ଶ୍ରୀମନ୍ଦିର ପ୍ରଶାସନ ପକ୍ଷରୁ ସେବାୟତଙ୍କୁ ନୋଟିସ୍‌ ।

ଏଥର ସମ୍ଭାଳ ବ୍ୟୁରୋ (ପୁରୀ) – ଗତ ୨୮ ତାରିଖ ଦିନ ଶ୍ରୀମନ୍ଦିରରେ ହୋଇଥିବା ନୀତି ବିଭ୍ରାଟକୁ ନେଇ ମନ୍ଦିର ପ୍ରଶାସନ ପକ୍ଷରୁ ସେବାୟତଙ୍କୁ ନୋଟିସ୍ ଜାରି କରାଯାଇଛି । ଏହାର ଜବାବ ସପ୍ତାହ ମଧ୍ୟରେ ଦେବାକୁ ନିର୍ଦ୍ଦେଶ ଦିଆଯାଇଛି । ପ୍ରକାଶ ଥାଉକି ଗତ ଡିସେମ୍ବର ୨୭ ତାରିଖରେ ଶ୍ରୀମନ୍ଦିର ଭିତରକୁ ପ୍ରବେଶ ନେଇ ପୁଲିସ୍ ଓ ସେବାୟତଙ୍କ ମଧ୍ୟରେ ଠେଲାପେଲା ହୋଇଥିଲା। ଏଥିରେ ସେବାୟତ ଭବାନୀ ଶଙ୍କର ମହାପାତ୍ର ଆହତ ହୋଇଥିଲେ। ତାଙ୍କୁ ପୁଲିସ୍ କର୍ମଚାରୀମାନେ ମାଡ଼ ମାରିଥିବା ନେଇ ଅଭିଯୋଗ ହୋଇଥିଲା ଓ ଏ ନେଇ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦାବିରେ ସେବାୟତମାନେ ତା’ ପରଦିନ ଅର୍ଥାତ୍ ୨୮ ତାରିଖରେ ଶ୍ରୀଜିଉଙ୍କ ନୀତିକାନ୍ତ ବନ୍ଦ କରିଥିଲେ ।

ଦୀର୍ଘ ସମୟ ଧରି ମହାପ୍ରଭୁଙ୍କ ଦର୍ଶନ କରି ନପାରିବା ହେତୁ ଭକ୍ତଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା । ଫଳରେ ଭକ୍ତଗଣ ବ୍ୟାରିକେଡ୍‌ ଭାଙ୍ଗି ଶ୍ରୀମନ୍ଦିର ଭିତରକୁ ପଶିବା ଯୋଗୁଁ ପରିସ୍ଥିତି ଅଣାୟତ ହୋଇପଡିଥିଲା । ପରି ଶେଷରେ ପ୍ରଶାସନର ହସ୍ତକ୍ଷେପ ଯୋଗୁଁ ପରିସ୍ଥିତି ସୁଧୁରି ଅପରାହ୍ନ ରେ ମନ୍ଦିରର ନୀତିକାନ୍ତି ଆରମ୍ଭ ହୋଇଥିବାରୁ ବିଳମ୍ବିତ ରାତି ପର୍ଯ୍ୟନ୍ତ ଭକ୍ତଗଣ ମହାପ୍ରଭୁଙ୍କ ଦର୍ଶନ କରିଥିଲେ ।

ରାମଚନ୍ଦ୍ରପୁର ସରକାରୀ ନୋଡାଲ ଉଚ୍ଚ ବିଦ୍ୟାଳୟ ର କ୍ରୀଡ଼ା ସମାପନ ।

!!! ଯାଜପୁର ଜିଲ୍ଲା ବରୀ ରୁ ପ୍ରଦୀପ ମହାରଣା ଙ୍କ ରିପୋର୍ଟ !!!

ଯାଜପୁର ଜିଲ୍ଲା ବରୀ ଅନ୍ତର୍ଗତ ଅଲ୍ଲିପୁର ଗ୍ରାମ ପଞ୍ଚାୟତ ଅଧୀନ ରାମଚନ୍ଦ୍ରପୁର ସରକାରୀ ନୋଡାଲ ଉଚ୍ଚ ବିଦ୍ୟାଳୟ ର ବାର୍ଷିକ ଉତ୍ସବ କ୍ରୀଡ଼ା ଅନୁଷ୍ଠିତ ହୋଇଯାଇଛି ।

ଏହି କ୍ରୀଡ଼ା ଉତ୍ସଵ ୨ ଦିନ ଧରି ଅନୁଷ୍ଠିତ ହୋଇଥିଲା । ଏହି ଖେଳ କୁ ସହକାରୀ ଶିକ୍ଷକ ମଧୁସୂଦନ ଦଳାଇ ପରିଚାଳନା କରିଥିଲେ ।

ଉଦଯାପନୀ ଉତ୍ସଵ ରେ ସ୍କୁଲ ର ପ୍ରଧାନ ଶିକ୍ଷୟତ୍ରୀ ମେନକା ଭୂୟାଁ ସଭାପତିତ୍ୱ କରିଥିଲେ । କ୍ରୀଡ଼ା ମାଧ୍ୟମରେ ଜଣେ ଛାତ୍ର କିମ୍ବା ଛାତ୍ରୀ ଜାତୀୟ ଓ ଆନ୍ତର୍ଜାତୀୟ ସ୍ତରରେ ଉଦାହରଣ ହୋଇ ପରିବ ଏବଂ ଖେଳ ମାଧ୍ୟମରେ ନିଜ ଶରୀର ମଧ୍ୟ ସୁସ୍ଥ ସବଳ ରହିବ ବୋଲି ସେ କହିଥିଲେ ।

ଉକ୍ତ ଖେଳ ର ଚାମ୍ପିଅନ ଭାବେ ସୁଜିତ ମହାନ୍ତି ଓ ରୋଜାଲୀନ ବିଶ୍ୱାଳ ଓ ଅନ୍ୟ କୃତି ପିଲା ଙ୍କୁ ପୁରସ୍କୃତ କରାଯାଇଥିଲା । ସଭା ଶେଷ ରେ ସୁରେନ୍ଦ୍ର ସାମଲ ଧନ୍ୟବାଦ ଅର୍ପଣ କରିଥିଲେ ।

