ଗୁଜରାଟରେ ବିଜେପିର ବଡ଼ ବିଜୟ, କଂଗ୍ରେସ ମୂଳପୋଛ ।

ଏଥର ସମ୍ଭାଳ ବ୍ୟୁରୋ (ଅହମଦାବାଦ)- ଗୁଜରାଟ ପଞ୍ଚାୟତ ନିର୍ବାଚନରେ ଶାସକ ବିଜେପି ବଡ଼ ବିଜୟ ହାସଲ କରିଛି। ଦଳ ସବୁ ସ୍ଥାନରେ ଜବରଦସ୍ତ ପ୍ରଦର୍ଶନ କରି ଜିଲ୍ଲା ସ୍ତରୀୟ ପଞ୍ଚାୟତର ସମସ୍ତ ୩୧ଟି ଆସନରେ ବାଜିମାତ କରିଛି। କଂଗ୍ରେସ ଏଠାରେ ମୂଳପୋଛ ହୋଇଯାଇଛି। ରବିବାର ୮୧ଟି ପୌରପାଳିକା, ୩୧ଟି ଜିଲ୍ଲା ପଞ୍ଚାୟତ ଓ ୨୩୧ ତହସିଲ ପଞ୍ଚାୟତର ଆସନ ପାଇଁ ଭୋଟିଂ ହୋଇଥିଲା। ଆଜି ଭୋଟ ଗଣତି ସହ ଫଳାଫଳ ପ୍ରକାଶ ପାଇଛି। ଫଳାଫଳ ଅନୁଯାୟୀ, ବିଜେପି ସମସ୍ତ ୩୧ଟି ପଞ୍ଚାୟତରେ ଏକତରଫା ବିଜୟ ହାସଲ କରିଛି। ୨୦୧୫ରେ କଂଗ୍ରେସ ୭ଟି, ବିଜେପି ୨୨ଟି ଓ ଅନ୍ୟାନ୍ୟ ଦଳ ଦୁଇଟି ପଞ୍ଚାୟତ ଦଖଲ କରିଥିଲେ। ହେଲେ ଏଥର ବିଜେପି ପୂରା କ୍ଲିନସୁଇପ କରିନେଇଛି। କଂଗ୍ରେସ ଏତେ ଶୋଚନୀୟ ଓ ନୈରାଶ୍ୟଜନକ ପ୍ରଦର୍ଶନ କରିଛି ଯେ ଦଳ ପଶ୍ଚିମାଞ୍ଚଳ ଜିଲ୍ଲାରେ ଗୋଟିଏ ବି ଆସନ ଜିତିବାକୁ ସକ୍ଷମ ହୋଇନାହିଁ। ସେହିପରି ୨୯ଟି ଜିଲ୍ଲାରେ କଂଗ୍ରେସର ବିଜୟ ପ୍ରାର୍ଥୀମାନେ ଦୁଇ ଅଙ୍କର ଭୋଟ ବ୍ୟବଧାନ ମଧ୍ୟ ଛୁଇଁ ନାହାନ୍ତି।ଗୁଜରାଟ ବିଧାନସଭାର ବିରୋଧୀ ଦଳ ନେତା ପରେଶ ଧନାନୀଙ୍କ ନିର୍ବାଚନ ମଣ୍ଡଳୀ ଅମରେଲିରେ ବି କଂଗ୍ରେସ ପଞ୍ଚାୟତ ନିର୍ବାଚନରେ ହାରିଛି। କଂଗ୍ରେସର ଗଡ଼ କୁହାଯାଉଥିବା ଆନନ୍ଦ, ସର୍ବରକାଣ୍ଠ ଓ ଜାମନଗର ଜିଲ୍ଲାରେ ବି ଦଳ ହାରିଛି। କଂଗ୍ରେସର ନୈରାଶ୍ୟଜନକ ପ୍ରଦର୍ଶନ ପରେ ଦଳର ଗୁଜରାଟ ମୁଖ୍ୟ ଅମିତ ଛାଭଡ ଓ ବିରୋଧୀ ଦଳ ନେତା ପରେଶ ଧନାନୀ ନିଜ ନିଜ ପଦରୁ ଇସ୍ତଫା ଦେଇଛନ୍ତି। କଂଗ୍ରେସ ନୈରାଶ୍ୟଜନକ ପ୍ରଦର୍ଶନ କରିଥିବା ବେଳେ ବିଜେପି ପ୍ରଥମଥର ତପାଇ ଜିଲ୍ଲା ପଞ୍ଚାୟତରେ ବାଜିମାତ କରିଛି। କୁହାଯାଉଥିଲା ଯେ କଂଗ୍ରେସ ଗ୍ରାମାଞ୍ଚଳରେ ନିଜର ସ୍ଥିତି ମଜଭୂତ କରିଥିବା ବେଳେ ବିଜେପି ସହରାଞ୍ଚଳରେ ନିଜର ଦବଦବା ଦେଖାଉଛି। ହେଲେ ସମସ୍ତ ୩୧ଟି ଯାକ ପଞ୍ଚାୟତ ବିଜେପି ଦଖଲକୁ ଯିବା ପରେ ସବୁ ଅଙ୍କ ଭୁଲ ହୋଇଯାଇଛି। ବିଜେପିର ଏହି ବିଜୟ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଓ ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ପ୍ରମୁଖ ଟ୍ୱିଟ କରି ଶୁଭେଚ୍ଛା ଜଣାଇଛନ୍ତି। ବର୍ତ୍ତମାନ ସୁଦ୍ଧା ମିଳିଥିବା ଖବର ଅନୁଯାୟୀ, ୪୭୭୪ଟି ତହସିଲରୁ ବିଜେପି ୩୩୨୨ଟି, କଂଗ୍ରେସ ୧୨୪୩, ସ୍ୱାଧୀନ ପ୍ରାର୍ଥୀ ୧୧୫, ଆପ୍‌ ୩୧, ବିଏସପି ୪, ଅନ୍ୟାନ୍ୟ ଦଳ ୧୬ଟି ଆସନରେ ଜିତିଛନ୍ତି। ଜିଲ୍ଲା ସ୍ତରୀୟ ପଞ୍ଚାୟତର ୯୮୦ ଆସନରୁ ବିଜେପି ୭୮୬, କଂଗ୍ରେସ ୧୬୭, ସ୍ୱାଧୀନ ପ୍ରାର୍ଥୀ ୩, ଆପ୍‌ ୨, ବିଏସ୍‌ପି ୧ ଓ ଅନ୍ୟାନ୍ୟ ଦଳ ୪ଟି ଆସନ ଦଖଲ କରିଛନ୍ତି। ନଗରପାଳିକାର ୨୭୨୦ଟି ଆସନରୁ ବିଜେପି ୨୦୬୩, କଂଗ୍ରେସ ୩୮୫, ସ୍ୱାଧୀନ ପ୍ରାର୍ଥୀ ୧୭୨, ଆପ୍‌ ୯, ବିଏସ୍‌ପି ୬ ଓ ଅନ୍ୟାନ୍ୟ ଦଳ ୨୪ଟି ଆସନ ଜିତିଛନ୍ତି।

