ଅଣଦେଖା ଭାରତୀୟ କ୍ରିକେଟର କଲେ ବିଶ୍ୱ ରେକର୍ଡ

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ସେ ଲିଷ୍ଟ ଏରେ ଆଉଟ ନ ହୋଇ ସର୍ବାଧିକ ରନ କରିବାର ବିଶ୍ୱ ରେକର୍ଡ ନିଜ ନାଁରେ କରିଛନ୍ତି। ଆଜି ସେ ବିଜୟ ହଜାରେ ଟ୍ରଫିରେ ଦମଦାର ଇନିଂସ ଖେଳି ଉତ୍ତର ପ୍ରଦେଶ ବିପକ୍ଷରେ ବିର୍ଦ୍ଦଭାକୁ ୮ ୱିକେଟରେ ବିଜୟ ଭେଟି ଦେଇଛନ୍ତି। ଇତିହାସ ରଚିଛନ୍ତି କରୁଣ ନାଏର। ଏକଦା ଭାରତୀୟ ଟିମରେ ଖେଳୁଥିବା କରୁଣ ଇଂଲଣ୍ଡ ବିପକ୍ଷ ଟେଷ୍ଟରେ ୩୦୦ ରନର ଇନିଂସ ଖେଳିଥିଲେ। ସେ ବାରମ୍ବାର ଘରୋଇ କ୍ରିକେଟରେ ଭଲ ପ୍ରଦର୍ଶନ କରିଥିଲେ ହେଁ ଭାରତୀୟ ଟିମରେ ତାଙ୍କୁ ଅଣଦେଖା କରାଯାଇଛି। ଏସବୁ ଭିତରେ ଶୁକ୍ରବାର କରୁଣ ବିଶ୍ୱ ରେକର୍ଡ କରିଛନ୍ତି। ସେ ଲିଷ୍ଟ ଏରେ ଆଉଟ ନ ହୋଇ ସର୍ବାଧିକ ରନ କରିବାର ବିଶ୍ୱ ରେକର୍ଡ ନିଜ ନାଁରେ କରିଛନ୍ତି। ଆଜି ସେ ବିଜୟ ହଜାରେ ଟ୍ରଫିରେ ଦମଦାର ଇନିଂସ ଖେଳି ଉତ୍ତର ପ୍ରଦେଶ ବିପକ୍ଷରେ ବିର୍ଦ୍ଦଭାକୁ ୮ ୱିକେଟରେ ବିଜୟ ଭେଟି ଦେଇଛନ୍ତି। ଆଜିର ମ୍ୟାଚ୍‌ ବିଜୟୀ ଇନିଂସ ପରେ କରୁଣ ନାଏର ନ୍ୟୁଜିଲ୍ୟାଣ୍ଡର ଜେମ୍ସ ଫ୍ରାଙ୍କଲିନ ୨୦୧୦ରେ କରିଥିବା ବିଶ୍ୱ ରେକର୍ଡକୁ ଭାଙ୍ଗି ଦେଇଛନ୍ତି। ୨୦୧୦ରେ ଫ୍ରାଙ୍କଲିନ ବିନା ଆଉଟରେ ବିଭିନ୍ନ ଲିଷ୍ଟ ଏ ମ୍ୟାଚ୍‌ରେ ସର୍ବାଧିକ ୫୨୭ ରନ କରିଥିଲେ। ହେଲେ କରୁଣ ଆଜି ୧୧୨ ରନ କରି ଆଉଟ ହୋଇଥିଲେ ହେଁ ବିଶ୍ୱ ରେକର୍ଡକୁ ନିଜ ନାଁରେ କରି ଦେଇଛନ୍ତି। ସେ ବିନା ଆଉଟରେ ୫୪୨ ରନ କରିଛନ୍ତି। ଏହାପରେ ଆଜି ଆଉଟ ହୋଇ ନୂଆ ବେଞ୍ଚ ମାର୍କ ସୃଷ୍ଟି କରିଛନ୍ତି। ଏହି ତାଲିକାରେ ଥିବା ଅନ୍ୟ ଖେଳାଳିମାନେ ହେଲେ ଦକ୍ଷିଣ ଆଫ୍ରିକାର ଜୋଶୁଆ ଭାନ ହୀରଡେନ(୫୧୨), ପାକିସ୍ତାନର ଫକର ଜମାନ(୪୫୫) ଓ ତୌଫିକ ଉମର(୪୨୨)। କରୁଣଙ୍କ ଏହା ୪ର୍ଥ ଶତକ ହୋଇଥିବା ବେଳେ ବିଜୟ ହଜାରେ ଟ୍ରଫିରେ ତୃତୀୟ ଟନ୍‌। ଏଥିଯୋଗୁ ଉତ୍ତର ପ୍ରଦେଶର ୩୦୮ ରନର ଟାର୍ଗେଟକୁ ବିର୍ଦ୍ଦଭା ୧୬ ବଲ ପୂର୍ବରୁ ୨ ୱିକେଟ ହରାଇ ହାସଲ କରି ନେଇଛି। କରୁଣ ନାଏର ୧୧୨ ରନର ଇନିଂସ ଖେଳିଥିବା ବେଳେ ୟାଶ ରାଥୋଡ ୧୪୦ ବଲରେ ଅପରାଜିତ ୧୩୮ ରନ କରିଛନ୍ତି। ଉଭୟ ଦ୍ୱିତୀୟ ୱିକେଟ ପାଇଁ ବିଶାଳ ୨୨୮ ରନର ଭାଗିଦାରୀ ମଧ୍ୟ କରିଥିଲେ। ଏହି ବିଜୟ ସହ ଗ୍ରୁପ ଡିର ୧ନଂ ସ୍ଥାନରେ ବିର୍ଦ୍ଦଭା ନିଜ ସ୍ଥାନକୁ ଆହୁରି ମଜବୁତ କରିନେଇଛି। ୫ଟି ମ୍ୟାଚ୍‌ରୁ ୨୦ ପଏଣ୍ଟ ପାଇ ଦଳ ୧ନଂରେ ରହିଥିବା ବେଳେ ୧୪ ପଏଣ୍ଟ ସହ ତାମିଲନାଡୁ ଦ୍ୱିତୀୟରେ ଓ ସମାନ ୧୪ ପଏଣ୍ଟ ସହ ୟୁପି ତୃତୀୟ ସ୍ଥାନରେ ଅଛି।

