୩୮,୪୨୭ କୋଟି ଟଙ୍କାର ହିସାବ ଗାଏବ, ଚିଟଫଣ୍ଡ ଜମାକାରୀଙ୍କୁ ଟଙ୍କାଟିଏ ଦେଲେନାହିଁ, ୩୦୦ କୋଟି ଟଙ୍କାର କର୍ପସ ଫଣ୍ଡ ଗଲା କୁଆଡେ? : ବିଜେପି

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) –୨୦୧୮ ଆର୍ଥିକ ବର୍ଷର ସିଏଜି ରିପୋର୍ଟ ସ୍ପଷ୍ଟ କରୁଛି କି ରାଜ୍ୟସରକାର ଓଡିଶାବାସୀଙ୍କୁ ବିଭ୍ରାନ୍ତି କରିଛନ୍ତି । ରାଜ୍ୟସରକାରଙ୍କ ଅର୍ଥନୀତିର କୌଣସି ଦିଗନାହିଁ ଓ କେନ୍ଦ୍ର ସରକାରଙ୍କର ଅନୁଦାନକୁ ବାଟମାରଣା କରାଯାଇଛି । ରାଜ୍ୟସରକାର ବିଧାନସଭାରେ ଲକ୍ଷେ କୋଟି ଟଙ୍କାରୁ ଉର୍ଦ୍ଧ୍ୱ ବଜେଟ୍ ପାସ୍ କରୁଛନ୍ତି ବୋଲି କହୁଛନ୍ତି କିନ୍ତୁ ସେଥିରେ ୨୧,୨୦୬କୋଟି ଟଙ୍କା ଖର୍ଚ୍ଚ କରିପାରୁନାହାଁନ୍ତି । ରାଜ୍ୟସରକାରଙ୍କର Cash Balance ରିଜର୍ଭ ବ୍ୟାଙ୍କ୍ ସହିତ ୩୦,୮୪୮କୋଟି ଟଙ୍କା ଥିଲା ବେଳେ ରାଜ୍ୟସରକାର ମାର୍କେଟ୍ରୁ ୬ରୁ ୮ % ସୁଧ ଦେଇ ୧୨,୧୩୦କୋଟି ଟଙ୍କା ଉଠାଇଛନ୍ତି । ଏହି ୬ରୁ ୮ ପ୍ରତିଶତ ସୁଧ କାହା ସ୍ୱାର୍ଥରେ କାହା ପକେଟକୁ ଯାଇଛି ବୋଲି ରାଜ୍ୟ ସଂପାଦିକା ଡ. ଲେଖାଶ୍ରୀ ସାମନ୍ତସିଂହାର ପ୍ରଶ୍ନ କରିଛନ୍ତି ।

ଡ.ସାମନ୍ତସିଂହାର ଅଭିଯୋଗ କରି କହିଛନ୍ତି କି, ରାଜ୍ୟସରକାର ଜନହିତକାରୀ ଯୋଜନା ଯଥା- ସ୍ୱାସ୍ଥ୍ୟ, ଶିକ୍ଷା, କୃଷି, ମହିଳା ଓ ଶିଶୁ ବିଭାଗ ଆଦି ସୋସିଆଲ ସେକ୍ଟର ମାନଙ୍କରେ ଅର୍ଥ ଖର୍ଚ୍ଚ ନକରି ଯେଉଁଥିରେ ଦୁର୍ନୀତି ଓ ପିସି କାରବାର ହୋଇପାରିବ ଏବଂ ଯେଉଁଥିରେ ଅର୍ଥ ଖର୍ଚ୍ଚ ହେବ ତାହାର ହିସାବ ମିଳିବନାହିଁ ସେଭଳି କ୍ଷେତ୍ରରେ ରାଜ୍ୟସରକାର ପଇସା ଖର୍ଚ୍ଚ କରିଛନ୍ତି । ରାଜ୍ୟସରକାର ମହିଳା ଓ ଶିଶୁବିକାଶ, କୃଷି, ସ୍ୱାସ୍ଥ୍ୟ ବିଭାଗକୁ ଅଣଦେଖା କରିଛନ୍ତି ।

କୃଷି କ୍ଷେତ୍ରରେ ୯୪୬ କୋଟି ଟଙ୍କା, ମହିଳା ଓ ଶିଶୁ ବିକାଶରେ ୯୨୨ କୋଟି, ଏବଂ ସ୍ୱାସ୍ଥ୍ୟ କ୍ଷେତ୍ରରେ ୩୮୧ କୋଟି ଟଙ୍କା ସରକାର ଖର୍ଚ୍ଚ କରିନପାରି ଫେରାଇ ଦେଇଛନ୍ତି । ଅଥଚ ପୂର୍ତ ବିଭାଗରେ ସବୁ ପଇସା ଖର୍ଚ୍ଚ କରିବା ସହ ଦୁର୍ନୀତି ମଧ୍ୟ କରିଛନ୍ତି । ୨୨୯କୋଟି ଟଙ୍କା ଖର୍ଚ୍ଚରେ ୧୦୦ କି.ମି ରାସ୍ତାରୁ ମାତ୍ର ୪୮ କି.ମି ରାସ୍ତା ନିର୍ମାଣ କରାଯାଇଛି । ସେହିଭଳି ମୁଖ୍ୟମନ୍ତ୍ରୀ ସଡକ ଯୋଜନାରେ ୨୯୨ କୋଟି ଟଙ୍କା ଖର୍ଚ୍ଚ କରି ୮୦୦ କି.ମି ଜାଗାରେ ମାତ୍ର ୪୬୨ କି.ମି ନିର୍ମାଣ କରାଯାଇ ବାକି ଅର୍ଥ ଆତ୍ମସାତ କରାଯାଇଛି । ଏହି ମହାଦୁର୍ନୀତି ପାଇଁ ରାଜ୍ୟସରକାର ତକ୍ରାଳୀନ ପୂର୍ତ ବିଭାଗର ମୁଖ୍ୟ ନଳୀନ କାନ୍ତ ପ୍ରଧାନଙ୍କୁ ସମ୍ବଲପୁରର ସାଂସଦ ଟିକେଟ ଦେଇ ପୁରସ୍କୃତ କରିଛନ୍ତି । ଏହା ଅତ୍ୟନ୍ତ ନିନ୍ଦନୀୟ ଏବଂ ଦୁର୍ଭାଗ୍ୟଜନକ ବୋଲି ଡ. ସାମନ୍ତସିଂହାର ଅଭିଯୋଗ କରିଛନ୍ତି ।

ରାଜ୍ୟସରକାରଙ୍କ ଆଳୁ ମିଶନ ସଂପୂର୍ଣ୍ଣଭାବେ ବିଫଳ ହୋଇଛି । ଏଥିରେ ୧୩୦ କୋଟିରୁ ମାତ୍ର ୨୬.୬୫ କୋଟି ଖର୍ଚ୍ଚ ହୋଇପାରିଛି । କାଜୁ ଚାଷର ବିକାଶ ପାଇଁ ଦିଆଯାଇଥିବା ୮୦ କୋଟିରୁ ଟଙ୍କାଟିଏ ମଧ୍ୟ ଖର୍ଚ୍ଚ ହୋଇପାରିନାହିଁ । ମ୍ୟାଲେରିଆ ନିୟନ୍ତ୍ରଣ ପାଇଁ ୩୦ କୋଟି ଏବଂ ଜନ୍ମନିୟନ୍ତ୍ରଣ ପାଇଁ ୧୫ କୋଟି ଟଙ୍କା ଆଦୌ ଖର୍ଚ୍ଚ ହୋଇପାରିନାହିଁ । ରାଜ୍ୟସରକାର ଗତ ୫ ବର୍ଷ ହେବ ଜମାକାରୀଙ୍କୁ ପଇସା ଫେରାଇ ଦେବେ ବୋଲି ମିଥ୍ୟା ପ୍ରତିଶୃତି ଦେଇଆସୁଛନ୍ତି ଏବଂ କମିସନ ଅବଦ୍ଧି ବଢାଇ ଚାଲିଛନ୍ତି । ହେଲେ ୩୦୦ କୋଟି କର୍ପସ ଫଣ୍ଡରୁ ଟଙ୍କାଟିଏ ବି କେଉଁ ଜମାକାରୀଙ୍କୁ ଦେଇ ପାରିଲେ ନାହିଁ । ସରକାର ଜମାକାରୀଙ୍କୁ ଠକିବା ସହ ମିଥ୍ୟା ପ୍ରତାରଣା ଦେଇଚାଲିଛନ୍ତି । ସୁପ୍ରିମକୋର୍ଟଙ୍କ ନିର୍ଦ୍ଦେଶାନୁକ୍ରମେ ଖଣିଜ ଅଂଚଳର ବିକାଶ ପାଇଣ ମିନେରାଲ ଡେଭଲପମେଂଟ ଫଣ୍ଡରେ ୧୧ ହଜାର ୫୬୮ କୋଟି ଟଙ୍କା ଜମା ଥିବାବେଳେ ସରକାର ଟଙ୍କାଟିଏ ବି ସେ ଅଂଚଳର ବିକାଶ ପାଇଁ ଖର୍ଚ୍ଚ କରିପାରି ନାହାଁନ୍ତି ବୋଲି ଡ. ସାମନ୍ତସିଂହାର ଅଭିଯୋଗ କରିଛନ୍ତି ।

