ଭୂତ ଭୟରେ ସ୍କୁଲ ଆସୁନାହାନ୍ତି ଛାତ୍ରଛାତ୍ରୀ !

ଏଥର ସମ୍ଭାଳ ବ୍ୟୁରୋ (ଗଜପତି) – ବିଜ୍ଞାନ ଯୁଗରେ ଆଜି ବି ବସା ବାନ୍ଧିଛି ଅନ୍ଧବିଶ୍ୱାସ । ଗଜପତି ଜିଲ୍ଲା ରା.ଉଦୟଗିରି ବ୍ଲକ ଗୋପବନ୍ଧୁ ବିଦ୍ୟାପୀଠରୁ ଆସିଛି ଏମିତି ଅଭିଯୋଗ । ଗତ ୨୫ ତାରିଖରୁ ସ୍କୁଲର ବିଭିନ୍ନ ପିଲାଙ୍କୁ ଭୂତ ଲାଗୁଥିବା କହି ଛାତ୍ରଛାତ୍ରୀ ସ୍କୁଲକୁ ଆସୁ ନହାନ୍ତି । ଫଳରେ ସ୍କୁଲରେ ଛାତ୍ର ଉପସ୍ଥାନ କମି ଯାଉଥିବା ବେଳେ ଶିକ୍ଷର ଶିକ୍ଷୟିତ୍ରୀ ମଧ୍ୟ ଭୟଭୀତ ହୋଇ ରହିଛନ୍ତି ।

ବିଦ୍ୟାଳୟରେ ମୋଟ ୨୪୦ଜଣ ଛାତ୍ରଛାତ୍ରୀ ଥିବା ବେଳେ ଏବେ ୫୦ ବି ଆସୁ ନଥିବା ଦେଖିବାକୁ ମିଳିଛି । ଅଭିଭାବକମାନେ ପିଲାଙ୍କୁ ନେଇ ଗୁଣିଆଙ୍କ ପାଖରେ ଛଡା ଫୁଙ୍କା କରୁଛନ୍ତି । ସ୍କୁଲରେ ଘଟୁଥିବା ଘଟଣାର ସମାଧାନ ନହେବା ଯାଏ ପିଲାଙ୍କୁ ଆଉ ବିଦ୍ୟାଳୟକୁ ପଠାଇବେ ନାହିଁ ବୋଲି ଅଭିଭାବକମାନେ କହିଛନ୍ତି । ସେପଟେ ଘଟଣାର ୧୦ ଦିନ ବିତିଯାଇଥିଲେ ବି ବିଦ୍ୟାଳୟ ପକ୍ଷରୁ କୌଣସି ଅଭିଭାବକ ବୈଠକ ଡକାଯାଇନଥିବାରୁ ଅସନ୍ତୋଷ ବଢୁଛି ।

ଚଇତି କଳାକାରଙ୍କୁ ଠକିଲା ପ୍ରଶାସନ : ଫେରାଇଲେ ଚେକ୍‌ !