ସଚିନ ଓ ଲତାଙ୍କ ବିରୋଧରେ ନୁହେଁ, ବିଜେପିର ଆଇଟି‌ ସେଲ ବିରୋଧରେ ଚାଲିଛି ତଦନ୍ତ: ମନ୍ତ୍ରୀ

ଏଥର ସମ୍ଭାଳ ବ୍ୟୁରୋ (ମୁମ୍ବାଇ)- କିମ୍ବଦନ୍ତୀ କ୍ରିକେଟର ସଚିନ ତେନ୍ଦୁଲକର ଓ କଣ୍ଠଶିଳ୍ପୀ ଲତା ମଙ୍ଗେସକର କିଛି ଦିନ ତଳେ କରିଥିବା ଟ୍ୱିଟକୁ ନେଇ ରାଜନୀତିକ ବୟାନବାଜୀ ସୃଷ୍ଟି ହୋଇଛି। ଏହି ଦୁଇ ସେଲେବ୍ରିଟି ଦେଶରେ ଚାଲିଥିବା ଚାଷୀ ଆନ୍ଦୋଳନ ପ୍ରସଙ୍ଗରେ କେନ୍ଦ୍ରକୁ ସମର୍ଥନ କରି ଟ୍ୱିଟ କରିଥିଲେ। ଏମାନେ ଟ୍ୱିଟ କରିଥିବାରୁ ମହାରାଷ୍ଟ୍ର ସରକାର ଘଟଣାର ତଦନ୍ତ ନିର୍ଦ୍ଦେଶ ଦେଇଥିବା ଖବର ପ୍ରକାଶ ପାଇଥିଲା। ଏହାକୁ ନେଇ ସରକାରଙ୍କୁ ବିଜେପି ନେତା ଦେବେନ୍ଦ୍ର ଫଡ଼ନାଭିସ୍‌ ଟାର୍ଗେଟ କରିଥିଲେ। ଏହାର ଜବାବ ମଧ୍ୟ ମହାରାଷ୍ଟ୍ର ଗୃହମନ୍ତ୍ରୀ ଅନୀଲ ଦେଶମୁଖ ଦେଇଛନ୍ତି। ସେ କହିଛନ୍ତି, ଆମେ ସଚିନ ଓ ଲତା ମଙ୍ଗେସକରଙ୍କ ବିରୋଧରେ କୌଣସି ତଦନ୍ତ କରୁନାହୁଁ। କିନ୍ତୁ ବିଜେପିର ଆଇଟି ସେଲ୍‌ ବିରୋଧରେ ତଦନ୍ତ ଚାଲିଛି। ଏହାପୂର୍ବରୁ ଦେବେନ୍ଦ୍ର ଫଡ଼ନାଭିସ କହିଥିଲେ, ମହାରାଷ୍ଟ୍ର ସରକାର ପୂର୍ବତନ ଆଲିଗଡ଼ ବିଶ୍ୱବିଦ୍ୟାଳୟ ଛାତ୍ର ଶର୍ଜିଲ ଉସମାନ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିପାରୁନାହାନ୍ତି। ସେ ହିନ୍ଦୁଙ୍କୁ ଅପମାନିତ କରିଛନ୍ତି। କିନ୍ତୁ ତାଙ୍କ ବିରୋଧରେ ଆପଣ(ମହାରାଷ୍ଟ୍ର ସରକାର) କୌଣସି କାର୍ଯ୍ୟାନୁଷ୍ଠାନ ନେଉନାହାନ୍ତି। ଏଲଗାର ପରିଷଦ ମଧ୍ୟ ତାଙ୍କ ବୟାନକୁ ସମର୍ଥନ କରିଛି। ତଥାପି ଆପଣ ଚୁପ। କିନ୍ତୁ ଆପଣ ଭାରତ ରତ୍ନ ପାଇଥିବା ସଚିନ ତେନ୍ଦୁଲକର ଓ ଲତା ମଙ୍ଗେସକରଙ୍କ ବିରୋଧରେ ତଦନ୍ତ କରିବାକୁ ଆଗ୍ରହ ଦେଖାଇଛନ୍ତି। ଧରି ନିଆଯାଉ ମୁଁ ସେମାନଙ୍କୁ ଏପରି କଥା ଲେଖି ଟ୍ୱିଟ କରିବାକୁ କହିଥିଲି। ଏହି ଘଟଣାରେ ମୋ ବିରୋଧରେ କେଉଁ ଚାର୍ଜ ଲାଗିବ ? ଯଦି ମୋ ପାର୍ଟି ସେମାନଙ୍କୁ ଦେଶକୁ ସମର୍ଥନ କରି ଟ୍ୱିଟ କରିବାକୁ କହିଲା, ତା’ହେଲେ ଭୁଲ କେଉଁଠି ରହିଲା? ଆମେ ଏଥିପାଇଁ ଗର୍ବିତ। ଆମେ କେବେ ହେଲେ ତଦନ୍ତକୁ ଡରିଯିବୁ ନାହିଁ। ଦେଶକୁ ସମର୍ଥନ କରୁଥିବା ଲୋକଙ୍କ ବିରୋଧରେ ଆପଣ ତଦନ୍ତ କରୁଥିବାରୁ ଆମେ ଧନ୍ୟ। ଏହି ଘଟଣାରୁ ଆପଣଙ୍କ ଦେଶଭକ୍ତି ସଂପୂର୍ଣ୍ଣ ଜଣାପଡ଼ୁଛି ବୋଲି ଫଡ଼ନାଭିସ ତାଚ୍ଛଲ୍ୟ କରି କହିଥିଲେ। ସୂଚନାଯୋଗ୍ୟ, ପପ୍‌ ସିଙ୍ଗର ରିହାନା ଚାଷୀଙ୍କ ଆନ୍ଦୋଳନକୁ ସମର୍ଥନ କରି ୬ଟି ଶବ୍ଦରେ ଗୋଟିଏ ଟ୍ୱିଟ କରିଥିଲେ। ଏହାପରେ ଭାରତୀୟ ସେଲେବ୍ରିଟିମାନେ କାଉଣ୍ଟର ଆଟାକ ଆରମ୍ଭ କରିଥିଲେ। ଭାରତର ଆଭ୍ୟନ୍ତରୀଣ ବ୍ୟାପାରରେ କେହି ବି ହସ୍ତକ୍ଷେପ କରିବା ଠିକ୍‌ ନୁହେଁ ବୋଲି ସେମାନେ ଟ୍ୱିଟ କରିଥିଲେ।

