ବିବାହ ପ୍ରଲୋଭନ ଦେଇ ନାବାଳିକାକୁ ଦୁଷ୍କର୍ମ

ଝାରସୁଗୁଡ଼ା: ମିଥ୍ୟା ବିବାହ ପ୍ରଲୋଭନ ଦେଖାଇ ଶାରୀରିକ ସଂପର୍କ ରଖୁଥିବା ଜଣେ ନାବାଳକ ବିରୋଧରେ ଅଭିଯୋଗ ଆଣିଛନ୍ତିି ଜଣେ ନାବାଳିକା। ଏନେଇ ଝାରସୁଗୁଡ଼ା ଥାନାରେ ଏକ ମାମଲା ରୁଜୁ ହୋଇଛି। ସମ୍ବଲପୁର ଜିଲ୍ଲା ଠେଲକୁଲି ଥାନା ଅନ୍ତର୍ଗତ ଏହି ନାବାଳିକାର ବୟସ ୧୫ ହୋଇଥିବା ବେଳେ ଅଭିଯୁକ୍ତର ବୟସ ୧୭ ବୋଲି ଜଣାପଡ଼ିଛି। ନାବଳିକାର ମାଁ ନଥିବା ବେଳେ ବାପା ଅଛନ୍ତି। ତେବେ ସେ ଝାରସୁଗୁଡ଼ା ଠାରେ ଜଣେ ସଂପର୍କୀୟଙ୍କ ଘରେ ଗତ ଏକ ମାସ ହେଲା ରହୁଛନ୍ତି। ଏହି ସମୟ ମଧ୍ୟରେ ନାବାଳିକା ସହିତ ନିକଟରେ ରହୁଥିବା ସଂପୃକ୍ତ ନାବାଳକର ସଂପର୍କ ଗଢ଼ି ଉଠିଥିଲା ଓ ଉଭୟଙ୍କ ମଧ୍ୟରେ ଶାରୀରିକ ସଂପର୍କ ହୋଇଥିଲା। ନାବାଳକ କୁଆଡ଼େ ଉକ୍ତ ନାବାଳିକାକୁ ବିବାହ କରିବାର ପ୍ରତିଶ୍ରୁତି ଦେଇଥିଲା। ପରେ ମନା କରିବାରୁ ନାବାଳିକା ଥାନାରେ ଲିଖିତ ଅଭିଯୋଗ କରିଥିଲା। ପୁଲିସ ମାମଲା ରୁଜୁ କରି ନାବାଳକ ନାମରେ ପୋକସୋ ଧାରା ୪ ଓ ଆଇପିସି ୩୬୯ ଦାୟାର କରି ତଦନ୍ତ ଆରମ୍ଭ କରିଛି। ନାବାଳିକାର ଡାକ୍ତରୀ ମାଇନା ପରେ ତାକୁ ଚାଇଲ୍‌ଡ଼ ଲାଇନ ସହାୟତାରେ ସିଡବ୍ଲୁସିରେ ଉପସ୍ଥାପନ କରାଯାଇଥିଲା । ପରେ ଓପନ୍‌ ସେଲ୍‌ଟରକୁ ପଠାଯାଇଛି।

ଟ୍ରାକ୍ଟରରୁ ଖସି ଯୁବତୀଙ୍କ ମୃତ୍ୟୁ

ଥୁଆମୂଳ ରାମପୁର: ଥୁଆମୂଳ ରାମପୁର ଥାନା ଦଲଗୁଡ଼ା ଠାରେ ଚଳନ୍ତା ଟ୍ରାକ୍ଟରରୁ ଖସି ପଡ଼ିବାରୁ ଜୀବାନ ମାଝୀ(୧୮)ଙ୍କ ମୃତ୍ୟୁ ଘଟିଛି। ରାୟଗଡ଼ା ଜିଲ୍ଲା କାଶୀପୁର ବ୍ଲକ ରାମଗିରିରୁ ଟ୍ରାକ୍ଟର (ଓଆର ୧୮- ୪୬୧୮)ରେ ୬ଜଣ ମହିଳା ବାଲି ନେବା ପାଇଁ ଥୁଆମୂଳ ରାମପୁର ଅଞ୍ଚଳର କୁକୁଡ଼ାଗୁଡ଼ାକୁ ଆସୁଥିଲେ। ଏହି ସମୟରେ ଦଲଗୁଡ଼ା ନିକଟରେ ଟ୍ରାକ୍ଟରରେ ବସିଥିବା ଜୀବାନ ଭାରସାମ୍ୟ ହରାଇ ପଡି ଯାଇଥିଲେ। ଟ୍ରାକ୍ଟର ଟ୍ରଲିର ଚକ ତାଙ୍କ ଉପରେ ମାଡ଼ି ଯିବାରୁ ଘଟଣାସ୍ଥଳରେ ହିଁ ତାଙ୍କ ମୃତ୍ୟୁ ହୋଇଥିଲା। ଡ୍ରାଇଭର ଭରତ ମାଝୀ ଘଟଣାସ୍ଥଳରୁ ଫେରାର ଥିବା ଜଣାପଡ଼ିଛି।

ଏବେଠୁ ଦେଖା ଦେଲାଣି ଜଳ ସଂକଟ

ବୌଦ୍ଧ: ବୌଦ୍ଧ ସହର ମହାନଦୀ କୂଳରେ ଅବସ୍ଥିତ ହୋଇଥିଲେ ଏଠାରେ ଜଳ କଷ୍ଟ ଉତ୍କଟ ରୂପ ଧାରଣ କରୁଛି। ମହାନଦୀ ଏଠି ପ୍ରଶସ୍ତ ହୋଇଥିଲେ ମଧ୍ୟ ଏବେ ନଦୀର କଳେବର କେବଳ ବାଲିରେ ଭର୍ତ୍ତି ହୋଇ ଗଲାଣି। ଏକ କ୍ଷୀଣ ସ୍ରୋତରେ ମହାନଦୀ ପ୍ରବାହିତ ହେଉଥିବା ବେଳେ ଖରା ଦିନରେ ଏହାର କାୟା ଆହୁରି କ୍ଷୀଣ ହେବାର ଆଶଙ୍କା ଦେଖାଦେଲାଣି। ଜିଲ୍ଲା ସଦର ମହକୁମାର ବୁଟୁପାଲି, ରାଜନପାଲି ଅଞ୍ଚଳରେ ଖରାଦିନରେ ଜଳ ସଂକଟ ତୀବ୍ର ରୂପ ଧାରଣ କରିଥାଏ। ସହରକୁ ମହାନଦୀରୁ ଜଳ ଯୋଗାଣ ପାଇଁ ଯୋଜନା ରହିଥିଲେ ହେଁ କାର୍ଯ୍ୟକାରୀ ହୋଇନାହିଁ। ମହାନଦୀ ତଳ ମୁଣ୍ଡରେ ଆନିକଟ କରାଯାଇ ପାରିଲେ ବୌଦ୍ଧ ସହରର ଅଧିବାସୀଙ୍କ ପାନୀୟ ସମସ୍ୟା କିଛି ମାତ୍ରାରେ ଦୂର ହେବା ସହ ନଦୀରେ ଜଳ ପ୍ରବାହ ମଧ୍ୟ ଲାଗି ରହନ୍ତା ମାତ୍ର ତାହା ଏଯାଏଁ କାର୍ଯ୍ୟକାରୀ ହୋଇ ପାରି ନାହିଁ। ବୌଦ୍ଧ ବ୍ଲକ ଆମ୍ବଝରି ପଞ୍ଚାୟତରେ ପାନୀୟ ଜଳ ସମସ୍ୟା ସବୁଠୁ ଉତ୍କଟ। ଏଠାରେ ଏବେବି ଲୋକେ କାଦୁଅ ମିଶା ପାଣି ନାଳରୁ ସଂଗ୍ରହ କରୁଛନ୍ତି।

ଶିକ୍ଷା ସହାୟକ ସଂଘର ଆନ୍ଦୋଳନ ପ୍ରତ୍ୟାହୃତ

ଭୁବନେଶ୍ୱର: ଶିକ୍ଷା ସହାୟକମାନେ ଚଳାଇଥିବା କାର୍ଯ୍ୟବନ୍ଦ ଆନ୍ଦୋଳନ ଆଜି ପ୍ରତାହାର କରି ନେଇଛନ୍ତି। ଶିକ୍ଷାସହାୟକ ସଂଘର ୭ଟି ଦାବି ମଧ୍ୟରୁ ରାଜ୍ୟ ସରକାର ୪ଟି ଦାବି ମାନି ନେଇ ଥିବାରୁ ଶିକ୍ଷାସହାୟକ ସଂଘ ସେମାନଙ୍କ ଆନ୍ଦୋଳନ ପ୍ରତ୍ୟାହାର କରି ନେଇଛନ୍ତି। ଆସନ୍ତାକାଲି ଠାରୁ ୭୦ ହଜାର ଶିକ୍ଷା ସହାୟକ କାର୍ଯ୍ୟରେ ଯୋଗ ଦେବେ।

ନବନିର୍ମାଣ କୃଷକ ସଂଗଠନର ଧାରଣା ତୃତୀୟ ଦିନରେ : ୧୬ରୁ ରାଜ୍ୟବ୍ୟାପୀ ଆନ୍ଦୋଳନ

ଭୁବନେଶ୍ୱର : ଚାଷୀଙ୍କୁ ସମ୍ମାନ, ଚାଷୀ ଉତ୍ପାଦିତ ଦ୍ରବ୍ୟର ଉଚିତ ମୂଲ୍ୟ ଓ ପେନସନ୍‌ ଦାବି ନେଇ ନବନିର୍ମାଣ କୃଷକ ସଂଗଠନ ପକ୍ଷରୁ ଚାଲିଥିବା ଅନଶନ ଓ ସତ୍ୟାଗ୍ରହ ଆଜି ତୃତୀୟ ଦିନରେ ପହଞ୍ଚିଛି। ତୃତୀୟ ଦିନରେ ମଧ୍ୟ ଦୁଇ ଶହରୁ ଅଧିକ ଚାଷୀ ଅନଶନରେ ସାମିଲ ହୋଇଥିଲେ। ଏହାକୁ ସମର୍ଥନ ଜଣାଇ ଆଜି ମଧ୍ୟ କଂଗ୍ରେସ ନେତୃବୃନ୍ଦ ଧାରଣାସ୍ଥଳରେ ପହଞ୍ଚିଥିଲେ।

ଅପରପକ୍ଷରେ ଭାପୁର ଅଞ୍ଚଳର ରମେଶ ଚନ୍ଦ୍ର ବାରିକ ଅସୁସ୍ଥ ହେବା କାରଣରୁ ତାଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତି କରାଯାଇଛି। ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଥିବା ସଂଗଠନ ପକ୍ଷରୁ ସୂଚନା ଦିଆଯାଇଛି। ତେବେ ଆସନ୍ତା ୧୬ତାରିଖରୁ ସମସ୍ତ ଜିଲ୍ଲାର ସଦର ମହକୁମାରେ ଆନ୍ଦୋଳନ କରିବାକୁ ସଂଗଠନ ନିଷ୍ପତ୍ତି ନେଇଛି।

ସଂଗଠନର ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାରଙ୍କ ନେତୃତ୍ୱରେ ଆଜି ମଧ୍ୟ ଧାରଣାସ୍ଥଳରେ ଆନ୍ଦୋଳନ ଜାରି ରହିଛି। ଗତକାଲି ଭଳି ଆଜି ୨ଶହରୁ ଅଧିକ ଚାଷୀ ଅନଶନରେ ସାମିଲ ହୋଇଥିଲେ। ଏହି ଅବସରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସଂଗଠନର ଦାବି ଉପସ୍ଥାପନ କରି ଅକ୍ଷୟ କୁମାର କହିଲେ ଯେ ଦେଶ ତଥା ରାଜ୍ୟରେ ଚାଷୀମାନେ ଆଜି ଅବହେଳିତ। ରାଜ୍ୟରେ ଚାଷୀମାନେ ଆତ୍ମହତ୍ୟା କରୁଥିଲେ ହେଁ ରାଜ୍ୟ ସରକାର ଏହାକୁ ସ୍ୱୀକାର କରୁ ନାହାନ୍ତି। ଚାଷୀ ଆତ୍ମହତ୍ୟାର ସମାଧାନ କରିବା ପାଇଁ ପ୍ରତ୍ୟେକ ୨୦ବର୍ଷ ବୟସରୁ ଅଧିକ ଚାଷୀଙ୍କୁ ମାସିକ ୫ହଜାର ଟଙ୍କା ସୁରକ୍ଷା ଭତ୍ତା ପ୍ରଦାନ କରାଯାଉ। ୩୬ଲକ୍ଷ ଚାଷୀ ପରିବାରଙ୍କ ପାଇଁ ବଜେଟ୍‌ରେ ସରକାର ୨୧ହଜାର ୬ଶହ କୋଟି ଟଙ୍କା ବ୍ୟୟ ବରାଦ କରନ୍ତୁ। ଯଦି ରାଜ୍ୟ ସରକାର ଚାଷୀଙ୍କ ସମସ୍ୟାର ସମାଧାନ ନ କରନ୍ତି ତେବେ ଆଗାମୀ ଦିନରେ ଆନ୍ଦୋଳନକୁ ଜୋରଦାର କରାଯିବ ବୋଲି ସେ ଚେତାବନୀ ଦେଇଥିଲେ।

ଆଜି ବିଧାନସଭାରେ ବିରୋଧୀ ଦଳ ନେତା ନରସିଂହ ମିଶ୍ର, କଂଗ୍ରେସ ବିଧାୟକ ଦେବେନ୍ଦ୍ର ଶର୍ମା, ଚିରଞ୍ଜୀବୀ ବିଶ୍ୱାଳ, ପ୍ରକାଶ ବେହେରା, ଯୋଗେନ୍ଦ୍ର ସିଂ, ତାରା ପ୍ରସାଦ ବାହିନୀପତି ଓ ସମାଜବାଦୀ ପାର୍ଟିର ରାଜ୍ୟ ସଭାପତି ରବି ବେହେରା ପ୍ରମୁଖ ଅନଶନସ୍ଥଳରେ ପହଞ୍ଚି ଆନ୍ଦୋଳନକୁ ସମର୍ଥନ ଜଣାଇଥିଲେ। ସଂଗଠନ ପକ୍ଷରୁ ରାଜ୍ୟ ସଂଯୋଜକ ଶେଷଦେବ ନନ୍ଦ, ସହ ସଂଯୋଜକ ଉମାକାନ୍ତ ଭାରତ, ନିମାଇଁ ରାୟ, ରଶ୍ମିରଂଜନ ସ୍ୱାଇଁ, ଦୁର୍ଗା ଚରଣ ସ୍ୱାଇଁ, ଦୁର୍ଗା ପ୍ରସାଦ ଦାସ, ରବୀନ୍ଦ୍ର ସାହୁ, ସୁରେନ୍ଦ୍ର ନାଥ ମହାରଣା, ମମତା ନାଥ, ମଧୁମିତା ସମାଲ, ମନଓ୍ଵର ଅଲ୍ଲୀ ପ୍ରମୁଖ ନେତୃତ୍ୱ ନେଇଥିଲେ।

