କଳିଙ୍ଗସେନା ଘୋଷଣା କଲା ଦଳ ର ତୃତୀୟ ପର୍ଯ୍ୟାୟ ପ୍ରାର୍ଥୀ ତାଲିକା ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଆଜି କଳିଙ୍ଗସେନା ପକ୍ଷରୁ ତୃତୀୟ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରାଯାଇଛି । ପ୍ରାର୍ଥୀ ମାନେ ନିର୍ବାଚନ ରେ ଦଳୀୟ ସଙ୍କେତ ” ବ୍ୟାଟ୍ ” ଚିହ୍ନ ରେ ନିର୍ବାଚନ ଲଢ଼ିବେ ।

ବିଶେଷ ଭାବରେ ଯୁବ ଏବଂ ମହିଳା ଙ୍କୁ ଏହି ନିର୍ବାଚନ ରେ ଗୁରୁତ୍ୱ ଦିଆଯାଇଛି । ଦଳ ପକ୍ଷରୁ ୨୦ ଜଣିଆ ତାରକା ପ୍ରଚାରକ ଙ୍କ ନାମ ଘୋଷଣା କରାଯାଇ ଥିବା ବେଳେ ଆଜି ଏହି ସାମ୍ବାଦିକ ସମ୍ମିଳନୀ ରେ ସେନା ସୁପ୍ରିମୋ ଶ୍ରୀ ହେମନ୍ତ ରଥ ପୁରୀ ଲୋକସଭା ପାଇଁ ସବ୍ୟସାଚୀ ମହାପାତ୍ର , କଟକ ଲୋକସଭା ପାଇଁ ବିଶ୍ବଜିତ ଗୋସ୍ୱାମୀ , ବ୍ରହ୍ମଗିରି ବିଧାୟକ ଭାବେ ପ୍ରମୋଦ ପରିଡା , ଖୋର୍ଦ୍ଧା ବିଧାୟିକା ଭାବେ ନିବେଦିତା ଦାସ , ଭୁବନେଶ୍ୱର ଉତ୍ତର ରୁ ବିଧାୟକ ଭାବେ ଅଶୋକ କୁମାର ସାହୁ ରହିଥିବା ବେଳେ ଭୁବନେଶ୍ୱର ମଧ୍ୟମ ରୁ ବିଧାୟିକା ଭାବେ ସୁଭଦ୍ରା ମିଶ୍ର , ଭୁବନେଶ୍ୱର ଏକାମ୍ର ରୁ ବିଧାୟିକା ଭାବେ ଦିପ୍ତିମୟି ମହାପାତ୍ର , ଜଗତସିଂହପୁର ରୁ ବିଧାୟକ ଭାବେ ପୁରୁଷୋତ୍ତମ ପ୍ରଧାନ , ସାଲେପୁର ରୁ ବିଧାୟକ ଭାବେ ବିଷ୍ଣୁ ଚରଣ ଦାସ ପ୍ରମୁଖ ଙ୍କ ନାମ ଘୋଷଣା କରିଥିଲେ ।

ଆଗାମୀ ଦିନ ରେ ଚତୁର୍ଥ ପର୍ଯ୍ୟାୟ ପ୍ରାର୍ଥୀ ତାଲିକା ଖୁବ୍ ଶୀଘ୍ର ଘୋଷଣା କରା ଯିବ ବୋଲି ଦଳ ପକ୍ଷରୁ ଶ୍ରୀ ରଥ ସୁଚନା ଦେଇଛନ୍ତି ।

ଉକ୍ତ ସାମ୍ବାଦିକ ସମ୍ମିଳନୀରେ କଳିଙ୍ଗସେନା ର ସାଧାରଣ ସମ୍ପାଦକ ସୁଶାନ୍ତ କୁମାର ସାହୁ , ରାଜ୍ୟ ସମ୍ପାଦକ ଅବଦୁଲ ୟାକୁମ୍ ଖାନ୍ ଓ ନିରଞ୍ଜନ ପରିଡା , ନାରୀସେନା ସାଧାରଣ ସମ୍ପାଦିକା ସିମ୍ରନ୍ ଅଧିକାରୀ ଏବଂ ଯୁବସେନା ର ରାଜ୍ୟ ସଭାପତି ଶକ୍ତି ପ୍ରଦ ଦାଶ ଙ୍କ ସମେତ ସମସ୍ତ ଦଳୀୟ କର୍ମୀ ଓ ଘୋଷିତ ପ୍ରାର୍ଥୀ ପ୍ରାର୍ଥୀନୀ ଉପସ୍ଥିତ ରହିଥିଲେ ।

ଦଳ ଛାଡିଲେ କୁସୁମ, ପଦ୍ମରୁ ଲଢ଼ିବେ ! “ମଦ ବେପାରୀ-କୋଇଲା ବେପାରୀ ପାଇଁ ମୁଁ ପ୍ରଚାର କରିପାରିବିନି” କହିଲେ କୁସୁମ !!!!

ଏଥର ସମ୍ଭାଳ ବ୍ୟୁରୋ (ସୁନ୍ଦରଗଡ଼) – ଯୋଗେଶ ସିଂଙ୍କୁ ସୁନ୍ଦରଗଡ ଆସନ ପାଇଁ ବିଜେଡି ଟିକେଟ ମିଳିବା ପରେ ନିରାଶ ହୋଇଛନ୍ତି ଆଶାୟୀ ପ୍ରାର୍ଥୀ କୁସୁମ ଟେଟେ  | ନିରାଶ ହୋଇ ଛାଡିଛନ୍ତି ବିଜେଡି | ଆଉ ପୂର୍ବରୁ ସେ ବିଜେପି ସହିତ ଯୋଗ ଯୋଗରେ ଥିବାରୁ ସେ ବିଜେପି ଟିକଟରୁ ସୁନ୍ଦରଗଡ ବିଧାନସଭା ଆସନରୁ ଲଢ଼ିବେ |