ଡାଏଟିଂରେ ଥିଲେ ଏହି ସବୁ ଫଳ ଠାରୁ ଦୂରେଇ ରୁହନ୍ତୁ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ଵର)- ଆଜିକାଲି ଅଧିକାଂଶ ଲୋକଙ୍କ ସବୁଠାରୁ ବଡ ମୁଣ୍ଡବିନ୍ଧାର କାରଣ ହେଉଛି ଓଜନ ବଢ଼ିଯିବା। ଓଜନ କମାଇବା ଏବଂ ପତଳା ହେବା ପାଇଁ ଲୋକେ ଅନେକ ଜିନିଷ ଖାଇବା ଛାଡି ଦିଅନ୍ତି, ଡାଏଟିଂ ମଧ୍ୟ କରନ୍ତି। ଡାଏଟିଂ କରିବା ବେଳେ ତେଲ ଯୁକ୍ତ ଖାଦ୍ୟ ଛାଡି ଫଳ ଖାଇବା ଆରମ୍ଭ କରିଦିଅନ୍ତି  ଏବଂ ଭାବନ୍ତି ଯେ ଫଳ ଖାଇଲେ ଓଜନ କମିଯିବ ବୋଲି। କିନ୍ତୁ ଫଳ ଖାଇଲେ ମଧ୍ୟ ଓଜନ କମେ ନାହିଁ। କାରଣ ଅଧିକାଂଶ ଫଳରେ କ୍ୟାଲୋରୀର ମାତ୍ରା ଅଧିକ ଥାଏ, ତେଣୁ ଓଜନ କମିବା ବଦଳରେ ବଢ଼ିବାକୁ ଲାଗେ। ତେଣୁ ଡାଏଟିଂ କରିବା ବେଳେ କେଉଁ ଫଳ ଖାଇବା ଠାରୁ ଦୂରେଇ ରହିବା ଉଚିତ ଆସନ୍ତୁ ଜାଣିବା ।

• କଦଳୀ: କଦଳୀକୁ ଏକ ସୁପରଫୁଡ୍ ବୋଲି କୁହାଯାଏ । କିନ୍ତୁ ଏହା ଏକ ଏଭଳି ଫଳ, ଯାହାକୁ ଆପଣ ଅଧିକ ମାତ୍ରାରେ ଖାଇପାରିବେ ନାହିଁ। କଦଳୀରେ କ୍ୟାଲୋରୀ ଭରପୁର ମାତ୍ରାରେ ରହିଛି। ଗୋଟିଏ କଦଳୀରେ ପ୍ରାୟ ୧୫୦ କ୍ୟାଲୋରୀ ଥାଏ, ଯାହା ପ୍ରାୟ ୩୭.୫ ଗ୍ରାମ କାର୍ବୋହାଇଡ୍ରେଟ୍ ସହ ସମାନ । ତେଣୁ  ଯଦି ଆପଣ ଡାଏଟିଂରେ ରହି ପ୍ରତିଦିନ ୨ରୁ୩ଟି କଦଳୀ ଖାଉଛନ୍ତି ତେବେ ଏହା ଓଜନ କମାଇବା ବଦଳରେ ବଢ଼ାଇପାରେ। ଡାଏଟିଂ କରୁଥିବା ବ୍ୟକ୍ତି ଦିନକୁ କେବଳ ଗୋଟିଏ କଦଳୀ ଖାଇବା ଉଚିତ।
• ଅଙ୍ଗୁର: ସ୍ୱାସ୍ଥ୍ୟ ପାଇଁ ଭଲ ଅଙ୍ଗୁର। କିନ୍ତୁ ଏଥିରେ ଅଧିକମାତ୍ରାରେ ସର୍କରା ଜାତୀୟ ପଦାର୍ଥ ରହିଛି, ଯାହା ଓଜନ ବଢ଼ାଇବା କାମ କରେ। ୧୦୦ ଗ୍ରାମ ଅଙ୍ଗୁରରେ ୬୭ କ୍ୟାଲୋରୀ ଏବଂ ୧୬ ଗ୍ରାମ ଚିନି ଅଛି।  ଯଦି ଆପଣ ଏହାକୁ ନିୟମିତ ରୂପେ ଖାଉଛନ୍ତି ତେବେ ଓଜନ ବଢ଼ିପାରେ। ତେଣୁ ଆପଣ ଯଦି ଡାଏଟିଂରେ ଅଛନ୍ତି ତା’ହେଲେ ଅଙ୍ଗୁର ଖାଇବାଠାରୁ ଦୂରେଇ ରୁହନ୍ତୁ।
• କିସମିସ: ଡ୍ରାଏ ଫ୍ରୁଟସ ବା କିସମିସରେ ଅଧିକ ମାତ୍ରାରେ କ୍ୟାଲୋରୀ ରହିଛି । ଅଙ୍ଗୁର ତୁଳନାରେ ଏକ ଗ୍ରାମ କିସମିସରେ ଅଧିକ କ୍ୟାଲୋରୀ ଥାଏ ବୋଲି କୁହାଯାଉଛି। ଏକ କପ କିସମିସରେ ପାଖାପାଖି ୫୦୦ କ୍ୟାଲୋରୀ ଅଛି। ତେଣୁ ଡାଏଟିଂ କରୁଥିବା ବ୍ୟକ୍ତି କିସମିସ ଖାଇବା ଠାରୁ ମଧ୍ୟ ଦୂରେଇ ରହିବା ଉଚିତ।
• ଆଭୋକାଡୋ: ଅଧିକ କ୍ୟାଲୋରୀ ଯୁକ୍ତ ଫଳ ମଧ୍ୟରୁ ଗୋଟିଏ ହେଉଛି ଆଭୋକାଡୋ। ୧୦୦ ଗ୍ରାମ ଆଭୋକାଡୋରେ ପ୍ରାୟ ୧୬୦ କ୍ୟାଲୋରୀ ଥାଏ। ଏହାକୁ ଅଧିକ ଖାଇଲେ ଓଜନ ବଢ଼ିପାରେ। ଆପଣ ଚାହିଁଲେ ଏହି ଫଳକୁ କମ ମାତ୍ରାରେ ନିଜ ଡାଏଟରେ ସାମିଲ କରିପାରବେ।
• ଆମ୍ବ: ଆମ୍ବକୁ ଫଳମାନଙ୍କ ରାଜା କୁହାଯାଏ। କାରଣ ଅନ୍ୟ ଫଳ ଅପେକ୍ଷା ଅଧିକ ସ୍ୱାଦିଷ୍ଟ ହେଉଛି ଆମ୍ବ। ଗୋଟିଏ ଖଣ୍ଡ ଆମ୍ୱରେ ୯୯ କ୍ୟାଲୋରୀ ରହିଛି, ୨୩ ଗ୍ରାମ ଚିନି ଏବଂ ୩ ଗ୍ରାମ ଫାଇବର ରହିଛି। ଯଦି ଆପଣ ଡାଏଟିଂରେ ରହି ଓଜନ ହ୍ରାସ କାରିବାକୁ ଚାହୁଁଛନ୍ତି, ତେବେ ସୀମିତ ପରିମାଣରେ ଆମ୍ବ ଖାଇବା ଭଲ।

