ଗାନ୍ଧୀ ଜୟନ୍ତି ଉପଲକ୍ଷେ ମିଠା ଓ ଖାଦ୍ୟ ବଣ୍ଟନ….!

!!! ରାୟଗଡା ରୁ ଜିଲ୍ଲା ପ୍ରତିନିଧି ପି॰ଦିଲ୍ଲୀପ କୁମାର ଙ୍କ ରିପୋର୍ଟ !!!

ଏଥର ସମ୍ଭାଳ(ରାୟଗଡା)- ରାୟଗଡା ରେ ଆଜି ପବିତ୍ର ଗାନ୍ଧୀ ଜୟନ୍ତୀ ଉପଲକ୍ଷେ ଜ଼ିଲ୍ଲା ସଭାପତି ଶ୍ରୀ ଶିବ ପଟ୍ଟନାୟକ ଙ୍କ ନିର୍ଦେଶକ୍ରମେ ରାୟଗଡା ନଗର ରେ ଭାଜପାର ନଗର ସଭାପତି ଶ୍ରୀ ଶ୍ୟାମ କୁମାର ଦାଶ ଙ୍କ ତତ୍ୱାବଧାନରେ ବିଭିନ୍ନ କାର୍ଯ୍ୟକ୍ରମ କରାଯାଇଛି।ଶ୍ରୀମତୀ ମଞ୍ଜୁଳା ମିନିଆକା ନଗର ଉପସଭାନେତ୍ରୀଙ୍କ ନେତୃତ୍ୱରେ ଜ଼ିଲ୍ଲା ଭାଜପା କାର୍ଯ୍ୟାଳୟ ରେ ଗାନ୍ଧୀ ଜି ଙ୍କ ଫୋଟୋଚିତ୍ରକୁ ପୁଷ୍ପମାଲ୍ୟ ଦିଆଯାଇଛି।….

ନଗର ଯୁବମୋର୍ଚ୍ଚା ସଭାପତି ଶ୍ରୀ ରାଜେଶ ପାଣିଗ୍ରାହୀ ଙ୍କ ନେତୃତ୍ୱରେ ହାଉସିଂବୋର୍ଡ କଲନିରେ ବୃକ୍ଷରୋପଣ କାର୍ଯ୍ୟକ୍ରମ କରାଯାଇଛି।ରାୟଗଡା ନିର୍ବାଚନ ମଣ୍ଡଳୀ ବିଧାୟକ ପାର୍ଥି ଶ୍ରୀ ବସନ୍ତ କୁମାର ଉଲ୍ଲାକା ଙ୍କ ନେତୃତ୍ୱରେ ରାୟଗଡା ଜେଲ ରେ ମିଠା ବଣ୍ଟା ଯାଇଛି ତତ୍ସହିତ ରାୟଗଡା ନଗଗରେ ଥିବା ଅସହାୟ ଲୋକଙ୍କୁ ରନ୍ଧା ଖାଦ୍ୟ ବଣ୍ଟନ କରାଯାଇଛି।

ହାବିଲଦାର ଓ କନଷ୍ଟବଲ ଇଲେକ୍ସନ ପାଇଁ ନାମାଙ୍କନ ପତ୍ର ଦାଖଲ…!

!!! ଗଞ୍ଜାମ ରୁ ଜିଲ୍ଲା ପ୍ରତିନିଧି ପବିତ୍ର କୁମାର ରାଉତଙ୍କ ରିପୋର୍ଟ !!!

ଏଥର ସମ୍ଭାଳ(ବେଗୁନିଆପଡା)- ଗଞ୍ଜାମଜିଲ୍ଲା ଛତ୍ରପୁର ଠାରେ ହାବିଲଦାର ଓ କନେଷ୍ଟବଲ ଇଲେକ୍ସନ ପାଇଁ ୨୨ ଜଣ ନାମାଙ୍କନ ପତ୍ର ଦାଖଲ କରିଛନ୍ତି ସଭାପତି ଅଭିମନ୍ୟୁ ଜାଲି , ଗୋରାଚାନ୍ଦ ତ୍ରିପାଠୀ ଉପସଭାପତି ଆକାଶ ବେହେରା, ଜି. ମନୋଜ କୁମାର ସମ୍ପାଦକ ଭାବରେ ସୁବାସ ଚନ୍ଦ୍ର ସେଠୀ ବ୍ରଜମୋହନ ଜେନା, ଯୁଗ୍ମ ସମ୍ପାଦକ ଭାବରେ ଦିଲୀପ କୁମାର ରଣା ଦୀନବନ୍ଧୁ ବେହେରା ପି , ଧୃବ କହଁର ଙ୍କ ସମେତ ଅନ୍ୟ ସମସ୍ତେ ନାମାଙ୍କନ ପତ୍ର ଏକ ବିଶାଳ ବାଇକ ରାଲି କରି ଆରକ୍ଷଅଧିକାରୀ ଙ୍କ କାର୍ଯ୍ୟାଳୟ ରେ ପହଂଚି ଆଡିସନାଲ ଏସ୍ପି ବିଜୟ କୁମାର ମଲିକ ଙ୍କ ନିକଟରେ ଉଭୟ ପାର୍ଟିର ୨୨ ଜଣ କେଣ୍ଡେଟ ନିଜ ନିଜ ସମର୍ଥକ ଙ୍କ ସହ ନାମାଙ୍କନ ପତ୍ର ଦାଖଲ କରିଥିଲେ ଆସନ୍ତା ୧୦ ତାରିଖରେ ଇଲେକ୍ସନ ହେବାକୁ ଥିବାବେଳେ ମୋଟ ଭୋଟର ହେଉଛନ୍ତି ୭୨୦ ସେଥିମଧ୍ୟରୁ ପୁରୁଷ ଭୋଟର ୬୧୮ ଓ ମହିଳା ଭୋଟର ୧୦୨ । ଆସନ୍ତା ୧୧ ତାରିଖରେ ଭୋଟ ଗଣତି ହେବ ।

କୋଦଳା ଏଲ ଏନ ସ୍ନାତକ ମହାବିଦ୍ୟାଳୟରେ ଜୁନିଅର ରେଡ଼ କ୍ରସ ପକ୍ଷରୁ ତାଲିମ ଶିବିର ଉଦଘାଟିତ…!

