ବିଗ୍‌ ବସ୍‌ ୧୫ରେ ବାଜି ମାରିଲେ ତେଜସ୍ୱୀ ପ୍ରକାଶ .

ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – ‘ବିଗ୍‌ ବସ୍‌’ ସିଜିନ୍‌ ୧୫ର ବିଜେତା ହୋଇଛନ୍ତି ଟେଲିଭିଜନ୍‌ ଷ୍ଟାର ତେଜସ୍ୱୀ ପ୍ରକାଶ। ପୁରସ୍କାର ବାବଦକୁ ତାଙ୍କୁ ଏକ ଟ୍ରଫି ସହିତ ୪୦ ଲକ୍ଷ ଟଙ୍କା ପ୍ରଦାନ କରାଯାଇଛି। ଗତକାଲି ଶୋ’ର ଉପସ୍ଥାପକ ସଲମାନ ଖାନ୍‌ ବିଜେତାଙ୍କ ନାଁ ଘୋଷଣା କରିଥିଲେ। ତେଜସ୍ୱୀ ପ୍ରକାଶ ବିଜୟୀ ହୋଇଥିବା ବେଳେ ପ୍ରଥମ ରନର ଅପ୍ ହୋଇଛନ୍ତି ଅଭିନେତା ତଥା ମଡେଲ ପ୍ରତୀକ ସେହଜପାଲ। ସେହିପରି ତେଜସ୍ୱୀଙ୍କ ବୟଫ୍ରେଣ୍ଡ ତଥା ଅଭିନେତା କରନ କୁନ୍ଦ୍ରା ତୃତୀୟ ସ୍ଥାନରେ ରହିଛନ୍ତି। ଅଭିନେତ୍ରୀ ସମିତା ଶେଟ୍ଟୀ ଚତୁର୍ଥ ସ୍ଥାନରେ ରହିଛନ୍ତି। ‘ସ୍ୱରାଗିଣୀ- ଯୋଡେଁ ରିସ୍ତୋଁ କି ସୁର୍‌’ରେ ଅଭିନୟ କରି ଚର୍ଚ୍ଚାକୁ ଆସିଥିବା ତେଜସ୍ୱୀ ‘ବିଗ୍‌ ବସ୍‌’ ସିଜିନ୍ ୧୫ ପ୍ରତିଯୋଗିତା ପ୍ରାରମ୍ଭରୁ ପ୍ରମୁଖ ଦାବିଦାର ରହିଥିଲେ। ଏହି ଶୋ’ ସମୟରେ ସେ କରନ କୁନ୍ଦ୍ରାଙ୍କ ପ୍ରେମରେ ପଡ଼ିଯାଇଥିଲେ। ଫ୍ୟାନ୍‌ମାନେ ବି ସେମାନଙ୍କ ଯୋଡ଼ିକୁ ପସନ୍ଦ କରିଛନ୍ତି । ଗତକାଲି ଶୋ’ର ଗ୍ରାଣ୍ଡ ଫିନାଲେରେ ବିଗ୍‌ ବସ୍‌ର ପୂର୍ବତନ ବିଜେତାମାନେ ଯୋଗ ଦେଇଥିଲେ। ସେମାନଙ୍କ ମଧ୍ୟରେ ଥିଲେ ଗୌହର ଖାନ୍‌, ଊର୍ବଶୀ ଢୋଲକିଆ, ଗୌତମ ଗୁଲାଟି, ରୁବାନି ଦିଲୈକ ଓ ଶ୍ୱେତା ତିୱାରୀ। ସେହିପରି ବିଗ୍ ବସ୍ ସିଜିନ୍ ୧୩ର ଫାଇନାଲିଷ୍ଟ ଶେହନାଜ ଗିଲ୍‌ ମଧ୍ୟ ଗ୍ରାଣ୍ଡ ଫିନାଲେରେ ସାମିଲ ହୋଇଥିଲେ। ଏଥିରେ ସେ ତାଙ୍କର ପୂର୍ବତନ ପ୍ରେମିକ ସ୍ୱର୍ଗତ ସିଦ୍ଧାର୍ଥ ଶୁକ୍ଳାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ତାଙ୍କୁ ମନେ ପକାଇ ଉଭୟ ଶେହନାଜ ଓ ସଲମାନ କାନ୍ଦି ପକାଇଥିଲେ। ସୂଚନାଯୋଗ୍ୟ, ପୂର୍ବତନ ବିଗ୍ ବସ୍ ବିଜେତା ସିଦ୍ଧାର୍ଥ ଶୁକ୍ଳାଙ୍କର ଗତବର୍ଷ ମୃତ୍ୟୁ ହୋଇଥିଲା। ତାଙ୍କୁ ମାତ୍ର ୪୦ ବର୍ଷ ହୋଇଥିଲା।

