ଜାଣନ୍ତୁ ବିବାହ ପୂର୍ବରୁ ଅନିଲ କାହାଠୁଁ ଅର୍ଥ ସାହାଯ୍ୟ ନେଉଥିଲେ !

ବଲିଉଡର ମିଷ୍ଟର ଇଣ୍ଡିଆ ଭାବେ ଜଣାଯାଉଥିବା ଅନିଲ କପୁରଙ୍କ ଲୋକପ୍ରିୟତା ଆଜି ମଧ୍ୟ କିଛି କମ୍ ନାହିଁ। ବ୍ୟକ୍ତିଗତ ଜୀବନଶୈଳୀକୁ ଗଣମାଧ୍ୟମଠାରୁ ଯଥେଷ୍ଟ ଦୂରେଇ ରଖିବାକୁ ଚେଷ୍ଟା କରନ୍ତି ଅନିଲ। ଏହା ବାଦ୍ ଅନେକ ସାକ୍ଷାତକାରରେ ସେ ନିଜ ପାରିବାରିକ କଥା ପ୍ରକାଶ କରିଛନ୍ତି। ଅନିଲଙ୍କ ପତ୍ନୀ ସୁନିତା କପୁର ମଧ୍ୟ କାଁଭାଁ ପାର୍ଟିରେ ଉପସ୍ଥିତ ରୁହନ୍ତି। ନିଜ ବ୍ୟବସାୟରେ ମସଗୁଲ୍ ଥିବା ସୁନିତା​‌ ୩ ପିଲାଙ୍କ ଦାୟିତ୍ବ ମଧ୍ୟ ଯଥା ଭାବେ ନେଇଛନ୍ତି।

ଖୁବ୍ କମ୍ ଲୋକେ ଜାଣନ୍ତି ଯେ ଏହି ଦମ୍ପତିଙ୍କର ପ୍ରେମ ବିବାହ ହୋଇଥିଲା। ବିବାହ ପୂର୍ବରୁ ସୁନୀତା ଜଣେ ନାମକରା ମଡେଲର ଥିଲାବେଳେ ଅନିଲ ସେସମୟରେ କଳାକାର ଭାବରେ ପ୍ରତିଷ୍ଠିତ ହେବାକୁ ସଂଗ୍ରାମ କରୁଥିଲେ। ଏକ ଉତ୍ସବରେ ଦୁହିଁଙ୍କର ଭେଟ ହୋଇଥିଲା। ପରେ ଏହା ବନ୍ଧୁତାର ରୂପ ନେଇଥିଲା। ଏହିଭଳି ଭାବେ ସେମାନଙ୍କ ପ୍ରେମକାହାଣୀର ଆରମ୍ଭ। ସେ ସମୟରେ ଦୁହେଁ ବରାବର ରେସ୍ତୋରାଁ, ପାର୍କରେ ଭେଟୁଥିଲେ। ସୁନିତା​‌ ନିଜ କାରରେ ଆସୁଥିବାବେଳେ ଅନିଲ ବସ୍ କିମ୍ବା ଟ୍ୟାକ୍ସି କରି ଆସୁଥିଲେ। ଅନେକ ସମୟରେ ଅନିଲଙ୍କ ନିକଟରେ ଟଙ୍କାପଇସା ନଥାଏ। ତେବେ ସେତେବେଳେ ସୁନିତା ହିଁ ତାଙ୍କୁ ସାହାଯ୍ୟ କରୁଥିଲେ। ନିଜେ ଅନିଲ ଏକଥା ସାକ୍ଷାତକାରରେ ପ୍ରକାଶ କରିଛନ୍ତି।
ବିବାହ ପରେ ଓ ୩ ପିଲା(ସୋନମ୍, ରିୟା ଓ ହର୍ଷ)ଙ୍କ ଜନ୍ମ ପ​‌ରେ ସୁନୀତା ଆଉ ମଡେଲିଂ କ୍ଷେତ୍ରରେ ପାଦ ଥାପିନଥିଲେ। ବରଂ ନିଜ ବ୍ୟବସାୟ ଆରମ୍ଭ କରିବାକୁ ଉଚିତ୍ ମଣିଥିଲେ। ୬୧ ବର୍ଷୀୟ ଅନିଲ ସିନେଜଗତରେ ୪୧ ବର୍ଷ ଅତିବାହିତ କରିସାରିଲେଣି। ଏଯାବତ୍ କୌଣସି ଅଭିନେତ୍ରୀଙ୍କ ସହ ତାଙ୍କର ନାମ ଯୋଡ଼ା ହୋଇନାହିଁ। ଆଗାମୀ ଚଳଚ୍ଚିତ୍ର ରେସ୍-୩ ନିମନ୍ତେ ଖୁବ୍ ଶୀଘ୍ର ଅନିଲ ଥାଇଲାଣ୍ଡ ଯିବେ ବୋଲି ଜଣାପଡ଼ିଛି।