!!! ଗଞ୍ଜାମ ରୁ ଜିଲ୍ଲା ପ୍ରତିନିଧି ପବିତ୍ର କୁମାର ରାଉତଙ୍କ ରିପୋର୍ଟ !!!

ଏଥର ସମ୍ଭାଳ(ବେଗୁନିଆପଡା)- କୋଦଳା ସ୍ଥିତ ଲକ୍ଷ୍ମୀ ନାରାୟଣ ସ୍ନାତକ ମହାବିଦ୍ୟାଳୟ ପରିସରରେ ଜୁନିଅର ରେଡ଼ କ୍ରସ ସୋସାଇଟି ପକ୍ଷରୁ ଏକ ସ୍ବେଚ୍ଛାସେବୀ ତାଲିମ ଶିବିର ଉଦଘାଟିତହୋଇଯାଇଛି। ଏହି କାର୍ଯ୍ୟକ୍ରମକୁ ମହାବିଦ୍ୟାଳୟର ପ୍ରତିଷ୍ଠାତା ସମ୍ପାଦକ ପ୍ରଫୁଲ୍ଲ କୁମାର ରଥ ଉଦଘାଟନ କରିଥିବା ବେଳେ ମହାବିଦ୍ୟାଳୟର ଅଧକ୍ଷ ଡଃ. ପଦ୍ମ ଚରଣ ପାଢ଼ୀ ଅଧକ୍ଷତା କରିଥିଲେ। ଅତିଥି ଭାବେ ଖଲ୍ଲିକୋଟ ଆର ସି ଏମ ବିଜ୍ଞାନ ମହାବିଦ୍ୟାଳୟର ଇତିହାସ ବିଭାଗ ଅଧ୍ୟାପକ ଟି ଅକ୍ଷୟ କୁମାର, କୋଦଳା ମହାବିଦ୍ୟାଳୟର ଅଧ୍ୟାପକ ସାଗର ଚାନ୍ଦ ପାତ୍ର,ଡଃ ବିଷ୍ଣୁ ନାରାୟଣ ସେଠୀ,ବିନୋଦ କୁମାର ମିଶ୍ର, ଶିକ୍ଷକ ଦେବେନ୍ଦ୍ର କୁମାର ମହାରଣା,କୋଦଳା +୨ ମହାବିଦ୍ୟାଳୟର ଅଧ୍ୟାପକ ସାସ।ଲିପି ନାୟକ, ରଘୁନାଥ ମୁଦୁଲି ପ୍ରମୁଖ ଯୋଗଦେଇ ରେଡ଼କ୍ରସର ଉପାଦେୟତା ଉପରେ ଆଲୋକପାତ କରିଥିଲେ। କାର୍ଯ୍ୟକ୍ରମରେ ଅଧ୍ୟାପକ ବିଷ୍ଣୁ ନାରାୟଣ ସେଠୀ ଙ୍କ ଦ୍ଵାରା ଲିଖିତ ୨ଟି ପୁସ୍ତକ ଉନ୍ମୋଚିତ ହୋଇଥିଲା। କାର୍ଯ୍ୟକ୍ରମକୁ ଅଧ୍ୟାପକ ଡଃ ବିଷ୍ଣୁ ନାରାୟଣ ସେଠୀ ପରିଚାଳନା କରିଥିବା ବେଳେ ବିଭିନ୍ନ ମହାବିଦ୍ୟାଳୟର ଛାତ୍ରଛାତ୍ରୀ ଓ ଏହି ମହାବିଦ୍ୟାଳୟର ସମସ୍ତ କର୍ମଚାରୀ ଯୋଗଦେଇଥିଲେ। ଏହି ତାଲିମ ୩ ଦିନ ଧରି ଚାଲିବାର କାର୍ଯ୍ୟକ୍ରମ ରହିଛି।

ସମୂହ ସ୍ୱଛତା ଅଭିଯାନ ଓ ପ୍ଲାଷ୍ଟିକ ବର୍ଜନ କାର୍ଯ୍ୟକ୍ରମ….!

!!! ଗଞ୍ଜାମ ରୁ ଜିଲ୍ଲା ପ୍ରତିନିଧି ପବିତ୍ର କୁମାର ରାଉତଙ୍କ ରିପୋର୍ଟ !!!

