ଫୋକସରେ ବସ୍ତି ଭୋଟର, ୨୫% ଅର୍ଥ ଖର୍ଚ୍ଚ କରିବେ ପୌର ସଂସ୍ଥା …!

ଏଥର ସମ୍ଭାଳ (ଭୁବନେଶ୍ଵର) -ପୌର ନିର୍ବାଚନ ପୂର୍ବରୁ ବସ୍ତି ଭୋଟରଙ୍କୁ ଆକୃଷ୍ଟ କରିବା ପାଇଁ କ୍ଷମତାସୀନ ବିଜେଡି ସରକାର ଏବେ ପୌର ସଂସ୍ଥାଗୁଡ଼ିକୁ ଦିଆଯାଉଥିବା ପାଣ୍ଠିର ୨୫ ପ୍ରତିଶତ ଅର୍ଥକୁ ବସ୍ତି ଅଂଚଳର ବିକାଶ ପାଇଁ ବ୍ୟୟ କରିବାକୁ ନିଷ୍ପତ୍ତି ନେଇଛନ୍ତି। ଏଥିପାଇଁ ରାଜ୍ୟ ସରକାର ପୌର ଆଇନରେ ସଂଶୋଧନ ମଧ୍ୟ ଆଣିଛନ୍ତି।

ରାଜ୍ୟ ପୌର ନିର୍ଦ୍ଦେଶକ ସଂଗ୍ରାମଜିତ୍ ନାୟକ ସମସ୍ତ ପୌର ପ୍ରଶାସକଙ୍କୁ ଚିଠି ଲେଖି ୨୦୨୦-୨୧ ଓ ୨୦୨୧-୨୨ ଆର୍ଥିକ ବର୍ଷରେ ସମସ୍ତ ମହାନଗର ନିଗମ, ପୌର ପରିଷଦ ଓ ବିଜ୍ଞାପିତ ପରିଷଦକୁ ଦିଆଯାଇଥିବା ମୋଟ ପାଣ୍ଠିର ୨୫ ପ୍ରତିଶତ ଅର୍ଥକୁ ବସ୍ତି ଅଂଚଳରେ ବ୍ୟୟ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ଅର୍ଥରେ ବସ୍ତି ଅଂଚଳର ସର୍ବନିମ୍ନ ସେବା ଯୋଗାଣ ଓ ଭିତ୍ତିଭୂମି ବିକାଶ ବାବଦରେ ବ୍ୟୟ କରାଯିବ।

ଶ୍ରୀ ନାୟକ ଲେଖିଛନ୍ତି ଯେ, ଓଡ଼ିଶା ସରକାର ମ୍ୟୁନିସପାଲଟି ଆଇନ-୧୯୫୦ ଓ ମ୍ୟୁନିସପାଲ କର୍ପୋରେସନ ଆଇନ-୨୦୦୩ରେ ସଂଶୋଧନ ଆଣିବା ସହ ଏହାକୁ ଗେଜେଟ୍ ବିଜ୍ଞପ୍ତିରେ ପ୍ରକାଶ କରିସାରିଛନ୍ତି। ସେହି ଅନୁଯାୟୀ ପୌର ସଂସ୍ଥାଗୁଡ଼ିକ ସେମାନଙ୍କ ବାର୍ଷିକ ବଜେଟ ଅର୍ଥର ୨୫ ପ୍ରତିଶତ ବସ୍ତି ଅଂଚଳର ଭିତ୍ତିଭୂମି ବିକାଶ ଓ ମୌଳିକ ସୁବିଧା ଯୋଗାଇବା କ୍ଷେତ୍ରରେ ବ୍ୟୟ କରିବେ। ଏହି ବ୍ୟୟ କିଭଳି ହେଉଛି ତାହାର ତ୍ରୈମାସିକ ଲକ୍ଷ୍ୟଧାର୍ଯ୍ୟ କରିବା ସହ ଏହି ନିୟମକୁ କଡ଼ାକଡ଼ି ଯାଂଚ କରିବା ପାଇଁ ପୌର ପ୍ରଶାସକମାନଙ୍କୁ ନିର୍ଦ୍ଦେଶ ଦିଆଯାଇଛି।

ଏହାସହିତ ୨୦୨୦-୨୧ ଓ ୨୦୨୧-୨୨ ଆର୍ଥିକ ବର୍ଷ ପାଇଁ ସମସ୍ତ ମହାନଗର ନିଗମ, ମ୍ୟୁନିସପାଲଟି ଓ ଏନଏସିଗୁଡ଼ିକୁ ମଞ୍ଜୁର ହୋଇଥିବା ପାଣ୍ଠିର ତାଲିକା ସହିତ ୨୫ପ୍ରତିଶତ ଅର୍ଥର ମଧ୍ୟ ଏକ ତାଲିକା ମଧ୍ୟ ଶ୍ରୀ ନାୟକ ତାଙ୍କ ଚିଠିରେ ସଂଲଗ୍ନ କରିଛନ୍ତି।

ଘର ପରିବର୍ତ୍ତେ ଜଙ୍ଗଲରେ ଛାଡ଼ି ଚାଲିଗଲା ଆମ୍ବୁଲାନ୍ସ …!

ଏଥର ସମ୍ଭାଳ (ଆନନ୍ଦପୁର) – ସୁସ୍ଥ ହୋଇଥିବା ଜଣେ କୋଭିଡ ଆକ୍ରାନ୍ତଙ୍କୁ ଘର ପରିବର୍ତ୍ତେ ଜଙ୍ଗଲରେ ଛାଡ଼ିଦେଲା ନିଶାସକ୍ତ ଆମ୍ବୁଲାନ୍ସ ଡ୍ରାଇଭର। ଦୀର୍ଘ ସମୟ ଅପେକ୍ଷା କରିବା ପରେ ଶେଷରେ ଅନ୍ୟ ଏକ ଆମ୍ବୁଲାନ୍ସରେ ଘରେ ପହଞ୍ଚିଲେ ବ୍ୟକ୍ତିଜଣକ। ଏଭଳି ଅଭାବନୀୟ କାଣ୍ଡ କେନ୍ଦୁଝର ଜିଲ୍ଲା ଆନନ୍ଦପୁର ଅଞ୍ଚଳରେ ଘଟିଛି।