ପ୍ରାର୍ଥୀ ଚୟନରେ ଅସନ୍ତୋଷ ପ୍ରକାଶ କରି ଇସ୍ତଫା ଦେଇଛନ୍ତି କୁସୁମ ବୋଲି ସୂଚନା ମିଳିଛି | ଗତକାଲି ବିଜେଡି ପ୍ରାଥୀ ତାଲିକାରେ ତାଙ୍କୁ ଟିକେଟ ନ ଦେଇ ସୁନ୍ଦରଗଡ଼ ବିଧାନସଭା ବିଜେଡି ପ୍ରାଥୀ ଭାବେ କଂଗ୍ରେସ ରୁ ଆସି ବିଜେଡି ରେ ଯୋଗ ଦେଇଥିବା ଯୋଗେଶ ସିଂକୁ ଟିକେଟ ଦେବାପରେ କୁସୁମ ଅସନ୍ତୋଷ ପ୍ରକାଶ କରିଛନ୍ତି | ତେବେ୨୦୧୪ ସାଧାରଣ ନିର୍ବାଚନରେ ବିଜେଡି ତରଫରୁ ସୁନ୍ଦରଗଡ଼ ବିଧାୟକ ପ୍ରାଥୀ ହୋଇଥିଲେ କୁସୁମ ଏବଂ ଯୋଗେଶ ଙ୍କ ଠାରୁ ପରାଜିତ ହୋଇଥିଲେ | ଏହା ପରେ କୁସୁମ ଗତ ୧୭ତାରିଖ ଦିନ ସୁନ୍ଦରଗଡ଼ ସ୍ୱତନ୍ତ୍ର ଉନ୍ନୟନ ପରିଷଦରୁ ଇସ୍ତଫା ଦେଇଥିଲେ ଏବଂ କହିଥିଲେ ସେ ଏଥର ବିଧାନସଭା ନିର୍ବାଚନ ମଇଦାନକୁ ଓଲ୍ହାଇବାକୁ ନିଷ୍ପତ୍ତି ନେଇଥିବା ହେତୁ ସୁନ୍ଦରଗଡ଼ ସ୍ୱତନ୍ତ୍ର ଉନ୍ନୟନ ପରିଷଦର ଅଧକ୍ଷା ପଦରୁ ଇସ୍ତଫା ଦେଇଛନ୍ତି | ,ନିର୍ବାଚନ ପାଇଁ ମୋତେ ଦଲୀୟ ଟିକେଟ ମିଳିବ ବୋଲି  ଦମ୍ଭୋକ୍ତି  ବାଢିଥିଲେ କୁସୁମ ! କିନ୍ତୁ ଗତକାଲି ବିଜେଡି ସୁପ୍ରିମୋଙ୍କ ଦ୍ୱାରା ହୋଇଥିବା ପ୍ରାର୍ଥୀ  ଘୋଷଣାରେ କୁସୁମଙ୍କ ନା ନ ଥିବାରୁ ସେ ଅସନ୍ତୋଷ ପ୍ରକାଶ କରି ଇସ୍ତଫା ଦେଇଛନ୍ତ |ଆହୁରି ମଧ୍ୟ କୁସୁମ ତାଙ୍କ ଇସ୍ତଫା ପତ୍ରରେ ଲେଖିଛନ୍ତି କି ମୁଁ ବିସ୍ମିତ  କଂଗ୍ରେସ ଦଳରୁ ଆଣି ବିଜେଡ଼ି ପ୍ରାଥୀ ଘୋଷଣା କରାଯାଇଛି |  ଯେଉଁ ବ୍ୟକ୍ତି କି ମଦ ବ୍ୟବଶାୟୀ , କୋଇଲାବେପାରୀ ଓ ଅଞ୍ଚଳ ପ୍ରତି ଅବହେଳା କରି ଆସିଛି ଏବଂ ଯାହା ବିରୋଧରେ ସେ  ବାରମ୍ବାର ସ୍ବର ଉତ୍ତୋଳନ କରି  ଜନ ସାଧାରଣ ଙ୍କ ବିଶ୍ଵାସଭାଜନ ହୋଇ  ପାରି ଛନ୍ତି, ତାଙ୍କ ସପକ୍ଷରେ ମୁଁ ପ୍ରଚାର କରି ପାରିବି ନାହିଁ | ସେଇଥି ପାଇଁ ମୁଁ ବିଜେଡ଼ି ଦଳରସସମସ୍ତ ପଦଵୀ, ସାଧାରଣ ସଦସ୍ୟ  ପଦରୁ ଇସ୍ତଫା ପ୍ରଦାନ କରୁଛି ବୋଲି କୁସୁମ ତାଙ୍କ ଇସ୍ତଫା ପତ୍ରରେ ଲେଖିଛନ୍ତି  | ଆହୁରୀ ମଧ୍ୟ ସେ ଗଣମାଧ୍ୟମ ପ୍ରତିନିଧିମାନଙ୍କ ସାମ୍ନାରେ କହିଛନ୍ତି ମୁଁ ବିଜେଡି ଦଳ ପାଇଁ କେମିତି ଖରା, କେମିତି ବର୍ଷା, କେମିତି ଶୀତ ମୁଁ ଜାଣିନି ଅହରହ କାମ କରି ଆସିଥିଲି | ମୋ ନିଷ୍ଠାର ଫଳ ଦେବା ପରିବର୍ତ୍ତେ ମୋ ପ୍ରତି ଚରମ ଧୋକା କରିଛି ବିଜେଡି |

ଶଙ୍ଖ ଫୁଙ୍କିଲେ ରଘୁନନ୍ଦନ … ବିଜେପି କୁ ବଡ଼ ଝଟକା !!!