ଶୁଟିଂ ସେଟ୍‌ରେ ଲାଗିଲା ନିଆଁ, ଅଳ୍ପକେ ବର୍ତ୍ତିଲେ ଅକ୍ଷୟ-କ୍ରିତି…!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ବଲିଉଡର ଖିଲାଡି ଷ୍ଟାର ଅକ୍ଷୟ କୁମାରଙ୍କ ଅପ୍‌କମିଂ ଫିଲ୍ମ `ବଚ୍ଚନ ପାଣ୍ଡେ’ର ଶୁଟିଂ ସେଟ୍‌ରେ ଅଗ୍ନିକାଣ୍ଡ। ଅଳ୍ପକେ ବର୍ତ୍ତିଲେ ଅକ୍ଷୟ କୁମାର ଓ ଅଭିନେତ୍ରୀ କ୍ରିତି ସାନନ୍‌। ଘଟଣାସ୍ଥଳରେ ନିଆଁକୁ ଆୟତ୍ତ କରାଯାଇଛି। ତେବେ ଏହି ଫିଲ୍ମର ଶୁଟିଂ କେଉଁଠି ଚାଲିଥିଲା ସେ ନେଇ କିଛି ସୂଚନା ମିଳିନାହିଁ। ରିପୋର୍ଟ ମୁତାବକ, ଏହି ଫିଲ୍ମର ଶୁଟିଂ ପ୍ରାୟ ଶେଷ ହେବାକୁ ବସିଲାଣି। ଏବେ କେବଳ କିଛି ପ୍ୟାଚ୍‌ୱାର୍କ ରହିଛି। ଏଥିପାଇଁ ଅକ୍ଷୟ ଓ କ୍ରିତି କିଛି ବାକି ରହିଥିବା କାମ ପାଇଁ ଶୁଟିଂ କରୁଥିଲେ। ଏହି ସମୟରେ ହଠାତ୍‌ ସେଟ୍‌ରେ ନିଆଁ ଲାଗି ଯାଇଥିଲା। ତେବେ ସୌଭାଗ୍ୟବଶତଃ ଏଥିରେ କାହାରି କିଛି କ୍ଷୟକ୍ଷତି ଘଟନାହିଁ। ଖୁବଶୀଘ୍ର ନିଆଁକୁ ଆୟତ୍ତ କରାଯାଇଥିବା ଜଣାପଡିଛି। ଏହି ଫିଲ୍ମର ଲିଡ୍‌ ରୋଲ୍‌ରେ ଅକ୍ଷୟ କୁମାର ଥିବା ବେଳେ ତାଙ୍କ ଅପୋଜିଟ୍‌ରେ କ୍ରିତି ସାନନ ଓ ଜ୍ୟାକ୍‌ଲିନ୍‌ ଫର୍ଣ୍ଣାଣ୍ଡିଜ ଅଛନ୍ତି। ଏଥିରେ ଅକ୍ଷୟଙ୍କୁ ଏକ ଭିନ୍ନ ଚରିତ୍ରରେ ଦେଖିବାକୁ ମିଳିବ। ସେ ଏଥିରେ ଏକ ଭିନ୍ନ ରକମର ହିନ୍ଦୀ କହୁଥିବା ଦେଖିବାକୁ ମିଳିବ। ଏହି ଭାଷା କହିବା ପାଇଁ ସେ ଫିଲ୍ମର ସେଟ୍ ଉପରେ ସହକାରୀ ନିର୍ଦ୍ଦେଶକଙ୍କଠାରୁ ତାଲିମ ନେଉଛନ୍ତି। କୁହାଯାଉଛି ଯେ ‘ବଚ୍ଚନ ପାଣ୍ଡେ’ରେ ଅକ୍ଷୟ କୁମାର ଉତ୍ତରପ୍ରଦେଶର ଗ୍ୟାଙ୍ଗଷ୍ଟର ବଚ୍ଚନ ପାଣ୍ଡେ ଭୂମିକାରେ ନଜର ଆସିବେ। ସାମ୍ବାଦିକ ରୂପେ ନଜର ଆସିବେ କ୍ରିତି, ଯିଏକି ତାଙ୍କ ପାଇଁ ଏକ ଫିଲ୍ମ ତିଆରି ଲାଗି ଯୋଜନା କରିଛନ୍ତି। ଏହା ପରେ ହିରୋ ଅପରାଧ ଜଗତ ଛାଡୁଛନ୍ତି କି ନାହିଁ ତାହା ଉପରେ କାହାଣୀ ଅଗ୍ରଗତି କରୁଛି। ଏହି ଫିଲ୍ମରେ ଅନ୍ୟ ପ୍ରମୁଖ ଭୂମିକାରେ ଅରସଦ୍‌ ବର୍ସି, ସଞ୍ଜୟ ମିଶ୍ରା ଓ ପଙ୍କଜ ତ୍ରିପାଠୀ ମଧ୍ୟ ଅଛନ୍ତି। ଆସନ୍ତା ମାର୍ଚ୍ଚ ୪ ତାରିଖରେ ଏହି ଫିଲ୍ମଟି ରିଲିଜ ହେବ। ଏହି ଫିଲ୍ମଟି ସାଉଥ ଫିଲ୍ମ ‘ଜିଗରଥଣ୍ଡା’ର ରିମେକ୍‌।

ଆସିବ କପିଲ ଶର୍ମାଙ୍କ ବାୟୋପିକ୍, ମକର ସଂକ୍ରାନ୍ତିରେ ହେଲା ଘୋଷଣା…!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ଆସିବ କମେଡିଆନ କପିଲ ଶର୍ମାଙ୍କ ବାୟୋପିକ୍। ଶୁକ୍ରବାର ମକର ସଂକ୍ରାନ୍ତି ଅବସରରେ କରାଯାଇଛି ଏହି ଘୋଷଣା। ପ୍ରଯୋଜକ ମହାବୀର ଜୈନ କରିଛନ୍ତି ଏହି ଘୋଷଣା। ଫିଲ୍ମଟିର ନାଁ ରହିବ ‘ଫନ୍‌କାର’। ଏହାର ନିର୍ଦ୍ଦେଶନା ଦେବେ ‘ଫୁକ୍‌ରେ’ ଫେମ୍‌ ମୃଗଦୀପ ସିଂହ ଲାମ୍ବା। ମୃଗଦୀପ ଏବେ ‘ଫୁକ୍‌ରେ ୩’ ପାଇଁ କାମ କରୁଥିବା ବେଳେ ଆଗକୁ ଲୋକେ ଦେଶର ଜଣାଶୁଣା କମେଡିଆନ୍ କପିଲ ଶର୍ମାଙ୍କ ବାୟୋପିକ୍ ଦେଖିବାକୁ ପାଇବେ ବୋଲି କହିଛନ୍ତି। ସେହିପରି ପ୍ରଯୋଜକ ମହାବୀର ଜୈନ କହିଛନ୍ତି, ଦେଶର କୋଟି କୋଟି ଲୋକ ଏବେ କପିଲ ଶର୍ମାଙ୍କ ଯୋଗୁ ହସିବାର ଖୋରାକ ପାଇଛନ୍ତି। କପିଲଙ୍କ ଜୀବନୀ ଉପରେ ଫିଲ୍ମ କରିବାକୁ ଯାଉଥିବାରୁ ଆମେ ଗର୍ବ ଅନୁଭବ କରୁଛୁ। ଏଥିରେ ତାଙ୍କ ଜୀବନର ଅନେକ ଅଜଣା ଓ ଅକୁହା କଥା ସ୍ଥାନ ପାଇବ। ଅନ୍ୟପକ୍ଷରେ ଖୁବ୍‌ଶୀଘ୍ର କପିଲ ଶର୍ମାଙ୍କୁ ନେଟ୍‌ଫ୍ଲିକ୍ସରେ ଦେଖିବାକୁ ମିଳିବ। ଏଥିରେ ତାଙ୍କ ଶୋ’ ‘କପିଲ ଶର୍ମା: ଆଇ ଆମ୍ ନଟ୍ ଡନ୍ ୟେଟ୍‌’ ଜାନୁଆରୀ ୨୮ ତାରିଖରୁ ଆରମ୍ଭ ହେବ। ଏବେ କପିଲଙ୍କ କମେଡି ଶୋ’ ସୋନି ଟିଭିରେ ପ୍ରସାରିତ ହେଉଥିବା ବେଳେ ସେ ପ୍ରଥମ ଥର ପାଇଁ ନେଟ୍‌ଫ୍ଲିକ୍ସରେ ଆସିବେ।

