ଧର୍ମଗଡ ରେଡ଼କ୍ରସ ଟାଉନହଲ କୁ ନକରାଯାଉ ବ୍ୟବସାୟିକ କେନ୍ଦ୍ର…!

!!! କଳାହାଣ୍ଡି ଜିଲ୍ଲା ଧର୍ମଗଡ଼ ରୁ ପ୍ୟାରୀଲାଲ୍ ଦୁର୍ଗା ଙ୍କ ରିପୋର୍ଟ୍ !!!

ଏଥର ସମ୍ଭାଳ (ଧର୍ମଗଡ଼) -କଳାହାଣ୍ଡି ଜିଲ୍ଲା ଧର୍ମଗଡ଼ସ୍ଥିତ ରେଡ଼କ୍ରସ ଟାଉନହଲ କୁ ଜୈନିକ ଟେଣ୍ଟ ହାଉସ ମାଲିକ ଲିଜ଼ରେ ନେଇ ବାହାର ରାଜ୍ୟର ବ୍ୟବସାୟୀ ଙ୍କୁ ଭଡା ରେ ଦେବା ଘଟଣା ଧର୍ମଗଡ଼ ଉପଜିଲ୍ଲାପାଳ ଙ୍କ ନିକଟରେ ଅଭିଯୋଗ ହୋଇଛି। ୨୦୦୩ ମସିହାରେ ତତ୍କାଳୀନ ଉପଜିଲ୍ଲାପାଳ ଭି. କାର୍ତ୍ତିକେୟ ପାଣ୍ଡିଆନ, ଆଇଏଏସ,ଙ୍କ ଉଦ୍ୟମକ୍ରମେ ଉକ୍ତ ଟାଉନ ହଲର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା ଓ ୨୦୧୦ ମସିହାରେ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଏହାର ଉଦଘାଟନ କରିଥିଲେ।ରକ୍ଷଣାବେକ୍ଷଣର ଦୃଷ୍ଟିକୁ ନେଇ ପ୍ରଶାସନ ଏହାକୁ ଲିଜ଼ ସୂତ୍ରରେ ପ୍ରଦାନ କରିଛନ୍ତି। ବିଭିନ୍ନ ସରକାରୀ କାର୍ଯ୍ୟକ୍ରମ ସମେତ ବିବାହ, ବ୍ରତ, ସଭା ସମିତି ପାଇଁ ଏହି ଟାଉନ ହଲ ଉଦିଷ୍ଟ ଥିଲେ ହେଁ ଉକ୍ତ ଟାଉନ ହଲ କୁ ଲିଜ଼ରେ ନେଇଥିବା ଜୈନିକ ଟେଣ୍ଟ ହାଉସ ମାଲିକ ମାସ ମାସ ଧରି ବାହାର ରାଜ୍ୟର ବ୍ୟବସାୟୀଙ୍କୁ ଭଡାରେ ଦେଇ ଦେଉଥିବା ଯୋଗୁଁ ଏଠାରେ ଆଉ କୋଣସି ସରକାରୀ କି ବେସରକାରୀ କର୍ଯ୍ୟକ୍ରମ ହୋଇପାରୁନାହିଁ। ଗତବର୍ଷ ଏହି ଟାଉନ ହଲକୁ ‘ଚେନ୍ନାଇ ବିଗ ବଜ଼ାର’ ନାମକ ସଂସ୍ଥାକୁ ଛଅ ମାସ ଧରି ଦିଆଯାଇଥିବା ବେଳେ ଚଳିତ ବର୍ଷ ମଧ୍ୟ ଉକ୍ତ ବ୍ୟବସାୟୀ ଙ୍କୁ ଏବେ ଟାଉନହଲ ପୁଣି ସମ୍ପୁକ୍ତ ଟେଣ୍ଟ ମାଲିକ ଭଡାରେ ଦେଇଥିବା ଦେଖାଦେଇଛି।ଫଳରେ ଜନ ସାଧାରଣଙ୍କ ଦ୍ଵାରା ହେବାକୁ ଥିବା ଉତ୍ସବ ଓ ମୋହତ୍ସବ ରେ ଏହା ଅସୁବିଧା ସୃଷ୍ଟି କରିବ। ବିଭିନ୍ନ ସରକାରୀ କାର୍ଯ୍ୟକ୍ରମ ସମେତ ଜନସାଧାରଣ ଙ୍କ ସାମାଜିକ ହିତ କାର୍ଯ୍ୟକ୍ରମ ପାଇଁ ଉଦ୍ଦିଷ୍ଟ ଏହି ଟାଉନ ହଲ କୁ ବ୍ୟବସାୟୀ କେନ୍ଦ୍ର ପାଇଁ ଅନୁମତି ନ ଦେବା ଲାଗୀ ଧର୍ମଗଡ଼ ଚେମ୍ବର ଅଫ କମର୍ସ ପକ୍ଷରୁ ଉପଜିଲ୍ଲାପାଳଙ୍କ ନିକଟରେ ଅଭିଯୋଗ କରାଯାଇଛି।

ସୁଷୁମା ସ୍ଵରାଜ ଙ୍କ ବିୟୋଗରେ ସିନାପାଲି ବସଷ୍ଟାଣ୍ଡ ଠାରେ ଶୋକ ସଭା ଅନୁଷ୍ଠିତ ହୋଇଯାଇଛି…!

!!! ନୂଆପଡ଼ା ଜିଲ୍ଲା ରୁ ଜିଲ୍ଲା ପ୍ରତିନିଧି ସତୀଶ ଯୋଶୀ ଙ୍କ ରିପୋର୍ଟ୍ !!!