ଏଥର ସମ୍ଭାଳ ବ୍ୟୁରୋ (ରାୟଗଡ଼ା) – ୩୦/୧/୧୯ ରାୟଗଡା ଜିଲ୍ଲା ଲୋକ ମହୋତ୍ସବ ଚଇତି ୨୦୧୮ ଡିସେମ୍ବର ୨୬ରୁ ୩୦ତାରିଖ ପର୍ଯ୍ୟନ୍ତ ଧୁମ୍‌ଧାମ୍‌ରେ ପାଳନ କରାଯାଇଛି। ଚଇତି ସରିବାର ୧ମାସରୁ ଊର୍ଦ୍ଧ୍ୱ ବିତିଯାଇଥିଲେ ମଧ୍ୟ ଜିଲ୍ଲା ସଂସ୍କୃତି ବିଭାଗ ପକ୍ଷରୁ କଳାକାରମାନଙ୍କୁ ପ୍ରଦାନ କରାଯାଇଥିବା ଚେକ୍‌ର ଅର୍ଥ ବର୍ତ୍ତମାନ ସେମାନେ ପାଇପାରିନାହାନ୍ତି । ଫଳରେ ସେମାନେ ବ୍ୟାଙ୍କକୁ ଦୌଡ଼ି ଦୌଡ଼ି ନିରାଶ ହୋଇଛନ୍ତି । ସେମାନଙ୍କୁ ଯେଉଁ ଚେକ୍‌ ସଂସ୍କୃତି ବିଭାଗ ପକ୍ଷରୁ ପ୍ରଦାନ କରାଯାଇଛି ତାହା କାର୍ଯ୍ୟରେ ଲାଗୁନାହିଁ । ନିଜ ବ୍ୟାଙ୍କ ଆକାଉଣ୍ଟରେ ଚେକ୍‌ ଡିପୋଜିଟ କରିବା ପରେ ତାହା ଫେରସ୍ତ ହେଉଛି। ଏନେଇ କଳାକାରମାନେ ଜିଲ୍ଲା ସଂସ୍କୃତି ଅଧିକାରୀଙ୍କ ନିକଟରେ ଅଭିଯୋଗ କରିବା ସହ ଚେକ୍‌ଗୁଡିକ ଫେରସ୍ତ କରିଛନ୍ତି । ଜିଲ୍ଲା ଲୋକ ମହୋତ୍ସବର କଳାକାରଙ୍କୁ ଏପରି ଠକେଇ କରାଯାଇଥିବାରୁ ଅସନ୍ତୋଷ ଦେଖାଦେଇଛି । ଜିଲ୍ଲା ପ୍ରଶାସନର ଏପରି କାର୍ଯ୍ୟକୁ ସାଧାରଣରେ ନିନ୍ଦା କରାଯାଇଛି । ଚଇତି ଅବସରରେ ଅନେକ କଳାକାର ଗ୍ରୁପ୍‌କୁ ନନ-ସିଟିଏସ୍‌ ଚେକ୍‌ ପ୍ରଦାନ ହୋଇଛି।  ଜିଲ୍ଲା ସଂସ୍କୃତି ପରିଷଦ ପକ୍ଷରୁ ଏକ୍ସିସ ବ୍ୟାଙ୍କ ଆକାଉଣ୍ଟର ଚେକ୍‌ ପ୍ରଦାନ କରାଯାଇଛି । ନନ-ସିଟିଏସ୍‌ ଚେକ୍‌ ବର୍ତ୍ତମାନ ବନ୍ଦ ହୋଇଯାଇଥିବା ବେଳେ ସେଗୁଡିକ କିଭଳି ପ୍ରଦାନ କରାଯାଇଛି ତାହା ଜଣାପଡିନାହିଁ । ଫଳରେ ନନ-ସିଟିଏସ ଚେକ୍‌କୁ ବ୍ୟାଙ୍କ ଗ୍ରହଣ ନ କରି ଫେରସ୍ତ କରିଛି । ଏଭଳିକି ଚେକ୍‌ରେ ବାରମ୍ବାର ଭୁଲ ସୁଧାର ଗ୍ରହଣଯୋଗ୍ୟ ନ ଥିବା ବେଳେ ତାହା ମଧ୍ୟ ପାଳନ କରାଯାଇନାହିଁ। ଫଳରେ ଏହିଭଳି ସମସ୍ୟା ଉପୁଜିଥିବା ଜଣାପଡିଛି । କଳକାରମାନେ ଚେକ୍‌ଗୁଡ଼ିକୁ ଜିଲା ସଂସ୍କୃତି ଅଧିକାରୀ ଦାୟୀତ୍ୱରେ ଥିବା ଜିଲ୍ଲା ଅଧିକାରୀଙ୍କ କାର୍ଯ୍ୟାଳୟର ମୁଖ୍ୟ କିରାଣୀଙ୍କୁ ଫେରସ୍ତ କରିଛନ୍ତିି । ଯାହା