ବିଜେପି ପାଇଁ ତ୍ୟାଗ: ୩ ବର୍ଷିୟା ଆସନ ରଖି ୫ ବର୍ଷିୟା ଛାଡ଼ିଲା ବିଜେଡି !

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଓଡ଼ିଶାର ଖାଲି ହୋଇଥିବା ୩ ରାଜ୍ୟସଭା ଆସନ ମଧ୍ୟରୁ ବିଜେଡି ଦୁଇଟି ଆସନ ହାତରେ ରଖି ଗୋଟିଏ ଆସନ ବିଜେପିକୁ ଛାଡ଼ି ଦେଇଛି । ବିଜେପି ପାଇଁ ବିଜେଡି କେବଳ ଏତିକି ତ୍ୟାଗ କରିନି ଆହୁରି ଅଧିକ ସହାୟତା କରିଛି । ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଗୋଟିଏ ପରେ ଗୋଟିଏ ପଦକ୍ଷେପ ସମସ୍ତଙ୍କୁ ଚକିତ କରିବାରେ ଲାଗିଛି । ବିଜେପିକୁ ବିଜେଡି କାହିଁକି ଗୋଟିଏ ରାଜ୍ୟସଭା ଆସନ ଛାଡ଼ିଲା ତାକୁ ନେଇ ଚର୍ଚ୍ଚା ଥମି ନ ଥିଲା ବେଳେ ନବୀନ ଆଉ ଏକ ଚର୍ଚ୍ଚାର ବିଷୟ ଯୋଗାଇ ଦେଇଛନ୍ତି ବିରୋଧୀ ବୋଲି କୁହାଯାଉଛି । ବିଜେଡି ଗୋଟିଏ ୫ ବର୍ଷିୟା ରଖି ଆଉ ଗୋଟିଏ ବିଜେପିକୁ ଛାଡ଼ି ଦେଇଛି । ନିଜ ପାଖରେ ୩ ବର୍ଷିୟା ଆସନଟି ରଖିଛି ।
ଓଡ଼ିଶାର ଯେଉଁ ୩ଟି ରାଜ୍ୟସଭା ଆସନ ଖାଲି ହୋଇଛି ସେଥିରେ ୨ଟି ହେଉଛି ୫ ବର୍ଷ ପାଇଁ ଓ ଗୋଟିଏ ହେଉଛି ୩ ବର୍ଷ ପାଇଁ । ଇସ୍ତଫା ଦେଇଥିବା ବିଜେଡିର ୩ ରାଜ୍ୟସଭା ସାଂସଦଙ୍କ ମଧ୍ୟରୁ ସୌମ୍ୟରଂଜନ ପଟ୍ଟନାୟକ ଓ ଅଚ୍ୟୁତ ସାମନ୍ତଙ୍କ କାର୍ଯ୍ୟକାଳନ ୨୦୨୪ରେ ଶେଷ ହେବାର ଥିଲା । ଏଣୁ ଉଭୟ ଇସ୍ତଫା ଦେବାରୁ ଏମାନଙ୍କ ସ୍ଥାନରେ ଯେଉଁ ଉପନିର୍ବାଚନ ହେବ ଏବଂ ଏଥିରେ ଯେଉଁ ପ୍ରାର୍ଥୀ ଯିବେ ସେମାନେ ୫ ବର୍ଷ ପାଇଁ ନିର୍ବାଚିତ ହେବେ । ସେହିପରି ଇସ୍ତଫା ଦେଇଥିବା ପ୍ରତାପ କେଶରୀ ଦେବଙ୍କ କାର୍ଯ୍ୟକାଳନ ୨୦୨୨ରେ ସରିଥାନ୍ତା । ଏଣୁ ପ୍ରତାପଙ୍କ ସ୍ଥାନରେ ଯେଉଁ ଉପନିର୍ବାଚନ ହେବ ତାହା ୩ ବର୍ଷ ପାଇଁ । ଫଳରେ ପ୍ରତାପଙ୍କ ସ୍ଥାନରେ ଯିଏ ନିର୍ବାଚିତ ହେବେ ତାଙ୍କ କାର୍ଯ୍ୟକାଳ ୩ ବର୍ଷ ରହିବ । ଏ କ୍ଷେତ୍ରରେ ବିଜେଡି ଗୋଟିଏ ୫ ବର୍ଷ ଓ ଗୋଟିଏ ୩ ବର୍ଷର ଆସନ ରଖି ବିଜେପିକୁ ୫ ବର୍ଷିୟା ଆସନଟି ଦେଇଛି ।
ଏହାକୁ ନେଇ ରାଜନୀତିକ ଚର୍ଚ୍ଚା ଚାଲିଛି । ବିଜେଡି କେବଳ ରାଜ୍ୟସଭା ଆସନ ଗୋଟିଏ ଛାଡ଼ି ବିଜେପି ପାଇଁ ତ୍ୟାଗ କରିଛି ବୋଲି ଆଲୋଚନା ହେଉଥିଲା । ଏବେ ବିଜେପି ପାଇଁ ବିଜେଡି କେତେ ଦରଦୀ ତାହା ଏଥିରୁ ଜଣାପଡିଛି । ନିଜେ ୩ ବର୍ଷିୟା ଆସନ ରଖି ବିରୋଧୀ ପକ୍ଷକୁ ୫ ବର୍ଷିୟା ଆସନ ଛାଡ଼ିଛି । ଏବେ କଥା ଉଠୁଛି ବିଜେପି ପାଇଁ ବିଜେଡିର ଏତେ ତ୍ୟାଗ କାହିଁକି? ଏହାକୁ ନେଇ ଏତେ ଆଲୋଚନା ଓ ସମାଲୋଚନା ଚାଲିଥିଲା ବେଳେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଏହା ଉପରେ କୌଣସି ପ୍ରତିକ୍ରୀୟା ରଖି ନାହାଁନ୍ତି । କେବଳ ତାଙ୍କର ଦଳୀୟ ନେତାମାନେ କହିଚାଲିଛନ୍ତି ନବୀନ ବାବୁ ଯାହା କରିଛନ୍ତି ତାହା ଭାବିଚିନ୍ତି କରିଛନ୍ତି ଓ ରାଜ୍ୟ ସ୍ୱାର୍ଥ ପାଇଁ କରିଛନ୍ତି । ରାଜ୍ୟର କଣ ସ୍ୱାର୍ଥ ସାଧନ ହେଉଛି ତାହା ଦେଖିବାର କଥା ବୋଲି କୁହାଯାଉଛି ।

