ଖଲ୍ଲିକୋଟ ପ୍ରେସ କ୍ଲବ ର ନୁତନ କର୍ମକର୍ତ୍ତା ଚୟନ ।

!!! ଗଞ୍ଜାମ୍ ଜିଲ୍ଲା ଖଲ୍ଲିକୋଟ ରୁ ଅଶ୍ଵିନ କୁମାର ମହାନ୍ତି ଙ୍କ ରିପୋର୍ଟ୍ !!! 

ଏଥର ସମ୍ଭାଳ (ଖଲ୍ଲିକୋଟ) – ଖଲ୍ଲିକୋଟ ପ୍ରେସ କ୍ଲବ ତରଫରୁ ସମସ୍ତ ସଦସ୍ୟ ଙ୍କ ଉପସ୍ଥିତ ରେ ବାର୍ଷିକ ବୈଠକ  ଅନୁଷ୍ଟିତ ହୋଇଥିଲା। ଏହି ବୈଠକରେ କ୍ଲବ ର ପୂର୍ବତନ ସମ୍ପାଦକ ଶ୍ରୀ ମାଧବ ବେହେରା ପୁରୋହିତ୍ୟି କରି କ୍ଲବ ର ସଦସ୍ୟ ମାନଙ୍କୁ ସାମ୍ବାଦିକତା ସହିତ ବିଭିନ୍ନ ସାମାଜିକ କାର୍ଯ୍ୟକ୍ରମ ହାତକୁ ନେବା ସହିତ ଶୃଙ୍ଖଳିତ ସହକାରେ ସଙ୍ଘ ର ନୀତି ନିୟମ ଅନୁଯାୟୀ ସମସ୍ତେ ସଂକଳ୍ପ ବଦ୍ଧ ହେବାପାଇଁ ଉପଦେଶ ଦେଇଥିଲେ। ପରେ ପ୍ରତିବର୍ଷ ଭଳି ପୂର୍ବ କର୍ମ କର୍ତା ଙ୍କୁ ବିଶ୍ରାମ ଦେଇ ନୂତନ କର୍ମ କର୍ତା ମନୋନୟନ କରାଯାଇଥିଲା, ଏହି ପ୍ରକ୍ରିୟା ରେ ସଭାପତି ଭାବେ ଶ୍ରୀ ପ୍ରଶାନ୍ତ କୁମାର ମିଶ୍ର, ଉପସଭାପତି ଭାବେ ଶ୍ରୀ ପ୍ରଦୀପ୍ତ କୁମାର ସାହୁ,ସମ୍ପାଦକ ଭାବେ ଶ୍ରୀ ସୁନୀଲ କୁମାର ମହାପାତ୍ର ଓ କୋଷାଧ୍ୟକ୍ଷ ଭାବରେ ଶ୍ରୀ ଅଶ୍ୱିନୀ କୁମାର ମହାନ୍ତି ମନୋନୀତ ହୋଇଥିଲେ।ଏହି ବୈଠକରେ ପ୍ରେସ କ୍ଲବର ବରିଷ୍ଠ ସାମ୍ବାଦିକ ଶ୍ରୀ ବିଭୁତି ଭୂଷଣ ତ୍ରିପାଠୀ, ଶ୍ରୀ ଅଶୋକ ତ୍ରିପାଠୀ, ଶ୍ରୀ ନଗେନ୍ଦ୍ର ନାଥ ସାହୁ, ଶ୍ରୀ ଗଣେଶ ମଳିକ,ଶ୍ରୀ ବିଭୁ ପ୍ରସାଦ ପଟନାୟକ, ଶ୍ରୀ ମନମଦନ ସାହୁ,ଶ୍ରୀ ବିମଲ ପ୍ରସାଦ ପାଢ଼ୀ ପ୍ରମୁଖ ଉପସ୍ଥିତ ଥିଲେ।

ବେଗୁନିଆପଡା ଏବିସିଡ଼ି ପ୍ଲେ ସ୍କୁଲ ଠାରେ ରକ୍ତଦାନ ଶିବିର ଅନୁଷ୍ଠିତ;୭୯ ୟୁନିଟ ରକ୍ତ ସଂଗୃହିତ l 

!!! ଗଞ୍ଜାମ୍ ଜିଲ୍ଲା ବେଗୁନିଆପଡ଼ା ରୁ ମୁନା ନାୟକ ଙ୍କ ରିପୋର୍ଟ !!! 