ଟଙ୍କା ଅଜାଡ଼ି ଦେଲେ

ସହରାଞ୍ଚଳ ପାଇଁ ମାଳ ମାଳ ପ୍ରକଳ୍ପ
ଗାଁ ପାଣି ପାଇଁ ୧୦୦୦ କୋଟି

ଭୁବନେଶ୍ୱର : ପାଣି ସମସ୍ୟା ଦୂର କରିବା ସହିତ ସ୍ୱାସ୍ଥ୍ୟ ସେବାର ଉନ୍ନତି ପାଇଁ ରାଜ୍ୟ ସରକାର ଆଜି ଶହ ଶହ କୋଟି ଟଙ୍କାର ଯୋଜନା କରିଛନ୍ତି। ଗାଁରେ ପାଣି ପାଇଁ ୧୦୦୦ କୋଟି ବିନିଯୋଗ ହେବ। ସହରାଞ୍ଚଳ ବି ଅନୁରୂପ ଯୋଜନା ହୋଇଛି। ସେହିଭଳି ନିଦାନ ଓ ଡାଇଲେସିସ୍‌ ପାଇଁ ୫୯୬ କୋଟି ଖର୍ଚ୍ଚ ଅଟକଳ ହୋଇଥିବା ବେଳେ ଜନସ୍ୱାସ୍ଥ୍ୟ କ୍ଷେତ୍ରରେ ଆନୁଷଙ୍ଗିକ ସେବାର ସୁଦୃଢୀକରଣ ପାଇଁ ୫୫୦ କୋଟି ଟଙ୍କାର ଯୋଜନା ହୋଇଛି। ଆଜି କ୍ୟାବିନେଟ୍‌ ଏସବୁକୁ ଅନୁମୋଦନ ପ୍ରଦାନ କରିଛି।

ସରକାରଙ୍କ ପକ୍ଷରୁ କୁହାଯାଇଛି, ୨୦୧୮-୧୯ ସୁଦ୍ଧା ସହରାଞ୍ଚଳରେ ସାର୍ବଜନୀନ ଜଳଯୋଗାଣ ପାଇଁ ୧୮୦୩ କୋଟି ୮୯ଲକ୍ଷ ଟଙ୍କାର ଏକ ଯୋଜନା ହୋଇଛି। ଏଥିରେ ୫୪୫ଟି ନୂତନ ପ୍ରକଳ୍ପ ହାତକୁ ନିଆଯିବ, ଯେଉଁଥିପାଇଁ ୫୮୮ କୋଟି ୪ଲକ୍ଷ ଲକ୍ଷ୍ୟ ବ୍ୟୟ ହେବ। ୨୦୬ଟି ଚାଲୁ ରହିଥିବା ପ୍ରକଳ୍ପ ଲାଗି ୩୦୩ କୋଟି ଟଙ୍କା ବ୍ୟୟ ଅଟକଳ କରାଯାଇଛି। ପୁରୁଣା ୟୁଆଇଡିଏସ୍‌ଏସ୍‌ଏମ୍‌ଟି ଯୋଜନା ମାଧ୍ୟମରେ ଥିବା ଅସମ୍ପୂର୍ଣ୍ଣ ପ୍ରକଳ୍ପଗୁଡିକୁ ୧୬୦ କୋଟି ଟଙ୍କା ବ୍ୟୟରେ ସମ୍ପୂର୍ଣ୍ଣ କରାଯିବ। ପାନୀୟ ଜଳର ଗୁଣାତ୍ମକମାନର ପରିକଳ୍ପନା, ପରୀକ୍ଷଣ ସୁବିଧା, ସ୍ୱୟଂଚାଳନା ପଦ୍ଧତି, ବିଦ୍ୟାଳୟ, ଅଙ୍ଗନବାଡି କେନ୍ଦ୍ରକୁ ଆବଶ୍ୟକ ପାନୀୟ ଜଳଯୋଗାଣ କ୍ଷେତ୍ରରେ ୫୦ କୋଟି ୭୯ ଲକ୍ଷ ଟଙ୍କାର ବ୍ୟୟ କରାଯିବ।

ସେହିଭଳି ଓୟୁଆଇଡିଏଫ୍‌ ଓ ରାଜ୍ୟ ଯୋଜନା ସହାୟତାରେ ବିଶାଳ ବ୍ରହ୍ମପୁର ସହରାଞ୍ଚଳ ପାଇଁ ଚାଲୁ ରହିଥିବା ବୃହତ୍‌ ଜଳଯୋଗାଣ ପ୍ରକଳ୍ପର ସମ୍ପୂର୍ଣ୍ଣ ନିମନ୍ତେ ଅମୃତ ଯୋଜନାରୁ ୧୩୦ କୋଟି ଟଙ୍କା ବ୍ୟୟ କରାଯିବ। ୧୪୧୪ କୋଟି ଟଙ୍କା ବିନିମୟରେ ଅମୃତ ଯୋଜନା ମାଧ୍ୟମରେ ୯ଟି ଅମୃତ ସହରାଞ୍ଚଳର ସାର୍ବଜନୀନ ଜଳଯୋଗାଣ ପରିସରଭୁକ୍ତୀକରଣ ପାଇଁ ୩୧୦ କୋଟିର ପ୍ରକଳ୍ପ ସମୂହକୁ ସରକାର ଅନ୍ତର୍ଭୁକ୍ତ କରିଛନ୍ତି। ବେଲପାହାଡ, ବ୍ରଜରାଜନଗର, ସୁନ୍ଦରଗଡ, ରାଜଗାଙ୍ଗପୁର ଓ ବୀରମିତ୍ରପୁର ସହରର ଯୋଗାଣ ନିମନ୍ତେ ୨୬୬ କୋଟି ୧୦ଲକ୍ଷ ଟଙ୍କା ଜିଲ୍ଲା ଖଣିଜ ପାଣ୍ଠିରୁ ଖର୍ଚ୍ଚ ହେବ। ଜଳ ପରିମାପକ ଯନ୍ତ୍ରୀକରଣ ବା ମିଟରିଂ ପାଇଁ ୩୪୫ କୋଟି ଟଙ୍କା ବିନିଯୋଗ ହେବ।

ଗ୍ରାମାଞ୍ଚଳରେ ନୂତନ ଜଳଉତ୍ସ ଖନନ, ନୂତନ ପାଇପ ଯୋଗେ ଜଳଯୋଗାଣ ପ୍ରକଳ୍ପ ନିର୍ମାଣ, ନିର୍ମାଣ କରାଯାଇଥିବା ପାଇପ ଜଳଯୋଗାଣ ପ୍ରକଳ୍ପର ଉନ୍ନତି ପାଇଁ ଆବଶ୍ୟକସ୍ଥଳେ ନୂତନ ଉଚ୍ଚ ପାଣି ଟାଙ୍କି ସ୍ଥାପନ ଲାଗି ସରକାର ପଦକ୍ଷେପ ନେବେ। ଗ୍ରାମାଞ୍ଚଳରେ ଦୈନିକ ମୁଣ୍ଡପିଛା ୭୦ଲିଟର ହିସାବରେ କିମ୍ବା ପରିବାରର ପରିସୀମାର ୫୦ ମିଟର ଦୂରତା ମଧ୍ୟରେ ସ୍ୱଚ୍ଛ ପାନୀୟ ଜଳ ଯୋଗାଣ କରାଯିବ। ୨୦୧୭-୧୮ ବର୍ଷରେ ଏଥିପାଇଁ ୬୦୦ କୋଟି ଟଙ୍କା ଆର୍ଥିକ ଅନୁଦାନ ପ୍ରଦାନ କରାଯାଇଥିଲା। ୨୦୧୮-୧୯ ବର୍ଷ ରେ ଏ ବାବଦରେ ୧୦୦୦ କୋଟି ଟଙ୍କା ବିନିଯୋଗ କରାଯିବ।

