନିଗୁଡା)- ରାୟଗଡା ଜିଲ୍ଲାର ବ୍ୟସ୍ତବହୁଳ ବ୍ୟବସାୟିକ ପେଣ୍ଠ ମୁନିଗୁଡାର ରାସ୍ତାଘାଟ ଓ ଡ୍ରେନ ସମସ୍ୟା ବର୍ଷାଋତୁରେ ଚରମ ସୀମା ଲଙ୍ଘିଛି।ପୂର୍ତ୍ତବିଭାଗ,ଆର.ଡି ବିଭାଗ,ବ୍ଲକ ଓ ପଂଚାୟତ ସବୁ ଏହି ସମସ୍ୟା ପ୍ରତି ନିରବ ଦ୍ରଷ୍ଟା। ମୁନିଗୁଡାର ରାସ୍ତାଘାଟ,ନାଳ ନାର୍ଦମାର ବିକାଶ ପାଇଁ ପ୍ରଶାସନିକ ସ୍ତରରେ ଇଛାନାହିଁ କି ଲୋକପ୍ରତିନିଧି ମାନଙ୍କର ନିଘାନାହିଁ ସାଧାରଣରେ ଚର୍ଚ୍ଚା ଜୋର୍ ଧରିଛି । ଖରାଦିନ ରେ ଯେତେବେଳ ଏମାନେ ଏସବୁର ଉନ୍ନୟନ ପାଇଁ ଚିନ୍ତା କଲେନି,ଏବେ ବର୍ଷାଋତୁରେ ଏମାନେ କଣ ତାଡି ନେବେ ?ଏମାନଙ୍କର ଗଠନାତ୍ମକ ମନବୃତ୍ତି ଆଦୌ ନାହିଁ ବୋଲି କିଛି ବ୍ୟବସାୟୀ କଟାକ୍ଷ କରିଛନ୍ତି । ପ୍ରକୃତରେ କଣ ପାଇଁ ଦୀର୍ଘବର୍ଷ ହେବ ରାସ୍ତାଘାଟ,ଡ୍ରେନ ସଫା ଓ ଅନ୍ୟାନ୍ୟ ଉନ୍ନୟନ କାର୍ଯ୍ୟ ହେଉନାହିଁ?ସରକାରଙ୍କ ତହବିଲରେ ମୁନିଗୁଡା ଉନ୍ନୟନ ପାଇଁ ଅର୍ଥର ଅଭାବ ନାଁ ଲୋକପ୍ରତିନିଧି ଓ ପ୍ରଶାସନର ମୁନିଗୁଡା ଅଞ୍ଚଳ ପ୍ରତି ବୈମାତୃକ ମନୋଭାବ ବୋଲି ସାଧାରଣ ରେ ଏଭଳି ଅନେକ୍ ପ୍ରଶ୍ନ ବାଚି ସୃଷ୍ଟି ହୋଇଛି ।

