ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ଆଜି ଓଡ଼ିଶା ପ୍ରଦେଶ କଂଗ୍ରେସ କମିଟି ତରଫରୁ ପଛୁଆବର୍ଗ ସଂରକ୍ଷଣ ସଂକ୍ରାନ୍ତରେ ସାମ୍ବାଦିକ ସମ୍ମିଳନୀରେ ଉଦ୍ବୋଧନ ଦେଇ ମିଡ଼ିଆ ଅଧ୍ୟକ୍ଷ ଗଣେଶ୍ୱର ବେହେରା ସ୍ପଷ୍ଟ ଭାବରେ କହିଛନ୍ତି ଯେ ଓବିସି ମାନଙ୍କ ପାଇଁ ପ୍ରଥମେ ସଂରକ୍ଷଣ କରି ତା’ପରେ ନିର୍ବଚାନ କର । ରାଜ୍ୟର ୫୦ ଭାଗରୁ ଅଧିକ ଜନସଂଖ୍ୟ ଥିବା ଏହି ବର୍ଗପ୍ରତି ଅବିଚାରକୁ ମୁଣ୍ଡପାତି ସହିନେବା ସମ୍ଭବ ନୁହେଁ । ଓବିସି ବର୍ଗର ସାମାଜିକ, ଅର୍ଥନୈତିକ ତଥା ରାଜନୀତିକ ସ୍ୱାର୍ଥର ସୁରକ୍ଷା ପାଇଁ କଂଗ୍ରେସ ଅଙ୍ଗୀକାରବଦ୍ଧ, ସୁତରାଂ ସଂରକ୍ଷଣ ତ୍ରିସ୍ତରୀୟ ପଂଚାୟତ ନିର୍ବାଚନ ଓ ପୌର ନିର୍ବାଚନରେ ଓବିସି ପାଇଁ ଆସନ ସଂରଣକ୍ଷ କରି ନିର୍ବାଚନ କରାଯାଉ । ବ୍ୟତିକ୍ରମ ହେଲେ କଂଗ୍ରେସର ବଚରାଳୟକୁ ଯିବ ଓ ଲୋକଙ୍କ ପାଖକୁ ଯିବ । ଏ ସଂପର୍କରେ ରାଜ୍ୟ ସରକାର ତୁରନ୍ତ ବିଧାନସଭାର ସ୍ୱତନ୍ତ୍ର ଅଧିବେସନ ଡାକିବାକୁ କଂଗ୍ରେସ ଦୃଢ଼ ଦାବି ଜଣାଉଛି ।
ଉଭୟ କେନ୍ଦ୍ର ବିଜେପି ଓ ରାଜ୍ୟ ବିଜେଡ଼ି ଓବିସିର ସ୍ୱାର୍ଥପ୍ରତି ଅଣଦେଖା କରିଚାଲିଛନ୍ତି ।
କେନ୍ଦ୍ର ମୋଦି ସରକାର ଜାତି ଭିତିକ ଜନଗଣନା କରିବାକୁ କରିଦେଲେ, ଦ୍ୱିତୀୟରେ, ଉପା- ସରକାର ଅମଳରେ ୨୦୧୧ ରେ ଯେଉଁ ସାମାଜିକ, ଅର୍ଥନିତୀକ ଓ ଜାତି (ଏସ୍ଇସିସି) ଗଣନା ହୋଇଥିଲା । ତାହା ରିପୋର୍ଟ ପ୍ରକାଶ କଲେ ନାହିଁ । ଆଳ ଦେଖାଇଲେ ଯେ ଏସ୍ଇସିସି ରିପୋର୍ଟ ୨୦୧୧ ତୃଟିପୂର୍ଣ୍ଣ । ଏହି ଆଳ ସଂପୂର୍ଣ୍ଣ ନିରାଧାର । ଶ୍ରୀଯୁକ୍ତ ବେହେରା ତଥ୍ୟପୂର୍ଣ୍ଣ ଯୁକ୍ତ ଉପସ୍ଥାପିତ କରି ଦର୍ଶାଇଥିଲେ ଯେ କେନ୍ଦ୍ର ସରକାରଙ୍କ ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟର ଷ୍ଟାଣ୍ଡିଂ କମିଟି ତା’ର ମାନ୍ୟବର ଲୋକସଭା ବାଚସ୍ପତିଙ୍କୁ ଜୁଲାଇ ୩୧,୨୦୧୬ରେ ଉଲ୍ଲେଖ୍ୟ କରିଥିଲେ ଯେ ଉପରୋକ୍ତ ଏସ୍ଇସିସି ସର୍ଭେରେ ୯୮.