ଜୀବିକା ଛଡ଼େଇ ନେଇଛି କରୋନା..!

!!! କୋଲନରା ବ୍ଲକରୁ ପୃଥିରାଜ ମହାନ୍ତି ଓ ମୋନଜ ନାଲା ରିପୋର୍ଟ !!!

ଏଥର ସମ୍ଭାଳ (କୋଲନରା)- ମହାମାରୀ କରୋନା ର ଦ୍ଵିତୀୟ ଲହରୀ ସାରା ରାଷ୍ଟ୍ରକୁ ବିଚଳିତ କରିଦେଇଛି । କିଏ ପେଟ ପାଟଣା ପାଇଁ ଗାଁ ଛାଡି ଅନ୍ୟ ରାଜ୍ୟ କୁ ତ କିଏ ଜିଲ୍ଲା ଛାଡ଼ି ଅନ୍ୟ ଜିଲ୍ଲା କୁ ଯାଇ ନିଜ ପରିବାର ପ୍ରତି ପୋଷଣ କରୁଥିବା ଦେଖିବାକୁ ମିଳିଛି ।
ରାୟଗଡା ଜିଲ୍ଲା କୋଲନରା ଠାରେ ଜଣେ ବୃଦ୍ଧ ଲୋକ କଳାହାଣ୍ଡି ଜିଲ୍ଲାର କସୁର ପଡା ଗ୍ରାମର ବାବୁଲାଲ ରହିବାର ବ୍ୟକ୍ତି ଜଣକ ଜୋତା ସିଲେଇ ନିଜର ପରିବାର ଚଳାଉ ଥିବା କହିଛନ୍ତି । ବର୍ତ୍ତମାନ କରୋନା କଟକଣା ଜାରି ହେଇଥିବା ବେଳେ ଦୋକାନ ବଜାର ବନ୍ଦ ରହିଛି। ପ୍ରତିଦିନ ବଜାର କୁ ଯାଇ ଜୋତା ସିଲେଇଲେ ପରିବାର ଚାଲେ । ରାଜ୍ୟ ସରକାର ମାସିକ ୧୦ କେଜି ଚାଉଳ ଦେଉଛନ୍ତି । ୧୦ କେଜି ଚାଉଳ ରେ କେମିତି ଚଳିବ ମୋ ପରିବାର ନିଜେ ଯଦି ଜୋତା ସିଲେଇବା କାମ ନ କରେ ତେବେ ୨୦ ଦିନ ଭୋକିଲା ରହିବାକୁ ପଡ଼ିବ ବୋଲି କହିଛନ୍ତି । ସରକାର ଆମ ପ୍ରତି ନଜର ଦେଇ କଣ ସାହାଯ୍ୟ କରିବେ ଆମେ ଦୁଇ ବୁଢ଼ା ବୁଢ଼ୀ ବଞ୍ଚିପାରିବୁ ବୋଲି ମଧ୍ୟ ରହିଦାର କହିଛନ୍ତି । କରୋନା କଟକଣା ରେ ପୁଣି ଏତେ ବାଟ କଳାହାଣ୍ଡି ଜିଲ୍ଲା ରୁ ରାୟଗଡା ଜିଲ୍ଲା କୁ ଆସି ପେଟ ପାଇଁ ଆସି ନିଜ ଘରକୁ ଫେରି ପାରୁ ନାହାଁନ୍ତି । ଜୀବିକା ଆଶାରେ ରେ ଆସିବା ବେଳେ କରୋନା ଗରିବ ଲୋକମାନଙ୍କ ପାଇଁ ଦାଉ ସାଜି ପେଟରେ ଘଇଟା ମାରୁଛି। କେମିତି ଚଳିବୁ ଚାରିଆଡ଼େ କରୋନା ର ଚିତ୍କାର । ବଞ୍ଚିବା ଆଶା ନେଇ ଏତେ ବାଟ ଆସିଥିଲି । କରୋନା କେତେବେଳେ ଯେ ବାଟ ଅଗାଳି ଜୀବନ ନେଇଯିବ କିଏ ବା କହିବ ସବୁ ଇଶ୍ୱର ଙ୍କ ଇଚ୍ଛା ବୋଲି ଭାଙ୍ଗି ପଡିଛନ୍ତି ରହିଦାର। ମୋର ୫୨ ବର୍ଷ ବୟସରେ ଚାକୁଣ୍ଡେ ପେଟ ପୋଷିବା ପାଇଁ ଏତେ ବାଟ ଆସିଥିଲି ବୋଲି ବିକଳ ହୃଦୟରେ ମର୍ମାହତ ହେଇ ପଡିଛନ୍ତି ବାବୁଲାଲ ରହିବାର ।

ନବୀନ, ରାହୁଲ୍ ଓ ମମତାଙ୍କୁ ବୁଝାଇ ଦେଲେ ସୀତାରମଣ..!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – କରୋନା ଟିକା ଉପରୁ ୫ ପ୍ରତିଶତ ଜିଏସଟି ଏବଂ କରୋନା ଔଷଧ ଏବଂ ଅକ୍ସିଜେନ କନସେନଟ୍ରେଟର ଉପରୁ ୧୨ ପ୍ରତିଶତ ଜିଏସଟି ଛାଡ଼ି କରିବାକୁ ବିଭିନ୍ନ ନେତା ଦାବି କରିଥିଲେ। ଏବେ ଏହାର ଜବାବ ଦେଇଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ। ସିରିଜ୍ ଟ୍ୱିଟ୍ କରି ସୀତାରମଣ ସିଧାସିଧା କହିଛନ୍ତି ଯେ ଏହି ଜିନିଷ ଗୁଡ଼ିକ ଉପରେ ଜିଏସଟି ସଂପୂର୍ଣ୍ଣ ଭାବରେ ଛାଡ଼ କରାଯାଇପାରିବ ନାହିଁ। ଏହାର କାରଣ କହିବାକୁ ଯାଇ ସୀତାରମଣ କହିଛନ୍ତି, ଯଦି ଜିଏସଟି ଛାଡ଼ ହେବ ତାହେଲେ ଯେଉଁମାନେ ଏହି ସବୁ ଜିନିଷ ତିଆରି କରୁଛନ୍ତି ସେମାନେ ଇନପୁଟ ଟ୍ୟାକସ କ୍ରେଡିଟର ଲାଭ ଉଠାଇ ପାରିବେ ନାହିଁ। ଆଉ ଏଭଳି ହେଲେ ଖାଉଟିଙ୍କ ଉପରେ ଦର ବୋଝ ଅଧିକ ପଡ଼ିବ। ତେଣୁ ଜିଏସଟି ଛାଡ କରାଯାଇପାରିବ ନାହିଁ।କେନ୍ଦ୍ର ଅର୍ଥମନ୍ତ୍ରୀ ଆଜି ଏହି ଟ୍ୱିଟ୍ କରିବା ପୂର୍ବରୁ ଏହି ପ୍ରସଙ୍ଗରେ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କଂଗ୍ରେସ ନେତା ରାହୁଲ୍ ଗାନ୍ଧୀ, ଆଉ ଶେଷରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କରୋନା ଟିକା ଉପରୁ ଜିଏସଟି ଛାଡ଼ କରିବାକୁ ଦାବି କରିଥିଲେ। ନବୀନ କେନ୍ଦ୍ର ସରକାରଙ୍କୁ ଚିଠି ଲେଖି କହିଥିଲେ ସରକାର ଯଦି ୫ ପ୍ରତିଶତ ଜିଏସଟି ଛାଡ଼ କରିବ ତାହେଲେ ପ୍ରତି ରାଜ୍ୟ ଡୋଜ ପିଛା ୧୫ରୁ ୨୦ ଟଙ୍କା କମ୍ ଆର୍ଥିକ ବୋଝ ବହନ କରିବ। ଆଉ ଏହି ପଇସାରେ ଅଧିକରୁ ଅଧିକ ଟିକାକରଣ କରାଯାଇପାରିବ। ତେବେ ସୀତାରମଣ କିନ୍ତୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଟିକା ଉପରୁ ଜିଏସଟି ଛାଡ଼ କରିବାକୁ ଦାବି କରିବା ପରେ ଟ୍ୱିଟ୍ କରି ଉତ୍ତର ରଖିଛନ୍ତି। ଏହା ପୂର୍ବରୁ ଗତକାଲି ରାହୁଲ୍ ଗାନ୍ଧୀ ଟ୍ୱିଟ୍ କରି ଜିଏସଟି ଛାଡ଼ କରିବାକୁ ଦାବି କରିଥିଲେ। ତେବେ ଅର୍ଥମନ୍ତ୍ରୀ କହିଛନ୍ତି ଯେ ଯଦି ଟିକା ଉପରେ ଟିକସ ସମ୍ପୂର୍ଣ୍ଣ ଛାଡ କରାଯାଏ, ତାହେଲେ ଟିକା ଉତ୍ପାଦନକାରୀମାନେ ଇନପୁଟ ଟ୍ୟାକ୍ସ କ୍ରେଡିଟ ପାଇପାରିବେ ନାହିଁ ଏବଂ ଗ୍ରାହକଙ୍କ ଉପରେ ଏହାର ଭାର ବଢ଼ିବ ଆଉ ମୂଲ୍ୟ ବୃଦ୍ଧି ପାଇବ। ଏହା ବ୍ୟତୀତ କରୋନା ସହ ଜଡିତ ଅନ୍ୟାନ୍ୟ ଜିନିଷ ଉପରେ କଷ୍ଟମ୍ ଡ୍ୟୁଟି ଏବଂ ସ୍ୱାସ୍ଥ୍ୟ ସେସ୍ ଛାଡ କରିଛନ୍ତି କେନ୍ଦ୍ର ସରକାର। ଏଥିମଧ୍ୟରେ ରେମେଡେସଭିର ଏପିଆଇ, ରେମେଡେସଭିର ଇଞ୍ଜେକ୍ସନ, ଅକ୍ସିଜେନ, ଅକ୍ସିଜେନ କନସେଣ୍ଟରେଟର, ଅକ୍ସିଜେନ ଜେନେରେଟର ଇତ୍ୟାଦି ମୋଟ୍ ୨୩ଟି ଜିନିଷ ରହିଛି। ସୂଚନାଯୋଗ୍ୟ କେନ୍ଦ୍ର ସରକାର ଟିକା ଉପରେ ସର୍ବନିମ୍ନ ୫% ଏବଂ କୋଭିଡ ଔଷଧ ଉପରେ ସର୍ବାଧିକ ୧୨% ଟିକସ ଲାଗୁ କରିଛନ୍ତି। ଅର୍ଥମନ୍ତ୍ରୀ କହିଛନ୍ତି ଯେ ଯଦି କୌଣସି ସାମଗ୍ରୀ ଉପରେ ୧୦୦ ଟଙ୍କାର ଜିଏସଟି ଆଦାୟ କରାଯାଏ, ତେବେ କେନ୍ଦ୍ର ଏବଂ ରାଜ୍ୟ ୫୦-୫୦ ଟଙ୍କା ସେଣ୍ଟ୍ରାଲ ଜିଏସଟି ଏବଂ ଷ୍ଟେଟ ଜିଏସଟି ଆକାରରେ ଗ୍ରହଣ କରିବେ। ପରେ ସିଜିଏସଟିର ୪୧ ପ୍ରତିଶତ ପୁନର୍ବାର ରାଜ୍ୟମାନଙ୍କୁ ଦିଆଯିବ। ଏହିପରି, ରାଜ୍ୟଗୁଡିକ ୧୦୦ ଟଙ୍କା ଟିକସରେ ୭୦.୫୦ ପଇସା ପାଉଛନ୍ତି।

ଅକ୍ସିଜେନ ଯୋଗାଣକୁ ନେଇ ବାହାଦୂରୀ: ବିଜେଡି ସରକାରର ନଗ୍ନ ଚିତ୍ର ପଦାରେ ପକାଇଲେ ସରକାରୀ ଉପମୁଖ୍ୟ ସଚେତକ…!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର)- କରୋନା ମହାମାରୀର ଦ୍ୱିତୀୟ ପର୍ଯ୍ୟାୟ ଭୟାବହତା ଲାଗି ରହିଥିବାବେଳେ ନିଜସ୍ୱ ଗୋଟିଏ ବି ଅକ୍ସିଜେନ୍ ପ୍ଲାଣ୍ଟ ନଥାଇ ମଧ୍ୟ ଅନ୍ୟ ରାଜ୍ୟକୁ ଅକ୍ସିଜେନ୍ ଯୋଗାଣର ମାର୍ଗ ପ୍ରସ୍ତ କରି ରାଜ୍ୟର କ୍ଷମତାସୀନ ବିଜେଡି ସରକାର ରାତାରାତି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲେ। ଜାତୀୟ ଗଣମାଧ୍ୟମ ସମେତ ଦେଶର ବିଭିନ୍ନ ଭାଗରୁ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଶଂସାର ସୁଅ ଛୁଟିଥିଲା। ଯଦିଓ ରାଜ୍ୟରେ ଅକ୍ସିଜେନ୍ ଅଭାବରୁ ଜିଲ୍ଲା ମେଡିକାଲଗୁଡ଼ିକରେ କୋଭିଡ୍ ରୋଗୀ ପ୍ରାଣ ହରାଉଥିବାର ଅଭିଯୋଗ ହେଉଥିଲା । ତଥାପି ରାଜ୍ୟ ସରକାର ଅକ୍ସିଜେନ୍ ଅଭାବ ଅଭିଯୋଗକୁ ଏଡ଼ାଇ ଯାଉଥିଲେ। କିନ୍ତୁ ଅନ୍ୟ ରାଜ୍ୟକୁ ଅକ୍ସିଜେନ୍ ଯୋଗାଣକୁ ନେଇ ବିଜେଡି ସରକାରର ବାହାଦୂରୀର ନଗ୍ନ ଚିତ୍ରକୁ ସରକାରୀ ଦଳର ଉପମୁଖ୍ୟ ସଚେତକ ରୋହିତ ପୂଜାରୀ ନିଜେ ସୋସିଆଲ ମିଡିଆ ମାଧ୍ୟମରେ ପଦାରେ ପକାଇଛନ୍ତି। ନିଜ ଜିଲ୍ଲା ସମ୍ବଲପୁର ପାଇଁ ଅକ୍ସିଜେନ୍ ଯୋଗାଣ କରିବାକୁ ସୋସିଆଲ ମିଡିଆର ସହାୟତା ନେଇଛନ୍ତି। ୫୭.୧ ପ୍ରତିଶତ ସହ କୋଭିଡ୍ ସଂକ୍ରମଣର ସାପ୍ତାହିକ ହାରରେ ସମ୍ବଲପୁର ଜିଲ୍ଲା ଦେଶର ପ୍ରଥମ ୧୦ଟି ଜିଲ୍ଲାରେ ରହିବାର ଉଦବେଗଜନକ ସ୍ଥିତି ମଧ୍ୟରେ ଶ୍ରୀ ପୂଜାରୀଙ୍କ ଏଭଳି ଅନୁରୋଧ ନିଶ୍ଚିତ ଭାବେ ରାଜ୍ୟର ବିଜେଡି ସରକାରକୁ ଲଜ୍ଜାଜନକ ପରିସ୍ଥିତିର ସମ୍ମୁଖୀନ କରାଇଛି। ମିଳିଥିବା ସୂଚନା ଅନୁସାରେ, ସରକାରୀ ଉପମୁଖ୍ୟ ସଚେତକ ତଥା ରେଢାଖୋଲର ବିଜେଡି ବିଧାୟକ ରୋହିତ ପୂଜାରୀ ଆଜି ଅପରାହ୍ନ ୪ଟା ୨୩ମିନିଟରେ ନିଜ ଟ୍ୱିଟର ମାଧ୍ୟମରେ ସିଧାସଳଖ ତାଙ୍କ ଜିଲ୍ଲା ସମ୍ବଲପୁରକୁ ବିଭିନ୍ନ ବର୍ଗର ଦୁଇ ହଜାର ଅକ୍ସିଜେନ୍ ସିଲିଣ୍ଡର ଓ ଅକ୍ସିଜେନ୍ ମାସ୍କ ଯୋଗାଣ କରିବାକୁ ଅନୁରୋଧ କରିଛନ୍ତି। ସେ ଜିଲ୍ଲାରେ ଅକ୍ସିଜେନ୍ ଅଭାବ ସମ୍ପର୍କରେ ଟ୍ୱିଟ୍ କରି କହିଛନ୍ତି ଯେ, ଡି-ଟାଇପ୍ ଅକ୍ସିଜେନ୍ ସିଲିଣ୍ଡର(୪୭.