କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଭେଟିଲେ ; ପିପିଲି ର ଗଣଦୁଷ୍କର୍ମ ପୀଡିତା ବେବିନା ଙ୍କ ପରିବାର ସହ । ପିପିଲି ପୀଡିତାର ବାପା ବାବୁଲି ବେହେରାକୁ କେହି ବଂଚାଇ ପାରିବେ ନାହିଁ ବୋଲି ଧମକ ଦେଲେ ବିଜେଡି ଗୁଣ୍ଡା ।

ଏଥର ସମ୍ଭାଳ ବ୍ୟୁରୋ (ଭୁବନେଶ୍ଵର) – ଗଣବଳକ୍ରାର ପରେ ମୃତ୍ୟୁବରଣ କରିଥିବା ପିପିଲିର ଦଳିତ ଝିଅ ବେବିନାର ବାପା, ମା ଓ ଭାଇଙ୍କୁ ସାକ୍ଷାତ ପରେ ଘଟଣାର ସିବିଆଇ ତଦନ୍ତ ଓ ପରିବାରକୁ ସୁରକ୍ଷା ପାଇଁ ଗଣମାଧ୍ୟମ ଆଗରେ ଭାବାବେଗପୂର୍ଣ ଅପିଲ୍ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

ଶ୍ରୀ ପ୍ରଧାନ ପିପିଲିର ଅର୍ଜୁନଗଦା ଗାଁକୁ ଯାଇ ପୀଡିତା ପରିବାରଙ୍କୁ ଭେଟି ଫେରିବା ପରେ ଭୁବନେଶ୍ୱରରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଦୟାନଦୀ ବନ୍ଧ ଉପରେ ଶାସକ ବିଜେଡି ଦଳର ଗୁଣ୍ଡାମାନେ ବାବୁଲି ବେହେରା ପରିବାରକୁ କେହି ବଂଚାଇ ପାରିବେ ନାହିଁ ବୋଲି କହି ସାର୍ବଜନୀନ ଭାବେ ପୋଲିସର ଉପସ୍ଥିତରେ ଧମକ ଦେଇଛନ୍ତି ।

ଗତକାଲି ପ୍ରଧାନମନ୍ତ୍ରୀ ବାରିପଦାର ସାଧାରଣ ସଭାରେ ବେବିନା ପ୍ରସଙ୍ଗ ଉଠାଇବା ପରେ ସେ ପ୍ରଧାନମନ୍ତ୍ରୀଙ୍କ ବାର୍ତା ନେଇ ଏହି ପୀଡିତା ପରିବାରକୁ ସାକ୍ଷାତ କରିବାକୁ ଯାଇଥିଲେ । ମାର କୋହ, ବାପା ଓ ଭାଇଙ୍କ ଦୁଃଖ ଭରା କଥାକୁ ଶୁଣି ସେ ମର୍ମାହତ ବୋଲି କହିଛନ୍ତି ।

ଶ୍ରୀ ପ୍ରଧାନ କହିଛନ୍ତି ସମ୍ପୂର୍ଣ ପରିବାର ଓଡିଶାର ପୋଲିସ ବ୍ୟବସ୍ଥା ଉପରେ ଭରଷା ହରାଇଛି । ସିବିଆଇ ତଦନ୍ତ ଦାବି ବେବିନାର ମା କରୁଛନ୍ତି । ବେବିନାର ଭାଇ ସେଦିନର ଦୁର୍ଘଟଣା ପରେ ରକ୍ତ ଜୁଡୁବୁଡୁ ପୋଷାକକୁ କ୍ରାଇମବ୍ରାଂଚକୁ ତଦନ୍ତ ପାଇଁ ଦେଇଥିଲେ ମଧ୍ୟ ତଦନ୍ତ ପାଇଁ ସେ ନେଇନଥିବାର ଅଭିଯୋଗ କରିଛନ୍ତି । ଏହି ପୋଷାକକୁ ତଦନ୍ତ କମିଶନଙ୍କ ପାଖରେ ଦେଇଥିବା ବେବିନାର ଭାଇ ପ୍ରକାଶ କରିଛନ୍ତି । ସରକାରୀ ଓକିଲ କ୍ରାଇମବ୍ରାଂଚର କଥାକୁ ନ ମାନିଲେ ତାଙ୍କ ପାଇଁ ସମସ୍ୟା ହେବ ବୋଲି କହିଥିବା କଥା ତାଙ୍କ ଆଗରେ ପ୍ରକାଶ କରିଥିବାର ସେ କହିଛନ୍ତି ।

ଶ୍ରୀ ପ୍ରଧାନ ଆହୁରି କହିଛନ୍ତି ଯେ, ଓଡିଶାର କ୍ରାଇମବ୍ରାଂଚ ଶାସକ ଦଳର ନେତାଙ୍କୁ ଘଂଟ ଘୋଡାଇବାର ନୂଆ ବ୍ୟବସ୍ଥା । ତଦନ୍ତକାରୀ ସଂସ୍ଥା ଓଡିଶା ପୋଲିସ ରକ୍ଷକ ବଦଳରେ ଭକ୍ଷକ ସାଜିଛି । ଓଡିଶା ପୋଲିସ ସମ୍ବେଦନଶୀଳ ହେଉନାହିଁ । ଏହି ଘଟଣାରେ ସେ ଡିଜି, ଆଇଜି, ଏସପିଙ୍କ ସହ କଥା ହେବାକୁ ଚେଷ୍ଟା କରିଥିଲେ ମଧ୍ୟ ଏଯାଏଁ ଯୋଗାଯୋଗ ହୋଇପାରୁନଥିବା କଥା କହିବା ସହ ପ୍ରସଙ୍ଗକୁ ସେ ପ୍ରଧାନମନ୍ତ୍ରୀଙ୍କୁ ଅବଗତ କରାଇବେ ବୋଲି କହିଛନ୍ତି ।

ମୁଖ୍ୟମନ୍ତ୍ରୀଙ୍କୁ ସେ ଆକୁଳ ନିବେଦନ କରୁଛନ୍ତି ବୋଲି କହି ରାଜ୍ୟରେ ଏହି ଦଳିତ ଗରିବ ପରିବାରକୁ ସୁରକ୍ଷା ଯୋଗାଇ ଦେବାସହ ନିଜ ଆଡୁ ଘଟଣାର ତଦନ୍ତଭାର ସିବିଆଇ ଦେଇଦିଅନ୍ତୁ । ମୁଖ୍ୟମନ୍ତ୍ରୀ ଚଂଚକତା କରିବାରେ ପ୍ରବୀଣ ନେତୃତ୍ୱ ବୋଲି ସେ କହିଛନ୍ତି ।

