ବରୀ କୃଷକ ସଙ୍ଗଠନ ର ପ୍ରସ୍ତୁତି ବୈଠକ ।

!!! ବରୀ ରୁ ପ୍ରଦୀପ ମହାରଣା ଙ୍କ ରିପୋର୍ଟ !!!

ଯାଜପୁର ଜିଲ୍ଲା ବରୀ ବ୍ଲକ ଅଧୀନ ମନ୍ଦାରୀ ଗ୍ରାମ ପଞ୍ଚାୟତ ର ଅଣିକଣା ମା ଗଜଲକ୍ଷ୍ମୀ ମନ୍ଦିର ପ୍ରାଙ୍ଗଣ ରେ ନବ ନିର୍ମାଣ କୃଷକ ସଙ୍ଗଠନ ର ଆସନ୍ତା ଫେବୃଆରୀ ୬ ତାରିଖ ରେ ଭୁବନେଶ୍ୱର ଯିବା ପାଇଁ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି ।

ଏହି ବୈଠକ ରେ ଶ୍ରୀ ଗଣେସ୍ବର ଘଡେଇ ସଭାପତିତ୍ୱ କରିଥିଲେ ।

ଆଗାମୀ ଦିନ ରେ ଚାଷୀ ଙ୍କ ସୁବିଧା ଅସୁବିଧା ନେଇ କଣ ପଦକ୍ଷେପ ନିଆଯିବ ତାହା ନେଇ ଏକ ଆଲୋଚନା କରାଯାଇଥିଲା । ସେଥିରେ ପ୍ରଶାନ୍ତ ବେଉରିଆ , ଜୟୀରାମ ନାୟକ , ମାଧବା ନନ୍ଦ ଶାନ୍ତି ଙ୍କ ସମେତ ପଞ୍ଚାୟତ ର ସମସ୍ତ ଚାଷୀ ନେତୃ ମଣ୍ଡଳୀ ଉପସ୍ଥିତ ରହିଥିଲେ ।

ଅନ୍ୟପକ୍ଷରେ ବଦୁଅ ଗ୍ରାମ ପଞ୍ଚାୟତ ର କନ୍ତିଆ ଠାରେ ସୁଦର୍ଶନ ନାୟକ ଙ୍କ ଦ୍ୱାରା ବୈଠକ ଅନୁଷ୍ଠିତ ହୋଇଥିଲା ।

ବୟସ୍କମାନେ ବି ଏହି ସବୁ କାମ ପାଇଁ ବ୍ୟବହାର କରି ପାରିବେ ‘ବେବି ପାଉଡର୍’ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଘରେ ଛୋଟ ପିଲାଙ୍କ ପାଇଁ ସାଧାରଣତଃ ବେବି ପାଉଡର୍‌ ପ୍ରାୟ ସମସ୍ତେ ବ୍ୟବହାର କରିଥା’ନ୍ତି। ଶିଶୁଙ୍କ ସ୍କିନ୍‌ ଖୁବ୍‌ କୋମଳ ଥିବାରୁ ଇଆଡୁ ସିଆଡୁ ପାଉଡର୍‌ ବଦଳରେ ‘ବେବି ପାଉଡର୍‌’ ବ୍ୟବହାର ପାଇଁ ଡାକ୍ତର ମଧ୍ୟ ପରାମର୍ଶ ଦେଇଥା’ନ୍ତି। ତେବେ ‘ବେବି ପାଉଡର୍‌’କୁ କେବଳ ଶିଶୁଙ୍କ ପାଇଁ ନୁହେଁ, ବୟସ୍କମାନେ ବିଭିନ୍ନ ସମସ୍ୟାରୁ ମୁକ୍ତି ପାଇଁ ନିଜେ ବ୍ୟବହାର ମଧ୍ୟ କରିପାରିବେ। ଏବେ ଆସନ୍ତୁ ଜାଣିବା, ବୟସ୍କମାନେ ଅନ୍ୟ କେଉଁ ସବୁ କାମ ପାଇଁ ‘ବେବି ପାଉଡର୍‌’ ବ୍ୟବହାର କରିପାରିବେ।

୧. ଯଦି ଆପଣଙ୍କ କେଶ ଅଧିକ ତେଲିଆ ଲାଗି ଚିପ୍‌ଚିପ୍‌ କରୁଛି ଓ ଏହାକୁ ଶାମ୍ପୁ କରିବା ପାଇଁ ଆପଣଙ୍କ ସମୟ ନାହିଁ, ତେବେ କେଶରେ କିଛି ବେବି ପାଉଡର୍‌ ଛିଞ୍ଚି ଦିଅନ୍ତୁ କିମ୍ବା ପାନିଆରେ କିଛି ବେବି ପାଉଡର୍‌ ଲଗାଇ ମୁଣ୍ଡ କୁଣ୍ଡାଇ ଦିଅନ୍ତୁ। ଏହାଦ୍ୱାରା କେଶରୁ ଚିପ୍‌ଚିପ୍‌ ଦୂର ହୋଇଯିବ। ଶାମ୍ପୁ କରିବା ପରେ ଆପଣଙ୍କ କେଶ ସିଲ୍କି ଓ ସାଇନି ଦେଖାଯିବ।

୨. ଆଖି କଜଳ କିମ୍ବା ପତାରେ ମସ୍କରା ଲଗାଇ ସାରିବା ପରେ ତା’ର ଆଖପାଖ ଅଂଶରେ କିଛି ବେବି ପାଉଡର୍‌ ମାଲିସ୍ କରି ଦିଅନ୍ତୁ। ଏଭଳି କଲେ, ମସ୍କରା ଆଉ ଆଖିସାରା ବୋଳି ହୋଇଯିବାର ଆଶଙ୍କା ରହିବ ନାହିଁ।