ରାଜ୍ୟସରକାର ସବୁ ସମୟରେ କେନ୍ଦ୍ର ଅବହେଳା କଥା କହୁଛନ୍ତି ହେଲେ ବିଭିନ୍ନ ଯୋଜନାରେ ଆସିଥିବା ୩୮ ହଜାର ୪୨୭ କୋଟି ଟଙ୍କାକୁ ସଂପୂର୍ଣ୍ଣଭାବେ ଗାଏବ କରିଛନ୍ତି । ଏବେ ରାଜ୍ୟସରକାର ସେହି ଅର୍ଥର ହିସାବ ଦେଇପାରୁଛନ୍ତି ନା ବିନିଯୋଗ ପ୍ରମାଣପତ୍ର (ୟୁଟିଲାଇଜେସନ ସାର୍ଟିଫିକେଟ) ଦେଇପାରୁଛନ୍ତି । ଏହି ସିଏଜି ରିପୋର୍ଟରୁ ସ୍ପଷ୍ଟ ଯେ, ରାଜ୍ୟସରକାର ଆର୍ଥୀକ ଦୁର୍ନୀତି ଓ ପିସି କାରବାରରେରେ ଲିପ୍ତ ରହିଛନ୍ତି ଏବଂ କୌଣସି ଜନହିତକାରୀ କାର୍ଯ୍ୟକ୍ରମ ହାତକୁ ନେଇନାହାଁନ୍ତି । ବିଜେଡି ସରକାର ମହିଳା, ଶିଶୁ, ଯୁବ, କୃଷକ, ଏବଂ ଏକ ଜନବିରୋଧୀ ସରକାର ବୋଲି ପ୍ରମାଣିତ ହୋଇଛି । ଏହି ସମସ୍ତ ପ୍ରସଙ୍ଗ ବିରୋଧୀ ଉଠାଇବାର ଆଶଙ୍କା ଥିବାରୁ ଜାଣିସୁଣି ରାଜ୍ୟସରକାର ବିଧାନସଭାକୁ ଆଗୁଆ ବନ୍ଦ କରିଦେଲେ ବୋଲି ଡ. ସାମନ୍ତସିଂହାର କହିଛନ୍ତି ।

ପାଣ୍ଡୁଗୁଡା ଠାରେ ପଲ୍ଲିସଭା ବୈଠକ ଅନୁଷ୍ଠିତ !

!!! ଚକାପାଦ ବ୍ଲକ ପ୍ରତିନିଧି ସୁନୀଲ ଦିଗାଲ୍ ଙ୍କ ରିପୋର୍ଟ !!!

ଏଥର ସମ୍ଭାଳ (ଚକାପାଦ) – କନ୍ଧମାଳ ଜିଲ୍ଲା ଚକାପାଦ ବ୍ଲକ ଲାଇନପଡା(ଲା ) ପଞ୍ଚାୟତ ସ୍ଥିତଆଦର୍ଶ ଗ୍ରାମ ନାମ ରେ ନାମିତ ପାଣ୍ଡୁଗୁଡା ଗ୍ରାମ ରେ ଏକ ପଲ୍ଲୀ ସଭା ମା ସୁନାପ୍ରତିମା ଠାକୁରାଣୀ ମନ୍ଦିର ପ୍ରାଙ୍ଗଣରେ ଅନୁଷ୍ଠିତ ହୋଇଯାଇଛି । ଏହି ସଭାରେ WEO ଶ୍ରୀ ପ୍ରତାପ ଚନ୍ଦ୍ର ମହାନ୍ତି, PEO ଶ୍ରୀ ବିଷ୍ଣୁ ବେହେରା, JE ଶ୍ରୀ ଚକ୍ରଧର ପୃଷ୍ଟି. AE ଶ୍ରୀ ପଞ୍ଚୁ ବେହେରା , ନାୟାବ ସରପଞ୍ଚ ଶ୍ରୀ ପ୍ରତାପ କିଶୋର ବେହେରା , ୱାର୍ଡ ସଭ୍ୟା ଶ୍ରୀମତୀ ନର୍ମଦା ଦିଗାଲ ଙ୍କ ଦ୍ୱାରା ୧୦୦ ଗ୍ରାମ ମଧ୍ୟରେ କେନ୍ଦ୍ର ସରକାର ଦ୍ୱାରା ଆଦର୍ଶ ଗ୍ରାମ ଭାବେ ଚିହ୍ନଟ କରାଯାଇଛି । ଏହି ଗ୍ରାମ ର ବିକାଶ ନିମନ୍ତେ ଗ୍ରାମ ଉର୍ଣ୍ଣୟନ ଯୋଜନା ରେ ଜିଲ୍ଲାପାଳ ଙ୍କ ପରାମର୍ଶ କ୍ରମେ ପାନୀୟ ଜଳ ଯୋଗାଣ , ଗ୍ରାମ୍ୟ ପାଠାଗାର , କଲ୍ୟାଣ ମଣ୍ଡପ , ଅତିରିକ୍ତ ଶ୍ରେଣୀ ଗୃହ ନିର୍ମାଣ ଇତ୍ୟାଦି ପ୍ରକଳ୍ପ ଗୁଡିକ ଅଗ୍ରାଧିକାର ଭିତରେ ଗ୍ରାମ୍ୟ ଉନ୍ନୟନ ଯୋଜନା ରେ ଅନ୍ତର୍ଭୁକ୍ତ କରି ନୂତନ VDP ପ୍ରସ୍ତୁତ କରିବାକୁ ଅନୁରୋଧ କରାଯାଇଥିଲା । ଉପରକ୍ତ ବିଷୟ ଗୁଡିକ ଉପରେ ଗୁରୁତ୍ୱ ପ୍ରଦାନ କରି ଉପସ୍ଥିତ ଗ୍ରାମବାସୀ ମାନେ ପ୍ରତିନିଧି ମାନଙ୍କ ବୋହୁ ମୂଲ୍ୟ ମତାମତ ପ୍ରଦାନ କରିଥିଲେ । ପାଣ୍ଡୁଗୁଡା ଗ୍ରାମବାସୀ ଙ୍କୁ ଆଦର୍ଶ ଗ୍ରାମ ର ମାନ୍ୟତା ପାଇଥିବା ରୁ ଗ୍ରାମବାସୀ ଙ୍କ ମନ ରେ ଖୁସି ଦେଖିବାକୁ ମିଳିଥିଲା ।