ପ୍ରଦୀପ ମହାରଥୀଙ୍କ ଇସ୍ତଫା ସମ୍ପର୍କରେ ମନ୍ତବ୍ୟ ରଖି  ଶ୍ରୀ ପ୍ରଧାନ କହିଛନ୍ତି ଯେ, ଯେଉଁମାନେ ବିଗତ ଦିନରେ ମନ୍ତ୍ରୀମଣ୍ଡଳରୁ ଚିଟଫଣ୍ଡ, ଛତୁଆ, ଡାଲି, ବ୍ଲାକରୋଜ ଓ ଅନ୍ୟାନ୍ୟ କେଳାଙ୍କାରୀ କାରଣରୁ ଇସ୍ତଫା ଦେଇଛନ୍ତି ସେମାନେ ଏବେ ସରକାରଙ୍କର ମୁଖ୍ୟ କାର୍ପଟଦାର ସାଜିଛନ୍ତି ବୋଲି ଶ୍ରୀ ପ୍ରଧାନ କହିଛନ୍ତି ।

ତିନି ସେଲିବ୍ରିଟି ଭଉଣୀ ସମେତ ସମୁଦାୟ ୬ ଭଉଣୀଙ୍କ ହାତରୁ ରାଖୀ ବାନ୍ଧିବାକୁ ଉଚ୍ଛନ ହେଲେଣି ଏହି ବଲିଉଡ୍‌ ଅଭିନେତା

ମୁମ୍ବାଇ: ଶୀର୍ଷକଟି ପଢ଼ି ଆପଣ ଦ୍ୱନ୍ଦ୍ୱରେ ପଡ଼ିଯିବେଣି ନିଶ୍ଚୟ। ଏମିତି କିଏ ବଲିଉଡ୍‌ ଅଭିନେତା ଅଛି ଯାହାଙ୍କର ତିନି ଜଣ ସେଲିବ୍ରିଟି ଭଉଣୀଙ୍କ ସମେତ ସମୁଦାୟ ୬ ଉଭୁଣୀ ଅଛନ୍ତି। ସେ ଅଭିନେତା ଜଣକ ଅର୍ଜୁନ କପୁରଙ୍କ ବ୍ୟତୀତ ଆଉ କିଏ ହୋଇପାରେ! ତାଙ୍କର ନିଜ ଭଉଣୀ ଅନ୍‌ସୁଲା, ସାବତ ଉଭଣୀ ଜାହ୍ନବୀ ଓ ଖୁସି ଏବଂ କାକା ଅନୀଲ କପୁରଙ୍କ ତନୟା ସୋନମ କପୁର୍‌ ଓ ରେହା କପୁରଙ୍କ ବ୍ୟତୀତ ସଞ୍ଜୟ କପୁରଙ୍କ ଝିଅ ସନୟା୍‌ଙ୍କୁ ମିଶାଇଲେ ସମୁଦାୟ ୬ ଭଉଣୀ। ଜଣାପଡ଼ିଲାଣି ଅର୍ଜୁନ ରାଖୀ ପାଇଁ ପୂର୍ବରୁ ପ୍ରସ୍ତୁତ ହୋଇଗଲେଣି। କାହିଁକି ନା, ରାଖୀ ପୂର୍ବରୁ ହିଁ ସେ ନିଜର ଭଉଣୀମାନଙ୍କ ସହ ଫଟୋ ସୋସିଆଲ୍‌ ମିଡିଆରେ ସେୟାର୍‌ କରିଲେଣି। ଅର୍ଜୁନ କପୁରଙ୍କର ତାଙ୍କ ଭଉଣୀମାନଙ୍କ ସହ ସବୁବେଳେ ଉତ୍ତମ ସଂପର୍କରେ ଥିବା ଗଣମାଧ୍ୟମ ଓ ସୋସିଆଲ୍‌ ମିଡିଆରେ ଦେଖିବାକୁ ମିଳିଛି। ଅନେକ ସମୟରେ ନିଜ ଭଉଣୀମାନଙ୍କୁ ସୁରକ୍ଷା ଦେବାକୁ ଯାଇ ଚର୍ଚ୍ଚାରେ ରହିଛନ୍ତି ଏହି ଅଭିନେତା।

ରୁଜୁ ହେଉନି ଦୁଷ୍କର୍ମ ମାମଲା, ଅଭିଯୋଗକାରୀଙ୍କୁ କରାଯାଉଛି ଦୁର୍ବ୍ୟବହାର : ଏମିତି ଚାଲିଛି ରାଜଧାନୀର ମହିଳା ଥାନା !

ଏଥର ସମ୍ଭାଳ ବ୍ୟୁରୋ : ଗୋଟିଏ ପଟେ ରାଜ୍ୟ ସରକାର କହୁଛନ୍ତି, ମହିଳାଙ୍କୁ ସୁରକ୍ଷା ଦିଅ। ମହିଳା ସଂକ୍ରାନ୍ତୀୟ ମାମଲା ତୁରନ୍ତ ରୁଜୁ କରି ଅଭିଯୁକ୍ତଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କର। କିନ୍ତୁ ରାଜଧାନୀର ମହିଳା ଥାନା ଚିତ୍ର ଏବେ କିଛି ଅଲଗା ବୟାନ କରୁଛି। ସ୍ୱତନ୍ତ୍ର ଭାବେ ମହିଳାଙ୍କ ଅଭିଯୋଗ ଶୁଣିବା ପାଇଁ ଥିବା ଏହି ମହିଳା ଥାନା ଏବେ ମହିଳାଙ୍କ ଅଭିଯୋଗ ଶୁଣିବାକୁ ନାରାଜ। ଏପରିକି ଦୁଷ୍କର୍ମ ଓ ଅସଦାଚରଣ ମାମଲା ନେବାକୁ ସିଧାସିଧା ମନା କରି ଦିଆଯାଉଛି। ଥାନାକୁ ଯାଉଥିବା ଅଭିଯୋଗକାରୀଙ୍କୁ ଥାନା ମୁହଁରୁ ଦୁରଦୁର ମାରମାର କହି ବିଦା କରି ଦେଉଛନ୍ତି। ନଚେତ ଥାନାରେ ଅଭିଯୋଗକାରୀ ଓ ଅଭିଯୁକ୍ତଙ୍କ ମଧ୍ୟରେ ଆପୋସ ସମାଧାନ କରାଇ ଦେଉଛନ୍ତି।