କଳାକାରଙ୍କ ପାଇଁ ଏକ ଉପହାସ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଚଇତି ପଡିଆରେ ବିଏସ୍‌ଏନ୍‌ଏଲ୍‌ ପକ୍ଷରୁ ଦିଆଯାଇଥିବା ଇଣ୍ଟରନେଟ୍‌ କନେକ୍ସନର ଚେକ୍‌ ମଧ୍ୟ ବର୍ତ୍ତମାନ ସୁଦ୍ଧା ବ୍ୟାଙ୍କକୁ ଯାଇପାରିନାହିଁ। ଡିସେମ୍ବର ୨୪ତାରିଖରେ ଚେକ୍‌ ନମ୍ବର ୦୨୫୩୦୯ରେ ବିଏସ୍‌ଏନ୍‌ଏଲ୍‌କୁ ୧୬୯୯ଟଙ୍କା ପ୍ରଦାନ ହୋଇଥିଲା । ତାହା ମଧ୍ୟ ସେହି ସମାନ ସମସ୍ୟା ଯୋଗୁ ବ୍ୟାଙ୍କ ଦ୍ୱାରା ଗ୍ରହଣ ହେଲାନାହିଁ । କଳାକାର ସିନ୍ଧ ଓ୍ବାଡକାଙ୍କୁ ଚେକ୍‌ ନମ୍ବର ୦୧୨୦୫୮ରେ ଡିସେମ୍ବର ୨୭ ତାରିଖରେ ୫ ହଜାର ଟଙ୍କାର ଏକ ଚେକ୍‌ ପ୍ରଦାନ କରାଯାଇଥିଲା । ତାହା ମଧ୍ୟ ଫେରସ୍ତ ହୋଇଛି । ସେହିପରି ଟି.ଶିବା ଭାସ୍କରଙ୍କ ପକ୍ଷରୁ ୨ଟି ନୃତ୍ୟଦଳ କଳା ପ୍ରଦର୍ଶନ କରିଥିଲେ । ଗୋଟିଏ ସୁପର ମମ ଗ୍ରୁପ୍‌ର ଓ ଅନ୍ୟଟି ମରାଠି ନୃତ୍ୟଦଳର । ମରାଠି ଦଳପାଇଁ ଡିସେମ୍ବର ୨୭ରେ ଚେକ୍‌ ନମ୍ବର ୦୧୨୦୫୪ରେ ୫ ହଜାର ଟଙ୍କା ଓ ସୁପର ମମ ଗ୍ରୁପ୍‌ ପାଇଁ ୩୦ତାରିଖରେ ଚେକ୍‌ ନମ୍ବର ୦୨୫୩୨୨ରେ ୫ହଜାର ଟଙ୍କା ପ୍ରଦାନ କରାଯାଇଥିଲା । ଏହି ୨ଟି ଚେକ୍‌ ମଧ୍ୟ ମାସେ ହେବ ଟଙ୍କାରେ ପରିବର୍ତ୍ତନ ହେଉନାହିଁ । ନନ-ସିଟିଏସ୍‌ ଚେକ୍‌ ହୋଇଥିବାରୁ ତାହା ପରିବର୍ତ୍ତନ ହେଉ ନ ଥିବା ବ୍ୟାଙ୍କ କର୍ତ୍ତୃପକ୍ଷ ଟି.ଶିବା ଭାସ୍କରଙ୍କୁ କହିଛନ୍ତି। ମଙ୍ଗଳବାର ସେ ଉଭୟ ଚେକ୍‌କୁ ସଂସ୍କୃତି ବିଭାଗକୁ ଫେରସ୍ତ କରିଛନ୍ତି । ଏ ସମ୍ପର୍କରେ  ଜିଲ୍ଲା  ସଂସ୍କୃତି ଅଧିକାରୀ ଦାୟୀତ୍ୱରେ ଥିବା ଜିଲ୍ଲା ମଙ୍ଗଳ ଅଧିକାରୀ ନନ୍ଦଲାଲ ବିଶ୍ୱାଳଙ୍କୁ ପଚାରିବାରୁ, କିଛି ଚେକ୍‌ରେ ଏହିଭଳି ସମସ୍ୟା ଉପୁଜିଥିବା ନଜରକୁ ଆସିଛି । ସେମାନଙ୍କୁ ଆରଟିଜିଏସ୍‌ ମାଧ୍ୟମରେ ଇ-ପେମେଣ୍ଟ କରିବା ନିମନ୍ତେ ଆମେ ପଦକ୍ଷେପ ଗ୍ରହଣ କରୁଛୁ । ଖୁବଶୀଘ୍ର ଫେରସ୍ତ ହୋଇଥିବା ଚେକ୍‌ଗୁଡିକ ବାବଦର ଅର୍ଥ ପ୍ରଦାନ କରି ଦିଆଯିବ ବୋଲି କହିଥିଲେ ।

