ହିରୋଇନ୍ ବି କମ୍ ନୁହନ୍ତି, ଓଡ଼ିଶାରେ ସଫଳ ହେଉଛି ନାରୀ କୈନ୍ଦ୍ରିକ ଫିଲ୍ମ

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ପୁରୁଷ କୈନ୍ଦ୍ରିକ ସମାଜରେ ନାରୀ ପଛରେ ନାହାନ୍ତି। ସବୁକ୍ଷେତ୍ରରେ ସେମାନେ ଦେଖାଇଛନ୍ତି ନିଜର ପାରଦର୍ଶିତା। ମାଆଟିଏ ହୋଇ ନିଜ ପିଲାକୁ ସ୍ନେହ ଓ ବାତ୍ସଲ୍ୟ ବାନ୍ଧି ରଖିବା ହେଉ ବା ସୀମାରେ ଆତଙ୍କବାଦୀଙ୍କୁ ଘୌଡ଼ାଇବା, ସବୁଥିରେ ନାରୀ ଦେଖାଇଛନ୍ତି ଦକ୍ଷତା। ଆଉ ସମାଜ ପାଇଁ ତିଆରି କରିପାରିଛନ୍ତି ସ୍ୱତନ୍ତ୍ର ଉଦାହରଣ। ଯାହାକୁ ନେଇ ତିଆରି ହୋଇଛି ଅନେକ ଫିଲ୍ମ। ପୁରୁଷ କୈନ୍ଦ୍ରିକ ସମାଜରେ ଏହି ଫିଲ୍ମ ଗୁଡ଼ିକ ଅନେକ କ୍ଷେତ୍ରରେ ସଫଳ ହୋଇଛି। ଏଥିରୁ ଓଡ଼ିଶା ପଛରେ ନାହିଁ। ଓଡ଼ିଶାରେ ମଧ୍ୟ ରାଜ କରୁଛନ୍ତି ନାରୀ କୈନ୍ଦ୍ରିକ ଫିଲ୍ମ। ଯେଉଁଥିରେ ରହିଛି ଜବରଦସ୍ତ ଆକ୍‌ସନ୍‌ ଓ ରୋମାନ୍ସ। ବିଶ୍ୱ ମହିଳା ଦିବସ ଅବସରରେ ଏମିତି ନାରୀଙ୍କ ଆମର ସଲାମ। ବଲିଉଡ୍‌ ହେଉ ଅବା ହଲିଉଡ, ମହିଳାଙ୍କୁ ନେଇ ଅନେକ ଫିଲ୍ମ ତିଆରି ହୋଇଛି। ଫିଲ୍ମ ଜରିଆରେ ସେମାନଙ୍କ ସାହାସ ଓ ଶକ୍ତିକୁ ଲୋକଙ୍କ ଆଗରେ ପ୍ରଦର୍ଶିତ କରାଯାଇଛି। ତେବେ ଏଥିରୁ  ଓଡ଼ିଆ ଫିଲ୍ମ ଇଣ୍ଡଷ୍ଟ୍ରି ମଧ୍ୟ ବାଦ୍ ନାହିଁ। ଓଲିଉଡରେ ମଧ୍ୟ ମହିଳା ସଶକ୍ତିକରଣକୁ ନେଇ ତିଆରି ହୋଇଛି ଅନେକ ଫିଲ୍ମ। ଏହି ଫିଲ୍ମ ଗୁଡ଼ିକ ମଧ୍ୟ ସାଉଣ୍ଟିଛି ପ୍ରଶଂସା। ସୋମବାର ବିଶ୍ୱ ମହିଳା ଦିବସ। ଅବସରରେ ‌‘ତରଙ୍ଗ ସିନେ ପ୍ଲସ’ ତରଫରୁ ଏଭଳି  ୮ଟି ମହିଳା କୈନ୍ଦ୍ରିକ ଫିଲ୍ମ ପ୍ରଦର୍ଶିତ ହେବାକୁ ଯାଉଛି। ତେବେ ଆସନ୍ତୁ ଜାଣିବା ସେହି ସବୁ ଫିଲ୍ମ ବିଷୟରେ…