ଏବେ ମହିଳା ଥାନା ଉପରୁ ରାଜଧାନୀବାସୀଙ୍କ ଆସ୍ଥା ତୁଟି ଗଲାଣି। ଶେଷରେ ବାଧ୍ୟ ହୋଇ ଅନ୍ୟ ଥାନାରେ ଅଭିଯୋଗ କରୁଛନ୍ତି। ଶୁକ୍ରବାର ମଞ୍ଚେଶ୍ୱର ଓ ଲକ୍ଷ୍ମୀସାଗର ଥାନା ପୁଲିସ ଦୁଇଟି ନାବାଳିକା ଦୁଷ୍କର୍ମ ମାମଲାରେ ଦୁଇଜଣ ଅଭିଯୁକ୍ତଙ୍କୁ ଗିରଫ କରିବା ପରେ ମହିଳା ଥାନାର ଅସଲ ଚିତ୍ର ପଦାକୁ ଆସିଛି। ରାଜ୍ୟରେ ଦିନକୁ ଦିନ ଦୁଷ୍କର୍ମ ମାମଲା ବଢ଼ି ବଢ଼ି ଚାଲିଛି। ବିଶେଷ କରି ରାଜଧାନୀରେ ଏଭଳି ଅଭିଯୋଗର ସଂଖ୍ୟା ଅଧିକ। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ୨୦୦୧ରେ ସ୍ୱତନ୍ତ୍ର ଭାବେ ମହିଳା ଥାନା ପ୍ରତିଷ୍ଠା କରିଥିଲେ। ଖୋଦ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାକୁ ଉଦଘାଟନ କରିଥିଲେ। ସେହି ଦିନଠାରୁ ମହିଳାଙ୍କ ସମ୍ପର୍କିତ ସମସ୍ତ ମାମଲା, ଦୁଷ୍କର୍ମ, ଅସଦାଚରଣ ଭଳି ଅଭିଯୋଗ ମହିଳା ଥାନାରେ ରୁଜୁ ହେଲା।

ବ୍ୟାଙ୍କରୁ ୩୬ଶହ ଟଙ୍କା ଅଧିକା ବାହାରିଲା ! ଅଧିକ ଟଙ୍କା ବାହାରିବାରୁ ବ୍ୟାଙ୍କ କର୍ତ୍ତୃପକ୍ଷଙ୍କୁ ଭେଟିଲେ ଓ ଟଙ୍କା ଫେରାଇଲେ ଯୁବକ !

ଏଥର ସମ୍ଭାଳ ବ୍ୟୁରୋ : ଏବେବି ମାନବିକତା ବଚିଂଛି । ଲେକାମାନଙ୍କ ପାଖରେ ଏବେବି ସ୍ୱାଭିମାନ ବଞ୍ଚିରହିଥିବା ଦେଖାଯାଉଛି । ତେବେ ବାଉଳା ହୋଇଗଲା ଏଟିଏମ୍ କିନ୍ତୁ ବାଉଳା ହେଲେ ନାହିଁ ଯୁବକ। ୨୫୦୦ ଟଙ୍କା ଉଠାଇଲା ବେଳକୁ ବାହାରିଲା ୬୧୦୦ ଟଙ୍କା। ତେବେ ଏହି ଅଧିକା ଟଙ୍କାକୁ ଚୁପଚାପ ନିଜ ପକେଟରେ ରଖି ଘରକୁ ଯିବା ବଦଳରେ ଜଣେ ଯୁବକ ସିଧା ବ୍ୟାଙ୍କକୁ ଯିବା ଓ ଅଧିକ ଉଠିଥିବା ଟଙ୍କା ଫେରାଇବା ବଲାଙ୍ଗୀର ସହରରେ ଚର୍ଚ୍ଚାର ବିଷୟ ହୋଇଛି। ବଲାଙ୍ଗୀର ସିଭିଲ କୋର୍ଟରେ କାମ କରୁଥିବା ସମୀର ରଂଜନ ପ୍ରଧାନ ଗତ ୧୪ ତାରିଖରେ ମୁଖ୍ୟ ଡାକ୍ତରଖାନା ନିକଟରେ ଥିବା ସିଣ୍ଡିକେଟ ବ୍ୟାଙ୍କର ଏଟିଏମରୁ ୨୫ଶହ ଟଙ୍କା ଉଠାଇଥିଲେ। କିନ୍ତୁ ଏଟିଏମରୁ ବାହାରିଲା ୬ହଜାର ଶହେ ଟଙ୍କା। ୩୬ ଶହ ଟଙ୍କା ଅଧିକ! ତେବେ ଶ୍ରୀ ପ୍ରଧାନ ବଳକା ଟଙ୍କା ନେଇ ପହଞ୍ଚିଥିଲେ ସିଣ୍ଡିକେଟ ବ୍ୟାଙ୍କରେ। ଏଟିଏମରୁ ଟଙ୍କା ଉଠାଇବା ବେଳେ ଅଧିକ ୩୬ଶହ ଟଙ୍କା ବାହାରିଥିବା ସୂଚନା ଦେବା ପରେ ବ୍ୟାଙ୍କ କର୍ମଚାରୀମାନେ ଆଶ୍ଚର୍ଯ୍ୟ ହୋଇଥିଲେ। ଖୋଦ୍ ବ୍ୟାଙ୍କର ପରିଚାଳକ ଆସି ତାଙ୍କୁ ଭେଟିଥିଲେ। ତେବେ ଏହି ଘଟଣାପରେ ବ୍ୟାଙ୍କ କର୍ମଚାରୀମାନେ ଯୁବକ ଜଣଙ୍କୁ ପ୍ରଶଂସା କରିଛନ୍ତି । ଅନେକ ସମୟରେ ଏପରି ଭାବରେ ଭୁଲରେ ଏଟିଏମରୁ ଅଧିକ ଟଙ୍କା ବାହାରି ଆସେ କିନ୍ତୁ କେହି ପେରି ଭାବରେ ଟଙ୍କା ଫେରାଇବାରେ ଦେଖାଯାଇନାହିଁ । କିନ୍ତୁ ଏହି ଯୁବକ ନିଜ ସ୍ୱାଭିମାନ ଓ ବିବେକ ଦୃଷ୍ଟିରୁ ଟଙ୍କା ଫେରାଇଥିବାରୁ ତାଙ୍କୁ ଧନ୍ୟବାଦ ଦେଇଛନ୍ତି ବ୍ୟାଙ୍କ କର୍ତୃପକ୍ଷ । 