ବ୍ରିଟିଶ ବିରୋଧରେ ଲଢ଼ିଥିବା ଭଗବାନଙ୍କ ଦାୟାଦ ଏବେ ପାଲଟିଛନ୍ତି ଦିନ ମଜୁରିଆ ।

ଏଥର ସମ୍ଭାଳ ବ୍ୟୁରୋ (କୋରାପୁଟ) – ବ୍ରିଟିଶ ବିରୋଧରେ ଭାରତ ଛାଡ଼ ଆନ୍ଦୋଳନରେ ସକ୍ରିୟ ଭାବେ ସାମିଲ ହୋଇଥିଲେ କୋରାପୁଟ ଖେମୁଣ୍ଡୁଗୁଡା ଗାଁର ସ୍ୱର୍ଗତ ଭଗବାନ ଖେମୁଣ୍ଡୁ ନାୟକ। ହେଲେ ଏହି ବୀରପୁତ୍ରଙ୍କୁ ପ୍ରକୃତ ସମ୍ମାନ ମିଳୁନଥିବା ଅଭିଯୋଗ ହେଉଛି। ଉଚ୍ଚ ଶିକ୍ଷିତ ହୋଇଥିଲେ ମଧ୍ୟ ଏହି ପରିବାରର ଦାୟାଦମାନେ ଦିନ ମଜୁରି କରି ଚଳୁଛନ୍ତି। ମୁଣ୍ଡ ଗୁଞ୍ଜିବାକୁ ଘର ନାହିଁ କି କୌଣସି ସରକାରୀ ସହାୟତା ମିଳୁ ନାହିଁ। କୋରାପୁଟ ଖେମୁଣ୍ଡୁଗୁଡା ଗାଁର ଏକମାତ୍ର ସ୍ୱାଧୀନତା ସଂଗ୍ରାମୀ ସ୍ୱର୍ଗତ ଭଗବାନ ଖେମୁଣ୍ଡୁ ନାୟକ ପରିବାର ଲୋକ ଏକ ଝାଟି ମାଟିର ଚାଳ ଛପର ଘରେ ରହୁଛନ୍ତି। ଭାରତ ଛାଡ଼ ଆନ୍ଦୋଳନରେ ସକ୍ରିୟ ଥିଲେ ଭଗବାନ। ଏହି ପରିବାରର ଦାୟଦମାନେ ଉଚ୍ଚ ଶିକ୍ଷିତ ହୋଇଥିଲେ ମଧ୍ୟ କୌଣସି ସରକାରୀ ସହାୟତା ପାଇବାରୁ ବଞ୍ଚିତ ହୋଇଛନ୍ତି। ସେଥିପାଇଁ ଦିନ ମଜୁରି କରି ଚଳୁଛନ୍ତି। ଖାଲି ସେତିକି ନୁହେଁ, ଦେଶ ସ୍ୱାଧୀନ ହେବାର ୭୦ ବର୍ଷ ପରେ ବି ଏହି ବୀରପୁତ୍ରଙ୍କୁ ଉଚିତ ସମ୍ମାନ ମିଳିପାରି ନାହିଁ। ତେଣୁ ସ୍ୱାଧୀନତା ସଂଗ୍ରାମୀ ସ୍ୱର୍ଗତ ଭଗବାନ ଖେମୁଣ୍ଡୁ ନାୟକଙ୍କୁ ପ୍ରକୃତ ସମ୍ମାନ ଦେବା ସହିତ ତାଙ୍କ ପରିବାର ଲୋକଙ୍କୁ ସରକାରୀ ସହାୟତା ଯୋଗାଇ ଦେବାକୁ ଦାବି ହେଉଛି। ସଂଗ୍ରାମୀ ଭଗବାନଙ୍କୁ ସ୍ୱତନ୍ତ୍ର ପରିଚୟ ଦେବା ସହିତ ପଞ୍ଚାୟତ କାର୍ଯ୍ୟାଳୟରେ ତାଙ୍କର ପ୍ରତିମୂର୍ତ୍ତି ନିର୍ମାଣ କରିବାକୁ ଗାଁ ଲୋକେ ଦୀର୍ଘ ଦିନରୁ ଦାବି କରି ଆସୁଛନ୍ତି। ହେଲେ ଏନେଇ କେହି କର୍ଣ୍ଣପାତ କରୁ ନଥିବା ଅଭିଯୋଗ ହୋଇଛି। ଏପରିକି ଗାଁରେ ରାସ୍ତା, ପାନୀୟ ଜଳ, ସ୍ୱାସ୍ଥ୍ୟ ଭଳି କୌଣସି ମୌଳିକ ସୁବିଧା ନଥିବା ମଧ୍ୟ ଅଭିଯୋଗ ହୋଇଛି।

ଗଞ୍ଜାମରେ ‘କାଳିଆ’ ହିତାଧିକାରୀଙ୍କୁ ସହାୟତା ବଣ୍ଟନ ।

ଏଥର ସମ୍ଭାଳ ବ୍ୟୁରୋ (ବ୍ରହ୍ମପୁର) – ପୁରୀ ପରେ ଗଞ୍ଜାମ  ଜିଲ୍ଲାରେ କାଳିଆ ଯୋଜନାର ହିତାଧିକାରୀଙ୍କୁ ରାଜ୍ୟ ସରକାରଙ୍କ ପକ୍ଷରୁ ସହାୟତା ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ବ୍ରହ୍ମପୁର ନିକଟ ରଙ୍ଗେଇଲୁଣ୍ଡା ଏୟାରଷ୍ଟ୍ରିପ୍ ପଡ଼ିଆରେ ଆୟୋଜିତ ଚାଷୀ ସମାବେଶରେ ଯୋଗଦେଇ ନବୀନ ହିତାଧିକାରୀଙ୍କୁ ଏହି ସହାୟତା ରାଶି ପ୍ରଦାନ କରିଛନ୍ତି। ଏହାସହ ଗଞ୍ଜାମ ଜିଲ୍ଲା ପାଇଁ ୧ ହଜାର ୧୧ କୋଟି ଟଙ୍କାର ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଉଦ୍‌ଘାଟନ କରିଛନ୍ତି ମୁଖ୍ୟମନ୍ତ୍ରୀ । ଏଥିରେ ରହିଛି ବିଭିନ୍ନ ବ୍ଲକରେ ୧୬ଟି ଅନୁସୂଚିତ ଜନଜାତି ଛାତ୍ରୀ ନିବାସ, କବିସୂର୍ଯ୍ୟ ନଗରର ବାଘୁଆ ନଦୀ ଉପରେ ସେତୁ ନିର୍ମାଣ ଭଳି ଅନେକ ପ୍ରକଳ୍ପ।

