ହସ୍‌ପିଟାଲ୍‌ରେ ଲାଞ୍ଚ କାରବାର: ଏସ୍‌ଡିଏମ୍‌ଓଙ୍କୁ ବଦଳି, ଆଟେଣ୍ଡାଣ୍ଟ ନିଲମ୍ବିତ..!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର/ବଲାଙ୍ଗୀର) – ମହଙ୍ଗା ପଡ଼ିଲା ହସ୍‌ପିଟାଲ୍‌ ଭିତରେ ଲାଞ୍ଚ କାରବାର। ଜଣେ ଏସ୍‌ଡିଏମ୍‌ଓଙ୍କୁ ବଦଳି କରାଯାଇଥିବା ବେଳେ ଜଣେ ଆଟେଣ୍ଡାନ୍ସଙ୍କୁ ନିଲମ୍ବନ କରାଯାଇଛି। ଘଟଣା ଦୁଇଟି ବଲାଙ୍ଗୀର ଜିଲ୍ଲାର। ପାଟଣାଗଡ଼ ଏସ୍‌ଡିଏମ୍‌ଓ ଡାକ୍ତର ବାଚସ୍ପତି ଦାଶ ଅପରେସନ୍‌ ପାଇଁ ୨୦ ହଜାର ଟଙ୍କା ଲାଞ୍ଚ ମାଗୁଥିବା ଓ କିଛି ଟଙ୍କା ପକେଟରେ ଭର୍ତ୍ତି କରୁଥିବାର ଭିଡିଓ ସାମ୍ନାକୁ ଆସିଥିଲା। ସେହିପରି ଭୀମଭୋଇ ମେଡିକାଲ କଲେଜ ଓ ହସ୍‌ପିଟାଲର ଅସ୍ଥିଶଲ୍ୟ ବିଭାଗ ଓପିଡିର ଆଟେଣ୍ଡାଣ୍ଟ ସଚୀକାନ୍ତ ମିଶ୍ର ଲାଞ୍ଚ ମାଗୁଥିବା ଭିଡିଓ ଭାଇରାଲ ହୋଇଥିଲା। ଏ ଦୁଇଟି ଘଟଣା ସାମ୍ନାକୁ ଆସିବା ପରେ ଜିଲ୍ଲା ସ୍ୱାସ୍ଥ୍ୟ ବିଭାଗ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ବଲାଙ୍ଗିର ସିଡିଏମ୍‌ଓ ଡାକ୍ତର ଭୀମ ସାହୁ କହିଛନ୍ତି, ପାଟଣାଗଡ଼ ଏସଡିଏମଓ ଡାକ୍ତର ବାଚସ୍ପତି ଦାସଙ୍କୁ ବଲାଙ୍ଗିର ଜିଲ୍ଲା ହସପିଟାଲକୁ ବଦଳି କରାଯାଇଛି। ତା’ସହିତ ତାଙ୍କ ବିରୋଧରେ ବିଭାଗୀୟ ତଦନ୍ତ ଆରମ୍ଭ କରାଯାଇଛି। ସେହିପରି ଆଟେଣ୍ଡାଣ୍ଟ ସଚୀକାନ୍ତ ମିଶ୍ରଙ୍କୁ କାର୍ଯ୍ୟରୁ ନିଲମ୍ୱନ କରାଯାଇଛି। 