ଦୁର୍ବଳ ହେଉଛି ଆପ୍‌! ପୁଣି ଜଣେ ବିଧାୟକଙ୍କ ଇସ୍ତଫା ।

ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ୨୦୧୯ ସାଧାରଣ ନିର୍ବାଚନ ଯେତିକି ପାଖେଇ ଆସୁଛି, ଦିଲ୍ଲୀରେ କ୍ଷମତାସୀନ ଆମ୍‌ ଆଦ୍‌ମୀ ପାର୍ଟି(ଆପ୍‌) ସେତିକି ଦୁର୍ବଳ ହେବାରେ ଲାଗିଛି। ଆଜି ପଞ୍ଜାବର ବରିଷ୍ଠ ଆପ୍‌ ନେତା ତଥା ବିଧାୟକ ବଲଦେବ ସିଂହ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି।
ସେ କହିଛନ୍ତି,“ଦଳ ଯେଉଁ ଆଦର୍ଶ ଓ ସ୍ୱାଭିମାନକୁ ନେଇ ଗଠନ ହୋଇଥିଲା, ଧୀରେଧୀରେ ଲକ୍ଷ୍ୟଚ୍ୟୁତ ହେବାରେ ଲାଗିଛି। ଦଳରେ ଦୋମୁହାଁ ନୀତି ପ୍ରଚଳିତ ଥିବା ବେଳେ ଏହାର ମୁଖ୍ୟ ଅରବିନ୍ଦ କେଜ୍ରିୱାଲ ସ୍ୱେଚ୍ଛାଚାରୀ ଭାବେ କାର୍ଯ୍ୟ କରୁଛନ୍ତି। ତେଣୁ ମୁଁ ଦଳର ସମସ୍ତ ସଦସ୍ୟ ପଦରୁ ଇସ୍ତଫା ଦେଉଛି। ମୁଁ ମୋ ଇସ୍ତଫାପତ୍ର ଆପ୍‌ ମୁଖ୍ୟଙ୍କୁ ପଠାଇ ଦେଇଛି।” ବଲଦେବ ସିଂହ ପଞ୍ଜାବର ଜାଇଟୋ ଆସନରୁ ବିଧାୟକ ହୋଇଥିଲେ।

ଏହାପୂର୍ବରୁ ଜାନୁଆରୀ ୬ରେ ବିଧାୟକ ସୁକପାଲ ସିଂହ ଖୈରା ଆପ୍‌ ମୁଖ୍ୟଙ୍କୁ ଜଣେ ସ୍ୱେଚ୍ଛାଚାରୀ କହି ଦଳରୁ ଇସ୍ତଫା ଦେଇଥିଲେ। ଏହି ଦୁଇ ବିଧାୟକଙ୍କ ବ୍ୟତୀତ ସାମଜିକ କର୍ମୀ ତଥା ବରିଷ୍ଠ ଓକିଲ ଏଚ୍‌ସି ଫୁଲକା ମଧ୍ୟ ଆପ୍‌ର ପ୍ରାଥମିକ ସଦସ୍ୟରୁ ଇସ୍ତଫା ଦେଇଥିଲେ।

ଓଟିଇଟି ପ୍ରଶ୍ନପତ୍ର ଲିକ୍‌ ମାମଲାର ତଦନ୍ତ କରିବ କ୍ରାଇମବ୍ରାଞ୍ଚ !

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – OTET ପ୍ରଶ୍ନପତ୍ର ଲିକ୍‌ ମାମଲାରେ କ୍ରାଇମବ୍ରାଞ୍ଚ ତଦନ୍ତ କରିପାରେ। ଘଟଣାର ତଦନ୍ତ ପାଇଁ ମାଧ୍ୟମିକ ଶିକ୍ଷା ବୋର୍ଡକୁ ଚିଠି ଲେଖିଛି କ୍ରାଇମବ୍ରଞ୍ଚ। ଏନେଇ ସୂଚନା ଦେଇଛନ୍ତି ବୋର୍ଡ ସମ୍ପାଦକ ରାମାଶିଷ ହାଜରା।

OTET ପ୍ରଶ୍ନପତ୍ର ସୋଶାଲ ମିଡିଆରେ ଭାଇରାଲ ହେବା ପରେ, ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ପରୀକ୍ଷା ବାତିଲ କରାଯାଇଛି। ଭାଇରାଲ୍ ହୋଇଥିବା ପ୍ରଶ୍ନପତ୍ର ଏବଂ ଓଟିଇଟି ପକ୍ଷରୁ ପ୍ରସ୍ତୁତ ହୋଇଥିବା ପ୍ରଶ୍ନପତ୍ର ମେଳ ଖାଉଥିବାରୁ, ବୋର୍ଡ ପକ୍ଷରୁ ଏହି ନିଷ୍ପତ୍ତି ନିଆଯାଇଛି। କେଉଁ ପରିସ୍ଥିତିରେ ପ୍ରଶ୍ନପତ୍ର ଲିକ୍ ହେଲା, କିଏ ଏହାକୁ କେଉଁଠୁ ପାଇଲା ଏବଂ କିଏ ସୋଶାଲ୍ ମିଡିଆରେ ଛାଡ଼ିଲା, ଏ ସଂପର୍କରେ କିଛି ଜଣାପଡି ନାହିଁ।

ବୁଧବାର ଓଟିଇଟି ପକ୍ଷରୁ ଦୁଇଟି ସିଟିଂରେ ପରୀକ୍ଷାର ଆୟୋଜନ କରାଯାଇଥିଲା। କିନ୍ତୁ ସକାଳ ୧୦ଟାରୁ ୧୨ଟା ୩୦ମଧ୍ୟରେ ପ୍ରଥମ ସିଟିଂ ପରୀକ୍ଷା ଚାଲିଥିବା ବେଳେ ସୋଶାଲ ମିଡିଆରେ ପ୍ରଶ୍ନପତ୍ର ଭାଇରାଲ୍‌ ହୋଇଥିଲା।

ଚଳିତବର୍ଷ ଦୁଇଟି ସିଟିଂରେ ପ୍ରାୟ ୧ ଲକ୍ଷ ୧୨ ହଜାର ଛାତ୍ରଛାତ୍ରୀ ପରୀକ୍ଷା ଦେଉଥିଲେ। ବୋର୍ଡ ପକ୍ଷରୁ ପରୀକ୍ଷା ବାତିଲ ପରେ ଛାତ୍ରଛାତ୍ରୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ରାଉରକେଲାରେ ଛାତ୍ରଛାତ୍ରୀମାନେ ଧାରଣାରେ ବସିଥିଲେ।

