ଘର ପୋଡି ସମ୍ପତି ନଷ୍ଟ !

ବରୀ ରୁ ପ୍ରଦୀପ ମହାରଣା ଙ୍କ ରିପୋର୍ଟ 

ବରୀ ବ୍ଲକ ଅନ୍ୟାସୀପୁର ଗ୍ରାମରେ ରହୁଥିବା ସୁରେନ୍ଦ୍ର ସେଠି ଙ୍କ ଘର ପୋଡି ସଂପୂର୍ଣ୍ଣ ନଷ୍ଟ ହୋଇ ଯାଇଛି । ଗତ ବିଳମ୍ବିତ ରାତ୍ର ରେ ହଠାତ ନିଆଁ ଲାଗି ଘର ପୋଡିଯାଇଥିବା ଜଣାପଡିଛି । ସୁରେନ୍ଦ୍ର ଏବଂ ତାଙ୍କ ପରିବାର ରାତ୍ର ସୋଇଥିବା ବେଳେ ଏହି ଅଘଟଣ ଘଟିଛି । ଘର ପୋଡି ଯାଉଥିବା ବିଷୟ ନେଇ ବଡ ଝିଅ ପାଟି କରି ଜଣାଇବାପରେ  ପରିବାର ଲୋକ ଉଠି ସହାୟତା ନିମନ୍ତେ ଡାକପକାଇଥିଲେ  । ସୁରେନ୍ଦ୍ର ଙ୍କ ଘର ଗ୍ରାମଠାରୁ ଦୂରରେ ଥିବାରୁ ଲୋକେ ପହଞ୍ଚି ନିଆଁ ଲିଭାଇବା ଓ ଖବର ପାଇ ଦମକଳ ବାହିନୀ ପହଞ୍ଚିବା ବେଳକୁ ଘରର ଅଧିକାଂଶ ଭାଗ ପୋଡି ଯାଇଥିବା ଦେଖିବାକୁ ମିଳିଥିଲା । ଝିଅ ବାହାଘର ନିମନ୍ତେ ନଗଦ ୩୦ ହଜାର ,ସୁନା ଗହଣା ,ଧାନ ୧୫ ବସ୍ତା ସହ ଘରେ ରଖିଥିବା ବିରି ,ମୁଗ ସମେତ ସମସ୍ତ ଆସବାବ ପତ୍ର ନଷ୍ଟ ହୋଇଯାଇଥିବା ସୁରେନ୍ଦ୍ର ଜଣାଇଛନ୍ତି । ଘରେ କେମିତି ନିଆଁ ଲାଗିଲା ତାହା ଅସ୍ପଷ୍ଠ ରହିଛି । ଏନେଇ ଅନୁସନ୍ଧାନ ଜାରି ରହିଥିବା କତ୍ତୃ ପକ୍ଷଙ୍କ ଠାରୁ ପ୍ରକାଶ ।

ବରୀ ଠାରେ ସବୁଜ କାର୍ଡ ଧାରି ମା ମାନଙ୍କ ସଭା ଅନୁଷ୍ଠିତ .