ରାଜ୍ୟ ସରକାର ଗତ ଅକ୍ଟୋବର ୧୨ ତାରିଖରେ ଓଡ଼ିଶା ସାର୍ବଜନୀନ ଚକ୍ଷୁ ସ୍ୱାସ୍ଥ୍ୟ କାର୍ଯ୍ୟକ୍ରମ ଘୋଷଣା କରିଥିଲେ। ୨୦୧୮-୧୯ରୁ ୨୦୨୨-୨୩ ଏହି ୫ ବର୍ଷ ପାଇଁ ଯୋଜନା କାର୍ଯ୍ୟକାରୀ ହେବ। ୫୭ଟି ସ୍ଥାନରେ ୨୦ ଶଯ୍ୟା ବିଶିଷ୍ଟ ଓ୍ଵାର୍ଡ ସହ ଚକ୍ଷୁ ଓଟି ବା ଅସ୍ତ୍ରୋପଚାର ଗୃହ ସ୍ଥାପନ ହେବ। ପ୍ରତ୍ୟେକ ବ୍ଲକ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରସ୍ତରରେ ଉତ୍କଷ୍ଟ କର୍ମଚାରୀ ଓ ଯନ୍ତ୍ରପାତି ବିଶିଷ୍ଟ ୩୭୭ଟି ଚକ୍ଷୁ କେନ୍ଦ୍ର ସ୍ଥାପନ ହେବ। ୩୦ଟି ଜିଲ୍ଲା ପାଇଁ ଭ୍ରାମ୍ୟମାଣ ଚକ୍ଷୁ ସେବା ଭ୍ୟାନ୍‌, ୭ଟି ମେଡିକାଲ କଲେଜର ଚକ୍ଷୁ ସେବା ବ୍ୟବସ୍ଥାର ଉନ୍ନତୀକରଣ, ୧୦ଲକ୍ଷ ମୋତିଆ ବିନ୍ଦୁ ଅସ୍ତ୍ରୋପଚାର, ୫ଲକ୍ଷ ଚଷମା ଶିକ୍ଷାର୍ଥୀଙ୍କୁ ବଣ୍ଟନ, ୨.୫ଲକ୍ଷ ପ୍ରେସ୍‌ ବାୟୋପିକ୍‌ ଚଷମା ବଣ୍ଟନ କରାଯିବ। ୩୦୦ ଜଣ ଆପଥାଲମିକ୍‌ ଆସିଷ୍ଟାଣ୍ଟଙ୍କୁ ପ୍ରଶିକ୍ଷଣ ଓ ନିୟୁକ୍ତି ଦିଆଯିବ। ୬୦ଜଣ ଚକ୍ଷୁ ଡାକ୍ତରଙ୍କୁ ନିୟୁକ୍ତି, ସମସ୍ତ ମଧୁମେହ ରୋଗୀଙ୍କୁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରସ୍ତରରେ ଡାଇବେଟିସ୍‌ ରେଟିନୋପାଥି ପାଇଁ ନିରୀକ୍ଷଣ ଏବଂ ମେଡିକାଲ କଲେଜ ଓ ଜିଲ୍ଲାସ୍ତରୀୟ ହସ୍ପିଟାଲରେ ମାଗଣା ଚିକିତ୍ସା ବ୍ୟବସ୍ଥା ହେବ। ସମସ୍ତ ଗ୍ଲୁକୋମା ରୋଗୀଙ୍କୁ ମାଗଣା ଚିକିତ୍ସା, ୨୫୦ଟି ଜନ୍ମଜାତ ମୋତିଆବିନ୍ଦୁ ଅସ୍ତ୍ରୋପଚାର ଏମ୍‌ସିଏଚ୍‌ ଗୁଡିକରେ କରାଇବା ଲାଗି ବ୍ୟବସ୍ଥା ହେବ। ୭ଟି ସରକାରୀ ମେଡିକାଲ କଲେଜ ଓ କ୍ୟାପିଟାଲ ହସ୍ପିଟାଲରେ ଅପ୍ଟୋମେଟ୍ରି ଡିପ୍ଲୋମା କୋର୍ସ ଓ ଅପଥାଲମିକ୍‌ ନର୍ସିଙ୍ଗ କୋର୍ସ ଆରମ୍ଭ କରାଯିବ। ଏଥିପାଇଁ ୬୮୨ କୋଟି ଟଙ୍କାର ବ୍ୟୟ ଅଟକଳ କରାଯାଇଛି।

ବିନା ଦେୟରେ ରୋଗ ନିରୂପଣ ସେବା ନିଦାନ ଓ ଡାଇଲେସିସ୍‌ ସେବା ସହାୟ ଯୋଜନା ପାଇଁ ୫୯୬ କୋଟି ୨୮ଲକ୍ଷ ଟଙ୍କା ଖର୍ଚ୍ଚ ହେବ। ରୋଗ ନିରୂପଣ ପାଇଁ ୫୫୨ କୋଟି ୩୫ଲକ୍ଷ ଓ ଡାଇଲେସିସ୍‌ ପାଇଁ ୪୩ କୋଟି ୯୩ଲକ୍ଷ ଟଙ୍କା ଖର୍ଚ୍ଚ ଅଟକଳ କରାଯାଇଛି।

ରାଜ୍ୟ ସରକାର ୫୫୦ କୋଟି ୨୪ଲକ୍ଷ ଟଙ୍କା ବ୍ୟୟରେ ଜନସ୍ୱାସ୍ଥ୍ୟ ସେବା କ୍ଷେତ୍ରରେ ଆନୁଷଙ୍ଗିକ ସେବାର ସୁଦୃଢୀକରଣ ପାଇଁ ଏକ ନୂଆ ଯୋଜନା ହାତକୁ ନେଇଛନ୍ତି। ୫୫୦ କୋଟି ୨୪ ଲକ୍ଷ ଟଙ୍କା ଏ ବାବଦରେ ଖର୍ଚ୍ଚ ହେବ। ଏ ମଧ୍ୟରୁ ୧୨୩ କୋଟି ୮୮ଲକ୍ଷ ଟଙ୍କା ଜାତୀୟ ସ୍ୱାସ୍ଥ୍ୟ ମିସନରୁ ଓ ଅବଶିଷ୍ଟ ୪୨୬ କୋଟି ୩୬ଲକ୍ଷ ରାଜ୍ୟ ବଜେଟ୍‌ରୁ ଦିଆଯିବ। ଏହି ଯୋଜନା ମାଧ୍ୟମରେ ସରକାରୀ ସ୍ୱାସ୍ଥ୍ୟ ଅନୁଷ୍ଠାନରେ ରୋଗୀ ଓ ସେମାନଙ୍କ ସହାୟକଙ୍କୁ ଉତ୍ତମ ପରିବେଶରେ ସ୍ୱାସ୍ଥ୍ୟ ସେବା ଯୋଗାଇ ଦେବା, ସ୍ୱାସ୍ଥ୍ୟ ଅନୁଷ୍ଠାନରେ ସଂକ୍ରମଣ ହ୍ରାସ କରିବା, ରୋଗୀର ବିଶ୍ୱାସଭାଜନ ହେବା, କାୟାକଳ୍ପର ସୂଚକାଙ୍କରେ ମାନବୃଦ୍ଧି ପାଇଁ ଉନ୍ନତ ସ୍ୱାସ୍ଥ୍ୟ ସୁବିଧା ଯୋଗାଇ ଦିଆଯିବ। ଏହା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରସ୍ତରରୁ ଆରମ୍ଭ ହେବ। ଆଉଟସୋର୍ସିଂ ମାଧ୍ୟମରେ ବିଭିନ୍ନ ସେବା ୫ବର୍ଷ ପ୍ରଦାନ କରାଯିବ। ସନ୍ତୋଷଜନକ ହେଲେ ନବୀକରଣ ହେବ। ୩୧୪ ବ୍ଲକରେ ଏହି ଯୋଜନାକୁ ନିରୀକ୍ଷଣ ପାଇଁ ଏକ ରାଜ୍ୟସ୍ତରୀୟ ପୋଗ୍ରାମ୍‌ ମ୍ୟାନେଜମେଣ୍ଟ ୟୁନିଟ୍‌ ଗଠନ କରାଯିବ। ବ୍ଲକ ମେଡିକାଲ ଅଫିସରଙ୍କୁ ସହାୟତା ପାଇଁ ହସ୍ପିଟାଲ ମ୍ୟାନେଜର ନିଯୁକ୍ତି ପାଇବେ। ବର୍ତମାନ ଥିବା ହସ୍ପିଟାଲ ମ୍ୟାନେଜର ବା ଜୁନିଅର ହସ୍ପିଟାଲ ମ୍ୟାନେଜର ମାନେ ନିଜ ଜିଲ୍ଲା ଓ ସବ୍‌ଡିଭିଜନ୍‌ ମେଡିକାଲ ପାଇଁ ଦାୟୀ ରହିବେ।