କଂଗ୍ରେସରୁ ଇସ୍ତଫା ଦେଲେ ନବ ଦାସ, ବିଜେଡିରେ ଯୋଗ ଦେବେ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଶେଷରେ ସବୁ କଳ୍ପନାଜଳ୍ପନାର ଅନ୍ତ ଘଟିଲା। କଂଗ୍ରେସରୁ ଇସ୍ତଫା ଦେଲେ ଝାରସୁଗୁଡ଼ା ବିଧାୟକ ନବ ଦାସ। ସେ ପିସିସିର କାର୍ଯ୍ୟକାରୀ ସଭାପତି ଓ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି। ସେ ତାଙ୍କ ଇସ୍ତଫାପତ୍ର କଂଗ୍ରେସ ସଭାପତି ରାହୁଲ ଗାନ୍ଧିଙ୍କ ନିକଟକୁ ପଠାଇ ଦେଇଛନ୍ତି। ସେ ଖୁବ୍‌ଶୀଘ୍ର ବିଧାୟକ ପଦରୁ ବି ଇସ୍ତଫା ଦେବେ ବୋଲି ସୂଚନା ମିଳିଛି।

ସେ ବିଜେଡିରେ ଯୋଗ ଦେବେ ବୋଲି ତାଙ୍କ ଇସ୍ତଫାପତ୍ରରେ ଉଲ୍ଲେଖ କରିଛନ୍ତି। ସେ ବିଜେଡିରୁ ପ୍ରାର୍ଥୀ ହୁଅନ୍ତୁ ବୋଲି ଅଞ୍ଚଳବାସୀ ଚାହୁଁଥିବା ସେ ଉଲ୍ଲେଖ କରିଛନ୍ତି।

ନବ ଲେଖିଛନ୍ତି,“ମୋ ଅଞ୍ଚଳର ଲୋକେ ଚାହୁଁଛନ୍ତି ମୁଁ ୨୦୧୯ ନିର୍ବାଚନ ବିଜେଡିରୁ ଲଢ଼େ। କାରଣ ସେମାନେ ଅଞ୍ଚଳର ବିକାଶ ଚାହୁଁଛନ୍ତି। ମୁଁ ବିଜେଡିରେ ଯୋଗ ଦିଏ ବୋଲି ସେମାନେ ଚାହୁଁଛନ୍ତି। ମୋ ଲୋକଙ୍କ ମୂଲ୍ୟବାନ ପରାମର୍ଶ ସଂପର୍କରେ ମୁଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଆସନ୍ତା ୨୪ ତାରିଖରେ ଜଣାଇବି, ଯେତେବେଳେ ସେ ଝାରସୁଗୁଡ଼ା ଗସ୍ତରେ ଆସିବେ।”

ଇସ୍ତଫା ପାଇଁ କ୍ଷମାପ୍ରାର୍ଥନା କରିବା ସହିତ ବିକାଶ ପାଇଁ ବିଜେଡିରେ ଯୋଗଦେବା ଉଚିତ୍ ହେବ ବୋଲି ଇସ୍ତଫାପତ୍ରରେ ନବ ଲେଖିଛନ୍ତି।

ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ବିରୋଧରେ ତାଙ୍କର କିଛି ଅଭିଯୋଗ ନାହିଁ ବୋଲି ସେ ଇସ୍ତଫାପତ୍ରରେ ଲଖିଛନ୍ତି। ନିରଞ୍ଜନଙ୍କ ସହିତ ତାଙ୍କର ଭଲ ସଂପର୍କ ଥିବା ସେ ଏଥିରେ ସ୍ପଷ୍ଟ କରିଛନ୍ତି।

ଜାନୁଆରୀ ୨୪ ତାରିଖରେ ନବ ଦାସ ବିଜେଡିରେ ଯୋଗ ଦେଇପାରନ୍ତି।

କଂଗ୍ରେସ ନେତା ଆର୍ଯ୍ୟ କୁମାର ଜ୍ଞାନେନ୍ଦ୍ର କହିଛନ୍ତି, ନବ ଦାସଙ୍କ ଇସ୍ତଫାର ପ୍ରଭାବ କଂଗ୍ରେସ ଉପରେ ପଡ଼ିବ ନାହିଁ। କଂଗ୍ରେସ ଏଥିପାଇଁ ଆଦୌ ବ୍ୟସ୍ତ ବା ବିବ୍ରତ ହେଉନି। ଯେତେ ଲୋକ କଂଗ୍ରେସ ଛାଡୁଛନ୍ତି, ସେତେ ଲୋକ ଆସୁଛନ୍ତି। ବିଜେଡିରୁ ବହୁ ନେତା କଂଗ୍ରେସକୁ ଆସିବାକୁ ଚାହୁଁଛନ୍ତି। ଭୂପିନ୍ଦର ସିଂହ ଓ ଅନୁପ ସାଏ ବିଜେଡି ଯାଇଥିଲେ। ଏବେ ସେମାନେ କେଉଁଠି?”

ସୂଚନାଯୋଗ୍ୟ, ୨୦୦୯ ଓ ୨୦୧୪ ବିଧାନସଭା ନିର୍ବାଚନରେ ନବ ଦାସ ବିଜେଡି ପ୍ରାର୍ଥୀ ତଥା ପୂର୍ବତନ ବାଚସ୍ପତି କିଶୋର ମହାନ୍ତିଙ୍କୁ ପରାସ୍ତ କରିଥିଲେ।

ନବ କଂଗ୍ରେସ ଛାଡ଼ିବେ ବୋଲି ପ୍ରାୟ ମାସକ ଆଗରୁ ସଂକେତ ଦେଇ ସାରିଥିଲେ। ବିଭିନ୍ନ ସମୟରେ ମୁଖ୍ୟମନ୍ତ୍ରୀଙ୍କୁ ନେଇ ସକାରାତ୍ମକ ମନ୍ତବ୍ୟ ଦେଇଥିଲେ।

ବଲିଉଡ୍‌ରେ ଡେବ୍ୟୁ କରିବେ ‘ଡ୍ୟାନ୍‌ସ୍‌ ପ୍ଲସ୍‌’ର ଜଜ୍‌ ଶକ୍ତି ମୋହନ ।

ଏଥର ସମ୍ଭାଳ ବ୍ୟୁରୋ (ମୁମ୍ୱାଇ) – ବରୁଣ ଧୱନ୍‌ଙ୍କ ଅପ୍‌ କମିଂ ଫିଲ୍ମ ABCD 3 ଏବେ ଚର୍ଚ୍ଚାରେ ରହିଛି। ଲୋକପ୍ରିୟ ଟିଭି ଅଭିନେତ୍ରୀ ଓ ଡ୍ୟାନ୍ସର୍‌ ଶକ୍ତି ମୋହନ ରିମୋ ଡିସୋଜାଙ୍କ ଏହି ଫିଲ୍ମ ଜରିଆରେ ବଲିଉଡ୍‌ ଡେବ୍ୟୁ କରିବେ। ଏକ ଇନଣ୍ଟରଭ୍ୟୁରେ ନିଜେ ଶକ୍ତି ଏହି ସୂଚନା ଦେଇଛନ୍ତି।