ସାଧାରଣ ଜନତା ଏସବୁର ଖିଅ ଖୋଜି ପାଉନଥିଲା ବେଳେ ଜୀବନ ଜୀବିକାକୁ ନେଇ ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ମୁନିଗୁଡା ସିନେମା ହଲ ରୋଡ଼ ସାଇଡ଼ରେ ଥିବା ଗୋପବନ୍ଧୁ ଦୈନିକ ବଜାର ପରିବା ବେପାରୀ ଓ ଆମିଷ ବେପାରୀଙ୍କ ନିମନ୍ତେ ଗଲା ଦେଢବର୍ଷ ପୂର୍ବୁ ରୁ ଆରମ୍ଭ ହୋଇଥିବା ବେଳେ ଏବେ ଏଠାରେ ମାତ୍ର ଦୁଇଜଣ ପରିବା ବେପାରୀ ଓ ୨୦ରୁ ୨୫ମାଛ, ମାଂସ ଓ ଚେକେନ ବେପାରୀ ଅଛନ୍ତି। ଏମାନଙ୍କ ବ୍ୟତୀତ ଅନ୍ୟ ପ୍ରାୟ ପଚାଶରୁ ଉର୍ଦ୍ଧ ପରିବା ଦୋକାନୀ ଓ ମାଛ,ମାଂସ ଦୋକାନୀ ଗୋପବନ୍ଧୁ ଦୈନିକ ବଜାର ପରିବେଶର ଅସୁବିଧା କାରଣରୁ ଗୋବର୍ଦ୍ଧନ,ଗୁଣ୍ଡିଚା ଛକ,ମେଡ଼ିକାଲ ଛକ,ସିଂହଦ୍ଵାର ଓ ବସଷ୍ଟାଣ୍ଡ ଛକରେ ପସରା ମେଲେଇ ବେପାର କରୁଥିବା । ବର୍ତ୍ତମାନ୍ ର ଲଗାଣ ବର୍ଷା ଯୋଗୁଁ ମୁନିଗୁଡ଼ାରେ ରାସ୍ତାଘାଟ ପରିସ୍ଥିତି ଅତି ଦୟନୀୟ।ଏଥିମଧ୍ୟରେ ମୁନିଗୁଡାର ଗୋପବନ୍ଧୁ ଦୈନିକ ବଜାରର ରାସ୍ତା ଖାଲଖମାରେ ବର୍ଷାପାଣି ପରିପୂର୍ଣ୍ଣ ହୋଇଯାଇଛି। ବାରମ୍ବାର ଅଭିଯୋଗ କରିବା ସତ୍ତ୍ୱେ ଏଥି ପ୍ରଶାସନ ର ନଜର ପଡ଼ୁନଥିବାରୁ ଏହି ସମସ୍ୟା ଗୁଡ଼ିକର ସମାଧାନ ନିମନ୍ତେ ଜନ ଆନ୍ଦୋଳନ ହିଁ ଏକ୍ ମାତ୍ର୍ ପନ୍ଥା ବୋଲି ସାଧାରଣରେ ମତ ପ୍ରକାଶ ପାଇଛି ।

ଷ୍ଟେଚର ସାହାଯ୍ୟ ରେ ନଦୀ ପାର ହୋଇ ସ୍ୱାସ୍ଥ୍ୟ କେନ୍ଦ୍ର କୁ ଆସିଲେ ରୋଗୀ …!

!!! ରାୟଗଡା ଜିଲ୍ଲା କାଶୀପୁର ରୁ ମଧୁସୂଦନ ନାୟକ ଙ୍କ ରିପୋର୍ଟ !!!

ଏଥର ସମ୍ଭାଳ(କାଶୀପୁର)- ରାୟଗଡ଼ା ଜିଲ୍ଲାର କାଶିପୁର ବ୍ଲକ ଡଙ୍ଗାସିଲ ପଞ୍ଚାୟତ ଶିଶୁପାଲ ଗ୍ରାମରେ ଜମୁନା ସାହୁ ଙ୍କ ଦେହ ଅସୁସ୍ଥ ହେବା ପରେ ଡଙ୍ଗାସିଲ ଗ୍ରାମବାସୀ ସ୍ଵାସ୍ଥ୍ୟ କର୍ମଚାରୀ କୁ ଜଣାଇଥିଲେ । ଏହି ଫୋନ ପାଇବା ପରେ ତୁରନ୍ତ ସ୍ଵାସ୍ଥ୍ୟ କର୍ମଚାରୀ ଏକ ଆମ୍ବୁଲାନ୍ସ ନେଇ ସେହି ଗ୍ରାମକୁ ଯାଇ ଥିଲେ । ଏହି ଗ୍ରାମକୁ ଯିବା କୁ ହେଲେ ଏକ ନଦୀ ପାର ହୋଇ ଯିଵା କୁ ପଡେ । ନଦୀ ଆରପାରିରେ ଗାଡ଼ି ରଖି ସ୍ଵାସ୍ଥ୍ୟ କର୍ମଚାରୀ ଓ ଆସା ଦିଦି ଆମ୍ବୁଲାନ୍ସ ଡ଼୍ରାଇଭର ଶିବାଜୀ ବିଶୋଇ ସହ ନଦୀ ପାର ହୋଇ ସେହି ଗ୍ରାମକୁ ଯାଇ ପହଞ୍ଚିଥିଲେ । ଜମୁନା ସାହୁ ଙ୍କ ଦେହ ବହୁତ ଖରାପ ହେବା ରୁ ତାଙ୍କୁ ତୁରନ୍ତ ଷ୍ଟେଚର ସାହାଯ୍ୟ ରେ ନଦୀପାର କରି ଆଣିବାବେଳେ ଉପର ମୁଣ୍ଡରେ ଅଧିକା ବର୍ଷା ହେବାରୁ ନଦୀରେ ପାଣି ବଢ଼ିଥିବା ପରେବି କିଛି ଗ୍ରାମ ବାସୀଙ୍କ ସାହାଯ୍ୟରେ ସ୍ଵାସ୍ଥ୍ୟ କର୍ମୀ ,ଆଶା ଦିଦି ଓ ଆମ୍ବୁଲାନ୍ସ ଡ଼୍ରାଇଭର ବହୁତ କଷ୍ଟରେ ରୋଗୀକୁ ନଦୀ ପାର କରିଥିଲେ ।