ଅର୍ଜୁନ-ମଲାଇକାଙ୍କ ବ୍ରେକ୍‌ଅପ୍‌ ; ଆଇସୋଲେସନ୍‌ରେ ବଲିଉଡର ମୁନ୍ନି ….!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ବଲିଉଡ ଅଭିନେତା ଅର୍ଜୁନ କପୁର ଓ ଅଭିନେତ୍ରୀ ମଲାଇକା ଅରୋନା। ଦୁହେଁ ବହୁ ବର୍ଷ ଧରି ପରସ୍ପରକୁ ଡେଟ୍‌ କରୁଛନ୍ତି। ବି-ଟାଉପରେ ମୋଷ୍ଟ ଫେଭରେଟ୍‌ କପଲ୍‌ଙ୍କ ମଧ୍ୟରେ ଏମାନେ ଜଣେ। ପ୍ରାୟତଃ ଦୁହିଁଙ୍କ ସବୁ ଜାଗାରେ ଏକାଠି ଦେଖିବାକୁ ମିଳେ। ସେ ପାର୍ଟି ହେଉ ଅବା କୌଣସି ଫଙ୍କସନ୍‌। ଦୁହେଁ ରୋମାଣ୍ଟିକ ଅନ୍ଦାଜରେ ନଜର ଆସନ୍ତି। ତେବେ ଗତ କିଛି ଧରି ଦୁହିଁଙ୍କ ମଧ୍ୟରେ ସବୁ କିଛି ଠିକ୍‌ ନାହିଁ।  ଏବେ କୁଆଡେ ଏହି ଦୁଇ ପ୍ରେମୀ ଯୁଗଳ ଅଲଗା ହୋଇଯାଇଛନ୍ତି। ଅର୍ଜୁନ ଓ ମଲାଇକାଙ୍କ ବ୍ରେକ୍‌ଅପ୍‌ ହୋଇଯାଇଥିବା ନେଇ ଖବର ଶୁଣିବାକୁ ମିଳିଛି। ବଲିଉଡ ଲାଇଫର ରିପୋର୍ଟ ମୁତାବକ, “ଗତ ୬ଦିନ ଧରି ମଲାଇକା ଘରୁ ବାହାରକୁ ଆସି ନାହାଁନ୍ତି। ସେ ସମ୍ପୂର୍ଣ୍ଣ ଆଇସୋଲେସନ୍‌ରେ ଅଛନ୍ତି। ଗୋଟେ ଘରେ ନିଜକୁ ଲକ୍‌ କରିଦେଇଛନ୍ତି ମଲାଇକା। କୁହାଯାଉଛି ଯେ, ମଲାଇକା ବହୁତ ଦୁଃଖିତ ଏବଂ ସେ କିଛି ସମୟ ପାଇଁ ଦୁନିଆରୁ ଦୂରେଇ ରହିବାକୁ ଚାହୁଁଛନ୍ତି। ଏଥି ସହିତ ଅର୍ଜୁନ କପୁର ମଧ୍ୟ ଗତ କିଛି ଦିନ ହେବ ମଲାଇକାଙ୍କୁ ଭେଟିବାକୁ ଯାଇ ନାହାଁନ୍ତି।ପ୍ରାୟ ତିନି ଦିନ ପୂର୍ବେ ଅର୍ଜୁନ କପୁର ତାଙ୍କ ଭଉଣୀ ରିୟା କପୁରଙ୍କ ଘରକୁ ଯାଇଥିଲେ, ଯେଉଁଠାରେ ଡିନର ପାର୍ଟିର ଆୟୋଜନ କରାଯାଇଥିଲା। ମଲାଇକା ମଧ୍ୟ ଅର୍ଜୁନଙ୍କ ସହ ଏହିପରି ପରିବାରର ଡିନର ପାର୍ଟିରେ ଯୋଗ ଦିଅନ୍ତି, କିନ୍ତୁ ଏଥର ତାହା ହୋଇ ନାହିଁ। ଅର୍ଜୁନ ମଧ୍ୟ ନିଜ ଭଉଣୀ ଘରକୁ ଯାଇ ମଲାଇକାଙ୍କୁ ଭେଟିବାକୁ ଯାଇନାହାନ୍ତି।

