ବିଜୁ କୃଷକ ବିକାଶ ଯୋଜନା ଧାନ୍ଦୁପାଲି ରେ ଦିଗହରା…!

!!!  ବରଗଡ଼ ରୁ ଜିଲ୍ଲା ସ୍ଵତନ୍ତ୍ର ପ୍ରତିନିଧି ନିରଞ୍ଜନ ତ୍ରିପାଠୀ ଙ୍କ ରିପୋର୍ଟ  !!! 

ଏଥର ସମ୍ଭାଳ(ପଦ୍ମପୁର) –ସରକାର ଙ୍କ ଯୋଜନା ମାଳମାଳ ହେଲେ କେଉଁ କାମକୁ ନୁହଁ କହିଲେ ଅତ୍ୟୁକ୍ତି ହେବ ନାହିଁ। ବରଗଡ ଜିଲ୍ଲା ପଦ୍ମପୁର ଉପଖଣ୍ଡ ଅନ୍ତର୍ଗତ ପାଇକମାଲ ବ୍ଳକ ର ଟେମେରୀ ଗ୍ରାମପଞ୍ଚାୟତ ର ଅଧିନରେ ଯାଉଛି ଧାନ୍ଦୁପାଲି ଗ୍ରାମ । ଏଠକାର ଲୋକେ ବର୍ଷାଦିନିଆ ଚାଷ କୁ ନିର୍ଭର କରିଥାନ୍ତି । ସରକାର ଙ୍କ ଯୋଜନା ଭିତରେ “ବିଜୁ କୃଷକ ବିକାଶ ଯୋଜନା ମାଧ୍ୟମରେ ଗଭୀର ନଳକୂପ ଖନନ କରି ଚାଷଜମି କୁ ପାଣିଯୋଗାଇଦେବା ପାଇଁ ଏକ ଯୋଜନା ପ୍ରସ୍ତୁତ ହୋଇଥିଲେ ସୁଦ୍ଧା ଏଠାକାର ସମୁଦାୟ ୧୭ ଜଣ ଚାଷୀ ୨୦୧୬ ମସିହାରୁ କୋଡ଼ିଏ ହଜାର ଟଙ୍କା ଲେଖାଏଁ ଜଣ ପିଛା ଜମାଦେଇ ପଞ୍ଜିକୃତ ପରେ ଅଦ୍ୟାବଧି ଚାଷୀ ଚାଷଜମି ପାଇଁ ଟୋପାଏ ପାଣି ପାଇବାରୁ ବଞ୍ଚିତ। ଦିର୍ଘ ୫ ବର୍ଷ ଭିତରେ ନଳକୂପ ଖନନ,ଲାଇନ ତାର ଟଣା,ମିଟର ଫିଟିଙ୍ଗ ଅନେକ କିଛି ହୋଇ ସାରିଛି କିନ୍ତୁ ବିଦ୍ୟୁତ ସଂଯୋଗ ଆଜି ପର୍ଯ୍ୟନ୍ତ ହୋଇପାରିନି।

ଏଭଳି ବିଳମ୍ବ କାହିଁକି ? ଏଥିପାଇଁ ଦାୟୀ କିଏ ?ଏବର୍ଷ ଜଳାଭାବ ତ ସମଗ୍ର ଓଡ଼ିଶାରେ ଦେଖାଦେଇଛି । ଯଦି ପାଣି ଅଭାବ ପାଇଁ ଚାଷୀ କ୍ଷତିଗ୍ରସ୍ତ ର ସମ୍ମୁଖୀନ ହୁଅନ୍ତି ତେବେ ଏଠି ଦାୟୀ ରହିବ କିଏ ? ଏମିତି ଅନେକ ପ୍ରଶ୍ନ ଭିତରେ ଆଜି ଚାଷୀ ଅସହାୟ ହୋଇ ପଡ଼ିରହିଛି। ଗୋଟିଏ ପଟେ ୧୦ ଜଣ ଚାଷୀ ଙ୍କୁ ନେଇ ଗୋଟିଏ ଟ୍ରାସଫରମର ଦିଆଯାଇଥିବାବେଳେ ଅନ୍ୟପଟେ ୭ ଜଣଙ୍କୁ ନେଇ ଆଉ ଗୋଟାଏ ଟ୍ରାସଫରମର ଏଇ ଗ୍ରାମରେ ବସା ଯାଇଛି । କିନ୍ତୁ ବର୍ତ୍ତମାନ ପର୍ଯ୍ୟନ୍ତ ବିଦ୍ୟୁତ ସଂଯୋଗ ହୋଇପାରିନାହିଁ। ଏଥିପ୍ରତି ବିଭାଗୀୟ ଅଧିକାରୀ ତଥା ବିଭାଗୀୟ ମନ୍ତ୍ରୀ ଦୁଇ ତିନି ଦିନ ମଧ୍ୟରେ ବିଦ୍ୟୁତ ସଂଯୋଗ କରି ମରୁଡି ର ମୁକାବିଲା ସକାଶେ ଚାଷୀ ମାନଙ୍କ ପାଣି ଯୋଗାଇଦେବାକୁ ଜନସାଧାରଣ ଦାବି କରନ୍ତି ।

କାହିଁକି କଟିଲା ମନ୍ତ୍ରୀଙ୍କ ନାମ…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ମାହାଙ୍ଗା ଡବଲ ମର୍ଡର ମାମଲାରେ ଆଇନମନ୍ତ୍ରୀଙ୍କୁ ନେଇ ହୁଲସ୍ତୁଲ ମୌସୁମୀ ଅଧିବେଶନ।  ରାଜ୍ୟ ସରକାରଙ୍କୁ ଘେରିଛନ୍ତି ବିରୋଧୀ । ବିଜେପି ନେତା କୁଳମଣି ବରାଳ ଓ ଦିବ୍ୟସିଂହ ବରାଳ ହତ୍ୟା ମାମଲାର FIRରେ ଆଇନ ମନ୍ତ୍ରୀ ପ୍ରତାପ ଜେନାଙ୍କ ନାଁ ଥିବାବେଳେ କାହିଁକି ଚାର୍ଜସିଟ୍‌ରୁ କାଟି ଦିଆଗଲା ? FIRର ୧୩ ନମ୍ବରରେ ଥିବା ମନ୍ତ୍ରୀ ପ୍ରତାପଙ୍କ ସମ୍ପର୍କରେ ତଦନ୍ତ ପାଇଁ ସାଲେପୁର JMFC କୋର୍ଟ ତଦନ୍ତ ନିର୍ଦ୍ଦେଶ ଦେବା ସତ୍ତ୍ୱେ କାହିଁକି ପଦକ୍ଷେପ ନିଆଯାଉନି ? ଏଭଳି ଏକାଧିକ ପ୍ରଶ୍ନ ଉଠାଇ ମନ୍ତ୍ରିପଦରୁ ପ୍ରତାପ ଜେନାଙ୍କୁ ବହିଷ୍କାର ଦାବି କରି ଆଜି ଗୃହ ବାହାରେ ଓ  ଭିତରେ ସ୍ୱର ଉତ୍ତୋଳନ କରିଛନ୍ତି ବିରୋଧୀ । ଆଜି ଗୃହ ଆରମ୍ଭ ହେବା କ୍ଷଣି ଆଇନମନ୍ତ୍ରୀ ପ୍ରତାପ ଜେନାଙ୍କ ବିରୋଧରେ ଗର୍ଜିଥିଲା ବିଜେପି । ବାଚସ୍ପତିଙ୍କ ପୋଡ଼ିୟମ୍ ଆଗରେ ପୋଷ୍ଟର ଧରି କରିଥିଲା ହୋହଲ୍ଲା । ଏଣେ ଗୃହ ବାହାରେ ସାମ୍ବାଦିକ ସମ୍ମିଳନୀ କରି ମନ୍ତ୍ରୀ ପ୍ରତାପ ଜେନାଙ୍କୁ କଂଗ୍ରେସର ଟାର୍ଗେଟ୍। ଉଭୟ ଦଳର ସେହି ସମାନ ଦାବି । ନେତା କୁଳମଣି ବରାଳ ଓ ଦିବ୍ୟସିଂହ ବରାଳ ହତ୍ୟା ମାମଲାରେ ମନ୍ତ୍ରୀଙ୍କୁ ବହିଷ୍କାର କର । ଗୃହ ବାହାରେ ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ କହିଥିଲେ ଯେ, FIRର ୧୩ ନମ୍ବରରେ ଥିବା ମନ୍ତ୍ରୀଙ୍କ ବିରୋଧରେ ତଦନ୍ତ ନିର୍ଦ୍ଦେଶ ଦେଇଥିଲେ ସାଲେପୁର JMFC । ଅଥଚ କୌଣସି ପଦକ୍ଷେପ ନେଇନାହାଁନ୍ତି ରାଜ୍ୟ ସରକାର। ଯଦି ବି ତାଙ୍କ ବିରୋଧରେ ତଦନ୍ତ ହୁଏ, ତାହେଲେ କେଉଁ ଆଧାରରେ ଜଣେ ଥାନା ଅଧିକାରୀ ଆଇନମନ୍ତ୍ରୀଙ୍କ ବିରୋଧରେ ତଦନ୍ତ କରିବ ? ତେଣୁ ନୈତିକତା ଦୃଷ୍ଟିରୁ ଆଇନମନ୍ତ୍ରୀ ପ୍ରତାପ ଜେନା ଇସ୍ତଫା ଦିଅନ୍ତୁ, ନଚେତ ତାଙ୍କୁ ବହିଷ୍କାର କରାଯାଉ ଏବଂ ମୁଖ୍ୟମନ୍ତ୍ରୀ ବିବୃତ୍ତି ରଖନ୍ତୁ ବୋଲି ଦାବି କରି ଗୃହ ଭିତରେ ଓ ବାହାରେ ଅଡ଼ିବସିଛି ବିଜେପି । କଂଗ୍ରେସ ବି ପ୍ରତାପ ଜେନାଙ୍କୁ ନିଶାନା କରି ୨୦୧୪ରୁ ୫ଟି ହତ୍ୟା ମାମଲା ତାଙ୍କ ନାଁରେ ଥିବାବେଳେ କାହିଁକି କାର୍ଯ୍ୟାନୁଷ୍ଠାନ ନିଆଯାଉନାହିଁ ବୋଲି ପ୍ରଶ୍ନ ଉଠାଇ ମନ୍ତ୍ରୀ ଇସ୍ତଫା ଦିଅନ୍ତୁ ବୋଲି ଦାବି କରିଛି। ୨ ଜାନୁଆରୀ, ୨୦୨୧ । ବିଜେପି ନେତା କୁଳମଣି ଓ ଦିବ୍ୟସିଂହଙ୍କୁ ନିର୍ମମ ହତ୍ୟା କରାଯାଇଥିଲା । ଏହି ଘଟଣାରେ କୁଳମଣିଙ୍କ ପୁଅ ରମାକାନ୍ତ ମାହାଙ୍ଗା ଥାନାରେ ମନ୍ତ୍ରୀ ପ୍ରତାପ ଜେନାଙ୍କ ସମେତ ୧୩ ଜଣଙ୍କ ବିରୋଧରେ ଏତଲା ଦେଇଥିଲେ । ଆଉ ୧୩ ନମ୍ବର ମୁଦାଲା ଭାବେ ମନ୍ତ୍ରୀଙ୍କ ନାଁ ଥିଲା FIRରେ।  ଏହାର ପ୍ରାୟ ୫ ମାସ ଧରି ତଦନ୍ତ ପରେ ମେ’ରେ ଚାର୍ଜସିଟ୍ ଦାଖଲ କରିଥିଲା ମାହାଙ୍ଗା ପୁଲିସ।  ସେଥିରେ କିନ୍ତୁ ନଥିଲା ମନ୍ତ୍ରୀଙ୍କ ନାଁ। ଏନେଇ ଗତ ଅଗଷ୍ଟ ୧୬ରେ ସାଲେପୁର JMFC କୋର୍ଟରେ ରମାକାନ୍ତ ଦାଖଲ କରିଥିଲେ ଏକ ପ୍ରୋଟେଷ୍ଟ ପିଟିସନ। ଏହାର ଶୁଣାଣି କରି କୋର୍ଟ ମନ୍ତ୍ରୀଙ୍କ ସଂପୃକ୍ତିର ସାନି ତଦନ୍ତ କରି ରିପୋର୍ଟ ଦେବାକୁ ଗତ ୨୫ ତାରିଖରେ ମାହାଙ୍ଗା ପୁଳିସକୁ ନିର୍ଦ୍ଦେଶ ଦେଇଥିଲେ।  ତାପରଠୁ ଖଡ୍ଗହସ୍ତ ବିରୋଧୀ । ଚଳିତ ଅଧିବେଶନରେ ସରକାରଙ୍କୁ ହଲାପଟା କରୁଥିବାବେଳେ ଶାସକ ଦଳ କହିଛି, ଆଲୋଚନା ପାଇଁ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଥିଲେ ବି ୨ଟି ଅପରାଧିକ ମାମଲାକୁ ଧରି ବିରୋଧୀ ନିଜର ଦଳୀୟ ପ୍ରଚାର କରୁଛନ୍ତି । ତେଣେ ମରୁଡ଼ି ପ୍ରସଙ୍ଗରେ ଆଜି କଂଗ୍ରେସ ବିଧାୟକ ଗୃହ ମଧ୍ୟଭାଗରେ ପାଟିତୁଣ୍ଡ କରିଥିବାବେଳେ ବାଚସ୍ପତି ଗୃହକୁ ମୁଲତବୀ କରି ସର୍ବଦଳୀୟ ବୈଠକ ଡାକିଥିଲେ । ବୈଠକରେ ନିଷ୍ପତ୍ତି ହେଲା ମରୁଡ଼ି ପ୍ରସଙ୍ଗରେ ପୁଣି ଥରେ ଆଲୋଚନା ହେବ।