ସରକାରୀ ପ୍ରକଳ୍ପରେ ବିଜେଡିର ଶଂଖ ଚିହ୍ନ…!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ନିୟମ ରହିଛି କୌଣସି ସରକାରୀ କାମର ଫଳକରେ ଦଳୀୟ ଚିହ୍ନ ଦିଆଯାଇପାରିବ ନାହିଁ । କିନ୍ତୁ ବେଳପଡା ବ୍ଲକ ଧୁମାଭଟା ପଂଚାୟତରେ ନିୟମକୁ ଖୋଲାଖୋଲି ଉଲ୍ଲଘଂନ କରିଛି ଶାସକ ଦଳ ବିଜେଡି । ଧୁମାଭଟା ପଂଚାୟତର ଜଲିଆ ଗାଁର ଜଗନ୍ନାଟ ମନ୍ଦିର ନିକଟରେ ତିନି ଲକ୍ଷ ଟଙ୍କା ବ୍ୟୟରେ କମ୍ୟୁନିଟି ସେଣ୍ଟର ନିର୍ମାଣ କରାଯାଉଛି । ଡିଆରଡିଏ ଦ୍ୱାରା ନିର୍ମାଣ କରାଯାଉଥିବା ସରକାରୀ କାମର  ଫଳକରେ କିନ୍ତୁ ଦଳୀୟ ବିଜେଡିର ଶଙ୍ଖ ଚିହ୍ନ ରହିଛି । ଏପରିକି ବିଜେଡି ମଧ୍ୟ ଲେଖାଯାଇଛି। କେବଳ ଜଲିଆ ନୁହଁ ଧୁମାଭଟା ପଂଚାୟତର ଡାହିମାଲ ଗାଁରେ ସରକାରୀ ଅନୁଦାନରେ  ନିର୍ମାଣ କରାଯାଇଥିବା ଗ୍ରାମପତୀ ଠାକୁରାଣୀ ମନ୍ଦିରର  କମ୍ୟୁନିଟି ସେଣ୍ଟରରେ ମଧ୍ୟ ଦଳୀୟ ବିଜେଡି ଚିହ୍ନ ଏବଂ  ବିଜେଡି ଲେଖାଯାଇଛି । ସରକାରୀ ଅନୁଦାନରେ ବିଜେଡି ଠିକାଦାର ମାନେ ନିଜ ଦଳର ପ୍ରଚାର ପାଇଁ ଏପରି କରୁଥିବା ସନ୍ଦେହ କରୁଛନ୍ତି ସ୍ଥାନୀୟ ଲୋକେ । ଶୀଘ୍ର ସରକାରୀ କାମର ନାମଫଳକରୁ ଦଳୀୟ ଚିହ୍ନ ହଟାଇବା ପାଇଁ ବେଳପଡା ବ୍ଲକ ପ୍ରଶାସନକୁ ଅନୁରୋଧ କରିଛନ୍ତି ସ୍ଥାନୀୟ ସମାଜସେବୀ ଅଚ୍ୟୁତ ସିପୁନ ଖମାରୀ । ସେ କହିଛନ୍ତି ସରକାରୀ ପ୍ରକଳ୍ପରେ ଦଳୀୟ ଚିତ୍ର ରହିବା ଗଣତନ୍ତ୍ର ପ୍ରତି ଅଶୋଭନୀୟ। ତେବେ ଏନେଇ ବେଳପଡା ବିଡିଓଙ୍କ ମତାମତ ମିଳିପାରିନାହିଁ ।

ପର୍ଯ୍ୟଟନ ମନ୍ତ୍ରୀଙ୍କୁ କଣ ହୋଇଛି ? କଣ ପାଇଁ ଯାଇଥିଲେ ମେଡିକାଲ୍‌ ।

ଏଥର ସମ୍ଭାଳ ବ୍ୟୁରୋ (ବଲାଙ୍ଗିର): ରାଜ୍ୟ ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀଙ୍କୁ କଣ ହୋଇଛି? ସେ ବଲାଙ୍ଗିରରେ ପର୍ଯ୍ୟଟନ କାର୍ଯ୍ୟାଳୟ ପାଇଁ ଜମି ଚିହ୍ନଟ କରିବାକୁ ଯାଇ ଅଚାନକ ମେଡିକାଲ୍‌ରେ ପହଞ୍ଚି ଥିଲେ। ସାଧାରଣ ରୋଗୀଙ୍କ ପରି ଧାଡ଼ିରେ ଠିଆ ହୋଇ ଟୋକନ୍‌ କାଟି ଆଉଟ୍‌ଡୋର୍‌ରେ ଡାକ୍ତରଙ୍କୁ ଦେଖାଇଥିଲେ। ବାମ କହୁଣୀରେ ଯନ୍ତ୍ରଣା ହେଉଥିବାରୁ ସେ ମେଡିକାଲ୍‌ରେ ଡାକ୍ତରଙ୍କୁ ଦେଖାଇଥିଲେ।

ପର୍ଯ୍ୟଟନ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ବଲାଙ୍ଗିର ଗସ୍ତରେ ଯାଇଥିଲେ। ଏହି ସମୟରେ ସେ ପର୍ଯ୍ୟଟନ କାର୍ଯ୍ୟାଳୟ ପାଇଁ ଜମି ଚିହ୍ନଟ କରିବା ସହିତ ବିଭିନ୍ନ ପର୍ଯ୍ୟଟନ ସ୍ଥଳ ବୁଲିବାର କାର୍ଯ୍ୟକ୍ରମ ଥିଲା। କିନ୍ତୁ ଆଜି ଭାରତ ବନ୍ଦ ଡାକରା ହୋଇଥିବାରୁ ସେ ସରକାରୀ କାର୍ଯ୍ୟ କରିପାରିଲେ ନାହିଁ। ତେଣୁ ସେ ବଲାଙ୍ଗିର ଭୀମଭୋଇ ମେଡିକାଲ କଲେଜକୁ ସରପ୍ରାଇଜ୍‌ ଭିଜିଟ୍‌ କରିବା ପାଇଁ ଯିବାକୁ ସ୍ଥିର କଲେ।