ଚୋଲାମଣ୍ଡଲମ୍‍ କମ୍ପାନୀ ସମ୍ମୁଖରେ ୨୦୧୭ର ବକେୟା ଅନ୍‍ଲାଇନ୍‍ କୃଷି ବୀମା ପ୍ରଦାନ ଦାବିରେ ଧାରଣା ଓ ପ୍ରତିବାଦ ସଭା ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ‘ପ୍ରଧାନମନ୍ତ୍ରୀ ଫସଲ ବୀମା’ ଯୋଜନାରେ ଅନ୍‍ଲାଇନ୍‍ରେ ବୀମା କରି ଠକାମୀର ଶିକାର ହୋଇଥିବା ବଲାଙ୍ଗୀର ଜିଲ୍ଲାର ପ୍ରାୟ ୧ ହଜାରରୁ ଊଦ୍ଧ୍ୱର୍ ଚାଷୀ ‘ଚୋଲାମଣ୍ଡଲମ୍‍’ କମ୍ପାନୀର ଭୁବନେଶ୍ୱର ସହିଦନଗର ସ୍ଥିତ ମୁଖ୍ୟ କାର୍ଯ୍ୟାଳୟକୁ ଆସି ଆଜି ଧାରଣା ଦେଇଥିଲେ । ବଲାଙ୍ଗୀର ଜିଲ୍ଲା ବିଜୁ କୃଷକ ଜନତା ଦଳ ସଭାପତି ଅଜୟ ଦାସଙ୍କ ନେତୃତ୍ୱରେ ଅନୁଷ୍ଠିତ  ଏହି ଧାରଣା ଓ ପ୍ରତିବାଦରେ ବିଜୁ କୃଷକ ଜନତା ଦଳ ରାଜ୍ୟ ସାଧାରଣ ସଂପାଦକ କିଶୋର ମେହେର କହିଥିଲେ ଯେ ବଲାଙ୍ଗୀର ଜିଲ୍ଲାର ଚାଷୀ ଭାଇମାନଙ୍କୁ ଠକି ଦିଆଯାଇଛି । ଅଥଚ ସେଥିପ୍ରତି ଆଦୌ ଭ୍ରୁକ୍ଷେପ ନକରି ଖୋଦ୍‍ ପ୍ରଧାନମନ୍ତ୍ରୀ ଆଜି ବଲାଙ୍ଗୀରରେ କୋଟି କୋଟି ଟଙ୍କା ଖର୍ଚ୍ଚ କରି ବ୍ୟୟବହୁଳ ଦଳୀୟ ସଭା କରିବା ଏହି ଜିଲ୍ଲାର ଚାଷୀମାନଙ୍କ ପ୍ରତି କ୍ରୁର ଉପହାସ । ଆଗରୁ ଓଡ଼ିଶାର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଧାନର ସର୍ବନିମ୍ନ ସହାୟକ ମୂଲ୍ୟ ୨୯୩୦ ଟଙ୍କା ଧାର୍ଯ୍ୟ କରିବାକୁ ପତ୍ର ଲେଖିବା ସହ ଦିଲ୍ଲୀରେ ଦଳ ପକ୍ଷରୁ ପ୍ରତିବାଦ କରାଯାଇଥିଲେ ହେଁ ତାହା ପ୍ରଧାନମନ୍ତ୍ରୀ ଶୁଣିନାହାନ୍ତି ବୋଲି ଶ୍ରୀ ମେହେର କହିଥିଲେ ।

କେନ୍ଦ୍ର ସରକାର ମନୋନୀତ ବୀମା କମ୍ପାନୀ ଜରିଆରେ ବଲାଙ୍ଗୀର ଜିଲ୍ଲାର ହଜାର ହଜାର ଚାଷୀ ଏବେ ଲୁଟ୍‍ର ଶିକାର ହୋଇଛନ୍ତି, ଯାହାର ପ୍ରତିବାଦରେ ଚୋଲାମଣ୍ଡଲମ୍‍ କମ୍ପାନୀର ମୁଖ୍ୟ କାର୍ଯ୍ୟାଳୟ ସମ୍ମୁଖରେ ସହସ୍ରାଧିକ ଚାଷୀ ଆଜି ଦିନ ୧୧ଟାରୁ ଅପରାହ୍ଣ ୩ଟା ପର୍ଯ୍ୟନ୍ତ ଧାରଣା ଓ ପ୍ରତିବାଦ ସଭା କରିଥିଲେ । ଚୋଲାମଣ୍ଡଲମ୍‍ ବୀମା କମ୍ପାନୀର ପ୍ରତିନିଧି ଧାରଣାସ୍ଥଳରେ ପହଂଚି କୃଷକମାନଙ୍କ ସହିତ ଆଲୋଚନା କରିଥିଲେ । ପରେ ସେ ମୁଖ୍ୟ ପରିଚାଳକଙ୍କ ସହ କଥାବାର୍ତ୍ତା କରି ଧାରଣାରତ କୃଷକ ଭାଇମାନଙ୍କୁ ଜଣାଇଥିଲେ ଯେ ଆଗାମୀ ୧ ସପ୍ତାହ ମଧ୍ୟରେ ଭୁବନେଶ୍ୱର ଠାରେ ବଲାଙ୍ଗୀର ଜିଲ୍ଲାର କୃଷକ ପ୍ରତିନିଧିମାନଙ୍କୁ ମୁଖ୍ୟ ପରିଚାଳକ ଭେଟି ସମସ୍ୟା ସମାଧାନ କରିବେ । ଏହି ଦୃଢ଼ ପ୍ରତିଶ୍ରୁତି ମିଳିବା ପରେ ଧାରଣା ଓ ପ୍ରତିବାଦ ସଭା କାର୍ଯ୍ୟକ୍ରମକୁ ସ୍ଥଗିତ ରଖାଯାଇଥିଲା ।