• ଅନୁ ଦିଦି ନଟ୍ ଆଉଟ୍ : ଟେଲି ଫିଲ୍ମ ‘ଅନୁ ଦିଦି ନଟ୍ ଆଉଟ୍।’ ନାରୀ ସଂଘର୍ଷ ଓ ସଫଳତାର କାହାଣୀକୁ ନେଇ ତିଆରି ହୋଇଛି। ଯେଉଁଥିରେ ମୁଖ୍ୟ ଭୂମିକାରେ ଅଛନ୍ତି ଅନୁ ଚୌଧୁରୀ, ଅମନ ଓ ବିଜୟିନୀ ତନୁଶ୍ରୀ। ଏଥିରେ ମୁଖ୍ୟ ଚରିତ୍ରଥିବା ଅନୁ ଦିଦି ଜଣେ କଲେଜ‌ରେ ଅଧ୍ୟାପନା ଭୂମିକାରେ ନଜରକୁ ଆସିବେ। ସେ ଛାତ୍ରୀଙ୍କୁ କିଭଳି ସାହସ ଓ ସଫଳତାର ପାଠ ପଢାଉଛନ୍ତି ତା’ ଉପରେ ଫିଲ୍ମ ଗତିଶୀଳ ହେଉଛି। ମହିଳା ଦିବସ ଉପଲକ୍ଷେ ଆଜି ସନ୍ଧ୍ୟାରେ ତରଙ୍ଗ ପ୍ଲସରେ ଏହି ଫିଲ୍ମଟି ପ୍ରସାରିତ ହେବ।
• ଚାମ୍ପିଅନ: ବାପାଙ୍କ ସ୍ୱପ୍ନ ଥିଲା ତାଙ୍କ ପିଲାମାନେ ବକ୍ସିଂରେ ଚାମ୍ପିଅନ ହୁଅନ୍ତୁ। ବାପାଙ୍କ ସ୍ୱପ୍ନ ପୂରା କରିବା ପାଇଁ ଆଗେଇ ଆସିଛି କିର୍ତି। ଅନେକ ସଂଘର୍ଷ କରି ପାଲଟୁଛି ବକ୍ସର। ଗୋଟିଏ ଗାଉଁଲି ଝିଅ କେମିତି ଜୀବନର ପ୍ରତ୍ୟେକ ସ୍ତରରେ ଲଢ଼ି ଆଗକୁ ଯାଉଛି ଏବଂ ଶେଷରେ ଜଣେ ବକ୍ସର ଭାବେ ନିଜକୁ ପ୍ରତିଷ୍ଠିତ କରିପାରିଛି ତାହାକୁ ନେଇ ଏହି ‘ଚାମ୍ପିଅନ’ ଫିଲ୍ମର କାହାଣୀ ଗତିଶୀଳ ହୋଇଛି। ତରଙ୍ଗ ପ୍ଲସ ତରଫରୁ ତିଆରି ଏହି ଫିଲ୍ମର ମୁଖ୍ୟ ଭୂମିକାରେ ଅଛନ୍ତି ଅର୍ଚ୍ଚିତା । ଏଥିରେ ତାଙ୍କୁ କିର୍ତ୍ତି ଚରିତ୍ରରେ ଦେଖିବାକୁ ମିଳିବ, ଯିଏକି ଜଣେ ବକ୍ସର। ଚଳଚ୍ଚିତ୍ରର ନିର୍ଦ୍ଦେଶନା ଭାର କେ.ମୂରଲୀ କ୍ରିଷ୍ଣା ବହନ କରିଥିବା ବେଳେ ଏନ୍.ଗଙ୍ଗାଧର ଏବଂ ପି.ଦିପ୍ତୀରାଣୀ ଏହାର ପ୍ରଯୋଜନା ଦାୟିତ୍ୱ ବହନ କରିଛନ୍ତି।
• ଚୁମ୍ବକ: ଓଡ଼ିଆ ଓ୍ୱେବ ସିରିଜ୍ ଚୁମ୍ବକ। ସମଲିଙ୍ଗୀ ସମ୍ପର୍କକୁ ନେଇ ପ୍ରସ୍ତୁତ ହୋଇଛି ଏହି ଓ୍ୱେବ୍‌ ସିରିଜ। ଦୁଇ ଝିଅ  ଶିଖା ଏବଂ ମାନ୍ୟା କିପରି ଲୁହା ଓ ଚୁମ୍ବକ ଭଳି ପରସ୍ପର ପ୍ରତି ଆକର୍ଷିତ ହେଉଛନ୍ତି, ଦୁହିଁକ ପ୍ରେମ ସମ୍ପର୍କକୁ ସମାଜ କେମିତି ଦେଖୁଛି ଓ ତା’ପରେ ସେମାନେ ଏକାଠି ରହିବା ପାଇଁ କ’ଣ କରୁଛନ୍ତି? ଏହା ହେଉଛି ସୁଶାନ୍ତ ମଣିଙ୍କ ‘ଚୁମ୍ବକ’ର କାହାଣୀ। ତରଙ୍ଗ ସିନେ ପ୍ରଡକ୍ସନ ବ୍ୟାନରରେ ନିର୍ମିତ ଏହି ଓ୍ୱେବ ସିରିଜ୍‌ରେ ଓଲିଉଡ ଅଭିନେତ୍ରୀ ଦିବ୍ୟା ଓ ତମନ୍ନା, ସାନୁ ଓ ଆର୍ଯ୍ୟନ ଦାଶ ମୁଖ୍ୟ ଚରିତ୍ରରେ ନଜର ଆସୁଛନ୍ତି।
• ପାପ: ପାପୀକୁ ନିପାତ କରିବା ପାପା ନୁହେଁ ପୂଣ୍ୟ। ‘ପାପ’ର ସଜ୍ଞା ବି ବେଳେ ବେଳେ ବଦଳି ଯାଇପାରେ, ପାପ ବି ହୋଇପାରେ ପୂଣ୍ୟ। ଏଭଳି କିଛି ଟ୍ୟାଗ ଲାଇନ ସହ ତିଆରି ହୋଇଛି ତରଙ୍ଗ ପ୍ଲସର ଫିଲ୍ମ ‘ପାପ’। ଫିଲ୍ମଟି ଏଭଳି ଜଣେ ମହିଳାଙ୍କ ଉପରେ ଆଧାରିତ ଯିଏକି ନିଜ ଯନ୍ତ୍ରଣାକୁ ଶକ୍ତିରେ ପରିଣତ କରି ପାପିମାନଙ୍କୁ ଶାସ୍ତି ଦେବାକୁ ପ୍ରଣ କରିଛି। ନୂଆ କାହାଣୀ ଓ ନୂଆ କନସେପ୍ଟକୁ ନେଇ ଅଶୋକ ପତିଙ୍କ ନିର୍ଦ୍ଦେଶନାରେ ତିଆରି ଏହି ଫିଲ୍ମର ଲିଡ ରୋଲରେ ଏଲିନା ସାମନ୍ତରାୟ ଅଛନ୍ତି। ତାଙ୍କ ଅପୋଜିଟରେ ଅଭିନେତା ଅଙ୍କିତ କୁମାର ଅଛନ୍ତି।
• ଇଚ୍ଛା: ଲାଇଫ ଏବଂ କାମର ଏତେ ଷ୍ଟ୍ରେସ ରହିଛି, କିନ୍ତୁ ତା’ସହ ରହିଲେ ସବୁ ଭୁଲି ଯାଏ। ଲାଇଫର ସବୁଠୁ ଗୁରୁତ୍ୱପୂର୍ଣ୍ଣ ହେଉଛି ନିଜେ ନିଜକୁ ଭଲ ପାଇବା। ପ୍ରେମ, ବନ୍ଧୁତ ଏବଂ ହୃଦୟ ଭାଙ୍ଗିବା ଏହି ତିନିଟି ଶବ୍ଦକୁ ନେଇ ‘ଇଚ୍ଛା’ ୱେବସିରିଜଟି ଆଧାରିତ। ତରଙ୍ଗ ବ୍ୟାନରରେ ତିଆରି ଏହି  ୱେବସିରିଜ ଲିଡ ରୋଲରେ  ଅଭିନେତ୍ରୀ ଗାର୍ଗୀ ମହାନ୍ତି ଅଛନ୍ତି।
• ଲାଲପାନ ବିବିର ସ୍ମାର୍ଟ ଫ୍ୟାମିଲି: ଜଣେ ଫ୍ରେଣ୍ଡଲି ମା’ର ସରଳତାର ସୁଯୋଗ ନେଇ ପିଲାମାନ ପଥଭ୍ରଷ୍ଟ ହେଉଛନ୍ତି। ଯାହାକୁ ନେଇ ମା’ ଭାରାକ୍ରାନ୍ତ ହୋଇପଡୁଛନ୍ତି। ସେଇ ଚିନ୍ତାରେ ସ୍ୱାମୀ ଆରପାରିକୁ ଚାଲିଯାଉଛନ୍ତି। ଆଉ ତା’ପରେ ପଥହୁଡା ପିଲାମାନଙ୍କୁ ବାଟକୁ ଆଣିବା ପାଇଁ  ମା’ କିଭଳି ଆପଣାଉଛି ନୂଆ ରାସ୍ତା, ତାକୁ ନେଇ ଏହି ଲାଲପାନ ବିବିର ଜୀବନ ଯାତ୍ରା। ତରଙ୍ଗ ବ୍ୟାନରରେ ତିଆରି ଏହି ଫିଲ୍ମର ଲିଡ୍ ରୋଲରେ ମାହେଶ୍ୱତା ରୟ ଅଛନ୍ତି। ତାଙ୍କୁ ଏଥିରେ ଚରିତ୍ରରେ ଦେଖିବାକୁ ମିଳିବ।
• ଖୁସି: ସ୍କୁଲରେ ପଢ଼ୁଥିବା ଆଠ ଦଶବର୍ଷର ଝିଅଟିଏ ଖୁସି। ବାପା ମା’ ଜେଜେ ଜେଜେମା’ଙ୍କ ଅତି ଅଲିଅଳି ସେ। ପାଠରେ  ଶାଠରେ ବୁଦ୍ଧିରେ, ବିବେକରେ ସବୁଥିରେ ସବୁଠୁ ଆଉ ଆଗୁଆ। ହେଲେ ଗୋଟେ ଦିନର ଗୋଟେ ରାକ୍ଷସ ଯୋଗୁ ସେ ହୋଇଗଲା ସବୁଠୁ ପଛୁଆ। ଗୋଟେ ନାରୀ ମାଂସଲୋଭୀ ପିଶାଚ ଦଳି ଚକଟି ମାଟିରେ ମିଶେଇଦେଲା ଖୁସି ଜୀବନର ସବୁତକ ଖୁସି। ସେ ନିଜକୁ ଲୁଚେଇ ରଖିଲା ଘର କୋଣରେ, ଅନ୍ଧାର ଭିତରେ। ସେଇ ଅନ୍ଧାର ଭିତରୁ ପୁଣିଥରେ ଆଲୁଅକୁ ବାହାରି ଆସିବା ପାଇଁ ତା’ ପରିବାର ଯେଉଁ ସଂଘର୍ଷ କରିଚାଲନ୍ତି ତାକୁ ନେଇ ଗତିଶୀଳ ହୋଇଛି ତରଙ୍ଗ ପ୍ରଡକ୍ସନର ଫିଲ୍ମ ‘ଖୁସି’ର କାହାଣୀ। ଖୁବ ଶୀଘ୍ର ଏହି ଫିଲ୍ମଟି ବଡ ପରଦାରେ ରିଲିଜ ହେବ।
• ଫ୍ୟାମିଲି: ଅବସରପ୍ରାପ୍ତି ହାଇ ପ୍ରୋଫାଇଲ ପୁଲିସ ଅଧିକାରୀଙ୍କ ପରିବାରର କାହାଣୀ। ଏହି ପରିବାରର ପୁଲିସ ଅଧିକାରୀଙ୍କ ପତ୍ନୀ, ତାଙ୍କ ବଡ ଫୁଅ ରିଙ୍କୁ, ସାନ ଝିଅ ରିଙ୍କି ଏବଂ ପତ୍ନୀଙ୍କ ମଦ୍ୟପ ଭାଇ ରୁହୁଥିଲ। ହସ ଖୁସି ଭରା ଥିଲା ଏହି ପରିବାର। କିନ୍ତୁ ହଠାତ ଏହି ପରିବାରରେ ଦିନେ ଘଟିଯାଏ ଅଘଟଣ। ସାନ ଝିଅ ରିଙ୍କି ତାଙ୍କ ପରିବାର ସଦସ୍ୟଙ୍କ ନିକଟରେ ଆସି ତାଙ୍କ ମାମୁ ଏବଂ ପୁଲିସର ମଦ୍ୟପ ଭାଇ ତାକୁ ଅସଦାଚରଣ କରିଥିବା ଅଭିଯୋଗ କରେ। ଏହାପରେ ମଦ୍ୟ ଭାଇର ଛାତରୁ ଖସି ମୃତ୍ୟୁ ହୋଇଯାଏ। ତେବେ ଏସବୁ ପ୍ରକୃତରେ କିଏ ଘଟଣା ଏବଂ କ’ଣ ସବୁ ଘଟିଥିଲା ତାକୁ ନେଇ ଆରମ୍ଭ ହୁଏ ତଦନ୍ତ। ଏଭଳି ହିଁ କିଛି ସସପେନ୍ସ ଥ୍ରୀଲର କାହାଣୀକୁ ତରଙ୍ଗ ସିନେ ବ୍ୟାନରେ ତିଆରି ଏହି ଫିଲ୍ମଟି ଗତିଶୀଳ।