ପୁଣି ନିରାଶ କଲେ ଭାରତୀୟ ବ୍ୟାଟର;ବଦଳିଲେ କ୍ୟାପ୍ଟେନ,କିନ୍ତୁ ବଦଳିଲାନି ଭାଗ୍ୟ

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ଦଳ ପକ୍ଷରୁ ଋଷଭ ପନ୍ତ ସର୍ବାଧିକ ୪୦ ରନ କରିଥିବା ବେଳେ ଶେଷ ଭାଗରେ ଅଧିନାୟକ ବୁମ୍ରା ୨୨ ରନର ଇନିଂସ ଖେଳିବାରୁ ଦଳ ୧୮୫ କରିବାକୁ ସକ୍ଷମ ହୋଇଛି। ପ୍ରଥମେ ପର୍ଥରେ ବ୍ୟାଟର ନିରାଶ କଲେ। କିନ୍ତୁ ବୋଲରଙ୍କ ଦମରେ ଭାରତ ଚମତ୍କାର ଢଙ୍ଗରେ ମ୍ୟାଚ୍‌ ଜିତି ନେଲା। ଏହାପରେ ପିଙ୍କ ବଲ ଟେଷ୍ଟରେ ବ୍ୟାଟର ପୁଣି ହାତ ଟେକି ଦେଲେ। ଭାରତ ୧୦ ୱିକେଟରେ ହାରିଲା। ତୃତୀୟ ଟେଷ୍ଟରେ ମଧ୍ୟ ଭାରତ ହାରିବାର ଯଥେଷ୍ଟ ଆଶଙ୍କା ରହିଥିଲା। କିନ୍ତୁ ବର୍ଷା ଦଳକୁ ବଞ୍ଚାଇ ଦେଲା। ମ୍ୟାଚ୍‌ ଡ୍ରରେ ଶେଷ ହେଲା। ୪ର୍ଥ ଟେଷ୍ଟରେ ପୁଣି ସମାନ ଘଟଣା ଘଟିଲା। ବ୍ୟାଟରଙ୍କ ବିଫଳତା ଯୋଗୁ ଅଷ୍ଟ୍ରେଲିଆ ଡ୍ର ହେବାକୁ ଯାଉଥିବା ମ୍ୟାଚ୍‌କୁ କବଜା କରିଥିଲା। ଏହି ବିଜୟ ସହ କଙ୍ଗାରୁ ଟିମ ବର୍ଡର-ଗାଭାସ୍କର ଟ୍ରଫିରେ ୨-୧ରେ ଆଗୁଆ ହୋଇଗଲା। ୫ମ ତଥା ଶେଷ ଟେଷ୍ଟରେ ଭାରତୀୟ ଟିମ ନିଜର ନିୟମିତ ଅଧିନାୟକ ରୋହିତ ଶର୍ମାଙ୍କୁ ଚୂଡ଼ାନ୍ତ ଏକାଦଶରୁ ବାଦ ଦେଲା। ଯଶପ୍ରୀତ ବୁମ୍ରା କମାଣ ସମ୍ଭାଳିଲେ। କିନ୍ତୁ ସିଡନୀ ଟେଷ୍ଟର ପ୍ରଥମ ଇନିଂସରେ ବ୍ୟାଟରମାନେ ପୁଣି ନିରାଶ କରିଛନ୍ତି। ଭାରତୀୟ ଟିମ ପ୍ରଥମ ଇନିଂସରେ ମାତ୍ର ୧୮୫ ରନ କରି ଅଲଆଉଟ ହୋଇଯାଇଛି। ଦଳ ପକ୍ଷରୁ ଋଷଭ ପନ୍ତ ସର୍ବାଧିକ ୪୦ ରନ କରିଥିବା ବେଳେ ଶେଷ ଭାଗରେ ଅଧିନାୟକ ବୁମ୍ରା ୨୨ ରନର ଇନିଂସ ଖେଳିବାରୁ ଦଳ ୧୮୫ କରିବାକୁ ସକ୍ଷମ ହୋଇଛି। ଅଧିନାୟକ ବଦଳିଥିଲେ ହେଁ ଭାରତୀୟ ଟିମର ଭାଗ୍ୟ ବଦଳି ନାହିଁ। ରୋହିତ ଶର୍ମା ଖରାପ ଫର୍ମ ଦେଇ ଗତି କରୁଥିବାରୁ ଆଜି ସେ ନିଜ ଆଡ଼ୁ ଚୂଡ଼ାନ୍ତ ଏକାଦଶରୁ ଓହରି ଯାଇଥିଲେ। ତାଙ୍କ ବଦଳରେ ଶୁବମନ ଗିଲ ସୁଯୋଗ ପାଇଥିଲେ। କିନ୍ତୁ ସେ ବି ଆଜି କିଛି ଖାସ କରି ନାହାନ୍ତି। ବିରାଟ କୋହଲି ପୁଣିଥରେ ଫେଲ ମାରିଛନ୍ତି। କେଏଲ ରାହୁଲ କେବଳ ୪ ରନ କରିବାକୁ ସକ୍ଷମ ହୋଇଛନ୍ତି। ଭାରତ ପ୍ରଥମ ଇନିଂସରେ ୧୮୫ ରନ କରିବା ପରେ ଅଷ୍ଟ୍ରେଲିଆ ଆଜି ପ୍ରଥମ ଦିନରେ ୩ ଓଭର ବ୍ୟାଟିଂ କରିଛି। ଏହି ୩ ଓଭର ବେଶ ନାଟକୀୟ ରହିଥିଲା। ସାମ କୋନଷ୍ଟାସ ଓ ଯଶପ୍ରୀତ ବୁମ୍ରାଙ୍କ ମଧ୍ୟରେ ବେଶ ଟକ୍କାରି ଟକ୍କରି ହୋଇଛି। ଦିବସର ଶେଷ ବଲରେ ବୁମ୍ରା ଓପନର ଉସମାନ ଖାୱାଜା(୨)ଙ୍କୁ ଆଉଟ କରି ଭାରତୀୟ କ୍ୟାମ୍ପରେ ଖୁସି ଭରି ଦେଇଛନ୍ତି। କୋନଷ୍ଟାସ ୭ ରନ କରି ଅପରାଜିତ ରହିଛନ୍ତି। ଅଷ୍ଟ୍ରେଲିଆ ଷ୍ଟମ୍ପ ଅପସାରଣ ବେଳକୁ ୧ ୱିକେଟ ହରାଇ ୯ ରନ କରିଛି। ସିଡ୍‌ନୀର ଗ୍ରାସୀ ପିଚ୍‌ରେ ଟସ୍‌ ଜିତି ବୁମ୍ରା ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ। ହେଲେ ଭାରତୀୟ ବ୍ୟାଟରମାନେ ଆଦୌ କମାଲ କରି ପାରି ନଥିଲେ। ରାହୁଲ(୪)ଙ୍କୁ ଆଉଟ କରି ମିଚେଲ ଷ୍ଟାର୍କ ଭାରତକୁ ପ୍ରଥମ ଝଟକା ଦେଇଥିଲେ। ଏହାପରେ ୧୦ ରନ କରିଥିବା ଯଶସ୍ୱୀ ଜୈସୱାଲଙ୍କୁ ସ୍କଟ ବୋଲାଣ୍ଡ ଆଉଟ କରିଥିଲେ। ବିରାଟ କୋହଲି ପ୍ରଥମ ବଲରେ ଆଉଟ ହେବାର ଆଶଙ୍କା ପ୍ରକାଶ ପାଇଥିଲା। ସ୍ଲିପରେ ଫିଲ୍ଡିଂ କରିଥିବା ଷ୍ଟିଭ ସ୍ମିଥ କ୍ୟାଚ୍‌ ଧରି ଅପିଲ ମଧ୍ୟ କରିଥିଲେ। ହେଲେ ତୃତୀୟ ଅମ୍ପାୟାରଙ୍କ ନିଷ୍ପତ୍ତି ଯୋଗୁ ସେ ବର୍ତ୍ତି ଯାଇଥିଲେ। ଶୁବମନ ଗିଲଙ୍କୁ ସାଥୀ କରି ସେ ଲଞ୍ଚ ଯାଏ ସ୍ଥିତି ସମ୍ଭାଳିବାକୁ ଚେଷ୍ଟା କରିଥିଲେ। କିନ୍ତୁ ଲଞ୍ଚର ଶେଷ ବଲରେ ହିଁ ୨୦ ରନ କରିଥିବା ଗିଲଙ୍କୁ ନାଥନ ଲାୟନ ଆଉଟ କରି ଭାରତକୁ ତୃତୀୟ ଝଟକା ଦେଇଥିଲେ। ଲଞ୍ଚ ପରେ ବିରାଟ ୧୭ ରନ କରି ପୁଣିଥରେ ବୋଲାଣ୍ଡଙ୍କ ଶିକାର ବନିଥିଲେ। ତେବେ ଋଷଭ ପନ୍ତ ଓ ରବୀନ୍ଦ୍ର ଜାଡେଜା ଟି ଯାଏ ଆଉ କୌଣସି ବିପର୍ଯ୍ୟୟ ନ ଘଟାଇ ଦଳୀୟ ସ୍କୋରକୁ ୧୦୭ରେ ପହଞ୍ଚାଇ ଦେଇଥିଲେ। ପନ୍ତ ଟି ପରେ ମଧ୍ୟ ଭଲ ଲୟରେ ଦେଖାଯାଉଥିଲେ। କିନ୍ତୁ ବୋଲାଣ୍ଡଙ୍କୁ ବଡ଼ ଶଟ ମାରିବାକୁ ଯାଇ ସେ ପାଟ କମିନ୍ସଙ୍କ ହାତରେ ଧରାପଡ଼ି ଯାଇଥିଲେ। ପରବର୍ତ୍ତୀ ବଲରେ ନୀତୀଶ କୁମାର ରେଡ୍ଡୀ ତାଙ୍କ ଶିକାର ବନିଥିଲେ। ଦଳୀୟ ସ୍କୋର ୧୩୪ ଥିବା ବେଳେ ରବୀନ୍ଦ୍ର ଜାଡଜା(୨୬) ଓ ୧୪୮ ରନ ଥିବା ବେଳେ ୱାଶିଂଟନ ସୁନ୍ଦର(୧୪) ପ୍ୟାଭିଲିୟନ ଫେରିଥିଲେ। ପ୍ରସିଦ୍ଧ କ୍ରିଷ୍ଣା ମଧ୍ୟ କେବଳ ୩ ରନ କରିବାକୁ ସକ୍ଷମ ହୋଇଥିଲେ।୧୬୮ ରନରେ ଭାରତ ୯ମ ୱିକେଟ ହରାଇଥିଲା। ଏତିକି ବେଳେ ମହମ୍ମଦ ସିରାଜଙ୍କୁ ସାଥୀ କରି ବୁମ୍ରା ଦଳ ପାଇଁ କିଛି ରନ ସଂଗ୍ରହ କରିଥିଲେ। ଶେଷରେ ସେ ୨୨ ରନ କରି କମିନ୍ସଙ୍କ ବଲରେ ଆଉଟ ହୋଇଥିଲେ। ବୁମ୍ରା ଆଉଟ ହେବା ସହ ଭାରତର ପ୍ରଥମ ଇନିଂସ ୧୮୫ ରନରେ ଅଟକି ଯାଇଥିଲା। ଅଷ୍ଟ୍ରେଲିଆ ପକ୍ଷରୁ ବୋଲାଣ୍ଡ ସର୍ବାଧିକ ୪ଟି ୱିକେଟ ନେଇଥିବା ବେଳେ ମିଚେଲ ଷ୍ଟାର୍କ ୩ଟି, ପାଟ କମିନ୍ସ ୨ଟି ଓ ନାଥନ ଲାୟନ ଗୋଟିଏ ୱିକେଟ ପାଇଛନ୍ତି।