ଅର୍ଜୁନ କପୁର ସର୍ବଦା ସୁନିଶ୍ଚିତ କରନ୍ତି ଯେ, ଯେତେବେଳେ ବି ସେ ମଲାଇକାଙ୍କ ଘର ଆଖପାଖରେ ଥାଆନ୍ତି, ସେତେବେଳେ ସେ କେବଳ ନିଜ ଲେଡି ଲଭ୍‌କୁ ଭେଟି ଘରକୁ ଫେରନ୍ତି, କିନ୍ତୁ ସେଦିନ ତାହା ହୋଇନଥିଲା। ରିୟା କପୁରଙ୍କ ଘରୁ ଅର୍ଜୁନ ସିଧା ତାଙ୍କ ଘରକୁ ଫେରି ଆସିଥିଲେ। ଅର୍ଜୁନ ଏବଂ ମଲାଇକା ପ୍ରାୟତଃ କଫି ଏବଂ ଡିନର୍‌ ଡେଟ୍‌ରେ ଯାଆନ୍ତି। କିନ୍ତୁ ଉଭୟଙ୍କୁ କିଛି ଦିନ ହେଲେ ସ୍ପଟ୍‌ କରାଯାଉ ନାହିଁ। ସେମାନେ ପରସ୍ପରକୁ ଏବେ ଡେଟିଂ କରିବା ଠାରୁ ଦୂରେଇ ରହିଛନ୍ତି। ଏସବୁ ଜିନିଷ ଦର୍ଶାଏ ଯେ ଦୁହିଁଙ୍କ ମଧ୍ୟରେ କିଛି ଠିକ୍‌ ନାହିଁ।ସୂଚନା ମୁତାବକ, ଅର୍ଜୁନ କପୁରଙ୍କ ହାତରେ ଏବେ ଅନେକ ପ୍ରଜେକ୍ଟସ୍‌ ରହିଛି। ଶେଷଥର ପାଇଁ ଅର୍ଜୁନଙ୍କୁ ‘ଭୂତ ପୁଲିସ’ ଫିଲ୍ମରେ ଦେଖିବାକୁ ମିଳିଥିଲା। ଏଥିରେ ତାଙ୍କ ବ୍ୟତୀତ ସୈଫ ଅଲ୍ଲି ଖାନ୍‌, ୟାମୀ ଗୌତମ ଓ ଜ୍ୟାକ୍‌ଲିନ୍‌ ଫର୍ଣ୍ଣାଣ୍ଡିଜ ଲିଡ୍‌ ରୋଲରେ ଥିଲେ। ଆଗକୁ ତାଙ୍କର ‘ଏକ ଭିଲେନ୍‌ ରିଟର୍ଣ୍ଣ’ ଫିଲ୍ମ ଆସିବା ଅପେକ୍ଷାରେ ରହିଛି। ସେହିପରି ମଲାଇକା ଅରୋରା ମଧ୍ୟ ଗତ କିଛି ଦିନ ତଳେ ଡ୍ୟାନ୍ସ ରିଆଲିଟି ଶୋ’ ଇଣ୍ଡିଆଜ୍‌ ବେଷ୍ଟ ଡ୍ୟାନ୍ସରରେ ଜଜ୍‌ ଭାବେ ନଜର ଆସିଥିଲେ।

ରୁପେଲି ପରଦା ରେ ଆସୁଅଛି ଓଡିଆ ଚଳଚ୍ଚିତ୍ର ଅଭିସାରିକା ; ଆଜି ହେଲା ଶୁଭ ମହୁରତ …!

ଏଥର ସମ୍ଭାଳ ବ୍ୟୁରୋ(ଭୁବନେଶ୍ବର) – ଭୁବନେଶ୍ୱର ମହାନଗର ସ୍ଥିତ ଜାଗମରା ଜଗନ୍ନାଥ ମନ୍ଦିର ପ୍ରାଙ୍ଗଣରେ ଆଜି ଜେନେସିସ୍ ମୋସନ ପିକ୍ଚର ଓ କାନ୍ତା ଜ୍ୟୋତି ପ୍ରଡକ୍ସନ ର ମିଳିତ ଅନୁକୂଲ୍ୟ ରେ ବଡ଼ ପରଦା ଚଳଚ୍ଚିତ୍ର ତଥା ହଲ୍ ଫିଲ୍ମ ” ଅଭିସାରିକା ” ର ଶୁଭ ମହୁରତ କାର୍ଯ୍ୟକ୍ରମ ଆୟୋଜିତ ହୋଇଯାଇଛି । ଏହି ଚଳଚ୍ଚିତ୍ର ରେ ନାୟକ ଭାବେ ସିନେ ଜଗତ ର ଜଣାଶୁଣା ଅଭିନେତା ପ୍ରେମ କୁମାର ରହିଥିବା ବେଳେ ପ୍ରଥମ ନାୟିକା ଭାବେ ସିନେ ଜଗତ ର ଆଗଧାଡି ର ଅଭିନେତ୍ରୀ ପୂଜା ରାଓ ଓ ଦ୍ଵିତୀୟ ନାୟିକା ଭାବେ ଅଭିନେତ୍ରୀ ମୋନାଲିସା ଦାଶ ରହିଛନ୍ତି ।

ଏହାର ନିର୍ଦ୍ଦେଶନା ଓ ଚିତ୍ରନାଟ୍ୟ ଭାର ଶ୍ରୀ ଅଜିତ୍ ଗୋଛାୟତ ତୁଲାଉଥିବା ବେଳେ ମୁଖ୍ୟ ସହ ନିର୍ଦ୍ଦେଶକ ଓ ପ୍ରଡକ୍ସନ ମୁଖ୍ୟ ର ଦାୟିତ୍ୱ ଶ୍ରୀ ଶକ୍ତି ଦାଶ ତୁଲାଉଛନ୍ତି । ଏହି ଚଳଚ୍ଚିତ୍ର ଟି ର କାହାଣୀ ଓ ସଂଳାପ ଶ୍ରୀ ଅଜିତ୍ ଜି ଏବଂ ସୁଶ୍ରୀ ତାପସି ଲେଖିଛନ୍ତି ଏବଂ ସୁନାମଧନ୍ୟ ସଙ୍ଗୀତ ନିର୍ଦ୍ଦେଶକ ଏନ କେ ଏଥିରେ ସଙ୍ଗୀତ ନିର୍ଦ୍ଦେଶନା ଦେଇ ଥିବା ବେଳେ, ଡି ଓ ପି (କ୍ୟାମେରା) ର ଭାର ସତ୍ୟମ୍ ଏସ୍ଏସ୍ ତୁଲାଉଛନ୍ତି । ଚଳଚ୍ଚିତ୍ର ଟି ର ପ୍ରଯୋଜକ ଭାବେ ଶ୍ରୀ ବି କାନ୍ତା ରାଓ ରହିଥିବା ବେଳେ ସହ ପ୍ରଯୋଜକ ଭାବେ ଶ୍ରୀ ସିଦ୍ଧାର୍ଥ ଦାଶ ଓ ଚେପାଲି ପ୍ରେମ କୁମାର ରହିଛନ୍ତି । ଏଥିରେ ଅନ୍ୟାନ୍ୟ ଭୂମିକାରେ ଫିଲ୍ମ ଜଗତର କଳାକାର ଦେବ, କାଳିଆ ଷଣ୍ଡ, ଲଲି ପପୁ, ପ୍ରଜ୍ଞା ପ୍ରିୟଦର୍ଶିନୀ, ତାପସି, ପ୍ରିୟା ଦାଶ, ସତ୍ୟ କଣ୍ଠ ରହିଛନ୍ତି । ଚଳଚ୍ଚିତ୍ର ଟି ଏକ ହରର୍ ଓ ଟିନ ଏଜ ଲଭ ଷ୍ଟୋରି ଉପରେ ଆଧାରିତ ବୋଲି ନିର୍ଦ୍ଦେଶକ ଅଜିତ୍ ଗୋଛାୟତ ସୂଚନା ଦେଇଛନ୍ତି । ଆଗାମୀ ନୂତନ ବର୍ଷ ରେ ଦର୍ଶକ ଙ୍କୁ ଏକ ଭିନ୍ନ ଧରଣର ମନୋରଞ୍ଜନ ଭିତ୍ତିକ ଉପହାର ଦେବା ନିମନ୍ତେ ଚେଷ୍ଟା ଜାରି ରଖିଥିବା ପ୍ରଡକ୍ସନ ମୁଖ୍ୟ ତଥା ମୁଖ୍ୟ ସହ ନିର୍ଦ୍ଦେଶକ ଶକ୍ତି ଦାଶ କହିଛନ୍ତି ।