ଜଙ୍ଗଲରୁ ଉଦ୍ଧାର ହେଲେ କନ୍ୟାଶ୍ରମର ୨୯ ଛାତ୍ରୀ ।

ଏଥର ସମ୍ଭାଳ ବ୍ୟୁରୋ (ଗଜପତି – ମୋହନା) – ଗଜପତି ଜିଲ୍ଲା ମୋହନା ବ୍ଲକ୍‌ ଅନ୍ତରବା କନ୍ୟାଶ୍ରମରୁ ନିଖୋଜ ଥିବା ୨୯ ଜଣ ଛାତ୍ରୀଙ୍କୁ ଉଦ୍ଧାର କରାଯାଇଛି। ଚନ୍ଦ୍ରଗିରି ଟାଙ୍କିଲିପଦର ଗାଁ ପାଖ ଜଙ୍ଗଲରେ ଥିବା ଏକ କୁଡ଼ିଆରୁ ସେମାନଙ୍କୁ ଉଦ୍ଧାର କରାଯାଇଛି। ଜଣେ ଛାତ୍ରୀଙ୍କ ଫୋନ୍‌କୁ ଟ୍ରାକ୍‌ କରି ସେମାନଙ୍କ ଠିକଣା ଠାବ କରିଥିଲା ପୁଲିସ୍‌। ଉଦ୍ଧାର ପରେ ସେମାନଙ୍କୁ ଚନ୍ଦ୍ରଗିରି ବାଳିକା ବିଦ୍ୟାଳୟରେ ରଖାଯାଇ ହଷ୍ଟେଲ ଛାଡ଼ିବାର ସମ୍ପର୍କରେ ପଚରାଉଚରା କରାଯାଉଛି। ସମସ୍ତ ଛାତ୍ରୀ କେମିତି ପୁଣି ଥରେ ହଷ୍ଟେଲକୁ ଫେରିବେ ସେନେଇ ଉଦ୍ୟମ କରାଯାଉଥିବା ଆର. ଉଦୟଗିରି ଏସ୍‌ଡିପିଓ ଅନୀଲ ପ୍ରଧାନ କହିଛନ୍ତି।

ଶନିବାର ବିଳମ୍ବିତ ରାତିରେ ଛାତ୍ରୀମାନେ କନ୍ୟାଶ୍ରମ ହଷ୍ଟେଲ ଛାଡ଼ି ପଳାଇଥିଲେ। ହେଲେ କେହି ବି ଛାତ୍ରୀ ଘରକୁ ଯାଇ ନଥିଲେ। ଏହି ଘଟଣା ଜଣାପଡ଼ିଲା ପରେ ଅଭିଭାବକଙ୍କଠାରୁ ଆରମ୍ଭ କରି ସ୍କୁଲ କର୍ତ୍ତୃପକ୍ଷ ଜିଲ୍ଲା ପ୍ରଶାସନ ଓ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳି ଯାଇଥିଲା। ଛାତ୍ରୀମାନେ କେଉଁଠି ଥିବେ? କେଉଁ ଅବସ୍ଥାରେ ଥିବେ? କଣ କରୁଥିବେ? ଆଦି ପ୍ରଶ୍ନ ସମସ୍ତଙ୍କ ମନକୁ ଆନ୍ଦୋଳିତ କରିଥିଲା। ଏହାପରେ ଛାତ୍ରୀମାନଙ୍କୁ ଉଦ୍ଧାର କରିବାକୁ  ଉଦ୍ୟମ ଆରମ୍ଭ ହୋଇଥିଲା। ସ୍କୁଲ କର୍ତ୍ତୃପକ୍ଷ, ଜିଲ୍ଲା ମଙ୍ଗଳ ଅଧିକାରୀଙ୍କ ସହ ଜିଲ୍ଲା ପ୍ରଶାସନ ଓ ପୁଲିସ୍‌ ବିଭିନ୍ନ ସ୍ଥାନରେ ଖୋଜାଖୋଜି କରୁଥିଲେ।ତେବେ ଛାତ୍ରୀମାନେ କାହିଁକି ହଷ୍ଟେଲ ଛାଡ଼ିଥିଲେ ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ।

ବରୀ କୃଷକ ସଙ୍ଗଠନ ର ପ୍ରସ୍ତୁତି ବୈଠକ ।

!!! ବରୀ ରୁ ପ୍ରଦୀପ ମହାରଣା ଙ୍କ ରିପୋର୍ଟ !!!

