ଅଧୀରଙ୍କୁ ବଳି ପକାଇ ଦିଦିଙ୍କୁ ଖୁସି କରାଇବ କଂଗ୍ରେସ ….!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ଜୁନ୍ ୧୯ରୁ ସଂସଦର ମୌସୁମୀ ଅଧିବେଶନ ଆରମ୍ଭ ହେବାକୁ ଯାଉଛି। ହେଲେ ଏହା ପୂର୍ବରୁ କଂଗ୍ରେସର ଲୋକସଭାର ନେତା ଅଧୀର ରଞ୍ଜନ ଚୌଧୁରୀଙ୍କୁ ତଥା ବିରୋଧୀ ଦଳ ନେତା ପଦରୁ କଂଗ୍ରେସ ହଟାଇବାକୁ ଯୋଜନା କରୁଛି। ଦଳ ଏଭଳି ବିଚାର କରିବା ପଛର ଦୁଇଟି ତର୍କ ଏବେ ସାମ୍ନାକୁ ଆସିଛି। ଗୋଟିଏ ହେଉଛି ଉଭୟ ସଂସଦ ଏବଂ ବାହାରେ ଶାସକ ବିଜେପିକୁ ଘେରିବାରେ ଅଧୀର ବିଫଳ ହୋଇଛନ୍ତି ଆଉ ଗୋଟିଏ କାରଣ ମମତା ବାନାର୍ଜୀଙ୍କ ନିକଟତର ହେବାକୁ ଯାଇ ଅଧୀରଙ୍କୁ ବଳି ପକାଇବାକୁ କଂଗ୍ରେସ ବିଚାର କରୁଥିବା ସୂଚନା ରହିଛି। ସୂଚନା ଅନୁଯାୟୀ ଅଧୀର ଏବଂ ମମତା ପରସ୍ପରକୁ କଂଗ୍ରେସ ଦିନରୁ ପ୍ରତିଦ୍ୱନ୍ଦ୍ୱୀ ଭାବରେ ବିଚାର କରୁଛନ୍ତି। କିନ୍ତୁ ପଶ୍ଚିମବଙ୍ଗ ବିଧାନସଭା ନିର୍ବାଚନ ବେଳେ ଅଧିରୀଙ୍କୁ ସମ୍ପୂର୍ଣ୍ଣ ସ୍ୱାଧୀନତା ଦେଇଥିବା ବେଳେ କଂଗ୍ରେସ ଚିତପଟାଙ୍ଗ ମାରିଛି। ଏବେ ବିଜେପି ବିରୋଧରେ ମମତାଙ୍କ ଟିଏମସି ଅଧିକ ଆକ୍ରମଣାତ୍ମକ ରହିଛି। ତେଣୁ ଆଗକୁ ୟୁପି ବିଧାନସଭା ନିର୍ବାଚନ ସହିତ ୨୦୨୪ ସାଧାରଣ ନିର୍ବାଚନ ବେଳକୁ ଟିଏମସି ବିଜେପି ପାଇଁ ଅଧିକ ଚ୍ୟାଲେଞ୍ଜ ହେବ। ତେଣୁ ଏବେ ଟିଏମସି ସହିତ ମତଭେଦ ଦୂର କରି ମୋଦିଙ୍କୁ କେମିତି କ୍ଷମତାରୁ ହଟାଇ ହେବ ସେ ନେଇ ପ୍ରୟାସ ହେବା ଦରକାର ବୋଲି କଂଗ୍ରେସ ଚୂଡ଼ାନ୍ତ ନିଷ୍ପତ୍ତି ନେବା ପୂର୍ବରୁ ରଫ୍ ଖାତାରେ ରାଜନୀତିର ଗଣିତ କଷି ଏଭଳି ବିଚାର କରୁଛି। ଏବେ ବିରୋଧୀ ଦଳ ନେତା ଭାବରେ ମନୀଷ ତେୱାରୀ କିମ୍ବା ଶଶି ଥରୁରଙ୍କୁ କଂଗ୍ରେସ ବସାଇପାରେ। ତିୱାରୀ ପଞ୍ଜାବର ଆନନ୍ଦପୁର ସାହିବର ସାଂସଦ କିନ୍ତୁ ପୂର୍ବ ୟୁପିରେ ତାଙ୍କର ଭୋଟ୍ ବ୍ୟାଙ୍କ ରହିଛି। ସେହିପରି ମମତା ବାନାର୍ଜୀଙ୍କ ସହ ତାଙ୍କର ଭଲ ସମ୍ପର୍କ ରହିଛି। ଏଥିସହ ସେ ଜଣେ ବ୍ରାହ୍ମଣ ନେତା। ସେହିପରି କେରଳ ସାଂସଦ ଶଶୀ ଥରୁର ଅନେକ ପ୍ରସଙ୍ଗରେ କେନ୍ଦ୍ରକୁ ପ୍ରଶ୍ନ କରି ହଲାପଟା କରିଛନ୍ତି। ହେଲେ ଅଧୀରଙ୍କୁ ଏହି ପଦରୁ ହଟାଇବା ସେପର୍ଯ୍ୟନ୍ତ ସମ୍ଭବ ନୁହେଁ ଯେ ପର୍ଯ୍ୟନ୍ତ ରାହୁଲ ଗାନ୍ଧୀ ଗ୍ରୀନ ସିଗନାଲ ଦେଇ ନାହାନ୍ତି। କାରଣ ସେ ରାହୁଲଙ୍କ ନିକଟତମ ବ୍ୟକ୍ତି। ସେହିପରି ରାହୁଲ ଗାନ୍ଧୀଙ୍କୁ ମଧ୍ୟ ବିରୋଧୀ ଦଳର ନେତା ଭାବରେ ଦଳର କିଛି ସାଂସଦ ସମର୍ଥନ କରୁଥିବା ଜଣାପଡ଼ିଛି। ହେଲେ ରାହୁଲ ଏହି ପଦ ପାଇଁ ନିଜକୁ ପ୍ରସ୍ତୁତ କରିନଥିବା ୨୦୧୯ସାଧାରଣ ନିର୍ବାଚନରେ ପରାଜୟ ପରେ ଦେଇ ସାରିଛନ୍ତି। ଉଭୟ ଥରୁର ଏବଂ ତିୱାରୀ ଜି -୨୩ଗୋଷ୍ଠୀର ରହିଛନ୍ତି। ଯେଉଁମାନେ ଦସ୍ତଖତ କରି ସୋନିଆ ଗାନ୍ଧୀଙ୍କୁ କହିଥିଲେ ଦଳରେ ବ୍ୟାପକ ସଂସ୍କାର ଆଣିବାକୁ ହେଲେ ଆମୁଳ ଚୂଳ ପରିବର୍ତ୍ତନ ହେବା ଦରକାର। ଏହାପରେ ସୋନିଆ ଗାନ୍ଧୀ ଯଦିଓ ଦାବି ଶୁଣିବାକୁ ରାଜି ହୋଇଛନ୍ତି। ଆଗାମୀ ଦିନରେ କଂଗ୍ରେସ ଅଧ୍ୟକ୍ଷ ପଦ ପାଇଁ ନିର୍ବାଚନ ହେବ ବୋଲି କହିଛନ୍ତି। ହେଲେ ଏହି ଜି-୨୩ ନେତା ଏବେ କୋଣଠେସା।