ଏଥର ସମ୍ଭାଳ ବ୍ୟୁରୋ (ବାଲିକୁଦ) – ୨୦୧୯ ସାଧାରଣ ନିର୍ବାଚନ ଏରସମା-ବଲିକୁଦା ନିର୍ବାଚନମଣ୍ଡଳୀରେ ଏପ୍ରିଲ ୨୯ତାରିଖରେ ହେବାକୁ ଘୋଷଣା ହେବା ପରେ ସବୁ ରାଜନୈତିକ ଶିବିର ଚଳଚଞ୍ଚଳ ହୋଇଉଠିଛି।ଡ଼ ଦାମୋଦର ରାଉତ ବିଜେପିରେ ମିଶିବା ପରେ ନିଜର ଜନ୍ମମାଟି ଏରସମା-ବାଲିକୁଦା ନିର୍ବାଚନ ମଣ୍ଡଳୀରୁ ପ୍ରାର୍ଥୀ ହୋଇ ନିର୍ବାଚନ ଲଢିବେ ବୋଲି ଚର୍ଚ୍ଚା ହେଉଥିବା ବେଳେ ଏଠାରୁ ପ୍ରାର୍ଥୀ ହେବାକୁ ଆଶାୟୀ ଥିବା ପ୍ରମୁଖ ଦାବିଦାର ରଘୁନନ୍ଦନ ଦାସ ବିଜେପି ଛାଡି ବିଜେଡିରେ ଯୋଗଦେଇଛନ୍ତି।ଏନେଇ ବାଲିକୁଦା ବିଜେପିକୁ ଏକ ଶକ୍ତ ଝଟକା ଲାଗିବା ସହିତ ବର୍ତମାନ ବିଜେଡିର ବିଧାୟକ ଥିବା ପ୍ରଶାନ୍ତ ମୁଦୁଲିଙ୍କ ଚଳିତ ନିର୍ବାଚନରେ ପ୍ରାର୍ଥୀ ହେବାର ଆଶା ସୂତାଖିଅରେ ଝୁଲୁଛି ବୋଲି ରାଜନୈତିକ ବିଶେଷଜ୍ଞଙ୍କ ମଧ୍ୟରେ ମତପ୍ରକାଶ ପାଇଛି।ଦିନେ ଏରସମା-ବାଲିକୁଦା ବିଜେପିର ସ୍ଥିତି ନଥିଲା ଏଇ କିଛି ବର୍ଷ ମଧ୍ୟରେ ନେତା ଓ କର୍ମୀଙ୍କ ପ୍ରଚେଷ୍ଟାରେ ବିଜେପି ଦଳ ଆଗାମୀ ବିଧାନସଭା ନିର୍ବାଚନରେ ନିଜକୁ ପ୍ରମୁଖ ଦାବିଦାର ବୋଲି ଭାବୁଥିବା ବେଳେ ଦାମ ବାବୁ ବିଜେପିରେ ମିଶିବା ପରେ ନିଜ ଜନ୍ମମାଟି ଏରସମା-ବାଲିକୁଦା ନିର୍ବାଚନମଣ୍ଡଳୀରୁ ପ୍ରାର୍ଥୀ ହୋଇ ନିର୍ବାଚନ ଲଢିବେ ବୋଲି ଚର୍ଚ୍ଚା ହେବା ପରଠୁଁ ବିଜେପିର ନେତା ଓ କର୍ମୀଙ୍କ ମହଲରେ ଅସନ୍ତୋଷ ଦେଖାଦେଇଥିବା ଶୁଣିବାକୁ ମିଳିଥିଲା।ଦଳପାଇଁ ଅଦମ୍ୟ ଇଚ୍ଛାଶକ୍ତିକୁ ନେଇ କାର୍ଯ୍ୟ କରୁଥିବା ନେତାଙ୍କ ପ୍ରଚେଷ୍ଟା ଓ ଦଳରେ ପ୍ରତ୍ୟେକ କର୍ମୀଙ୍କ ଅବଦାନ ପାଇଁ ଏରସମା-ବାଲିକୁଦା ନିର୍ବାଚନ ମଣ୍ଡଳୀରେ ଆଜି ବିଜେପିର ସ୍ଥିତି ସୁଦୃଢ଼ ହୋଇଛି।ଏଭଳି ସ୍ଥିତିରେ ଦାମବାବୁଙ୍କୁ ଏଠାରୁ ପ୍ରାର୍ଥୀ କରାଯିବ ବୋଲି ହେଉଥିବା ଚର୍ଚ୍ଚା ଦାବିଦାର ଆଶାୟୀ ପ୍ରାର୍ଥୀଙ୍କ ଶିବିରରେ ନିରାଶା ସୃଷ୍ଟି ହୋଇଥିବା ଚର୍ଚ୍ଚା ହେଉଥିଲା।ଏବେ ସବୁ କଳ୍ପନା ଜଳ୍ପନାର ଅନ୍ତ ଘଟିଛି ଏହି ନିର୍ବାଚନମଣ୍ଡଳୀ ବିଜେପିର ପ୍ରମୁଖ ଦାବିଦାର ଟିକେଟ୍ ଆଶାୟୀ ପ୍ରାର୍ଥୀ ବାଲିକୁଦା ଅଞ୍ଚଳର ରଘୁନନ୍ଦନ ଦାସ ସୋମବାର ଅପରାହ୍ନରେ ନବୀନ ନିବାସରେ ପହଞ୍ଚି ବିଜେଡିରେ ଯୋଗଦେଇଛନ୍ତି।ଗତ ୨୦୧୪ ବିଧାନସଭା ନିର୍ବାଚନରେ ଏରସମା-ବାଲିକୁଦା ନିର୍ବାଚନମଣ୍ଡଳୀରୁ ରଘୁନନ୍ଦନ ସ୍ୱାଧୀନ ପ୍ରାର୍ଥୀ ହୋଇ ୩୨ହଜାର ୧୩୫ଖଣ୍ଡ ଭୋଟ୍ ପାଇ ୩ୟ ସ୍ଥାନରେ ରହିଥିଲେ।ଏପରିକି ଏହି ନିର୍ବାଚନମଣ୍ଡଳୀର ପ୍ରତ୍ୟେକ ଯାଗାରେ ରଘୁନନ୍ଦନଙ୍କ ସମର୍ଥକଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଏଭଳି ଘଡିସନ୍ଧି ମୁହୁର୍ତ୍ତରେ ସେ ବିଜେପି ଛାଡି ବିଜେଡିରେ ଯୋଗଦେବା ଏହି ନିର୍ବାଚନମଣ୍ଡଳୀର ବିଜେପିକୁ ଏକ ଶକ୍ତ ଧକ୍କା ଲାଗିବା ସହିତ ଆଗାମୀ ନିର୍ବାଚନରେ ଦଳ ପାଇଁ ଏହା ଶୁଭଙ୍କର ନୁହେଁ ବୋଲି ଚର୍ଚ୍ଚା ହେଉଛି। ଅପରପକ୍ଷରେ ବର୍ତ୍ତମାନ ବିଜେଡିର ବିଧାୟକ ଥିବା ପ୍ରଶାନ୍ତ ମୁଦୁଲି ୨୦୧୪ ନିର୍ବାଚନରେ ସମୁଦାୟ ୬୯ହଜାର ୩୩୫ଖଣ୍ଡ ଭୋଟ୍ ପାଇ ଦ୍ବିତୀୟ ସ୍ଥାନରେ ଥିବା କଂଗ୍ରେସ ଠାରୁ ୨୯ହଜାର ୩୫୪ଖଣ୍ଡ ଅଧିକ ଭୋଟ ପାଇ ନିର୍ବାଚିତ ହୋଇଥିଲେ।କିନ୍ତୁ ଦଳରେ ବିଦ୍ରୋହୀଙ୍କ ସଂଖ୍ୟା ବୃଦ୍ଧି ପାଇବା ଯୋଗୁଁ ପ୍ରଶାନ୍ତଙ୍କ ସ୍ଥିତି ଭଲ ନଥିବା କୁହାଯାଉଥିବା ବେଳେ ରଘୁନନ୍ଦନ ବିଜେପି ଛାଡି ବିଜେଡିରେ ଯୋଗଦେବା ପରେ ଚଳିତ ନିର୍ବାଚନରେ ବିଜେଡି ପ୍ରଶାନ୍ତଙ୍କୁ ପ୍ରାର୍ଥୀ ନକରି ରଘୁନନ୍ଦନଙ୍କୁ ପ୍ରାର୍ଥୀ କରିବ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି।

ନିର୍ବାଚନ ପୂର୍ବରୁ ପୋଲିସକୁ ବଡ ସଫଳତା- ବଡଧରଣର ଜାଲନୋଟ ଛାପା କାରଖାନା ଠାବ ,

ଏଥର ସମ୍ଭାଳ ବ୍ୟୁରୋ (ପାରଳାଖେମୁଣ୍ଡି) – ପାରଳାଖେମୁଣ୍ଡି ସ୍ଥିତ ଆଦର୍ଶ ଥାନାରେ ଘଟଣା ସମ୍ପର୍କରେ ଜିଲ୍ଲା ଆରକ୍ଷୀ ଅଧିକ୍ଷକ ସାର ଶର୍ମା ଅଧିକ ସୂଚନା ଦେଇ ସାମ୍ୱାଦିକ ମାନଙ୍କୁ କହିଛନ୍ତି ଯେ ପାରଳାଖେମୁଣ୍ଡି ସହରରେ ଥିବା ଶ୍ରୀଧର ନଗର ୨ୟ ଲାଇନ ଠାରେ ଦୀର୍ଘ ଦିନ ଧରି ଏକ ଭଡା ଘରେ ଜାଲ ନୋଟ ଛାପା କାରଖାନା ଚାଲିଥିବା କୌଣସି ସୁତ୍ରରୁ ସୁରାକ ମିଳିଥିଲା । ପୋଲିସ ଏହାକୁ ଦୃଷ୍ଟିରେ ରଖି ଏସଡିପିଓ ଠାକୁର ପ୍ରସାଦ ପାତ୍ର ଏବଂ ଥାନା ଅଧିକାରୀ ବିବେକା ନନ୍ଦ ସ୍ୱାଇଁଙ୍କ ନେତୃତ୍ୱରେ ସଦଳବଳେ ଅଚାନକ ସେହି ଜାଲନୋଟ ଛାପାକାରଖାନା ଉପରେ ଚଢାଉ କରିଥିଲେ । ସେଠାରେ କାରବାରରେ ସମ୍ପୃକ୍ତ ଥିବା ଗଜପତି ଜିଲ୍ଲା ଗୁରାଣ୍ଡି ଥାନା ଅନ୍ତର୍ଗତ ମହାଦେଇପୁର ଗ୍ରାମର କରୁଣାକର ପରିଡା ଏବଂ ପଡୋଶୀ ଆନ୍ଧ୍ରର ଶ୍ରୀକାକୁଲମ ଜିଲ୍ଲା ମେଳିଆପୁଟି ଅନ୍ତର୍ଗତ ବସୁନ୍ଦରା ଗ୍ରାମର ସନ୍ତୋଷ ମାଝୀଙ୍କୁ ଗିରଫ କରିଥିଲେ । ତାହା ସହିତ ଜାଲ ନୋଟ ଛାପାକାରବାରରେ ବ୍ୟବହୃତ ହେଉଥିବା କେତୋଟି ବାଲଟି , ହାତଗ୍ଲୋବ ଜାଲନୋଟ ଛାପା ଛାଞ୍ଚ ବିଭିନ୍ନ କେମିକେଲ ଓ କେମିକେଲରେ ବୁଡି ରହିଥିବା ଜାଲନୋଟ, ଜାଲନୋଟ ସାଇଜର ପେପର କଟିଂ , ମୋବାଇଲ ସମେତ ୨,୫୦,୦୦୦ଟଙ୍କାର ୫୦୦ଟଙ୍କିଆ ଜାଲନୋଟ ଜବତ କରାଯାଇଥିଲା ।

