ପଂଚାୟତ ନିର୍ବାଚନ; ବିଜେଡି ନେତାଙ୍କୁ ନବୀନ ଦେଲେ ଗୁରୁମନ୍ତ୍ର

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ପଂଚାୟତ ନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ ଶେଷ ହୋଇସାରିଥିବାବେଳେ ଆଜି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜ ଦଳର ନେତାମାନଙ୍କୁ ନିର୍ବାଚନୀ ବୈତରଣୀ ପାର ହେବାର ଗୁରୁମନ୍ତ୍ର ଦେଇଛନ୍ତି। ବିଜେଡି ସୁପ୍ରିମୋ ନବୀନ ପଟ୍ଟନାୟକ ଆଜି ନବୀନ ନିବାସରୁ ଭିଡିଓ କନଫରେନ୍ସିଂ ମାଧ୍ୟମରେ ଦଳର ମନ୍ତ୍ରୀ, ବିଧାୟକ, ସାଂସଦ, ଜିଲ୍ଲା ସଭାପତି ଓ ପର୍ଯ୍ୟବେକ୍ଷକମାନଙ୍କୁ ସମ୍ବୋଧନ କରି ପଂଚାୟତ ନିର୍ବାଚନ ପ୍ରଚାରରେ ରାଜ୍ୟ ସରକାରଙ୍କ ସଫଳତାର କାହାଣୀ ଲୋକଙ୍କୁ ଅବଗତ କରିବାକୁ କହିଛନ୍ତି । ବିଶେଷକରି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା, ଗ୍ରାମାଂଚଳ ଗୃହ ନିର୍ମାଣ ଯୋଜନା, ଚାଷୀଙ୍କ ପାଇଁ କାଳିଆ ଓ ଅନ୍ୟାନ୍ୟ ସବସିଡି ଯୋଜନା ଆଦି ସମ୍ପର୍କରେ ରାଜ୍ୟ ସରକାର ଯେଭଳି ଐତିହାସିକ ନିଷ୍ପତ୍ତି ନେଇଛନ୍ତି ଓ ତାହା ସାଧାରଣ ଲୋକଙ୍କ ପାଇଁ କେତେ ଫଳପ୍ରଦ ହୋଇଛି, ସେସବୁ ନିର୍ବାଚନ ପ୍ରଚାରବେଳେ ଜଣାଇବାକୁ ପରାମର୍ଶ ଦେଇଛନ୍ତି । ରାଜ୍ୟର ସାଢ଼େ ୯୬ଲକ୍ଷ ପରିବାରକୁ ବିଜୁ ସ୍ୱାସ୍ଥ୍ୟ ସ୍ମାର୍ଟ କାର୍ଡ, ଭୂମିହୀନ ପରିବାରକୁ ୧୦ହଜାର ଟଙ୍କାର କାଳିଆ ସହାୟତା, ଗ୍ରାମାଂଚଳର ବାସହୀନଙ୍କୁ ପକ୍କାଘର ସହ ମରାମତି ପାଇଁ ୩ରୁ ୫ହଜାର ଟଙ୍କା, ଆଦିବାସୀଙ୍କ ପାଇଁ ବିଭିନ୍ନ କଲ୍ୟାଣମୂଳକ ଯୋଜନା ଓ ମିଶନ ଶକ୍ତିର ମହିଳା ସଦସ୍ୟମାନଙ୍କୁ ୧୦ହଜାର କୋଟି ଟଙ୍କାର ସୁଧମୁକ୍ତ ଋଣ ଆଦିର ସଫଳ କାହାଣୀ ସମ୍ପର୍କରେ ଲୋକଙ୍କୁ ଅବଗତ କରାଇବାକୁ ନବୀନ କହିଛନ୍ତି । ବିରୋଧୀ ଦଳ ପାଖରେ ବିଜେଡି ବିରୋଧରେ ଲଢ଼େଇ କରିବାକୁ କୌଣସି ପ୍ରସଙ୍ଗ ନାହିଁ। ତେଣୁ ବିରୋଧୀ ଦଳଗୁଡ଼ିକର ମିଛ ଅପପ୍ରଚାରକୁ ରାଜ୍ୟ ସରକାରଙ୍କ ବିଭିନ୍ନ ସଫଳ କାର୍ଯ୍ୟକ୍ରମ ମାଧ୍ୟମରେ ଜବାବ ଦେବାକୁ ସେ ଦଳୀୟ ନେତାମାନଙ୍କୁ କହିଛନ୍ତି। ଏହାସହିତ ଦଳୀୟ ପ୍ରାର୍ଥୀଙ୍କ ପାଇଁ ନିର୍ବାଚନ ପ୍ରଚାରବେଳେ କୋଭିଡ୍ ଗାଇଡଲାଇନକୁ କଡ଼ାକଡ଼ି ପାଳନ କରିବାକୁ ପରାମର୍ଶ ଦେବାକୁ ମଧ୍ୟ ନେତାମାନଙ୍କୁ ନବୀନ ପରାମର୍ଶ ଦେଇଛନ୍ତି । ସେ କହିଛନ୍ତି, ଏବେ କୋଭିଡ୍ ମହାମାରୀର ତୃତୀୟ ଲହର ଚାଲିଛି। କୋଭିଡ୍ ବିରୋଧୀ ଲଢ଼େଇରେ ଓଡ଼ିଶା ଏବେ ସମଗ୍ର ଭାରତ ବର୍ଷରେ ଏକ ନମ୍ବର ହୋଇଛି। ଲୋକଙ୍କ ଜୀବନ ବଞ୍ଚାଇବାରେ ରାଜ୍ୟ ସକ୍ଷମ ହୋଇଛି। ଆପଣଙ୍କ ଜୀବନ ବି ମୂଲ୍ୟବାନ, ତେଣୁ ନିର୍ବାଚନ ପ୍ରଚାର ବେଳେ କୋଭିଡ୍‌ ନିୟମ ପାଳନ କରିବାକୁ ସମସ୍ତଙ୍କୁ ଅନୁରୋଧ। ଆଜିର ଏହି କାର୍ଯ୍ୟକ୍ରମରେ ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ସମେତ ୧୦୦ରୁ ଅଧିକ ବିଧାୟକ, ସାଂସଦ, ଜିଲ୍ଲା ସଭାପତି ଓ ପର୍ଯ୍ୟବେକ୍ଷକମାନେ ସାମିଲ ହୋଇଥିବା ଜଣାପଡ଼ିଛି।