ବରୀ ରୁ ପ୍ରଦୀପ ମହାରଣା ଙ୍କ ରିପୋର୍ଟ

ରାମଚନ୍ଦ୍ରପୁର ଦୁର୍ଗୀ ପଡିଆ ଠାରେ ସବୁଜ କାର୍ଡ ଧାରି ମା ମାନଙ୍କ ଏକ ସୋଭା ଅନୁଷ୍ଠିତ ହୋଇଯାଇଛି । ଏହି ସଭାରେ ଓଡିଶା ସବୁଜ ପତ୍ରିକା ମହିଳା ମହା ସଂଘର ସଭାନେତ୍ରୀ ଲକ୍ଷ୍ମୀଦେବୀ,ପୁରୀ ଜିଲ୍ଲା ସଭାନେତ୍ରୀ ମଞ୍ଜୁଳା ମହାପାତ୍ର ,ଯାଜପୁର ଜିଲ୍ଲା ସଭାନେତ୍ରୀ ସ୍ଵର୍ଣ୍ଣଲତା ରାଉତ,କାର୍ଯ୍ୟ କାରୀ ସଭାନେତ୍ରୀ ସ୍ଵର୍ଣ୍ଣଲତା ଜେନା ,ଜିଲ୍ଲା ସଂଯୋଜିକା ଚିନ୍ତାମଣି ମହାପାତ୍ର,ବ୍ଲକ ସଭାନେତ୍ରୀ ମଧୁସ୍ମିତା ଦାସ ,ସମ୍ପାଦିକା ସୁମିତ୍ରା ରଥ ଓ ସନ୍ଧ୍ୟାରଣୀ ନାୟକ ଉପସ୍ଥିତ ରହି ମା ମାନଙ୍କ ଅସୁବିଧା ନେଇ ଆଲୋଚନା କରିଥିଲେ । ଓଡିଶା ମହାସଂଘ ପକ୍ଷରୁ ଗତ ବର୍ଷ ନଭେମ୍ବର ୨୦ ତାରିଖ ଦିନ ନବୀନ ନିବାସ ଠାରେ ସବୁଜ କାର୍ଡଧାରି ମା ମାନେ ପାଇବାକୁ ଥିବା ସମସ୍ତ ସୁବିଧାରୁ ବଞ୍ଚିତ ହେଉଥିବା ନେଇ ଏକ ଦାବି ପତ୍ର ପ୍ରଦାନ କରାଯାଇଥିବା ମହା ସଂଘ ସଭାନେତ୍ରୀ ଉପସ୍ଥାପନା କରିଥିଲେ । ଆଗାମୀ ଦିନରେ ମା ମାନଙ୍କୁ ୧୦୦୦ ତାଙ୍କ ଭତା ,ଭୂମିହୀନ ଙ୍କୁ ଭୂମି ପ୍ରଦାନ ଅଳ୍ପ ସୁଦ୍ଧ ହାରରେ ଗୃହ ରୁଣ ଯୋଗାଇ ଦେବା ଏବଂ ସ୍ୱାସ୍ଥ୍ୟ ବୀମା ଯୋଜନା ରେ ମା ମାନଙ୍କୁ ଅନ୍ତରଭୁକ୍ତ କରିବା ଭଳି ଦାବୀ ଗୁଡିକ ଉପରେ ସଭାରେ ଆଲୋଚନା କରାଯାଇଥିଲା । ମହା ସଂଘ ପକ୍ଷରୁ ମୁଖ୍ୟମନ୍ତ୍ରୀ ଙ୍କୁ ଦିଆଯାଇଥିବା ଦାବୀ ପତ୍ର ରେ ଏଗୁଡିକ ଉପସ୍ଥାପନା କରାଯାଇଥିବା ସତ୍ତ୍ୱେ ଏନେଇ ଏଯାବତ କୌଣସି ପଦକ୍ଷେପ ସରକାରଙ୍କ ପକ୍ଷରୁ ଗ୍ରହଣ କରାଯାଇନଥିବା ନେଇ ସଭାରେ କ୍ଷୋଭ ପ୍ରକାଶ ପାଇଥିଲା ।

ଗତକାଲି କଂଗ୍ରେସ ଛାଡ଼ି,ଆଜି ବିଜେଡିରେ ଯୋଗ ଦେବେ ପ୍ରଣୟ ସାହୁ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ବିଜେପୁର ଉପନିର୍ବାଚନରେ କଂଗ୍ରେସ ପ୍ରାର୍ଥୀ ହୋଇଥିବା ପ୍ରଣୟ ସାହୁ ଗତକାଲି କଂଗ୍ରେସରୁ ଇସ୍ତଫା ଦେବାର ୨୪ଘଣ୍ଟା ନପୁରୁଣୁ ଆଜି ବିଜେଡିରେ ସାମିଲ ହେବେ ବୋଲି ଜଣାପଡ଼ିଛି। ସୂଚନା ଅନୁସାରେ, ନବୀନ ନିବାସରେ ଆଜି ପୂର୍ବାହ୍ନ ୧୧ଟାରେ ଶ୍ରୀ ସାହୁ ନିଜର ସମର୍ଥକଙ୍କ ସହ ବିଜେଡିରେ ସାମିଲ ହେବେ।

ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଦଳର ବରିଷ୍ଠ ନେତାମାନଙ୍କ ଉପସ୍ଥିତିରେ ଶ୍ରୀ ସାହୁ ବିଜେଡିରେ ସାମିଲ ହେବେ।

ଏହି ସମୟରେ ବିଜେପୁର ବିଧାୟିକା ରୀତା ସାହୁ, ସାଂସଦ ପ୍ରସନ୍ନ ଆଚାର୍ଯ୍ୟ, ବରଗଡ଼ ଜିଲ୍ଲା ପର୍ଯ୍ୟବେକ୍ଷକ ତଥା ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ଓ ଅନ୍ୟ ବରିଷ୍ଠ ନେତାମାନେ ଉପସ୍ଥିତ ରହିବେ। ଶ୍ରୀ ସାହୁଙ୍କ ସହ ତାଙ୍କର ପ୍ରାୟ ୧୫୦ଜଣ ସମର୍ଥକ ମଧ୍ୟ ବିଜେଡିରେ ସାମିଲ ହେବେ।

ଉଲ୍ଲେଖଯୋଗ୍ୟ, ଶ୍ରୀ ସାହୁ ସଂଗଠନରେ ତାଙ୍କୁ ପଚରା ଯାଉନଥିବା ଅଭିଯୋଗ ଆଣି ଅଚାନକ କଂଗ୍ରେସରୁ ଇସ୍ତଫା ଦେଇଥିଲେ।

ଘନ କୁହୁଡ଼ି ଲାଗି ପୁରୀରେ ଦେଖାଯାଉନି ଶ୍ରୀମନ୍ଦିର ଓ ସମୁଦ୍ର ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଆଜି ରାଜଧାନୀ ଭୁବନେଶ୍ୱର ଓ କଟକକୁ କୁହୁଡ଼ି ଢାଙ୍କି ରଖିଛି। ଆଜିକୁ ମିଶାଇ ଲଗାତାର ଚାରି ଦିନ ହେଲା ଏ ଦୁଇ ସହରରେ କୁହୁଡ଼ି ପଡୁଛି। ଶନିବାର ଓ ରବିବାର ଭୁବନେଶ୍ୱର ସହିତ କଟକରେ ଘନ କୁହୁଡ଼ି ପଡ଼ିଥିଲା। ଗତକାଲି ଭୁବନେଶ୍ୱରରେ କୁହୁଡ଼ିର ମାତ୍ରା ବହୁତ କମ୍ ଥିଲା। ଗତକାଲି ଅପେକ୍ଷା ଆଜି ଭୁବନେଶ୍ୱରରେ ଟିକେ ଅଧିକ କୁହୁଡ଼ି ପଡ଼ିଛି। କିନ୍ତୁ ଏହା ଶନିବାର ଓ ରବିବାର ଅପେକ୍ଷା ବହୁତ କମ୍। ଆଜି କୁହୁଡ଼ିରେ ପ୍ରାୟ ୧୦୦ ମିଟର ପର୍ଯ୍ୟନ୍ତ କୌଣସି ବସ୍ତୁ ଦୃଶ୍ୟମାନ ହେଉଛି। କୁହୁଡ଼ି ଯୋଗୁ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଛି। କେବଳ କଟକ, ଭୁବନେଶ୍ୱର ନୁହେଁ, ପୁରୀ ଓ ଅନ୍ୟାନ୍ୟ ଉପକୂଳ ଜିଲ୍ଲାଗୁଡ଼ିକରେ ମଧ୍ୟ କୁହୁଡ଼ି ପଡ଼ୁଛି। ପୁରୀରେ ଚାରି ଦିନ ହେଲା ଘନ କୁହୁଡ଼ି ପଡୁଛି। ଘନ କୁହୁଡ଼ି ଯୋଗୁ ପୁରୀ ଶ୍ରୀମନ୍ଦିର ଓ ସମୁଦ୍ର ଦେଖାଯାଉ ନାହିଁ। ସମୁଦ୍ରର ଲହରୀର ଶବ୍ଦ କେବଳ ଶୁଭୁଛି। ଏଠାରେ ବି ଗାଡ଼ି ଚଳାଚଳ ବାଧାପ୍ରାପ୍ତ ହୋଇଛି।