୩. ଆପଣ ଯଦି ଓଠକୁ ‘ମ୍ୟାଟ୍‌ ଲୁକ୍‌’ ଦେବାକୁ ଚାହୁଁଛନ୍ତି, କିନ୍ତୁ ଆପଣଙ୍କ ପାଖରେ ମ୍ୟାଟ୍‌ ବଦଳରେ କେବଳ ଗ୍ଲସି ଲିପ୍‌ଷ୍ଟିକ ଅଛି, ତେବେ ବି ଚିନ୍ତା କରନ୍ତୁ ନାହିଁ। ଓଠରେ ଗ୍ଲସି ଲିପ୍‌ଷ୍ଟିକ୍‌ ଲଗାଇବା ପରେ ଏହା ଉପରେ ଟିକେ ବେବି ପାଉଡର୍‌ ଥାଫି ଥାପି ଲଗାନ୍ତୁ। ଏହା ପରେ ଏକ ଟିସୁ ପେପର୍‌କୁ ଦୁଇ ଓଠ ମଝିରେ ରଖି ଚାପି ଦିଅନ୍ତୁ, ଦେଖିବେ ଆପଣଙ୍କ ଓଠକୁ ‘ମ୍ୟାଟ୍‌ ଲୁକ୍‌’ ମିଳିଯିବ।

୪.ଖରା ଦିନେ ଅନେକଙ୍କ ପାଦରୁ ଝାଳ ବାହାରି ଜୋତାରୁ ଦୁର୍ଗନ୍ଧ ଆସିଥାଏ। ଆପଣଙ୍କ କ୍ଷେତ୍ରରେ ଯଦି ଏମିତି କିଛି ହେଉଛି, ତବେ କିଛି ବେବି ପାଉଡର୍‌ ଜୋତା ଭିତରେ ଛିଞ୍ଚି ଦିଅନ୍ତୁ। ଦେଖିବେ, କିଛି ସମୟପରେ ଆପଣଙ୍କ ଜୋତାରୁ ଦୁର୍ଗନ୍ଧ ବାହାରିବା ବନ୍ଦ ହୋଇଯିବ।

୫. ଅନେକ ସମୟରେ ଅସାବଧାନତା ଯୋଗୁ ଆପଣଙ୍କ ମନପସନ୍ଦର ଡ୍ରେସ୍‌ ବା ଅନ୍ୟ କପଡ଼ାରେ ତେଲ ପଡ଼ି ଦାଗ ହୋଇଯାଇଥାଏ। ଏହା ଦେଖିବାକୁ ଖରାପ ଲାଗିବା ସହ ଏଥିରୁ ତେଲିଆ ଗନ୍ଧ ମଧ୍ୟ ଆସିଥାଏ। କିଛି ବେବି ପାଉଡର୍‌ ନେଇ ତେଲ ପଡ଼ିଥିବା ସ୍ଥାନରେ ଲଗାଇ ଘସି ଦିଅନ୍ତୁ। ଏହାପରେ କପଡ଼ାକୁ ସଫା କରି ଦିଅନ୍ତୁ, ଦେଖିବା ତେଲ ଦାଗ ସମ୍ପୂର୍ଣ୍ଣ ଚାଲିଯିବ।

୬. ଅନେକ ସମୟରେ ଆମେ କିଛି ଗହଣା ଏକାଠି ରଖିଦେଲେ, ଏହା ପରସ୍ପର ସହ ଛନ୍ଦି ହୋଇଯା’ନ୍ତି। ଏଗୁଡ଼ିକୁ ଯେତେ ଖୋଲିବାକୁ ଚେଷ୍ଟା କଲେ ବି ଏ ସବୁ ଟଣା ଟଣି ହୋଇ ଆହୁରି ଗଣ୍ଠି ପଡ଼ିଯାଏ। ହେଲେ ବ୍ୟସ୍ତ ହୁଅନ୍ତୁ ନାହିଁ, ଆପଣଙ୍କର ଯଦି ଏଭଳି ସମସ୍ୟା ହେଉଛି, ତେବେ ଗଣ୍ଠି ପଡ଼ି ଯାଇଥିବା ଗହଣାରେ କିଛି ବେବି ପାଉଡର୍‌ ଲଗାଇ ଦିଅନ୍ତୁ। ଏହାଦ୍ୱାରା ଛନ୍ଦି ହୋଇଥିବା ଗହଣା ଅତି ସହଜରେ ଖୋଲିଯିବ।

୭. ଖରାଦିନେ ଘରର ବିଭିନ୍ନ ଜାଗାରେ ପିମ୍ପୁଡ଼ି ଭର୍ତ୍ତି ହୋଇଯା’ନ୍ତି। ବିଛଣାରେ, ରୋଷେଇଘରେ ଓ ଅନେକ ଜାଗାରେ ପିମ୍ପୁଡ଼ି ହୋଇଥା’ନ୍ତି। ତେବେ ପିମ୍ପୁଡ଼ି ହେଉଥିବା ସ୍ଥାନରେ ଆପଣ ଯଦି କିଛି ବେବି ପାଉଡର୍‌ ଛିଞ୍ଚିଦେବେ, ତେବେ ଦେଖିବେ କିଛି ସମୟ ଭିତରେ ପିମ୍ପୁଡ଼ି ସବୁ କୁଆଡ଼େ ଗାଏବ ହୋଇଯିବେ।