ମୁଖ୍ୟମନ୍ତ୍ରୀଙ୍କ ଉପରେ ୮୨ ବିଧାୟକ ଓ ମନ୍ତ୍ରୀଙ୍କର ଆସ୍ଥା ନାହିଁ: ନରସିଂହ….!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ରାଜ୍ୟରେ ଗୋଟିଏ ଅଚଳ ସରକାର ଚାଲିଛି । ମୁଖ୍ୟମନ୍ତ୍ରୀଙ୍କ ଉପରେ ଅଧିକାଂଶ ମନ୍ତ୍ରୀ ଓ ବିଧାୟକମାନଙ୍କର ଆସ୍ଥା ନାହିଁ। ତେଣୁ ମୁଖ୍ୟମନ୍ତ୍ରୀ ତୁରନ୍ତ ଇସ୍ତଫା ଦେବା ଦରକାର ବୋଲି କଂଗ୍ରେସ ବିଧାୟକ ଦଳର ନେତା ନରସିଂହ ମିଶ୍ର ଦାବି କରିଛନ୍ତି। ଆଜି ଗୃହ ବାହାରେ ଗଣମାଧ୍ୟମ ଆଗରେ ବିସ୍ଫୋରକ ବୟାନ ରଖି ଶ୍ରୀ ମିଶ୍ର କହିଛନ୍ତି ଯେ, ଓଡ଼ିଶାରେ ଏବେ ଅଦ୍ଭୂତ ପରିସ୍ଥିତି ସୃଷ୍ଟି ହୋଇଛି। ଏଭଳି କେବେ ଆଗରୁ ହୋଇନଥିଲା । ଅଧାରୁ ଅଧିକ ମନ୍ତ୍ରୀ ଓ ବିଧାୟକ ବୋଧହୁଏ ମୁଖ୍ୟମନ୍ତ୍ରୀଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିଛନ୍ତି । ୧୭୭ଟି ହାଇସ୍କୁଲକୁ ଗ୍ରାଣ୍ଟ-ଇନ-ଏଡ୍ ଦାବି କରି ଶିକ୍ଷକମାନେ ତାଙ୍କୁ ଏଭଳି ଏକ ଦରଖାସ୍ତ ଦେଇଛନ୍ତି ଯେଉଁଥିରେ ୮୨ଜଣ ବିଧାୟକ ଓ ମନ୍ତ୍ରୀଙ୍କ ଦସ୍ତଖତ ରହିଛି। ଏହି ଦରଖାସ୍ତରେ ମୁଖ୍ୟମନ୍ତ୍ରୀଙ୍କୁ ବିଧାୟକମାନେ ପ୍ରଶ୍ନ କରିଛନ୍ତି ଯେ କାହିଁକି ଏସବୁ ସ୍କୁଲକୁ ଗ୍ରାଣ୍ଟ-ଇନ-ଏଡ୍ ଦିଆଯାଉ ନାହିଁ। ଏଠି ଗ୍ରାଣ୍ଟ-ଇନ-ଏଡ୍ ଦେବା ପାଇଁ ମୁଖ୍ୟମନ୍ତ୍ରୀଙ୍କୁ ଚିଠି କ୍ୟାବିନେଟ୍ ମନ୍ତ୍ରୀ ଲେଖୁଛନ୍ତି । ଏଥିରୁ ସ୍ପଷ୍ଟ ଜଣାପଡ଼ୁଛି ଯେ, ଏ ସରକାରରେ ମନ୍ତ୍ରୀମାନଙ୍କର କିଛି ଭୂମିକା ନାହିଁ। ମନ୍ତ୍ରୀମାନେ ଅପାରଗ ହୋଇପଡ଼ିଛନ୍ତି। ମନ୍ତ୍ରୀ ଯେତେବେଳେ ଅନୁଭବ କରନ୍ତି ଯେ ସେ ସରକାର ନୁହଁନ୍ତି, ତାଙ୍କୁ ସରକାର ବୋଲି ମାନ୍ୟତା ଦିଆଯାଉ ନାହିଁ, ସେତେବେଳେ ସେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବାକୁ ବାଧ୍ୟ ହୋଇଥାନ୍ତି। ବୋଧହୁଏ ମୁଖ୍ୟମନ୍ତ୍ରୀ ଅବା ତାଙ୍କ ତରଫରୁ ସେମାନଙ୍କୁ ସରକାରର ମାନ୍ୟତା ଦିଆଯାଉ ନାହିଁ । ମନ୍ତ୍ରୀଙ୍କର କଲେକ୍ଟିଭ ରେସପନ୍ସିବିଲିଟି ରହିଛି। ସ୍କୁଲକୁ ଅନୁଦାନ ଦେବା ପାଇଁ ମନ୍ତ୍ରୀମାନେ ଏଠି ବିରୋଧୀ ଦଳକୁ ସାହାଯ୍ୟ ମାଗୁଛନ୍ତି ବୋଲି ଶ୍ରୀ ମିଶ୍ର କହିଛନ୍ତି। ସୂଚନାଯୋଗ୍ୟ, ୧୭୭ଟି ହାଇସ୍କୁଲକୁ ସରକାର ଗ୍ରାଣ୍ଟ-ଇନ-ଏଡ୍ ଦେବା ଦାବିରେ ବିଧାୟକ ଓ ମନ୍ତ୍ରୀମାନଙ୍କର ଦ୍ୱାରସ୍ଥ ହୋଇଛି। ସେମାନେ ମଧ୍ୟ କଂଗ୍ରେସ ବିଧାୟକ ଦଳ ନେତା ଶ୍ରୀ ମିଶ୍ରଙ୍କୁ ଏକ ଚିଠି ଲେଖି ସହାୟତା ମାଗିଛନ୍ତି,ଯେଉଁଥିରେ ଅଧିକାଂଶ ମନ୍ତ୍ରୀ ଓ ବିଧାୟକଙ୍କର ଦସ୍ତଖତ ରହିଛି ବୋଲି ସେ କହିଛନ୍ତି।

ସାହିତ୍ୟିକ ଜୟକୃଷ୍ଣ ଗୌଡ଼ ସମ୍ବର୍ଦ୍ଧିତ ….!