ଏଥର ସମ୍ଭାଳ(ବେଗୁନିଆପଡା)- କୋଦଳା ବିଜ୍ଞାପିତ ଅଞ୍ଚଳ ପରିଷଦ ପକ୍ଷ ରୁ କାର୍ଯ୍ୟ ନିର୍ବାହୀ ଅଧିକାରୀ ସୁଜିତ କୁମାର ଚୌଧୁରୀଙ୍କ ପ୍ରତ୍ୟକ୍ଷ ତତ୍ୱାବଧାନ ତଥା ସ୍ଵଛତା ବିଶେଷଜ୍ଞ ଚନ୍ଦ୍ର କାନ୍ତ ମାରାଣ୍ଡିଙ୍କ ନେତୃତ୍ୱ ରେ ମୁଖ୍ୟ ଅତିଥି ଡ଼ିଏସଡବ୍ଲୁଓ ସୁରେଖା ସୁନ୍ଦରୀ, ଏଡ଼ିଏସଡବ୍ଲୁଓ ସାଧନ ଦାଶ, ଏନଏସି ସାହାୟକ ଯନ୍ତ୍ରୀ ସୁଧାକର ଦାଶ ଙ୍କ ଉପସ୍ଥିତିରେ ଏନଏସି ର ସମସ୍ତ ସଫେଇ କର୍ମଚାରି, ଅଙ୍ଗନବାଡି କର୍ମୀ, ସ୍ଵଛସାଥୀଓ କାର୍ଯ୍ୟଳୟ କର୍ମକର୍ତ୍ତା ଏକ ମିଳିତ ରା଼ଲି ମାଧ୍ୟମ ରେ ବର୍ଯ୍ୟବସ୍ତୁ ପରିଚାଳନା କାର୍ଯ୍ୟଳୟ ଠାରୁ ବାହାରି ଏନଏସି କାର୍ଯ୍ୟାଳୟ ନିକଟରେ ଶପଥ ପାଠ କରିଥିବା ବେଳେ ଅନ୍ୟ 100 ଜଣଙ୍କୁ ମଧ୍ୟ ଏହି ଶପଥ କରାଇବି ବୋଲି କହିଥିଲେ !ପରେ ପରେ ସମସ୍ତ କୋଦଳା ମୁଖ୍ୟ ରାସ୍ତାରେ ସ୍ଵଛତା ଓ ସମସ୍ତ ପ୍ଳାଷ୍ଟିକ ବର୍ଯ୍ୟାବସ୍ତୁ କୁ ସମ୍ପୂର୍ଣ ବର୍ଜନ ସମ୍ବନ୍ଧୀୟ ବିଭିନ୍ନ ସ୍ଲୋଗାନ ଦେଇ କାର୍ଯ୍ୟଳୟ ସମ୍ମୁଖରେ ପହଞ୍ଚିଥିଲେ !ଏହି କାର୍ଯ୍ୟକ୍ରମରେ ଯୋଗ ଦେଇଥିବା ଡ଼ିଏସଡବ୍ଲୁଓ କାର୍ଯ୍ୟକ୍ରମ ରେ ନିଜେ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନା କରି ଖୁସିବ୍ୟକ୍ତ କରିଥିଲେ ।

ଜବତ ହେଲା ଲକ୍ଷାଧିକ ଟଙ୍କାର ଗଞ୍ଜେଇ ; ଗୁଣପୁର ଅବକାରୀ ବିଭାଗ କୁ ବଡ଼ ସଫଳତା ….!

!!! ରାୟଗଡା ଜିଲ୍ଲା ଗୁଣପୁର ଉପଖଣ୍ଡ ରୁ ପ୍ରତିନିଧି ବାସନ୍ତୀ କୁମାରୀ ପାଟ୍ଟଜୋଶୀ ଙ୍କ ରିପୋର୍ଟ !!!

ଏଥର ସମ୍ଭାଳ (ଗୁଣୁପୁର) – ରାୟଗଡ଼ା ଜିଲ୍ଲା ଗୁଣପୁର ଅବକାରୀ ବିଭାଗ ପକ୍ଷରୁ ଆଜି ଭୋର ରେ ପେଟ୍ରୋଲିଂ କରୁଥିବା ସମୟ ରେ ବିଶେଷ ସୂତ୍ର ରୁ ଖବର ପାଇ ଗୁଣପୁର ଅବକାରୀ ଥାନା ଭାରପ୍ରାପ୍ତ ଅଧିକାରୀ ଶ୍ରୀ ହିତାଂସୁ ଶେଖର ମଲ୍ଲିକ ଙ୍କ ନେତୃତ୍ୱ ରେ ପଦ୍ମପୁର ଅଧିନସ୍ଥ ପରିମା ଗ୍ରାମ ର ରଘୁନାଥ ମାଝି (୨୮) , ପିତା – କାର୍ଜି ମାଝି ନାମକ ବ୍ୟକ୍ତି ଙ୍କ ଠାରୁ ୧୫୦ କେଜି ଗଞ୍ଜେଇ ଜବତ କରାଯାଇଥିଲା । ଉକ୍ତ ଗଞ୍ଜେଇ ଗୁଡିକୁ ବାହାର ରାଜ୍ୟ କୁ ରପ୍ତାନି କରିବାକୁ ଅଭିଯୁକ୍ତ ଗଚ୍ଛିତ କରି ରଖିଥିବା ସୁଚନା ଦେଇଥିଲେ ଅବକାରୀ ଥାନା ଅଧିକାରୀ ।