ମେଡିକାଲ୍‌ରେ ‘ମୋ ସରକାର କେମିତି ଚାଲିଛି’ ସେ ସମ୍ପର୍କରେ ଜାଣିବା ପାଇଁ ମନ୍ତ୍ରୀ ଶ୍ରୀ ପାଣିଗ୍ରାହୀ ଅଚାନକ ମନିଂୱାକ୍‌ ଡ୍ରେସ୍‌ରେ ବାଇକରେ ଯାଇ ମେଡିକାଲରେ ପହଞ୍ଚିଥିଲେ। ପରେ ରୋଗୀଙ୍କ ପରି ଲାଇନ୍‌ରେ ଛିଡା ହୋଇ କାଉଣ୍ଟରରୁ ଟିକେଟ କାଟିଲେ। ତା’ପରେ ସେ ଆଉଟ୍‌ଡୋରରେ ଡାକ୍ତରଙ୍କରେ ସ୍ୱାସ୍ଥ୍ୟ ପରୀକ୍ଷା କରାଇଥିଲେ। ଡାକ୍ତରଙ୍କ ପରାମର୍ଶ ନେଇ ସେ ଏକ୍ସ-ରେ ରୁମ୍‌ ଭିତରକୁ ଯାଇଥିଲେ। ସେଠାରେ ଲାଇନ୍‌ରେ ଛିଡା ହୋଇ ଏକ୍ସ-ରେ କରିଥିଲେ। ମେଡିକାଲ୍‌ରେ କେମିତି ରୋଗୀ ସେବା ଦିଆଯାଉଛି? ସେ ସମ୍ପର୍କରେ ଜାଣିବା ପାଇଁ ମନ୍ତ୍ରୀ କିଛି ରୋଗୀ ଓ ତାଙ୍କ ସମ୍ପର୍କୀୟଙ୍କ ସହିତ ଆଲୋଚନା କରିଥିଲେ। ଏହି ସମୟରେ ମନ୍ତ୍ରୀ ସକାରାତ୍ମକ ଉତ୍ତର ପାଇଛନ୍ତି। ପରେ ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ର ହସ୍ପିଟାଲରେ ପହଞ୍ଚିଥିଲେ।

ସେ କହିଛନ୍ତି-“ଦୁଇ ମାସ ତଳେ ଗାଡ଼ିରେ ବାମ ହାତ କହୁଣୀରେ ମାଡ଼ ହୋଇଯାଇଥିଲା। ସେଥିପାଇଁ ଯନ୍ତ୍ରଣା ହେଉଛି। ଏଥିରୁ ଉପଶମ ପାଇଁ ଆଜି ମୁଁ ମେଡିକାଲ୍‌ ଯାଇଥିଲି। ଅନ୍ୟ ରୋଗୀଙ୍କ ପରି ଲାଇନ୍‌ରେ ଛିଡ଼ା ହୋଇ ଟୋକନ୍‌ କଲି। ପରେ ଡାକ୍ତରଙ୍କୁ ଦେଖାଇ ଏକ୍ସ-ରେ କଲି।”

ଶୋଚନୀୟ ହୋଇପଡ଼ିଛି ରାସ୍ତା, ଜିଲ୍ଲାପାଳ ନୀରବ ଦ୍ରଷ୍ଟା ; ବିଧାୟକ ଦୃଷ୍ଟି ଦେବାକୁ ଲୋକଙ୍କ ଦାବୀ …!

!!! ପଶ୍ଚିମ ଓଡିଶା ମୁଖ୍ୟ ଏମ୍. ଶ୍ରୀକାନ୍ତ କୁମାର ଙ୍କ ରିପୋର୍ଟ !!!

ଏଥର ସମ୍ଭାଳ (ବଲାଙ୍ଗୀର/ପାଟଣାଗଡ଼) – ପାଟଣାଗଡରୁ ଖପ୍ରାଖୋଲକୁ ସଂଯୋଗ କରୁଥିବା ରାଜ୍ୟ ରାଜପଥର ବାଲିପଟା ବସ ଷ୍ଟାଣ୍ଡରୁ ବାଙ୍କିବାହାଲ ବସଷ୍ଟାଣ୍ଡ ପର୍ଯ୍ୟନ୍ତ 7 କିଲୋମିଟର ରାସ୍ତା ଏବେ ମରଣଯନ୍ତା ପାଲିଟିଛି । ବାଇକ୍ ପାସ କରିବାକୁ 7 କିମି ରାସ୍ତାକୁ 30ମିନିଟ୍ ଲାଗୁଛି । ରାସ୍ତାଟି ଆଜିକି 4ବର୍ଷ ହେଲା ଏମିତି ଅଛି । ଏରାସ୍ତା ଉପରେ ଦିନକୁ ଶହଶହ ଭାରିଯାନ, ବାଇକ ବସ ଭଳି ଅନେକ ଗାଡି ଯାତାୟତ କରୁଛି ଓ ପ୍ରତିଦିନ ଅନେକ ସ୍କୁଲ ଓ କଲେଜ ଛାତ୍ରଛାତ୍ରୀ ମଧ୍ୟ ଏହି ରାସ୍ତା ଦେଇ ଯିବା ଆସିବା କରୁଛନ୍ତି । ଜରୁରୀ ସମୟରେ ଠିକ ସମୟରେ ପହଞ୍ଚିବା ହୋଇପାରୁନି ।ଏହି ରାସ୍ତା ଦେଇ ଜିଲ୍ଲାପାଳ , ମନ୍ତ୍ରୀ , ନେତା, ଯାଉଥିବା ବେଳେ ଏସୁବୁ ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହୋଇନାହିଁ କାହିଁକି ବୋଲି ଲୋକଙ୍କ ଭିତରେ ଚର୍ଚା ?ଏଥିପାଇଁ ଜିଲ୍ଲାପ୍ରଶାସନ ଏବଂ ପୁର୍ତ୍ତବିଭାଗ ବେଳ ଥାଉଣୁ ଏହିରୋଡର ତୁରନ୍ତ ସମାଧାନ କରି ରାସ୍ତା ମରାମତି କରିବା ପାଇଁ ସାଧାରଣରେ ଦାବି ହେଉଛି। ପାଟଣାଗଡ ବିଧାୟକ ଶ୍ରୀ ସରୋଜ ମେହେର ଏହି ସମସ୍ୟା ଉପରେ ଦୃଷ୍ଟି ଦେବେ ବୋଲି ଲୋକମାନେ ଦୃଢ ଆଶାପୋଷଣ କରିଛନ୍ତି | ରାସ୍ତାମରାମତି ହେଲେ ସାଧାରଣ ଲୋକେ ଉପକୃତ ହୋଇପାରିବେ ବୋଲି ସାଧାରଣରେ ମତପ୍ରକାଶ ପାଉଛି |

