ମୁମ୍ବାଇ ମଡେଲ୍‌ଙ୍କ ସହ ରୋମାନ୍ସ କରିବେ ସ୍ୱରାଜ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର): ମୁମ୍ବାଇ ମଡେଲ୍‌ଙ୍କ ସହ କାମ କରିବେ ଓଲିଉଡ୍‌ ଅଭିନେତା ସ୍ୱରାଜ ବାରିକ୍। ଆଗକୁ ଏକ ଓଡିଆ ଚଳଚ୍ଚିତ୍ରରେ ଦୁହିଁଙ୍କୁ ଏକାଠି ଦେଖିବାକୁ ମିଳିବ। ତେବେ ଏହି ମୁମ୍ବାଇ ମଡେଲ୍‌ କିଏ? ଫିଲ୍ମର ନାଁ କ’ଣ?

ସ୍ୱରାଜଙ୍କ କହିବା ଅନୁଯାୟୀ, ଫିଲ୍ମର ନାଁ ସ୍ଥିର କରାଯାଇ ନାହିଁ। ଏବଂ ମଡେଲ୍‌ଙ୍କ ବିଷୟରେ ତ ଏବେ କିଛି କହିବା ଠିକ୍‌ ହେବନି। କିନ୍ତୁ ଫିଲ୍ମର ଶୁଟିଂ ଫେବୃଆରୀ ୨୦ରୁ ଆରମ୍ଭ ହେବ ଏବଂ ମୁମ୍ବାଇ ନିର୍ଦ୍ଦେଶକ ଧରମ ବର୍ମା ଫିଲ୍ମର ନିର୍ଦ୍ଦେଶନା ଭାର ସମ୍ଭାଳିବେ ବୋଲି ସୂଚନା ମିଳିଛି। ଧରମ ପୂର୍ବରୁ ଅନେକ ମରାଠି ଫିଲ୍ମରେ ନିର୍ଦ୍ଦେଶନା ଦେଇଛନ୍ତି। ଏହି ଫିଲ୍ମର ରିଲିଜ୍‌ ଜୁଲାଇ କିମ୍ବା ଅଗଷ୍ଟରେ ରଖାଯାଇଛି । ପୂର୍ବରୁ ସ୍ୱରାଜ ଭୂମିକା, ଶିବାନୀ, ଏଲିନା, ସନ୍‌ମିରାଙ୍କ ସହ କାମ କରିଥିବା ବେଳେ ପ୍ରଥମ ଥର ଜଣେ ମଡେଲ୍‌ଙ୍କ ସହ କାମ କରିବାକୁ ନେଇ ବେଶ୍‌ ଖୁସି ଅଛନ୍ତି। ସ୍ୱରାଜଙ୍କ କହିବା ଅନୁଯାୟୀ, ସେ ୩ ବର୍ଷ ଭିତରେ ୫ଟି ଫିଲ୍ମ କରିଛନ୍ତି। ଯେହେତୁ ସେ ବାଛି ବାଛି ଫିଲ୍ମ କରିଛନ୍ତି ସେଥିପାଇଁ ସେ ଅଧିକ ଫିଲ୍ମ କରିପାରିନାହାନ୍ତି। ତଥାପି ଦର୍ଶକ ତାଙ୍କୁ ଭଲ ପାଇବା ଦେଉଥିବାରୁ ଧନ୍ୟବାଦ।ସୂଚନା ଅନୁଯାୟୀ,  ସ୍ୱରାଜ ‘ତୁ ମୋ ଲଭ୍‌ ଷ୍ଟୋରୀ’, ‘ଲୈଲା ଓ ଲୈଲା’, ‘ଲଭ୍‌ ଏକ୍ସପ୍ରେସ୍’, ଆଦି ଫିଲ୍ମରେ ଲିଡ୍‌ରେ ନଜର ଆସିଛନ୍ତି। ଶିଶୁ କଳାକାର ଭାବେ ଅଭିନୟର ଯାତ୍ରା ଆରମ୍ଭ କରିଥିବା ସ୍ୱରାଜ ‘ତୁ ମୋ ଲଭ୍‌ ଷ୍ଟୋରୀ’ ଫିଲ୍ମ ମାଧ୍ୟମରେ ଡେବ୍ୟୁ କରିଥିଲେ। ଏହି ଫିଲ୍ମରେ ତାଙ୍କ ସହ ଲିଡ୍‌ରେ ନଜର ଆସିଥିଲେ ଚୁଲ୍‌ବୁଲି ନାୟିକା ଭୂମିକା।

କଶ୍ମୀର ପଣ୍ଡିତଙ୍କ ହୃଦୟଥରା ଗାଥା ବଖାଣିବ ‘ଶିକାରା’, ଆସିଲା ଟ୍ରେଲର ।

ଏଥର ସମ୍ଭାଳ ବ୍ୟୁରୋ (ମୁମ୍ବାଇ): ଭାରତ ଇତିହାସରେ ଅନ୍ୟତମ ଦୁଃଖଦ ଅଙ୍ଗ କୁହାଯାଉଥିବା କଶ୍ମୀର ପଣ୍ଡିତମାନଙ୍କ ଜମ୍ମୁ-କଶ୍ମୀର ଛାଡ଼ିବା କାହାଣୀ ଆଜିବି ଅଜଣା ହୋଇ ରହିଛି। ବର୍ତ୍ତମାନ କଶ୍ମୀର ପ୍ରସଙ୍ଗ ଚର୍ଚ୍ଚାରେ ଥିବାବେଳେ ପ୍ରସିଦ୍ଧ ପ୍ରଯୋଜକ ବିଧୁ ବିନୋଦ ଚୋପ୍ରା ଏହାକୁ ନେଇ ଏକ ଫିଲ୍ମ ଆଣିବାକୁ ଯାଉଛନ୍ତି। ୧୯୯୦ ମସିହାରେ କଶ୍ମୀର ପଣ୍ଡିତମାନଙ୍କ ଉପରେ ହୋଇଥିବା ଅତ୍ୟାଚାରକୁ ନେଇ ଆସିବାକୁ ଥିବା ଏହି ଫିଲ୍ମରେ ସେମାନେ ଘର ଛାଡ଼ିବାର କାରଣ ସହ ଜଡ଼ିତ କାହାଣୀ ରହିଥିବା କୁହାଯାଉଛି।