୬ ଲିଟର-ଜମ୍ବୋ)- ଏକ ହଜାରଟି, ବି-ଟାଇପ୍ ଅକ୍ସିଜେନ୍ ସିଲିଣ୍ଡର(୧୦ଲିଟର-ମିଡିୟମ) ଏକ ହଜାରଟି, ବି-ଟାଇପ୍ ସିଲିଣ୍ଡର ସହ ଫିଟିଂ ହୋଇଥିବା ଅକ୍ସିଜେନ୍ ଫ୍ଲୋ ମିଟର ୫୦୦ଟି ଏବଂ ୫ହଜାର କିମ୍ବା ତା’ଠୁ ଅଧିକ ଅକ୍ସିଜେନ୍ ମାସ୍କ ଆମକୁ ଆବଶ୍ୟକତା ରହିଛି। ଜିଲ୍ଲା ପ୍ରଶାସନକୁ ସିଧାସଳଖ ଏହା ଯୋଗାଇବାକୁ ସେ ଅନୁରୋଧ କରିଛନ୍ତି। ରାଜ୍ୟର ବିଭିନ୍ନ ଭାଗରେ ଅକ୍ସିଜେନ୍ ଅଭାବରୁ କୋଭିଡ୍ ରୋଗୀଙ୍କ ପ୍ରାଣ ଯାଉଥିଲେ ମଧ୍ୟ ବିଜେଡି ସରକାର ନିଜର ଭାବମୂର୍ତ୍ତି କ୍ଷୂଣ୍ଣ ହେବା ଭୟରେ ଏହାକୁ ସ୍ୱୀକାର କରୁନଥିଲେ ତଥା ପର୍ଯ୍ୟାପ୍ତ ପରିମାଣର ଅକ୍ସିଜେନ୍ ରାଜ୍ୟର ହସ୍ପିଟାଲଗୁଡ଼ିକୁ ଯୋଗାଇ ଦିଆଯାଉଛି ବୋଲି କହି ଆସୁଥିଲେ। କିନ୍ତୁ ଶ୍ରୀ ପୂଜାରୀ ଟ୍ୱିଟର ମାଧ୍ୟମରେ ଅକ୍ସିଜେନର ଆବଶ୍ୟକତା ଦର୍ଶାଇ ରାଜ୍ୟ ସରକାରଙ୍କ ଏଭଳି ଦାବି ଉପରେ ପ୍ରଶ୍ନବାଚୀ ସୃଷ୍ଟି କରିଛନ୍ତି। କ୍ଷମତାସୀନ ବିଜେଡି ଆଉ ପାଦେ ଆଗେଇ ଯାଇ ନିଜର ଅଫିସିଆଲ ଟ୍ୱିଟର ଆକାଉଣ୍ଟରୁ ଆଜି ସନ୍ଧ୍ୟା ୬ଟା ୦୫ମିନିଟରେ ଏକ ଟ୍ୱିଟ୍ କରି କହିଛି ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୃଢ଼ ନେତୃତ୍ୱରେ ଅକ୍ସିଜେନ ଟ୍ୟାଙ୍କରଗୁଡ଼ିକର ସହଜ ଯାତାୟତ ପାଇର୍ ବ୍ୟାପକ ବ୍ୟବସ୍ଥା କରାଯାଇଛି। ପ୍ରତିଟି ଜୀବନର ସୁରକ୍ଷାକୁ ଗୁରୁତ୍ୱ ଦେଇ କୋଭିଡ୍ ସଙ୍କଟ ସମୟରେ ବିଭିନ୍ନ ରାଜ୍ୟକୁ ୪୭୩ଟି ଟ୍ୟାଙ୍କରରେ ୮୬୮୯ମେଟ୍ରିକ ଟନ ଅକ୍ସିଜେନ୍ ପଠାଇ ଓଡ଼ିଶା ସହଯୋଗର ହାତ ବଢ଼ାଇଛି। ଏହାସହିତ ବିଜେଡି ପକ୍ଷରୁ କେଉଁ ରାଜ୍ୟକୁ କେତେ ଅକ୍ସିଜେନ୍ ଦିଆଯାଇଛି ତା’ର ଏକ ତାଲିକା ମଧ୍ୟ ଉଲ୍ଲେଖ ରହିଛି। ତେବେ ପ୍ରଶ୍ନ ଉଠୁଛି, ଗତ ୨ଦୁଇ ଦଶନ୍ଧି ଧରି କ୍ଷମତାରେ ରହିବା ସତ୍ତ୍ୱେ ନିଜସ୍ୱ ଗୋଟିଏ ବି ଅକ୍ସିଜେନ୍ ଉତ୍ପାଦନ ପ୍ଲାଣ୍ଟ ନିର୍ମାଣ କରିନଥିବା ବିଜେଡି ସରକାର ଏବେ ରାଜ୍ୟର ଘରୋଇ ସଂସ୍ଥାଗୁଡ଼ିକର ଅକ୍ସିଜେନକୁ ଯୋଗାଣ କରି ବାହାବା ନେଉଥିବାବେଳେ କୋଭିଡ୍ ମହାମାରୀ ବିପତ୍ତିବେଳେ ରାଜ୍ୟବାସୀଙ୍କ ସ୍ୱାର୍ଥ ପ୍ରତି କାହିଁକି ଆଖିବୁଜି ଦେଇଛନ୍ତି। ବିଜେପି ରାଜ୍ୟ ସାଧାରଣ ସମ୍ପାଦିକା ଲେଖାଶ୍ରୀ ସାମନ୍ତସିଂହାର କହିଛନ୍ତି ଯେ, ବହି ଯାଉଥିବା ଗଙ୍ଗାରେ ହାତ ଧୋଇବାର ବାହାଦୂରୀ ନେଉ ନେଉ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଧରାପଡ଼ିଯାଇଛନ୍ତି। ଇସ୍ପାତ ଶିଳ୍ପର ଅକ୍ସିଜେନକୁ ନିଜର କହୁଥିବାବେଳେ ସିଲିଣ୍ଡର ବି ତାଙ୍କର ନୁହେଁ ବୋଲି ଏବେ ଜଣାପଡ଼ିଲା। ଓଡ଼ିଶାର କୋଭିଡ୍ ପରିଚାଳନାର ପ୍ରକୃତ ସ୍ଥିତି ଦାଣ୍ଡରେ ପକାଇଛନ୍ତି ଖୋଦ୍ ବିଜୁ ଜନତା ଦଳର ଉପମୁଖ୍ୟ ସଚେତକ ତଥା ରେଢ଼ାଖୋଲ ବିଧାୟକ ରୋହିତ ପୂଜାରୀ । ଅକ୍ସିଜେନ୍ ଯୋଗାଣ ପାଇଁ ଦୁନିଆ ଆଗରେ ‘ମହାପୁରୁଷ’ ସାଜିଥିବା ନବୀନବାବୁଙ୍କ ନିଜ ରାଜ୍ୟରେ ଲୋକେ ଅକ୍ସିଜେନ୍ ବିନା ମରୁଛନ୍ତି। ଆଉ ତାଙ୍କ ବିଧାୟକ ଦୁନିଆ ଆଗରେ ହାତ ପାତୁଛନ୍ତି ବୋଲି ଶ୍ରୀ ସାମନ୍ତସିଂହାର କଟାକ୍ଷ କରି କହିଛନ୍ତି।