ଚାଷୀ ଆନ୍ଦୋଳନକାରୀଙ୍କ ସଂଖ୍ୟା ସୀମାରେ କମୁଛି ?

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – କେନ୍ଦ୍ର ସରକାରଙ୍କ ତିନି କୃଷି ଆଇନକୁ ବିରୋଧ କରି ଚାଷୀ ଆନ୍ଦୋଳନରେ ବସିଛନ୍ତି। ଆନ୍ଦୋଳନକୁ ୧୦୦ ଦିନ ପୂରଣ ହୋଇଛି। ଆନ୍ଦୋଳନର ଦିନ ଯଦିଓ ବଢ଼ୁଛି ହେଲେ ଆନ୍ଦୋଳନକାରୀଙ୍କ ସଂଖ୍ୟା ଧୀରେ ଧୀରେ କମିଥିବାର ଦେଖିବାକୁ ମିଳିଛି। ଆଜି ମହାଶିବରାତ୍ରୀ। ଏହି ଅବସରରେ ଘଗବାନଙ୍କ ନିକଟରେ ଚାଷୀଙ୍କ ପାଇଁ ପ୍ରାର୍ଥନା କରିଥିବା ଚାଷୀ ନେତା ରାକେଶ ଟିକାୟତ କହିଛନ୍ତି। ତେବେ ଆନ୍ଦୋଳନକାରୀଙ୍କ ସଂଖ୍ୟା କମିବା ନେଇ ପ୍ରତିକ୍ରିୟା ରଖିଛନ୍ତି ଚାଷୀ ନେତା। ଓଲଟା ସିଧା ଜବାବ ଦେଇ ଏହାବି ତାଙ୍କ ଆନ୍ଦୋଳନର ଏକ ରଣନୀତି ବୋଲି କହିଛନ୍ତି ରାକେଶ। ଅଧିକ ଖରା ହେଉଛି, ଚାଷ ଜମିକୁ ଚାଷୀ ଯାଉଛନ୍ତି କହି ସଫେଇ ଦେଇଛନ୍ତି ରାକେଶ। ଆନ୍ଦୋଳନକାରୀଙ୍କ ସଂଖ୍ୟା କମିବା ଅଭିଯୋଗକୁ ସେ ଖାରଜ କରିଛନ୍ତି। ଆଗକୁ ଆନ୍ଦୋଳନ ଲମ୍ୱା ହେବ। ତେଣୁ ରୋଟେସନ ହିସାବରେ ଚାଷୀ ଆନ୍ଦୋଳନରେ ସାମିଲ୍ ହେଉଛନ୍ତି ବୋଲି ଟିକାୟତ କହିଛନ୍ତି। ଯେତେବେଳେ ଆବଶ୍ୟକ ହେବେ ସେତେବେଳେ ଗାଜିପୁର ସୀମାରେ ସମସ୍ତ ଚାଷୀ ଏକାଠି ହେବେ ବୋଲି ଟିକାୟତ କହିଛନ୍ତି। ଚାଷୀଙ୍କ ଏହି ଆନ୍ଦୋଳନ ଏବେ ରାଜନୀତିକ ପ୍ରସଙ୍ଗ ପାଲଟିଛି। ବିଜେପିକୁ ଭୋଟ୍ ନଦେବା ପାଇଁ ଏହି ଆନ୍ଦୋଳନକାରୀ ଆହ୍ୱାନ କରିଛନ୍ତି।

ଏଥିପାଇଁ ନିକଟରେ ହେବାକୁ ଥିବା ଚାରି ରାଜ୍ୟ ଓ ଗୋଟିଏ କେନ୍ଦ୍ର ଶାସିତ ଅଞ୍ଚଳରେ ବିଜେପି ବିରୋଧରେ ପ୍ରଚାର କରିବେ ବୋଲି ରାକେଶ ଟିକାୟତ କହିଛନ୍ତି। ତାଙ୍କ ସମର୍ଥକମାନେ ମଧ୍ୟ ଏହି ପ୍ରଚାରରେ ସାମିଲ୍ ହେବେ ବୋଲି ସେ କହିଛନ୍ତି। ନଭେମ୍ୱର ମାସରୁ ରାକେଶ ଟିକାୟତଙ୍କ ନେତୃତ୍ୱରେ ଏହି ଚାଷୀ ଆନ୍ଦୋଳନ ଆରମ୍ଭ ହୋଇଛି। ମାର୍ଚ୍ଚ ୨୬କୁ ଏହି ଆନ୍ଦୋଳନ ଚାରି ମାସ ପୂରଣ ହେବାକୁ ଯାଉଛି। ଏହି ଅବସରରେ ରାକେଶ ଟିକାୟତ ଭାରତ ବନ୍ଦ ଡାକରା ଦେଇଛନ୍ତି। ଆନ୍ଦୋଳନରତ ଚାଷୀ ଏବଂ ସରକାରଙ୍କ ମଧ୍ୟରେ ଅନେକ ଥର ବୈଠକ ହୋଇଛି। ହେଲେ ବୈଠକ ସଫଳ ହୋଇନି। ଆନ୍ଦୋଳନରତ ଚାଷୀ ତିନି କୃଷି ଆଇନକୁ ରଦ୍ଦ କରିବାକୁ ଦାବି କରିବା ସହିତ ଏମଏସପି ଗ୍ୟାରେଣ୍ଟି ଦାବି କରିଛନ୍ତି। ଯାହାର ଜବାବରେ କେନ୍ଦ୍ର ସରକାର କହିଛନ୍ତି ସଂଶୋଧନ ପାଇଁ ସରକାର ରାଜି ହେଲେ ରଦ୍ଦ ହେବନାହିଁ ତିନି କୃଷି ଆଇନ୍।