ଆଜିର ରାଶିଫଳ – ୩ ମାର୍ଚ୍ଚ, ବୁଧବାର

ମେଷ: ନିଜର ତୀକ୍ଷ୍ଣ ବୁଦ୍ଧି ଓ କୌଶଳ ପ୍ରୟୋଗ କରି କାର୍ଯ୍ୟ ସାଧନ କରିବେ। ନୂତନ ସ୍ଥାନ ପରିଭ୍ରମଣର ସୁଯୋଗ ପାଇବେ। କର୍ମ କ୍ଷେତ୍ରରେ ଉଚ୍ଚ କର୍ତ୍ତୃପକ୍ଷଙ୍କ ସହିତ ସୁସମ୍ପର୍କ ସ୍ଥାପନ ହେବ । ପ୍ରତିକାର- ‘ଘୃଣି ସୂର୍ଯ୍ୟାୟ ନମଃ’  ମନ୍ତ୍ରରେ ସୂର୍ଯ୍ୟଙ୍କୁ ଅର୍ଘ୍ୟ  ପ୍ରଦାନ କରନ୍ତୁ।

ବୃଷ: ଶତ୍ରୁମାନେ ପରାଜୟ ସ୍ୱୀକାର କରି ମିତ୍ରତାର ହାତ ବଢାଇବେ। ଶରୀର ସୁସ୍ଥ ରହିବ ଓ ଯାତ୍ରା ସଫଳ ହେବ। ରାଜନୀତି କ୍ଷେତ୍ରରେ ମାନ ସମ୍ମାନ ପ୍ରଶଂସାର ଅଧିକାରୀ ହେବେ ।

ମିଥୁନ: ମିତ୍ରମାନଙ୍କ ସହିତ ଅଯଥା ଯୁକ୍ତିତର୍କ ମତପାର୍ଥକ୍ୟ ଦେଖାଦେଇପାରେ।  ଖାଦ୍ୟର ଅନିୟମିତତା ହେତୁ ସ୍ୱାସ୍ଥ୍ୟ ଖରାପ ହୋଇଯାଇପାରେ । ତେଣୁ ଜଗି ରଖି ଚଳନ୍ତୁ । ପ୍ରତ୍ୟେକଟି କାର୍ଯ୍ୟରେ ବାଧାବିଘ୍ନ ଘାତପ୍ରତିଘାତ ଦେଖାଦେବ । ପ୍ରତିକାର- ତୁଳସୀ ଚଉରା ମୂଳରେ ଜଳ ପ୍ରଦାନ କରନ୍ତୁ ଓ ତୁଳସୀ ମୂଳର ମାଟିକୁ ମଥାରେ ଲଗାନ୍ତୁ ।

କର୍କଟ:ପାରିବାରିକ ମନୋମାଳିନ୍ୟ ଦୂରହୋଇ ସୁଖ ଶାନ୍ତି ବିରାଜମାନ କରିବ। ନିଜ ଲୋକମାନଙ୍କ ପ୍ରେରଣା ପାଇ ଲକ୍ଷ୍ୟସ୍ଥଳରେ ପହଞ୍ଚିବେ । ମହିଳାମାନଙ୍କ କାର୍ଯ୍ୟ ଜନସମାଜରେ ପ୍ରଶଂସନୀୟ ହେବ। ପ୍ରତିକାର- ଡାଲିମ୍ବ ବୃକ୍ଷ ମୂଳରେ କିଛି କଞ୍ଚାକ୍ଷୀର, ଅରୁଆ ଚାଉଳ ମିଶାଇ ଢାଳନ୍ତୁ ।

ସିଂହ: ସାଂଗଠନିକ କାର୍ଯ୍ୟର ନେତୃତ୍ୱ ନେଇ ପ୍ରଶଂସିତ ହେବେ। ଲାଗିରହିଥିବା ସମସ୍ୟା ଗୁଡିକର ସମାଧାନ ହୋଇଯିବ । ସାମାଜିକ ମାନ ସମ୍ମାନ ପ୍ରତିଷ୍ଠା ଲାଭ କରିବେ। ପ୍ରତିକାର-ରୁଟି ଓ ଗୁଡ ଗାଈକୁ ଖାଇବାକୁ ଦିଅନ୍ତୁ ।

କନ୍ୟା: ପରିଶ୍ରମ ତୁଳନାରେ ପାରିଶ୍ରମିକ କମ୍ ପାଇବେ। ଆକସ୍ମିକ ଦୁର୍ଘଟଣା ଦେଖାଦେଇପାରେ । ତେଣୁ ସତର୍କତା ଅବଲମ୍ବନ କରନ୍ତୁ । ବ୍ୟବସାୟ ବାଣିଜ୍ୟରେ ଦ୍ରବ୍ୟ ହାନି ବା ଚୋରି ହେବାର ସମ୍ଭାବନା ରହିଛି। ପ୍ରତିକାର- ପାଞ୍ଚଟି ତ୍ରିଶାଖା ବେଲପତ୍ର ମହାଦେବଙ୍କୁ ଅର୍ପଣ କରନ୍ତୁ ।

ତୁଳା: ପ୍ରତ୍ୟେକଟି କାର୍ଯ୍ୟରେ ସଫଳ ହେବେ ଓ ଉତ୍ତମ ଭୋଜନ ପ୍ରାପ୍ତି ହେବ । ଶରୀର ସୁସ୍ଥ ରହିବ । ସମସ୍ତ ଆଶା ଅଭିଳାଷ ପୂରଣ ହେବ । କର୍ମକ୍ଷେତ୍ରରେ ଉଚ୍ଚ ପଦପଦବୀ ପାଇବାର ସୁଯୋଗ ରହିଛି । ପ୍ରତିକାର- ଶ୍ରୀଗଣେଶଙ୍କ ପାଖରେ ସାତଟି  ବୁନ୍ଦି ଲଡୁ ଭୋଗଲାଗି କରନ୍ତୁ ।

ବିଛା: ଗୁରୁଜନମାନଙ୍କ ସ୍ୱାସ୍ଥ୍ୟରେ ଉନ୍ନତି ପରିଲକ୍ଷିତ ହେବ । ମହିଳାମାନେ ରାଜନୀତି କ୍ଷେତ୍ରରେ ନିଜର ସ୍ଥିତି ସୁଦୃଢ କରିବେ। ଯାନବାହନ ଚାଳନାରେ ସତର୍କତା ଅବଲମ୍ବନ କରନ୍ତୁ । ପ୍ରତିକାର- ହନୁମାନଙ୍କୁ ଦର୍ଶନ କରନ୍ତୁ ଓ ସାତଟି ପେଡା ଭୋଗ କରନ୍ତୁ ।

ଧନୁ: ନିର୍ମାଣଧୀନ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚାଇବେ। ନୂତନ ଯାନ ବାହନ କିମ୍ବା ଭୂମି କ୍ରୟ କରିବାର ସୁଯୋଗ ରହିଛି । ମହିଳା ଓ ଛାତ୍ରଛାତ୍ରୀମାନେ ହସ ଖୁସିରେ ଦିନ କାଟିବେ। ପ୍ରତିକାର- କଦଳୀ ଗଛ ମୂଳରେ ହଳଦୀ ମିଶ୍ରିତ ଜଳ ପ୍ରଦାନ କରନ୍ତୁ ।

