!!! ସୁନ୍ଦରଗଡ଼ ଜିଲ୍ଲା ରାଜଗାଙ୍ଗପୁର ରୁ ରମେଶ ମିଶ୍ର ଙ୍କ ରିପୋର୍ଟ୍ !!!
ଏଥର ସମ୍ଭାଳ (ରାଜଗାଙ୍ଗପୁର) – ବେଳେ ବେଳେ କୁନି କୁନା ପିଲାଙ୍କ କାମ ବଡ଼ ଲୋକଙ୍କୁ ଶିକ୍ଷା ଦେବା ସହ ସମାଜକୁ ଏକ ପ୍ରେରଣା ପ୍ରଦାନ କରିଥାଏ । ଏପରି ଏକ ଘଟଣା ଘଟିଛି ରାଜଗାଙ୍ଗପୁର ୱାର୍ଡନଂ ୭ କୁଣ୍ଡୁ ପଡା ଠାରେ ଥିବା ଏକ ପଡ଼ିଆରେ ରାଜଗାଙ୍ଗପୁର ପୌରପାଳିକା ତରଫରୁ ଏକ ପ୍ରକଳ୍ପ ପାଇଁ ନିର୍ମାଣ କାର୍ଯ୍ୟ ଆରମ୍ଭ କରାଯାଇଛି । ଏହି ପ୍ରକଳ୍ପ ପାଇଁ ଖୋଲା ଜାଗାରେ ରେ ବଡ଼ ବଡ଼ ଗର୍ତ୍ତ ମାନ ଖୋଳା ଯାଇଛି। ଆଜି ସକଳେ ହୋଇଥିବା ବର୍ଷା ଯୋଗୁ ନିର୍ମାଣ ଉଦ୍ଦେଶ୍ୟରେ ଖୋଳା ଯାଇଥିବା ଏହି ଗର୍ତ୍ତ ବର୍ଷା ଜଳରେ ଭର୍ତ୍ତି ହୋଇ ଯାଇଥିଲା । ନିର୍ମାଣ କରୁଥିବା ସଂସ୍ଥା ଏହି ଖୋଲା ପଡିଆରେ ବଡ଼ ବଡ଼ ଗାତ ଖୋଳିଥିବା ବେଳେ ସୁରକ୍ଷା ଦୃଷ୍ଟିରୁ କୌଣସି ପ୍ରକାର ବ୍ୟବସ୍ଥା କରିନାହିଁ । ଯାହାଫଳରେ ଆଜି ସନ୍ଧ୍ୟାରେ ଏକ ଗାଈ ଉକ୍ତ ଜଳଭର୍ତି ଗାତରେ ପଡି ଯାଇ ଆଉ ଉଠି ନପାରି ଅସହାୟ ଅବସ୍ଥାରେ ପଡି ରହିଥିଲା । ଅନେକ ବୟସ୍କ ଲୋକ ଗାଈ ଗାତରେ ପଡିଥିବା ଦେଖି ମଧ୍ୟ ନ ଦେଖିଲା ଭଳି ଚାଲିଯାଇଥଲେ । ସେଠାରେ ଖେଳୁଥିବା ସୋନୁ,ରିତିକ, ଛୋଟୁ, କାହ୍ନା,ସନ୍ତୋଷ ନାମକ ଦଶ ରୁ ବାର ବର୍ଷର ଛୋଟ ଛୋଟ ପିଲାମାନେ ଗାଈଟିକୁ ଗାତରେ ପଡି ଥିବା ଦେଖି ସେଇ ବାଟ ଦେଇ ଯାଉଥିବା ଅନେକ ବୟସ୍କ ଲୋକଙ୍କୁ ସାହାଯ୍ୟ କରିବା ପାଇଁ କାକୁତି ମିନତୀ କରିଥିଲେ । କିନ୍ତୁ ବଡ଼ବଡ଼ିଆ କେହି ତାଙ୍କ କଥା ନ ଶୁଣିବାରୁ ଶେଷରେ ସେମାନେ ନିଜେ ଗାଈଟିକୁ ଉଦ୍ଧାର କରିବା ପାଇଁ ଅଣ୍ଟା ଭିଡି ବାହାରି ଥିଲେ । ବହୁ କଷ୍ଟରେ କାଦୁଅ ପାଣିରେ ସରସର ହୋଇ ଦୁଇ ଘଣ୍ଟାରୁ ଅଧିକ ଅକ୍ଲାନ୍ତ ପରିଶ୍ରମ କରି ସେମାନେ ଶେଷରେ ଗାଈ ଟିକୁ ଗାତ ଭିତରୁ ରୁ ଉଦ୍ଧାର କରିଥିଲେ । ଯାହା କରିବା ପାଇଁ ବଡ଼ ଲୋକେ ପଛଘୁଞ୍ଚା ଦେଲେ ତାକୁ ନିଜ ଦୃଢ଼ ଇଛାଶକ୍ତି ଏବଂ ଏକତାର ବଳରେ ଛୋଟ ଛୋଟ ପିଲାମାନେ ତାହା କରି ଦେଖାଇଥିଲେ । ସେମାନେ ଗାଈଟିକୁ ଉଦ୍ଧାର କରି ତାର ଜୀବନ ରକ୍ଷା କରିବା ସହ ବଡ଼ ମାନଙ୍କ ପାଇଁ ଏକ ଉଦ୍ଧାହରଣ ସୃଷ୍ଟି କରିବା ସହିତ ନିଜ ମଣିଷ ପଣିଆର ପରିଚୟ ପ୍ରଦାନ କରିଥିଲେ।