ଏହି ଫିଲ୍ମରେ ଦୁଇ ନବାଗତ ସାଦିଆ ଏବଂ ଆଦିଲ ଖାନ୍‌ ମୁଖ୍ୟ ଭୂମିକାରେ ଅଛନ୍ତି। ସତ କାହାଣୀ ଉପରେ ଆଧାରିତ ଏହି ଫିଲ୍ମରେ ବୟାନ କରାଯାଇଛି ୧୯୯୦ ମସିହା ଜାନୁଆରୀରେ କିଭଳି ହଜାର ହଜାର କଶ୍ମିରୀ ପଣ୍ଡିତ କିଭଳି ଭିଟାମାଟି ଛାଡ଼ି ହିନ୍ଦୁ ବହୁଳ ଅନ୍ୟ ଅଞ୍ଚଳ ଆଡ଼କୁ ମୁହାଁଇଥିଲେ।

୨ ମିନିଟ୍‌ ୩୪ ସେକେଣ୍ଡର ଏକ ଟ୍ରେଲର ଆରମ୍ଭରେ ଏକ ରୋମାଣ୍ଟିକ୍‌ ଦୃଶ୍ୟ ରହିଛି। ଏକ ଦମ୍ପତ୍ତି ବେଶ୍‌ ଖୁସିଥିବା ଏହି ଦୃଶ୍ୟରେ ଦେଖାଯାଇଛି। କିନ୍ତୁ ହଠାତ ସବୁକିଛି ବଦଳିଯାଉଛି। ସେମାନେ ବାହାରେ ହୋହଲ୍ଲା ଶୁଣି ଚମକି ପଡ଼ୁଛନ୍ତି। ଦେଖିବାବେଳକୁ ବାହାରେ ନିଆଁ ଏବଂ ଧମକପୂର୍ଣ୍ଣ ଆହ୍ୱାନ। ଏଥିରେ କିଛି ପୁରୁଣା ଭିଡିଓ ଏବଂ ନ୍ୟୁଜ୍‌ କ୍ଲିପ୍‌ ମଧ୍ୟ ଯୋଡ଼ାଯାଇଛି। ଶେଷରେ କଶ୍ମୀର ପଣ୍ଡିତମାନେ ଶରଣାର୍ଥୀ କ୍ୟାମ୍ପରେ ଥିବା ଦେଖିବାକୁ ମିଳୁଛି।

ଆସନ୍ତା ଫେବୃଆରୀ ୭ ତାରିଖରେ ଏହି ଫିଲ୍ମ ରିଲିଜ୍‌ ହେବ। ଏହା ପୂର୍ବରୁ ଡିସେମ୍ବର ୨୦ରେ ଏହାର ମୋସନ୍‌ ପୋଷ୍ଟର ରିଲିଜ୍‌ ହୋଇଥିଲା। ଏହି ଫିଲ୍ମଟି ବିଧୁ ବିନୋଦ ଚୋପ୍ରାଙ୍କ ଦ୍ୱାରା ନିର୍ଦ୍ଦେଶିତ ଏବଂ ପ୍ରଯୋଜିତ। ଏହାର ସ୍କ୍ରିନ୍‌ପ୍ଲେ ବିଧୁ ବିନୋଦ ଚୋପ୍ରାଙ୍କ ସହ ରାହୁଲ ପଣ୍ଡିତ ଏବଂ ଅଭିଜାତ ଯୋଷୀ ମିଳିତ ଭାବେ ରଚନା କରିଛନ୍ତି। ଏଆର ରେହମାନ୍‌ ଏବଂ ମ୍ୟୁଜିକାଲ ଗ୍ରୁପ୍‌ କୁତାବ୍‌ ଏ କୃପା ଏହାର ସଂଗୀତ ଦେଇଛନ୍ତି।

ଗୁଣପୁର ବଂଶଧାରା ଯୁକ୍ତ ଦୁଇ ମହାବିଦ୍ୟାଳୟ ରେ ଯୋଗ ଶିବିର ଅନୁଷ୍ଠିତ ।

ଏଥର ସମ୍ଭାଳ ବ୍ୟୁରୋ (ଗୁଣପୁର) – ରାୟଗଡ଼ା ଜିଲ୍ଲା ଗୁଣପୁର ବଂଶଧାରା ଯୁକ୍ତ ଦୁଇ ବିଜ୍ଞାନ ଦୈନିକ ଏବଂ ଆବାସିକ ମହାବିଦ୍ୟାଳୟ ଠାରେ କ୍ରିକେଟ ମ୍ୟାଚ୍ , ବକୃତା , ସଙ୍ଗୀତ ଓ ମ୍ୟୁଜିକାଲ୍ ଚେୟାର ଏବଂ ଯୋଗ ଶିବିର କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।

ଏହି ଯୋଗ ଶିବିର କାର୍ଯ୍ୟକ୍ରମ ରେ ୧୦୦ ରୁ ଉର୍ଦ୍ଧ ଛାତ୍ର ଛାତ୍ରୀ ଯୋଗ ଦେଇଥିଲେ ଏବଂ ଏହି ଯୋଗ ଶିବିର କୁ ଯୋଗ ଗୁରୁ ଶ୍ରୀ ଉମା ଶଙ୍କର ଦାଶ ପରିଚାଳନା କରିଥିଲେ ।

