ବଢ଼ିଲା ବସ୍‌ ଭଡ଼ା;ଲୋକେ ଅସନ୍ତୋଷ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ପୁଣି ବଢ଼ିଲା ବସ୍‌ ଭଡ଼ା । ଅଟୋମେଟିକ୍ ମେକାନିଜିମ୍‌ରେ ବଢ଼ିଲା ବସ୍ ଭଡ଼ା। ଅର୍ଡିନାରି ବସ୍ କିମି ପିଛା ୬୯ ପଇସା ଥିଲା । ହେଲା ୭୦ ପଇସା। ସେହିପରି ଏକ୍ସପ୍ରେସ୍ ବସ୍ ଭଡ଼ା ଥିଲା ୭୨ ପଇସା । ହେଲା ୭୩ ପଇସା। ଡିଲକ୍ସ ବସ୍ ଭଡ଼ା ଥିଲା ୯୯ ପଇସା ହେଲା ୧ ଟଙ୍କା ୧ ପଇସା। ଏସି ଡିଲକ୍ସ କିମି ପିଛି ଥିଲା ୧ ଟଙ୍କା ୨୧ ପଇସା ହେଲା ୧ ଟଙ୍କା ୨୩ ପଇସା ପୂର୍ବରୁ ଶେଷଥର ପାଇଁ ୨୦୧୯ ଜୁଲାଇ ୧୧ରେ ବୃଦ୍ଧି ପାଇଥିଲା। ପୂର୍ବରୁ  ଅର୍ଡିନାରି କିମି ପିଛା ୬୯ ପଇସାକୁ ବୃଦ୍ଧି ପାଇ ଥିଲା । ସେହିପରି ଏକ୍ସପ୍ରେସ୍ ବସ୍ ଭଡ଼ା ୭୨ ପଇସାକୁ ବୃଦ୍ଧି ପାଇଛି। ଡିଲକ୍ସ ୯୯ ପଇସାକୁ ବୃଦ୍ଧି ପାଇଛି। ଏସି ଡିଲକ୍ସ ୧ ଟଙ୍କା ୨୧ ପଇସାକୁ ବୃଦ୍ଧି ପାଇ ଥିଲା।

ମହୁ ଖାଆନ୍ତୁ, ଏସବୁ ସମସ୍ୟାରୁ ମୁକ୍ତି ପାଆନ୍ତୁ

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର): ସାଧାରଣତଃ ଶୀତ ଦିନେ ଅଧିକାଂଶ ଲୋକଙ୍କୁ ଥଣ୍ଡା ଓ କାଶ ଆଦି ହୋଇଥାଏ। ଯଦି ଆପଣ ବି ଏମିତି ସମସ୍ୟାରେ ପଡ଼ୁଛନ୍ତି, ତା’ହେଲେ ମହୁ ଖା’ନ୍ତୁ। କାରଣ ମହୁରେ ଥିବା ଔଷଧୀୟ ଗୁଣ ଥଣ୍ଡା ଓ କାଶ ଭଳି ସମସ୍ୟାରୁ ଆରାମ ଦିଏ। ତେବେ ଏଥିପାଇଁ ଏହାକୁ କେମିତି ଖାଇବାକୁ ହେବ, ତାହା ବି ଜାଣିବା ଜରୁରୀ। ତା’ହେଲେ ଆସନ୍ତୁ ଜାଣିବା ମହୁକୁ କେମିତି ଖାଇବେ। ଏହା ସହିତ ଆପଣ ଖାଉଥିବା ମହୁ ଅସଲି ନା ନକଲି କେମିତି ପରୀକ୍ଷା କରିବେ, ସେ ବିଷୟରେ ବି ଜାଣି ନିଅନ୍ତୁ।

୧. ଶୀତଦିନେ ଥଣ୍ଡା ଜିନିଷ ଖାଇଲେ ଗଳାରେ ଇନ୍‌ଫେକ୍ସନ୍‌ ହୋଇଥାଏ। ଏହି ସମୟରେ ହାଲ୍‌କା ଗରମ ପାଣିରେ ମହୁ ଓ ଲେମ୍ୱୁ ମିଶାଇ ପିଇଲେ, ଗଳା ଠିକ୍‌ ହୋଇଯାଏ।

୨. ଶୀତଦିନେ ଜର, ଥଣ୍ଡା, ନାକ ନଫିଟିବା ଓ କାଶକୁ ଠିକ୍‌ କରିବା ପାଇଁ ମହୁ ରାମବାଣ ପରି କାର୍ଯ୍ୟ କରିଥାଏ। ଏଥିପାଇଁ ଅଦାରସରେ ମହୁ ମିଶାଇ ପିଅନ୍ତୁ। ଏ ସବୁ ସମସ୍ୟା ଦୂର ହୋଇଯିବ।

୩. ମହୁକୁ ଚାଟି ଖାଇଲେ ମଧ୍ୟ ଥଣ୍ଡା ଓ କାଶ ଭଳି ସମସ୍ୟାରୁ ମୁକ୍ତି ପାଇପାରିବେ। ଦିନକୁ ଏହିପରି ଦୁଇରୁ ତିନିଥର ମହୁକୁ ଖାଇଲେ କାଶ ବନ୍ଦ ହୋଇଯାଏ। ଆପଣ ଚାହିଁଲେ ଡାଲଚିନି ପାଉଡର୍‌ରେ ବି ମହୁ ମିଶାଇ ଖାଇପାରିବେ। ଏହା ବି ବେଶ୍ ଫାଇଦା ଦେଇଥାଏ।

୪. ଗୋଟିଏ କପ୍‌ ଗରମ ପାଣିରେ ୧ ଚାମଚ ମହୁ ମିଶାଇ ପିଇଲେ ଦିନସାରା ଶରୀରକୁ ଏନର୍ଜି ମିଳିଥାଏ।

ମହୁ ଅସଲି ନା ନକଲି

ଯଦି ମହୁ ଅସଲି କିମ୍ୱା ନକଲି ଜାଣିବାକୁ ଚାହୁଁଛନ୍ତି, ତା’ହେଲେ ଗ୍ଲାସ୍‌ରେ ଅଳ୍ପ ପାଣି ନେଇ ସେଥିରେ ଟିକେ ଭିନେଗାର ପକାଇ ଗୋଳାଇ ଦିଅନ୍ତୁ। ତା’ପରେ ଏଥିରେ ମହୁ ପକାନ୍ତୁ। ଯଦି ମହୁ ପକାଇବା ପରେ ଏହି ମିଶ୍ରଣରୁ ଫେଣ ବାହାରିଲା, ତା’ହେଲେ ଜାଣିବେ ମହୁ ଶୁଦ୍ଧ ନୁହେଁ। ଏହା ଅପମିଶ୍ରିତ। ତେଣୁ ଉକ୍ତ ମହୁକୁ ବ୍ୟବହାର କରନ୍ତୁ ନାହିଁ।