ସବୁ ଖେଳାଳି ମସ୍ତିରେ ମସଗୁଲ୍, ହେଲେ ଲଣ୍ଡନ ରାସ୍ତାରେ ସିରାଜ୍ କରୁଛନ୍ତି ଏମିତି କାମ….!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ଟିମ୍ ଇଣ୍ଡିଆର ଷ୍ଟାର୍ ପେସ୍ ବୋଲର ମହମ୍ମଦ ସିରାଜଙ୍କୁ ହୁଏତ ବିଶ୍ୱ ଟେଷ୍ଟ ଚାମ୍ପିୟନଶିପର ଫାଇନାଲରେ ଖେଳିବାକୁ ସୁଯୋଗ ମିଳିନାହିଁ। କିନ୍ତୁ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ ପାଇଁ ସେ ଭାରତର ଚୂଡ଼ାନ୍ତ ଏକାଦଶରେ ସ୍ଥାନ ପାଇବାକୁ ଆଶାବାଦୀ ଅଛନ୍ତି। ଟେଷ୍ଟ ଚାମ୍ପିୟନଶିପର ଫାଇନାଲ୍ ପରେ ସବୁ ଭାରତୀୟ ଖେଳାଳି ବାୟୋ-ବବଲରୁ ବାହାରି ପରିବାର ସହ ଛୁଟି ମନାଉଛନ୍ତି। କିନ୍ତୁ ସିରାଜ ଖାଲି ସମୟ ଉପଯୋଗ ନିଜକୁ ଫିଟ୍ କରାଇବାରେ ଲାଗିଛନ୍ତି। ସିରାଜ୍ ସୋଶାଲ ମିଡିଆ ଇନଷ୍ଟାଗ୍ରାମରେ ଏକ ଭିଡିଓ ଶେଆର୍ କରିଛନ୍ତି, ଯେଉଁଥିରେ ତାଙ୍କୁ ଇଂଲଣ୍ଡର ରାସ୍ତାରେ ନିର୍ମିତ ପାହାଚରେ ୱାର୍କ ଆଉଟ୍ କରୁଥିବାର ଦେଖିବାକୁ ମିଳିଛି। ଏହି ଭିଡିଓକୁ ଖୁବ୍ ପସନ୍ଦ କରାଯାଉଛି। ସିରାଜ୍ ଭିଡିଓ ଶେଆର୍ କରି ୱାର୍କଆଉଟ୍ କରୁଥିବା ଇମୋଜୀ ମଧ୍ୟ ପୋଷ୍ଟ କରିଛନ୍ତି। ଭିଡିଓରେ ପେସ୍ ବୋଲର ସିରାଜଙ୍କୁ ପାହାଚରେ ଦ୍ରୁତ ଗତିରେ ଚଢ଼ୁଛନ୍ତି ଏବଂ ଏହାସହ ତଳକୁ ଓହ୍ଲାଉଥିବାର ଦେଖିବାକୁ ମିଳିଛି। ସିରାଜ୍ ଅଷ୍ଟ୍ରେଲିଆ ଗସ୍ତରେ ଟେଷ୍ଟ ପଦାର୍ପଣ କରିଥିଲେ। ସିରାଜ୍ ନିଜର ଡେବ୍ୟୁ ସିରିଜରେ ଦମଦାର ବୋଲିଂ କରି ସମସ୍ତଙ୍କୁ ପ୍ରଭାବିତ କରିଛନ୍ତି। ଏହା ପରେ ସେ ଯେତିକି ସୁଯୋଗ ପାଇଛନ୍ତି, ସବୁଥିରେ ପ୍ରଭାବୀ ପ୍ରଦର୍ଶନ କରିଛନ୍ତି। ହେଲେ ବିଶ୍ୱ ଟେଷ୍ଟ ଚାମ୍ପିୟନଶିପର ଫାଇନାଲରେ ତାଙ୍କୁ ସୁଯୋଗ ମିଳିନଥିଲା। ଫାଇନାଲ୍ ଭାରତ ନ୍ୟୁଜିଲ୍ୟାଣ୍ଡ ନିକଟରୁ ପରାସ୍ତ ହୋଇଥିଲା। ଯଦି ସିରାଜ୍ ଭାରତର ଚୂଡ଼ାନ୍ତ ଏକାଦଶରେ ସ୍ଥାନ ପାଇଥାନ୍ତେ, ତାହେଲେ ପରିଣାମ ଅଲଗା ହୋଇଥାନ୍ତା ବୋଲି ଅନେକେ ମତ ଦେଇଛନ୍ତି। ସୂଚନାଯୋଗ୍ୟ, ଭାରତ ଓ ଇଂଲଣ୍ଡ ମଧ୍ୟରେ ଟେଷ୍ଟ ସିରିଜ୍ ଅଗଷ୍ଟରୁ ଆରମ୍ଭ ହେବ। ପ୍ରଥମ ଟେଷ୍ଟ ଅଗଷ୍ଟ ୪ ତାରିଖରୁ ନଟ୍ଟିଂହାମରେ ଖେଳାଯିବ। ଭାରତୀୟ ଟିମ୍ ଇଂଲଣ୍ଡ ବିପକ୍ଷରେ ମୋଟ ୫ଟି ଟେଷ୍ଟ ଖେଳିବ। ସିରିଜର ଶେଷ ଟେଷ୍ଟ ମ୍ୟାଚ୍ ସେପ୍ଟେମ୍ବର ୧୦ରୁ ୧୪ ତାରିଖ ଯାଏ ଖେଳାଯିବ।