ପୁଣି ୩ ମାସ କୋହଳ ହେଲା ଟ୍ରାଫିକ୍ ନିୟମ ; ବିଧାନସଭା ରେ ପରିବହନ ମନ୍ତ୍ରୀ କଲେ ଘୋଷଣା…!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଜନସାଧାରଣଙ୍କ ସମସ୍ୟାକୁ ବୁଝିପାରିଛନ୍ତି ରାଜ୍ୟ ସରକାର । ନୂଆ ଟ୍ରାଫିକ ନିୟମ ତଥା ଆରଟିଓ ଯାଞ୍ଚକୁ ଆଉ ତିନି ମାସ ଘୁଞ୍ଚାଇ ଦିଆଯାଇଛି । ଆଜି ବିଧାନସଭାରେ ପରିବହନ ମନ୍ତ୍ରୀ ପଦ୍ମନାଭ ବେହେରା ଏହି ଘୋଷଣା କରିଛନ୍ତି । ଶୂନ୍ୟକାଳରେ ଶାସକ ଓ ବିରୋଧୀ ଦଳ ସଭ୍ୟମାନେ ଜନସାଧାରଣଙ୍କ ଦୁର୍ଦ୍ଦଶା ରାଜ୍ୟ ସରକାରଙ୍କ ଦୃଷ୍ଟିକୁ ଆଣି ଆଟିଓ ଯାଞ୍ଚ ପାଇଁ ଆଉ ତିନି ମାସ କୋହଳ କରିବାକୁ ଅନୁରୋଧ କରିଥିଲେ । ବିଭାଗୀୟ ମନ୍ତ୍ରୀ ଏହା ବିଚାର କରିବାକୁ ବାଚସ୍ପତି ସୂର୍ଯ୍ୟନାରାୟଣ ପାତ୍ର ରୁଲିଂ ଦେବା ପରେ ମନ୍ତ୍ରୀ ଶ୍ରୀ ବେହେରା ମୁଖ୍ୟମନ୍ତ୍ରୀଙ୍କ ଅନୁମୋଦନ ଆଣି ଗୃହରେ ନିଷ୍ପତ୍ତି ଶୁଣାଇଥିଲେ ।
ଗାଡ଼ି କାଗଜପତ୍ର ଓ ଡ୍ରାଇଭିଂ ଲାଇସେନସ୍ ନଥିବା ଲୋକଙ୍କୁ ପୁଣି ତିନିମାସ ମହଲତ ଦିଆଯାଇଛି । ଅନ୍ୟଥା ପୂର୍ବଭଳି ସାଧାରଣ ଟ୍ରାଫିକ ନିୟମ ପାଳନରେ କୌଣସି କୋହଳ କରାଯିବ ନାହିଁ । ଅର୍ଥାତ୍ ହେଲମେଟ୍, ସିଟ୍ ବେଲ୍ଟ ନ ପିନ୍ଧିଲେ ତଣ୍ଡ ଗଣିବାକୁ ପଡ଼ିବ । ସେହିଭଳି ଗାଡ଼ି ଚଳାଇବା ବେଳେ ମୋବାଇଲ୍ ରେ ଗପିବା, ମଟରସାଇକେଲରେ ତିନି ଜଣ ବସିବା ଏବଂ ମଦ ପିଇ ଡ୍ରାଇଭିଂ କଲେ ଟ୍ରାଫିକ ଦଣ୍ଡର ସମ୍ମୁଖୀନ ହେବାକୁ ପଡ଼ିବ ବୋଲି ପରିବହନ ମନ୍ତ୍ରୀ ସ୍ପଷ୍ଟ କରିଛନ୍ତି ।
ସେପ୍ଟେମ୍ବର ୧ ରୁ ରାଜ୍ୟରେ ଲାଗୁ ହୋଇଥିଲା ନୂଆ ମୋଟରଯାନ ଆଇନ । ଏହି ନିୟମ ଲାଗୁ ପରେ ଆରଟିଓ ଓ ପୁଲିସର ବ୍ୟାପକ ଧରପଗଡ଼ ଯୋଗୁଁ ଜନସାଧାରଣ ନାହିଁ ନ ଥିବା ଦୁର୍ଦ୍ଦଶା ଭୋଗିଥିଲେ । ଗାଡ଼ି କାଗଜପତ୍ର ଠିକଠାକ୍ ଓ ଡ୍ରାଇଭିଂ ଲାଇସେନସ୍ ନ ଥିବାରୁ ଲୋକଙ୍କୁ ମୋଟା ଅଙ୍କର ତଣ୍ଡ ଗଣିବାକୁ ପଡ଼ିଥିଲା । ଫଳ ହେଲା ଲୋକମାନଙ୍କ ଅସନ୍ତୋଷ ଭୀଷଣ ରୂପ ନେଲା । ରାଜଧାନୀର ରାଜମହଲ ରଣକ୍ଷେତ୍ର ପାଲଟିଲା । ଲୋକଙ୍କ ଦୁର୍ଦ୍ଦଶା ଓ ଅସନ୍ତୋଷ ଦୃଷ୍ଟିରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନୂଆ ଟ୍ରାଫିକ ଆଇନକୁ ୩ ମାସ କୋହଳ କରିବାକୁ ନିଦେ୍ର୍ଦଶ ଦେଇଥିଲେ । ଏହି ସମୟରେ ଗାଡ଼ି କାଗଜପତ୍ର ଓ ଡ୍ରାଇଭିଂ ଲାଇସେନସ୍ ଠିକ କରିବାକୁ କୁହାଯାଇଥିଲା ।
ତେବେ ଭିତ୍ତିଭୂମି ଅଭାବରୁ ଏହି ତିନିମାସ ସମୟ ଯଥେଷ୍ଟ ହୋଇନାହିଁ । ଗତ କିଛି ଦିନ ହେଲା ବିଭିନ୍ନ ଆରଟିଓ ଅଫିସରେ ପ୍ରବଳ ଭିଡ଼ ଲାଗିରହିଥିଲା । ଭୁବନେଶ୍ୱରରେ ଆରଟିଓ ଅଫିସରେ କାଗଜପତ୍ର କରିବାକୁ ଲୋକେ ରାତି ଅଧରୁ ଲମ୍ବା ଲାଇନ ଦେଇଥିଲେ । ଡିସେମ୍ବର ୧ରୁ ଟ୍ରାଫିକ ନିୟମ କଡ଼ାକଡ଼ି କରିବାକୁ ପରିବହନ ମନ୍ତ୍ରୀ ବାରମ୍ବାର ଚେତାବନୀ ଦେଉଥିବାରୁ ଲୋକଙ୍କ ହୋସ୍ ଉଡ଼ିଯାଇଥିଲା । ନିୟମକୁ ଆଉ କିଛି ମାସ କୋହଳ କରିଦେବାକୁ ଜନସାଧାରଣଙ୍କ ପକ୍ଷରୁ ଚାପ ବଢ଼ିଥିଲା ।
ଆଜି ବିଧାନସଭାରେ ଶାସକ ଦଳ ସଭ୍ୟ ଦେବୀପ୍ରସାଦ ମିଶ୍ର ଏହି ପ୍ରସଙ୍ଗ ଉଠାଇ ଜନସାଧାରଣଙ୍କ ଦୁର୍ଦ୍ଦଶାକୁ ସରକାରଙ୍କ ଦୃଷ୍ଟିକୁ ଆଣିଥିଲେ । ନିୟମ ଆଉ ୩ ମାସ କୋହଳ କରିବାକୁ ସରକାରଙ୍କୁ ଅନୁରୋଧ କରିଥିଲେ । ଦଳର ଅନ୍ୟତମ ବରିଷ୍ଠ ସଭ୍ୟ ପ୍ରଦୀପ ମହାରଥୀ, କଂଗ୍ରେସ ସଭ୍ୟ ସନ୍ତୋଷ ସିଂହ ସାଲୁଜା ପ୍ରମୁଖ ଅନୁରୂପ ଦାବି କରିଥିଲେ । ବାଚସ୍ପତି ଏହା ବିଚାରକୁ ନେଇ ନିଷ୍ପତ୍ତିର ପୁନର୍ବିଚାର କରାଯାଇପାରେ ବୋଲି ମନ୍ତ୍ରୀଙ୍କୁ ନିର୍ଦ୍ଦେଶ ଦେଇଥିଲେ । ଏହାପରେ ମୁଖ୍ୟମନ୍ତ୍ରୀଙ୍କଠାରୁ ଅନୁମୋଦ ଆଣି ମନ୍ତ୍ରୀ ଶ୍ରୀ ବେହେରା ବିଧାନସଭାରେ ନିଷ୍ପତ୍ତି ଘୋଷଣା କରିଥିଲେ ।