” ଧସିଲା ରଘୁବାରି ଘାଟି ” ୪୦ ଖଣ୍ଡ ଗାଁ ବାହ୍ୟ ଜଗତରୁ ବିଚ୍ଛିନ୍ନ : ରାୟଗଡ଼ା

ବ୍ୟୁରୋ ରିପୋର୍ଟ  : ରାୟଗଡ଼ା : ଲଗାଣ ବର୍ଷା ଯୋଗୁଁ ରାୟଗଡ଼ା ଜିଲ୍ଲା ରଘୁବାରି ଘାଟି ଧସିଯାଇଛି। ଘାଟି ଧସି ଯବାରୁ ରଘୁବାରି ଓ ଡିମିରିଗୁଡ଼ା ଅଞ୍ଚଳର ପ୍ରାୟ ୪୦ ଖଣ୍ଡ ଗାଁର ପାଞ୍ଚ ହଜାରରୁ ଅଧିକ ଲୋକ ବାହ୍ୟ ଜଗତରୁ ବିଚ୍ଛିନ୍ନ ହୋଇ ଯାଇଛନ୍ତି। ରଘୁବାରିରୁ ପାତରପଡ଼ା, ହରିପୁର ଓ ଡିମିରିଗୁଡ଼ା ରାସ୍ତା ଧସି ହୋଇ ଯାଇଛି। ଫଳରେ ସ୍ଥାନୀୟ ଅଞ୍ଚଳରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ଅମ୍ବାଦଳାକୁ ଯାଇଥିବା ଲୋକେ ନିଜ ଗାଁକୁ ଫେରି ପାରୁ ନାହାନ୍ତି। ମୁନିଗୁଡ଼ା କିମ୍ବା ଅନ୍ୟ କୌଣସି ସ୍ଥାନକୁ ମଧ୍ୟ ଲୋକେ ଜରୁରୀ କାମରେ ଯାଇ ପାରୁ ନ ଥିବା ଜଣାପଡ଼ିଛି।

ବିଏମ୍‌ସିର ଫମ୍ପା ଧମକ

ଭୁବନେଶ୍ୱର: ବିନା ଅନୁମତିରେ ରାଜଧାନୀରେ ହୋର୍ଡିଂ ଲଗାଇଥିବାରୁ ବିଏମ୍‌ସି ପକ୍ଷରୁ ବିଭିନ୍ନ ସଂସ୍ଥାକୁ ଜରିମାନା ନୋଟିସ୍‌ କରାଗଲା। ଏପରିକି ୭ଦିନ ମଧ୍ୟରେ ଜରିମାନା ଅର୍ଥ ନଦେଲେ ସାର୍ଟିଫିକେଟ୍‌ କେସ୍‌ କରି ସମ୍ପତ୍ତି ଜବତ କରାଯିବ ବୋଲି ନୋଟିସ୍‌ରେ ଚେତାବନୀ ଦିଆଗଲା। କିନ୍ତୁ ନୋଟିସ୍‌ କରିବାର ଦୁଇ ମାସରୁ ଅଧିକ ସମୟ ବିତିଯାଇଥିଲେ ହେଁ ବିଏମ୍‌ସି କର୍ତ୍ତୃପକ୍ଷ ଆଜି ପର୍ଯ୍ୟନ୍ତ ନା ଜରିମାନା ଆଦାୟ କରିପାରିଲେ ନା ସାର୍ଟିଫିକେଟ୍‌ କେସ୍‌ କଲେ। ବିଏମ୍‌ସିର ଫମ୍ପା ଧମକ ଦେଖି ଏବେ ରାଜଧାନୀରେ ବେଆଇନ ହୋର୍ଡିଂ ଛାଇ ଗଲାଣି। ବିଏମ୍‌ସିର ବିଜ୍ଞାପନ ନୀତି ୨୦୦୬ର ପରିଚ୍ଛେଦ ୧୦-ଇ ଅନୁସାରେ ବେଆଇନ ବିଜ୍ଞାପନ ପ୍ରଦର୍ଶନକାରୀଙ୍କ ଠାରୁ ପ୍ରତି ହୋର୍ଡିଂ ପିଛା ୫ହଜାର ଟଙ୍କା ଜରିମାନା ଆଦାୟ କରିବାକୁ ନିୟମ ରହିଛି। ଏହି ନିୟମ ଅନୁଯାୟୀ ୭ଦିନ ମଧ୍ୟରେ ଜରିମାନା ନଦେଲେ ଓଡ଼ିଶା ମ୍ୟୁନିସପାଲ କର୍ପୋରେସନ୍‌ ଆକ୍ଟ-୨୦୦୩ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଥିରେ ଜରିମାନା ଖିଲାପକାରୀଙ୍କ ଉପରେ ସାର୍ଟିଫିକେଟ୍‌ କେସ୍‌ ରୁଜୁ କରାଯିବ। ଏହାପରେ ବିଏମ୍‌ସି ପକ୍ଷରୁ ସମ୍ପତ୍ତି ବାଜ୍ୟାପ୍ତି କରାଯିବ। କିନ୍ତୁ ଏହି ନିୟମ କେବଳ ବିଏମ୍‌ସିର ରେକର୍ଡରେ ଅଛି। କିଛି ବି କାର୍ଯ୍ୟକାରୀ ହେଉନି। ଖାଲି ଫମ୍ପା ବାହାଦୂରୀ ମାରିବା ପାଇଁ ଅଧିକାରୀମାନେ ନୋଟିସ୍‌ ସିନା ଜାରି କରିଦେଲେ କିନ୍ତୁ ଜରିମାନା ଆଦାୟ କରିବାକୁ ସାହାସ ଜୁଟାଇ ପାରିଲେନି। ରାଜଧାନୀରେ ମାଳମାଳ ବେଆଇନ ହୋର୍ଡିଂ ଲାଗୁଥିବା ଦେଖି ବିଏମ୍‌ସି ପକ୍ଷରୁ ବିଜ୍ଞାପନ ନୀତି ୨୦୦୬କୁ ସଂଶୋଧନ କରାଗଲା। ଏହାକୁ କଡ଼ାକଡ଼ି ଲାଗୁ କରିବାକୁ ବାରମ୍ବାର ବୈଠକ ବି ବସିଲା। ହେଲେ ଏହି ନିୟମକୁ କାର୍ଯ୍ୟକାରୀ କରିବାକୁ ବିଏମ୍‌ସି ଅଧିକାରୀ କାହିଁକି ପଛଘୁଞ୍ଚା ଦେଉଛନ୍ତି ସେନେଇ ଏବେ ଅନେକ ପ୍ରଶ୍ନ ଉଠିଲାଣି।