ଦିବ୍ୟାଙ୍ଗଙ୍କୁ ଉପହାସ, ପରିବାରକୁ ମିଳୁନି ମୌଳିକ ସୁବିଧା ; ମୋ ସରକାରର ସୁଫଳ ପାଇବା ପାଇଁ ଅପେକ୍ଷା ଦିବ୍ୟାଙ୍ଗ ବିଶ୍ୱନାଥ…!

!!! ପଶ୍ଚିମ ଓଡ଼ିଶା ମୁଖ୍ୟ ଏମ୍. ଶ୍ରୀକାନ୍ତ ଙ୍କ ରିପୋର୍ଟ୍ !!!

ଏଥର ସମ୍ଭାଳ (ବଲାଙ୍ଗୀର/ତୁରେକେଲା) – ଦିବ୍ୟାଙ୍ଗଙ୍କୁ ସମାଜର ମୁଖ୍ୟସ୍ରୋତରେ ସାମିଲ କରିବା ପାଇଁ ସରକାର କରୁଛନ୍ତି ଅନେକ ଯୋଜନା । ନିଜକୁ କୌଣସିଥିରେ କମ୍ ନଭାବି ଆଗକୁ ବଢିବେ, ଅନ୍ୟମାନଙ୍କ ସହ ତାଳ ମିଶାଇ ଚାଲିବେ । କିନ୍ତୁ ସରକାରଙ୍କ ଏହି ଯୋଜନା କେତେ ଯେ ଫଳପ୍ରଦ ଅନେକ ସମୟରେ ଆମେ ଦେଖିଥାଉ । ବାସ୍ତବ ଚିତ୍ର ଭିନ୍ନ । ହିତାଧିକାରୀ ପାଇନଥାନ୍ତି ସହାୟତା । ପୁଣି ଥରେ ସରକାରଙ୍କ ଯୋଜନାର ବିଫଳ ଚିତ୍ର ଆସିଛି ତୁରେକେଲାରୁ ।ବଲାଙ୍ଗୀର ଜିଲ୍ଲା ତୁରେକେଲା ବ୍ଲକ ଅନ୍ତର୍ଗତ କୁଇବାହାଲ ପଞ୍ଚାୟତର ସଦର ଗାଁ । ଏହି ଗାଁରେ ରୁହନ୍ତି ଭାଗିରଥି ଚନ୍ଦନଙ୍କ ପରିବାର । ପରିବାର କହିଲେ ସ୍ୱାମୀ ସ୍ତ୍ରୀ ଓ ଗୋଟିଏ ପୁଅ ଏବଂ ଝିଅ । ପୁଅ ବିଶ୍ୱନାଥ ଭିନ୍ନକ୍ଷମ | ତେଣୁ ନିଜ ପେଟକୁ ଦୁଇମୁଠା ଖାଇବା ଯୋଗାଡ କରିବା କଷ୍ଟକର ହୋଇପଡୁଥିବା ବେଳେ ଦିବ୍ୟାଙ୍ଗ ପୁଅର ଚିକିତ୍ସା ଖର୍ଚ୍ଚ ତାଙ୍କ ପାଇଁ ବୋଝ ପାଲଟିଛି । ସହାୟତା ପାଇଁ ପ୍ରଶାସନ ନିକଟରେ ବାରମ୍ବାର ଗୁହାରି ଜଣାଇଥିଲେ ମଧ୍ୟ କୌଣସି ସହାୟତା ମିଳୁନି । ତେଣୁ ମୁଣ୍ଡରେ ହାତ ଦେଇଛନ୍ତି ଭାଗିରଥି । ସେପଟେ ଏନେଇ ଆମ ପ୍ରତିନିଧି ତୁରେକେଲା ବିଡିଓଙ୍କୁ ଯୋଗାଯୋଗ କରିଥିଲେ ମଧ୍ୟ ସେ କୌଣସି ମତାମତ ଦେଇନାହାନ୍ତି । ସେହିପରି ଗାଁ ସରପଞ୍ଚ ଖୁବ୍ ଶୀଘ୍ର ଏହି ପରିବାରକୁ ଥଇଥାନ କରାଯିବ ବୋଲି ସୂଚନା ଦେଇଛନ୍ତି ।ତାଙ୍କୁ ଶୀଘ୍ର ଭିନ୍ନକ୍ଷମ ଭତ୍ତା ଯୋଗେଇଦେବା ସହ ଏକ ହୁଇଲ ଚେୟାର ଯୋଗେଇ ଦେବା ନିମନ୍ତେ ସରକାର ତଥା ପ୍ରଶାସନକୁ ଆମ ଶାସକପ୍ରଶାସକ ପରିବାର ତରଫରୁ ବିନମ୍ର ନିବେଦନ | ସେପଟେ ଭାଗିରଥିଙ୍କ ପରିବାର ପାଇଁ ସରକାରୀ ସହାୟତା ସାତ ସପନ । କେତେବେଳ ସେମାନଙ୍କ ଦୁଃଖ ଦୂର ହେବ, ଏହି ପରିବାର ଚାହିଁବସିଛନ୍ତି ।

