ଲକ ଡାଡନରେ ଧରାପଡ଼ିଗଲା ଆମ ନାଲି ପାଣି ବେପାର !
ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର/ଚୌଦ୍ୱାର)- କରୋନାର ଦ୍ୱିତୀୟ ଲହରୀର ଭୟାବହତାକୁ ଲକ୍ଷ୍ୟକରି ସରକାର ଲକ୍ଡାଉନ କରିଥିବା ବେଳେ ଏହାର ସୁଯୋଗ ନେଇ କିଛି ମଦ ବ୍ୟବସାୟୀ ଚୋରାରେ ମଦ ବିକ୍ରୀ କରି ଭଲ ମୁନାଫା କମାଉଛନ୍ତି କ୍ଷ ପୋଲିସ ମାସ୍କ ଓ ହେଲମେଟ୍ ଚେକିଂ ରେ ସୀମିତ ରହିଥିବା ବେଳେ ଏହି ବେପାର ଖୋଲମଖୁଲା ହେଉଛି । ସେହିଭଳି ୩ଜଣ ଚୋରା ମଦ ବ୍ୟବସାୟୀଙ୍କ ଘରେ କିଛି ମହିଳା ଚଢାଉ କରି ବିପୁଳ ମାତ୍ରରେ ମଦ ଜବତ କରିବା ସହ ବ୍ୟବସାୟି ମାନଙ୍କୁ ପୋଲିସ ଜିମା ଦେଇଛନ୍ତି । ଏଭଳି ଏକ ଘଟଣା ଦେଖିବାକୁ ମିଳିଛି ଚୌଦ୍ୱାର ଥାନା ଅନ୍ତର୍ଗତ ଓଟିଏମ କଲୋନୀରେ । କଲୋନୀର ୪ଟି କ୍ୱାର୍ଟର ଭିତରେ ମହଜୁଦ ଥିବା ବିପୁଳ ପରିମାଣର ଚୋରା ଦେଶୀ ଓ ବିଦେଶୀ ମଦକୁ ଚୌଦ୍ୱାର ପୋଲିସ ସ୍ଥାନୀୟ ବାସିନ୍ଦାଙ୍କ ସହଯୋଗରେ ଜବତ କରିଛି । ଏଥି ସହିତ ଓଟିଏମ୍ କଲୋନୀରେ ରହୁଥିବା ମଦ ବ୍ୟବସାୟୀ କାହ୍ନୁ ଚରଣ ରାଉଳ, ରମେଶ ରାଉଳ ଓ ଚନ୍ଦ୍ର ଶେଖର ସାହୁଙ୍କୁ ଗିରଫ କରିଛି ।ସେମାନଙ୍କ ଘରୁ ୭୨୫ ବୋତଲ ଦେଶୀ ମଦ, ୧୮ ବୋତଲ ବିଦେଶୀ ମଦ, ୧୬୦ ଲିଟର ସହିତ ୪ଟି ମଟରସାଇକେଲ, ଗୋଟିଏ ଅଲଟୋ କାର, ମଦ ରଖୁଥିବା ଜାରକିନ୍ ଆଦି ଜବତ କରାଯାଇଛି କ୍ଷ ଅଭିଯୁକ୍ତ କାହ୍ନୁ ଓ ତାଙ୍କ ବାପା ଓଟିଏମ୍ କଲୋନୀସ୍ଥିତ ତାଙ୍କ ରହିବା କ୍ୱାର୍ଟରରେ ଦୀର୍ଘଦିନ ହେଲା ଚୋରାମଦ କାରବାର କରୁଥିଲେ । ଏଥି ସହିତ ସ୍ଥାନୀୟ ବାସିନ୍ଦାଙ୍କୁ ଡରାଇ ଧମକାଇ ଚୁପ୍ କରି ରଖୁଥିଲେ । କେହି ପ୍ରତିବାଦ କଲେ ସେମାନଙ୍କୁ ମାଡ଼ ମାରିବା, ଧମକାଇବା ଓ ହଇରାଣ ହରକତ ଆଦି କରୁଥିଲେ । ପରିସ୍ଥିତି ଅସମ୍ଭାଳ ହେବାରୁ କଲୋନୀର ଶତାଧିକ ମହିଳା, ପୁରୁଷ ଓ ଯୁବକ ଏକାଠି ହୋଇ ମଦ ସାମ୍ରାଜ୍ୟ ଚଳାଇଥିବା ୪ଟି କ୍ୱାର୍ଟର ଉପରେ ଚଢ଼ଉ କରିଥିଲେ । ଘର ଭିତରେ ବିପୁଳ ପରିମାଣର ପେଟି ବାହାରକୁ ନେଇ ଆସିବା ସହିତ ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ସଦଳବଳେ ଘଟଣାସ୍ଥଳରେ ପହଚିଂ ମଦ ଜବତ କରିବା ସହିତ ବିଭିନ୍ନ ସ୍ଥାନରେ ଚଡ଼ଉ କରି ଅଭିଯୁକ୍ତ ମାନଙ୍କୁ ଗିରଫ କରିଥିଲେ ।