ନିଦ ହେଉନି କି, ଖାଆନ୍ତୁ ଏହି ଫଳ

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର): ସମସ୍ତଙ୍କ ରୋଷେଇ ଘରେ ଜାଇଫଳ ଦେଖିବାକୁ ମିଳିଥାଏ। ଏହା କେବଳ ଖାଇବାକୁ ସ୍ୱାଦିଷ୍ଟ କରି ନଥାଏ, ଏଥିରେ ଔଷଧୀୟ ଗୁଣ ମଧ୍ୟ ରହିଛି। ତା’ହେଲେ ଆସନ୍ତୁ ଜାଣିବା ଜାଇଫଳରେ କେଉଁସବୁ ସ୍ୱାସ୍ଥ୍ୟ ଉପକାରୀ ଗୁଣ ରହିଛି।

୧. ଅନିଦ୍ରା ସମସ୍ୟା ବା ଇସୋମୋନିଆ ଦୂର କରିବା ପାଇଁ ଜାଇଫଳ ଲାଭଦାୟକ। ଏହି ରୋଗ ହେଲେ ରାତିରେ ନିଦ ହୁଏନି।  ଏଥିପାଇଁ ଦୈନନ୍ଦିନ ଭୋଜନରେ ଜାଇଫଳ ସାମିଲ କରନ୍ତୁ।

୨. ଜାଇଫଳରେ କ୍ୟାନସର୍‌ ପରି ରୋଗ ସହିତ ଲଢ଼ିବା ପାଇଁ ଶକ୍ତି ରହିଛି।

ଶୀତଦିନେ ନିହାତି ଖାଆନ୍ତୁ ଗ୍ରୀନ୍ ମଟର୍

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର): ସାଧାରଣତଃ ଶୀତ ଦିନେ ଗ୍ରୀନ୍ ମଟର ହୋଇଥାଏ। ଗ୍ରୀନ୍‌ ମଟର୍‌ ଖାଇବାକୁ ପ୍ରାୟ ସମସ୍ତେ ପସନ୍ଦ କରନ୍ତି। ଏହାକୁ ସବୁ ତରକାରିରେ ବ୍ୟବହାର କରି ହୁଏ। ଅନେକ ଲୋକ ଏହାକୁ କଞ୍ଚା ଖାଇବାକୁ ମଧ୍ୟ ପସନ୍ଦ କରନ୍ତି। ତେବେ ଏହା କେବଳ ପାଟିକୁ ସୁଆଦିଆ ଲାଗେ ନାହିଁ, ଏଥିରେ ଅନେକ ଭିଟାମିନ୍ ସହିତ ଔଷଧୀୟ ଗୁଣ ଭରି ରହିଥାଏ, ଯାହା ଶରୀର ପାଇଁ ବହୁତ ଭଲ। ତା’ହେଲେ ଆସନ୍ତୁ ଜାଣି ନେବା ଗ୍ରୀନ୍ ମଟର ଖାଇଲେ କେଉଁ କେଉଁ ଲାଭ ମିଳେ।

୧. ଶୀତଦିନେ ଖାଦ୍ୟ ଠିକ୍‌ ଭାବେ ହଜମ ହୁଏ ନାହିଁ। ଏହି ସମସ୍ୟାକୁ ଠିକ୍‌ କରିବାରେ ମଟର ସାହାଯ୍ୟ କରିଥାଏ। ଏଥିରେ ଥିବା ଫାଇବର୍‌ ଡାଇଜେଷ୍ଟିଭ୍‌ ସିଷ୍ଟମ୍‌କୁ ଠିକ୍‌ ରଖିଥାଏ। ଫଳରେ କୋଷ୍ଠକାଠିନ୍ୟ ସମସ୍ୟା ହୋଇନଥାଏ।

୨. ମଟରରେ ଅଧିକ ପରିମାଣରେ ଫାଇବର୍‌ ଓ ପ୍ରୋଟିନ୍‌ ଥିବାରୁ ଏହା ପେଟରେ ଅଧିକ ସମୟ ପର୍ଯ୍ୟନ୍ତ ରହିଥାଏ। ଫଳରେ ପେଟ ପୂରିଲା ପୂରିଲା ଲାଗେ ଓ ଭୋକ କମ୍‌ ହୋଇଥାଏ। ଭୋକ କମ୍‌ ହେଲେ ଖାଇବା କମ୍ ହୁଏ ଓ ଏହାଦ୍ୱାରା ଓଜନ ହ୍ରାସ ପାଏ।

୩. ମଟରରେ ମ୍ୟାଗ୍ନେସିୟମ୍‌, ପୋଟାସିୟମ୍‌ ଓ କ୍ୟାଲସିୟମ୍‌ ରହିଛି। ଏସବୁ ତତ୍ତ୍ୱ ହାଇ ବ୍ଲଡ୍‌ ପ୍ରେସର ଓ କୋଲେଷ୍ଟ୍ରଲ୍‌କୁ ନିୟନ୍ତ୍ରଣ କରିଥାଏ। ଫଳରେ ହାର୍ଟ ଆଟାକ୍‌ର ଆଶଙ୍କା କମ୍ ହୋଇଥାଏ।

୪. ମଟର ଡାଇବେଟିସ୍‌ ରୋଗୀଙ୍କ ପାଇଁ ମଧ୍ୟ ଭଲ।

୫. ମଟରରେ ପ୍ରଚୁର ମାତ୍ରାରେ ଆଇରନ୍‌ ରହିଛି। ଏହି ଆଇରନ୍‌ ଶରୀରରେ ଆଲର୍ଜିକୁ କମ୍‌ କରିଥାଏ ଏବଂ ଏନିମିଆ ସମସ୍ୟାକୁ ଦୂର କରିଥାଏ।