ଶ୍ରୀଧର ନଗର ୨ୟଲାଇନରେ ଚଞ୍ଚଳା ବାରିକ ନାମକ ଜଣେ ମହିଳାଙ୍କ ଘରେ ଗିରଫ ସଂପୃକ୍ତ ୨ଜଣ ଯୁବକ ଭଡାସୁତ୍ରରେ ନେଇ ଏଭଳି ଜାଲନୋଟ ଛାପାକାରଖାନା ଚଳାଇ ଆସୁଥିଲେ । ଆସନ୍ତା ସାଧାରଣ ନିର୍ବାଚନ ପାଇଁ ଏହି ଜାଲ ନୋଟ ଗୁଡିକ ବଣ୍ଟନ କରାଯିବା ପାଇଁ ଏଭଳି ଜାଲନୋଟ ଛାପାକାରଖାନା ଚାଲିଥିବା ପୋଲିସ ପକ୍ଷରୁ ସନ୍ଦେହ କରାଯାଉଛି ତେବେ ଏହାର ଅଧିକ ତଦନ୍ତ ଚାଲିଛି । ଅନ୍ୟ ପକ୍ଷରେ ଏହି କାରବାରରେ ଆଉ କେତେକ ଯୁବକ ସଂପୃକ୍ତ ଥିବା ପୋଲିସ ଅନୁମାନ କରି ତଦନ୍ତକୁ ଜୋରଦାର କରିଛି । ଅତିଶୀଘ୍ର ଅନ୍ୟ ସଂପୃକ୍ତ ଥିବା ଅଭିଯୁକ୍ତ ମାନଙ୍କୁ ଧରାଯିବ ବୋଲି ଏସପି ସାରା ଶର୍ମା କହିଛନ୍ତି ।

ଏହି ଚଢାଉରେ ଅନ୍ୟମାନଙ୍କ ମଧ୍ୟରେ ଏସ ଆଇ ସୁନିଲ କୁମାର ଦଳାଇ,ଏ ଏସଆଇ ଜଗଦୀଶ ପଣ୍ଡା ଓ ଦିବାକର ପ୍ରଧାନ ହାବିଲଦାର ବିର୍ଜି ଜେନା, ବିପି ରଥ, କେ.ବି ରତ୍ନମ, ହରିକୃଷ୍ଣ ସାମଲ, ସୁସିଲ କୁମାର ପାତ୍ର ସାମିଲ ଥିଲେ ।

ବିଧାୟକ ପ୍ରଫୁଲ୍ଲ ମାଝୀଙ୍କ ଆସନ ଟଳମଳ !!!!!

ଏଥର ସମ୍ଭାଳ ବ୍ୟୁରୋ (ସୁନ୍ଦରଗଡ଼) – ବିଜେଡି ଦଳ ପକ୍ଷରୁ ଦୂତୀୟ ପର୍ଯ୍ୟାୟ ନିର୍ବାଚନ ପ୍ରାଥୀ ତାଲିକା ଘୋଷଣା କରାଯାଇଛି | ହେଲେ କଂଗ୍ରେସ ପକ୍ଷରୁ ଜାରି କରାଯାଇଥିବା ପ୍ରଥମ ପର୍ୟାୟ ପ୍ରାଥୀ ତାଲିକାରେ ସୁନ୍ଦରଗଡ଼ ଜିଲ୍ଲାର ମାତ୍ର ୨ଟି ଆସନ ଘୋଷଣା କରାଯାଇଛି |   ସେଗୁଡିକ ହେଲା  ବିରମିତ୍ର ପୁର ଓ ରାଜଗାଙ୍ଗପୁର |  ହେଲେ ଆଉ ୫ଟି ଆସନ କଂଗ୍ରେସ ରୁ ପ୍ରାଥୀ କିଏ ହେବ ବୋଲି ଚର୍ଚ୍ଚା ଜୋର ଧରିଛି | ଏପରିକି ବିଧାୟକ ଥିବା ତଲସରା ଆସନରେ ଡ଼ ପ୍ରଫୁଲ୍ଲ ମାଝୀ ଦାବିଦାର ଥିବା ବେଳେ ସେ ଆସନଟିକୁ ବି ଝୁଲେଇ ରଖାଯାଇଥିବା ଯୋଗୁ ତାଙ୍କର ଟିକଟ ଅନିଶ୍ଚିତତା ନାହିଁ ତ, ଏହାକୁ ନେଇ  ସୁନ୍ଦରଗଡରେ ଚାଲିଛି ଜୋରଦାର ଟୁପୁରୁ ଟାପୁରୁ |