ଜାଣନ୍ତୁ ପୂରା ରିପୋର୍ଟ – ରୋହିତଙ୍କୁ ଚୂଡ଼ାନ୍ତ ଏକାଦଶରୁ ବାଦ ଦେବାକୁ କେମିତି ହେଲା ନିଷ୍ପତ୍ତି ?

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ଭାରତର ପରବର୍ତ୍ତୀ ଟେଷ୍ଟ ସିରିଜ ପ୍ରାୟ ୫ ମାସ ପରେ ରହିଛି। ତେଣୁ ରୋହିତ ଆଉ ଭାରତ ପାଇଁ ଟେଷ୍ଟ ଖେଳିବାର ଆଶା ନାହିଁ। ସେ ସମ୍ଭବତଃ ମେଲବର୍ଣ୍ଣରେ ନିଜ ଟେଷ୍ଟ କ୍ୟାରିୟରର ଶେଷ ମ୍ୟାଚ୍‌ ଖେଳି ସାରିଛନ୍ତି। ବର୍ଡର-ଗାଭାସ୍କର ଟ୍ରଫିର ଶେଷ ମ୍ୟାଚ୍‌ର ଚୂଡ଼ାନ୍ତ ଏକାଦଶରୁ ଭାରତୀୟ ଟିମର ଅଧିନାୟକ ରୋହିତ ଶର୍ମା ବାଦ ପଡ଼ିଛନ୍ତି। ଖରାପ ଫର୍ମ ପାଇଁ ତାଙ୍କୁ ବାଦ ଦିଆଯାଇଛି। ହେଲେ ଏହାକୁ ବିଶ୍ରାମର ନାଁ ଦିଆଯାଉଛି। ରୋହିତଙ୍କୁ ଏବେ ୩୭ ବର୍ଷ। ଭାରତର ପରବର୍ତ୍ତୀ ଟେଷ୍ଟ ସିରିଜ ପ୍ରାୟ ୫ ମାସ ପରେ ରହିଛି। ତେଣୁ ରୋହିତ ଆଉ ଭାରତ ପାଇଁ ଟେଷ୍ଟ ଖେଳିବାର ଆଶା ନାହିଁ। ସେ ସମ୍ଭବତଃ ମେଲବର୍ଣ୍ଣରେ ନିଜ ଟେଷ୍ଟ କ୍ୟାରିୟରର ଶେଷ ମ୍ୟାଚ୍‌ ଖେଳି ସାରିଛନ୍ତି। ରୋହିତ, ବିରାଟ କୋହଲି ଓ ରବୀନ୍ଦ୍ର ଜାଡେଜା ଯେତେବେଳେ ଟି-୨୦ ବିଶ୍ୱକପ ପରେ ଏହି ଫର୍ମାଟରୁ ଅବସର ନେଲେ ସେତେବେଳେ ଭାରତୀୟ କ୍ରିକେଟର ଟ୍ରାଞ୍ଜିସନ ପ୍ରକ୍ରିୟା ଆରମ୍ଭ ହୋଇଯାଇଥିଲା। ଏବେ ଟେଷ୍ଟ ସିରିଜ ଅଧାରୁ ରବିଚନ୍ଦ୍ରନ ଅଶ୍ୱିନ ଅବସର ନେବା ଓ ରୋହିତଙ୍କୁ ବିଶ୍ରାମ ଆଳରେ ଚୂଡ଼ାନ୍ତ ଏକାଦଶରୁ ବାଦ ଦେବାର ଅର୍ଥ ଟ୍ରାଞ୍ଜିସନ ପ୍ରକ୍ରିୟା ସର୍ବୋଚ୍ଚ ସ୍ତରରେ ରହିଛି। ରିପୋର୍ଟ ଅନୁସାରେ, ୫ମ ଟେଷ୍ଟର ଶେଷ ଟ୍ରେନିଂ ସେସନରେ ସମସ୍ତେ ସିଡ୍‌ନୀ କ୍ରିକେଟ ଗ୍ରାଉଣ୍ଡରେ ଉପସ୍ଥିତ ଥିଲେ। ଏହି ସମୟରେ ରୋହିତ ଓ ମୁଖ୍ୟକୋଚ୍‌ ଗୌତମ ଗମ୍ଭୀରଙ୍କ ମଧ୍ୟରେ କୌଣସି ପ୍ରକାରର ତାଳମେଳ ନଥିବା ଭଳି ସ୍ଥିତି ସୃଷ୍ଟି ହୋଇଥିଲା। ପୂର୍ବରୁ ରୋହିତ ୫ମ ଟେଷ୍ଟ ଖେଳିବେ ନାହିଁ ବୋଲି ସଙ୍କେତ ମିଳିଥିଲା। କିନ୍ତୁ ଗୁରୁବାର ଅଭ୍ୟାସ ବେଳେ ସବୁ କିଛିର ନିଷ୍ପତ୍ତି ହୋଇଥିଲା। ରୋହିତ ୮ଟି ଇନିଂସରେ ମାତ୍ର ଗୋଟିଏ ଅର୍ଦ୍ଧଶତକ କରିଛନ୍ତି। ତେଣୁ ଗମ୍ଭୀର ତାଙ୍କ ରଣନୀତିରେ ରୋହିତଙ୍କୁ ଆଉ ସାମିଲ କରିବା ମୁଡରେ ନାହାନ୍ତି। ରୋହିତ ମଧ୍ୟ ଅଭ୍ୟାସ ସେସନରେ ବଲକୁ ଠିକ ଭାବେ କନେକ୍ଟ କରିବାରେ ବିଫଳ ହୋଇଥିଲେ। ଟି ଦିଲ୍ଲୀପଙ୍କ ଥ୍ରୋ ଡାଉନକୁ ମିସ କରି ସେ ବୋଲ୍ଡ ମଧ୍ୟ ହୋଇଥିଲେ। ସେ ବଲକୁ ମିଟ କରିବାରେ ବିଳମ୍ବ କରୁଥିବା ତାଙ୍କ ପ୍ରତିକ୍ରିୟାରୁ ସ୍ପଷ୍ଟ ଭାବେ ଦେଖାଯାଇଥିଲା। ସବୁଠାରୁ କୌତୁହଳର ବିଷୟ ହେଉଛି ଯେ ରୋହିତଙ୍କ ସାଇଡ ନେଟ୍ସରେ ନୀତୀଶ କୁମାର ରେଡ୍ଡୀ ଅଭ୍ୟାସ କରୁଥିଲେ। ସେ ବଲକୁ ବ୍ୟାଟରେ ମିଡଲ କରୁଥିବା ରୋହିତ ବଲକୁ ମିସ କରୁଥିଲେ। ମୁଖ୍ୟ କୋଚ ଗମ୍ଭୀର ଯୁବ ତାରକା ନୀତୀଶ କୁମାରଙ୍କ ନେଟ୍ସ ପାଖରେ ଛିଡ଼ା ହୋଇ ତାଙ୍କୁ ସବୁ କିଛି କହୁଥିଲେ। ରୋହିତ ଅଭ୍ୟାସ କରିସାରିବା ପରେ ବୁମ୍ରା ଓ ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କୁ ସେଠାରୁ ଚାଲି ଯାଇଥିଲେ। କିନ୍ତୁ ଗମ୍ଭର ନେଟ୍ସରେ ଉପସ୍ଥିତ ରହିଥିଲେ। ଏହି ମିଟିଂ ସମୟରେ ରୋହିତ ୫ମ ଟେଷ୍ଟରେ ବିଶ୍ରାମ ନେବେ ବୋଲି ନିଷ୍ପତ୍ତି ହୋଇଥିବା କୁହାଯାଉଛି। ମିଟିଂର ୪୫ରୁ ୧ ଘଣ୍ଟା ପରେ ଅଧିକାଂଶ ଖେଳାଳି ନେଟ ଅଞ୍ଚଳରେ ଲାଗିଥିବା ପ୍ରସ୍ଥାନ ଦ୍ୱାର ଦେଇ ବସ୍‌ ପାଖକୁ ଆସିଥିଲେ। କିନ୍ତୁ ରୋହିତ ଟିମ ସହ ଆସି ନଥିଲେ। ସେ ଅନ୍ୟ ଏକ ଗେଟ୍‌ ପଟେ ବାହାରକୁ ଆସିବା ସହ ବସରେ ବସିଥିଲେ।