ରାଜ୍ୟ କ୍ୟାବିନେଟ୍‌ ବେସମାରିକ ପ୍ରତିରକ୍ଷା (ନିଯୁକ୍ତି ପ୍ରଣାଳୀ ଓ ସେବା ସର୍ତ୍ତାବଳୀ) ନିୟମ, ୨୦୧୮କୁ ମଧ୍ୟ ଅନୁମୋଦନ ଦେଇଛନ୍ତି।

ଚିନ୍ତା ବଢ଼ାଇଲା ଭାଇରାଲ୍‌ ଭିଡିଓ

୨୦୧୭ରେ ୧୮୪ ମାମଲା
ହତ୍ୟା, ଡକାୟତି କମିଛି, ଦୁଷ୍କର୍ମ ବଢିଛି

ଭୁବନେଶ୍ୱର : ଅଶ୍ଳୀଳ ଭିଡିଓ ଓ ଫଟୋ ଭାଇରାଲ ଘଟଣାକୁ ନେଇ ରାଜ୍ୟର ବୁଦ୍ଧିଜୀବୀ, ଅଭିଭାବକ ମହଲ ଚିନ୍ତାରେ ଥିବା ବେଳେ ୨୦୧୭ ଅପରାଧ ଇତିହାସରୁ ଏକ ଚାଞ୍ଚଲ୍ୟକର ତଥ୍ୟ ହସ୍ତଗତ ହୋଇଛି। ୨୦୧୭ରେ ରାଜ୍ୟରେ ୧୮୪ଟି ଏ ସଂକ୍ରାନ୍ତ ମାମଲା ବିଭିନ୍ନ ଥାନାରେ ରୁଜୁ ହୋଇଛି। ପୁଲିସ ତଥାପି ବେଫିକର। ଅପରାଧ ନିୟନ୍ତ୍ରଣ ଦିଗରେ ଯେତିକି ତନାଘନା ହେବା କଥା ତାହା ହେଉନାହିଁ। କ୍ରାଇମବ୍ରାଞ୍ଚ ଏ ଦିଗରେ ଏକ ପ୍ରକାର ବିଫଳ ହୋଇଛି ବୋଲି ଚର୍ଚ୍ଚା ଜୋର ଧରିଲାଣି।

ଅନ୍ୟପକ୍ଷରେ ପରିସଂଖ୍ୟାନ ସୂଚାଉଛି, ରାଜ୍ୟରେ ହତ୍ୟା, ଡକାୟତି, ଠକେଇ ଓ ଚୋରି ଭଳି ଅପରାଧ ହ୍ରାସ ପାଇଥିଲେ ହେଁ, ସାଇବର ଅପରାଧ ଭଳି ଦୁଷ୍କର୍ମ ଓ ମୋଟର ଦୁର୍ଘଟଣା ମଧ୍ୟ ବଢ଼ିବାରେ ଲାଗିଛି। ୨୦୧୭ରେ ମୋଟ ୧ ଲକ୍ଷ ୩ ହଜାର ୮୬୬ଟି ମାମଲା ଦରଜ ହୋଇଥିଲା। ୨୦୧୬ରେ ଏହି ସଂଖ୍ୟା ୧ଲକ୍ଷ ୩ ହଜାର ୬୦୨ ଓ ୨୦୧୫ରେ ୧ଲକ୍ଷ ୩ ହଜାର ୨୦୦ ରେକର୍ଡ ହୋଇଛି। ଏହା ସଙ୍କେତ ଦେଉଛି ଯେ ଥାନାକୁ ଆସୁଥିବା ସବୁ ମାମଲାର ପଞ୍ଜୀକରଣ କ୍ଷେତ୍ରରେ ତଥାପି ପୁଲିସ ସକ୍ଷମ ହେଉନାହିଁ। ମାମଲା ରଫାଦଫା କରି ଦିଆଯାଉଛି ବା ଏହା ପଛରେ ଆଉ କୌଣସି ଅଦୃଶ୍ୟ ଚାପ ପୁଲିସ ବାଟ ଓଗାଳୁଛି।

କୁନ୍ଦୁଲି ଘଟଣାକୁ ନେଇ ଚର୍ଚ୍ଚା ଆଲୋଚନା ଜାରି ରହିଥିବା ବେଳେ ପରିସଂଖ୍ୟାନ ଦର୍ଶାଉଛି ଯେ ଦୁଷ୍କର୍ମ ମାମଲା ବଢିବାରେ ଲାଗିଛି। ୨୦୧୭ରେ ଦୈନିକ ୬ଜଣ ମହିଳା ଦୁଷ୍କର୍ମର ଶିକାର ହୋଇଛନ୍ତି। ଗତବର୍ଷ ବିଭିନ୍ନ ଥାନାରେ ୨୨୨୧ଟି ଏ ସଂକ୍ରାନ୍ତ ମାମଲା ରୁଜୁ ହୋଇଥିଲା। ୨୦୧୬ରେ ଦୁଷ୍କର୍ମ ମାମଲା ଥିଲା ୨୧୪୪ ଓ ୨୦୧୫ରେ ୨୨୮୬। ଦଙ୍ଗା ସଂକ୍ରାନ୍ତ ମାମଲାରେ ପାଖାପାଖି ୨୫ ପ୍ରତିଶତ ବୃଦ୍ଧି ଘଟିଛି। ୨୦୧୭ରେ ୨୪୦୭ଟି ଦଙ୍ଗା ମାମଲା ରୁଜୁ ହୋଇଥିବା ରେକର୍ଡ କହୁଛି। ପୂର୍ବବର୍ଷ (୨୦୧୬) ୧୯୧୪ ଓ ୨୦୧୫ରେ ୧୯୭୬ ଏଭଳି ମାମଲା ରୁଜୁ ହୋଇଥିଲା।

ଭଦ୍ରକରେ ଦେଖା ଦେଇଥିବା ଦଙ୍ଗା ଯୋଗୁ ଗତବର୍ଷ ଏହି ମାମଲା ସଂଖ୍ୟା ବଢ଼ିଥିବା କୁହାଯାଉଥିଲେ ହେଁ, ପଞ୍ଚାୟତ ନିର୍ବାଚନ ପ୍ରଭାବକୁ ଏ କ୍ଷେତ୍ରରେ ଅଣଦେଖା କରିହେବ ନାହିଁ। ଭଦ୍ରକରେ ୨୦୧୬ରେ ୨୧ଟି ଦଙ୍ଗା ମାମଲା ରୁଜୁ ହୋଇଥିଲା। କିନ୍ତୁ ୨୦୧୭ରେ ଏହା ବଢି ୧୩୫ରେ ପହଞ୍ଚିଥିଲା।

