ଗଜପତି ଜିଲ୍ଲା ଏସ୍.ପି ସାରା ଶର୍ମା ଙ୍କ ଫିଟନେସ ମନ୍ତ୍ର ; ସାରା ଙ୍କ ଏଭଳି କାର୍ଯ୍ୟକୁ ସାଧାରଣ ରେ ଭୂୟସୀ ପ୍ରଶଂସା…!
!!! ଗଜପତି ଜିଲ୍ଲା ରୁ ପାରଳାଖେମୁଣ୍ଡି ଟାଉନ ପ୍ରତିନିଧି ଅନିତା କୁମାରୀ ଅଧିକାରୀ ଙ୍କ ରିପୋର୍ଟ୍ !!!
ଏଥର ସମ୍ଭାଳ (ପାରଳାଖେମୁଣ୍ଡି) – କରିବାକୁ ଚାହିଁଲେ ଅନେକ କିଛି କରିହେବ | ପାଖରେ ଥିବା ଜ୍ଞାନକୁ ବାଣ୍ଟି ହେବ | ଲୋକଙ୍କ ପାଇଁ କିଛି କରିହେବ | ସେଥିପାଇଁ ଦରକାର ଇଛା ଶକ୍ତି | ଆଉ ଭାରତୀୟ ପ୍ରଶାସନିକ ସେବାରେ କାର୍ଯ୍ୟ କରିବାର ସୁଯୋଗ ଓ କ୍ଷମତା ବି ଅପର୍ଯ୍ୟାପ୍ତ | ଶୀତତାପ ନିୟନ୍ତ୍ରିତ କୋଠରୀ ଭିତରେ ରହି, ଶୀତତାପ ନିୟନ୍ତ୍ରିତ ଗାଡ଼ିରେ ବୁଲି ଅନେକ କାମ କରୁଛନ୍ତି | ଏଥିରେ କିଛି ଅସୁବିଧା ନାହିଁ କି କାହାର କିଛି କହିବାର ବି ନାହିଁ | ହେଲେ ଟିକେ ଆଖି ଖୋଲି ଦେଲେ, ହୃଦୟକୁ ପରିବ୍ୟାପ୍ତ କରିଦେଲେ, ଶୀତତାପ ନିୟନ୍ତ୍ରିତ କୋଠରୀ ଓ ଗାଡି ଭିତରୁ ବାହାରି ଲୋକଙ୍କ ଭିତରେ ପଶିଗଲେ, ଲୋକଙ୍କ ସମସ୍ୟା ଅସୁବିଧା ଭିତରେ ସାମାନ୍ୟ ମୁଣ୍ଡ ପୁରାଇଦେଲେ, ଅନେକ ଅନେକ କିଛି କାମ ଜଣେ କରିପାରିବ | ଯେଉଁଥିରେ ସମାଜ ହେବ ଉପକୃତ ଓ ନିଜକୁ ମିଳିବ ଆତ୍ମତୃପ୍ତି | ଆଉ ଖାସ କରି ପୋଲିସ ଭଳି ପେଶାରେ ଏପରି କରୁଥିବା ଅଧିକାରୀଙ୍କୁ ମିଳିଥାଏ ଲୋକଙ୍କ ଭଲପାଇବା ଓ ବଢେ ଗ୍ରହଣୀୟତା | ସେମିତି ଜଣେ ପୋଲିସ ଅଫିସର ହେଲେ ସାରା ଶର୍ମା, ନିଜ ନିଆରା ପଦକ୍ଷେପ ପାଇଁ ଗଜପତି ଜିଲ୍ଲା ବାସୀଙ୍କ ହୃଦୟରେ ସ୍ୱତନ୍ତ୍ର ସ୍ଥାନ ହାସଲ କରିଥିବା ଜିଲ୍ଲାର ଏସପି ସାରା ଶର୍ମା | ସେ ମହିଳାଙ୍କ ସୁରକ୍ଷା କଥା ହେଉ, ଯୁବକ ଯୁବତୀମାନଂକ ଦକ୍ଷତା ବୃଦ୍ଧି ପାଇଁ ହେଉ, ଭୋକିଲା ଲୋକଙ୍କ ପେଟର ବୁଝିବା ହେଉ ବା ଗଜପତି ବାସୀଙ୍କ ଫିଟନେସ ପାଇଁ ହେଉ, ଏସପି ସାରା