ଏଥର ସମ୍ଭାଳ (ନୂଆପଡ଼ା) – ସିନାପାଳି ଭାରତୀୟ ଜନତା ପାର୍ଟି ତରଫରୁ ପୁର୍ବତନ ମନ୍ତ୍ରୀ ତଥା ବରିଷ୍ଠ ସଭା ନେତ୍ରୀ ସୁଷମା ସ୍ଵରାଜ ଙ୍କ ଵିୟୋଗ ରେ ଆଜି ଦିନ ୧୧ ଟାରେ ସିନାପାଳି ବସଷ୍ଟାଣ୍ଡ ଠାରେ ଅମର ଆତ୍ମାର ସଦ୍ଗତି ପାଇଁ ଏକ ଶୋକ ସଭା ଅନୁଷ୍ଠିତ ହୋଇଥିଲା । ଏହି ସଭା ରେ ଭାରତୀୟ ଜନତା ପାର୍ଟି ର ଜିଲ୍ଲା ସଭାପତି ଶିବ ପ୍ରସାଦ ମୁଣ୍ଡ ,ସଧାରଣ ସମ୍ପାଦକ ସୁବ୍ରତ କୁମର ଠାକୁର ,ମଣ୍ଡଳ ସଭାପତି ଆରୀ ଯୋଷି, ଆଇନଜିବୀ ସୁବ୍ରତ ମେହେର, ସଂଜୟ ବେହେରା,ମାର୍କଣ୍ଡ ଗହୀର,ପ୍ରତାପ ଗୋଆଲ,ଅବସର ପ୍ରାପ୍ତ ଶିକ୍ଷକ ପ୍ରଶାନ୍ତ ଯୋଶୀ ଓ ଭାରତୀୟ ଜନତା ପାଟି ର ଶତାଧିକ କର୍ମୀ ଙ୍କ ଉପସ୍ଥିତି ଥିଲେ। ସଭା ଶେଷ ରେ ୨ ମିନିଟ ନିରବ ପ୍ରାର୍ଥନା କରି ସଭାସାଙ୍ଗ କରାଯାଇଥିଲା ।

ସରକାରୀ ସାହାଯ୍ଯ ଅପେକ୍ଷା ରେ ଅସହାୟ ମହିଳା ପାର୍ବତୀ ନାଗ…!

!!! କଳାହାଣ୍ଡି ଜିଲ୍ଲା ଧର୍ମଗଡ଼ ରୁ ପ୍ରତିନିଧି ପ୍ୟାରୀଲାଲ୍ ଦୁର୍ଗା ଙ୍କ ରିପୋର୍ଟ୍ !!!

ଏଥର ସମ୍ଭାଳ (ଧର୍ମଗଡ଼) – କଳାହାଣ୍ଡି ଜିଲ୍ଲା କୋକସରା ବ୍ଲକ ବଡ଼ ପୋଡ଼ାଗୁଡା ଅନ୍ତର୍ଗତ ଏନ ଗୁଡ଼ା ଗ୍ରାମର ଉପେନ୍ଦ୍ର ନାଗ ଙ୍କ ଦେହାନ୍ତ ପରେ ସ୍ତ୍ରୀ ପାର୍ବତୀ ନାଗ ଭଙ୍ଗା ଦାଦରା ଚାଳ ଛପର ଘରେ ଅସହାୟ ଅବସ୍ଥାରେ ଦିନ କାଟୁଛନ୍ତି। ରାଜ୍ଯ ସରକାର ଙ୍କ ସମସ୍ତ ଯୋଜନା ୟାଙ୍କରି ଠାରେ ଅପହଞ୍ଚ। ବର୍ତ୍ତମାନ ର ଲଘୁଚାପ ଜନିତ ଲଗାଣ ବର୍ଷା ରେ ପାର୍ବତୀ ନାଗ ଙ୍କ ଚାଳ ଛପର ଦଦରା ମାଟି ଘରଟି ଭୁଶୁଡ଼ି ପଡ଼ିଛି। ବର୍ତ୍ତମାନ୍ ଏବେ ସେ ବେସାହାରା। କେବଳ ସରକାରୀ ସହାୟତା ହିଁ ତାଙ୍କରି ସାହା ଭରସା ଜିଲ୍ଲା ପ୍ରଶାସନ ପକ୍ଷରୁ ସହଯୋଗ ର ହାତ ବଢ଼ାଇବାକୁ ସେ ନିବେଦନ କରିଛନ୍ତି।

ସ୍ଵଚ୍ଛ ଭାରତ ଅଭିଯାନ ପକ୍ଷରୁ ନିର୍ମୀତ ଶୌଚାଳୟ ଖର୍ଚ୍ଚ ର ଅର୍ଥ ଆଜକୁ ୨ ବର୍ଷ ହେବ ପାଇ ପାରୁନାହାଁନ୍ତି ହିତାଧିକାରୀ…!

!!! କଳାହାଣ୍ଡି ରୁ ଜିଲ୍ଲା ପ୍ରତିନିଧି ରଜତ୍ ପଟ୍ଟନାୟକ ଙ୍କ ରିପୋର୍ଟ୍ !!!