ପୂଜାଙ୍କ ପ୍ରେମରେ ପାଗଳ ପ୍ରଭାସ…!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ପ୍ରେମରେ ଉବୁଟୁବୁ ବାହୁବଳୀ ଫେମ୍‌ ପ୍ରଭାସ। ଲକ୍ଷ ଲକ୍ଷ ଫ୍ୟାନ୍‌ଙ୍କୁ ପାଗଳ କରିଥିବା ପ୍ରଭାସ ଏବେ ନିଜେ ପଡିଛନ୍ତି ପ୍ରେମ ଜାଲରେ। ସେ ଅଭିନେତ୍ରୀ ପୂଜା ହେଗଡେଙ୍କ ପାଇଁ ପାଲଟି ଯାଇଛନ୍ତି ଆଶିକ୍‌। ତାଙ୍କ ପାଇଁ ସେ ଆଶିକି କରୁଛନ୍ତି। କେତେବେଳେ ତାଙ୍କ ପାଇଁ ଷ୍ଟେସନ ବାହାରେ ଅପେକ୍ଷା କରୁଛନ୍ତି ତ ଆଉ କେତେବେଳେ ବର୍ଷାରେ ଭିଜୁଛନ୍ତି। ସେହିପରି ଆଉ କେତେବେଳେ ତାଙ୍କୁ ବାଇକ୍‌ରେ ବସାଇ ବୁଲୁଛନ୍ତି। ରିଲିଜ ହୋଇଛି ବହୁ ପ୍ରତିକ୍ଷିତ ଫିଲ୍ମ ‘ରାଧେ ଶ୍ୟାମ୍‌’ର ଲଭ୍‌ ଆନ୍ଥମ୍‌। ଏହି ଗୀତରେ ସାଉଥ ସୁପରଷ୍ଟାର ପ୍ରଭାସ ପାଲଟିଛନ୍ତି ରମୋଣ୍ଟିକ୍‌ ବୟ। ସେ ଅଭିନେତ୍ରୀ ପୂଜା ହେଗଡେଙ୍କ ପାଇଁ ପାଗଳ ହୋଇଯାଇଛନ୍ତି। ଏହି ଗୀତଟି ରିଲିଜ ହେବାର କିଛି ଘଣ୍ଟା ମଧ୍ୟରେ ହିଁ ୟୁଟ୍ୟୁବ୍‌ରେ ଧମାଲ କରିଛି। ସୋଶାଲ ମିଡିଆରେ ମଧ୍ୟ ପ୍ରଭାସଙ୍କ ଏହି ଗୀତ ଟ୍ରେଣ୍ଡ କରୁଛି। ଫିଲ୍ମ ‘ରାଧେ ଶ୍ୟାମ୍‌’ ଟିମ୍‌ ତରଫରୁ ସୋଶାଲ ମିଡିଆ ହ୍ୟାଣ୍ଡେଲରେ ଏହି ଗୀତଟିକୁ ଶେୟାର କରାଯାଇଛି। ଗୀତରେ ପ୍ରଭାସ ଏବଂ ପୂଜାଙ୍କ କେମେଷ୍ଟ୍ରି ଦର୍ଶକଙ୍କୁ ଖୁବ୍‌ ପସନ୍ଦ ଆସୁଛି। ଏହି ଗୀତଟି ରିଲିଜ ହେବା ପରେ ଏବେ ଏହି ଫିଲ୍ମକୁ ନେଇ ପ୍ରଶଂସକଙ୍କ ମଧ୍ୟରେ ଉତ୍ସାହ ବଢ଼ି ଯାଇଛି। ଏହି ରୋମାଣ୍ଟିକ୍‌ ଗୀତଟିକୁ ଅରିଜିତ ସିଂହ ଗାଇଛନ୍ତି। ଆସନ୍ତା ଜାନୁଆରୀ ୧୪ରେ ଏହି ଫିଲ୍ମଟି ବଡ ପରଦାରେ ରିଲିଜ ହେବ। ବିଭିନ୍ନ ଭାଷାରେ ଫିଲ୍ମଟି ପରଦାକୁ ଆସିବ। ଗୁଲସନ କୁମାର ଓ ଟି-ସିରିଜ ପ୍ରଡକ୍ସନରେ ତିଆରି ଏହି ଫିଲ୍ମକୁ ରାଧା କୃଷ୍ଣା କୁମାର ନିର୍ଦ୍ଦେଶନା ଦେଇଛନ୍ତି। ଲିଡ୍‌ ରୋଲରେ ପ୍ରଭାସ ଥିବା ବେଳେ ପ୍ରଥମ ଥର ପାଇଁ ତାଙ୍କ ଅପୋଜିଟ୍‌ରେ ପୂଜା ହେଗଡେ ଅଛନ୍ତି।