ଯାଜପୁର ଜିଲ୍ଲା ବରୀ ବ୍ଲକ ଅଧୀନ ମନ୍ଦାରୀ ଗ୍ରାମ ପଞ୍ଚାୟତ ର ଅଣିକଣା ମା ଗଜଲକ୍ଷ୍ମୀ ମନ୍ଦିର ପ୍ରାଙ୍ଗଣ ରେ ନବ ନିର୍ମାଣ କୃଷକ ସଙ୍ଗଠନ ର ଆସନ୍ତା ଫେବୃଆରୀ ୬ ତାରିଖ ରେ ଭୁବନେଶ୍ୱର ଯିବା ପାଇଁ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି ।

ଏହି ବୈଠକ ରେ ଶ୍ରୀ ଗଣେସ୍ବର ଘଡେଇ ସଭାପତିତ୍ୱ କରିଥିଲେ ।

ଆଗାମୀ ଦିନ ରେ ଚାଷୀ ଙ୍କ ସୁବିଧା ଅସୁବିଧା ନେଇ କଣ ପଦକ୍ଷେପ ନିଆଯିବ ତାହା ନେଇ ଏକ ଆଲୋଚନା କରାଯାଇଥିଲା । ସେଥିରେ ପ୍ରଶାନ୍ତ ବେଉରିଆ , ଜୟୀରାମ ନାୟକ , ମାଧବା ନନ୍ଦ ଶାନ୍ତି ଙ୍କ ସମେତ ପଞ୍ଚାୟତ ର ସମସ୍ତ ଚାଷୀ ନେତୃ ମଣ୍ଡଳୀ ଉପସ୍ଥିତ ରହିଥିଲେ ।

ଅନ୍ୟପକ୍ଷରେ ବଦୁଅ ଗ୍ରାମ ପଞ୍ଚାୟତ ର କନ୍ତିଆ ଠାରେ ସୁଦର୍ଶନ ନାୟକ ଙ୍କ ଦ୍ୱାରା ବୈଠକ ଅନୁଷ୍ଠିତ ହୋଇଥିଲା ।

ସାଧାରଣତନ୍ତ୍ର ଦିବସରେ ସହିଦ ହେଲେ ଓଡ଼ିଆ ଯବାନ ।

ଏଥର ସମ୍ଭାଳ ବ୍ୟୁରୋ (ଖୋର୍ଦ୍ଧା) – ଗତକାଲି ସାଧାରଣତନ୍ତ୍ର ଦିବସରେ ଜଣେ ଓଡ଼ିଆ ଯବାନଙ୍କ ପରଲୋକ ହୋଇଛି। ତାଙ୍କ ନାଁ ହେମନ୍ତ ପଣ୍ଡା। ତାଙ୍କ ଘର ଖୋର୍ଦ୍ଧା ଜିଲ୍ଲା ବେଗୁନିଆ ଥାନା ଅନ୍ତର୍ଗତ ଅଠରାଙ୍ଗ ଗାଁରେ। ହେମନ୍ତ ଜମ୍ମୁ କଶ୍ମୀରରେ ବାରମୁଲାରେ ମୁତୟନ ହୋଇଥିଲେ। ସେ ଗୁଳିମାଡ଼ରେ ଆହତ ହୋଇ ଚିକିତ୍ସାଧୀନ ଥିଲେ। ତେବେ ଆତଙ୍କବାଦୀଙ୍କ ଗୁଳିରେ ସେ ଆହତ ହୋଇଥିଲେ ନା ଆଉ କିଛି କାରଣ ଯୋଗୁ ତାଙ୍କ ଦେହରେ ଗୁଳିମାଡ଼ ହୋଇଥିଲା, ତାହା ସ୍ପଷ୍ଟ ହୋଇନାହିଁ। ଖୋର୍ଦ୍ଧା ଜିଲ୍ଲା ପ୍ରଶାସନ ପକ୍ଷରୁ ମଧ୍ୟ ଏନେଇ ସ୍ପଷ୍ଟ ସୂଚନା ମିଳି ପାରି ନାହିଁ। ଏହି ଘଟଣାରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି।

ବରୀ ର ବିଭିନ୍ନ ସ୍ଥାନରେ ସଧାରଣତନ୍ତ୍ର ଦିବସ ପାଳିତ ।

!!! ବରୀ ରୁ ପ୍ରଦୀପ ମହାରଣା ଙ୍କ ରିପୋର୍ଟ !!!