ଯଦିଓ ସାଇବର ଅପରାଧରେ ଗତବର୍ଷ ତୁଳନାରେ ପାଖାପାଖି ଦୁଇଗୁଣ ଲୋକ ବନ୍ଧା ହୋଇଛନ୍ତି, କିନ୍ତୁ ଆଜି ବି ଏ କ୍ଷେତ୍ରରେ ପୁଲିସ ବିଫଳତା ଜଳ ଜଳ ହୋଇ ଦିଶୁଛି। ୨୦୧୫ ଓ ୨୦୧୬ରେ ଏହି ଘଟଣାରେ ୯୯ ଜଣ ବନ୍ଧା ହୋଇଥିବା ବେଳେ ୨୦୧୭ରେ ୧୯୫ଜଣଙ୍କୁ ଗିରଫ କରାଯାଇଥିଲା। ସାଇବର ଅପରାଧ ମଧ୍ୟରେ ସବୁଠାରୁ ଅଧିକ ଏଟିଏମ୍‌ ଠକେଇ ଘଟିଛି। ଗତବର୍ଷ ୨୬୫ଟି ଏଟିଏମ୍‌ ଠକେଇ ହୋଇଥିଲା। ଅନ୍‌ଲାଇନ୍‌ ଠକେଇ ସଂଖ୍ୟା ଥିଲା ୨୦୬। କ୍ରେଡିଟ୍‌ କାର୍ଡ ଠକେଇ ସଂଖ୍ୟା ୨୭ ଥିବା ବେଳେ ବ୍ୟାଙ୍କ ଠକେଇ ୧୯ଟି ହୋଇଥିବା ରେକର୍ଡ କହୁଛି। ଗତବର୍ଷ ଭାଇରାଲ ଭିଡ଼ିଓ ଓ ଫଟୋ ଜନିତ ୧୮୪ଟି ମାମଲା ରୁଜୁ ହୋଇଥିବା ବେଳେ ନିଯୁକ୍ତି ଠକେଇ ଅଭିଯୋଗରେ ୭ଟି ମାମଲା ରୁଜୁ ହୋଇଛି। ଗତବର୍ଷ ୮୨୪ଟି ସାଇବର ମାମଲା ପଞ୍ଜିକୃତ ହୋଇଥିବା ବେଳେ ୨୦୧୬ରେ ଏହା ୩୧୭ ଓ ୨୦୧୫ରେ ୩୮୫ଟି ଥିଲା।

ପରିସଂଖ୍ୟାନ ଅନୁଯାୟୀ ହତ୍ୟା ମାମଲା ସଂଖ୍ୟା ହ୍ରାସ ପାଇଛି। ୨୦୧୬ରେ ରାଜ୍ୟରେ ୧୩୨୮ଟି ହତ୍ୟା ମାମଲା ରୁଜୁ ହୋଇଥିବା ବେଳେ ୨୦୧୫ରେ ଏହା ୧୪୭୩ ଥିଲା। ଗତବର୍ଷ ଏହି ଧରଣର ମାମଲା ସଂଖ୍ୟା ୧୨୬୭ ରହିଛି। ଅନୁରୂପ ଭାବେ ୨୦୧୫ ଓ ୨୦୧୬ ତୁଳାନରେ ଡକାୟତି ମାମଲା ମଧ୍ୟ ୨୦୧୭ରେ କମିଛି। ରାଜ୍ୟରେ ମୋଟ ୫୩୪ଟି ଏ ସଂକ୍ରାନ୍ତ ମାମଲା ରୁଜୁ ହୋଇଥିବା ବେଳେ ୨୦୧୬ରେ ଏହା ୫୬୬ ଥିଲା। ସେହିଭଳି ଚୋରି ସଂଖ୍ୟା ୩୯୫୩କୁ କମିଛି। ୨୦୧୬ରେ ଏହା ୪୦୦୪ ଓ ୨୦୧୫ରେ ଏଭଳି ୪୦୪୬ଟି ମାମଲା ରୁଜୁ ହୋଇଥିଲା। ଠକେଇ ମାମଲା ସଂଖ୍ୟା ବି ୨୯୬୦ରେ ଅଟକିଛି। ୨୦୧୫ରେ ୨୯୨୫ଟି ଓ ୨୦୧୬ରେ ୩୧୯୭ ଥିଲା।

ମୋଟର ଯାନ ଦୁର୍ଘଟଣା ସଂଖ୍ୟା କିନ୍ତୁ କମୁନି। ୨୦୧୭ରେ ୧୦ ହଜାର ୮୫୫ଟି ମୋଟର ଯାନ ଦୁର୍ଘଟଣା ମାମଲା ରୁଜୁ ହୋଇଥିଲା। ୨୦୧୬ରେ ଏହା ୧୦,୫୩୨ ଓ ୨୦୧୫ରେ ୧୦ ହଜାର ୫୪୨ଟି ମାମଲା ରୁଜୁ ହୋଇଥିଲା।

ଟିଟିଲାଗଡ଼ ଦେଶର ତତଲାଗଡ଼

୪୦ ଡିଗ୍ରି ଟପିଲା ଚଳିତବର୍ଷର ସର୍ବୋଚ୍ଚ ତାପମାତ୍ରା
ଉପକୂଳରେ ଜାରି ହେଲା ‘ହିଟ୍‌ ଓ୍ଵଭ୍‌’ ସତର୍କ ସୂଚନା

ଭୁବନେଶ୍ୱର : ଖରାଦିନ ଆରମ୍ଭ ହେଉ ହେଉ ଓଡ଼ିଶାର ଟିଟିଲାଗଡ଼ ପାଲଟିଛି ଦେଶର ତତଲାଗଡ଼। ଆଜି ଏଠାରେ ଦେଶର ସର୍ବୋଚ୍ଚ ତାପମାତ୍ରା ୪୦.୫ ଡିଗ୍ରି ରେକର୍ଡ ହୋଇଛି। ମଧ୍ୟାହ୍ନ ୧୨ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଏଠାରେ ତାପମାତ୍ରା ୩୮ରୁ ୪୦.୫ ଡିଗ୍ରି ମଧ୍ୟରେ ରହିଥିଲା। ପବନର ବେଗ କମ୍‌ ରହିଥିବାରୁ ତାପମାତ୍ରା ବଢ଼ିଥିଲା ବୋଲି ଭାରତୀୟ ପାଣିପାଗ ବିଭାଗ କହିଛି।

କେବଳ ଟିଟିଲାଗଡ଼ ନୁହେଁ ସମ୍ବଲପୁର ମଧ୍ୟ ଦେଶର ଅନ୍ୟତମ ତତଲା ସହର ପାଲଟିଛି। ଏଠାରେ ଦେଶର ଦ୍ୱିତୀୟ ସର୍ବୋଚ୍ଚ ତାପମାତ୍ରା ରେକର୍ଡ କରାଯାଇଛି। ମହରାଷ୍ଟ୍ରର ଏକ ସହର ସମେତ ସମ୍ବଲପୁରର ତାପମାତ୍ରା ମିଳିତ ଭାବେ ୪୦.୩ ଡିଗ୍ର୍ରି ରହିଛି। ଦେଶର ମୋଟ ୬ଟି ସହରର ତାପମାତ୍ରା ୪୦ ଡିଗ୍ରି ଉପରେ ରହିଥିବା ବେଳେ ଓଡ଼ିଶାର ଦୁଇଟି ସହର ପ୍ରଥମ ଓ ଦ୍ୱିତୀୟ ସ୍ଥାନରେ ରହି ଉତ୍ତପ୍ତ ସହରରେ ପରିଣତ ହେବା ଚିନ୍ତା ବଢ଼ାଇଛି।