ନନ୍ଦନକାନନ ପ୍ରାଣୀ ଉଦ୍ୟାନରେ ମହୁ ମାଛି ଆତଙ୍କ..!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ନନ୍ଦନକାନନ ପ୍ରାଣୀ ଉଦ୍ୟାନରେ ମହୁମାଛି ଆକ୍ରମଣରେ ପର୍ଯ୍ୟଟକ ଘାଇଲା ହୋଇଛନ୍ତି। ୧୫ରୁ ଅଧିକ ପର୍ଯ୍ୟଟକ ମହୁମାଛି କାମୁଡ଼ାରେ ଆହତ ହୋଇଛନ୍ତି। ଅହତକ ଭିତରେ କେତେକ ପଶ୍ଚିମବଙ୍ଗର ହୋଇଥିବା ଜଣାପଡ଼ିଛି। ବଣମଣିଷ ଏନ୍‌କ୍ଲୋଜର ପାଖାପାଖି ଅଞ୍ଚଳରେ ଏକ ଗଛରେ ମହୁଫେଣାଟି ଥିଲା। କୌଣସି କାରଣ ହଠାତ୍ ମହୁ ମାଛିମାନେ ପର୍ଯ୍ୟଟକଙ୍କୁ ଆକ୍ରମଣ କରିଥିଲେ। ଏହା ଦେଖି ପର୍ଯ୍ୟଟକମାନେ ବିକ୍ଷିପ୍ତ ହୋଇ ଏଣେତେଣେ ଦୌଡ଼ି ଥିଲେ। ଆଉ କିଏ ଚିତ୍କାର କରୁଥିବା ଦେଖିବାକୁ ମିଳିଥିଲା। ଏ ସମ୍ପର୍କରେ ଜାଣିବା ପରେ ପ୍ରାଣୀ ଉଦ୍ୟାନ କର୍ତ୍ତୃପକ୍ଷ ତ୍ୱରିତ ପଦକ୍ଷେପ ନେଇଛନ୍ତି। ମହୁ ମାଛି ଆକ୍ରମଣରେ ୧୫ ନୁହେଁ, ଅଧିକ ଲୋକ ଆହତ ହୋଇଥିବା ପ୍ରାଥମିକ ଅନୁସନ୍ଧାନରୁ ଜଣାପଡ଼ିଛି ।

ରାଜଧାନୀର ବରିଷ୍ଠ ନାଗରିକଙ୍କୁ ମଗଣାରେ ଅଯୋଧ୍ୟା ବୁଲାଇବେ ସରକାର…!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ)- ଦେଶର ଜାତୀୟ ରାଜଧାନୀ ଦିଲ୍ଲୀର କ୍ଷମତାସୀନ ଆମ ଆଦମୀ ପାର୍ଟି(ଆପ୍‌) ବଡ଼ ଘୋଷଣା କରିଛି। ଅଯୋଧ୍ୟାରେ ଭବ୍ୟ ରାମ ମନ୍ଦିର ନିର୍ମାଣ ହେବା ପରେ ସେଠାକୁ ମଗଣାରେ ଦିଲ୍ଲୀରେ ରହୁଥିବା ବୟସ୍କ ବ୍ୟକ୍ତିମାନେ ଯାଇପାରିବେ। ସେମାନଙ୍କ ତୀର୍ଥଯାତ୍ରା ପାଇଁ ସବୁ ଖର୍ଚ୍ଚ ସରକାର କରିବେ ବୋଲି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି। ସେହିପରି ରାମ ରାଜ୍ୟର ୧୦ଟି ନୀତି ନିୟମକୁ କାର୍ଯ୍ୟକାରୀ କରି ସରକାର ଲୋକଙ୍କ ସେବା କରିବେ ବୋଲି ସେ କହିଛନ୍ତି। ସେ ତାଲିକା ଭୁକ୍ତ କରିଥିବା ୧୦ଟି ନୀତି ହେଲା, ଲୋକଙ୍କୁ ଖାଦ୍ୟ, ଶିକ୍ଷା, ମେଡିକାଲ କେୟାର, ବିଜୁଳି, ପାଣି, ନିଯୁକ୍ତି, ହାଉସିଂ, ମହିଳାଙ୍କୁ ଉପଯୁକ୍ତ ସୁରକ୍ଷା ଓ ବୟସ୍କମାନଙ୍କୁ ଉପଯୁକ୍ତ ସମ୍ମାନ ପ୍ରଦାନ କରିବା। ଗୋଟିଏ ଦିନ ପୂର୍ବରୁ ଦିଲ୍ଲୀ ସରକାର ୬୯ ହଜାର କୋଟିର ବଜେଟ୍‌ ଉପସ୍ଥାପନ କରିଥିଲେ।  ଏହାକୁ ଦେଶଭକ୍ତିର ବଜେଟ୍‌ ଭାବେ ନାମିତ କରାଯାଇଥିଲା। ବଜେଟ୍‌ର ବ୍ୟବସ୍ଥା ଅନୁଯାୟୀ, ଦିଲ୍ଲୀର ବିଭିନ୍ନ ସ୍ଥାନରେ ୫୦୦ଟି ଫ୍ଲାଗ ମାସ୍କଟ ଓ ସ୍ୱାଧୀନତା ସଂଗ୍ରାମୀଙ୍କ ଜୀବନୀକୁ ନେଇ କାର୍ଯ୍ୟକ୍ରମ କରାଯିବ। ଏଥିସହ ଦେଶଭକ୍ତି କରିକୁଲାମ ବିଷୟରେ ମଧ୍ୟ ଅର୍ଥମନ୍ତ୍ରୀ ଘୋଷଣା କରିଥିଲେ।ପୂର୍ବରୁ ଆପ୍‌ ସରକାର “ମୁଖ୍ୟମନ୍ତ୍ରୀ ତୀର୍ଥ ଯାତ୍ରା” ନାଁରେ ଗୋଟିଏ ଯୋଜନା କାର୍ଯ୍ୟକାରୀ କରିଛନ୍ତି। ଏହି ଯୋଜନା ଅନୁସାରେ ଦିଲ୍ଲୀର ବରିଷ୍ଠ ନାଗରିକଙ୍କୁ ମାଗଣାରେ ତୀର୍ଥ ଯାତ୍ରୀର ସୁବିଧା ଯୋଗାଇ ଦିଆଯାଉଛି। ତୀର୍ଥ ଯାତ୍ରା ସମୟରେ ଖାଦ୍ୟ, ପାନୀୟ, ରହଣୀ ଓ ଯବା ଆସିବା ‌ଖର୍ଚ୍ଚ ରାଜ୍ୟ ସରକାର ବହନ କରିବେ। କେଜ୍ରିୱାଲ ବିଧାନସଭାରେ କହିଛନ୍ତି, ମୁଁ ଭଗବାନ ରାମ ଓ ହନୁମାନଙ୍କ ଭକ୍ତ। ରାମ ରାଜ୍ୟ ବିଷୟବସ୍ତୁରୁ ଅନୁପ୍ରାଣିତ ହୋଇ ଆମେ ୧୦ଟି ନୀତି ନିୟମ ଉପରେ କାର୍ଯ୍ୟ କରୁଛୁ। ଆମେ ବୟସ୍କଙ୍କୁ ସମ୍ମାନିତ କରିବା ପାଇଁ ଏକାଧିକ ପଦକ୍ଷେପ ନେଇଛୁ। ଏହା ମଧ୍ୟରୁ ସବୁଠାରୁ ଗୁରୁତ୍ୱପୂର୍ଣ୍ଣ ଯୋଜନା ହେଲା, ସେମାନଙ୍କୁ ମାଗଣାରେ ତୀର୍ଥଯାତ୍ରାରେ ପଠାଇବା।ମୁଁ ଏବେ ସମସ୍ତ ବରିଷ୍ଠ ନାଗରିକଙ୍କୁ କହିବାକୁ ଚାହେଁ ଯେ ଆମେ ସେମାନଙ୍କୁ ମାଗଣାରେ ଅଯୋଧ୍ୟାରେ ହେବାକୁ ଥିବା ରାମ ମନ୍ଦିର ଦର୍ଶନ କରିବାକୁ ପଠାଇବୁ। ରାମ ମନ୍ଦିରର ନିର୍ମାଣ କାମ ଶେଷ ହେବା ପରେ ସେମାନେ ସେଠାକୁ ଯାଇପାରିବେ ବୋଲି ସେ କହିଛନ୍ତି। ଅଯୋଧ୍ୟାରେ ହେବାକୁ ଥିବା ରାମ ମନ୍ଦିର ନିର୍ମାଣ କାମ ୩୬ରୁ ୪୦ ସପ୍ତାହ ମଧ୍ୟରେ ଶେଷ ହେବ।