ଭୋଟିଂ ମାଧ୍ୟମରେ କଂଗ୍ରେସ ସଭାପତି ବାଛିବ, ରେସରେ ଏହି ନେତା…!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ଏଥର ଭୋଟିଂ ଜରିଆରେ କଂଗ୍ରେସ ଦଳର ପରବର୍ତ୍ତୀ ସଭାପତି ଚୟନ କରିବ। ସୂଚନାନୁସାରେ ଜୁନ୍ ୨୩ରେ ଆଭ୍ୟନ୍ତରୀଣ ମତଦାନ ମାଧ୍ୟମରେ କଂଗ୍ରେସ ଦଳର ସଭାପତି ନିର୍ବାଚିତ ହେବେ ବୋଲି କଂଗ୍ରେସ ୱାର୍କିଂ କମିଟିରେ ନିଷ୍ପତ୍ତି ନିଆଯାଇଥିବା ସୂଚନା ରହିଛି। ଚାରି ରାଜ୍ୟ ଏବଂ ଗୋଟିଏ କେନ୍ଦ୍ର ଶାସିତ ଅଞ୍ଚଳରେ ନିର୍ବାଚନ ଫଳାଫଳ ପରେ ଆଜି କଂଗ୍ରେସ ୱାର୍କିଂ କମିଟି ବୈଠକ ବସିଛି। ଏହି ସମୟରେ ଦଳର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀ କହିଥିଲେ ନିର୍ବାଚନ ଫଳାଫଳ ପରେ ଏହା ସ୍ପଷ୍ଟ ଯେ ଦଳରେ ତୃଣମୂଳ ସ୍ତରରେ ସୁଧାର ଆବଶ୍ୟକ। କଂଗ୍ରେସ ୱାର୍କିଂ କମିଟି ବୈଠକକୁ ସମ୍ବୋଧିତ କରି ସୋନିଆ ଗାନ୍ଧୀ କହିଥିଲେ, ଦଳର ପ୍ରଦର୍ଶନରୁ ସ୍ପଷ୍ଟ ଯେ ଆମକୁ ଆଗକୁ ବଢ଼ିବାକୁ ହେବ। ଏଥିପାଇଁ ସୁଧାରର ଆବଶ୍ୟକ ରହିଛି। ନିର୍ବାଚନରେ ଯେଉଁ ଫଳାଫଳ ଆସିଛି ତାର ସମସ୍ତ ଦିଗ ଉପରେ ଆଲୋଚନା ହେବା ଦରକାର। ଏଥିପାଇଁ ସେ ଏକ କମିଟି ଗଠନ କରି ପରାଜୟର କାରଣ ବାବଦରେ ବିସ୍ତୁତ ରିପୋର୍ଟ ଦେବାକୁ କହିଛନ୍ତି। ଆସାମ ଏବଂ କେରଳରେ ପରାଜୟ ଏବଂ ପଶ୍ଚିମବଙ୍ଗରେ ମୂଳପୋଛ ହେବା ଅତ୍ୟନ୍ତ ନୈରାଶ୍ୟଜନକ ବୋଲି ସେ କହିଛନ୍ତି। ସୂଚନାଯାଗ୍ୟ, ୨୦୧୯ରେ ସାଧାରଣ ନିର୍ବାଚନରେ ନୈରାଶ୍ୟଜନକ ପ୍ରଦର୍ଶନ ପାଇଁ ରାହୁଲ୍ ଗାନ୍ଧୀ ଦଳର ସଭାପତି ପଦରୁ ଇସ୍ତଫା ଦେଇଥିଲେ। ଏହାପରେ ସୋନିଆ ଗାନ୍ଧୀ ଦଳର ଅନ୍ତରୀଣ ଅଧ୍ୟକ୍ଷା ରହିଛନ୍ତି। ହେଲେ ପୂର୍ଣ୍ଣ ସଭାପତି ଭାବରେ ଥିବା ଏହି ପଦ ଖାଲି ପଡ଼ିଛି। ଏହାରି ଭିତରେ ଦଳର ବରିଷ୍ଠ ନେତା କପିଲ ଶିବଲ, ଗୁଲାମ ନବୀ ଆଜାଦ, ମନୀଷ ତିଓ୍ୱାରୀ ପ୍ରମୁଖ ୨୩ ନେତା ଦଳର ନୀତିକୁ ନେଇ ଅସନ୍ତୁଷ୍ଟ ପ୍ରକାଶ କରିଥିଲେ। ଆଉ କହିଥିଲେ ଦଳରେ ଉପରୁ ତଳ ପରିବର୍ତ୍ତନ ହେବା ଆବଶ୍ୟକ। ହେଲେ ଏହାକୁ ସହଜରେ ଗ୍ରହଣ କରିନଥିଲେ ସୋନିଆ ଗାନ୍ଧୀ। ଆଉ ୨୩ ନେତାଙ୍କୁ କଥାକୁ ଅଣଦେଖା କରିଥିଲେ। ସୋନିଆ ଗାନ୍ଧୀ ଅସୁସ୍ଥ ଅଛନ୍ତି। ତାଙ୍କର ନେତୃତ୍ୱ ବେଳେ ରାହୁଲ ଗାନ୍ଧୀ ହିଁ ପ୍ରମୁଖ ନେତା ଭାବରେ ମତ ରଖୁଛନ୍ତି। କିଛି ଦିନ ହେବ ରାହୁଲ ଗାନ୍ଧୀ ମଧ୍ୟ ସରକାର ବିରୋଧରେ ପ୍ରତିଦିନ ଟ୍ୱିଟ୍ କରିବା ପାଖରୁ ଆରମ୍ଭ କରି ବିଭିନ୍ନ ପ୍ରସଙ୍ଗରେ ମୋଦି ସରକାରକୁ ଘେରୁଛନ୍ତି। ଏଯାବତ ଦଳର ଅନ୍ୟତମ ପ୍ରମୁଖ ନେତା ମଧ୍ୟ ଗାନ୍ଧୀ ପରିବାର ପ୍ରତି ଆନୁଗତ୍ୟ ରଖିଛନ୍ତି। ଆଉ ରାହୁଲ ମଧ୍ୟ ବିଭିନ୍ନ ନିର୍ବାଚନୀ ପ୍ରଚାର ବେଳେ ଦଳ ପକ୍ଷରୁ ପ୍ରମୁଖ ନେତା ଭାବରେ ରାଲି କରୁଥିଲେ। ତେଣୁ ଦଳ ଆଭ୍ୟନ୍ତରୀଣ ମତଦାନ ଜରିଆରେ ପୁଣିଥରେ ରାହୁଲ ଗାନ୍ଧୀଙ୍କୁ ଦଳର ସଭାପତି ଭାବରେ ନିର୍ବାଚିତ କରିପାରେ।

ରେକର୍ଡ ସ୍ତରରେ ପହଞ୍ଚିଲା ତୈଳଦର, ଆଉ ଗୋଟିଏ ରାଜ୍ୟରେ ପେଟ୍ରୋଲ ୧୦୦ ଟଙ୍କା ଟପିଲା..!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ଗୋଟିଏ ପଟେ କରୋନା ସଂକ୍ରମଣ ଯୋଗୁ ଲୋକମାନେ କଟକଣା ମଧ୍ୟରେ ରହିଥିବା ବେଳେ ସେମାନଙ୍କ ଉପରେ ମହଙ୍ଗା ମାଡ଼ ହେବାରେ ଲାଗିଛି। ଦୁଇ ଦିନର ବିରତୀ ପରେ ଆଜି ପେଟ୍ରୋଲ ଓ ଡିଜେଲ ଦରରେ ବୃଦ୍ଧି ଘଟିଛି। ବର୍ଦ୍ଧିତ ଦର ପରେ ତୈଳଦର ରେକର୍ଡ ସ୍ତରରେ ପହଞ୍ଚି ଯାଇଛି। ସେହିପରି ରାଜସ୍ଥାନ ଓ ମଧ୍ୟପ୍ରଦେଶ ପରେ ଆଉ ଗୋଟିଏ ରାଜ୍ୟରେ ପେଟ୍ରୋଲର ଲିଟର ପିଛା ଦର ୧୦୦ ଟଙ୍କା ପାର କରିଯାଇଛି। ରାଜଧାନୀ ଦିଲ୍ଲୀରେ ଆଜି ପେଟ୍ରୋଲର ଲିଟର ପିଛା ଦର ୨୬ ପଇସା ବୃଦ୍ଧି ପାଇଛି। ଫଳରେ ଦିଲ୍ଲୀରେ ପେଟ୍ରୋଲର ଲିଟର ପିଛା ଦର ୯୧.୨୭ ଟଙ୍କାରୁ ବୃଦ୍ଧି ପାଇ ୯୧.୫୩ ଟଙ୍କାରେ ପହଞ୍ଚି ଯାଇଛି। ସେହିପରି ଡିଜେଲର ଲିଟର ପିଛା ଦର ୩୩ ପଇସା ମହଙ୍ଗା ହୋଇଛି। ଏହି କାରଣରୁ ରାଜଧାନୀରେ ଆଜି ଡିଜେଲ ଲିଟର ପିଛା ୮୨.୦୬ ଟଙ୍କାରେ ବିକ୍ରି ହେଉଛି। ଗତକାଲି ଏହା ୮୧.