ବରୀ ପଞ୍ଚାୟତ ସମିତି କାର୍ଯ୍ୟାଳୟ , ଆମ୍ର କାନନ ନୋଡାଲ ବିଦ୍ୟାଳୟ ଓ ଚନ୍ଦନପୁର  ଉଚ୍ଚ ପ୍ରାଥମିକ ବିଦ୍ୟାଳୟ ଠାରେ ସାଧାରଣତନ୍ତ୍ର ଦିବସ ପାଳିତ ହୋଇଯାଇଛି ।

ବ୍ଲକ ଅଧକ୍ଷା ସୁନନ୍ଦା ଦାସ , ବିଡ଼ିଓ  ପ୍ରଭାସ ବେଉରା ଓ ରମେଶ ଚନ୍ଦ୍ର ଭଞ୍ଜ ଙ୍କ ଉପସ୍ଥିତି ରେ ବ୍ଲକ କାର୍ଯ୍ୟାଳୟ ଠାରେ ପତାକା ଉତ୍ତୋଳନ ହୋଇଥିବା ବେଳେ ଚନ୍ଦନ ପୁର ଉଚ୍ଚ ପ୍ରାଥମିକ ବିଦ୍ୟାଳୟ ର ପ୍ରଧାନ ଶିକ୍ଷୟତ୍ରୀ ବିମଳା ବିଶ୍ବା ଙ୍କ ଉପସ୍ଥିତି ରେ ଶିକ୍ଷକ ମକର ଧ୍ୱଜ ସାହୁ ଏବଂ ଆମ୍ର କାନନ ନୋଡାଲ ବିଦ୍ୟାଳୟ ର ପ୍ରଧାନ ଶିକ୍ଷୟତ୍ରୀ ସଂଘମିତ୍ରା ସାମଲ ପତାକା ଉତ୍ତୋଳନ କରିଥିଲେ ।

ସ୍କୁଲ ଛାତ୍ର ଛାତ୍ରୀ ମାନେ ପେରେଡ୍ ଯୋଗେ ମନୋରଞ୍ଜନ କରିଥିବା ବେଳେ ସମସ୍ତେ ଏକ ସ୍ୱର ରେ ଜାତୀୟ ସଂଗୀତ ଗାନ କରିଥିଲେ ।

ପରିଶେଷ ରେ ସମସ୍ତ ଙ୍କୁ ମିଷ୍ଟାନ ବଣ୍ଟା ଯାଇଥିଲା ।

ପୁରୀରେ ‘କାଳିଆ’ ଯୋଜନାର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ।

ଏଥର ସମ୍ଭାଳ ବ୍ୟୁରୋ (ପୁରୀ) – ଶୁକ୍ରବାର ପୁରୀ ଜିଲା ମାଳତୀପାଟପୁର ନିକଟ ରାହାଙ୍ଗିରିଆଠାରେ ‘କାଳିଆ’ ଯୋଜନା ପାଇଁ ଏକ ବୃହତ ସମାବେଶ ହେବ। ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗଦେବାର କାର୍ଯ୍ୟକ୍ରମ ରହିଛି।
ଏହି ସମାବେଶରେ ରାଜ୍ୟର ୩୧୪ ବ୍ଲକରୁ ପ୍ରାୟ ୨ଲକ୍ଷ ଚାଷୀ ଯୋଗ ଦେବା ପାଇଁ ବ୍ୟବସ୍ଥା କରାଯାଇଛି। ‘କାଳିଆ’ ଯୋଜନାରେ ଚାଷୀମାନଙ୍କୁ ମିଳିବାକୁ ଥିବା ସହାୟତା ରାଶି ଚାଷୀମାନଙ୍କ ଆକାଉଣ୍ଟକୁ ଟ୍ରାନ୍ସଫର କରାଯାଇ ଏହି କାର୍ଯ୍ୟକ୍ରମର ଆନୁଷ୍ଠାନିକ ଭାବେ ମୁଖ୍ୟମନ୍ତ୍ରୀ ଶୁଭାରମ୍ଭ କରିବେ ବୋଲି ସୂଚନା ମିଳିଛି। ଏହା ସହ ସମାବେଶରେ ଯୋଗ ଦେବାକୁ ଆସିଥିବା ଚାଷୀମାନଙ୍କୁ ଶ୍ରୀମନ୍ଦିର ନେଇ ମହାପ୍ରଭୁଙ୍କୁ ଦର୍ଶନ କରାଇବା ସହ ବେଳାଭୂମି ବୁଲାଇବା କାର୍ଯ୍ୟକ୍ରମ ରହିଛି।
ଏହି କାର୍ଯ୍ୟକ୍ରମକୁ ସଫଳ କରିବାକୁ ଜିଲ୍ଲା ପ୍ରଶାସନ ବ୍ୟାପକ ବନ୍ଦୋବସ୍ତ କରିଛି। ଲକ୍ଷାଧିକ ଚାଷୀଙ୍କ ସମାଗମକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥା ମଧ୍ୟ କଡ଼ାକଡ଼ି କରାଯାଇଛି। ସୁରକ୍ଷା ପାଇଁ ୫୦ ପ୍ଲାଟୁନ ଫୋର୍ସ ସହ ୨୫୦ ଅଫିସରଙ୍କୁ ନିୟୋଜିତ କରାଯାଇଛି।

