ମୁଁହ ଖୋଲିଲେ ଅଞ୍ଜଳି, ଅମିତ କୁମାରଙ୍କ ବୟାନକୁ ନେଇ ଦେଲେ ଟିପ୍ପଣୀ…!
ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – ସୋନି ଟିଭିରେ ପ୍ରସାରିତ ସୁପରହିଟ ରିଆଲିଟି ଶୋ’ ଇଣ୍ଡିଆନ ଆଇଡଲରୁ ବାହାରିବା ପରେ ମୁଁହ ଖୋଲିଛନ୍ତି ପ୍ରତିଯୋଗୀ ଅଞ୍ଜଳି ଗାଏକୱାଡ। ଭଲ ପରଫର୍ମ କରିବା ସତ୍ତ୍ୱେ ଅଞ୍ଜଳି ଶୋ’ରୁ ଆଉଟ ହେବା ଘଟଣାକୁ ତାଙ୍କ ଫ୍ୟାନ୍ସ ସହଜେ ଗ୍ରହଣ କରିପାରି ନଥିବା ବେଳେ ସେ ବି ଖୋଲିଛନ୍ତି ମୁହାଁ। ସୂଚନାଯୋଗ୍ୟ, ଇଣ୍ଡିଆନ ଆଇଡଲର ପ୍ରତିଯୋଗୀଙ୍କ ପ୍ରଦର୍ଶନକୁ ନେଇ କିଛି ଦିନ ହେଲା ସୋଶାଲ ମିଡିଆରେ ବିବାଦ ଲାଗି ରହିଛି। ଶୋ’ରେ ସ୍ୱର୍ଗତ କିଶୋର କୁମାରଙ୍କୁ ଶ୍ରଦ୍ଧାଞ୍ଜଳି ଉଦ୍ଦେଶ୍ୟରେ ଏକ ଏପିସୋଡ୍ ହୋଇଥିବା ବେଳେ ଏଥିରେ ଅତିଥି ଭାବେ ଯୋଗ ଦେଇଥିବା ତାଙ୍କ ପୁଅ ଅମିତ କୁମାରଙ୍କ ବୟାନକୁ ନେଇ ଆରମ୍ଭ ହୋଇଥିଲା ବିବାଦ । ଏହି ଏପିସୋଡ୍ରେ ପ୍ରତିଯୋଗୀଙ୍କ ପ୍ରଦର୍ଶନକୁ ବହୁ ଦର୍ଶକ ଗ୍ରହଣ କରିପାରି ନଥିଲା ବେଳେ ସୋଶାଲ୍ ମିଡିଆରେ ଟ୍ରୋଲ୍ ମଧ୍ୟ କରାଯାଇଥିଲା। ଏପରିକି ଖରାପ ପରଫରମାନ୍ସ ସତ୍ତ୍ୱେ ଅମିତ କ’ଣ ପାଇଁ ପ୍ରତିଯୋଗୀଙ୍କୁ ପ୍ରଶଂସା କରିଥିଲେ ବୋଲି ପ୍ରଶ୍ନ କରାଯାଇଥିଲା। ଆଉ ଏକ ସାକ୍ଷାତକାରରେ ଅମିତ କହିଥିଲେ ଯେ ଶୋ’ର ମେକର୍ସ ଯେପରି କହିଥିଲେ ସେ ସେପରି କରିଥିଲେ। ଅମିତଙ୍କ ବୟାନ ପରେ ଇଣ୍ଡିଆନ ଆଇଡଲ ଶୋ ମେକର୍ସ ଧୋକା ଦେଉଥିବା ଅଭିଯୋଗ ହୋଇଥିଲା l ତେବେ ଶୋ’ରୁ ବାହାରିବା ପରେ ଏନେଇ ଖୋଲାଖୋଲି ନିଜ ମତ ରଖିଛନ୍ତି ଅଞ୍ଜଳି l ସେ କହିଛନ୍ତି, ଅମିତ କୁମାରଙ୍କ ଏପରି ବୟାନ ଯୋଗୁ କାହାକୁ ଖରାପ ଲାଗି ନଥିଲା। ସମସ୍ତେ ନିଜ ଗାୟକି ଉପରେ ଅଧିକ ଫୋକସ କରିଥିଲେ। ଏଥିସହ ସେ କହିଛନ୍ତି, ଅମିତ କୁମାରଙ୍କୁ ଆମ ଗୀତ ଭଲ ଲାଗି ନଥିଲା l ହେଲେ ତାଙ୍କ ଟିପ୍ପଣୀକୁ ନେଇ ଆମେ କେହିବି ବିଚଳିତ ହୋଇ ନଥିଲୁ l ଆମେ ତାଙ୍କମତକୁ ସମ୍ମାନ ଜଣାଇ ସେହି ହିସାବରେ ନିଜକୁ ପ୍ରସ୍ତୁତ କରିଥିଲୁ l ଅମିତ କୁମାର ନିଜ ବ୍ୟକ୍ତିଗତ ମତ ରଖିବାକୁ ସ୍ୱାଧୀନ l ଆମେମାନେ ତାଙ୍କ ଆଲୋଚନା ଦ୍ୱାରା ପ୍ରେରିତ ହୋଇ ଅଧିକ ପରିଶ୍ରମ କରି ଭଲ ପରଫର୍ମ କରିବାକୁ ସ୍ଥିର କରିଥିଲୁ l
