ଗାଁ କୁ ନାହିଁ ପକ୍କା ରାସ୍ତା । ବର୍ଷା ଦିନେ ସମସ୍ୟା ଭୋଗୁଛନ୍ତି ୪ ଗ୍ରାମର ଗ୍ରାମବାସୀ ; ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନା କାହାପାଇଁ …?
!!! ରାୟଗଡ଼ ଜିଲ୍ଲା ଗୁଣୁପୁର ରୁ ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଜୋଶୀ ଙ୍କ ରିପୋର୍ଟ !!!
ଏଥର ସମ୍ଭାଳ (ଗୁଣପୁର)- ସ୍ୱାଧୀନତାର ଦୀର୍ଘ ବର୍ଷ ବିତିଯାଇଥିଲେ ମଧ୍ୟ ଏଯାଏଁ ହୋଇ ପାରିନାହିଁ ଗାଁ କୁ ପକ୍କା ରାସ୍ତା । ଫଳରେ ନାନା ସମସ୍ୟାର ସମ୍ମୁଖୀନ ହେଉଛନ୍ତି ଗ୍ରାମବାସୀ । ଯାତାୟାତ ରେ ବାଧା ଉପୁଜିଥିବା ଯୋଗୁଁ ବିକାଶ ଠାରୁ ବହୁ ଦୂରରେ ରହିଯାଉଛି ଆଦିବାସୀ ମୂଳକ । ଏ ଦୃଶ୍ୟ ହେଉଛି ରାୟଗଡା ଜିଲ୍ଲା ଗୁଣୁପୁର ବ୍ଳକ ଜଲତାର ପଞ୍ଚାୟତ ଲୁଂଗୁରୁତାଲ,ଜଲତାର ଗୁଡା ଓ ଘନାନ୍ତ୍ରୀ ପଞ୍ଚାୟତ ସମ୍ପେନି ଗ୍ରାମକୁ ସଂଯୋଗ କରୁଥିବା ମାଟି ରାସ୍ତାର ଦୃଶ୍ୟ । ଏହି ତିନିଗୋଟି ଗ୍ରାମର ମୋଟ ଜନସଂଖ୍ୟା ଦୁଇ ହଜାରରୁ ଉର୍ଦ୍ଧ୍ବ ଥିବା ବେଳେ ସମସ୍ତେ ଆଦିମ ଜନଜାତି ବର୍ଗର ଆଦିବାସୀ ଅଟନ୍ତି । ଗୁଣୁପୁର ସହର ଠାରୁ ମାତ୍ର ୧୨ କିମି ଦୂରରେ ଥିବା ଏହି ସବୁ ଗ୍ରାମବାସୀ ପକ୍କା ରାସ୍ତା ନ ଥିବାରୁ ଯାତାୟାତ ରେ ନାହିଁ ନ ଥିବା ସମସ୍ୟା ଭୋଗୁଛନ୍ତି । ବିଶେଷ କରି ବର୍ଷା ଆସିଲେ ଏକ ପ୍ରକାର ବିଛିନାଞ୍ଚଳ ଦୁଃଖ ଭୋଗ କରୁଥିବା ଅଭିଯୋଗ କରିଛନ୍ତି । ମାଟିରାସ୍ତାରେ ସ୍ଥାନେ ସ୍ଥାନେ ବିରାଟ ବିରାଟ ଖାଲ ଖମା ଯୋଗୁଁ ପାଣି ଜମି ରହୁଛି । ରାସ୍ତା ସାରା କାଦୁଅ ପଚାପଚ ହୋଇ ଯାଉଥିବା ରୁ ଗମନାଗମନ ରେ ବାଧା ସୃଷ୍ଟି ହେଉଥିବା ଗ୍ରାମବାସୀ ମାନେ କହିଛନ୍ତି । ଜରୁରୀ ସମୟରେ ଏହି ସବୁ ଗ୍ରାମକୁ ଆମ୍ବୁଲାନ୍ସ କି ଅଗ୍ନିଶମ ବିଭାଗ ଗାଡ଼ି ଆସି ପାରୁନଥିବା, ରୋଗୀଙ୍କୁ ମେଡିକାଲ ନେବାରେ ବହୁ ଅସୁବିଧା ଭୋଗୁଥିବା କୁହାଯାଇଛି । ଏଠାକାର ଲୋକେ ଶିକ୍ଷା, ସ୍ୱାସ୍ଥ୍ୟ, ବାଣିଜ୍ୟ କାରବାର ଉପରେ ଗୁଣୁପୁର ସହର ଉପରେ ନିର୍ଭର କରୁଥିବା ବେଳେ ବର୍ଷାଋତୁ ଆସିଲେ ସବୁ ଯେପରି ଏମାନଙ୍କ ପାଇଁ ଠପ୍ ହୋଇପଡେ । ତମାମ ସମସ୍ୟା ସମ୍ପର୍କରେ ଗ୍ରାମବାସୀ ସରପଞ୍ଚ ଙ୍କ ଠାରୁ ଆରମ୍ଭ କରି ପ୍ରଶାସନ ପର୍ଯ୍ୟନ୍ତ ଗୁହାରୀ କରିଥିଲେ ମଧ୍ୟ କୌଣସି ସୁଫଳ ମିଳିପାରି ନାହିଁ । ସମସ୍ୟା ସମ୍ପର୍କରେ ଗୁଣୁପୁର ଗୋଷ୍ଠୀ ଉନ୍ନୟନ ଅଧିକାରୀ ଙ୍କୁ ଅବଗତ କରାଇବାରୁ, ଗ୍ରାମ୍ୟ ଉନ୍ନୟନ ବିଭାଗ ସହ ଆଲୋଚନା କରି ପଦକ୍ଷେପ ଗ୍ରହଣ କରିବାକୁ ପ୍ରତିଶ୍ରୁତି ଦେଇଛନ୍ତି । ତେବେ କେବେ ତିଆରି ହେବ ପକ୍କା ରାସ୍ତା କେବେ ଉପକୃତ ହେବେ ଏଠାକାର ବାସିନ୍ଦା ତାହା ଏବେ ଦେଖିବାକୁ ରହିଲା ।