ଏଥର ସମ୍ଭାଳ (ବେଗୁନିଆପଡା) – ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ ଅନ୍ତର୍ଗତ ଏବିସିଡ଼ି ପ୍ଲେ ସ୍କୁଲ ପରିସରରେ ରବିବାର ଦିନ କେନ୍ଦ୍ରୀୟ ମାନବ ଅଧିକାର ସୁରକ୍ଷା ସଂଗଠନ, ଗଞ୍ଜାମ ଶାଖା ଓ ଏବିସିଡ଼ି ପ୍ଲେ ସ୍କୁଲ ଆନୁକୂଲ୍ୟରେ ଏବଂ ବେଗୁନିଆପଡା ସମ୍ବାଦ ଆମ ଓଡିଶା, ଇଣ୍ଡିଆନ ୟୁଥ ଆସୋସିଏସନ ଏବଂ ଜୀବନ ଦ୍ୟୁତି ଏଜୁକେସନ ଏଣ୍ଡ ଚାରିଟେବଲ ଟ୍ରଷ୍ଟର ମିଳିତ ସହଯୋଗରେ ଏକ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି l ଉକ୍ତ ରକ୍ତଦାନ ଶିବିରରେ ବେଗୁନିଆପଡା ଗୋଷ୍ଠୀ ଉନ୍ନୟନ ଅଧିକାରୀ ଦେବବର ପ୍ରଧାନ, ଫାଣ୍ଡି ଅଧିକାରୀ ଦୀପ୍ତି ରଞ୍ଜନ ବେହେରା ଓ ଅବସର ପ୍ରାପ୍ତ ଶିକ୍ଷକ ସିମାଞ୍ଚଳ ଶତପଥୀ, ସମାଜସେବୀ ଚିତ୍ରସେନ ଘୋଷ, ସ୍ଥାନୀୟ ସରପଞ୍ଚ  ଅରୁଣ କୁମାର ମାଝୀ ଆଦି ସାମ୍ନାନିତ ଅତିଥି ଭାବେ ଯୋଗଦେଇଥିଲେ l

ଅନ୍ୟମାନଙ୍କ ମଧ୍ୟରେ ଏବିସିଡ଼ି ପ୍ଲେ ସ୍କୁଲ ସମ୍ପାଦକ ଅଶୋକ କୁମାର ସେନାପତି, ରାଜ୍ୟପାଳ ପୁରସ୍କାର ପ୍ରାପ୍ତ ଶିକ୍ଷକ ପ୍ରସନ୍ନ କୁମାର ନାୟକ, ଶିକ୍ଷକ ଦେବେନ୍ଦ୍ର ମହାରଣା, ମାନବ ଅଧିକାର ସୁରକ୍ଷା ସଂଗଠନ ଜିଲ୍ଲା ସଭାପତି ଜଗନ୍ନାଥ ସାହୁ, ସମ୍ବାଦଦାତା ପବିତ୍ର କୁମାର ରାଉତ, ଜଗବନ୍ଧୁ ସାହୁ, ଟ୍ରଷ୍ଟ ସମ୍ପାଦକ ଟୁକୁନା ପ୍ରଧାନ, ବିଜେପି ଜିଲ୍ଲା ଯୁବମୋର୍ଚା ସାଧାରଣ ସମ୍ପାଦକ ଆଲୋକ କୁମାର ଶତପଥି, ସମାଜସେବୀ ରବୀନ୍ଦ୍ର ନାଥ ଶତପଥି, ଆରତୀ ବେହେରା, ଅର୍ଧେନ୍ଦୁ, ଜଗମୋହନ, ସୁଶାନ୍ତ, ବସନ୍ତ, ନାରାୟଣ, ରବୀନ୍ଦ୍ର ପାଣିଗ୍ରାହୀ ଆଦି ଯୋଗଦେଇ ରକ୍ତଦାତା ମାନଙ୍କୁ ଉତ୍ସାହିତ କରିଥିଲେ l  ଉକ୍ତ ଶିବିରରେ ଅଂଚଳର ଅନେକ ବ୍ୟକ୍ତି  ସ୍ବେଛାକୃତ ଭାବେ ରକ୍ତଦାନ କରିଥିବା ବେଳେ ସେମାନଙ୍କ ଠାରୁ 79 ୟୁନିଟ ରକ୍ତ ସଂଗ୍ରହ କରାଯାଇଥିଲା l ଏମକେସିଜି ରକ୍ତ ଭଣ୍ଡାରରୁ ଆସିଥିବା ଅଭିଜ୍ଞ କର୍ମଚାରୀ ସମେତ ଏବିସିଡ଼ି ପ୍ଲେ ସ୍କୁଲର ସମସ୍ତ ଶିକ୍ଷକ ଶିକ୍ଷୟିତ୍ରୀ ସହଯୋଗ କରିଥିଲେ l