ବଂଶଧାରା କପ୍ ଫାଇନାଲ ରେ ସମ୍ବଲପୁର ବିଜୟୀ ।

!!! ଗୁଣପୁର ଉପଖଣ୍ଡ ପ୍ରତିନିଧି ବାସନ୍ତୀ କୁମାରୀ ପାଟ୍ଟଯୋଶୀ ଙ୍କ ରିପୋର୍ଟ !!!

ଏଥର ସମ୍ଭାଳ (ଗୁଣପୁର) – ଚଳିତ ମାସ ୨୪ ତାରିଖରୁ ଗୁଣପୁର ବଂଶଧାରା ବସନ୍ତ ମୋହତ୍ସବ ଆନୁକୁଲ୍ୟରେ ପ୍ରଥମ କରି ମିନି ଷ୍ଟାଡିୟମରେ ଚାଲିଥିବା ଡ୍ୟୁଜ ବଲ୍ କ୍ରିକେଟ ଟର୍ଣ୍ଣ। ମେଣ୍ଟ ବଂଶଧାରା କପ୍ ର ଫାଇନାଲ ମ୍ୟାଚ୍ ଆଜି ମହା ଆଡ଼ମ୍ବରରେ ଶେଷ ହୋଇ ଯାଇଛି । ଏଥିରେ ସମ୍ବଲପୁର ଏମ ଏମ ସି ସି ଏବଂ ବାଲେଶ୍ଵର ଆଦର୍ଶ କ୍ରିକେଟ କ୍ଲବ୍ ମଧ୍ୟରେ ଟକ୍କର ଖେଳ ପ୍ରଦର୍ଶନ କରାଯାଇଥିଲା । ଶେଷରେ ସମ୍ବଲପୁର ଏମ ଏମ ସି ସି ଟିମ୍ ବାଲେଶ୍ଵର କୁ ୮୪ ରନ୍ ରେ ପରାସ୍ତ କରି ପ୍ରଥମ ସ୍ଥାନ ଅଧିକାର କରିଛନ୍ତି । ଏନେଇ ଆୟୋଜିତ ସଭାରେ ଜି ଆଇ ଇ ଟି ବିଶ୍ବ ବିଦ୍ୟାଳୟ ର ନିର୍ଦ୍ଦେଶକ ଶ୍ରୀ ଜଗଦୀଶ ପଣ୍ଡା ମୁଖ୍ୟ ଅତିଥି ଭାବେ ଯୋଗଦେଇ କୃତି ଖେଳାଳି ମାନଙ୍କୁ ପୁରସ୍କୃତ କରିଥିଲେ । ଦୀର୍ଘ ୭ଦିନ ଧରି ଚାଲିଥିବା ଏହି ବଂଶଧାରା କପ୍ ରେ ଆମ୍ପାୟର ଭାବେ ରହିଥିବା ଓଡ଼ିଶା କ୍ରିକେଟ ଆସୋସିଏସନ୍ ର ଶ୍ରୀ ସାରଦା ପ୍ରସନ୍ନ ମହାପାତ୍ର ଏବଂ ମ୍ୟାଚ୍ କମେଣ୍ଟେଟର ଭାବେ ରହିଥିବା ଶ୍ରୀ ପ୍ରତ୍ୟୁଷ ସାହୁ ଙ୍କୁ ଅନୁଷ୍ଠାନ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା ।

ଖେଳାଳୀ ମାନଙ୍କୁ ଉତ୍ସାହିତ କରିବା ନିମନ୍ତେ ଷ୍ଟାଡିୟମ ଠାରେ ରହିଥିବା କ୍ରୀଡା ପ୍ରେମୀ ଦର୍ଶକ ମାନଙ୍କୁ ପରିଚାଳନା କମିଟି ପକ୍ଷରୁ ମଧ୍ୟାହ୍ନ ଭୋଜନ ର ବ୍ୟବସ୍ଥା କରି ଆପ୍ୟାୟିତ କରାଯାଇଥିଲା । କୃତି ଖେଳାଳି ମାନଙ୍କୁ ଆୟୋଜିତ ସଭାରେ ବଳରାମ ପଣ୍ଡା ସ୍ମାରକୀ ଟ୍ରଫି ସ୍ୱରୂପ ୬୦ ହଜାର ଟଙ୍କା ସହ ୱିନର ଟ୍ରଫି ଓ ଦ୍ଵିତୀୟ ସ୍ଥାନ ଅଧିକାର କରିଥିବା ବାଲେଶ୍ବର ଟିମ୍ ଖେଳାଳିଙ୍କୁ ୪୦ ହଜାର ଟଙ୍କା ସହ ରାନର୍ ଟ୍ରଫି ଫେବୃଆରୀ ମାସ ୧ ତାରିଖ ଦିନ ମହୋତ୍ସବ ର ଅନ୍ତିମ ଦିନ ରେ ପୁରସ୍କୃତ କରାଯିବ । ପରି ଶେଷରେ ନବ ନିର୍ମାଣ ସମିତି ର ସମ୍ପାଦକ ଶ୍ରୀ ରଞ୍ଜିତ ପାଢ଼ୀ ଧନ୍ୟବାଦ୍ ଅର୍ପଣ କରିଥିଲେ ।