ଚଳିତବର୍ଷ ପ୍ରଥମ ଥର ପାଇଁ ଓଡ଼ିଶାରେ ତାପମାତ୍ରା ୪୦ ଡିଗ୍ରି ଟପିଛି। ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ଆଜି ଉପକୂଳ ଓଡ଼ିଶାରେ ହିଟ୍‌ ଓ୍ଵଭ୍‌ ସତର୍କ ସୂଚନା ଜାରି ହୋଇଥିବା ବେଳେ ପଶ୍ଚିମ ଓଡ଼ିଶାର ଟିଟିଲାଗଡ଼ ଓ ସମ୍ବଲପୁର ସହ ଅନ୍ୟ ସମସ୍ତ ସହରର ତାପମାତ୍ରା ମଧ୍ୟ ୩୮ ଡିଗ୍ରି ଉପରକୁ ଚାଲିଯାଇଛି। ତାଳଚେର ଓ ଅନୁଗୁଳ ସହର ବି ତାତିଛି। ତାଳଚେରର ତାପମାତ୍ରା ୩୯.୯ ଡିଗ୍ରି ଓ ଅନୁଗୁଳରେ ୩୯.୪ ଡିଗ୍ରି ରହିଥିଲା। ବଲାଙ୍ଗିରରେ ୩୯.୩, ଝାରସୁଗୁଡ଼ାରେ ୩୯.୨, ହୀରାକୁଦ ୩୯.୧, ସୋନପୁରରେ ୩୯, ଭବାନୀପାଟଣା ୩୮ ଡିଗ୍ରି ରେକର୍ଡ କରାଯାଇଛି। ଭୁବନେଶ୍ୱର ସମେତ ଉତ୍ତର ଓ ଦକ୍ଷିଣ ଓଡ଼ିଶାର କେତେକ ସ୍ଥାନରେ ପ୍ରବଳ ତାତି ଅନୁଭୂତ ହୋଇଛି। ଆଜି ମାଲକାନଗିରିରେ ୩୯.୬ ଡିଗ୍ରି ରେକର୍ଡ ହୋଇଥିବା ବେଳେ ଭୁବନେଶ୍ୱର ଓ ବାରିପଦାରେ ୩୯.୪, ଢ଼େଙ୍କାନାଳରେ ୩୮.୮ ଡିଗ୍ରି ରହିଥିଲା। ରାଜ୍ୟର ୨୦ଟି ସହରର ତାପମାତ୍ରା ୩୫ ଡିଗ୍ରି ଉପରେ ରହିଥିବା ନେଇ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି।

ରାଜ୍ୟସଭା ନିର୍ବାଚନ: ସବୁଠାରୁ ଧନୀ ପ୍ରାର୍ଥୀ

ନୂଆଦିଲ୍ଲୀ: ରାଜ୍ୟସଭା ପାଇଁ ବିହାରରୁ ଜେଡିୟୁ ପ୍ରାର୍ଥୀ ମହେନ୍ଦ୍ର ପ୍ରସାଦ ହେଉଛନ୍ତି ୪ ହଜାର କୋଟି ଟଙ୍କା ସଂପତ୍ତିର ଅଧିକାରୀ। ଚଳିତ ରାଜ୍ୟସଭା ନିର୍ବାଚନରେ ସମ୍ଭବତଃ ସେ ହେଉଛନ୍ତି ସବୁଠାରୁ ଧନୀ ପ୍ରାର୍ଥୀ। ୭୮ ବର୍ଷୀୟ ମହେନ୍ଦ୍ର ପ୍ରସାଦ ୭ମ ଥର ଲାଗି ରାଜ୍ୟସଭାକୁ ନିର୍ବାଚିତ ହେବା ପ୍ରାୟ ନିଶ୍ଚିତ। ମହେନ୍ଦ୍ରଙ୍କର ଦୁଇଟି ଫାରମାସେଟିକାଲ କଂପାନୀ ରହିଛି। ତାଙ୍କ ନାମରେ କୌଣସି କାର ବା ବିମା ପଲିସି ନଥିଲେ ମଧ୍ୟ ତାଙ୍କ ପାଖରେ ୪୧ ଲକ୍ଷ ଟଙ୍କାର ଅଳଙ୍କାର ରହିଛି। ୨୦୧୬-୧୭ ପାଇଁ ସେ ଦାଖଲ କରିଥିବା ଆୟକର ରିଟର୍ନରେ ୩୦୩ କୋଟି ୫୦ ଲକ୍ଷ ଟଙ୍କାର ଆୟ ଦର୍ଶାଇଛନ୍ତି। ସେ ୨୧୧ଟି ଦେଶ ଯାତ୍ରା କରିଛନ୍ତି। ସେ ୫୩ ଥର ବ୍ରିଟେନ ଯାଇଥିବା ବେଳେ ୧୦ ଥର ଆମେରିକା ଯାଇଛନ୍ତି। ୨୦୦୨ରୁ ୨୦୦୩ ମଧ୍ୟରେ ଗୋଟିଏ ବର୍ଷରେ ୮୪ଟି ଦେଶ ଭ୍ରମଣ କରିଛନ୍ତି। ସୂଚନାଯୋଗ୍ୟ ଯେ ୧୯୮୦ରେ ସେ ପ୍ରଥମ ଥର ଲାଗି କଂଗ୍ରେସ ଟିକଟରେ ଲୋକସଭାକୁ ନିର୍ବାଚିତ ହୋଇଥିଲେ। ୧୯୮୫ରେ କଂଗ୍ରେସ ତାଙ୍କୁ ରାଜ୍ୟସଭା ପଠାଇଥିଲା। ଏହାପର ଠାରୁ ସେ କ୍ରମାଗତ ଭାବେ ରାଜ୍ୟସଭାକୁ ଆରଜେଡି/ ଜେଡିୟୁ ଟିକଟରେ ନିର୍ବାଚିତ ହେଉଛନ୍ତି।

୨୫ ବର୍ଷ ପୁରୁଣା ଇତିହାସର ପୁନରାବୃତ୍ତି: ୟୁପି ରାଜନୀତିରେ ନୂଆ ମୋଡ଼

ଲକ୍ଷ୍ନୌ: ଉଭୟ ଗୋରଖପୁର ଓ ଫୁଲପୁର ଆସନରେ ସମାଜବାଦୀ ପାର୍ଟିର ବିଜୟ ହେବା ପରେ ୟୁପି ରାଜନୀତିରେ ୨୫ ବର୍ଷ ତଳର ଇତିହାସର ପୁନରାବୃତ୍ତି ଘଟିଛି। ୧୯୯୩ ମସିହାରେ ବିଜପିର ବର୍ଦ୍ଧିତ ପତିଆରାକୁ ଆଖି ଆଗରେ ରଖି ବିଧାନସଭା ନିର୍ବାଚନ ପାଇଁ ତତ୍କାଳୀନ ସମାଜବାଦୀ ପାର୍ଟି ଅଧ୍ୟକ୍ଷ ମୁଲାୟମ ସିଂ ଯାଦବ ଓ ବହୁଜନ ସମାଜବାଦୀ ପାର୍ଟି ଅଧ୍ୟକ୍ଷ କାଂଶୀରାମ ମିଳିତଭାବେ ନିର୍ବାଚନ ଲଢି ବିଜୟୀ ହୋଇଥିଲେ। ଆଜି ବି ଅନୁରୂପ ଘଟଣା ଦେଖିବାକୁ ମିଳିଛି। ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ଓ ବହୁଜନ ସମାଜବାଦୀ ପାର୍ଟିର ମାୟାବତୀଙ୍କ ମଧ୍ୟରେ ଉପ ନିର୍ବାଚନ ମେଣ୍ଟ ବିଜେପି ଗଡ଼ରେ ସମାଜବାଦୀ ପ୍ରାର୍ଥୀଙ୍କୁ ବିଜୟୀ କରିବାରେ ସଫଳ ହୋଇଛି। ଏହା ସହିତ ୧୯୯୧ ମସିହାରୁ ବିଜେପି ହାତରେ ଥିବା ଗୋରଖପୁର ଆସନ ୨୫ବର୍ଷ ପରେ ବିଜେପି ହରାଇଛି। ସେପଟେ ପ୍ରଥମ ଥର ପାଇଁ ଗୋରଖପୁରରେ ସମାଜବାଦୀ ପାର୍ଟିର ବିଜୟ ୟୁପି ଇତିହାସରେ ନୂଆ ଫର୍ଦ୍ଦ ଯୋଡ଼ିିଛି। ୧୯୯୧ରୁ ୧୯୯୮ ମସିହା ଯାଏଁ ବିଜେପିର ମହନ୍ତ ଅବୈଦ୍ୟନାଥ ଗୋରଖପୁର ଲୋକସଭା ସାଂସଦ ଭାବେ ରହିଥିବା ବେଳେ ୧୯୯୮ରୁ ୨୦୧୭ ଯାଏଁ ଯୋଗୀ ଆଦିତ୍ୟନାଥ ଏହି ନିର୍ବାଚନ ମଣ୍ଡଳୀରୁ ସାଂସଦ ହୋଇଥିଲେ। ସେପଟେ ଆହ୍ଲାବାଦର ଫୁଲପୁର ନିର୍ବାଚନ ମଣ୍ଡଳୀରେ ୨୦୧୪ ମସିହାରେ ପ୍ରଥମ ଥର ପାଇଁ ବିଜେପିର ବିଜୟ ହୋଇଥିବା ବେଳେ ଏଥର ସମାଜବାଦୀ ପାର୍ଟି ହାତକୁ ଚାଲିଯାଇଛି। ଉଲ୍ଲେଖଯୋଗ୍ୟ , ୨୦୦୯ ମସିହାରେ ବହୁଜନ ସମାଜବାଦୀ ପାର୍ଟି ଏହି ଆସନରେ ବିଜୟୀ ହୋଇଥିଲା। ସ୍ୱାଧୀନତା ପରଠାରୁ ଏହି ଆସନରେ ଅର୍ଦ୍ଧାଧିକ ନିର୍ବାଚନରେ କଂଗ୍ରେସର ବିଜୟ ହୋଇଥିବାରୁ ଏଥର ମଧ୍ୟ ଦଳଇତିହାସ ଦୋହରାଇବ ବୋଲି ଆଶାବାନ୍ଧିଥିଲା। କିନ୍ତୁ ଉଭୟ ଗୋରଖପୁର ଓ ଫୁଲପୁରରେ କଂଗ୍ରେସ ନିଜର ସତ୍ତା ହରାଇ ବସିଛି। ପ୍ରାର୍ଥୀମାନେ ଅମାନତ ହରାଇଥିବା ବେଳେ କଂଗ୍ରେସ ସଂଗଠନର ଦୟନୀୟ ସ୍ଥିତି ସାମ୍ନାକୁ ଆସିଛି।