!!! ଗଞ୍ଜାମ ରୁ ଜିଲ୍ଲା ସ୍ଵତନ୍ତ୍ର ପ୍ରତିନିଧି ନରସିଂହ ପରିଡା ଙ୍କ ରିପୋର୍ଟ !!! 

ଏଥର ସମ୍ଭାଳ(ପୋଲସରା)-ପୋଲସରା ବିଜ୍ଞାନମହାବିଦ୍ୟାଳୟର ସମୂହ ସମ୍ମାନ ଶ୍ରେଣୀ ଛାତ୍ର ଛାତ୍ରୀ ଙ୍କ ତରଫରୁ ଓ ଓଡ଼ିଆ ଭାଷା ଓ ସାହିତ୍ୟ ବିଭାଗ ପକ୍ଷରୁ ସେବା ନିବୃତ ପ୍ରାଧ୍ୟାପକ ,ସୁ ସାହିତ୍ୟିକ ତଥା ସୁ ବକ୍ତା ଶ୍ରୀଯୁକ୍ତ ଜୟକୃଷ୍ଣ ଗୌଡ଼ଙ୍କୁ ହାର୍ଦ୍ଦିକ ଅଭିନନ୍ଦନ ଜ୍ଞାପନ କରିବା ସହିତ ସମ୍ବର୍ଦ୍ଧିତ କରାଯାଇ ଅଛି । ସମ୍ମାନ ଶ୍ରେଣୀ ଛାତ୍ର ଛାତ୍ରୀ ଙ୍କ ବିଦାୟକାଳୀନ ଓ ସ୍ୱାଗତ ସଭା ଅନୁଷ୍ଠିତ ହେବା ସ୍ଥଳରେ ସମ୍ପୃକ୍ତ କାର୍ଯ୍ୟକ୍ରମ ଡ଼.ଯୋସ୍ନା ରାଣୀ ପଟ୍ଟନାୟକ ଓ ଅଧ୍ୟାପକ ବିରଞ୍ଚି ନାରାୟଣ ରଥ ଏହି କାର୍ଯ୍ୟକ୍ରମ ପରିଚାଳନା କରିଥିଲେ । ଭାରପ୍ରାପ୍ତ ଅଧ୍ୟକ୍ଷ ଶ୍ରୀଯୁକ୍ତ ବାଲ ରାଜୁପାତ୍ର ଉକ୍ତ ସଭାରେ ଅଧ୍ୟକ୍ଷତା କରିଥିଲେ। ଶ୍ରୀଯୁକ୍ତ ଗୌଡ଼ଙ୍କ ଦୀର୍ଘ ଦିନର ସାହିତ୍ୟ ସାଧନା ,ଅଧ୍ୟାପନା ଓ ଭାଷା ବିଶ୍ୱବିଦ୍ୟାଳୟର ପରିଚାଳନା ଓ ପ୍ରଶିକ୍ଷଣ ପଦ୍ଧତି ନେଇ ଉପସ୍ଥିତ ଅଧ୍ୟକ୍ଷ ,ଅଧ୍ୟାପକ ଓ ଅଧ୍ୟାପିକା ନିଜ ନିଜର ବକ୍ତବ୍ୟରେ ଶ୍ରୀ ଗୌଡ଼ଙ୍କୁ ଘୁରି ଘୁରି ପ୍ରଶଂସା କରିଥିଲେ ।

ନିଜ ସମ୍ବର୍ଦ୍ଧନାର ଉତ୍ତରରେ ଶ୍ରୀ ଗୌଡ଼ ଓଡ଼ିଆ ଭାଷା ଓ ସାହିତ୍ୟର ଭବିଷ୍ୟତଉପରେ ଆଲୋକ ପାତ କରିଥିଲେ । ସମସ୍ତ ଛାତ୍ରଛାତ୍ରୀ ଙ୍କର ଓଡ଼ିଆ ରେ ଦସ୍ତଖତ କରାଯାଇଥିଲା । ଓଡ଼ିଆ ଭାଷା ପ୍ରତି ଆଗ୍ରହ ଜନ୍ମିବା ପାଇଁ ବାକ୍ତା ମାନେ ନିଜ ନିଜର ମାନ୍ତବ୍ୟ ରଖିଥିଲେ ।ଶ୍ୟାମ ସୁନ୍ଦର ଆଚାରି ଙ୍କୁ ମଧ୍ୟ ଏହି ସଭାରେ ସମ୍ବର୍ଦ୍ଧିତ କରାଯାଇଥିଲା । ଅଧ୍ୟାପକ ବିରଞ୍ଚି ନାରାୟଣ ରଥ ଓ ଡ଼.ଯୋସ୍ନା ରାଣୀ ପଟ୍ଟନାୟକ ଙ୍କ ଶିକ୍ଷାଦାନ ଶୈଳୀର ପାରଦର୍ଶୀତା ପାଇଁ ଆଜିର ଅତିଥି ଶ୍ରୀଯୁକ୍ତ ଜୟକୃଷ୍ଣ ଗୌଡ଼ ସେମାନଙ୍କୁ ଛାତ୍ର ଛାତ୍ରୀଙ୍କ ଦ୍ବାରା ପ୍ରଦତ୍ତ ଉତ୍ତରୀୟ ଓ ଫୁଲ ତୋଡା ପ୍ରଦାନ ସ୍ୱରୂପ ସମ୍ମାନିତ କରିଥିଲେ। ଶେଷରେ ଅଧ୍ୟାପକ ବିରଞ୍ଚି ନାରାୟଣ ରଥ ଭାରପ୍ରାପ୍ତ ଅଧ୍ୟକ୍ଷଙ୍କ ସମେତ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।

ଗଞ୍ଜାମ ଜିଲ୍ଲାରୁ ଗଜପତି ଜିଲ୍ଲାକୁ ୫୦ କିମି ଆସି ଟୀକା ନେବା ପାଇଁ ଲମ୍ବା ଧାଡ଼ି । ୨୦୦ରୁ ଉର୍ଦ୍ଧ୍ୱ ପରିବାର ସ୍ୱାସ୍ଥ୍ୟ କେନ୍ଦ୍ରରେ…!

!!! ଗଜପତି ଜିଲ୍ଲା ମହୋନା ବ୍ଲକ ରୁ ମୋଜେଶ ରଇତ ଙ୍କ ରିପୋର୍ଟ !!! 