କୁହୁଡ଼ି ଯୋଗୁ ଗତକାଲି କେନ୍ଦ୍ରାପଡ଼ାରେ ଏକ ବୋଲେରୋ ଦୁର୍ଘଟଣାଗ୍ରସ୍ତ ହୋଇଥିଲା। ଏଥିରେ ୪ ଜଣଙ୍କ ଲୋକଙ୍କ ମୃତ୍ୟୁ ଘଟିଥିଲା।

ଆଭ୍ୟନ୍ତରୀଣ ଓଡ଼ିଶାରେ କୁହୁଡ଼ିର ମାତ୍ରା ଏତେ ଅଧିକ ନାହିଁ ବୋଲି ଜଣାପଡ଼ିଛି। କୁହୁଡ଼ି ଜନଜୀବନକୁ ପ୍ରଭାବିତ କରୁଥିବା ବେଳେ ଶୀତ କମିଛି। ଏବେ ରାଜ୍ୟର ଅନେକ ସ୍ଥାନରେ ତାମପାତ୍ରା ସାମାନ୍ୟ ଠାରୁ ୩ ଡିଗ୍ରୀ କମ୍ ରହୁଥିବା ଜଣାପଡ଼ିଛି। ଯଦିଓ ଗତକାଲି ରାଜ୍ୟର ୬ଟି ସହରର ତାପମାତ୍ରା ୧୦ ଡିଗ୍ରୀ ତଳେ ରହିଥିଲା,  ଆଗକୁ ଧୀରେ ଧୀରେ ଶୀତ କମିବ ବୋଲି ଭୁବନେଶ୍ୱର ସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି।

ଭୋଟର ମତଦାନରୁ ଏନ୍‌ଆରଆଇ ବଞ୍ଚିତ ହେବେ କି ?