ମୁଖ୍ୟମନ୍ତ୍ରୀ ରାଜନୀତି କରିବାକୁ ଚାହିଁଲେ, ପଶ୍ଚିମ ଓଡିଶାର ବିକାଶ ଚାହିଁଲେ ନାହିଁ :ଧର୍ମେନ୍ଦ୍ର ପ୍ରଧାନ

ଏଥର ସମ୍ଭାଳ ବ୍ୟୁରୋ (ବଲାଙ୍ଗୀର) – ଓଡିଶାର ବିକାଶ ପାଇଁ କେନ୍ଦ୍ର ସରକାର ସଂକଳ୍ପବଦ୍ଧ । କିନ୍ତୁ ବିକାଶରେ ଓଡିଶାସରକାର ବାଧକ ସାଜିଛନ୍ତି । ଯାହାଦ୍ୱାରା ଓଡିଶାର ବିକାଶ କାମ ହୋଇପାରୁନାହିଁ । ପ୍ରଧାନମନ୍ତ୍ରୀ ପଶ୍ଚିମ ଓଡିଶାକୁଆସିଥିବା ବେଳେ ଏହ ଅବସରରେ ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ ସତ୍ୱେ ସେ ଆସିଲେ ନାହିଁ । ଗତ ଥର ବାରିପଦାକୁ ମଧ୍ୟ ଆସିନଥିଲେ । ଦୁଃଖର ବିଷୟ ମୁଖ୍ୟମନ୍ତ୍ରୀ ରାଜନୀତି କରିବାକୁ ଚାହିଁଲେ, ପଶ୍ଚିମ ଓଡିଶାର ଉନ୍ନତି ଚାହିଁଲେ ନାହିଁ ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି । ଦେଶର ପ୍ରଧାନମନ୍ତ୍ରୀ ଆସିଥିବା ବେଳେ ମୁଖ୍ୟମନ୍ତ୍ରୀ ଆଜି ଭୁବନେଶ୍ୱରରେ କୃଷକମାନଙ୍କ ନାଁରେ କୁମ୍ଭୀର କାନ୍ଦଣା କାନ୍ଦିବା ପାଇଁ ବ୍ୟବସ୍ଥା କଲେ ।