ମକର: ଦୁଃସାହସିକ ପଦକ୍ଷେପ ନେଇ କାର୍ଯ୍ୟଟିକୁ ସମ୍ପାଦନ କରିବେ । କର୍ମ କ୍ଷେତ୍ରରେ ସହଯୋଗୀମାନଙ୍କର ସାହାଯ୍ୟ ସହାନୁଭୂତି ମିଳିବ। ଆର୍ଥିକ, ମାନସିକ,ଶାରୀରିକ ଅଭିବୃଦ୍ଧି ଘଟିବ। ପ୍ରତିକାର- ଅଶ୍ୱତଥ୍ ପତ୍ରଟିଏ ନିଜ ପାଖରେ ରଖନ୍ତୁ ।

କୁମ୍ଭ: ସନ୍ତାନମାନଙ୍କ ବିଶୃଙ୍ଖଳିତ ଆଚରଣରେ ଦୁଃଖିତ ହେବେ । ଜମିବାଡି ଜନିତ ସମସ୍ୟାକୁ ନେଇ କୋର୍ଟ କଚେରୀର ଦ୍ୱାରସ୍ଥ ହୋଇପାରନ୍ତି । କର୍ମକ୍ଷେତ୍ରରେ ଷଡଯନ୍ତ୍ରର ଶିକାର ହୋଇପାରନ୍ତି ।

ମୀନ: ଶରୀରର କୌଣସି ଅଙ୍ଗରେ ଆଘାତ ଲାଗି କ୍ଷତାକ୍ତ ହୋଇପାରେ । ତେଣୁ ସାବଧାନ ହୋଇ କାମ କରନ୍ତୁ । ବୃଥା ଭ୍ରମଣ, ଧନ ହାନୀ, ପ୍ରାଣପୀଡା ଦେଖାଦେଇପାରେ । ପ୍ରତ୍ୟେକଟି ଦିଗରେ ବାଦାନୁବାଦ ଦେଇ ଗତି କରିବାକୁ ପଡିବ । ପ୍ରତିକାର- କିଛି ଗହମରେ ଗୁଡ ମିଶାଇ ଗାଈକୁ ଖାଇବାକୁ ଦିଅନ୍ତୁ   ।

ସାଇବର ଆଟାକ୍‌ କରି ମୁମ୍ବାଇରେ ବିଜୁଳି ବିଭ୍ରାଟ କରିଥିଲା ଚାଇନା ।

ଏଥର ସମ୍ଭାଳ ବ୍ୟୁରୋ (ମୁମ୍ବାଇ)- ସୀମାରେ ଭାରତ ସହ ତିକ୍ତତା ସୃଷ୍ଟି କରିଥିବା ଚାଇନା ସାଇବର ଆଟାକ ମଧ୍ୟ କରିଛି। ଗତବର୍ଷ ଅକ୍ଟୋବର ମାସରେ ମୁମ୍ବାଇରେ ଦୀର୍ଘ ସମୟ ଧରି ବିଜୁଳି ବିଭ୍ରାଟ ଦେଖାଯାଇଥିଲା। ଟ୍ରେନ୍‌ ଚଳାଚଳ ଠାରୁ ଆରମ୍ଭ କରି ବେପାର ବଣିଜ କିଛି ସମୟ ପାଇଁ ଅଟକି ଯାଇଥିଲା। ତେବେ ଏହା ପଛରେ ଚାଇନାର ସାଇବର ଆଟାକ ଥିବା ନ୍ୟୁୟର୍କ ଟାଇମ୍ସରେ ଆଶଙ୍କା କରାଯାଇଛି। ଏହି ଖବର ସଂପୂର୍ଣ୍ଣ ସତ୍ୟ ଓ ମୁମ୍ବାଇରେ ବିଜୁଳି ବିଭ୍ରାଟ ପଛରେ ଚାଇନାର ସାଇବର ଆଟାକ ରହିଥିବା ମହାରାଷ୍ଟ୍ର ଶକ୍ତି ମନ୍ତ୍ରୀ ନୀତୀନ ରାଉତ ଆଜି କହିଛନ୍ତି। ଭାରତରେ କରୋନା ମହାମାରୀର ସଙ୍କଟ ଚାଲିଥିବା ବେଳେ ଗତବର୍ଷ ଅକ୍ଟୋବର ମାସରେ ମୁମ୍ବାଇରେ ଏକ ବଡ଼ଧରରଣ ବିଦ୍ୟୁତ ସଙ୍କଟ ଦେଖାଦେଇଥିଲା। ଏହି କାରଣରୁ ଟ୍ରେନଗୁଡ଼ିକ ରାସ୍ତାରେ ଅଟକି ରହିଥିଲା ଓ ହସ୍ପିଟାଲ ଗୁଡ଼ିକ ଜେନେରେଟର ଚଳାଇ ଭେଣ୍ଟିଲେଟରରେ ରୋଗୀଙ୍କ ଚିକିତ୍ସା କରିଥିଲେ। ଏ ବିଷୟରେ ଏବେ ତଥ୍ୟ ସାମ୍ନାକୁ ଆସିଛି। ରିପୋର୍ଟରେ କୁହାଯାଇଛି ଯେ ଚାଇନାର ହ୍ୟାକର ଗୋଷ୍ଠୀ RedEcho ଭାରତୀୟ ଶକ୍ତି କ୍ଷେତ୍ରକୁ ଟାର୍ଗେଟ କରିଛି। ଏହି ଗ୍ରୁପ୍‌ ହିଁ ଭାରତୀୟ ପାୱାର ପ୍ଲାଣ୍ଟରେ ମାଲୱେର ଛାଡ଼ି ଏହାକୁ ଅଚଳ କରିଦେଇଥିଲା। ଗଲୱାନ ଉପତ୍ୟକାରେ ଉଭୟ ଦେଶ ମଧ୍ୟରେ ରକ୍ତାକ୍ତ ସଂଘର୍ଷ ଦେଖାଦେଇଥିଲା। ଏଥିରେ ୨୦ ଜଣ ଭାରତୀୟ ଯବାନ ସହିଦ ହୋଇଥିଲେ। ଚାଇନା ମଧ୍ୟ ଅନେକ ଯବାନଙ୍କୁ ହରାଇଥିଲା। ଏହାକୁ ନେଇ ଦୁଇ ଦେଶ ମଧ୍ୟରେ ତିକ୍ତତା ଚମର ସୀମାରେ ପହଞ୍ଚିଥିଲା। ଭାରତକୁ ଶିକ୍ଷା ଦେବା ପାଇଁ ଚାଇନାର ହ୍ୟାକରମାନେ ବିଜୁଳି ବିତରଣ କେନ୍ଦ୍ର ବା ଗ୍ରୀଡ୍‌କୁ ଟାର୍ଗେଟ କରି ମାଲୱେର ଛାଡ଼ିଥିଲେ। ଏଥିଯୋଗୁ ମୁମ୍ବାଇରେ ପ୍ରାୟ ୨ ଘଣ୍ଟା ଧରି ବିଜୁଳି କଟି ଯାଇଥିଲା। ଚାଇନିଜ୍ ମାଲୱେର ପ୍ରବାହକୁ ଆମେରିକାର ଏକ କମ୍ପାନୀ Recorded Future ଠାବ କରିଥିଲା। ଏହି କମ୍ପାନୀ ଡିଜିଟାଲ ବିପଦର ଅଧ୍ୟୟନ କରିଥାଏ। କମ୍ପାନୀ କହିଛି ଯେ ଭାରତୀୟ ପାୱାର ଗ୍ରୀଡରେ ମାଲୱେର ପ୍ରବେଶ କରିଥିଲେ ହେଁ ଅଧିକାଂଶ ଆକ୍ଟିଭ ହୋଇ ନଥିଲା। ଏହି କାରଣରୁ ବେଶୀ କିଛି କ୍ଷତି ହୋଇ ନଥିଲା। କେବଳ ମାଲୱେରର ଛୋଟିଆ ଅଂଶ ମୁମ୍ବାଇରେ ବିଜୁଳି ବିଭ୍ରାଟ ସୃଷ୍ଟି କରିଥିଲା। ଅନ୍ୟପକ୍ଷରେ ମହାରାଷ୍ଟ୍ର ଶକ୍ତିମନ୍ତ୍ରୀ ନୀତୀନ ରାଉତ କହିଛନ୍ତି, ନ୍ୟୁୟର୍କ ଟାଇମ୍ସରେ କରାଯାଇଥିବା ଦାବିରେ ସତ୍ୟତା ରହିଛି। ଆମେ ଘଟଣାର ତଦନ୍ତ ପାଇଁ ୩ ଜଣିଆ କମିଟି ଗଠନ କରିଥିଲୁ। ସାଇବର ବିଭାଗ ଠାରୁ ଆମେ ଆଜି ସନ୍ଧ୍ୟାରେ ବିସ୍ତୃତ ରିପୋର୍ଟ ପାଇବୁ ବୋଲି ସେ କହିଛନ୍ତି। ଏହାପୂର୍ବରୁ ମହାରାଷ୍ଟ୍ର ସାଇବର ବିଭାଗ ମୁମ୍ବାଇ ବିଜୁଳି ବିଭ୍ରାଟ ପଛରେ ସାଇବର ଆଟାକ କଥା ସନ୍ଦେହ କରିଥିଲା।