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ପ୍ରବାସୀ ଭାରତୀୟ ଭୋଟରଙ୍କୁ ନିର୍ବାଚନ ପ୍ରକ୍ରିୟାରେ ସାମିଲ କରିବା ଲାଗି ଆଇନ ମନ୍ତ୍ରାଳୟ ପକ୍ଷରୁ ଏକ ଗୁରୁତ୍ବପୂର୍ଣ୍ଣ ବିଧେୟକ ଅଣାଯାଇଛି। ଏହି ବିଧେୟକ ୨୦୧୮ରେ ଲୋକସଭାରେ ଗୃହୀତ ହୋଇଥିବା ବେଳେ ରାଜ୍ୟସଭାର ମଞ୍ଜୁରୀ ଅପେକ୍ଷାରେ ରହିଛି। ଆଗକୁ ଲୋକସଭା ନିର୍ବାଚନ ଆସୁଥିବାରୁ ବିଧେୟକଟି ରାଜ୍ୟସଭାରେ ଗୃହୀତ ହେବା ଅଧିକ ଗୁରୁତ୍ବପୂର୍ଣ୍ଣ ମନେହୁଏ। ଶୀତକାଳୀନ ଅଧିବେଶନରେ ଆଲୋଚନା ଲାଗି ପ୍ରତ୍ୟେକ ଦିନ ଏହାକୁ ତାଲିକାଭୁକ୍ତ କରାଯାଇଥିଲା। ମାତ୍ର ବିଭିନ୍ନ ଦଳର ହଟ୍ଟଗୋଳ ଯୋଗୁ ରାଜ୍ୟସଭା ବାରମ୍ବାର ମୁଲତବୀ ହେବାରୁ ବିଧେୟକ ଉପରେ କୌଣସି ଆଲୋଚନା ହୋଇପାରି ନ ଥିଲା। ଅନ୍ୟପଟେ କେନ୍ଦ୍ର ସରକାର ନିର୍ବାଚନ ପୂର୍ବରୁ ଅନ୍ତରୀଣ ବଜେଟ ଅଧିବେଶନ ଡକାଇଛନ୍ତି। ଜାନୁଆରୀ ୩୧ରୁ ଫେବୃଆରୀ ୧୩ ପର୍ଯ୍ୟନ୍ତ ଚାଲିବାକୁ ଥିବା ଉକ୍ତ ଅଧିବେଶନରେ ମାତ୍ର ୧୧ଟି କାର୍ଯ୍ୟଦିବସ ରହିଛି। ଏହାମଧ୍ୟରେ ସରକାର ଅନ୍ତରୀଣ ବଜେଟ ଉପସ୍ଥାପନ କରିବେ। ଏଣୁ ତାହା ଉପରେ ଚର୍ଚ୍ଚା ହେବାକୁ ଥିବାରୁ ଏହି ବିଧେୟକ ଉପରେ ଆଲୋଚନା ପାଇଁ ସମୟ ମିଳି ନ ପାରେ ବୋଲି କୁହାଯାଉଛି। ଫଳରେ ଆଗାମୀ ଲୋକସଭା ନିର୍ବାଚନରେ ମଧ୍ୟ ଏନ୍‌ଆରଆଇ ଭୋଟରମାନେ ଅଂଶଗ୍ରହଣ କରିବା ନେଇ ସଂଶୟ ଲାଗି ରହିଛି।
ବୈଦେଶିକ ମନ୍ତ୍ରାଳୟର ସୂଚନାନୁସାରେ ବିଶ୍ବର ବିଭିନ୍ନ ରାଷ୍ଟ୍ରରେ ୩.୧୦ କୋଟି ପ୍ରବାସୀ ଭାରତୀୟ ଅଛନ୍ତି। ସମ୍ପ୍ରତି ଏମାନଙ୍କୁ ଭୋଟର ତାଲିକାରେ ନାମ ପଞ୍ଜିକରଣ କରିବା ନିମନ୍ତେ ଭାରତ ଆସିବାକୁ ପଡୁଛି। ନିଜ ନିର୍ବାଚନମଣ୍ଡଳୀକୁ ଯାଇ ବିଦେଶଯାତ୍ରା ବେଳେ ପ୍ରଦାନ କରାଯାଇଥିବା ମୂଳ ପାସପୋର୍ଟ ଦେଖାଇ ମତଦାନ କରିବାକୁ ପଡୁଛି। ଏହି