ସାମାଜିକ ନ୍ୟାୟର ବିଜୟ

ଉତ୍ତରପ୍ରଦେଶର ଉଭୟ ଲୋକସଭା ନିର୍ବାଚନରେ ସମାଜବାଦୀ ପାର୍ଟିର ବିଜୟ ଐତିହାସିକ ଏବଂ ଏହା ସମାଜିକ ନ୍ୟାୟର ବିଜୟ ବୋଲି ସପା ସୁପ୍ରିମୋ ଅଖିଳେଶ ଯାଦବ କହିଛନ୍ତି। ମୁଖ୍ୟମନ୍ତ୍ରୀ ଏବଂ ଉପମୁଖ୍ୟମନ୍ତ୍ରୀଙ୍କ ବିରୋଧରେ ଲୋକଙ୍କ କ୍ରୋଧ ଏଭଳି ସ୍ଥିତିରେ ଥିବା ବେଳେ ଦେଶବ୍ୟାପୀ ଲୋକଙ୍କ କ୍ରୋଧ କିଭଳି ଥିବ ଏଥିରୁ ଅନୁମାନ କରାଯିବା ଆବଶ୍ୟକ ବୋଲି ଅଖିଳେଶ କହିଛନ୍ତି। କୁଶାସନ ବିରୋଧରେ ଏହି ବିଶାଳ ବିଜୟ ହୋଇଥିବାରୁ ଆଗକୁ ଲଢ଼େଇ ଜୋର୍‌ଦାର ହେବ ବୋଲି ଅଖିଳେଶ କହିଛନ୍ତି। ବିଜୟ ପାଇଁ ବିଏସ୍‌୍‌ପି ସୁପ୍ରିମୋ ମାୟାବତୀଙ୍କୁ ଅଖିଳେଶ ଧନ୍ୟବାଦ ଜଣାଇଛନ୍ତି।

ଲାଲୁଙ୍କୁ ଶେଷ କରିବାକୁ ଚାହୁଥିବା ଲୋକଙ୍କୁ ଜବାବ ମିଳିଛି

ଲକ୍ଷ୍ନୌ: ଉତ୍ତରପ୍ରଦେଶରେ ସପା-ବସପା ମେଣ୍ଟର ସଫଳତା ଏବଂ ବିହାରରେ ଦଳର ସଫଳତାରେ ଉତ୍‌ଫୁଲ୍ଲିତ ଆରଜେଡି ନେତା ତେଜସ୍ୱୀ ଯାଦବ ଜାତୀୟସ୍ତରରେ ମହାମେଣ୍ଟ ଗଠନ ପାଇଁ ପ୍ରସ୍ତାବ ଦେଇଛନ୍ତି। ବିରୋଧୀ ଦଳ ନେତାମାନେ ସେମାନଙ୍କ ଅହଙ୍କାର ଛାଡ଼ି ଏକାଠି ହେବାକୁ ତେଜସ୍ୱୀ କହିଛନ୍ତି। ୟୁପି ଓ ବିହାରରୁ ଆରମ୍ଭ ହୋଇଥିବା ଏହି ବିଜୟ ପର୍ବ ୨୦୧୯ ନିର୍ବାଚନ ପର୍ଯ୍ୟନ୍ତ ଜାରି ରହିବ। ବିରୋଧୀ ଦଳର ଏହି ବିଜୟ ପରେ ମୋଦି ସରକାର ହତୋତ୍ସାହିତ ହୋଇ ସିବିଆଇ ଓ ଇଡିକୁ ବ୍ୟବହାର କରି ଅଧିକ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ବୋଲି ତେଜସ୍ୱୀ କହିଛନ୍ତି। ପିତା ତଥା ଆରଜେଡି ସୁପ୍ରିମୋ ଲାଲୁ ପ୍ରସାଦଙ୍କ ରାଜନୈତିକ ମୃତ୍ୟୁ ଘଟାଇବାକୁ ଚାହୁଥିବା ଲୋକଙ୍କୁ ଏହି ନିର୍ବାଚନରେ କଡ଼ା ଜବାବ ମିଳିଛି ବୋଲି ତେଜସ୍ୱୀ କହିଛନ୍ତି।

ଏହା ଆମ ପାଇଁ ଶିକ୍ଷା
ନିର୍ବାଚନ ଫଳ ପ୍ରକାଶ ପରେ ମୁଖ୍ୟମନ୍ତ୍ରୀ ଆଦିତ୍ୟନାଥ କହିଛନ୍ତି ଯେ ରାଜ୍ୟରେ ବିକାଶର ଗତିରୋଧ କରିବା ପାଇଁ ସପା-ବସପା ମଧ୍ୟରେ ଅନୈତିକ ମେଣ୍ଟ ହୋଇଛି। ତେବେ ଏହାର ପ୍ରତିହତ କରିବା ପାଇଁ ଆମେ ବିହୀତ ପଦକ୍ଷେପ ନେବୁ ଏବଂ ନୂଆ ରଣନୀତିରେ ଦଳ କାର୍ଯ୍ୟ କରିବ ବୋଲି ସେ କହିଛନ୍ତି। ଏହି ମେଣ୍ଟକୁ ବିଜେପି ଆଦୌ ଗୁରୁତ୍ୱର ସହ ନେଇନଥିଲା ଏବଂ ମାତ୍ରାଧିକ ବିଶ୍ୱାସ ଆମ ପାଇଁ ପରାଜୟର କାରଣ ହେଲା ବୋଲି ଯୋଗୀ କହିଛନ୍ତି। ତେବେ ଲୋକଙ୍କ ରାୟକୁ ଆମେ ସମ୍ମାନର ସହ ଗ୍ରହଣ କରୁଛି। ଏହି ଜନାଦେଶ ଦଳ ପାଇଁ ଅତ୍ୟନ୍ତ ଅପ୍ରତ୍ୟାଶିତ ଥିବାରୁ ଆମେ ନିଜର ଦୁର୍ବଳତା ସଂପର୍କରେ ବଚାରମନ୍ଥନ କରିବୁ ବୋଲି ସେ କହିଛନ୍ତି। ବିଜୟୀ ପ୍ରାର୍ଥୀମାନଙ୍କୁ ଯୋଗୀ ଅଭିନନ୍ଦନ ଜଣାଇଛନ୍ତି।