ଜ୍ୟୋତିଙ୍କ ମୁଣ୍ଡ ଉପରେ ଖଣ୍ଡା ; ବାନ୍ଧବୀ ଙ୍କ ସହ ଟୁର ରେ ଯାଇ ଫସିଗଲେ ରାଜ୍ୟ ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ…!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଜ୍ୟୋତିଙ୍କ ମୁଣ୍ଡ ଉପରେ ଖଣ୍ଡା। ବାନ୍ଧବୀଙ୍କ ସହ ଟୁର ରେ ଯାଇ ଫସିଛନ୍ତି ରାଜ୍ୟ ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ । ସରକାରୀ କାର୍ଯ୍ୟକ୍ରମରେ ହାଇଦ୍ରାବାଦ ଯାଇଥିବା ମନ୍ତ୍ରୀଙ୍କ ସାଙ୍ଗରେ ଯାଇଥିଲେ ତାଙ୍କର ବାନ୍ଧବୀ ମାଆ, ଝିଅ । ଉଡ଼ାହାଜାଜରେ ସେମାନଙ୍କ ଯିବା ଆସିବା ଏବଂ ଫାଇଭ୍ ଷ୍ଟାର୍ ହୋଟେଲରେ ରହଣୀ ଖର୍ଚ୍ଚ ସରକାରୀ ତହବିଲ୍ ରୁ ବହନ କରାଯାଇଥିବା ଅଭିଯୋଗ ହୋଇଛି । କଂଗ୍ରେସ ମିଡ଼ିଆ ସେଲ୍ ମୁଖ୍ୟ ସତ୍ୟପ୍ରକାଶ ନାୟକ ଗତକାଲି ଏକ ସାମ୍ବାଦିକ ସମ୍ମିଳନୀରେ ଏହି ଗୁମର ଖୋଲିବା ପରେ ଆଜି ବିଧାନସଭା ହଲଚଲ ହୋଇଛି । ମନ୍ତ୍ରୀଙ୍କ ଇସ୍ତଫା ଦାବିରେ କଂଗ୍ରେସ ବିଧାୟକମାନେ ଅଡ଼ିବସି ଗୃହର ମଧ୍ୟ ଭାଗରେ ପ୍ରବଳ ହଟ୍ଟଗୋଳ କରିବାରୁ ବିଧାନସଭା ଅଚଳ ହୋଇଯାଇଛି ।ମନ୍ତ୍ରୀ ଜ୍ୟୋତିପ୍ରକାଶଙ୍କ ବିରୋଧରେ ଆସିଥିବା ଏହି ଅଭିଯୋଗଟି ସଙ୍ଗୀନ । ଅକ୍ଟୋବର ୪ ତାରିଖରେ ହାଇଦ୍ରାବାଦରେ ଟୁରିଜିମ୍ ରୋଡ୍ ସୋ’ ଆୟୋଜିତ ହୋଇଥିଲା । ଓଡ଼ିଶା ସରକାରଙ୍କ ପକ୍ଷରୁ ବିଭାଗୀୟ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ସେଠାକୁ ଆମନ୍ତ୍ରିତ ହୋଇଥିଲେ । ତେବେ ମନ୍ତ୍ରୀଙ୍କ ସହ ତାଙ୍କର ଦୁଇଜଣ ମହିଳା ଅତିଥି ଯିବେ ବୋଲି ମନ୍ତ୍ରୀଙ୍କ ଦପ୍ତର ପକ୍ଷରୁ ବିଭାଗକୁ ଚିଠି କରାଯାଇଥିଲା । ସେହି ଅନୁଯାୟୀ ଫ୍ଲାଇଟ୍ ଟିକେଟ ଏବଂ ହାଇଦ୍ରବାଦରେ ରହଣୀ ବନେ୍ଦାବସ୍ତ ପାଇଁ କୁହାଯାଇଥିଲା । ମନ୍ତ୍ରୀଙ୍କ ଅତିଥି ଦର୍ଶାଯାଇଥିବା ମହିଳାଦ୍ୱୟ ହେଲେ ଆର.ମହାପାତ୍ର(୪୭) ଏବଂ ଏସ.ଏସ. ମହାପାତ୍ର(୨୫) । ମନ୍ତ୍ରୀଙ୍କ ଚାହିଁବା ମୁତାବକ ମନ୍ତ୍ରୀ ଓ ତାଙ୍କର ଦୁଇ ମହିଳା ଅତିଥିଙ୍କ ପାଇଁ ଅକ୍ଟୋବର ୪ ତାରିଖରେ ଭୁବନେଶ୍ୱର-ହାଇଦ୍ରାବାଦ ଫ୍ଲାଇଟ୍ ଟିକେଟ ଏବଂ ୫ ତାରିଖରେ ହାଇଦ୍ରାବାଦ-ଭୁବନେଶ୍ୱର ଫ୍ଲାଇଟ୍ ରେ ଫେରନ୍ତା ଟିକେଟ ହୋଇଥିଲା । ହାଇଦ୍ରାବାଦର ଫାଇଭ୍ ଷ୍ଟାର୍ ହୋଟେଲ୍ ତାଜ୍ କ୍ରିଷ୍ଣା ବି ୪ ତାରିଖ ରାତି ପାଇଁ ବୁକ୍ ହୋଇଥିଲା । ଗତକାଲି ସାମ୍ବାଦିକ ସମ୍ମିଳନୀରେ କଂଗ୍ରେସ ନେତା ସତ୍ୟପ୍ରକାଶ ନାୟକ ସଂପୃକ୍ତ ଫ୍ଲାଇଟ୍ ଟିକେଟ୍, ହୋଟେଲ ତାଜ୍ କ୍ରିଷ୍ଣାର ଇନଭଏସ୍ ଏବଂ ମନ୍ତ୍ରୀଙ୍କ ଦପ୍ତରର ଚିଠି ଉପସ୍ଥାପନ କରିଥିଲେ । ରୋଚକ କଥା ହେଲା, ମନ୍ତ୍ରୀଙ୍କ ଦପ୍ତର ଚିଠିରେ ଅତିଥି ମହିଳାଦ୍ୱୟଙ୍କ ପୂରା ନାଁ ବଦଳରେ ସଟ୍ ଫର୍ମ ନାଁ ଲେଖାଯାଇ ସେମାନଙ୍କ ଠିକଣା ଗୋପନ ରଖିବାକୁ ଉଦ୍ୟମ କରାଯାଇଥିଲା । ସରକାରୀ ଖର୍ଚ୍ଚରେ ଦୁଇଜଣ ବେସରକାରୀ ମହିଳାଙ୍କୁ ମନ୍ତ୍ରୀ କିଭଳି ସାଙ୍ଗରେ ନେଲେ ଏବଂ ସେଥିପାଇଁ ମୁଖ୍ୟମନ୍ତ୍ରୀଙ୍କ ଅନୁମତି ଥିଲା ନା ନାହିଁ ପ୍ରଶ୍ନ କରିଥିଲେ ସତ୍ୟପ୍ରକାଶ ।ମନ୍ତ୍ରୀଙ୍କର ଏହି ଗୁମରକୁ ଧରି ଆଜି କଂଗ୍ରେସ ବିଧାୟକମାନେ ବିଧାନସଭାରେ କମ୍ପମାନ କରିଛନ୍ତି । ଶୂନ୍ୟକାଳରେ ବିରୋଧୀ ଦଳ ନେତା ପ୍ରଦୀପ୍ତ ନାଏକ ପ୍ରଥମେ ଏହି ପ୍ରସଙ୍ଗ ଉଠାଇ ସରକାରଙ୍କଠାରୁ ଜବାବ ମାଗିଥିଲେ । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ବି ଅନୁରୂପ ଦାବି କରିଥିଲେ । ବରିଷ୍ଠ ବିଧାୟକ ସନ୍ତୋଷ ସିଂ ସାଲୁଜା କହିଥିଲେ, ସରକାରୀ କାର୍ଯ୍ୟରେ ହାଇଦ୍ରାବାଦ ଯାଇଥିବା ମନ୍ତ୍ରୀଙ୍କ ସାଙ୍ଗରେ ଥିବା ମହିଳାଦ୍ୱୟ ସମ୍ପର୍କରେ ମାଆ ଓ ଝିଅ । ଏଇ ଗାଈ ବାଛୁରୀଙ୍କୁ ମନ୍ତ୍ରୀ ସାଙ୍ଗରେ ନେବା ପଛରେ କି ରହସ୍ୟ ଅଛି? ସେମାନେ ସରକାରୀ ଖର୍ଚ୍ଚରେ ଗଲେ କେମିତି? ମୁଖ୍ୟମନ୍ତ୍ରୀ ତୁରନ୍ତ ଏହି ମନ୍ତ୍ରୀଙ୍କୁ ବରଖାସ୍ତ କରିବାକୁ ସେ ଗୃହରେ ଦାବି କରିଥିଲେ । ଅନ୍ୟତମ ବରିଷ୍ଠ ବିଧାୟକ ସୁରେଶ ରାଉତରାୟ ମଧ୍ୟ ଏହି ପ୍ରସଙ୍ଗ ଉଠାଇ ଛି.. ଛି.. କରିବା ସହ ଗୃହର ମଧ୍ୟଭାଗକୁ ମାଡ଼ି ଆସିଥିଲେ । ପଛେ ପଛେ ସହଯୋଗୀ ବିଧାୟକମାନେ ସିଧା ବାଚସ୍ପତିଙ୍କ ପୋଡ଼ିୟମ୍ ଆଡକୁ ଚାଲିଆସି ନାରାବାଜି ଆରମ୍ଭ କରିଥିଲେ । ମନ୍ତ୍ରୀ ଜ୍ୟୋତିପ୍ରକାଶଙ୍କ ବରଖାସ୍ତ ଦାବି କରି କଂଗ୍ରେସ ବିଧାୟକମାନେ ସ୍ଲୋଗାନ୍ ଦେଇଥିଲେ । ଶ୍ରୀ ସାଲୁଜା ବାଚସ୍ପତିଙ୍କ ମାଇକ୍ ଛଡ଼ାଇବାକୁ ଉଦ୍ୟମ କରିଥିଲେ । ବିଧାୟକମାନେ ନିଜ ଆସନକୁ ଫେରିବାକୁ ବାଚସ୍ପତି ବାରମ୍ବାର ଅନୁରୋଧ କରିଥିଲେ ମଧ୍ୟ କେହି ଶୁଣି ନ ଥିଲେ । ଏଭଳିସ୍ଥିତିରେ ବାଚସ୍ପତି ତିନି ଥରକରେ ଗୃହକୁ ଅପରାହ୍ନ ୩ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ । ଅପରାହ୍ନ ଅଧିବେସନରେ ବି ସମାନ ଅବସ୍ଥା ଦେଖିବାକୁ ମିଳିଥିଲା । କଂଗ୍ରେସ ବିଧାୟକଙ୍କ ହଟ୍ଟଗୋଳ ଭିତରେ ବାଚସ୍ପତି ସୂର୍ଯ୍ୟନାରାୟଣ ପାତ୍ର ପର୍ଯ୍ୟଟନମନ୍ତ୍ରୀଙ୍କୁ ଗୃହରେ ଏହା ଉପରେ ସ୍ପଷ୍ଟୀକରଣ ଦେବାକୁ ନିର୍ଦ୍ଦେଶ ଦେଇଥିଲେ । ତେବେ କଂଗ୍ରେସ ବିଧାୟକଙ୍କୁ ଏହା ଶାନ୍ତ କରିପାରିନାହିଁ । ମନ୍ତ୍ରୀଙ୍କ ବରଖାସ୍ତ ଦାବିରେ ଅଡି ବସିଛନ୍ତି । ପ୍ରବଳ ହଟ୍ଟଗୋଳ ଜାରି ରହିବାରୁ ବାଚସ୍ପତି ଗୃହକୁ ମୁଲତବୀ ରଖି ସର୍ବଦଳୀୟ ବୈଠକ ଡାକିଛନ୍ତି ।ବିଜେପି ପକ୍ଷରୁ ବରିଷ୍ଠ ନେତା ତଥା ମୁଖପାତ୍ର ସମୀର ମହାନ୍ତି ଏକ ସାମ୍ବାଦିକ ସମ୍ମିଳନୀ କରି ପର୍ଯ୍ୟଟନ ମନ୍ତ୍ରୀଙ୍କ ବରଖାସ୍ତ ଦାବି କରିଛନ୍ତି ।ସେପଟେ ସଂପୃକ୍ତ ବାନ୍ଧବୀଙ୍କ ସହ ମନ୍ତ୍ରୀଙ୍କ ସମ୍ପର୍କକୁ ନେଇ ବିଭିନ୍ନ କଥା ଶୁଣାଯାଉଛି । ସଂପୃକ୍ତ ମହିଳାଙ୍କ ସହ ମନ୍ତ୍ରୀଙ୍କର ଅନେକ ଫଟୋ ସୋସିଆଲ୍ ମିଡ଼ିଆରେ ଭାଇରାଲ୍ ହେବାରେ ଲାଗିଛି । ଅନ୍ୟପକ୍ଷରେ ତାଙ୍କ ବିରୋଧରେ ଆସିଥିବା ଅଭିଯୋଗକୁ ମିଛ ବୋଲି କହିଛନ୍ତି ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ । ହାଇଦ୍ରାବାଦ ଗସ୍ତକାଳରେ ସେ କୌଣସି ବେଆଇନ କାର୍ଯ୍ୟ କରିନାହାନ୍ତି କି ଅତିଥିଙ୍କ ପାଇଁ ସରକାରୀ ତହବିଲରୁ ଟଙ୍କାଟିଏ ଖର୍ଚ୍ଚ କରିନାହାନ୍ତି ବୋଲି ସଫେଇ ଦେଇଛନ୍ତି ।ମୁଖ୍ୟମନ୍ତ୍ରୀ କ୍ଷୁବ୍ଧ!___________ପର୍ଯ୍ୟଟନ ମନ୍ତ୍ରୀଙ୍କ ବିରୋଧରେ ଆସିଥିବା ଅଭିଯୋଗ ତାଙ୍କ ଦୃଷ୍ଟିକୁ ଆସିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କ୍ଷୁବ୍ଧ ହୋଇପଡ଼ିଥିବା ଜଣାପଡ଼ିଛି । ମୁଖ୍ୟମନ୍ତ୍ରୀଙ୍କ ଦପ୍ତର ପକ୍ଷରୁ ଏହା ଉପରେ ତନାଘନା ଆରମ୍ଭ ହୋଇଛି । କୌଣସି ମୁହୁର୍ତ୍ତରେ ଜ୍ୟୋତିପ୍ରକାଶଙ୍କ ମନ୍ତ୍ରୀ ପଦ ଚାଲିଯାଇପାରେ ବୋଲି ଚର୍ଚ୍ଚା ହେଉଛି ।