ଆନନ୍ଦପୁର ଅଞ୍ଚଳର ଭାସ୍କର ସାହୁ ନାମକ ଜଣେ କୋଭିଡ୍ ସଂକ୍ରମିତ ବ୍ୟକ୍ତି କେନ୍ଦୁଝରରେ ରହି ଚିକିତ୍ସିତ ହେଉଥିଲା । ସୁସ୍ଥ ହେବା ପରେ ଗତକାଲି ତାଙ୍କୁ ଡିସଚାର୍ଜ କରାଯାଇ ଏକ ଆମ୍ବୁଲାନ୍ସ ଯୋଗେ ଘରକୁ ପଠାଯାଇଥିଲା। ମାତ୍ର ତାଙ୍କୁ ଘରେ ଛାଡ଼ିବା ପରିବର୍ତ୍ତେ ପ୍ରାୟ ୪୦ କିମି ଦୂର ଜଙ୍ଗଲ  ମଝିରେ ଛାଡି ଚାଲିଗଲା  ମଦ୍ୟପ ଆମ୍ବୁଲାନ୍ସ ଡ୍ରାଇଭର ।

୨୦ ନଂ ଜାଜୀୟ ରାଜପଥର ଅଟେଇ ଜଙ୍ଗଲ ଅଧୀନ  କୁମୁଡ ଛକଠାରେ ସମ୍ପୃକ୍ତ ବ୍ୟକ୍ତିଙ୍କୁ ଗାଡିରୁ ତଳକୁ ଓହ୍ଲାଇ ଦେଇ ଗାଡି ଧରି ପଳାଇଲା ଡ୍ରାଇଭର।   ବ୍ୟକ୍ତିଜଣକ ପ୍ରାୟ ୨ ଘଣ୍ଟା ପାଖାପାଖି ଅପେକ୍ଷା କରିବା ପରେ ମଧ୍ୟ ଡ୍ରାଇଭରଙ୍କ ପତ୍ତା ପାଇଲା ନାହିଁ। ଶେଷରେ ଗଣମାଧ୍ୟମ ପ୍ରତିନିଧିଙ୍କ ହସ୍ତକ୍ଷପ ଫଳରେ ସାଇଁକୁଳ ଗୋଷ୍ଠି ସ୍ୱାସ୍ଥକେନ୍ଦ୍ରରୁ ଅନ୍ୟ  ଏକ ଆମ୍ବୁଲାନ୍ସ ଆସି ତାଙ୍କୁ ନେଇ ଘରେ ଛାଡ଼ିଛି।

ଏନେଇ  ଭାସ୍କର ସାହୁ  କହିଛନ୍ତି,  କେନ୍ଦୁଝରରେ ଥିଲି। ଗାଡ଼ି ଡ୍ରାଇଭର ବାଟରେ ନିଶାସକ୍ତ ହୋଇ  ଶୋଇ ପଡ଼ିଲା। କିଛି ସମୟରେ ଉଠି ପୁଣି କୁଆଡ଼େ ପଳାଇଲା। ମୁଁ ଅପେକ୍ଷା କରିଛି, ଆଉ ତା’ର ଦେଖା ମିଳୁନି।

ରୋଗୀଜଣକ କୁମୁଡ ଛକଠାରେ ଛିଡ଼ା ହୋଇଥିବା ଖବର ପାଇ ଏଠାକୁ ଆସିଛି। ତାଙ୍କୁ ନେଇ ତାଙ୍କ ଗାଁରେ ଛାଡ଼ିବି ବୋଲି କହିଛନ୍ତି ଘରେ ପହଞ୍ଚାଇଥିବା ଆମ୍ବୁଲାନ୍ସ ଡ୍ରାଇଭର ବିନୋଦ ବିହାରୀ ସାହୁ।

ଆମ୍ବୁଲାନ୍ସ ଚଳାଇବା ପରି ଗୁରୁଦାୟିତ୍ୱ ନ୍ୟସ୍ତ ଥିବା ସତ୍ତ୍ୱେ ସମ୍ପୃକ୍ତ ଡ୍ରାଇଭର ଡ୍ୟୁଟିରେ ଥାଇ ନିଶାସକ୍ତ ଅବସ୍ଥାରେ ରୋଗୀଙ୍କୁ ଅଧା ବାଟରେ ଛାଡ଼ି ଚାଲିଯିବା ଏକ ସ୍ପର୍ଶକାତର ଘଟଣା। ଏପରି କର୍ମଚାରୀଙ୍କ ବିରୋଧରେ ବିଭାଗ ପକ୍ଷରୁ କ’ଣ ପଦକ୍ଷେପ ଗ୍ରହଣ କରାଯିବ ତାହା ଦେଖିବାକୁ ବାକି ରହିଲା।

ସାଢ଼େ ୩ କୋଟି ଟଙ୍କାର କୃଷି ସବ୍‌ସିଡି ଜାଲିଆତି, କ୍ରାଇମବ୍ରାଞ୍ଚ ଆରମ୍ଭ କଲା ଖୋଳତାଡ଼

ଏଥର ସମ୍ଭାଳ ବ୍ୟୁରୋ (ଭୁବନେଶ୍ଵର) – ରାଜ୍ୟରେ ଗରିବ ଚାଷୀଙ୍କ ପାଇଁ ଉଦ୍ଦିଷ୍ଟ ସରକାରୀ ସବସିଡିକୁ କିଛି ଅସାଧୁ ବ୍ୟବସାୟୀ ଓ ଲୋକମାନେ ଲୁଟି ଖାଉଛନ୍ତି ବୋଲି ବିଭିନ୍ନ ସମୟରେ ଅଭିଯୋଗକୁ ସରକାର ଏଡ଼ାଇ ଯାଉଥିବାବେଳେ ଏବେ ବରଗଡ଼ର ଜଣେ ବ୍ୟବସାୟୀଙ୍କୁ ସାଢ଼େ ୩କୋଟି ଟଙ୍କାର କୃଷି ସବସିଡି ଜାଲିଆତିରେ କ୍ରାଇମବ୍ରାଂଚ ଗିରଫ କରିଛି। ଏହି ବ୍ୟବସାୟୀ ଗିରଫ ହେବା ପରେ ରାଜ୍ୟରେ କୃଷି ଯନ୍ତ୍ରାଂଶ ଓ ଉପକରଣରେ ଚାଷୀଙ୍କୁ ମିଳୁଥିବା ସବସିଡିରେ ହେଉଥିବା ଜାଲିଆତି ପଦାକୁ ଆସିଛି। କ୍ରାଇମବ୍ରାଂଚର ଅର୍ଥନୀତିକ ଅପରାଧ ଶାଖ।। ବୁଧବାର ବରଗଡ଼ର ବ୍ୟବସାୟୀ କମଲଜିତ୍ ସିଂ(୨୩ ବର୍ଷ)କୁ ଗିରଫ କରିଛି ଓ ଅନ୍ୟତମ ଅଭିଯୁକ୍ତ ତା’ର ବଡ଼ଭାଇ ହରପାଲ(୨୭) ଏବେ ଫେରାର ରହିଛି।