୮୭ ତଥ୍ୟ ତ୍ରୁଟିଶୂନ୍ୟ । ଏହା ସାଂଗକୁ ଭାରତ ସରକାରଙ୍କ ରେଜିଷ୍ଟ୍ରାର ଜେନେରାଲ ମଧ୍ୟ ଅନୁରୂପ ମତ ଦେଇ କହିଲେ ଯେ ଏହି ସର୍ଭେରେ ମାତ୍ର ୧ ଭାଗରୁ କମ ତ୍ରୁଟି ଅଛି । ସୁତରାଂ କେନ୍ଦ୍ର ସରକାର ଏ ସବୁକୁ ଏଡ଼ାଇ ଯାଇଛନ୍ତି । ଓବିସି ପ୍ରତି ଯୋର ଅନ୍ୟାୟ କରିଛନ୍ତି ।
ରାଜ୍ୟ ସରକାର ମଧ୍ୟ ପଛୁଆବର୍ଗଙ୍କ ପ୍ରତି ନ୍ୟାୟ ପ୍ରଦାନ କ୍ଷେତ୍ରରେ ଚରମ ଅବହେଳା ପ୍ରଦର୍ଶନ କରିଚାଲିଛନ୍ତି । ମିଡିଆ ଅଧ୍ୟକ୍ଷ ଦର୍ଶାଇ ଥିଲେ ଯେ ମାନ୍ୟବର ସର୍ବୋଚ୍ଚ ନ୍ୟାୟାଳୟ ୨୦୧୦ ରୁ କେ. କୃର୍ଷ୍ଣମୂର୍ତୀ ବନାମ ଭାରତ ସରକାର ରାୟରେ ନିର୍ଦ୍ଦେଶ ଜାରି କରିଥିଲେ ଯେ ତିନିଗୋଟି ସର୍ତପୂରଣ କଲାପରେ ଯାଇ ଓବିସି ମାନଙ୍କ ପାଇଁ ରାଜନୈତିକ ସଂରକ୍ଷଣ କରିପାରିବ । ମାତ୍ର ଦୀର୍ଘ ୧୧ବର୍ଷ ଧରି ସରକାର ଶୋଇ ରହିଲେ । ଆଜି ଓବିସିଙ୍କ ପାଇଁ ଶୂନ ହେବାକୁ ଯାଉଛି । ୧୯୯୭, ୨୦୦୨, ୨୦୦୭, ୨୦୧୨ ଓ ୨୦୧୭ ରେ ୨୭ ଭାଗ ଆସନ ସଂରଣକ୍ଷ ପାଇଁ ଉପକୃତ ହୋଥିବା ପଛୁଆବର୍ଗ ୫ ଗୋଟି ନିର୍ବାଚନ ପରେ ୨୦୨୨ ନିର୍ବଚନରେ ସଂରକ୍ଷଣ ସୁବିଧାରୁ ବଂଚିତ ହୋଇଛନ୍ତି । ସେହିପରି ଗତ ସେପ୍ଟେମ୍ବର ୭ ରେ ପୌର ଆଇନ ଓ ସେପ୍ଟେମ୍ବର ୮ ରେ ପଂଚାୟତ ଆଇନ ଓଡ଼ିଶା ବିଧାନ ସଭାରେ ବିନା ଆଲୋଚନରେ ପାରିତ କରିନେଲେ । ଏହି ଦୁଇ ଆଇନର ସଂଶୋଧନ ଫଳରେ ସଂରକ୍ଷଣ ୨୭ ଭାଗକୁ ୧୧.