ଓଡ଼ିଶାରେ କଂଗ୍ରେସ ରାସ୍ତାରେ ବିଜେପି, ଗାଁ ’ରେ ହଜିଗଲା ଅସ୍ତିତ୍ୱ….!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- କେନ୍ଦ୍ରରେ ୟୁପିଏ ସରକାର ସମୟରେ କଂଗ୍ରେସ ରାଜ୍ୟରେ ବିଜେଡି ପ୍ରତି ଯେଉଁ ଆଭିମୁଖ୍ୟ ପୋଷଣ କରିଥିଲା ଠିକ୍ ସେଭଳି ରଣନୀତି ଏବେ ବିଜେଡି ପାଇଁ ବିଜେପି ଆପଣାଉଥିବା ଜଳଜଳ ହୋଇ ଦିଶୁଛି, ଯେଉଁଥିପାଇଁ ବିଜେପି ରାଜ୍ୟରେ କଂଗ୍ରେସ ଭଳି ଦଶା ଭୋଗିବାକୁ ଯାଉଥିବା ଜଣାପଡ଼ିଛି । ପଂଚାୟତ ନିର୍ବାଚନର ଫଳାଫଳକୁ ନେଇ ଯାହା ଆଶା କରାଯାଉଥିଲା, ପ୍ରଥମ ଦିନର ଭୋଟ ଗଣତି ଫଳାଫଳ ତାହା ପ୍ରମାଣିତ କରିଛି । ଦୁଇ ଜାତୀୟ ଦଳ ବିଜେପି ଓ କଂଗ୍ରେସର ପଂଚାୟତ ନିର୍ବାଚନୀ ରଣନୀତି ହିଁ ଲଢ଼ିବା ପାଇଁ ନୁହେଁ ବରଂ କେବଳ ନିଜର ଅସ୍ତିତ୍ୱ ରକ୍ଷା ପାଇଁ ନିର୍ବାଚନ ମଇଦାନକୁ ଓହ୍ଲାଇଥିବା ଭଳି ଅନୁଭୂତ ହେଉଥିଲା। ଆଉ ଯେଉଁ କାରଣରୁ ଆଜି ପ୍ରଥମ ଦିନର ଭୋଟଗଣତି ଫଳାଫଳର ଟ୍ରେଣ୍ଡରୁ ହିଁ ବିଜେପି ଓ କଂଗ୍ରେସ ରାଜ୍ୟର ଗ୍ରାମାଂଚଳରେ ନିଜର ସତ୍ତା ହରାଇଥିବା ଏବଂ ବିଜେଡି ରାଜ୍ୟର ସମସ୍ତ ଜିଲ୍ଲା ପରିଷଦର ଅଧ୍ୟକ୍ଷ ଆସନ ସହ ୮୦ ପ୍ରତିଶତରୁ ଅଧିକ ହାତେଇବାକୁ ଯାଉଥିବା ଏକରକମ ସ୍ପଷ୍ଟ ହୋଇଯାଇଛି। କେନ୍ଦ୍ରରେ ୟୁପିଏ ସରକାର ସମୟରେ କଂଗ୍ରେସ ରାଜ୍ୟରେ ବିଜେଡି ପ୍ରତି ଯେଉଁ ଆଭିମୁଖ୍ୟ ପୋଷଣ କରିଥିଲା ଠିକ୍ ସେଭଳି ରଣନୀତି ଏବେ ବିଜେଡି ପାଇଁ ବିଜେପି ଆପଣାଉଥିବା ଜଳଜଳ ହୋଇ ଦିଶୁଛି, ଯେଉଁଥିପାଇଁ ବିଜେପି ରାଜ୍ୟରେ କଂଗ୍ରେସ ଭଳି ଦଶା ଭୋଗିବାକୁ ଯାଉଥିବା ଜଣାପଡ଼ିଛି । ତେବେ ୨୦୧୭ ପଂଚାୟତ ନିର୍ବାଚନ ଓ ୨୦୧୯ ସାଧାରଣ ନିର୍ବାଚନକୁ ଜୋରଦାର ଢଙ୍ଗରେ ଲଢ଼ିଥିବା ବିଜେପି ଚଳିତ ପଂଚାୟତ ନିର୍ବାଚନକୁ କାହିଁକି ସେଭଳି ନଲଢ଼ି ନିଜ ଗୋଡ଼ରେ କୁରାଢ଼ୀ ମାରିଲା ତାକୁ ନେଇ ସାଧାରଣରେ ଚର୍ଚ୍ଚା । ମିଳିଥିବା ସୂଚନା ଅନୁସାରେ, ଆଜି ପ୍ରଥମ ଦିନରେ ୩୧୫ଟି ଜିଲ୍ଲା ପରିଷଦ ଜୋନରେ ହୋଇଥିବା ଗଣତିର ପ୍ରାରମ୍ଭିକ ଫଳାଫଳ ଅନୁସାରେ ବିଜେଡି ୨୭୮ଟି, ବିଜେପି ୧୮ଟି, କଂଗ୍ରେସ ୧୬ଟି, ସ୍ୱାଧୀନ ୨ଟି ଓ ଅନ୍ୟାନ୍ୟ ୨ଟି ଆସନରେ ଆଗରେ ରହିଛନ୍ତି । ୨୩ଟି ଜିଲ୍ଲାରେ କଂଗ୍ରେସ ଓ ୧୮ଟି ଜିଲ୍ଲାରେ ବିଜେପି ସମ୍ପୂର୍ଣ୍ଣ ମୂଳପୋଛ ହୋଇଥିବାବେଳେ ସମସ୍ତ ଜିଲ୍ଲାରେ ବିଜେଡିର ପ୍ରାର୍ଥୀମାନେ ଆଗରେ ରହିଛନ୍ତି । ବିଜେଡିକୁ ଟକ୍କର ଦେବା ତ ଦୂରର କଥା ଉଭୟ ବିଜେପି ଓ କଂଗ୍ରେସ ତା’ର ପାଖ ମାଡ଼ିବାକୁ ବି ସକ୍ଷମ ହୋଇପାରିନଥିବା ଜିଲ୍ଲ୍ଲା ପରିଷଦ ସଭ୍ୟ ନିର୍ବାଚନୀ ଫଳାଫଳ ଟ୍ରେଣ୍ଡରୁ ସ୍ପଷ୍ଟ ହୋଇଛି । ଆଉ ୨ଦିନର ଗଣତିରେ ଯେ ସେଭଳି କିଛି ଗୋଟେ ‘ଚମତ୍କାର’ ହେବ ଓ ଦୁଇ ବିରୋଧୀ ଦଳ ବିଜେପି ଓ କଂଗ୍ରେସ ବାଜିମାତ୍ କରିବେ ତାହା ବି ଜଣାପଡ଼ୁନି । ବରଂ ନିଜର ଗଡ଼କୁ ବି ଏହି ଦୁଇ ଦଳ ବିଜେପି ଓ କଂଗ୍ରେସ ବଂଚାଇବାକୁ ଅସମର୍ଥ ହୋଇଛନ୍ତି । ୨୦୧୭ ପଂଚାୟତ ନିର୍ବାଚନରେ ମୋଟ ୮୫୩ଟି ଜିଲ୍ଲା ପରିଷଦ ମଧ୍ୟରୁ ବିଜେପି ୪୭୬ଟି, କଂଗ୍ରେସ ୬୦ଟି ଓ ବିଜେଡି ୪୮୦ଟି ସିଟ୍ ହାତେଇଥିଲା । ୩୦ଟି ଜିଲ୍ଲା ପରିଷଦ ମଧ୍ୟରୁ ବିଜେପି ୮ଟି ଜିଲ୍ଲାରେ ଓ କଂଗ୍ରେସ ୨ଟି ଜିଲ୍ଲାରେ ଅଧ୍ୟକ୍ଷ ଓ ପରିଷଦ ଗଢ଼ିଥିବାବେଳେ ଶାସକ ବିଜେଡି ମାତ୍ର ୨୦ଟି ଜିଲ୍ଲା ମଧ୍ୟରେ ନିଜକୁ ସୀମିତ ରଖିପାରିଥିଲା । ଗ୍ରାମାଂଚଳରେ ବିଜେପି ଓ କଂଗ୍ରେସର ଏଭଳି ଶୋଚନୀୟ ପରାଜୟକୁ ନେଇ ଦୁଇ ଦଳ ଯଦିଓ ବିଜେଡି ସରକାରର ଶାସନ କଳକୁ ଦାୟୀ କରୁଛନ୍ତି ତଥାପି ନିର୍ବାଚନୀ ଫଳାଫଳ ବିଜେଡି ପାଇଁ ସବୁ ଦୃଷ୍ଟିରୁ ଉତ୍ସାହଜନକ ରହିଛି । ତେବେ ଏ ସମ୍ପର୍କରେ ପ୍ରତିକ୍ରିୟା ଦେଇ ରାଜନୀତିକ ସମୀକ୍ଷକ ତଥା ବରିଷ୍ଠ ସାମ୍ବାଦିକ ସମ୍ପଦ ମହାପାତ୍ର କହିଛନ୍ତି ଯେ, “ପଂଚାୟତ ନିର୍ବାଚନରେ ବିଜେଡି ଭଲ ପ୍ରଦର୍ଶନ କରିବାର ବିଭିନ୍ନ କାରଣ ରହିଛି । କଂଗ୍ରେସ ରାଜ୍ୟରେ ଦିନକୁ ଦିନ ତା’ର ଅସ୍ତିତ୍ୱ ହରାଉଛି ଓ ଲୋକେ ମଧ୍ୟ କଂଗ୍ରେସକୁ ଆଉ ବିଶ୍ୱାସକୁ ନେଉନାହାନ୍ତି କି କଂଗ୍ରେସ ମଧ୍ୟ ସେ ଦିଗରେ ପ୍ରୟାସ ବି କରୁନି । ବିଜେପି ଏଠି ବିଜେଡିକୁ ଟକ୍କର ଦେବା ପରିବର୍ତ୍ତେ ୨୦୧୯ ସାଧାରଣ ନିର୍ବାଚନ ପରଠୁ ଉଭୟ ‘ଲୁଛାଚପା’ରେ ସମ୍ପର୍କ ରଖି ରାଜନୀତିକ ସ୍ୱାର୍ଥ ପାଇଁ ପରସ୍ପରକୁ ସହଯୋଗର ହାତ ବଢ଼ାଉଛନ୍ତି । ଯେଉଁଥିପାଇଁ ରାଜ୍ୟ ବିଜେପିରେ ଏବେ ନେତୃତ୍ୱର ସଙ୍କଟ ଜଳଜଳ । ବିଜେପିର କେନ୍ଦ୍ରୀୟ ନେତୃତ୍ୱ ମଧ୍ୟ ଓଡ଼ିଶାରେ କାହାରିକୁ ଆଗକୁ ଆଣୁନି । ଯାହାକି ବିଜେପିର କର୍ମୀ ଓ ସାଧାରଣ ଭୋଟରଙ୍କୁ ବି ଦ୍ୱନ୍ଦ୍ୱରେ ରଖିଛି । ତା’ଛଡ଼ା ନବୀନ ପଟ୍ଟନାୟକ ଏଭଳି ଜଣେ ନେତା ଯିଏ ନିର୍ବାଚନ ସରିବା ପରଦିନ ହିଁ ଆଉ ଗୋଟିଏ ନିର୍ବାଚନ ପାଇଁ ନିଜକୁ ପ୍ରସ୍ତୁତ କରିଥାନ୍ତି । ନିର୍ବାଚନ ଜିତିଲେ ହିଁ ଶାସନରେ ରହିହେବ ସେ କଥା ନବୀନ ଭଲଭାବେ ଜାଣନ୍ତି । ଆଉ ଆବଶ୍ୟକତା ଥାଉ କି ଥାଉ, ରାଜ୍ୟବାସୀଙ୍କୁ ସରକାରୀ ଅର୍ଥରେ ଯୋଜନା କରି ଲୋଭନୀୟ ଭେଟି ଦେଇ ଦଳ ସପକ୍ଷରେ ଜନମତ ପ୍ରସ୍ତୁତ କରିଥାନ୍ତି । ପଂଚାୟତ ନିର୍ବାଚନରେ ପ୍ରଚାରକୁ ଓହ୍ଲାଇନଥିବା ନବୀନ କିନ୍ତୁ ନିର୍ବାଚନ ପୂର୍ବରୁ ସବୁ ଜିଲ୍ଲା ବୁଲି ବିଜୁ କାର୍ଡ ବାଣ୍ଟିଲେ । ଆଉ ସରକାରୀ ଅର୍ଥରେ ଦଳ ପାଇଁ ପ୍ରଚାର ବି ହୋଇଗଲା । ନବୀନଙ୍କ ଏଭଳି ନିର୍ବାଚନୀ ଜିତିବା ତୁଷ୍ଟୀକରଣ ଯୋଜନା ପାଇଁ ଓଡ଼ିଶା ଭଳି ରାଜ୍ୟ ଉପରେ ୧ଲକ୍ଷ କୋଟି ଟଙ୍କାରୁ ଅଧିକ ଋଣବୋଝ ରହିଛି । ନବୀନଙ୍କ ଏହି ବଦାନ୍ୟତା ହିଁ ଆମ ରାଜ୍ୟର ପରବର୍ତ୍ତୀ ପୀଢ଼ୀ ପାଇଁ ବଡ଼ ଚିନ୍ତାର କାରଣ ହେବ । ଜାତୀୟ ରାଜନୀତିର ବାଧ୍ୟବାଧକତା ହିଁ ବିଜେପିକୁ ଏଠି ଚୁପ୍ ରଖିଛି ଆଉ ବିଜେଡି ମଧ୍ୟ ଏହି ସୁବିଧାରୁ ଅଧିକ ଫାଇଦା ନେଉଛି ।” ତେବେ ବିଜେପିର ଜଣେ ବରିଷ୍ଠ ନେତା ନିଜ ନାମ ଗୁପ୍ତ ରଖିବା ସର୍ତ୍ତରେ କହିଛନ୍ତି ଯେ, ଏବେ ଯେହେତୁ ଉତ୍ତରପ୍ରଦେଶ, ପଞ୍ଜାବ ଭଳି ଗୁରୁତ୍ୱପୂର୍ଣ୍ଣ ରାଜ୍ୟରେ ବିଧାନସଭା ନିର୍ବାଚନ ହେଉଛି ତେଣୁ ଓଡ଼ିଶାର ପଂଚାୟତ ନିର୍ବାଚନ ଉପରେ କେନ୍ଦ୍ରୀୟ ନେତୃତ୍ୱ ସେତେଟା ଫୋକସ ଦେଉନାହାନ୍ତି । ରାଜ୍ୟ ବିଜେପି ୟୁନିଟ୍ ହିଁ ଏହି ନିର୍ବାଚନକୁ ଦେଖୁଛି । ବିଜେଡି ସରକାର ବିରୁଦ୍ଧରେ ଅନେକ କିଛି ପ୍ରସଙ୍ଗ ରହିଥିଲେ ବି ତାକୁ ଦଳ ଲୋକଙ୍କ ନିକଟରେ ପ୍ରଭାବଶାଳୀ ଢଙ୍ଗରେ ପହଂଚାଇବାରେ ସକ୍ଷମ ହୋଇନି । ତା’ଛଡ଼ା ନିର୍ବାଚନ ପୂର୍ବରୁ ଦଳର ବରିଷ୍ଠ ନେତା ଜୁଏଲ ଓରାମ ଓ ବିଶେଶ୍ୱର ଟୁଡୁଙ୍କ ଭଳି ନେତା ବିବାଦୀୟ ହେଲେ, ଯାହାକୁ ବିଜେଡି ଅତିରଞ୍ଜିତ କରି ଲୋକଙ୍କ ପାଖରେ ରଖିପାରିଲା । ୨୦୧୭ ପଂଚାୟତ ନିର୍ବାଚନରେ ଦଳୀୟ ପ୍ରାର୍ଥୀଙ୍କୁୁ ଦଳ ପକ୍ଷରୁ ଯେଭଳି ସହଯୋଗ ମିଳୁଥିଲା, ତାହା ଏଥର ହୋଇପାରିନି । ତେଣୁ ବିଭିନ୍ନ କାରଣ ପାଇଁ ଦଳ ନିଜକୁ ଠିକ୍ ଭାବେ ପଂଚାୟତ ନିର୍ବାଚନରେ ଲଢ଼ାଇ ପାରିନି । ଏହା ବି ଦଳ ଉପରେ ଆଗାମୀ ଦିନରେ ପ୍ରତିକୂଳ ପ୍ରଭାବ ପକାଇବ ବୋଲି ସେ କହିଛନ୍ତି ।

ପ୍ରତିଶୃତି ଭୁଲି ଉପଭୋକ୍ତା ଙ୍କ ଉପରେ ଜୁଲମ୍ କରୁଛି ଟାଟା ପାୱାର….!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଉପଭୋକ୍ତା ଙ୍କ ଉପରେ ବକେୟା ଟଙ୍କା ଆଦାୟ ଆଳରେ ଜୁଲମ୍ କରୁଛି ଟାଟା ପାୱାର । ୨ ବର୍ଷରେ ସଂସ୍କାର ବଦଳରେ ଟାଟା ପାୱାର ବିଜୁଳି ବ୍ୟବସ୍ଥାକୁ ହୁଗୁଲା କରିଛି । ଟାଟାର ଏଭଳି କାର୍ଯ୍ୟ ବିରୁଦ୍ଧରେ ପ୍ରତିରୋଧର ସ୍ୱର ଉଠାଇଛନ୍ତି ଜନତା । ଏଥିପାଇଁ ଉପଭୋକ୍ତା ସଙ୍ଘ ଓ ସାଧାରଣ ଜନତା ଏକାଠି ହୋଇ ଅଣ୍ଟା ଭିଡ଼ିଲେଣି । ବିଦ୍ୟତ କ୍ଷେତ୍ରରେ ସଂସ୍କାର ଆଣିବା ପାଇଁ ରାଜ୍ୟ ସରକାର ଘରୋଇ କରଣ କରି ଟାଟାକୁ ପାୱାରକୁ ୨୦୨୦ ମସିହାରେ ଦାଇତ୍ୱ ଦେଲେ । ବିଦ୍ୟୁତ ବିତରଣ ର କ୍ଷତି କମାଇବା ସହ ଭିତ୍ତି ଭୂମି ବିକାଶ ଜରିଆରେ ସଂସ୍କାର ଆଣିବା