୬. ମଟରରେ ଥିବା ଭିଟାମିନ୍‌ ଓ ମିନେରାଲ୍ସ ରୋଗ ପ୍ରତିରୋଧକ ଶକ୍ତିକୁ ବଢ଼ାଇଥାଏ। ଫଳରେ ଶୀତଦିନେ ହେଉଥିବା ବିଭିନ୍ନ ରୋଗ ହେବାର ଆଶଙ୍କା କମ୍‌ ହୋଇଥାଏ।

୭. ମଟରରେ କାରୋଟେନୋଏଡ୍‌ ପିଗମେଣ୍ଟ ଲୁଟିନ୍‌ ନାମରେ ଏକ ତତ୍ତ୍ୱ ରହିଛି, ଯାହା ଆଖି ପାଇଁ ଭଲ। ଏହା ଦୃଷ୍ଟିଶକ୍ତିକୁ ଠିକ୍ ରଖେ।

ମହିଳା ଟି-୨୦ ଚ୍ୟାଲେଞ୍ଜର ଟ୍ରଫି: ଇଣ୍ଡିଆ-ବି’କୁ ଜିତାଇଲେ ସୁଶ୍ରୀ

ଏଥର ସମ୍ଭାଳ ବ୍ୟୁରୋ (ଭୁବନେଶ୍ବର): ଓଡ଼ିଆ ସ୍ପିନର ସୁଶ୍ରୀ ଦିବ୍ୟଦର୍ଶିନୀଙ୍କ ଦମଦାର ବୋଲିଂ ବଳରେ ଇଣ୍ଡିଆ-ବି ଏଠାରେ ଖେଳାଯାଇଥିବା ମହିଳା ଟି-୨୦ ଚ୍ୟାଲେଞ୍ଜର ଟ୍ରଫିର ଦ୍ୱିତୀୟ ମ୍ୟାଚରେ ଇଣ୍ଡିଆ-ସି’କୁ ୪ ରନରେ ପରାସ୍ତ କରିଛି। ବାରବାଟୀ ଷ୍ଟାଡିୟମରେ ଅନୁଷ୍ଠିତ ଏହି ମୁକାବିଲାରେ ସ୍ମୃତି ମନ୍ଧାନାଙ୍କ ନେତୃତ୍ୱାଧୀନ ଇଣ୍ଡିଆ-ବି’ ନିର୍ଦ୍ଧାରିତ ୨୦ ଓଭରରେ ୮ ୱିକେଟ୍ ହରାଇ ୯୪ ରନ୍ କରିଥିଲା। ଜବାବରେ ଇଣ୍ଡିଆ-ସି’ ୮ ୱିକେଟ୍ ହରାଇ ୯୦ ରନ୍ କରିବାକୁ ସକ୍ଷମ ହୋଇଥିଲା। ଦୁଇଦିନ ଧରି ଲଗାତାର ବର୍ଷା କାରଣରୁ ବାରବାଟୀ ପିଚ୍ ଧିମା ହୋଇଯାଇଥିଲା, ଯେଉଁଥିରେ ବଡ଼ ରନ୍ କରିବା କଷ୍ଟକର ହୋଇଥିଲା। ତେବେ ବୋଲରଙ୍କ ପାଇଁ ଅନୁକୂଳ ଏହି ପିଚରେ ଓଡ଼ିଶାର ସୁଶ୍ରୀ କମାଲ୍ କରିଛନ୍ତି। ସେ ୪ ଓଭରରେ ୧୫ ରନ୍ ଦେଇ ୩ଟି ୱିକେଟ୍ ଅକ୍ତିଆର କରିଛନ୍ତି।

ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଇଣ୍ଡିଆ-ବି’ର ତିନି ଶୀର୍ଷ ବ୍ୟାଟ୍ସଓମ୍ୟାନ୍ ଯଥା ଭେଲାସ୍ୱାମୀ ବନିତା (୧୧), କ୍ୟାପଟେନ୍ ମନ୍ଧାନା (୬) ଓ ଜେମିମା ରୋଡ୍ରିଗ୍ସ (୧) ନିରାଶ କରିଥିଲେ। ତେବେ ରିଚା ଘୋଷ ୨୫ (୨୬ ବଲ୍‌, ୫ ଚୌକା) ରନର ନିର୍ଣ୍ଣାୟକ ଇନିଂସ୍ ଖେଳି ଦଳର ସ୍କୋରକୁ ୯୪ ରନରେ ପହଞ୍ଚାଇଥିଲେ। ଅନ୍ୟମାନଙ୍କ ମଧ୍ୟରେ ଶିଖା ପାଣ୍ଡେ ୧୫, ଅନୁଜା ପାଟିଲ୍ ୧୧, ସୁଶ୍ରୀ ୮ ଓ ପୂଜା ବସ୍ତ୍ରାକର ୪ ରନ୍ କରିଥିଲେ। ତନୁଜା କନୱର ୭ ରନ୍ କରି ଅପରାଜିତ ଥିଲେ। ଇଣ୍ଡିଆ-ସି’ ପକ୍ଷରୁ ରାଜେଶ୍ୱରୀ ଗାଏକ୍ୱାଡ୍ ମାତ୍ର ୭ ରନ୍ ଦେଇ ୩ଟି ୱିକେଟ୍ ନେଇଥିବା ବେଳେ ମୋନିକା ଶର୍ମା, ଅରୁନ୍ଧତୀ ରେଡ୍ଡି ଓ ତନୁଶ୍ରୀ ସରକାର ଗୋଟିଏ ଲେଖାଏ ୱିକେଟ୍ ପାଇଥିଲେ।

୯୫ ରନର ସହଜ ଲକ୍ଷ୍ୟର ପିଛା କରୁଥିବା ଇଣ୍ଡିଆ-ସି’ ଏକ ସମୟରେ ୫୭ ରନରେ ୫ ୱିକେଟ୍ ହରାଇ ସଙ୍କଟରେ ପଡ଼ିଥିଲା। ତେବେ ଦୟାଲାନ୍ ହେମଲତା (୨୦) ଓ ତନୁଶ୍ରୀ ସରକାର (୧୮) ଭଲ ଖେଳି ଟିମକୁ ବିଜୟ ଅଭିମୁଖେ ନେଇଥିଲେ। ହେମଲତାଙ୍କୁ ଆଉଟ୍ କରି ଶିଖା ପାଣ୍ଡେ ମ୍ୟାଚକୁ ଭାରତ-ବି’ କବଜାରେ କରିଥିଲେ। ଶେଷ ଓଭରରେ ଇଣ୍ଡିଆ-ସି’କୁ ୯ ରନ୍ ଆବଶ୍ୟକ ଥିଲା ବେଳେ ଦଳ ମାତ୍ର ୪ ରନ୍ କରିବାକୁ ସକ୍ଷମ ହୋଇଥିଲା।