ସୂଚନା ଅନୁସାରେ, ଏହି ଦୁଇ ଭାଇ କେରଳସ୍ଥିତ କୃଷି ଯନ୍ତ୍ରାଂଶ ଉତ୍ପାଦନକାରୀ ଏକ କମ୍ପାନୀ ରେଡଲ୍ୟାଣ୍ଡ ଆସଲିନ୍ ମୋର୍ଟସ ପିଏଲସିର ବରିଷ୍ଠ ଅଧିକାରୀ ଭାବେ ନିଜକୁ ଚିତ୍ରଣ କରି ଏହି ଜାଲିଆତି କରିଛନ୍ତି। ସେମାନେ କମ୍ପାନୀର ଜାଲ ଦସ୍ତାବିଜ୍ ପ୍ରସ୍ତୁତ କରି ଅଥରାଇଜଡ୍ ଡିଲର ଭାବେ ରାଜ୍ୟ କୃଷି ବିଭାଗରୁ ପଞ୍ଜିକରଣ ପ୍ରମାଣପତ୍ର ହାସଲ କରିବାରେ ସକ୍ଷମ ହୋଇଥିଲେ। ଏହି ଅଭିଯୁକ୍ତ ଦ୍ୱୟ ବରଗଡ଼, ସମ୍ବଲପୁର, ବଲାଙ୍ଗିର ଓ ସୋନପୁର ଜିଲ୍ଲାର ୨୭୮ଜଣ ଚାଷୀଙ୍କୁ ଧାନ ଟ୍ରାନ୍ସପ୍ଲାଣ୍ଟର ମେସିନ୍ ବିକ୍ରିର ଜାଲ୍ ଦସ୍ତାବିଜକୁ ରାଜ୍ୟ ସରକାରଙ୍କ ଡାଇରେକ୍ଟ ବେନିଫିଟ୍ ଟ୍ରାନ୍ସଫର(ଡିବିଟି)ରେ ୨୦୧୮ରୁ ୨୦୨୦ ମସିହା ମଧ୍ୟରେ ଅପଲୋଡ୍ କରିଛନ୍ତି। ଏପରିକି ସେମାନେ ଉକ୍ତ ମେସିନର ଜାଲ୍ ଇଞ୍ଜିନ ଓ ଚେସିସ୍ ନମ୍ବର ସହ ହିତାଧିକାରୀଙ୍କ ଫଟୋଗ୍ରାଫ ମଧ୍ୟ ସରକାରୀ ପୋର୍ଟାଲରେ ଅପଲୋଡ୍ କରଛନ୍ତି। ତେବେ ଆଶ୍ଚର୍ଯ୍ୟର କଥା ରାଜ୍ୟ ସରକାର ଏହି ଦସ୍ତାବିଜଗୁଡ଼ିକର ସତ୍ୟାସତ୍ୟ ଯାଂଚ ନକରି ୨୭୮ଜଣ ଚାଷୀଙ୍କ ବ୍ୟାଙ୍କ ଆକାଉଣ୍ଟକୁ ୧ଲକ୍ଷରୁ ଦେଢ଼ଲକ୍ଷ ଟଙ୍କା ପର୍ଯ୍ୟନ୍ତ ସବସିଡି ଅର୍ଥ ଟ୍ରାନ୍ସଫର କରିଛନ୍ତି।

ଏହି ଅଭିଯୁକ୍ତ ଦ୍ୱୟ ମଧ୍ୟ ସମ୍ପୃକ୍ତ ୨୭୮ଜଣ ଚାଷୀଙ୍କୁ ଭୁଆଁ ବୁଲାଇବା ସହ ୫ହଜାର ଟଙ୍କା ଲେଖାଏ ଦେଇ ସେମାନଙ୍କ ବ୍ୟାଙ୍କ ଆକାଉଣ୍ଟରେ ଜମା ହୋଇଥିବା ଅର୍ଥକୁ ଉଠାଣ କରି ଦେବାକୁ ପ୍ରବର୍ତ୍ତାଇ ସଫଳ ହୋଇଥିଲେ । କେତେକ ଟେକନିକାଲ କାରଣରୁ ସେମାନଙ୍କର ସମ୍ପର୍କୀୟ ପଠାଇଥିବା ଟଙ୍କା ଭୁଲବଶତଃ ଚାଷୀଙ୍କ ଆକାଉଣ୍ଟକୁ ଆସିଛି । ତେଣୁ ୫ହଜାର ଟଙ୍କା ନେଇ ଉକ୍ତ ଟଙ୍କା ଉଠାଣ କରି ଦେବାକୁ ଅନୁରୋଧ କରିଥିଲେ । ଗରିବ ଚାଷୀମାନେ ମଧ୍ୟ ମାଗଣାରେ ୫ହଜାର ଟଙ୍କା ଫାଇଦା ପାଉଥିବାରୁ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ଆସିଥିବା ଟଙ୍କା ଉଠାଇ ଏହି ଦୁଇ ଅଭିଯୁକ୍ତ ଭାଇଙ୍କୁ ଦେଇଥିଲେ । ତେବେ ଏହାପଛରେ ଏଭଳି ଜାଲିଆତି ଓ ଷଡ଼ଯନ୍ତ୍ର ହୋଇଥିବା ସମ୍ପର୍କରେ ଚାଷୀମାନେ କିଛି ବି ଜାଣିନଥିଲେ । ଏହି ଦୁଇ ଭାଇ କୌଣସି କୃଷି ଯନ୍ତ୍ରାଂଶ ନକିଣି ୩.୪୯କୋଟି ଟଙ୍କାର ସରକାରୀ ସବସିଡିକୁ ଲୁଟ୍ କରିବାରେ ସକ୍ଷମ ହୋଇଥିଲେ । ସରକାର ପରବର୍ତ୍ତୀ ସମୟରେ ଏହି କଳା ତାଲିକାଭୁକ୍ତ ସଂସ୍ଥା ରେଡଲ୍ୟାଣ୍ଡ ଆସଲିନ୍ ମୋର୍ଟସ ପିଏଲସି ସମ୍ପର୍କରେ ଖୋଳତାଡ଼ କରିଥିଲେ । ଆଉ କେରଳସ୍ଥିତ ଏହି କମ୍ପାନୀ ମଧ୍ୟ ଅନୁରୂପ ଜାଲିଆତି ସମ୍ପର୍କରେ ଜାଣିବା ପରେ ଚଳିତବର୍ଷ ଏପ୍ରିଲ ମାସରେ ରାଜ୍ୟ ଅର୍ଥନୀତିକ ଅପରାଧ ଶାଖାରେ ଏକ ମାମଲା ରୁଜୁ କରିଥିଲେ । ଏହାସହିତ ରାଜ୍ୟ କୃଷି ବିଭାଗକୁ ମଧ୍ୟ ସମ୍ପୃକ୍ତ କେରଳ କମ୍ପାନୀ ପକ୍ଷରୁ ଏଭଳି ଜାଲିଆତି ସମ୍ପର୍କରେ ଅବଗତ କରାଯାଇଥିଲା । ଯାହା ଆଧାରରେ କ୍ରାଇମବ୍ରାଂଚର ଅର୍ଥନୀତିକ ଅପରାଧ ଶାଖା ଏହାର ତଦନ୍ତ କରି କୃଷି ସବସିଡି ଜାଲିଆତି ହୋଇଥିବା ଜାଣିବାକୁ ପାଇଥିଲେ ।