ଏହି ସମୟରେ ଏଏନ୍ଏମ୍ ଦିଦି ଙ୍କ ଗୋଡ଼ ନଦୀରେ ଖସି ପଡିଯାଉଥୁବାବେଳେ ପଛରେ ଆସୁଥିବା କିଛି ଗ୍ରାମବାସୀ ତାଙ୍କୁ ଧରିନେଇଥିବା ସୂଚନା ମେକିଛି । ଏହି ଭଳି ଦୃଶ୍ୟ ସବୁ ସମୟରେ କାଶିପୁର ରେ ଦେଖିବାକୁ ମିଳୁଛି। କେଉଁ ଗ୍ରାମକୁ ରାସ୍ତା ନାହିଁତ କେଉଁ ଗ୍ରାମ ରେ ଏଯାଏଁ ବିଦ୍ୟାଳୟ ଟେ ନାହିଁ ଆଉ କେଉଁଠି ଛୋଟ ନଦୀ ଉପରେ ପୋଲ ଟିଏ ନାହିଁ। ଏସବୁ ସମସ୍ୟା ନେଇ ମନ୍ତ୍ରୀ , ବିଧାୟକ ଙ୍କ ନିକଟରେ ଖବର ରହିଛି କିନ୍ତୁ ଆଜି ଯାଏଁ କାଶିପୁର ବ୍ଲକ ର ଏସବୁ ସମସ୍ୟାର ସମାଧାନ ହୋଇ ପାରୁନାହିଁ । ଏସବୁ ସମସ୍ୟାର ସମାଧାନ କେବେ ହେବ ଦେଖିବାକୁ ରହିଲା।

ଦୁଇଦିନ ହେବ ବିଶବ୍ଦ ପାଣି ଯୋଗାଣ ବନ୍ଦ…!

!!! ରାୟଗଡା ଜିଲ୍ଲା କାଶୀପୁର ରୁ ମଧୁସୂଦନ ନାୟକ ଙ୍କ ରିପୋର୍ଟ !!!