ଆସନ୍ତା ୨୬ ତାରିଖରୁ ରାଜ୍ୟରେ ପୁଣି ବଢ଼ିବ ଶୀତ….!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ଆଗାମୀ ୨ ଦିନ ମଧ୍ୟରେ ୩ରୁ ୫ ଡିଗ୍ରୀ ଖସିବ ତାପମାତ୍ରା। ୨୬ ତାରିଖରୁ ରାଜ୍ୟରେ ପୁଣି ବଢ଼ିବ ଶୀତ ଲହର। କିନ୍ତୁ ପାଗ ମୁଖ୍ୟତଃ ଶୁଖିଲା ରହିବ। ଏନେଇ ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ଟ୍ୱିଟ୍‌ କରି ସୂଚନା ଦିଆଯାଇଛି। ସେହିପରି ଆଜି ରାତି ଓ କାଲି(ମଙ୍ଗଳବାର) ସକାଳ ପାଇଁ ଘନ କୁହୁଡ଼ି ନେଇ ୮ ଜିଲ୍ଲାକୁ ସତର୍କ ସୂଚନା ଜାରି କରାଯାଇଛି। ସେହି ଜିଲ୍ଲା ଗୁଡ଼ିକ ହେଲା- ବଲାଙ୍ଗିର, ସୁବର୍ଣ୍ଣପୁର, ବୌଦ୍ଧ, କନ୍ଧମାଳ, କଳାହାଣ୍ଡି, ଅନୁଗୋଳ, ଢେଙ୍କାନାଳ ଓ କେନ୍ଦୁଝର। ଭୁବନେଶ୍ୱର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ନିର୍ଦ୍ଦେଶକ ଡକ୍ଟର ଏଚ୍‌.ଆର୍‌. ବିଶ୍ୱସଙ୍କ କହିବା ଅନୁସାରେ  ଝାଡ଼ଖଣ୍ଡ ତଥା ତା’ର ପାର୍ଶ୍ଵବର୍ତ୍ତୀ ଅଞ୍ଚଳରେ ବାୟୁମଣ୍ଡଳରେ ସମୁଦ୍ର ପତ୍ତନଠାରୁ ୧.୫ କିମି ଯାଏଁ ଗୋଟିଏ ଘୁର୍ଣ୍ଣି ବଳୟ ସକ୍ରିୟ ରହିଛି। ଏହାର ପ୍ରଭାବରେ ଆଗାମୀ ୨୪ ଘଣ୍ଟାରେ ସୁନ୍ଦରଗଡ଼, କେନ୍ଦୁଝର, ମୟୂରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଢେଙ୍କାନାଳ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, କନ୍ଧମାଳ, ଗଜପତି, କୋରାପୁଟ, ମାଲକାନଗିରି ଜିଲ୍ଲାରେ ଗୋଟିଏ ବା ଦୁଇଟି ସ୍ଥାନରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହୋଇପାରେ। ସେହିପରି ବଲାଙ୍ଗିର, ସୋନପୁର,ବୌଦ୍ଧ, କନ୍ଧମାଳ, କଳାହାଣ୍ଡି, ଅନୁଗୋଳ, ଢ଼େଙ୍କାନାଳ ଓ କେନ୍ଦୁଝର ଜିଲ୍ଲାରେ କିଛି ସ୍ଥାନରେ ଘନକୁହୁଡ଼ି ହୋଇପାରେ । ୨୬, ୨୭ ଓ ୨୮ ତାରିଖରେ ପାଗ ଶୁଖିଲା ରହିବ। କିନ୍ତୁ ୨୬ ଓ ୨୭ ତାରିଖରେ କିଛି କିଛି ସ୍ଥାନରେ କୁହୁଡ଼ି ଓ ଘନ କୁହୁଡ଼ି ହେବାର ସମ୍ଭାବନା ରହିଛି। ଏହି ତିନି ଦିନ ପାଗ ଶୁଖିଲା ରହିଲେ ମଧ୍ୟ ଶୀତର ପ୍ରକୋପ ବଢ଼ିବାର ସମ୍ଭାବନା ରହିଛି ବୋଲି ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ରର ନିର୍ଦ୍ଦେଶକ କହିଛନ୍ତି।

ଜାଲ୍‌ ଭିନ୍ନକ୍ଷମ ସାର୍ଟିଫିକେଟରେ ଆଡ୍‌ମିଶନ ମାମଲାର ହେବ ଖୋଳତାଡ଼….!

ଏଥର ସମ୍ଭାଳ ବ୍ୟୁରୋ(ଭଦ୍ରକ/ଭୁବନେଶ୍ଵର)- ଭଦ୍ରକ କଲେଜରେ ଜାଲ୍‌ ଭିନ୍ନକ୍ଷମ ସାର୍ଟିଫିକେଟରେ ଆଡ୍‌ମିଶନ ମାମଲାର ହେବ ଖୋଳତାଡ। ସବୁ ଭିନ୍ନକ୍ଷମ ସାର୍ଟିଫିକେଟ ଯାଞ୍ଚ ପାଇଁ ନିର୍ଦ୍ଦେଶ ଦେଲେ ଉଚ୍ଚଶିକ୍ଷା ସଚିବ। ସେଥିପାଇଁ ସବୁ ସରକାରୀ ଓ ବେସରକାରୀ କଲେଜ ଅଧ୍ୟକ୍ଷଙ୍କୁ ଚିଠି ଲେଖିଛନ୍ତି। ଜିଲ୍ଲାର CDMOଙ୍କ ଦ୍ୱାରା ସବୁ ଭିନ୍ନକ୍ଷମ ସାର୍ଟିଫିକେଟ ଯାଞ୍ଚ ନିର୍ଦ୍ଦେଶ। ଯାଞ୍ଚରେ ଯଦି କେହି ଫେକ୍‌ ଜଣାପଡ଼ିଲା, ତାହାହେଲେ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଛନ୍ତି ଉଚ୍ଚଶିକ୍ଷା ସଚିବ। ଜାଲ୍‌ ସାର୍ଟିଫିକେଟ ଦେଇଥିବା ପିଲାଙ୍କ ଆଡମିଶନ ରଦ୍ଦ ସହ ସ୍ଥାନୀୟ ଥାନାରେ ଏତଲା କରିବାକୁ ନିର୍ଦ୍ଦେଶ ଦିଆଯାଇଛି। ଜାଲ୍ ଦିବ୍ୟାଙ୍ଗ ସାର୍ଟିଫିକେଟ ଦେଇ ଭଦ୍ରକ କଲେଜରେ ଆଡମିଶନ ଅଭିଯୋଗ ହୋଇଥିଲା। ଯାହାଫଳରେ ୮୦ ପ୍ରତିଶତ ମାର୍କ ରଖି ପିଲା ସିଟ୍ ପାଇନଥିଲେ। ଅଥଚ ୪୦ ପ୍ରତିଶତ ମାର୍କ ଥିବା ପିଲା କଲେଜରେ ନାଁ ଲେଖାଉଥିବା ଅଭିଯୋଗ ହୋଇଥିଲା। ଏହାକୁ ନେଇ ଏବିଭିପି ପକ୍ଷରୁ ଭୁବନେଶ୍ୱର ମାଷ୍ଟରକ୍ୟାଣ୍ଟିନ୍‌ ଛକରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ABVP ଅଭିଯୋଗ ଅନୁସାରେ, ଏହି କଲେଜରେ ବେଆଇନ୍‌ ତଥା ଜାଲ ସାର୍ଟିଫିକେଟରେ ଆଡମିଶନ୍ କରାଯାଇଛି। ଏହା ପଛରେ ବିଜେଡିର ରାଜ୍ୟ ଯୁଗ୍ମ ସମ୍ପାଦକଙ୍କ ହାତ ରହିଛି।