ପୁଣି ଭାରତ ବନ୍ଦ କରିବେ ଚାଷୀ…!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ)- ଦୀର୍ଘ ୧୭ ସପ୍ତାହ ହେଲା କେନ୍ଦ୍ରର କୃଷି ଆଇନ ବିରୋଧରେ ଆନ୍ଦୋଳନ କରୁଥିବା ଚାଷୀମାନେ ପୁଣିଥରେ ଭାରତ ବନ୍ଦ ଡାକରା ଦେଇଛନ୍ତି। ଦିଲ୍ଲୀ ସୀମାରେ ଚାଲିଥିବା ଆନ୍ଦୋଳନକୁ ୪ ମାସ ପୂରିବା ଅବସରରେ ଚାଷୀମାନେ ଆସନ୍ତା ୨୬ ତାରିଖରେ ଭାରତ ବନ୍ଦ କରିବେ। ଏ ସମ୍ପର୍କରେ ସଂଯୁକ୍ତ କିଷାନ ପକ୍ଷରୁ ଘୋଷଣା କରାଯାଇଛି। ଦିଲ୍ଲୀ ସୀମାରେ ହଜାର ହଜାର ଚାଷୀ କୃଷି ଆଇନ ପ୍ରତ୍ୟାହାର ଦାବିରେ ଗତ ନଭେମ୍ବର ୨୬ରୁ ଆନ୍ଦୋଳନରେ ବସିଛନ୍ତି। ସେମାନଙ୍କୁ ବୁଝାଇବାକୁ ସରକାର ବାରମ୍ବାର ବୈଠକ କରିଥିଲେ ହେଁ ଏଯାଏ କୌଣସି ସୁଫଳ ମିଳିନାହିଁ। ଏବେ ଚାଷୀମାନେ ନିଜ ଆନ୍ଦୋଳନକୁ ଜୋରଦାର କରିବାକୁ ନିଷ୍ପତ୍ତି ନେଇଛନ୍ତି। ସଂଯୁକ୍ତ କିଷାନ ମୋର୍ଚ୍ଚାର ଘୋଷଣା ଅନୁଯାୟୀ, ସହିଦ ଭଗବତ ସିଂହଙ୍କ ତରୋଧନ ଦିବସ ହେଉଛି ମାର୍ଚ୍ଚ ୨୩। ଏହି ଦିନ ଦେଶର ବିଭିନ୍ନ ପ୍ରାନ୍ତରୁ ଯୁବଗୋଷ୍ଠୀ ଦିଲ୍ଲୀରେ ଚାଲିଥିବା ଚାଷୀ ଆନ୍ଦୋଳନରେ ସାମିଲ ହେବେ। ମାର୍ଚ୍ଚ ୨୬ରେ ଦିଲ୍ଲୀରେ ଚାଲିଥିବା ଆନ୍ଦୋଳନକୁ ୪ ମାସ ପୂରିବ। ଏହି ଅବସରରେ ଭାରତ ବନ୍ଦ କରାଯିବ। ସେହିପରି ମାର୍ଚ୍ଚ ୨୮ରେ ଚାଷୀ ବିରୋଧୀ କୃଷି ଆଇନକୁ ସମଗ୍ର ଦେଶରେ ପୋଡ଼ାଯିବ। ହୋଲି ଦହନ କାର୍ଯ୍ୟକ୍ରମ ଜରିଆରେ ଏପରି କରାଯିବ ବୋଲି ମୋର୍ଚ୍ଚା ପକ୍ଷରୁ କୁହାଯାଇଛି। ଏହାବାଦ୍‌ ମାର୍ଚ୍ଚ ୧୫କୁ ଆଣ୍ଟି କର୍ପୋରେଟ ଓ ଆଣ୍ଟି ଗଭର୍ଣ୍ଣମେଣ୍ଟ ଦିବସ ଭାବେ ପାଳନ କରାଯିବ। ଏହି ଅବସରରେ ଏସଡିଏମ ଓ ଡିଏମ ଅଫିସରେଗୁଡ଼ିକରେ ତୈଳ, ଗ୍ୟାସ ଓ ଅନ୍ୟାନ୍ୟ ଜରୁରୀ ସାମଗ୍ରୀ ଦର ବୃଦ୍ଧି ବିରୋଧରେ ଦାବିପତ୍ର ପ୍ରଦାନ କରାଯିବ। ଘରୋଇ କରଣ ବିରୋଧରେ ସମଗ୍ର ଦେଶର ରେଳ ଷ୍ଟେସନରେ ଟ୍ରେଡ ୟୁନିୟନ ସହ ମିଶି ଆନ୍ଦୋଳନ କରାଯିବ। ସେହିପରି ମାର୍ଚ୍ଚ ୧୭ ତାରିଖରେ ଟ୍ରେଡ ୟୁନିୟନ ଓ ବିଭିନ୍ନ ସଂଗଠନ ଗୁଡ଼ିକ ସହ ମିଶି ୨୬ ତାରିଖ ଭାରତ ବନ୍ଦ ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ କରାଯିବ। ମାର୍ଚ୍ଚ ୧୯ରେ ଏଫସିଆଇ ଓ ଖେତି ବଞ୍ଚାଓ କାର୍ଯ୍ୟକ୍ରମ ଜରିଆରେ ମୁଜାରା ଲେହର ଦିବସ ପାଳନ କରାଯିବ। ସମଗ୍ର ଦେଶରେ ଥିବା ମଣ୍ଡିଗୁଡ଼ିକରେ ଏହି ଦିନ ଚାଷୀମାନେ ଆନ୍ଦୋଳନ କରିବେ ବୋଲି ମୋର୍ଚ୍ଚା ଯୋଜନା କରିଛି।

୫ ବର୍ଷରେ କେତେ ଦେଶଦ୍ରୋହ ମାମଲା ରୁଜୁ ହୋଇଛି ? ସରକାର ଦେଲେ ଜବାବ …!