ଏଥର ସମ୍ଭାଳ (କଳାହାଣ୍ଡି) – କାଳାହାଣ୍ଡି ଜିଲ୍ଲା କେସିଙ୍ଗା ବ୍ଲକ ଭମରମାଲ ଗ୍ରାମ ର ଶତ୍ରୁଘନ ସାହୁ ସ୍ୱଚ୍ଛ ଭାରତ ଅଭିଯାନ ରେ ଗତ ବର୍ଷ ଏକ ଶୌଚାଳୟ ନିର୍ମାଣ କରିଥିଲେ । ଆଜକୁ ୨ ବର୍ଷ ହେଲା ଖର୍ଚ୍ଚ କରିଥିବା ୧,୨୦,୦୦୦ ଟଙ୍କା ପାଇପାରିନଥିବା ଏବଂ ଏଥି ନିମନ୍ତେ ବାରମ୍ବାର ବ୍ଲକ କାର୍ଯ୍ୟାଳୟ କୁ ଯାଇ ଗୁହାରି କରିବା ପରେ ବି କୌଣସି ସୁଫଳ ମିଳୁନଥିବା ଶତୃଘ୍ନ ସାହୁ ଅଭିଯୋଗ କରିଛନ୍ତି।

ଅନ୍ୟ ପକ୍ଷରେ ସ୍ଥାନୀୟ ଜୈନିକ ଠିକାଦାର ବିଭିନ୍ନ କ୍ଷେତ ହିଡ ଓ ନିଛାଟିଆ ସ୍ଥାନରେ ଅତି ନିମ୍ନ ମାନର ଶୌଚାଳୟ ନିର୍ମାଣ କରି ଗୋଟିଏ ଶୌଚାଳୟ ଉପରେ ୨ ରୁ ୩ ଥର ରଙ୍ଗ ଦେଇ ଅନ୍ୟ ଅନ୍ୟ ଲୋକଙ୍କ ନାଁରେ ବିଲ ପାସ କରି ସମସ୍ତ ଅର୍ଥରାଶି ଆତ୍ମସାତ କରୁଥିବା ସାଧାରଣ ରେ ଚର୍ଚ୍ଚା ହେଉଛି । କନିଷ୍ଠ ଯନ୍ତ୍ରୀ , କ୍ଲଷ୍ଟ୍ରର ସଂଯୋଜକ ଓ ଅନ୍ୟ ସମସ୍ତ ବିଭାଗୀୟ କର୍ମ ଚାରି ଙ୍କ ମିଳିତ ସହଯୋଗରେ ଏହିସବୁ କାର୍ଯ୍ୟ କରାଯାଉଥିବା କୁହାଯାଉଛି।

ଏ ନେଇ କେସିଙ୍ଗା ବି. ଡ଼ି. ଓ ଶ୍ରୀ ଭୀମସେନ ଶବର ଙ୍କୁ ପଚାରି ବୁଝିବାରୁ ବିଗତ ଦିନ ରେ ଏପରି କିଛି ଅଭିଯୋଗ ସାମ୍ନା କୁ ଆସି ଥିଲା ଓ ତାର ସମାଧାନ ମଧ୍ୟ ହୋଇଥିଲା , କିନ୍ତୁ ବର୍ତମାନ ଏପରି କିଛି ମୋ ନଜର କୁ ଆସି ନାହିଁ ,ଯଦି ଏମିତି କିଛି ହୋଇଥାଏ ତାର ତଦନ୍ତ ନିଶ୍ଚୟ କରାଯିବ ବୋଲି କହିଛନ୍ତି। ଦେଖିବାକୁ ରହିଲା ଏହି ଖବର ପ୍ରକାଶ ପରେ ଜିଲ୍ଲା ପ୍ରଶାସନ କେତେ ତତ୍ପରତା ପ୍ରକାଶ କରୁଛି ଏବଂ ଏନେଇ କଣ କାର୍ଯ୍ୟନୁଷ୍ଠାନ ଗ୍ରହଣ କରୁଛି।

ମଙ୍ଗଳପୁର ବ୍ୟାରେଜ ରୁ ଖୋଲିଲା ପାଞ୍ଚୋଟି ଗେଟ; ହାତୀନଦୀ ରେ ବନ୍ୟା ସମ୍ଭାବନା…!

!!! କଳାହାଣ୍ଡି ଜିଲ୍ଲା ରୁ ରଜତ ପଟ୍ଟନାୟକ ଙ୍କ ରିପୋର୍ଟ୍ !!!

ଏଥର ସମ୍ଭାଳ (କଳାହାଣ୍ଡି) – ଗତ ତିନି ଦିନ ଧରି କଳାହାଣ୍ଡି ଜିଲ୍ଲାରେ ଲଗାଣ ବର୍ଷା ଯୋଗୁଁ ଜିଲ୍ଲାରେ ଥିବା ମୁଖୀଗୁଡା ଉପର ଇନ୍ଦ୍ରାବତୀ ଜଳ ବିଦ୍ୟୁତ ପ୍ରକଳ୍ପର ମଙ୍ଗଳପୁର ଜଳଭଣ୍ଡାର ରେ ୫ଟି ଗେଟ ଖୋଲାଯାଇଛି । ଯାହା ମିନିଟ କୁ ୧୩୨ କ୍ୟୁସେକ ପାଣି ନିଷ୍କାସନ କରିବ ବୋଲି ବିଭାଗ ତରଫରୁ ସୂଚନା ମିଳିଛି । ଏଥି ଜଗୁ ହାତୀ ନଦୀ ତଳ ମୁଣ୍ଡ ରେ ନଦୀକୂଳ ଗାଁ ମାନଙ୍କରେ ବନ୍ୟା ଆଶଙ୍କା ରହିଛି। କଲମପୁର ବ୍ଲକ ର କର୍ମେଲି,ବିରିପୁର, ମାଟିଖାଲ, ବାଲିଛଡ଼ା,ଟେମରା ଗାଁ ମାନଙ୍କ ରେ ଧୀରେ ଧୀରେ ଜଳ ସ୍ତର ବଢ଼ିପାରେ ଲାଗିଛି। ଏହା ବନ୍ୟା ପରିସ୍ଥିତି ଉପୁଜିବ ବୋଲି ଆଶଙ୍କା କରାଯାଉଛି।
ବନ୍ୟା ଯୋଗୁଁ ଧନଜୀବନ ଯେପରି କ୍ଷୟକ୍ଷତି ନ ହୁଏ ଏଥି ପ୍ରତି କଲମପୁର ବିଡ଼ିଓ ହେମସଗାର ଭୋଇ ତଥା ବ୍ଲକ କନିଷ୍ଠ ଯନ୍ତ୍ରୀ ଶିବ ବେହେରା, ସୁବ୍ରତ ପଣ୍ଡା ସଦଳବଳେ ଉକ୍ତ ଗାଁ ମାନଙ୍କୁ ପରିଦର୍ଶନ କରିବା ସହ ପ୍ରଭାବିତ ଲୋକମାନଙ୍କୁ ଦମକଳ ବାହିନୀ ସହଯୋଗ ରେ କଲମପୁର ସ୍ଥିତ ଦୁର୍ଗାମାଧଵ ହାଇସ୍କୁଲ ରେ ଆଣି ରଖିବାର ବନ୍ଦୋବସ୍ତ ବ୍ୟବସ୍ଥା କରିଛନ୍ତି।
ଉଦ୍ଧାର କରାଯାଇ ସମସ୍ତଙ୍କୁ ରନ୍ଧାଖାଦ୍ୟ ସହ ଆବଶ୍ୟକ ସାମଗ୍ରୀ ଯୋଗାଇ ଦିଆଯିବ ବୋଲି କହିଛନ୍ତି।