ପୁଲିସ୍ କୁ ଲୋକେ କହିଲେ ଫାଇନ୍ ଦିଅ…!

ଏଥର ସମ୍ଭାଳ ବ୍ୟୁରୋ(ଭଦ୍ରକ)- ପୁଲିସ୍ ଚଢ଼ୁଛି ଅନଫିଟ୍ ଗାଡ଼ି! ଗାଡ଼ିର ଫିଟନେସ୍ କି ଇନ୍ସ୍ୟୁରାନ୍ସ ପେପର୍ ନାହିଁ। ଆଉ ସେହି ଗାଡ଼ିରେ ପାଟ୍ରୋଲିଂ କରି ବିଭିନ୍ନ ସ୍ଥାନରେ ଲୋକଙ୍କ ଗାଡ଼ି ଅଟକାଇ ଚେକିଂ କରୁଥିଲା ପୁଲିସ୍। ହେଲେ ଏହି ଚେକିଂ ପୁଲିସ୍ ଉପରେ ଭାରୀ ପଡ଼ିଛି। ଓଲଟା ଲୋକମାନେ ପୁଲିସ ଗାଡିକୁ ଚେକିଂ କରିବାକୁ ଆଗେଇ ଆସିଛି। ଯାହା ଫଳରେ ଲୋକଙ୍କ ଆକ୍ରୋଶର ଶିକାର ହୋଇଛି ପୁଲିସ। ଏମିତି କିଛି ଦୃଶ୍ୟ ଦେଖିବାକୁ ମିଳିଛି ଭଣ୍ଡାରିପୋଖରୀରେ।ଭଣ୍ଡାରିପୋଖରୀ ଥାନା ଅଧୀନସ୍ଥ ପାଳଦାବାଙ୍କରେ ପୁଲିସ୍ ଜନସାଧାରଣଙ୍କ ଗାଡ଼ିର କାଗଜପତ୍ର, ହେଲମେଟ ଓ ମାସ୍କ ଚେକିଂ କରୁଥିଲା। ଯାହାର ଯାହା ନଥିଲା, ପୁଲିସ୍ ସେମାନଙ୍କ ଠାରୁ ସେହି ଅନୁସାରେ ଫାଇନ ଆଦାୟ କରୁଥିଲା। ଯେଉଁମାନଙ୍କର ଫାଇନ୍ କଟାଯାଇଥିଲା, ସେଥିମଧ୍ୟରୁ କିଛି ଓଲଟା ପୁଲିସ ଗାଡ଼ିର ମଧ୍ୟ ଚେକିଂ କରିଥିଲେ। ହେଲେ ପୁଲିସ୍ ଯେଉଁ ଗାଡ଼ିରେ ପାଟ୍ରୋଲିଂ କରୁଥିଲା, ସେହି ଗାଡ଼ିର ଅନେକ ଡକ୍ୟୁମେଣ୍ଟ ନଥିବା ଜାଣିବାକୁ ମିଳିଥିଲା। ପୁଲିସ ବ୍ୟବହାର କରୁଥିବା ବୋଲେରୋ OD-22 G-9867 ଗାଡ଼ିଟିର ଫିଟନେସ୍ ଓ ଇନସ୍ୟୁରାନ୍ସ ସରିଯାଇଥିବା ଅନଲାଇନ ପୋର୍ଟାଲରେ ଦେଖିବାକୁ ମିଳିଥିଲା। ଯାହାକୁ ନେଇ ସ୍ଥାନୀୟ ଲୋକମାନେ ଉତ୍ୟକ୍ତ ହୋଇପଡିଥିଲେ। ସ୍ଥାନୀୟ ଲୋକେ କହିଥିଲେ ଯେ ପୁଲିସ ଯେଉଁ ବିନା ଡକ୍ୟୁମେଣ୍ଟ ଗାଡ଼ିର ବ୍ୟବହାର କରୁଛି, ଆଗ ତା’ର ଫାଇନ୍ କଟାଯାଉ। ଆଉ ତା’ ପରେ ସେମାନଙ୍କର ଫାଇନ୍ କଟାଯିବ ବୋଲି ସ୍ଥାନୀୟ ଲୋକେ ଦାବି କରିଥିଲେ। ଏହାକୁ ନେଇ ସେଠାରେ ପୁଲିସ ଓ ଲୋକଙ୍କ ମଧ୍ୟରେ ପ୍ରବଳ ଉତ୍ତେଜନା ଦେଖିବାକୁ ମିଳିଥିଲ। ଏହାର ଭିଡିଓ ମଧ୍ୟ ଏବେ ସୋଶାଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି।

ଆଜିର ରାଶିଫଳ -୨୫ ଜାନୁଆରୀ, ମଙ୍ଗଳବାର

ମେଷ: ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇପାରନ୍ତି। ଧନପ୍ରାପ୍ତିର ଯୋଗ ରହିଛି। କର୍ମକ୍ଷେତ୍ରରେ ଉପରିସ୍ଥ କର୍ମଚାରୀଙ୍କ ଠାରୁ ପ୍ରଶଂସା ପାଇବେ।