ଜବତ ଗଞ୍ଜେଇ ର ଆନୁମାନିକ ମୂଲ୍ୟ ୮ ଲକ୍ଷ ଟଙ୍କା ହେବ ବୋଲି ସୁଚନା ମିଳିଛି । ଏଥି ନେଇ ଅବକାରୀ ଥାନା କେସ୍ ନମ୍ବର ୨୮/୨୦୨୧ କ୍ରମେ କମିଟିଂ ଅଫେନ୍ସ୍ ଧାରା ୨୦ (ବି) (ii) (ସି) ଏନ ଡ଼ି ପି ଏସ୍ ଆକ୍ଟ ୧୯୮୫ ଅନୁଯାୟୀ କୋର୍ଟ ଚାଲାଣ କରାଯିବ ବୋଲି ସୁଚନା ଦେଇଛନ୍ତି ।  ଆଜି ବିଭାଗ ପକ୍ଷରୁ ଗୁଣପୁର ଅବକାରୀ କାର୍ଯ୍ୟ।ଳୟ ଠାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀ ରେ ଗୁଣପୁର ରେଞ୍ଜ ଅବକାରୀ ଅଧିକାରୀ ଶ୍ରୀ ମଲ୍ଲିକ ଙ୍କ ସମେତ ଓ॰ଆଇ॰ସି ଶ୍ରୀ ମାଧବ କୌଶଲ୍ୟା, ଗୁଣପୁର ଏ॰ଆଇ॰ସି ଶ୍ରୀ ଦିବାକର ମହାପାତ୍ର , ବିଷମକଟକ ଏ॰ଆଇ॰ସି ଶ୍ରୀ ସନ୍ତୋଷ କୁମାର ସେଠୀ , ଗୁଡାରୀ ଏ॰ଆଇ॰ସି ଶ୍ରୀ ମାଝି ଗୌରୀ ପଟନାୟକ ଏବଂ ଗୁଣପୁର , ଗୁଡାରୀ ଓ ପଦ୍ମପୁର ଅବକାରୀ ବିଭାଗ ର କର୍ମକର୍ତ୍ତା ବୃନ୍ଦ ଉପସ୍ଥିତ ରହିଥିଲେ ।

ଆକାଂକ୍ଷୀ ଜିଲ୍ଲା ତାଲିକାରେ ଆଗରେ ଗଜପତି, ପାଇବ ୧୧ କୋଟି…!

!!! ଗଜପତି ରୁ ଜିଲ୍ଲା ପ୍ରତିନିଧି ଅନିତ କୁମାରୀ ଅଧିକାରୀ ଙ୍କ ରିପୋର୍ଟ !!!

ଏଥର ସମ୍ଭାଳ(ଗଜପତି)- ଆକାଂକ୍ଷୀ ଜିଲ୍ଲା ତାଲିକାରେ ଟପ୍‌ରେ ରହିଛି ଗଜପତି ଜିଲ୍ଲା । ସ୍ୱାସ୍ଥ୍ୟ,ପୋଷଣ, ଶିକ୍ଷା, କୃଷି, ଜଳସଂପଦ,ମୌଳିକ ଭିତ୍ତିଭୂମି, ଦକ୍ଷତା ବିକାଶ କ୍ଷେତ୍ରକୁ ଆକଳନ କରି ଗତ ଅଗଷ୍ଟ ମାସରେ  ନିତି ଆୟୋଗଙ୍କ ପକ୍ଷରୁ ଏକ  ତାଲିକା ପ୍ରସ୍ତୁତ ହୋଇଥିଲା । ସବୁ କ୍ଷେତ୍ରରେ ଉନ୍ନତ ପ୍ରଦର୍ଶନ ପାଇଁ ଗଜପତି ଜିଲ୍ଲା ପ୍ରଥମ ସ୍ଥାନ ଅଧିକାର କରିଥିବା କହିଛନ୍ତି ଜିଲ୍ଲାପାଳ ।  ଏଥିପାଇଁ ଜିଲ୍ଲାକୁ ନୀତି ଆୟୋଗଙ୍କ ପକ୍ଷରୁ ୫କୋଟି ପୁରସ୍କାର ମିଳିବାକୁ ଥିବା ବେଳେ କୃଷିରେ ପ୍ରଥମ ଏବଂ ଜଳସଂପଦ କ୍ଷେତ୍ରରେ ଦ୍ୱିତୀୟ ସ୍ଥାନ ଅଧିକାର କରିଥିବାରୁ ଅତିରିକ୍ତ ୬ କୋଟି ଟଙ୍କାର ପୁରସ୍କାର ରାଶି ମିଳିବ । ଗତ ୨୦୧୮ ମସିହା ଡିସେମ୍ବର  ରେ ଗଜପତି ଜିଲ୍ଲା ଏହି କାର୍ଯ୍ୟକ୍ରମରେ ଦକ୍ଷତା ବିକାଶ, ଏବଂ ଆର୍ଥିକ ଅନ୍ତର୍ଭୁକ୍ତିକରଣ ପ୍ରଥମ ସ୍ଥାନ ଅଧିକାର କରିଥିବା ବେଳେ ୨୦୧୯ ମସିହା ଡିସେମ୍ବର ମାସରେ କୃଷି ଓ ଜଳସଂପଦ କ୍ଷେତ୍ରରେ ତୃତୀୟ ଏବଂ ୨୦୨୦ ମସିହା ନଭେମ୍ବର ମାସରେ ମୌଳିକ ଭିତିଭୂମି କ୍ଷେତ୍ରରେ ଦ୍ୱିତୀୟ ସ୍ଥାନ ଅଧିକାର କରିଥିଲା ।