ଗଜପତି ଜିଲ୍ଲା ବରିଷ୍ଠ କଳାକାର ସଂଘ ଗଠିତ…!

!!! ଗଜପତି ଜିଲ୍ଲା ରୁ ପାରଳାଖେମୁଣ୍ଡି ଟାଉନ ପ୍ରତିନିଧି ଅନିତା କୁମାରୀ ଅଧିକାରୀ ଙ୍କ ରିପୋର୍ଟ !!!

ଏଥର ସମ୍ଭାଳ (ପାରଳାଖେମୁଣ୍ଡି) – ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ଠାରେ ଗଜପତି ଜିଲ୍ଲା ବରିଷ୍ଠ କଳାକାର ସଂଘ ଗଠିତ ହୋଇଯାଇଛି । ଏହି ଅବସରରେ ସ୍ଥାନୀୟ ବଡ ରାଧାକାନ୍ତ ମନ୍ଦିର ଝୁଲଣ ମଣ୍ଡପ ଠାରେ ପାରଳାଖେମୁଣ୍ଡି ସହରର ବରିଷ୍ଠ ମଞ୍ଚ ନିର୍ଦ୍ଦେଶକ ଓ କଳାକାର ମାନଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଥିଲା । ମୁଖ୍ୟତଃ ଏହି ବୈଠକ ବ୍ରହ୍ମପୁର ଠାରେ ଥିବା ଦକ୍ଷିଣ ଓଡିଶା ବରିଷ୍ଠ କଳାକାର ମହାସଂଘଙ୍କ ପରାମର୍ଶ କ୍ରମେ ହୋଇଥିବା ବେଳେ ଏହା ସେହି ମହାସଂଘ ଅଧୀନରେ ପରିଚାଳିତ ହେବ ବୋଲି କୁହାଯାଇଛି । ଆୟୋଜିତ ବୈଠକରେ ବରିଷ୍ଠ ସାହିତ୍ୟିକ ତଥା ଗବେଷକ ଉପାନ୍ତ ପ୍ରହରୀ ପୂର୍ଣ୍ଣଚନ୍ଦ୍ର ମହାପାତ୍ର ସଭାପତିତ୍ୱ କରିଥିଲେ। ବୈଠକରେ ମୁଖ୍ୟତଃ ଲୋକ-କଳାର ପୁନର୍ଗଠନ କରିବା ସହ କଳାକାର ମାନଙ୍କୁ ଚିହ୍ନଟ କରି ସେମାନଙ୍କୁ ଆବଶ୍ୟକ ପ୍ରୋତ୍ସାହନ ଯୋଗାଇ ଦେବାରେ ସାହାଯ୍ୟ କରିବା ନିମନ୍ତେ ସଂଘ ଗଠନ ହୋଇ କାର୍ଯ୍ୟ କରିବା ଏହାର ମୁଖ୍ୟ ଉଦ୍ଦେଶ୍ୟ । ଅନ୍ୟପକ୍ଷରେ ଜିଲ୍ଲାରେ ଥିବା ବହୁ ସଂଖ୍ୟାରେ କଳାକାର ଲୁକାୟିତ ଅବସ୍ଥାରେ ରହି ବିଭିନ୍ନ ସମସ୍ୟା ମଧ୍ୟଦେଇ ଗତି କରୁଛନ୍ତି । ସେହି ମାନଙ୍କୁ ଲୋକ ଲୋଚନକୁ ଆଣିବା ସହ ସେମାନଙ୍କ ପେନସନ ବ୍ୟବସ୍ଥା କରିବା ଏବଂ ରହିଥିବା ପେନସନ ବ୍ୟବସ୍ଥାକୁ ୫ ହଜାର ଟଙ୍କାକୁ ବୃଦ୍ଧି କରିବା , ନୂତନ ରଙ୍ଗମଞ୍ଚ ନିର୍ମାଣ କରିବା ସହ ଜିଲ୍ଲାରେ ବର୍ଷ ବର୍ଷ ଧରି ରହିଥିବା ଗାଁ ଗହଳିର ଯାହାକି ଲୋପ ପାଇ ଯାଉଥିବା ଭାରତଲୀଳା , ଭୂତକେଳି , କୃଷ୍ଣଲୀଳା , ରାଧାକୃଷ୍ଣ ଲୀଳା , ଘୁଡୁକି , ପ୍ରହଲ୍ଲାଦ ନାଟକ , ଦାସକାଠିଆ , ସଙ୍ଗୀତ , ନୃତ୍ୟ ଓ ମଞ୍ଚ-ନାଟକର କଳାକାର ମାନଙ୍କୁ ଚିହ୍ନଟ କରାଯାଇ ପୁନରୁଦ୍ଧାର କରିବା ସମ୍ପର୍କରେ ବିସ୍ତୃତ ଆଲୋଚନା କରା ଯାଇଥିଲା । ଆସନ୍ତା ଡିସେମ୍ବର ମାସ ୨୦ ତାରିଖ ଦିନ ବ୍ରହ୍ମପୁର ଠାରେ କଳାକାର ମହାସଂଘ ପକ୍ଷରୁ ଏକ ବିରାଟ କଳାକାର ପଟୁଆର ବାହାରିବା ସହିତ କଳାକାର ଓ ଲୋକକଳା ସମସ୍ୟା ଉପରେ ଏକ ସ୍ମାରକପତ୍ର ରାଜ୍ୟ ସରକାରଙ୍କ ଉଦ୍ଦେଶ୍ୟରେ ଦିଆଯିବ । ତେଣୁ ଜିଲ୍ଲାର ସମସ୍ତ କଳାକାର ମାନଙ୍କୁ ଜିଲ୍ଲା ସଂଘର କାର୍ଯ୍ୟକାରୀ ସଭାପତି ବଟକୃଷ୍ଣ ପାତ୍ରଙ୍କୁ ଯୋଗାଯୋଗ କରିବା ପାଇଁ ବିଶେଷ ଅନୁରୋଧ କରାଯାଇଛି । ଏହି ଅବସରରେ ଗଜପତି ଜିଲ୍ଲା ବରିଷ୍ଠ କଳାକାର ସଂଘ କମିଟି ଗଠନ କରାଯାଇଥିଲା । ଏଥିରେ ସଭାପତି ଭାବେ ପୂର୍ଣ୍ଣଚନ୍ଦ୍ର ମହାପାତ୍ର , କାର୍ଯ୍ୟକାରୀ ସଭାପତି ବଟକୃଷ୍ଣ ପାତ୍ର , ଉପ-ସଭାପତି ନୃସିଂହାନନ୍ଦ ପାଣିଗ୍ରାହୀ ଏବଂ ଭାରତ ଭୂଷଣ ମହାନ୍ତି , ସମ୍ପାଦକ ମନୋଜ କୁମାର ପାଢୀ , ସହ-ସମ୍ପାଦକ ଆଦର୍ଶ ଦାସ , ଏବଂ କୋଷାଧ୍ୟକ୍ଷ ଶୁଭ୍ରାଂଶୁ ଶେଖର ପଟ୍ଟନାୟକ , କାର୍ଯ୍ୟକାରୀ ସଦସ୍ୟ ଭାବେ ପ୍ରବୀଣ ପଣ୍ଡା , କୈଳାଶ ପଟ୍ଟନାୟକ , ବିଚିତ୍ରା ନନ୍ଦ ବେବର୍ତ୍ତା , ଜଟିଆ ଗୌଡ , ହିମାଂଶୁ ଶେଖର ପଟ୍ଟନାୟକ ଏବଂ ଶରତ ଚନ୍ଦ୍ର ସାହୁ ପ୍ରମୁଖ । ଶେଷରେ ଭାରତ ଭୂଷଣ ମହାନ୍ତି ଉପସ୍ଥିତ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।ଏହି ବୈଠକ କାର୍ଯ୍ୟକ୍ରମରେ ସହରର ବହୁ ମଞ୍ଚ ନିର୍ଦ୍ଦେଶକ ଓ କଳାକାର ମାନେ ଯୋଗ ଦେଇଥିଲେ ।