ଏଥର ସମ୍ଭାଳ(ମୋହନା)- ଗଜପତି ଜିଲ୍ଲାପାଳ ଲିଙ୍ଗରାଜ ପଣ୍ଡାଙ୍କ ପ୍ରତ୍ୟକ୍ଷ ତତ୍ତ୍ୱ।ବଧାନରେ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚାଲିଛି ପ୍ରଥମ ଓ ଦୁତୀୟ ଡୋଜ ଟୀକାକରଣ । ପ୍ରତେକ ଦିନ ୩୦୦ରୁ ଉର୍ଦ୍ଧ୍ଵ ଲୋକ ନେଉଛନ୍ତି ଟୀକା । ମୋହନା ବ୍ଲକର ଦୁର୍ଗମ ଆଦିବାସୀ ଅଧ୍ନ୍ୟୁଷିତ ଅଞ୍ଚଳରେ ରହୁଥିବା ଲୋକମାନେ ଚାଷ କାମ ସାରି ୧୧ଟା ରୁ ୧୨ଟା ମଧ୍ୟରେ ଆସନ୍ତି ଟୀକା ନେବା ପାଇଁ । ସେମାନେ ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚିଲା ବେଳକୁ ଟୀକା ସରିଯାଇଥାଏ। କାରଣ ପଡୋଶି ଜିଲ୍ଲା ଗଞ୍ଜାମର ଦିଗପହଣ୍ଡି ଓ ସାନଖେମୁଣ୍ଡି ବ୍ଲକର କିଛି ଗ୍ରାମରୁ ପ୍ରତେକ ଦିନ ୧୦୦ରୁ ଉର୍ଦ୍ଧ୍ୱ ଲୋକେ ନିଜ ପରିବାର ସହ ଆସି ୪୫ରୁ ୫୦କିମି ଦୂର ମୋହନା ସ୍ୱାସ୍ଥ୍ୟ କେନ୍ଦ୍ରରେ ନେଉଛନ୍ତି ଟୀକା । ଯାହାକି ତିନି ଦିନ ମଧ୍ୟରେ ୧୫ ଶହରୁ ଉର୍ଦ୍ଧ୍ଵ ଲୋକେ ନେଇଛନ୍ତି ଟୀକା । ଯାହାଫଳରେ ମୋହନା ବ୍ଲକର ଲୋକେ ପାଇପାରୁନାହାନ୍ତି କରୋନା ଟୀକା । ମଙ୍ଗଳବାର ଦିନ ସକାଳ ପ୍ରାୟ ୮ଟାରୁ ଲମ୍ଭା ଧାଡିରେ ଗଞ୍ଜାମର ସୁଣ୍ଡିପୋଲି,ନୂଆସାହି ଓ ଅନ୍ୟାନ୍ୟ ଗ୍ରାମର ଲୋକେ ୨ ଶହରୁ ଉର୍ଦ୍ଧ୍ୱ ଆସିଥିଲେ ପରିବାର ସହିତ ଟୀକା ନେବା ପାଇଁ। ଏହି ଖବର ଜାଣିବା ପରେ ମୋହନା ସ୍ୱାସ୍ଥ୍ୟ କେନ୍ଦ୍ର ଚିକିତ୍ସା ଅଧିକାରୀଣି ଡ଼.ନମିତା ପଣ୍ଡା ଓ ମେଡିକାଲ ପ୍ରୋଜେକ୍ଟ ମ୍ୟାନେଜର ସିଧା ସଳଖ ମନା କରିଦେଇଥିଲେ ବାହାର ଜିଲ୍ଲାର ଲୋକଙ୍କୁ ଟୀକା ଦେବା ପାଇଁ। କାରଣ ପ୍ରଥମ ଟୀକା ନେବା ପରେ ଦୁତୀୟ ଟୀକା ନେବା ପାଇଁ ଆସୁନାହାନ୍ତି ଗଞ୍ଜାମରୁ ଲୋକେ ।ବର୍ତ୍ତମାନ ସୁରାଟ ଯିବା ସକାଶେ ଟ୍ରେନ ଟିକଟ ପାଇଁ ଆବଶ୍ୟକ ପଡୁଛି ପ୍ରମାଣ ପତ୍ର I ତେଣୁ ମୋହନା ଆସି ନେଉଛନ୍ତି ଟୀକା ।ଅପରପକ୍ଷେ ମୋହନା ଅଞ୍ଚଳରେ ଟୀକା ପାଇ ପାରୁନାହାନ୍ତି ଲୋକେ । ଯାହାଫଳରେ ପ୍ରତ୍ୟେକ ଦିନ ଟୀକା କେନ୍ଦ୍ରରେ ଲାଗି ରହୁଛି ଝଗଡା । ଟୀକା ନ ପାଇବାରୁ ଗଞ୍ଜାମରୁ ଆସିଥିବା ଲୋକେ କିଛି ସମୟ ପାଇଁ ଉତେଜନା କରିଥିଲେ। ପରେ ମୋହନା ବିଡିଓଙ୍କୁ ଦେଖା କରିବାକୁ ଯାଇଥିଲେ । ଏହି ବିଷୟ ରେ ସାନଖେମୁଣ୍ଡି ବିଡିଓଙ୍କୁ ପଚାରିବାରୁ ସେ କହିଛନ୍ତି ଆମ ବ୍ଲକ ରେ ଟୀକା ଭରପୁର ରହିଛି । ସମସ୍ତ ଟୀକା ଦାନ କେନ୍ଦ୍ରରେ ୧୨ ଶହରୁ ଉର୍ଦ୍ଧ୍ୱ ଲୋକଙ୍କୁ ଟୀକା ଦିଆଯାଉଛି। କିନ୍ତୁ ଯେଉଁ ବ୍ୟକ୍ତି ଗଜପତି ଯାଉଛନ୍ତି ଟୀକା ନେବା ପାଇଁ ସେମାନେ ସୁରାଟ ଫେରନ୍ତା କିମ୍ବା ଯିବାକୁ ଚାହୁଁଥିବେ । ଲୋକେ ଅପେକ୍ଷା ନକରି ମୋହନା ଯାଉଛନ୍ତି ଟୀକା ନେବା ପାଇଁ। ତେଣୁ ସେମାନଙ୍କୁ ନିଜ ଅଞ୍ଚଳରେ ଯାଇ ଟୀକା ନେବା ପାଇଁ କହିଛନ୍ତି ସାନଖେମୁଣ୍ଡି ବିଡିଓ ।

ସ୍ଵୟଂ ଶାସିତ ଦିବସ ରେ ଆହ୍ଵାନ ; ଆମ ଗୁଣପୁର ସ୍ୱଚ୍ଛ – ସବୁଜ – ସୁନ୍ଦର…!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ଵର)- ପାଳିତ ସ୍ଵୟଂ ଶାସିତ ଦିବସ କୁ ନେଇ ପୋୖର ବାସୀ ଗର୍ବ ଅନୁଭବ କଲେବି ପରିଷଦରେ ଦେଖା ଦେଉଥିବା ଚଳନ୍ତି ବ୍ୟବସ୍ଥାକୁ ନେଉ କେହି ଛାତିରେ ହାତରଖି କହିବେନି ଆମ ଗୁଣପୁର ସ୍ୱଚ୍ଛ – ସବୁଜ – ସୁନ୍ଦର । ସହର ମଧ୍ୟରେ ପରିମଳ ବ୍ୟବସ୍ଥାକୁ ନେଇ ପ୍ରକାଶିତ ହୋଇଥିବା ଖବର ଏବଂ ବର୍ତ୍ତମାନର ବ୍ୟବସ୍ଥା କୁ ଦେଖି କେହିବି ଏକଥା କହିବେ । ଏଥି ପୂର୍ବରୁ ପାଳିତ ଦିବସରେ ପରିଷଦ ଗଣ ବାହୁପିଟି କହୁ ଥିଲେ ଦେଖ ଆମ ସମ୍ମାନ ପତ୍ର ସଭିଙ୍କଠୁଁ ଆମେ କେତେ ଆଗରେ । ସେଦିନ ଗଲା,ସେ ଶାସକ ନାହାଁନ୍ତି । ଏବେ ସବୁ ପ୍ରଶାସକ ଙ୍କ ହାତରେ । ସେତେ ବେଳର ଆଉ ଏବର ବ୍ୟବସ୍ଥା ମଧ୍ୟରେ ଅନେକ ଫରକ । ଏହାକୁ ନେଇ ଆମର କିଛି ଉପସ୍ଥାପନା । ଜନତା ମନୋନୀତ ଶାସକ ଯିବା ପରେ ପ୍ରଶାସକ ଙ୍କ ହାତକୁ ଗଲା ଶାସନ ଭାର । ସଭିଙ୍କ ମନରେ ଆଶା ସଂଚାର ହେଲା କିଛିଟା ପରିବର୍ତ୍ତନ ନିଶ୍ଚୟ । ଉନ୍ନତି ମୂଳକ କାର୍ଯ୍ୟ ରେ ଅଧ୍ୟକ୍ଷ ଙ୍କ ହାତ ସଫେଇ ନେଇ ଅନେକ ବିରୋଧୀ ସ୍ଵର ଉଠୁଥିଲା । ତଥାପି ସୁଧାର ଥିଲା ପରିମଳ ବ୍ୟବସ୍ଥାରେ । ଖାତିର ଥିଲା ପୋୖରବାସୀ ଓ ପରିଷଦ ପ୍ରତି । ଗୁହାରୀ ଶୁଣିବା ପାଇଁ ସ୍ଥାନୀୟ ସର୍ବୋଚ୍ଚ ଅଧିକାରୀ ଥିଲେ । ଏବେ ସେହି ବିରୋଧୀ ସ୍ଵର ନାହିଁ କି ଗୁହାରୀ ଶୁଣିବା ପାଇଁ କେହି ନାହିଁ । ଉନ୍ନତି ନାମରେ କେବଳ ପି.ସି. ହାତେଇବା ନିମନ୍ତେ ନୂତନ ରାସ୍ତାର ନିର୍ମାଣ ବୋଲି ସ୍ୱର ଉଠୁଥିଲା । ଏବେ କିନ୍ତୁ ଏହି ସ୍ୱର ଶୁଭୁନି । ସାହି ବସ୍ତି ପାଇଁ ରାସ୍ତା ନିର୍ମାଣ ର ବ୍ୟବସ୍ତା ଥିବାବେଳେ ବର୍ତ୍ତମାନ ଗୋଟିଏ ଘର ନିମନ୍ତେ ରାସ୍ତାଟିଏ ନିର୍ମାଣ ପାଇଁ ବ୍ୟବସ୍ଥା । ଅନେକ ସ୍ଥାନରେ ଶୌଚାଳୟ ନିର୍ମାଣ ହୋଇଛି ବର୍ତ୍ତମାନ ର ପରିଚାଳନା ଅଭାବ ରୁ ଏହାର ପରିସର ନର୍ଦ୍ଦମା ପାଲଟିଛି । ମଶା ଧୂପ ମାରିବା ଯନ୍ତ୍ର , ବ୍ଲିକିଙ୍ଗ ଓ ଫିନାଇଲ କିଣା ସରି ରକ୍ଷଣା ବେକ୍ଷଣ ର ବ୍ୟବସ୍ଥା କରାଯାଇଛି କିନ୍ତୁ ଏସବୁ ଜନ ସେବାରେ ଲାଗିପାରୁନି । ବହୁ ଅର୍ଥ ଖର୍ଚ୍ଚ ବ୍ୟୟ ରେ ନିର୍ମାଣ ହୋଇଛି ବିଜୁ କଲ୍ୟାଣ ମଣ୍ଡପ ଓ ଟାଉନ ହଲ । ଏବେ ଏହା ଭଙ୍ଗା ଦଦରା ଅବସ୍ଥାରେ । ସହର ବାସୀ ଙ୍କ ବ୍ୟବହାର ପାଇଁ ପାଇପ ମଧ୍ୟମରେ ଜଳ ଯୋଗାଣ ର ବ୍ୟବସ୍ଥା କରାଯାଇଛି । ଏଥି ପାଇଁ ରାସ୍ତା ଉପରେ କରାଯାଇଥିବା ଗାତ ରେ କୁତ୍ରିମ ନର୍ଦ୍ଦମା ସୃଷ୍ଟି ହୋଇଛି । ସହର ବାସୀଙ୍କୁ ପିବା ପାଇଁ ଯୋଗଉ ଥିବା ସ୍ଵଚ୍ଛ ପାଣି ବାହାର କରାଯାଉଥିବା ସ୍ଥାନ ଟି ସହରରୁ ନିଷ୍କାସିତ ଆବର୍ଜନା ପାଣିରେ ଭରି ରହିଛି । ସୁଦ୍ଧ ଜଳ ଯୋଗାଣ ନାମରେ ଦୂଷିତ ଜଳ ଯୋଗାଣ ବ୍ୟବସ୍ଥା କରାଯାଇଛି । ବେକାରୀ ଙ୍କ ପାଇଁ ନୂତନ ବସଷ୍ଟାଣ୍ଡ ଠାରେ ଦୋକାନ ଗୃହ ନିର୍ମାଣ କରି ଲିଜ ର ବ୍ୟବସ୍ଥା କୁ କହୋଳ କରି ସବ ଲିଜ ର ବ୍ୟବସ୍ଥା କରଯାଇପାରିଛି । ପରିଷଦର ର ଇଚ୍ଛା ମୁତାବକ ନିର୍ମିତ ହୋଇଥିବା ଦୋକାନ ଗୃହକୁ ଭାଙ୍ଗି ବ୍ୟବସାୟୀ  ଙ୍କ ସୁବିଧା ମୁତାବକ ଗୃହ ନିର୍ମାଣ ର ବ୍ୟବସ୍ଥା କରାଯାଇପାରିଛି । ଆଲୋକି କରଣ ବ୍ୟବସ୍ଥା ପାଇଁ ଖୁଣ୍ଟ ପୋତାଯାଇପାରିଛି । ହେଲେ ବିଦ୍ୟୁତ ସଂଯୋଗ ହୋଇନାହିଁ । ଅନ୍ୟ କେଉଁ ସହରରେ ସ୍ୱଚ୍ଛତା ନାମରେ ଟଙ୍କା ଆଦାୟ ହେଉ ଥାଉ କି ନାହିଁ ଏଠି କିନ୍ତୁ  ମାସକୁ ୩୦ ଟଙ୍କା ସ୍ୱଚ୍ଛତା ନାମରେ ଆଦାୟ ହୋଇପାରୁଛି । ପରିଷଦ ର ପାଣ୍ଠି ବଢାଇବା ପାଇଁ ଦୁର୍ଘଟଣା କୁ ସ୍ଵାଗତ ଜଣାଇ ରାସ୍ତା କଡରେ ଉଠା ଦୋକାନ ର ବ୍ୟବସ୍ଥା କରାଯାଇପାରିଛି । ପ୍ରଣୟନ ହୋଇଥିବା ସୂଚନା ଅଧିକାର ଆଇନ କୁ ଖିଲାପ କରାଯାଇପାରୁଛି । ସରକାର ଙ୍କ ଦ୍ଵାରା ନିଯୁକ୍ତ ସଫେଇ କର୍ମଚାରୀ ଙ୍କୁ ଛଟେଇ କରି ଏଜେନ୍ସି ମାଧ୍ୟମରେ ସଫେଇ ର ବ୍ୟବସ୍ଥା କରାଯାଇପାରିଛି । ସହରକୁ ସବୁଜି କରଣ କରିବା ପାଇଁ ବୃକ୍ଷ ରୋପଣ କରାଯାଇ ନପାରିଲେ ମଧ୍ୟ ଜନ ବହୁଳ ସ୍ଥାନ ରେ ଅନାବଶ୍ୟକୀୟ ଗଛ କୁ ବଢାଇ ସବୁଜିକରଣ ର ବାହାବା ନିଆଯାଇ ପାରୁଛି ।  ପୌରପରିଷଦ ରେ ଏସବୁ ବିକାଶର ଧାରା ପ୍ରବାହିତ ହୋଇ ନବ ନିର୍ମାଣ ର ଯୋଗ ଆସିଛି । ବୋଧେ ହୁଏ ଏସବୁକୁ ନେଇ ପୌର ବାସୀ ଗର୍ବି ରେ କରିପାରୁଛି ଆମ ଗୁଣପୁର ସ୍ୱଚ୍ଛ – ସବୁଜ – ସୁନ୍ଦର ।