ବାଲୁକା କଳାରେ ଗାନ୍ଧିଙ୍କୁ ଶ୍ରଦ୍ଧାଞ୍ଜଳି…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ଆଜି ସାରା ଦେଶ ମହାତ୍ମା ଗାନ୍ଧି ଏବଂ ଲାଲ ବାହାଦୁର ଶାସ୍ତ୍ରୀଙ୍କ ଜୟନ୍ତୀ ପାଳନ କରୁଛି। ଏହି ଅବସରରେ ପ୍ରଧାନମନ୍ତ୍ରୀ ମୋଦି ଆଜି ସକାଳେ ରାଜଘାଟସ୍ଥିତ ଗାନ୍ଧିଜୀଙ୍କ ପ୍ରତିମୂର୍ତ୍ତି ଏବଂ ବିଜୟଘାଟସ୍ଥିତ ଶାସ୍ତ୍ରିଜୀଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଗାନ୍ଧି ଜୟନ୍ତୀ ଅବସରରେ ବାଲୁକା ଶିଳ୍ପୀ ମାନସ ସାହୁ ବାଲୁକା କଳା ମାଧ୍ୟମରେ ବାପୁଜୀଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ପୁରୀ ବେଳାଭୂମିର ବାଲିରେ ଗାନ୍ଧିଙ୍କ ପ୍ରତିମୂର୍ତ୍ତି ନିର୍ମାଣ କରିବା ସହ ଗାନ୍ଧି ଜୟନ୍ତୀର ଶୁଭେଚ୍ଛା ଜଣାଇଛନ୍ତି ମାନସ। ଏଥିନିମନ୍ତେ ସେ ୧୫ଫୁଟ୍ ଓସାର ବିଶିଷ୍ଟ ବାଲୁକା କଳାରେ ୧୫ ଟନ୍ ବାଲି ଉପଯୋଗ କରିଛନ୍ତି। ଏହା କରିବାକୁ ତାଙ୍କୁ ୭ ଘଣ୍ଟା ସମୟ ଲାଗିଥିଲା। ସେହିପରି ସମ୍ବଲପୁର ନିକଟ ଭତରାରେ ଥିବା ଗାନ୍ଧି ମନ୍ଦିରରେ ଗାନ୍ଧି ଜୟନ୍ତୀ ପାଳନ କରାଯାଇଛି। ବଡି ଭୋରରୁ ମନ୍ଦିର ଖୋଲାଯାଇ ଗାନ୍ଧିଙ୍କ ପ୍ରତିମୂର୍ତ୍ତିରେ ଆଳତି କରାଯାଇଛି। ଏହି ଅବସରରେ ଜିଲ୍ଲା ପ୍ରଶାସନ ପକ୍ଷରୁ ଜିଲ୍ଲାପାଳ, ଉପଜିଲ୍ଲାପାଳ ଓ ମହାନଗର ନିଗମ କମିଶନର ପ୍ରମୁଖ ଗାନ୍ଧିଙ୍କ ମନ୍ଦିରକୁ ଯାଇ ପୁଷ୍ପମାଲ୍ୟ ଅର୍ପଣ କରିବା ସହିତ ଗାନ୍ଧିଜୀଙ୍କ ସ୍ମୃତି ଚାରଣ କରିଛନ୍ତି। ପୁରା ମନ୍ଦିର ଆଜି ରଘୁପତି ରାଘବ ରାଜା ରାମ ଧ୍ୱନିରେ ପ୍ରକମ୍ପିତ ହେଉଥିବା ବେଳେ ଗାନ୍ଧିଙ୍କ ଅବଦାନ ଓ ବଳିଦାନକୁ ସମସ୍ତେ ମନେ ପକାଇଛନ୍ତି।