ବୃଷ: ମାନ-ସମ୍ମାନ ବୃଦ୍ଧି ହେବ। ନୂତନ ଲୋକଙ୍କ ସହ ବନ୍ଧୁତ୍ୱ ସ୍ଥାପନ ହେବ। ବ୍ୟବସାୟରେ ଆଶା ମୁତାବକ ଲାଭ ପାଇବେ।

ମିଥୁନ: ଶୁଭ ସମ୍ବାଦ ପାଇବେ। ମାନସିକ ଦୁଶ୍ଚିନ୍ତା ଦୂରହେବ। କର୍ମକ୍ଷେତ୍ରରେ ଉପରିସ୍ଥ ଅଧିକାରୀମାନଙ୍କ ସହିତ ସୁସମ୍ପର୍କ ସ୍ଥାପନ ହେବ।

କର୍କଟ: ଶିକ୍ଷାକ୍ଷେତ୍ରରେ ସଫଳତା ଲାଭ କରିବେ। ସରକାରୀ କର୍ମଚାରୀମାନେ କର୍ମକ୍ଷେତ୍ରରେ ସଫଳତା ଲାଭ କରିବେ। ଭାଇଭଉଣୀମାନଙ୍କ ସହ ମନୋମାଳିନ୍ୟ ଦୂର ହୋଇ ପାରିବାରିକ କ୍ଷେତ୍ରରେ ଶାନ୍ତି ଦେଖାଦେବ।

ସିଂହ: ସ୍ୱାସ୍ଥ୍ୟ ଭଲ ରହିବ।  ନୂତନ କର୍ମ ନିଯୁକ୍ତିର ସୁଯୋଗ ପାଇବେ। ଋଣଭାର ଲାଘବ ହେବ।

କନ୍ୟା: କର୍ମକ୍ଷେତ୍ରରେ ଉଚ୍ଚାଧିକାରୀ ଓ ସହକର୍ମୀଙ୍କ ସହ ବାଦବିବାଦ ମେଣ୍ଟି ଯିବ। ଦୂରସ୍ଥାନକୁ ଯାତ୍ରା କରିପାରନ୍ତି।

ତୁଳା: ସମ୍ପର୍କୀୟ ବ୍ୟକ୍ତି ଆର୍ଥିକ ସାହାଯ୍ୟ କରିବେ। ଅଧିକ ପରିଶ୍ରମ କରିପାରନ୍ତି। ଦୂରସ୍ଥାନକୁ ଯାତ୍ରା କରନ୍ତୁ ନାହିଁ।

ବିଚ୍ଛା: ମନବଳ ଦୃଢ଼ ରହିବ। ମିତ୍ରଙ୍କଠାରୁ ଉପହାର ପ୍ରାପ୍ତି ହେବ। ନୂଆ ନିଯୁକ୍ତି ପାଇବାର ସମ୍ଭାବନା ରହିଛି।

ଧନୁ: ସ୍ୱାସ୍ଥ୍ୟରେ ଉନ୍ନତି ଦେଖାଦେବ। ଆର୍ଥିକସ୍ଥିତି ସ୍ୱଚ୍ଛଳ ରହିବ। ଛାତ୍ରଛାତ୍ରୀମାନେ ଉଚ୍ଚ ଶିକ୍ଷାପାଇଁ ସୁଯୋଗ ପାଇବେ।

ମକର: ବାକିଥିବା ଅର୍ଥ ପ୍ରାପ୍ତି ହେବ। ପରିବାର ସଦସ୍ୟଙ୍କ ବାହାରକୁ ବୁଲିବାକୁ ଯାଇପାରନ୍ତି।  ଘରକୁ ଅତିଥି ଆସିପାରନ୍ତି।

କୁମ୍ଭ: ସନ୍ତାନର ସ୍ୱାସ୍ଥ୍ୟକୁ ନେଇ ଚିନ୍ତିତ ରହିବେ। କର୍ମକ୍ଷେତ୍ରରେ ବରିଷ୍ଠ ବ୍ୟକ୍ତି ଓ ସହଯୋଗୀ ମାନଙ୍କର ସାହାଯ୍ୟ ସହଯୋଗ ମିଳିବ। ରାସ୍ତାରେ ଯିବା ସମୟରେ ସତର୍କ ରହିବା ଆବଶ୍ୟକ।

ମୀନ: ଦାମ୍ପତ୍ୟ ଜୀବନ ଖୁସିରେ କଟିବ। କଥା ଉପରେ ନିୟନ୍ତ୍ରଣ ରଖନ୍ତୁ। ଦୂରସ୍ଥାନକୁ ଯାତ୍ରା କରିପାରନ୍ତି।