ବଲାଙ୍ଗୀରରେ ପ୍ରଧାନମନ୍ତ୍ରୀଙ୍କର ଗସ୍ତ ଅବସରରେ ଆୟୋଜିତ ଏକ ବିଶାଳ ଜନସଭାରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ଚେଇଁ ଶୋଇଥିବ ଯିଏ ତାକୁ ଉଠାଇବ କିଏ । ବିକାଶ ପାଇଁ ସମସ୍ତଙ୍କର ସହଯୋଗ ଦରକାର । ତେବେ ରାଜ୍ୟର ବିକାଶ କଥାକୁ ଆଖି ବୁଜି ଦେଇ ମୁଖ୍ୟମନ୍ତ୍ରୀ ରାଜନୀତି କରୁଛନ୍ତି । ବଲାଙ୍ଗୀରର ମାଟି ଐତିହ୍ୟସମ୍ପନ୍ନ, ସଂସ୍କୃତିଭରା ଓ ପରମ୍ପରାର ମାଟି । ଏ ମାଟି କେବଳ ଇତିହାସକୁ ମନେପକାଏ ନାହିଁ, ସମୟର ଆବଶ୍ୟକତାକୁ ପୂରଣା କରିବା ପାଇଁ ଆହ୍ୱାନକୁ ବି ସ୍ୱୀକାର କରୋ କିଛି ମାସ ପୂର୍ବେ ଛତିଶଗଡର ବିଧାନସଭା ନିର୍ବାଚନ ଅବସରରେ ଏ ମାଟିର ବରପୂତ୍ର ଦୂରଦର୍ଶନ କ୍ୟାମେରା ମ୍ୟାନ ସ୍ୱର୍ଗତ ଅଚ୍ୟୁତାନନ୍ଦ ସାହୁ ଆତାତୀୟୀଙ୍କ ଗୁଳିରେ ପ୍ରାଣ ହରାଇ ଦେଶ ପାଇଁ ଶହୀଦ ହୋଇଥିଲେ । ଏମାଟି ତାଙ୍କର ବଳିଦାନକୁ ଅନ୍ୟଥା ହେବାକୁ ଦେବ ନାହିଁ । ଯେଉଁମାନେ ବନ୍ଧୁକ ମୁନରେ ଦେଶର ପ୍ରଜାତନ୍ତ୍ରକୁ ଦୂରେଇବା ପାଇଁ ଚାହଁଛନ୍ତି ତାଙ୍କୁ ଏହି ବଳିଦାନ ଉଚିତ ଜବାବ ଦେବ । ପ୍ରଧାନମନ୍ତ୍ରୀ ପର୍ବଦୋୟର ବାର୍ତାକୁ ନେଇ ଆସୁଛନ୍ତି । ଭାରତ ଦେଶ ଏକ ଅଗ୍ରଣୀ ଦେଶ । ଭାରତ ବଷର୍ର ସବୁ ଅଂଚଳ ସମତୁଲ ବିକଶିତ ହେଲେ, ଭାରତର ବିକାଶ ହେବ । ପୂର୍ବ ଭାରତ ବିକଶିତ ହେଲେ ଦେଶର ବିକାଶ ହୋଇପାରିବ । ସ୍ୱାଧୀନତାର ୭୦ ବର୍ଷ ପରେ ପୂର୍ବ ଭାରତର ବିକାଶ ହୋଇପାରିନଥିବାରୁ ଏହା ଅନେକ ସମସ୍ୟାରେ ଜର୍ଜରିତ ଅବସ୍ଥାରେ ଅଛି । ସେଥିପାଇଁ ପ୍ରଧାନମନ୍ତ୍ରୀ ବିଗତ ୩୦ ଦିନରୁ କମ ମଧ୍ୟରେ ପବିତ୍ର ପୂଷପୁନୀ ଅବସରରେ ପୂର୍ବ ଭାରତର ସଙ୍କଳ୍ପକୁ ନେଇ ଉପହାର ଦେବାକୁ ଆସିଛନ୍ତି ।

ବଲାଙ୍ଗୀର, ବରଗଡରେ ଶିଳ୍ପ ହେଉ । ବଲାଙ୍ଗୀରରେ ହଜାର କୋଟି ଟଙ୍କା ବ୍ୟୟ କରି ନଡା ରୁ ପେଟ୍ରୋଲ ବାହାର କରିବାର ବିକଳ୍ପ ପ୍ରକଳ୍ପ ମୋଦି ସରକାର କରିଛନ୍ତି । ଯୁବକଙ୍କୁ ରୋଜଗାର ଦେବା ଓ ଚାଷୀର ଅର୍ଥନୀତିକୁ ସୁଦୃଢ କରିବା ପାଇଁ ଏ ପ୍ରକଳ୍ପ ଆରମ୍ଭ ହୋଇଛି । ବାଲାଙ୍ଗୀରରେ ୧୦୦ କୋଟି ଟଙ୍କାର ବଟଲିଂ ପ୍ଲାଂଟ ଆରମ୍ଭ ହୋଇଛି । ବରଗଡରୁ ରାୟପୁର ପର୍ଯ୍ୟନ୍ତ ଦୂରତାକୁ ଛୋଟ କରିବା ପାଇଁ, ବରଗଡରୁ ବିଜେପୁର, ପଦ୍ମପୁର -ନୂଆପଡା ପର୍ଯ୍ୟନ୍ତ ରେଳ ଲାଇନର ସର୍ଭେ କାମ ହୋଇଛି । ଖୁବ ଶୀଘ୍ର ଏ ଅଂଚଳରେ କାମ ଆରମ୍ଭ ହେବ । ଏହା ମୋଦୀ ସରକାରଙ୍କ ପୁଷପୁନୀର ଉପହାର ।