ଶାସ୍ତ୍ରୀଙ୍କ ସ୍ଥାନ ନେବେ କି ଦ୍ରାବିଡ? ବଡ଼ ବୟାନ ଦେଲେ କପିଲ୍ ଦେବ…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ଟିମ ଇଣ୍ଡିଆର ହେଡ୍ କୋଚ୍ ରବି ଶାସ୍ତ୍ରୀ ସିନିୟର ଖେଳାଳିଙ୍କ ସହ ଇଂଲଣ୍ଡ ଗସ୍ତରେ ଅଛନ୍ତି। ଅନ୍ୟପକ୍ଷରେ ଭାରତୀୟ କ୍ରିକେଟରେ ବେଞ୍ଚ ଷ୍ଟ୍ରେନ୍ଥକୁ ମଜଭୁତ୍ କରିବା ଲାଗି ରାହୁଲ୍ ଦ୍ରାବିଡଙ୍କୁ କୋଚ୍ ଦାୟିତ୍ୱ ଦିଆଯାଇଛି। ଜୁଲାଇ ୧୩ ତାରିଖରୁ ଶ୍ରୀଲଙ୍କା ବିପକ୍ଷ ସୀମିତ ଓଭର ସିରିଜ୍ ପାଇଁ ଦ୍ରାବିଡଙ୍କୁ ଭାରତୀୟ ଦଳର କୋଚ୍ କରାଯାଇଛି। ଏଭଳି ସ୍ଥିତିରେ ଏବେ ସବୁଠି ଗୋଟିଏ ପ୍ରଶ୍ନ ଯେ ଶାସ୍ତ୍ରୀଙ୍କ ସ୍ଥାନରେ କ’ଣ ଦ୍ରାବିଡ୍ ଭାରତୀୟ ଟିମର ପରବର୍ତ୍ତୀ କୋଚ୍ ହେବେ କି? ଏହାକୁ ନେଇ ବଡ଼ ବୟାନ ଦେଇଛନ୍ତି ପୂର୍ବତନ କ୍ୟାପଟେନ୍ କପିଲ୍ ଦେବ। ବିଶ୍ୱକପ୍ ବିଜେତା କ୍ୟାପଟେନ୍ କପିଲ୍ ଦେବ ଶାସ୍ତ୍ରୀଙ୍କ ସମ୍ବନ୍ଧରେ କହିଛନ୍ତି, ମୋତେ ଲାଗୁନି ଯେ ଏ ବିଷୟରେ କହିବାର କିଛି ଆବଶ୍ୟକତା ଅଛି। ଆଗ ଶ୍ରୀଲଙ୍କା ସିରିଜକୁ ଶେଷ ହେଉ, ତାପରେ ଜଣାପଡ଼ିବ ଆମର ପ୍ରଦର୍ଶନ କେମିତି ରହିଲା। ଯଦି ଆପଣ ନୂଆ କୋଚଙ୍କୁ ସୁଯୋଗ ଦେବାକୁ ପ୍ରୟାସ କରୁଛନ୍ତି, ତାହେଲେ ଏଥିରେ କୌଣସି ଭୁଲ୍ ନାହିଁ। ଯଦି ରବି ଶାସ୍ତ୍ରୀ ଭଲ କାମ କରିବା ଜାରି ରଖନ୍ତି, ତାହେଲେ ତାଙ୍କୁ ହଟାଇବାର କୌଣସି ଆବଶ୍ୟକ ନାହିଁ। ସମୟ ସବୁ କହିବ। ମୋ ମତରେ ଏଭଳି ଆଲୋଚନା ଉଭୟ କୋଚ୍ ଓ ଖେଳାଳିଙ୍କ ଉପରେ ଅଯଥା ଚାପ ପକାଇବ। କପିଲ୍ ଦେବ ଆହୁରି କହିଛନ୍ତି, ଭାରତ ପାଖରେ ଏକ ବଡ଼ ବେଞ୍ଚ୍ ଷ୍ଟ୍ରେନ୍ଥ ରହିଛନ୍ତି। ଯଦି ଖେଳାଳିମାନେ ସୁଯୋଗ ପାଆନ୍ତି ଏବଂ ଭାରତ ଦୁଇଟି ଟିମ୍ ଏକକାଳୀନ ଖେଳାଇ ଇଂଲଣ୍ଡ ଓ ଶ୍ରୀଲଙ୍କାରେ ବିଜୟ ପାଇଁ ଦାବି କରେ, ତାହେଲେ ଏହାଠାରୁ ବଡ଼ ଆଉ କିଛି ହୋଇନପାରେ। ଯଦି ଯୁବ ଖେଳାଳିଙ୍କୁ ଅଧିକ ସୁଯୋଗ ମିଳୁଛି, ତାହେଲେ କିଛି ଖରାପ ନୁହେଁ। କିନ୍ତୁ ଏକା ସାଙ୍ଗରେ ଦୁଇ ଟିମ ଉପରେ ଚାପ ପକାଯିବା ଉଚିତ୍ ହେବ କି ନାହିଁ, ତାହା ଟିମ୍ ମ୍ୟାନେଜମେଣ୍ଟ ନିଷ୍ପତ୍ତି ନେବ।ସୂଚନାଯୋଗ୍ୟ, ରବି ଶାସ୍ତ୍ରୀଙ୍କ କୋଚିଂରେ ଟିମ୍ ଇଣ୍ଡିଆର ପ୍ରଦର୍ଶନ ବହୁତ ଭଲ ରହିଆସିଛି। ଚଳିତ ବର୍ଷ ଟି-୨୦ ବିଶ୍ୱକପ୍ ପରେ ତାଙ୍କ କାର୍ଯ୍ୟକାଳ ଶେଷ ହୋଇଯିବ। ଶାସ୍ତ୍ରୀଙ୍କ କୋଚିଂରେ ଟିମ୍ ଇଣ୍ଡିଆ ଦୁଇଥର ଅଷ୍ଟ୍ରେଲିଆକୁ ତା’ର ନିଜ ମାଟିରେ ହରାଇବାରେ ସଫଳ ହୋଇଛି। ଅନ୍ୟ ବିଦେଶ ଗସ୍ତରେ ମଧ୍ୟ ଭାରତର ପ୍ରଦର୍ଶନରେ ଅନେକ ସୁଧାର ଆସିଛି। କିନ୍ତୁ ଶାସ୍ତ୍ରୀଙ୍କ କୋଚିଂରେ ଭାରତ ଥରେ ବି ଆଇସିସି ଟ୍ରଫି ଜିତିପାରିନାହିଁ। ଅନ୍ୟପକ୍ଷରେ ଦ୍ରାବିଡଙ୍କ କୋଚିଂରେ ଭାରତ ୨୦୧୮ରେ ଅଣ୍ଡର-୧୯ ବିଶ୍ୱକପ୍ ଜିତିଥିଲା।

କ୍ରିକେଟ୍ ଖେଳିବେ ଅନୁଷ୍କା …..!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ବ୍ୟାଟ୍ ଧରି ପଡିଆକୁ ଓହ୍ଲାଇବେ ମିସେସ୍ କୋହଲି। ଭାରତୀୟ କ୍ରିକେଟ୍ ଅଧିନାୟକ ବିରାଟ କୋହଳିଙ୍କ ଭଳି ସେ ମଧ୍ୟ ମାରିବେ ଚଉକା ଛକା । ବିରୋଧୀ ଦଳ ବଲ୍‌ର କରିବେ ସାମ୍ନା। ପଡିଆରେ କରିବେ ରନ୍‌ର ବର୍ଷା। ସେହିପରି ବଲିଂ କରି ଅନ୍ୟ ଦଳକୁ କରିବେ କ୍ଲିନ୍ ବୋଲ୍ଡ। ଅଭିନେତ୍ରୀରୁ କ୍ରିକେଟର ପାଲଟିବେ ଅନୁଷ୍କା ଶର୍ମା। ଭାରତୀୟ ମହିଳା କ୍ରିକେଟର ଝୁଲନ୍ ଗୋସ୍ୱାମୀଙ୍କ ବାୟୋପିକ୍‌ରେ ନଜର ଆସିବେ ଅନୁଷ୍କା। ଦୀର୍ଘ ଦିନ ପରେ ସେ ଏହି ଫିଲ୍ମରେ ବଡ ପରଦାକୁ ବ୍ୟାକ୍ କରିବେ। ଏହି ଫିଲ୍ମରେ ତାଙ୍କୁ ମୁଖ୍ୟ ଭୂମିକାରେ ଦେଖିବାକୁ ମିଳିବ। ଏଥିପାଇଁ ପ୍ରସ୍ତୁତି ଆରମ୍ଭ କରିଦେଇଛନ୍ତି ଅନୁଷ୍କା। ହାତରେ ବଲ୍ ଏବଂ ବ୍ୟାଟ୍ ଧରି ପଡିଆରେ ଏବେ ଠାରୁ ହିଁ ଅଭ୍ୟାସ କରୁଛନ୍ତି ମିସେସ୍ କୋହଲି। ଝୁଲନ୍ ଗୋସ୍ୱାମୀଙ୍କ ଜର୍ସି ପିନ୍ଧି ଅନୁଷ୍କାଙ୍କ ଏକ ଫଟୋ ସାମ୍ନାକୁ ଆସିଛି। ଏହି ଫଟୋରେ ଝୁଲନ୍ ଏବଂ ଅନୁଷ୍କା ଉଭୟଙ୍କୁ ଦେଖିବାକୁ ମିଳିଛି। ମିଡିଆ ରିପୋର୍ଟ ମୁତାବକ କୁହାଯାଉଛି ଯେ, ଏହି ବାୟୋପିକ ଫିଲ୍ମର ସୁଟିଂ ଚଳିତ ବର୍ଷ ଡିସେମ୍ବରରୁ ଆରମ୍ଭ ହେବ। ତେବେ ଏନେଇ ବର୍ତ୍ତମାନ ସୁଦ୍ଧା ଔପଚାରିକ ରୂପେ କୌଣସି ଘୋଷଣା କରାଯାଇନାହିଁ।