ଭଗବାନ ଶ୍ରୀକୃଷ୍ଣଙ୍କ ଜନ୍ମ ପରେ ଶ୍ରୀମନ୍ଦିରରେ ପାଳିତ ହେଲା ନନ୍ଦୋତ୍ସବ।

!!! ଗଞ୍ଜାମ ରୁ ଜିଲ୍ଲା ପ୍ରତିନିଧି ପବିତ୍ର କୁମାର ରାଉତଙ୍କ ରିପୋର୍ଟ !!!

ଏଥର ସମ୍ଭାଳ ( ଗଞ୍ଜାମ) – ନନ୍ଦୋତ୍ସବ ଲାଗି, ମଙ୍ଗଳ ଆଳତି ବଢିବା ପରେ ମହାଜନ ସେବକମାନେ ରାମକୃଷ୍ଣଙ୍କୁ ଆଣି ଜଗମୋହନ ଦୋଳିରେ ବିଜେ କରାନ୍ତି। ଦକ୍ଷିଣ ଘରୁ ମଦନ ମୋହନ ଆସି ସେହି ଦୋଳିରେ ବିଜେ ହୁଅନ୍ତି। ମହାସ୍ନାନ ନୀତି ପରେ ପୁଷ୍ପାଳକ ସେବକମାନେ ମହାପ୍ରଭୁଙ୍କୁ ନୂଆ ଲୁଗା ଲାଗି କରାଯାଏ। ଏହାପରେ ମହାପ୍ରଭୁଙ୍କ ସର୍ବାଙ୍ଗ ହୋଇ ୬ମୂର୍ତ୍ତି ଅଳଙ୍କାର ଲାଗି କରାଯାଏ। ପୁଷ୍ପାଳକ ସେବକମାନେ ଦେବୀ ସୁଭଦ୍ରାଙ୍କୁ ଆଜ୍ଞାମାଳ ଓ କର୍ପୁର ଲାଗି କରାଇଥାନ୍ତି। ଦେବୀ ସୁଭଦ୍ରା ଏବଂ ମହାପ୍ରଭୁ ଶ୍ରୀଜଗନ୍ନାଥଙ୍କ ବାଡ଼ରେ ଷଠି ମାର୍କଣ୍ଡୀ ପୂଜା ପରେ ପାଣି ପଡ଼ିି ଟେରାବନ୍ଧା ହୁଅନ୍ତି। ମଧ୍ୟାହ୍ନ ଧୂପ ନୀତି ବଢିବା ପରେ ଶୁଦ୍ଧସୁଆର ଦୁଇଟି ପିତ୍ତଳ ବଟାରେ ମଙ୍ଗଳାର୍ପଣ ସାମଗ୍ରୀ ରଖନ୍ତି। ପୂଜାପଣ୍ଡା, ପତିମହାପାତ୍ର ଏବଂ ମୁଦିରସ୍ତ ଶ୍ରୀଜଗନ୍ନାଥ ବାଡ଼ ଓ ସୁଭଦ୍ରାଙ୍କ ବାଡ଼ରେ ମଙ୍ଗଳାର୍ପଣ କରି ବନ୍ଦାପନା କରନ୍ତି। ପତି ମହାପାତ୍ର ଭଣ୍ଡାର ଘରୁ ରୁପାବଟାରେ ଦୁର୍ଗାଦେବୀଙ୍କୁ ବିଜେ କରାଇ ଆଣନ୍ତି। ପତି ମହାପାତ୍ର ଦେବୀ ଦୁର୍ଗାଙ୍କୁ ଜଗମୋହନ ଦୋଳି ସମ୍ମୁଖ ଖଟୁଲି ଉପରେ ବିଜେ କରାଇ ଦିଅନ୍ତି। ମହାସ୍ନାନ ଓ ଶୀତଳ ଭୋଗ ନୀତି ଅନୁଷ୍ଠିତ ହୁଏ। ଦେବୀ ଦୁର୍ଗାଙ୍କୁ ସାତପାହାଚ ଦ୍ୱାର ଡମ୍ବୁରୁ ଉପରକୁ ବିଜେ ପରେ ବିଜୁଳି କନ୍ୟା ନୀତି ସମ୍ପନ୍ନ ହୋଇ ଦେବୀ ଭଣ୍ଡାରକୁ ବାହୁଡ଼ା ବିଜେ କରାଯାଏ। ଏହାପରେ ରାମ, କୃଷ୍ଣ ଓ ମଦନମୋହନ ଖଟ ଉପରକୁ ବିଜେ କରନ୍ତି। ସେଠାରେ ମାଜଣା ଓ ଫୁଲ ଲାଗି ହେବା ପରେ ସାତପାହାଚ ଦ୍ୱାରରେ ଥିବା ପାଲିଙ୍କିରେ ଯାଇ ଲକ୍ଷ୍ମୀମନ୍ଦିର ଜଗମୋହନ ଖଟରେ ବିଜେ କରନ୍ତି। ଭରତିଆ ଗୌଡ଼ ପୁତ୍ର ଜନ୍ମ ହେବା ଖବର ଦିଅନ୍ତେ। ପୁତ୍ରଙ୍କୁ ନନ୍ଦରାଜା କ୍ଷୀର ସମର୍ପଣ କରନ୍ତି ଏବଂ ବନ୍ଦାପନା କରିଥାନ୍ତି। ଏହାପରେ ଶ୍ରୀକୃଷ୍ଣଙ୍କ ବାଲ୍ୟଲୀଳା ନୀତି ସମ୍ପନ୍ନ ହେବ। ମଥୁରା, ବୃନ୍ଦାବନ, ଦ୍ୱାରକା, ଦିଲ୍ଲୀ ସମେତ ସାରା ଦେଶ ଭଗବାନ ଶ୍ରୀକୃଷ୍ଣଙ୍କର ଏହି ଜନ୍ମ ଉତ୍ସବ ପାଳନ କରିଥାନ୍ତି । ପୁରୀ ସହରର ବିଭିନ୍ନ ମଠମାନଙ୍କରେ ଭଜନ କୀର୍ତନ କରାଯାଇ ଭକ୍ତମାନେ ଉପବାସ ରଖିି ଶ୍ରୀକୃଷ୍ଣଙ୍କ ଜନ୍ମାଷ୍ଟମୀ ବ୍ରତ କରନ୍ତି । ବିଶେଷକରି ଗୌଡିୟ ମଠମାନଙ୍କରେ ଶ୍ରୀକୃଷ୍ଣଙ୍କ ଜନ୍ମାଷ୍ଟମୀ ଓ ନନ୍ଦୋତ୍ସବ ଖୁବ ଧାମଧାମରେ ପାଳନ କରାଯାଏ।

ସରପଞ୍ଚ ଙ୍କ ଦମଙ୍ଗ ଗିରି ଘରେ ପଶି ମାଡ଼ ମାରି ଲହୁ ଲୁହାଣ କଲେ ଯୁବକଙ୍କୁ…..!