କେବଳ ବରଗଡ଼ ନୁହେଁ ପୂର୍ବରୁ ବାଲେଶ୍ୱର ଓ ମୟୂରଭଞ୍ଜ ଜିଲ୍ଲାରେ ମଧ୍ୟ ଚାଷୀଙ୍କ ନାଁରେ କୃଷି ସବସିଡି ବ୍ୟାପକ ଭାବେ ହରିଲୁଟ୍ ହେଉଥିବା ଅଭିଯୋଗ ଆସିଥିଲା । କିନ୍ତୁ ସରକାର ସେଥିପ୍ରତି ଦୃଷ୍ଟି ଦେଇନଥିଲେ । ଏବେ କ୍ରାଇମବ୍ରାଂଚ ଏସବୁ ଅଭିଯୋଗର ମଧ୍ୟ ଖୋଳତାଡ଼ କରିବ ବୋଲି ସୂଚନା ମିଳିଛି ।

ସରିଲା ସର୍ବଦଳୀୟ ବୈଠକ, ଜମ୍ମୁ-କଶ୍ମୀରକୁ ପୁଣି ମିଳିବ ପୂର୍ଣ୍ଣ ରାଜ୍ୟ ମାନ୍ୟତା…!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ)- ଜମ୍ମୁ-କଶ୍ମୀରକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା ସର୍ବଦଳୀୟ ବୈଠକ ଶେଷ ହୋଇଛି। ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜମ୍ମୁ-କଶ୍ମୀରକୁ ପୂର୍ଣ୍ଣ ରାଜ୍ୟ ମାନ୍ୟତା ଦେବାକୁ ପ୍ରତିଶ୍ରୁତିବଦ୍ଧ ବୋଲି ସବୁ ଦଳର ନେତାମାନଙ୍କୁ କହିଥିବା ଜଣାପଡ଼ିଛି। ତେବେ ଠିକ୍‌ ସମୟରେ ଉପତ୍ୟକାକୁ ପୁଣି ପୂର୍ଣ୍ଣ ରାଜ୍ୟର ମାନ୍ୟତା ମିଳିବ ବୋଲି ସେ କହିଛନ୍ତି। ଏଥିସହ ଦିଲ୍ଲୀ ଓ ଦିଲ୍‌ ମଧ୍ୟରେ ଦୂରତା କମାଇବାକୁ ମଧ୍ୟ ସେ ସମସ୍ତଙ୍କୁ ନିବେଦନ କରିଛନ୍ତି। ସେହିପରି କଂଗ୍ରେସ ପକ୍ଷରୁ ସର୍ବଦଳୀୟ ବୈଠକରେ ୫ଟି ଦାବି ଉପସ୍ଥାପନ କରାଯାଇଛି। ବୈଠକରେ କୌଣସି ନେତା ପାକିସ୍ତାନ ସହ ଆଲୋଚନା କରିବାର ପ୍ରସ୍ତାବ ଦେଇ ନଥିବା ବିଶେଷ ସୂତ୍ରରୁ ସାମ୍ନାକୁ ଆସିଛି। ୨୦୧୮ରୁ ଜମ୍ମୁ-କଶ୍ମୀରରେ ରାଷ୍ଟ୍ରପତି ଶାସନ ଲାଗୁ ହୋଇଛି। ସେହିପରି ୨୦୧୯ ଅଗଷ୍ଟ ୫ରେ କେନ୍ଦ୍ର ସରକାର ଉପତ୍ୟକାକୁ ଦୁଇ ଭାଗରେ ବିଭକ୍ତ କରିବା ସହ ଧାରା ୩୭୦ ଧାରା ଉଚ୍ଛେଦ କରିଥିଲେ। ଏହାପରେ ଆଜି ପ୍ରଥମଥର ପାଇଁ ଜମ୍ମୁ-କଶ୍ମୀରର ୧୪ ଜଣ ନେତାଙ୍କ ସହ ମୋଦି ବୈଠକ କରିଛନ୍ତି। ଏଥିରେ ଉପତ୍ୟକାର ୪ ଜଣ ପୂର୍ବତନ ମୁଖ୍ୟମନ୍ତ୍ରୀ ମଧ୍ୟ ରହିଥିଲେ। ମୋଦି ବୈଠକରେ ସୀମା ପୁନଃ ନିର୍ଦ୍ଧାରଣ, ପୂର୍ଣ୍ଣ ରାଜ୍ୟ ମାନ୍ୟତା ଓ ନିର୍ବାଚନ ପ୍ରସଙ୍ଗରେ ସବୁ ଦଳର ନେତାମାନଙ୍କ ସହ କଥା ହୋଇଛନ୍ତି। ବୈଠକ ବେଳେ ସରକାରଙ୍କ ପକ୍ଷରୁ ଜମ୍ମୁ-କଶ୍ମୀରରେ କରାଯାଇଥିବା ବିକାଶମୂଳକ ଯୋଜନା ଓ ପଦକ୍ଷେପ ଗୁଡ଼ିକ ସମ୍ପର୍କରେ ସମସ୍ତଙ୍କୁ ଅବଗତ କରାଇଥିଲେ। ମୋଦି ଉପତ୍ୟକାରେ କରୁଥିବା ବିକାଶମୂଳକ କାର୍ଯ୍ୟକ୍ରମକୁ ନେଇ ସନ୍ତୋଷ ବ୍ୟକ୍ତ କରିଛନ୍ତି। ଏହି ବିକାଶ ଜମ୍ମୁ-କଶ୍ମୀରବାସୀଙ୍କ ମନରେ ନୂଆ ଆଶା ଓ ସମ୍ଭାବନା ସୃଷ୍ଟି