ଇଣ୍ଡିଆ-ବି’ର ସୁଶ୍ରୀ ଚମତ୍କାର ବୋଲିଂ କରି ପ୍ରତିପକ୍ଷ ଦଳର ମଧ୍ୟକ୍ରମରେ ଅଙ୍କୁଶ ଲଗାଇଥିଲେ। ସେ ଯଥାକ୍ରମେ ଇଣ୍ଡିଆ-ସି କ୍ୟାପଟେନ୍ ବେଦା କ୍ରିଷ୍ଣମୂର୍ତ୍ତୀ (୮), ଅରୁନ୍ଧତୀ (୨) ଓ ବୃଶାଲି ଭଗତ (୮)ଙ୍କୁ ଆଉଟ୍ କରିଥିଲେ। ଇଣ୍ଡିଆ-ବି’ର ଅନ୍ୟ ବୋଲରଙ୍କ ମଧ୍ୟରେ ଶିଖା, ଅନୁଜା ଓ ତନୁଜା ଗୋଟିଏ ଲେଖାଏ ୱିକେଟ୍ ନେଇଥିଲେ।

ସୂଚନାଯୋଗ୍ୟ, ବର୍ଷା ଓ ଖରାପ ଆଲୋକ ଯୋଗୁ ଶନିବାର ଇଣ୍ଡିଆ-ଏ ଓ ଇଣ୍ଡିଆ-ବି ମଧ୍ୟରେ ଖେଳାଯିବାକୁଥିବା ପ୍ରଥମ ମ୍ୟାଚ୍ ବାତିଲ ହୋଇଥିଲା। ଉଭୟ ଦଳ ୨ ପଏଣ୍ଟ ଲେଖାଏ ବାଣ୍ଟିଛନ୍ତି। ଆସନ୍ତାକାଲିର ମ୍ୟାଚ୍ ଇଣ୍ଡିଆ-ସି’ ଓ ଇଣ୍ଡିଆ-ଏ ମଧ୍ୟରେ ଖେଳାଯିବ।

ରଣଜୀ ଟ୍ରଫି: ମିଲିନ୍ଦଙ୍କ ଶତକ, ୨୮୮/୬ରେ ତ୍ରିପୁରାର ଇନିଂସ୍ ଘୋଷଣା

ଏଥର ସମ୍ଭାଳ ବ୍ୟୁରୋ (ଭୂବନେଶ୍ଵର) – ଦୁଇଦିନର ଖେଳ ବାତିଲ ହେବା ପରେ ଓଡ଼ିଶା ଓ ତ୍ରିପୁରା ରଣଜୀ ମ୍ୟାଚର ତୃତୀୟ ଦିବସ ଖେଳ ସମ୍ଭବ ହୋଇଛି। ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ତ୍ରିପୁରା ମିଲିନ୍ଦ କୁମାରଙ୍କ ଅପରାଜିତ ଶତକ ବଳରେ ୮୨ ଓଭରରେ ୬ ୱିକେଟ୍ ହରାଇ ୨୮୮ ରନ୍ କରି ପ୍ରଥମ ଇନିଂସ୍ ଘୋଷଣା କରିଛି। ମିଲିନ୍ଦ ୧୦୫ (୧୫୨ ବଲ୍‌, ୧୫ ଚୌକା, ୨ ଛକା) ରନ୍ କରି ଅପରାଜିତ ଥିବା ବେଳେ ମଣିଶଙ୍କର ମୁରାସିଂହ ଦ୍ରୁତ ୭୨ (୮୦ ବଲ୍‌, ୧୨ ଚୌକା, ୧ ଛକା) ଓ ସମ୍ରାଟ୍ ସିଙ୍ଘା ୬୫ ରନ୍ କରି ଆଉଟ୍ ହୋଇଛନ୍ତି।

ଓଡ଼ିଶାର ସଫଳ ବୋଲର ଭାବେ ରାଜେଶ ମହାନ୍ତି ୩ଟି ୱିକେଟ୍ ନେଇଛନ୍ତି। ଜବାବରେ ଓଡ଼ିଶା ଦିବସର ଖେଳ ଶେଷ ସୁଦ୍ଧା ବିନା ୱିକେଟ୍ ହରାଇ ୫ ରନ୍ କରିଛି। ଗୋବିନ୍ଦ ପୋଦ୍ଦାର ୪ ଓ ଶାନ୍ତନୁ ମିଶ୍ର ୧ ରନ୍ କରି ଅପରାଜିତ ରହିଛନ୍ତି। ସୋମବାର ଚତୁର୍ଥ ତଥା ଅନ୍ତିମ ଦିବସରେ ଓଡ଼ିଶା ତ୍ରିପୁରାଠାରୁ ଗୋଟିଏ ରନ୍ ଅଧିକ କରି ଇନିଂସ୍ ଅଗ୍ରଣୀ ହାସଲ କରିବାକୁ ଚାହିଁବ।

ରବିବାର ସକାଳେ ଓଡ଼ିଶା କ୍ୟାପଟେନ୍ ଶୁଭ୍ରାଂଶୁ ସେନାପତି ଟସ୍ ଜିତି ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲେ। ତ୍ରିପୁରା ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଓପ୍ନର ବିକ୍ରମକୁମାର ଦାସ (୫) ଓ ତନ୍ମୟ ମିଶ୍ର (୪)ଙ୍କୁ ରାଜେଶ ମହାନ୍ତି ପ୍ୟାଭିଲିୟନ୍ ପଠାଇଥିବା ବେଳେ କମଲ ଦାସ ୨୦ ରନରେ ପପୁ ରୟଙ୍କ ଶିକାର ହୋଇଥିଲେ। ୬୫ ରନରେ ୩ ୱିକେଟ୍ ହରାଇ ତ୍ରିପୁରା ସଙ୍କଟରେ ପଡ଼ିଥିଲା ବେଳେ ସମ୍ରାଟ୍ ଓ ମିଲିନ୍ଦ ସ୍ଥିତି ସମ୍ଭାଳିଥିଲେ। ଦୁହେଁ ଚତୁର୍ଥ ୱିକେଟ୍ ପାଇଁ ୯୨ ରନର ଭାଗୀଦାରୀ କରିଥିଲେ।