ବଚ୍ଚନ ଦମ୍ପତିଙ୍କ ସମ୍ପତ୍ତି ପରିମାଣ ୧୦୦୦ କୋଟି

ଲକ୍ଷ୍ନୌ : ବଲିଉଡ ଅଭିନେତା ଅମିତାଭ ବଚ୍ଚନ ଓ ତାଙ୍କର ପତ୍ନୀ ଜୟା ବଚ୍ଚନଙ୍କ ମୋଟ ସମ୍ପତ୍ତିର ପରିମାଣ ୧୦୦୦ କୋଟି ଟଙ୍କା ବୋଲି ଜଣାପଡିଛି। ଏଥିମଧ୍ୟରୁ ଜୟାଙ୍କ ସ୍ଥାବର ଓ ଅସ୍ଥାବର ସମ୍ପତ୍ତିର ପରିମାଣ ୪୯୩ କୋଟି ଟଙ୍କା। ଆଗାମୀ ରାଜ୍ୟସଭା ନିର୍ବାଚନ ନିମନ୍ତେ ଜୟା ପ୍ରାର୍ଥିପତ୍ର ଦାଖଲ ସମୟରେ କରିଥିବା ସତ୍ୟପାଠରୁଏହି ତଥ୍ୟ ମିଳିଛି। ଯଦି ଜୟା ଏଥର ରାଜ୍ୟସଭାକୁ ନିର୍ବାଚିତ ହେବେ, ତାହାହେଲେ ସେ ସବୁଠରୁ ଧନୀ ସାଂସଦଙ୍କ ମାନ୍ୟତା ଲାଭ କରିବେ। ଅମିତାଭ-ଜୟାଙ୍କ ନାମରେ ଥିବା ସ୍ଥାବର ସମ୍ପତ୍ତି ପରିମାଣ ୪୬୦ କୋଟି ଓ ଅସ୍ଥାବର ସମ୍ପତ୍ତି ମୂଲ୍ୟ ୫୪୦ କୋଟି ଟଙ୍କା। ଅସ୍ଥାବର ସମ୍ପତ୍ତି ମଧ୍ୟରେ ୯ ଲକ୍ଷ ଟଙ୍କାର ଏକ କଲମ, ୫୧ ଲକ୍ଷ ଟଙ୍କା ମୂଲ୍ୟର ଘଣ୍ଟା ଇତ୍ୟାଦି ରହିଛି ବୋଲି ଜୟା ସତ୍ୟପାଠରେ ଦର୍ଶାଇଛନ୍ତି। ଅମିତାଭଙ୍କ ନିକଟରେ ଥିବା ବିଭିନ୍ନ ଘଣ୍ଟାର ମୂଲ୍ୟ ୩.୪ କୋଟି ଟଙ୍କା ବୋଲି ସତ୍ୟପାଠରୁ ଜଣାପଡିଛି। ମୁମ୍ବଇ, ଭୋପାଳ, ନୋଏଡା, ଦିଲ୍ଲୀ, ପୁଣେ, ଅହମଦାବାଦ ଓ ଗାନ୍ଧିନଗରରେ ବଚ୍ଚନ ଦମ୍ପତିଙ୍କର ଏକାଧିକ ବିଳାସପୂର୍ଣ୍ଣ ବଙ୍ଗଳା ଓ ଫ୍ଲାଟ ଥିବାବେଳେ ସେମାନେ ଫ୍ରାନ୍ସର ବ୍ରିଗ୍‌ନୋଗାନ ପ୍ଲେଗ୍‌ରେ ୩୧୭୫ ବର୍ଗ ମିଟର ଜମି ମଧ୍ୟ କିଣିଛନ୍ତି। ଉତ୍ତର ପ୍ରଦେଶର ବାରାବାଙ୍କି ଜିଲା ଅନ୍ତର୍ଗତ ଦୌଲତପୁରରେ ଅମିତାଭଙ୍କ ନାମରେ ଥିବା ତିନି ଏକର ଜମିର ମୂଲ୍ୟ ୫.୭ କୋଟି ଟଙ୍କା ଓ ଲକ୍ଷ୍ନୌର କାକୋରି ଅଞ୍ଚଳରେ ଜୟାଙ୍କ ନାମରେ ଥିବା ୧.୨୨ ହେକ୍ଟର ଚାଷଜମିର ମୂଲ୍ୟ ୨.୨ କୋଟି ଟଙ୍କା ବୋଲି ସତ୍ୟପାଠରୁ ଜଣାପଡିଛି। ଜୟା ସମାଜବାଦୀ ପାର୍ଟି ପ୍ରାର୍ଥୀଭାବେ ଚତୁର୍ଥ ଥର ରାଜ୍ୟସଭା ନିର୍ବାଚନ ଲଢିବାକୁ ଯାଉଛନ୍ତି। ୨୦୧୨ ନିର୍ବାଚନ ସମୟରେ ଜୟା ନିଜର ସମ୍ପତ୍ତି ବାବଦରେ ଯେଉଁ ସତ୍ୟପାଠ ଦାଖଲ କରିଥିଲେ, ସେଥିରେ ଦୁଇଗୁଣ ବୃଦ୍ଧି ପାଇଥିବା ଜଣାପଡିଛି।