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ)- ବିଗତ ୫ ବର୍ଷ ମଧ୍ୟରେ ଭାରତରେ କେତୋଟି ଦେଶଦ୍ରୋହ ଓ ୟୁଏପିଏ ଆଇନ ବଳରେ ମାମଲା ରୁଜୁ କରାଯାଇଛି, ତା’ର ଉତ୍ତର କେନ୍ଦ୍ର ସରକାର ଦେଇଛନ୍ତି। ସରକାରଙ୍କ ସୂଚନା ଅନୁଯାୟୀ, ବିଗତ ବର୍ଷ ଗୁଡ଼ିକ ମଧ୍ୟରେ ୟୁଏପିଏ ବଳରେ ୫,୧୨୮ ଓ ୨୨୯ଟି ଦେଶଦ୍ରୋହ ମାମଲା ରୁଜୁ କରାଯାଇଛି। ୟୁଏପିଏ ବଳରେ ସବୁଠାରୁ ଅଧିକ ମାମଲା ମଣିପୁରରେ ରୁଜୁ କରାଯାଇଛି। ଏଠାରେ ମୋଟ ୧୭୮୬ଟି କେସ୍‌ ହୋଇଛି। ଯାହା ମୋଟ ମାମଲାର ୩୪.୮୨%। କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଜି କିଷନ ରେଡ୍ଡୀ ରାଜ୍ୟସଭାରେ ସାଂସଦ ଅବଦୁଲ ୱହାବଙ୍କ ଏକ ପ୍ରଶ୍ନର ଉତ୍ତରରେ ୨୦୧୫ରୁ ୨୦୧୯ର ତଥ୍ୟ ଉପସ୍ଥାପନ କରିଛନ୍ତି। ସେ କହିଛନ୍ତି, ଏହି ତଥ୍ୟ ଏନସିଆରବିର। ୨୦୧୯ ଡିସେମ୍ବର ୩୧ ସୁଦ୍ଧା ଦେଶରେ କେତେ ୟୁଏପିଏ ଓ ଦେଶଦ୍ରୋହ ମାମଲା ରୁଜୁ କରାଯାଇଛି, ତା’ର ତଥ୍ୟ ଏନସିଆରବି ଦେଇଛି। ତଥ୍ୟ ଅନୁସାରେ, ୟୁଏପିଏ ବଳରେ ୨୦୧୫ରୁ ୨୦୧୯ ଯାଏ ଯଥାକ୍ରମେ ୮୯୭, ୯୨୨, ୯୦୧, ୧୧୮୨ ଓ ୧୧୨୬ଟି ମାମଲା ରୁଜୁ କରାଯାଇଛି। ସେହିପରି ଦେଶଦ୍ରୋହ ଆଇନ ବଳରେ ୨୦୧୫ରେ ୩୦ଟି, ୨୦୧୬ରେ ୩୫ଟି, ୨୦୧୭ରେ ୫୧ଟି, ୨୦୧୮ରେ ୭୦ଟି ଓ ୨୦୧୯ରେ ସର୍ବାଧିକ ୯୩ଟି ମାମଲା ରୁଜୁ କରାଯାଇଛି। ମଣିପୁରରେ ୨୦୧୫ରେ ୫୨୨, ୨୦୧୬ରେ ୩୨୭, ୨୦୧୭ରେ ୩୩୦, ୨୦୧୮ରେ ୨୮୯ ଓ ୨୦୧୯ରେ ୩୦୬ଟି ୟୁଏପିଏ ବଳରେ ମାମଲା ରୁଜୁ କରାଯାଇଛି। ୨୦୧୮କୁ ଛାଡ଼ିଦେଲେ ବାକି ବର୍ଷ ଗୁଡ଼ିକରେ ମଣିପୁରରେ ସବୁଠାରୁ ଅଧିକ ୟୁଏପିଏ ମାମଲା ରୁଜୁ ହୋଇଛି। ୨୦୧୮ରେ ଆସାମରେ ୩୦୮ଟି ୟୁଏପିଏ ମାମଲା ରୁଜୁ ହୋଇଥିଲା। ଦେଶଦ୍ରୋହକୁ ବିଚାର କଲେ ୨୦୧୫ରେ ୯ଟି ମାମଲା ରୁଜୁ କରି ବିହାର ୧ନଂରେ ରହିଥିଲା। ଏହାପରେ ୨୦୧୬ରେ ୧୨ ଦେଶଦ୍ରୋହ ମାମଲା ସହ ହରିଆଣା, ୨୦୧୭ରେ ୧୯ଟି ମାମଲା ସହ ଆସାମ, ୨୦୧୮ରେ ୧୮ ମାମଲା ସହ ଝାରଖଣ୍ଡ ଓ ୨୦୧୯ରେ ୨୨ଟି ଦେଶଦ୍ରୋହ ମାମଲା ରୁଜୁ କରି କର୍ଣ୍ଣାଟକା ୧ନଂ ସ୍ଥାନରେ ରହିଥିଲା।

ପୁଣି ରୋଷେଇ ଘରେ ମହଙ୍ଗା ମାଡ଼ ..!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର/କଟକ) – ପୁଣି ରୋଷେଇ ଘରେ ମହଙ୍ଗା ମାଡ଼  । ପୂର୍ବରୁ ରନ୍ଧନ ଗ୍ୟାସ୍ ଦରବୃଦ୍ଧି ଗୃହିଣୀଙ୍କ ଚିନ୍ତା ବଢ଼ାଇଥିବା ବେଳେ ଏଥର ନିଜ ଭାଉ ବଢ଼ାଇଛି ଖାଇବା ତେଲ।  ସୋରିଷ, ସୂର୍ଯ୍ୟମୁଖୀ ଠୁ ଆରମ୍ଭ କରି ପାମୋଲିନ୍ ଯାଏଁ, ସବୁ ପ୍ରକାର ଖାଇବା ତେଲ ଦାମ୍ ଗତ କିଛି ମାସ ଧରି ଅସ୍ୱାଭାବିକ ଭାବେ ବଢ଼ିଥିବା ଦେଖିବାକୁ ମିଳିଛି  । ଦର ୬ମାସ ଭିତରେ ୨ଗୁଣ ବଢ଼ିଥିବା ରାଜ୍ୟ ବ୍ୟବସାୟୀ ସଂଘ ସାଧାରଣ ସଂପାଦକ କହିବା ସହ, ଏଭଳି ଦରବୃଦ୍ଧି ରୋକିବାକୁ ହେଲେ ସରକାର ଆମଦାନୀ ଶୁଳ୍କ ଓ କୃଷି ସେସ୍ କମାଇବା ଦରକାର ବୋଲି ଦାବି କରିଛନ୍ତି। ବିଶେଷ କରି ସୋରିଷ, ସୋୟାବିନ୍, ସୂର୍ଯ୍ୟମୁଖୀଠୁ ଚିନାବାଦାମ ଓ ପାମୋଲିନ୍ ଯାଏଁ  ସବୁ ପ୍ରକାର ତେଲ ଗତ କିଛି ମାସ ଧରି ଅସ୍ୱାଭାବିକ ଭାବେ ମହଙ୍ଗା ହେବାରେ ଲାଗିଛି।  ଆଜି କଟକ ମାଲଗୋଦାମରେ ସୋରିଷ ତେଲ ଲିଟର ୧୪୦ରୁ ୧୪୫ ଟଙ୍କା ସୂର୍ଯ୍ୟମୁଖୀ ୧୫୦ରୁ ୧୫୫ ଟଙ୍କା ଓ ପାମୋଲିନ୍ ୧୦୫ରୁ ୧୧୦ ଟଙ୍କା ଭିତରେ ରହିଛି । ପାମୋଲିନ୍‌ର ଏତେ ଦର ପୂର୍ବରୁ କେବେ ଦେଖିନଥିବା କହିଛନ୍ତି କଟକ ମହାନଗର ବ୍ୟବସାୟୀ ସଂଘ ସାଧାରଣ ସଂପାଦକ । ଏଭଳି ତେଲ ଦର ବୃଦ୍ଧି ଜାରି ରହିଲେ କେବଳ ଖାଉଟି ନୁହନ୍ତି, ବ୍ୟବସାୟୀ ବି ବହୁଳ ଭାବେ ପ୍ରଭାବିତ ହେବେ ବୋଲି ସେ ଆଶଙ୍କା କରିଛନ୍ତି। କେନ୍ଦ୍ର ଖାଉଟି ବ୍ୟାପାର ମନ୍ତ୍ରାଳୟର ପ୍ରାଇସ୍ ମନିଟରିଂ ସେଲ୍ ତଥ୍ୟ ଅନୁସାରେ, ଜାତୀୟ ସ୍ତରରେ ଗଲା ବର୍ଷେ ଭିତରେ ଖାଇବା ତେଲର ଦର ୨୫ରୁ ୫୦ ପ୍ରତିଶତ ବଢ଼ିଛି  । ଗତବର୍ଷ ମାର୍ଚ୍ଚରେ ପ୍ୟାକେ୍ଜଡ ସୋରିଷ ତେଲ ଦର ଲିଟର ପ୍ରତି ୧୧୩ ଟଙ୍କା ଥିବା ବେଳେ, ଏବେ ତାହା ୧୪୦ ଟଙ୍କାକୁ ବଢ଼ିଛି।  ସେହିପରି ସୂର୍ଯ୍ୟମୁଖୀ ୧୧୦ରୁ ୧୫୦, ପାମ୍ ଅଏଲ୍ ୮୫ରୁ ୧୨୨, ଚିନାବାଦାମ ତେଲ ୧୨୦ରୁ ୧୭୦ ଓ ବନସ୍ପତି ଦର ୮୦ରୁ ୧୨୦ ଟଙ୍କାକୁ ବଢ଼ିଛି। ସେପଟେ ରାଜ୍ୟରେ ତେଲ ଦର ୬ ମାସ ଭିତରେ ପ୍ରାୟ ୨ଗୁଣ ବଢ଼ିଥିବା କହିଛି ରାଜ୍ୟ ବ୍ୟବସାୟୀ ସଂଘ । ପେଟ୍ରୋଲ୍, ଡିଜେଲ୍ ଓ ରନ୍ଧନ ଗ୍ୟାସ୍ ସାଙ୍ଗକୁ ଖାଇବା ତେଲ ଦର ବୃଦ୍ଧି ଏବେ ପ୍ରାୟ ସବୁ ଘରର ବଜେଟକୁ ବିଗାଡ଼ିଦେଇଛି।