ସାମ୍ବାଦିକମାନଙ୍କ ପାଇଁ ମୁଁ ଅଛି – ମାନସ ମଙ୍ଗରାଜ….!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ସାମ୍ବାଦିକମାନଙ୍କ ପାଇଁ ମୁଁ ଅଛି । ମୁଁ ସାମ୍ବାଦିକମାନଙ୍କ ଦୁଃଖ ଓ କଷ୍ଟକୁ ମୁଁ ଅନୁଭବ କରିପାରିଛି । ତେଣୁ ସାମ୍ବାଦିକମାନଙ୍କ ସ୍ୱତନ୍ତ୍ର ଆଇନ୍ ପ୍ରଣୟନ କରିବା ପାଇଁ ମୁଁ ସରକାରଙ୍କ ନିକଟରେ ମୋର ପ୍ରୟାସ ଜାରି ରଖିବି । ମାନ୍ୟବର ମୁଖ୍ୟମନ୍ତ୍ରୀ ମଧ୍ୟ ସାମ୍ବାଦକମାନଙ୍କ ସୁରକ୍ଷା, ପେନ୍ସନ ଏବଂ ଅନ୍ୟାନ୍ୟ ସୁବିଧା ସୁଯୋଗ ପାଇଁ ସଚେତନ ବୋଲି ରାଜ୍ୟ ସରକାରଙ୍କ ଗଣମାଧ୍ୟମ ପରାମର୍ଶଦାତା ମାନସ ମଙ୍ଗରାଜ କହିଛନ୍ତି | ସାମ୍ବାଦିକ ସୁରକ୍ଷା ପାଇଁ ସ୍ୱତନ୍ତ୍ର ଆଇନ୍ ପ୍ରଣୟନ କରିବାକୁ ଦୀର୍ଘ ଦିନ ହେଲା ଦାବି ହୋଇ ଆସୁଥିବା ବେଲେ କିଛିଦିନ ଧରି ସାମ୍ବାଦିକ ମିଳିତ ମଞ୍ଚ ତରଫରୁ ବିଭିନ୍ନ ମନ୍ତ୍ରୀ ଓ ବିଧାୟକମାନଙ୍କୁ ଭେଟି ଏ ଦିଗରେ ଆଇନ୍ ପ୍ରଣୟନ କରିବାକୁ ଉଦ୍ୟମ ଜାରି ରହିଛି | ଆଜି ବରିଷ୍ଠ ସାମ୍ବାଦିକ ରାମଚଣ୍ଡୀ ପ୍ରସାଦ ରଣସିଂହଙ୍କ ନେତୃତ୍ୱରେ ମଞ୍ଚର ସଦସ୍ୟମାନେ ଏ ନେଇ ଗଣମାଧ୍ୟମ ଓ ଲୋକସମ୍ପର୍କ ବିଭାଗର ପରମର୍ଶଦାତା ଶ୍ରୀ ମଙ୍ଗରାଜଙ୍କୁ ଭେଟି ଆଲୋଚନା କରିଥିଲେ । ଆଲୋଚନା ଶ୍ରୀ ମଙ୍ଗରାଜ ଉପରୋକ୍ତ ପ୍ରତିଶ୍ରୁତି ଦେଇଛନ୍ତି । ସୂଚନାଯୋଗ୍ୟ ଯେ ଶ୍ରୀ ମଙ୍ଗରାଜ ଜଣେ ବରିଷ୍ଠ ସାମ୍ବାଦିକ ଭାବେ ଜଣାଶୁଣା ଓ ସାମ୍ବାଦିକ ଭାବେ ତାଙ୍କର କାର୍ଯ୍ୟ କରିବାର ଦୀର୍ଘଦିନର ଅଭିଜ୍ଞତା ରହିଛି | ସେ ଯୋଗ ଦେବା ପରେ ସାମ୍ବାଦିକ ମାନଂକ କଲ୍ୟାଣ ପାଇଁ ଆନ୍ତରିକତା ପ୍ରଦର୍ଶନ କରି ସେ ଦିଗରେ କାର୍ଯ୍ୟ ଆରମ୍ଭ କରିଛନ୍ତି | କିଛି ଦିନ ତଳେ ଜଣେ ସାମ୍ବାଦିକଙ୍କ କିଡନୀ ପ୍ରତ୍ୟାରୋପଣ ପାଇଁ ସରକାରଙ୍କ ପକ୍ଷରୁ ୨ଲକ୍ଷ ଟଙ୍କାର ପ୍ରାରମ୍ଭିକ ଆର୍ଥିକ ସହାୟତା ଯୋଗାଇଦେବା ତାଙ୍କ ତତ୍ପରତା ଯୋଗୁ ସମ୍ଭବ ହୋଇପାରିଛି |

ଧର୍ମଗଡ ରାଜ ହୋଟେଲ ଠାରେ ଓବିସି, ଏସଟି, ଏସସି ଏବଂ ସଂଖ୍ୟାଲଘୁ ମିଳିତ ମଞ୍ଚ ଧର୍ମଗଡ ଉପଖଣ୍ଡ ତରଫରୁ ସମ୍ବିଧାନ ଦିବସ ପାଳିତ…!

!!! କଳାହାଣ୍ଡି ଜିଲ୍ଲା ଧର୍ମଗଡ଼ ରୁ ପ୍ୟାରୀଲାଲ ଦୁର୍ଗା ଙ୍କ ରିପୋର୍ଟ୍ !!!

ଏଥର ସମ୍ଭାଳ (ଧର୍ମଗଡ଼) – କଳାହାଣ୍ଡି ଜିଲ୍ଲା ଧର୍ମଗଡ ରାଜ ହୋଟେଲ ଠାରେ ଓବିସି, ଏସଟି, ଏସସି ଏବଂ ସଂଖ୍ୟାଲଘୁ ମିଳିତ ମଞ୍ଚ ଧର୍ମଗଡ ଉପଖଣ୍ଡ ତରଫରୁ ସମ୍ବିଧାନ ଦିବସ ପାଳିତ ହୋଇଯାଇଛି। ଉକ୍ତ କାର୍ଯ୍ୟକ୍ରମ ଟିକୁ ଧୀମାନ ଚକ୍ରଧର ବେନୁପାଣି ସଭାପତିତ୍ୱ କରିଥିବା ବେଳେ କାର୍ଯ୍ୟକ୍ରମଟିରେ ମୁଖ୍ୟ ଅତିଥି ଭାବରେ ବସନ୍ତ ନାଏକ, ମୁଖ୍ୟ ବକ୍ତା ଭାବରେ ଯୁଗେଶ୍ୱର ସାଗର, ସମ୍ମାନିତ ଅତିଥି ଭାବରେ ପ୍ରଭାକର ଜାଲ, ସାମନ୍ତ ଦୁର୍ଗା, ଦିଗାମ୍ବର ଦୁର୍ଗା, ପ୍ରତାପ ସୁନାନୀ ଯୋଗ ଦେଇଥିଲେ। ଭାରତ ସମ୍ବିଧାନ ହେଉଛି ବିଶ୍ୱର ବୃହତ ସମ୍ବିଧାନ, ସମ୍ବିଧାନ ହେଉଛି ରାଷ୍ଟ୍ରର ମୌଳିକ ଆଇନ, ସମ୍ବିଧାନ ହେଉଛି ନୀତିମାନଙ୍କର ସମାହାର, ସମ୍ବିଧାନ ଦେଶର ଲୋକଙ୍କୁ ଶୃଙ୍ଖଳିତ ରଖିବା ସହ ନିରାପତ୍ତା କରିଥାଏ ବୋଲି ମୁଖ୍ୟ ବକ୍ତା ଶ୍ରୀ ଯୁଗେଶ୍ୱର ସାଗର ନିଜ ବକ୍ତବ୍ୟ ରେ କହିଥିବା ବେଳେ ସମାନତା, ସ୍ୱତନ୍ତ୍ରତା, ନ୍ୟାୟ, ଏବଂ ଭାଇଚାରା ବିଷୟରେ ସମ୍ବିଧାନ ରେ ଥିବା ମୌଳିକ ଅଧିକାର କୁ ସୁନ୍ଦର ଭାବରେ ବୁଝାଇଥିଲେ। ଏହି ସଭାରେ ସାଇକେଲ ପୋଲୋ ଖେଳରେ ସୁନାମ ଧନ୍ୟ ହୋଇଥିବା ଧୀମତି ଅନିତା ନାଏକ ଙ୍କୁ ସମ୍ମାନିତ ଏବଂ ମାନପତ୍ର ପ୍ରଦାନ କରାଯାଇଥିଲା ତତ ସହିତ କଳାହାଣ୍ଡି ଜିଲ୍ଲା ଧର୍ମଗଡ ବ୍ଲକ ପ୍ରାଥମିକ ସଙ୍ଘ ର ସଭାପତି ବଙ୍କିମ ଚନ୍ଦ୍ର ସାଗର ଓ ସାଧାରଣ ସମ୍ପାଦକ ଲୋକେସ୍ୱର ପାରି ଙ୍କୁ ସମ୍ମାନିତ କରାଯାଇଥିଲା। ଉକ୍ତ କାର୍ଯ୍ୟକ୍ରମଟିକୁ ଧୀମାନ ଟିକେଶ୍ୱର ନାଏକ ସଭା ପରିଚାଳନା କରିଥିବା ବେଳେ ଧୀମାନ ଦେବାର୍ଚ୍ଚନ ସେଠିଆ ବହୁତ ସୁନ୍ଦର ଭାବରେ ଧନ୍ୟବାଦ ଅର୍ପଣ କରିଥିଲେ. ଉକ୍ତ ସମ୍ବିଧାନ ଦିବସ ସଭା କାର୍ଯ୍ୟ ରେ ଧୀମାନ ଢଗ ନାଏକ, କମଳା କାନ୍ତ ବିହାରୀ, ଫକୀର ନାରାୟଣ ଜାଲ, ବିନୋଦ ପାଣିଗ୍ରାହୀ, ଶ୍ୟାମ ମାଝୀ, ୟୁଗେଶ ତାଣ୍ଡି, ମୁନିଆ ସିପିକାସହଯୋଗ କରିଥିବା ବେଳେ ଅଞ୍ଚଳର ବହୁ ଆମ୍ବେଦକରବାଦୀ ଓ ଆମ୍ବେଦକରପ୍ରେମୀ ଯୋଗ ଦେଇଥିଲେ।