ଏପରିକି ବିଏମ୍‌ସି ଅଧିକାରୀମାନେ ଜରିମାନା ନୋଟିସ୍‌ କରିଦେବା ପରେ ସଂସ୍ଥା ଠାରୁ ଭିତିରିଆ କାରବାର କରି ଏହାକୁ ଚପାଇ ରଖୁଥିବା ଅଭିଯୋଗ ଉଠିଲାଣି। ଯେଉଁଥିପାଇଁ ଏବେ ରାଜଧାନୀରେ ବେଆଇନ ହୋର୍ଡିଂ ଲଗାଇବାକୁ ବିଭିନ୍ନ ସଂସ୍ଥା ପଛଘୁଞ୍ଚା ଦେଉନାହାନ୍ତି। ଗତ ଜାନୁଆରି ୧୦ତାରିଖରେ ରାଜଧାନୀରେ ୯ଟି ସଂସ୍ଥା ପକ୍ଷରୁ ଲାଗିଥିବା ୪୫୦ଟି ବେଆଇନ ହୋର୍ଡିଂକୁ ବିଏମ୍‌ସି ଉଚ୍ଛେଦ କରିବା ସହ ୨୪ଲକ୍ଷ ୫୦ହଜାର ଟଙ୍କା ଜରିମାନା ନୋଟିସ୍‌ କରିଥିଲା। ବିଏମ୍‌ସି ପକ୍ଷରୁ ବ୍ଲିସ୍‌ଫୁଲ୍‌ ୟୋଗା ସେଣ୍ଟର୍‌, ଫ୍ୟୁଚର୍‌ ଫ୍ଲେମ୍‌ କମ୍ପ୍ୟୁଟର୍‌ ଏଜୁକେସନ୍‌, ନୃତ୍ୟାର୍ଚ୍ଚନା, ଲେଜର୍‌ ପାଇଲ୍‌ସ ସେଣ୍ଟର୍‌, କ୍ଲାଟ୍‌, ବାଜିରାଓ ଆଇଏଏସ୍‌ ଏକାଡେମି, କେନ୍‌ସଫ୍ଟ୍‌ ଏଜୁକେସନ, ଭେଟା, ଉଡାନ୍‌ ଏକାଡେମି ପ୍ରମୁଖଠାରୁ ଜରିମାନା ଆଦାୟ ପାଇଁ ନୋଟିସ୍‌ ହୋଇଥିଲା। ହେଲେ ଏହି ୯ଟି ସଂସ୍ଥାରୁ ଗୋଟିଏ ସଂସ୍ଥା ମାତ୍ର ୫ହଜାର ଟଙ୍କା ଜମା କରିଥିବାବେଳେ ବାକି ୮ଟି ସଂସ୍ଥା ଟଙ୍କାଟିଏ ବି ଦେଲେନି। ବିଏମ୍‌ସି ପକ୍ଷରୁ କିନ୍ତୁ ଏନେଇ ତନାଘନା ବି କରାଗଲାନି। କିପରି ଜରିମାନା ଆଦାୟ ହେବ ସେନେଇ ପଦକ୍ଷେପ ନିଆଗଲାନି କି ସାର୍ଟିଫିକେଟ୍‌ କେସ୍‌ ହେଲାନି। କେବଳ ଏତିକିରେ ବିଏମ୍‌ସିର ଅପାରଗତା ଶେଷ ହେଲାନି। ଗତ ଫେବ୍ରୁଆରି ୩ତାରିଖରେ ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ଅଧୀନସ୍ଥ ସଂସ୍ଥା ପେଟ୍ରୋଲିୟମ କନଜରଭେସନ୍‌ ଆଣ୍ଡ ରିସର୍ଚ୍ଚ ଆସୋସିଏସନ୍‌ (ପିସିଆର୍‌ଏ) ପକ୍ଷରୁ ରାଜଧାନୀର ବିଭିନ୍ନ ସ୍ଥାନରେ ବେଆଇନ ଭାବେ ୨ହଜାର ହୋର୍ଡିଂ ଲଗାଯାଇଥିବାବେଳେ ବିଏମ୍‌ସି ପକ୍ଷରୁ ଏହାକୁ ଉଚ୍ଛେଦ କରାଯାଇଥିଲା। ବିନା ଅନୁମତିରେ ହୋର୍ଡିଂ ଲଗାଇଥିବାରୁ ହୋର୍ଡିଂ ପିଛା ୫ହଜାର ଟଙ୍କା ହିସାବରେ ୧କୋଟି ଟଙ୍କା ଜରିମାନା ଦେବାକୁ ନୋଟିସ୍‌ ଜାରି କରାଗଲା। ଏଥିରେ ଉଲ୍ଲେଖ କରାଯାଇଥିଲା ଯେ, ୭ଦିନ ଭିତରେ ଜରିମାନା ନଦେଲେ ସାର୍ଟିଫିକେଟ୍‌ କେସ୍‌ କରାଯିବ। କିନ୍ତୁ ନୋଟିସ୍‌ କରିବାର ୫ ସପ୍ତାହ ବିତିଯାଇଥିଲେ ହେଁ ବିଏମ୍‌ସି କର୍ତ୍ତୃପକ୍ଷ କିଛି ପଦକ୍ଷେପ ନେଇନାହାନ୍ତି।

ଜରିମାନା ଆଦାୟ କଲେନି କି କେସ୍‌ କଲେନି
କାହା ଇସାରାରେ ଚୁପ୍‌ ବସିଛନ୍ତି ଅଧିକାରୀ?
ପିସିଆର୍‌ଏ ଓ ଅନ୍ୟ ୮ସଂସ୍ଥା ପାଇଁ ଦରଦ କାହିଁକି?
ମାଡ଼ିଗଲାଣି ବେଆଇନ ହୋର୍ଡିଂ
ସରକାରୀ ଓ ବେସରକାରୀ ସଂସ୍ଥା କେହି ନିୟମ ମାନୁନାହାନ୍ତି
ବିଏମ୍‌ସିର ଏହିଭଳି ପଦକ୍ଷେପ ଏବଂ ଫମ୍ପା ଧମକ ଦେଖି ଯେଉଁ ସଂସ୍ଥାମାନଙ୍କ ବେଆଇନ ହୋର୍ଡିଂ ଉଚ୍ଛେଦ ହୋଇଥିଲା ସେମାନେ ଏବେ ପୁଣି ହୋର୍ଡିଂ ଲଗାଇଲେଣି। ଏପରିକି ରାଜ୍ୟ ସରକାରଙ୍କ ଅଧୀନରେ ଥିବା ବିଭିନ୍ନ ବିଭାଗ ରାଜଧାନୀରେ ବେଆଇନ ହୋର୍ଡିଂ ଛାଇ ଦେଇଛନ୍ତି। ସବୁଠୁ ଆଗରେ ପର୍ଯ୍ୟଟନ ବିଭାଗ ରହିଛି। ପର୍ଯ୍ୟଟନ ବିଭାଗ ରାଜଧାନୀର ବିଭିନ୍ନ ସ୍ଥାନରେ ବେଆଇନ ଭାବେ ବାଉଁଶ ପୋତି ହୋର୍ଡିଂ ଲଗାଇଥିଲେ ହେଁ ବିଏମ୍‌ସି କର୍ତ୍ତୃପକ୍ଷ ଏହାକୁ ଉଚ୍ଛେଦ କରିବାକୁ ସାହସ କରୁନାହାନ୍ତି। କେବଳ ସରକାରୀ କି ବେସରକାରୀ ସଂସ୍ଥା ନୁହେଁ ବିଭିନ୍ନ ରାଜନୈତିକ ଦଳ ବି ବିଏମ୍‌ସିର ଅପାରଗତାକୁ ଦେଖି ବେଆଇନ ହୋର୍ଡିଂ ଲଗାଇବାକୁ ପଛାଉନାହାନ୍ତି। ବେଆଇନ ହୋର୍ଡିଂ ଲଗାଇଥିବା ସଂସ୍ଥା ଠାରୁ ଜରିମାନା ଆଦାୟ କରିବା ଏବଂ ସାର୍ଟିଫିକେଟ୍‌ କେସ୍‌ କରିବା ପାଇଁ ନୋଟିସ୍‌ ଜାରି କରିଥିବା ବିଏମ୍‌ସିର ଡେପୁଟି କମିସନର ଶ୍ରୀମନ୍ତ ମିଶ୍ରଙ୍କୁ ଏନେଇ ଯୋଗାଯୋଗ କରିବାରୁ ସେ କହିଛନ୍ତି ଯେ, ଜରିମାନା ଆଦାୟ ପାଇଁ ଆମେ ଯେତିକି ସମୟ ଦେଇଥିଲୁ ସେଥିରେ ଗୋଟିଏ ମାତ୍ର ସଂସ୍ଥା ଜରିମାନା ଦେଲା। ସମସ୍ତଙ୍କ ବିରୁଦ୍ଧରେ ସାର୍ଟିଫିକେଟ୍‌ କେସ୍‌ ହେବ। ଜୋନାଲ ଡେପୁଟି କମିସନରମାନେ ଏନେଇ ନୋଟିସ୍‌ କରିବେ। ଏନେଇ ସେମାନଙ୍କୁ ଜଣାଇ ଦିଆଯାଇଛି। କିନ୍ତୁ ମାର୍ଚ୍ଚ ମାସ ପାଇଁ ଜୋନାଲ ଡେପୁଟି କମିସନରମାନେ ବିଭିନ୍ନ ରାଜସ୍ୱ ଆଦାୟ କରିବାରେ ବ୍ୟସ୍ତ ଥିବାରୁ ସାର୍ଟିଫିକେଟ୍‌ କେସ୍‌ ହୋଇପାରିନି। ଖୁବ୍‌ ଶୀଘ୍ର ଏନେଇ ପଦକ୍ଷେପ ନିଆଯିବ।