ଝୁଲନ୍ ଗୋସ୍ୱାମୀ ହେଉଛନ୍ତି ଭାରତୀୟ ମହିଳା କ୍ରିକେଟ ଟିମ୍‌ର ଜଣେ ଦକ୍ଷ ବୋଲର୍। ସେ ‘ଚକ୍‌ଦହା’ ଏକ୍ସପ୍ରେସ୍ ରୂପେ ବେଶ୍ ପରିଚିତ। ଝୁଲନ୍ ନିଜ ନାଁରେ ଅନେକ ରେକର୍ଡ କରିଛନ୍ତି। ଅନ୍ତର୍ଜାତୀୟ କ୍ରିକେଟରେ ନିଜର ୧୯ ବର୍ଷ ପୂରଣ କରିସାରିଥିବା ଝୁଲନ୍ ନିଜ କ୍ୟାରିଅର୍‌ରେ ୩୦୦ରୁ ଅଧିକ ୱିକେଟ ହାତେଇ ସାରିଛନ୍ତି। ଝୁଲନ୍ ଇଣ୍ଟରନ୍ୟାସନାଲ କ୍ରିକେଟରେ ୩୩୩, ୧୦୮ଟି ୱାନ୍ ଡେ’ ମ୍ୟାଚ୍‌ରେ ୨୩୬ଟି ୱିକେଟ ହାସଲ କରିଥିବା ପ୍ରଥମ ମହିଳା କ୍ରିକେଟ ଭାବେ ଇତିହାସ ରଚି ସାରିଛନ୍ତି।

ବିଗ୍ ବି’ଙ୍କ ବଙ୍ଗଳାରେ ବୁଲିବ ବୁଲଡୋଜର…..!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ବିଗ୍ ବିଙ୍କ ଘରେ ବୁଲିବ ବୁଲଡୋଜର । ବିଏମ୍‌ସି ଭାଙ୍ଗିବ ଅମିତାଭ ବଚ୍ଚନଙ୍କ ଘର । ଆଉ ଏହି ବଙ୍ଗଳା ହେଉଛି ବଲିଉଡର ମହାନାୟକ ଅମିତାଭଙ୍କ ମୁମ୍ବାଇର ପ୍ରଥମ ଘର ‘ପ୍ରତିକ୍ଷା’ । ମିଳିଥିଲା ସୂଚନା ଅନୁସାରେ ଅମିତାଭଙ୍କ ଜୁହୁ ସ୍ଥିତ ବଙ୍ଗଳାର ୮ରୁ ୯ ଫୁଟ୍ ଯାଏ ଭାଙ୍ଗିପାରେ ବିଏମ୍‌ସି । ଅମିତାଭଙ୍କ ଜୁହୁ ସ୍ଥିତ ବଙ୍ଗଳାର କାନ୍ଥ ଭାଙ୍ଗିବା ପାଇଁ ପ୍ରସ୍ତୁତି ଚଳାଇଛି ମୁମ୍ବାଇ ମହାନଗରପାଳିକା । ଏହି ପାଚେରୀ ଭାଙ୍ଗିବା ପାଇଁ ୨୦୧୭ରେ ବିଗ୍ ବି’ଙ୍କୁ ନୋଟିସ କରାଯାଇଥିଲା । ତେବେ ୪ ବର୍ଷ ବିତି ଯାଇଥିଲେ ସୁଦ୍ଧା ଏହି ନୋଟିସର ଜବାବ ଏଯାଏଁ ବିଗ୍ ବି’ ପକ୍ଷରୁ ମିଳିନାହିଁ । ଏନେଇ ଏବେ ବିଏମ୍‌ସି ଆକ୍ସନ ମୋଡକୁ ଆସିଛି । ସେପଟେ ଏବେ ଏହି ପ୍ରସଙ୍ଗକୁ ନେଇ ଓ୍ବାର୍ଡ ନମ୍ବର  ୯୦ର କର୍ପୋରେଟର ତୁଲିପ ମିରାଣ୍ଡା ପ୍ରଶ୍ନ ଉଠାଇଛନ୍ତି। ସେ କହିଛନ୍ତି, ‘ବିଏମସି ୨୦୧୭ରେ ଅମିତାଭ ବଚ୍ଚନଙ୍କୁ ରାସ୍ତା ପ୍ରଶସ୍ତିକରଣ ନେଇ ନୋଟିସ୍‌ ଦେଇଥିଲା। କିନ୍ତୁ କୌଣସି ପ୍ରତିକ୍ରିୟ ମିଳିନଥିଲା। ଯଦି ନୋଟିସ୍‌ ଜାରି ହୋଇଥିଲା ତେବେ ବିଏମସି ତାଙ୍କ ପାଖରୁ ଜାଗା କାହିଁକି ନେଲା ନାହିଁ ? ବିଏମସି ନୋଟିସ୍‌ ଦେବା ପରେ ପୁଣି ଥରେ ଅପିଲ୍‌ କରିବାର ଆବଶ୍ୟକତା ନାହିଁ।’ ଏହା ସହ ବିଏମସି ଜାଣିଶୁଣି ଅମିତାଭଙ୍କ ବିରୋଧରେ କାର୍ଯ୍ୟାନୁଷ୍ଠାନ କରିବାକୁ ବିଳମ୍ବ କରୁଛି ବୋଲି ସେ ଅଭିଯୋଗ କରିଛନ୍ତି। ମିଡିଆ ରିପୋର୍ଟ ଅନୁସାରେ ୨୦୧୭​‌​‌ରେ ବିଏମସି ନୋଟିସ୍‌ କରିବା ସହ କିଛି ଲୋକଙ୍କ ପାଖରୁ ଜମି ଅଧିଗ୍ରହଣ ମଧ୍ୟ କରିଥିଲା। ଏହା ବ୍ୟତୀତ ୨୦୧୯ରେ ‘ପ୍ରତିକ୍ଷା’ର ବିଲକୁଲ୍‌ ପାଖାପାଖି ରହୁଥିବା ଅଭିନେତାଙ୍କ ପଡ଼ୋଶୀ କେ.ଭି. ସତ୍ୟମୂର୍ତ୍ତିଙ୍କ ବଙ୍ଗଳା ଭଙ୍ଗାଯାଇଥିଲା। କିନ୍ତୁ ସୁପରଷ୍ଟାରଙ୍କ ବଙ୍ଗଳା ଉପରେ କୌଣସି କାର୍ଯ୍ୟାନୁଷ୍ଠାନ ହୋଇନଥିଲା। କର୍ପୋରେଟର ଏନେଇ ପ୍ରଶ୍ନ ଉଠାଇବା ପରେ ବିଏମସି ଜବାବ ରଖିଛି। ବିଏମସି ପକ୍ଷରୁ ମିଳିଥିବା ସୂଚନା ଅନୁସାରେ ଖୁବଶୀଘ୍ର ‘ପ୍ରତିକ୍ଷା’ ପ୍ଲଟ୍‌ ଅଧିଗ୍ରହଣ ହେବ। ଏନେଇ ଜମି ମାପ କରିବାକୁ ସିଟି ସର୍ଭେ କାର୍ଯ୍ୟାଳୟକୁ କୁହାଯାଇଛି ।

୫ ଜୁଲାଇ, ସୋମବାର – ଆଜିର ରାଶିଫଳ

ମେଷ: ସ୍ୱାସ୍ଥ୍ୟ ଭଲ ରହିବ। କର୍ମ କ୍ଷେତ୍ରରେ ଉଚ୍ଚାଧିକାରୀ ଓ ସହକର୍ମୀଙ୍କ ସହଯୋଗ ମିଳିବ। ପାରିବାରିକ ସମସ୍ୟାର ସମାଧାନ ହେବ।