ସଂରକ୍ଷିତ ଆସନରେ ସାଧାରଣ ବର୍ଗଙ୍କ କବ୍‌ଜା;ବିଜେଡି ପ୍ରାର୍ଥୀ ଓ ରିଟର୍ଣ୍ଣିଂ ଅଫିସରଙ୍କ ଗିରଫ ଦାବି କଲା କଂଗ୍ରେସ…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ଜଗତସିଂହପୁର ଜିଲ୍ଲାର ବାଲିକୁଦା ଜିଲ୍ଲା ପରିଷଦ ଜୋନ-୨ ଆସନଟି ଅନୁସୂଚିତ ଜାତି ପାଇଁ ସଂରକ୍ଷିତ ଥିବାବେଳେ ଶାସକ ବିଜେଡି ଚଂଚକତା କରି ଏଠାରେ ସାଧାରଣ ବର୍ଗର ବ୍ୟକ୍ତିଙ୍କୁ ପ୍ରାର୍ଥିୀ କରିଛି। ନିର୍ବାଚନ ରିଟର୍ଣ୍ଣିଂ ଅଫିସରଙ୍କ ଭୂମିକା ମଧ୍ୟ ସନ୍ଦେହଘେରରେ ରହିଛି । ତେଣୁ ଜାଲିଆତି କରି ନିର୍ବାଚନ ଲଢ଼ୁଥିବାରୁ ଉଭୟ ବିଜେଡି ପ୍ରାର୍ଥି ଓ ରିଟର୍ଣ୍ଣିଂ ଅଫିସରଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କଂଗ୍ରେସ ଦାବି କରିଛି। ପ୍ରଦେଶ କଂଗ୍ରେସ କମିଟିର ଏକ ଉଚ୍ଚସ୍ତରୀୟ ପ୍ରତିନିଧି ଦଳ ଆଜି ରାଜ୍ୟ ନିର୍ବାଚନ କମିଶନରଙ୍କୁ ଭେଟି ଏନେଇ ତଥ୍ୟଭିତ୍ତିକ ଅଭିଯୋଗ କରିଛି । ଅନୁସୂଚିତ ଜାତିଙ୍କ ପାଇଁ ସଂରକ୍ଷିତ ଆସନରେ ସାଧାରଣ ବର୍ଗର ପ୍ରାର୍ଥୀ ନାମାଙ୍କନ ପତ୍ର ଦାଖଲବେଳେ ରିଟର୍ଣ୍ଣିଂ ଅଫିସର ନିରବଦ୍ରଷ୍ଟା ସାଜିଛନ୍ତି। ତେଣୁ ସଂପୃକ୍ତ ପ୍ରାର୍ଥିଙ୍କ ପ୍ରାର୍ଥିପତ୍ର ନାକଚ ସହ ଜାଲିଆତିରେ ସହଯୋଗ କରିଥିବା ରିଟର୍ଣ୍ଣିଂ ଅଫିସରଙ୍କ ବିରୋଧରେ ଫୌଜଦାରି ମୋକଦ୍ଦମା ରୁଜୁ କରିବାକୁ କଂଗ୍ରେସ ଦାବି କରିଛି। ପିସିସି ସାଧାରଣ ସମ୍ପାଦକ ତଥା ପୂର୍ବତନ ବିଧାୟକ ଡାକ୍ତର ଲଲାଟେନ୍ଦୁ ମହାପାତ୍ର କହିଛନ୍ତି ଯେ, ଜଗତସିଂହପୁର ଜିଲ୍ଲାର ବାଲିକୁଦା ଜୋନ ନଂ-୨ ଜିଲ୍ଲା ପରିଷଦ ଆସନ ଅନୁସୂଚିତ ଜାତିବର୍ଗ ପାଇଁ ସଂରକ୍ଷିତ। ଏହି ସଂରକ୍ଷିତ ଆସନରେ ଶାସକ ବିଜେଡି ସାଧାରଣ ବର୍ଗର ଜଟାଧାରୀ ଦାସଙ୍କୁ ପ୍ରାର୍ଥୀ କରିଛି। ଜଟାଧାରୀଙ୍କ ଜାତି କୈବର୍ତ –ବୈଷ୍ଣବ ଯାହା ଅନୁସୂଚିତ ଜାତି ତାଲିକାରେ ନାହିଁ। ଶ୍ରୀ ଦାସଙ୍କର ବାପା ଓ ଜେଜେବାପା କୈବର୍ତ ବୈଷ୍ଣବ ବୋଲି ତଥ୍ୟ ପ୍ରମାଣ କମିଶନଙ୍କ ପାଖରେ ଦାଖଲ ହୋଇଛି । କିନ୍ତୁ ଜଟାଧାରୀ ଚଂଚକତା କରି ଏକ ମିଥ୍ୟା ଜାତିଗତ ପ୍ରମାଣପତ୍ର ହାସଲ କରିଛନ୍ତି। ଯେଉଁଥିରେ ତାଙ୍କର ଜାତି ‘କେଉଟ-ଦେୱର’ ଉଲ୍ଲେଖ ରହିଛି ଓ ଏହା ୧୯୯୬ ମସିହାରେ ଜାରି ହୋଇଛି। ଜଟାଧାରୀ ନିକଟରେ ଜାତି ପ୍ରମାଣପତ୍ର ପାଇଁ ଆବେଦନ କରିଥିଲେ ମଧ୍ୟ ସେ ସାଧାରଣ ବର୍ଗର ହୋଇଥିବାରୁ ତାଙ୍କ ଆବେଦନକୁ ବାଲିକୁଦା ତହସିଲଦାର ଖାରଜ କରିବା ସତ୍ତ୍ୱେ ୨୫ବର୍ଷ ତଳର ଏକ ହାତ ଲେଖା ଜାତି ପ୍ରମାଣପତ୍ରକୁ ଦାଖଲ କରି ସେ ସଂରକ୍ଷିତ ଆସନରେ ବିଜେଡିର ପ୍ରାର୍ଥୀ ହେବା ସମ୍ପୂର୍ଣ୍ଣ ନିନ୍ଦନୀୟ। ଏନେଇ କଂଗ୍ରେସ ପକ୍ଷରୁ ସ୍ଥାନୀୟ ରିଂଟର୍ଣ୍ଣି ଅଫିସରଙ୍କ ପାଖରେ ଅଭିଯୋଗ କରାଯାଇ ପ୍ରାର୍ଥିପତ୍ର ତୁରନ୍ତ ନାକଚ ସହ ତାଙ୍କ ବିରୋଧରେ ଫୌଜଦାରୀ ମୋକଦ୍ଦମା ରୁଜୁ କରିବାକୁ ଦାବି କରାଯାଇଥିଲା। କିନ୍ତୁ ବାଲିକୁଦା ବିଧାୟକ ତଥା ଜଳସମ୍ପଦ ମନ୍ତ୍ରୀ ରଘୁନନ୍ଦନ ଦାସଙ୍କ ଚାପରେ କୌଣସି କାର୍ଯ୍ୟାନୁଷ୍ଠାନ ନେଉନାହାନ୍ତି। ରିଟର୍ଣ୍ଣିଂ ଅଫିସରଙ୍କ ପକ୍ଷପାତପୂର୍ଣ୍ଣ ବେଆଇନ କାର୍ଯ୍ୟପାଇଁ ତାଙ୍କ ବିରୋଧରେ ମଧ୍ୟ ଦଣ୍ଡନୀୟ କାର୍ଯ୍ୟାନୁଷ୍ଠାନ ନେବାକୁ ଦଳ ଦାବି କରୁଛି ବୋଲି ଡାକ୍ତର ମହାପାତ୍ର କହିଛନ୍ତି। ଏହି ପ୍ରତିନିଧି ଦଳରେ କଂଗ୍ରେସର ବରିଷ୍ଠ ନେତା ଶିବାନନ୍ଦ ରାୟ, ଯଜ୍ଞେଶ୍ୱର ବାବୁ, ମନୋରଞ୍ଜନ ଦାଶ, ଚିନ୍ମୟ ସୁନ୍ଦର ଦାସ, ସନ୍ତୋଷ କୁମ୍ଭାର, ଦୀପକ ମହାପାତ୍ର, ବିକ୍ରମ ପରିଡ଼ା ଓ କଂଗ୍ରେସ ଜିଲ୍ଲା ପରିଷଦ ପ୍ରାର୍ଥି ଶରତ କୁମାର ସାହୁ ପ୍ରମୁଖ ସାମିଲ ଥିଲେ।