ନୈାପଡା-ଗୁଣୁପୁର ରେଳପଥ ବିଦ୍ୟୁତିକରଣ ବ୍ୟବସ୍ଥା ଅନୁଧ୍ୟାନ କରିଲେ ରେଳବିଭାଗ ‘ସିଆରଏସ’।

!!! ଗଜପତି ଜିଲ୍ଲା ରୁ ପାରଳାଖେମୁଣ୍ଡି ଟାଉନ ପ୍ରତିନିଧି ଅନିତା କୁମାରୀ ଅଧିକାରୀ ଙ୍କ ରିପୋର୍ଟ !!! 

ଏଥର ସମ୍ଭାଳ (ପାରଳାଖେମୁଣ୍ଡି) – ପୂର୍ବତଟ ରେଳ ଜୋନ୍ ର ମୁଖ୍ୟ ସୁରକ୍ଷା ଅଧିକାରୀ ଏ. କେ. ରାଏ ଆଜି ବିଭାଗୀୟ ଉଚ୍ଚସ୍ତରୀୟ ରେଳ କର୍ମକର୍ତ୍ତାଙ୍କ ସହ ନୈାପଡା-ଗୁଣୁପୁର ରେଳପଥ ବିଦ୍ୟୁତିକରଣ ସମୀକ୍ଷା କରିବା ସହ ପାରଳାଖେମୁଣ୍ଡି ରେଳ ଷ୍ଟେସନ ପରିସର ବୋଲି ଦେଖିଥିଲେ। ଏହି ଅବସରରେ ନୈାପଡା- ପାରଳାଖେମୁଣ୍ଡିର- ଗୁଣୁପୁର ରେଳପଥ ବିଦ୍ୟୁତିକରଣ, ବିକାଶ ଓ ବିଭିନ୍ନ ସମସ୍ୟାର ସମାଧାନ ପାଇଁ ସ୍ଥାନୀୟ ବିଜେପି ଦଳର କିଛି କର୍ମକର୍ତ୍ତା ଦାବି ପତ୍ର ପୂର୍ବତଡ ରେଳ ବିଭାଗ ମୁଖ୍ୟ ସୁରକ୍ଷା ଅଧିକାରୀଙ୍କୁ ପ୍ରଦାନ କରିଥିଲେ। ଏହି ରେଳପଥରେ ରହି ଆସିଥିବା ପ୍ଲାଟଫର୍ମ ଗୁଡିକ ଅତ୍ୟନ୍ତ ପୂରାତନ ଅଟେ। ବର୍ତ୍ତମାନ ଏହି ପ୍ଲାଟଫର୍ମ ଗୁଡିକ ଠିକ୍ ଉଚ୍ଚତା ନଥିବା ଯୋଗୁଁ ସାଧାରଣ ଯାତ୍ରୀ ଟ୍ରେନରେ ଚଳିବା ଓ ଓହ୍ଲାଇବା ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ ପାରଳାଖେମୁଣ୍ଡି ସମେତ ଗୁଣୁପୁର ମଧ୍ୟରେ ଥିବା ପ୍ଲାଟଫର୍ମ ଗୁଡିକର ଉଚ୍ଚତା ବସାଇବା ସହ ସେଗୁଡ଼ିକ ସୈାନ୍ଦର୍ଯ୍ୟ କରଣ କରିବା ନିମନ୍ତେ ଆଇନଜୀବୀ , ସ୍ଥାନୀୟ ବିଜେପି ନେତା, ଉତ୍କଳ ହିତୈଷିଣୀ, ପାରଳାଖେମୁଣ୍ଡି ବରିଷ୍ଠ ଜନସାଧାରଣ ମାନେ ଦାବି ପତ୍ର ପ୍ରଦାନ କରିଥିଲେ। ଦାବି ପତ୍ର ପାଇବା ପରେ ଏଥିନେଇ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ସିଆରଏସ ଜଣାଇଥିଲେ। ପୂର୍ବତଟ ରେଳ ଜୋନ୍ ର ବିଶାଖାପାଟଣା ଡିଆରଏମ ଚେତନ କୁମାର ଶ୍ରୀବାସ୍ତବଙ୍କ ସହିତ ରେଳବାଇ ବିଭାଗ କର୍ମକର୍ତା ଉପସ୍ଥିତ ଥିଲେ।