ସୂଚନାଯୋଗ୍ୟ ଯେ ମୁରିବାହାଲ, ତୁରେଇକେଲା ଓ ବଙ୍ଗୋମୁଣ୍ଡା ସମେତ କଣ୍ଟାବାଞ୍ଜି ଅଞ୍ଚଳର ହଜାର ହଜାର ଚାଷୀ ପ୍ରଧାନମନ୍ତ୍ରୀଙ୍କ ଆହ୍ୱାନକୁ ଗୁରୁତ୍ୱ ଦେଇ ୨୦୧୭ ମସିହାରେ ନିଜର ଘର, ଆସବାବପତ୍ର ଠାରୁ ଆରମ୍ଭ କରି ସୁନା-ରୁପା ବନ୍ଧକ ରଖି ପ୍ରଧାନମନ୍ତ୍ରୀ କୃଷି ବୀମା ଯୋଜନାରେ ଅନ୍‍ଲାଇନ୍‍ ଦ୍ୱାରା ବୀମା ଟଙ୍କା ଜମା କରିଥିଲେ । ୨ବର୍ଷ ବିତିଯିବା ସତ୍ତେ୍ୱ କୃଷି ବୀମା ନମିଳିବାରୁ ଚାଷୀମାନେ ଭୁବନେଶ୍ୱରସ୍ଥିତ ଚୋଲାମଣ୍ଡଲମ୍‍ କମ୍ପାନୀ ନିକଟରେ ବାରମ୍ବାର ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିନଥିଲା । ଅଥଚ କେନ୍ଦ୍ର ସରକାର ଚାଷୀଙ୍କ ପାଇଁ କୁମ୍ଭୀର କାନ୍ଦଣାରେ ବ୍ୟସ୍ତ ।

ଏହି ଧାରଣା ଓ ପ୍ରତିବାଦ ସଭାରେ ଲକ୍ଷ୍ମଣ ପୁଟେଲ୍‍, ବିଜୟ ବଂଶଲ, ବୁଦ୍ଧଦେବ ମହାକୁଡ, ଶ୍ୟାମସୁନ୍ଦର ମେହେର, ଶ୍ରୀକାନ୍ତ ମହାନନ୍ଦ, ନୃପରାଜ ବଛା, ମୁକୁନ୍ଦ ବରିହା, କୈଳାସ ବରିହା, ଅରୁଣ ଆରିଆ, ଭୁବନାନନ୍ଦ ମହାନ୍ତି, ଚିତ୍ରଭାନୁ ବେହେରା, ରଥୀ ଭୋଇ, ଗୋପାଳ ପୁଞ୍ଜି, ତରଣୀସେନ ବାଗ, ବାଳକୃଷ୍ଣ ପୁଟେଲ୍‍, ଶ୍ରୀରାମ ମେହେର, କାର୍ତ୍ତିକ ପୁଟେଲ୍‍, ଚିତ୍ତ ହଂସ, ଉଗ୍ରେ ଚନ୍ଦନଙ୍କ ସହିତ ୧ ହଜାରରୁ ଊଦ୍ଧ୍ୱର୍ ଠକାମୀର ଶିକାର ହୋଇଥିବା ଚାଷୀ ଅଂଶଗ୍ରହଣ କରିଥିଲେ ।

କେଉଁଝର ରାଜନୀତି ଘଡିକେ ଘୋଡା ଛୁଟୁଛି : କୁଶ ଦଳକୁ ଫେରିଲେ, ସନା ଦଳ ଛାଡିଲେ ।

ଏଥର ସମ୍ଭାଳ ବ୍ୟୁରୋ (କେନ୍ଦୁଝର) – ଆଜି କେନ୍ଦୁଝର ଜିଲ୍ଲା ରାଜନୀତିରେ ହଟଚମଟ ସୃଷ୍ଟି ହୋଇଛି। ବହୁଦିନର ପ୍ରତୀକ୍ଷା ଆଉ କଳ୍ପନା ଜଳ୍ପନାରେ ପୂର୍ଣ୍ଣଛେଦ ପକାଇ ବିଜେଡିରୁ ନିଲମ୍ବିତ ହୋଇଥିବା କୁଶ ଆପଟଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କରିଛନ୍ତି ଦଳର ସୁପ୍ରିମୋ ନବୀନ ପଟ୍ଟନାୟକ | ଅନ୍ୟପକ୍ଷରେ ଅନ୍ୟ ଏକ ବିଶ୍ୱସ୍ତ ଖବର ଅନୁଯାୟୀ କୁଶଙ୍କୁ  ପାରମ୍ପରିକ ପ୍ରତିଦ୍ବନ୍ଦ୍ବୀ ଭାବେ ଜଣାଶୁଣା  ବିତ୍ତଶାଳୀ ତଥା ବାହୁବଳୀ ଚମ୍ପୁଆ ବିଧାୟକ ସନାତନ ମହାକୁଡ ନିଜ ଦ୍ୱାରା ଗଠିତ ଜନ ସମୃଦ୍ଧି ପାର୍ଟିରୁ ଇସ୍ତଫା ଦେଇଛନ୍ତି। ଏହି ଖବର କେତେ ସତ ତାହା ଦଳ ପକ୍ଷରୁ ସ୍ପଷ୍ଟ କରାଯାଇନାହିଁ, ତଥାପି ଦଳର ସଭାପତି ହୋଇ ସନା କାହିଁକି ଦଳରୁ ଇସ୍ତଫା ଦେବାର ପରିସ୍ଥିତି ଆସିଲା ତାହାକୁ ନେଇକି ଏବେ ଚର୍ଚ୍ଚା | ଉଭୟ ଘଟଣା ଗୋଟିଏ ଦିନରେ ଆଉ ମାତ୍ର ଘଂଟାଏ ବା ଦି ଘଣ୍ଟା ବ୍ୟବଧାନରେ ଘଟିବା ଚମ୍ପୁଆ ରାଜନୀତିକୁ ଗରମ କରି ଦେଇଛି |  ସନା ବିଜେଡିରେ ଯୋଗ ଦେବେନି ତ ! କୁଶଙ୍କୁ ବିଜେଡି ଟିକଟ ମିଳିବ ତ ! ନା  କୁଶ ବିଜେଡିରୁ ଆଉ ସନାତନ କଂଗ୍ରେସ ପ୍ରାର୍ଥୀ ଭାବେ ନିର୍ବାଚନ ଲଢ଼ିବେ !!! ହେଉଥିବା ଚର୍ଚା ଅନୁଯାୟୀ ସନା କୁଆଡେ ଘର ଲେଉଟାଣି କରିବେ ! ଗତ କିଛି ମାସ ଧରି ପୁଣି ସକ୍ରିୟ ହୋଇଥିବା ଜିତୁ ପଟ୍ଟନାୟକଙ୍କ ସ୍ଥିତି କଣ ହେବ , ବିଜେଡି ନ କଂଗ୍ରେସ!!! ଏହାକୁ ହେଇ ଚର୍ଚ୍ଚା ଜୋରଦାର |