କରିବାରେ ସହାୟକ ହେବ। ରାଜନୀତିକ ମତପାର୍ଥକ୍ୟ ସୃଷ୍ଟି ହେବା ସ୍ୱାଭାବିକ। କିନ୍ତୁ ଜାତୀୟ ସ୍ୱାର୍ଥ ପାଇଁ ସମସ୍ତେ ଏକାଠି କାମ କରିବା ଦରକାର। ଜମ୍ମୁ-କଶ୍ମୀରବାସୀ କେମିତି ଲାଭ ପାଇବେ, ତା’ର ବ୍ୟବସ୍ଥା ଆମ ସମସ୍ତଙ୍କୁ କରିବାକୁ ପଡ଼ିବ। ଜମ୍ମୁ-କଶ୍ମୀରର ସମସ୍ତ ବର୍ଗର ସୁରକ୍ଷା ପାଇଁ ଉପଯୁକ୍ତ ପରିବେଶ ଦରକାର ବୋଲି ମୋଦି ବୈଠକରେ କହିଥିବା ସରକାରୀ ସୂତ୍ରରେ କୁହାଯାଇଛି। ସୂଚନା ଅନୁସାରେ, ସୀମା ପୁନଃ ନିର୍ଦ୍ଧାରଣ ସରିବା ମାତ୍ରେ ଜମ୍ମୁ-କଶ୍ମୀରରେ ବିଧାନସଭା ନିର୍ବାଚନ ହେବ। ଉପତ୍ୟକାରେ ଗଣତାନ୍ତ୍ରି ପ୍ରକ୍ରିୟା ଆରମ୍ଭ କରିବାକୁ ସମସ୍ତେ ଗୁରୁତ୍ୱ ଦେଇଛନ୍ତି। କଂଗ୍ରେସ ପକ୍ଷରୁ ବୈଠକରେ ଯୋଗଦେଇଥିବା ଗୁଲାମ ନବୀ ଆଜାଦ ମୋଦିଙ୍କ ଆଗରେ ୫ଟି ଦାବି ଉପସ୍ଥାପନ କରିଛନ୍ତି। ଉକ୍ତ ଦାବି ଗୁଡ଼ିକ ମଧ୍ୟରେ ଜମ୍ମୁ-କଶ୍ମୀରକୁ ତୁରନ୍ତ ପୂର୍ଣ୍ଣ ରାଜ୍ୟ ମାନ୍ୟତା ଦେବା, ଯଥା ଶୀଘ୍ର ବିଧାନସଭା ନିର୍ବାଚନ କରିବା, କଶ୍ମୀର ପଣ୍ଡିତଙ୍କୁ ଉପତ୍ୟକାକୁ ଫେରାଇ ଆଣି ସେମାନଙ୍କୁ ସୁରକ୍ଷିତ ଭାବେ ଅବସ୍ଥାପିତ କରିବା, ୨୦୧୯ ଅଗଷ୍ଟ ୫ ଠାରୁ ଅଟକ କିମ୍ବା ଗିରଫ ହୋଇଥିବା ସମସ୍ତ ରାଜନୀତିକ ଓ ସାମାଜିକ କର୍ମୀଙ୍କୁ ମୁକ୍ତ କରିବା ଏବଂ ଜମି ଉପରେ ଅଧିକାର ଓ ସରକାରୀ ଚାକିରି କ୍ଷେତ୍ରରେ ସ୍ଥାନୀୟ ବାସୀଙ୍କୁ ଅଗ୍ରାଧିକାର ଦେବା ପାଇଁ ସରକାର ସ୍ୱତନ୍ତ୍ର ବ୍ୟବସ୍ଥା କରିବାକୁ କଂଗ୍ରେସ ନେତା ଗୁଲାମ ନବୀ ଆଜଦ ଦାବି କରିଛନ୍ତି। ବୈଠକରେ ଯୋଗଦେଇଥିବା ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ କହିଛନ୍ତି, ଜମ୍ମୁ-କଶ୍ମୀରର ସର୍ବାଙ୍ଗିନ ବିକାଶ ପାଇଁ ସରକାର ପ୍ରତିଶ୍ରୁତିବଦ୍ଧ। ଜମ୍ମୁ-କଶ୍ମୀରର ଭବିଷ୍ୟତକୁ ନେଇ ଆଲୋଚନା ହୋଇଛି। ସୀମା ପୁନଃ ନିର୍ଦ୍ଧାରଣ ଓ ଶାନ୍ତିପୂର୍ଣ୍ଣ ବିଧାନସଭା ନିର୍ବାଚନ ହିଁ ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ। ଏହାଦ୍ୱାରା ହିଁ ସଂସଦରେ ପ୍ରତିଶ୍ରୁତି ମୁତାବକ ଜମ୍ମୁ-କଶ୍ମୀରକୁ ପୂର୍ଣ୍ଣ ରାଜ୍ୟ ମାନ୍ୟତା ଦେବା ସହଜ ହେବ ବୋଲି ସେ କହିଛନ୍ତି। ଅନ୍ୟପକ୍ଷରେ ପିଡିପି ମୁଖ୍ୟ ମେହବୁବା ମୁଫତି ଧାରା ୩୭୦ ଲାଗୁ କରିବା ଜରୁରୀ ଓ ଉପତ୍ୟକାର ପରିଚୟ ବୋଲି କହିଛନ୍ତି। ଏଥିପାଇଁ ଶାନ୍ତିପୂର୍ଣ୍ଣ ସଂଘର୍ଷ ଜାରି ରହିବ ବୋଲି ମଧ୍ୟ ମୁଫତି ବୈଠକ ପରେ ଗଣମାଧ୍ୟମକୁ ଅବଗତ କରାଇଛନ୍ତି।