ବାବୁସାନ୍‌-ଅଶୋକ ଏଗାର ପରେ ବି ନଟ୍‌ଆଉଟ୍‌

ଭୁବନେଶ୍ୱର : ଓଲିଉଡର ଷ୍ଟାରସନ୍‌ ବାବୁସାନ୍‌ ଇତିମଧ୍ୟରେ ଜଣେ ନିର୍ଦ୍ଦେଶକଙ୍କ ସହ ଏଗାରଟି ସିନେମାରେ କାମ କରିସାରିଲେଣି। ଏବେ ବାର ନମ୍ବର ଫିଲ୍ମର ସୁଟିଂ କରୁଛନ୍ତି ଏହି ନିର୍ଦ୍ଦେଶକ-ନାୟକଙ୍କ ଯୋଡ଼ି। ଏଠାରେ ଯେଉଁ ନିର୍ଦ୍ଦେଶକଙ୍କ କଥା କୁହାଯାଉଛି, ସେ ହେଲେ ଷ୍ଟାଇଲିସ୍‌ ଡିରେକ୍ଟର ଅଶୋକ ପତି।

ଅଶୋକ ପତି ବାବୁସାନ୍‌ଙ୍କୁ ନାୟକ ଭାବେ ନେଇ ସର୍ବ ପ୍ରଥମେ ତିଆରି କରିଥିଲେ ଓଡ଼ିଆ ଛବି ‘ସଂଜୁ ଆଉ ସଂଜନା’। ଏହାପରେ ଅଶୋକ ତାଙ୍କ ନିର୍ଦ୍ଦେଶିତ ଅଧିକାଂଶ ଫିଲ୍ମରେ ବାବୁସାନ୍‌ଙ୍କୁ ନାୟକ ରୂପେ ନେଇଛନ୍ତି। ‘ସଂଜୁ ଆଉ ସଂଜନା’ ପରେ ଅଶୋକ-ବାବୁସାନ୍‌ଙ୍କ ଯୋଡ଼ି ଯେଉଁସବୁ ଫିଲ୍ମରେ ଏକାଠି କାମ କରିଥିଲେ ସେଗୁଡ଼ିକ ହେଲା ଲୋଫର୍‌, ଦୋସ୍ତି, ଓ୍ଵାନ୍‌ ଫୋର୍‌ ଥ୍ରି ଆଇ ଲଭ୍‌ ୟୁ, ଇଡିଅଟ୍‌, ଦିଓ୍ଵାନା ଦିଓ୍ଵାନି, ଲଭ ପାଇଁ କୁଛ୍‌ ଭି କରେଗା ଓ ସିଷ୍ଟର ଶ୍ରୀଦେବୀ।

ବାବୁସାନ୍‌-ଅଶୋକ ପତିଙ୍କ ଯୋଡ଼ି ନଟ୍‌ ଆଉଟ୍‌ ରହିଛନ୍ତି। ଏହି ଯୋଡ଼ିର ଦୁଇଟି ବ୍ଲକବଷ୍ଟର ମୁଭି ହେଲା ‘ସୁପର ମିଛୁଆ’ ଏବଂ ‘ଲଭ୍‌ ଷ୍ଟେସନ’।

ଏବେ ଏହି ଯୋଡ଼ି ସେମାନଙ୍କର ୧୨ ନମ୍ବର ସିନେମାର ସୁଟିଂ ଜୋରସୋରରେ ଚଳାଇଛନ୍ତି। ଏଯାବତ୍‌ ଏହି ଫିଲ୍ମର ଟାଇଟଲ୍‌ ଫାଇନାଲ୍‌ ହୋଇନାହିଁ। ଏହି ଫିଲ୍ମର ପ୍ରଯୋଜନା କରୁଛନ୍ତି ଓଲିଉଡର ଜଣାଶୁଣା ପ୍ରଯୋଜନା ସଂସ୍ଥା ତରଙ୍ଗ ସିନେ ପ୍ରଡକସନ୍‌ସ। ସୀତାଂଶୁ ମହାପାତ୍ର ଏହା ନାମକରଣ ହୋଇନଥିବା ସିନେମାର ସିନେମାଟୋଗ୍ରାଫର୍‌। ଏଥିରେ ବରିଷ୍ଠ ଅଭିନେତା ମିହିର ଦାସ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି।

ନିଆଁ ଲଗାଇ ମହିଳାଙ୍କ ଆତ୍ମହତ୍ୟା : କାରଣ ଅସ୍ପଷ୍ଟ…!