ପାଇଁ ପ୍ରତିଶ୍ରୁତି ବଦ୍ଧ ହୋଇ ଟାଟା ପାୱାର ଦାୟିତ୍ୱ ନେଇ ଥିଲା । ଦାୟିତ୍ୱ ନେବାର ୨ ବର୍ଷ ପରେବି ବିତରଣ କ୍ଷତି କମାଇ ପାରିନି । ପରନ୍ତୁ ନିଜ ଦାୟିତ୍ୱ ଭୁଲି ଟାଟା ମନ୍ ମାନି ଜାହିର କରି ଉପଭୋକ୍ତା ଙ୍କୁ ଶୋଷଣ କରିବାରେ ଲାଗିପଡିଛି । ନିଜର ଭୁଲ ପାଇଁ ଶୁଳ୍କ ଵୃଦ୍ଧି କରି ଜନସଧାରଣ ଙ୍କ ମୁଣ୍ଡର ବୋଝ ଲଦି ଦେବାକୁ ବର୍ତ୍ତମାନ ଓଇଆରସିର ଜନ ଶୁଣାଣୀ ରେ ଟାଟା ପାୱାର ନିଜର ଉଦ୍ୟମ ଚଳାଇ ଥିବା ଅଭିଯୋଗ ଉଠିଛି । ପୂର୍ବ ବର୍ଷ ପ୍ରଥମେ ୨୦ ପଇସା ଏବଂ ପରେ ୩୦ ପଇସା କରି ମୋଟ ୫୦ ପଇସା ବୃଦ୍ଧି କରି ଟାଟା ଉପଭୋକ୍ତା ଙ୍କ ମୁଣ୍ଡରେ ବୋଝ ଲଦିଦେଇଛି । ଆମ ରାଜ୍ୟରେ ବର୍ତ୍ତମାନ ସାତ ହଜାର ୟୁନିଟ ବିଦ୍ୟୁତ ସର୍ପଲେସ ଥିବା ବେଳେ କାହିଁକି ବିଦ୍ୟୁତ ଶୁକ୍ଳ ଵୃଦ୍ଧି ହେବ ବୋଲି କଥା ଉଠିଛି । ନିଯୁକ୍ତି ପ୍ରାପ୍ତ ମିଟର ରିଡ଼ର ମାନେ ସେମାନଙ୍କ କାର୍ଯ୍ୟ ସଠିକ ଭାବେ ତୁଲାଉ ଥିବାବେଳେ ଟାଟା ଦ୍ୱାରା ନିଯୁକ୍ତି ପ୍ରାପ୍ତ କମ୍ପାନୀର କର୍ମଚାରୀ ଏମାନଙ୍କୁ ଶୁଳ୍କ ବୃଦ୍ଧି କରି ବିଲ ଦେବା ନିମନ୍ତେ ପ୍ରବର୍ତ୍ତାଉଥିବା  ଏବଂ ଏହାକୁ ନମାନିଲେ ଛଟେଇ କରୁଥିବା ଅଭିଯୋଗ ଆସିଛି । ଏଭଳି ବର୍ଦ୍ଧିତ ଶୁଳ୍କର ବୃଦ୍ଧିକୁ ଉପଭୋକ୍ତା ବିରୋଧ କଲେ ସେମାନଙ୍କ ମିଟର ଠିକ ନଥିବା କହି ମିଟର ବଦଳାଇବା କୁ ତାଗିଦ କରିବା ସହ ବିଦ୍ୟୁତ ସଂଯୋଗ ବିଛିନ୍ନ କରୁଥିବା ଅଭିଯୋଗ ହେଉଛି । ଉପୋଭୋକ୍ତା ଙ୍କ ବୃହତ୍ ସ୍ୱାର୍ଥ ଦୃଷ୍ଟି ରୁ ସରକାର ଏଥି ପ୍ରତି ଦୃଷ୍ଟି ଦେଇ କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ ସାଧାରଣ ରେ ଦାବି ହେଉଛି ।

ପଦ୍ମପୁର କ ଜୋନ୍ ରେ ବିଜେଡି ର ଜିଲ୍ଲା ପରିଷଦ ପ୍ରାର୍ଥୀ ବିଜୟୀ …!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ରାୟଗଡା ଜିଲ୍ଲା ପଦ୍ମପୁର କ ଜୋନ ଜିଲ୍ଲା ପରିଷଦ ଆସନ ର ଫଳାଫଳ ଘୋଷଣା ହୋଇସାରିଛି । ଏଥିରେ ବିଜେଡି ର ଡର୍ଗୀନ୍ ଶବର ନିଜ ନିକଟ ତମ ପ୍ରତିଦ୍ବନ୍ଦୀ କଂଗ୍ରେସ ର ସବିତା ଗମାଙ୍ଗ ଙ୍କ ଠାରୁ ୧୪୮୬ ଗୋଟି ଅଧିକ ଭୋଟ ପାଇ ବିଜୟ ହୋଇଛନ୍ତି । ବିଜେଡି କୁ ୫୬୧୮ , କଂଗ୍ରେସ ୪୧୩୨ , ବିଜେପି ୩୦୭୯ ଭୋଟ ମିଳିଥିବା ବେଳେ ୬୬୪ ଭୋଟ ନାକଚ ହୋଇଥିବା ସୂଚନା ମିଳିଛି । ବର୍ତ୍ତମାନ ପଦ୍ମପୁର ଠାରେ ଖୁସିର ଲହରୀ ଖେଳିଯାଇଛି ।

ଶାସକ ଦଳକୁ ଜିତାଇବାର ଗଳାବାଟ ବାହାର କରିଛନ୍ତି ରାଜ୍ୟ ନିର୍ବାଚନ କମିଶନର – ବିଜେପି

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ଶାସକ ବିଜେଡିକୁ ଜିତାଇବା ପାଇଁ ରାଜ୍ୟ ନିର୍ବାଚନ କମିଶନର ଗଳାବାଟ ବାହାର କରିଛନ୍ତି। ମନ୍ଦ ଉଦ୍ଦେଶ୍ୟ ରଖି ଜାରି କରାଯାଇଥିବା ନିର୍ବାଚନ କମିଶନଙ୍କ ସର୍କୁଲାର-୨୧୫୬କୁ ତୁରନ୍ତ ପ୍ରତ୍ୟାହାର କରିବା ପାଇଁ ବିଜେପି ଦାବି କରିଛି। ଏହାସହିତ ଏହି ପ୍ରତିନିଧି ଦଳ ମଧ୍ୟ ଆଜି ରାଜ୍ୟ ନିର୍ବାଚନ କମିଶନଙ୍କ କାର୍ଯ୍ୟାଳୟ ଆଗରେ ଧାରଣାରେ ବସିଥିଲେ। ବିଜେପି ରାଜ୍ୟ ସଭାପତି ସମୀର ମହାନ୍ତି ଆଜି ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ନିର୍ବାଚନ କମିଶନଙ୍କ ନିରପେକ୍ଷତା ଉପରେ ପ୍ରଶ୍ନ ଉଠାଇବା ସହ ଏକ ଉଚ୍ଚସ୍ତରୀୟ ପ୍ରତିନିଧି ଦଳ ଆଜି ରାଜ୍ୟ ନିର୍ବାଚନ କମିଶନଙ୍କୁ ଭେଟି ଭୋଟ ଗଣତି ପକ୍ରିୟା ପାଇଁ ନିର୍ବାଚନ କମିଶନ ଦୃଢ଼ ଓ ସ୍ୱଚ୍ଛ ପଦକ୍ଷେପ ନିଅନ୍ତୁ ବୋଲି ଦାବି କରିଛି । ଶ୍ରୀ ମହାନ୍ତି କହିଛନ୍ତି ଯେ, ପଂଚାୟତ ନିର୍ବାଚନରେ ଭୋଟିଂ ସମାପ୍ତ ହେବା ପରେ ପ୍ରିଜାଇଡିଂ ଅଫିସର ଦେଇଥିବା ସାର୍ଟିଫିକେଟ ଫର୍ମ-୧୧ରେ ଉଲ୍ଲେଖ ହୋଇଥିବା ସମୁଦାୟ ଭୋଟ ସଂଖ୍ୟା ଏବଂ ଭୋଟ ବାକ୍ସରୁ ବାହାରୁଥିବା ଭୋଟ ସଂଖ୍ୟାରେ ତାଳମେଳ ନ ରହିଲେ ଏହାକୁ କ’ଣ ଭୋଟ ଟାମ୍ପରିଂ କୁହାଯିବ ନାହିଁ ? ସେହିପରି ଯଦି, ଭୋଟ ବାକ୍ସରେ ବାହାରିଥିବା ବାଲାଟ୍ ପେପର ହିଁ ସିଦ୍ଧ, ତା’ହେଲେ ମତଦାନ ସମାପ୍ତ ହେବା ପରେ ପ୍ରିଜାଇଡିଂ ଅଫିସର ଦ୍ୱାରା ପ୍ରଦାନ କରାଯାଇଥିବା ସାର୍ଟିଫିକେଟ (ଫର୍ମ-୧୧) କେବଳ ଏକ ପ୍ରହସନ ଥିଲା କି ? ଏହାକୁ ନେଇ ଆଜି ରାଜ୍ୟ ସଭାପତି ଶ୍ରୀ ମହାନ୍ତିଙ୍କ ନେତୃତ୍ୱରେ ଯାଇଥିବା ପ୍ରତିନିଧି ଦଳ ଆଜି ରାଜ୍ୟ ନିର୍ବାଚନ କମିଶନଙ୍କୁ ଭେଟି ସ୍ପଷ୍ଟୀକରଣ ମାଗିଥିଲେ । ଏଥି ସହ ମନ୍ଦ ଉଦ୍ଦେଶ୍ୟ ରଖି ନିର୍ବାଚନ କମିଶନ ଲୁଚାଛପାରେ ଜାରି କରିଥିବା ଚିଠି ନମ୍ବର ୨୧୫୬କୁ ତୁରନ୍ତ ପ୍ରତ୍ୟାହାର କରିବା ସହ ଆସନ୍ତା କାଲିଠୁ ପର୍ଯ୍ୟାୟକ୍ରମେ ଅନୁଷ୍ଠିତ ହେବାକୁ ଥିବା ପଂଚାୟତ ଭୋଟ ଗଣତି ପକ୍ରିୟା ପାଇଁ ନିର୍ବାଚନ କମିଶନ ଦୃଢ଼ ଓ ସ୍ୱଚ୍ଛ ପଦକ୍ଷେପ ନେବା ଦାବି କରିଥିଲା । ଆଲୋଚନା ବେଳେ ନିର୍ବାଚନ କମିଶନ ନିଜ ତୃଟିକୁୁ ସ୍ୱୀକାର କରିବା ସହିତ ଯଥାଶୀଘ୍ର ସମସ୍ତ ବିଡିଓ ଏବଂ ଜିଲ୍ଲାପାଳଙ୍କ ସମେତ ସମସ୍ତ ନିର୍ବାଚନ ଅଧିକାରୀଙ୍କୁ ନୂତନ ସଂଶୋଧିତ ସର୍କୁଲାର ପଠାଯିବ ବୋଲି ପ୍ରତିଶୃତି ଦେଇଛନ୍ତି । ମନ୍ଦ ଉଦ୍ଦେଶ୍ୟ ରଖି ଜାରି କରାଯାଇଥିବା ନିର୍ବାଚନ କମିଶନଙ୍କ ସର୍କୁଲାର ସଂଖ୍ୟା- ୨୧୫୬କୁ ପ୍ରତ୍ୟାହାର ନହେବା ପର୍ଯ୍ୟନ୍ତ ଭାରତୀୟ ଜନତା ପାର୍ଟୀ ନିର୍ବାଚନ କମିଶନଙ୍କ କାର୍ଯ୍ୟାଳୟ ସମ୍ମୁଖରେ ଆନ୍ଦୋଳନ ଜାରି ରଖିବ ବୋଲି ରାଜ୍ୟ ସଭାପତି ଶ୍ରୀ ସମୀର ମହାନ୍ତି ଘୋଷଣା କରିବା ପରେ ନିର୍ବାଚନ କମିଶନ ନିଜ ତୃଟି ସୁଧାରି ନୂତନ ସଂଶୋଧିତ ନିର୍ଦ୍ଦେଶନାମା ଜାରୀ କରିଛନ୍ତି । ଏହାଫଳରେ ମତଦାନ ସମାପ୍ତ ହେବା ପରେ ପ୍ରିଜାଇଡିଂ ଅଫିସର ଦ୍ୱାରା ପ୍ରଦାନ କରାଯାଇଥିବା ସାର୍ଟିଫିକେଟ (ଫର୍ମ-୧୧) ଅନୁଯାୟୀ ଭୋଟ ଗଣତି କରାଯିବ । ରାଜ୍ୟ ସଭାପତିଙ୍କ ସମେତ ଏହି ପ୍ରତିନିଧି ଦଳରେ ବିଧାୟକ ଲଲିତେନ୍ଦୁ ବିଦ୍ୟାଧର ମହାପାତ୍ର, ଭୃଗୁ ବକ୍ସିପାତ୍ର, ସୁଦୀପ୍ତ ରାୟ, ରମାରଂଜନ ବଳିୟାର ସିଂହ, ଯତୀନ ମହାନ୍ତିି ଓ ଧୀରେନ ସେନାପତି, ସୁରଥ ବିଶ୍ୱାଳ, ଶଙ୍କର୍ଷଣ ପରିଡା ଓ ଜୟନ୍ତ କୁମାର ଜେନା ପ୍ରମୁଖ ଉପସ୍ଥିତ ଥିଲେ ।

ବଦଳିବନି ନାଁ, ଘୁଞ୍ଚିବନି ରିଲିଜ ତାରିଖ ; ରୋକ୍‌ଠୋକ୍‌ କହିଲେ ସୁପ୍ରିମକୋର୍ଟ…!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ଗଙ୍ଗୁବାଇକୁ ମିଳିଲା ସୁପ୍ରିମ ଆଶ୍ୱସ୍ତି। ଶାନ୍ତିର ନିଶ୍ୱାସ ନେଲେ ନିର୍ଦ୍ଦେଶକ ସଞ୍ଜୟ ଲୀଲା ଭଂସାଲି ଓ ଅଭିନେତ୍ରୀ ଆଲିଆ ଭଟ୍ଟ। ଲାଗି ରହିଥିବା ବିବାଦ ଉପରେ ପୂର୍ଣ୍ଣଛେଦ ପକାଇଛନ୍ତି ସର୍ବୋଚ୍ଚ ଅଦାଲତ। ଆସନ୍ତାକାଲି ରିଲିଜ ହେବାକୁ ଥିବା ଫିଲ୍ମ ‘ଗଙ୍ଗୁବାଇ କାଠିଆୱାଡି’ ଉପରେ ରୋକ ଲଗାଇବା ଆବେଦନକୁ ଖାରଜ କରିଦେଇଛନ୍ତି ସୁପ୍ରିମକୋର୍ଟ। ‘ବଦଳିବନି ନାଁ, ଘୁଞ୍ଚିବନି ରିଲିଜ’ ଏଭଳି କିଛି ରୋକ୍‌ଠୋକ୍‌ ଶୁଣାଇ ଦେଇଛନ୍ତି ସୁପ୍ରିମକୋର୍ଟ। ଗଙ୍ଗୁବାଇଙ୍କ ପରିବାର ଲୋକେ ଆଲିଆ ଭଟ୍ଟଙ୍କ ଫିଲ୍ମ ‘ଗଙ୍ଗୁବାଇ କାଠିଆୱାଡି’ ଉପରେ ପ୍ରଶ୍ନ ଉଠାଇଥିଲେ। ଫିଲ୍ମର ନାଁକୁ ନେଇ ସେମାନେ ଆପତ୍ତି ଉଠାଇଥିଲେ। ଏହି ନାଁକୁ ବଦଳାଇବା ପାଇଁ ପରିବାର ଲୋକେ ସୁପ୍ରିମ କୋର୍ଟରେ ଆବେଦନ କରିଥିଲେ। ତେବେ ଶେଷ ମୁହୂର୍ତ୍ତରେ ଫିଲ୍ମର ଟାଇଟଲ ବଦଳାଇବା ସମ୍ଭବ ନୁହେଁ ବୋଲି କୋର୍ଟରେ ପକ୍ଷ ରଖିଥିଲେ ନିର୍ମାତା। ଫିଲ୍ମରେ ଗଙ୍ଗୁବାଈଙ୍କୁ ଛବି ଏବଂ ତାଙ୍କ ଚରିତ୍ରକୁ ନେଇ କୌଣସି ବି ପ୍ରକାରରେ ଅପମାନିତ କରାଯାଇନଥିବା ଦାବି କରିଥିଲେ। ଅଭିଯୋଗକାରୀ ଫିଲ୍ମ ନ ଦେଖି ଏଭଳି ଦାବି ଉଠାଇବା ଭୁଲ୍‌ ବୋଲି ଭଂସାଲି ପ୍ରଡକ୍ସନର ଓକିଲ କହିଥିଲେ। ଏହାପରେ ସୁପ୍ରିମ କୋର୍ଟ ବଚାରପତି  ଜେକେ ମହେଶ୍ୱରୀ ଏହି ଗଙ୍ଗୁବାଇଙ୍କ ପୋଷ୍ୟ ପୁତ୍ର ଆଣିଥିବା ଅଭିଯୋଗକୁ ଖାରଜ କରିବା ସହ ଫିଲ୍ମ ଉପରେ ରୋକ ଲଗାଇବାକୁ ମନା କରିଦେଇଛନ୍ତି। ଦେଶ ବିଦେଶର ହଜାର ହଜାର ଥିଏଟରରେ ଏକା ସହ ଏହି ଫିଲ୍ମ ରିଲିଜ ହେବ। ତେବେ ଫିଲ୍ମର