ଏଥର ସମ୍ଭାଳ(କାଶୀପୁର)-  ରାୟଗଡ଼ା ଜିଲା କାଶୀପୁର ବ୍ଲକର କେତେକ ଗ୍ରାମରେ ଦୁଇଦିନ ହେବ ବିଶୁଦ୍ଧ ପାନୀୟ ଜଳ ଯୋଗାଣ ବନ୍ଦ ରହିଛି । କାଶୀପୁର ପ୍ରଶାସନ କହୁଛି ବର୍ତ୍ତମାନ ଝାଡାବାନ୍ତି ସମୟରେ ଆମେ ଗାଁ ଗାଁ ରେ ବିଶୁଦ୍ଧ ପାନୀୟ ଜଳ ଟେଂକେର ଯୋଗେ ଯୋଗାଇ ଦେଉଛୁ l କିନ୍ତୁ ଦୁଇ ଦିନ ହେବ କରେଣ୍ଟ ନଥିବାରୁ ସଦର କାଶୀପୁର ରେ ପାଣି ଯୋଗାଣ ବନ୍ଦ ଅଛି l ଏହାକୁ ନେଇଁ ଦୁଇ ଦିନ ହେଲା କରେଣ୍ଟ ନଥିବାରୁ ଏବେ କେଉଁ ପାଣି ବ୍ୟବହାର କରୁଛନ୍ତି l ତାହା ନେଇ ଲୋକ ଙ୍କ ମନରେ ପ୍ରଶ୍ନ ଉଠୁଛି ? ଏବେ କେଉଁ ଗାଁର ଲୋକମାନେ ବ୍ୟବହାର କରୁଛନ୍ତି । ଏବେ କିଛି ଦିନ ହେବ ବିଶୁଦ୍ଧ ପାଣି ଗାଁକୁ ଗାଁ ପହଁଞ୍ଚାଇ ଦଉଥିବାରୁ ଝାଡ଼ାବାନ୍ତିରେ ଆୟତନ କୁ ଆସିଥିବା ବେଳେ ଯଦି ଏହି ପରି କିଛି ଦିନ କରେଣ୍ଟର ଅସୁବିଧା ରହିବ ତାହା ହେଲେ ଆଗର ସେହି ପରିସ୍ଥିତି କୁ ପୁଣି ଥରେ ସେହି ରୂପ ନେବ ବୋଲି ଲୋକଙ୍କ ମନରେ ଉଙ୍କି ମାରିବା ସହିତ ଝାଡ଼ାବାନ୍ତିରେ ଆକ୍ରାନ୍ତ ବଢିବାର ଆଶଙ୍କା ରହିଛି ବୋଲି ସାଧାରଣରେ ଚର୍ଚ୍ଚା ହଉଛି l ତେଣୁ କରି ଏଥି ପ୍ରତି ବିଦ୍ୟୁତ୍ ବିଭାଗ ଅଧିକାରୀ ଓ ବ୍ଳକ ପ୍ରଶାସନ ଏଥିପ୍ରତି ଦୃଷ୍ଟି ଦେବା ଦରକାର ବୋଲି ବୁଦ୍ଧିଜୀବୀ ମହଲରେ ପ୍ରକାଶ ପାଇଛି l

ବ୍ରହ୍ମ କୁମାରୀ ସଂସ୍ଥାନ ପକ୍ଷରୁ ରାକ୍ଷୀ ବନ୍ଧନ ଉତ୍ସବ ପାଳନ…!

!!! ରାୟଗଡା ଜିଲ୍ଲା ଗୁଣପୁର ରୁ ସି॰ଏଚ॰ପ୍ରେମ କୁମାର ଙ୍କ ରିପୋର୍ଟ !!!

ଏଥର ସମ୍ଭାଳ(ଗୁଣପୁର)- ବଡ ଜୀଉ ଙ୍କ ପବିତ୍ର ଜନ୍ମ ଦିବସ ଅବସରରେ ଗୁଣପୁର ବ୍ରହ୍ମ କୁମାରୀ ସଂସ୍ଥାନ ପକ୍ଷରୁ ରାକ୍ଷୀ ବନ୍ଧନ ଉତ୍ସବ ପାଳନ କରାଯାଇଛି । ସଂସ୍ଥାନ ର ସଦସ୍ୟ ଭଉଣୀ ସୁଶ୍ରୀ ଜ୍ୟୋତି, ବି. କେ ପଦ୍ମିନୀ, ବି. କେ ରିତା ଓ ଭାଇ ସୁରେନ୍ଦ୍ର ମହାନ୍ତି, ଜି. ଉପେନ୍ଦ୍ରା ଗୁଣପୁର ସହର ର ସମସ୍ତ ସରକାରୀ ଅନୁଷ୍ଠାନ କୁ ଯାଇ କାର୍ଯ୍ୟରତ ଭାଇ ମାନଙ୍କ ହାତରେ ରାକ୍ଷୀ ବାନ୍ଧି ମିଷ୍ଟାନ ଖୁଆଇ ସେମାନଙ୍କ ଉତ୍ତମ୍ ସ୍ଵାସ୍ଥ୍ଯ ଓ ଦୀର୍ଘାୟୁ କାମନା କରିଛନ୍ତି । ସଂସ୍ଥାନ ପକ୍ଷରୁ କରାଯାଇଥିବା ଏଭଳି କାର୍ଯ୍ୟକ୍ରମ କୁ ସାଧାରଣ ରେ ଭୂୟସୀ ପ୍ରଶଂସା କରାଯାଇଛି ।

ଖୋଲିଲା ହୀରାକୁଦ ଜଳ ଭଣ୍ଡାରର ୫ଟି ଗେଟ୍‌…!