ସ୍ନେହାଙ୍କୁ ନିର୍ଦ୍ଦେଶକଙ୍କ ସହିତ ଗୋଟିଏ ଦିନ ବିତାଇବାକୁ କୁହାଯାଇଥିଲା….!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ‘ସାଥ୍ ନିଭାନା ସାଥୀୟା-୨’ରେ ଲିଡ୍ ରୋଲ୍‌ରେ ଅଭିନୟ କରୁଛନ୍ତି ସ୍ନେହା ଜୈନ। ଏଥିରେ ସେ ଗେହ୍‌ନା ଚରିତ୍ରରେ ଅଭିନୟ କରୁଛନ୍ତି। ଏହି ଧାରାବାହିକ ଜରିଆରେ ସେ ଘରେ ଘରେ ପରିଚିତ ହୋଇଗଲେଣି। ତେବେ ଏହି ସଫଳତା ପାଇଁ ତାଙ୍କୁ ବେଶ୍ କଷ୍ଟ କରିବାକୁ ପଡ଼ିଛି। ଅନେକ ଥର ତାଙ୍କୁ ରିଜେକ୍ଟ କରାଯାଇଛି। ଏମିତିକି ସେ କାଷ୍ଟିଂ କାଉଚ୍‌ର ମଧ୍ୟ ଶିକାର ହୋଇଛନ୍ତି। ଅତୀତରେ ଅନେକ ଅଭିନେତ୍ରୀ କାଷ୍ଟିଂ କାଉଚ୍‌କୁ ନେଇ ଖୋଲାଖୋଲି ନିଜ ଅନୁଭୂତି ବଖାଣିଥିବା ବେଳେ ଏବେ ଏହି ତାଲିକାରେ ଯୋଡ଼ି ହୋଇଛନ୍ତି ସ୍ନେହ ଜୈନ। ଏକ ସାକ୍ଷାତକାରରେ ସେ ଏ ସଂପର୍କରେ ଖୋଲାଖୋଲି ଆଲୋଚନା କରିଛନ୍ତି। ସେ କହିଛନ୍ତି, ଥରେ ଦକ୍ଷିଣ ଭାରତର ଜଣେ କାଷ୍ଟିଂ ଡାଇରେକ୍ଟର ମୋତେ ଫୋନ୍ କରିଥିଲେ। ସେ ମୋତେ ଏକ ଫିଲ୍ମ ଯାଚି ଥିଲେ। ମୁଁ ମୋ ପ୍ରୋଫାଇଲ ଓ କିଛି ଫଟୋ ପଠାଇ ଥିଲି। ତା’ପର ଦିନ ସେ ମୋତେ ହାଇଦ୍ରାବାଦ ଡାକିଥିଲେ ଫିଲ୍ମର ନିର୍ଦ୍ଦେଶକ ଓ ପ୍ରଯୋଜକଙ୍କୁ ସାକ୍ଷାତ କରିବାକୁ। ମୁଁ ସେଠାକୁ ଯିବାକୁ ରାଜି ହୋଇଥିଲି। ତେବେ ତା’ ପୂର୍ବରୁ ଫିଲ୍ମ ସଂପର୍କରେ ସବିଶେଷ କଥା ଜାଣିବାକୁ ଚାହିଁଥିଲି। ମୁଁ ତାଙ୍କୁ ସେ ବିଷୟରେ ଜଣାଇବା ସହିତ ମା’ଙ୍କ ସାଙ୍ଗରେ ସେଠାକୁ ଯିବି ବୋଲି କହିଥିଲି। କାଷ୍ଟିଂ ଡାଇରେକ୍ଟର କହିଥିଲେ ଯେଉଁ ଦିନ ମୁଁ ହାଇଦ୍ରାବାଦରେ ପହଞ୍ଚିବି ସେହିଦିନ କେଉଁ ହୋଟେଲ୍‌ରେ ଫିଲ୍ମର ନିର୍ଦ୍ଦେଶକ ଓ ପ୍ରଯୋଜକଙ୍କୁ ଭେଟିବାକୁ ହେବ ସେ କଥା କହି ଦିଆଯିବ। ଚୁକ୍ତିପତ୍ର ସ୍ୱାକ୍ଷର କରିବା ପରେ ମୋତେ ଅଧା ପାରିଶ୍ରମିକ ଦେଇ ଦିଆଯିବ। କିନ୍ତୁ ମୋତେ ଫିଲ୍ମର ନିର୍ଦ୍ଦେଶକଙ୍କ ସହିତ ଗୋଟିଏ ଦିନ ବିତାଇବାକୁ ପଡ଼ିବ ବୋଲି ସେ କହିଥିଲେ। ଆଉ ନିର୍ଦ୍ଦେଶକ ଯାହା କହିବେ ମୋତେ କରିବାକୁ ପଡ଼ିବ ବୋଲି କହିଥିଲେ। ଏହା ଶୁଣି ମୁଁ ଆଶ୍ଚର୍ଯ୍ୟ ହୋଇଯାଇଥିଲି। ସ୍ନେହା ଆହୁରି କହିଛନ୍ତି, ଏହା ଠିକ୍ କଥା ନୁହେଁ ବୋଲି ମୁଁ ଉକ୍ତ କାଷ୍ଟିଂ ଡାଇରେକ୍ଟରଙ୍କୁ କହିଥିଲି। ମୁଁ ସେହି ପ୍ରୋଜେକ୍ଟରେ କାମ କରିବି ନାହିଁ ବୋଲି ମଧ୍ୟ କହିଥିଲି। ତା’ପରେ ସେ କହିଥିଲେ ଏଇଟା ବଡ଼ କଥା ନୁହେଁ। ଅନେକ ଅଭିନେତ୍ରୀ ଏମିତି କମ୍ପ୍ରୋମାଇଜ କରନ୍ତି। ସପ୍ତାହେ ପରେ ସେ ପୁଣି ମୋତେ ଫୋନ୍ କରିଥିଲେ। କିନ୍ତୁ ମୁଁ ଉକ୍ତ ପ୍ରୋଜେକ୍ଟରେ କାମ କରିବି ନାହିଁ ବୋଲି କହିଥିଲି। ଅନେକ ଥର ବିଫଳତାର ସମ୍ମୁଖୀନ ହୋଇଥିବା ସ୍ନେହା କହିଛନ୍ତି ଯେ ସବୁ ବିଫଳତାରୁ ଶିକ୍ଷାଲାଭ କରି ଉପରକୁ ଉଠିଛନ୍ତି। ସେ କହିଛନ୍ତି, ଯେତେବେଳେ ଜଣେ ଅଭିନୟରେ କ୍ୟାରିୟର ଆରମ୍ଭ କରେ ସେତେବେଳେ ପ୍ରଥମେ ସମସ୍ତେ ତାଙ୍କ ସୌନ୍ଦର୍ଯ୍ୟ ଓ ବ୍ୟକ୍ତିତ୍ୱକୁ ବିଚାରକୁ ନିଅନ୍ତି। ମୋ ସହିତ ବି ସେମିତି ଘଟିଥିଲା। ମୁଁ ଅଧିକ ଡେଙ୍ଗା ହୋଇ ନଥିବାରୁ ବହୁବାର ମୋତେ ରିଜେକ୍ଟ କରାଯାଇଥିଲା। କିନ୍ତୁ ମୁଁ ଆଶା ହରାଇ ନଥିଲି। କାରଣ ମୁଁ ମୋ ଅଭିନୟ ଦକ୍ଷତା ଉପରୁ ବିଶ୍ୱାସ ହରାଇ ନଥିଲି।