ରିଲିଜ ଅଟକି ଗଲେ ପ୍ରଡ୍ୟୁସର, ଡାଇରେକ୍ଟର, ଲେଖକ, ଡିଷ୍ଟ୍ରିବ୍ୟୁଟର, ଥିଏଟର, ଦର୍ଶକ ସମେତ ଅନେକଙ୍କ ଉପରେ ପ୍ରଭାବ ପଡିବ। ସୂଚନାଯୋଗ୍ୟ ଯେ, ଗଙ୍ଗୁବାଇ କାଠିଆୱାଡି ଟ୍ରେଲର ରିଲିଜ ହେବା ପରଠାରୁ ଉଭୟ ସଞ୍ଜୟ ଏବଂ ଆଲିଙ୍କ ପାଇଁ  ସମସ୍ୟା ବଢିଥିଲା। ମୁଭିରେ ଗଙ୍ଗୁବାଈଙ୍କ ଚରିତ୍ରକୁ ନକାରାତ୍ମକ ଭାବେ ଚିତ୍ରିତ କରାଯାଇଥିବା ଅଭିଯୋଗ ହୋଇଥିଲା। ଗଙ୍ଗୁବାଈଙ୍କୁ ଜଣେ ସାମାଜିକ କର୍ମୀ ବଦଳରେ ଜଣେ ଦେହଜୀବୀ ଭାବେ ଚିତ୍ରଣ କରାଯାଇଥିବା ଅଭିଯୋଗ ହୋଇଥିଲା। ଗଙ୍ଗୁବାଈଙ୍କ ପୋଷ୍ୟପୁତ୍ର ବାବୁ ରାଓଜୀ ଶାହା ଓ ତାଙ୍କ ନାତୁଣୀ ଭାରତୀ ଶାହା ସିନେମାର କାହାଣୀକୁ ଜୋରଦାର ବିରୋଧ କରିଛନ୍ତି। ସେ ପ୍ରଥମେ ବମ୍ବେ ହାଇକୋର୍ଟ ଓ ପରେ ସୁପ୍ରିମକୋର୍ଟରେ ଆଲିଆ ଓ ଏହାର ପ୍ରଯୋଜକ ତଥା ନିର୍ଦ୍ଦେଶକ ଭଂସାଲି ନାଁରେ ମାମଲା ଦାଏର କରିଥିଲେ।

ରାଗିଣୀଙ୍କ ସିନ୍ଥିରେ ସିନ୍ଦୂର ଦେଲେ ନିର୍ଦ୍ଦେଶକ ବିକ୍ରମ ଶଙ୍କର….!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ହାତକୁ ଦି’ ହାତ ହେଲେ ଓଲିଉଡ୍‌ର ଚୁଲ୍‌ବଲି ଷ୍ଟାଇଲିଷ୍ଟ୍‌ ନାୟିକା ରାଗିଣୀ ସୁତ୍ରଧର। ସେ ବିବାହ ବନ୍ଧନରେ ବାନ୍ଧି ହୋଇ ଯାଇଛନ୍ତି। ଗୋଆର ଚଳଚ୍ଚିତ୍ର ନିର୍ଦ୍ଦେଶକ ବିକ୍ରମ ଶଙ୍କରଙ୍କୁ ସେ ବିବାହ କରିଛନ୍ତି। ଉଭୟ ପରିବାର ସଦସ୍ୟ ଓ ବନ୍ଧୁବାନ୍ଧବଙ୍କ ଉପସ୍ଥିତି ବିବାହ ସମ୍ପନ୍ନ ହୋଇଛି। ବିବାହ ପୂର୍ବରୁ ହୋଇଥିଲା ରଙ୍ଗାରଙ୍ଗ ସଂଗୀତ କାର୍ଯ୍ୟକ୍ରମ। ଏଥିରେ ବହୁ ଜଣାଶୁଣା ଅଭିନେତା ଓ ଅଭିନେତ୍ରୀ ଯୋଗଦେଇ ଧୁମ୍‌ ମଚାଇଥିଲେ। ରାଗିଣୀ ଧଳା ରଙ୍ଗର ଲେହେଙ୍ଗାରେ ଗର୍ଜିୟସ୍‌ ଲାଗୁଥିଲେ। ଆଉ ବିକ୍ରମ ନୀଳ ରଙ୍ଗର ସେରୱାନୀ ପରିଧାନ ହ୍ୟାଣ୍ଡସମ୍‌ ଲାଗୁଥିଲେ। ସଙ୍ଗୀତ ସେରେମନୀ ଯୋଗଦେବା ପରେ ରାଗିଣୀ ନିଜ ଇନ୍‌ଷ୍ଟାରେ ଦୁଇଟି ଫଟୋ ସେୟାର କରିଥିଲେ। ଆଉ ସେହି ଫଟୋରେ ଲେଖିଥିଲେ, ଜୀବନର ନୂଆ ଯାତ୍ରା ଆରମ୍ଭ କରିବାକୁ ଯାଉଥିବାରୁ ସମସ୍ତଙ୍କ ସ୍ନେହ ଓ ଆଶୀର୍ବାଦ ଲୋଡୁଛି। ରାଗିଣୀଙ୍କ ଏହି କେଇପଦ କଥା ତାଙ୍କ ପ୍ରଶଂସକଙ୍କ ଦିଲ୍‌ କିଣି ନେଇଛି। ପ୍ରଶଂସକମାନେ ତାଙ୍କୁ ମନଭରି ପ୍ରଶଂସା କରିଛନ୍ତି।

ରାଗିଣୀଙ୍କ ଫିଲ୍ମ କ୍ୟାରିୟର ୨୦୧୨ ମସିହାରେ ଆରମ୍ଭ ହୋଇଥିଲା। ସେ ପ୍ରଥମେ ବଙ୍ଗଳା ଫିଲ୍ମ ‘ଏକ ତୁକୁ ଛୋୟା ଲାଗେ’ ଫିଲ୍ମରୁ ଅଭିନୟ ଜୀବନ ଆରମ୍ଭ କରିଥିଲେ। ତା’ପରେ ଓଲିଉଡ୍‌ ମୁହାଁ ହୋଇଥିଲେ। ସେ ‘ମୁଁ ଏକା ତୁମର, ଗଡଫାଦର, ହରିଓମ୍‌ ହରି, ତୁମେ ଥିଲେ ସାଥୀରେ, ଦେଖା ହେଲା ପ୍ରେମ ହେଲା ପରି ଚଳଚ୍ଚିତ୍ରରେ ଅଭିନୟ କରିଥିଲେ। ତାଙ୍କ ଅଭିନୟରେ ପାଗଳ ହୋଇଥିଲେ ଓଲିଉଡ୍‌ ପ୍ରଶଂସକ। ଏହାବ୍ୟତୀତ ରାଗିଣୀ- ମିତାଲି ଗେଷ୍ଟ ହାଉସ୍‌, ୧୦୦ ରୁପଏ ନୋଟ୍‌, ସ୍ୱର୍ଣ୍ଣ ମୁଦ୍ରା ପରି ବହୁ ଫିଲ୍ମରେ ଅଭିନୟ କରିଛନ୍ତି। ସେ ତେଲୁଗୁ ଓ କନ୍ନଡ଼ ଫିଲ୍ମରେ ମଧ୍ୟ ନଜର ଆସିଛନ୍ତି।

ମାର୍ଚ୍ଚ ୨୪ରେ ପୌର ନିର୍ବାଚନ, ଆଜିଠୁ ଲାଗୁ ହେଲା ଆଚରଣ ବିଧି …!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ପଂଚାୟତ ନିର୍ବାଚନ ଭୋଟ ଗଣତି ଆସନ୍ତାକାଲିଠୁ ଆରମ୍ଭ ହେବାକୁ ଥିବାବେଳେ ରାଜ୍ୟ ନିର୍ବାଚନ କମିଶନର ଆଜି ପୌର ନିର୍ବାଚନ ପାଇଁ କାର୍ଯ୍ୟସୂଚୀ ଘୋଷଣା କରିଛନ୍ତି । ଆସନ୍ତା ମାର୍ଚ୍ଚ ୨୪ତାରିଖରେ ରାଜ୍ୟର ୧୦୬ଟି ପୌର ପରିଷଦ ଓ ଏନଏସି ଏବଂ ୩ଟି ମହାନଗର ନିଗମରେ ପ୍ରାୟ ୪୧ଲକ୍ଷ ଭୋଟର ସେମାନଙ୍କର ମତାଧିକାର ସାବ୍ୟସ୍ତ କରିବେ ।  