ଅତ୍ୟଧିକ ଗରମ ଚା’ ପିଉଛନ୍ତି କି? ସାବଧାନ୍, ହୋଇପାରେ କ୍ୟାନ୍‌ସର୍ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଚା’ ସାଧାରଣତଃ ଗରମ ହିଁ ପିଆଯାଏ। କାରଣ ଚା’ ଗରମ ଥିଲେ ହିଁ ପାଟିକୁ ତାଜା ଅନୁଭବ ଦିଏ। ତେବେ ଆପଣ ଜାଣନ୍ତି କି, ଅତ୍ୟଧିକ ଗରମ ଚା’ ଶରୀର ପାଇଁ କେତେ ହାନିକାରକ ? ଏକ ଗେବଷଣାରୁ ଜଣାପଡ଼ିଛି ଯେ ଅତ୍ୟଧିକ ଗରମ ଚା’ ପିଇଲେ, ଖାଦ୍ୟ ନଳୀ କିମ୍ବା ଗଳାରେ କ୍ୟାନ୍‌ସର୍‌ ହେବାର ଆଶଙ୍କା ଆଠଗୁଣା ଅଧିକ ବଢ଼ିଯାଏ।  ଇରାନ୍‌ର ଲୋକେ ଖୁବ୍‌ ଚା’ ପିଅନ୍ତି। ହେଲେ ଏମାନେ କେବେ ହେଲେ ଧୂମପାନ କି ତମାଖୁ ସେବନ କରନ୍ତି ନାହିଁ। କିନ୍ତୁ ସେମାନଙ୍କ ଠାରେ ଅଧିକ ମାତ୍ରାରେ ଇସୋଫେଗଲ୍‌ କ୍ୟାନସର୍ ସମସ୍ୟା ଦେଖିବାକୁ ମିଳିଛି। ଆଉ ଏହା ପଛର କାରଣ ହେଉଛି ଅତ୍ୟଧିକ ଗରମ ଚା’। ଗରମ ଚା’ ପିଇବା ଦ୍ୱାରା ଗଳାର ଟିସୁଗୁଡ଼ିକ ନଷ୍ଟ ହୋଇ ପରେ କ୍ୟାନ୍‌ସର୍‌ର ଆକ୍ରାନ୍ତ ହୁଅନ୍ତି। ଚା’କୁ ଆଞ୍ଚରୁ ଓହ୍ଲାଇବାର ଦୁଇମିନିଟ୍‌ ଭିତରେ ଯେଉଁମାନେ ପିଇଥା’ନ୍ତି, ସେମାନଙ୍କ କ୍ଷେତ୍ରରେ ଏହି ସମସ୍ୟା ଅଧିକ ଦେଖାଦିଏ। ତେଣୁ ଗବେଷକଙ୍କ ମତରେ, ଚା’କୁ କପ୍‌ରେ ଢ଼ାଳିବାର ୫ ମିନିଟ୍‌ ପରେ ର୍ହିଁ ଏହାକୁ ପିଇବା ଉଚିତ୍। ଏହି ଗବେଷଣାରେ ପ୍ରାୟ ୫୦ ହଜାର ଲୋକଙ୍କୁ ସାମିଲ କରାଯାଇଥିଲା। ଏହି ଗବେଷଣାରୁ ମିଳିଥିବା ତଥ୍ୟ ଅନୁଯାୟୀ, ଚା’ କପ୍‌ରେ ଢାଳିବା ଓ ପିଇବା ଭିତରେ ଅତି କମ୍‌ରେ ୪ରୁ ୫ ମିନିଟ୍‌ ଅନ୍ତର ରହିବା ଉଚିତ୍‌। ଗରମ ଚା’ ପିଇବା ଦ୍ୱାରା ଆସିଡିଟି, ଅଲ୍‌ସର୍ ଓ ପେଟ ସହ ଜଡ଼ିତ ଅନେକ ସମସ୍ୟା ହୋଇପାରେ। କେବଳ ଗରମ ଚା’ ନୁହେଁ, ଆହୁରି ଅନେକ ଜିନିଷ ରହିଛି, ଯାହାକି ଏତେ ଗରମ ହୋଇଥାଏ ଯେ ଏହା ପେଟର କୋଷିକାଗୁଡ଼ିକୁ ପ୍ରଭାବିତ କରିଥାଏ। ଫଳରେ ପେଟ ସହ ଜଡ଼ିତ ଅନେକ ସମସ୍ୟା ଦେଖାଦିଏ।

କେଶ ଝଡ଼ିବା ବନ୍ଦ ହେବ, ଖାଆନ୍ତୁ ଏହି ସବୁ ଖାଦ୍ୟ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ପ୍ରାୟ ସବୁ ମହିଳା ଚାହାନ୍ତି ତାଙ୍କର ଲମ୍ବା, ଘନ ଓ ସୁନ୍ଦର କେଶ ହେଉ। କିନ୍ତୁ ଅବ୍ୟବସ୍ଥିତ ଜୀବନଶୈଳୀ, ପ୍ରଦୂଷଣ ଓ ଖାଦ୍ୟପେୟରେ ଅନୀୟମିତତା ଯୋଗୁ କେଶ ଝଡ଼ିଥାଏ। ହେଲେ ଆପଣ ଯଦି ଚାହିଁବେ ତେବେ ଆପଣଙ୍କ ଲମ୍ବା କେଶର ସ୍ୱପ୍ନକୁ ସାକାର କରିପାରିବେ। ଲମ୍ବା ଓ ମଜଭୂତ କେଶ ପାଇଁ କିଛି ପୋଷକ ତତ୍ତ୍ୱ ଥିବା ଦ୍ରବ୍ୟକୁ ବ୍ୟବହାର କଲେ କେଶ ଉପୁଡ଼ିବା ସମସ୍ୟାରୁ ମୁକ୍ତି ମିଳିବ। ଏଥିପାଇଁ ନିଜ ଖାଦ୍ୟରେ ଏମିତି କିଛି ଦ୍ରବ୍ୟକୁ ସାମିଲ କରିବାକୁ ହେବ। କାରଣ ନିଜ ଭୋଜନରେ ସେହି ଖାଦ୍ୟପେୟକୁ ନିୟମିତ ଖାଇଲେ କେଶ ଉପୁଡ଼ିବା ସମ୍ପୁର୍ଣ୍ଣ ବନ୍ଦ ହୋଇଯିବ। ଏ ବାବଦରେ ଆଜି ଆମେ ଆପଣଙ୍କୁ କିଛି ଉପକାରୀ ଟିପ୍ସ ବତାଇବୁ। ଯଦି ଆପଣ ଏଗୁଡ଼ିକୁ ଆପଣାନ୍ତି, ତେବେ ଆପଣଙ୍କ କେଶ ଲମ୍ବା, ଘନ ଓ ସୁନ୍ଦର ହେବ।