ଭାରତ ର ସମ୍ବିଧାନ ଆଧ୍ୟାତ୍ମିକତା ଭିତ୍ତି ଉପରେ ପ୍ରତିଷ୍ଠିତ – ରାଜ୍ୟପାଳ…!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଭାରତର ସଂବିଧାନ ଆଧ୍ୟାତ୍ମିକତା ଭିତ୍ତି ଉପରେ ପ୍ରତିଷ୍ଠିତ ଯେଉଁଥିରେ ମାନବୀୟ ମୂଲ୍ୟବୋଧ ବିଶେଷ ଭାବରେ ପ୍ରତିଫଳିତ । ଲୋକମାନଙ୍କର ଆଶା, ଆକାଂକ୍ଷା ଓ ଅଭୀପ୍ସାର ଆଧାର ଭାବରେ ଏବଂ ଭାରତୀୟତାର ମହନୀୟ ଭାବବୋଧର କ୍ରିୟାଶୀଳ ମାଧ୍ୟମ ହେଉଛି ସଂବିଧାନ । ଏଥିପାଇଁ ଭାରତର ସଂବିଧାନ ବିଶ୍ୱରେ ସର୍ବଶ୍ରେଷ୍ଠ ବିବେଚିତ ବୋଲି ରାଜ୍ୟପାଳ ପ୍ରଫେସର ଗଣେଶୀ ଲାଲ ପ୍ରକାଶ କରିଛନ୍ତି । ଆଜି ରାଜଭବନରେ ଆୟୋଜିତ ସଂବିଧାନ ଦିବସ ସମାରୋହରେ ରାଜ୍ୟପାଳ ପ୍ରଫେସର ଲାଲ କହିଲେ ଯେ ସଂବିଧାନର ନିର୍ଦ୍ଦେଶାବଳୀର ପ୍ରତିପାଳନ ଆମର ପରମ କର୍ତ୍ତବ୍ୟ । ପ୍ରତ୍ୟେକ ନାଗରିକ ନିଜ ଦାୟିତ୍ୱ ପ୍ରତି ସଚେତନ ରହି କାର୍ଯ୍ୟ କରିବା ହିଁ ଏହି ଦିବସର ଅନୁଚିନ୍ତା । ମୁଖ୍ୟବକ୍ତା ଭାବରେ ଯୋଗଦେଇ ପ୍ରଖ୍ୟାତ ଲେଖକ ତଥା ରାଜନୀତି ଶାସ୍ତ୍ରୀ ଅଧ୍ୟାପକ ବିଶ୍ୱରଂଜନ କହିଲେ ଯେ ଭାରତର ସଂବିଧାନ ଭାରତୀୟ ସଂସ୍କୃତିର ଯଥାର୍ଥ ପ୍ରତୀକ । ଏହା ଆମର ପରଂପରା ଓ ଆଦର୍ଶର ପ୍ରତିରୂପ । ଏବଂ ସମୟକ୍ରମେ ଏହା ସମୃଦ୍ଧ ଓ ପରିପୁଷ୍ଟ ହେବାରେ ଲାଗିଛି । ବିବିଧତାକୁ ଏକୀଭୂତ କରି ଏକ ଆଦର୍ଶ ବିଚାରଧାରା ଓ ସମନ୍ୱୟ ଭାବ ପାଇଁ ଭାରତୀୟ ସଂବିଧାନର ବିଶେଷତା ସର୍ବ ସ୍ୱୀକୃତ । ରାଜ୍ୟପାଳଙ୍କ ପ୍ରମୁଖ ସଚିବ ମଧୁସୂଦନ ପାଢ଼ୀ ସଂବିଧାନ ଦିବସର ମହତ୍ୱ ଓ ତାତ୍ପର୍ଯ୍ୟ ସଂପର୍କରେ ଆଲୋଚନା କରିଥିଲେ । ରାଜ୍ୟପାଳଙ୍କ ଲୋକସଂପର୍କ ଅଧିକାରୀ ସଂଗ୍ରାମ ଦେଓଭଂଜ କାର୍ଯ୍ୟକ୍ରମ ପରିଚାଳନା କରିଥିଲେ । ରାଜଭବନର ସମସ୍ତ ଅଧିକାରୀ ଓ କର୍ମଚାରୀ ସମାରୋହରେ ଉପସ୍ଥିତ ଥିଲେ ।

ଉତ୍ସବ ମୁଖର ହେବ ଗଜପତି, ଜାନୁଆରୀ ୧୦ରୁ ଗଜପତି ଉତ୍ସବ ; ୫ଦିନ ଧରି ଅନୁଷ୍ଠିତ ହେବ ସାଂସ୍କୃତିକ ମହାପର୍ବ…!

!!! ଗଜପତି ଜିଲ୍ଲା ରୁ ପାରଳାଖେମୁଣ୍ଡି ଟାଉନ ପ୍ରତିନିଧି ଅନିତା କୁମାରୀ ଅଧିକାରୀ ଙ୍କ ରିପୋର୍ଟ !!!