ଦୁଇ ଭିନ୍ନକ୍ଷମ ପିଲାଙ୍କୁ ମିଳିଲା ସରକାରୀ ସହାୟତା…!

!!! କଳାହାଣ୍ଡି ଜିଲ୍ଲା ଧର୍ମଗଡ଼ ରୁ ପ୍ରତିନିଧି ପ୍ୟାରୀଲାଲ୍ ଦୂର୍ଗା ଙ୍କ ରିପୋର୍ଟ୍ !!!

ଏଥର ସମ୍ଭାଳ (ଧର୍ମଗଡ଼) – କଳାହାଣ୍ଡି ଜିଲ୍ଲା ଜୁନାଗଡ ବ୍ଲକ ଅନ୍ତର୍ଗତ ଚାରବାହାଲ ପଞ୍ଚାୟତ ର ମାଝୀ ପଡ଼ା ଗ୍ରାମର ଅଜୟ ସିଂହ ଙ୍କ ଦୁଇ ପୁଅ ସୁବ୍ରତ ଓ ଭୁପେନ୍ଦ୍ର ଜନ୍ମର ପାଞ୍ଚ ବର୍ଷ ପରେ ଅଜଣା ରୋଗରେ ରୋଗାକ୍ରାନ୍ତ ବିକଳାଙ୍ଗ ହୋଇଯାଇଛନ୍ତି। ବାପା ନିଜ ପିଲାଙ୍କୁ ଚିକିତ୍ସା ପାଇଁ ବିଭିନ୍ନ ସ୍ଥାନରେ ଚିକିତ୍ସା କରାଇଥିଲେ ମଧ୍ଯ କୌଣସି ସୁଫଳ ମିଳିପାରିନଥିଲା। ଆର୍ଥିକ ଅନାଟନ ଯୋଗୁଁ ପିଲାଙ୍କୁ ଉଚିତ୍ ଚିକିତ୍ସା ଯୋଗାଇବାରେ ଅସମର୍ଥ ଅଛନ୍ତି ପିତା ଅଜୟ ସିଂହ। ଏହାଙ୍କ ଦୂରାବସ୍ଥା ନେଇ ବିଭିନ୍ନ ଗଣ ମାଧ୍ୟମରେ ଖବର ପ୍ରକାଶ ପାଇବା ପରେ ଘଟଣାଟି ଜିଲ୍ଲାପାଳ ଙ୍କ ଦୃଷ୍ଟି କୁ ଆସିଛି। ଜିଲ୍ଲାପାଳ ଙ୍କ ନିର୍ଦ୍ଦେଶ କ୍ରମେ ଜୁନାଗଡ଼ ବ୍ଲକ ଗୋଷ୍ଠୀ ସାମାଜିକ ସୁରକ୍ଷା ଅଧିକାରୀ ତୁଷାର ରଞ୍ଜନ ସାହୁ ଏବଂ ଜି.ଆର୍.ଏସ୍ ଗୌତମ ଦଳପତି ଅଜୟ ସିଂହ ଙ୍କ ଘରେ ପହଞ୍ଚି ଦୁଇ ଦିବ୍ୟାଙ୍ଗ ଙ୍କ ପାଇଁ ଦୁଇଟି ୱୁଇଲ ଚେୟାର ଦେଇଛନ୍ତି। ଆଗାମୀ ଦିନରେ ଏମାନଙ୍କୁ ସମସ୍ତ ପ୍ରକାର ସରକାରୀ ସହାୟତା ଯୋଗାଇଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି। ଆବାସ ଗୃହ ପାଇଁ ଜିଲ୍ଲାପାଳ ଙ୍କ ଦୃଷ୍ଟି ଆକର୍ଷଣ କରାଯିବ ବୋଲି କହିଛନ୍ତି।

ଗଜପତି ଜିଲ୍ଲା ପାରଳାଖେମୁଣ୍ଡି ଠାରେ ଅନ-ଷ୍ଟେରିଓ ଟାଇପିଙ୍ଗ ସିନେମା ସମ୍ପର୍କିତ ସଚେତନତା କର୍ମଶାଳା ଅନୁଷ୍ଠିତ ହୋଇଯାଇଛି…!

!!! ଦକ୍ଷୀଣ ଓଡ଼ିଶା ମୁଖ୍ୟ ଡ଼ି. କିରଣ କୁମାର ଙ୍କ ରିପୋର୍ଟ୍ !!!