ବୃଷ: ପ୍ରତ୍ୟେକ କ୍ଷେତ୍ରରେ ସଫଳତା ପାଇବେ। ବହୁ ଦିନର ଆଶା ପୂରଣ ହେବ। ବ୍ୟବସାୟ କ୍ଷେତ୍ରରେ ଥିବା ସମସ୍ୟା ଦୂର ହୋଇ ଆୟ ବୃଦ୍ଧି ହେବ।

ମିଥୁନ: ଅଳ୍ପ ପରିଶ୍ରମରେ ଅଧିକ ଅର୍ଥ ଉପାର୍ଜନ କରିବେ। ସାମାଜିକ ପ୍ରତିଷ୍ଠା ଏବଂ ମାନସମ୍ମାନ ବୃଦ୍ଧି ହେବ। ପରିବାରରେ ଶାନ୍ତିର ବାତାବରଣ ରହିବ।

କର୍କଟ: ପାରିବାରିକ ସମସ୍ୟାର ସମାଧାନ ହୋଇଯିବ। ପ୍ରେମ କ୍ଷେତ୍ରରେ ସଫଳ ହେବେ। ସୁସ୍ୱାଦୁ ଖାଦ୍ୟ ଖାଇବେ।

ସିଂହ: ଦାମ୍ପତ୍ୟ ଜୀବନ ଭଲରେ କଟିବ। ରାଜନୀତି କରୁଥିବା ଲୋକଙ୍କ ପାଇଁ ଦିନଟି ବେଶ୍ ଭଲ ରହିବ। ବ୍ୟବସାୟରେ ବାକି ପଡ଼ିଥିବା ଅର୍ଥ ମିଳିବ।

କନ୍ୟା: କର୍ମକ୍ଷେତ୍ରରେ ଉତ୍ତମ କାର୍ଯ୍ୟ କରି ପ୍ରଶଂସା ପାଇବେ। ପରିଶ୍ରମ ଅନୁସାରେ ଆଶାଜନକ ପାରିଶ୍ରମିକ ମିଳିବ। ରାସ୍ତାରେ ଯା’ଆସ କଲା ବେଳେ ସାବଧାନତା ଅବଲମ୍ବନ କରନ୍ତୁ।

ତୁଳା: ସବୁ କାର୍ଯ୍ୟରେ ସଫଳ ହେବେ। ବ୍ୟବସାୟରେ ଆଶାଜନକ ଲାଭ ମିଳିବ। ଅଫିସ୍‌ରେ ଉଚ୍ଚ ଅଧିକାରୀଙ୍କ ପ୍ରିୟଭାଜନ ହେବେ।

ବିଛା: ସୁସ୍ଥ ରହିବେ। ଆର୍ଥିକ କ୍ଷେତ୍ରରେ ଉନ୍ନତି ହେବ। ଅଟକିଥିବା କାର୍ଯ୍ୟ ସଫଳତା ପୂର୍ବକ ସମ୍ପନ୍ନ ହେବ।

ଧନୁ: ପୈତୃକ ସମ୍ପତ୍ତିକୁ ନେଇ ପରିବାରରେ ଲାଗି ରହିଥିବା ଅଶାନ୍ତିର ସମାଧାନ ହେବ। ଦୂର ସ୍ଥାନକୁ ଯାତ୍ରା କରିବାକୁ ପଡ଼ିପାରେ।

ମକର: ସ୍ୱାସ୍ଥ୍ୟରେ ଉନ୍ନତି ଦେଖାଦେବ। ବ୍ୟବସାୟ ବଢ଼ାଇବାକୁ ନୂଆ ଯୋଜନା ପ୍ରସ୍ତୁତ କରିବେ। ସହକର୍ମୀଙ୍କ ସାହାଯ୍ୟ ପାଇ ଅସମ୍ପୂର୍ଣ୍ଣ କାର୍ଯ୍ୟକୁ ସମ୍ପୂର୍ଣ୍ଣ କରିବେ।

କୁମ୍ଭ: ଦିନଟି ଶୁଭଫଳ ପ୍ରଦାନ କରିବ। ପୂର୍ବ ଅପେକ୍ଷା ଆୟ ବଢ଼ିବ। ସମସ୍ତଙ୍କ ସହିତ ସୁସମ୍ପର୍କ ବଜାୟ ରହିବ।

ମୀନ: କାର୍ଯ୍ୟ ବ୍ୟସ୍ତ ରହିବେ। କୌଣସି କାରଣରୁ ମନ ଭାରାକ୍ରାନ୍ତ ହୋଇପାରେ। ବ୍ୟବସାୟରେ କମ୍‌ ଲାଭ ମିଳିବ।

ରାଜ୍ୟ ସରକାର ଙ୍କ ମେଧା ଶକ୍ତି ର ବୃହତ ଅସଫଳତା ; ଆନ୍ଧ୍ର ସରକାର ସ୍ଥାପନ କଲେ ଭିତ୍ତି ପ୍ରସ୍ତର : ଶ୍ରୀ ଭୃଗୁବକ୍ସି ପାତ୍ର ।

!!! ରାୟଗଡ଼ା ଜିଲ୍ଲା ଗୁଣପୁର ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଯୋଷୀ ଙ୍କ ରିପୋର୍ଟ !!!

ଏଥର ସମ୍ଭାଳ (ଗୁଣପୁର) – ବଂଶଧାରା ଜଳ ବିବାଦ ନେଇ ଟ୍ରିବ୍ୟୁନାଲ ରାୟ ପ୍ରକାଶ ପରେ ଆଜି ରାଜ୍ୟ ଭାରତୀୟ ଜନତା ପାର୍ଟି ପକ୍ଷରୁ ଦଳର ରାଜ୍ୟ ଉପ ସଭାପତି ଶ୍ରୀ ଭୃଗୁବକ୍ସି ପାତ୍ର ଙ୍କ ନେତୃତ୍ୱ ରେ ୧୦ ଜଣିଆ ପ୍ରତିନିଧି ଦଳ ଓଡିଶା ର ଗଜପତି ଜିଲ୍ଲା ଅନ୍ତର୍ଗତ ସାହାରା ଠାରୁ ଆରମ୍ଭ କରି ପାଣି ଡ଼ଙ୍ଗର ପର୍ଯ୍ୟନ୍ତ ନଦୀ ତଟ ଅଞ୍ଚଳ ପରିଦର୍ଶନ କରି ସ୍ଥିତି ଅନୁଧ୍ୟାନ କରିଥିଲେ ।

ବଂଶଧାରା ନଦୀ ଜଳ ବିବାଦ କୁ ନେଇ ଆନ୍ଧ୍ର ସପକ୍ଷରେ ଏକପକ୍ଷଭାବେ ଟ୍ରିବ୍ୟୁନାଲ ରାୟଦେଇ ଥିବା କହି ରାଜ୍ୟ ଭାରତୀୟ ଜନତା ପାର୍ଟି ଓ ରାୟଗଡ଼ା ଜିଲ୍ଲା ଗୁଣପୁର ଜନସାଧାରଣ ଓ ଗଜପତି ଜିଲ୍ଲା ଜନସାଧାରଣ ବିରୋଧ କରିଥିବା ଦେଖିବାକୁ ମିଳିଛି । ଓଡିଶା ସରକାର ୨୦୦୫ ମସିହା ରେ ବଂଶଧାରା କୁ ନେଇ ଉପର ମୁଣ୍ଡ ରେ ଯେଉଁ ପାଣି ଡଙ୍ଗର ପ୍ରକଳ୍ପ ଯୋଜନା କରିଥିଲେ ତାହା ଦୀର୍ଘ ବର୍ଷ ହେବ କାର୍ଯ୍ୟକାରୀ ନ ହେବା ଫଳ ରେ ଆଜି ଆନ୍ଧ୍ର ଏହାର ଲାଭ ଉଠାଇ ଥିବା ଗଜପତି ବିଧାୟକ ଶ୍ରୀ ନାରାୟଣ ରାଓ ମତବ୍ୟକ୍ତ କରିଥିଲେ ।