ସ୍ନେହାଙ୍କୁ ନିର୍ଦ୍ଦେଶକଙ୍କ ସହିତ ଗୋଟିଏ ଦିନ ବିତାଇବାକୁ କୁହାଯାଇଥିଲା….!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ‘ସାଥ୍ ନିଭାନା ସାଥୀୟା-୨’ରେ ଲିଡ୍ ରୋଲ୍‌ରେ ଅଭିନୟ କରୁଛନ୍ତି ସ୍ନେହା ଜୈନ। ଏଥିରେ ସେ ଗେହ୍‌ନା ଚରିତ୍ରରେ ଅଭିନୟ କରୁଛନ୍ତି। ଏହି ଧାରାବାହିକ ଜରିଆରେ ସେ ଘରେ ଘରେ ପରିଚିତ ହୋଇଗଲେଣି। ତେବେ ଏହି ସଫଳତା ପାଇଁ ତାଙ୍କୁ ବେଶ୍ କଷ୍ଟ କରିବାକୁ ପଡ଼ିଛି। ଅନେକ ଥର ତାଙ୍କୁ ରିଜେକ୍ଟ କରାଯାଇଛି। ଏମିତିକି ସେ କାଷ୍ଟିଂ କାଉଚ୍‌ର ମଧ୍ୟ ଶିକାର ହୋଇଛନ୍ତି। ଅତୀତରେ ଅନେକ ଅଭିନେତ୍ରୀ କାଷ୍ଟିଂ କାଉଚ୍‌କୁ ନେଇ ଖୋଲାଖୋଲି ନିଜ ଅନୁଭୂତି ବଖାଣିଥିବା ବେଳେ ଏବେ ଏହି ତାଲିକାରେ ଯୋଡ଼ି ହୋଇଛନ୍ତି ସ୍ନେହ ଜୈନ। ଏକ ସାକ୍ଷାତକାରରେ ସେ ଏ ସଂପର୍କରେ ଖୋଲାଖୋଲି ଆଲୋଚନା କରିଛନ୍ତି। ସେ କହିଛନ୍ତି, ଥରେ ଦକ୍ଷିଣ ଭାରତର ଜଣେ କାଷ୍ଟିଂ ଡାଇରେକ୍ଟର ମୋତେ ଫୋନ୍ କରିଥିଲେ। ସେ ମୋତେ ଏକ ଫିଲ୍ମ ଯାଚି ଥିଲେ। ମୁଁ ମୋ ପ୍ରୋଫାଇଲ ଓ କିଛି ଫଟୋ ପଠାଇ ଥିଲି। ତା’ପର ଦିନ ସେ ମୋତେ ହାଇଦ୍ରାବାଦ ଡାକିଥିଲେ ଫିଲ୍ମର ନିର୍ଦ୍ଦେଶକ ଓ ପ୍ରଯୋଜକଙ୍କୁ ସାକ୍ଷାତ କରିବାକୁ। ମୁଁ ସେଠାକୁ ଯିବାକୁ ରାଜି ହୋଇଥିଲି। ତେବେ ତା’ ପୂର୍ବରୁ ଫିଲ୍ମ ସଂପର୍କରେ ସବିଶେଷ କଥା ଜାଣିବାକୁ ଚାହିଁଥିଲି। ମୁଁ ତାଙ୍କୁ ସେ ବିଷୟରେ ଜଣାଇବା ସହିତ ମା’ଙ୍କ ସାଙ୍ଗରେ ସେଠାକୁ ଯିବି ବୋଲି କହିଥିଲି। କାଷ୍ଟିଂ ଡାଇରେକ୍ଟର କହିଥିଲେ ଯେଉଁ ଦିନ ମୁଁ ହାଇଦ୍ରାବାଦରେ ପହଞ୍ଚିବି ସେହିଦିନ କେଉଁ ହୋଟେଲ୍‌ରେ ଫିଲ୍ମର ନିର୍ଦ୍ଦେଶକ ଓ ପ୍ରଯୋଜକଙ୍କୁ ଭେଟିବାକୁ ହେବ ସେ କଥା କହି ଦିଆଯିବ। ଚୁକ୍ତିପତ୍ର ସ୍ୱାକ୍ଷର କରିବା ପରେ ମୋତେ ଅଧା ପାରିଶ୍ରମିକ ଦେଇ ଦିଆଯିବ। କିନ୍ତୁ ମୋତେ ଫିଲ୍ମର ନିର୍ଦ୍ଦେଶକଙ୍କ ସହିତ ଗୋଟିଏ ଦିନ ବିତାଇବାକୁ ପଡ଼ିବ ବୋଲି ସେ କହିଥିଲେ। ଆଉ ନିର୍ଦ୍ଦେଶକ ଯାହା କହିବେ ମୋତେ କରିବାକୁ ପଡ଼ିବ ବୋଲି କହିଥିଲେ। ଏହା ଶୁଣି ମୁଁ ଆଶ୍ଚର୍ଯ୍ୟ ହୋଇଯାଇଥିଲି। ସ୍ନେହା ଆହୁରି କହିଛନ୍ତି, ଏହା ଠିକ୍ କଥା ନୁହେଁ ବୋଲି ମୁଁ ଉକ୍ତ କାଷ୍ଟିଂ ଡାଇରେକ୍ଟରଙ୍କୁ କହିଥିଲି। ମୁଁ ସେହି ପ୍ରୋଜେକ୍ଟରେ କାମ କରିବି ନାହିଁ ବୋଲି ମଧ୍ୟ କହିଥିଲି। ତା’ପରେ ସେ କହିଥିଲେ ଏଇଟା ବଡ଼ କଥା ନୁହେଁ। ଅନେକ ଅଭିନେତ୍ରୀ ଏମିତି କମ୍ପ୍ରୋମାଇଜ କରନ୍ତି। ସପ୍ତାହେ ପରେ ସେ ପୁଣି ମୋତେ ଫୋନ୍ କରିଥିଲେ। କିନ୍ତୁ ମୁଁ ଉକ୍ତ ପ୍ରୋଜେକ୍ଟରେ କାମ କରିବି ନାହିଁ ବୋଲି କହିଥିଲି। ଅନେକ ଥର ବିଫଳତାର ସମ୍ମୁଖୀନ ହୋଇଥିବା ସ୍ନେହା କହିଛନ୍ତି ଯେ ସବୁ ବିଫଳତାରୁ ଶିକ୍ଷାଲାଭ କରି ଉପରକୁ ଉଠିଛନ୍ତି। ସେ କହିଛନ୍ତି, ଯେତେବେଳେ ଜଣେ ଅଭିନୟରେ କ୍ୟାରିୟର ଆରମ୍ଭ କରେ ସେତେବେଳେ ପ୍ରଥମେ ସମସ୍ତେ ତାଙ୍କ ସୌନ୍ଦର୍ଯ୍ୟ ଓ ବ୍ୟକ୍ତିତ୍ୱକୁ ବିଚାରକୁ ନିଅନ୍ତି। ମୋ ସହିତ ବି ସେମିତି ଘଟିଥିଲା। ମୁଁ ଅଧିକ ଡେଙ୍ଗା ହୋଇ ନଥିବାରୁ ବହୁବାର ମୋତେ ରିଜେକ୍ଟ କରାଯାଇଥିଲା। କିନ୍ତୁ ମୁଁ ଆଶା ହରାଇ ନଥିଲି। କାରଣ ମୁଁ ମୋ ଅଭିନୟ ଦକ୍ଷତା ଉପରୁ ବିଶ୍ୱାସ ହରାଇ ନଥିଲି।

