!!! କଳାହାଣ୍ଡି ରୁ ଜିଲ୍ଲା ପ୍ରତିନିଧି ରଜତ୍ ପଟ୍ଟନାୟକ ଙ୍କ ରିପୋର୍ଟ୍ !!!
ଏଥର ସମ୍ଭାଳ (କଳାହାଣ୍ଡି) – ଗ୍ରାମୀଣ ସ୍ତରରେ ଜବ କାର୍ଡ଼ ହିତାଧିକାରୀ ଙ୍କ ତାଲିକା ପ୍ରସ୍ତୁତ କରି କାହାକୁ କେଉଁ କାର୍ଯ୍ୟ ରେ ନିୟୋଜିତ କରାଯାଇଛି ଏହା ସେମାନଙ୍କୁ ସୂଚନା ଦେବା ସହ ହିତାଧିକାରୀ ପାଇବାକୁ ଥିବା ପାରିଶ୍ରମିକ ଅର୍ଥ ସେମାନଙ୍କୁ କିଭଳି ଠିକ ସମୟରେ ଉପଯୁକ୍ତ ଭାବେ ମିଳିବ ଏହାକୁ ସୁଗମ କରିବା ଉଦ୍ଦେଶ୍ୟରେ ରାଜ୍ୟ ସରକାରଙ୍କ ପକ୍ଷରୁ ପଞ୍ଚାୟତ ସ୍ତରରେ ଗ୍ରାମୀଣ ରୋଜଗାର ସେବକ (GRS) ମାନଙ୍କୁ ନିଯୁକ୍ତି ଦିଆଯାଇଛି ।
ପରନ୍ତୁ,GRS ମାନେ ସେମାନଙ୍କ କାର୍ଯ୍ୟ କୁ ଗ୍ରାମ ପଞ୍ଚାୟତ ସ୍ତରରେ ସଠିକ ଭାବେ ପରିଚାଳିତ ନକରି ପଂଚାୟତ ସମିତି କାର୍ଯ୍ୟଳୟ ରେ ବସି ସମୟ ଅତିବାହିତ କରୁଥିବା ଅଭଯୋଗ ହେଉଛି । ଗ୍ରାମ ପଞ୍ଚାୟତ ସ୍ତରରେ ହିତାଧିକାରୀଙ୍କ ନିକଟକୁ ନଯାଇ ପଞ୍ଚାୟତ ସମିତି ସ୍ତରରେ BDO ଙ୍କ ନିକଟରେ ରହି ସମୟ ଅତିବାହିତ କରି ମଧ୍ୟସ୍ଥ ସାଜୁଥିବା କଥା ଜୋର ଧରିଛି । ନିଜ କାର୍ଯ୍ୟ ସଠିକ ଭାବେ ପରିଚାଳିତ କରୁନଥିବା ରୁ ଏମାନେ ମନୋରଞ୍ଜନ ସକାଶେ କିଛି ପନ୍ଥା ଆପଣାଉଥିବା କୁହାଯାଉଛି ।
କଳାହାଣ୍ଡି ଜିଲ୍ଲାର କୋକସରା ବ୍ଲକ ଅଞ୍ଚଳରେ ଏଭଳି କିଛି ଘଟଣା ଦେଖିବାକୁ ମିଳିଛି । କୋକସରା ବ୍ଲକ ଅଧୀନସ୍ଥ କାଉଡୋଳା ଗ୍ରାମ ପଞ୍ଚାୟତ ର କାର୍ଯ୍ୟରତ GRS ଅଶୋକ କୁମାର ସେଠୀ ଟିକ୍ ଟକ୍ ନିଶାରେ ଡୁବି ରହୁଥିବା ବହୁ ଚର୍ଚ୍ଚା ର ବିଷୟ ପାଲଟିଛି । ଶ୍ରୀ ସେଠୀ କେବଳ ଅଫିସରେ ନୁହେଁ ଏପରିକି 26 ନମ୍ବର ଜାତୀୟ ରାଜପଥରେ ସାଇକେଲ ଓ ମୋଟର ସାଇକେଲ ରେ ଷ୍ଟାଣ୍ଟ ଦେଖାଇ ଏହାର ଭିଡିଓ ସୋସିଆଲ ମିଡ଼ିଆରେ ଭାଇରଲ କରି ଟିକଟକ ମାଷ୍ଟର ଭାବେ ସ୍ଥାନୀୟ ଅଞ୍ଚଳରେ ଇମେଜ ବଢ଼ାଇ ପାରିଛନ୍ତି ବୋଲି ଏଠି ସେଠି ସବୁଠି ଚର୍ଚ୍ଚା ର ବିଷୟ ଵସ୍ତୁ ହୋଇଛି। କାର୍ଯ୍ୟାଳୟରେ ସେଠୀ ବାବୁଙ୍କ ଏତାଦୃଶ୍ୟ କାର୍ଯ୍ୟକୁ ବିରୋଧ କରି BDO ଙ୍କ ନିକଟରେ ଅଭିଯୋଗ କଲେବି କିଛି କାର୍ଯ୍ୟାନୁଷ୍ଠାନ ହୋଇପାରୁ ନଥିବା ଅଞ୍ଚଳ ବାସୀ ଅଭିଯୋଗ କରୁଛନ୍ତି । BDO ଙ୍କ ନୀରବତା ସାଧାରଣରେ ଅନେକ ପ୍ରଶ୍ନ ସୃଷ୍ଟି କରୁଛି । ଜିଲ୍ଲା ପ୍ରଶାସନ ଏଥି ପ୍ରତି ଦୃଷ୍ଟି ଦେଇ ପଦକ୍ଷେପ ଗ୍ରହଣ କରିବାକୁ ଦାବୀ ହେଉଛି ।