କେବଳ ପୁରୀ ପୌର ପରିଷଦ ଏବଂ ଭଦ୍ରକ ପୌର ପରିଷଦର ୪ ନମ୍ବର ୱାର୍ଡରେ ନିର୍ବାଚନକୁ ନେଇ କୋର୍ଟରେ ମାମଲା ଥିବାରୁୁ ସେଠାରେ ନିର୍ବାଚନ ହେବ ନାହିଁ । ଏହି ପୌର ନିର୍ବାଚନ ସମଗ୍ର ରାଜ୍ୟରେ ଗୋଟିଏ ଦିନରେ ହେବ ଓ ଭୋଟ ଗଣତି ମାର୍ଚ୍ଚ ୨୬ତାରିଖରେ ହେବ । ଚଳିତଥର ପୌର ପରିଷଦ ଓ ଏନଏସି ଅଧ୍ୟକ୍ଷ ପଦବୀ ଓ ମହାନଗର ନିଗମରେ ମେୟର ପଦବୀ ପାଇଁ ସିଧାସଳଖ ନିର୍ବାଚନ ହେବ । ୨୦୧୮ ମସିହାରୁ ଅଧିକାଂଶ ପୌର ସଂସ୍ଥାର କାର୍ଯ୍ୟକାଳ ଶେଷ ହୋଇସାରିଥିଲା । ରାଜ୍ୟ ନିର୍ବାଚନ କମିଶନର ଆଦିତ୍ୟ ପ୍ରସାଦ ପାଢ଼ୀ ଆଜି ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ରାଜ୍ୟର ମୋଟ ୪୭ଟି ପୌର ପରିଷଦ, ୫୯ଟି ଏନଏଏସି ଓ ୩ଟି ମହାନଗର (ଭୁବନେଶ୍ୱର, କଟକ ଓ ବ୍ରହ୍ମପୁର)ରେ ଆସନ୍ତା ମାର୍ଚ୍ଚ ୨୪ତାରିଖରେ କାଉନସିଲର/କର୍ପୋରେଟର, ଅଧ୍ୟକ୍ଷ/ମେୟର ପଦବୀ ନିମନ୍ତେ ନିର୍ବାଚନ ହେବ । ଏଥିପାଇଁ ସ୍ଥାନୀୟ ନିର୍ବାଚନ ଅଧିକାରୀମାନେ ବିଧିବଦ୍ଧ ଭାବେ ଫେବୃୟାରୀ ୨୮ତାରିଖରେ ବିଜ୍ଞପ୍ତି ଜାରି କରିବେ । ମାତ୍ର ଆଜି ନିର୍ବାଚନ କାର୍ଯ୍ୟସୂଚୀ ଘୋଷଣା ସହ ଭୋଟ ହେବାକୁ ଥିବା ସବୁ ପୌରାଂଚଳରେ ଆଦର୍ଶ ଆଚରଣ ବିଧି ଲାଗୁ ହୋଇଛି । ଯାହାକି ମାର୍ଚ୍ଚ ୨୬ତାରିଖ ପର୍ଯ୍ୟନ୍ତ ବଳବତ୍ତର ରହିବ । ଏହି ସମସ୍ତ ପୌର ନିର୍ବାଚନ ପାଇଁ ଆସନ୍ତା ମାର୍ଚ୍ଚ ୨ରୁ ୭ତାରିଖ ପର୍ଯ୍ୟନ୍ତ ନାମାଙ୍କନ ପତ୍ର ଦାଖଲ, ମାର୍ଚ୍ଚ ୯ତାରିଖରେ ନାମାଙ୍କନ ପତ୍ର ଯାଂଚ ଓ ୧୪ତାରିଖ ଅପରାହ୍ନ ୩ଟା ସୁଦ୍ଧା ନାମାଙ୍କନ ପତ୍ର ପ୍ରତ୍ୟାହାର ଓ ସେହିଦିନ ଅପରାହ୍ନ ୫ଟାରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ । ୨୪ତାରିଖ ସକାଳ ୮ଟାରୁ ଅପରାହ୍ନ ୫ଟା ପର୍ଯ୍ୟନ୍ତ ଭୋଟଗ୍ରହଣ ହେବ । ୨୬ତାରିଖ ସକାଳ ୮ଟାରୁ ଭୋଟଗଣତି ହେବ । ଏପ୍ରିଲ ୭ତାରିଖରେ ପୌର ପରିଷଦ ଓ ଏନଏଏସି ଉପାଧ୍ୟକ୍ଷ ପଦବୀ ପାଇଁ ନିର୍ବାଚନ ହେବ । ଏପ୍ରିଲ ୮ତାରିଖରେ ଡେପୁଟି ମେୟର ନିମନ୍ତେ ନିର୍ବାଚନ ହେବ । ଏଥର ନିର୍ବାଚନରେ ଭୋଟରମାନେ ଇଭିଏମ ମାଧ୍ୟମରେ ନିଜର ମତାଧିକାର ସାବ୍ୟସ୍ତ କରିବେ । ପୌରାଂଚଳ ଓ ଏନଏସିର ଅଧ୍ୟକ୍ଷ ପଦବୀ ଓ ମହାନଗରର ମେୟର ପଦବୀ ନିମନ୍ତେ ହଳଦିଆ ବାଲାଟ ପେପର ଏବଂ କାଉନସିଲର ଓ କର୍ପୋରେଟରଙ୍କ ପାଇଁ ଗୋଲାପୀ ରଙ୍ଗର ବାଲାଟ ପେପର ଉଦ୍ଦିଷ୍ଟ ରହିବ । ଏଥର ଭୋଟର୍ ଚାହିଁଲେ, ନିଜ ପସନ୍ଦରେ ନୋଟା (ନନ୍ ଅଫ୍ ଦି ଏଭବ୍)ର ଉପଯୋଗ ମଧ୍ୟ କରିପାରିବେ। ଏଥର ନିର୍ବାଚନରେ ପ୍ରାର୍ଥୀଙ୍କ ନିମନ୍ତେ ଖର୍ଚ୍ଚସୀମା ଓ ପ୍ରଚାର ନିମନ୍ତେ ପୂର୍ବରୁ ନିର୍ବାଚନ କମିଶନ ଆବଶ୍ୟକ ନିର୍ଦ୍ଦେଶନାମା ଜାରି କରିସାରିଛନ୍ତି । ୫୦ହଜାର ପର୍ଯ୍ୟନ୍ତ ଜନସଂଖ୍ୟା ବିଶିଷ୍ଟ ଏନଏସି ଓ ପୌର ପରିଷଦର କାଉନସିଲରଙ୍କ ନିର୍ବାଚନୀ ଖର୍ଚ୍ଚ ୫୦ହଜାର ଟଙ୍କା ଓ ଅଧ୍ୟକ୍ଷଙ୍କ ପାଇଁ ୨ଲକ୍ଷ ଟଙ୍କା, ୫୦ହଜାରରୁ ୧ଲକ୍ଷ ପର୍ଯ୍ୟନ୍ତ ଜନସଂଖ୍ୟା ବିଶିଷ୍ଟ ଏନଏଏସି ଓ ପୌର ପରିଷଦର କାଉନସିଲରଙ୍କ ନିର୍ବାଚନୀ ଖର୍ଚ୍ଚ ୭୫ହଜାର ଟଙ୍କା ଓ ଅଧ୍ୟକ୍ଷଙ୍କ ସର୍ବାଧିକ ୩ଲକ୍ଷ ଟଙ୍କା, ୧ଲକ୍ଷରୁ ଊର୍ଦ୍ଧ୍ୱ ପୌର ସଂସ୍ଥାର କାଉନସିଲରଙ୍କ ପାଇଁ ୧ଲକ୍ଷ ଟଙ୍କା ଓ ଅଧ୍ୟକ୍ଷଙ୍କ ପାଇଁ ୫ଲକ୍ଷ ଟଙ୍କା ନିର୍ବାଚନ ପ୍ରଚାରରେ ଖର୍ଚ୍ଚ କରିପାରିବେ । ସେହିପରି ୩ଟି ମହାନଗର ନିଗମରେ କର୍ପୋରେଟରମାନେ ୨ଲକ୍ଷ ଟଙ୍କା ଓ ମେୟର ସର୍ବାଧିକ ୧୨ଲକ୍ଷ ଟଙ୍କା ଖର୍ଚ୍ଚ କରିବେ ।

ପ୍ରତିଶୃତି ଭୁଲିଗଲା କି ଟାଟା ପାୱାର ; ନିୟୋଜିତ ଏଜେନ୍ସି ଙ୍କ ମନମୁଖୀ କାର୍ଯ୍ୟ …!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଜୀବନ ଯାପନ କରିବା ନିମନ୍ତେ ପ୍ରତ୍ୟେକ ବ୍ୟକ୍ତି ଙ୍କୁ ପୋଷାକ , ଖାଦ୍ୟ ଓ ଘର ର ଆବଶ୍ୟକ ହୋଇଥାଏ । କିନ୍ତୁ ବର୍ତ୍ତମାନ୍ ର ବୈଜ୍ଞାନିକ ଯୁଗରେ ଜୀବନ୍ ଜାପାନ ପାଇଁ ବିଜୁଳି ନିତ୍ୟାନ୍ତ ଆବଶ୍ୟକ ହୋଇପଡିଛି । କେନ୍ଦ୍ରୀୟ ବିଦ୍ୟୁତ ଯୋଗାଣ ସଂସ୍ଥା ସେସୁ (CESU) ୧୯୯୯ ମସିହା ଠାରୁ ୨୦୨୦ ମସିହା ମେ ମାସ ୩୦ ତାରିଖ ପର୍ଯ୍ୟନ୍ତ ଓଡିଶା ରେ ବିଦ୍ୟୁତ ଯୋଗାଣ କାର୍ଯ୍ୟକ୍ରମ ସଫଳତା ର ସହ ତୁଲାଉଥିଲେ । ବର୍ତ୍ତମାନ ଟାଟା ପାୱାର ର ଦକ୍ଷିଣ ଓଡିଶା ଦାୟିତ୍ୱ ତୁଲାଉଥିବା (TPSODL) ସଂସ୍ଥା