ଲାଇନ୍ କଟିଲେ ରାଜ ରାସ୍ତାକୁ ଓହ୍ଳାଇବ କଂଗ୍ରେସ: ସୁର
ଏଥର ସମ୍ଭାଳ ବ୍ୟୁରୋ (ଭୁବନେଶ୍ବର) : ଆସନ୍ତା ୧୫ ତାରିଖକୁ ଡେଡ୍ ଲାଇନ୍ ଦେଇଛି ସେସୁ। ଏହି ତାରିଖ ଭିତରେ ବକେୟା ଥିବା ବିଦ୍ୟୁତ୍ ବିଲ୍ ପୈଠ ନ କଲେ ଆସନ୍ତା ୧୬ ତାରିଖରୁ ଲାଇନ୍ କଟାଯିବ। ତେବେ ଏହାକୁ ବିରୋଧ କରିଛି କଂଗ୍ରେସ। ଗରିବ ଲୋକଙ୍କ ଲାଇନ୍ କାଟିଲେ କଂଗ୍ରେସ ରାଜରାସ୍ତାକୁ ଓହ୍ଲାଇବ ବୋଲି ଚେତାବନୀ ଦେଇଛନ୍ତି ଜଟଣୀ ବିଧାୟକ ତଥା କଂଗ୍ରେସର ବରିଷ୍ଠ ନେତା ସୁର ରାଉତରାୟ। ମୁଣ୍ଡ ଉପରେ ପିଲାଙ୍କ ପରୀକ୍ଷା ଥିବାରୁ ଏହି ନିଷ୍ପତ୍ତି ବଦଳାଯାଉ ବୋଲି କହିଛନ୍ତି ସୁର।
ସୁର ରାଉତରାୟ କହିଛନ୍ତି, ଶିଳ୍ପପତିଙ୍କ ପାଖରେ ଶହ ଶହ କୋଟି ଟଙ୍କାର ବିଜୁଳି ବିଲ୍ ବାକି ପଡ଼ିଥିବା ବେଳେ ଗୀରବଙ୍କ ଉପରେ ଦାଉ ସାଧୁଛନ୍ତି ସରକାର। ଯଦି ବିଦ୍ୟୁତ୍ କାଟ୍ ହେବ, ତା’ହେଲେ ରାଜରାସ୍ତାରେ ନିଆଁ ଜଳିବ। ଯଦି ଆଗାମୀ ୧୬ ତାରିଖରୁ ଗରିବ ଲୋକଙ୍କ ବିଜୁଳି କଟାଯାଏ, ତେବେ କଂଗ୍ରେସ ଏହାର ଜୋର୍ଦାର୍ ପ୍ରତିବାଦ କରିବ। ଏପରିକି ବିଦ୍ୟୁତ୍ କାଟିବା ପାଇଁ ଗାଁ ଭିତରକୁ କାହାକୁ ପୁରାଇ ଦିଆଯିବ ନାହିଁ ବୋଲି ଖୋଲାଖୋଲି ଧମକ ଦେଇଛନ୍ତି କଂଗ୍ରେସ ବିଧାୟକ ସୁର ରାଉତରାୟ। ମୁଣ୍ଡ ଉପରେ ପିଲାମାନଙ୍କ ମାଟ୍ରିକ୍ ପରୀକ୍ଷା ରହିଛି। ତେଣୁ ‘ସେସୁ’ ଓ ସରକାର ଏ ଦିଗରେ ପୁନର୍ବିଚାର କରି ନିଷ୍ପତ୍ତି ବଦଳାନ୍ତୁ। ଏଥିଲାଗି ସରକାରଙ୍କ ହାତରେ ଆଉ ମାତ୍ର ଛଅ ଦିନ ବାକି ରହିଛି। ତେଣୁ ଗ୍ରାମାଞ୍ଚଳରେ ବସବାସ କରୁଥିବା ଗରିବ ପରିବାରକୁ ସମୟ ଦିଆଯିବା ଉଚିତ୍ ବୋଲି ସେ କହିଛନ୍ତି। ଅନ୍ୟପଟେ ସରକାରଙ୍କ ବିଜୁଳି କାଟ୍ ନିଷ୍ପତ୍ତିକୁ ମଧ୍ୟ ବିଜେପି ବିରୋଧ କରିଛି। ଖାଉଟିମାନଙ୍କ ଉପରେ ବୋଝ ଲଦିବାକୁ ସରକାର ଚାହୁଁଛନ୍ତି। ସରକାର ଏଥିରୁ ନିବୃତ୍ତ ରୁହନ୍ତୁ ବୋଲି କହିଛି ବିଜେପି।