ସମ୍ରାଟଙ୍କ ଲଢ଼ୁଆ ଇନିଂସରେ ବ୍ରେକ୍ ଲଗାଇଥିଲେ ଭେଟେରାନ୍ ବସନ୍ତ ମହାନ୍ତି। ତାଙ୍କ ସ୍ଥାନ ପୂରଣ କରିବାକୁ ଆସିଥିବା ରଜତ ଦେ(୪)ଙ୍କୁ ଗୋବିନ୍ଦ ପୋଦ୍ଦାର ନିଜର ଶିକାର ବନାଇଥିଲେ। ଏହା ପରେ ମିଲିନ୍ଦ ଓ ମଣିଶଙ୍କର ସକାରାତ୍ମକ ବ୍ୟାଟିଂ କରିଥିଲେ ଏବଂ ଷଷ୍ଠ ୱିକେଟ୍ ପାଇଁ ୧୨୬ ରନ୍ ଯୋଡ଼ି ଟିମକୁ ମଜଭୁତ୍ ସ୍କୋରରେ ପହଞ୍ଚାଇଥିଲେ। ମଣିଶଙ୍କରଙ୍କୁ ରାଜେଶ ଆଉଟ୍ କରିଥିଲେ ଏବଂ ଏହା ପରେ କ୍ୟାପଟେନ୍ ମିଲିନ୍ସ ଇନିଂସ୍ ଘୋଷଣା କରିଥିଲେ। ଓଡ଼ିଶା ପକ୍ଷରୁ ବସନ୍ତ, ପପୁ ଓ ଗୋବିନ୍ଦ ଗୋଟିଏ ଲେଖାଏ ୱିକେଟ୍ ହାସଲ କରିଥିଲେ। ସୂଚନାଯୋଗ୍ୟ, ବର୍ଷା ଯୋଗୁ ମ୍ୟାଚର ପ୍ରଥମ ଦୁଇଦିନ ଖେଳରେ ଟସ୍ ପଡ଼ିପାରି ନଥିଲା।

ଚତୁଃରାଷ୍ଟ୍ରୀୟ ଯୁବ ଦିନିକିଆ ରେ ଭାରତର କ୍ରମାଗତ ଦ୍ୱିତୀୟ ବିଜୟ ।

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ)-ଭାରତୀୟ ଅଣ୍ଡର୍‌-୧୯ କ୍ରିକେଟ୍ ଟିମ୍ ଦକ୍ଷିଣ ଆଫ୍ରିକାରେ ଚାଲିଥିବା ଚତୁଃରାଷ୍ଟ୍ରୀୟ ଯୁବ ଦିନିକିଆ ଟୁର୍ଣ୍ଣାମେଣ୍ଟରେ କ୍ରମାଗତ ଦ୍ୱିତୀୟ ବିଜୟ ସହ ଫାଇନାଲରେ ସ୍ଥାନ ସୁନିଶ୍ଚିତ କରିଛି। ରବିବାର ଭାରତ ତା’ର ଦ୍ୱିତୀୟ ମୁକାବିଲାରେ ଜିମ୍ବାୱେକୁ ୮୯ ରନର ବଡ଼ ବ୍ୟବଧାନରେ ପରାସ୍ତ କରିଛି। ଏହା ପୂର୍ବରୁ ଭାରତ ପ୍ରଥମ ମ୍ୟାଚରେ ଆୟୋଜକ ଦଳକୁ ୬୬ ରନରେ ହରାଇଥିଲା।

ଆଜି ଖେଳାଯାଇଥିବା ମ୍ୟାଚରେ ଭାରତ ପ୍ରଥମେ ବ୍ୟାଟିଂ କରି ଓପ୍ନର ଦିବ୍ୟାଂଶ ସାକ୍ସେନାଙ୍କ ଅପରାଜିତ ଶତକ ବଳରେ ନିର୍ଦ୍ଧାରିତ ୫୦ ଓଭରରେ ୫ ୱିକେଟ୍ ହରାଇ ୩୦୫ ରନ୍ କରିଛି। ଜବାବରେ ଜିମ୍ବାୱେ ୪୯.୫ ଓଭରରେ ସମସ୍ତ ୱିକେଟ୍ ହରାଇ ୨୧୨ ରନ୍ କରିବାକୁ ସକ୍ଷମ ହୋଇଛି। ଭାରୀତୀୟ ଓପ୍ନର ଦିବ୍ୟାଂଶ ୧୩୭ ବଲରେ ୧୧ ଚୌକା ଓ ୧ ଛକା ସହ ଅପରାଜିତ ୧୨୮ ରନ୍ କରି ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି। ତାଙ୍କ ସହ ଓପନ୍ କରିଥିବା ଯଶସ୍ୱୀ ଜୈସୱାଲ୍ ୭୮ (୮୬ ବଲ୍‌, ୫ ଚୌକା, ୨ ଛକା) ରନ୍ କରିଛନ୍ତି।

ଉଭୟେ ଯଶସ୍ୱୀ ଓ ଦିବ୍ୟାଂଶ ପ୍ରଥମ ୱିକେଟ୍ ପାଇଁ ୧୪୩ ରନର ଭାଗୀଦାରୀ କରିଥିଲେ। ମଧ୍ୟକ୍ରମରେ କୁମାର କୁଶାଗ୍ର ୪୭ (୫୧ ବଲ୍‌, ୨ ଚୌକା), ତିଳକ ବର୍ମା ୧୦, ଶାଶ୍ୱତ ରାୱତ୍ ୧୬ ଓ ଶୁଭାଙ୍ଗ ହେଗଡେ ୯ ରନ୍ କରିଥିଲେ। ଜିମ୍ବାୱେ କ୍ୟାପଟେନ୍ ଡିଅନ୍ ମେୟର୍ସ ସର୍ବାଧିକ ୮୩ (୧୦୮ ବଲ୍‌, ୯ ଚୌକା, ୧ ଛକା) ରନ୍ କରିଥିବା ବେଳେ ୱେସଲୀ ମାଢିଭିୟର୍ ୪୨ ଓ ତୌରାୟୀ ତୁଗୱେଟେ ୨୬ ରନ୍ କରି ଆଉଟ୍ ହୋଇଥିଲେ। ବୋଲିଂରେ ଭାରତ ପକ୍ଷରୁ ସୁଶାନ୍ତ ମିଶ୍ର ଓ ହେଗଡେ ୩ଟି ଲେଖାଏ ୱିକେଟ୍ ହାସଲ କରିଥିଲେ। ସେହିପରି ତିଳକ ବର୍ମା ୨ଟି, ବିଦ୍ୟାଧର ପାଟିଲ୍ ଓ ରବି ବିଷ୍ଣୋଇ ଗୋଟିଏ ଲେଖାଏ ୱିକେଟ୍ ନେଇଥିଲେ।