ଆଜିଠୁ କୁଆଖାଇ ପୋଲରେ ଯାତାୟତ ବନ୍ଦ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ଵର) – ଭୁବନେଶ୍ୱର-କଟକ ଜାତୀୟ ରାଜପଥରେ ଥିବା ପୁରୁଣା କୁଆଖାଇ ପୋଲରେ ଆଜିଠୁ ବନ୍ଦ ରହିବ ଯାତାୟାତ । ଏହାର ମରାମତି ପାଇଁ ଆଜିଠୁ ଠିକ୍ ୨ ମାସ ଅର୍ଥାତ୍ ମେ ୨ ତାରିଖ ପର୍ଯ୍ୟନ୍ତ ବନ୍ଦ ରହିବ। କମିଶନରେଟ୍ ପୁଲିସ୍‌  ଟ୍ୱିଟ୍ କରି ଏହି ସୂଚନା ଦେଇଛି। ଦୀର୍ଘ ଦିନ ଧରି ଏହି ବ୍ରିଜ ବିପଦସଙ୍କୁଳ ଅବସ୍ଥାରେ ଥିବାରୁ ଏହାର ମରାମତି ପାଇଁ ଦାବି ହେଉଥିଲା । ତେଣୁ ମରାମତି ହେବାକୁ ଥିବାରୁ ଏହା ଉପରେ କୌଣସି ଯାନବାହନ ଚଳଳଚଳ କରିବ ନାହିଁ। ଭୁବନେଶ୍ୱର ପଟୁ କଟକ ଯାଉଥିବା ସମସ୍ତ ପ୍ରକାର ଯାନବାହନ ମଝି କୁଆଖାଇ ପୋଲ ଦେଇ ଯାତାୟତ କରିବ।

କୋଭିଡ୍‌ ଗାଇଡ୍‌ଲାଇନ୍‌ରେ ହେବ ଲିଙ୍ଗରାଜ ମହାପ୍ରଭୁଙ୍କ ଜାଗର ଯାତ୍ରା ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ଵର) – ଚଳିତବର୍ଷ ଲିଙ୍ଗରାଜ ମହାପ୍ରଭୁଙ୍କର ହେବ ମହାଶିବରାତ୍ରୀ। କୋଭିଡ୍‌ ଗାଇଡ୍‌ଲାଇନ୍‌ ଭିତରେ ଜାଗର ଯାତ୍ରା କରିବାକୁ ସ୍ଥିର ହୋଇଛି। ଭୁବନେଶ୍ୱର ମହାନଗର ନିଗମ(ବିଏମସି) କମିଶନର ପ୍ରେମ ଚନ୍ଦ୍ର ଚୌଧୁରୀଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଏହି ନିସ୍ପତି ନିଆଯାଇଛି । ମହାଶିବରାତ୍ରୀରେ ୬୦ ବର୍ଷରୁ ଊର୍ଦ୍ଧ୍ୱ ବୟସ୍କ ବ୍ୟକ୍ତି ଓ ୧୦ ବର୍ଷରୁ କମ୍‌ ବୟସର ପିଲାଙ୍କୁ ମନ୍ଦିର ଭିତରେ ପ୍ରବେଶ ଉପରେ କଟକଣା ରଖାଯାଇଛି। ଯେଉଁ ଭକ୍ତମାନେ ମନ୍ଦିର ଭିତରକୁ ଯିବେ, ସେମାନେ ଗର୍ଭଗୃକୁ ଯାଇପାରିବେ ନାହିଁ। କେବଳ ଆଡ଼କାଠରେ ରହି ମହାଦେବଙ୍କ ଦର୍ଶନ କରିବେ। ସମ୍ପୂର୍ଣ୍ଣ ବ୍ୟାରିକେଡ୍‌ ଭିତରେ ନିୟମ ଅନୁସାରେ ଭକ୍ତ ଦର୍ଶନ କରିବେ। ଶ୍ରଦ୍ଧାଳୁଙ୍କ ପାଇଁ ଛାଇ ଓ ପିଇବା ପାଣିର ବ୍ୟବସ୍ଥା କରାଯିବ। ମନ୍ଦିର ଭିତରେ ପ୍ରବେଶ ପୂର୍ବରୁ ଶ୍ରଦ୍ଧାଳୁଙ୍କର ସ୍କ୍ରିନିଂ କରାଯିବ। ଯେଉଁମାନଙ୍କଠାରେ କରୋନା ଲକ୍ଷ୍ୟଣ ଦେଖାଯିବା, ଦରକାର ପଡ଼ିଲେ ସେହିଠାରେ ସେମାନଙ୍କର ଆଣ୍ଟିଜେନ୍‌ ଟେଷ୍ଟ କରାଯିବ ବୋଲି ବିଏମ୍‌ସି କମିଶନର କହିଛନ୍ତି। ଆଜିର ବୈଠକରେ ଲିଙ୍ଗରାଜ ମନ୍ଦିର ୩ ନିଯୋଗ, BMC କର୍ତ୍ତୃପକ୍ଷ, ଲିଙ୍ଗରାଜ ମନ୍ଦିର ନିର୍ଦ୍ଦେଶକ ଉପସ୍ଥିତ ରହିଥିଲେ। ମହାମାରୀ କରୋନାର ପ୍ରକୋପ ଏବଂ ଏହାପରେ ଲକ୍‌ଡାଉନ୍‌ କାରଣରୁ ଶ୍ରଦ୍ଧାଳୁଙ୍କ ସ୍ୱାସ୍ଥ୍ୟ ସୁରକ୍ଷାକୁ ଦୃଷ୍ଟିରେ ରଖି ଗତବର୍ଷ ଲିଙ୍ଗରାଜଙ୍କ ପ୍ରସିଦ୍ଧ ରୁକୁଣା ରଥ ଗଡ଼ିନଥିଲା। ଯାହାକୁ ନେଇ ଶ୍ରଦ୍ଧାଳୁ ଓ ସେବାୟତଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ସେହି ଦୃଷ୍ଟିରୁ ଚଳିତବର୍ଷ ମହାପ୍ରଭୁଙ୍କ ଜାଗର ଯାତ୍ରାକୁ ନେଇ ସସ୍‌ପେନ୍ସ ଦେଖାଦେଇଥିଲା। ତେବେ ସବୁ କଳ୍ପନାଜଳ୍ପନାର ଅନ୍ତଘଟାଇ ଜାଗର ଯାତ୍ରା କରିବାକୁ ବିଏମ୍‌ସି ନିଷ୍ପତ୍ତି ନେଇ ଯାଇଛି। ଯାହାକୁ ମନ୍ଦିର ସେବାୟମାନେ ସ୍ୱାଗତ କରିଛନ୍ତି।