ଏଥର ସମ୍ଭାଳ ବ୍ୟୁରୋ(ବୁର୍ଲା)- ଅନୁଗୁଳ ଜିଲ୍ଲା କିଶୋରନଗର ଥାନା କୁଟାସିଂଘା ଗାଁର ଅଜିତ ବେହେରାଙ୍କ ସ୍ତ୍ରୀ ହିମାଦ୍ରୀ ବେହେରା(୨୦) ନିଜ ଦେହରେ କିରୋସିନ ଢାଳି ନିଆଁ ଲଗାଇ ମଙ୍ଗଳବାର ଆତ୍ମହତ୍ୟା କରିଛନ୍ତି। ତାଙ୍କୁ ଗୁରୁତର ଅବସ୍ଥାରେ ବୁର୍ଲାମେଡ଼ିକାଲ୍‍କୁ ଚିକିତ୍ସା ପାଇଁ ଅଣାଯାଉଥିବା ବେଳେ ରାସ୍ତାରେ ତାଙ୍କ ପ୍ରାଣ ବାୟୁ ଉଡ଼ିଯାଇଥିଲା। ମେଡ଼ିକାଲ୍‍ ଆଶୁ ଚିକିତ୍ସା ବିଭାଗରେ ଡାକ୍ତର ତାଙ୍କ ମୃତ ଘୋଷଣା କରିଥିଲେ। ତେବେ ମୃତ ମହିଳାଙ୍କ ମାଆଘର ଲୋକଙ୍କ ଅନୁପସ୍ଥିତ ଶବକୁ ମେଡ଼ିକାଲ୍‍ ଶବଗୃହରେ ରଖାଯାଇଥିଲା। ବୁଧବାର ସମ୍ବଲପୁର ମାଜିଷ୍ଟ୍ରେଟ୍‍ଙ୍କ ଉପସ୍ଥିତିରେ ଶବ ଇନକ୍ୟୁଏଷ୍ଟ କରାଯାଇ ବ୍ୟବଚ୍ଛେଦ ପାଇଁ ପଠାଯାଇଥିଲା। ଏନେଇ ମେଡ଼ିକାଲ୍‍ ପୁଲିସ୍‍ ଫାଣ୍ଡିରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ତେବେ ପରିବାର ଲୋକଙ୍କ କହିବା ଅନୁସାରେ ମୃତ ମହିଳାଙ୍କ ସ୍ୱାମୀ ଅଜିତ ସୋମବାର ରାତି ସ୍ତ୍ରୀର ବାରଣ ସତେ୍ଵ ପାଖ ଅଞ୍ଚଳରେ ହେଉଥିବା ଏକ ଯାତ୍ରା ଦେଖିବାକୁ ଚାଲିଯାଇଥିଲେ। ମଙ୍ଗଳବାର ସକାଳେ ସେ ଘରକୁ ଫେରି ଛୁଆକୁ ନେଇ ବାହାରକୁ ଯାଇଥିବା ବେଳେ କୌଣସି କଥାକୁ ନେଇ ସ୍ତ୍ରୀ ହିମାଦ୍ରୀ ଦେହରେ କିରୋସିନ ଢାଳି ନିଆଁ ଲଗାଇଦେଇଥିଲେ। ତାଙ୍କ ଶରୀରର ଶହେ ପ୍ରତିଶତ ଅଂଶ ନିଆଁରେ ପୋଡ଼ି ଯାଇଥିବା ଡାକ୍ତରୀ ଏମ୍‍ଏଲସି ରିପୋର୍ଟରୁ ପ୍ରକାଶ। ତେବେ କାରଣ ସ୍ପଷ୍ଟ ହୋଇନଥିବା ବେଳେ ମହିଳାଙ୍କ ମାଆଘର ପକ୍ଷରୁ ମଧ୍ୟ ପୁଲିସ୍‍ ନିକଟରେ କୌଣସି ଅଭିଯୋଗ ହୋଇ ନଥିବା ଇ.ଓ ଏସ୍‍ଆଇ କଲ୍ୟାଣ ସାହୁ କହିଛନ୍ତି।

ଓକିଲ ସଂଘ ପକ୍ଷରୁ ସରକାରୀ କାର୍ଯ୍ୟାଳୟ ବନ୍ଦ

ଆଇନଜୀବୀ ସଚୀକାନ୍ତ ଦାଶଙ୍କ ଉପରେ ହୋଇଥିବା ମରଣାନ୍ତକ ଆକ୍ରମଣ ଘଟଣାକୁ ନିନ୍ଦା କରିଛି ଦେବଗଡ଼ ଜିଲ୍ଲା ବିଜେପି। ଜିଲ୍ଲା ସଭାପତି ଅରୁଣ ସାହୁ ବୁଧବାର ଜାରି କରିଥଇବା ଏକ ପ୍ରେସ୍‌ ବିବୃତ୍ତି ଜରିଆରେ ଉକ୍ତ ଘଟଣା ଅତି ନିନ୍ଦନୀୟ ଓ ଶୀଘ୍ର ଉପଯୁକ୍ତ ତଦନ୍ତ କରାଯାଇ ଦୋଷୀଙ୍କୁ ଗିରଫ କରିବାକୁ ଦାବି କରିଛନ୍ତି।
ଦେବଗଡ଼/ରିଆମାଳ: ଗତ ୧୦ ତାରିଖ ଦିନ ଦେବଗଡ଼ର ଆଇନଜୀବୀ ସଚୀକାନ୍ତ ଦାଶଙ୍କୁ ଦୁଇ ଜଣ ମୁଖାପିନ୍ଧା ଦୁର୍ବୃତ୍ତ ଠେଙ୍ଗାରେ ମରଣାନ୍ତକ ଆକ୍ରମଣ କରିିଥିଲେ। ଏ ନେଇ ଶ୍ରୀ ଦାଶ ଉକ୍ତ ଦିନ ହିଁ ଦେବଗଡ଼ ଥାନାରେ ଲିଖିତ ଅଭିଯୋଗ କରିଥିବା ବେଳେ ଦେବଗଡ଼ ଓକିଲ ସଂଘ ଏସ୍‌ପି ବି. ଗଙ୍ଗାଧରଙ୍କୁ ଭେଟି ଦୁର୍ବୃତ୍ତମାନଙ୍କୁ ୩ ଦିନ ମଧ୍ୟରେ ଗିରଫ କରିବାକୁ ଦାବି କରିଥିଲେ। ମାତ୍ର ତଦନ୍ତରେ ପୁଲିସ୍‌ ଶିଥିଳତା ପ୍ରଦର୍ଶନ କରୁଥିବା ଅଭିଯୋଗ କରି ପ୍ରତିବାଦରେ ସଂଘ ପକ୍ଷରୁ ବୁଧବାର ଦେବଗଡ଼ରେ ସମସ୍ତ ସରକାରୀ କାର୍ଯ୍ୟାଳୟ ବନ୍ଦ କରାଯାଇଥିଲା। ସଂଘ ସଭାପତି ପ୍ରମଥେଶ ଗୁରୁଙ୍କ ନେତୃତ୍ୱରେ ଓକିଲମାନେ ପିକେଟିଂ କରି ସମସ୍ତ ସରକାରୀ କାର୍ଯ୍ୟାଳୟ, କୋର୍ଟ, ପୋଷ୍ଟ ଅଫିସ ଆଦିକୁ ବନ୍ଦ କରାଇଥିଲେ। ଫଳରେ ଆଜି ହେବାକୁ ଥିବା ଜିଲ୍ଲା ପରିଷଦର ବୈଠକକୁ ମଧ୍ୟ ମଙ୍ଗଳବାରଠାରୁ ବାତିଲ କରି ଦିଆଯାଇଥିଲା।