ବଂଶଧାରା ମହାବିଦ୍ୟାଳୟ ର ଅଧକ୍ଷ ଶ୍ରୀ ଲକ୍ଷ୍ମୀ ନାରାୟଣ ମହାଙ୍କୁଡ , ଉପ ଅଧକ୍ଷ ଶ୍ରୀ ଲାଡ଼ି ରାଜ କୁମାର , ସମ୍ପାଦକ ଶ୍ରୀ ହରି କୃଷ୍ଣ ପୁରୁଷୋତ୍ତମ ଏବଂ ସମସ୍ତ ଅଧ୍ୟାପକ ଅଧ୍ୟାପିକା ଙ୍କ ଉପସ୍ଥିତି ରେ ଉକ୍ତ କାର୍ଯ୍ୟକ୍ରମ ଶୁଭାରମ୍ଭ ହୋଇଥିଲା ।

ଓଡିଶା ର ଗୌରବ , ଗୁଣପୁର ମାଟିର ଝିଅ ଶୀତଳ !

ଏଥର ସମ୍ଭାଳ ବ୍ୟୁରୋ (ଗୁଣପୁର) – ଫେମିନା ମିସ୍‌ ଇଣ୍ଡିଆ ପ୍ରତିଯୋଗିତାରେ ଗୁଣପୁର  ଆଚବା ଗ୍ରାମ ର ଝିଅ ଶୀତଲ ସାହୁ       କୃତିତ୍ୱ ହାସଲ କରି ଜନ୍ମ ମାଟି ର ଗୌରବ ବଢ଼ାଇଛନ୍ତି। ଇଷ୍ଟଜୋନ୍‌ ପାଇଁ କୋଲକାତାରେ ଅନୁଷ୍ଠିତ ପ୍ରତିଯୋଗିତାରୁ ଓଡ଼ିଶାରୁ ଏକ ମାତ୍ର ପ୍ରତିଯୋଗୀ ଭାବେ ସେ ମନୋନୀତ ହୋଇଛନ୍ତି।

ପ୍ରତିଯୋଗିତାରେ ପରବର୍ତ୍ତୀ ରାଉଣ୍ଡ ସମସ୍ତ ରାଜ୍ୟର ଜଣେ ଲେଖାଁଏ ପ୍ରତିଯୋଗୀଙ୍କୁ ନେଇ ଅନୁଷ୍ଠିତ ହେବାକୁ ଥିବା ବେଳେ ଶୀତଲ ଉକ୍ତ ରାଉଣ୍ଡକୁ ଉତୀର୍ଣ୍ଣ ହୋଇ ଓଡ଼ିଶାକୁ ଗୌରବାନ୍ଵିତ କରିଛନ୍ତି। ନାବି ମୁମ୍ବାଇର ଏକ ବେସରକାରୀ କଂପାନିରେ ଚାକିରୀ କରୁଥିବା ଶୀତଲଙ୍କ ପିଲା ଦିନ ଗୁଣପୁର ରେ କଟିଥିବା ବେଳେ ଅଷ୍ଟମ ରୁ ମାଟ୍ରିକ୍‌ ପର୍ଯ୍ୟନ୍ତ ସେ ଗୁଣପୁର ସହିଦ ଲଖ୍ମଣ ନାୟକ ସ୍କୁଲ ରେ ପଢ଼ିଛନ୍ତି।

ପରେ ବୁର୍ଲାରେ ଆଇଟି ରେ ବି ଟେକ୍‌ ପାଠ୍ୟକ୍ରମ ଶେଷ କରିବା ପରେ ମୁମ୍ବାଇରେ ଚାକିରୀ ପାଇଥିଲେ। ଶୀତଲ ଙ୍କ ବାପା ଜୀବନ ସାହୁ ବୃତ୍ତିରେ ଜଣେ ଠିକାଦାର ହୋଇଥିବା ବେଳେ ମାଆ ସ୍ୱପ୍ନାରାଣୀ ଅଧିକାରୀ ଶିକ୍ଷୟିତ୍ରୀ ଭାବେ କାମ କରୁଛନ୍ତି ।

ଶୀତଲ ଙ୍କ କୃତିତ୍ୱ ପାଇଁ ତାଙ୍କ ପରିବାର ଲୋକ ଙ୍କ ସମେତ ଶ୍ରୀ ମନୋରଞ୍ଜନ ସାହୁ ଓ ଶ୍ରୀମତୀ ସଂଘମିତ୍ରା ଅଧିକାରୀ  ଶୁଭେଚ୍ଛା ଜଣାଇବା ସହ ଆମ ଚ୍ୟାନେଲ୍ ମାଧ୍ୟମ ରେ ରାଧାକାନ୍ତ ପଣ୍ଡା , ଦୀପକ କୁମାର ବେହେରା (ସୁନା) , ସୁବାଷ ଶତପଥୀ , ଏମ୍ ଶ୍ରୀକାନ୍ତ , ଡି କିରଣ କୁମାର ଏବଂ ଯୁବ ଆଇନଜିବି ଇନ୍ଦ୍ରାକ୍ଷି ପ୍ରସାଦ ଦାଶ ଶୁଭେଚ୍ଛା ଜଣାଇଛନ୍ତି ।