ଏହି ପ୍ରତିନିଧି ଦଳ ପରିଦର୍ଶନ ରେ ଯିବା ସମୟ ରେ ନେରେଡ଼ି ଠାରେ ଆନ୍ଧ୍ର ର ପ୍ରକଳ୍ପ ନିମନ୍ତେ ଭିତ୍ତି ପ୍ରସ୍ତର ସ୍ଥାପନ କାର୍ଯ୍ୟକ୍ରମ ଚାଲିଥିବା ଏବଂ ସେଠାରେ ଆନ୍ଧ୍ର ଉପ ମୁଖ୍ୟମନ୍ତ୍ରୀ ଧାର୍ମନା କ୍ରୀଷ୍ଣା ଦାସ , ଜଳ ସମ୍ପଦ ମନ୍ତ୍ରୀ ଅନିଲ କୁମାର ଯାଦବ ପ୍ରମୁଖ ଙ୍କ ଉପସ୍ଥିତି ଦେଖି ସରକାର ଙ୍କୁ ଦୃଢ ନିନ୍ଦା କରିବା ସହ ଏହା ଓଡିଶା ରାଜ୍ୟ ସରକାର ଙ୍କ ମେଧା ଶକ୍ତିର ଏକ ବୃହତ ଅସଫଳତା ବୋଲି ସାମ୍ବାଦିକ ସମ୍ମିଳନୀ ରେ ରାଜ୍ୟ ଭାଜପା ଉପ ସଭାପତି ଶ୍ରୀ ଭୃଗୁ ପାତ୍ର ମତବ୍ୟକ୍ତ କରି ସରକାର ଙ୍କ ଉପରେ ବର୍ଷିଥିଲେ । ଟ୍ରିବ୍ୟୁନାଲ ର ରାୟ ଆସିବା ର ଦୀର୍ଘ ୧୨ ଦିନ ବିତି ଯାଇଥିଲେ ସୁଦ୍ଧା ରାଜ୍ୟ ସରକାର ଏହି ଦିଗରେ କୌଣସି ପ୍ରତିକ୍ରିୟାି ପ୍ରକାଶ ନକରିବା ଏବଂ ଚୁପ୍ ରହି ଟ୍ରିବ୍ୟୁନାଲ ର ରାୟ କୁ ମାନିନେବା ରାଜ୍ୟ ସରକାର ଙ୍କ ଅପାରଗତା କୁ ଦୃଷ୍ଟି ଆକର୍ଷଣ କରୁଛି ବୋଲି ପୂର୍ବତନ ସାଂସଦ ଶ୍ରୀ ଜୟରାମ ପାଙ୍ଗି ଉକ୍ତ ସାମ୍ବାଦିକ ସମ୍ମିଳନୀ ରେ କହିଛନ୍ତି । ଯଥା ଶୀଘ୍ର ଏକ ଇଞ୍ଜିନିୟରିଂ ଟିମ ଗଠନ କରି ପାଣି ଡ଼ଙ୍ଗର ପ୍ରକଳ୍ପ କାର୍ଯ୍ୟକୁ ପୁରଣ କରିବା ଏବଂ ଟ୍ରିବ୍ୟୁନାଲ ଦେଇଥିବା ରାୟ ବିରୋଧ ରେ ସୁପ୍ରିମକୋର୍ଟ ର ଆଶ୍ରୟ ନେଇ ଓଡିଶା ସପକ୍ଷରେ ତଥ୍ୟ ଉପସ୍ଥାପନା କରିବାକୁ ରାଜ୍ୟ ଭାଜପା ପକ୍ଷରୁ ଦାବୀ କରଯାଇଛି । ଆୟୋଜିତ ସାମ୍ବାଦିକ ସମ୍ମିଳନୀରେ ରେ ରାୟଗଡ଼ା ଜିଲ୍ଲା ସଭାପତି ଶ୍ରୀ ଶିବ ପଟନାୟକ , ଉପ ସଭାପତି ଶ୍ରୀ ୱାଇ ଗଣପତି ରାଓ , ସାଧାରଣ ସମ୍ପାଦକ ଶ୍ରୀ କିଶୋର ପଣ୍ଡା , ସମ୍ପାଦକ ଶ୍ରୀ ରବି ଶଙ୍କର ଗମାଙ୍ଗ , ଜିଲ୍ଲା କୃଷକ ମୋର୍ଚ୍ଚା ସଭାପତି ଶ୍ରୀ ପ୍ରେମ ପଣ୍ଡା , ଗୁଣପୁର ନଗର ସଭାପତି ଶ୍ରୀ ଶ୍ରୀନିବାସ ସ୍ୱାଇଁ , ଜିଲ୍ଲା କମିଟି କୋଷାଧକ୍ଷ ଶ୍ରୀ ପେଦିନା ନାଗାରାଜୁ ଙ୍କ ସମେତ ସମସ୍ତ କର୍ମକର୍ତ୍ତା ଉପସ୍ଥିତ ରହିଥିଲେ ।