ଜଳୁଛି ଜଙ୍ଗଲ, ସ୍ଥିତି ଅନୁଧ୍ୟାନ ପାଇଁ ଆସିବ କେନ୍ଦ୍ରୀୟ ଏକ୍ସପର୍ଟ ଟିମ୍ …!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) –ରାଜ୍ୟରେ ଜଙ୍ଗଲ ନିଆଁର ସ୍ଥିତି ଅନୁଧ୍ୟାନ ପାଇଁ ଖୁବଶୀଘ୍ର ଓଡ଼ିଶା ଆସିବ କେନ୍ଦ୍ରୀୟ ଏକ୍ସପର୍ଟ ଟିମ୍। ରାଜ୍ୟ ବିଜେପି ସାଂସଦଙ୍କୁ ଭେଟିବା ପରେ ଟୁଇଟ୍ କରି ଏହି ସୂଚନା ଦେଇଛନ୍ତି କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରୀ ପ୍ରକାଶ ଜାଭଡେକର। ଆଜି ଏହି ଟିମ୍ ଓଡ଼ିଶା ଆସିବା ସମ୍ଭାବନା ରହିଛି। କେନ୍ଦ୍ରୀୟ ଟିମ୍ ଜଙ୍ଗଲ ନିଆଁ ସ୍ଥିତି ନେଇ ରାଜ୍ୟ ସରକାରଙ୍କ ସହ ଆଲୋଚନା କରିବା ସହ ନିଆଁ ଅାୟତ୍ତ ସମ୍ପର୍କରେ ଗୁରୁତ୍ୱ ଦେବେ। ସେପଟେ ଶିମିଳିପାଳ ଅଭୟାରଣ୍ୟରେ ଅଗ୍ନିକାଣ୍ଡ ପରେ ବାରିପଦାରେ ପହଞ୍ଚିଛନ୍ତି ଅତିରିକ୍ତ ଜଙ୍ଗଲ ବିଭାଗର ଅତିରିକ୍ତ ଶାସନ ସଚିବ ମୋନା ଶର୍ମା। ମୟୂରଭଞ୍ଜ ଜିଲ୍ଲାପାଳ, ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ନିର୍ଦ୍ଦେଶକ, ଉତ୍ତର ଏବଂ ଦକ୍ଷିଣ ବନଖଣ୍ଡ ଉପନିର୍ଦ୍ଦେଶକଙ୍କ ସମେତ ବରିଷ୍ଠ ବନ ବିଭାଗ ଅଧିକାରୀଙ୍କ ସହ ଆଲୋଚନା କରିଛନ୍ତି। ଜଙ୍ଗଲରେ ନିଆଁ କିପରି ଲାଗିଲା ଓ ଏହାକୁ ନେଇ ନିୟନ୍ତ୍ରଣ ବ୍ୟବସ୍ଥା କ’ଣ ହୋଇଛି ସେ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ । ଆଜି ମୋନା ଶର୍ମା ଶିମିଳିପାଳର ଠାକୁରମୁଣ୍ଡା ରେଞ୍ଜ ଅଞ୍ଚଳ ଯାଇ ସେଠାରେ ସ୍ଥିତି ପରଖିବା କାର୍ଯ୍ୟକ୍ରମ  ରହିଛି । ରାଜ୍ୟରେ ଗତ ୯ ତାରିଖ ଦିନ ୨୯୦ଟି ସ୍ଥାନରେ ଜଙ୍ଗଲ ଜଳୁଥିବା ବେଳେ ଏହା ୨୬୮ ଟି ସ୍ଥାନକୁ ଖସିଛି। କେବଳ ବ୍ୟାଘ୍ର ପ୍ରକଳ୍ପ ଅଞ୍ଚଳରେ ୨୪ଟି ଫାୟାର ପଏଣ୍ଟ ରହିଛି । ନିଆଁ ଲିଭା କାର୍ଯ୍ୟରେ ୭୫୦ ଜଣ ନିୟମିତ  କର୍ମଚାରୀ, ୮୦୦ ଫାୟାର ଓ୍ୱାଚର ନିଆଁ ଲିଭାଇବା କାର୍ଯ୍ୟରେ ନିୟୋଜିତ ହୋଇଛନ୍ତି। ସେହିପରି ୨ଟି ଓଡ୍ରାଫ୍ ଟିମ୍ ନିଆଁ ଲିଭାରେ ଲାଗିଛନ୍ତି ବୋଲି ମୁଖ୍ୟ ବନ ସଂରକ୍ଷକ ଓ ବନବାହିନୀ ମୁଖ୍ୟ କହିଛନ୍ତି ।