ଏହା ସହିତ ଡିଆରଡିଏ କାର୍ଯ୍ୟାଳୟରେ ଚାଲିଥିବା ସରପଞ୍ଚମାନଙ୍କ ତାଲିମ କାର୍ଯ୍ୟକ୍ରମକୁ ବି ଓକିଲମାନେ ବନ୍ଦ କରାଇଥିଲେ। ଏଥିରେ ଓକିଲ ଦିଲୀପ ଗୁରୁ, ମନୋଜ ପାଢ଼ୀ, ରାଜୀବ ପ୍ରଧାନ, ରଂଜନ ସାହୁ, ଜୟ ଭଗବାନ ଅଗ୍ରଓ୍ଵାଲ, ଶୈଳେନ୍ଦ୍ର ସାହୁ, ପୃଥ୍ଵୀରାଜ ପଟ୍ଟନାୟକ, ରାଜକିଶୋର ପ୍ରଧାନ, ଅଭିଳାଷ ମିଶ୍ର, ଆଲୋକ ସୌରଭ ବେହେରା, ବିକାଶ ପ୍ରଧାନ, ତାପସ ମହାପାତ୍ର, ସଚ୍ଚିକାନ୍ତ ଦାଶ, ପ୍ରଣବ ସ୍ୱାଇଁଙ୍କ ସମତେ ବହୁ ଆଇନଜୀବୀ ସାମିଲ ହୋଇଥିଲେ। ସେହିପରି ରିଆମାଳ ଓକିଲ ସଂଘ ସଭାପତି ପ୍ରମୋଦ ନନ୍ଦଙ୍କ ନେତୃତ୍ୱରେ ଓକିଲମାନେ ପିକେଟିଂ କରି ଅଂଚଳର ବିଭିନ୍ନ ସରକାରୀ କାର୍ଯ୍ୟାଳୟଗୁଡ଼ିକୁ ବନ୍ଦ କରାଇଥିଲେ।

ଜମିବାଡ଼ିକୁ କେନ୍ଦ୍ର କରି ମାଡ଼ପିଟ:ମହିଳା ଗୁରୁତର

ବେଲପାହାଡ଼: ବେଲପାହାଡ ଗୁମାଡେରା ସ୍କୁଲ ପଡାରେ ୩ ଭାଇଙ୍କ ମଧ୍ୟରେ ଜମିବାଡିକୁ କେନ୍ଦ୍ର ମାଡପିଟ ହୋଇଛି। ଏଥିରେ ବଡଭାଇ ଆକ୍ରମଣରେ କରିବାରୁ ତାଙ୍କ ସାନ ଭାଇଙ୍କ ସ୍ତ୍ରୀ ଆହତ ହୋଇଛନ୍ତି। ଆହତ ମହିଳାକୁ ଜାହାଙ୍ଗୀର ଗାନ୍ଧି ହସପିଟଲରେ ଚିକିତ୍ସା କରିବା ପରେ ଚିକିତ୍ସକ ଆହତ ମହିଳାକୁ ବୁର୍ଲା ପଠାଇଥିବା ଜଣାପଡିଛି। ଆହତ ମହିଳାଙ୍କ ନାଁ ସଂଯୁକ୍ତା ହାତି। ତିନି ଭାଇ ବଡବାବୁ ହାତି (୩୫), ସଂକୀର୍ତନ (୨୨) ଓ ଚୁନୁ ମଧ୍ୟରେ ଜମିବାଡ଼ି ବିବାଦ ରହିଛି। ବଡ ଭାଇ ଠେଙ୍ଗାରେ ଆକ୍ରମଣ କରିବାରୁ ଚୁନୁ ହାତିଙ୍କ ସ୍ତ୍ରୀ ସଂଯୁକ୍ତାଙ୍କ ମୁଣ୍ଡରେ ଆଘାତ ଲାଗିଥିଲା। ବେଲପାହାଡ଼ ପୁଲିସ ଘଟଣାର ଖବର ପାଇଁ ଅନୁସଂଧାନ ଜାରି ରଖିଛି।