ଏଥର ସମ୍ଭାଳ ବ୍ୟୁରୋ(ସମ୍ବଲପୁର)- ହୀରାକୁଦ ଜଳଭଣ୍ଡାରର ୫ଟି ଗେଟ୍ ଖୋଲିଲା। ଉପରମୁଣ୍ଡରେ ପ୍ରବଳ ବର୍ଷା ହେବା ଯୋଗୁ ଜଳଭଣ୍ଡାରରେ ଜଳସ୍ତର ବୃଦ୍ଧି ପାଇବାରୁ ୫ଟି ଗେଟ୍ ଖୋଲାଯାଇଛି। ପରେ ଆଉ ୫ଟି ଗେଟ୍ ଖୋଲିବାର ଯୋଜନା ରହିଛି ବୋଲି ହୀରାକୁଦ ଜଳଭଣ୍ଡାର ମୁଖ୍ୟଯନ୍ତ୍ରୀ ଆନନ୍ଦ ସାହୁ କହିଛନ୍ତି। ଜଳଭଣ୍ଡାରକୁ ସେକେଣ୍ଡ ପିଛା ୨ ଲକ୍ଷ ୯୬ ହଜାର ୭ ଶହ ୪୩ କ୍ୟୁସେକ ଜଳ  ପ୍ରବେଶ କରୁଥିବା ବେଳେ, ୩୯ ହଜାର ୯୫୭ କ୍ୟୁସେକ ଜଳ ନିଷ୍କାସିତ ହେଉଛି। ଏବେ ଜଳଭଣ୍ଡାରରେ ଜଳସ୍ତର ୬୧୨ ଦଶମିକ ୪୭ ଫୁଟ୍ ରହିଛି। ଗେଟ୍ ଖୋଲିବା ପୂର୍ବରୁ ସକାଳ ୯ଟା ୩୦ରୁ ସାଇରନ୍ ବଜାଇ ତଳମୁଣ୍ଡ ଲୋକଙ୍କୁ ସତର୍କ କରାଯାଇଥିଲା। ହୀରାକୁଦ ଜଳଭଣ୍ଡାର ମୁଖ୍ୟଯନ୍ତ୍ରୀ ଆନନ୍ଦ ସାହୁ କହିଛନ୍ତି, ମହାନଦୀ ଉପମୁଣ୍ଡରେ ବର୍ଷାର ପରିମାଣ ବଢ଼ିଥିବାରୁ ସରାଡିହରେ ସକାଳ ୬ଟା ସୁଦ୍ଧା ୪ଲକ୍ଷ କ୍ୟୁସେକ୍‌ ଜଳ ଜଳଭଣ୍ଡାର ମଧ୍ୟକୁ ଆସିଛି। ତାକୁ ଦୃଷ୍ଟିରେ ରଖି ଆଜିଠାରୁ ହୀରାକୁଦ ଜଳଭଣ୍ଡାରର ଗେଟ୍ ଖୋଲିବା ଆରମ୍ଭ କରିବୁ। ଆଜି ପ୍ରଥମ ପର୍ଯ୍ୟାୟରେ ୫ଟି ଗେଟ୍‌ ଖୋଲିବୁ ଏବଂ ଦ୍ୱିତୀୟ ପର୍ଯ୍ୟାୟରେ ୫ଟି ଗେଟ୍‌ ଖୋଲିବୁ। ମୋଟ ଉପରେ ୧୦ଟି ଗେଟ୍‌ ହୀରାକୁଦ ଜଳଭଣ୍ଡାରରୁ ଖୋଲାଯିବ। ପରେ ଜଳସ୍ତର ଦେଖି ହୀରାକୁଦ ଜଳଭଣ୍ଡାରରେ ଗେଟ୍‌ ଗୁଡ଼ିକ ଖୋଲାଯିବ।