ଗୁଣପୁର : ଜଗନ୍ନାଥପୁର ଗ୍ରାମ ପଞ୍ଚାୟତ ଚିନ୍ତାଲଗୁଡା ଗ୍ରାମରେ ଘର ପୋଡି ଭସ୍ମୀଭୂତ ।

ଏଥର ସମ୍ଭାଳ ବ୍ୟୁରୋ (ଗୁଣପୁର) – ରାୟଗଡ଼ ଜିଲ୍ଲା ଗୁଣପୁର ବ୍ଲକ ଅଧିନସ୍ଥ ଜଗନ୍ନାଥପୁର ଗ୍ରାମ ପଞ୍ଚାୟତ ର ଚିନ୍ତାଲଗୁଡା ଗ୍ରାମରେ ନିଆଁ ଲାଗି ୨ ଗୋଟି ଘର ସଂପୂର୍ଣ୍ଣ ଭସ୍ମୀଭୂତ ହୋଇଯାଇଥିବା ବେଳେ ନିକଟସ୍ଥ ୪ ଗୋଟି ଘର ଅନେକାଂଶ ପୋଡିଯାଇଛି । ବିଳମ୍ବିତ ରାତ୍ର ୧୨ ଘଣ୍ଟା ୩୦ ମିନିଟ ସମୟରେ ନିଆଁ ଲାଗିଯାଇଥିବା ରୁ ସ୍ଥାନୀୟ ବାସିନ୍ଦା ଏହାକୁ ଆୟତ କରିବା ଚେଷ୍ଟା କରି ଗୁଣପୁରସ୍ଥ ଦମକଳ ବାହିନୀକୁ ଅବଗତ କରାଇଥିଲେ । ଘଟଣାଟି ରାତ୍ର ସମୟରେ ହୋଇଥିବାରୁ ଦମକଳ କେନ୍ଦ୍ର ରେ କେହି ଫୋନ ଉଠାଇ ନଥିବା ନେଇ ଅଭିଯୋଗ ହୋଇଛି । ଘଟଣା ବିଷୟରେ ଖବର ପାଇ ସ୍ଥାନୀୟ ସରପଞ୍ଚ ଙ୍କ ପ୍ରତିନିଧି ଗୁଣପୁର ଦମକଳ କେନ୍ଦ୍ରରେ ପହଞ୍ଚି ଅଭିଯୋଗ କରିବା ରୁ ଦମକଳ ବାହିନୀ ଚିନ୍ତାଲଗୁଡା ରେ ପହଞ୍ଚି ନିଆଁ କୁ ଆୟତ କରିଛନ୍ତି । ଏହି ଗ୍ରାମର ୩ ଗୋଟି ସାହି ରେ ପ୍ରାୟ ୮୦ ଗୋଟି ଘର ରହିଛି । ଘଟଣା ସ୍ଥଳରେ ସରପଞ୍ଚ ଗୌରୀ ଗମାଙ୍ଗ ସହ ଗୁଣପୁର କଳିଙ୍ଗ ସାମ୍ବାଦିକ ସଂଘ ର ଆଇନ ଉପଦେଷ୍ଟା ଗୌରୀ ଶଙ୍କର ଦାଶ ଏବଂ ସମ୍ପାଦକ ସୁମନ ସାହୁକାର ପହଞ୍ଚି ଘଟଣା ର ଅନୁସନ୍ଧାନ କରି ପ୍ରପୀଡିତ ପରିବାର ଙ୍କୁ ସାନ୍ତ୍ଵନା ଦେଇଛନ୍ତି । ଗ୍ରାମ ପଞ୍ଚାୟତ ତରଫରୁ ପ୍ରପୀଡିତ ପରିବାର ବର୍ଗ ଙ୍କୁ ସଂପୂର୍ଣ୍ଣ ସହାୟତା ଯୋଗାଇ ଦିଆଯିବ ବୋଲି ସରପଞ୍ଚ ଗୌରୀ ଗମାଙ୍ଗ ପ୍ରକାଶ କରିଛନ୍ତି । ମଧ୍ୟ ରାତ୍ରରେ ନିଆଁ ଲାଗିଥିବାରୁ କେଉଁ କାରଣ ରୁ ନିଆଁ ଲାଗିଲା ତାହା ବର୍ତ୍ତମାନ ଅସ୍ଵଷ୍ଟ ଅଛି ଓ କ୍ଷୟକ୍ଷତି ର ଆକଳନ କରାଯାଇପାରି ନାହିଁ  ।