ଅଁଳା: ଅଁଳା କେଶ ପାଇଁ ଖୁବ ଉପକାରୀ । ଏହାର ଗୁଣ୍ଡ, ଜୁସ୍‌ କିମ୍ବା ଆଚାରକୁ ମଧ୍ୟ ଖାଇପାରିବେ। ଅଁଳାକୁ କେଶ ମୂଳରେ ଓ ମୁହଁରେ ମଧ୍ୟ ଲଗାଇ ପାରିବେ। ଅଁଳାରେ ଭିଟାମିନ ସି ଓ ଆଣ୍ଟିଅକ୍ସିଡ଼ାଣ୍ଟ ଗୁଣ ରହିଛି। ଯାହା କେଶକୁ ମଜଭୂତ, ଘନ କରିବା ସହ ଉପୁଡ଼ିବା ସମସ୍ୟାକୁ ଦୂର କରିଥାଏ।

ପାଳଙ୍ଗ ଶାଗ: କେଶ ପାଇଁ ପାଳଙ୍ଗ ଶାଗ ଖୁବ ଲାଭଦାୟକ ଅଟେ। ଏଥିରେ ଭିଟାମିନ ସି, ଇ, ବି ଆଦି ରହିଛି। ଏହାକୁ ନିୟମିତ ଖାଇଲେ କେଶ ମୂଳ ମଜଭୂତ ହୋଇଥାଏ।

ମେଥି: ସମସ୍ତଙ୍କ ଘରେ ମେଥି ନିଶ୍ଚୟ ଥାଏ। ଏହା ବହୁ ଛୋଟ ବଡ଼ ରୋଗ ପାଇଁ ମଧ୍ୟ ବ୍ୟବହାର କରାଯାଏ। ଏଥିରେ ଅଧିକ ମାତ୍ରାରେ ପ୍ରୋଟିନ ରହିଛି। ଯାହାକୁ ଖାଇବା ଦ୍ୱାରା ଓ କେଶରେ ଲଗାଇବା ଦ୍ୱାରା କେଶ ଲମ୍ବା ଓ ଘନ ହୋଇଥାଏ।

ନଡ଼ିଆ ତେଲ: ଘରେ ନଡ଼ିଆ ତେଲ ପ୍ରସ୍ତୁତ କରି ଏହାକୁ କେଶ ମୂଳରେ ମାଲିସ କରନ୍ତୁ। ନଡ଼ିଆ ତେଲ ବ୍ୟବହାର କରି ଖାଦ୍ୟ ପ୍ରସ୍ତୁତ କରି ମଧ୍ୟ ଖାଇପାରିବେ। ଯାହାଦ୍ୱାରା କେଶ ସୁସ୍ଥ ଓ ସୁରକ୍ଷିତ ରହିବ। 

ରୋହିତ-ଧୱନ ଟପିଲେ ସଚିନ-ସେହୱାଗ ଙ୍କୁ !

ଏଥର ସମ୍ଭାଳ ବ୍ୟୁରୋ (ମାଉଣ୍ଟ ମାଙ୍ଗାନୁଇ) – ନ୍ୟୁଜିଲ୍ୟାଣ୍ଡ ବିପକ୍ଷ ଦ୍ୱିତୀୟ ଦିନିକିଆରେ ବି ବିଜୟୀ ହୋଇଛି ଟିମ୍ ଇଣ୍ଡିଆ। ବିରାଟ ବାହିନୀ ଏହି ମ୍ୟାଚ୍‌ରେ ଘରୋଇ ଟିମ୍‌କୁ ୯୦ ରନ୍‌ରେ ହରାଇଛି। ଭାରତ ୫୦ ଓଭରରେ ମାତ୍ର ୪ଟି ୱିକେଟ୍ ହରାଇ ୩୨୪ ରନ୍ କରିଥିବା ବେଳେ ନ୍ୟୁଜିଲ୍ୟାଣ୍ଡ ୪୦.୨ ଓଭରରେ ୨୩୪ ରନ୍ କରି ଅଲ୍‌ ଆଉଟ୍ ହୋଇଯାଇଥିଲା। ଏହି ବିଜୟ ସହିତ ୫ଟି ମ୍ୟାଚ୍ ବିଶିଷ୍ଟ ଏହି ସିରିଜ୍‌ରେ ଭାରତ ୨-୦ରେ ଆଗୁଆ ରହିଛି। ଆଜିର ମ୍ୟାଚ୍‌ରେ ଓପନିଂ ଯୋଡ଼ି ରୋହିତ ଶର୍ମା ଓ ଶିଖର ଧୱନ ବଢ଼ିଆ ଖେଳିଥିଲେ। ସେମାନଙ୍କ ମଧ୍ୟରେ ପୁଣି ଶତକୀୟ ଭାଗୀଦାରୀ ହୋଇଥିଲା। ଦୁହିଁଙ୍କ ମଧ୍ୟରେ ୧୫୪ ରନ୍‌ର ପାର୍ଟନରସିପ୍ ହୋଇଥିବା ବେଳେ ପ୍ରଥମ ଶିଖର ଆଉଟ୍ ହୋଇଯାଇଥିଲେ। ଏହି ଶତକୀୟ ଭାଗୀଦାରୀ ସହିତ ଏ ଦୁଇ ଖେଳାଳି ସଚିନ ତେନ୍ଦୁଲକର ଓ ବୀରେନ୍ଦ୍ର ସେହୱାଗ ଯୋଡ଼ିକୁ ଟପି ଯାଇଛନ୍ତି। ସଚିନ ଓ ସେହୱାଗ ମଧ୍ୟରେ ୧୩ଟି ଶତକୀୟ ଭାଗୀଦାରୀ ହୋଇଥିବା ବେଳେ ରୋହିତ ଓ ଶିଖରଙ୍କ ମଧ୍ୟରେ ୧୪ଟି ଶତକୀୟ ଭାଗୀଦାରୀ ହୋଇଛି। ଆଜି ରୋହିତ ୯୬ ବଲ୍‌ରୁ ୮୭ ରନ୍ କରିଥିବା ବେଳେ ଧୱନ ୬୭ ବଲ୍‌ରୁ ୬୬ ରନ୍ କରିଥିଲେ।