୭୩ ଟଙ୍କା ରହିଥିଲା। ଦେଶର ଆର୍ଥିକ ରାଜଧାନୀ ମୁମ୍ବାଇରେ ପେଟ୍ରୋଲ ୧୦୦ ଟଙ୍କା ପାଖରେ ପହଞ୍ଚି ଯାଇଛି। ଡିଜେଲ ଦର ମଧ୍ୟ ୯୦ ଟଙ୍କା ଅତିକ୍ରମ କରିବାକୁ ବସିଛି। ଆଜି ମୁମ୍ବାଇରେ ପେଟ୍ରୋଲର ଲିଟର ପିଛା ଦର ୯୭.୮୬ ଟଙ୍କା ଓ ଡିଜେଲ ଦର ୮୯.୧୭ ଟଙ୍କା ରହିଛି। ଚେନ୍ନାଇରେ ପେଟ୍ରୋଲ ଓ ଡିଜେଲର ଲିଟର ପିଛା ଦର ଯଥାକ୍ରମେ ୯୩.୩୮ ଟଙ୍କା ଓ ୮୬.୯୬ ଟଙ୍କା ରହିଛି। କୋଲକାତାରେ ପେଟ୍ରୋଲର ଲିଟର ୯୧.୬୬ ଟଙ୍କା ଓ ଡିଜେଲର ଲିଟର ପିଛା ଦର ୮୪.୯୦ ଟଙ୍କା ରହିଛି। କିଛି ଦିନ ତଳେ ରାଜସ୍ଥାନ ଓ ମଧ୍ୟପ୍ରଦେଶରରେ ପେଟ୍ରୋଲର ଲିଟର ପିଛା ଦର ୧୦୦ ଟଙ୍କା ପାର କରିଥିଲା। ଆଜି ଏହି ତାଲିକାରେ ମହାରାଷ୍ଟ୍ର ଯୋଡ଼ି ହୋଇଯାଇଛି। ମହାରାଷ୍ଟ୍ରର ପରବାହାନୀରେ ଆଜି ପେଟ୍ରୋଲର ଲିଟର ପିଛା ଦର ୧୦୦.୨୦ ଟଙ୍କା ରହିଛି। ପୂର୍ବରୁ ରାଜସ୍ଥାନର ଶ୍ରୀ ଗଙ୍ଗାନଗରରେ ପେଟ୍ରୋଲର ଲିଟର ପିଛା ଦର ୧୦୨.୪୨ ଟଙ୍କା ଓ ମଧ୍ୟପ୍ରଦେଶର ଅନୁପ୍ପୁରରେ ଏହା ଲିଟର ପିଛା ୧୦୨.୧୨ ଟଙ୍କାରେ ବିକ୍ରି ହେଉଥିଲା। ସୂଚନାଯୋଗ୍ୟ, ଗତ ଗୋଟିଏ ସପ୍ତାହ ମଧ୍ୟରେ ତୈଳଦର ୫ଥର ବୃଦ୍ଧି ପାଇଲାଣି। ଏହି ସମୟରେ ପେଟ୍ରୋଲର ଲିଟର ପିଛା ଦାମ ୧.୧୪ ଟଙ୍କା ଓ ଡିଜେଲର ଦାମ ୧.୩୩ ମହଙ୍ଗା ହୋଇଛି। ମାର୍ଚ୍ଚ ୨୪ରୁ ଏପ୍ରିଲ ୧୫ ମଧ୍ୟରେ ସରକାର ଏକାଧିକ ଥର ଦର ହ୍ରାସ କରିଥିଲେ। ହେଲେ ଏବେ ବର୍ଦ୍ଧିତ ଦାମ ହ୍ରାସ ହୋଇଥିବା ଟଙ୍କାକୁ ଅତିକ୍ରମ କରିସାରିଲାଣି। ମାର୍ଚ୍ଚ ୨୪ରୁ ଏପ୍ରିଲ ୧୫ ମଧ୍ୟରେ ପେଟ୍ରୋଲ ୬୭ ପଇସା ଓ ଡିଜେଲ ୭୪ ପଇସା ହ୍ରାସ ପାଇଥିଲା।

ମମତାଙ୍କୁ ହରାଇଥିବା ଶୁଭେନ୍ଦୁଙ୍କୁ ବିଜେପି ଦେଲା ଗୁରୁ ଦାୟିତ୍ୱ…!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ପଶ୍ଚିମବଙ୍ଗ ବିଧାନସଭା ନିର୍ବାଚନରେ ​​ନନ୍ଦିଗ୍ରାମ ଆସନରୁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ପରାସ୍ତ କରିଥିବା ଶୁଭେନ୍ଦୁ ଅଧିକାରୀଙ୍କୁ ଗୁରୁ ଦାୟିତ୍ୱ ଦେଇଛି ବିଜେପି। ବିଧାନସଭାରେ ଶାସକ ଦଳକୁ କଡ଼ା ଜବାବ ଦେବା ପାଇଁ ବିଜେପି ଶୁଭେନ୍ଦୁଙ୍କୁ ବିରୋଧୀ ଦଳ ନେତା କରିଛି। ପୂର୍ବରୁ ଏହି ପଦ ପାଇଁ ଶୁଭେନ୍ଦୁ ଅଧିକାରୀଙ୍କ ବ୍ୟତୀତ ରାଜ୍ୟ ବିଜେପି ସଭାପତି ଦିଲୀପ ଘୋଷ ଏବଂ ମୁକୁଲ ରୟଙ୍କ ନାମ ଚର୍ଚ୍ଚା ହେଉଥିଲା। ବିରୋଧୀ ଦଳ ପଦବୀକୁ ନେଇ ଶୁଭେନ୍ଦୁ ଅଧିକାରୀ ଏବଂ ମୁକୁଲ ରୟଙ୍କ ଗୋଷ୍ଠୀ ମଧ୍ୟରେ ଭିତିରିଆ କନ୍ଦଳ ଆରମ୍ଭ ହୋଇଥିଲା ବୋଲି ବି ଚର୍ଚ୍ଚା ହେଉଛି। ଏମିତିକି ମୁକୁଲ ରୟ ଟିଏମସି କ୍ୟାମ୍ପକୁ ଫେରିଯିବେ ବୋଲି ଚର୍ଚ୍ଚା ହେଉଥିଲା। ହେଲେ ରୟ ଏହାକୁ ଖଣ୍ଡନ କରିଛନ୍ତି। ତେଣୁ ଦଳରେ ସୃଷ୍ଟି ହୋଇଥିବା ଫାଟ ଯେମିତି ଆଉ ବଡ଼ ନହୁଏ, ସେଥିପ୍ରତି କେନ୍ଦ୍ରୀୟ ବିଜେପି ପର୍ଯ୍ୟବେକ୍ଷକ ଭାବରେ କେନ୍ଦ୍ର ମନ୍ତ୍ରୀ ରବି ଶଙ୍କର ପ୍ରସାଦ ଏବଂ ଦଳର ଜାତୀୟ ସାଧାରଣ ସମ୍ପାଦକ ଭୁପେନ୍ଦ୍ର ଯାଦବଙ୍କୁ ନିଯୁକ୍ତ କରିଥିଲା। ଆଜି ଦଳର ବିଧାୟକଙ୍କ ସହିତ ରବିଶଙ୍କର ପ୍ରସାଦ ଆଲୋଚନା କରିବା ପରେ ଶୁଭେନ୍ଦୁ ଅଧିକାରୀଙ୍କ ନାମ ବିରୋଧୀ ଦଳ ନେତା ଭାବେ ଘୋଷଣା କରିଛନ୍ତି।ଶୁଭେନ୍ଦୁ ଅଧିକାରୀ ନନ୍ଦୀଗ୍ରାମ ଆସନରୁ ୧୯୫୬ ଭୋଟରେ ମମତା ବାନାର୍ଜୀଙ୍କୁ ପରାସ୍ତ କରିଛନ୍ତି। ନିର୍ବାଚନରେ ​​ଶୁଭେନ୍ଦୁ ଅଧିକାରୀ ମୋଟ୍ ୧,୦୯,୬୭୩ ଭୋଟ୍ ପାଇଥିବାବେଳେ ମମତା ବାନାର୍ଜୀ ୧,୦୭,୯୩୭ ଭୋଟ୍ ପାଇଛନ୍ତି। ପଶ୍ଚିମବଙ୍ଗ ବିଧାନସଭାର ୨୯୪ଟି ଆସନ ମଧ୍ୟରୁ ୮ଟି ପର୍ଯ୍ୟାୟରେ ୨୯୨ଟି ଆସନ ପାଇଁ ମତଦାନ ହୋଇଥିଲା। ବିଜେପି ୭୭ଟି ଆସନରେ ବିଜୟୀ ହୋଇଛି। ଗତ ବିଧାନସଭା ନିର୍ବାଚନରେ ​ଦଳ ମାତ୍ର ୩ଟି ଆସନ ଜିତିଥିଲେ। ସେହିପରି ଟିଏମସି ୨୧୩ଟି ଆସନରେ ଜିତିଛି। ଏଥି ସହିତ ବାମପନ୍ଥୀ ଏବଂ ଅନ୍ୟମାନେ ୧-୧ ସିଟ୍ ପାଇଛନ୍ତି।