ମାସେ ହେଲା କ୍ୟାପିଟାଲ ହସ୍ପିଟାଲ ସିଟି ସ୍କାନ୍‌ ବନ୍ଦ

ଭୁବନେଶ୍ୱର: ଗତ ୧ମାସ ହେଲାଣି କ୍ୟାପିଟାଲ ହସ୍ପିଟାଲରେ ସି.ଟି ସ୍କାନ୍‌ ମେସିନ୍‌ ବନ୍ଦ ହୋଇ ପଡ଼ିଛି। ଶହ ଶହ ରୋଗୀ ଘରୋଇ ଡାଇଗ୍ନୋଷ୍ଟିକ୍‌ ସେଣ୍ଟରକୁ ପରୀକ୍ଷା ପାଇଁ ଯାଉଛନ୍ତି। ମାତ୍ର ଏଥିପ୍ରତି ହସ୍ପିଟାଲ କର୍ତୃପକ୍ଷଙ୍କ ଚିନ୍ତା ଅଛି ନା ରାଜ୍ୟ ସରକାରଙ୍କର। ଗରିବ ରୋଗୀଙ୍କୁ ଘରୋଇ ଡାଇଗ୍ନୋଷ୍ଟିକ୍‌ ସେଣ୍ଟରକୁ ଚିକିତ୍ସା କରିବା ପାଇଁ ଏକପ୍ରକାର ବାଟ ଖୋଲି ଦିଆଯାଇଛି। ରାଜଧାନୀର ପ୍ରମୁଖ ସରକାରୀ ହସ୍ପିଟାଲରେ ଏଭଳି ଅବ୍ୟବସ୍ଥାକୁ ସାଧାରଣରେ ତୀବ୍ର ସମାଲୋଚନା କରାଯାଉଛି। ସୂଚନା ଅନୁଯାୟୀ, ଇନଫୋସିସ୍‌ ପକ୍ଷରୁ ୨୦୦୧ ମସିହାରେ କ୍ୟାପିଟାଲ ହସ୍ପିଟାଲକୁ ସି.ଟି ସ୍କାନ୍‌ ମେସିନ୍‌ ପ୍ରଦାନ କରାଯାଇଥିଲା। ସେବେଠାରୁ ହସ୍ପିଟାଲରେ ଏହି ମେସିନ୍‌ କାର୍ଯ୍ୟ କରି ଆସୁଛି। ତେବେ ଏଥିରେ କେବଳ ମୁଣ୍ଡର ସ୍କାନ୍‌ କରାଯାଉଥିବା ବେଳେ ସି.ସିଟି କରାଯାଉ ନ ଥିଲା। ଗୋଟିଏ ସ୍ଲାଇସ୍‌ର ହୋଇଥିବା ବେଳେ ଏବେ ୧୬ ସ୍ଲାଇସ୍‌ର ମେସିନ୍‌ ବ୍ୟବହାର କରାଯାଉଛି। ତେବେ ହସ୍ପିଟାଲରେ ଥିବା ମେସିନ୍‌ଟି କିଛି ଟ୍ୟୁବ୍‌ ପୋଡ଼ି ଯାଇଥିବାରୁ ତାହା ଅଚଳ ହୋଇଯାଇଛି। ହସ୍ପିଟାଲ କର୍ତୃପକ୍ଷ ମେସିନ୍‌କୁ ବାରମ୍ବାର ସଜାଡ଼ୁଥିଲେ ମଧ୍ୟ ତାହା ଖରାପ ହୋଇଯାଉଥିବାରୁ ଏହାର ବଦଳରେ ନୂତନ ମେସିନ୍‌ ଆଣିବା ପାଇଁ ରାଜ୍ୟ ସରକାରଙ୍କୁ ହସ୍ପିଟାଲ କର୍ତୃପକ୍ଷ ଅନୁରୋଧ କରିଥିଲେ। କିନ୍ତୁ ଏହା ଭିତରେ ୧ମାସ ବିତିଗଲାଣି, ନୂଆ ମେସିନ୍‌ ଆଜି ପର୍ଯ୍ୟନ୍ତ ପହଞ୍ଚିପାରି ନାହିଁ। ଯାହାର ଫାଇଦା ନେଉଛନ୍ତି ଘରୋଇ ଡାଇଗ୍ନୋଷ୍ଟିକ ସେଣ୍ଟର। ନିକଟରେ ରାଜ୍ୟ ସରକାରଙ୍କ ପକ୍ଷରୁ ନିଦାନ ଯୋଜନାରେ ମାଗଣାରେ ସି.ଟି ସ୍କାନ୍‌ କରିବା ପାଇଁ ନିର୍ଦେଶ ଦିଆଯାଇଛି। ତେବେ କ୍ୟାପିଟାଲ ହସ୍ପିଟାଲରେ ଏହି ମେସିନ୍‌ ଖରାପ ହୋଇଯାଇଥିବା ବେଳେ ସାଧାରଣ ରୋଗୀମାନେ ଏହାର ଫାଇଦା ପାଇବାରୁ ବଞ୍ଚିତ ହେଉଛନ୍ତି। ଅପରପକ୍ଷରେ ପିପିପି ମୋଡ୍‌ରେ କ୍ୟାପିଟାଲ ହସ୍ପିଟାଲରେ ସି.ଟି ସ୍କାନ୍‌ ମେସିନ୍‌ ବସାଇବା ପାଇଁ ଯୋଜନା କରାଯାଇଥିବା ଜଣାପଡ଼ିଛି। କ୍ୟାପିଟାଲ ହସ୍ପିଟାଲର ଜଣେ ବରିଷ୍ଠ ଅଧିକାରୀଙ୍କ ସୂଚନା ଅନୁଯାୟୀ, ଏ ନେଇ ସ୍ୱାସ୍ଥ୍ୟ ବିଭାଗକୁ ଜଣାଇ ଦିଆଯାଇଛି। ନିକଟରେ ସ୍ୱାସ୍ଥ୍ୟ ମିସନର ଅଧିକାରୀ ହସ୍ପିଟାଲରେ ନୂତନ ମେସିନ୍‌ ବସାଇବା ନେଇ ଯାଞ୍ଚ କରିଛନ୍ତି। ଖୁବଶୀଘ୍ର ଏହି ମେସିନ୍‌ ହସ୍ପିଟାଲରେ କାର୍ଯ୍ୟ କରିବ ବୋଲି ଅଧିକାରୀ ଜଣକ ସୂଚନା ଦେଇଛନ୍ତି।