ପ୍ରଥମ ମ୍ୟାଚ୍‌ରେ ସ୍ପେନ୍‌ଠାରୁ ହାରିଗଲା ଭାରତୀୟ ମହିଳା ଟିମ୍ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଭାରତୀୟ ମହିଳା ହକି ଟିମ୍ ଏବେ ସ୍ପେନ୍‌ ଗସ୍ତରେ ଅଛି। ଗତକାଲି ଦଳ ତା’ର ପ୍ରଥମ ମ୍ୟାଚ୍ ଘରୋଇ ଟିମ୍ ବିପକ୍ଷରେ ଖେଳିଥିଲା। ତେବେ ଗସ୍ତ ଆରମ୍ଭରୁ ହିଁ ଟିମ୍‌କୁ ଝଟକା ଲାଗିଥିଲା। ପ୍ରଥମ ମ୍ୟାଚ୍‌ରେ ଭାରତୀୟ ଟିମ୍ ୨-୩ ଗୋଲ୍‌ରେ ସ୍ପେନ୍‌ ଠାରୁ ହାରି ଯାଇଛି। ମ୍ୟାଚ୍‌ର ଅଷ୍ଟମ୍ ମିନିଟ୍‌ରେ ଭାରତ ଏକ ପେନାଲ୍‌ଟି କର୍ଣ୍ଣର ପାଇଥିଲା। ତେବେ ଦଳ ଏହାକୁ ଗୋଲରେ ପରିଣତ କରିପାରି ନଥିଲା। ତେବେ ୧୨ତମ ମିନିଟ୍‌ରେ ଉଦିତା ଦଳ ପାଇଁ ପ୍ରତମ ଗୋଲ୍ କରିଥିଲେ।

ଦ୍ୱିତୀୟ କ୍ୱାର୍ଟରରେ ୨୩ତମ ମିନିଟ୍‌ରେ ଆୟୋଜକ ସ୍ପେନ୍‌ର ମାରିଆ ଟୋଷ୍ଟ ଭାରତ ଉପରେ ଏକ ଗୋଲ୍ ଦେଇ ସ୍ଥିତି ବାରାବର କରି ଦେଇଥିଲେ। ଏହା ପରେ ମ୍ୟାଚ୍‌ର ୩୯ ମିନିଟ୍ ଓ ୪୦ ମିନିଟ୍‌ରେ ସ୍ପେନ୍ ଆଉ ଦୁଇଟି ଗୋଲ୍ ଦେଇଥିଲା। ୪୮ତମ ମିନିଟ୍‌ରେ ଭାରତ ପକ୍ଷରୁ ଗୁରଜିତ ଆଉ ଏକ ଗୋଲ୍‌ ଦେଇଥିଲେ।

ଭାରତୀୟ ମହିଳା ଟିମ୍‌ ସ୍ପେନ୍‌ ବିପକ୍ଷରେ ଆଉ ତିନିଟି ମ୍ୟାଚ୍ ଖେଳିବ। ଏହାପରେ ଫେବ୍ରୁଆରୀ ୨ ଓ ୩ ତାରିଖରେ ଆୟର୍ଲ୍ୟାଣ୍ଡ ବିପକ୍ଷରେ ୨ଟି ମ୍ୟାଚ୍‌ ଖେଳିବ ।

ସାଧାରଣତନ୍ତ୍ର ଦିବସରେ ଦର୍ଶକଙ୍କୁ ଜନ୍‌ଙ୍କ ଭେଟି ।

ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – ମାଦ୍ରାସ କ୍ୟାଫେ, ପରମାଣୁ ଓ ସତ୍ୟମେବ ଜୟତେ ପରେ ଜନ୍‌ ପୁଣି ଥରେ ଦେଶ ଭକ୍ତିର ଏକ ଫିଲ୍ମ ନେଇ ଆସୁଛନ୍ତି। ତାଙ୍କ ଫିଲ୍ମର ନାଁ ହେଉଛି ‘ରୋମିଓ ଅକବର ୱାଲେଟର’। ଯାହାର ଟିଜର ରିଲିଜ୍‌ ହୋଇଯାଇଛି। ଫିଲ୍ମରେ ଜନ୍‌ ଅବ୍ରାହମ ଜଣେ ଏଜେଣ୍ଟ୍‌ ଭୂମିକାରେ ନଜର ଆସୁଛନ୍ତି। ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି ରବି ଗ୍ରେୱାଲ୍‌। ଫିଲ୍ମରେ ତାଙ୍କର ଭିନ୍ନ ଭିନ୍ନ ଲୁକ୍‌ ଦେଖିବାକୁ ମିଳିଛି। ଆଉ ତାଙ୍କ ଲୁକ୍‌ ମଧ୍ୟ ଦର୍ଶକଙ୍କୁ ଖୁବ୍‌ ପ୍ରଭାବିତ କରିଛି। ଟିଜରରେ ତାଙ୍କୁ ପୁଲିସ୍‌ ଓ ଜଣେ ମୁସ୍‌ଲିମ୍‌ ବ୍ୟକ୍ତି ସହ ଆହୁରି ଅନେକ ଚରିତ୍ରରେ ଦେଖିବାକୁ ମିଳିଛି। ଟିଜରରେ ବ୍ୟାକ୍‌ଗ୍ରାଉଣ୍ଡ୍‌ ଗୀତ ‘ଏ ୱତନ’ ବଜା ଯାଇଥିଲା। ଟିଜରରେ ଗୋଟିଏ ସମୟରେ ଜନ୍‌ଙ୍କୁ ରକ୍ତ ଜୁଡ଼ୁ ବୁଡ଼ୁ ଅବସ୍ଥାରେ ଦେଖିବାକୁ ମିଳିଥିଲା। ଫିଲ୍ମର ଟିଜର ରିଲିଜ୍‌ ହେବା ପରେ ସୋଶାଲ୍‌ ମିଡିଆରେ ଏହା ଖୁବ୍‌ ଭାଇରାଲ୍‌ ହୋଇଛି।