ଭାରତ-ଶ୍ରୀଲଙ୍କା ପ୍ରଥମ ଟି-୨୦ ବର୍ଷା ଧୋଇ ଦେଲା

ଏଥର ସମ୍ଭାଳ ବ୍ୟୁରୋ (ଭୂବନେଶ୍ବର) – ଭାରତ ଓ ଶ୍ରୀଲଙ୍କା ମଧ୍ୟରେ ତିନିମ୍ୟାଚ୍ ବିଶିଷ୍ଟ ଟି-୨୦ ସିରିଜର ପ୍ରଥମ ମୁକାବିଲା ବର୍ଷା କାରଣରୁ ବାତିଲ ହୋଇଛି। ରବିବାର ଏଠାକାର ବର୍ଷାପଡ଼ା କ୍ରିକେଟ୍ ଷ୍ଟାଡିୟମରେ ଟସ୍ ପରେ ଗୋଟିଏ ବି ବଲ୍ ପଡ଼ିବା ପୂର୍ବରୁ ମ୍ୟାଚକୁ ବାତିଲ କରିଦିଆଯାଇଛି। ଟସ୍ ପରେ ଲଗାତର ବର୍ଷା କାରଣରୁ ମ୍ୟାଚ୍ ଆରମ୍ଭ ହୋଇପାରିନଥିଲା। ବର୍ଷା ବନ୍ଦ ହେବା ସତ୍ତ୍ୱେ ଆଉଟ୍ ଫିଲ୍ଡ ଓ ପିଚ୍ ଓଦା ରହିବା କାରଣରୁ ଅମ୍ପାୟାର ଶେଷରେ ମ୍ୟାଚକୁ ବାତିଲ କରିବାକୁ ନିଷ୍ପତ୍ତି ନେଇଛନ୍ତି। ମ୍ୟାଚ୍ ବାତିଲ୍ ହେବା ଦ୍ୱାରା ଷ୍ଟାଡିୟମରେ ଉପସ୍ଥିତ ହଜାର ହଜାର ସଂଖ୍ୟକ ଦର୍ଶକଙ୍କୁ ନିରାଶ ହେବାକୁ ପଡ଼ିଛି। ଏଥିସହ ନୂଆ ବର୍ଷରେ ଟିମ୍ ଇଣ୍ଡିଆ ମଧ୍ୟ ତା’ର ପ୍ରଥମ ମ୍ୟାଚ୍ ଖେଳିବାରୁ ବଞ୍ଚିତ ହୋଇଛି।

ମ୍ୟାଚ୍ ପାଇଁ ଟସ୍ ନିର୍ଦ୍ଧାରିତ ସମୟରେ ପଡ଼ିଥିଲା, କିନ୍‌ତୁ ମ୍ୟାଚ୍ ଆରମ୍ଭ ହେବାର ଠିକ୍ ପୂର୍ବରୁ ବର୍ଷା ବାଧା ଦେଇଥିଲା। ପ୍ରାୟ ୮ଟା ବେଳେ ବର୍ଷା ବନ୍ଦ ହୋଇଥିଲା, କିନ୍ତୁ ପିଚ୍ ଓଦା ରହିବା କାରଣରୁ ଇନ୍ସପେକ୍ସନ୍ ଟାଇମ୍ ରାତି ୯ଟାକୁ ରଖାଯାଇଥିଲା। ସାଢ଼େ ୯ଟା ବେଳେ ଅମ୍ପାୟାର ପୁଣିଥରେ ମ୍ୟାଚ୍ ଇନ୍ସପେକ୍ସନ୍ କରିଥିଲେ। ଏହା ପରେ ୫ ଓଭର ବିଶିଷ୍ଟ ମ୍ୟାଚ୍ ପାଇଁ କଟ୍ ଅଫ୍ ଟାଇମ୍ ରାତି ୯.୪୬ ଧାର୍ଯ୍ୟ ହୋଇଥିଲା, କିନ୍ତୁ ଏହି ସମୟରେ ମଧ୍ୟ ପିଚ୍ ଖେଳ ପାଇଁ ଉପଯୋଗ ହୋଇନଥିଲା। ଯାହା ପରେ ଅମ୍ପାୟାର ମ୍ୟାଚ୍ ନକରାଇବା ପାଇଁ ନିଷ୍ପତ୍ତି ନେଇଥିଲେ।

ଏହା ପୂର୍ବରୁ ଟିମ୍ ଇଣ୍ଡିଆ କ୍ୟାପଟେନ୍ ବିରାଟ୍ କୋହଲି ବର୍ଷର ପ୍ରଥମ ମ୍ୟାଚରେ ଟସ୍ ଜିତି ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲେ। ଏହି ମ୍ୟାଚରେ ସମସ୍ତଙ୍କ ନଜର ଶିଖର ଧୱନ୍ ଓ ଯଶପ୍ରୀତ ବୁମ୍ରାଙ୍କ ଉପରେ ରହିଥିଲା। ବୁମ୍ରା ଏହି ମ୍ୟାଚ୍ ଜରିଆରେ ଦୀର୍ଘ ୫ମାସ ପରେ ଜାତୀୟ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି। ସେହିପରି ଆହତ କାରଣରୁ ପ୍ରାୟ ଦୁଇମାସ ପରେ ଧୱନ୍ ଦଳକୁ ଫେରିଛନ୍ତି। ଏହି ମ୍ୟାଚରେ କୋହଲି ଚୂଡ଼ାନ୍ତ ଏକାଦଶରେ କିଛି ପରିବର୍ତ୍ତନ କରିଥିଲେ। ଅଲରାଉଣ୍ଡର ରବୀନ୍ଦ୍ର ଜାଡେଜା, ମନିଷ ପାଣ୍ଡେ, ୟୁଜବେନ୍ଦ୍ର ଚହଲ୍ ଓ ସଞ୍ଜୁ ସାମସନ୍ ଚୂଡ଼ାନ୍ତ ଏକାଦଶରେ ସ୍ଥାନ ପାଇନଥିଲେ। ସିରିଜର ଦ୍ୱିତୀୟ ମ୍ୟାଚ୍ ଆସନ୍ତା ୭ ତାରିଖରେ ଇନ୍ଦୋରରେ ଖେଳାଯିବ।