ଛୋଟ ପରଦାରେ ଧମାକେଦାର ଏଣ୍ଟ୍ରି କରିବେ ବାଜିରାଓ….!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ବିଗ୍‌ ବି, ଶାହରୁଖ ଖାନ ଓ ସଲମାନଙ୍କ ପରେ ଏବେ ହୋଷ୍ଟ ସାଜିବେ ବଲିଉଡର ବାଜିରାଓ। କଲର୍ସ ଚ୍ୟାନେଲର ‘ଦି ବିଗ୍‌ ପିକଚର’ ଶୋ’ ଜରିଆରେ ଛୋଟ ପରଦାରେ ଧମାକେଦାର ଏଣ୍ଟ୍ରି କରିବେ ବଲିଉଡ୍‌ର ମୋଷ୍ଟ ଷ୍ଟାଇଲିଶ୍‌ ସୁପରଷ୍ଟାର ରଣବୀର ସିଂ। ବଡ଼ ପରଦାରେ ନିଜ ଜଲୱାରେ ଫ୍ୟାନ୍ସଙ୍କୁ ଦିବାନା କରି ସାରିଥିବା  ରଣବୀର ଏଥର  ଛୋଟ ପରଦାରେ ବି କମାଲ ଦେଖାଇବେ। ନିଜ ନୂଆ ପ୍ରୋଜେକ୍ଟକୁ ନେଇ ଖୁବ୍‌ ଏକ୍ସାଇଟେଡ ଥିବା ରଣବୀର କହିଛନ୍ତି ଜଣେ କଳାକାର ଭାବେ ଫ୍ୟାନ୍ସ ମୋତେ  ଖୁବ୍‌ ଭଲ ପାଇବା ଦେଇଛନ୍ତି। ଏବେ ଜଣେ ହୋଷ୍ଟ ରୂପେ ଛୋଟ ପରଦାରେ ଏଣ୍ଟ୍ରି କରିବି।  କଲର୍ସ ସହ ଯୋଡ଼ି ହୋଇ ଖୁବ୍‌ ଖୁସି ଅଛି। ଏକଥାର ଖୁଲାସା ରଣବୀର ନିଜେ ବିଗ୍‌ ବସ୍‌ ମଞ୍ଚରେ ଦବଙ୍ଗ ଖାନଙ୍କ ଉପସ୍ଥିତିରେ କରିଛନ୍ତି। ବିଗ୍‌ ବସ୍‌ ସିଜିନ-୧୫ ଆଜି ଟେଲିକାଷ୍ଟ ହେବ । ସୋ’ରେ ଗ୍ଲାମରର ତଡ଼କା ଲଗାଇବାକୁ  ଡ୍ୟାନ୍ସ ସହ ଖୁବ୍‌ ମସ୍ତିଭରା କାର୍ଯ୍ୟକ୍ରମ ରହିଛି। ବିଗ୍‌ ବସ୍‌ର ଗ୍ରାଣ୍ଡ ମସ୍ତି କାର୍ଯ୍ୟକ୍ରମରେ ସୋ’ର ହୋଷ୍ଟ ସଲମାନ ଖାନଙ୍କ ସହ ଫ୍ୟାନ୍ସଙ୍କ ଖୁବ୍‌ ଏଣ୍ଟରଟେନ୍‌ କରିବେ  ବଲିଉଡର ବାଜିରାଓ ରଣବୀର ସିଂ । ରଣବୀର ନିଜର ପ୍ରଥମ ଟେଲିଭିଜନ ସୋ’ ‘ଦି ବିଗ୍‌ ପିକଚର’କୁ ପ୍ରମୋଟ କରିବାକୁ ବିଗ୍‌ ବସ୍‌  ସୋ’ରେ ପହଞ୍ଚିଛନ୍ତି।  ଏହି ପ୍ରିମିୟର ସୋ’ରେ ସଲମାନ ଓ ରଣବୀର ଖୁବ୍‌ ମସ୍ତି କରୁଥିବାର ଫ୍ୟାନ୍ସ ଦେଖିବାକୁ ପାଇବେ। ଏଥିସହ ବିଗ୍‌ ବସ୍‌ ଶୋ’ର ପ୍ରଶଂସା କରି ରଣବୀର କହିଛନ୍ତି, ବିଗ୍‌ ବସ୍‌ ଟେଲିଭିଜନର ସବୁଠୁ ପପୁଲାର ସୋ’ । ବହୁ ପ୍ରତିଭାବାନ କାଳକାର ଗୋଟିଏ ଘରେ ଦୀର୍ଘ ଦିନ ରହିଥାନ୍ତି।  ଏହି ସମୟରେ ସେମାନଙ୍କ କାର୍ଯ୍ୟକଳାପ ଦ୍ୱାରା ଫ୍ୟାନ୍ସଙ୍କୁ ସେମାନଙ୍କୁ ଜାଣିବାର ସୁଯୋଗ ମିଳିଥାଏ।