ବିବାହ ପ୍ରଲୋଭନ ଦେଇ ନାବାଳିକାକୁ ଦୁଷ୍କର୍ମ

ଝାରସୁଗୁଡ଼ା: ମିଥ୍ୟା ବିବାହ ପ୍ରଲୋଭନ ଦେଖାଇ ଶାରୀରିକ ସଂପର୍କ ରଖୁଥିବା ଜଣେ ନାବାଳକ ବିରୋଧରେ ଅଭିଯୋଗ ଆଣିଛନ୍ତିି ଜଣେ ନାବାଳିକା। ଏନେଇ ଝାରସୁଗୁଡ଼ା ଥାନାରେ ଏକ ମାମଲା ରୁଜୁ ହୋଇଛି। ସମ୍ବଲପୁର ଜିଲ୍ଲା ଠେଲକୁଲି ଥାନା ଅନ୍ତର୍ଗତ ଏହି ନାବାଳିକାର ବୟସ ୧୫ ହୋଇଥିବା ବେଳେ ଅଭିଯୁକ୍ତର ବୟସ ୧୭ ବୋଲି ଜଣାପଡ଼ିଛି। ନାବଳିକାର ମାଁ ନଥିବା ବେଳେ ବାପା ଅଛନ୍ତି। ତେବେ ସେ ଝାରସୁଗୁଡ଼ା ଠାରେ ଜଣେ ସଂପର୍କୀୟଙ୍କ ଘରେ ଗତ ଏକ ମାସ ହେଲା ରହୁଛନ୍ତି। ଏହି ସମୟ ମଧ୍ୟରେ ନାବାଳିକା ସହିତ ନିକଟରେ ରହୁଥିବା ସଂପୃକ୍ତ ନାବାଳକର ସଂପର୍କ ଗଢ଼ି ଉଠିଥିଲା ଓ ଉଭୟଙ୍କ ମଧ୍ୟରେ ଶାରୀରିକ ସଂପର୍କ ହୋଇଥିଲା। ନାବାଳକ କୁଆଡ଼େ ଉକ୍ତ ନାବାଳିକାକୁ ବିବାହ କରିବାର ପ୍ରତିଶ୍ରୁତି ଦେଇଥିଲା। ପରେ ମନା କରିବାରୁ ନାବାଳିକା ଥାନାରେ ଲିଖିତ ଅଭିଯୋଗ କରିଥିଲା। ପୁଲିସ ମାମଲା ରୁଜୁ କରି ନାବାଳକ ନାମରେ ପୋକସୋ ଧାରା ୪ ଓ ଆଇପିସି ୩୬୯ ଦାୟାର କରି ତଦନ୍ତ ଆରମ୍ଭ କରିଛି। ନାବାଳିକାର ଡାକ୍ତରୀ ମାଇନା ପରେ ତାକୁ ଚାଇଲ୍‌ଡ଼ ଲାଇନ ସହାୟତାରେ ସିଡବ୍ଲୁସିରେ ଉପସ୍ଥାପନ କରାଯାଇଥିଲା । ପରେ ଓପନ୍‌ ସେଲ୍‌ଟରକୁ ପଠାଯାଇଛି।

ତେଜସ ଓ ଶତାବ୍ଦୀ ଟ୍ରେନ୍‌ରେ ଏଣିକି ସିନେମା, ଭିଡିଓ ଗେମ୍‌ ଓ ଗୀତର ମଜା ଉଠାଇ ପାରିବେ ନାହିଁ ଯାତ୍ରୀ, କାରଣ ଜାଣନ୍ତୁ

ନୂଆଦିଲ୍ଲୀ: ତେଜସ ଏକ୍ସପ୍ରେସ ଓ ମୁମ୍ବାଇ ଅହମ୍ମଦାବାଦ ଶତାବ୍ଦୀରେ ଯଦି ଯାତ୍ରା କରୁଛନ୍ତି ତେବେ ଆପଣ ଏଣିକି ସିନେମା, ଭିଡିଓ ଗେମ୍‌ ଓ ଗୀତର ମଜା ନେଇ ପାରିବେ ନାହିଁ। ଏହି ଟ୍ରେନ୍‌ରେ ରେଳବାଇ ଏଣ୍ଟରଟେନ୍‌ମେଣ୍ଟ ପାଇଁ ସିଟ ପଛପାର୍ଶ୍ୱରେ ଏଲସିଡି ସ୍କ୍ରିନ୍‌ ଲାଗାଇଥିଲେ।

ସୂଚନାଯୋଗ୍ୟ, ଯାତ୍ରୀମାନେ ଏଲ୍‌ସିଡି ସ୍କ୍ରିନ୍‌ ଭାଙ୍ଗିବା ସହିତ ତାରକୁ ବି ଛିଣ୍ଡାଇ ଦେଇଛନ୍ତି। ବାରମ୍ବାର ଯାତ୍ରୀ ଏହାକୁ ନଷ୍ଟ କରିବାର ଖବର ମିଳୁଥିଲା। କେବଳ ଏତିକି ନୁହେଁ ହେଡଫୋନ୍‌ ମଧ୍ୟ କିଏ କେଉଁଆଡେ ନେଇ ଚାଲି ଯାଉଛନ୍ତି। ପାଓ୍ଵର ସୁଇଜ ବି ବାହାର କରି ଦେଉଛନ୍ତି। ଏହି କାରଣରୁ ରେଲବାଇ ତେଜସ ଏକ୍ସପ୍ରେସ ଓ ମୁମ୍ବାଇ ଅହମ୍ମଦାବାଦ ଶତାବ୍ଦୀରେ ଲାଗିଥିବା ଏଲସିଡି ସ୍କ୍ରିନ୍‌କୁ ବାହାର କରି ଦେବା ପାଇଁ ନିଷ୍ପତ୍ତି ନେଇଛନ୍ତି।