ସୂଚନାଯୋଗ୍ୟ ଯେ, ଫିଲ୍ମର ପୋଷ୍ଟରକୁ ଖୁବ୍‌ ପସନ୍ଦ କରାଯାଉଛି। ଯେଉଁଥିରେ ଜନ୍‌ ଜଣେ ଜାସୁସ ଚରିତ୍ରରେ ନଜର ଆସିଛନ୍ତି। ଏହାସହ ପୋଷ୍ଟର ପଛରେ ତାଙ୍କର ଆହୁରି ଅନେକ ଲୁକ୍‌ ଦେଖିବାକୁ ମିଳିଛି।

ଫିଲ୍ମର କାହାଣୀ ୧୯୭୦ର ଏକ ସତ୍ୟ ଘଟଣା ଉପରେ ଆଧାରିତ। ଫିଲ୍ମର ଶୁଟିଂ ଗୁଜୁରାଟ୍‌, ଶ୍ରୀନଗର, ଦିଲ୍ଲୀ ଓ ନେପାଳ ବର୍ଡର୍‌ରେ ହୋଇଛି। ଫିଲ୍ମ ପାଇଁ ଜନ୍‌ ନିର୍ମାତାଙ୍କ ପ୍ରଥମ ପସନ୍ଦ ନ ଥିଲେ। ପ୍ରଥମେ ଏହା ସୁଶାନ୍ତ ସିଂହ ରାଜପୁତ୍‌ଙ୍କୁ ଅଫର ହୋଇଥିଲା। କିନ୍ତୁ ସମୟ ନ ଥିବାରୁ ସେ ମନା କରିଦେଇଥିଲେ। ଫିଲ୍ମଟି ଏପ୍ରିଲ୍‌ ୧୨ରେ ବିଭିନ୍ନ ସିନେମା ଘରେ ରିଲିଜ୍‌ ହେବ। ତେବେ ଆଜି ସାଧାରଣତନ୍ତ୍ର ଦିବସରେ ଏହି ଭଳି ଦେଶଭକ୍ତିର ଟିଜର ରିଲିଜ୍‌ ହେବା ନିଶ୍ଚିତ ଭାବେ ଦର୍ଶକଙ୍କ ପାଇଁ ଏହା କେଉଁ ଉପହାରଠୁ କମ୍‌ ନୁହେଁ।