ଟ୍ୱିଟର ମୁଖ୍ୟଙ୍କୁ ହାଇକୋର୍ଟରୁ ମିଳିଲା ସୁରକ୍ଷା….!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ)- ଗାଜିଆବାଦର ମାରପିଟ ଭିଡିଓକୁ ନେଇ ବିବାଦରେ ଛନ୍ଦି ହୋଇଥିବା ଟ୍ୱିଟର ଇଣ୍ଡିଆ ମୁଖ୍ୟ ମନୀଷ ମାହେଶ୍ୱରୀଙ୍କୁ କର୍ଣ୍ଣାଟକା ହାଇକୋର୍ଟ ଅନ୍ତରୀଣ ସୁରକ୍ଷା ଯୋଗାଇ ଦେଇଛନ୍ତି। ଲୋନି ମାରପିଟ ଘଟଣାରେ ଗାଜିଆବାଦ ପୁଲିସ୍‌ ମନୀଷଙ୍କ ବିରୋଧରେ କୌଣସି ପ୍ରକାରର ଦୃଷ୍ଟାନ୍ତ ମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବ ନାହିଁ ବୋଲି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ବେଙ୍ଗାଲୁରୁରେ ରହୁଥିବା ମନୀଷଙ୍କୁ ଗାଜିଆବାଦ ପୁଲିସ ୪ ଦିନ ମଧ୍ୟରେ ୨ଥର ହାଜର ହେବାକୁ ନୋଟିସ କରିଥିଲା। ଆଜି ଦିନ ୧୧.୩୦ ସୁଦ୍ଧା ତାଙ୍କୁ ଲୋନି ବର୍ଡର ପୁଲିସ୍‌ ଷ୍ଟେସନ ନିକଟରେ ହାଜର ହେବାକୁ ନୋଟିସରେ କୁହାଯାଇଥିଲା। ହେଲେ କାଳେ ପୁଲିସ୍‌ ତାଙ୍କୁ ବୟାନ ରେକର୍ଡ ପାଇଁ ଡାକି ଗିରଫ କରିନେବ, ସେଥିପାଇଁ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। କୋର୍ଟ ଏହାର ଶୁଣାଣି କରି ତାଙ୍କୁ ସୁରକ୍ଷା ପ୍ରଦାନ କରିଛନ୍ତି। ଜଣେ ମୁସିଲିମ ବ୍ୟକ୍ତିଙ୍କ ଉପରେ ହେଉଥିବା ଆକ୍ରମଣ ଘଟଣାର ଭିଡିଓ ଟ୍ୱିଟରରେ ଭାଇରାଲ ହୋଇଥିଲା। ଏହି ଭିଡିଓ ନକଲି ବୋଲି ପୁଲିସ୍‌ କହିବା ସହ ଏହାକୁ ଶେୟାର କରିଥିବା ବିଭିନ୍ନ ବ୍ୟକ୍ତିମାନଙ୍କ ସହ ଟ୍ୱିଟର ବିରୋଧରେ ମାମଲା କରିଛି। ସୋମବାର ଗାଜିଆବାଦ ପୁଲିସ ମନୀଷଙ୍କୁ ପଠାଇଥିବା ନୋଟିସ୍‌ରେ ବ୍ୟକ୍ତିଗତ ଭାବେ ଜୁନ୍‌ ୨୪ରେ ଲୋନି ବର୍ଡର ପୁଲିସ୍‌ ଷ୍ଟେସନରେ ହାଜର ହେବାକୁ କହିଥିଲା। ଗତ ସପ୍ତାହରେ ସିଆରପିସିର ସେକସନ ୧୬୬ ଅନୁଯାୟୀ ଟ୍ୱିଟର ଇଣ୍ଡିଆ ଏମଡିଙ୍କୁ ପୁଲିସ୍‌ ନୋଟିସ ପଠାଇଥିଲା। ମାହେଶ୍ୱରୀ ତାଙ୍କ ଜବାବରେ କହିଥିଲେ ଯେ ସେ ଭିଡିଓ କନଫରେନ୍ସିଂ ଜରିଆରେ ତଦନ୍ତରେ ସାମିଲ ହେବାକୁ ଚାହାନ୍ତି। ତେବେ ଏହାକୁ ପୁଲିସ୍‌ ଅଗ୍ରାହ୍ୟ କରିଥିଲା। ଦ୍ୱିତୀୟ ନୋଟିସରେ ତାଙ୍କୁ ୨୪ ତାରିଖ ଦିନ ୧୧.୩୦ରେ ବ୍ୟକ୍ତିଗତ ଭାବେ ଥାନାରେ ହାଜର ହେବାକୁ କୁହାଯାଇଥିଲା।