ରମାଦେବୀ ବିଶ୍ୱବିଦ୍ୟାଳୟ ଓ ସିଫା ମଧ୍ୟରେ ବୁଝାମଣାପତ୍ର ସ୍ୱାକ୍ଷରିତ

ଭୁବନେଶ୍ୱର,: ରମାଦେବୀ ମହିଳା ବିଶ୍ୱବିଦ୍ୟାଳୟର ଜୈବ ବିଜ୍ଞାନ ଓ ଜୀବ ବିଜ୍ଞାନ ଏବଂ କୌଶଲ୍ୟାଗଙ୍ଗସ୍ଥିତ କେନ୍ଦ୍ରୀୟ ମଧୁର ଜଳ ମତ୍ସ୍ୟଚାଷ ଗବେଷଣା ଅନୁଷ୍ଠାନ(ସିଫା) ମଧ୍ୟରେ ଆଜି ଏକ ବୁଝାମଣାପତ୍ର ସ୍ୱାକ୍ଷରିତ ହୋଇଛି। ବିଶ୍ୱବିଦ୍ୟାଳୟ ପରିସରରେ ଆୟୋଜିତ କାର୍ଯ୍ୟକ୍ରମରେ ଏହାର କୁଳପତି ପ୍ରଫେସର ପଦ୍ମଜା ମିଶ୍ର, କୁଳସଚିବ ଜୟନ୍ତ ନାରାୟଣ ଷଡ଼ଙ୍ଗୀ, ଜୈବ ପ୍ରଯୁକ୍ତି ବିଜ୍ଞାନ ଓ ଜୀବ ବିଜ୍ଞାନର ଅଧ୍ୟାପକ, ଅଧ୍ୟାପିକାଙ୍କ ସମେତ ସିଫାର ନିର୍ଦେଶକ ଡ. ଜେ.କେ. ସୁନ୍ଦରାୟ, ବୈଜ୍ଞାନିକ ଡ. ପି.କେ. ସାହୁ, ଡ. ଏ. ବାରାତ ଏବଂ କୁମାର ସ୍ୱାମୀ ପ୍ରମୁଖ ଉପସ୍ଥିତ ଥିଲେ। ଜୈବ ବିଜ୍ଞାନ କ୍ଷେତ୍ରରେ ଛାତ୍ରୀଙ୍କୁ ଏହି ଅନୁଷ୍ଠାନର ସହଭାଗିତାରେ ଗବେଷଣା କରିବାରେ ସହାୟକ ହେବ। କୃଷି ତଥା ମତ୍ସ୍ୟଚାଷ କ୍ଷେତ୍ରରେ ନାରୀଙ୍କର ଭୂମିକା ସମ୍ପର୍କିତ ବିଭିନ୍ନ କାର୍ଯ୍ୟକ୍ରମରେ ଜୈବ ପ୍ରଯୁକ୍ତି ବିଜ୍ଞାନ, ମନ ବିଜ୍ଞାନ ଓ ପରିସଂଖ୍ୟାନ ବିଭାଗରେ ଛାତ୍ରୀମାନେ ବିଶେଷ ଉପକୃତ ହେବେ ବୋଲି ସିଫା ନିର୍ଦେଶକ କହିଛନ୍ତି।

ଖରାଦିନର ପ୍ରବଳ ଗରମରୁ ଏମିତି ବଞ୍ଚାନ୍ତୁ ନିଜକୁ

ଗରମ ଧୀରେ ଧୀରେ ବଢ଼ି ଚାଲିଛି। ବର୍ତ୍ତମାନ ଏହା ପ୍ରାୟ ୪୦ ଡିଗ୍ରି ଯାଏଁ ହୋଇ ଯାଇଛି। ଏହା ଧୀରେ ଧୀରେ ଆହୁରି ଅଧିକ ବଢ଼ି ୪୮ ରୁ ୫୦ ଡିଗ୍ରି ଯାଏଁ ପହଞ୍ଚିପାରେ। ଆଗକୁ ଆସୁଥିବାଏଭଳି ଗରମରୁ ପଙ୍ଖା କିମ୍ବା କୁଲର୍‌ ମଧ୍ୟ ତ୍ରାହି ଦେବାରେ ସମର୍ଥ ହେବେ ନାହିଁ। ଜାଣନ୍ତୁ, ଏଭଳି ପରିସ୍ଥିତିରେ ଆପଣ ନିଜକୁ କେମିତି ରକ୍ଷା କରିବେ….
ପ୍ରବଳ ଗରମରୁ ଏମିତି ବଞ୍ଚାନ୍ତୁ ନିଜକୁ: ଜୋର୍‌ ଗରମ ପବନ ବୋହିଲା ବେଳେ ଶରୀରକୁ ସମ୍ପୂର୍ଣ୍ଣ ଭାବେ ଢାଙ୍କନ୍ତୁ। ଚପଲ କିମ୍ବା ଜୋତା ପିନ୍ଧି ବାହାରକୁ ଯାଆନ୍ତୁ। ଖାଲି ପେଟ ବା କିଛି ନ ଖାଇ ବାହାରକୁ ଯାଆନ୍ତୁ ନାହିଁ। ବହୁ ସମୟ ଖରାରେ ରୁହନ୍ତୁ ନାହିଁ। ଯଦି ଅଧିକ ଝାଳ ବୋହୁଛି ତା’ହେଲେ ତୁରନ୍ତ ଥଣ୍ଡା ପାଣି ପିଅନ୍ତୁ ନାହିଁ। ଗରମ ଓ ଅଧିକ ଖାଦ୍ୟ ଖାଆନ୍ତୁ ନାହିଁ, ଏହା ଦ୍ୱାରା ଶରୀରରେ ଉତ୍ତାପ ବଢ଼ିଥାଏ। ବାହାରକୁ ବାହାରିଲା ବେଳେ କଳା ରଙ୍ଗ ଛାଡ଼ି ଅନ୍ୟ ହାଲୁକା ରଙ୍ଗର ଛତା ବ୍ୟବହାର କରନ୍ତୁ। ପିଲାମାନଙ୍କୁ ଓ ଗୃହପାଳିତ ପଶୁଙ୍କୁ ଗାଡ଼ିରେ ଛାଡ଼ନ୍ତୁ ନାହିଁ। ଜିମ୍‌ ନ ଯିବା ଭଳି ସ୍ଥିତି ଦେଖା ଦେଲେ ଘରେ ରହି ବ୍ୟାୟାମ ବା ଯୋଗାସନ କରନ୍ତୁ। ଦିନସାରା ୧୦-୧୨ ଗ୍ଲାସ୍‌ ପାଣି ନିଶ୍ଚୟ ପିଅନ୍ତୁ। ଦିନରେ ୨ ଥର ଥଣ୍ଡା ପାଣିରେ ଗାଧାନ୍ତୁ।