‘ଇଶ୍କବାଜ୍‌’ର ‘ଅନିକା’ ହେଲେ ପ୍ରଥମ ମହିଳା ସୁପର୍‌ ହିରୋ ।

ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – ଷ୍ଟାର୍‌ପ୍ଲସ୍‌ ଚ୍ୟାନେଲ୍‌ର ଲୋକପ୍ରିୟ ଧାରାବାହିକ ‘ଇଶ୍କବାଜ୍‌’ର ଅନିକା ଅର୍ଥାତ୍ ଟେଲି ଅଭିନେତ୍ରୀ ସୁରଭି ଚନ୍ଦନା ଗତ ମାସେ ହେବ ସୋଶାଲ୍‌ ମିଡିଆରେ ତାଙ୍କ ଫଟୋ ଓ ଭିଡିଓକୁ ନେଇ ଚର୍ଚ୍ଚାରେ ରହୁଛନ୍ତି। ‘ଇଶ୍କବାଜ୍‌’ରୁ ସେ ଦୀର୍ଘ ଦିନ ଧରି ଦୂରେଇ ଅଛନ୍ତି। ଫ୍ୟାନ୍ସ ଏବେ ତାଙ୍କୁ ‘ଇଶ୍କବାଜ୍‌’ କିମ୍ବା କେଉଁ ଅଲଗା ଶୋ’ରେ ପୁଣି ଦେଖିବାକୁ ଚାହୁଁଥିବାବେଳେ ଏବେ ସେମାନଙ୍କ ପାଇଁ ଏକ ଖୁସି ଖବର ଆସିଛି। ସୁରଭି ଏବେ କ୍ୟାପଟେନ୍‌ ପାଉଟ୍‌ ହୋଇଯାଇଛନ୍ତି। ଅର୍ଥାତ୍‌ ମାର୍ବଲ୍‌ ଷ୍ଟୁଡିଓର ପ୍ରଥମ ମହିଳା ସୁପର ହିରୋ ଫିଲ୍ମରେ ସୁରଭି  କ୍ୟାପଟେନ୍‌ ପାଉଟ୍‌ ଭୂମିକାରେ ନଜର ଆସିବେ। ସୁରଭିଙ୍କ ପାଇଁ ଏହା ଏକ ବିଗ୍‌ ବ୍ରେକ୍‌ ବୋଲି କୁହାଯାଉଛି। ଏହି ଫିଲ୍ମକୁ ଇଂରାଜୀ, ହିନ୍ଦୀ, ତେଲୁଗୁ ଓ ତମିଲ୍ ଭାଷାରେ ରିଲିଜ୍‌ କରାଯିବ।

୨.୦ ପରେ ଏହି ଫିଲ୍ମରେ ଭିଲେନ୍‌ ରୋଲ୍‌ରେ ନଜର ଆସିବେ ଖିଲାଡ଼ି ଷ୍ଟାର୍‌ .

ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – ମେଗାଷ୍ଟାର୍‌ ରଜନୀକାନ୍ତଙ୍କ ଫିଲ୍ମ ୨.୦ରେ ଖଳନାୟକ ଭୂମିକା କରିବା ପରେ ବଲିଉଡ୍‌ ଖିଲାଡ଼ି ଷ୍ଟାର୍‌ ଅକ୍ଷୟ କୁମାର ଏବେ ନେଗେଟିଭ୍ ଚରିତ୍ରର ନିଶାରେ ମାତିଛନ୍ତି। ଖୁବ୍‌ ଶୀଘ୍ର ଏହି ସୁପର୍‌ଷ୍ଟାର୍‌ ଦକ୍ଷିଣ ଭାରତର ଆଉ ଏକ ବଡ଼ ଫିଲ୍ମରେ ଭିଲେନ୍‌ ରୋଲ୍‌ରେ ନଜର୍‌ ଆସିବେ। ଏହି ଫିଲ୍ମ ହେଉଛି କମଲ୍‌ ହାସନଙ୍କ ଫିଲ୍ମ ‘ଇଣ୍ଡିଆନ୍‌’ର ସିକ୍ୱେଲ୍ ‘ଇଣ୍ଡିଆନ୍‌-୨’। ଫିଲ୍ମର ନିର୍ଦ୍ଦେଶନା ଦେବେ ଶଙ୍କର୍‌। ଶଙ୍କର୍‌ ରଜନୀକାନ୍ତ ଷ୍ଟାରର୍‌ ୨.୦ର ମଧ୍ୟ ନିର୍ଦ୍ଦେଶନା ଦେଇଥିଲେ। ପୂର୍ବରୁ ‘ଇଣ୍ଡିଆନ୍‌-୨’ର ଏହି  ରୋଲ୍‌ ପାଇଁ ଅଜୟ ଦେବ୍‌ଗନ୍‌ଙ୍କୁ ଅଫର୍‌ ମିଳିଥିଲା। ହେଲେ ସମୟ ନ ମିଳିବାରୁ ସେ ଏଥିରୁ ଓହରି ଯାଇଥିଲେ। ଏହାପରେ ଫିଲ୍ମଟି ଅକ୍ଷୟଙ୍କୁ ମିଳିଥିଲା। ଫିଲ୍ମ ୨.୦ରେ ନିର୍ଦ୍ଦେଶକ ଶଙ୍କର୍‌ଙ୍କୁ ଅକ୍ଷୟଙ୍କ ଅଭିନୟ ବେଶ୍‌ ପ୍ରଭାବିତ କରିଥିଲା। ତେଣୁ ସେ ଅକ୍ଷୟଙ୍କୁ ଏହି ଫିଲ୍ମରେ ଏକ ଭଲ ରୋଲ୍ ଦେଉଛନ୍ତି। ଫିଲ୍ମରେ ଅକ୍ଷୟ ଜଣେ ପୁଲିସ୍‌ ଅଧିକାରୀ ଭୂମିକାରେ ନଜର ଆସିବେ।  ଏହି ଫିଲ୍ମର ହିନ୍ଦୀ ରିମେକ୍‌ର ନାଁ ‘ହିନ୍ଦୁସ୍ତାନୀ-୨’ ରହିବ। ୧୯୯୬ରେ ଆସିଥିବା ମୂଳ ଫିଲ୍ମ ‘ଇଣ୍ଡିଆନ୍‌’ରେ କମଲ ହାସନ୍‌ ଡବଲ୍‌ ରୋଲ୍‌ କରିଥିଲେ। ଫିଲ୍ମର କାହାଣୀ ସ୍ୱାଧୀନତା ସଂଗ୍ରାମୀଙ୍କ ଉପରେ ଥିଲା, ଯିଏ କି ଭ୍ରଷ୍ଟାଚାର ବିରୋଧରେ ଲଢୁଥିଲେ। ହେଲେ, ତାଙ୍କ ପୁଅ ଭୂଲ୍‌ ରାସ୍ତାରେ ଯାଇ ବେଇମାନି କରୁଥିଲେ। ଫିଲ୍ମରେ କମଲଙ୍କ ସହ ମନିଷା କୋଇରାଲା ଓ ଉର୍ମିଲା ମାତୋଣ୍ଡକର୍ ମଧ୍ୟ ମୁଖ୍ୟ ଭୂମିକାରେ ଥିଲେ। ଏହି ଫିଲ୍ମ ହିନ୍ଦୀ ଡବିଂର ନାଁ ‘ହିନ୍ଦୁସ୍ତାନୀ’ ରହିଥିଲା। ଫିଲ୍ମଟିକୁ ଜତୀୟ ପୁରସ୍କାର ସହ ଆହୁରି ଅନେକ ପୁରସ୍କାର ମିଳିଥିଲା। ଅକ୍ଷୟ କୁମାର୍‌ଙ୍କ ପାଇଁ ଏହା ବ୍ୟାକ୍‌ ଟୁ ବ୍ୟାକ୍‌ ଦ୍ୱିତୀୟ ତମିଲ୍‌ ଫିଲ୍ମ ହେବ। ଏହାକୁ ମଧ୍ୟ ତେଲୁଗୁ ଓ ହିନ୍ଦୀ ଭାଷାରେ ରିଲିଜ୍‌ କରାଯିବ। ଫିଲ୍ମଟି କମଲ୍ ହାସନ୍‌ ଓ ଅକ୍ଷୟ କୁମାର ଷ୍ଟାରର୍ ଏକ ବିଗ୍‌ ବଜେଟ୍‌ ପଲିଟିକାଲ୍‌ ଥ୍ରୀଲର୍‌ ବୋଲି ଶୁଣାଯାଉଛି।