ଦଳର ପ୍ରଦର୍ଶନ ନେଇ ବିଳମ୍ୱରେ ଚେତିଲେ ସୋନିଆ ଗାନ୍ଧୀ…!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ଦେଶରେ କଂଗ୍ରେସର ସ୍ଥିତି ନେଇ ବହୁ ବିଳମ୍ୱରେ ଚେତିଲେ କଂଗ୍ରେସର ଅନ୍ତରୀଣ ଅଧ୍ୟକ୍ଷା ସାେନିଆ ଗାନ୍ଧୀ। ଆଜି ଦଳର କଂଗ୍ରେସ ୱାର୍କିଂ କମିଟି ବୈଠକ ବସିଛି। ଏହି ସମୟରେ ସୋନିଆ କହିଛନ୍ତି ଚାରି ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳରେ ନିର୍ବାଚନ ଫଳାଫଳ ପରେ ଏହା ସ୍ପଷ୍ଟ ଯେ ଦଳରେ ତୃଣମୂଳ ସ୍ତରରେ ସୁଧାର ଆବଶ୍ୟକ। କଂଗ୍ରେସ ୱାର୍କିଂ କମିଟି ବୈଠକକୁ ସମ୍ବୋଧିତ କରି ସୋନିଆ ଗାନ୍ଧୀ କହିଛନ୍ତି, ଦଳର ପ୍ରଦର୍ଶନରୁ ସ୍ପଷ୍ଟ ଯେ ଆମକୁ ଆଗକୁ ଗୁରୁତର ସହ କାମ କରିବାକୁ ହେବ। କିନ୍ତୁ ଆମେ ପ୍ରଦର୍ଶନରୁ ନିରାଶ ହୋଇଛନ୍ତି ବୋଲି କହିଛନ୍ତି। ନିର୍ବାଚନରେ ଯେଉଁ ଫଳାଫଳ ଆସିଛି ତାର ସମସ୍ତ ଦିଗ ଉପରେ ଆଲୋଚନା ହେବା ଦରକାର। ଏଥିପାଇଁ ସେ ଏକ କମିଟି ଗଠନ କରିବାକୁ କହିଛନ୍ତି। ଏହି ଟିମ୍ ତାଙ୍କୁ ନିର୍ବାଚନରେ ପରାଜୟର କାରଣ ବିସ୍ତୃତ ଭାବରେ ଦେବ ବୋଲି ସେ କହିଛନ୍ତି। ଆସାମ ଏବଂ କେରଳରେ ପରାଜୟ ଏବଂ ପଶ୍ଚିମବଙ୍ଗରେ ମୂଳପୋଛ ହେବା ଅତ୍ୟନ୍ତ ନୈରାଶ୍ୟଜନକ ବୋଲି ସେ କହିଛନ୍ତି । ସେ କହିଛନ୍ତି ଯେ ମୋଦି ସରକାର କରୋନାକୁ ନିୟନ୍ତ୍ରଣ କରିବାରେ ବିଫଳ ହୋଇଛନ୍ତି। ତେଣୁ ଏକ ସର୍ବଦଳୀୟ ବୈଠକ ଡାକିବାକୁ ସେ ଦାବି କରିଛନ୍ତି। କରୋନାକୁ ଏକ ଅପ୍ରତ୍ୟାଶିତ ସ୍ୱାସ୍ଥ୍ୟ ସଙ୍କଟ ବୋଲି କହିଛନ୍ତି ସୋନିଆ ଗାନ୍ଧୀ। ଏହାର ମୁକାବିଲା କରିବା ପାଇଁ ସମସ୍ତ ସମ୍ଭାବ୍ୟ ସହଯୋଗ କରିବାକୁ ଦଳୀୟ କର୍ମୀଙ୍କୁ ନିବେଦନ କରିଛନ୍ତି ସୋନିଆ। ଆସାମ ଏବଂ କେରଳରେ କ୍ଷମତାକୁ ଫେରିବାକୁ ଚେଷ୍ଟା କରୁଥିଲା କଂଗ୍ରେସ। ଏଥପାାଇଁ ସୋନିଆ ଗାନ୍ଧୀଙ୍କ ସାଂସଦ ପୁଅ ରାହୁଲ ଗାନ୍ଧୀ ତଥା ଝିଅ ପ୍ରିୟଙ୍କା ଗାନ୍ଧୀ ଜୋରଦାର ପ୍ରଚାର କରିଥିଲେ। ଏମିତିକି ଆସାମରେ ବଡ଼ ଭୋଟ ବ୍ୟାଙ୍କ ଚା ବଗିଚାରେ କାମ କରୁଥିବା ଲୋକଙ୍କ ସହ ଭେଟିଥିଲେ ରାହୁଲ ଏବଂ ପ୍ରିୟଙ୍କା। ହେଲେ ବିଜେପିର ରଣନୀତି ଆଗରେ କଂଗ୍ରେସର ସମସ୍ତ ପ୍ରଚେଷ୍ଟା ବିଫଳ ହୋଇଥିଲା। ତେବେ ଦଳ ତାମିଲନାଡୁରେ ଶାସକ ଦଳ ବିରୋଧୀ ହାଓ୍ୱାର ଫଇଦା ନେଇଛି କଂଗ୍ରେସ। ସୂଚନାଯାଗ୍ୟ, ଚାରି ରାଜ୍ୟ ଏବଂ ଗୋଟିଏ କେନ୍ଦ୍ର ଶାସିତ ଅଞ୍ଚଳରେ ନିର୍ବାଚନ ପୂର୍ବରୁ ଦଳର ବରିଷ୍ଠ ନେତା କପିଲ ଶିବଲ, ଗୁଲାମ ନବୀ ଆଜାଦ, ମନୀଷ ତିଓ୍ୱାରୀ ପ୍ରମୁଖ ୨୩ ନେତା ଦଳର ନୀତିକୁ ନେଇ ଅସନ୍ତୁଷ୍ଟ ପ୍ରକାଶ କରିଥିଲେ। ଆଉ କହିଥିଲେ ଆମୂଳଚୂଳରେ ପରିବର୍ତ୍ତନ ହେବା ଆବଶ୍ୟକ। ହେଲେ ଏହାକୁ ସହଜରେ ଗ୍ରହଣ କରିନଥିଲେ ସୋନିଆ। ଆଉ ୨୩ ନେତାଙ୍କୁ କଥାକୁ ଅଣଦେଖା କରିଥିଲେ। ଯାହାକୁ ଏବେ ସ୍ୱୀକାର କରିଛନ୍ତି ସୋନିଆ ଗାନ୍ଧୀ।

ଏଠିକାର ଲୋକେ ହିଂସା ପାଇଁ ଭୋଟ୍ ଦେଇ ନାହାନ୍ତି: ରାଜ୍ୟପାଳ

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) –  ପଶ୍ଚିମବଙ୍ଗରେ ନିର୍ବାଚନ ପରେ ଦେଖାଦେଇଥିବା ନିର୍ବାଚନୀ ହିଂସାକୁ ନେଇ ରାଜ୍ୟପାଳ ଜଗଦୀପ ଧନଖର ମମତା ବାନାର୍ଜୀଙ୍କ ସରକାର ବିରୋଧରେ ସଙ୍ଗୀନ ଅଭିଯୋଗ ଆଣିଛନ୍ତି। ଯାହାକି ବେଙ୍ଗଲରେ ରାଜ୍ୟପାଳ ଏବଂ ମମତା ସରକାର ମଧ୍ୟରେ ଦୀର୍ଘଦିନ ଧରି ଚାଲିଥିବା ବିବାଦକୁ ଆହୁରି ଆଗକୁ ବଢ଼ାଇଛି। ରାଜ୍ୟପାଳ କହିଛନ୍ତି ଯେ ନିର୍ବାଚନ ପରେ ସେ ହିଂସା ପ୍ରଭାବିତ ଅଞ୍ଚଳ ପରିଦର୍ଶନ କରିବାକୁ ଚାହୁଁଛନ୍ତି। କିନ୍ତୁ ରାଜ୍ୟ ସରକାର ଏଥିରେ ସହଯୋଗ କରୁ ନାହାନ୍ତି। ଏବେ ସେ ନିଜ ବ୍ୟବସ୍ଥାରେ ହିଂସା ପ୍ରଭାବିତ ଅଞ୍ଚଳ ପରିଦର୍ଶନ କରିବେ ବୋଲି କହିଛନ୍ତି। ଲୋକଙ୍କ ଭୋଟ୍ ଲୁଟ୍ ଏବଂ ହିଂସା ପାଇଁ ନୁହେଁ। ହେଲେ ଯାହା ହେଉଛି ତାହା ଗଣତନ୍ତ୍ରର ଏକ ପ୍ରକାର ସମାପ୍ତି ସହିତ ସମାନ। ସେ କହିଛନ୍ତି ଯେ ବିଭିନ୍ନ ସ୍ଥାନରୁ ଆଶ୍ଚର୍ଯ୍ୟଜନକ ଖବର ଆସୁଛି ଆଉ ଏହାକୁ ନେଇ ସେ ଚିନ୍ତିତ ବୋଲି କହିଛନ୍ତି।