ଟିମ୍ ଇଣ୍ଡିଆ ସହ ଜିମ୍ବାୱେ ଯିବେ ଲକ୍ଷ୍ମଣ ; ରାହୁଲଙ୍କୁ ବିଶ୍ରାମ ଦେଲା ବିସିସିଆଇ…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ଟିମ୍ ଇଣ୍ଡିଆର ମୁଖ୍ୟ କୋଚ୍ ରାହୁଲ ଦ୍ରାବିଡଙ୍କୁ ବ୍ରେକ୍ ଦେଲା ବିସିସିଆଇ। ସେ କିଛି ଦିନ ବିଶ୍ରାମ କରିବେ। ତାଙ୍କ ବଦଳରେ ଟିମ୍ ଇଣ୍ଡିଆ ସହିତ ଜିମ୍ବାୱେ  ଗସ୍ତରେ ଯିବେ ନ୍ୟାଶନାଲ କ୍ରିକେଟ୍ ଏକାଡେମୀ (ଏନ୍ସିଏ)ର ମୁଖ୍ୟ ଭିଭିଏସ୍ ଲକ୍ଷ୍ମଣ। ଜିମ୍ବାୱେ ବିପକ୍ଷ ଦିନିକିଆ ସିରିଜ୍ ପାଇଁ ଲକ୍ଷ୍ମଣ ନେବେ ଟିମ୍ ଇଣ୍ଡିଆର ମୁଖ୍ୟ କୋଚ୍ ଦାୟିତ୍ୱ। ଆଗକୁ ଏସିଆ କପ୍ ଅନୁଷ୍ଠିତ ହେବାକୁ ଯାଉଥିବାରୁ ଟିମ୍ ଇଣ୍ଡିଆର ମୁଖ୍ୟ କୋଚ୍ ରାହୁଲ ଦ୍ରାବିଡଙ୍କୁ ବିଶ୍ରାମ ଦେଇଛି ବିସିସିଆଇ। ସେ କୋଚ୍ ଦାୟିତ୍ୱ ନେବା ପରଠୁ ଟିମ୍ ଇଣ୍ଡିଆ ସହିତ ପ୍ରତି ସିରିଜ୍‌ରେ ରହିଥିଲେ ଓ ଛୁଟି ନେଇ ନଥିଲେ। ସେହିଭଳି ବ୍ୟାଟିଂ କୋଚ୍ ବିକ୍ରମ ରାଠୋଡ଼ ଓ ବୋଲିଂ କୋଚ୍ ପାରସ ମହାମ୍ବ୍ରେଙ୍କୁ ମଧ୍ୟ ବିଶ୍ରାମ ଦିଆଯାଇଛି। ସେମାନଙ୍କ ବଦଳରେ ଭିଭିଏସ୍ ଲକ୍ଷ୍ମଣଙ୍କ ସହିତ ତାଙ୍କ ଡେପୁଟି ହୋଇ ଜିମ୍ବାୱେ ଯିବେ ସାଇରାଜ ବାହୁତୁଲେ ଓ ହୃଷିକେଶ କାନିତକର। ଜିମ୍ବାୱେରେ କେଏଲ୍ ରାହୁଲଙ୍କ ନେତୃତ୍ୱରେ ଟିମ୍ ଇଣ୍ଡିଆ ତିନିଟି ଦିନିକିଆ ମ୍ୟାଚ୍ ଖେଳିବ। ଏହି ସରିଜ୍ ଅଗଷ୍ଟ ୧୮ ତାରିଖରୁ ଆରମ୍ଭ ହେବ। ୨ୟ ଓ ୩ୟ ମ୍ୟାଚ୍ ଯଥାକ୍ରମେ ୨୦ ଓ ୨୨ରେ ହେବ। ସମସ୍ତ ମ୍ୟାଚ୍ ହରାରେରେ ଖେଳାଯିବ। ଏସିଆ କପ୍ ଖେଳିବା ପାଇଁ ରୋହିତ ଶର୍ମାଙ୍କ ନେତୃତ୍ୱରେ ଟିମ୍ ୟୁଏଇ ଗସ୍ତ କରିବା ବେଳେ ରାହୁଲ ଦ୍ରାବିଡ ସେମାନଙ୍କ ସହିତ ଯୋଗ ଦେବେ। ଅଗଷ୍ଟ ୨୦ ତାରିଖରେ ଟିମ୍ ଇଣ୍ଡିଆ ୟୁଏଇ ଗସ୍ତ କରିବ। ଅଗଷ୍ଟ ୨୮ ତାରିଖରେ ଭାରତର ପ୍ରଥମ ମ୍ୟାଚ୍ ଅଛି। ଦଳ ତା’ର ପ୍ରଥମ ମ୍ୟାଚ୍‌ରେ ପାକିସ୍ତାନକୁ ଭେଟିବ। ଜିମ୍ବାୱେ ଗସ୍ତରୁ ଅଧିନାୟକ ରୋହିତ ଶର୍ମା, ବିରାଟ କୋହଲି, ଋଷଭ ପନ୍ତ, ରବୀନ୍ଦ୍ର ଜାଡ଼େଜା, ସୂର୍ଯ୍ୟକୁମାର ଯାଦବ ଓ ଶ୍ରେୟଶ ଆୟରଙ୍କୁ ବାଦ୍ ଦିଆଯାଇଛି। ସେମାନଙ୍କୁ ବିଶ୍ରାମ ଦିଆଯାଇଛି। ଅନ୍ୟପକ୍ଷରେ ଜିମ୍ବାୱେ ବିପକ୍ଷ ଦିନିକିଆ ସିରିଜ୍ ପରେ କେଏଲ୍ ରାହୁଲ, ଦୀପକ ହୁଡ଼ା ଓ ଅବେଶ ଖାନ ଏସିଆ କପ୍ ଦଳରେ ସାମିଲ ହେବେ।

କେଏଲ୍‌ ରାହୁଲ ପାସ୍‌, ଜିମ୍ବାୱେ ବିପକ୍ଷ ସିରିଜ୍‌ରେ ନେବେ ନେତୃତ୍ୱ…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ଫିଟ୍‌ନେସ୍‌ ଟେଷ୍ଟରେ ପାସ୍ ହେଲେ କେଏଲ ରାହୁଲ। ସେ ଜିମ୍ବାୱେ ବିପକ୍ଷ ଦିନିକିଆ ସିରିଜ୍‌ରେ ଖେଳିବେ। କେବଳ ଖେଳିବେନି, ସେ ଟିମ୍‌ର ନେତୃତ୍ୱ ମଧ୍ୟ ନେବେ। ଗୁରୁବାର ବିସିସିଆଇ ପକ୍ଷରୁ ଏହି ଘୋଷଣା କରାଯାଇଛି। ଜିମ୍ବାୱେ ବିପକ୍ଷ ଦିନିକିଆ ସିରିଜ୍ ପାଇଁ ପୂର୍ବରୁ ବିସିସିଆଇ ଶିଖର ଧୱନଙ୍କୁ ଅଧିନାୟକ ଦାୟିତ୍ୱ ଦେଇଥିଲା। ତେବେ ଆଜି କେଏଲ୍ ରାହୁଲ ଫିଟ୍‌ନେସ୍ ଟେଷ୍ଟରେ ପାସ୍ କରିବା ପରେ ବିସିସିଆଇ ତାଙ୍କୁ ଟିମ୍‌ରେ ସାମିଲ କରିବା ସହ ଅଧିନାୟକ ଦାୟିତ୍ୱ ଦେଇଛି। ଶିଖର ଧାୱନଙ୍କୁ ଉପ-ଅଧିନାୟକ କରାଯାଇଛି। ବିସିସିଆଇ ପକ୍ଷରୁ ଜାରି କରାଯାଇଥିବା ବିବୃତ୍ତିରେ କୁହାଯାଇଛି, ବିସିସିଆଇ ମେଡିକାଲ ଟିମ୍ କେଏଲ୍ ରାହୁଲଙ୍କ ପରୀକ୍ଷା କରିଥିଲେ ଓ ସେ ଜିମ୍ବାୱେ ବିପକ୍ଷ ଆଗାମୀ ଦିନିକିଆ ସିରିଜ୍ ଖେଳିପାରିବେ ବୋଲି କହିଥିଲେ। ଏହା ପରେ ଚୟନ କମିଟି କେଏଲ୍ ରାହୁଲଙ୍କୁ ଅଧିନାୟକ ଭାବେ ନିଯୁକ୍ତି ଦେଇଥିବା ବେଳେ ଶିଖର ଧାୱନଙ୍କୁ ତାଙ୍କ ଡେପୁଟି କରିଛି। ସୂଚନାଯୋଗ୍ୟ, ୨୦୨୨ ଆଇପିଏଲ ପରଠୁ କେଏଲ ରାହୁଲ ଆଉ କୌଣସି କ୍ରିକେଟ୍ ଖେଳି ନାହାନ୍ତି। ସେ ଏହି ଆଇପିଏଲ୍‌ରେ ଲକ୍ଷ୍ନୌ ସୁପର ଜିଆଣ୍ଟସ୍‌ର ନେତୃତ୍ୱ ନେଇଥିଲେ। ଜିମ୍ବାୱେ ବିପକ୍ଷ ଦିନିକିଆ ସିରିଜ୍‌ରେ ମୋଟ ୩ଟି ମ୍ୟାଚ୍ ଖେଳାଯିବ। ଏହି ସିରିଜ୍ ଅଗଷ୍ଟ ୧୮ ତାରିଖରୁ ଆରମ୍ଭ ହେବ। ଦ୍ୱିତୀୟ ମ୍ୟାଚ୍ ଅଗଷ୍ଟ ୨୦ ତାରିଖରେ ହେବାକୁ ଥିବା ବେଳେ ତୃତୀୟ ମ୍ୟାଚ୍ ଅଗଷ୍ଟ ୨୨ ତାରିଖରେ ଖେଳା ଯିବ। ସମସ୍ତ ମ୍ୟାଚ୍ ହରାରେ ସ୍ପୋର୍ଟ୍ସ କ୍ଲବ୍‌ରେ ଖେଳା ଯିବ। ଭାରତର ୧୫ ଜଣିଆ ଟିମ୍: କେଏଲ୍ ରାହୁଲ (ଅଧିନାୟକ), ଶିଖର ଧୱନ (ଉପ-ଅଧିନାୟକ), ଋତୁରାଜ ଗାଏକ୍ୱାଡ୍‌, ଶୁବମନ ଗିଲ୍‌, ଦୀପକ ହୁଡା, ରାହୁଲ ତ୍ରିପାଠୀ, ଈଶାନ କିଶନ (ୱିକେଟ୍ କିପର), ସଞ୍ଜୁ ସାମ୍‌ସନ୍‌ (ୱିକେଟ୍ କିପର), ୱାଶିଂଟନ୍‌ ସୁନ୍ଦର, ଶର୍ଦ୍ଦୁଳ ଠାକୁର, କୁଳଦୀପ ଯାଦବ, ଅକ୍ଷର ପଟେଲ, ପ୍ରସିଦ୍ଧ କ୍ରିଷ୍ଣା, ମହମ୍ମଦ ସିରାଜ ଓ ଦୀପକ ଚହର।