ଉଦ୍ଧବ ସରକାରରେ ବିଭାଗ ବଣ୍ଟନ, ବଡ଼ ବିଭାଗ ଏନସିପି-କଂଗ୍ରେସ ହାତରେ

ଏଥର ସମ୍ଭାଳ ବ୍ୟୁରୋ (ମୁମ୍ୱାଇ): ମହାରାଷ୍ଟ୍ରରେ ମନ୍ତ୍ରିମାନଙ୍କ ବିଭାଗ ବଣ୍ଟନକୁ ନେଇ ଚାଲିଥିବା ଆଲୋଚନାର ଆଜି ପୂର୍ଣ୍ଣଛେଦ ପଡ଼ିଛି। ରାଜ୍ୟପାଳ ଭଗତ ସିଂହ କେଶିଆରୀ ବିଭାଗ ବଣ୍ଟନକୁ ଅନୁମୋଦନ ଦେଇଛନ୍ତି। ତେବେ ବିଭାଗ ବଣ୍ଟନକୁ ନେଇ ଶିବସେନାରେ ଅସନ୍ତୋଷ ଦେଖିବାକୁ ମିଳିଛି। ଶିବସେନାର ଅନେକ ବରିଷ୍ଠ ନେତା ଏହି ବିଭାଗ ବଣ୍ଟନକୁ ନେଇ ଅସନ୍ତୋଷ ପ୍ରକାଶ କରିଛନ୍ତି। ଶିବସେନାର ଅସନ୍ତୋଷ ବିଧାୟକ କହିଛନ୍ତି, ଦଳୀୟ ବିଧାୟକମାନଙ୍କ ଅପେକ୍ଷା ଏନସିପି ଓ କଂଗ୍ରେସ ବିଧାୟକ ବଡ଼ ବଡ଼ ପଦବୀ ପାଇଛନ୍ତି।

ମୁଖ୍ୟମନ୍ତ୍ରୀଙ୍କୁ ମିଶାଇ ମୋଟ୍ ୪୩ ଜଣ ଉଦ୍ଧବ ସରକାରରେ ମନ୍ତ୍ରୀ ରହିଛନ୍ତି। ଯେଉଁଥିରେ ୩୩ ଜଣ କ୍ୟାବିନେଟ ମନ୍ତ୍ରୀ ରହିଥିବାବେଳେ ୧୦ ଜଣ ରାଜ୍ୟ ମନ୍ତ୍ରୀ ରହିଛନ୍ତି। ମୁଖ୍ୟମନ୍ତ୍ରୀ ଉଦ୍ଧବ ଠାକେରଙ୍କ ପାଖରେ ସାଧାରଣ ପ୍ରଶାସନ, ସୂଚନା ଓ ଲୋକସମ୍ପର୍କ, ଆଇନ ଏବଂ ବଣ୍ଟା ହୋଇନଥିବା ବିଭାଗ ରହିଛି।

ଏହାବାଦ୍ ଏନସିପି ପାଖରେ ଉପମୁଖ୍ୟମନ୍ତ୍ରୀ ପଦବୀ ସହିତ ଗୃହ ମନ୍ତ୍ରଣାଳୟ, ଅର୍ଥ, ଜଳସେଚନ, ପରିବହନ, ଖାଦ୍ୟ, ସଂଖ୍ୟାଲଘୁ ଏବଂ ସାମାଜିକ ନ୍ୟାୟ ବିଭାଗ ପ୍ରମୁଖ ରହିଛି। ଉପମୁଖ୍ୟମନ୍ତ୍ରୀ ତଥା ଏନସିପି ବିଧାୟକ ଅଜିତ ପାଓ୍ୱାରଙ୍କ ପାଖରେ ଅର୍ଥମନ୍ତ୍ରଣାଳୟ ଏବଂ ଯୋଜନା କମିଶନ ରହିଛି। ସେହିପରି ଏନସିପି ବିଧାୟକ ଅନୀଲ ଦେଶମୁଖଙ୍କ ପାଖରେ ଗୃହ ମନ୍ତ୍ରଣାଳୟ ରହିଛି। ଛଗନ ଭୂଜବଳଙ୍କ ପାଖରେ ଖାଦ୍ୟ ଏବଂ ସାମାଜିକ ନ୍ୟାୟ ବିଭାଗ ରହିଛି।

ଶିବସେନା ପାଖରେ ମୋଟ ୧୫ଟି ବିଭାଗ ରହିଛି। ଯେଉଁଥିରେ ଶିଳ୍ପ, ଖଣି ଏବଂ ମରାଠୀ ଭାଷା ଭଳି ବିଭାଗ ରିହଛି। ସବାଷ ଦେଶାଈଙ୍କ ପାଖରେ ନଗର ଉନ୍ନୟନ ବିଭାଗ ରହିଥିବାବେଳେ ଏକନାଥ ସିନ୍ଧେଙ୍କ ପାଖରେ ପରିବବନ ଏବଂ ସଂସଦୀୟ ବ୍ୟାପାର ବିଭାଗ ରହିଛି। ଉଦ୍ଧବଙ୍କ ପୁଅ ଆଦିତ୍ୟ ଠାକରେଙ୍କ ପାଖରେ ପର୍ଯ୍ୟଟନ ବିଭାଗ ରହିଛି। ମହାବିକାଶ ଅଘାଡ଼ି ମେଣ୍ଟରେ ସାମିଲ ଥିବା ଅନ୍ୟତମ ଦଳ କଂଗ୍ରେସ ପାଖରେ ରାଜସ୍ୱ, ପିଡବଲ୍ୟୁଡି ଏବଂ ସ୍ୱାସ୍ଥ୍ୟ ମନ୍ତ୍ରଣାଳୟ ରହିଛି।