ସାଧାରଣତନ୍ତ୍ର ଦିବସରେ ଦର୍ଶକଙ୍କୁ ଜନ୍‌ଙ୍କ ଭେଟି ।

ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – ମାଦ୍ରାସ କ୍ୟାଫେ, ପରମାଣୁ ଓ ସତ୍ୟମେବ ଜୟତେ ପରେ ଜନ୍‌ ପୁଣି ଥରେ ଦେଶ ଭକ୍ତିର ଏକ ଫିଲ୍ମ ନେଇ ଆସୁଛନ୍ତି। ତାଙ୍କ ଫିଲ୍ମର ନାଁ ହେଉଛି ‘ରୋମିଓ ଅକବର ୱାଲେଟର’। ଯାହାର ଟିଜର ରିଲିଜ୍‌ ହୋଇଯାଇଛି। ଫିଲ୍ମରେ ଜନ୍‌ ଅବ୍ରାହମ ଜଣେ ଏଜେଣ୍ଟ୍‌ ଭୂମିକାରେ ନଜର ଆସୁଛନ୍ତି। ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି ରବି ଗ୍ରେୱାଲ୍‌। ଫିଲ୍ମରେ ତାଙ୍କର ଭିନ୍ନ ଭିନ୍ନ ଲୁକ୍‌ ଦେଖିବାକୁ ମିଳିଛି। ଆଉ ତାଙ୍କ ଲୁକ୍‌ ମଧ୍ୟ ଦର୍ଶକଙ୍କୁ ଖୁବ୍‌ ପ୍ରଭାବିତ କରିଛି। ଟିଜରରେ ତାଙ୍କୁ ପୁଲିସ୍‌ ଓ ଜଣେ ମୁସ୍‌ଲିମ୍‌ ବ୍ୟକ୍ତି ସହ ଆହୁରି ଅନେକ ଚରିତ୍ରରେ ଦେଖିବାକୁ ମିଳିଛି। ଟିଜରରେ ବ୍ୟାକ୍‌ଗ୍ରାଉଣ୍ଡ୍‌ ଗୀତ ‘ଏ ୱତନ’ ବଜା ଯାଇଥିଲା। ଟିଜରରେ ଗୋଟିଏ ସମୟରେ ଜନ୍‌ଙ୍କୁ ରକ୍ତ ଜୁଡ଼ୁ ବୁଡ଼ୁ ଅବସ୍ଥାରେ ଦେଖିବାକୁ ମିଳିଥିଲା। ଫିଲ୍ମର ଟିଜର ରିଲିଜ୍‌ ହେବା ପରେ ସୋଶାଲ୍‌ ମିଡିଆରେ ଏହା ଖୁବ୍‌ ଭାଇରାଲ୍‌ ହୋଇଛି।