!!! ଗଞ୍ଜାମ ରୁ ଜିଲ୍ଲା ପ୍ରତିନିଧି ପବିତ୍ର କୁମାର ରାଉତଙ୍କ ରିପୋର୍ଟ !!!

ଏଥର ସମ୍ଭାଳ (କୋଦଳା) – ଗଞ୍ଜାମ ଜିଲ୍ଲା କୋଦଳା ଥାନା ଅନ୍ତର୍ଗତ ବେରୁଆଁ ବାଡ଼ି ସରପଞ୍ଚ ନୀଳାଞ୍ଚଳ ପାଢ଼ୀ ଆଜି ଟୀକାକରଣ କୁ ନେଇ ସିଅଳ ସାହିର ପ୍ରମୋଦ କୁମାର ବେହେରା ଙ୍କୁ ତାଙ୍କ ଘରେପଶି ଜାତିଆଣ ଭେଦ କୁ ନେଇ ଗାଳିକରିବା ସହ ମାରଣାତ୍ମକ ଆକ୍ରମଣ କରିଥିବା କୋଦଳା ଥାନାରେ ଅଭିଯୋଗ ହୋଇଛି l ଏତେଲାରେ ଦର୍ଶଯାଇଛି କି ଆଜି ବେରୁଆଁ ବାଡ଼ିରେ ଦିନ ଦଶ ଘଣ୍ଟ ସମୟରେ ଟିକାଦେବାପାଇଁ ସମୟ ନିର୍ଧାରଣ ହୋଇଥିଲା କିନ୍ତୁ ସେଇ ସମୟ ପୂର୍ବରୁ ସମସ୍ତ ଟୋକେନ ଅନ୍ୟ ଲୋକ ମାନଙ୍କୁ ଦିୟା ସରିଥିଲା ଏହା ପରେ କିଛି ଲୋକେ ଆସି ସରପଞ୍ଚ ଙ୍କୁ ପଚାରି ଥିଲେ କିନ୍ତୁ ସରପଞ୍ଚ ଦିଆଯିବ କହି ଜଗିଥାଓ ବୋଲି କହିଥିଲେ l ପ୍ରମୋଦ ନିଜ ଗ୍ରାମରେ ଥିବା କଠୋଘର ବାରଣ୍ଡାରେ ବସିଥିବା ସମୟରେ ସରପଞ୍ଚ ସେଇଠାକୁ ଆସି ଗାଳିଗୁରଜ କରିବା ସହ ପ୍ରମୋଦ ର ଘରକୁ ଡାକି ନେଇ ମାଡମାରିବା ସହ ଏକ ଧାରୁଆ ଅସ୍ତ୍ର ରେ ଆକ୍ରମଣ କରି ସେଠାରୁ ପଳେଇ ଯାଇଥିଲେ l ରକ୍ତ ଜୁଡୁବୁଡୁ ଅବସ୍ଥା ରେ ଗ୍ରାମର କିଛି ଲୋକ ତାଙ୍କୁ କୋଦଳା ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରକୁ ଆଣି ଚିକିତ୍ସା କରିବା ପରେ କୋଦଳା ଥାନା ରେ ଏନେଇ ଏକ ଏତଲା ଦିୟାଯାଇଛି l ସେଇପଟେ ସରପଞ୍ଚ ଙ୍କୁ ଯୋଗାଯୋଗ କରିବାରୁ ସରପଞ୍ଚ ଏହା ସଂପୂର୍ଣ୍ଣ ଭିତିହୀନ ଏ ନେଇ ସରପଞ୍ଚ ମଧ୍ୟ ଥାନାରେ ଏତଲା ଦେଇଥିବା କହିଛନ୍ତି l ସେଇପଟେ ଗ୍ରାମର ଲୋକ ସରପଞ୍ଚ ଙ୍କ ଏଇପରୀ ଗୁଣ୍ଡା ରାଜ କୁ ତିବ୍ର ନିନ୍ଦା କରିଛନ୍ତି ।

ଗୁଣପୁର ପୌର ପରିଷଦ ରେ ବିକାଶ ର ଯୁଗ ଆସିଛି …!

!!! ଏଥର ସମ୍ଭାଳ ଚ୍ୟାନେଲ ମୁଖ୍ୟ ଶ୍ରୀ ଶକ୍ତି ଦାଶ !!! 

ଦୀର୍ଘ ଦିନ ଛକା ପଞ୍ଜ। ପରେ ଗୁଣପୁର ପୌରପରିଷଦ ରେ ସତ୍ତା ବଦଳିଛି ଓ ଅଧିକାରୀ ବଦଳିଛନ୍ତି । କାର୍ଯ୍ୟଳୟ ଭିତରେ ଅନେକ ଜିନିଷ ବଦଳିଛି ଅନେକ କର୍ମୀ, ଅନେକ କାର୍ଯ୍ୟ କରୁଥିବା ପରିଚାଳନା କରୁଥିବା ଏଜେନ୍ସି ମଧ୍ୟ ବଦଳିଛି । ପୌରପରିଷଦ ରେ ନବ ନିର୍ମାଣ ର ଯୁଗ ଆସିଛି ନିଶ୍ଚିତ ରୂପେ ଗୁଣପୁର ପୌରପରିଷଦ ରେ ବିକାଶ ର ଧାରା ପ୍ରବାହିତ ହେଉଛି …!

• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଅନେକ ସ୍ଥାନରେ ଶୌଚାଳୟ ନିର୍ମାଣ ଓ କାର୍ଯ୍ୟକାରୀ ହୋଇ ପରିଚାଳନା ଅଭାବରୁ ଶୌଚାଳୟ ଏବଂ ସେହି ଚାରି ପାଖରେ ନର୍ଦ୍ଦମା କୁଣ୍ଣ ହୋଇଛି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଦୀର୍ଘ ବର୍ଷ ହେବ ମଶା ଧୂପ ମାରିବା ଯନ୍ତ୍ର କାର୍ଯ୍ୟକାରୀ ହେବା କିମ୍ବା ମଶା ଧୂପ ମାରିବା କୌଣସି ସାଧାରଣ ବ୍ୟକ୍ତି ଜାଣି ପାରୁ ନାହାଁନ୍ତି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ପୂର୍ବରୁ ବହୁ ଅର୍ଥ ଖର୍ଚ୍ଚ କରି ନିର୍ମାଣ ହୋଇଥିବା ବିଜୁ କଲ୍ୟାଣ ମଣ୍ଡପ ଓ ଟାଉନ ହଲ ପରିଚାଳନା ଅଭାବରୁ ଭଙ୍ଗା ଦଦରା ହୋଇ ପଡ଼ିଛି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ପିଇବା ପାଣି ପାଇପ ଯୋଗୁଁ ପ୍ରତ୍ୟେକ ସାହିରେ ଗର୍ଭ ଓ କୁତ୍ରିମ ନର୍ଦ୍ଦମ ସୃଷ୍ଟି ହେଉଛି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଗତ ବର୍ଷ ବର୍ଷା ପୂର୍ବରୁ ଏନ ଜି ଟି ଉପରେ ଦୋଷ ଢାଳି ଡ୍ରେନେଜ ଵ୍ୟଵସ୍ଥା କୁ ସୁଧାର କରି ନପାରି ବର୍ଷା ଜଳରେ ସହର ମଧ୍ୟରେ କୁତ୍ରିମ ବନ୍ୟା ସୃଷ୍ଟି କରାଯାଇଛି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ସହରକୁ ସପ୍ଲାଇ ହେଉଥିବା ପିଇବା ପାଣି ଯେଉଁ ନଦୀ ଗର୍ଭ ରୁ ଆସୁଛି ସେଠାରେ ସହରର ଡ୍ରେନେଜ ଡ଼ମ୍ପିଙ୍ଗ ହେଉଛି ଏବଂ ସମସ୍ତ ସଂପର୍କୀତ ବିଭାଗ ପୌର ପରିଷଦ କୁ ପଦକ୍ଷେପ ନେବା ନିମନ୍ତେ କହିବା ପରେ ମଧ୍ୟ କିଛି ପଦକ୍ଷେପ ନ ନେଇ ସେହି ଦୂଷିତ ପାଣି ପିଇବା ନିମନ୍ତେ ସହରବାସୀଙ୍କୁ ଦିଆଯାଉଛି ।
• ପୌରପରିଷଦ ମଧ୍ୟରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଖାଲି ଥିବା ଅନେକ ଖାଲି ସ୍ଥାନକୁ ଭୂମି ମାଫିଆ ମାନେ ଅକ୍ତିଆର କରି ନିଜ ବ୍ୟକ୍ତିଗତ ସେଡ଼,ଦୋକାନ, ପାର୍କିଂ ସ୍ଥ।ନ ଇତ୍ୟାଦି କରି ମାଲାମାଲ ହେଉଛନ୍ତି କତ୍ତୃପକ୍ଷ କିନ୍ତୁ ନୀରବ ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ବିନା ଟାଉନ ପ୍ଲାନ ରେ ଅନେକ ପ୍ଲଟ ବିକ୍ରି ହେଉଛି ଅନେକ ସାହି ଅନେକ ସୌଧ ନିର୍ମାଣ ହେଉଛି କାହାର ଡ୍ରେନ ନାହିଁ ତ କାହାର ସାହି ସଂକୀର୍ଣ୍ଣ କାହାର ଓସାର । ଟାଉନ ପ୍ଲାନ ରେ ଗଛ ଲଗାଇବା ନିୟମ ଚୁଲିକୁ ଯାଉ ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ନୂତନ ଓ ପୁରାତନ ବସଷ୍ଟାଣ୍ଡ ରେ ଲିଜ ରୁ ସବ ଲିଜ ଦେଇ ଅସାଧୁ ବ୍ୟବସାୟୀ ମାନେ ଅସାଧୁ ଉପାୟରେ ନିୟମ କୁ ଫାଙ୍କି ଦୋକାନ ଗୃହ ଗୁଡିକୁ ନିଜ ଇଚ୍ଛା ମୁତାବକ ଭାଙ୍ଗି ନିର୍ମାଣ କରି ଲାଭବାନ ହେଉଛନ୍ତି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ପୁରୁଣା ବସଷ୍ଟାଣ୍ଡ ରେ ଥିବା ମାର୍କେଟ କମ୍ପ୍ଲେକ୍ସର ଓପରକୁ ଉଠିବା ସିଡ଼ି କୁ ଭାଙ୍ଗି ଅଗ୍ନିଶମ ବିଭାଗର ସମସ୍ତ ନିୟମ କୁ ଜଳାଞ୍ଜଳି ଦେଇ ଦୋକାନ ଗୃହ କରାଯାଇଛି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ନୂତନ ଏଜେନ୍ସି କୁ ସହର ସଫେଇର ଟେଣ୍ଡେର ଦେଇ ୮୦ ଉର୍ଦ୍ଧ୍ବ ସଫେଇ କର୍ମଚାରୀଙ୍କ ଅର୍ଥ ସରକାରଙ୍କ ଠାରୁ ଉଠାଇ ୬୦ ରୁ କମ କର୍ମଚାରୀ ରେ କାମ ଚଲାଉଛନ୍ତି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ସାହି ମାନଙ୍କୁ ସଫେଇ ନିମନ୍ତେ ଅଲଗା କର୍ମଚାରୀ ଓ ବଡ଼ ଡ୍ରେନ ଗୁଡିକୁ ସଫା କରିବା ନିମନ୍ତେ ଅଲଗା ଏସ୍ଟିମେଟ କରି ବିଲ ଉଠାଯାଉଛି । ତଥାପି ସହର ସଫା ସୁତୁରା କେବଳ ଧର୍ମ କୁ ଆଖିଠାର ।
• ପୌର ପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ନୂତନ ଭାବେ ଯୋଡ଼ି ହୋଇଥିବା ଅନେକ ସାହି କୁ ସଫେଇ କର୍ମଚାରୀ ମାନଙ୍କୁ ଏକ ମାସରେ କେବଳ ଥରେ ପଠାଯାଉଛି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ମରାଠୀଗୁଡା ଓ ମେଟା କର୍ଣ୍ଣଗୁଡ଼ା ରେ ଅଦ୍ୟାବଧି ରାସ୍ତା,ପିଇବା ପାଣି, ସଠିକ ବିଦ୍ୟୁତ ଲାଇନ ଭଳି କୌଣସି ସୁବିଧା ପହଂଚି ପାରୁନି ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ପୂର୍ବରୁ ଅନେକ ଦୁର୍ନୀତି ( ଶିଶୁ ଉଦ୍ୟାନ, ସୋଡିଏମ ଲାଇଟ, ଦୋକାନ ଗୃହ ନିର୍ମାଣ ,ଦୋକାନ ଗୃହ ବଣ୍ଟନ) ର ହଟ ହଟା ତଥାପି ତଦନ୍ତ ନାହିଁ କିମ୍ବା କାର୍ଯ୍ୟାନୁଷ୍ଠାନ ନାହିଁ ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଅନେକ ପାର୍କ ଏକ ସାଙ୍ଗରେ ନିର୍ମାଣ ହେଉଛି କିନ୍ତୁ ଦୀର୍ଘ ଦିନ ହେବ କାମ ସବୁ ଅସମ୍ପୂର୍ଣ୍ଣ ଲୋକଙ୍କ ପାର୍କ ପାଇବା ସ୍ୱପ୍ନ କେବଳ ପଦ୍ମ ଘୁଂଚି ଘୁଂଚି ଯାଉଛି ।
• ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଦିବ୍ୟାଙ୍ଗ ଭତ୍ତା, ବୃଦ୍ଧ ଭତ୍ତା, ଆବାସ ଯୋଜନା , ଅସହାୟ ଏବଂ ପରିତ୍ୟକ୍ତ ମହିଳା ଭତ୍ତା,ବିଧବା ଭତ୍ତା ଆଜି ମଧ୍ୟ ଯୋଗ୍ୟ ବ୍ୟକ୍ତି ନ ପାଇ କେବଳ ଖଣ୍ଡି ରାଜନେତା ଙ୍କ ଗୋଡାଣିଆ ଲୋକଙ୍କୁ ମିଳୁଥିବା ଅନେକ ଅଭିଯୋଗ ସହ ଗଣମାଧ୍ୟମ ମଧ୍ୟ ଚିତ୍କାର କରୁଛି ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ବିଲ ହୁଡା ରୁ ଆରମ୍ଭ କରି ସମସ୍ତ ରାସ୍ତାରେ ନାମ ମାତ୍ରକୁ ଲାଇଟ ପୋଲ ଲାଇଟ ଲାଗିଛି ସେଗୁଡିକ ବାହାରି ଉପୁଡି ପଡିଲାଣି କିନ୍ତୁ କେବେ ବିଦ୍ୟୁତ ସଂଯୋଗ ହୋଇ ପାରୁ ନାହିଁ ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଟିକସ ନୀତି ଆସିଛି , ସବୁଠୁ ପୁରୁଣା ପାରଳାଖେମୁଣ୍ଡି ରେ କିମ୍ବା ରାୟଗଡ଼ା ସହର ରେ ଏହି ନୀତି ନାମରେ ଜନସାଧାରଣ ଙ୍କ ନିକଟରୁ ଅତ୍ୟଧିକ ଟିକସ ଆଦାୟ କରାଯାଉନାହିଁ କିନ୍ତୁ ଗୁଣପୁର ରେ ସରଳ ଜନସାଧାରଣଙ୍କ ଲାଭ ଉଠାଇ ମାତ୍ରାଧିକ ଟିକସ ଆଦାୟ ହେଉଛି ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଅନ୍ୟ କେଉଁ ସହରରେ ସ୍ୱଚ୍ଛତା ନାମରେ ଆଦାୟ ହେଉନଥିବାବେଳେ ମାସକୁ ୩୦ ଟଙ୍କା ସ୍ୱଚ୍ଛତା ନାମରେ ଲୋକଙ୍କୁ ଦେବାକୁ ପଡୁଛି ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଅନେକ ଯୁବକଙ୍କ ସ୍ୱପ୍ନ ଜିମ ଟିଏ ହେବା । ପୂର୍ବ ସଂସଦ ଅନୁଦାନ ଦେବାପରେ ମଧ୍ୟ ଯୁବକଙ୍କ ସ୍ୱପ୍ନ କେବଳ ସ୍ୱପ୍ନ ହୋଇ ରହିଛି ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ସୂଚନା ଅଧିକାର ଆଇନ ମାଗିବା ସବୁଠୁ ବଡ଼ ଭୁଲ ହେବ କାରଣ ମାଗିଲେ ଭ୍ରମାତ୍ମକ ତଥ୍ୟ ମିଳିବ ନଚେତ ଧମକ ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ସଫେଇ ଅଧିକାରୀ ପରିବର୍ତ୍ତନ ହୋଇଛନ୍ତି ବହୁ ମାତ୍ରାରେ ବ୍ଲିକିଙ୍ଗ, ଫିନାଇଲ ଆସୁଛି ଏଭଳିକି ଏଗୁଡ଼ିକୁ ରଖିବାକୁ ଷ୍ଟୋର ରୁମ ମଧ୍ୟ ନିର୍ମାଣ ହେଉଛି କିନ୍ତୁ କେଉଁ ଡ୍ରେନ କିମ୍ବା ରାସ୍ତା ରେ ପକାଯିବାର ଦେଖଯାଉ ନାହିଁ ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ କତ୍ତୃପକ୍ଷ ଙ୍କ ବିସ୍ତୃତ ଯୋଜନା ଯୋଗୁଁ ରାସ୍ତାରେ ବୁଲିବା ଗାଈ -ଗୋରୁ ଙ୍କ ଯୋଗୁଁ ଅନେକ ଦୁର୍ଘଟଣା ହେଉଛି ଗୋ -ସମ୍ପଦ ମଧ୍ୟ କ୍ଷତି ହେଉଛି । ବୁଲା ଗାଈ ଙ୍କୁ କାଞ୍ଜିଆହୋଦା ରେ ରଖିବା ଓ ବୁଲା କୁକୁରଙ୍କ ବ୍ୟବସ୍ଥା କଥା ସବୁ ଚୁଲିକୁ ଯାଉ ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ମୃତ ପ୍ରମାଣ ପତ୍ର,ଜନ୍ମ ପ୍ରମାଣ ପତ୍ର, ପ୍ଲାନ ଏପୃଭଲ, ବିବାହ ପ୍ରମାଣ ପତ୍ର କେବଳ ବରିଷ୍ଠ ଅଧିକାରୀ କିମ୍ବା କିଛି ରାଜନେତାଙ୍କ ହସ୍ତକ୍ଷେପ ପରେ ମିଳୁଛି ।
• ପୌରପରିଷଦ ରେ ବିକାଶର ଧାରା ପ୍ରବାହିତ ହେଉଛି ତେଣୁ ବୋଧେ ଚାହା ଦୋକାନ ଠାରୁ ଅଧିକା ରାସ୍ତା କଡରେ ଚିକେନ ଦୋକାନ ବୁଲା କୁକୁରଙ୍କୁ ଖୋରାକ ଯୋଗାଉଛି ।
  ଗୁଣପୁର ପୌରପରିଷଦ ର ପ୍ରଚଳିତ ବିକାଶ ଧାରା ରୁ କିଛି ସଂଗୃହୀତ ତଥ୍ୟ । ଏଥିରେ ଆପଣ ମଧ୍ୟ ନିଜ ଅନୁଭୂତିରୁ କିଛି ଯୋଡି ପାରିବେ । ଏହା କେବଳ ଆପଣଙ୍କ ଅବଗତି ନିମନ୍ତେ ମୋର ଅନୁଭୂତି କଥନ । ଅନ୍ୟଥା ଦେହକୁ ନେବେ ନାହିଁ । 