ଆସିଲା ସଲମାନ୍‌ଙ୍କ ଫିଲ୍ମ ‘ଭାରତ୍‌’ର ଟିଜର୍ ।

ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – ରିଲିଜ୍‌ ହୋଇଯାଇଛି ସଲମାନ୍‌ ଖାନ୍‌ଙ୍କ ବହୁ ପ୍ରତିକ୍ଷୀତ ଫିଲ୍ମ ‘ଭାରତ’ର ଟିଜର୍। ସଲମାନ୍‌ ଖାନ୍‌ଙ୍କ ଫିଲ୍ମର ଅନେକ ଲମ୍ବା ସମୟରୁ ଅପେକ୍ଷା କରାଯାଉଛି। ଫିଲ୍ମରେ ସଲମାନ୍‌ ବିଭିନ୍ନ ଅନ୍ଦାଜ୍‌ରେ ନଜର ଆସିବେ। ରିଲିଜ୍‌ ହୋଇଥିବା ଟ୍ରେଲର୍‌ରେ ସଲମାନ୍‌ କେବେ ନୌ ସେନାରେ ତ କେବେ ପୁଣି କୋଇଲା ଖଣିରେ କାମ କରୁଥିବା ନଜର ଆସୁଛନ୍ତି। କେବଳ ଏତିକି ନୁହେଁ ସଲମାନ୍‌ ଫିଲ୍ମରେ ସର୍କସରେ ମଧ୍ୟ କାମ କରୁଛନ୍ତି। ‘ଭାରତ୍‌’ର ଟିଜର୍ ଦେଖିବା ପରେ ଲାଗୁଛି ଫିଲ୍ମଟି ପୂରା ପୂରି ଦବଙ୍ଗ ସଲମାନ୍‌ଙ୍କ ଷ୍ଟାଇଲ୍‌ରେ ହିଁ ହୋଇଛି। ଟିଜର୍‌ଟି ରିଲିଜ୍‌ ହେବାର ୨୪ ଘଣ୍ଟା ଭିତରେ ୨କୋଟିରୁ ଅଧିକ ଲୋକ ଦେଖିସାରିଲେଣି। ‘ଭାରତ୍‌’ରେ ସଲମାନ୍‌ଙ୍କ ଫେଭରାଇଟ୍‌ ନିର୍ଦ୍ଦେଶକ ଅଲ୍ଲୀ ଅବାସ ଜଫର୍‌ ନିର୍ଦ୍ଦେଶନା ଦେଇଛନ୍ତି। ଫିଲ୍ମରେ ସଲମାନଙ୍କ ଫେଭରେଟ୍‌ କୋଷ୍ଟାର୍‌ କ୍ୟାଟ୍ରିନା ମଧ୍ୟ ନଜର ଆସିବେ। ଫିଲ୍ମର ଟିଜର୍‌ର ଆରମ୍ଭ ଭାରତ ବିଭାଜନରୁ ଆରମ୍ଭ ହୋଇଛି। ଏହାପରେ ସଲମାନ୍‌ ଜଣେ ନ୍ୟାଭି ଅଫିସର୍‌ ଲୁକ୍‌ରେ ଏକ ଯାହାଡ଼ ଉପରେ ଛିଡ଼ା ହୋଇଥିବା ଦେଖିବାକୁ ମିଳିଛି। ଏହାପରେ ସଲମାନ ଏକ ବାଇକରେ ଷ୍ଟଣ୍ଟ କରୁଛନ୍ତି। ଶେଷରେ ସଲମାନ ଟିକେ ବୟସ୍କ ବ୍ୟକ୍ତିଙ୍କ ଲୁକ୍‌ରେ ବକ୍ସିଂ କରୁଥିବା ନଜର ଆସିଛନ୍ତି। ଫିଲ୍ମରେ ସଲମାନ ଜାତିଧର୍ମ ଭେଦଭାବକୁ କଟାକ୍ଷ କରି ଏକ ଡାଇଲଗ୍‌ କହୁଛନ୍ତି। ଏହି ଡାଇଲଗ୍‌କୁ ନେଇ ସବୁଠୁ ଅଧିକ ଚର୍ଚ୍ଚା। ଏହି ଡାଇଲଗ୍‌କୁ ଦର୍ଶକ ବେଶ୍ ପସନ୍ଦ କରୁଛନ୍ତି। ଡାଇଲଗ୍‌ଟି ହେଉଛି ‘ଇଶ୍ ଦେଶ୍ କେ ନାମ୍‌ ପର ମେରେ ବାଉଜୀନେ ମେରା ନାମ୍‌ ଭାରତ୍ ରଖା ହେ। ଇତନେ ବଡ଼େ ନାମ୍‌କେ ଆଗେ ଜାତି, ଧର୍ମ, ସରନେମ୍‌ ଲଗାକର, ମେ ନା ତୋ ଅପନା ଔର୍ ନା ହି ଇଶ୍‌ ଦେଶ୍‌କା ମାନ୍‌ କମ୍‌ କରନା ଚାହାତା ହୁଁ।’ ତେବେ ଡାଇଲଗ୍‌ରୁ ସଲମାନ୍‌ଙ୍କ ଫିଲ୍ମରେ ମଧ୍ୟ ଦେଶଭକ୍ତି ଦେଖିବାକୁ ମିଳିବ ବୋଲି ଅନୁମାନ୍‌ କରାଯାଉଛି। ସଲମାନଙ୍କ ‘ଭାରତ୍’ ୨୦୧୪ରେ ଆସିଥିବା ଦକ୍ଷିଣ କୋରିଅନ୍‌ ଫିଲ୍ମ ‘ଓଡ୍‌ ଟୁ ମାଇଁ ଫାଦର୍‌’ର ରିମେକ୍‌। ଏହା କୋରିଆ ଯୁଦ୍ଧ ସମୟରେ ଏକ ଛୋଟ ପିଲା ତା ପରିବାରର ସୁରକ୍ଷାର ଦାୟିତ୍ୱ ନେଇଥିବା ଦର୍ଶାଯାଇଛି। ଫିଲ୍ମଟି ସବୁଥର ଭଳି ଏଥର ମଧ୍ୟ  ଇଦ୍‌ରେ ହିଁ ରିଲିଜ୍‌ ହେବ।

ପରଦାକୁ ଆସିଲା ‘ତୁ ମୋ ସୁନା ଚଢ଼େଇ’ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ପରଦାକୁ ଆସିଛି ନୂଆ ଓଡ଼ିଆ ଫିଲ୍ମ ‘ତୁ ମୋ ସୁନା ଚଢ଼େଇ’। ଶୁକ୍ରବାର ସମ୍ରାଟ ସିନେମା ହଲ୍‌ରେ ଏହି ଫିଲ୍ମର ପ୍ରିମିୟର ଶୋ’ ହୋଇଛି। ଫିଲ୍ମର ଲିଡ୍ ରୋଲରେ ଅଛନ୍ତି ନାୟକ ଜ୍ୟୋତି ଓ ନବାଗତା ଲେସା। ଦିଲିପ ପଣ୍ଡା ଫିଲ୍ମର ନିର୍ଦ୍ଦେଶନା ଦେଇଥିବା ବେଳେ ସଂଗୀତ ନିର୍ଦ୍ଦେଶନା ଦେଇଛନ୍ତି ବୈଦ୍ୟନାଥ ପଣ୍ଡା।

ଅନ୍ୟମାନଙ୍କ ମଧ୍ୟରେ ରାଇମୋହନ ଓ ଯାତ୍ରା ଟାଇଗର ଦୈତାରୀ ପଣ୍ଡାଙ୍କୁ ଫିଲ୍ମରେ ଦେଖିବାକୁ ମିଳିବ। ଫିଲ୍ମରେ ରହିଛି ୬ଟି ମନଛୁଆଁ ଗୀତ। ଗୀତ ଗୁଡ଼ିକ ଅସୀମା ପଣ୍ଡା, ଅନନ୍ୟା ଓ ହ୍ୟୁମାନ ସାଗର ଗାଇଛନ୍ତି। ତେବେ ଫିଲ୍ମଟିର ଟାଇଟଲ ଗୀତ ଦର୍ଶକଙ୍କ ବେଶ ପସନ୍ଦ ଆସିଛି।

ସୂଚନାରୁ ପ୍ରକାଶ, ଏହି ଫିଲ୍ମର ଅଡିଓ ରିଲିଜ୍‌ ବେଳେ ହଙ୍ଗାମା ହୋଇଥିଲା। ଫିଲ୍ମର ହିରୋଇନ୍‌ଙ୍କୁ ନିର୍ଦ୍ଦେଶକ ମାନସିକ ନିର୍ଯାତନା ଦେଉଥିବା ନେଇ ଅଭିଯୋଗ ହୋଇଥିଲା। ବାଦ ବିବାଦ ପରେ ଶେଷରେ ଆଜି ଫିଲ୍ମ ରିଲିଜ୍‌ ହୋଇଛି। ଏହି ଫିଲ୍ମ ଦର୍ଶକଙ୍କ ମନ କଣିପାରିବ ବୋଲି ପ୍ରଯୋଜନା ସଂସ୍ଥା ଆଶା ରଖିଛନ୍ତି।