ଜାଭେଲିନ ଥ୍ରୋରେ ଦେଶ ପାଇଁ ପ୍ରଥମ ପଦକ ଜିତିଲେ ଅନୁରାଣୀ…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ଦେଶ ପାଇଁ ପୁଣି ଏକ ପଦକ ଜିତିଲେ ଆଉ ଜଣେ ଆଥଲେଟ୍‌। ରବିବାର ବର୍ମିଂହାମ ଠାରେ ଅନୁଷ୍ଠିତ ରାଜ୍ୟଗୋଷ୍ଠୀ କ୍ରୀଡ଼ା-୨୨ରେ ମହିଳା ଜାଭେଲିନ ଥ୍ରୋ ବର୍ଗରେ  ଅନୁରାଣୀ ତୃତୀୟ ସ୍ଥାନରେ ରହି ବ୍ରୋଞ୍ଜ ପଦକ ହାସଲ କରିଛନ୍ତି । ଫାଇନାଲରେ ଜାଭେଲିନରେ ପଦକ ଜିତବାରେ ଅନୁରାଣୀ ପ୍ରଥମ ଭାରତୀ ହେବାରେ ଗୌରବ ଅର୍ଜନ କରିଛନ୍ତି । ୬୦ ମିଟର ଥ୍ରୋରେ ଅନୁରାଣୀ ତାଙ୍କର ଶ୍ରେଷ୍ଠ ପ୍ରଦର୍ଶନ କରି ବ୍ରୋଞ୍ଜ ପଦକ ହାସଲ କରିଛନ୍ତି।  ତେବେ ଆଉ ଜଣେ ଭାତୀୟ ଶିଳ୍ପାରାଣୀ ଜାଭେଳିନ ଥ୍ରୋରେ ସପ୍ତମ ରାଉଣ୍ଡରେ ଅଟକିଯାଇନ୍ତି। ଏହି ପ୍ରତିଯୋଗିତାରେ ଅଷ୍ଟେଲିୟାର କେଲସି-ଲି ବାରବର୍ ସ୍ୱର୍ଣ୍ଣପଦକ ଜିତିଥିଲା ବେଳେ ତାଙ୍କ ନିକଟତମ ପ୍ରତିଦ୍ୱନ୍ଦୀ ମାକେଞ୍ଜି ଲିଟେ ଦ୍ୱିତୀୟ ସ୍ଥାନରେ ରହି ରୌପ୍ୟପଦକ ହାତେଇଛନ୍ତି।  ଏହା ହେଉଛି ରାଣୀଙ୍କ ପ୍ରଥମ ରାଜ୍ୟଗୋଷ୍ଠୀ କ୍ରୀଡ଼ା ପଦକ । ଏଥିସହ ରାଜ୍ୟଗୋଷ୍ଠୀ କ୍ରୀଡ଼ାର ଦଶମ ଦିନରେ ରବିବାର  ଭାରତ ତତୁର୍ଥ ମେଡାଲ ହାସଲ କରିବାରେ ସମର୍ଥ ହୋଇଛି। ପ୍ରଥମ ପ୍ରୟାସରେ ରାଣୀ  ୫୫.୬୧ ମିଟର ପାଇଁ ପଞ୍ଚମ ସ୍ଥାନ ପାଇଥିଲେ।  କିନ୍ତୁ ଚତୁର୍ଥ ଥ୍ରୋରେ ସେ ଜବରଦସ୍ତ ଫର୍ମକୁ ଫେରି  ୬୦ ମିଟରରେ ତୃତୀୟ ସ୍ଥାନରେ ପହଞ୍ଚି ପାରିଥିଲେ। ସେହିପରି  ଆଜି ଭାରତକୁ ୨ ସ୍ୱର୍ଣ୍ଣ ସହ ହକି ଟିମ୍‌କୁ ବ୍ରୋଞ୍ଜ ପଦକ ମିଳିଛି। ବକ୍ସିଂରେ ଭାରତ ୨ ଖେଳାଳି ଜିତିଲେ ସ୍ୱର୍ଣ୍ଣ। ୪୮ କେଜି ବର୍ଗ ମହିଳା ବକ୍ସିଂରେ ସ୍ୱର୍ଣ୍ଣ ଜିତିଲେ ନିତୁ ଘଂଘାସ। ସେ ଫାଇନାଲରେ ଇଂଲଣ୍ଡର ବିଶ୍ୱ ଚାମ୍ପିଅନସିପ୍ ବ୍ରୋଞ୍ଜ ପଦକ ବିଜେତା ଡେମି-ଜାଡେ ରେଜଟାନଙ୍କୁ ୫-୦ରେ ପରାସ୍ତ କରିଛନ୍ତି।