ରେଳବାଇ ବୋର୍ଡର ଜଣେ ବରିଷ୍ଠ ଅଧିକାରୀଙ୍କ କହିବାନୁସାରେ, ରେଳବାଇକୁ ଏହି ଏଲସିଡି ସ୍କ୍ରିନ୍‌ ହଟାଇବା ଆଦେଶ ଫେବ୍ରୁଆରିରୁ ଲାଗୁ କରିବା ପାଇଁ କୁହାଯାଇଥିଲା। ରେଲାବାଇ ସମସ୍ତ ଜୋନ୍‌ ରେଳରୁ ଏଲସିଡି ସ୍କ୍ରିନ୍‌ ହଟାଇବା କାମ ଆରମ୍ଭ କରି ଦେଲେଣି। ଏହା ପରିବର୍ତ୍ତେ ରେଳରେ ମାଗଣା ଓ୍ଵାଇଫାଇ ବ୍ୟବସ୍ଥା ଲାଗୁ କରିବା ପାଇଁ ଯୋଜନା କରାଯାଉଛି। ବର୍ତ୍ତମାନ କେବଳ ପ୍ରିମିୟମ ଟ୍ରେନ୍‌ରେ ଓ୍ଵାଇଫାଇ ସୁବିଧା ଉପଲବ୍ଧ ରହିଛି।

ଭାରତରେ ପ୍ରଥମେ ତେଜସ ଏକ୍ସପ୍ରେସ ମୁମ୍ବାଇ ଓ ଗୋଆ ମଧ୍ୟରେ ୨୦୧୭ ମଇରୁ ଆରମ୍ଭ କରାଯାଇଥିଲା। ଏଥିରେ ବିଶେଷ ସୁବିଧା ଉପଲବ୍ଧ ଯେପରି କି ସିଟ ପଛପାର୍ଶ୍ୱରେ ଯାତ୍ରୀଙ୍କ ପାଇଁ ଏଲସିଡି ସ୍କ୍ରିନ୍‌ ଖଞ୍ଜା ଯାଇଥିଲା। ଯାହା ମୁଖ୍ୟ ଆକର୍ଷଣ ଥିଲା।

କେତେକ ଅସାଧୁ ବ୍ୟବସାୟୀ ଆମ ଦେଶର ଭବିଷ୍ୟତକୁ ଲୁଟୁଛନ୍ତି : ପିଏନବି ଠକେଇ ନେଇ ମୁହଁ ଖୋଲିଲେ ଉର୍ଜିତ ପଟେଲ

ଗାନ୍ଧିନଗର : ବହୁକୋଟି ଟଙ୍କାର ପିଏନବି ଠକେଇକୁ ନେଇ ବେଶକିଛି ଦିନ ଧରି ଚୁପ ରହିଥିିବା ରିଜର୍ଭ ବ୍ୟାଙ୍କ ଗଭର୍ଣ୍ଣର ଉର୍ଜିତ ପଟେଲ ମୁହଁ ଖୋଲିଛନ୍ତି । ଦେଶର ବ୍ୟାଙ୍କ ଗୁଡ଼ିକରେ ବଡ଼ ବଡ଼ ଠକେଇ ଧରାପଡୁଥିବାରୁ ସେ ଚିନ୍ତା ଓ ଅସନ୍ତୋଷ ପ୍ରକାଶ କରିଛନ୍ତି । କେତେକ ଅସାଧୁ ବ୍ୟବସାୟୀ ଆମ ଦେଶର ଭବିଷ୍ୟତକୁ ଲୁଟୁଛନ୍ତି ବୋଲି ସେ କହିଛନ୍ତି । ତେବେ ଏସବୁକୁ ନିୟନ୍ତ୍ରଣ କରିବାର କ୍ଷମତା ରିଜର୍ଭ ବ୍ୟାଙ୍କ ପାଖରେ ନାହିଁ ବୋଲି ସେ ଅସହାୟତା ପ୍ରକାଶ କରିଛନ୍ତି । ରାଷ୍ଟ୍ରାୟତ ବ୍ୟାଙ୍କଗୁଡ଼ିକ ଉପରେ ଅଧିକ ନିୟନ୍ତ୍ରଣ ପାଇଁ ରିଜର୍ଭ ବ୍ୟାଙ୍କକୁ ଅଧିକ କ୍ଷମତା ଦିଆଯିବା ଆବଶ୍ୟକ ବୋଲି ସେ କହିଛନ୍ତି । ସେ କହିଛନ୍ତି ଯେ ନୀଳକଣ୍ଠ ପରି ରିଜର୍ଭ ବ୍ୟାଙ୍କ ସବୁ ନିନ୍ଦା ଅପବାଦ ସହିବ, କିନ୍ତୁ ବ୍ୟାଙ୍କ ବ୍ୟବସ୍ଥାକୁ ସ୍ୱଚ୍ଛ କରିବାକୁ ନିଜର ଉଦ୍ୟମ ଅବ୍ୟାହତ ରଖିବ । ଗୁଜୁରାଟ ଜାତୀୟ ଆଇନ ବିଶ୍ୱ ବିଦ୍ୟାଳୟର ସମାବର୍ତ୍ତନ ଉତ୍ସବରେ ଯୋଗ ଦେଇ ସେ କହିଛନ୍ତି ଯେ ଏସବୁ ବ୍ୟାଙ୍କ ଠକେଇକୁ ନେଇ ରିଜର୍ଭ ବ୍ୟାଙ୍କରେ ମଧ୍ୟ କ୍ରୋଧର ବାତାବରଣ ଅଛି । ସରଳ ଭାଷାରେ କହିଲେ କେତେକ ଅସାଧୁ ବ୍ୟବସାୟୀ ଆମ ଦେଶର ଭବିଷ୍ୟତକୁ ଲୁଟୁଛନ୍ତି । ଆଗକୁ ଯେପରି ଏହାକୁ ରୋକିହେବ ସେଥିପାଇଁ ଉଦ୍ୟମ କରାଯାଉଛି । କିନ୍ତୁ ରାଷ୍ଟ୍ରାୟତ ବ୍ୟାଙ୍କଗୁଡ଼ିକ ଉପରେ ରିଜର୍ଭ ବ୍ୟାଙ୍କର ନିୟନ୍ତ୍ରଣ ସୀମିତ । ଏକ ବ୍ୟାଙ୍କର ନିର୍ଦ୍ଦେଶକଙ୍କୁ ହଟାଇବା, ପରିଚାଳନାରେ ପରବର୍ତ୍ତନ, ଅନ୍ୟ ବ୍ୟାଙ୍କ ସହ ମିଶ୍ରଣ କରିବାର କ୍ଷମତା ଆରବିଆଇର ନାହିଁ । ଆହୁରି ମଧ୍ୟ ରାଷ୍ଟ୍ରାୟତ ବ୍ୟାଙ୍କଗୁଡ଼ିକ ଉପରେ ସରକାରଙ୍କ ମଧ୍ୟ ନିୟନ୍ତ୍ରଣ ରହୁଛି । ଏଣୁ ରାଷ୍ଟ୍ରାୟତ ବ୍ୟାଙ୍କଗୁଡ଼ିକ ଉପରେ ଦୁଇପଟିଆ ନିୟନ୍ତ୍ରଣ ରହିଛି । ଏହା ଦ୍ୱାରା ଦୂର୍ବଳତା ଦେଖାଦେଉଛି ବୋଲି ସେ କହିଛନ୍ତି ।