ଗତ ୨୦୦୪ ମସିହାରେ ସାଧାରଣ ନିର୍ବାଚନ ପରେ ତଲସରା ବିଧାୟକ ଗଜାଧର ମାଝୀ ଙ୍କ ସ୍ବର୍ଗବାସ ହେବାପରେ ତାଙ୍କ ପୁତୁରା ଜ୍ୱାଇଁ ଉପନିର୍ବାଚନରେ ପ୍ରାର୍ଥୀ  ହୋଇ ବିଜୟୀ ହେବାପରେ ଲଗାତାର ଭାବେ୨୦୦୯ଓ୨୦୧୪ନିର୍ବାଚନରେ ବିଜୟୀ ହୋଇ ହେଟ୍ରିକ କରିବା ଓ ଚଳିତ ବର୍ଷ ରାଜ୍ୟ ସରକାରଙ୍କ ଠାରୁ ଶ୍ରେଷ୍ଠ ବିଧାୟକ ଭାବେ ପୁରସ୍କୃତ ହୋଇଥିଲେ | ଟିକେଟ ପାଇବା ଥୟ, କିନ୍ତୁ କଂଗ୍ରେସ ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକାରେ ତାଙ୍କ ନାମ ନ ଥିବାରୁ ତାଙ୍କ ଆସନ ଟଲମଲ ହେଉଥିବା ଚର୍ଚ୍ଚା ହେଉଛି |  ଜିଲ୍ଲା କଂଗ୍ରେସର ଆଶାୟୀ ପ୍ରାଥୀଙ୍କ ଦରଖାସ୍ତ ଦାଖଲ ସମୟରେ ପ୍ରଫୁଲ୍ଲ ମାଝୀ ସୁନ୍ଦରଗଡ଼ ଲୋକସଭା ଆସନ ଓ ତାଙ୍କର ପତ୍ନୀ ବାଲିଶଙ୍କରା ବ୍ଲକ ର ଅଧ୍ୟକ୍ଷା ତ୍ରିବେଣୀ ମାଝୀଙ୍କୁ ତଲସରା ବିଧାନସଭା ଆସନରୁ ପ୍ରାର୍ଥୀ କରିବା ପାଇଁ ଦରଖାସ୍ତ ଦାଖଲ କରିଥିଲେ |  ସୁନ୍ଦରଗଡ଼ ଲୋକସଭା ଆସନରୁ ଜର୍ଜ ତିର୍କୀଙ୍କୁ କଂଗ୍ରେସ ପକ୍ଷରୁ ପ୍ରାର୍ଥୀ ଘୋଷଣା କରିବା ପରେ ପ୍ରଫୁଲ୍ଲ ମାଝୀ ତଲସରା ବିଧାନସଭା ମଣ୍ଡଳୀରୁ ଟିକେଟ ପାଇବେ ବୋଲି ଆଶାକରା ଯାଉଥିଲା | କଂଗ୍ରେସ ପ୍ରାର୍ଥୀ ତାଲିକା ଘୋଷଣାରେ ତଲସରା ବିଧାନସଭା ପ୍ରାଥୀ କିଏ ହବ ନାମ ନ ଥିବାରୁ ତାଙ୍କ ଆସନ ଟଳମଳ ହେଉଥିବା ଚର୍ଚ୍ଚା ହେଉଛି | ବିଜେଡ଼ିରୁ ଟିକେଟ ପାଇନଥିବା ବିନୟ ଟପ୍ପୋ ଙ୍କୁ କଂଗ୍ରେସରୁ ପ୍ରାର୍ଥୀ  କରାଇବା ପାଇଁ ହେଉଥିବା ଶୁଣିବାକୁ ମିଳିଛି|  ବିନୟ ଟପ୍ପୋ ୧୯୯୦ ମସିହାରେ ସ୍ବର୍ଗତ ଗଜାଧର ମାଝୀ ଙ୍କ ବିରୋଧରେ ସ୍ୱାଧୀନ ପ୍ରାର୍ଥୀ ହୋଇ  ୧୦୦୦୦ ଭୋଟ୍ ନେଇ ଗଜାଧର ମାଝୀଙ୍କୁ ପରାଜିତ କରିବାରେ ମୁଖ୍ୟ ଭୂମିକା ନେଇଥିଲେ | ୨୦୦୯ମସିହାରେ ଝାରଖଣ୍ଡ ମୁକ୍ତିମୋର୍ଚାରୁ ତଲସରା ଆସନ ରୁ ପ୍ରାଥୀ ହୋଇ ୪୯୯୪ ଖଣ୍ଡ ଭୋଟ ପାଇଥିଲେ | ୨୦୧୪ନିର୍ବାଚନ ରେ ବିଜେଡ଼ି ଦଳରେ ପ୍ରାଥୀ ହୋଇ ମାତ୍ର ୧୧୦୦ ଶହ  ଭୋଟରେ କଂଗ୍ରେସ ପ୍ରାର୍ଥୀଙ୍କଠୁ ପରାଜିତ ହୋଇଥିଲେ | ଚଳିତ ନିର୍ବାଚନ ରେ ବିଜେଡିରୁ ଟିକେଟ ପାଇବେ ନାହିଁ ବୋଲି ସେ ଜାଣି କଂଗ୍ରେସ ସହ ବହୁଦିନ ଧରି ଆଲୋଚନା କରୁଥିବାରୁ  ଶ୍ରେଷ୍ଠ ବିଧାୟକ ପ୍ରଫୁଲ୍ଲ ମାଝୀ ଙ୍କ ଟିକେଟ କଟିପାରେ ବୋଲି ଚର୍ଚ୍ଚା ଜୋର ଧରିଛି |

କଂଗ୍ରେସ ଜାରି କଲା ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା !

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) –

ସୋମବାର  ବିକୁ ଜନତା ଦଳ ତାହାର ପ୍ରଥମ ପରୱାଡା ପ୍ରାର୍ଥୀତାଲିକା ଜାରି କରିଥିବା ବିଳମ୍ବିତ ସନ୍ଧ୍ୟାରେ କଂଗ୍ରେସ କାରି କରିଛି ପ୍ରଥମ ପର୍ଯ୍ୟାୟ ତାଲିକା   । ବରଗଡ଼, ସୁନ୍ଦରଗଡ଼, କଳାହାଣ୍ଡି, ନବରଙ୍ଗପୁର, କନ୍ଧମାଳ ଓ ବ୍ରହ୍ମପୁର ଲୋକସଭା ଆସନ ସମେତ ୩୬ଟି ବିଧାନସଭା ଆସନ ପାଇଁ ପ୍ରାର୍ଥୀଙ୍କ ନାଁ ଘୋଷଣା କରାଯାଇଛି । ପ୍ରାର୍ଥୀ ତାଲିକାରେ ସ୍ଥାନ ପାଇଥିବା ନା ଗୁଡିକ ହେଲା ଲୋକସଭା ପାଇଁ ବରଗଡ଼-  ପ୍ରଦୀପ କୁମାର ଦେବତା, ସୁନ୍ଦରଗଡ଼- ଜର୍ଜ ତିର୍କୀ, କଳାହାଣ୍ଡି- ଭକ୍ତଚରଣ ଦାସ, ନବରଙ୍ଗପୁର- ପ୍ରଦୀପ ମାଝୀ, କନ୍ଧମାଳ- ମନୋଜ କୁମାର ଆଚାର୍ଯ୍ୟ,  ଓ ବ୍ରହ୍ମପୁର- ଭି.ଚନ୍ଦ୍ରଶେଖର ନାଇଡୁ |