୨୫ ଭାଗକୁ ହ୍ରାସ ପାଇଲା । ସେତେବେଳେ ମଧ୍ୟ ମାନ୍ୟବର ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁପାଳନ କଥା ଚିନ୍ତା କଲେ ନାହିଁ । ସୁତରାଂ ୨ ଟି କଥା ଅତ୍ୟନ୍ତ ସ୍ପଷ୍ଟ ରାଜ୍ୟ ସରକାର ଅଦାଲତର ନିର୍ଦ୍ଦେଶକୁ ଅବଜ୍ଞା କରୁଛନ୍ତି, ପଛୁଆ ବର୍ଗଙ୍କ ପ୍ରତି ଚରମଅବହେଳା କରୁଛନ୍ତି । ଅପରିଣାମଦର୍ଶୀ ହୋଇ ଓବିସି ମାନଙ୍କୁ ସଂରଣକ୍ଷ ବ୍ୟବସ୍ଥାରୁ ବଂଚିତ ହେଉଛନ୍ତି ।
ଏହି ସାମ୍ବାଦିକ ସମ୍ମିଳନୀରେ କଂଗ୍ରେସ ମୁଖପାତ୍ର ଶ୍ରୀ ମନୋଜ ମହାପାତ୍ର କହିଲେ ଯେ ବିଜେଡ଼ି ଦଳୀୟ ଟିକେଟରେ ୪୦ ଭାଗ ପଛୁଆ ବର୍ଗଙ୍କୁ ଦେବାର ଘୋଷଣା ହାସ୍ୟାସ୍ପଦ । ଏହି ଘୋଷଣା ହୁଏତ ଦଳୀୟ କର୍ମୀଙ୍କ ଅସନ୍ତୋଷ ହ୍ରାସ କରିପାରେ କିନ୍ତୁ ରାଜ୍ୟବାସୀଙ୍କ କ୍ରୋଦ୍ଧ ବଢ଼ାଇବ । ବିଜେଡ଼ି ସରକାରରେ ଅଛି ତେଣୁ ରାଜ୍ୟ ଓ ରାଜ୍ୟବାସୀଙ୍କ କଥା ଚିନ୍ତା ନକରି ନିଜର ଦଳ କଥା ଚିିନ୍ତା କରିବା ଦୁଃଭାଗ୍ୟଜନକ । ଯଦି ବିଜେଡ଼ି ଓବିସି ସଂରକ୍ଷଣ ଦେବାର ଅଛି ତାହାହେଲେ ମୁଖ୍ୟମନ୍ତ୍ରୀ, ବିଜେଡ଼ି ରାଜ୍ୟ ସଭାପତି ଓ ସଂଗଠନ ସଂପାଦକ ପଦବୀରୁ ଅତିକମରେ ଓବିସି ବର୍ଗରୁ ଜଣଙ୍କୁ ଦେଉ ବୋଲି ଆହ୍ୱାନ ଦେଇଥିଲେ । ପିସିସି ଲିଗାଲସେଲ ଅଧ୍ୟକ୍ଷ ଶ୍ରୀ ସୁରେନ୍ଦ୍ର ନାଥ କର ସମ୍ବୋଧନ କରି କହିଲେ ଯେ ଆଇନର ଅନୁପାଳନ ଗଣତନ୍ତ୍ରର ଅପରିହାର୍ଯ୍ୟ । ଯେଉଁଠି ଆଇନ ଉପହାସିତ ସେଠି ନ୍ୟାୟ ବିଳମ୍ବିତ । ଓବିସି ସଂରକ୍ଷଣ ପ୍ରସଙ୍ଗରେ ରାଜ୍ୟ ସରକାର ମାନ୍ୟବର ସର୍ବୋଚ୍ଚ ଅଦାଲତର ନିର୍ଦ୍ଦେଶକୁ ଅଣଦେଖା କରିବା ଓ ପରିଣତି ଅର୍ଦ୍ଧେକ ଜନସଂଖ୍ୟା ବିଶିଷ୍ଟ ପଛୁଆ ବର୍ଗକୁ ସଂରକ୍ଷଣହୀନ କରିବା ଅକ୍ଷମଣୀୟ । ଏହି ସାମ୍ବାଦିକ ସମ୍ମିଳନୀରେ ପିସିସି ସାଧାରଣ ସଂପାଦକ ଚିନ୍ମୟ ସୁନ୍ଦର ଦାସ ଓ ସଂପାଦକ ତଥା ଆଇନଜୀବି ଶମ୍ଭୁନାଥ ପାଣିଗ୍ରାହୀ ଉପସ୍ଥିତ ଥିଲେ ।