ନିରବ, ଚୋକ୍‌ସିଙ୍କ ବିରୋଧରେ ରେଡ୍‌ କର୍ଣ୍ଣର ନୋଟିସ୍‌!

ନୂଆଦିଲ୍ଲୀ: ପିଏନ୍‌ବି ଠକେଇ ମାମଲାର ଦୁଇ ଅଭିଯୁକ୍ତ ନିରବ ମୋଦି ଏବଂ ତାଙ୍କ ମାମୁଁ ମେହୁଲ ଚୋକ୍‌ସିଙ୍କ ବିରୋଧରେ ରେଡ୍‌ କର୍ଣ୍ଣର ନୋଟିସ୍‌ ଜାରି କରିବାକୁ ପ୍ରବର୍ତ୍ତନ ନିର୍ଦେଶାଳୟ (ଇଡି) ପକ୍ଷରୁ ଇଣ୍ଟରପୋଲ୍‌ ନିକଟରେ ଆବେଦନ କରାଯାଇଛି। ଇଡି ପକ୍ଷରୁ ଏହି ଦୁଇ ଜଣଙ୍କ ବିରୋଧରେ ମନି ଲଣ୍ଡରିଂ ମାମଲା ଦାୟର କରି ତଦନ୍ତ କରାଯାଉଛି। କୋର୍ଟ ପକ୍ଷରୁ ତାଙ୍କ ବିରୋଧରେ ଜାମିନ ବିହୀନ ଗିରଫ ପରଓ୍ଵାନା ମଧ୍ୟ ଜାରି କରାଯାଇଛି। ସେହି ଆଧାରରେ ରେଡ୍‌ କର୍ଣ୍ଣର ନୋଟିସ୍‌ ଜାରି କରାଯାଉ ବୋଲି ଇଡି ଇଣ୍ଟରପୋଲ୍‌କୁ କହିଛି। ଫ୍ରାନ୍ସରେ ଥିବା ଇଣ୍ଟରପୋଲ୍‌ ମୁଖ୍ୟ କାର୍ଯ୍ୟାଳୟରେ ଏହି ମାମଲା ବିଷୟରେ ଆଲୋଚନା କରିବାକୁ ଇଡି ପକ୍ଷରୁ ସିବିଆଇକୁ ମଧ୍ୟ କୁହାଯାଇଛି। ଅପରାଧିକ ମାମଲାର ଅଭିଯୁକ୍ତଙ୍କୁ ଖୋଜି ବାହାର କରିବା ଏବଂ ତାଙ୍କୁ ଖୋଜୁଥିବା ଦେଶକୁ ଆଇନଗତ ଉପାୟରେ ହସ୍ତାନ୍ତର କରିବା ପାଇଁ ରେଡ୍‌ କର୍ଣ୍ଣର ନୋଟିସ୍‌ ଜାରି କରାଯାଏ।