ରାମନାଗୁଡା କ ଯୋନ ପ୍ରାର୍ଥୀ ଶିବାଶିଷଙ୍କ ନାମାଙ୍କନ ପତ୍ର ନାକଚ ମାମଲା, କୋର୍ଟ ରେ ମାମଲା ପାଇଁ ସଜବାଜ….!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର) – ରାୟଗଡ଼ା ଜିଲ୍ଲା ରାମନାଗୁଡା ବ୍ଲକ କ ଯୋନ ଜିଲା ପରିଷଦ ନିର୍ବାଚନ ମାମଲା ଏବେ ବିବାଦୀୟ ହୋଇ ପଡିଛି l ଏହି ଯୋନର ପ୍ରାର୍ଥୀ ହୋଇ ନାମାଙ୍କନ ଦାଖଲ କରିଥିବା ଶିବାଶିଷ ପାଣିଗ୍ରାହୀ କୋର୍ଟ ର ଆଶ୍ରୟ ନେବାକୁ ସଜବାଜ ହେଉଥିବା ଜଣା ପଡ଼ିଛି l ତାଙ୍କର ପ୍ରାର୍ଥୀ ପତ୍ର କିପରି ନାକଚ ହେଲା ତାହା ବିରୋଧରେ ସେ ନିର୍ବାଚନୀ ମାମଲା ରୁଜୁ କରିବେ ବୋଲି ତାଙ୍କ ଓଲିଲ ପ୍ରଦିପ ଦାସ ସୂଚନା ଦେଇଛନ୍ତି l ଜିଲା ପରିଷଦ ନିର୍ବାଚନ ପାଇଁ ଶିବାଶିଷ ନାମାଙ୍କନ ଗୁଣପୁର ଉପ ଜିଲ୍ଲାପାଳ ତଥା ନିର୍ବାଚନ ଅଧିକାରୀଙ୍କ ନିକଟରେ ଦାଖଲ କରିଥିଲେ l ପ୍ରାର୍ଥୀ ପତ୍ର ଯାଞ୍ଚ ପରେ ତାଙ୍କର ଭୋଟର ଲିଷ୍ଟ ରେ ନାମ ନଥିବା କହି ନାମାଙ୍କନ ପତ୍ର କୁ ଖାରଜ କରି ଥିଲେ ନିର୍ବାଚନ ଅଧିକାରୀ l ଏହାକୁ ନେଇ ଏବେ ବିବାଦୀୟ ପରିସ୍ଥିତି ସୃଷ୍ଟି ହୋଇଛି l ତାଙ୍କ ନାମ ଗୁଣପୁର ପୌର ପରିଷଦରେ ଥିବାରୁ ତାଙ୍କ ନାମକୁ ନିର୍ବାଚନ ଅଧିକାରୀ ନାକଚ କରି ଦେଇଥିଲେ l ହେଲେ ଏହାକୁ ନେଇ ଶିବାଶିଷ ଏବଂ ତାଙ୍କ ଓକିଲ ଖାରଜ କୁ ନେଇ ପ୍ରଶ୍ନ ଉଠାଇଛନ୍ତି l ସେମାନଙ୍କର ଅଭିଯୋଗ ହେଲା ତାଙ୍କ ର ପ୍ରାର୍ଥି ପତ୍ର ଦାଖଲ ସମୟରେ କିପରି ଏହା ଜାଣି ପାରିଲେ ନାହିଁ l ସେତେବେଳେ ସମସ୍ତ ତନଖି ପରେ ନାମାଙ୍କନ ପତ୍ର ଗ୍ରହଣ କରାଯାଇଥିଲା l ପ୍ରାର୍ଥୀ ପତ୍ର ଦାଖଲ ସମୟରେ କେଉଁ ଭୋଟର ତାଲିକା ସେମାନେ ଦେଖିଥିଲେ l ବର୍ତ୍ତମାନ ଲେଉଁ ଭୋଟର ତାଲିକା ଦେଖି ଖାରଜ କଳେ l ଯଦି ନାମ ନଥିଲା ପ୍ରାର୍ଥୀ ପତ୍ର ଗ୍ରହଣ ସମୟରେ ହିଁ ଗ୍ରହଣ କରିବା କଥା ନୁହଁ l ଯାଞ୍ଚ ରେ କିପରି ଖାରଜ କଲେ ତାହା ପରେ ନିର୍ବାଚନ ପରିଚାଳନରେ ଅନିୟମିତତା ନୁହେଁ କି ବୋଲି କହିଛନ୍ତି l ଶିବାଶିଷ ପୂର୍ବରୁ ଗୁଣପୁର ବ୍ଲକ ରେଗେଡା ପଞ୍ଚାୟତ ଅଧୀନ ଗୋପାଳ ନଗର ଠାରେ ରହୂଥିଲେ l ତାଙ୍କର ନାମ ଗ୍ରାମାଞ୍ଚଳରେ ରହୁ ଥିବାରୁ ସେହି ଅନୁସାରେ ସେ ନାମାଙ୍କନ ପତ୍ର ଦାଖଲ କରିଥିଲେ l ତାଙ୍କ ନାମ ବର୍ତ୍ତମାନ ମଧ୍ଯ ସେହି ଅନୁସାରେ ରହିଛି, ପୌର ପରିଷଦର ଭୋଟର ତାଲିକା ହୋଇ ନାହିଁ l ବର୍ତ୍ତମାନ ସୁଦ୍ଧା ପୌର ପରିଷଦ ଘୋଷଣା ହୋଇ ଭୋଟ ହୋଇ ନାହିଁ କିମ୍ବା ତାଙ୍କ ନାମ ଭୋଟର ତାଲିକାରୁ ବା ଦ ପଡି ନାହିଁ । ଯଦି କୌଣସି ବ୍ୟକ୍ତି ଭୋଟର ତାଲିକାରୁ ବ।ଦ ପଡିବା ଜାଣି ଥାନ୍ତା ତେବେ ଅନ୍ୟ ଭୋ ଟର ତାଲିକା ରେ ସଂଯୋଗ କରିଥାନ୍ତେ । ଭୋଟର ତାଲିକାରେ ନାମ ଥାଇ ତାଙ୍କ ପ୍ରାର୍ଥୀ ପତ୍ର ଗ୍ରହଣ କରାଯାଇ ନାକଚ କରିଥିବାରୁ ଏହା ଉପଜିଲାପାଳ ଗୁଣପୁର ତଥା ଉପଖଣ୍ଡ ନିର୍ବାଚନ ଅଧିକାରୀଙ୍କ ବିଜେଡି ଦଳକୁ ସହାୟତା ଦିଗରେ ପରୋ କ୍ଷ ହସ୍ତକ୍ଷେପ ବୋଲି ନବଭାର ତ ନିର୍ମାଣ ସେବା ପାର୍ଟି ର ଜାତୀୟ ଅଧ୍ୟକ୍ଷ ସୂଚନା ଦେଇଛନ୍ତି ।