ର କେଳେଙ୍କାରୀ ବର୍ତ୍ତମାନ ଦାଣ୍ଡ ରେ ପଡି ହାଟ ରେ ଗଡୁଛି । ଟାଟା ପାୱାର କମ୍ପାନୀ ୨୦୨୦ ମସିହା ଜୁନ ମାସ ୧ ତାରିଖ ଠାରୁ ଓଡିଶା ସରକାର ଙ୍କ ସହ ଯଏଣ୍ଟ ଭେଞ୍ଚର ତଥା ସଂଯୁକ୍ତ ଉଦ୍ୟମ ରେ ଓଡିଶା ରେ ବିଦ୍ୟୁତ ଯୋଗାଣ କାର୍ଯ୍ୟକ୍ରମ ଆରମ୍ଭ କରିଛି । ଓଡିଶା ସରକାର ଙ୍କ ସହ ଟାଟା ପାୱାର କମ୍ପାନୀ ର ଚୁକ୍ତି ଅନୁଯାୟୀ ଟାଟା ପାୱାର ଏହି କାର୍ଯ୍ୟ ତୁଲାଇବା ନିମନ୍ତେ ଚୁକ୍ତିବଦ୍ଧ । କିନ୍ତୁ ଟାଟା ପାୱାର କମ୍ପାନୀ ଉକ୍ତ କାର୍ଯ୍ୟ ନିଜେ ନକରି କିଛି ଏଜେନ୍ସି ମାନଙ୍କ ସହ ଚୁକ୍ତି ଭିତ୍ତିକ ଭାବେ କରାଉଥିବା ସୂଚନା ମିଳିଛି । ପ୍ରଥମେ ଏହି ତ୍ରି – ଫେଜ ରିଡିଙ୍ଗ କାର୍ଯ୍ୟ କୁ ଭାନମାରିଆ ଇମ୍ଫରା ନାମକ ପ୍ରାଇଭେଟ କମ୍ପାନୀ ରାୟଗଡା ଓ ଜୟପୁର ସର୍କିଲ ରେ ତୁଲାଉଥିଲା  କିନ୍ତୁ ବର୍ତ୍ତମାନ କିଛି ଦିନ ହେବ ଇନ୍ଭେଣ୍ଟିବ ନାମକ ପ୍ରାଇଭେଟ କମ୍ପାନୀ ଏହି କାର୍ଯ୍ୟ ତୁଲାଉଅଛି । ଓଡିଶା ସରକାର ଙ୍କ ସହ ଚୁକ୍ତି ଅନୁଯାୟୀ ଟାଟା ପାୱାର ପୂର୍ବରୁ କାର୍ଯ୍ୟରତ ଶ୍ରମିକ ଓ କର୍ମଚାରୀ ମାନଙ୍କୁ କାର୍ଯ୍ୟ ରୁ ବେଦଖଲ ନକରି ସେମାନଙ୍କ ସହ ସହଭାଗୀତା ରେ ହିତାଧିକାରୀ ମାନଙ୍କୁ ବିଦ୍ୟୁତ ଯୋଗାଣ କରିବା ନିମନ୍ତେ ସ୍ଥିର କରାଯାଇଥିଲା । ଏଣୁ ଗତ ଦିନ ରେ ଓଡିଶା ର ମାନ୍ୟବର ଏନର୍ଜୀ ମିନିଷ୍ଟର ଶ୍ରୀ ଦିବ୍ୟ ଶଙ୍କର ମିଶ୍ର ଙ୍କ ସହ ଆଲୋଚନା ବେଳେ ଓଡିଶା ବିଦ୍ୟୁତ କର୍ମଚାରୀ ମହାସଂଘ ର ସଭାପତି ଶ୍ରୀ ସୁବାସ ସିଂ କହିଥିଲେ ରେଗୁଲାର ଏମ୍ପ୍ଲୟର , ଆଉଟ ସୋରସ୍ କିମ୍ବା ଅସ୍ଥାୟୀ ଠିକା କର୍ମଚାରୀ ଯେଉଁ ମାନେ ଏଜେନ୍ସି ଦ୍ୱାରା ନିୟୋଜିତ ସମସ୍ତ ଙ୍କୁ କାର୍ଯ୍ୟ ରୁ ବାହାର କରିପାରିବେ ନାହିଁ ସେମାନେ ସମସ୍ତେ କାର୍ଯ୍ୟ କରିବେ ଏବଂ ଟାଟା ପାୱାର ବିଭିନ୍ନ ସେକ୍ଟର ରେ ୨୫ ହଜାର ନିଯୁକ୍ତି ଦେବା ସହ ନିୟୋଜିତ କର୍ମଚାରୀ ଙ୍କୁ ଠିକ ସମୟରେ ସେମାନଙ୍କ ପ୍ରାପ୍ୟ ବେତନ ଯୋଗାଇଦେବା ଏବଂ କର୍ମକ୍ଷେତ୍ର କୁ ଯିବା ପୂର୍ବରୁ କର୍ମଚାରୀ ଙ୍କୁ ସୁରକ୍ଷା ଉପକରଣ ଯୋଗାଇ ଦେବା ନେଇ ପ୍ରତିଶ୍ରୁତି ଦେଇଥିଲା ପରନ୍ତୁ ଟାଟା କମ୍ପାନୀ ଦ୍ଵାରା ନିଯୋଜିତ ଏଜେନ୍ସି ସମ୍ପୂର୍ଣ୍ଣ ଭାବେ ଏହାକୁ ଏଡ଼ାଇ ଦେଇ ନିଜ ର ମନମୁଖୀ କାର୍ଯ୍ୟ ତୁଲାଇବା ହେତୁ କର୍ମକ୍ଷେତ୍ର ରେ କର୍ମଚାରୀ ଙ୍କ ମୃତ୍ୟୁ ଘଟିଥିବା କୁହାଯାଉଛି । ବର୍ତ୍ତମାନ ପରିସ୍ଥିତି ରେ ଟାଟା ପାୱାର ଦ୍ୱାରା ନିୟୋଜିତ ଏଜେନ୍ସି ଇନ୍ଭେଣ୍ଟିଭ ୧୦ ବର୍ଷ ରୁ ଉର୍ଦ୍ଧ ଶ୍ରମଦାନ କରିଥିବା କର୍ମଚାରୀ ମାନଙ୍କୁ କୌଣସି କାରଣ ନ ଦର୍ଶାଇ ଛଟାଇ କରିଥିବା ଅଭିଯୋଗ ଆସିଛି ।ଟାଟା ପାୱାର ଦ୍ୱାରା କାର୍ଯ୍ୟାଦେଶ ପାଇଥିବା ନୂତନ ଏଜେନ୍ସି ଇନ୍ଭେଣ୍ଟିଭ ପୁରଣା କର୍ମଚାରୀ ମାନଙ୍କୁ ବାହାର କରି ଦେଇ ନୂତନ କର୍ମଚାରୀ ମାନଙ୍କ ଠାରୁ ହାତ ଗୁଞ୍ଜ। ନେଇ ସେମାନଙ୍କୁ କାମ ରେ ନିୟୋଜିତ କରିଥିବା ଅଭିଯୋଗର ଚର୍ଚ୍ଚା ଜୋର ଧରିଛି । କରୋନା ସମୟ ରେ ନିଜ ଜୀବନ କୁ ଜଳାଞ୍ଜଳି ଦେଇ କାର୍ଯ୍ୟ କରୁଥିବା କର୍ମଚାରୀ ମାନଙ୍କୁ ଛଟେଇ କରି ଟଙ୍କା ଆଶା ରେ ନୂତନ କର୍ମଚାରୀ ଙ୍କୁ ନିଯୁକ୍ତି ଦେବା ପଦକ୍ଷେପକୁ ନେଇ ବର୍ତ୍ତମାନ ସାଧାରଣ ରେ ଅସନ୍ତୋଷ ପ୍ରକାଶ ପାଇଛି । ଏକ ବିଶେଷ ସୂତ୍ର ରୁ ମିଳିଥିବା ସୂଚନା ଅନୁଯାୟୀ ତୃଣମୂଳ ସ୍ଥର ରେ କାର୍ଯ୍ୟକରୁଥିବା କର୍ମଚାରୀ ମାନଙ୍କ ସହ ଆଲୋଚନା ପର୍ଯ୍ୟାଲୋଚନା କରିବା ଆବଶ୍ୟକ ନାହିଁ ଏଜେନ୍ସି କୁ ସାହାଯ୍ୟ କରି ସେମାନଙ୍କ ସହଭାଗୀତା ରେ କାର୍ଯ୍ୟ କରିବା ନେଇ ଟାଟା କମ୍ପାନୀ ର କର୍ପୋରେଟ କାର୍ଯ୍ୟାଳୟ ପକ୍ଷରୁ ବିଦ୍ୟୁତ ବିଭାଗ ର ସମ୍ପୃକ୍ତ ନିର୍ବାହୀ ଯନ୍ତ୍ରୀ ଙ୍କୁ ନିର୍ଦ୍ଦେଶ ଦେଇଥିବା କୁହାଯାଉଛି । ଏସବୁ ଅଭିଯୋଗ ଉପରେ ଏକ ଦୃଢ଼ ତଦନ୍ତ କରାଯିବା ପାଇଁ ସାଧାରଣ ରେ ଦାବୀ ହେଉଛି ।

ବିଜେଡି ପାଇଁ ପ୍ରଚାର କରୁଛନ୍ତି ସାଉଥ୍‌ ଷ୍ଟାର ସୁମନ୍‌…!