ଏଥର ସମ୍ଭାଳ (ପାରଳାଖେମୁଣ୍ଡି) – ପାରଳାଖେମୁଣ୍ଡି ସ୍ଥିତ ଶ୍ରୀ କୃଷ୍ଣଚନ୍ଦ୍ର ଗଜପତି ସ୍ୱୟଂ ଶାସିତ ମହାବିଦ୍ୟାଳୟ ପରିସରରେ ନାଓ ଏବଂ ମହିଳା ବିକାଶ ପ୍ରତିଷ୍ଠାନର ମିଳିତ ଆନୁକୁଲ୍ୟ ରେ, ଭୁବନେଶ୍ୱର ସ୍ଥିତ ଅକ୍ସଫାମ୍ ଇଣ୍ଡିଆ ସହାୟତାରେ , ଲିଙ୍ଗଗତ ସମାନତା ଦିଗରେ ସମାଜର ଯୁବପିଢି ଙ୍କୁ ପ୍ରୋତ୍ସାହିତ କରିବା ପାଈଁ ” ଅନ-ଷ୍ଟେରିଓ ଟାଇପିଙ୍ଗ ସିନେମା ସମ୍ପର୍କିତ ସଚେତନତା କର୍ମଶ।ଳା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।
ମୁଖ୍ୟତଃ ସିନେମାରେ କିଭଳି ଭାଷା-ଚିତ୍ର ସବୁ ଗତାନୁଗତିକ ଭାବେ ବ୍ୟବହାର ହୋଇ ତାହା ସମାଜରେ ଏକ କୁ-ପ୍ରଭାବ ପକାଉଛି ଏବଂ ସମାଜରେ ନାରୀ ଓ ପୁରୁଷ ମାନଙ୍କ ମଧ୍ୟରେ ଯେଉଁ ସବୁ ଭେଦ-ଭାଵ ରହିଛି , ତାକୁ କିଭଳି ସମାନ ସ୍ତରକୁ ଅଣା ଯାଇପାରିବ, ସେ ଦିଗରେ ଯୁବପିଢି ମାନଙ୍କୁ ସଚେତନ କରାଇବା- ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ ।

ଏହି ଅବସରରେ , ମହିଳା ବିକାଶ ପ୍ରତିଷ୍ଠାନର ସମ୍ପାଦିକା ମିନତି ପାଢିଙ୍କ ସଭାପତିତ୍ୱରେ ଅନୁଷ୍ଠିତ କର୍ମଶାଳା ରେ ଗଜପତି ମହାବିଦ୍ୟାଳୟର ବରିଷ୍ଠ ଅଧ୍ୟାପକ ଡ଼ଃ ଅଜୟ କୁମାର ତ୍ରିପାଠୀ ଯୋଗଦେଇ ,ସାମାଜିକ ପ୍ରକ୍ରିୟା ମଧ୍ୟରେ ନାରୀ ଓ ପୁରୁଷ ସମାଜର ଏକ ବର୍ଦ୍ଧିତ ପରମ୍ପରା ମଧ୍ୟରେ ରହିଥିବା ଦୁଇଟି ଅଙ୍ଗ । ଏହି ଦୃଷ୍ଟିରୁ ନାରୀ ଓ ପୁରୁଷ ମାନଙ୍କ ମଧ୍ୟରେ ସମାନତା ରହିବା ନିହାତି ଆବଶ୍ୟକତା ରହିଛି ।
ଆମେ ସାମାଜିକ ସ୍ତରରେ ନାରୀ ଓ ପୁରୁଷକୁ ସମାନ ଦୃଷ୍ଟିରେ ଦେଖିଲେ ମଧ୍ୟ ଆମେ କେଉଁଠି ନା କେଉଁଠି ତାହାକୁ ମାନସିକ ସ୍ତରରେ ଗ୍ରହଣ କରି ପାରୁନୁ । ନାରୀକୁ ତାର ସାମାଜିକ ସ୍ତରରେ ସୁରକ୍ଷିତ କରିବା ପାଇଁ ଅତୀତରୁ ହିଁ ଅନେକ ଆନ୍ଦୋଳନ ଆରମ୍ଭ କରାଯାଇଛି ଏବଂ ଏ ଦିଗରେ ଅନେକ ସଚେତନତା ସୃଷ୍ଟି ମଧ୍ୟ କରାଯାଇଛି । ଏମିତିକି , ନାରୀ ବାଲ୍ୟ-ବିବାହ ବିରୋଧରେ ସ୍ୱର ଉତ୍ତୋଳନ ଏବଂ ନାରୀଶିକ୍ଷା , ଏଭଳି ଅନେକ ପଦକ୍ଷେପ-ମାନ ଗ୍ରହଣ କରାଯାଇଛି , ହେଲେ ଏକ ନିର୍ଦ୍ଦିଷ୍ଟ ସମୟ ମଧ୍ୟରେ ବିଭିନ୍ନ କ୍ଷେତ୍ରରେ ବାନ୍ଧି ହୋଇ ସେମାନେ ନିର୍ଯ୍ୟାତିତ ଓ ନିଷ୍ପେସିତ ହୋଇ ରହୁଛନ୍ତି । ତେଣୁ ସମାଜରେ ଯେଉଁ ଯୁବପିଢି ରହିଛନ୍ତି ,ଏ ଦିଗରେ ସେମାନେ ଆଗକୁ ବଢ଼ି କିଭଳି ନେତୃତ୍ୱ ନେଇ ଏଭଳି ହିଂସାକୁ ସବୁ ସ୍ତରରେ ବିରୋଧ କରିବା ସହ ଲିଙ୍ଗଗତ ସମାନତା ଦିଗରେ ସଚେତନ ହେବେ , ସେଥି ଉପରେ ବିଶେଷ ଗୁରୁତ୍ଵାରୋପ୍ କରିଥିଲେ ।
ଅନ୍ୟ ମାନଙ୍କ ମଧ୍ୟରେ ଏହି କାର୍ଯ୍ୟକ୍ରମରେ ଭୁବନେଶ୍ୱର ସ୍ଥିତ ଅକ୍ସଫାମ୍ ଇଣ୍ଡିଆର ଆଫସନାଁ ବେଗମ୍ ,ମହାବିଦ୍ୟାଳୟର ଅଧ୍ୟାପକ ଚନ୍ଦ୍ର ଶେଖର ଦାସ , ଜିଲ୍ଲା ଜୁଭେନାଇଲ ଜଷ୍ଟିସ ବୋର୍ଡ ସଦସ୍ୟା ଭାଗ୍ୟଲକ୍ଷ୍ମୀ ନାୟକ ପ୍ରମୁଖ ମଞ୍ଚାସୀନ ଅତିଥି ଭାବେ ଯୋଗ ଦେଇ ମହିଳା ହିଂସା ଓ ଲିଙ୍ଗଗତ ସମାନତା ର ବିଭିନ୍ନ ଦିଗ ସମ୍ପର୍କରେ ନିଜ ନିଜର ସୁଚିନ୍ତିତ ମତାମତ ପ୍ରଦାନ କରିଥିଲେ ।
ଏହି କାର୍ଯ୍ୟକ୍ରମରେ ପ୍ରତିଷ୍ଠାନର ସଂଯୋଜକ ନଟବର ପାଢ଼ୀ ଯୋଗଦେଇ ସ୍ବାଗତ ଭାଷଣ ଦେବା ସହ କାର୍ଯ୍ୟକ୍ରମର ପ୍ରାରମ୍ଭିକ ସୁଚନା ଦେଇ ଆଭିମୁଖ୍ୟ ଉପରେ କହିଥିଲେ ।
ମହିଳା ସହାୟତା କେନ୍ଦ୍ରର ପରାମର୍ଶିକା ଶିଲି ପରିଡା ଯୋଗ ଦେଇ ସମସ୍ତ କାର୍ଯ୍ୟକ୍ରମକୁ ପରିଚାଳନା କରି ଅନ-ଷ୍ଟେରିଓ ଟାଇପିଙ୍ଗ ସିନେମା ର ଭାଷା-ଚିତ୍ର ସବୁ ଗତାନୁଗତିକ ସମାଜରେ କିଭଳି କୁ-ପ୍ରଭାବ ପକାଇଥାଏ ଏବଂ ଲିଙ୍ଗଗତ ସମାନତା ର ବିଭିନ୍ନ ଦିଗ ଉପରେ ବୁଝାଇଥିଲେ ।
ଏହି କାର୍ଯ୍ୟକ୍ରମରେ ନାରୀ ହିଂସା ,ନାରୀ-ସୁରକ୍ଷା ଓ ସିନେମାର ଭାଷା-ଚିତ୍ର ର ବ୍ୟବହାର ସବୁ ସମାଜରେ କିଭଳି କୁ-ପ୍ରଭାବ ପକାଉଛି , ସେ ସମ୍ପର୍କରେ ଏକ ଭିଡିଓ- ଶୋ ପ୍ରଦର୍ଶନ କରାଯାଇଥିଲା ।