ଫାଇନାଲରେ ହାରିବା ପରେ ବଡ଼ ପରିବର୍ତ୍ତନର ସଙ୍କେତ ଦେଲେ ବିରାଟ…!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ)- ପୁଣି ଗୋଟିଏ ଆଇସିସି ଇଭେଣ୍ଟରେ ପରାସ୍ତ ହୋଇଛି ବିରାଟ ବାହିନୀ। ବର୍ଷାର ଲୁଚକାଳୀ ଖେଳ ମଧ୍ୟରେ ୬ ଦିନ ଧରି ନ୍ୟୁଜିଲ୍ୟାଣ୍ଡ ସହ ଲଢ଼େଇ କରିବା ପରେ ଟିମ୍‌ ଇଣ୍ଡିଆ ଶେଷରେ ହାରି ଯାଇଛି। ନ୍ୟୁଜିଲ୍ୟାଣ୍ତ ବିଶ୍ୱ ଟେଷ୍ଟର ନୂଆ ଚାମ୍ପିୟନର ଆଖ୍ୟା ପାଇଛି।ତେବେ ଏହି ପରାଜୟ ପରେ ଟିମ୍‌ ଇଣ୍ଡିଆର ଅଧିନାୟକ ବିରାଟ କୋହଲି ଟିମ୍‌ରେ ବଡ଼ ପରିବର୍ତ୍ତନ ହେବାର ସଙ୍କେତ ଦେଇଛନ୍ତି। ଫାଇନାଲରେ ଭୁଲକୁ ଠାବ କରି ସୁଧାରିବା ଦିଗରେ ମଧ୍ୟ ସେ କହିଛନ୍ତି। ସାଉଥାମ୍ପଟନରେ ଭାରତୀୟ ବ୍ୟାଟିଂ ଲାଇନ ଅପ୍‌ ସମସ୍ତଙ୍କୁ ନିରାଶ କରିଛି। ପ୍ରଥମ ଦୁଇ ଦିନ ବ୍ୟାଟିଂ କରିବା କଷ୍ଟକର ଥିଲା ସତ, ହେଲେ ଏହାପରେ ପିଚ୍‌ ବ୍ୟାଟସମ୍ୟାନଙ୍କୁ ସୁହାଇଥିଲା। ବିଶେଷ କରି ଶେଷ ଦିନ ଆରମ୍ଭରୁ ଖରା ଲାଗି ରହିଥିଲା। ତଥାପି ଭାରତୀୟ ବ୍ୟାଟସମ୍ୟାନ ଆଦୌ ଭଲ ବ୍ୟାଟିଂ କରିବାକୁ ସକ୍ଷମ ହୋଇ ନଥିଲେ। ଶେଷରେ ଦଳ ୧୭୦ ରନ୍‌ରେ ଅଲଆଉଟ ହୋଇ ଯାଇଥିଲା। ନ୍ୟୁଜିଲ୍ୟାଣ୍ଡ ୧୩୯ ରନ୍‌ର ଟାର୍ଗେଟକୁ ବେଶ ଚମତ୍କାର ଢଙ୍ଗରେ ଚେଜ୍‌ କରି ବିଜୟୀ ହୋଇଥିଲା। ୨୧ ବର୍ଷ ପରେ କ୍ୱିୱି ଟିମ୍‌ କୌଣସି ଆଇସିସି ଟ୍ରଫି ଜିତି ରେକର୍ଡ ସୃଷ୍ଟି କରିଛି। ମ୍ୟାଚ୍ ପରେ ଆୟୋଜିତ ପ୍ରେସ କନଫରେନ୍ସରେ ବିରାଟ କୋହଲି କହିଛନ୍ତି, ଆମେ ଆଗକୁ ମଧ୍ୟ ଦଳକୁ ସଶକ୍ତ କରିବାକୁ ପ୍ରୟାସ କରିବୁ। ଦଳରେ ଥିବା ତ୍ରୁଟିକୁ ସୁଧାରିବା ପାଇଁ କ’ଣ ସବୁ ପରିବର୍ତ୍ତନ ଆବଶ୍ୟକ, ତା’ର ଆଲୋଚନା ମଧ୍ୟ ଆଗକୁ ଜାରି ରହିବ। ଆମେ ସବୁବେଳେ ଗୋଟିଏ ପ୍ରକାରର ପାର୍ଟନ କିମ୍ବା ଦୃଷ୍ଟିକୋଣକୁ ନେଇ ଆଗକୁ ଯିବୁ ନାହିଁ। ଦଳର ଆବଶ୍ୟକତା ଅନୁଯାୟୀ ପରିବର୍ତ୍ତନ କରାଯିବ। ଆମେ କେବେ ହେଲେ ଗୋଟିଏ ବର୍ଷ ଅପେକ୍ଷା କରିବୁ ନାହିଁ। ଆମକୁ ବହୁତ ଆଗରୁ ସବୁ କିଛି ଯୋଜନା ପ୍ରସ୍ତୁତ କରିବାକୁ ପଡ଼ିବ। ଆପଣ ଯଦି ଆମ ସୀମିତ ଓଭର ଟିମକୁ ଦେଖିବେ, ତା’ହେଲେ ସେଥିରେ ଗଭୀରତା ରହିଛି। ସବୁ ସଦସ୍ୟ ନିଜ ଉପରେ ବିଶ୍ୱାସ ରଖିଛନ୍ତି ଓ ଭଲ ପ୍ରଦର୍ଶନ କରିବାକୁ ସବୁବେଳେ ପ୍ରସ୍ତୁତ ହୋଇ ରହିଛନ୍ତି। ଏବେ ଟେଷ୍ଟ ଟିମରେ ସେମିତି କିଛି କରିବାକୁ ହେବ। ଆମକୁ ସବୁ କିଛି ପୁଣି ଯୋଜନା କରିବାକୁ ପଡ଼ିବ। ଆମକୁ ଠିକ୍‌ ଲୋକଙ୍କୁ ଚିହ୍ନଟ କରି ଠିକଣା ସମୟରେ ପ୍ରଦର୍ଶନ କରିବାର ମାନସିକତା ରଖିଥିବା ଖେଳାଳିଙ୍କୁ ଦଳରେ ସାମିଲ କରିବାକୁ ହେବ। ବ୍ୟାଟିଂ କରିବା ବେଳେ କେମିତି ରନ୍‌ ସଂଗ୍ରହ କରିବାକୁ ହେବ, ତା’ ଉପରେ କାମ କରିବାର ରହିଛି ବୋଲି କୋହଲି କହିଛନ୍ତି। ବିରାଟ ଠିକ୍‌ ଲୋକଙ୍କୁ ଟିମ୍‌କୁ ଆଣିବାର ସମୟ ଆସିଛି ବୋଲି କହିଥିବାରୁ ଆଗକୁ ଦଳରେ ବ୍ୟାପକ ପରିବର୍ତ୍ତନ ହେବାର ସମ୍ଭାବନା ରହିଛି।

ଆଇସିସି ଟେଷ୍ଟ ରାଙ୍କିଙ୍ଗ: ସର୍ବୋଚ୍ଚ ସ୍ଥାନରେ ରବୀନ୍ଦ୍ର ଜାଡେଜା..!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ)- ଭାରତକୁ ହରାଇ ଟେଷ୍ଟ କ୍ରିକେଟର ଚାମ୍ପିୟନ ହୋଇଛି ନ୍ୟୁଜିଲ୍ୟାଣ୍ଡ। ତେବେ ବିଶ୍ୱ ଟେଷ୍ଟ ଚାମ୍ପିୟନଶିପରେ ଟିମ ଇଣ୍ଡିଆର ଅଲରାଉଣ୍ଡର ରବୀନ୍ଦ୍ର ଜାଡେଜା କୌଣସି ଆଖି ଦୃଶିଆ ପ୍ରଦର୍ଶନ କରି ନଥିଲେ ହେଁ ଆଇସିସି ରାଙ୍କିଙ୍ଗରେ ତାଙ୍କୁ ଫାଇଦା ମିଳିଛି। ଏବେ ସେ ଟେଷ୍ଟ କ୍ରିକେଟର ଅଲରାଉଣ୍ଡର ତାଲିକାରେ ୧ନଂ ସ୍ଥାନରେ ପହଞ୍ଚି ଯାଇଛନ୍ତି। ସେ ୱେଷ୍ଟଇଣ୍ଡିଜର ଅଲରାଉଣ୍ଡର ଜେସନ ହୋଲ୍ଡରଙ୍କୁ ପଛରେ ପକାଇ ସର୍ବୋଚ୍ଚ ସ୍ଥାନ ଦଖଲ କରିଛନ୍ତି। ୨୦୧୭ ଅଗଷ୍ଟ ପରେ ଜାଡେଜା ଏହି ସ୍ଥାନକୁ ପୁଣି କମବ୍ୟାକ କରିଛନ୍ତି। ତାଙ୍କ ପାଖରେ ୩୮୬ ପଏଣ୍ଟ ଥିବା ବେଳେ ଦ୍ୱିତୀୟ ସ୍ଥାନରେ ଥିବା ହୋଲ୍ଡରଙ୍କ ପଏଣ୍ଟ ସଂଖ୍ୟା ୩୮୪ ରହିଛି। ପୂର୍ବଭଳି ବେନ ଷ୍ଟୋକ୍ସ ୩ନଂ ସ୍ଥାନରେ ରହିଥିବା ବେଳେ ଭାରତର ରବି ଅଶ୍ୱିନ ୪ନଂ ଓ ସାକିବ ଅଲ ହାସନ ୫ନଂ ସ୍ଥାନରେ ରହିଛନ୍ତି। ଦକ୍ଷିଣ ଆଫ୍ରିକା ଘରୋଇ ୱେଷ୍ଟଇଣ୍ଡିଜକୁ ୨-୦ରେ ହରାଇବାରେ ପ୍ରମୁଖ ଭୂମିକା ଗ୍ରହଣ କରିଥିବା କ୍ୱିଣ୍ଟନ ଡି’କକ ବ୍ୟାଟିଂ ରାଙ୍କିଙ୍ଗର ଟପ୍‌ ୧୦କୁ ଫେରିଛନ୍ତି। ସେ ଏବେ ୭୧୭ ପଏଣ୍ଟ ସହ ୧୦ନଂ ସ୍ଥାନରେ ରହିଛନ୍ତି। ଷ୍ଟିଭ ସ୍ମିଥ, କେନ ୱିଲିୟମସନ ଓ ମାର୍ନସ ଲାବୁଶେନ ଯଥାକ୍ରମେ ୧ରୁ ୩ ମଧ୍ୟରେ ରହିଛନ୍ତି। ବିରାଟ କୋହଲି ୪ନଂରେ, ୫ନଂରେ ଜୋ ରୁଟ, ୬ନଂରେ ଋଷଭ ପନ୍ତ, ୭ନଂରେ ରୋହିତ ଶର୍ମା, ୮ନଂରେ ହେନେରି ନିକୋଲ୍ସ ଓ ୯ନଂରେ ଡେଭିଡ ୱାର୍ଣ୍ଣର ରହିଛନ୍ତି।