ଏଥର ସମ୍ଭାଳ ବ୍ୟୁରୋ(ପାରଳାଖେମୁଣ୍ଡି)- ପଞ୍ଚାୟତ ନିର୍ବାଚନରେ ସାଉଥ୍‌ ଷ୍ଟାର୍‌ଙ୍କ କ୍ରେଜ୍‌। ଖୋଲା କାର୍‌ରେ ବୁଲୁଛନ୍ତି ଓ ବିଜେଡି ପାଇଁ ଭୋଟ୍‌ ମାଗୁଛନ୍ତି। ଓଡ଼ିଶାରେ ବସବାସ କରୁଥିବା ତେଲୁଗୁ ଲୋକଙ୍କୁ ବିଜେଡିକୁ ଭୋଟ ଦେବା ପାଇଁ ଅନୁରୋଧ କରୁଛନ୍ତି। ଆଜି ଏପରି ଚିତ୍ର ଗଜପତି ଜିଲ୍ଲାରେ ଦେଖିବାକୁ ମିଳିଛି। ଆସନ୍ତା ୨୪ ତାରିଖରେ ଗଜପତି ଜିଲ୍ଲା ଗୋଷାଣୀ ବ୍ଲକ୍‌ର ୨୧ଟି ପଞ୍ଚାୟତ ଓ ଏହା ଅଧୀନରେ ଥିବା ଦୁଇଟି ଜିଲ୍ଲା ପରିଷଦ ଜୋନ ପାଇଁ ମତଦାନ ହେବ। ସେଥିପାଇଁ ଜମ୍ପୁଛି ପ୍ରଚାର। ତେବେ ଏହି ପ୍ରଚାରରେ ବିଜେଡି ସବୁଠୁ ଆଗରେ ରହିଛି। ଚଳିତବର୍ଷ ପ୍ରଥମ ଥର ପାଇଁ ପ୍ରଚାରରେ ସାମିଲ୍‌ ହୋଇଛନ୍ତି ତେଲୁଗୁ ଷ୍ଟାର ସୁମନ୍‌ ତଲୱାର। ସେ ତେଲୁଗୁ ଭାଷାଭାଷି ଅଞ୍ଚଳରେ ବୁଲି ବିଜେଡି ସମର୍ଥିତ ପ୍ରାର୍ଥୀଙ୍କ ପାଇଁ ପ୍ରଚାର କରୁଛନ୍ତି। ନବୀନ ପଟ୍ଟନାୟକଙ୍କ ଆଦର୍ଶରେ ଅନୁପ୍ରାଣିତ ହୋଇ ସେ ବିଜେଡି ପାଇଁ ପ୍ରଚାର କରିବାକୁ ଆସିଥିବା ସୁମନ୍‌ କହିଛନ୍ତି। ଏହି ପ୍ରଚାରରେ ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ଓ ବିଜେଡି ନେତା ଡା.ତିରୁପତି ପାଣିଗ୍ରାହୀ ସାମିଲ ହୋଇଛନ୍ତି। ସୁମନ ତଲୱାରଙ୍କ ପଛେ ପଛେ ଭୋଟ୍‌ ମାଗୁଥିବା ଦେଖିବାକୁ ମିଳିଛି। ଗୋଷାଣୀ ବ୍ଲକରେ ସଂଖ୍ୟଧୀକ ତେଲୁଗୁ ଭୋଟର ରହିଥିବାରୁ ସୁମନଙ୍କ ପ୍ରଚାର ଦଳ ପାଇଁ ସହାୟକ ହେବ ବୋଲି ବିଜେଡି ନେତାମାନେ ଆଶା ପ୍ରକାଶ କରିଛନ୍ତି। ତେଲୁଗୁ ତାରକା ସୁମନ୍‌ ତଲୱାର କହିଛନ୍ତି, “ଡା.ତିରୁପତି ପାଣିଗ୍ରାହୀ ହେଉଛନ୍ତି ମୋର ପ୍ରିୟ ବନ୍ଧୁ। ତାଙ୍କ ଅନୁରୋଧ ରକ୍ଷା କରି ପ୍ରଚାର କରିବାକୁ ଆସିଛି। ଖାସ୍‌କରି ତେଲୁଗୁ ଲୋକଙ୍କୁ ଭୋଟ୍‌ ଦେବା ପାଇଁ ଅନୁରୋଧ କରିବାକୁ ଆସିଛି। ଗୋଟିଏ ଭଲ ପାର୍ଟି ଓ ସିଏମ୍‌ ପାଇଁ ଇଏ ମୋର ସାମାନ୍ୟ ଯୋଗଦାନ। ରାଜ୍ୟର ଗରିବ ଲୋକଙ୍କ ପାଇଁ ସିଏମ୍‌ ଭଲ କାମ କରୁଛନ୍ତି। ସାରା ଭାରତରେ ନବୀନଜୀଙ୍କ ନାଁ ରହିଛି। ତାମିଲନାଡୁ, କେରଳ, କର୍ଣ୍ଣାଟ ଯେଉଁଠିକି ମୁଁ ଯାଉଛି, ତାଙ୍କ ନାଁ ଶୁଣିବାକୁ ପାଉଛୁ। କ୍ରମାଗତ ଭାବେ ୫ ଥର ଜିତି ମୁଖ୍ୟମନ୍ତ୍ରୀ ହେବା ଗୋଟିଏ ଜୋକ୍‌ ନୁହେଁ। ସେଥିପାଇଁ ମୁଁ କହୁଛି, ସିଏ ଜଣେ ବ୍ୟକ୍ତି ନୁହେଁ, ମହାଶକ୍ତି। ଏପରି ବ୍ୟକ୍ତିଙ୍କୁ ଆଗକୁ ବଢ଼ିବା ପାଇଁ ସୁଯୋଗ ଦିଆଯାଉ। ଯଦି ମୁଖ୍ୟମନ୍ତ୍ରୀ ମୋତେ ଡାକିବେ, ତାହାହେଲେ ମୁଁ ଆସି ତାଙ୍କ ଦଳ ପାଇଁ ପ୍ରଚାର କରିବି।”

ଆଇପିଏଲ୍-୧୫: ୪ଟି ଭେନ୍ୟୁରେ ୭୦ ମ୍ୟାଚ୍, ମେ’ ୨୯ରେ ଫାଇନାଲ୍….!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ଆଇପିଏଲ୍-୨୦୨୨ର ଶୁଭାରମ୍ଭ ମାର୍ଚ୍ଚ ଶେଷ ସପ୍ତାହରୁ ଆରମ୍ଭ ହେବ। ଫାଇନାଲ୍‌ ମ୍ୟାଚ୍ ମେ’ ମାସରେ ଖେଳାଯିବ। ଭାରତୀୟ କ୍ରିକେଟ୍‌ କଣ୍ଟ୍ରୋଲ୍ ବୋର୍ଡ (ବିସିସିଆଇ) ଆଇପିଏଲ୍ କାର୍ଯ୍ୟସୂଚୀକୁ ନେଇ ପୂରା ପ୍ରସ୍ତୁତି କରିସାରିଛି। ଆସନ୍ତା ସପ୍ତାହରେ କାର୍ଯ୍ୟସୂଚୀ ଜାରି ହୋଇପାରେ। ରିପୋର୍ଟ ମୁତାବକ, ଏଥର ୧୦ ଟିମ୍ ମଧ୍ୟରେ ଗ୍ରୁପ୍ ଷ୍ଟେଜରେ ମୋଟ ୭୦ ମ୍ୟାଚ୍ ଖେଳାଯିବ। ତେବେ ଏଥିମଧ୍ୟରୁ ୫୫ ମ୍ୟାଚ୍ ମୁମ୍ବାଇର ତିନୋଟି ଷ୍ଟାଡିୟମରେ ଅନୁଷ୍ଠିତ ହେବ। ଏହି ମ୍ୟାଚ୍ ଗୁଡ଼ିକ ୱାଙ୍ଖଡେ ଷ୍ଟାଡିୟମ, ବ୍ରାବୋର୍ଣ୍ଣ ଷ୍ଟାଡିୟମ ଓ ଡିୱାଇ ପାଟିଲ୍ ଷ୍ଟାଡିୟମରେ ଖେଳାଯିବ। ଏହାବ୍ୟତୀତ ପୁଣେର ଏମସିଏ ଅନ୍ତର୍ଜାତୀୟ ଷ୍ଟାଡିୟମରେ ୧୫ଟି ମ୍ୟାଚ୍ ଆୟୋଜିତ ହେବ। ସମସ୍ତ ୧୦ଟି ଯାକ ଟିମ୍ ୱାଙ୍ଖଡେ ଓ ଡିୱାଇ ପାଟିଲ୍ ଷ୍ଟାଡିୟମରେ ୪ଟି ଲେଖାଏ ମ୍ୟାଚ୍ ଖେଳିବେ। ଏହାବ୍ୟତୀତ ବ୍ରାବୋର୍ଣ୍ଣ ଓ ପୁଣେରେ ତିନୋଟି ଲେଖାଏ ମୁକାବିଲା ଖେଳିବେ। ଏଥର ଆଇପିଏଲରେ ଦୁଇ ନୂଆ ଟିମ୍ ଯଥା ଲକ୍ଷ୍ନୌ ସୁପର୍ ଜାଏଣ୍ଟସ୍ ଓ ଗୁଜରାଟ୍ ଲାୟନ୍ସ (ଅହମଦାବାଦ ଫ୍ରାଞ୍ଚାଇଜି) ସାମିଲ୍ ଅଛନ୍ତି। ଏଥର ଆଇପିଏଲର ଓପନିଂ ପାଇଁ ଦୁଇଟି ତାରିଖ ଧାର୍ଯ୍ୟ କରାଯାଇଛି। ବ୍ରଡକାଷ୍ଟର୍ ବିସିସିଆଇକୁ ଅନୁରୋଧ କରିଛି ଯେ ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍ ମାର୍ଚ୍ଚ ୨୬ ତାରିଖ ଅର୍ଥାତ୍ ଶନିବାର ଆୟୋଜିତ କରାଯାଉ। ପରବର୍ତ୍ତୀ ଦିନ ଅର୍ଥାତ୍ ରବିବାର ଡବଲ୍ ହେଡର୍ ରଖାଯାଉ, ଯାହାଦ୍ୱାରା ଓପନିଂରୁ ୱିକେଣ୍ଡର ଫାଇଦା ମିଳିପାରିବ। ହେଲେ ବିସିସିଆଇ ମାର୍ଚ୍ଚ ୨୭ ତାରିଖରେ ପ୍ରଥମ ମ୍ୟାଚ୍ କରାଇବା ସପକ୍ଷରେ ଅଛି। ଆଇପିଏଲର ଫାଇନାଲ୍‌ ମ୍ୟାଚ୍ ମେ ୨୯ ତାରିଖ ଅର୍ଥାତ୍ ରବିବାର ହୋଇପାରେ। ବିସିସିଆଇ ପ୍ଲେଅଫ୍ ପାଇଁ ଏପର୍ଯ୍ୟନ୍ତ ଭେନ୍ୟୁ ଫାଇନାଲ୍‌ କରିନାହିଁ। କିନ୍ତୁ ବିଶେଷ ସୂତ୍ର ଅନୁଯାୟୀ, ଫାଇନାଲ୍‌ ସମେତ ପ୍ଲେ-ଅଫ୍ ଅହମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ କରାଯିବାର ସମ୍ଭାବନା ରହିଛି। ତେବେ ଫେବୃଆରୀ ୨୪ ତାରିଖ ଅର୍ଥାତ୍ ଆସନ୍ତାକାଲି ଆଇପିଏଲ୍ ଗଭର୍ଣ୍ଣିଂ କାଉନସିଲର ବୈଠକ ହେବ। ଏହିଦିନ ସିଡ୍ୟୁଲକୁ ନେଇ କୌଣସି ନିଷ୍ପତ୍ତି ନିଆଯାଇପାରେ। ଏହା ପରେ ଆସନ୍ତା ସପ୍ତାହରେ କାର୍ଯ୍ୟସୂଚୀ ଜାରି କରାଯିବ।