ସେ ଯାହାବି ହେଇ, କୁଶ ଆପଟଙ୍କ ବିଜେଡିକୁ ପ୍ରତ୍ୟାବର୍ତ୍ତନକୁ ନେଇ ଚମ୍ପୁଆ ନିର୍ବାଚନ ମଣ୍ଡଳୀରେ ତାଙ୍କ ସମର୍ଥକମାନେ ବାଣ ଫୁଟାଇ ସ୍ୱାଗତ କରିଥିବା ଜଣା ପଡ଼ିଛି।

ଚନ୍ଦ୍ରଶେଖର ହେଲେ ଉପସଭାପତି, ବିକ୍ରମ ସାଧାରଣ ସମ୍ପାଦକ ।

ବିମ୍ବାଧର କୁଅଁରଙ୍କୁ ମିଳିଲା ବିଜୁ ଶ୍ରମିକ ସାମ୍ମୁଖ୍ୟ,  ଦେବାଶିଷ ସାମନ୍ତରାୟ ହେଲେ ଜିଲ୍ଲା ବିଜେଡି ସଭାପତି କଟକ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ବିଜୁ ଜନତା ଦଳ ରାଜ୍ୟ ସଭାପତି ମାନ୍ୟବର ନବୀନ ପଟ୍ଟନାୟକ ଆଜି ଦଳୀୟ ପଦାଧିକାରୀ ସ୍ତରରେ ଏକ ଅବଦଳବଦଳ କରିଛନ୍ତି । ଏହିକ୍ରମରେ ଦଳର ଉପ-ସଭାପତି ଶ୍ରୀ ବିମ୍ବାଧର କୁଅଁରଙ୍କୁ ବିଜୁ ଶ୍ରମିକ ସାମ୍ମୁଖ୍ୟର ଇନ୍‍ଚାର୍ଜ ଭାବେ ନିଯୁକ୍ତି ଦିଆଯାଇଛି । ସେହିପରି ଶ୍ରୀ ଦେବାଶିଷ ସାମନ୍ତରାୟଙ୍କୁ କଟକ ଜିଲ୍ଲା ସଭାପତି ଭାବେ ନିଯୁକ୍ତି ମିଳିଛି । ଏଥିସହ ଶ୍ରୀ ସାମନ୍ତରାୟଙ୍କୁ ଦଳର ସାଧାରଣ ସଂପାଦକ ପଦରୁ ଅବ୍ୟାହତି ଦିଆଯାଇଛି । ଶ୍ରୀ ଚନ୍ଦ୍ରଶେଖର ସାହୁଙ୍କୁ ଦଳର ଉପ-ସଭାପତି ଭାବେ ନିଯୁକ୍ତି ଦିଆଯାଇଥିବା ବେଳେ ଶ୍ରୀ ବିକ୍ରମ ପଣ୍ଡାଙ୍କୁ ସାଧାରଣ ସଂପାଦକ ଓ ଡ. ସସ୍ମିତ ପାତ୍ରଙ୍କୁ ସଂପାଦକ (ସଂଖ୍ୟାଲଘୁ ବ୍ୟାପାର) ଭାବେ ନିଯୁକ୍ତି ମିଳିଛି । ସେହିପରି ଶ୍ରୀ ଅଶୋକ ବଳ, ଶ୍ରୀ ସଂଗ୍ରାମ କେଶରୀ ପାଇକରାୟ, ଶ୍ରୀ ପ୍ରମୋଦ କୁମାର ସାହୁ, ଶ୍ରୀ ଆଶିଷ ଚକ୍ରବର୍ତ୍ତୀ, ଶ୍ରୀ ରବି ସାମଲ, ଶ୍ରୀ ତପନ ଦାସ ଓ ଶ୍ରୀ ଟି. ପ୍ରସାଦ ରାଓ ଦୋରାଙ୍କୁ ସଂପାଦକ ଭାବେ ନିଯୁକ୍ତି ଦିଆଯାଇଛି । ସେହିପରି ଦଳର ସମ୍ବଲପୁର ଜିଲ୍ଲା ସଭାପତି ଶ୍ରୀ ପ୍ରମୋଦ କୁମାର ରଥଙ୍କୁ ତାଙ୍କ ପଦବୀରୁ ଅବ୍ୟାହତି ଦିଆଯାଇଛି ।

ସେହିପରି ଶ୍ରୀ ବିମ୍ବାଧର ବିଶ୍ୱାଳଙ୍କୁ ଦଳର କେନ୍ଦୁଝର ଜିଲ୍ଲା ସଭାପତି ଭାବେ ନିଯୁକ୍ତି ଦିଆଯାଇଥିବା ବେଳେ ଶ୍ରୀମତୀ ରୀନା ବାରିକଙ୍କୁ କେନ୍ଦୁଝର ଜିଲ୍ଲା କାର୍ଯ୍ୟକାରୀ ସଭାପତି ଭାବେ ନିଯୁକ୍ତି ମିଳିଛି । ଏଥିସହ ମହମ୍ମଦ ସକିଲ୍‍ଙ୍କୁ ସାଲେପୁର ଏବଂ ମାହାଙ୍ଗା ବିଧାନସଭା ନିର୍ବାଚନ ମଣ୍ଡଳୀର ସହ ପର୍ଯ୍ୟବେକ୍ଷକ ଭାବେ ନିଯୁକ୍ତି ଦିଆଯାଇଥିବା ବେଳେ ଶ୍ରୀ ମନୋହର ରନ୍ଧାରୀଙ୍କୁ ଡାବୁଗାଁ ବିଧାନସଭା ନିର୍ବାଚନ ମଣ୍ଡଳୀର ସହ ପର୍ଯ୍ୟବେକ୍ଷକ, ଶ୍ରୀ ପ୍ରୀତମ ମେହେରଙ୍କୁ ବଲାଙ୍ଗୀର ବିଧାନସଭା ନିର୍ବାଚନ ମଣ୍ଡଳୀର ସହ ପର୍ଯ୍ୟବେକ୍ଷକ, ଶ୍ରୀ ଶିବ ପଟ୍ଟନାୟକଙ୍କୁ ଲକ୍ଷ୍ମୀପୁର ବିଧାନସଭା ନିର୍ବାଚନ ମଣ୍ଡଳୀର ସହ ପର୍ଯ୍ୟବେକ୍ଷକ ଏବଂ ଶ୍ରୀ ନାରାୟଣ ପାତ୍ରଙ୍କୁ କୋଟ୍‍ପାଡ଼ ବିଧାନସଭା ନିର୍ବାଚନ ମଣ୍ଡଳୀର ସହ ପର୍ଯ୍ୟବେକ୍ଷକ ଭାବେ ନିଯୁକ୍ତି ଦିଆଯାଇଛି ।