ଶର୍ମାଙ୍କ ନିଆରା ପଦକ୍ଷେପ ଗଜପତି ଜିଲ୍ଲାରେ ପୋଲିସ ପ୍ରତି ସୃଷ୍ଟି କରିଛି ଲୋକଙ୍କ ମନରେ ଶ୍ରଦ୍ଧା | ପୋଲିସ ପ୍ରତି ଲୋକଂକ ମନରେ ରହିଥିବା ଖରାପ ଧାରଣାର ଭବାନ୍ତର ଘଟିଛି | ପୋଲିସ ଯେ ଜନତାଙ୍କ ବନ୍ଧୁ ଏ ଧାରଣା ବଦ୍ଧମୂଳ କରିବା ଦିଗରେ କେତୋଟି ପାହାଚ ପକାଇବାରେ ସକ୍ଷମ ହୋଇଛି, ଏହା ନିଃସନ୍ଦେହ | ଏବେ ସାରା ଆରମ୍ଭ କରିଛନ୍ତି ଏକ ଅଭିନବ ଅଭିଯାନ, ଆଉ ସେଇଟା ଜନସଧାରଣଙ୍କ ଫିଟନେସ ପାଇଁ | ଆଉ ଲୋକଙ୍କ ଭିତରେ ଫିଟନେସର ମନ୍ତ୍ର ବାଣ୍ଟିବାକୁ ଉଦ୍ୟମ ଆରମ୍ଭ କରିଛନ୍ତି | ଭାରତୀୟ ପୋଲିସ ସେବା ଚାକିରୀ ପାଇବା ପରେ ସେ ଯେଉଁ ଫିଜିକାଲ ଫିଟନେସ ପାଇଁ ଦୀର୍ଘ ମାସ ଧରି ଫିଜିକାଲ ଏକ୍ସର୍ଶାଇଜର ପ୍ରଶିକ୍ଷଣ ସବୁ ନେଇଥିଲେ , ସେ ସବୁର ଅନୁଭୂତି ଓ ଅଭିଜ୍ଞତାକୁ ନେଇ ପାରଳାଖେମୁଣ୍ଡି ସ୍ଥିତ ଗଜପତି ଷ୍ଟାଡିୟମ୍ ଠାରେ ସମସ୍ତଙ୍କୁ ଦେଢଘଣ୍ଟା ଧରି ନିଜେ ପ୍ରଦର୍ଶନ କରି ସୁନ୍ଦର ଓ ଆରୋଗ୍ୟ ସ୍ବାସ୍ଥ୍ୟର ଫିଟନେସ ପାଇଁ ଟିପ୍ସ ଦେଇଥିଲେ ଏସପି ସାରା ଶର୍ମା । ପୋଲିସ ବିଭାଗର ଏକ ଉଚ୍ଚ ପାହ୍ୟାରେ ରହି ଗଜପତି ଜିଲ୍ଲା ଆରକ୍ଷୀ ଅଧିକ୍ଷକ ସାରା ଶର୍ମା ଜିଲ୍ଲାକୁ ନିଜର କର୍ମଭୂମି ଭାବେ ପରିଗଣିତ କରି ଜିଲ୍ଲାର ବିଭିନ୍ନ ବର୍ଗର ଲୋକଙ୍କ ପାଇଁ ଗୋଟିଏ ପରେ ଗୋଟିଏ ଯେଉଁ ସବୁ ସେବା ମୂଳକ କାର୍ଯ୍ୟ ସବୁ କରି ଚାଲିଛନ୍ତି ତାହା ନିଶ୍ଚିତ ଭାବେ ସ୍ୱାଗତ-ଯୋଗ୍ୟ , ପ୍ରଶଂସନୀୟ ଓ ଅନ୍ୟ ଜିଲ୍ଲାର ଉଚ୍ଚ ପାହ୍ୟାର ପୋଲିସ ଅଧିକାରୀଙ୍କ ପାଇଁ ଉଦାହରଣ ସୃଷ୍ଟି କଲାଭଳି ପଦକ୍ଷେପ ନିଶ୍ଚିତ । ୧୮ ରୁ ୫୮ ବର୍ଷ ବୟସର ମହିଳା ପୁରୁଷ ବ୍ୟକ୍ତି ମାନଙ୍କୁ ସେମାନେ ସେମାନଙ୍କ ସୌଖିନ-ମୟ ଜୀବନ ଶୈଳୀରେ ନିଜକୁ କିଭଳି ଶାରୀରିକ-ସ୍ବାସ୍ଥ୍ୟକୁ ସୁସ୍ଥ ରଖିବେ , ସେଥିପାଇଁ ଅମ୍ଳଜାନ ଗ୍ରହଣ କରିବା