ମହାକାଳପଡ଼ାରେ ସିଏଏ ପାଇଁ ସମାବେଶ, ବିରୋଧୀ ର ଅପପ୍ରଚାର ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ବର): ନାଗରିକତା ସଂଶୋଧନ ଆଇନ(ସିଏଏ)କୁ ନେଇ ଦେଶବ୍ୟାପୀ ଉତ୍ତେଜନା ଲାଗି ରହିଥିବାବେଳେ ବିଜେପି ପକ୍ଷରୁ ସଚେତନତା କାର୍ଯ୍ୟକ୍ରମ ଆରମ୍ଭ ହୋଇଛି। ଆଜି କେନ୍ଦ୍ରାପଡ଼ା ଜିଲ୍ଲାର ଶରଣାର୍ଥୀ ବହୁଳ ମହାକାଳପଡ଼ାଠାରେ ବିଜେପି ଏକ ବିଶାଳ ସମାବେଶ କରି ବିରୋଧୀ ଦଳଗୁଡ଼ିକ ଦ୍ୱାରା ଯେଉଁ ଗୁଜବ ପ୍ରଚାର ଚାଲିଛି ସେଥିରେ କୌଣସି ସତ୍ୟତା ନାହିଁ ବୋଲି କହିଛି। ସଂଖ୍ୟାଲଘୁ ବର୍ଗର ଶରଣାର୍ଥୀଙ୍କୁ ନାଗରିକତ୍ୱ ପ୍ରଦାନ କରିବା ସିଏଏର ମୁଖ୍ୟ ଲକ୍ଷ୍ୟ ବୋଲି ମହାକାଳପଡ଼ାରେ କେନ୍ଦ୍ର ରାଷ୍ଟ୍ରମନ୍ତ୍ରୀ ଫଗନ ସିଂ କୁଲସ୍ତେ କହିଛନ୍ତି। ଏପଟେ ପୁରୀଠାରେ ବରିଷ୍ଠ ବିଜେପି ନେତା ରାଜୀବ ପ୍ରତାପ ରୁଡ଼ି ମଧ୍ୟ ସିଏଏ ସମର୍ଥନରେ ଲୋକଙ୍କ ମଧ୍ୟରେ ସଚେତନତା କାର୍ଯ୍ୟକ୍ରମରେ ସାମିଲ ହୋଇଥିଲେ।

ଆଜି ମହାକାଳପଡ଼ାଠାରେ ଆୟୋଜିତ ସମାବେଶକୁ ସମ୍ବୋଧିତ କରି କେନ୍ଦ୍ରମନ୍ତ୍ରୀ ଶ୍ରୀ କୁଲସ୍ତେ କହିଛନ୍ତି ଯେ, ସିଏଏ ହେଉଛି ନାଗରିକତ୍ୱ ଦେବା ଆଇନ। କାହାରି ନାଗରିକତ୍ୱ ଛଡ଼ାଇବାର ଆଇନ ନୁହେଁ। ଭାରତ ବିଭାଜନ ପରେ ନିଜ ନିଜ ଦେଶର ସଂଖ୍ୟାଲଘୁଙ୍କ ସୁରକ୍ଷା ପାଇଁ ନେହରୁ- ଲିଆକତଙ୍କ ମଧ୍ୟରେ ଏକ ଚୁକ୍ତି ହୋଇଥିଲା। ସେହି ଚୁକ୍ତି ଆଧାରରେ ଭାରତ ସରକାର ୨୦୧୪ ଡିସେମ୍ବର ୩୧ ତାରିଖ ସୁଦ୍ଧା ଧାର୍ମିକ ଉତ୍ପୀଡ଼ନର ଶିକାର ହୋଇ ପାକିସ୍ତାନ, ଆଫଗାନିସ୍ତାନ ଏବଂ ବାଂଲାଦେଶରୁ ଆସିଥିବା ହିନ୍ଦୁ, ଶିଖ, ବୌଦ୍ଧ, ଜୈନ, ଇସାଇ ଏବଂ ପାର୍ସୀ ଶରଣାର୍ଥୀଙ୍କୁ ସିଏଏ ମାଧ୍ୟମରେ ନାଗରିକତା ପ୍ରଦାନ କରିବେ।

ଭାରତରେ ବସବାସ କରୁଥିବା ଶରଣାର୍ଥୀମାନଙ୍କୁ ସେମାନଙ୍କର ଅଧିକାର ଦେବା ପାଇଁ ଏହି ଆଇନ କାର୍ଯ୍ୟ କରିବ। ଓଡ଼ିଶାର ଯେତେ ସଂଖ୍ୟାଲଘୁ ଶରଣାର୍ଥୀ ଅଛନ୍ତି ସମସ୍ତଙ୍କୁ ସମସ୍ତ ଅଧିକାର ସ୍ଥାୟୀ ଭାବେ ପ୍ରଦାନ କରାଯିବ। ଶ୍ରୀ କୁଲସ୍ତେ ବିରୋଧୀ ଦଳଗୁଡ଼ିକର ଗୁଜବ ଓ ଅପପ୍ରଚାରକୁ ବିଶ୍ୱାସ ନକରିବା ପାଇଁ କହିଛନ୍ତି। ଏହି ଗସ୍ତ ସମୟରେ କେନ୍ଦ୍ରମନ୍ତ୍ରୀ ଶ୍ରୀ କୁଲସ୍ତେ ମହାକାଳପଡ଼ାର ୨ଟି ଶରଣାର୍ଥୀ ପରିବାର ନିକଟକୁ ଯାଇ ଏହି ଆଇନ ସଂପର୍କରେ ସଚେତନ କରାଇଥିଲେ।

ସୂଚନାଯୋଗ୍ୟ ବିଜେପି ଆସନ୍ତା ୧୫ଦିନ ମଧ୍ୟରେ ରାଜ୍ୟର ପ୍ରାୟ ଏକ କୋଟି ପରିବାର ପାଖକୁ ଯାଇ ସିଏଏ ସମ୍ପର୍କରେ ସଚେତନତା ସୃଷ୍ଟି କରିବ।