ମୁଖ୍ୟମନ୍ତ୍ରୀଙ୍କ ମାରାଥନ ଗସ୍ତ, ଦଶହରା ପୂର୍ବରୁ ଯିବେ ୩ ଜିଲ୍ଲା…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ପଞ୍ଚାୟତ ଓ ପୌର ନିର୍ବାଚନକୁ ଦୃଷ୍ଟିରେ ରଖି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ସ୍ମାର୍ଟ କାର୍ଡ ବାଣ୍ଟିବା ଆଳରେ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାରାଥନ୍ ଜିଲ୍ଲା ଗସ୍ତରେ ଯିବେ। ଦଶହରା ପୂର୍ବରୁ ୬ ଦିନିଆ ଦିଲ୍ଲୀ ଗସ୍ତ ଶେଷକରି ଫେରିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତା ସପ୍ତାହରେ ୩ଟି ଜିଲ୍ଲା ଗସ୍ତ କରିବେ। ପ୍ରଥମଥର ପାଇଁ ମୁଖ୍ୟମନ୍ତ୍ରୀ ଗୋଟିଏ ସପ୍ତାହରେ ୩ଟି ଜିଲ୍ଲାକୁ ସରକାରୀ ଗସ୍ତରେ ଯିବାର କାର୍ଯ୍ୟକ୍ରମ ପ୍ରସ୍ତୁତ ହୋଇଛି। ମୁଖ୍ୟମନ୍ତ୍ରୀଙ୍କ ଗସ୍ତରୁ ରାଜନୀତିକ ଫାଇଦା ଉଠାଇବା ପାଇଁ ବିଜେଡି ପକ୍ଷରୁ ଜୋରଦାର ପ୍ରସ୍ତୁତି ଆରମ୍ଭ ହୋଇଛି। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସୂତ୍ରରୁ ମିଳିଥିବା ସୂଚନା ଅନୁସାରେ, ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଆସନ୍ତା ୪ତାରିଖରେ ଗଜପତି ଜିଲ୍ଲା ଗସ୍ତରେ ଯାଇ ସେଠାରେ ବିଜୁ ସ୍ୱାସ୍ଥ୍ୟ କଲ୍ୟାଣର ସ୍ମାର୍ଟ କାର୍ଡ ବାଣ୍ଟିବାର ଶୁଭାରମ୍ଭ କରିବା ସହ ୪୫୦କୋଟି ଟଙ୍କାର ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରିବେ। ଏହାପରେ ଆସନ୍ତା ୭ତାରିଖରେ ମୁଖ୍ୟମନ୍ତ୍ରୀ ପୁରୀ ଜିଲ୍ଲାର ବ୍ରହ୍ମଗିରି ନିର୍ବାଚନମଣ୍ଡଳୀ ଗସ୍ତ କରି ସେଠାରେ ବିଜୁ ସ୍ମାର୍ଟ କାର୍ଡ ବଣ୍ଟନର ଶୁଭାରମ୍ଭ କରିବା ସହ ପ୍ରାୟ ୩୦୦କୋଟି ଟଙ୍କାର ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିବାର କାର୍ଯ୍ୟକ୍ରମ ରହିଛି। ସେହିପରି ଅକ୍ଟୋବର ୯ତାରିଖରେ ମୁଖ୍ୟମନ୍ତ୍ରୀ ଦେବଗଡ଼ ଜିଲ୍ଲା ଗସ୍ତରେ ଯାଇ ସ୍ମାର୍ଟ କାର୍ଡ ବଣ୍ଟନର ଶୁଭାରମ୍ଭ ସହ ବିଭିନ୍ନ ପ୍ରକଳ୍ପର ଶୁଭାରମ୍ଭ ଓ ଉଦଘାଟନ କରିବେ ବୋଲି ଜଣାପଡ଼ିଛି। ମୁଖ୍ୟମନ୍ତ୍ରୀଙ୍କ ଗଜପତି ଓ ମୟୂରଭଞ୍ଜ ଜିଲ୍ଲା ଗସ୍ତ ପାଇଁ ସରକାରୀସ୍ତରରେ କାର୍ଯ୍ୟକ୍ରମ ଚୂଡ଼ାନ୍ତ ହେଉଥିବାବେଳେ ମୟୂରଭଞ୍ଜ ଗସ୍ତ କାର୍ଯ୍ୟକ୍ରମକୁ ସ୍ଥଗିତ ରଖାଯାଇ ଦଶହରା ପୂଜା ପରେ କରିବା ପାଇଁ ନିଷ୍ପତ୍ତି ହୋଇଛି। ଅନ୍ୟପକ୍ଷରେ ବ୍ରହ୍ମଗିରି ଓ ଦେବଗଡ଼ ଜିଲ୍ଲା ଗସ୍ତ କାର୍ଯ୍ୟକ୍ରମ ପାଇଁ ଅଚାନକ ପ୍ରସ୍ତୁତି ଆରମ୍ଭ ହୋଇଛି। ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ତଥା ବିଜେଡି ସାଧାରଣ ସମ୍ପାଦକ ସଞ୍ଜୟ ଦାସବର୍ମା, ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ, ପୁରୀ ଜିଲ୍ଲାପାଳ ସମର୍ଥ ବର୍ମା, ଜିଲ୍ଲା ଏସପି ଓ ବରିଷ୍ଠ ଅଧିକାରୀମାନେ ଆଜି ବ୍ରହ୍ମଗିରି ଗସ୍ତ କରି ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମ ପାଇଁ ପ୍ରସ୍ତୁତି ଆରମ୍ଭ କରିଛନ୍ତି। ମୁଖ୍ୟମନ୍ତ୍ରୀଙ୍କ ହେଲିକପ୍ଟର ଅବତରଣଠୁ ସଭା ପର୍ଯ୍ୟନ୍ତ ଏହି ସରକାରୀ ଗସ୍ତ କାର୍ଯ୍ୟକ୍ରମକୁ ବିଜେଡି ପକ୍ଷରୁ ଆଜି ଚୂଡ଼ାନ୍ତ ରୂପ ଦିଆଯାଇଥିବା ଜଣାପଡ଼ିଛି। ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ଅକ୍ଟୋବର ୮ରେ ବାରିପଦା ଗସ୍ତରେ ଯିବାର କାର୍ଯ୍ୟକ୍ରମ ରହିଥିଲା। ଯାହାକୁ ଏବେ ସ୍ଥଗିତ ରଖାଯାଇଛି ଓ ମୁଖ୍ୟମନ୍ତ୍ରୀ ଅକ୍ଟୋବର ୨୦ରୁ ୨୫ତାରିଖ ମଧ୍ୟରେ ବାରିପଦା ଗସ୍ତରେ ଯିବେ ବୋଲି ଜଣାପଡ଼ିଛି। ଏହାବ୍ୟତୀତ ପଂଚାୟତ ନିର୍ବାଚନକୁ ଦୃଷ୍ଟିରେ ରଖି ଆସନ୍ତା ଡିସେମ୍ବର ମାସ ଶେଷ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ସମସ୍ତ ୩୦ଟି ଜିଲ୍ଲାକୁ ଗସ୍ତ କରିବାର କାର୍ଯ୍ୟକ୍ରମ ରହିଥିବାବେଳେ ଏହି ଗସ୍ତରୁ ରାଜନୀତିକ ଫାଇଦା ଉଠାଇବାକୁ ବିଜେଡି ଜୋରଦାର ପ୍ରସ୍ତୁତି କରୁଥିବା ସୂଚନା ମିଳିଛି।