ବଲାଙ୍ଗୀର ଜିଲ୍ଲାରେ ୧୯ ବର୍ଷର ଶାସନରେ ଚାଷ ଜମିରେ ଜଳସେଚନ ନାହିଁ । ତଥ୍ୟନୁଯାଇ ଗତ ୨୦ ବର୍ଷ ଭିତରେ ୫ରୁ ୧୦ ପ୍ରତିଶତ ଅଂଚଳ ଜଳସେଚନ ହୋଇଛି । ଲୋଏର ସୁକତେଲ ପ୍ରକଳ୍ପ ର କାମ ୧୫ ବର୍ଷ ହେଲା ଚାଲିଛି କିନ୍ତୁ ସମ୍ପୂର୍ଣ୍ଣ ହୋଇପାରୁନି । ୩୦ ବର୍ଷ ଏ ଅଂଚଳକୁ ଅଣଦେଖା ରଖାଯାଇଛି । ବଲାଙ୍ଗୀର ଜିଲ୍ଲାର ପ୍ରକଳ୍ପ ପାଇଁ କ୍ରିୟାନ୍ୱୟନ କରିବା ପାଇଁ ୩୦ ବର୍ଷ ଲାଗୁଛି । ମାଲକାନାଗିରି ରୁ ସୁନ୍ଦରଗଡ ପର୍ଯ୍ୟନ୍ତ ଓଡିଶାରେ ୧୫ଟି ଜିଲ୍ଲାରେ ବର୍ତମାନ ୨୫୦୦ କିମିର ଜାତୀୟ ରାଜପଥ ରହିଛି । ମୋଦି ସରକାର ଏଥିରେ ଆଉ ୧୭୬୭ କିଲୋମିଟର ରାସ୍ତା ଯୋଡିବା ପାଇଁ ସମସ୍ତ ପ୍ରକାର ବ୍ୟବସ୍ଥା କରିଛନ୍ତି । ମାତ୍ର ରାଜ୍ୟ ସରକାର ବିଭିନ୍ନ ଅନୁମତି ନଦେଇ ବିକାଶର ଏତେବଡ କାମକୁ ଜାଣିଶୁଣି ଅଟକାଇ ରଖିବା ଦୁର୍ଭାଗ୍ୟଜନକ ବୋଲି ଶ୍ରୀ ପ୍ରଧାନ କହିଛନ୍ତି । ଖୋର୍ଦ୍ଧା – ବଲାଙ୍ଗୀର ରେଳ ଲାଇନ୍ ପାଇଁ ରାଜ୍ୟ ସରକାର ଜମି ଦେଇନାହାନ୍ତି । ହକି ବିଶ୍ୱକପରେ ସଲମାନ ଓ ଶାହରୁଖ ଖାଁକୁ ନଚାଇବା ପାଇଁ ପଇସା ଅଛି କିନ୍ତୁ ଶିକ୍ଷକଙ୍କ ପାଇଁ ପଇସା ନାହିଁ । ପ୍ରଧାନମନ୍ତ୍ରୀଙ୍କ ସ୍ୱପ୍ନ ନୂଆ ଭାରତ ତିଆରି ହେବ । ନୂଆ ଓଡିଶା ହେଲେ ନୂଆ ଭାରତ ହେବ । ଓଡିଶାର ବିକାଶରେ ରାଜ୍ୟ ସରକାର ବାଧକ ସାଜିଛନ୍ତି ବୋଲି ଶ୍ରୀ ପ୍ରଧାନ କହିଛନ୍ତି ।

ବଲାଙ୍ଗୀରରେ ୧୫୪୫ କୋଟି ଟଙ୍କାର ବିଭିନ୍ନ ପ୍ରକଳ୍ପର ଉଦ୍ଘାଟନ, ଶିଳାନ୍ୟାସ କଲେ ପ୍ରଧାନମନ୍ତ୍ରୀ

ଏଥର ସମ୍ଭାଳ ବ୍ୟୁରୋ (ବଲାଙ୍ଗୀର) – ବଲାଙ୍ଗୀରରେ ୧୫୪୫ କୋଟି ଟଙ୍କାର ବିଭିନ୍ନ ପ୍ରକଳ୍ପର ଉଦ୍ଘାଟନ, ଶିଳାନ୍ୟାସ କଲେ ପ୍ରଧାନମନ୍ତ୍ରୀ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଦିନିକିଆ ସଂକ୍ଷିପ୍ତ ଓଡ଼ିଶା ଗସ୍ତରେ ଆସି ୧୫୦୦ କୋଟି ଟଙ୍କାର ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଲୋକାର୍ପଣ କରିଛନ୍ତି । ଏହିସବୁ ପ୍ରକଳ୍ପ ଶିକ୍ଷା, ସଂସ୍କୃତି, ରେଳପଥ, ଭିତିଭୂମି ଏବଂ ସହଜ ଜୀବନଧାରଣ ସଂକ୍ରାନ୍ତ କାର୍ଯ୍ୟକ୍ରମ ଅନ୍ତର୍ଭୁକ୍ତ ।