ସୂଚନାଯୋଗ୍ୟ ଯେ, ଫିଲ୍ମର ପୋଷ୍ଟରକୁ ଖୁବ୍‌ ପସନ୍ଦ କରାଯାଉଛି। ଯେଉଁଥିରେ ଜନ୍‌ ଜଣେ ଜାସୁସ ଚରିତ୍ରରେ ନଜର ଆସିଛନ୍ତି। ଏହାସହ ପୋଷ୍ଟର ପଛରେ ତାଙ୍କର ଆହୁରି ଅନେକ ଲୁକ୍‌ ଦେଖିବାକୁ ମିଳିଛି।

ଫିଲ୍ମର କାହାଣୀ ୧୯୭୦ର ଏକ ସତ୍ୟ ଘଟଣା ଉପରେ ଆଧାରିତ। ଫିଲ୍ମର ଶୁଟିଂ ଗୁଜୁରାଟ୍‌, ଶ୍ରୀନଗର, ଦିଲ୍ଲୀ ଓ ନେପାଳ ବର୍ଡର୍‌ରେ ହୋଇଛି। ଫିଲ୍ମ ପାଇଁ ଜନ୍‌ ନିର୍ମାତାଙ୍କ ପ୍ରଥମ ପସନ୍ଦ ନ ଥିଲେ। ପ୍ରଥମେ ଏହା ସୁଶାନ୍ତ ସିଂହ ରାଜପୁତ୍‌ଙ୍କୁ ଅଫର ହୋଇଥିଲା। କିନ୍ତୁ ସମୟ ନ ଥିବାରୁ ସେ ମନା କରିଦେଇଥିଲେ। ଫିଲ୍ମଟି ଏପ୍ରିଲ୍‌ ୧୨ରେ ବିଭିନ୍ନ ସିନେମା ଘରେ ରିଲିଜ୍‌ ହେବ। ତେବେ ଆଜି ସାଧାରଣତନ୍ତ୍ର ଦିବସରେ ଏହି ଭଳି ଦେଶଭକ୍ତିର ଟିଜର ରିଲିଜ୍‌ ହେବା ନିଶ୍ଚିତ ଭାବେ ଦର୍ଶକଙ୍କ ପାଇଁ ଏହା କେଉଁ ଉପହାରଠୁ କମ୍‌ ନୁହେଁ।

ଆସିଲା ସଲମାନ୍‌ଙ୍କ ଫିଲ୍ମ ‘ଭାରତ୍‌’ର ଟିଜର୍ ।

ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – ରିଲିଜ୍‌ ହୋଇଯାଇଛି ସଲମାନ୍‌ ଖାନ୍‌ଙ୍କ ବହୁ ପ୍ରତିକ୍ଷୀତ ଫିଲ୍ମ ‘ଭାରତ’ର ଟିଜର୍। ସଲମାନ୍‌ ଖାନ୍‌ଙ୍କ ଫିଲ୍ମର ଅନେକ ଲମ୍ବା ସମୟରୁ ଅପେକ୍ଷା କରାଯାଉଛି। ଫିଲ୍ମରେ ସଲମାନ୍‌ ବିଭିନ୍ନ ଅନ୍ଦାଜ୍‌ରେ ନଜର ଆସିବେ। ରିଲିଜ୍‌ ହୋଇଥିବା ଟ୍ରେଲର୍‌ରେ ସଲମାନ୍‌ କେବେ ନୌ ସେନାରେ ତ କେବେ ପୁଣି କୋଇଲା ଖଣିରେ କାମ କରୁଥିବା ନଜର ଆସୁଛନ୍ତି। କେବଳ ଏତିକି ନୁହେଁ ସଲମାନ୍‌ ଫିଲ୍ମରେ ସର୍କସରେ ମଧ୍ୟ କାମ କରୁଛନ୍ତି। ‘ଭାରତ୍‌’ର ଟିଜର୍ ଦେଖିବା ପରେ ଲାଗୁଛି ଫିଲ୍ମଟି ପୂରା ପୂରି ଦବଙ୍ଗ ସଲମାନ୍‌ଙ୍କ ଷ୍ଟାଇଲ୍‌ରେ ହିଁ ହୋଇଛି। ଟିଜର୍‌ଟି ରିଲିଜ୍‌ ହେବାର ୨୪ ଘଣ୍ଟା ଭିତରେ ୨କୋଟିରୁ ଅଧିକ ଲୋକ ଦେଖିସାରିଲେଣି। ‘ଭାରତ୍‌’ରେ ସଲମାନ୍‌ଙ୍କ ଫେଭରାଇଟ୍‌ ନିର୍ଦ୍ଦେଶକ ଅଲ୍ଲୀ ଅବାସ ଜଫର୍‌ ନିର୍ଦ୍ଦେଶନା ଦେଇଛନ୍ତି। ଫିଲ୍ମରେ ସଲମାନଙ୍କ ଫେଭରେଟ୍‌ କୋଷ୍ଟାର୍‌ କ୍ୟାଟ୍ରିନା ମଧ୍ୟ ନଜର ଆସିବେ। ଫିଲ୍ମର ଟିଜର୍‌ର ଆରମ୍ଭ ଭାରତ ବିଭାଜନରୁ ଆରମ୍ଭ ହୋଇଛି। ଏହାପରେ ସଲମାନ୍‌ ଜଣେ ନ୍ୟାଭି ଅଫିସର୍‌ ଲୁକ୍‌ରେ ଏକ ଯାହାଡ଼ ଉପରେ ଛିଡ଼ା ହୋଇଥିବା ଦେଖିବାକୁ ମିଳିଛି। ଏହାପରେ ସଲମାନ ଏକ ବାଇକରେ ଷ୍ଟଣ୍ଟ କରୁଛନ୍ତି। ଶେଷରେ ସଲମାନ ଟିକେ ବୟସ୍କ ବ୍ୟକ୍ତିଙ୍କ ଲୁକ୍‌ରେ ବକ୍ସିଂ କରୁଥିବା ନଜର ଆସିଛନ୍ତି। ଫିଲ୍ମରେ ସଲମାନ ଜାତିଧର୍ମ ଭେଦଭାବକୁ କଟାକ୍ଷ କରି ଏକ ଡାଇଲଗ୍‌ କହୁଛନ୍ତି। ଏହି ଡାଇଲଗ୍‌କୁ ନେଇ ସବୁଠୁ ଅଧିକ ଚର୍ଚ୍ଚା। ଏହି ଡାଇଲଗ୍‌କୁ ଦର୍ଶକ ବେଶ୍ ପସନ୍ଦ କରୁଛନ୍ତି। ଡାଇଲଗ୍‌ଟି ହେଉଛି ‘ଇଶ୍ ଦେଶ୍ କେ ନାମ୍‌ ପର ମେରେ ବାଉଜୀନେ ମେରା ନାମ୍‌ ଭାରତ୍ ରଖା ହେ। ଇତନେ ବଡ଼େ ନାମ୍‌କେ ଆଗେ ଜାତି, ଧର୍ମ, ସରନେମ୍‌ ଲଗାକର, ମେ ନା ତୋ ଅପନା ଔର୍ ନା ହି ଇଶ୍‌ ଦେଶ୍‌କା ମାନ୍‌ କମ୍‌ କରନା ଚାହାତା ହୁଁ।’ ତେବେ ଡାଇଲଗ୍‌ରୁ ସଲମାନ୍‌ଙ୍କ ଫିଲ୍ମରେ ମଧ୍ୟ ଦେଶଭକ୍ତି ଦେଖିବାକୁ ମିଳିବ ବୋଲି ଅନୁମାନ୍‌ କରାଯାଉଛି। ସଲମାନଙ୍କ ‘ଭାରତ୍’ ୨୦୧୪ରେ ଆସିଥିବା ଦକ୍ଷିଣ କୋରିଅନ୍‌ ଫିଲ୍ମ ‘ଓଡ୍‌ ଟୁ ମାଇଁ ଫାଦର୍‌’ର ରିମେକ୍‌। ଏହା କୋରିଆ ଯୁଦ୍ଧ ସମୟରେ ଏକ ଛୋଟ ପିଲା ତା ପରିବାରର ସୁରକ୍ଷାର ଦାୟିତ୍ୱ ନେଇଥିବା ଦର୍ଶାଯାଇଛି। ଫିଲ୍ମଟି ସବୁଥର ଭଳି ଏଥର ମଧ୍ୟ  ଇଦ୍‌ରେ ହିଁ ରିଲିଜ୍‌ ହେବ।