ଭାରତକୁ ବକ୍ସିଂ ଓ ଟ୍ରିପଲ୍ ଜମ୍ପରେ ମିଳିଲା ୩ ସ୍ୱର୍ଣ୍ଣ, ହକିରେ ବ୍ରୋଞ୍ଜ…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ରାଜ୍ୟଗୋଷ୍ଠୀ କ୍ରୀଡ଼ାରେ ଆଜି ଭାରତକୁ ୨ ସ୍ୱର୍ଣ୍ଣ ସହ ହକି ଟିମ୍‌କୁ ବ୍ରୋଞ୍ଜ ପଦକ ମିଳିଛି। ବକ୍ସିଂରେ ଭାରତ ୨ ଖେଳାଳି ଜିତିଲେ ସ୍ୱର୍ଣ୍ଣ। ୪୮ କେଜି ବର୍ଗ ମହିଳା ବକ୍ସିଂରେ ସ୍ୱର୍ଣ୍ଣ ଜିତିଲେ ନିତୁ ଘଂଘାସ। ସେ ଫାଇନାଲରେ ଇଂଲଣ୍ଡର ବିଶ୍ୱ ଚାମ୍ପିଅନସିପ୍ ବ୍ରୋଞ୍ଜ ପଦକ ବିଜେତା ଡେମି-ଜାଡେ ରେଜଟାନଙ୍କୁ ୫-୦ରେ ପରାସ୍ତ କରିଛନ୍ତି। ସୂଚନା ଥାଉକି ୨୧ ବର୍ଷିୟ ନିତୁ ସେମିଫାଇନାଲାରେ କାନାଡ଼ାର ଖେଳାଳିଙ୍କୁ ପରାଜିତ କରି ଫାଇନାଲରେ ସ୍ଥାନ ପକ୍କା କରିଥିଲେ। ସେହିପରି ୪୮-୫୧ କେଜି ବର୍ଗ ପୁରୁଷ ବକ୍ସିଂରେ ସ୍ୱର୍ଣ୍ଣ ଜିତିଲେ ଅମିତ ପଙ୍ଗଲ। ସେ ଫାଇନାଲରେ ଇଂଲଣ୍ଡର କିଆରନ୍ ମ୍ୟାକଡୋନାଲ୍ଡଙ୍କୁ  ୫-୦ ପଏଣ୍ଟରେ ପରାସ୍ତ କରି ଏହି ବିଜୟ ହାସଲ କରିଛନ୍ତି। ସେହିପରି ମହିଳା ହକିରେ ଭାରତକୁ ବ୍ରୋଞ୍ଜ ପଦକ ମିଳିଛି। ନ୍ୟୁଜିଲାଣ୍ଡକୁ ହରାଇ ଭାରତୀୟ ମହିଳାଙ୍କ ବ୍ରୋଞ୍ଜ ପଦକ ହାସଲ କରିଛି। ପେନାଲିଟି ସୁଟ୍ ଆଉଟରେ ନ୍ୟୁଜିଲାଣ୍ଡକୁ ୨-୧ରେ ହରାଇଲା ଭାରତ। ନିର୍ଦ୍ଧାରିତ ସମୟରେ ୧-୧ ଗୋଲ୍‌ରେ ଖେଳ ବରାବର ରହିଥିଲା। ଫଳରେ ଦୀର୍ଘ ୧୦ ବର୍ଷ ଅପେକ୍ଷାର ଅନ୍ତ ଘଟିଛି। ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତୀୟ ମହିଳା ହକି ଦଳକୁ ପଦକ ମିଳିଛି। ୨୦୦୬ ମସିହାରେ ଭାରତୀୟ ମହିଳା ହକି ଟିମ ପ୍ରଥମ ରାଜ୍ୟଗୋଷ୍ଠୀ କ୍ରୀଡ଼ ପଦକ ହାସଲ କରିଥିଲା। ସେହିପରି ଟ୍ରିପଲ୍ ଜମ୍ପରେ ଭାରତକୁ ଆଜି ସ୍ୱର୍ଣ୍ଣ ଓ ରୌପ୍ୟ ପଦକ ମିଳିଛି। ଭାରତ ପାଇଁ ସ୍ୱର୍ଣ୍ଣ ପଦକ ଜିତିଲେ ଏଲଧସ ପୌଲ୍। ଅବଦୁଲ୍ଲା ଆବୁବାକର ଜିତିଲେ ରୌପ୍ୟ ପଦକ। ସେମାନେ ଯଥାକ୍ରମେ ୧୭.୩ ମିଟର ଓ ୧୭.୨ ମିଟର ଡେଇଁ ପଦକ ହାସଲ କରିଥିଲେ। ପୁରୁଷ ବର୍ଗରେ ୧୦ କିଲୋମିଟର ରେସ ୱାକରେ ସନ୍ଦୀପ କୁମାର ଭାରତ ପାଇଁ ବ୍ରୋଞ୍ଜ ପଦକ ଜିତିଛନ୍ତି। ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତର ପଦକ ସଂଖ୍ୟା ୪୫କୁ ବୃଦ୍ଧି। ଭାରତକୁ ମିଳିଲାଣି ୧୬ ସ୍ୱର୍ଣ୍ଣ, ୧୨ ରୌପ୍ୟ ଓ ୧୭ ବ୍ରୋଞ୍ଜ ପଦକ। ସେପଟେ ବ୍ୟାଡମିଣ୍ଟନ ମହିଳା ସିଙ୍ଗଲ୍ସ ଫାଇନାଲରେ ସ୍ଥାନ ପକ୍କା କରିଛନ୍ତି ପିଭି ସିନ୍ଧୁ। ସେମିଫାଇନାଲରେ ସେ ସିଙ୍ଗାପୁରର ଜିଆ ମିନ୍ ୟୋଙ୍କୁ ୨୧-୧୯, ୨୧-୧୭ରେ ହରାଇଛନ୍ତି। ଭାରତୀୟ ସଟଲର ଲାସଖ୍ୟ ସେନ୍ ବ୍ୟାଡମିଣ୍ଟନ୍ ପୁରୁଷ ସିଙ୍ଗଲ୍ସର ଫାଇନାଲରେ ପ୍ରବେଶ କରିଛନ୍ତି। ଏଥିସହ ରାଜ୍ୟଗୋଷ୍ଠୀ କ୍ରୀଡ଼ାରେ ପୁଣି ୨ ଭାରତୀୟ ଖେଳାଳି ସ୍ୱର୍ଣ୍ଣ ପଦକ ଜିତିବା ନେଇ ଆଶା ପ୍ରକାଶ ପାଇଛି।

ଇଣ୍ଡିଜ ବିପକ୍ଷ ଶେଷ ଟି-୨୦ ବି ଜିତିଲା ଟିମ୍‌ ଇଣ୍ଡିଆ…!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ୱେଷ୍ଟଇଣ୍ଡିଜ ବିପକ୍ଷ ଟି-୨୦ ସିରିଜକୁ ୩-୧ କବଜା କରିଥିବା ଟିମ ଇଣ୍ଡିଆ ୫ମ ତଥା ଶେଷ ମ୍ୟାଚକୁ ବି ଜିତି ନେଇଛି। ରବିବାର ରାତିରେ ଖେଳା ଯାଇଥିବା ମ୍ୟାଚ୍‌ରେ ଟିମ ଇଣ୍ଡିଆର କୌଣସି ଅଭିଜ୍ଞ କ୍ରିକେଟର ଖେଳୁ ନଥିଲେ। ତଥାପି ହାର୍ଦ୍ଦିକ ପାଣ୍ଡ୍ୟାଙ୍କ ଟିମ ଇଣ୍ଡିଆ ୮୮ ରନରେ ମ୍ୟାଚ୍‌କୁ ଜିତି ନେଇଛି। ଭାରତ ନିର୍ଦ୍ଧାରିତ ୨୦ ଓଭର୍‌ରେ ୭ ୱିକେଟ ହରାଇ ୧୮୮ ରନ କରିଥିଲା। ଏହାର ଜବାବରେ ନିକୋଲସ ପୂରନଙ୍କ ଇଣ୍ଡିଜ ଟିମ୍‌ ୧୫.୩ ଓଭର୍‌ରେ ୧୦୦ ରନ କରି ଅଲଆଉଟ ହୋଇଯାଇଛି। ଦମଦାର ବୋଲିଂ ପାଇଁ ଭାରତର ଅକ୍ଷର ପଟେଲ ମ୍ୟାନ ଅଫ ଦି ମ୍ୟାଚ୍‌ ପୁରସ୍କାର ପାଇଛନ୍ତି। ସେହିପରି ପୂରା ସିରିଜ୍‌ରେ ଦମ ଦେଖାଇଥିବା ଭାରତର ଯୁବ ତାରକା ଅର୍ଶଦୀପ ସିଂହ ଶୃଙ୍ଖଳାର ଶ୍ରେଷ୍ଠ ଖେଳାଳି ବିବେଚିତ ହୋଇଛନ୍ତି। ରୋହିତ ଶର୍ମା ଓ ଋଷଭ ପନ୍ତଙ୍କ ଅନୁପସ୍ଥିତିରେ ଭାରତ ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ମ୍ୟାଚ୍‌ ଖେଳିବାକୁ ପଡ଼ିଆକୁ ଓହ୍ଲାଇଥିଲା। ଟସ୍‌ ହାରି ଦଳ ପ୍ରଥମ ବ୍ୟାଟିଂ କରୁଥିବା ବେଳେ ୩୮ ରନରେ ଈଶାନ କିଶନ(୧୧)ଙ୍କୁ ହରାଇଥିଲା। ତେବେ ଇନିଂସ ଆରମ୍ଭ କରିଥିବା ଶ୍ରେୟସ ଆୟର ଓ ୩ନଂରେ ବ୍ୟାଟିଂ କରିବାକୁ ଆସିଥିବା ଦୀପକ ହୁଡ୍ଡା କାଉଣ୍ଟର ଆଟାକ କରିଥିଲେ। ଏଥିସହ ଆୟର ନିଜର ଅର୍ଦ୍ଧଶତକ ମଧ୍ୟ ହାସଲ କରିଥିଲେ। ଦଳୀୟ ସ୍କୋର ୧୧୮ ଥିବା ବେଳେ ବ୍ୟକ୍ତିଗତ ୩୮ ରନ କରି ହୁଡ୍ଡା ଆଉଟ ହୋଇଥିଲେ। ଏହାପରେ ଶ୍ରେୟସ ଆୟର(୬୪)ଙ୍କୁ ଜେସନ ହୋଲ୍ଡର ପ୍ୟାଭିଲିୟନ ପଠାଇ ଦେଇଥିଲେ। ସଞ୍ଜୁ ସାମସନ(୧୫)ଙ୍କୁ ଓଡେନ ସ୍ମିଥ ଆଉଟ କରି ଭାରତକୁ ୪ର୍ଥ ଝଟକା ଦେଇଥିଲେ। ଦୀନେଶ କାର୍ତ୍ତିକ ମଧ୍ୟ କେବଳ ୧୨ ରନ କରିବାକୁ ସକ୍ଷମ ହୋଇଥିଲେ। କିନ୍ତୁ ଅଧିନାୟକ ହାର୍ଦ୍ଦିକ ୨୮ ରନ କରିବାରୁ ଦଳୀୟ ସ୍କୋର ୧୮୧ରେ ପହଞ୍ଚିଥିଲା। ଶେଷ ଭାଗରେ ଅକ୍ଷର ପଟେଲ ମଧ୍ୟ ୯ ରନ କରିଥିଲେ। ଫଳରେ ଭାରତ ନିର୍ଦ୍ଧାରିତ ୨୦ ଓଭର୍‌ରେ ୭ ୱିକେଟ ହରାଇ ୧୮୮ ରନ କରିଥିଲା। ୧୮୯ ରନର ଟାର୍ଗେଟ ପାଇଥିବା ୱେଷ୍ଟଇଣ୍ଡିଜକୁ ଅକ୍ଷର ପଟେଲ ଆରମ୍ଭରୁ ରନ କରିବାର କୌଣସି ସୁଯୋଗ ଦେଇ ନଥିଲେ। ସେ ନିଜର ପ୍ରଥମ ଓଭର୍‌ରେ ଜେସନ ହୋଲ୍ଡରଙ୍କୁ କ୍ଲିନବୋଲ୍ଡ କରିଦେଇଥିଲେ। ବ୍ରୁକ୍ସ(୧୩) ଅକ୍ଷର ପଟେଲଙ୍କ ଦ୍ୱିତୀୟ ଶିକାର ବନିଥିଲେ। ଡେଭନ ଥୋମାସ(୧୦)ଙ୍କୁ ଆଉଟ କରି ଅକ୍ଷର ପଟେଲ ପାୱାର ପ୍ଲେ ମଧ୍ୟରେ ଇଣ୍ଡିଜକୁ ତୃତୀୟ ଝଟକା ଦେଇଥିଲେ। ୩୩ ରନରେ ୩ଟି ୱିକେଟ ହରାଇଥିବା ଘରୋଇ ଟିମ୍‌ ଅଧିନାୟକ ପୂରନଙ୍କ ଠାରୁ ବଡ଼ ଇନିଂସ ଆଶା କରୁଥିଲା। ହେଲେ ସେ ମାତ୍ର ୩ ରନ କରି କୁଲଦୀପ ଯାଦବଙ୍କ ବଲରେ ଆଉଟ ହୋଇଥିଲେ। ଏହାପରେ ରବି ବିଷ୍ଣୋଇ ନିଜର ଯାଦୁ ଦେଖାଇ ପ୍ରଥମେ ରୋଭମନ ପାୱେଲ(୯), କେମୋ ପଲ(୦) ଓ ଓବେଦ ମ୍ୟାକୟଙ୍କୁ ଆଉଟ କରିଥିଲେ। ଗୋଟିଏ ପଟେ ୱିକେଟ ଝଡ଼ୁଥିବା ବେଳେ ଅନ୍ୟପଟେ ଶିମରନ ହେଟମେୟର ଦମଦାର ବ୍ୟାଟିଂ କରି ନିଜର ଅର୍ଦ୍ଧଶତକ ହାସଲ କରିଥିଲେ। ସେ ୫୬ ରନ କରିଥିବା ବେଳେ ରବି ବିଷ୍ଣୋଇଙ୍କ ବଲରେ ଆଉଟ ହୋଇଥିଲେ। ସେ ଏକାକୀ ୫୬ ରନ କରିଥିବା ବେଳେ ଇଣ୍ଡିଜର ପୂରା ଟିମ ୧୦୦ ରନ କରି ଅଲଆଉଟ ହୋଇ ଯାଇଛି। ବିଷ୍ଣୋଇଙ୍କ ବ୍ୟତୀତ କୁଲଦୀପ ଯାଦବ ମଧ୍ୟ ଦମ ଦେଖାଇଛନ୍ତି। ସେ ପୂରନ, ଡୋମିନିକ ଡ୍ରାକ୍ସ ଓ ହାୟଡେନ ୱାଲ୍ସଙ୍କ ୱିକେଟ ନେଇଛନ୍ତି। ୱେଷ୍ଟଇଣ୍ଡିଜର ୩ ଜଣ ବ୍ୟାଟରଙ୍କୁ ଛାଡ଼ି ଦେଲେ ଆଉ କେହି ବି ଦୁଇ ଅଙ୍କ ଛୁଇଁ ନାହାନ୍ତି। ଭାରତ ପକ୍ଷରୁ ବିଷ୍ଣୋଇ ୪ଟି ୱିକେଟ ନେଇଥିବା ବେଳେ କୁଲଦୀପ ଓ ଅକ୍ଷର ପଟେଲ ୩ଟି ଲେଖାଏ ସଫଳତା ପାଇଛନ୍ତି।