କରୋନା ପାଇଁ ବିଧାୟିକାଙ୍କ ସଚେତନତା ବାର୍ତ୍ତା l 

!!! ଗଞ୍ଜାମ୍ ଜିଲ୍ଲା ଛତ୍ରପୁର ରୁ ଉପଖଣ୍ଡ ପ୍ରତିନିଧି ପବିତ୍ର କୁମାର ରାଉତ ଙ୍କ ରିପୋର୍ଟ୍ !!!

ଏଥର ସମ୍ଭାଳ (ବେଗୁନିଆପଡା) – କରୋନା ଭାଇରସ ଭୟରେ ସମସ୍ତେ ଆତଙ୍କିତ ଥିବାବେଳେ ଆଜିକାଲି ସୋସିଆଲ ମିଡ଼ିଆରେ ଏହାର ଏହାର ଦୁରୁପଯୋଗ ଯୋଗୁଁ ଏହାର ଅପପ୍ରଚାର ଲୋକଙ୍କୁ ଆହୁରି ଭୟଭୀତ କରିଦେଇଛି l ତେଣୁ ଏଥିରୁ ବର୍ତ୍ତିବା ପାଇଁ ବିଭିନ୍ନ ଜନ ପ୍ରତିନିଧି, ପ୍ରଶାସନ, ବୁଦ୍ଧିଜୀବୀମାନେ ଆଗକୁ ଆସି ଜନସାଧାରଣଙ୍କୁ ସଚେତନ କରିବାରେ ଲାଗିଛନ୍ତି l ଏହାର ପ୍ରକୃତ କାରଣ, ନିରାକରଣ, ପ୍ରତିକାର ଆଦି ସମ୍ବନ୍ଧରେ ଲୋକଙ୍କୁ ଜାଗୃତ କରାଯାଉଛି l ଆଜି କବିସୂର୍ଯ୍ୟନଗର ବିଧାୟିକା ଲତିକା ପ୍ରଧାନ ମଧ୍ୟ ସଚେତନତା ପାଇଁ ଅଣ୍ଟା ଭିଡିଛନ୍ତି l ସେ ଆଜି ବେଗୁନିଆପଡା ବ୍ଲକ ଶାଙ୍କୁଡ଼ା ଠାରେ ପହଂଚି ଲୋକଙ୍କ ମନରୁ ଭୟ ଦୂର କରିବା ପାଇଁ ସଚେତନତା ବାର୍ତ୍ତା ଦେଇଥିଲେ l