ନିଜ ଜିଦ୍‌ରେ ଅଟଳ ୫ ପଞ୍ଚାୟତବାସୀ, କେହି ଦାଖଲ କଲେନି ପ୍ରାର୍ଥିପତ୍ର ।

ଏଥର ସମ୍ଭାଳ ବ୍ୟୁରୋ (ଦେବଗଡ) – ମୋବାଇଲ୍‌ ଫୋନ୍ ନେଟ୍‌ୱର୍କ ସମସ୍ୟା ପାଇଁ ଭୋଟ୍ ବର୍ଜନ ନିଷ୍ପତ୍ତି ନେଇଥିବା ଦେବଗଡ଼ ଜିଲ୍ଲା ତିଳେଇବଣି ବ୍ଳକର ୫ଟି ପଞ୍ଚାୟତରେ କେହି ନାମାଙ୍କନ ପତ୍ର ଦାଖଲ କରି ନାହାନ୍ତି। ନାମାଙ୍କନ ପତ୍ର ଦାଖଲର ଆଜି ଶେଷ ତାରିଖ ଥିବା ବେଳେ ପାରପୋଷି, ଝରାଗୋଗୁଆ, ଝାରମୁଣ୍ଡା, ଗଣ୍ଡମ, ଦିମିରିକୁଦା ପଞ୍ଚାୟତରେ ସରପଞ୍ଚ, ୱାର୍ଡ ମେମ୍ବର ଓ ସମିତି ସଭ୍ୟ ପାଇଁ ଜଣେ ବି ବ୍ୟକ୍ତି ପ୍ରାର୍ଥିପତ୍ର ଦାଖଲ କରି ନାହାନ୍ତି। ଏ ସବୁ ପଞ୍ଚାୟତରେ ନାମାଙ୍କନ ପତ୍ର ଦାଖଲ ହୋଇ ନଥିବା ନେଇ ତିଳେଇବଣି ବ୍ଳକ୍ ବିଡିଓ ସୂଚନା ଦେଇଛନ୍ତି। ମୋବାଇଲ୍ ଫୋନ୍ ନେଟୱର୍କ ଜନିତ ସମସ୍ୟାର ସମାଧାନ ନ ହେଲେ ଚଳିତ ପଞ୍ଚାୟତ ନିର୍ବାଚନକୁ ବର୍ଜନ କରାଯିବ ବୋଲି ପୂର୍ବରୁ ଏହି ୫ ପଞ୍ଚାୟତବାସୀ ବୈଠକ କରି ନିଷ୍ପତ୍ତି ନେଇଥିଲେ। ଏମିତିକି କେହି ଏହି ନିଷ୍ପତ୍ତି ବିରୋଧରେ ଯାଇ ନାମାଙ୍କନ ପତ୍ର ଦାଖଲ କଲେ ତାଙ୍କୁ ପଞ୍ଚାୟତ ବିରୋଧୀ ବୋଲି ଘୋଷଣା କରିବାକୁ ମଧ୍ୟ ଚେତାବନୀ ଦିଆଯାଇଥିଲା। ପାରପୋଷି ପଞ୍ଚାୟତରୁ ଗତଥର ସରପଞ୍ଚ ହୋଇଥିବା ବିନତା କିସାନ ଗତ ୧୭ ତାରିଖରେ ନାମାଙ୍କନ ପତ୍ର କ୍ରୟ କରିଥିଲେ। ସେ ପୁଣି ଥରେ ସରପଞ୍ଚ ହେବା ପାଇଁ ଆଶାୟୀ ଥିଲେ। କିନ୍ତୁ ୧୮ ତାରିଖରେ ସେ ନାମାଙ୍କନ ପତ୍ର ଓ ରସିଦକୁ ପଞ୍ଚାୟତ ନିର୍ବାଚନ ଅଧିକାରୀଙ୍କୁ ଫେରାଇ ଦେଇଥିଲେ। ପଞ୍ଚାୟତ ବିରୋଧୀ ଘୋଷିତ ହେବାର ଭୟରେ ସେ ନାମାଙ୍କନ ପତ୍ର ଦାଖଲ କରି ନଥିଲେ ବୋଲି ଜଣାପଡ଼ିଛି।

ଜିଲ୍ଲା ପରିଷଦ ନିର୍ବାଚନ ଲଢ଼ୁଛନ୍ତି ଦୁଇ ପୂର୍ବତନ ବିଧାୟକ ପ୍ରଫୁଲ୍ଲ ଜେନା ଓ ହାଲୁ ମୁଣ୍ଡାରି ।