ରାଜ୍ୟପାଳ ଜଗଦୀପ କହିଛନ୍ତି ହିଂସା ପରେ ପରିସ୍ଥିତି ସମ୍ପର୍କରେ ମୁଖ୍ୟ ଶାସନ ସଚିବ ତଥା ଡିଜିପିଙ୍କ ପାଖରୁ ଏକ ରିପୋର୍ଟ ମାଗିଥିଲେ। ହେଲେ ଉଭୟ ସରକାରୀ ଅଧିକାରୀ ଏବାବଦରେ ତାଙ୍କୁ ଅବଗତ କରାଇନଥିବାରୁ ସେ ଅସନ୍ତୋଷ ବ୍ୟକ୍ତ କରିଛନ୍ତି। ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ସମ୍ପର୍କରେ ମୁଖ୍ୟ ଶାସନ ସଚିବ ତଥା ଡିଜିପିଙ୍କୁ ଜଣାଇବା ପାଇଁ ରାଜ୍ୟପାଳ ଶନିବାର ସନ୍ଧ୍ୟାରେ ରାଜ ଭବନକୁ ଡାକିଥିଲେ। ଏହାପରେ ସୋମବାର ରାଜ୍ୟପାଳ ଏହା କହିଛନ୍ତି। ରାଜ୍ୟପାଳ କହିଛନ୍ତି ଯେ ସମଗ୍ର ବିଶ୍ୱ ବେଙ୍ଗଲରେ ଚାଲିଥିବା ନିର୍ବାଚନ ପରବର୍ତ୍ତୀ ହିଂସାକୁ ଦେଖୁଛନ୍ତି। ଆଉ ଏହାକୁ ଦୃଢ଼ ଭାଷାରେ ନିନ୍ଦା କରୁଛନ୍ତି। ସେ କହିଛନ୍ତି ଯେ ଲୋକଙ୍କୁ ସେମାନଙ୍କର ବ୍ୟବସାୟ ଚଳାଇବା ପାଇଁ ଚାନ୍ଦା ଦେବାକୁ ପଡିବ ବୋଲି ଏଭଳି ରିପୋର୍ଟ ତାଙ୍କ ପାଖକୁ ଆସିଛି ବୋଲି କୁହିଛନ୍ତି। ହିଂସା ଘଟାଇଥିବା ଅପରାଧୀଙ୍କୁ ଦଣ୍ଡ ଦେବା ପାଇଁ ସେ ରାଜ୍ୟ ସରକାରଙ୍କୁ ନିବେଦନ କରିଛନ୍ତି।

ଆସାମ ମୁଖ୍ୟମନ୍ତ୍ରୀ ଭାବେ ଶପଥ ନେଲେ ହିମନ୍ତ ବିଶ୍ୱଶର୍ମା…!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ଆସାମର ୧୫ ତମ ମୁଖ୍ୟମନ୍ତ୍ରୀ ଭାବେ ସୋମବାର ଶପଥ ଗ୍ରହଣ କରିଛନ୍ତି ହିମନ୍ତ ବିଶ୍ୱଶର୍ମା। ରାଜ୍ୟପାଳ ଜଗଦୀଶ ମୁଖୀ ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି। ଗତକାଲି ବିଜେପି ବିଧାୟକ ଦଳ ବୈଠକରେ ହିମନ୍ତ ବିଶ୍ୱଶର୍ମାଙ୍କୁ ସର୍ବସମ୍ମତିକ୍ରମେ ନେତା ନିର୍ବାଚିତ କରାଯାଇଥିଲା। ଏହା ପରେ ସେ ସରକାର ଗଠନ କରିବାକୁ ରାଜ୍ୟପାଳଙ୍କୁ ଦାବିପତ୍ର ପ୍ରଦାନ କରିଥିଲେ। ଆଜି ଏହି ଶପଥ ସମାରୋହରେ ବିଜେପି ସଭାପତି ଜେପି ନଡ୍ଡା, ରାଷ୍ଟ୍ରୀୟ ଉପସଭାପତି ତଥା ଆସାମ ପ୍ରଭାରୀ ଶ୍ରୀଯୁକ୍ତ ବୈଜୟନ୍ତ୍ର ପଣ୍ଡାଙ୍କ ସମେତ ଅନେକ ନେତା ଏହି ଶପଥ ସମାରୋହରେ ଉପସ୍ଥିତ ଥିଲେ। ହିମନ୍ତ ବିଶ୍ୱଶର୍ମା ଛାତ୍ର ଜୀବନରୁ ରାଜନୀତିରେ ସଂପୃକ୍ତ।  ୧୯୯୧-୯୨ରେ ରାଜନୀତି ବିଜ୍ଞାନରେ ସ୍ନାତକୋତ୍ତର କରୁଥିବାବେଳେ ଆସାମର କଟନ କଲେଜ ୟୁନିଅନର ସାଧାରଣ ସଂପାଦକ ଭାବେ ବିଜୟୀ ହୋଇଥିଲେ। ଏହା ପୂର୍ବରୁ ସେ ଅଲ୍ ଆସାମ ଷ୍ଟୁଡେଣ୍ଟ ୟୁନିଅନରେ ଥିବାବେଳେ ୧୯୭୯ରୁ ୮୫ ମଧ୍ୟରେ ଆସାମ ଗଣ ପରିଷଦ ମୁଖ୍ୟ ପ୍ରଫୁଲ୍ଲ କୁମାର ମହନ୍ତଙ୍କ ନିକଟତର ହୋଇଥିଲେ। ନବେ ଦଶକରେ ତତ୍କାଳୀନ ମୁଖ୍ୟମନ୍ତ୍ରୀ ହିତେଶ୍ୱର ସାଇକିଆ ତାଙ୍କୁ କଂଗ୍ରେସରେ ସାମିଲ କରିଥିଲେ।  ସେ ୨୦୦୬, ୨୦୧୧ ଓ ୨୦୧୬ ବିଧାନସଭା ନିର୍ବାଚନରେ ବିଜୟୀ ହୋଇଥିଲେ। ପୂର୍ବତନ ମୁଖ୍ୟମନ୍ତ୍ରୀ ତରୁଣ ଗୋଗୋଇଙ୍କ ଶାସନ କାଳରେ ହିମନ୍ତ ତାଙ୍କ ଏକାନ୍ତ ବିଶ୍ୱସ୍ତ ଥିଲେ ଓ ଦଳରେ ୨ ନମ୍ବର ସ୍ଥାନରେ ରହି ଆସିବା ସହ ବିଭିନ୍ନ ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ଭାବେ କାମ କରିଥିଲେ। ୨୦୧୩ରେ ଗୋଗୋଇ ନିଜ ପୁଅ ଗୌରବ ଗୋଗଇଙ୍କୁ ସାମନାକୁ ଆଣିବା ପରଠାରୁ ହିମନ୍ତ କଂଗ୍ରେସ ଠାରୁ ଦୂରେଇବା ଆରମ୍ଭ କରିଥିଲେ। ୨୦୧୫ରେ ୧୦ ସହଯୋଗୀ ବିଧାୟକଙ୍କୁ ଧରି କଂଗ୍ରେସରୁ ଇସ୍ତଫା ଦେଇ ବିଜେପିରେ ସାମିଲ ହୋଇଥିଲେ।୨୦୧୬ରେ ବିଜେପିକୁ କ୍ଷମତାସୀନ କରାଇବାରେ ତାଙ୍କର ପ୍ରମୁଖ ଭୂମିକା ଥିଲା।  