ସୂଚନାଯୋଗ୍ୟ, ଗୁରୁବାର ସାମ୍ବାଦିକ ସମ୍ମିଳନୀ କରି ସେସୁର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଅରୁଣ ବୋଥ୍ରା କହିଥିଲେ, ପ୍ରାୟ ୭ ଲକ୍ଷ ବକେୟା ବିଦ୍ୟୁତ ବିଲ୍ ଉପଭୋକ୍ତାଙ୍କୁ ସେସୁ ପକ୍ଷରୁ ନୋଟିସ୍ ଓ ଏସ୍ଏମ୍ଏସ୍ ଯୋଗେ ବିଲ୍ ପେମେଣ୍ଟ୍ କରିବାକୁ ସୂଚନା ଦିଆଯାଇଥିଲା। ଆଉ ଏହି ଉପଭୋକ୍ତାଙ୍କ ମଧ୍ୟରୁ ପ୍ରାୟ ୧ ଲକ୍ଷ ୧୦ ହଜାର ଉପଭୋକ୍ତା ବକେୟା ବିଦ୍ୟୁତ ବିଲ୍ ପୈଠ କରିଛନ୍ତି। ବକେୟା ଥିବା ୧୯୭୧ କୋଟିରୁ ୨୧ କୋଟି ଆଦାୟ ହୋଇଛି। ସେହିଭଳି ପ୍ରାୟ ସମସ୍ତ ଶିଳ୍ପାନୁଷ୍ଠାନ ବକେୟା ବିଦ୍ୟୁତ ବିଲ୍ ପୈଠ କରିଛନ୍ତି। ମୋକଦ୍ଦମା ଚାଲିଥିବା ମାତ୍ର ୫ଟି ଶିଳ୍ପାନୁଷ୍ଠାନ ଏପର୍ଯ୍ୟନ୍ତ ଟଙ୍କା ପୈଠ କରିନାହାନ୍ତି। ପାଖାପାଖି ୨ ବର୍ଷ ଧରି ଲକ୍ଷେ ଲୋକ ବକେୟା ପୈଠ କରିନାହାନ୍ତି। ତାଙ୍କ ମଧ୍ୟରେ ୫୮ ହଜାରରୁ ଅଧିକ ଲୋକ ରହିଛନ୍ତି, ଯେଉଁମାନଙ୍କ ପାଖରେ ୫୦ ହଜାରରୁ ଅଧିକ ବିଦ୍ୟୁତ୍ ବିଲ୍ ବାକି ଅଛି। ବର୍ତ୍ତମାନ ପର୍ଯ୍ୟନ୍ତ ୯ ଲକ୍ଷ ୧୦ ହଜାର ଉପଭୋକ୍ତା ବିଦ୍ୟୁତ୍ ବିଲ୍ ପୈଠ କରି ନ ଥିବା ବୋଥ୍ରା କହିଛନ୍ତି। ତେଣୁ ୧୬ ତାରିଖରୁ ରାଜ୍ୟରେ ବିଦ୍ୟୁତ୍ ସଂଯୋଗ କାଟ ଡ୍ରାଇଭ୍ ଆରମ୍ଭ ହେବ। ରାଜ୍ୟରେ ମୋଟ ୧୧୩୯୭ ଗାଁରେ ବକେୟା ଦେଇ ନ ଥିବା ଗ୍ରାହକଙ୍କ ବିଜୁଳି କଟାହେବ। ଏଥିପାଇଁ ୪୧୩ ସ୍କ୍ୱାଡ୍ ଗଠନ କରାଯାଇଛି। ଏହି ସ୍କ୍ୱାଡ୍ ରାଜ୍ୟର ୨୦ ଡିଭିଜନ, ୬୫ ସବ୍ ଡିଭିଜନ, ୨୪୭ ସେକ୍ସନ୍ ଏବଂ ୧୬୪୩ ରୁଟ୍ରେ ଡିସକନେକ୍ସନ୍ ଡ୍ରାଇଭ କରିବେ ବା ବକେୟା ଟଙ୍କା ଦେଇ ନ ଥିବା ଗ୍ରାହକଙ୍କ ବିଦ୍ୟୁତ ସଂଯୋଗ କାଟିବେ। ପ୍ରତିଦିନ ସ୍କ୍ୱାଡ୍ ୩-୪ ଗାଁ ବୁଲି ଲାଇନ୍ କାଟିବେ। ତେବେ ବିଦ୍ୟୁତ ବିଲ୍ ଆଦାୟ ପାଇଁ ପୂର୍ବରୁ ବିଜ୍ଞାପନ, ଲିଫଲେଟ୍, ମାଇକ୍ ଯୋଗେ ଲୋକଙ୍କୁ ଅବଗତ କରାଯାଉଛି।
ସେହିଭଳି ୫୯୬୫ ସରକାରୀ ଅନୁଷ୍ଠାନକୁ ମଧ୍ୟ ନୋଟିସ୍ ଜାରି କରାଯାଇଛି। ଯେଉଁ ଅନୁଷ୍ଠାନଗୁଡ଼ିକ ବିଦ୍ୟୁତ ବିଲ୍ ବକେୟା ରଖିଛନ୍ତି ସରକାରୀ ଅନୁଷ୍ଠାନଗୁଡ଼ିକରେ ଥିବା ବକେୟା ବିଦ୍ୟୁତ୍ ବିଲ୍ ୩୧ ମାର୍ଚ୍ଚ ସୁଦ୍ଧା ପୈଠ କରିବାକୁ ସରକାରଙ୍କ ପକ୍ଷରୁ ପ୍ରତିଶ୍ରୁତି ଦିଆଯାଇଛି। ଏପ୍ରିଲ ମାସରୁ ସମସ୍ତ ସରକାରୀ ଅନୁଷ୍ଠାନ ଗୁଡ଼ିକ ମାସିକିଆ ବିଦ୍ୟୁତ ବିଲ୍ ଦେବେ ବୋଲି ସରକାର ନିଷ୍ପତ୍ତି ନେଇଛନ୍ତି। ଏହାଛଡ଼ା ଯେଉଁ ଉପଭୋକ୍ତାଙ୍କର ୨୫ ହଜାର ଟଙ୍କାରୁ କମ୍ ବକେୟା ବିଦ୍ୟୁତ ବିଲ୍ ରହିଛି ସେମାନେ ୩୦ ପ୍ରତିଶତ ଟଙ୍କା ପୈଠ କଲେ ସେମାନଙ୍କୁ ୪ଟି କିସ୍ତିରେ ଟଙ୍କା ସୁଝିବାକୁ ସୁଯୋଗ ଦିଆଯିବ। ସେହିଭଳି ଯେଉଁ ଉପଭୋକ୍ତାଙ୍କର ୫୦ ହଜାର ଟଙ୍କାରୁ କମ୍ ବିଲ୍ ବକେୟା ରହିଛି ସେମାନେ ୩୦ ପ୍ରତିଶତ ବିଲ ଦେଇ ୬ଟି କିସ୍ତିରେ ଟଙ୍କା ସୁଝିବାର ସୁଯୋଗ ପାଇପାରିବେ। ବିଦ୍ୟୁତ୍ ଦେୟ ବାକି ରହିଥିବା ଉପଭୋକ୍ତାଙ୍କୁ ଜାନୁଆରୀ ୧୫ ତାରିଖ ପର୍ଯ୍ୟନ୍ତ ସମୟ ଦିଆଯାଇଛି। ଏନେଇ ସେମାନଙ୍କୁ ବାରମ୍ବାର ସୂଚନା ଦିଆଯାଇଥିବା କହିଛନ୍ତି ବୋଥ୍ରା। ମାତ୍ର ଏହାକୁ ନାପିନ୍ଦ କରିଛନ୍ତି ଉଭୟ କଂଗ୍ରେସ ଓ ବିଜେପି।