ଲାଞ୍ଚ ନେବା ଘଟଣାକୁ ମିଛ କହିବା ଭାରପ୍ରାପ୍ତ ଅବକାରୀ ଅଧୀକ୍ଷକ ନିଲମ୍ବିତ …!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ୱର)- ପ୍ରଥମେ ଲାଞ୍ଚ ନେବା ଘଟଣାକୁ ସଫା ସଫା ମନା କରି ଦେଉଥିଲେ। ଏହା କେବେକାର ଘଟଣା ମନେ ପଡ଼ୁନି ବୋଲି କହିବା ସହ କୋଭିଡ, ରେଡକ୍ରସ ପାଇଁ କଲେକସନ୍‌ ହୋଇଥିବ ବୋଲି ବି କହିବାକୁ ପଛାଇ ନ ଥିଲେ। କିନ୍ତୁ କିଛି ବି ଚାଲ୍‌ କାମ ଦେଲାନି । ଶେଷରେ ନିଲମ୍ବିତ ହେଲେ ରାୟଗଡ଼ାର ଭାରପ୍ରାପ୍ତ ଅବକାରୀ ଅଧୀକ୍ଷକ ପ୍ରସନ୍ନ ନାୟକ । ଏନେଇ ଅବକାରୀ ବିଭାଗ ପକ୍ଷରରୁ ନଂ ୪୧୯୨ ତା ୩୧/୦୮/୨୦୨୧ ରିଖରେ ଏକ ପତ୍ର ଜାରି ହୋଇଛି । ମଦ ଦୋକାନ କର୍ମଚାରୀଙ୍କଠାରୁ ଅବକାରୀ ଅଧୀକ୍ଷକ ପ୍ରସନ୍ନ ନାୟକ ଙ୍କ ଉପସ୍ଥିତିରେ ଲାଞ୍ଚ ନେଉଥିବାର ଭିଡିଓ ପ୍ରାୟ ୧୫ ଦିନ ପୂର୍ବେ ଖୁବ୍‌ ଭାଇରାଲ ହୋଇଥିଲା। ଏହା ଗତ ଏପ୍ରିଲ ମାସର ଘଟଣା ହୋଇଥିବା ବେଳେ ଗତ ୧୫ ଦିନ ପୂର୍ବେ ଏହା ସୋସିଆଲ ମିଡିଆରେ ଘୁରି ବୁଲିଲା। ହେଲେ ଭିଡିଓ ଭାଇରାଲ ହେବା ପରେ ଏଥିରେ ନିଜ ସମ୍ପୃକ୍ତିକୁ ସଫା ସଫା ମନା କରି ଦେଇଥିବା ଅବକାରୀ ଅଧୀକ୍ଷକ ପ୍ରସନ୍ନ ନାୟକ ଶେଷରେ ନିଲମ୍ବିତ ହୋଇଛନ୍ତି। ମିଳିଥିବା ସୂଚନା ଅନୁଯାୟୀ, ରାୟଗଡ଼ା ଅବକାରୀ ଅଧୀକ୍ଷକ ପ୍ରସନ୍ନ କୁମାର ନାୟକ ଓ କନଷ୍ଟେବଲ ସୁଶାନ୍ତ ପାତ୍ର ଗତ ଏପ୍ରିଲ ୧୩ ତାରିଖରେ ଗୁଣପୁରକୁ ଯାଇଥିବା ବେଳେ ଏକ ଲଜ୍‌ରେ ରହିଥିଲେ। ସେଠାରେ କୌଣସି ମଦ ଦୋକାନର କର୍ମଚାରୀଙ୍କ ସହ ଟଙ୍କା କାରବାରକୁ ନେଇ ହୋଇଥିବା ସେମାନଙ୍କ କଥାବାର୍ତ୍ତାର ଭିଡିଓ ସୋଶାଲ ମିଡିଆରେ ଭାଇରାଲ ହୋଇଥିଲା। ଅବକାରୀ ଅଧୀକ୍ଷକ ତାଙ୍କ ବିଭାଗର କନଷ୍ଟେବଲଙ୍କ ଜରିଆରେ ଅର୍ଥ କାରବାର କଥା କହୁଥିବା ଭିଡିଓରେ ସ୍ପଷ୍ଟ ଭାବେ ଶୁଣା ଯାଉଥିଲା। ଭିଡିଓ ଭାଇରାଲ ହେବା ପରେ ରାୟଗଡା ଜିଲ୍ଲାରେ ଏହାକୁ ନେଇ ଚର୍ଚ୍ଚା ଜୋର ଧରିଥିଲା । ‘ଆମେ କେତେ ମନ ଦେଇ କାମ କରୁଛୁ। ଆମାଉଣ୍ଟ ବହୁତ କମ୍‌ ହୋଇଗଲା । ମୋତେ ଖୁସି କଲା ଭଳି ଦେଲେ ସିନା ହେବ। ମୁଁ ସବ୍‌ଇନ୍ସପେକ୍ଟର ଥିଲା ବେଳେ ଏହାଠୁ ଅଧିକ ନେଉଥିଲି। ଏପରିକି ପାତ୍ରପୁରରେ ଥିବା ବେଳେ ଗୋଟିଏ ମଦ ଦୋକାନରୁ ୧୫ ହଜାର ନେଉଥିଲି’ ବୋଲି ଅବକାରୀ ଅଧୀକ୍ଷକ କହୁଥିବା ଶୁଣିବାକୁ ମିଳୁଥିଲା। ତେବେ ଉଭୟ ଅବକାରୀ ଅଧୀକ୍ଷକ ଓ କନଷ୍ଟେବଲ ଏବେ ଏହି ଭିଡିଓକୁ ସମ୍ପୂର୍ଣ୍ଣ ମିଥ୍ୟା ବୋଲି କହିବା ସହ ସେମାନଙ୍କୁ ଫସା ଯାଉଥିବା କୁହାଯାଉଛି । ଘଟଣାର ପ୍ରାଥମିକ ତଦନ୍ତ ପରେ ଭିଡ଼ିଓରେ ଦେଖା ଯାଉଥିବା ଅବକାରୀ କନେଷ୍ଟେବଳଙ୍କୁ ନିଲମ୍ବନ କରାଯାଇଛି । ଏହି ଘଟଣାରେ ସବିଶେଷ ତଦନ୍ତ ପାଇଁ ରାୟଗଡା ଜିଲ୍ଲା ଅତିରିକ୍ତ ଜିଲ୍ଲାପାଳ ଶ୍ରୀ ସୋମନାଥ ପ୍ରଧାନ ଙ୍କୁ ନିର୍ଦ୍ଦେଶ ଦିଆଯାଇଛି । ଘଟଣାରେ ସଂପୃକ୍ତ ରହିଥିବା ଅନ୍ୟମାନଙ୍କ ବିରୁଦ୍ଧରେ ଯଥାଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ରାଜ୍ୟ ସରକାରଙ୍କୁ ଅବଗତ କରାଯାଇଥିବା ଜଣାପଡିଛି । ଏଭଳି ଘଟଣାକୁ ଆଦୌ ବରଦାସ୍ତ କରାଯିବ ନାହିଁ । ଯେଉଁ ମାନେ ଏଭଳି ଅନୈତିକ କାର୍ଯ୍ୟରେ ସମ୍ପୃକ୍ତ ଅଛନ୍ତି ସେମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ରାୟଗଡ଼ା ଜିଲ୍ଲାପାଳ ସରୋଜ କୁମାର ମିଶ୍ର ପ୍ରତିଶୃତି ଦେଇଛନ୍ତି । ଏହି ଘଟଣାରେ ପୂର୍ବରୁ ଜଣେ ଅବକାରୀ କନଷ୍ଟେବଲ ନିଲମ୍ବିତ ହୋଇଥିବା ବେଳେ ଏବେ ଅବକାରୀ ଅଧୀକ୍ଷକଙ୍କ ପାଳି ପଡ଼ିଲା। ଲାଞ୍ଚ ନେବା ବ୍ୟକ୍ତି ଯେତିକି ପରିମାଣରେ ଦୋଷୀ ଲାଞ୍ଚ ଦେବା ବ୍ୟକ୍ତି ସେତିକି ପରିମାଣରେ ଦୋଷୀ ବୋଲି ଏକ ଖବରକାଗଜ ରେ ପ୍ରକାଶ ପାଇଥିବା ସମ୍ବାଦକୁ ନେଇ ବର୍ତ୍ତମାନ ଜନସାଧରଣ ରେ ତର୍ଜମା ଚାଲିଛି । ଦେଖିବାକୁ ରହିଲା ଏବେ ପୁଣି କାହା ପାଳି ପଡୁଛି ।