ସର୍ବାନନ୍ଦ ସୋନଓ୍ୱାଲଙ୍କ ମନ୍ତ୍ରିମଣ୍ଡଳରେରେ ସେ ଅର୍ଥ ପରି ଗୁରୁତ୍ୱ ବିଭାଗର ଦାୟିତ୍ୱ ପାଇଥିଲେ।  ତାଙ୍କୁ ନର୍ଥ ଇଷ୍ଟ ଡେମୋକ୍ରାଟିକ ଆଲାଏନ୍ସର ଆବାହକର ଦାୟିତ୍ୱ ଦେଇଥିଲା ବିଜେପି।  ତାଙ୍କର ରଣନୀତି ଯୋଗୁଁ ଉତ୍ତର-ପୂର୍ବାଞ୍ଚଳରେ ଗୋଟିଏ ପରେ ଗୋଟିଏ ରାଜ୍ୟ ବିଜେପି ଅକ୍ତିଆର କରିଥିଲା। କଂଗ୍ରେସରେ ବିଦ୍ରୋହ କରାଇ ଅରୁଣାଚଳ ପ୍ରଦେଶରେ ବିଜେପିକୁ କ୍ଷମତାସୀନ କରିବା ଓ ମଣିପୁରରେ କମ୍ ଆସନ ସତ୍ତ୍ୱେ ଦଳକୁ ସରକାର ଗଠନ କରାଇବାରେ ହିମନ୍ତଙ୍କ ପ୍ରମୁଖ ଭୂମିକା ରହିଥିଲା। ତାଙ୍କ ଯୋଗୁଁ ମେଘାଳୟରେ ମଧ୍ୟ ସରକାର ଗଠନ କରିବାକୁ ବିଜେପି ସକ୍ଷମ ହୋଇଥିଲା।

ପ୍ରଶାନ୍ତଙ୍କୁ ମୁଖ୍ୟ ପରାମର୍ଶଦାତା ଭାବେ ନିଯୁକ୍ତି, ସରକାରଙ୍କୁ ଜବାବ ମାଗିଲେ ସୁପ୍ରିମକୋର୍ଟ…!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ବିଭିନ୍ନ ରାଜନୀତିକ ଦଳ ପାଇଁ ନିର୍ବାଚନ ରଣନୀତି ତିଆରି କରୁଥିବା ପ୍ରଶାନ୍ତ କିଶୋରଙ୍କୁ ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂହ ତାଙ୍କର ମୁଖ୍ୟ ପରାମର୍ଶଦାତା ଭାବରେ ନିଯୁକ୍ତ କରିଛନ୍ତି। ଏଥିସହ କ୍ୟାବିନେଟ ପାହ୍ୟା ଦେଇଛନ୍ତି। ଏହାକୁ ବେଆଇନ୍ ଦର୍ଶାଇ ଜଣେ ଆବେଦନକାରୀ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏବେ ସୁପ୍ରିମକୋର୍ଟ ପଞ୍ଜାବ ସରକାରକୁ ସମନ କରି କେଉଁ ଆଧାରରେ ପ୍ରଶାନ୍ତ କିଶୋରଙ୍କୁ କ୍ୟାବିନେଟ ପାହ୍ୟା ଓ ପରାମର୍ଶଦାତା ଭାବରେ ନିଯୁକ୍ତି ଦିଆଯାଇଛି, ତା’ର ଜବାବ ମାଗିଛନ୍ତି। ନିକଟରେ ସମାନ ଆବେଦନକୁ ପଞ୍ଜାବ ଏବଂ ହରିଆଣା ହାଇକୋର୍ଟଙ୍କ ଖାରଜ କରିଦେଇଥିଲେ। ଏହାପରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି ଆବେଦନକାରୀ।  ଜଷ୍ଟିସ ସଞ୍ଜୟ କିଶାନ କିଷାନ କୌଲ ଏବଂ ହେମନ୍ତ ଗୁପ୍ତା ଖଣ୍ଡପୀଠ ଉଲ୍ଲେଖ କରିଛନ୍ତି ଯେ, ପ୍ରଶାନ୍ତ କିଶୋର ଯେତେବେଳେ ବିଭିନ୍ନ ରାଜନୀତିକ ଦଳ ପାଇଁ ନିର୍ବାଚନ ରଣନୀତି ପ୍ରସ୍ତୁତ କରୁଛନ୍ତି, ସେତେବେଳେ ଏଭଳି ନିଯୁକ୍ତି କାହିଁକି ? ଲବ ସିଂ ଏବଂ ଅନ୍ୟ ଜଣେ ଆବେଦନକାରୀଙ୍କ ପ୍ରତିନିଧିତ୍ୱ କରୁଥିବା ଆଡଭୋକେଟ୍ ବାଲଟେଜ ସିଂ ସିଦ୍ଧୁ କୋର୍ଟରେ କହିଛନ୍ତି ଯେ ପ୍ରଶାନ୍ତ କିଶୋରଙ୍କୁ ମୁଖ୍ୟମନ୍ତ୍ରୀ ମୁଖ୍ୟ ପରାମର୍ଶଦାତା ଭାବରେ ନିଯୁକ୍ତ କରାଗଲେ ମଧ୍ୟ ଲୋକଙ୍କ ଟିକସରେ କ୍ୟାବିନେଟ ପାହ୍ୟାରେ ରଖିବା ଠିକ୍ ନୁହେଁ। ଆବେଦନକାରୀ କହିଛନ୍ତି ଯେ ପ୍ରଶାନ୍ତ କିଶୋର ୨୦୧୭ରେ ପଞ୍ଜାବ କଂଗ୍ରେସ ପାଇଁ ନିର୍ବାଚନ ରଣନୀତି ପ୍ରସ୍ତୁତ କରିଥିଲେ। ଆବେଦନକାରୀମାନେ ଦାବି କରିଛନ୍ତି ଅମରିନ୍ଦର ସିଂହ ଚଳିତ ବର୍ଷ ମାର୍ଚ୍ଚରେ ପ୍ରଶାନ୍ତ କିଶୋରଙ୍କୁ ପରାମର୍ଶଦାତା ଭାବେ ନିଯୁକ୍ତ କରିଥିଲେ। ନିଯୁକ୍ତି ପାଇଁ କୌଣସି ବିଜ୍ଞପ୍ତି କିମ୍ବା ଇଣ୍ଟରଭ୍ୟୁ ହୋଇନାହିଁ, ଯାହାକି ସମ୍ବିଧାନର ଧାରା ୧୪ ଏବଂ ୧୬କୁ ଉଲ୍ଲଂଘନ କରୁଛି। ଅନ୍ୟପକ୍ଷରେ ପଞ୍ଜାବ ଓ ହରିଆଣା ହାଇକୋର୍ଟ ସମାନ ଆବେଦନକୁ ଖାରଜ କରିବା ବେଳେ କହିଥିଲେ ମୁଖ୍ୟମନ୍ତ୍ରୀ ଜଣେ ନିର୍ବାଚିତ ପ୍ରତିନିଧି। ରାଜ୍ୟରେ ସୁଶାସନ ପାଇଁ ସେ କାହାକୁ ପରାମର୍ଶଦାତା ଭାବେ ବାଛିବେ ସେହି କ୍ଷମତା ତାଙ୍କର ରହିଛି। ସୂଚନାଯୋଗ୍ୟ, ନିକଟରେ ଶେଷ ହୋଇଥିବା ପଶ୍ଚିମବଙ୍ଗ ବିଧାନସଭା ନିର୍ବାଚନ ବେଳେ ଟିଏମସି ପାଇଁ ନିର୍ବାଚନ ରଣନୀତି ତିଆରି କରିଥିଲେ ପ୍ରଶାନ୍ତ କିଶୋର। ଆଉ ସେ ଦଳକୁ କ୍ରମାଗତ ତୃତୀୟ ଥର ପାଇଁ ବିଜୟୀ କରାଇଥିଲେ। ଏହାପରେ କିନ୍ତୁ ପ୍ରଶାନ୍ତ ଘୋଷଣା କରିଛନ୍ତି ଯେ ସେ ଆଉ ତାଙ୍କ ପେସାରେ ରହିବେନି। ଅର୍ଥାତ୍ ଆଗକୁ ପ୍ରଶାନ୍ତ କୌଣସି ଦଳ ପାଇଁ ନିର୍ବାଚନ ରଣନୀତି ପ୍ରସ୍ତୁତ କରିବେ ନାହିଁ।