ସେହିପରି ବିଜୁ ଜନତା ଦଳ ସଭାପତି  ନବୀନ ପଟ୍ଟନାୟକ କେନ୍ଦୁଝର ଜିଲ୍ଲା ଚମ୍ପୁଆ ବିଧାନସଭା ନିର୍ବାଚନ ମଣ୍ଡଳୀର ଶ୍ରୀ କୁଶ ଆପଟ୍ଟ ଏବଂ ଗଞ୍ଜାମ ଜିଲ୍ଲା ବେଲଗୁଣ୍ଠା ବ୍ଲକର ଶ୍ରୀ ରଞ୍ଜନ କୁମାର ଖଣ୍ଡୁଆଳ ଏବଂ ଶ୍ରୀମତୀ ରମା ଖଣ୍ଡୁଆଳଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କରିନେଇଥିବା ବିଜୁ ଜନତା ଦଳର ଗଣମାଧ୍ୟମ ସଂଯୋଜକ ଶ୍ରୀ ମାନସ ରଞ୍ଜନ ମଙ୍ଗରାଜ ଏକ ପ୍ରେସ୍‍ ଇସ୍ତାହାରରେ ଜଣାଇଛନ୍ତି |

ମୁଖ୍ୟମନ୍ତ୍ରୀ ରାଜନୀତି କରିବାକୁ ଚାହିଁଲେ, ପଶ୍ଚିମ ଓଡିଶାର ବିକାଶ ଚାହିଁଲେ ନାହିଁ :ଧର୍ମେନ୍ଦ୍ର ପ୍ରଧାନ

ଏଥର ସମ୍ଭାଳ ବ୍ୟୁରୋ (ବଲାଙ୍ଗୀର) – ଓଡିଶାର ବିକାଶ ପାଇଁ କେନ୍ଦ୍ର ସରକାର ସଂକଳ୍ପବଦ୍ଧ । କିନ୍ତୁ ବିକାଶରେ ଓଡିଶାସରକାର ବାଧକ ସାଜିଛନ୍ତି । ଯାହାଦ୍ୱାରା ଓଡିଶାର ବିକାଶ କାମ ହୋଇପାରୁନାହିଁ । ପ୍ରଧାନମନ୍ତ୍ରୀ ପଶ୍ଚିମ ଓଡିଶାକୁଆସିଥିବା ବେଳେ ଏହ ଅବସରରେ ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ ସତ୍ୱେ ସେ ଆସିଲେ ନାହିଁ । ଗତ ଥର ବାରିପଦାକୁ ମଧ୍ୟ ଆସିନଥିଲେ । ଦୁଃଖର ବିଷୟ ମୁଖ୍ୟମନ୍ତ୍ରୀ ରାଜନୀତି କରିବାକୁ ଚାହିଁଲେ, ପଶ୍ଚିମ ଓଡିଶାର ଉନ୍ନତି ଚାହିଁଲେ ନାହିଁ ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି । ଦେଶର ପ୍ରଧାନମନ୍ତ୍ରୀ ଆସିଥିବା ବେଳେ ମୁଖ୍ୟମନ୍ତ୍ରୀ ଆଜି ଭୁବନେଶ୍ୱରରେ କୃଷକମାନଙ୍କ ନାଁରେ କୁମ୍ଭୀର କାନ୍ଦଣା କାନ୍ଦିବା ପାଇଁ ବ୍ୟବସ୍ଥା କଲେ ।

ବଲାଙ୍ଗୀରରେ ପ୍ରଧାନମନ୍ତ୍ରୀଙ୍କର ଗସ୍ତ ଅବସରରେ ଆୟୋଜିତ ଏକ ବିଶାଳ ଜନସଭାରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ଚେଇଁ ଶୋଇଥିବ ଯିଏ ତାକୁ ଉଠାଇବ କିଏ । ବିକାଶ ପାଇଁ ସମସ୍ତଙ୍କର ସହଯୋଗ ଦରକାର । ତେବେ ରାଜ୍ୟର ବିକାଶ କଥାକୁ ଆଖି ବୁଜି ଦେଇ ମୁଖ୍ୟମନ୍ତ୍ରୀ ରାଜନୀତି କରୁଛନ୍ତି । ବଲାଙ୍ଗୀରର ମାଟି ଐତିହ୍ୟସମ୍ପନ୍ନ, ସଂସ୍କୃତିଭରା ଓ ପରମ୍ପରାର ମାଟି । ଏ ମାଟି କେବଳ ଇତିହାସକୁ ମନେପକାଏ ନାହିଁ, ସମୟର ଆବଶ୍ୟକତାକୁ ପୂରଣା କରିବା ପାଇଁ ଆହ୍ୱାନକୁ ବି ସ୍ୱୀକାର କରୋ କିଛି ମାସ ପୂର୍ବେ ଛତିଶଗଡର ବିଧାନସଭା ନିର୍ବାଚନ ଅବସରରେ ଏ ମାଟିର ବରପୂତ୍ର ଦୂରଦର୍ଶନ କ୍ୟାମେରା ମ୍ୟାନ ସ୍ୱର୍ଗତ ଅଚ୍ୟୁତାନନ୍ଦ ସାହୁ ଆତାତୀୟୀଙ୍କ ଗୁଳିରେ ପ୍ରାଣ ହରାଇ ଦେଶ ପାଇଁ ଶହୀଦ ହୋଇଥିଲେ । ଏମାଟି ତାଙ୍କର ବଳିଦାନକୁ ଅନ୍ୟଥା ହେବାକୁ ଦେବ ନାହିଁ । ଯେଉଁମାନେ ବନ୍ଧୁକ ମୁନରେ ଦେଶର ପ୍ରଜାତନ୍ତ୍ରକୁ ଦୂରେଇବା ପାଇଁ ଚାହଁଛନ୍ତି ତାଙ୍କୁ ଏହି ବଳିଦାନ ଉଚିତ ଜବାବ ଦେବ । ପ୍ରଧାନମନ୍ତ୍ରୀ ପର୍ବଦୋୟର ବାର୍ତାକୁ ନେଇ ଆସୁଛନ୍ତି । ଭାରତ ଦେଶ ଏକ ଅଗ୍ରଣୀ ଦେଶ । ଭାରତ ବଷର୍ର ସବୁ ଅଂଚଳ ସମତୁଲ ବିକଶିତ ହେଲେ, ଭାରତର ବିକାଶ ହେବ । ପୂର୍ବ ଭାରତ ବିକଶିତ ହେଲେ ଦେଶର ବିକାଶ ହୋଇପାରିବ । ସ୍ୱାଧୀନତାର ୭୦ ବର୍ଷ ପରେ ପୂର୍ବ ଭାରତର ବିକାଶ ହୋଇପାରିନଥିବାରୁ ଏହା ଅନେକ ସମସ୍ୟାରେ ଜର୍ଜରିତ ଅବସ୍ଥାରେ ଅଛି । ସେଥିପାଇଁ ପ୍ରଧାନମନ୍ତ୍ରୀ ବିଗତ ୩୦ ଦିନରୁ କମ ମଧ୍ୟରେ ପବିତ୍ର ପୂଷପୁନୀ ଅବସରରେ ପୂର୍ବ ଭାରତର ସଙ୍କଳ୍ପକୁ ନେଇ ଉପହାର ଦେବାକୁ ଆସିଛନ୍ତି ।