ଓଡ଼ିଶା ଫେରିବ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ‘ଡାକୋଟା’…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ଓଡ଼ିଶାକୁ ଶୀଘ୍ର ଆସିବ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ‘ଡାକୋଟା’ ବିମାନ। ‘ଡାକୋଟା’ ଫେରାଇ ଆଣିବା ପାଇଁ ରାଜ୍ୟ ସରକାର ସମସ୍ତ ପ୍ରସ୍ତୁତି ଆରମ୍ଭ କରିଛନ୍ତି। ଏନେଇ ସୂଚନା ଦେଇଛନ୍ତି ପରିବହନ ମନ୍ତ୍ରୀ ପଦ୍ମନାଭ ବେହେରା। ସେ କହିଛନ୍ତି, ବିଜୁବାବୁଙ୍କ ‘ଡାକୋଟା’ ଆଣିବା ପାଇଁ ଟେଣ୍ଡର ପ୍ରକ୍ରିୟା ଆରମ୍ଭ ହୋଇସାରିଲାଣି। ଟେଣ୍ଡର ପାଇଁ ପିଡବ୍ଲୁଡିକୁ ଦାୟିତ୍ୱ ଦିଆଯାଇଛି। ତେବେ ଡାକୋଟା ବିମାନ ଆସିଲେ ଏହାକୁ ଏୟାରପୋର୍ଟ ନିକଟରେ ଥିବା ବିଜୁବାବୁଙ୍କ ପ୍ରତିମୂର୍ତ୍ତି ନିକଟରେ ରଖାଯିବା ପାଇଁ ଭାରତ ସରକାରଙ୍କ ଅନୁମତି ମଗାଯାଇଛି। ଡାକୋଟା ଆସିବା ପରେ ଏହାକୁ ବିଜୁବାବୁଙ୍କ ସ୍ମୃତି ଉଦ୍ଦେଶ୍ୟରେ ରଖାଯିବ ବୋଲି ମନ୍ତ୍ରୀ କହିଛନ୍ତି। ବିଜୁବାବୁଙ୍କ ‘ଡାକୋଟା’ ଏବେ କୋଲକତା ଅନ୍ତର୍ଜାତୀୟ ବିମାନବନ୍ଦରରେ ଜରାଜୀର୍ଣ୍ଣ ଅବସ୍ଥାରେ ପ଼ଡି ରହିଛି। ୧୯୪୭ ଅକ୍ଟୋବରରେ ଜାମ୍ମୁ ଓ କାଶ୍ମୀରରେ ଲାଗିରହିଥିଲା ଅସ୍ଥିରତା। ସେହି ସମୟରେ ମହାରାଜା ହରି ସିଂଙ୍କ ରାଜୁତିକୁ ଚାଲେଞ୍ଜ କରି ୨ ମାସ ତଳେ ଜନ୍ମ ନେଇଥିବା ପାକିସ୍ତାନ ଜୋରଦାର ଚେଷ୍ଟା ଚଳାଇଥାଏ ରାଜ୍ୟକୁ ନିଜ ଅକ୍ତି ଆରକୁ ନେବା ପାଇଁ।  ପାକିସ୍ତାନୀ ସେନା ସହଯୋଗରେ ଆତଙ୍କବାଦୀ ଆଗରେ ଦୁର୍ବଳ ହୋଇପଡୁଥାନ୍ତି ମହାରାଜା ହରି ସିଂଙ୍କ ସୈନ୍ୟବାହିନୀ। ଧୀରେ ଧୀରେ ପରିସ୍ଥିତି ଏତେ ଅଣାୟତ୍ତ ହୋଇପଡ଼ିଲା ଯେ, ରାଜଧାନୀ ଶ୍ରୀନଗର କବ୍‌ଜା କରିବାକୁ ପାକିସ୍ତାନ ସେନାକୁ ବାକିଥିଲା, ଆଉ ମାତ୍ର ୩୦ କିଲୋମିଟର। ଶେଷରେ ଭାରତ ସରକାରଙ୍କ ସାହାଯ୍ୟ ଲୋଡ଼ିଲେ ହରି ସିଂ। ତତ୍କାଳୀନ ପ୍ରଧାନମନ୍ତ୍ରୀ ଜବାହରଲାଲ ନେହରୁଙ୍କୁ ଅନୁରୋଧ କଲେ ହରି ସିଂ। ସେନା ପଠାଇ ଶ୍ରୀନଗର ରକ୍ଷା କରିବାକୁ ଅନୁରୋଧ କଲେ। ଏହି ଭଳି ଘଡ଼ିସନ୍ଧି ମୁହୂର୍ତ୍ତରେ ପ୍ରବାଦପୁରୁଷ ତଥା ଦୁର୍ଦ୍ଧର୍ଷ ପାଇଲଟ୍ ବିଜୁ ପଟ୍ଟନାୟକଙ୍କ ଭୂମିକା ଥିଲା ଅତୁଳନୀୟ। ଭାରତୀୟ ସେନାଙ୍କୁ ଏୟାରଲିଫ୍ଟ କରି ପାକିସ୍ତାନୀ ଶତ୍ରୁ ବଳୟ ଭିତରେ ପଶି ଶ୍ରୀନଗରରେ ପହଞ୍ଚାଇବାର ଗୁରୁଦାୟିତ୍ୱ ନେଲେ ବିଜୁ ବାବୁ। ଅକ୍ଟୋବର ୨୭, ୧୯୪୭ରେ ହେଲା ଏହି ଦୁଃସାହସିକ ଅଭିଯାନ। ସୂର୍ଯ୍ୟ ଉଇଁବା ଆଗରୁ ଡିସି-ଥ୍ରୀ ଡାକୋଟା ବିମାନ ଧରି ଦିଲ୍ଲୀ ପାଲାମ ଏୟାରପୋର୍ଟରୁ ଶ୍ରୀନଗର ଅଭିମୁଖେ ବାହାରିଲେ ବିଜୁ ବାବୁ। ପ୍ରତିପକ୍ଷର ରାର୍ଡାରକୁ ଚକ୍‌ମା ଦେଇ ଓ ଗୁଳିଗୋଳାକୁ ଖାତିର ନ କରି ସଫଳତାର ସହ ଶିଖ୍ ରେଜିମେଣ୍ଟର ଯବାନଙ୍କୁ ଭୋରରୁ ଭୋରରୁ ପହଞ୍ଚାଇ ଦେଇଥିଲେ ଶ୍ରୀନଗରରେ ।ଏହାପରେ ଭାରତୀୟ ସେନାର ପଲ୍ଲା ଭାରି ହୋଇଥିଲା। ଆଉ ଏହି ଅଭିଯାନ ବାଟ କଢ଼ାଇଥିଲା ଭାରତରେ ଜାମ୍ମୁ-କାଶ୍ମୀର ମିଶ୍ରଣ ପାଇଁ।