ପରଦାକୁ ଆସିଲା ‘ତୁ ମୋ ସୁନା ଚଢ଼େଇ’ ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ପରଦାକୁ ଆସିଛି ନୂଆ ଓଡ଼ିଆ ଫିଲ୍ମ ‘ତୁ ମୋ ସୁନା ଚଢ଼େଇ’। ଶୁକ୍ରବାର ସମ୍ରାଟ ସିନେମା ହଲ୍‌ରେ ଏହି ଫିଲ୍ମର ପ୍ରିମିୟର ଶୋ’ ହୋଇଛି। ଫିଲ୍ମର ଲିଡ୍ ରୋଲରେ ଅଛନ୍ତି ନାୟକ ଜ୍ୟୋତି ଓ ନବାଗତା ଲେସା। ଦିଲିପ ପଣ୍ଡା ଫିଲ୍ମର ନିର୍ଦ୍ଦେଶନା ଦେଇଥିବା ବେଳେ ସଂଗୀତ ନିର୍ଦ୍ଦେଶନା ଦେଇଛନ୍ତି ବୈଦ୍ୟନାଥ ପଣ୍ଡା।

ଅନ୍ୟମାନଙ୍କ ମଧ୍ୟରେ ରାଇମୋହନ ଓ ଯାତ୍ରା ଟାଇଗର ଦୈତାରୀ ପଣ୍ଡାଙ୍କୁ ଫିଲ୍ମରେ ଦେଖିବାକୁ ମିଳିବ। ଫିଲ୍ମରେ ରହିଛି ୬ଟି ମନଛୁଆଁ ଗୀତ। ଗୀତ ଗୁଡ଼ିକ ଅସୀମା ପଣ୍ଡା, ଅନନ୍ୟା ଓ ହ୍ୟୁମାନ ସାଗର ଗାଇଛନ୍ତି। ତେବେ ଫିଲ୍ମଟିର ଟାଇଟଲ ଗୀତ ଦର୍ଶକଙ୍କ ବେଶ ପସନ୍ଦ ଆସିଛି।

ସୂଚନାରୁ ପ୍ରକାଶ, ଏହି ଫିଲ୍ମର ଅଡିଓ ରିଲିଜ୍‌ ବେଳେ ହଙ୍ଗାମା ହୋଇଥିଲା। ଫିଲ୍ମର ହିରୋଇନ୍‌ଙ୍କୁ ନିର୍ଦ୍ଦେଶକ ମାନସିକ ନିର୍ଯାତନା ଦେଉଥିବା ନେଇ ଅଭିଯୋଗ ହୋଇଥିଲା। ବାଦ ବିବାଦ ପରେ ଶେଷରେ ଆଜି ଫିଲ୍ମ ରିଲିଜ୍‌ ହୋଇଛି। ଏହି ଫିଲ୍ମ ଦର୍ଶକଙ୍କ ମନ କଣିପାରିବ ବୋଲି ପ୍ରଯୋଜନା ସଂସ୍ଥା ଆଶା ରଖିଛନ୍ତି।