ବଲାଙ୍ଗୀର, ବରଗଡରେ ଶିଳ୍ପ ହେଉ । ବଲାଙ୍ଗୀରରେ ହଜାର କୋଟି ଟଙ୍କା ବ୍ୟୟ କରି ନଡା ରୁ ପେଟ୍ରୋଲ ବାହାର କରିବାର ବିକଳ୍ପ ପ୍ରକଳ୍ପ ମୋଦି ସରକାର କରିଛନ୍ତି । ଯୁବକଙ୍କୁ ରୋଜଗାର ଦେବା ଓ ଚାଷୀର ଅର୍ଥନୀତିକୁ ସୁଦୃଢ କରିବା ପାଇଁ ଏ ପ୍ରକଳ୍ପ ଆରମ୍ଭ ହୋଇଛି । ବାଲାଙ୍ଗୀରରେ ୧୦୦ କୋଟି ଟଙ୍କାର ବଟଲିଂ ପ୍ଲାଂଟ ଆରମ୍ଭ ହୋଇଛି । ବରଗଡରୁ ରାୟପୁର ପର୍ଯ୍ୟନ୍ତ ଦୂରତାକୁ ଛୋଟ କରିବା ପାଇଁ, ବରଗଡରୁ ବିଜେପୁର, ପଦ୍ମପୁର -ନୂଆପଡା ପର୍ଯ୍ୟନ୍ତ ରେଳ ଲାଇନର ସର୍ଭେ କାମ ହୋଇଛି । ଖୁବ ଶୀଘ୍ର ଏ ଅଂଚଳରେ କାମ ଆରମ୍ଭ ହେବ । ଏହା ମୋଦୀ ସରକାରଙ୍କ ପୁଷପୁନୀର ଉପହାର ।

ବଲାଙ୍ଗୀର ଜିଲ୍ଲାରେ ୧୯ ବର୍ଷର ଶାସନରେ ଚାଷ ଜମିରେ ଜଳସେଚନ ନାହିଁ । ତଥ୍ୟନୁଯାଇ ଗତ ୨୦ ବର୍ଷ ଭିତରେ ୫ରୁ ୧୦ ପ୍ରତିଶତ ଅଂଚଳ ଜଳସେଚନ ହୋଇଛି । ଲୋଏର ସୁକତେଲ ପ୍ରକଳ୍ପ ର କାମ ୧୫ ବର୍ଷ ହେଲା ଚାଲିଛି କିନ୍ତୁ ସମ୍ପୂର୍ଣ୍ଣ ହୋଇପାରୁନି । ୩୦ ବର୍ଷ ଏ ଅଂଚଳକୁ ଅଣଦେଖା ରଖାଯାଇଛି । ବଲାଙ୍ଗୀର ଜିଲ୍ଲାର ପ୍ରକଳ୍ପ ପାଇଁ କ୍ରିୟାନ୍ୱୟନ କରିବା ପାଇଁ ୩୦ ବର୍ଷ ଲାଗୁଛି । ମାଲକାନାଗିରି ରୁ ସୁନ୍ଦରଗଡ ପର୍ଯ୍ୟନ୍ତ ଓଡିଶାରେ ୧୫ଟି ଜିଲ୍ଲାରେ ବର୍ତମାନ ୨୫୦୦ କିମିର ଜାତୀୟ ରାଜପଥ ରହିଛି । ମୋଦି ସରକାର ଏଥିରେ ଆଉ ୧୭୬୭ କିଲୋମିଟର ରାସ୍ତା ଯୋଡିବା ପାଇଁ ସମସ୍ତ ପ୍ରକାର ବ୍ୟବସ୍ଥା କରିଛନ୍ତି । ମାତ୍ର ରାଜ୍ୟ ସରକାର ବିଭିନ୍ନ ଅନୁମତି ନଦେଇ ବିକାଶର ଏତେବଡ କାମକୁ ଜାଣିଶୁଣି ଅଟକାଇ ରଖିବା ଦୁର୍ଭାଗ୍ୟଜନକ ବୋଲି ଶ୍ରୀ ପ୍ରଧାନ କହିଛନ୍ତି । ଖୋର୍ଦ୍ଧା – ବଲାଙ୍ଗୀର ରେଳ ଲାଇନ୍ ପାଇଁ ରାଜ୍ୟ ସରକାର ଜମି ଦେଇନାହାନ୍ତି । ହକି ବିଶ୍ୱକପରେ ସଲମାନ ଓ ଶାହରୁଖ ଖାଁକୁ ନଚାଇବା ପାଇଁ ପଇସା ଅଛି କିନ୍ତୁ ଶିକ୍ଷକଙ୍କ ପାଇଁ ପଇସା ନାହିଁ । ପ୍ରଧାନମନ୍ତ୍ରୀଙ୍କ ସ୍ୱପ୍ନ ନୂଆ ଭାରତ ତିଆରି ହେବ । ନୂଆ ଓଡିଶା ହେଲେ ନୂଆ ଭାରତ ହେବ । ଓଡିଶାର ବିକାଶରେ ରାଜ୍ୟ ସରକାର ବାଧକ ସାଜିଛନ୍ତି ବୋଲି ଶ୍ରୀ ପ୍ରଧାନ କହିଛନ୍ତି ।