ଅହଂକାରୀ ଭାଇରସ ବିରୋଧରେ ଟିକା ନାହିଁ କହି ରାହୁଲ ଗାନ୍ଧୀଙ୍କୁ ବାଣ ମାରିଲେ ସ୍ୱାସ୍ଥ୍ୟମନ୍ତ୍ରୀ…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- କଂଗ୍ରେସ ନେତା ରାହୁଲ ଗାନ୍ଧୀ ଟିକାର ଅଭାବକୁ ନେଇ ପ୍ରଶ୍ନ ଉଠାଉଛନ୍ତି। ଏହାକୁ ନେଇ ବର୍ଷିଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଡାକ୍ତର ହର୍ଷବର୍ଦ୍ଧନ। ଶୁକ୍ରବାର ରାହୁଲ ଗାନ୍ଧୀ କହିଛନ୍ତି ଜୁଲାଇ ମାସ ଆରମ୍ଭ ହୋଇଯାଇଛି। ହେଲେ ଟିକାକୁ ନେଇ କୌଣସି ଖୋଜ ଖବର ନାହିଁ। ଏହାର ଜବାବ ଦେବାକୁ ଯାଇ ସ୍ୱାସ୍ଥ୍ୟ ମନ୍ତ୍ରୀ କହିଛନ୍ତି ରାହୁଲ୍ ଗାନ୍ଧୀଙ୍କର ଅସୁବିଧା କେଉଁଠି ରହୁଛି? ସେ କିଛି ପଢ଼ୁଛନ୍ତି କି ନାହିଁ? ନା ସେ ବୁଝି ପାରୁନାହାନ୍ତି ? ହର୍ଷବର୍ଦ୍ଧନ ଆହୁରି କହିଛନ୍ତି, ଅଂହକାରୀ ଏବଂ ଅଣଦେଖା କରୁଥିବା ଭାଇରସ ବିରୋଧରେ କୌଣସି ଟିକା ନାହିଁ। ଏଥିସହ ରାହୁଲ ଗାନ୍ଧୀଙ୍କ ନେତୃତ୍ୱକୁ ନେଇ ମଧ୍ୟ ସେ ପ୍ରଶ୍ନ ଉଠାଇଛନ୍ତି। କଂଗ୍ରେସ ନିଜ ନେତୃତ୍ୱରେ ପରିବର୍ତ୍ତନ କରିବାର ଆବଶ୍ୟକ ରହିଛି ବୋଲି ସ୍ୱାସ୍ଥ୍ୟମନ୍ତ୍ରୀ କହିଛନ୍ତି।ଏହାପୂର୍ବରୁ ଗୁରୁବାର ହର୍ଷବର୍ଦ୍ଧନ ଟିକାକରଣ ନୀତିକୁ ନେଇ ବିଭିନ୍ନ ପ୍ରଶ୍ନର ଉତ୍ତର ଦେଇଥିଲେ। ସ୍ୱାସ୍ଥ୍ୟମନ୍ତ୍ରୀ ଲେଖିଛନ୍ତି, ‘ମୁଁ ନିଜେ ବିଶ୍ୱର ସର୍ବବୃହତ ଟିକାକରଣ ଅଭିଯାନ ସଂପର୍କରେ ଅନେକ ନେତାଙ୍କ ଦାୟିତ୍ୱହୀନ ମନ୍ତବ୍ୟକୁ ଦେଖିଛି। କିଛି ଅଳ୍ପ ତଥ୍ୟ ରଖୁଛି, ଏହି ତଥ୍ୟରୁ ଲୋକମାନେ ଏହି ଦାୟିତ୍ୱହୀନ ନେତାଙ୍କ ମନ୍ତବ୍ୟର ଉଦ୍ଦେଶ୍ୟ ବିଷୟରେ ଜାଣିପାରିବେ। ଜୁନରେ କେନ୍ଦ୍ର ସରକାର ୭୫ ପ୍ରତିଶତ ମାଗଣା ଟିକାକରଣର ଦାୟିତ୍ୱ ନେବା ପରେ ୧୧.୫୦ କୋଟି ଡୋଜ ଯୋଗାଇ ଦେଇଛନ୍ତି। ସୂଚନାଯୋଗ୍ୟ, ରାହୁଲ ଗାନ୍ଧୀ ସରକାରଙ୍କ ଟିକାକରଣ ନୀତିକୁ ଅନେକ ସମୟରେ ସମାଲୋଚନା କରୁଛନ୍ତି। ନିକଟରେ କରୋନା ଟିକା ଅଭାବକୁ ଦୂର କରିବା ପାଇଁ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ମୋଦିଙ୍କୁ ନିବେଦନ କରିଛନ୍ତି। ଏହାର ଜବାବରେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ କହିଛନ୍ତି ଯେ ରାହୁଲ ଗାନ୍ଧୀ ଗୁଡାଏ ମିଛ ଏବଂ ବିଭ୍ରାନ୍ତିକର ତଥ୍ୟ ବିସ୍ତାର କରୁଛନ୍ତି। ଟିକାକରଣ ଯୋଗାଣକୁ ନେଇ ଅନେକ ରାଜ୍ୟ ଏବଂ କେନ୍ଦ୍ର ସରକାରଙ୍କ ମଧ୍ୟରେ ବିବାଦ ଲାଗି ରହିଛି। ଅନେକ ରାଜ୍ୟରୁ ସ୍ୱଳ୍ପ ଯୋଗାଣକୁ ନେଇ ବାରମ୍ବାର ଅଭିଯୋଗ ଆସିଛି, କିନ୍ତୁ କେନ୍ଦ୍ର କହିଛି ଯେ ଏହା ଜନସଂଖ୍ୟା ଏବଂ ଆବଶ୍ୟକତା ଅନୁଯାୟୀ ଏହି ଟିକା ଯୋଗାଉଛି।

ସମ୍ୱିତ ପାତ୍ର ଓ ରମଣ ସିଂଙ୍କ ବିରୋଧରେ ସୁପ୍ରିମକୋର୍ଟ ଗଲେ ଛତିଶଗଡ଼ ସରକାର…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ‘ଜାଲ୍ ଟୁଲକିଟ୍’ ମାମଲାରେ ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ ଏବଂ ବିଜେପି ମୁଖପାତ୍ର ସମ୍ବିତ ପାତ୍ରଙ୍କ ଟ୍ୱିଟ୍‌କୁ ନେଇ ଦାୟର ହୋଇଥିବା ଏଫ୍‌ଆଇଆର ଉପରେ ରୋକ୍ ଲଗାଇଥିଲେ ହାଇକୋର୍ଟ। ଏହି ନିର୍ଦ୍ଦେଶକୁ ଏବେ ବିରୋଧ କରି ଛତିଶଗଡ ସରକାର ସୁପ୍ରିମକୋର୍ଟରେ ପହଞ୍ଚିଛନ୍ତି। ଛତିଶଗଡ ହାଇକୋର୍ଟ ଜୁନ୍ ୧୧ରେ ଦୁଇଟି ପୃଥକ ନିର୍ଦ୍ଦେଶ ଜାରି କରି ରମଣ ସିଂହ ଏବଂ ସମ୍ୱିତ ପାତ୍ରଙ୍କ ବିରୋଧରେ ଦାୟର ହୋଇଥିବା ସମାନ ଏଫ୍ଆଇଆରରେ ଅନ୍ତରୀଣ ସୁରକ୍ଷା ପ୍ରଦାନ କରିଥିଲେ। ହାଇକୋର୍ଟ ତାଙ୍କ ନିର୍ଦ୍ଦେଶରେ କହିଥିଲେ ଯେ ଏଫଆଇଆର କେବଳ ରାଜନୀତିକ ଦଳ ମଧ୍ୟରେ ହୋଇଥିବା ମତଭେଦ ପାଇଁ ହୋଇଛି। ତେଣୁ ଦୁଇ ବିଜେପି ନେତାଙ୍କୁ ଅନ୍ତରୀଣ ସୁରକ୍ଷା ଯୋଗାଇଥିଲେ ରାଜ୍ୟର ସର୍ବୋଚ୍ଚ କୋର୍ଟ। ତେବେ ଛତିଶଗଡ଼ ସରକାର କିନ୍ତୁ ହାଇକୋର୍ଟଙ୍କ ଏପରି ନିଷ୍ପତ୍ତିକୁ ଚ୍ୟାଲେଞ୍ଜ କରିବେ ବୋଲି ନିଷ୍ପତ୍ତି ନେଇଛନ୍ତି। ତେଣୁ ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ ଓ ବିଜେପି ମୁଖପାତ୍ର ସମ୍ୱିତ ପାତ୍ରଙ୍କ ବିବାଦରେ ହାଇକୋର୍ଟ ଦେଇଥିବା ରାୟକୁ ବିରୋଧ କରି ସରକାର କହିଛନ୍ତି ଯେ, ହାଇକୋର୍ଟ ଭୁଲରେ ରମଣ ସିଂ ଓ ସମ୍ୱିତ ପାତ୍ରଙ୍କୁ ଅନ୍ତରୀଣ ସୁରକ୍ଷା ଯୋଗାଇଛନ୍ତି। ରାଜ୍ୟ ସରକାର ଆବେଦନରେ ତାଙ୍କର ଯୁକ୍ତି ଦର୍ଶାଇ କହିଛନ୍ତି ଯେ ହାଇକୋର୍ଟ ସମ୍ବିଧାନର ଧାରା ୨୨୬କୁ ବ୍ୟବହାର କରିଛନ୍ତି। ଏହା ବିରଳ ମାମଲାରେ ବ୍ୟବହାର କରାଯିବା ଉଚିତ ବୋଲି କହି ରାଜ୍ୟ ସରକାର ହାଇକୋର୍ଟଙ୍କ ଆଦେଶକୁ ରଦ୍ଦ କରିବାକୁ ଆବେଦନରେ ଦର୍ଶାଇଛନ୍ତି। ରାଜ୍ୟ ସରକାର କହିଛନ୍ତି ଯେ ହାଇକୋର୍ଟ ବିଶେଷ ଅଧିକାର ବ୍ୟବହାର କରିବାରେ ତ୍ରୁଟି କରିଛନ୍ତି। କାରଣ ଟୁଲକିଟ ମାମଲାରେ ପ୍ରାଥମିକ ତଦନ୍ତ ବେଳେ ଟୁଲକିଟ୍ ଜାଲ ବୋଲି ଜଣାପଡ଼ିଛି।