ସମସ୍ୟା ଦୂର କରିବା ଲାଗି ଇ-ଭୋଟିଂ ବା ଇଣ୍ଟରନେଟ ମାଧ୍ୟମରେ ମତଦାନ ବ୍ୟବସ୍ଥା କରିବାକୁ ଏକ ପ୍ରସ୍ତାବ ଆସିଥିଲା। ମାତ୍ର ନିର୍ବାଚନ କମିସନଙ୍କ ବିଶେଷଜ୍ଞ କମିଟି ଏହି ପ୍ରସ୍ତାବକୁ ଅଗ୍ରାହ୍ୟ କରିଛନ୍ତି। ଏହା ପରିବର୍ତ୍ତେ ପ୍ରକ୍ସି ଭୋଟିଂ ବା ଜଣେ ବ୍ୟକ୍ତିଙ୍କ ପାଇଁ ଅନ୍ୟ ଜଣେ ବ୍ୟକ୍ତି ମତଦାନ କରିପାରିବା ନେଇ ଏକ ପ୍ରସ୍ତାବକୁ କମିଟି ମଞ୍ଜୁରୀ ଦେଇଛନ୍ତି। ଏହାକୁ ଆଇନରେ ପରିଣତ କରିବା ଲାଗି ଉକ୍ତ ବିଧେୟକ ଉଦ୍ଦିଷ୍ଟ। ବିଧେୟକଟି ଆଇନରେ ପରିଣତ ହେଲେ ପ୍ରବାସୀ ଭାରତୀୟମାନେ ନିଜ ପାଇଁ ଜଣେ ପ୍ରକ୍ସି ଭୋଟର ମନୋନୟନ କରିପାରିବେ। ପ୍ରତ୍ୟେକ ନିର୍ବାଚନ ବେଳେ ଏହି ପ୍ରକ୍ସି ପରିବର୍ତ୍ତନ କରାଯିବ।
ନିର୍ବାଚନ ଆଇନ ଅନୁସାରେ ସେନାର ଜଣେ ପୁରୁଷ କର୍ମଚାରୀଙ୍କ ପତ୍ନୀ ‘ସର୍ଭିସ ଭୋଟର’ ଭାବେ ପଞ୍ଜିକୃତ। ଅର୍ଥାତ ସ୍ବାମୀ କାର୍ଯ୍ୟସ୍ଥଳରେ ଥିବା ଅବସରରେ ତାଙ୍କ ପାଇଁ ପତ୍ନୀ ମତଦାନ କରିପାରିବା ନେଇ ନିର୍ବାଚନ ଆଇନରେ ଅନୁମତି ରହିଛି। କିନ୍ତୁ ସେନାର ଜଣେ ମହିଳା କର୍ମଚାରୀଙ୍କ ସ୍ବାମୀଙ୍କୁ ସେହି ଅଧିକାର ଦିଆଯାଇନାହିଁ। ଏଣୁ ଆଇନଟିକୁ ଲିଙ୍ଗଗତ ପ୍ରଭେଦରୁ ଊର୍ଦ୍ଧ୍ବକୁ ନେଇ ପତ୍ନୀ ସ୍ଥାନରେ ‘ସ୍ପାଉସ (ପତ୍ନୀ କିମ୍ବା ପତି)’ ଉଲ୍ଲେଖ କରିବାକୁ କେନ୍ଦ୍ର ଯୋଜନା ଚଳାଇଛି। ଉଲ୍ଲେଖ ଯେ, ସେନାବାହିନୀ, ସିଆରପିଏଫ୍‌, ନିଜ ରାଜ୍ୟରୁ ବାହାରେ ନିୟୋଜିତ ରାଜ୍ୟ ପୁଲିସ ବାହିନୀ ଓ ଦେଶ ବାହାରେ ନିଯୁକ୍ତ କେନ୍ଦ୍ରସରକାରଙ୍କ ଅଧୀନସ୍ଥ କର୍ମଚାରୀ ତଥା ବିଭିନ୍ନ ଦୂତାବାସର କୂଟନୀତିଜ୍ଞମାନେ ‘ସର୍ଭିସ ଭୋଟର’ ବର୍ଗଭୁକ୍ତ ଅଟନ୍ତି। ଏହାକୁ ଦୃଷ୍ଟିରେ ରଖି ନିର୍ବାଚନ ଆଇନକୁ ଲିଙ୍ଗଗତ ପ୍ରଭେଦମୁକ୍ତ କରିବା ଲାଗି ନିର୍ବାଚନ କମିଶନ ମଧ୍ୟ ପ୍ରସ୍ତାବ ଦେଇଛନ୍ତି।