ପ୍ରଥମ ଦିନରେ ଏତିକି କୋଟିର ବିଜ୍‌ନେସ୍‌ କଲା ‘ମଣିକର୍ଣ୍ଣିକା’ ।

ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – କଙ୍ଗନା ରାନାୱତ୍‌ ଅଭିନୀତ ତଥା ନିର୍ଦ୍ଦେଶିତ ବହୁଚର୍ଚ୍ଚିତ ଫିଲ୍ମ ‘ମଣିକର୍ଣ୍ଣିକା: ଦ କୁଇନ୍‌ ଅଫ୍‌ ଝାନ୍‌ସି’ ସାଧାରଣତନ୍ତ୍ର ଦିବସର ଦିନକ ପୂର୍ବରୁ ଅର୍ଥାତ୍‌ ୨୫ ଜାନୁଆରୀରେ ରିଲିଜ୍‌ ହୋଇଛି।

ରିଲିଜ୍‌ ପୂର୍ବରୁ ଏହି ଫିଲ୍ମ୍‌ର ସ୍ପେଶାଲ୍‌ ସ୍କ୍ରିନିଂ ରଖାଯାଇଥିଲା। ଏହି ସମାରୋହରେ ରାଷ୍ଟ୍ରପତି ରାମନାଥ୍ କୋବିନ୍ଦ ଏବଂ ବରିଷ୍ଠ ବିଜେପି ନେତା ଲାଲ୍‌କୃଷ୍ଣ ଆଡଭାନୀ ଉପସ୍ଥିତ ଥିଲେ।

କର୍‌ନି ସେନାର ବିରୋଧ ଯୋଗୁ ଏହି ଫିଲ୍ମ ଚର୍ଚ୍ଚାରେ ଥିଲା ଏବଂ ଏହାର ରିଲିଜ୍‌କୁ ଦର୍ଶକ ଖୁବ୍ ଉତ୍କଣ୍ଠାର ସହ ଅପେକ୍ଷା କରିଥିଲେ। ତେବେ ଆଶାନୁସାରେ ନ ହେଲେ ବି ଫିଲ୍ମ ପ୍ରଥମ ଦିନରେ ବକ୍ସ ଅଫିସ୍‌ରେ ଭଲ ବ୍ୟବସାୟ କରିଛି। ଫିଲ୍ମର କିଛି ସିନ୍‌ ଉପରେ କର୍‌ନି ସେନାର ଆପତ୍ତି, ଏହାକୁ ନେଇ ବିରୋଧ ଏବଂ କରନି ସେନାକୁ କଙ୍ଗନାଙ୍କ ପ୍ରତିଜବାବ ଯୋଗୁ ରିଲିଜ୍‌ ପୂର୍ବରୁ ହିଁ ‘ମଣିକର୍ଣ୍ଣକା’କୁ  ଖୁବ୍‌ ପବ୍ଲିସିଟି ମିଳିସାରିଥିଲା। ତେଣୁ ସମସ୍ତଙ୍କ ନଜର ଏହାର ପ୍ରଥମ ଦିନର କଲେକ୍ସନ୍ ଉପରେ ଥିଲା। ‘ମଣିକର୍ଣ୍ଣିକା’କୁ ଦେଶର ୩ ହଜାର ସ୍କ୍ରିନ୍‌ରେ ଏକକାଳୀନ ରିଲିଜ୍‌ କରାଯାଇଛି। ଏହା ବ୍ୟତୀତ ଏହି ଫିଲ୍ମ ବିଦେଶରେ ମଧ୍ୟ ୭୦୦ ସ୍କ୍ରିନ୍‌ରେ ଲଞ୍ଚ୍‌ ହୋଇଛି। ପ୍ରାୟ ୧୨୫ କୋଟି ବଜେଟ୍‌ର ଏହି ଫିଲ୍ମ ରିଲିଜ୍‌ର ପ୍ରଥମ ଦିନ ୧୩ରୁ ୧୫ କୋଟି ଟଙ୍କା ଆୟ କରିବ ବୋଲି ଆଶା କରାଯାଉଥିଲା। କିନ୍ତୁ ଫିଲ୍ମଟି ପ୍ରଥମ ଦିନରେ ପାଖାପାଖି ୯ କୋଟି ଟଙ୍କାର ବିଜ୍‌ନେସ କରିଛି। ଆଶା କାରାଯାଉଛି ଯେ ଗଣତନ୍ତ୍ର ଦିବସର ଛୁଟିରେ ଫିଲ୍ମଟି ଭଲ ଆୟ କରିବ। ତେବେ ଫିଲ୍ମରେ କଙ୍ଗନାଙ୍କ ଅଭିନୟକୁ ଲୋକେ ତାରିଫ୍‌ କରିଛନ୍ତି। କିନ୍ତୁ କାହାଣୀକୁ ନେଇ ରିଆକ୍ସନ୍‌ ମିଶ୍ର ରହିଛି। କଙ୍ଗନାଙ୍କ ଅଭିନୟକୁ ଦେଖି କିଛି ପ୍ରଶଂସକ ତାଙ୍କୁ ତୃତୀୟ ଥର ପାଇଁ ଜତୀୟ ସମ୍ମାନ ଦେବାକୁ ଯୁକ୍ତି ବାଢ଼ିଛନ୍ତି। ଏହା ପୂର୍ବରୁ ଫିଲ୍ମ ‘କୁଇନ୍’ ଓ ‘ତନୁ ୱେଡ୍ସ ମନୁ ରିଟର୍ନ୍ସ’ ପାଇଁ କଙ୍ଗନାଙ୍କୁ ଜାତୀୟ ପୁରସ୍କାର ମିଳି ସାରିଛି।