ଜେଲ ଗଲେ ପାଟଣାଗଡ଼ ବିଧାୟକ !

ଏଥର ସମ୍ଭାଳ ବ୍ୟୁରୋ (ପାଟଣାଗଡ଼) – ଜାମିନ ନାମଞ୍ଜୁର ପରେ ପାଟଣାଗଡ଼ ଜେଲ୍ ଗଲେ ବିଧାୟକ ସରୋଜ ମେହେର; ଆଜି ପୂର୍ବାହ୍ନରେ ସରୋଜଙ୍କୁ ଗିରଫ କରିଥିଲା ପାଟଣାଗଡ଼ ପୁଲିସ, ଜେଇଙ୍କୁ ଉଠବସ ମାମଲାରେ ଗିରଫ କରିଥିଲା ପୁଲିସ ।

ସାମ୍ବାଦିକତା ବୃତ୍ତିକୁ ଘୋର ଅପମାନ : ସାମ୍ବାଦିକଙ୍କୁ ଭିକାରୀ କହିବା ଅଭିଯୋଗରେ ଆଠଗଡ ଡିଏଫଓ ସସ୍ମିତା ଲେଙ୍କାଙ୍କ ବିରୋଧରେ ଥାନାରେ ଏତଲା !

ଏଥର ସମ୍ଭାଳ ବ୍ୟୁରୋ (ଆଠଗଡ଼) – ଫେସବୁକ୍ ପୋଷ୍ଟରେ ସାମ୍ବାଦିକତା ବୃତ୍ତିକୁ ଅପମାନ । ଗତ ୧୬ ଜୁନରେ ସାମ୍ବାଦିକଙ୍କୁ ତାତ୍ସଲ୍ୟ କରି ଅରୁଚିକରର ମନ୍ତବ୍ୟ ଦେଇଛନ୍ତି ଆଠଗଡ଼ ଡିଏଫଓ । ସାମ୍ବାଦିକଙ୍କୁ ଭିକାରୀ କହି ଅପମାନିତ କରିଛନ୍ତି ଆଠଗଡ଼ ଡିଏଫଓ ସସ୍ମିତା ଲେଙ୍କା । । ସାମ୍ବାଦିକତା ଏକ ନିଆରା ବୃତ୍ତି । ସତ୍ୟ, ନୀତିନିଷ୍ଠ ତଥା ନିରପେକ୍ଷ ସାମ୍ବାଦିକ ବିଭିନ୍ନ ସମୟରେ ଅପଦସ୍ତ ହେଉଛନ୍ତିି । ଲୋକଙ୍କ ସୁବିଧା ଅସୁବିଧାକୁ ସରକାରଙ୍କ ପାଖରେ ପହଞ୍ଚାଇବା ତଥା ଦୁର୍ନୀତିର ଗୁମର ଖୋଲୁଥିବା ସାମ୍ବାଦିକ ବିଭିନ୍ନ ସମୟରେ ଆକ୍ରମଣର ଶିକାର ହେଉଛନ୍ତି । କିଏ କେତେବେଳେ ସାମ୍ବାଦିକଙ୍କୁ ମିଛୁଆ କହୁଛି ଆଉ କିଏ ଲାଞ୍ଚୁଆ ତ ଆଉ କିଏ ଭିକାରୀ । ଲୋକ ପାଇଁ ଜୀବନ ଉତ୍ସର୍ଗ କରୁଥିବା ବ୍ୟକ୍ତିଙ୍କର କ’ଣ କିଛି ସମ୍ମାନବୋଧ ନାହିଁ ।

‘ସାମ୍ବାଦିକମାନେ ଭିକାରୀ ! ସାମ୍ବାଦିକଙ୍କ ପରି ଭିକାରୀ କେବେ ମୋ ଜୀବନରେ ପୂର୍ବରୁ କେବେ ବି ଦଖିନି ! ସାମ୍ବାଦିକମାନଙ୍କୁ ଦିଆଯାଇଥିବା ସ୍ୱାଧୀନତାର ବ୍ୟବହାର କରି ସେମାନେ ଟଙ୍କା ମାଗିବା ସହିତ ବ୍ଲାକମେଲିଂ କରୁଛନ୍ତି ! ଏହା ଅତ୍ୟନ୍ତ ଦୁଃଖଦାୟକ ଘଟଣା ! ସମସ୍ତେ ଏଠାରେ ସାମ୍ବାଦିକ ! ସମସ୍ତଙ୍କ ଅଯୁକ୍ତିକର ଦାବି ପୂରଣ କରିବା ପାଇଁ ମୁଁ ଏଠାରେ ନାହିଁ ବୋଲି ସେ ଲେଖିଛନ୍ତି ।