ଧର୍ମଗଡ଼ ରେ ବ୍ଲକ ସ୍ତରୀୟ ସ୍ଵାଧୀନତା ଦିବସ ପାଇଁ ପ୍ରସ୍ତୁତି ବୈଠକ…!

!!! କଳାହାଣ୍ଡି ଜିଲ୍ଲା ଧର୍ମଗଡ଼ ରୁ ପ୍ୟାରେ ଲାଲ୍ ଦୁର୍ଗା ଙ୍କ ରିପୋର୍ଟ !!!

ଏଥର ସମ୍ଭାଳ (ଧର୍ମଗଡ଼) – ଧର୍ମଗଡ଼ ବ୍ଲକ ସ୍ତରୀୟ ସ୍ବାଧିନତା ଦିବସ ପାଇଁ ଏକ ଗୁରୁତ୍ୱପୂର୍ଣ୍ଣ ବୈଠକ ବ୍ଲକ ସଦ୍ଭାବନା ସଭାଗୃହରେ ସହଯୋଗୀ ଉପଜିଲ୍ଲାପାଳ ବରିହା ଓ ରାଜେନ୍ଦ୍ର କୁମାର ମେହେର ଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଅନୁଷ୍ଠିତ ଏହି ବୈଠକରେ ସ୍ଵାଧୀନତା ଦିବସ କୁ କିପରି ଆଡ଼ମ୍ବର ସହିତ ପାଳନ କରାଯିବ ସେହି ବିଷୟରେ ଆଲୋଚନା କରାଯଇଥିଲା। ବୈଠକ ଆରମ୍ଭରେ ସୂଚନ ଓ ଲୋକ ସମ୍ପର୍କ ଅଧିକାରୀ ରମେଶ ଚନ୍ଦ୍ର ସିଂ ସ୍ଵାଗତ ଭାଷଣ ଦେବା ସହ ବିଗତ ବର୍ଷ ରେ କରାଯାଇଥିବା ବ୍ୟବସ୍ଥା ସମ୍ପର୍କରେ ସୂଚନା ଦେଇଥିଲେ। ଚଳିତ ବର୍ଷ ପ୍ୟାରେଡ୍ ରେ ସ୍ଥାନୀୟ ପୁଲିସ ବିଭାଗ ସମେତ ବିଭିନ୍ନ ବିଦ୍ୟାଳୟର ୨୨ ଗୋଟି ପ୍ୟାରେଡ୍ ଦଳ ଅଂଶ ଗ୍ରହଣ କରିବେ ବୋଲି ସୂଚନ ଦିଆଯାଇଛି।

