ଗୁଣପୁର ଉପ ଜିଲ୍ଲାପାଳଙ୍କ ଜଗନ୍ନାଥପୁର ଓ ଗୋଠଲ ପଦର ପଞ୍ଚାୟତ ଗସ୍ତ !
!!! ଗୁଣପୁର ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଯୋଷୀ ଙ୍କ ରିପୋର୍ଟ !!!
ଏଥର ସମ୍ଭାଳ (ଗୁଣପୁର) – ଗୁଣପୁର ଉପ ଜିଲ୍ଲାପାଳ ଡାକ୍ତର ସିଦ୍ଧେଶ୍ଵର ବଳିରାମ ବନ୍ଦର ଆଜି ଗୁଣପୁର ପଞ୍ଚାୟତ ସମିତି ଅନ୍ତର୍ଗତ ଜଗନ୍ନାଥପୁର ଓ ଗୋଠଲ ପଦର ପଞ୍ଚାୟତ ଗସ୍ତ କରି କରନା ପରୀକ୍ଷା ଅଗ୍ରଗତି ସମୀକ୍ଷା କରିଥିଲେ । ପଞ୍ଚାୟତ ସ୍ତରରେ ପରୀକ୍ଷା ନିମନ୍ତେ ଗଠନ ହୋଇଥିବା ତିନି ଜଣିଆ ପ୍ରତିନିଧି ତଥା ସ୍ବାସ୍ଥ୍ୟ ବିଭାଗ, ପଞ୍ଚାୟତ ବିଭାଗ ଓ ଅଙ୍ଗନବାଡି କର୍ମୀ ଲୋକଙ୍କୁ ସଚେତନ କରି ଅଧିକରୁ ଅଧିକ ଲୋକଙ୍କ କରନା ପରୀକ୍ଷା କରିବା ନିମନ୍ତେ ନିର୍ଦ୍ଦେଶ ଦେଇଥିଲେ । ଯେଉଁ ମାନଙ୍କ ପରୀକ୍ଷା କରାଯାଉଛି ସେମନେ ରିପୋର୍ଟ ଆସିବ ଯାଏଁ ଓ ଯେଉଁମାନଙ୍କ ପୋଜିଟିଭ ଚିହ୍ନଟ ହୁଏ ସେମାନେ କିପରି ଘରେ ଏକାନ୍ତବସ କରିବେ ଅଥବା କରନା ସେବା କେନ୍ଦ୍ରକୁ ନେବାକୁ ହେବ ସେଥିପ୍ରତି ଦୃଷ୍ଟି ଦେବାକୁ ଗୁଣପୁର ଗୋଷ୍ଠୀ ଉନ୍ନୟନ ଅଧିକାରୀଙ୍କୁ ଦାୟିତ୍ବ ଅର୍ପଣ କରିଥିଲେ । ପ୍ରତିଦିନ ପଞ୍ଚାୟତ ସଦର ମହକୁମା ଓ ଘରକୁ ଘର ବୁଲି ଅଧିକରୁ ଅଧିକ ପରୀକ୍ଷା କରିବା ନିମନ୍ତେ ଉପ ଜିଲ୍ଲାପାଳ ପରାମର୍ଶ ଦେଇଥିଲେ । ଉପଖଣ୍ଡ ସ୍ତରରେ ପର୍ଯ୍ୟାପ୍ତ ପରିମାଣରେ ଆଣ୍ଟିଜେନ ଟେଷ୍ଟ କିଟ ଥିବା ଏବଂ ଆବଶ୍ୟକ ଅନୁଯାୟୀ ଆଣି ପରୀକ୍ଷା ତ୍ବରାନ୍ବିତ କରିବା ନିମନ୍ତେ ସ୍ବାସ୍ଥ୍ୟ କର୍ମଚାରୀଙ୍କୁ କହିଥିଲେ ।
ଦୁଇଟି ପଞ୍ଚାୟତର ବିଭିନ୍ନ ଗ୍ରାମକୁ ଯାଇ ଲୋକ ମାନଙ୍କୁ ସଚେତନ କରିବା ସହ ଭୟଭୀତ ନ ହୋଇ ସମସ୍ତେ ନିଜ ନିଜର ପରୀକ୍ଷା କରାଇ ନେବାକୁ ଅନୁରୋଧ କରିଥଲେ । ସେହିପରି ସମସ୍ତେ ମାସ୍କ ବ୍ୟବହାର କରିବା , ସାମାଜିକ ଦୂରତା ପାଳନ କରିବ ସହ ବାରମ୍ବାର ହାତ ଧୋଇବା ନିମନ୍ତେ ପରାମର୍ଶ ଦେଇଥିଲେ । ଉପ ଜିଲ୍ଲାପାଳଙ୍କ ଏହି ଗସ୍ତ ସମୟରେ ଗୁଣପୁର ଗୋଷ୍ଠୀ ଉନ୍ନୟନ ଅଧିକାରୀ ଶ୍ରୀମତୀ ଶାନ୍ତି ପ୍ରଭା ପ୍ରଧାନ, ସହକାରୀ ନିର୍ବାହୀ ଯନ୍ତ୍ରୀ ଦୁର୍ଯ୍ୟୋଧନ ଜନୀ, ପୁରୁଷ ସ୍ବାସ୍ଥ୍ୟ କର୍ମୀ ଗୋପାଳ କୃଷ୍ଣ ପଟନାୟକ, ପଞ୍ଚାୟତ ନିର୍ବାହୀ ଅଧିକାରୀ ଅଶୋକ କୁମାର ପାତ୍ର ପ୍ରମୁଖ ଉପସ୍ଥିତ ଥିଲେ ।