ଡିପ୍ରେସନ ଦୂର କରିବ କଫି, ଜାଣନ୍ତୁ ଆଉ କ’ଣ ମିଳିବ ଫାଇଦା ।

• ୨୦୧୫ରେ ହୋଇଥିବା ଏକ ରିସର୍ଚ୍ଚ ମୁତାବକ ଦିନ ସାରା ୪ କପ୍‌ରୁ ଅଧିକ କଫି ପିଇବା ଦ୍ୱାରା ବହୁ ଗମ୍ଭୀର ବେମାରରୁ ରକ୍ଷା ମିଳିପାରିବ। ରୋଗ ବଢ଼ିବାର କାରଣ ସାଜୁଥିବା ନ୍ୟୁରଲ ଇଂଫ୍ଲେମେଶନକୁ ରୋକିଥାଏ କଫି। କେଫିନ୍‌ରେ ଥିବା ତତ୍ତ୍ୱ ଶରୀରରେ ଚର୍ବି କମାଇଥାଏ। ବହୁ ରିସର୍ଚ୍ଚରୁ ସାବ୍ୟସ୍ତ ହୋଇସାରିଛି କି କେଫିନ୍‌ ଶରୀରରେ ୩ରୁ ୧୧ ପ୍ରତିଶତ ପର୍ଯ୍ୟନ୍ତ ମେଟାବାଲିକ ରେଟ୍‌କୁ ବୁଷ୍ଟ କରିଥାଏ।

• ଅନ୍ୟ ଏକ ରିସର୍ଚ୍ଚରୁ ଜଣାପଡ଼ିଛି, କେଫିନ୍‌ ଦ୍ୱାରା ମୋଟା ଲୋକଙ୍କ ଶରୀରରେ ୧୦ ପ୍ରତିଶତ ଓ ଦୁର୍ବଳ ଲୋକଙ୍କ  ଶରୀରରେ ୨୯ ପ୍ରତିଶତ ଫ୍ୟାଟ୍‌ ବର୍ଣ୍ଣ ହୋଇଥାଏ।

ଆଜିର ରାଶିଫଳ – ୨ ମାର୍ଚ୍ଚ, ମଙ୍ଗଳବାର

ମେଷ: ଦାମ୍ପତ୍ୟ ଜୀବନ ସୁଖପ୍ରଦ ହେବ। ମନର ଅଭିଳାଷ ପୂରଣ ହେବ। ଶତ୍ରୁମାନେ ପରାଜିତ ହେବେ ଏବଂ ମାନ ସମ୍ମାନ ପ୍ରତିଷ୍ଠା ଅର୍ଜନ କରିବେ। ମାଲିମକଦ୍ଦମାରେ ବିଜୟ ଲାଭ କରିବାର ସମ୍ଭାବନା ଅଧିକ ରହିଛି।  ପ୍ରତିକାର- କିଛି ଗାଈକୁ ଖାଇବାକୁ ଦିଅନ୍ତୁ।

ବୃଷ: କାର୍ଯ୍ୟରେ ବିଳମ୍ବ, ଅପବ୍ୟୟକୁ ନେଇ ମନ ଭାରକ୍ରାନ୍ତ ରହିବ। କେହି ଜଣେ ବ୍ୟକ୍ତି ଶତ୍ରୁତା ଆଚରଣ କରି ବିପଦରେ ପକାଇ ଦେଇପାରେ। ବ୍ୟବସାୟ ବାଣିଜ୍ୟ କ୍ଷେତ୍ରରେ ପ୍ରତିବନ୍ଧକମାନ ସୃଷ୍ଟି ହେବ। ପ୍ରତିକାର- ଶ୍ରୀ ଗଣେଶଙ୍କ ଗାୟତ୍ରୀ ମନ୍ତ୍ରକୁ ୨୭ଥର ଜପ କରନ୍ତୁ।

ମିଥୁନ: ପୈତୃକ ସମ୍ପତ୍ତିକୁ ନେଇ ଲାଗିଥିବା ବାଦ ବିବାଦର ସମାଧାନ ହେବ। ନିଜର ଲୋକମାନେ ସାହାଯ୍ୟ ସହାନୁଭୂତି ପ୍ରଦାନ କରିବେ। ଛାତ୍ରଛାତ୍ରୀମାନେ ପ୍ରତିଯୋଗିତାରେ ସଫଳତା ଅର୍ଜନ କରିବେ। ପ୍ରତିକାର- ଶ୍ରୀ ବିଷ୍ଣୁଙ୍କୁ ଦର୍ଶନ କରନ୍ତୁ ଓ ଘୃତ ଦୀପଟିଏ ପ୍ରଦାନ କରନ୍ତୁ।