ସହିତ ବିଭିନ୍ନ ପ୍ରକାରର ରୋଗ ଦାଉରୁ ଯଥା- ପେଟ ମେଦ ବୃଦ୍ଧି , ଅଣ୍ଟାବ୍ୟଥା , ପିଠି ମେରୁ ହାଡ଼ ବ୍ୟଥା , ରକ୍ତଚାପ , ହୃଦରୋଗ ପ୍ରଭୃତିରେ କିଭଳି ନିଜକୁ ସମ୍ପୂର୍ଣ୍ଣ ଭାବେ ସୁସ୍ଥ ରଖି ପାରିବେ ତାହା ପ୍ରଦର୍ଶନ କରାଇ ସମସ୍ତଙ୍କୁ ବ୍ୟାୟାମ ଶିକ୍ଷା ଦେଇଥିଲେ । ମ୍ୟୁଜିକର ତାଳେ ତାଳେ ଏକ ଅଭିନବ ଢଙ୍ଗରେ ଅତି ସୁନ୍ଦର ଓ ଚମତ୍କାର ଭାବେ ମହିଳା ପୁରୁଷ ଶତାଧିକ ସଂଖ୍ୟକଙ୍କୁ ପ୍ରଶିକ୍ଷଣ ଦେଇଥିଲେ । ଏ ସମ୍ପର୍କରେ ସାମ୍ବାଦିକ ମାନଙ୍କୁ ସୂଚନା ଦେଇ କହିଥିଲେ ଯେ , ମନୁଷ୍ୟର ସୌଖିନ-ମୟ ଜୀବନ ଶୈଳୀରେ ଶରୀରରେ ଦିନକୁ ଦିନ ଯେଉଁ ପେଟ ବଢିବା , ଅଣ୍ଟା ଓ ମେରୁହାଡ଼ ବ୍ୟଥା ସହିତ ଅନ୍ୟାନ୍ୟ ରୋଗ ଓ ଅମ୍ଳଜାନ ଅଭାବ ଭଳି ଯେଉଁ ସବୁ ଦେଖା ଦେଇଥାଏ , ସେଥିରେ ସମ୍ପୂର୍ଣ୍ଣ ପରିବର୍ତ୍ତନ ଆଣିବା ପାଇଁ ଏହା ଆମର ନିଜସ୍ୱ ପ୍ରୟାସ । କାରଣ ଆମେ ପ୍ରାୟତଃ ଶରୀରକୁ ପରିଶ୍ରମର କଷ୍ଟ ଦେଉନାହୁଁ , ଏମିତିକି ବିନା କୌଣସି ପରିଶ୍ରମର ଆମେ ଦୀର୍ଘ ସମୟ ଧରି ବସି ରହୁଛୁ, କେବଳ ପରିଶ୍ରମ ନ କରି ବସି ରହିବା ଫଳରେ ଏଭଳି ସମସ୍ୟା ଦେଖା ଦେଇଥାଏ । ଯାହାକି ତାହା ଭବିଷ୍ୟତରେ ଶରୀର ସ୍ବାସ୍ଥ୍ୟ ପାଇଁ ଅତ୍ୟନ୍ତ ବିପଦ ଓ ହାନିକାରକ । ତେଣୁ ସେମାନଙ୍କ ପାଇଁ ନିୟମିତ ବ୍ୟାୟାମର ଆବଶ୍ୟକତା ରହିଛି ବୋଲି କହିଥିଲେ ଏପି ସାରା ଶର୍ମା। ଅତିରିକ୍ତ ଏସପି ସୀତାରାମ ଶତପଥୀ , ଜିଲ୍ଲା କ୍ରୀଡ଼ା ଅଧିକାରୀ ପ୍ରଭାକର ତ୍ରିପାଠୀ , ପାରଳାଖେମୁଣ୍ଡି ଆଦର୍ଶ ଥାନା ଅଧିକାରୀ ବିବେକା ନନ୍ଦ ସ୍ବାଇଁ ପ୍ରମୁଖଙ୍କ ସମେତ ଶତାଧିକ ସଂଖ୍ୟାରେ ପାରଳାଖେମୁଣ୍ଡି ସହରର ଯୁବକ ଯୁବତୀ , ବୟସ୍କ ବ୍ୟକ୍ତି , ବୁଦ୍ଧିଜୀବୀ , ପୋଲିସ ଅଧିକାରୀ ଓ କର୍ମଚାରୀ ମାନେ ଯୋଗଦେଇ ବ୍ୟାୟାମ ଶିକ୍ଷାରେ ଗ୍ରହଣ କରିଥିଲେ ।