ସେହିପରି ବିଧାନସଭା ପ୍ରାର୍ଥୀ ତାଲିକାରେ ଯେଉଁମାନେ ସ୍ଥାନ ପାଇଛନ୍ତି, ସେମାନେ ହେଲେ ପଦ୍ମପୁର- ସତ୍ୟଭୂଷଣ ସାହୁ,ବରଗଡ଼- ନିପନ୍ ଦାସ. ଅତାବିରା- ନିହାର ମହାନନ୍ଦ, ବୀରମିତ୍ରପୁର- ରୋହିତ ଯୋଶେଫ୍ ତିର୍କୀ, ରାଜଗାଙ୍ଗପୁର- ଡ. ସି.ଏସ୍.ରାଜନ୍, ବୀରମହାରାଜପୁର- ବିନୋଦ କୁମାର ପାତ୍ର, ବଲାଙ୍ଗୀର- ନରସିଂହ ମିଶ୍ର, ନୂଆପଡ଼ା- ଘାସିରାମ ମାଝୀ, ଖରିଆର- ଅଧିରାଜ ପାଣିଗ୍ରାହୀ, ଝରିଗ୍ରାମ- ଉଧାର ମାଝୀ, ନବରଙ୍ଗପୁର- ସଦନ ନାଏକ, ଡାବୁଗାଁ- ଭୂଜବଳ ମାଝୀ, ଲାଞ୍ଜିଗଡ଼- ଶିବାଜୀ ମାଝୀ, ଧର୍ମଗଡ଼- ଦିଗମ୍ବର ଦୁରିଆ,ବାଲିଗୁଡ଼ା- ସିମନ୍ ମଲ୍ଲିକ, ଫୁଲବାଣୀ- କିଶୋର ଚନ୍ଦ୍ର କଅଁର, କଣ୍ଟାମାଳ- ପ୍ରଶାନ୍ତ ସାହୁ, ଦଶପଲ୍ଲା- ପ୍ରଶାନ୍ତ କୁମାର ନାୟକ, ଭଞ୍ଜନଗର- ସଞ୍ଜୟ କୁମାର ତ୍ରିପାଠୀ, ପୋଲସରା- ହରିଚରଣ ସ୍ୱାଇଁ, କବିସୂର୍ଯ୍ୟନଗର- ବିଜୟ କୁମାର ସାହୁ, ଆସ୍କା- ମନୋଜ କୁମାର ଜେନା, ସାନଖେମୁଣ୍ଡି- ରମେଶ ଚନ୍ଦ୍ର ଜେନା,ହିଞ୍ଜିଳି- ରାମକୃଷ୍ଣ ପଣ୍ଡା, ଗୋପାଳପୁର- ଏସ୍.ଧାମରାଜ ରେଡ୍ଡି, ବ୍ରହ୍ମପୁର- ଲିଙ୍ଗରାଜ ଚୌଧୁରୀ, ଦିଗପହଣ୍ଡି- ବିସ୍ମୟ ମହାପାତ୍ର, ଚିକିଟି- ସୁବାସ ଚନ୍ଦ୍ର ରାଉତ, ମୋହନା- ଦାଶରଥୀ ଗମାଙ୍ଗ, ଗୁଣୁପୁର- ପୁରୁଷୋତ୍ତମ ଗମାଙ୍ଗ, ବିଷମ କଟକ- ନୀଳମାଧବ ହିକୋକା, ଜୟପୁର- ତାରାପ୍ରସାଦ ବାହିନୀପତି, କୋରାପୁଟ- କୃଷ୍ଣଚନ୍ଦ୍ର କୁଲଦୀପ୍, ପଟାଙ୍ଗୀ- ରାମଚନ୍ଦ୍ର କାଡାମ୍, ମାଲକାନଗିରି- ମାଲା ମାଢ଼ୀ ଓ  ଚିତ୍ରକୋଣ୍ଡା- ଶ୍ରୀମତୀ ଲକ୍ଷ୍ମୀପ୍ରିୟା ନାୟକ |

ବିଜେଡି ଫେରିଲେ ପ୍ରଫୁଲ୍ଲ ଘଡାଇ: ଘରୁ ତଡି ଦେଇଥିଲେ, ଏବେ ଲୋଡା ପଡିଲେ

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ନିର୍ବାଚନ ପୂର୍ବରୁ ବହିଷ୍କୃତ ପ୍ରଫୁଲ୍ଲ ଚନ୍ଦ୍ର ଘଡାଇଙ୍କ କଥା ମନେ ପଡିଲା ସୁପ୍ରିମୋଙ୍କୁ । ପ୍ରଫୁଲ୍ଲଙ୍କ ଉପରୁ ବହିଷ୍କୃତ ଆଦେଶ ଉଠାଇଲେ ନବୀନ ପଟ୍ଟନାୟକ । ଏବେ ପୁଣି ବିଜେଡିକୁ ଫେରିଛନ୍ତି ପୂର୍ବତନ ମନ୍ତ୍ରୀ ତଥା ବିଜେଡିର ଟାଣୁଆ ନେତା ପ୍ରଫୁଲ୍ଲ ଚନ୍ଦ୍ର ଘଡାଇ ।

ହାରିବା ଭୟରେ ବିଜେପୁର ଭଳି ‘ସେଫ୍‌ ସିଟ୍‌’ ବାଛିନେଲେ ନବୀନ !

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଦକ୍ଷିଣ ଓଡ଼ିଶାରେ କମୁଛି ସମର୍ଥନ । ହାରିବା ଭୟରେ ପଶ୍ଚିମ ମୁହାଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତେଣୁ ପଶ୍ଚିମ ଓଡ଼ିଶାର  ବିଜେଡି ପାଇଁ ‘ସେଫ ସିଟ୍‌’ କୁହାଯାଉଥିବା ବିଜେପୁରରୁ ଲଢିବେ ନବୀନ  । ସବୁବେଳେ ମହିଳାଙ୍କ ସମ୍ମାନ କଥା କହୁଥିବା ନବୀନ ନିଜ ପରାଜୟ ଭୟରେ ବିଜେପୁର ବିଧାୟକ ରୀତା ସାହୁଙ୍କୁ ଆଉଟ୍‌ କରି ନିଜେ ଇନ୍‌ ହୋଇଛନ୍ତି । ଏଭଳି ତମାମ ଅଭିଯୋଗ ଆଣିଛି ରାଜ୍ୟ ବିଜେପି । ରାଜ୍ୟ ଗୁଇନ୍ଦା ବିଭାଗର ଏକ ଗୁରୁତ୍ବପୂର୍ଣ୍ଣ  ଚିଠି ଏହି ଅଭିଯୋଗର କେନ୍ଦ୍ର ବିନ୍ଦୁ ପାଲଟିଛି  । ମାର୍ଚ୍ଚ ୧୫ ତାରିଖରେ  ରାଜ୍ୟ ଗୁଇନ୍ଦା ବିଭାଗ ମହାନିର୍ଦ୍ଦେଶକଙ୍କ ଦସ୍ତଖତରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଓ ପୋଲିସ ମହାନିର୍ଦ୍ଦେଶକଙ୍କୁ ଦିଆଯାଇଥିବା ଚିଠିକୁ  ଗଣମାଧ୍ୟମ ସାମ୍ନାରେ ମୁଖ୍ୟମନ୍ତ୍ରୀଙ୍କ ଗୁମର ଖୋଲିଛନ୍ତି ରାଜ୍ୟ ବିଜେପି ଯୁବମୋର୍ଚ୍ଚା ସଭାପତି ଟଙ୍କଧର ତ୍ରିପାଠୀ ।

ବାପାଙ୍କୁ ଅନୁସରଣ କଲେ ଝିଅ । ବ୍ୟକ୍ତିିଗତ କାରଣ ଦର୍ଶାଇ ବିଜେଡି ଛାଡିଲେ ଦାମଙ୍କ ଝିଅ ପ୍ରୀତିନନ୍ଦା । ପୁଅ ସମ୍ବିତଙ୍କୁ ନେଇ ଲାଗି ରହିଛି ଦ୍ୱନ୍ଦ୍ୱ !