ଜଣେ ଉଚ୍ଚଶିକ୍ଷିତ ଅଧିକାରୀ ଗଣତନ୍ତ୍ରର ଚତୁର୍ଥ ସ୍ତମ୍ଭଙ୍କୁ ଏପରି ଅପମାନ ଜନକ ମନ୍ତବ୍ୟ ଦେବା କେତେଦୂର ଯୁକ୍ତିଯୁକ୍ତ । ଗଣମାଧ୍ୟମ ପରି ଏକ ମର୍ଯ୍ୟାଦାଜନକ ପେଶା ପାଇଁ ଏହି କ’ଣ ପୁରସ୍କାର । ତେବେ ସାମ୍ବାଦିକଙ୍କୁ ଭିକାରୀ କହିବା ଅଭିଯୋଗରେ ଆଠଗଡ ଡିଏଫଓ ସସ୍ମିତା ଲେଙ୍କାଙ୍କ ନାଁରେ ଆଠଗଡ ଥାନାରେ ଏତଲା ଦିଆଯାଇଛି । ସମସ୍ତ ଗଣମାଧ୍ୟମ ପ୍ରତିନିଧି ଏହି ଏତଲା ଦେଇଛନ୍ତି । ସସ୍ମିତାଙ୍କ ଫେସବୁକ୍ ପୋଷ୍ଟକୁ ନେଇ ସାମ୍ବାଦିକ ତୀବ୍ର ଅସନ୍ତୋଷ ବ୍ୟକ୍ତ କରିବା ସହିତ ଘଟଣାକୁ ସାମ୍ବାଦିକମାନେ ଦୃଢତାର ସହିତ ନିନ୍ଦା କରିଛନ୍ତି ।

ରାଜ୍ଯକଳା ଗବେଷଣା ଓ ପ୍ରଶିକ୍ଷକ ପରିଷଦ ଓଡିଶା ଆନୁକୁଲ୍ୟରେ ୧୯ ତମ ରାଜ୍ଯସ୍ତରୀୟ ସମ୍ବର୍ଦ୍ଧନା ଓ ପ୍ରତିଭା ପୂଜା ଉତ୍ସବ ଅନୁଷ୍ଠିତ !

ଏଥର ସମ୍ଭାଳ ବ୍ୟୁରୋ (କଟକ) – ରାଜ୍ଯକଳା ଗବେଷଣା ଓ ପ୍ରଶିକ୍ଷକ ପରିଷଦ ଓଡିଶା ଆନୁକୁଲ୍ୟରେ ୧୯ ତମ ରାଜ୍ଯସ୍ତରୀୟ ସମ୍ବର୍ଦ୍ଧନା ଓ ପ୍ରତିଭା ପୂଜା ଉତ୍ସବ କଟକ ସ୍ଥିତ ସହିଦ୍ ଭବନ ଠାରେ ପାଳନ ଅବସରରେ ଓଡ଼ିଶା ର ଏକ ମାତ୍ର ସାମ୍ବାଦିକ ପ୍ରଶାନ୍ତ କୁମାର କର ଙ୍କୁ ସ୍କର୍ଟ ନବରତ୍ନ ସମ୍ମାନ ପ୍ରଦାନ କରାଯାଇଅଛି।

ସୂଚନା ଯୋଗ୍ୟ ଯେ ଉକ୍ତ ସମ୍ବର୍ଦ୍ଧନା ଉତ୍ସବ ରେ ଓଡ଼ିଶା ହାଇକୋର୍ଟ ର ପ୍ରାକ୍ତନ ବିଚାରପତି ମାନ୍ୟବର ନ୍ୟାୟମୂର୍ତ୍ତୀ ଏସ୍. ଏସ୍. ନାଇଡୁ ଉଦଘାଟକ ଭାବେ, ହାଇକୋର୍ଟ ର ଆଉ ଜଣେ ପ୍ରାକ୍ତନ ବିଚାରପତି ଡଃ. ଡି. ପି. ଚୌଧୁରୀ, ରାଜ୍ଯ ସଂଯୋଜକ ରଞ୍ଜିତ କୁମାର ଦାଶ, ଯୋଜନା ଲୋକ ସମ୍ପର୍କ ର ସମ୍ପାଦକ ଧୃବ ଚରଣ ପ୍ରଧାନ, ଓଡ଼ିଶା ର ବୀମା ଲୋକପାଳ ବିଭୁ ପ୍ରସନ୍ନ ପରିଜା ଙ୍କ ସହ ବହୁ ମାନ୍ୟଗଣ୍ୟ ବ୍ୟକ୍ତି ପ୍ରମୁଖ ଉପସ୍ଥିତ ଥିଲେ।