ଏଥର ସମ୍ଭାଳ ବ୍ୟୁରୋ (ଭଦ୍ରକ/ରାଉରକେଲା) – ତ୍ରିସ୍ତରୀୟ ପଞ୍ଚାୟତ ନିର୍ବାଚନ ରଣଭୂମିକୁ ଓହ୍ଲାଇଛନ୍ତି ଦୁଇ ପୂର୍ବତନ ବିଧାୟକ। ସେମାନେ ଜିଲ୍ଲା ପରିଷଦ ସଭ୍ୟ ପଦ ପାଇଁ ପ୍ରାର୍ଥିପତ୍ର ଦାଖଲ କରିଛନ୍ତି। ପୁଣି ଉଭୟେ ବିଜେଡି ତରଫରୁ ପ୍ରାର୍ଥୀ ହୋଇଛନ୍ତି । ଏହି ଦୁଇ ପୂର୍ବତନ ବିଧାୟକ ହେଲେ- ପ୍ରଫୁଲ୍ଲ ଜେନା ଓ ହାଲୁ ମୁଣ୍ଡାରି। ପ୍ରଫୁଲ୍ଲ ଜେନା ଜନତା ଦଳ ଟିକେଟ୍‌ରେ ୧୯୯୦ରେ ଭଣ୍ଡାରିପୋଖରୀ ଆସନରୁ ବିଧାନସଭାକୁ ନିର୍ବାଚିତ ହୋଇଥିଲେ। କିନ୍ତୁ ଚଳିତ ନିର୍ବାଚନରେ ସେ ଭଣ୍ଡାରିପୋଖରୀ ୧୫ ନମ୍ବର ଜୋନ୍‌ରୁ ଜିଲ୍ଲା ପରିଷଦ ସଭ୍ୟ ପାଇଁ ପ୍ରାର୍ଥିପତ୍ର ଦାଖଲ କରିଛନ୍ତି। ସେ ଗତକାଲି ତାଙ୍କ ପ୍ରାର୍ଥିପତ୍ର ଦାଖଲ କରିଥିଲେ। ସେ ନିର୍ବାଚନ ଜିତିବେ ବୋଲି ଆଶା ରଖିଥିବା କହିଛନ୍ତି। ଭଦ୍ରକ ଜିଲ୍ଲା ପରିଷଦ ଅଧ୍ୟକ୍ଷ ପଦ ଅନୁସୂଚିତ ଜାତିଙ୍କ ପାଇଁ ସଂରକ୍ଷିତ ହୋଇଥିବା ବେଳେ ପ୍ରଫୁଲ୍ଲଙ୍କ ନଜର ଏହା ଉପରେ ଥିବା କୁହାଯାଉଛି। ସେହିପରି ପୂର୍ବତନ ବିଧାୟକ ଜାଲୁ ମୁଣ୍ଡାରୀ ଜିଲ୍ଲା ପରିଷଦ ସଭ୍ୟ ପାଇଁ ଆଜି ପ୍ରାର୍ଥିପତ୍ର ଦାଖଲ କରିଛନ୍ତି। ସେ ବିଜେଡି ଟିକେଟ୍‌ରେ ଏହି ନିର୍ବାଚନ ଲଢ଼ୁଛନ୍ତି। ସେ ସୁନ୍ଦରଗଡ଼ ଜିଲ୍ଲା ବିଶ୍ରା ବ୍ଳକ୍ (କ) ଆସନରୁ ପ୍ରାର୍ଥୀ ହୋଇଛନ୍ତି। ସେ ବି ଜିତିବେ ବୋଲି ଆଶା ରଖିଛନ୍ତି। ସେ ୨୦୦୪ରୁ ୨୦୦୯ ପର୍ଯ୍ୟନ୍ତ ବିଧାୟକ ଥିଲେ। ସେ ଜେଏମ୍‌ଏମ୍ ଟିକେଟ୍‌ରେ ରଘୁନାଥପାଲି ଆସନରୁ ବିଜୟୀ ହୋଇଥିଲେ। ସେହିଭଳି ସେ ବିଶ୍ରା ବ୍ଲକ୍ (କ) ଆସନରୁ ଦୁଇ ଥର ଜିଲ୍ଲା ପରିଷଦ ସଭ୍ୟ ଭାବେ ମଧ୍ୟ ନିର୍ବାଚିତ ହୋଇଥିଲେ।

ସତ୍ୟବାଦୀ ର ବିଧାୟକ ଉମାକାନ୍ତ ସାମନ୍ତରାୟ ଙ୍କ ପତ୍ନୀ ସମିତି ସଭ୍ୟ ପାଇଁ ନାମାଙ୍କନ ପତ୍ର ଦାଖଲ କଲେ ।

ଏଥର ସମ୍ଭାଳ ବ୍ୟୁରୋ (ପିପିଲି) – ତ୍ରିସ୍ତରୀୟ ପଞ୍ଚାୟତ ନିର୍ବାଚନ ମଇଦାନରେ ଓହ୍ଲାଇଲେ ଜଣେ ବିଧାୟକଙ୍କ ପତ୍ନୀ। ସେ ସମିତି ସଭ୍ୟ ପାଇଁ ଆଜି ନାମାଙ୍କନ ପତ୍ର ଦାଖଲ କରିଛନ୍ତି। ତାଙ୍କ ନାଁ ଶୁଭ୍ରାନ୍ତି ସାମନ୍ତରାୟ। ତାଙ୍କ ସ୍ୱାମୀଙ୍କ ନାଁ ଉମାକାନ୍ତ ସାମନ୍ତରାୟ, ଯିଏ ସତ୍ୟବାଦୀରୁ ବିଧାନସଭାକୁ ନିର୍ବାଚିତ ହୋଇଛନ୍ତି। ପୁରୀ ଜିଲ୍ଲା କଣାସ ବ୍ଲକ ଦୋଛିଆଁ ପଞ୍ଚାୟତରୁ ସମିତି ସଭ୍ୟ ପ୍ରାର୍ଥୀ ଭାବେ ନାମାଙ୍କନ ପତ୍ର ଦାଖଲ କରିଛନ୍ତି ଶୁଭ୍ରାନ୍ତି ସାମନ୍ତରାୟ। ଆଜି ସେ କଣାସ ବ୍ଲକ୍ ବିଡିଓଙ୍କ ଅଫିସ୍‌ରେ ପହଞ୍ଚି ନାମାଙ୍କନ ପତ୍ର ଦାଖଲ କରିଛନ୍ତି। ବିଧାୟକଙ୍କ ଧର୍ମପତ୍ନୀ ସମିତି ସଭ୍ୟ ଭାବେ ଛିଡ଼ା ହୋଇଥିବାରୁ ଏହା ଏବେ ସ୍ଥାନୀୟ ଅଞ୍ଚଳରେ ଆଲୋଚନାର ବିଷୟ ହୋଇଛି। ସୂଚନାଯୋଗ୍ୟ, ପଞ୍ଚାୟତ ନିର୍ବାଚନ ପାଇଁ ଆଜି ନାମାଙ୍କନ ପତ୍ର ଦାଖଲ କରିବାର ଶେଷ ତାରିଖ ଥିଲା। ଆସନ୍ତାକାଲି ନାମାଙ୍କନ ପତ୍ର ଯାଞ୍ଚ କରାଯିବ। ୨୫ ତାରିଖ ପର୍ଯ୍ୟନ୍ତ ପ୍ରାର୍ଥୀ ଚାହିଁଲେ ନାମାଙ୍କନ ପତ୍ର ପ୍ରତ୍ୟାହାର କରିପାରିବେ। ଏହା ପରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ ଓ ଫେବ୍ରୁଆରୀ ୧୬, ୧୮, ୨୦, ୨୨ ଓ ୨୪ ତାରିଖରେ ଭୋଟ୍ ଗ୍ରହଣ କରାଯିବ।