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଦାମ ରାଉତ ପଦ୍ମ ଧରିବା ପରେ ତାଙ୍କୁ ଅନୁସରଣ କରିଛନ୍ତି ଝିଅ ପ୍ରତିନନ୍ଦା ରାଉତରାୟ । ବ୍ୟକ୍ତିିଗତ କାରଣ ଦର୍ଶାଇ ବିଜେଡିର ପ୍ରାଥମିକ ସଦସ୍ୟରୁ ଇସ୍ତଫା ଦେଇଛନ୍ତି ପ୍ରୀତିନନ୍ଦା । ବିଏମସି କର୍ପୋରେଟର ଭାବେ ବିଜେଡିରୁ ଜିତିଥିଲେ ପ୍ରୀତିନନ୍ଦା । ଗୋଟିଏ ପଟେ ପୁଅ ସମ୍ବିତ ବିଜେଡି ଟିକେଟ୍ ପାଇଁ ଲବି କରୁଥିବା ବେଳେ ଝିଅ ପ୍ରୀତିନନ୍ଦା ବିଜେଡି ଛାଡିଛନ୍ତି । ଫଳରେ ରୋଚକ ସ୍ଥିତିରେ ପହଁଚିଛି ଦାମବାବୁଙ୍କ ପରିବାରିକ ରାଜନୀତି । ପ୍ରୀତିନନ୍ଦା ବିଜେପିରେ ଯୋଗ ଦେବେ ବୋଲି ଚର୍ଚ୍ଚା ହେଉଥିବା ବେଳେ ସମ୍ବିତଙ୍କୁ ନେଇ ଦ୍ୱନ୍ଦ୍ୱ ଲାଗିରହିଛି ।

ବାପାଙ୍କ ପଛେ ପଛେ ଝିଅ । ପଦ୍ମ ଶିବିରରେ ବରିଷ୍ଠ ନେତା ଦାମ ରାଉତ ସାମିଲ ହେବା ପରେ ବିଜେଡି ଛାଡ଼ିଛନ୍ତି ଝିଅ ପ୍ରୀତିନନ୍ଦା ରାଉତରାୟ । ଦଳର ପ୍ରାଥମିକ ସଦସ୍ୟରୁ ସେ ଇସ୍ତଫା ଦେଇଛନ୍ତି । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନିକଟକୁ ପଠାଇଥିବା ଇସ୍ତଫା ପତ୍ରରେ ବ୍ୟକ୍ତିଗତ କାରଣ ଦର୍ଶାଇଛନ୍ତି ପ୍ରୀତିନନ୍ଦା । ତେବେ ପ୍ରୀତିନନ୍ଦା ତାଙ୍କ ଇସ୍ତଫା ପତ୍ରରେ ବିଜେଡି କିମ୍ବା ସୁପ୍ରିମୋଙ୍କ ବିରୋଧରେ କୌଣସି ଅଭିଯୋଗ ଆଣିନାହାନ୍ତି । ବରଂ ତାଙ୍କୁ ବିଏମସି କର୍ପୋରେଟର ହେବାର ସୁଯୋଗ ଦେଇଥିବାରୁ ମୁଖ୍ୟମନ୍ତ୍ରୀଙ୍କୁ ସେ ଧନ୍ୟବାଦ ଜଣାଇଛନ୍ତି ।

ଭୁବନେଶ୍ୱର ମହାନଗର ନିଗମର କର୍ପୋରେଟର ଭାବେ ବିଜେଡି ଟିକେଟରେ ଜିତିଥିଲେ ପ୍ରୀତିନନ୍ଦା ରାଉତରାୟ । ଦାମ ରାଉତ ବିଜେଡିରୁ ବହିଷ୍କାର ହେବା ପରେ ମଧ୍ୟ ଦଳରେ ରହିଥିଲେ ପ୍ରୀତିନନ୍ଦା । ତେବେ ଦାମ ରାଉତ ବିଜେପିରେ ଯୋଗ ଦେବା ପରେ ବିଜେଡି ଛାଡିଛନ୍ତି ଝିଅ । ଡାକ୍ତର ଦାମ ରାଉତ ବିଜେପିରେ ଯୋଗ ଦେବା ପୂର୍ବରୁ ଚର୍ଚ୍ଚା ହେଉଥିଲା, ଦାମଙ୍କ ଅଭିଯାନରେ ରୋକ ଲଗାଇବା ପାଇଁ ବିଜେଡି ଶିବିର ଜୋରଦାର ଉଦ୍ୟମ କରିଥିଲା । ଏହା ମଧ୍ୟ ଚର୍ଚ୍ଚା ହେଉଥିଲା ପୁଅ ସମ୍ବିତଙ୍କୁ ପାରାଦୀପ ଟିକେଟ୍ ଓ ଝିଅ ପ୍ରୀତିନନ୍ଦାଙ୍କୁ ଭୁବନେଶ୍ୱର ମେୟର ପଦବୀ ଅଫର୍ ଦେଇଥିଲା ବିଜେଡି ।

ତେବେ ଦାମ ବାବୁ ତାଙ୍କ ଜିଦ୍ରେ ଅଟଳ ରହି ବିଜେପିରେ ଯୋଗ ଦେଇଥିଲେ । ବାପାଙ୍କ ପଦ ଅନୁସରଣ କରି ଝିଅ ପ୍ରୀତିନନ୍ଦା ଦଳ ଛାଡ଼ିଛନ୍ତି । ପ୍ରୀତିନନ୍ଦା ବିଜେପିରେ ଯୋଗ ଦେବେ ବୋଲି ଚର୍ଚ୍ଚା ହେଉଥିବା ବେଳେ ପୁଅ ସମ୍ବିତ ରାଉତରାୟଙ୍କ ଉପରେ ସମସ୍ତଙ୍କ ନଜର ରହିଛି । ତେବେ ତାଙ୍କର ରାଜନୈତିକ ପଦକ୍ଷେପ କ’ଣ ହେବ, ଏହାକୁ ନେଇ ଦ୍ୱନ୍ଦ୍ୱ ଲାଗିରହିଛି ।

ବୈଜୟନ୍ତ ଙ୍କୁ ଭୟ ଯୋଗୁଁ ; ଦିଲୀପ ଙ୍କୁ ଲୋଡ଼ିଲା ବିଜେଡି !

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ରାଜ୍ୟରେ ରାଜନୀତିକ ଉଷ୍ମତା ବଢ଼ିବା ସହ ବିଜେପିର କଳେବର ବୃଦ୍ଧି ପାଇବାକୁ ନେଇ ଆଶଙ୍କିତ ବିଜେଡି ଏବେ ନିଜର ପ୍ରତିଷ୍ଠାତା ସଦସ୍ୟ ଦିଲୀପ ରାୟଙ୍କୁ ପୁଣିଥରେ ଦଳରେ ସାମିଲ କରିବାକୁ ନିଷ୍ପତ୍ତି ନେଇଛି। ଦିଲୀପଙ୍କ ମାଧ୍ୟମରେ ବିଜେଡି ନିଜର ଗଡ଼ କେନ୍ଦ୍ରାପଡ଼ା ଲୋକସଭା ଆସନକୁ ସୁରକ୍ଷିତ ରଖିବାକୁ ଏକ ସୁଚିନ୍ତିତ ରଣନୀତି ପ୍ରସ୍ତୁତ କରିଥିବା ଜଣାପଡ଼ିଛି। କେନ୍ଦ୍ରାପଡ଼ା ଲୋକସଭା ଆସନରେ ଅଭିନେତା ଅନୁଭବ ମହାନ୍ତି ଓ ବରିଷ୍ଠ ପ୍ରଶାସିକା ସୁଜାତା କାର୍ତ୍ତିକେୟନଙ୍କ ମଧ୍ୟରୁ ଜଣଙ୍କୁ ପ୍ରାର୍ଥୀ କରିବାକୁ ଯୋଜନା କରିଥିବା ବିଜେଡି ନିଜର ଆଭ୍ୟନ୍ତରୀଣ ସର୍ଭେ ରିପୋର୍ଟକୁ ଆଧାର କରି ଦିଲ୍ଲୀପଙ୍କୁ ଦଳକୁ ଆଣିବାକୁ ବାଧ୍ୟ ହୋଇଥିବା ସୂଚନା ମିଳିଛି।