ପ୍ରଥମ ଦିନରେ ଏତିକି କୋଟିର ବିଜ୍‌ନେସ୍‌ କଲା ‘ମଣିକର୍ଣ୍ଣିକା’ ।

ଏଥର ସମ୍ଭାଳ ବ୍ୟୁରୋ (ମୁମ୍ବାଇ) – କଙ୍ଗନା ରାନାୱତ୍‌ ଅଭିନୀତ ତଥା ନିର୍ଦ୍ଦେଶିତ ବହୁଚର୍ଚ୍ଚିତ ଫିଲ୍ମ ‘ମଣିକର୍ଣ୍ଣିକା: ଦ କୁଇନ୍‌ ଅଫ୍‌ ଝାନ୍‌ସି’ ସାଧାରଣତନ୍ତ୍ର ଦିବସର ଦିନକ ପୂର୍ବରୁ ଅର୍ଥାତ୍‌ ୨୫ ଜାନୁଆରୀରେ ରିଲିଜ୍‌ ହୋଇଛି।

ରିଲିଜ୍‌ ପୂର୍ବରୁ ଏହି ଫିଲ୍ମ୍‌ର ସ୍ପେଶାଲ୍‌ ସ୍କ୍ରିନିଂ ରଖାଯାଇଥିଲା। ଏହି ସମାରୋହରେ ରାଷ୍ଟ୍ରପତି ରାମନାଥ୍ କୋବିନ୍ଦ ଏବଂ ବରିଷ୍ଠ ବିଜେପି ନେତା ଲାଲ୍‌କୃଷ୍ଣ ଆଡଭାନୀ ଉପସ୍ଥିତ ଥିଲେ।

କର୍‌ନି ସେନାର ବିରୋଧ ଯୋଗୁ ଏହି ଫିଲ୍ମ ଚର୍ଚ୍ଚାରେ ଥିଲା ଏବଂ ଏହାର ରିଲିଜ୍‌କୁ ଦର୍ଶକ ଖୁବ୍ ଉତ୍କଣ୍ଠାର ସହ ଅପେକ୍ଷା କରିଥିଲେ। ତେବେ ଆଶାନୁସାରେ ନ ହେଲେ ବି ଫିଲ୍ମ ପ୍ରଥମ ଦିନରେ ବକ୍ସ ଅଫିସ୍‌ରେ ଭଲ ବ୍ୟବସାୟ କରିଛି। ଫିଲ୍ମର କିଛି ସିନ୍‌ ଉପରେ କର୍‌ନି ସେନାର ଆପତ୍ତି, ଏହାକୁ ନେଇ ବିରୋଧ ଏବଂ କରନି ସେନାକୁ କଙ୍ଗନାଙ୍କ ପ୍ରତିଜବାବ ଯୋଗୁ ରିଲିଜ୍‌ ପୂର୍ବରୁ ହିଁ ‘ମଣିକର୍ଣ୍ଣକା’କୁ  ଖୁବ୍‌ ପବ୍ଲିସିଟି ମିଳିସାରିଥିଲା। ତେଣୁ ସମସ୍ତଙ୍କ ନଜର ଏହାର ପ୍ରଥମ ଦିନର କଲେକ୍ସନ୍ ଉପରେ ଥିଲା। ‘ମଣିକର୍ଣ୍ଣିକା’କୁ ଦେଶର ୩ ହଜାର ସ୍କ୍ରିନ୍‌ରେ ଏକକାଳୀନ ରିଲିଜ୍‌ କରାଯାଇଛି। ଏହା ବ୍ୟତୀତ ଏହି ଫିଲ୍ମ ବିଦେଶରେ ମଧ୍ୟ ୭୦୦ ସ୍କ୍ରିନ୍‌ରେ ଲଞ୍ଚ୍‌ ହୋଇଛି। ପ୍ରାୟ ୧୨୫ କୋଟି ବଜେଟ୍‌ର ଏହି ଫିଲ୍ମ ରିଲିଜ୍‌ର ପ୍ରଥମ ଦିନ ୧୩ରୁ ୧୫ କୋଟି ଟଙ୍କା ଆୟ କରିବ ବୋଲି ଆଶା କରାଯାଉଥିଲା। କିନ୍ତୁ ଫିଲ୍ମଟି ପ୍ରଥମ ଦିନରେ ପାଖାପାଖି ୯ କୋଟି ଟଙ୍କାର ବିଜ୍‌ନେସ କରିଛି। ଆଶା କାରାଯାଉଛି ଯେ ଗଣତନ୍ତ୍ର ଦିବସର ଛୁଟିରେ ଫିଲ୍ମଟି ଭଲ ଆୟ କରିବ। ତେବେ ଫିଲ୍ମରେ କଙ୍ଗନାଙ୍କ ଅଭିନୟକୁ ଲୋକେ ତାରିଫ୍‌ କରିଛନ୍ତି। କିନ୍ତୁ କାହାଣୀକୁ ନେଇ ରିଆକ୍ସନ୍‌ ମିଶ୍ର ରହିଛି। କଙ୍ଗନାଙ୍କ ଅଭିନୟକୁ ଦେଖି କିଛି ପ୍ରଶଂସକ ତାଙ୍କୁ ତୃତୀୟ ଥର ପାଇଁ ଜତୀୟ ସମ୍ମାନ ଦେବାକୁ ଯୁକ୍ତି ବାଢ଼ିଛନ୍ତି। ଏହା ପୂର୍ବରୁ ଫିଲ୍ମ ‘କୁଇନ୍’ ଓ ‘ତନୁ ୱେଡ୍ସ ମନୁ ରିଟର୍ନ୍ସ’ ପାଇଁ କଙ୍ଗନାଙ୍କୁ ଜାତୀୟ ପୁରସ୍କାର ମିଳି ସାରିଛି।