ଭାରତ ପାଇଁ ଟିଟିରେ ସ୍ୱର୍ଣ୍ଣ ଜିତିଲେ ଶରତ-ଶ୍ରୀଜା ଯୋଡ଼ି…!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ଭାରତୀୟ ଟେବୁଲ ଟେନିସର କିମ୍ବଦନ୍ତୀ ଖେଳାଳି ଶରତ କମଲ ଓ ଯୁବ ତାରକା ତଥା ଡେବ୍ୟୁଟାଣ୍ଟ ଶ୍ରୀଜା ଅକୁଳା ସ୍ୱର୍ଣ୍ଣ ପଦକ ହାସଲ କରିଛନ୍ତି। ଶରତ କମଲ ଓ ଶ୍ରୀଜା ଯୋଡ଼ି ମିକ୍ସଡ ଡବଲ୍ସ ଇଭେଣ୍ଟରେ ଦେଶ ପାଇଁ ଏହି ପଦକ ଜିତିଛନ୍ତି। ଫାଇନାଲ ମ୍ୟାଚ୍‌ରେ ଏମାନଙ୍କ ମୁକାବିଲା ମାଲେସିୟାର ଜେଭେନ ଚୋଙ୍ଗ ଓ କାରେନ ଲୟନେଙ୍କ ସହ ହୋଇଥିଲା। ମ୍ୟାଚ୍‌ର ଦ୍ୱିତୀୟ ସେଟକୁ ଛାଡ଼ି ଦେଲେ ଶରତ ଓ ଶ୍ରୀଜାଙ୍କ ଯୋଡ଼ି କମାଲ କରିଥିଲେ। ଏହି ଯୋଡ଼ି ଗୋଲ୍ଡ ମ୍ୟାଚ୍‌କୁ ୧୧-୪, ୯-୧୧, ୧୧-୫ ଓ ୧୧-୬ରେ ଜିତି ନେଇଛନ୍ତି। ଏହି ବିଜୟ ପାଇଁ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଠାରୁ ଆରମ୍ଭ କରି ଅନ୍ୟମାନେ ଶରତ ଓ ଶ୍ରୀଜା ଯୋଡ଼ିଙ୍କୁ ଶୁଭେଚ୍ଛା ଜଣାଇଛନ୍ତି। ଅନ୍ୟପକ୍ଷରେ ଶରତ କମଲ ଆଜି ପୁରୁଷ ଏକକ ଟିଟିର ଫାଇନାଲ ଖେଳିବେ। ସେ ଇଂଲଣ୍ଡର ପଲ ଡ୍ରିଙ୍କହଲଙ୍କୁ ୧୧-୮, ୧୧-୮, ୮-୧୧, ୧୧-୭, ୯-୧୧ ଓ ୧୧-୮ରେ ହରାଇ ସ୍ୱର୍ଣ୍ଣ ପଦକ ଲଢ଼େଇରେ ପ୍ରବେଶ କରିଛନ୍ତି। ୨୦୦୬ରେ ଶରତ କମଲ ଶେଷଥର ପାଇଁ ରାଜ୍ୟଗୋଷ୍ଠୀ କ୍ରୀଡ଼ାରେ ସ୍ୱର୍ଣ୍ଣ ଜିତିଥିଲେ। ଏବେ ତାଙ୍କ ପାଖରେ ଆଉ ଥରେ ସ୍ୱର୍ଣ୍ଣ ଜିତିବାର ସୁଯୋଗ ରହିଛି। ଏହାପୂର୍ବରୁ ପୁରୁଷ ଡବଲ୍ସ ଫାଇନାଲରେ ଶରତ ଓ ସାଥିୟାନ ଗଣଶେଖରନଙ୍କ ଯୋଡ଼ି ଇଂଲଣ୍ଡଠାରୁ ହାରି ରୌପ୍ୟରେ ସନ୍ତୁଷ୍ଟ ହୋଇଥିଲେ। ୨୦୧୮ରେ ମଧ୍ୟ ଏହି ଯୋଡ଼ି ଭାରତ ପାଇଁ ରୌପ୍ୟ ପଦକ ଜିତିଥିଲେ।