ଏହି ମାରାତ୍ମକ ଭୁତାଣୁ ଠାରୁ ରକ୍ଷା ପାଇବା ପାଇଁ ନିୟମିତ ସାବୁନରେ ହାତ ଧୋଇବା, ମୁହଁରେ ଟିସୁ ଵା ରୁମାଲ ବ୍ୟବହାର କରିବା, କୌଣସି ଜାଗାରେ ଏକାଠି ନହୋଇ ଅଧିକାଂଶ ସମୟ ଘରେ ରହିବା, ଛୁଆ ମାନଙ୍କୁ ନଜରରେ ରଖିବା, ଅସୁସ୍ଥ ହେଲେ କାହା କଥା ନଶୁଣି ସିଧା ଡାକ୍ତରଙ୍କ ପରାମର୍ଶ ନେବା ଆଦି ଉପରେ ଲୋକଙ୍କୁ ବୁଝାଇଥିଲେ l

ତାରାତାରିଣୀଙ୍କ ପୀଠରେ ପ୍ରଶାସନ ପକ୍ଷରୁ କଟକଣା ; ମୁଣ୍ଡନ ସମ୍ପୂର୍ଣ ବନ୍ଦ l 

!!! ଗଞ୍ଜାମ୍ ଜିଲ୍ଲା ଛତ୍ରପୁର ରୁ ଉପଖଣ୍ଡ ପ୍ରତିନିଧି ପବିତ୍ର କୁମାର ରାଉତ ଙ୍କ ରିପୋର୍ଟ୍ !!!

ଏଥର ସମ୍ଭାଳ (ଗଞ୍ଜାମ) – କରୋନା ଭୟରେ ସମଗ୍ର ବିଶ୍ୱ ଏବେ  ପ୍ରମାଦ ଗଣୁଛି l ଏଥିପାଇଁ ସବୁଠି ପ୍ରତିକାର ସ୍ୱରୂପ ଯେପରି ଜନସାଧାରଣ ଅଧିକ ଗହଳି ନହେବେ ସେଥିପ୍ରତି ଗୁରୁତ୍ୱ ଦିଆଯାଉଛି l ଏହି ପରିପ୍ରେକ୍ଷୀରେ ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ନିକଟସ୍ଥ ଗଞ୍ଜାମର ଆରାଧ୍ୟ ଦେବୀ ମା’ତାରାତାରିଣୀଙ୍କ ଚୈତ୍ର ମଙ୍ଗଳବାର ଯାତ୍ରା ଉପରେ ପ୍ରଶାସନ ପକ୍ଷରୁ କଟକଣା ଲଗାଯାଇଛି। ମୁଣ୍ଡନକୁ ସମ୍ପୂର୍ଣ୍ଣ ବନ୍ଦ କରାଯାଇଛି। ଏଥିସହ ପାହାଡ଼ ଉପରକୁ ବସ୍‌ ସେବା ପ୍ରତ୍ୟାହାର ହୋଇଛି। ସେଠାରେ ଥିବା କଲ୍ୟାଣ ମଣ୍ଡପ ଓ ହୋଟେଲ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି। ଫଳରେ ଜନସମାଗମ କମିବା ସହ ଯାତ୍ରା ରୀତିନୀତିରେ ହେବ। ଚଳିତବର୍ଷ ନ ଆସି ଆଗାମୀ ବର୍ଷକୁ ଭକ୍ତ ଆସନ୍ତୁ ବୋଲି ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ କହିଛନ୍ତି। ରବିବାର ଏନେଇ ଜିଲାପାଳ ଏକ ଜରୁରୀ ବୈଠକ କରିଥିଲେ। ସେବାୟତମାନେ ମଧ୍ୟ ଏହାକୁ ସ୍ବାଗତ କରିଛନ୍ତି। ଗଞ୍ଜାମ ଏସ୍‌ପି ବ୍ରିଜେଶ କୁମାର ରୟ, ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା, କବିସୂର୍ଯ୍ୟନଗର ବିଧାୟିକା ଲତିକା ପ୍ରଧାନ, ଖଲିକୋଟ ବିଧାୟିକା ସୂର୍ଯ୍ୟମଣି ବୈଦ୍ୟ ପ୍ରମୁଖ ଉପସ୍ଥିତ ଥିଲେ। ଏହାକୁ ସମସ୍ତେ ସ୍ୱାଗତ କରିଥିବା ଜଣାପଡିଛି l