ଶ୍ରୀ କର ଦକ୍ଷୀଣ ଓଡ଼ିଶା ର ବିଭିନ୍ନ କ୍ଷେତ୍ରରେ କଳାକାର ମାନଙ୍କୁ କଳା ପ୍ରଦର୍ଶନ କରାଇବାରେ ପ୍ରମୁଖ ଭୂମିକା ଗ୍ରହଣ କରିଥିବା ନେଇ ସମ୍ମାନିତ ହୋଇଛନ୍ତି। ଏହା ସହିତ ଅନେକ ପତ୍ର ପତ୍ରିକା ରେ ନିଜର ଲେଖା ଓ ସମ୍ବାଦ ପରିବେଷଣ କରି ଉଚ୍ଚ ପ୍ରଶଂସିତ ହୋଇଛନ୍ତି।

ଏହା ଛଡ଼ା ପୁରୀ ଠାରେ ଅଷ୍ଟ ଭୁଜା ସାହିତ୍ୟ ଅନୁଷ୍ଠାନ ଓଡ଼ିଶା ପକ୍ଷରୁ ସାମ୍ବାଦିକ ଗୌରବ ସମ୍ମାନ, ସୁଲେଖା ସାହିତ୍ୟ ସଂସ୍କୃତି ପରିଷଦ ପକ୍ଷରୁ ପ୍ରତିଭା ସମ୍ମାନ, ଗୌର ଭକ୍ତ କଳା ସଂସଦ ପକ୍ଷରୁ କଳାକାର ସମ୍ମାନ, ଅଭିପ୍ସା ସାହିତ୍ୟ ଓ ସାଂସ୍କୃତିକ ଅନୁଷ୍ଠାନ ପକ୍ଷରୁ ସାମ୍ବାଦିକ ଗୌରବ ସମ୍ମାନ ମୟୁରଭଞ୍ଜ ବାଣୀ ପିଠ ମୋହତ୍ସବ ରେ ସମ୍ମାନିତ ହୋଇଥିବା ବେଳେ ନୂଆଦିଲ୍ଲୀ ସ୍ଥିତ ବାବୁ ଜରା ଜୀବନ ରାମ କଳା ସଂସ୍କୃତି ଓ ସାହିତ୍ୟ ଏକାଡେମୀ ପକ୍ଷରୁ ରାଷ୍ଟ୍ରୀୟ ସେବା ଶ୍ରୀ ସମ୍ମାନ ରେ ଭୂଷିତ ହୋଇ ସମ୍ମାନିତ ହୋଇଛନ୍ତି। ଏଭଳି ଜଣେ ବହୁମୁଖୀ ପ୍ରତିଭା ସମ୍ପନ୍ନ ବ୍ୟକ୍ତି ଙ୍କ ପାଇଁ ରାୟଗଡ଼ା ଜିଲ୍ଲା ପଦ୍ମପୁର ମାଟି ଆଜି ସାରା ଓଡ଼ିଶା ରେ ସମ୍ମାନିତ ହୋଇପାରିଛି। ଆଗାମୀ ଦିନରେ ଏଭଳି ପ୍ରତିଭା ସମ୍ପନ୍ନ ବ୍ୟକ୍ତି ଙ୍କ ପାଇଁ ଜନ୍ମ ମାଟି ଗୌରବାନ୍ବିତ ହେବ ବୋଲି ସ୍ଥାନୀୟ ବୁଦ୍ଧୀଜିବି ଓ ସାଧାରଣ ଜନତା ଆଶା ପ୍ରକାଶ କରିଛନ୍ତି।