ଆଜି ଶିବରାତ୍ରୀ, ମହାଦେବଙ୍କ ପାଇଁ ମହା ଆରାଧନା …!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ମହାଦେବଙ୍କ ପାଇଁ ମହା ଆରାଧନା। ଆଜି ଶିବରାତ୍ରୀ ଉପଲକ୍ଷେ  ରାଜ୍ୟର ଶୈବ ପୀଠରେ ଚାଲିଛି ଭୋଲା ବାବାଙ୍କ ପୂଜାର୍ଚ୍ଚନା। ଭୁବନେଶ୍ୱରର ଶ୍ରୀ ଲିଙ୍ଗରାଜ, ପୁରୀର ଲୋକନାଥ, ଭଦ୍ରକର ବାବା ଆଖଣ୍ଡଳମଣି, କଟକର ଧବଳେଶ୍ୱର ପୀଠ ସମେତ ରାଜ୍ୟର ବିଭିନ୍ନ ଶିବ ମନ୍ଦିର ଚଳଚଞ୍ଚଳ ରହିଛି। କୋଭିଡ୍ କଟକଣା ମଧ୍ୟରେ ସାମାଜିକ ଦୂରତା ରକ୍ଷା କରି ମହାଶିବରାତ୍ରୀ ପାଇଁ ପୂଜାର୍ଚ୍ଚନା କରାଯାଉଛି। ବାବା ଲିଙ୍ଗରାଜଙ୍କ ପୀଠରେ ରାତି ୧୦ଟା ସୁଦ୍ଧା ମହାଦୀପ ଉଠିବା ପାଇଁ ନୀତି ନିର୍ଘଣ୍ଟ ହୋଇଛି। ସେହିପରି ପୁରୀ ଲୋକନାଥଙ୍କ ପୀଠରେ ଭକ୍ତଙ୍କ ମଧ୍ୟରେ ସାମାଜିକ ଦୂରତା ରକ୍ଷା ପାଇଁ ଚିହ୍ନ ଦେବାକୁ ଯାଇ ଗାର ଟାଣିଛି ପ୍ରଶାସନ। ଭୋର୍ ୪ଟାରେ ଏଠି ମହାଦୀପ ଉଠିବ।କଟକର ଧବଳେଶ୍ୱର ପୀଠରେ କିନ୍ତୁ ଏବର୍ଷ ଜାଗର ଯାତ୍ରାରେ ଲାଗିବନି ଗହଳି ଚହଳି। ପ୍ରଶାସନ ପକ୍ଷରୁ ୧୪୪ ଧାରା ଜାରି କରାଯାଇଥିବାରୁ ଭକ୍ତମାନେ ଧବଳେଶ୍ୱରଙ୍କ ଦର୍ଶନରୁ ବଞ୍ଚିତ ହୋଇଛନ୍ତି। ମନ୍ଦିର ଭିତରେ ଧବଳେଶ୍ୱରଙ୍କ ନୀତିକାନ୍ତି ସ୍ୱାଭାବିକ ଭାବେ କରାଯିବା ସହ ପ୍ରସିଦ୍ଧ ମାଣ୍ଡୁଅ ଭୋଗ ଲାଗି ହେବ। ଏଠାରେ ରାତି ଗୋଟାଏରେ ମହାଦୀପ ଉଠିବ। ଭଦ୍ରକର ବାବା ଆଖଣ୍ଡଳମଣିଙ୍କ ପୀଠରେ ବି ଏଥର ବିନା ଭକ୍ତରେ ହେବ ଜାଗର ଯାତ୍ରା। ଭିଡ ଏଡ଼ାଇବାକୁ  ଏଠି ମଧ୍ୟ ୧୪୪ ଧାରା ଜାରି ହୋଇଛି। ଢେଙ୍କାନାଳର କପିଳାସ ପୀଠରେ ରାଜ୍ୟ ଓ ଜିଲ୍ଲା ବାହାର ଭକ୍ତଙ୍କୁ ବାରଣ କରାଯାଇଛି। କୋଭିଡ୍ ନେଗେଟିଭ୍ ରିପୋର୍ଟ ଦେଖାଇ ଜିଲ୍ଲା ଭିତରର ଭକ୍ତ ମନ୍ଦିର ଭିତରକୁ ଯାଇପାରିବେ। ଏଠାରେ ଭୋର ସାଢେ ୪ଟାରେ ମହାଦୀପ ଉଠିବ।

ସ୍ୱାସ୍ଥ୍ୟ ପାଇଁ କ୍ଷତିକାରକ କାଜୁ !

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଡ୍ରାଏ ଫ୍ରୁଟସ୍ ତଥା କାଜୁ ଖାଇବା ସମସ୍ତଙ୍କୁ ପସନ୍ଦ। ଏହାର ସ୍ୱାଦ ସମସ୍ତଙ୍କୁ ଭଲ ଲାଗେ। କାଜୁ ଖାଇବା ସ୍ୱାସ୍ଥ୍ୟ ପାଇଁ ହିତକର ବୋଲି ମଧ୍ୟ କୁହାଯାଏ। କିନ୍ତୁ ଆବଶ୍ୟକତା ଠାରୁ ଅଧିକ କାଜୁ ଖାଇବା ସ୍ୱାସ୍ଥ୍ୟ ପାଇଁ କ୍ଷତିକାରକ ପ୍ରମାଣିତ ହୋଇପାରେ। ଯଦି ଆପଣଙ୍କର କାଜୁ ଖାଇବା ସଉକ ଥାଏ ତେବେ ସାବଧାନ ହୋଇଯା’ନ୍ତୁ। ଅଧିକ କାଜୁ ଖାଇବା ଦ୍ୱାରା ଓଜନ ବଢ଼ିବା ସହ କିଡନୀ ଏବଂ ହୃଦୟ ଉପରେ ଖରାପ ପ୍ରଭାବ ପକାଇଥାଏ। ତେବେ କାଜୁ ଖାଇବା ଦ୍ୱାରା ଆଉ କ’ଣ କ’ଣ ସବୁ କ୍ଷତି ହୁଏ ଆସନ୍ତୁ ଜାଣିବା । 

• ଯଦି ଆପଣଙ୍କର ସାଧାରଣତ ମୁଣ୍ଡବିନ୍ଧା କିମ୍ବା ମାଇଗ୍ରେନ୍ ସମସ୍ୟା ଥାଏ ତେବେ କାଜୁ ବାଦାମଠାରୁ ଦୂରଇ ରୁହନ୍ତୁ । କାଜୁରେ ଆମିନୋ ଏସିଡ୍ ଟାଇରାମାଇନ୍ ଏବଂ ଫେନିଲେଥାଇଲାମାଇନ୍ ଥାଏ, ଯାହା ଆପଣଙ୍କ ମୁଣ୍ଡବିନ୍ଧାକୁ ଅନେକ ଥର ବଢ଼ାଇପାରେ।
• କାଜୁ ଏକ ଅଧିକ କ୍ୟାଲୋରୀ ଯୁକ୍ତ ଖାଦ୍ୟ। ଏହାକୁ ଅଧିକ ଖାଇବା ଦ୍ୱାରା ଓଜନ ବଢ଼ିବା ସହ ଆପଣ ମୋଟାପଣର ଶିକାର ହୋଇପାରନ୍ତି। ତେଣୁ କାଜୁକୁ ଅତି ସୀମିତ ପରିମାଣରେ ଖାଇବା ଉଚିତ। ପ୍ରାୟ ୩୦ ଗ୍ରାମ କାଜୁରେ ୧୬୩ କ୍ୟାଲୋରୀ ଏବଂ ୧୩.୧ ଚର୍ବି ଥାଏ | ଯଦି ଆପଣ ନିୟମିତ କିମ୍ବା ଅଧିକ ପରିମାଣରେ କାଜୁ ଖାଉଛନ୍ତି ତେବେ ଆପଣଙ୍କର ଓଜନ ହ୍ରାସ କରିବା ଲକ୍ଷ୍ୟ କେବେ ବି ପୂରଣ ହୋଇପାରିବ ନାହିଁ।
• ଅଧିକ ପରିମାଣରେ କାଜୁ ଖାଇବା ଦ୍ୱାରା ଧୀରେ ଧୀରେ ଶରୀରରେ ଔଷଧ ମଧ୍ୟ  କାମ କରେ ନାହିଁ। ୩ ରୁ ୪ଟି କାଜୁରେ ୮୨.୫mg ମ୍ୟାଗ୍ନେସିୟମ୍ ଥାଏ । ଏହି ମ୍ୟାଗ୍ନେସିୟମ୍ ଆପଣ ଖାଉଥିବା ଡାଇବେଟିସ୍, ଥାଇରଏଡ୍, ମୂତ୍ର ସମ୍ବନ୍ଧୀୟ  ଏବଂ ଆର୍ଥ୍ରାଇଟିସ୍ ଔଷଧ ଉପରେ ପ୍ରଭାବ ପକାଇଥାଏ।
• ଉଚ୍ଚ ରକ୍ତଚାପରେ ପୀଡିତ ଥିବା ବ୍ୟକ୍ତି ଭୁଲ୍‌ରେ ବି କାଜୁ ଖାଇବା ଉଚିତ ନୁହେଁ। କାଜୁରେ ଅଧିକ ମାତ୍ରାରେ ସୋଡିଅମ ରହିଛି, ଯାହା ରକ୍ତଚାପକୁ ବଢ଼ାଇବାରେ କାମ କରେ। କେବଳ ସେତିକି ନୁହେଁ ଅଧିକ କାଜୁ ଖାଇବା ଦ୍ୱାରା କିଡନୀ ଏବଂ ହୃଦୟ ଉପରେ ମଧ୍ୟ ପ୍ରଭାବ ପଡିଥାଏ।