ଛୋଟ ପରଦାରେ ଧମାକେଦାର ଏଣ୍ଟ୍ରି କରିବେ ବାଜିରାଓ….!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ବିଗ୍‌ ବି, ଶାହରୁଖ ଖାନ ଓ ସଲମାନଙ୍କ ପରେ ଏବେ ହୋଷ୍ଟ ସାଜିବେ ବଲିଉଡର ବାଜିରାଓ। କଲର୍ସ ଚ୍ୟାନେଲର ‘ଦି ବିଗ୍‌ ପିକଚର’ ଶୋ’ ଜରିଆରେ ଛୋଟ ପରଦାରେ ଧମାକେଦାର ଏଣ୍ଟ୍ରି କରିବେ ବଲିଉଡ୍‌ର ମୋଷ୍ଟ ଷ୍ଟାଇଲିଶ୍‌ ସୁପରଷ୍ଟାର ରଣବୀର ସିଂ। ବଡ଼ ପରଦାରେ ନିଜ ଜଲୱାରେ ଫ୍ୟାନ୍ସଙ୍କୁ ଦିବାନା କରି ସାରିଥିବା  ରଣବୀର ଏଥର  ଛୋଟ ପରଦାରେ ବି କମାଲ ଦେଖାଇବେ। ନିଜ ନୂଆ ପ୍ରୋଜେକ୍ଟକୁ ନେଇ ଖୁବ୍‌ ଏକ୍ସାଇଟେଡ ଥିବା ରଣବୀର କହିଛନ୍ତି ଜଣେ କଳାକାର ଭାବେ ଫ୍ୟାନ୍ସ ମୋତେ  ଖୁବ୍‌ ଭଲ ପାଇବା ଦେଇଛନ୍ତି। ଏବେ ଜଣେ ହୋଷ୍ଟ ରୂପେ ଛୋଟ ପରଦାରେ ଏଣ୍ଟ୍ରି କରିବି।  କଲର୍ସ ସହ ଯୋଡ଼ି ହୋଇ ଖୁବ୍‌ ଖୁସି ଅଛି। ଏକଥାର ଖୁଲାସା ରଣବୀର ନିଜେ ବିଗ୍‌ ବସ୍‌ ମଞ୍ଚରେ ଦବଙ୍ଗ ଖାନଙ୍କ ଉପସ୍ଥିତିରେ କରିଛନ୍ତି। ବିଗ୍‌ ବସ୍‌ ସିଜିନ-୧୫ ଆଜି ଟେଲିକାଷ୍ଟ ହେବ । ସୋ’ରେ ଗ୍ଲାମରର ତଡ଼କା ଲଗାଇବାକୁ  ଡ୍ୟାନ୍ସ ସହ ଖୁବ୍‌ ମସ୍ତିଭରା କାର୍ଯ୍ୟକ୍ରମ ରହିଛି। ବିଗ୍‌ ବସ୍‌ର ଗ୍ରାଣ୍ଡ ମସ୍ତି କାର୍ଯ୍ୟକ୍ରମରେ ସୋ’ର ହୋଷ୍ଟ ସଲମାନ ଖାନଙ୍କ ସହ ଫ୍ୟାନ୍ସଙ୍କ ଖୁବ୍‌ ଏଣ୍ଟରଟେନ୍‌ କରିବେ  ବଲିଉଡର ବାଜିରାଓ ରଣବୀର ସିଂ । ରଣବୀର ନିଜର ପ୍ରଥମ ଟେଲିଭିଜନ ସୋ’ ‘ଦି ବିଗ୍‌ ପିକଚର’କୁ ପ୍ରମୋଟ କରିବାକୁ ବିଗ୍‌ ବସ୍‌  ସୋ’ରେ ପହଞ୍ଚିଛନ୍ତି।  ଏହି ପ୍ରିମିୟର ସୋ’ରେ ସଲମାନ ଓ ରଣବୀର ଖୁବ୍‌ ମସ୍ତି କରୁଥିବାର ଫ୍ୟାନ୍ସ ଦେଖିବାକୁ ପାଇବେ। ଏଥିସହ ବିଗ୍‌ ବସ୍‌ ଶୋ’ର ପ୍ରଶଂସା କରି ରଣବୀର କହିଛନ୍ତି, ବିଗ୍‌ ବସ୍‌ ଟେଲିଭିଜନର ସବୁଠୁ ପପୁଲାର ସୋ’ । ବହୁ ପ୍ରତିଭାବାନ କାଳକାର ଗୋଟିଏ ଘରେ ଦୀର୍ଘ ଦିନ ରହିଥାନ୍ତି।  ଏହି ସମୟରେ ସେମାନଙ୍କ କାର୍ଯ୍ୟକଳାପ ଦ୍ୱାରା ଫ୍ୟାନ୍ସଙ୍କୁ ସେମାନଙ୍କୁ ଜାଣିବାର ସୁଯୋଗ ମିଳିଥାଏ।

କାଠଗଡ଼ାକୁ ଟଣା ହେଲା କପିଲଙ୍କ ଶୋ’….!