କଳାହାଣ୍ଡି ଉତ୍ସବ ପଡିଆରେ ପୂର୍ବ ବର୍ଷ ଭଳି ଚଳିତ ବର୍ଷ ମଧ୍ୟ ସ୍ଵାଧୀନତା ଦିବସ ପାଳନ କରିବା ସ୍ଥିର କରାଯାଇଥିବା ରୁ ଏହାକୁ ପ୍ୟାରଡ ଉପଯୋଗୀ ସେଫଇ କାର୍ଯ୍ୟ କରିବା ନିମନ୍ତେ ସ୍ଥାନୀୟ ଏନ୍.ଏ.ସି କତୃପକ୍ଷ ଙ୍କୁ ଦାୟିତ୍ଵ ଦିଆଯାଇଛି।

ସ୍ଵାଧୀନତା ଦିବସ ଅବସରରେ କରାଯାଇଥିବା ପ୍ରତିଯୋଗିତା ରେ କୃତିତ୍ଵ ହାସଲ କରିଥିବା ବିଦ୍ୟାର୍ଥୀ ଏବଂ ଅନ୍ୟାନ୍ୟ କ୍ଷେତ୍ର ରେ କୃତିହାସଲ କରିଥିବା ବ୍ୟକ୍ତି ବିଶେଷଙ୍କୁ ଏହି ଅବସରରେ ସମ୍ମାନିତ କରାଯିବା ସ୍ଥିର କରାଯାଇଅଛି। ଅନୁଷ୍ଠିତ ବୈଠକରେ ସ୍ଥାନୀୟ ବି.ଡି.ଓ ଅଶୋକ କୁମାର ଭୋଇ, ଧର୍ମଗଡ଼ ଆଇ.ଆଇ.ସି ଦସୁ ପରଜା, ଇଲେକ୍ଟିକ ଏସ୍.ଡ଼ି. ଓ ଭଗବାନ ସାହୁ ଙ୍କ ସମେତ ବିଭିନ୍ନ ବିଦ୍ୟାଳୟରୁ ଆସିଥିବା ଶିକ୍ଷକ ପ୍ରତିନିଧି , ସ୍ଵେଚ୍ଛାସେବୀ ସଂଗଠକ ଓ ଗଣମାଧ୍ୟମ ପ୍ରତିନିଧି ମାନେ ଉପସ୍ଥିତ ଥିଲେ।

କଲେଜ ଛାତ୍ରୀ ଙ୍କୁ ଦୁଷ୍କର୍ମ ଅଭିଯୋଗ,ଅଭିଯୁକ୍ତକୁ ଗିରଫ;ପୋଲିସ୍ ର ପଚରାଉଚରା ଜାରି…!

!!! କଳାହାଣ୍ଡି ଜିଲ୍ଲା ଧର୍ମଗଡ଼ ରୁ ପ୍ରତିନିଧି ପ୍ୟାରୀଲାଲ୍ ଦୁର୍ଗା ଙ୍କ ରିପୋର୍ଟ୍ !!!

ଏଥର ସମ୍ଭାଳ (ଜୟପାଟଣା) – କଳାହାଣ୍ଡି ଜିଲ୍ଲାରେ ଦିନକୁ ଦିନ ନାବାଳିକା ଙ୍କ ପ୍ରତି ଦୁଷ୍କର୍ମ ବଢ଼ିବାରେ ଲାଗିଛି।

ଆଜି ଜୟପାଟଣା ପୋଲିସ ଏହି ମାମଲାରେ ଜଣେ ୪୦ ବର୍ଷୀୟ ବ୍ୟକ୍ତି ଜ୍ୟୋତି ରଞ୍ଜନ ଦାଶ କୁ ଅଟକ ରଖି ପଚରାଉଚରା କରିଛି।

ଜୟପାଟଣା ପୋଲିସ ସୂତ୍ରରୁ ପ୍ରକାଶ ଯେ ଏହି ଥାନା ଅନ୍ତର୍ଗତ ମୁଖୀଗୁଡା ଠାରେ ଏହି ନାବାଳିକା ଜଣକ ତାଙ୍କ ସମ୍ପର୍କୀୟ ମଉସା ଘରେ ରହି ସେହି ଅଞ୍ଚଳର କଲେଜ ରେ ଯୁକ୍ତ ଦୁଇ ରେ ପଢୁଥିଲେ।

କିନ୍ତୁ ଦୀର୍ଘ ଦିନ ଧରି ଛାତ୍ରୀ ଙ୍କୁ ଏହି ମଉସା ଜଣକ ବାରମ୍ବାର ବଳପୂର୍ବକ ଶାରୀରିକ ନିର୍ଯ୍ୟାତନା ତଥା ଦୁଷ୍କର୍ମ କରିଚାଲିଥିଲେ।

ଏ ନେଇ ନାବାଳିକା କୋଣସି ମତେ ଗତକାଲି ଆସି ଜୟପାଟଣା ଥାନା ରେ ଲିଖିତ ଅଭିଯୋଗ ଦେଲା ପରେ ପୋଲିସ ଅଭିଯୋଗ ମୁତାବକ ୧୮୮/୧୯ କେଶ ନମ୍ବର ରୁଜୁ କରି ଅଭିଯୁକ୍ତ ନାବାଳିକା ଙ୍କ ମଉସା ଜ୍ୟୋତି ରଞ୍ଜନ କୁ ଗିରଫ କରି ପଚରାଉଚରା ଜାରି ରଖିଛି ।

ଅଭିଯୁକ୍ତ ଙ୍କ ନାଁ ରେ ଆପିସି ୩୭୬,୩୪୧,୩୨୩ ତଥା ପୋସ୍କୋ ଆକ୍ଟ ଲଗାଯାଇ ତଦନ୍ତ ଚାଲିଛି। ଏହି ନାବାଳିକା ଙ୍କୁ ବର୍ତ୍ତମାନ ଜିଲ୍ଲା ସୁଧାଘର କୁ ପଠାଯାଇଛି ବୋଲି ଜୟପାଟଣା ଥାନା ଅଧିକାରୀ ସୁଶାନ୍ତ କୁମାର ସାହୁ ପ୍ରକାଶ କରିଛନ୍ତି।

ବନ୍ୟା ସମୟରେ କରାଯାଇଥିବା ଖାଦ୍ୟ ଯୋଗାଣ ରେ ହେର୍ ଫେର୍ ନେଇ ଅଭିଯୋଗ !