୨୫ ଜୁନ୍, ଶୁକ୍ରବାର – ଆଜିର ରାଶିଫଳ

!!! ପ୍ରବାଚକ ॰ ଜଗଦୀଶ ପ୍ରସାଦ !!!

ମେଷ: ବ୍ୟବସାୟରେ ଯଥେଷ୍ଟ ଲାଭ ମିଳିବ। ଦାମ୍ପତ୍ୟ ଜୀବନ ଆନନ୍ଦରେ କଟିବ। ବିଳାସ ବ୍ୟସନ ଓ ଖାଦ୍ୟପେୟ ପାଇଁ ଅଧିକ ଖର୍ଚ୍ଚାନ୍ତ ହେବେ।

ବୃଷ: ପରିବାର ଲୋକଙ୍କ ସହିତ ଭଲ ସଂପର୍କ ରହିବ। କର୍ମକ୍ଷେତ୍ରରେ ଉଚ୍ଚ ଅଧିକାରୀଙ୍କ ଦ୍ୱାର ପ୍ରଶଂସିତ ହେବେ।

ମିଥୁନ: ଶୁଭଫଳ ପାଇବେ। ଆୟର ନୂଆ ପନ୍ଥା ମିଳିପାରେ। ମିଳିବ। ସହକର୍ମୀ ମାନଙ୍କ ଦ୍ୱାରା ବିଶେଷ ଭାବେ ଲାଭବାନ୍ ହେବେ।

କର୍କଟ: ସ୍ୱାସ୍ଥ୍ୟ ଠିକ୍ ରହିବ। ଅଧିକରୁ ଅଧିକ ଅର୍ଥ ସଞ୍ଚୟ କରିବା ପାଇଁ ଯୋଜନା ପ୍ରସ୍ତୁତ କରିବେ। ପାରିବାରିକ ସମସ୍ୟାର ସମାଧାନ ବୁଝାମଣା ମଧ୍ୟରେ ହୋଇଯିବ।

ସିଂହ: ବ୍ୟବସାୟୀମାନେ କଠିନ ପରିଶ୍ରମର ଫଳ ନିଶ୍ଚିତ ପାଇବେ। କର୍ମକ୍ଷେତ୍ରରେ ଅପେକ୍ଷାକୃତ ଉତ୍ତମ ବାତାବାରଣ ଦେଖାଦେବ।

କନ୍ୟା: କିଛି ନୂଆ ଦାମୀ ଜିନିଷ କିଣିପାରନ୍ତି। ଉଚ୍ଚପଦାଧିକାରୀଙ୍କ ଠାରୁ ସାହାଯ୍ୟ ସହଯୋଗ ପାଇବେ।

ତୁଳା: ଅଳ୍ପ ପରିଶ୍ରମରେ ଅଧିକ ଲାଭ ପାଇବେ। ଜମିବାଡ଼ି ନେଇ ଥିବା କେତେକ ସମସ୍ୟାର ସମାଧାନ ହୋଇପାରେ। ଯାନବାହାନ ସମ୍ବନ୍ଧୀୟ ସମସ୍ୟା ଦେଖା ଦେଇପାରେ।

ବିଛା: ମିତ୍ରମାନଙ୍କ ପରାମର୍ଶ କାମରେ ଲାଗିବ। କ୍ରୋଧକୁ ନିୟନ୍ତ୍ରଣରେ ରଖନ୍ତୁ। ଦୂର ସ୍ଥାନକୁ ଯାତ୍ରା କରିପାରନ୍ତି।

ଧନୁ: ସହକର୍ମୀ ମାନଙ୍କ ସହଯୋଗ ପାଇ କର୍ମକ୍ଷେତ୍ରରେ ପ୍ରଶଂସିତ ହେବେ। ମାନସିକ ଶାନ୍ତି ମିଳିବ। ସୁସମ୍ବାଦ ପ୍ରାପ୍ତି ହେବ।

ମକର: ଆର୍ଥିକ ଉନ୍ନତି ଫଳରେ ଚିନ୍ତା କରିଥିବା କାର୍ଯ୍ୟକୁ ସଂପୂର୍ଣ୍ଣ କରିବାକୁ ଚେଷ୍ଟା କରିବେ। ଯେକୌଣସି ନୂଆ କାମ ଆରମ୍ଭ କରିପାରିବେ।

କୁମ୍ଭ: ସମସ୍ତ କାର୍ଯ୍ୟ ଭଲରେ ଭଲରେ ସଂପନ୍ନ ହେବ। ପରିବାରରେ ହସଖୁସିରେ ବାତାବରଣ ରହିବ। ନୂଆ ଲକ୍ଷ୍ୟ ପୂରଣ ଦିଗରେ କାର୍ଯ୍ୟ କରିବେ।

ମୀନ: ପୈତୃକ ସମ୍ପତ୍ତିକୁ ନେଇ ରହିଥିବା ସମସ୍ୟାର ସମାଧାନ ହୋଇପାରେ। ଯୋଜନା ମୁତାବକ କାମ କଲେ କୌଣସି ପ୍ରକାର ଅସୁବିଧା ହେବ ନାହିଁ।