ବିଜେଡି ସୂତ୍ରରୁ ମିଳିଥିବା ସୂଚନା ଅନୁସାରେ, ନଭେମ୍ବର ୩୦ତାରିଖରେ ଦିଲୀପ ବିଜେପିରୁ ଇସ୍ତଫା ଦେବା ପରେପରେ ବିଜେଡିରେ ସାମିଲ ହେବା କଥା। କିନ୍ତୁ ବିଜୟ ମହାପାତ୍ରଙ୍କୁ ନେଇ ସମସ୍ୟା ରହିଥିବାରୁ ସେ ଏକାକୀ ବିଜେଡିକୁ ଫେରି ପାରୁନଥିଲେ। କେନ୍ଦ୍ରାପଡ଼ା ଜିଲ୍ଲା ସମୀକରଣକୁ ଦୃଷ୍ଟିରେ ରଖି ବିଜୟଙ୍କୁ ସାମିଲ କରିବା ସପକ୍ଷରେ ଦଳର ସଭାପତି ନବୀନ ପଟ୍ଟନାୟକ ଆଗ୍ରହୀ ନଥିବା ଜାଣିବା ପରେ ଦିଲୀପ ଦଳକୁ ଫେରିବାର ତାରିଖକୁ ଗଡ଼ାଇ ଚାଲିଥିଲେ। କିନ୍ତୁ ବୈଜୟନ୍ତ ପଣ୍ଡା ଓ ଡାକ୍ତର ଦାମୋଦର ରାଉତ ବିଜେପିରେ ସାମିଲ ହେବାପରେ ଉପକୂଳ ଓଡ଼ିଶାରେ ସଂଗଠନ ଦୁର୍ବଳ ହେବାର ଆଶଙ୍କା କରି ବିଜେଡି ସଭାପତି ମଧ୍ୟ ନରମ ଆଭିମୁଖ୍ୟ ପୋଷଣ କରିଥିବା ଜଣାପଡ଼ିଛି।

ନିର୍ଭରଯୋଗ୍ୟ ସୂତ୍ର ଅନୁସାରେ, ଦିଲୀପଙ୍କ ଘରବାହୁଡ଼ା ପାଇଁ ବିଜେଡି ମଧ୍ୟ ତାଙ୍କର ସର୍ତ୍ତକୁ ମାନି ନେଇଛି । ବିଜେଡି ତାଙ୍କୁ ଚଳିତ ସାଧାରଣ ନିର୍ବାଚନରେ କେନ୍ଦ୍ରାପଡ଼ା ଲୋକସଭା ଆସନରୁ ପ୍ରାର୍ଥୀ କରିବ। ବିଜେପି ନିଜର ବରିଷ୍ଠ ନେତା ବୈଜୟନ୍ତ ପଣ୍ଡାଙ୍କୁ କେନ୍ଦ୍ରାପଡ଼ାରେ ଛିଡ଼ା କରାଇବାର ସମ୍ଭାବନା ଥିବାରୁ ତାଙ୍କୁ କଡ଼ା ମୁକାବିଲା କରିବା ନିମନ୍ତେ ଦିଲ୍ଲୀପଙ୍କୁ ଦଳକୁ ଫେରାଇ ଅଣାଯାଇଛି। କେନ୍ଦ୍ରାପଡ଼ା ଜିଲ୍ଲାରେ ପ୍ରଭାବ ଥିବା ବିଜୟ ମହାପାତ୍ରଙ୍କ ସହଯୋଗରେ ବୈଜୟନ୍ତଙ୍କୁ ଦିଲ୍ଲୀପ କଡ଼ା ଟକ୍କର ଦେଇପାରିବେ ବୋଲି ବିଜେଡି ଆକଳନ କରିଛି। ଦିଲୀପ ଓ ବିଜୟଙ୍କର ଘନିଷ୍ଠ ସମ୍ପର୍କ ଥିବାରୁ ତା’ର ଫାଇଦା ବିଜେଡିକୁ ମିଳିବ ବୋଲି ଦଳ ଆଶା ରଖିଛି। ଆଉ ନିର୍ବାଚନ ପରେ ବିଜୟଙ୍କୁ ବିଜେଡିକୁ ଫେରାଇ ଆଣିବା ପାଇଁ ପଦକ୍ଷେପ ନିଆଯିବ ବୋଲି ଦଳ ପକ୍ଷରୁ ଦିଲୀପଙ୍କୁ ଆଶ୍ୱସ୍ତ କରାଯାଇଥିବା ସୂଚନା ମିଳିଛି।

ଉଲ୍ଲେଖଯୋଗ୍ୟ, ବିଜେଡି ପ୍ରଥମେ କେନ୍ଦ୍ରାପଡ଼ା ଲୋକସଭା ଆସନରେ ଅଭିନେତା ଅନୁଭବ ମହାନ୍ତି ଓ ବରିଷ୍ଠ ପ୍ରଶାସିକା ସୁଜାତା କାର୍ତ୍ତିକେୟନଙ୍କ ମଧ୍ୟରୁ ଜଣକୁ ପ୍ରାର୍ଥୀ କରିବାକୁ ଯୋଜନା ପ୍ରସ୍ତୁତ କରିଥିଲା। କିନ୍ତୁ ବିଭିନ୍ନ ପର୍ଯ୍ୟାୟର ସର୍ଭେ ରିପୋର୍ଟ ଓ ଗୁଇନ୍ଦା ରିପୋର୍ଟରେ ବୈଜୟନ୍ତଙ୍କ ସପକ୍ଷରେ କେନ୍ଦ୍ରାପଡ଼ାରେ ଜନମତ ରହିଥିବା ଜଣାପଡ଼ିବା ପରେ ବିଜେଡି ନିଜର ରଣନୀତି ପରିବର୍ତ୍ତନ କରିବାକୁ ବାଧ୍ୟ ହୋଇଥିଲା। ଆଉ ଦିଲ୍ଲୀପଙ୍କୁ ଆଣିବା ପାଇଁ ଜୋରଦାର ପ୍ରୟାସ ହୋଇଥିଲା ଓ ଯାହା ସଫଳ ହେବାକୁ ଯାଉଛି। ଦିଲ୍ଲୀପ ମଧ୍ୟ ନିଜର ପୁରୁଣା କଥା ଭୁଲି ବିଜେଡିକୁ ବାହୁଡ଼ିବାକୁ ରାଜି ହୋଇଛନ୍ତି।

ସୂଚନାଯୋଗ୍ୟ, ନବୀନଙ୍କ ଇସାରାରେ ହିଁ ୨୦୦୧ ମସିହାରେ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ମନ୍ତ୍ରିମଣ୍ଡଳରୁ ଦିଲୀପଙ୍କୁ ବିଦା ହେବାକୁ ପଡ଼ିଥିଲା। ୨୦୦୨ ମସିହା ରାଜ୍ୟସଭା ନିର୍ବାଚନରେ ନବୀନଙ୍କ ସମସ୍ତ ବିରୋଧ ସତ୍ତ୍ଵେ ଦିଲୀପ ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚିତ ହୋଇଥିଲେ। ଆଉ ତାଙ୍କ ପାଇଁ ବିଜେଡି ଦ୍ୱାର ସବୁ ଦିନ ପାଇଁ ବନ୍ଦ ହୋଇଯାଇଥିଲା।