ଆଜିର ରାଶିଫଳ ୨୨.୦୧.୨୦୧୯ ମଙ୍ଗଳବାର ।

ମେଷ: ମାନସିକ ସ୍ତରରେ କଷ୍ଟ ଅନୁଭବ କରିପାରନ୍ତି। ବାଦ-ବିବାଦ ଉପୁଜିବାର ସମ୍ଭାବନା ଅଛି। ଉଦାର ପ୍ରକୃତିର ହେବେ। ମିଷ୍ଟଭାଷୀ ହେବେ। ସୁସ୍ଥ ଓ ନିରାମୟ ରହିବେ। କୃଷିରୁ ଲାଭ ମିଳିବ। ବୁଦ୍ଧିମାନ ହେବେ।

ବୃଷ: ସାମାନ୍ୟ କାରଣରୁ ଦ୍ୱନ୍ଦ୍ୱର ସମ୍ମୁଖୀନ ହୋଇପାରନ୍ତି। କର୍ମକ୍ଷେତ୍ରରେ ପ୍ରାଧାନ୍ୟ ବିସ୍ତାର କରିପାରନ୍ତି। ମନ ପ୍ରସନ୍ନ ରହିବ। ଆସ୍ତିକ ହେବେ। ମିଷ୍ଟଭାଷୀ ହୋଇପାରନ୍ତି। ପ୍ରେମୀ ଓ ସାହସୀ ହେବେ।

ମିଥୁନ: ପିତୃ ଋଣରୁ ମୁକ୍ତି ପାଇଁ ବ୍ୟସ୍ତ ରହିବେ। ପରମ ଭାଗ୍ୟଶାଳୀ ହେବେ। ଶୋଭନ ବ୍ୟକ୍ତିତ୍ୱର ଅଧିକାରୀ ହୋଇପାରନ୍ତି। ମଧୁରଭାଷୀ, ସହନଶୀଳ, ଶାନ୍ତିପ୍ରିୟ ଓ ଉଦାର ବିଦ୍ୟାପ୍ରେମୀ ହୋଇପାରନ୍ତି। ମିତ୍ର ସୁଖ ମିଳିବ। ନୀତିନିଷ୍ଠ ହେବେ।

କର୍କଟ: କଳା ବିଦ୍ୟା ପ୍ରତି ଆଗ୍ରହୀ ହେବେ। ମାନ-ସମ୍ମାନ ପାଇଁ ଯୋଗ୍ୟ ଭାବେ ବିବେଚିତ ହେବେ। ଐଶ୍ୱର୍ଯ୍ୟଯୁକ୍ତ ଶକ୍ତିମାନ୍‍ ହୋଇପାରନ୍ତି। ଋଣ କ୍ଷେତ୍ରରେ ପାରଙ୍ଗମ ହେବେ। ମୋକଦ୍ଦମାରେ ବିଜୟୀ ହେବେ। ତତ୍‍ଜନିତ ଧନଲାଭ କରିପାରନ୍ତି।

ସିଂହ: ଦୂରବନ୍ଧୁଙ୍କ ଦର୍ଶନ ମିଳିବ। ଥଣ୍ଡା କଫ ଜନିତ ପୀଡ଼ା ଅନୁଭବ କରିପାରନ୍ତି। ଚଞ୍ଚଳ ସ୍ୱଭାବର ହେବେ। ମଧୁରଭାଷୀ ହୋଇପାରନ୍ତି। ଏକାନ୍ତ ରହିବାକୁ ଇଚ୍ଛା କରିବେ। ରାଜଯୋଗ ପ୍ରାପ୍ତ ହେବେ। ଖର୍ଚ୍ଚାନ୍ତ ହେବା ଆଶାକରାଯାଏ।

କନ୍ୟା: ମୂଲ୍ୟବାନ ଦ୍ରବ୍ୟ ଲାଭ ହୋଇପାରେ। ସୁସ୍ଥ ଓ ନିରାମୟ ଜୀବନ ଯାପନ କରିପାରନ୍ତି। ଯଶସ୍ୱୀ ହେବେ। ଲୋକ ପ୍ରିୟତା ଅର୍ଜନ କରିବେ। ଚଞ୍ଚଳ ପ୍ରକୃତିର ହେବେ। ସରକାରୀ ସ୍ତରରେ ସମ୍ମାନିତ ହେବା ସହିତ ଧନପ୍ରାପ୍ତି ହୋଇପାରନ୍ତି।

ତୁଳା: ପରିବେଶ ପାଇଁ ଚିନ୍ତିତ ହୋଇପାରନ୍ତି। ପରିଶ୍ରମର ମୂଲ୍ୟ ମିଳିବ। କୁଳଦୀପକ ହେବେ। ମନ ପ୍ରସନ୍ନ ରହିବ। ସୁସ୍ଥ ଓ ନିରାମୟ ରହିବେ। ଦୟାଳୁ ସ୍ୱଭାବର ହେବେ। ବ୍ୟବସାୟ ଲାଭଜନକ ହେବ। ଯଶ ଅର୍ଜନ କରି ସୁଖୀ ହେବେ।