ମଙ୍ଗଳବାର ପୂର୍ବାହ୍ନରେ ପ୍ରଧାନମନ୍ତ୍ରୀ ବଲାଙ୍ଗୀରଠାରେ ଏକ ସରକାରୀ କାର୍ଯ୍ୟକ୍ରମରେ ଯୋଗଦେଇ ଆନୁଷ୍ଠାନିକ  ଭାବେ ଝାରସୁଗୁଡ଼ା ବହୁମୁଖୀ ଲଜିଷ୍ଟିକ୍ ପାର୍କ, ଝାରସୁଗୁଡ଼ା-ବିଜୟନଗରମ୍ ରେଳଲାଇନ୍ ଏବଂ ସମ୍ବଲପୁର-ଅନୁଗୋଳ ରେଳ ଲାଇନ୍ର ବିଦୁ୍ୟତିକରଣ, ବରପାଲି-ଡୁଙ୍ଗୁରିପାଲି ଏବଂ ବଲାଙ୍ଗୀର-ଦେଓଗାଁ ରେଳପଥର ଦୋହରୀକରଣ ତଥା ଥେରୁବାଲି- ସିଙ୍ଗାପୁରରୋଡ ଷ୍ଟେସନ ମଧ୍ୟରେ ୫୮୮ ନମ୍ବର ବ୍ରିଜ୍ର ଲୋକାର୍ପଣ କରିଛନ୍ତି । ସେହିଭଳି ସୁବର୍ଣ୍ଣପୁରଠାରେ ଏକ କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା  ଲାଗି ନିର୍ମାଣ କାର୍ଯ୍ୟର ଆଧାରଶିଳା ରଖିଛନ୍ତି ।ଏହାଛଡ଼ା ରାୟଗଡ଼ାସ୍ଥିତ କେନ୍ଦ୍ରୀୟ ବିଦ୍ୟାଳୟ, ବଲାଙ୍ଗୀର-ବିଛୁପାଲି ସେକ୍ସନ ରେଳଲାଇନ୍, ବଲାଙ୍ଗୀର-ବିଛୁପାଲି ମଧ୍ୟରେ ନୂତନ ରେଳ ଚଳାଚଳକୁ ପତାକା ଦେଖାଇ ଶୁଭାରମ୍ଭ କରିଛନ୍ତି । ସେହିଭଳି ବରଗଡ଼, ବଲାଙ୍ଗୀର, ଜଗତସିଂହପୁର, କେନ୍ଦ୍ରାପଡ଼ା, ଫୁଲବାଣୀ ଏବଂ ପୁରୀ ଡାକଘରଗୁଡ଼ିକରେ ପାସ୍ପୋର୍ଟ ସେବାକେନ୍ଦ୍ରର ଶୁଭ ଉଦ୍ଘାଟନ କରିଛନ୍ତି । ଅଧିକନ୍ତୁ, ପ୍ରଧାନମନ୍ତ୍ରୀ ଏହି ଗସ୍ତକ୍ରମରେ କେତେକ ସାଂସ୍କୃତିକ ମହତ୍ୱ ବହନ କରୁଥିବା ପ୍ରକଳ୍ପକୁ ମଧ୍ୟ ଉଦ୍ଘାଟନ କରିଛନ୍ତି । ସେଥିମଧ୍ୟରେ ରହିଛି – ବୌଦ୍ଧ ଜିଲ୍ଲାର ନୀଳମାଧବ ଓ ସିଦେ୍ଧଶ୍ୱର ମନ୍ଦିର ଏବଂ ପଶ୍ଚିମ ସୋମନାଥ ମନ୍ଦିର ସମୂହ, ବଲାଙ୍ଗୀର ଜିଲ୍ଲାର ରାଣୀପୁର-ଝରିଆଳ ଐତିହ୍ୟ ସଂକୁଳ ଏବଂ କଳାହାଣ୍ଡି ଜିଲ୍ଲାର ଅସୁରଗଡ଼ ଦୁର୍ଗସ୍ଥିତ ପ୍ରାଚୀନ ଐତିହ୍ୟ ସ୍ଥଳୀର ବିକାଶ,ସଂରକ୍ଷଣ ଓ ସୌନ୍ଦର୍ଯ୍ୟବର୍ଦ୍ଧନ କାର୍ଯ୍ୟକୁ ଶୁଭାରମ୍ଭ କରିଛନ୍ତି ।

ଏହି କାର୍ଯ୍ୟକ୍ରମରେ କେନ୍ଦ୍ର ପେଟ୍ରୋଲିଅମ, ପ୍ରାକୃତିକ ବାଷ୍ପ, ଦକ୍ଷତା ବିକାଶ ତଥା ଉଦ୍ୟମିତା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଶ୍ରୀ ଜୁଏଲ ଓରାମ, ରାଜ୍ୟପାଳ ପ୍ରଫେସର ଗଣେଶୀ ଲାଲ , ବିରୋଧୀ ଦଳ ନେତା ତଥା ବିଧାୟକ ନରସିଂହ ମିଶ୍ର, ସାଂସଦ କଳିକେଶ ନାରାୟଣ ସିଂହଦେଓ ,ମନ୍ତ୍ରୀ ସ୍ନେହାଙ୍ଗିନୀ ଛୁରିଆ  ପ୍ରମୁଖ ଯୋଗ ଦେଇଥିଲେ ।