କର୍କଟ: ଶାରୀରିକ  ଓ ମାନସିକ ଅଭିବୃଦ୍ଧି ଘଟିବ। କୌଣସି ମାଙ୍ଗଳିକ ଉତ୍ସବରେ ଅଂଶ ଗ୍ରହଣ କରିବାର ସୁଯୋଗ ରହିଛି। କର୍ମଜୀବି ମହିଳାମାନେ ପ୍ରଶଂସାର ଅଧିକାରୀ ହେବେ। ପ୍ରତିକାର- କଉଡିଟିଏ ନିଜ ପାଖରେ ରଖନ୍ତୁ।

ସିଂହ: ଯୁକ୍ତିତର୍କ କଥାରୁ ଦୂରେଇ ରୁହନ୍ତୁ ନଚେତ୍ ଅଯଥା ମନୋମାଳିନ୍ୟ ଦେଖାଦେବ। ଆୟ ତୁଳନାରେ ବ୍ୟୟ ଅଧିକ ହେବ।  ଯାହାଫଳରେ ମନସ୍ତାପ ଦେଇ ଗତି କରିବେ। ଗୁପ୍ତ ଶତ୍ରୁ ଭୟ ମନକୁ ବ୍ୟତିବ୍ୟସ୍ତ କରାଇବ। ପ୍ରତିକାର- ହନୁମାନଙ୍କୁ ଦର୍ଶନ କରନ୍ତୁ ଓ ସାତଟି ପେଡା ଭୋଗ କରାନ୍ତୁ।

କନ୍ୟା: ଧନ ମାନ ପ୍ରତିଷ୍ଠା ମିଳିବା ସହିତ ସ୍ୱାଦିଷ୍ଟ ଭୋଜନ ପ୍ରାପ୍ତି ହେବ। ଆଶା କରୁଥିବା ଦିଗରୁ ଅର୍ଥ ପ୍ରାପ୍ତିର ଯୋଗ ରହିଛି। ବ୍ୟବସାୟ ବାଣିଜ୍ୟରେ ପୂର୍ବ ଅପେକ୍ଷା ଅଧିକ ଲାଭବାନ ହେବେ। ପ୍ରତିକାର- ସବୁଜ ରଙ୍ଗର ରୁମାଲଟିଏ ନିଜ ପାଖରେ ରଖନ୍ତୁ।

ତୁଳା: ଅନେକ ବାଧାବିଘ୍ନ ଆସିଲେ ମଧ୍ୟ ସମାଧାନର ବାଟ ଦେଖାଦେବ। କର୍ମକ୍ଷେତ୍ରରେ ସହଯୋଗୀମାନଙ୍କ ସାହାଯ୍ୟ ସହଯୋଗ ପାଇବେ। ଦୂରସ୍ଥାନକୁ ଯାତ୍ରା କରନ୍ତୁ ନାହିଁ । ଆକସ୍ମିକ ଦୁର୍ଘଟଣା ଦେଖାଦେଇପାରେ। ପ୍ରତିକାର- କିଛି କଞ୍ଚାକ୍ଷୀରରେ କଳାରାଶି ମିଶାଇ ମହାଦେବଙ୍କୁ ଅର୍ପଣ କରନ୍ତୁ।

ବିଛା: ପାରିବାରିକ ଓ ଦାମ୍ପତ୍ୟ ଜୀବନ ସୁଖପ୍ରଦ ହେବ। ନିର୍ମାଣଧୀନ କାର୍ଯ୍ୟକୁ ତ୍ୱରାନ୍ୱିତ କରି ପୂର୍ଣ୍ଣାଙ୍ଗ କରିବେ। ଛାତ୍ରଛାତ୍ରୀମାନେ ପ୍ରଗତି ପଥରେ ଅଗ୍ରସର ହୋଇ ଲକ୍ଷ୍ୟସ୍ଥଳରେ ପହଞ୍ଚିବେ। ପ୍ରତିକାର- ସାତଥର ହନୁମାନ ଚାଳିଶା ପାଠ କରନ୍ତୁ।

ଧନୁ: ପ୍ରତ୍ୟେକ କାର୍ଯ୍ୟରେ ସଫଳ ହେବେ ଓ ସୁଖ୍ୟାତି ଅର୍ଜନ କରିବେ। କୌଣସି ଜରୁରୀ କାମରେ ଦୂରସ୍ଥାନକୁ ଯାତ୍ରା କରିପାରନ୍ତି। ଆମଦାନୀ ରପ୍ତାନୀ ଜାତୀୟ କାରବାରରେ ଲାଭବାନ ହେବେ। ପ୍ରତିକାର- ଗାୟତ୍ରୀ ମନ୍ତ୍ରକୁ ୨୭ଥର ଜପ କରନ୍ତୁ

ମକର: ବୃଥା ଭ୍ରମଣ, ଶାରୀରିକ ଅସୁସ୍ଥତା ଓ ମାନସିକ ଅବସାଦ ଦେଖାଦେବ। ସାମାଜିକ ଓ ରାଜନୈତିକ ସମ୍ମାନ କ୍ଷୁର୍ଣ୍ଣ ହେବ। ଛାତ୍ରଛାତ୍ରୀମାନେ ବିଶୃଙ୍ଖଳିତ ହୋଇ ବିଦ୍ୟା ଶିକ୍ଷାରେ ଅସଫଳ ହୋଇପାରନ୍ତି। ପ୍ରତିକାର- ଅଶ୍ୱତଥ ଗଛ ମୂଳରେ ରାଶି ତେଲର ଦୀପଟିଏ ଜାଳନ୍ତୁ।

କୁମ୍ଭ: କୌଣସି କାର୍ଯ୍ୟ ପ୍ରତି ସ୍ପୃହା ରହିବ ନାହିଁ। ଶରୀରରେ ଆଘାତ ଲାଗିବାର ସମ୍ଭାବନା ରହିଛି । ତେଣୁ ଜଗିରଖି ଚଳନ୍ତୁ। କୌଣସି ମୂଲ୍ୟବାନ ଦ୍ରବ୍ୟ ଚୋରୀ ହୋଇଯାଇପାରେ କିମ୍ବା ହଜିଯିବାର ସମ୍ଭାବନା ରହିଛି। ପ୍ରତିକାର- ମହାମୃତ୍ୟୁଞ୍ଜୟ ମନ୍ତ୍ରକୁ ୨୧ଥର ଜପ କରନ୍ତୁ।

ମୀନ: କୌଣସି ଅନୁଷ୍ଠାନରେ ମୁଖ୍ୟ ଭାବରେ ଦାୟିତ୍ୱ ଗ୍ରହଣ କରିପାରନ୍ତି। ପୁରାତନ ବନ୍ଧୁଙ୍କ ସହିତ ସାକ୍ଷାତ ହେବାର ସୁଯୋଗ ରହିଛି। ଆଧ୍ୟାତ୍ମିକ ଦିଗରେ ମନ ନିବେଶ କରି ଶାନ୍ତି ଲାଭ କରିବେ। ପ୍ରତିକାର- ହଳଦି ରଙ୍ଗର ରୁମାଲଟିଏ ନିଜ ପାଖରେ ରଖନ୍ତୁ।