ଏଥର ସମ୍ଭାଳ ବ୍ୟୁରୋ (ମୁମ୍ବାଇ)- ବିବାଦରେ ଫସିଲା କପିଲ ଶର୍ମାଙ୍କ ଶୋ’। ଲୋକଙ୍କୁ ହସି ହସି ବେଦମ କରାଉଥିବା ସୋନି ଟିଭିର ଏହି ଶୋ’ ଏବେ କୋର୍ଟର କାଠଗଡ଼ାକୁ ଟଣା ହୋଇଛି।  ‘କମେଡି ନାଇଟ୍‌ ଉଇଥ୍‌ କପିଲ’ ଶୋ’ର କେବଳ ଗୋଟିଏ ଏପିସୋଡ୍‌ ଉପରେ ହିଁ ମାମଲା ହୋଇଛି। ଶୋ’ର ମଞ୍ଚରେ କୋର୍ଟ ରୁମ୍‌ର ସିନ୍‌ କରି ସେଠାରେ ମଦ୍ୟପାନର ଦୃଶ୍ୟ ଦେଖାଇବା ଶୋ’ ମେକର୍ସଙ୍କୁ ମହଙ୍ଗା ପଡ଼ିଛି।  ଏହା କୋର୍ଟଙ୍କ ଅପମାନ ଦର୍ଶାଇ ମଧ୍ୟପ୍ରଦେଶର ଜଣେ ଓକିଲ ଶିବପୁରୀ ଜିଲ୍ଲା କୋର୍ଟରେ ଏକ ମାମଲା ରୁଜୁ କରିଛନ୍ତି। ଆସନ୍ତା ୧ ତାରିଖରେ ଏହି ମାମଲାର ଶୁଣାଣି ହେବ। ଜିଲ୍ଲା ମାଜିଷ୍ଟ୍ରେଟଙ୍କ କୋର୍ଟରେ ଓକିଲ ଜଣଙ୍କ ରୁଜୁ କରିଥିବା ମାମଲା ଅନୁଯାୟୀ,  ସୋନି ଟିଭିରେ ପ୍ରସାରିତ ହେଉଥିବା କପିଲ ଶର୍ମାଙ୍କ କମେଡି ଶୋ’ ରେ ମହିଳାଙ୍କ ସମେତ ଅନ୍ୟମାନଙ୍କୁ ଆକ୍ଷେପ କରାଯାଉଛି।  ଏପରି ମହିଳାଙ୍କ ମର୍ଯ୍ୟାଦାହାନୀ ପରି କମେଣ୍ଟ ବି ଦିଆଯାଉଛି। ଯେଉଁ ଏପିସୋଡ୍‌ଟି ବିରୋଧରେ ଅଭିଯୋଗ ଆସିଛି ତାହା ୨୦୨୦ ମସିହା ଜାନୁଆରୀ ୯ ତାରିଖରେ ପ୍ରସାରିତ ହୋଇଥିଲା। ଏହାପରେ ଏହି ଶୋ’ ଗତ ଏପ୍ରିଲ ୨୪ ତାରିଖରେ ପୁନଃ ପ୍ରସାରିତ ହୋଇଥିଲା। ସୂଚନାଯୋଗ୍ୟ, ଦ୍ୱିତୀୟ ଥର ବାପା ହେବା ପରେ କିଛି ଦିନ ପାଇଁ କପିଲ ଶୋ’ରୁ ବ୍ରେକ ନେବା ପାଇଁ ନିଷ୍ପତ୍ତି ନେଇଥିଲେ।  ଏହା ପରେ ଗତ ମେ’ ୧୫ ତାରିଖରୁ ପୁଣି ଥରେ ଶୁଟିଂ ଆରମ୍ଭ କରିଥିବା ବେଳେ ଜୁଲାଇ ୨୧ରୁ ଶୋ’ ପୁଣିଥରେ ଅନ୍‌ ଏୟାର ହୋଇଛି।

ବାପି ଲହରୀଙ୍କ ନାଁରେ ମିଛ ପ୍ରଚାର …!

ଏଥର ସମ୍ଭାଳ ବ୍ୟୁରୋ(ମୁମ୍ବାଇ)- ବଲିଉଡ୍ ଅନ୍ୟତମ ପ୍ରସିଦ୍ଧ ଗାୟକ ତଥା ସଙ୍ଗୀତ ନିର୍ଦ୍ଦେଶକ ବାପି ଲହରୀଙ୍କ ବିଷୟରେ ସୋଶାଲ୍ ମିଡିଆରେ ଏକ ମିଛ କଥା ପ୍ରଚାର କରାଯାଇଥିବା ବେଳେ ସେ ଏହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି। ଆଉ ସୋଶାଲ୍ ମିଡିଆରେ ସେ ନିଜ ପ୍ରତିକ୍ରିୟା ରଖିଛନ୍ତି ଓ ସଂପୂର୍ଣ୍ଣ ସୁସ୍ଥ ଅଛନ୍ତି ବୋଲି ଲେଖିଛନ୍ତି। ବାପି ତାଙ୍କ ଇନ୍‌ଷ୍ଟାଗ୍ରାମ୍‌ ଆକାଉଣ୍ଟରେ ଲେଖିଛନ୍ତି ଯେ କିଛି ଗଣମାଧ୍ୟମରେ ତାଙ୍କ ସ୍ୱାସ୍ଥ୍ୟକୁ ନେଇ ମିଛ ରିପୋର୍ଟ ପ୍ରକାଶ କରାଯାଇଥିବା ଖବର ପାଇଛନ୍ତି। ଏହା ତାଙ୍କୁ ଖୁବ୍ ଦୁଃଖିତ କରିଛି। ତାଙ୍କ ଫ୍ୟାନ୍ ଓ ଶୁଭେଚ୍ଛୁଙ୍କ ଆଶୀର୍ବାଦରୁ ସେ ଭଲ ଅଛନ୍ତି ବୋଲି ଲେଖିଛନ୍ତି।ବାପିଙ୍କ ସ୍ୱାସ୍ଥ୍ୟ ଖରାପ ହୋଇଯାଇଥିବା ଓ ତାଙ୍କ ଗଳା ଖରାପ ହୋଇଯାଇଥିବା ନେଇ କିଛି ଦିନ ଧରି ସୋଶାଲି ମିଡିଆରେ ଏକ ଖବର ପ୍ରଚାର ହୋଇଥିଲା। ସେ ଆଉ କେବେ ଗୀତ ଗାଇ ପାରିବେ ନାହିଁ ବୋଲି ମଧ୍ୟ ଏଥିରେ କୁହାଯାଇଥିଲା। ସୂଚନାଯୋଗ୍ୟ, ଗତ ଏପ୍ରିଲ ମାସରେ ବାପି କରୋନା ପଜିଟିଭ୍ ଚିହ୍ନଟ ହୋଇଥିଲେ। ତା’ପରେ ସେ ଚିକିତ୍ସାଧୀନ ଥିଲେ ଓ ସୁସ୍ଥ ହୋଇଯାଇଥିଲେ।