!!! ରାୟଗଡ ଜିଲ୍ଲା ଗୁଡାରୀ ରୁ ତ୍ରିପତି ବିଡିକା ଙ୍କ ରିପୋର୍ଟ !!!

ଏଥର ସମ୍ଭାଳ (ଗୁଡାରୀ) – ଗତ ଦୁଇ ଦିନ ଧରି ଲଗାଣ ବର୍ଷା ରେ ରାୟଗଡ ଜିଲ୍ଲା ଗୁଡାରୀ ଠାରେ ବଂଶଧାରା ନଦୀ ରେ ଜଳ ସ୍ଥର ବୃଦ୍ଧି ପାଇବା ଦ୍ୱାରା ସ୍ଥାନୀୟ ବିଜ୍ଞାପିତ ଅଞ୍ଚଳ ପରିଷଦ ଦ୍ୱାରା ବର୍ଜ୍ୟ ଜଳ ନିଷ୍କାସନ ପାଇଁ ତିଆରି ହୋଇଥିବା ନର୍ଦ୍ଦମା ରେ ସହର ମଧ୍ୟରୁ ଜଳ ନିଷ୍କାସିତ ହୋଇନପାରି ନର୍ଦ୍ଦମା ରେ ପାଣି ଜମି ସହର ମଧ୍ୟରେ କୁତ୍ରିମ ବନ୍ୟା ସୃଷ୍ଟି ହୋଇଥିଲା।

ବନ୍ୟା ଆଶଙ୍କା ଖବର ପାଇ ଉପଜିଲ୍ଲାପାଳ ଶ୍ରୀ ସିଦ୍ଧେଶ୍ବର ବଳିରାମ ବନ୍ଧୋର ଗୁଡାରୀ ଠାରେ ପହଞ୍ଚି ଜମି ରହିଥିବା ପାଣି କୁ ନିଷ୍କାସନ କରିବାର ବ୍ୟବସ୍ଥା କରିଥିଲେ ।

ଏହି ଅଞ୍ଚଳବାସୀ ମାନଙ୍କୁ ଏଠାରୁ ସ୍ଥାନାନ୍ତରିତ କରାଯାଇ ସ୍ଥାନୀୟ ବ୍ରାହ୍ମଣ ସାହି ସ୍କୁଲ ଠାରେ ଥଇଥାନ କରାଯାଇଥିଲା । ଆଶ୍ରୟ ସ୍ଥଳ ରେ ୨୦ ଜଣ ଲୋକ ଙ୍କୁ ଥଇଥାନ କରାଯାଇଥିବା ଜଣାପଡ଼ିଛି ।

ସ୍ଥାନୀୟ ବିଜ୍ଞାପିତ ଅଞ୍ଚଳ ପରିଷଦ କାର୍ଯ୍ୟ ନିର୍ବାହୀ ଅଧିକାରୀ ଶ୍ରୀମତୀ ଗାୟତ୍ରୀ ଦେବୀ ଆଶ୍ରୟ ସ୍ଥଳ ରେ ଥିବା ୩୫୦ ଜଣ ଙ୍କୁ ଖାଦ୍ୟ ରନ୍ଧାଯାଇ ଖାଦ୍ୟ ପରସା ଯାଇଥିବା ସୁଚନା ଦେଇଛନ୍ତି ।

କିନ୍ତୁ ବାସ୍ତବ ରେ କିଛି ହାତ ଗଣତି ଲୋକ ଙ୍କୁ ଖାଦ୍ୟ ଦିଆଯାଇଥିବା ଅଭିଯୋଗ ହୋଇଛି । ଏଥି ପୁର୍ବରୁ ଫନି ବାତ୍ୟା ସମୟରେ ହୋଇଥିବା ଟଙ୍କା ହଡପ ର ସୁଧ ଏହି ବନ୍ୟା ସମୟର ଅଧିକା ଖାଦ୍ୟ ଯୋଗାଇବା ସୁଚନା ନୁହେଁ କି ବୋଲି ସାଧାରଣ ରେ ଚର୍ଚ୍ଚା ଜୋର ଧରିଛି । ଆଶ୍ରୟ ନେଇଥିବା ବ୍ୟକ୍ତି ଙ୍କ ମଧ୍ୟରୁ ଜଣେ ବୃଦ୍ଧ ଙ୍କ କହିବା ଅନୁସାରେ ଆଶ୍ରିତ ବ୍ୟକ୍ତି ଙ୍କୁ ଠିକ୍ ଭାବେ ଖାଦ୍ୟ ଯୋଗାଇ ଦିଆ ଯାଇନଥିଲା ।

ତେବେ ଏହି ଅଭିଯୋଗ କୁ ନେଇ ଏକ ଉଚ୍ଚ ସ୍ଥରିୟ ତଦନ୍ତ ଅବସମ୍ଭାବି ହୋଇପଡିଛି । ଜିଲ୍ଲା ସ୍ଥରିୟ ଅଧିକାରୀ ଏହାର ତଦନ୍ତ କରିବା ନିମନ୍ତେ ଦାବୀ ହେଉଛି ।