ବଚ୍ଚନ ଦମ୍ପତିଙ୍କ ସମ୍ପତ୍ତି ପରିମାଣ ୧୦୦୦ କୋଟି

ଲକ୍ଷ୍ନୌ : ବଲିଉଡ ଅଭିନେତା ଅମିତାଭ ବଚ୍ଚନ ଓ ତାଙ୍କର ପତ୍ନୀ ଜୟା ବଚ୍ଚନଙ୍କ ମୋଟ ସମ୍ପତ୍ତିର ପରିମାଣ ୧୦୦୦ କୋଟି ଟଙ୍କା ବୋଲି ଜଣାପଡିଛି। ଏଥିମଧ୍ୟରୁ ଜୟାଙ୍କ ସ୍ଥାବର ଓ ଅସ୍ଥାବର ସମ୍ପତ୍ତିର ପରିମାଣ ୪୯୩ କୋଟି ଟଙ୍କା। ଆଗାମୀ ରାଜ୍ୟସଭା ନିର୍ବାଚନ ନିମନ୍ତେ ଜୟା ପ୍ରାର୍ଥିପତ୍ର ଦାଖଲ ସମୟରେ କରିଥିବା ସତ୍ୟପାଠରୁଏହି ତଥ୍ୟ ମିଳିଛି। ଯଦି ଜୟା ଏଥର ରାଜ୍ୟସଭାକୁ ନିର୍ବାଚିତ ହେବେ, ତାହାହେଲେ ସେ ସବୁଠରୁ ଧନୀ ସାଂସଦଙ୍କ ମାନ୍ୟତା ଲାଭ କରିବେ। ଅମିତାଭ-ଜୟାଙ୍କ ନାମରେ ଥିବା ସ୍ଥାବର ସମ୍ପତ୍ତି ପରିମାଣ ୪୬୦ କୋଟି ଓ ଅସ୍ଥାବର ସମ୍ପତ୍ତି ମୂଲ୍ୟ ୫୪୦ କୋଟି ଟଙ୍କା। ଅସ୍ଥାବର ସମ୍ପତ୍ତି ମଧ୍ୟରେ ୯ ଲକ୍ଷ ଟଙ୍କାର ଏକ କଲମ, ୫୧ ଲକ୍ଷ ଟଙ୍କା ମୂଲ୍ୟର ଘଣ୍ଟା ଇତ୍ୟାଦି ରହିଛି ବୋଲି ଜୟା ସତ୍ୟପାଠରେ ଦର୍ଶାଇଛନ୍ତି। ଅମିତାଭଙ୍କ ନିକଟରେ ଥିବା ବିଭିନ୍ନ ଘଣ୍ଟାର ମୂଲ୍ୟ ୩.୪ କୋଟି ଟଙ୍କା ବୋଲି ସତ୍ୟପାଠରୁ ଜଣାପଡିଛି। ମୁମ୍ବଇ, ଭୋପାଳ, ନୋଏଡା, ଦିଲ୍ଲୀ, ପୁଣେ, ଅହମଦାବାଦ ଓ ଗାନ୍ଧିନଗରରେ ବଚ୍ଚନ ଦମ୍ପତିଙ୍କର ଏକାଧିକ ବିଳାସପୂର୍ଣ୍ଣ ବଙ୍ଗଳା ଓ ଫ୍ଲାଟ ଥିବାବେଳେ ସେମାନେ ଫ୍ରାନ୍ସର ବ୍ରିଗ୍‌ନୋଗାନ ପ୍ଲେଗ୍‌ରେ ୩୧୭୫ ବର୍ଗ ମିଟର ଜମି ମଧ୍ୟ କିଣିଛନ୍ତି। ଉତ୍ତର ପ୍ରଦେଶର ବାରାବାଙ୍କି ଜିଲା ଅନ୍ତର୍ଗତ ଦୌଲତପୁରରେ ଅମିତାଭଙ୍କ ନାମରେ ଥିବା ତିନି ଏକର ଜମିର ମୂଲ୍ୟ ୫.୭ କୋଟି ଟଙ୍କା ଓ ଲକ୍ଷ୍ନୌର କାକୋରି ଅଞ୍ଚଳରେ ଜୟାଙ୍କ ନାମରେ ଥିବା ୧.୨୨ ହେକ୍ଟର ଚାଷଜମିର ମୂଲ୍ୟ ୨.୨ କୋଟି ଟଙ୍କା ବୋଲି ସତ୍ୟପାଠରୁ ଜଣାପଡିଛି। ଜୟା ସମାଜବାଦୀ ପାର୍ଟି ପ୍ରାର୍ଥୀଭାବେ ଚତୁର୍ଥ ଥର ରାଜ୍ୟସଭା ନିର୍ବାଚନ ଲଢିବାକୁ ଯାଉଛନ୍ତି। ୨୦୧୨ ନିର୍ବାଚନ ସମୟରେ ଜୟା ନିଜର ସମ୍ପତ୍ତି ବାବଦରେ ଯେଉଁ ସତ୍ୟପାଠ ଦାଖଲ କରିଥିଲେ, ସେଥିରେ ଦୁଇଗୁଣ ବୃଦ୍ଧି ପାଇଥିବା ଜଣାପଡିଛି।