ବିଛା: ଯୋଗା-ଯୋଗରେ ପ୍ରଗତିର ସୂଚନା ମିଳୁଛି। ଭାଗ୍ୟଶାଳୀ ହେବେ। ଦିନଟି ଭୋଗ ବିଳାସରେ କଟାଇ ପାରନ୍ତି। ସୁଖ-ସମୃଦ୍ଧିପୂର୍ଣ୍ଣ ଜୀବନ ଯାପନ କରିବେ। ଧର୍ମାତ୍ମା, ପ୍ରବାସପ୍ରିୟ, ବିଦ୍ୱାନ୍‍, ସାହସୀ ଓ ସମ୍ପତ୍ତିବାନ୍‍ ହେବେ। ଦାମ୍ପତ୍ୟ ଜୀବନ ସୁଖପ୍ରଦ ହେବ।

ଧନୁ: ପୈତୃକ ସମ୍ପତ୍ତି ପାଇଁ ଲାଗି ରହିଥିବା ବିବାଦର ସୁ-ସମାଧାନ ହେବ। ସାମାନ୍ୟ ଦେହ କଷ୍ଟ ଅନୁଭବ କରିପାରନ୍ତି। ସ୍ୱାଭିମାନୀ ହେବେ। ଯୁଗ୍ମ ବ୍ୟବସାୟରେ ଲାଭବାନ ହେବେ। ନିଜ ଅଧୀନସ୍ଥ କର୍ମଚାରୀଙ୍କ ହର୍ତ୍ତାକର୍ତ୍ତା ହେବେ।

ମକର: ଦୁର୍ବଳ ମନ ନେଇ ଅସୁବିଧାରେ ପଡ଼ିଲେ ବି ତାହା ମାତ୍ର କ୍ଷଣକ ପାଇଁ ା ବ୍ୟବସାୟ ଲାଭଜନକ ହେବ। ସେବା ମନୋଭାବର ହୋଇପାରନ୍ତି। ବେଳେ ବେଳେ ମନରେ ଅହଂଭାବ ଜାଗ୍ରତ ହେବ। ଭାଇମାନଙ୍କ ଉପରେ ସ୍ନେହ, ସଦିଚ୍ଛା ଭାବ ରହିପାରେ।

କୁମ୍ଭ: ସ୍ୱାସ୍ଥ୍ୟରେ ଉନ୍ନତି ଘଟିବ। ନିଜ କାର୍ଯ୍ୟ ପାଇଁ ଗର୍ବିତ ହୋଇପାରନ୍ତି। ଭାଇମାନଙ୍କ ଉପରେ ସ୍ନେହ ସଦିଚ୍ଛା ଭାବ ରହିବ। ସୁସ୍ଥ ଓ ନିରାମୟ ଜୀବନ ଯାପନ କରିପାରନ୍ତି। ରାଜମନ୍ତ୍ରୀ ଭାବେ କାର୍ଯ୍ୟ କରିପାରନ୍ତି। ଶତ୍ରୁହନ୍ତା ହେବେ। ଖ୍ୟାତନାମୀ ହେବେ।

ମୀନ: ପୈତୃକ ସମ୍ପତ୍ତିକୁ ନେଇ ଗଣ୍ଡଗୋଳ ଉପୁଜିଥିବାବେଳେ ଆକସ୍ମିକ ଧନଲାଭ ଯୋଗୁଁ ପ୍ରଫୁଲ୍ଲିତ ହୋଇପାରନ୍ତି। ବ୍ୟବସାୟରେ ପ୍ରଚୁର ଧନଲାଭ ହୋଇପାରେ। ଚଞ୍ଚଳ ପ୍ରକୃତିର ହେବେ। ତନ୍ତ୍ର-ମନ୍ତ୍ରାଦି ଗୁପ୍ତ ବିଦ୍ୟାପ୍ରତି ରୁଚି ରହିବ।