ଏଥର ସମ୍ଭାଳ (ପାରଳାଖେମୁଣ୍ଡି) – ଗଜପତି ଜିଲ୍ଲା ସଦରମହକୁମା ପାରଳାଖେମୁଣ୍ଡି ସ୍ଥିତ ଜିଲ୍ଲା ପରିଷଦ ସମ୍ମିଳନୀ କକ୍ଷ ଠାରେ ଜିଲ୍ଲାପାଳ ଅନୁପମ ଶାହାଙ୍କ ଅଧ୍ୟକ୍ଷତାରେ ଜିଲ୍ଲା ସ୍ତରୀୟ ଗଜପତି ଉତ୍ସବ ପାଇଁ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ଏହି ଉତ୍ସବ ଜିଲ୍ଲା ପ୍ରଶାସନ ଓ ଜନସାଧାରଣଙ୍କ ମିଳିତ ସହଯୋଗରେ ମହା-ଆଡମ୍ବରରେ ହେବାକୁ ବୈଠକରେ ସର୍ବସମ୍ମତି କ୍ରମେ ଆସନ୍ତା ଜାନୁଆରୀ ମାସର ୧୦ ରୁ ୧୪ ତାରିଖ ୫ଦିନ ଧରି ଅନୁଷ୍ଠିତ ହେବାକୁ ନିଷ୍ପତ୍ତି ନିଆଯାଇଥିଲା । ଅନ୍ୟ ପକ୍ଷରେ ଏହି ବୈଠକରେ ମୁଖ୍ୟତଃ ପୂର୍ବାଞ୍ଚଳ ସାଂସ୍କୃତିକ କେନ୍ଦ୍ର , କୋଲକାତା ସହିତ ଯୋଗସୂତ୍ର ରକ୍ଷା କରି ତାର ମାଧ୍ୟମରେ ବିଭିନ୍ନ ରାଜ୍ୟର ସାଂସ୍କୃତିକ ଦଳ ସମେତ ରାଜ୍ୟର ବିଭିନ୍ନ ଜିଲ୍ଲାର ସାଂସ୍କୃତିକ ଦଳ ସବୁ ଆସି ଗଜପତି ଉତ୍ସବରେ ସେମାନଙ୍କର ପାରମ୍ପରିକ ନୃତ୍ୟ , ଲୋକନୃତ୍ୟ ପରିବେଷଣ କରିବାର କାର୍ଯ୍ୟକ୍ରମ ରହିଛି । ଦୀର୍ଘ ପାଞ୍ଚଦିନ ବ୍ୟାପି ଆୟୋଜିତ ହେବାକୁ ଥିବା ଏହି ଜିଲ୍ଲା ସ୍ତରୀୟ ଗଜପତି ଉତ୍ସବ କାର୍ଯ୍ୟକ୍ରମର ସୁ-ପରିଚାଳନା କରାଯିବା ଅବସରରେ ବିଭିନ୍ନ କମିଟି ଯଥା:- ଅଭ୍ୟର୍ଥନା , ମଞ୍ଚ ଓ ଷ୍ଟଲ ନିର୍ମାଣ , ସାଂସ୍କୃତିକ ଓ ମଞ୍ଚ ପରିଚାଳନା , ଅର୍ଥ , ରହିବା-ଉପଯୋଗୀ, ପରିବହନ , ଖାଦ୍ୟ , ସ୍ମରଣୀକା , ମଶାଲ-ଜ୍ୟୋତି ଓ ମେମୋଣ୍ଟ ପ୍ରଭୃତି କମିଟି ମାନ ସବୁ ପୂର୍ବ ବୈଠକରେ ଗଠନ କରାଯାଇଥିଲା । ସମ୍ପୂର୍ଣ୍ଣ ଭାବେ ଜିଲ୍ଲାସ୍ତରୀୟ ଉତ୍ସବ କମିଟିର ଅଧ୍ୟକ୍ଷ ଭାବେ ଜିଲ୍ଲାପାଳ ଅନୁପମ ଶାହା ରହିଛନ୍ତି । ଜିଲ୍ଲା ସ୍ତରୀୟ ଗଜପତି ଉତ୍ସବ ଆସନ୍ତା ଜାନୁୟାରୀ ୧୦,୧୧,୧୨ ତିନି ଦିନ ଏବଂ ପଲ୍ଲୀଶ୍ରୀ ମେଳା ୧୦ ତାରିଖ ଠାରୁ ୧୪ ପର୍ଯ୍ୟନ୍ତ ଏହି ଭଳି ୫ଦିନ ଧରି ଅନୁଷ୍ଠିତ ହେବ ପାଇଁ ନିଷ୍ପତ୍ତି ହୋଇଥିଲା। ଏହି ବୈଠକରେ ବ୍ଲକ ସ୍ତରୀୟ ଗଜପତି ଉତ୍ସବ ପାଇଁ ନିଷ୍ପତ୍ତି ନିଆଯାଇଥିଲା। ଗୋଷଣୀ ବ୍ଲକରେ ଜାନୁଆରୀ ୨ ଓ ୩ ତାରିଖ , କାଶୀନଗର ବ୍ଲକରେ ଜାନୁଆରୀ ୩ ଓ ୪ ତାରିଖ , ଗୁମ୍ମା ବ୍ଲକରେ ଜାନୁଆରୀ ୮ ଓ ୯ ତାରିଖ , ରାୟଗଡ଼ ବ୍ଲକରେ ଜାନୁଆରୀ ୪ ଓ ୫ ତାରିଖ ,ନୂଆଗଡ ବ୍ଲକରେ ଜାନୁଆରୀ ୬ ଓ ୭ ତାରିଖ , ମୋହନା ବ୍ଲକରେ ଜାନୁଆରୀ ୭ ଓ ୮ ତାରିଖ, ଏବଂ ପାରଳା ପୌର ପରିଷଦରେ ଜାନୁଆରୀ ୫ ତାରିଖରେ ରାହାଗିରି ଓ ମଶାଲ ଶୋଭାଯାତ୍ରା ୨୦୧୯ ଡିସେମ୍ବର ୩୦ତାରିଖରେ ହେବା ପାଇଁ ସ୍ଥିର କରାଯାଇଥିଲା। ମଞ୍ଚାସୀନ ଅତିଥି ଭାବେ ଜିଲ୍ଲା ଆରକ୍ଷୀ ଅଧିକ୍ଷକ ସାରା ଶର୍ମା , ଉପ-ଜିଲ୍ଲାପାଳ ରଜନୀ କାନ୍ତ ସ୍ବାଇଁ , ଅତିରିକ୍ତ ଉପ-ଜିଲ୍ଲାପାଳ ସରୋଜ କୁମାର ବେହେରା ଏବଂ ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ରବି ଚନ୍ଦ୍ର ନାୟକ ପ୍ରମୁଖ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ । ଜିଲ୍ଲା ସୂଚନା ଓ ଲୋକ ସମ୍ପର୍କ ବିଭାଗର ବରିଷ୍ଠ ଗ୍ରନ୍ଥାଗାରକ ଅଚ୍ୟୁତା ନନ୍ଦ ବସ୍ତିଆ ଏଜେଣ୍ଡା ପ୍ରକାରେ ବୈଠକ କାର୍ଯ୍ୟକ୍ରମକୁ ସଂଯୋଜନା କରିଥିଲେ । ଏହି ବୈଠକ କାର୍ଯ୍ୟକ୍ରମରେ ବହୁ ସଂଖ୍ୟାରେ ବିଭିନ୍ନ ବିଭାଗର ସରକାରୀ ଅଧିକାରୀ ଓ କର୍ମଚାରୀ , ସାମ୍ବାଦିକ ପ୍ରମୁଖ ଯୋଗ ଦେଇଥିଲେ ।

ଗଜପତି ଜିଲ୍ଲା ରା:ଉଦୟଗିରି ବ୍ଲକରେ ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କ ଯୁଗ୍ମ ଜନ-ଅଭିଯୋଗ ଶୁଣାଣୀ…!

!!! ଗଜପତି ଜିଲ୍ଲା ରୁ ପାରଳାଖେମୁଣ୍ଡି ଟାଉନ ପ୍ରତିନିଧି ଅନିତା କୁମାରୀ ଅଧିକାରୀ ଙ୍କ ରିପୋର୍ଟ !!!

ଏଥର ସମ୍ଭାଳ (ପାରଳାଖେମୁଣ୍ଡି) – ଗଜପତି ଜିଲ୍ଲା ରା:ଉଦୟଗିରି ବ୍ଲକ ଅନ୍ତର୍ଗତ ପୁରୁଣାପାଣି ଗ୍ରାମରେ ଜିଲ୍ଲା ପ୍ରଶାସନ ଆନୁକୂଲ୍ୟରେ ଗଜପତି ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କ ଯୁଗ୍ମ ଜନ-ଅଭିଯୋଗ ଶୁଣାଣୀ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଜିଲ୍ଲାପାଳ ଅନୁପମ ଶାହା ଏବଂ ଆରକ୍ଷୀ ଅଧିକ୍ଷକ ସାରା ଶର୍ମା ଯୋଗଦେଇ ମୋଟ ୧୦୨ ଗୋଟି ଅଭିଯୋଗର ଶୁଣାଣୀ କରିଥିଲେ । ଆସିଥିବା ମୋଟ ୧୦୨ ଗୋଟି ଅଭିଯୋଗ ଦରଖାସ୍ତ ମଧ୍ୟରୁ ୪୩ ଗୋଟି ଅଭିଯୋଗ ଦରଖାସ୍ତ ବ୍ୟକ୍ତିଗତ ସମସ୍ୟା ସମ୍ପର୍କିତ ଥିବାବେଳେ ୫୯ ଟି ଅଭିଯୋଗ ଦରଖାସ୍ତ ଗ୍ରାମର ଗୋଷ୍ଠୀ ଭିତ୍ତିକ ସମସ୍ୟା ଥିଲା । ଏହି କାର୍ଯ୍ୟକ୍ରମରେ ମୁଖ୍ୟତଃ ଅତି ଆବଶ୍ୟକ ସହାୟତା କରୁଥିବା କ୍ଷେତ୍ରରେ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ମୋଟ ୬ ଜଣଙ୍କୁ ୪୩ ହଜାର ଟଙ୍କା ଲେଖାଏଁ ର ଆର୍ଥିକ ସହାୟତା ପ୍ରଦାନ କରାଯାଇଥିବା ବେଳେ ଜିଲ୍ଲା ରେଡକ୍ରସ ପାଣ୍ଠିରୁ ୨ ଜଣଙ୍କୁ ୫ ହଜାର ଟଙ୍କା ଲେଖାଏଁ ର ଆର୍ଥିକ ପ୍ରଦାନ କରା ଯାଇଥିଲା । କାର୍ଯ୍ୟକ୍ରମରେ ମୋଟ ୩୪ ଗୋଟି ଅଭିଯୋଗ ଦରଖାସ୍ତ ଉପରେ ତ୍ୱରିତ ସମାଧାନ କରାଯାଇଥିଲା ।ଏହି ଯୁଗ୍ମ ଜନ-ଅଭିଯୋଗ ଶୁଣାଣୀ କାର୍ଯ୍ୟକ୍ରମରେ ଅନ୍ୟ ମାନଙ୍କ ମଧ୍ୟରେ ରା:ଉଦୟଗିରି ବିଡ଼ିଓ ପ୍ରଦୀପ କୁମାର ନାୟକ , ଜିଲ୍ଲା ପରିଷଦ ସଭ୍ୟା ଶୁପ୍ରଭା ମଣ୍ଡଳ ଏବଂ ସଭ୍ୟ ଯାକବ ମାଝୀ , ବ୍ଲକ ଅଧ୍ୟକ୍ଷ ଅନିତା ମଣ୍ଡଳ ପ୍ରମୁଖ ମଞ୍ଚାସୀନ ଥିଲେ ।